1 АХИЯ

¹ Жашау Сёзню юсюнден, башындан башлап болгъанны, бизни эшитгенибизни, кеси кёзлерибиз бла кёргенибизни, къарагъаныбызны эм бизни къолларыбыз тийип сезгенни билдиребиз. ² Жашау ачыкъ кёрюннгенди, биз аны кёрдюк эмда анга шагъатлыкъ этебиз. Атада болуп бизге кёрюннген ёмюрлюк Жашауну сизге билдиребиз. ³ Сизни да бизни бла бирикмеклигигиз болур ючюн, биз кёргенибизни эм эшитгенибизни сизге билдиребиз. Бизни бирикмеклигибиз да Ата бла эм Аны Уланы Масих Исса блады. ⁴ Сизни къууанчыгъыз толу болур ючюн, быланы сизге жазабыз. ⁵ Сора ма, биз Андан эшитген эм сизге билдирген Хайыр Хапар: Аллах жарыкъды, Анда бир тюрлю къарангылыкъ жокъду. ⁶ Бизни Аны бла бирикмеклигибиз барды деп айтып, къарангыда жюрюй эсег’а, биз ётюрюк айтабыз эм хакъ кертиге кёре жашамайбыз. ⁷ Аны жарыкъда болгъаны кибик, жарыкъда жюрюй эсег’а, бир-бирибиз бла бирикмеклигибиз барды эм Аны Уланы Масих Иссаны къаны бизни хар гюняхдан тазалайды. ⁸ Гюняхыбыз жокъду дей эсег’а, кесикесибизни алдайбыз эм бизде хакъ керти жокъду. ⁹ Гюняхларыбызны айтып ачыкъ эте эсек а, сора, Ол ышаннгылы эм тюзлюклю болгъаны себепли, бизни гюняхларыбызны кечер эмда бизни хар тюрлю аманлыкъдан тазалар. ¹⁰ Биз гюнях этмегенбиз дей эсег’а, сора Аны ётюрюкчю этебиз эм бизде Аны сёзю жокъду.

¹ Сабийлерим! Быланы сизге сиз гюнях этмез ючюн жазама; гюнях этген адам бар эсе уа, тюзлюклю Масих Исса Атаны аллында бизни Ёкюлюбюздю. ² Ол бизни гюняхларыбызны эм жаланда бизни гюняхларыбызны тюйюл, алай а битеу дунияны гюняхларын да кечдирген къурманды. ³ Биз Аны таныгъаныбызны уа Аны фарызларын тутханыбыздан билебиз. ⁴ «Мен Аны таныйма», – деп, алай а Аны фарызларын тутмагъан адам, ол ётюрюкчюдю эм анда хакъ керти жокъду; ⁵ Аны сёзюн тутхан адамда уа Аллахны сюймеклиги керти тамам болгъанды: биз Анда болгъаныбызны уа, муну бла билебиз. ⁶ „Жашауум Аллахдады“ деген адам Исса жюрюген жолда жюрюрге керекди. ⁷ Сюйюлюннгенле! Сизге жангы фарыз жазмайма, алай а ауалдан сизде болгъан буруннгу фарызны жазама; буруннгу фарыз а ол сиз алгъындан эшитген сёздю. ⁸ Алай а аны юсюне жангы фарыз да жазама сизге. Муну хакъ керти болгъаны Масихде да, сизде да кёрюнеди. Нек десегиз къарангылыкъ кетеди, керти жарыгъ’а энди жарыйды. ⁹ Жарыкъдама деп айтып, къарындашын а кёрюп болмагъан адам энтда къарангылыкъдады. ¹⁰ Къарындашын сюйген адам жарыкъда турады эм башхаланы абындырмайды. ¹¹ Къарындашын кёрюп болмагъан адам а къарангылыкъдады эм къарангыда жюрюйдю, къайры баргъанын да билмейди; нек десегиз къарангылыкъ аны кёзлерин сокъур этгенди. ¹² Сабийле, сизге жазама, нек десегиз Аны атыны хурметинден сизни гюняхларыгъыз кечилгендиле. ¹³ Атала, сизге жазама, нек десегиз сиз башланнгандан бери Болуп Тургъанны таныгъансыз. Жашла, сизге жазама, нек десегиз сиз ибилисни хорлагъансыз. Балала, сизге жазама, нек десегиз сиз Атаны таныгъансыз. ¹⁴ Атала, мен сизге жазгъанма, нек десегиз сиз башланнгандан бери Болуп Тургъанны таныгъансыз. Жашла, мен сизге жазгъанма, нек десегиз сиз кючлюсюз, Аллахны сёзю сизде жашайды, сиз ибилисни да хорлагъансыз. ¹⁵ Бу дунияны да, бу дунияда болгъан затланы да сюймегиз, бу дунияны сюйген адамда Атаны сюймеклик жокъду. ¹⁶ Нек десегиз битеу бу дунияда болгъан: гюняхлы табийгъатны талпыгъаны, кёзлени талпыгъаны эмда жашау ёхтемлик Атадан тюйюлдюле, алай а бу дуниядандыла. ¹⁷ Бу дуния да, аны талпыгъаны да озуп кетеди, Аллахны буйругъун толтургъан а ёмюрде да жашайды. ¹⁸ Балала! Ахыргъы заманды. Эмда Масиххе къаршчы келликди деп, сиз эшитгенигиз кибик, энди уа Масиххе къаршчыла кёп чыкъгъандыла. Ахыргъы заман болгъанын а биз андан билебиз. ¹⁹ Ала бизден чыкъгъандыла, алай а бизникиле тюйюл эдиле; нек десегиз ала бизникиле болсала эди, бизни бла къалыр эдиле. Алай а аланы бизден чыкъгъанлары ала бири да бизни болмагъанын кёргюзтгенди. ²⁰ Алай а сиз Сыйлы Нюрден майланнгансыз эм нени да билесиз. ²¹ Мен сизге сиз хакъ кертини билмейсиз деп жазмагъанма, алай а сиз аны билесиз, бир ётюрюк да хакъ кертиден болмагъанын билесиз деп жазгъанма. ²² Иссаны Масих болгъанын къабыл этмей къойгъан адам ётюрюкчю тюйюл эсе, ётюрюкчю кимди? Атаны да, Уланын да къабыл этмеген Масиххе къаршчы олду. ²³ Уланын ачыкъ къабыл этмеген хар ким Атадан да къуруду, Уланын ачыкъ къабыл этген адамда уа Ата да барды. ²⁴ Алай бла, ауалдан эшитгенигиз сизде болуп турсун; ауалдан эшитгенигиз сизде болуп турса уа, сора сиз да Уланда эм Атада болуп турурсуз. ²⁵ Масихни ант сёз бла бизге берирге айтханы уа ёмюрлюк жашауду. ²⁶ Мен быланы сизни терилтгенле ючюн жазгъанма. ²⁷ Алай а, сиз Масихден алгъан майланыу сизде болуп турады эм сизни киши юйретир кереклигиз да жокъду; алай а сизни хар неге да юйретген ол майланыу жалгъан тюйюл, керти болгъаны себепли, ол сизни юйретгени кибик, Масихде болуп туругъуз. ²⁸ Энди уа, сабийле, Масихде туругъуз; Ол кёрюннген заманда, бизни таукеллигибиз болсун эм, Ол келгенде, Аны аллында айыплы болмайыкъ. ²⁹ Сиз Аны тюзлюклю болгъанын биле эсегиз, тюзлюк этген хар ким Андан туугъанын да билигиз.

¹ Къарачыгъыз, бизге Аллахны сабийлери аталыр ючюн, Ата бизни къалай бек сюйгенди! Керти да алайбыз. Дуния Аны танымагъаны себепли, бизни да танымайды. ² Сюйюлюннгенле! Биз энди Аллахны сабийлерибиз, алай а не боллугъубуз алыкъа ачыкъ болмагъанды. Масих ачылгъан заманда Аны кибик боллугъубузну билебиз анса; нек десегиз Аны болгъаны кибик кёрлюкбюз. ³ Эм Масиххе бу ышаныуу болгъан хар адам, Масих таза болгъаны кибик, кесин тазалайды. ⁴ Гюнях этген хар адам законсузлукъ этеди; гюнях законсузлукъду. ⁵ Масих бизни гюняхларыбызны Кесини боюнуна алыр ючюн келгенин эм Анда гюнях болмагъанын сиз билесиз. ⁶ Анда болуп тургъан адам гюнях этмейди; гюнях этиучю адам Аны кёрмегенди эм Аны танымагъанды. ⁷ Сабийле! Сизни бир киши да терилтмесин. Масих тюзлюклю болгъаны кибик, тюзлюк этген адам да тюзлюклюдю. ⁸ Гюнях этген адам ибилисденди; нек десегиз бек алгъа ибилис гюнях этгенди. Ол себепден а Аллахны Уланы ибилисни ишлерин бузар ючюн келгенди. ⁹ Аллахдан туугъан адам гюнях этмейди, нек десегиз Аны урлугъу ол адамда болуп турады; Аллахдан туугъаны себепли ол гюнях этерге болаллыкъ тюйюлдю. ¹⁰ Аллахны сабийлери эм ибилисни сабийлери былай таныладыла: тюзлюк этмеген эм кесини къарындашын сюймеген ким болсада Аллахдан тюйюлдю. ¹¹ Нек десегиз сиз алгъындан эшитген хапар ма буду: бир-бирибизни сюейик. ¹² Ибилисден болуп, кесини къарындашын ёлтюрген Къабил кибик болмайыкъ. Аны уа не ючюн ёлтюргенди? Кесини ишлери аман болгъаны ючюн, къарындашыны ишлери уа тюзлюклю болгъаны ючюн ёлтюргенди. ¹³ Къарындашларым, дуния сизни кёрюп болмай эсе, мынга сейирсинмегиз. ¹⁴ Биз, къарындашларыбызны сюйгенибиз ючюн, ёлюмден жашаугъа кёчгенибизни билебиз. Къарындашын сюймеген ёлюмде къалады. ¹⁵ Кесини къарындашын сюймеген хар адам адам ёлтюрюучю мурдарды; адам ёлтюрюучюню уа кесинде болуп тургъан ёмюрлюк жашауу болмагъанын сиз а билесиз. ¹⁶ Биз сюймекликни не болгъанын Масих бизни ючюн Кесини жанын бергенинден ангылайбыз. Биз да къарындашларыбыз ючюн жаныбызны аямазгъа керекбиз. ¹⁷ Бу дунияда жетишимлиги болуп, кесини къарындашыны уа керекли болгъанын кёрюп, андан кесини жюрегин жапхан адамда уа Аллахны сюймеклиги къалай болур? ¹⁸ Сабийлерим! Сёз бла неда тил бла тюйюл, алай а иш бла эм кертилик бла сюейик. ¹⁹ Алай бла биз хакъ кертиден болгъаныбызны билебиз эм бизни жюрегибиз бизни терслей эсе да, Аллахны аллында жюреклерибизни ырахат этебиз. ²⁰ Нек десегиз Аллах бизни жюрегибизден уллуду эм барын да биледи. ²¹ Сюйюлюннгенле! Бизни жюрегибиз бизни терслемей эсе, бизни Аллахха жууукълашыргъа таукеллигибиз барды ²² Эм не тилесек да, Андан аллыкъбыз, нек десегиз Аны фарызларын тутабыз эмда Ол ыразы болгъан затланы этебиз. ²³ Аны фарызы уа буду: биз Аны Уланы Масих Иссаны атына ийнаныргъа эм, Ол бизге фарыз этгени кибик, бир-бирибизни сюергеди. ²⁴ Аллахны фарызларын тутхан адам, Аллахда жашайды, Аллах да ол адамда жашайды. Аллах бизде жашагъанын, Ол бизге берген Нюрден билебиз.

¹ Сюйюлюннгенле! Хар тюрлю нюрге ийнанып къалмагъыз, алай а нюрлени Аллахдан болгъанларын сынагъыз. Нек де сегиз дунияда кёп жалгъан файгъамбарла чыкъгъандыла. ² Аллахны Нюрюн былай билигиз: адам чархы бла келген Масих Иссаны ачыкъ къабыл этген нюр Аллахданды. ³ Чархы бла келген Масих Иссаны ачыкъ къабыл этмеген нюр а Аллахдан тюйюлдю, алай а ол Масиххе къаршчыны нюрюдю. Сиз аны келлигин эшитгенсиз, ол а энди бу дуниядады. ⁴ Сабийле! Сиз Аллахдансыз эм жалгъан файгъамбарланы хорлагъансыз; нек десегиз Ол сизде болгъан, бу дунияда болгъандан уллуду. ⁵ Ала бу дуниядандыла, аны себепли бу дуния айтханча айтадыла, бу дуния да алагъа тынгылайды. ⁶ Биз Аллахданбыз; Аллахны таныгъан бизге тынгылайды; Аллахдан болмагъан адам бизге тынгыламайды. Хакъ кертини Нюрюн эмда ажашыуну нюрюн а аны бла айырып таныйбыз. ⁷ Сюйюлюннгенле! Бир-бирибизни сюейик; нек десегиз сюймеклик Аллахданды, сюймеклиги болгъан хар адам Аллахдан туугъанды эм Аллахны таныйды. ⁸ Сюймеген адам, Аллахны танымайды, нек десегиз Аллах сюймекликди. ⁹ Аллах бу дуниягъа Кесини жангыз Уланын, биз Аны юсю бла жашау алыр ючюн ийгени бла, Аллахны сюймеклиги бизге ачылгъанды. ¹⁰ Аллахны биз сюймегенбиз, алай а бизни Ол сюйгенди эм бизни гюняхларыбызны кечдирген къурманнга Кесини Уланын ийгенди; сюймеклиг’а ма олду. ¹¹ Сюйюлюннгенле! Аллах бизни алай сюйген эсе, сора биз да бир-бирибизни сюерге керекбиз. ¹² Аллахны бир киши бир заманда кёрмегенди. Биз бир-бирибизни сюе эсег’а, сора Аллах бизде жашайды, Аны сюймеклиги да бизде толу барды. ¹³ Биз Анда жашагъаныбызны, Ол да бизде жашагъанын, Ол бизге Кесини Нюрюнден бергени бла билебиз. ¹⁴ Ата Уланын Къутхарыучу этип дуниягъа ийгенин биз кёргенбиз эм мынга шагъатлыкъ этебиз. ¹⁵ Исса Аллахны Уланы болгъанын ким ачыкъ къабыл этсе, Аллах ол адамда, ол да Аллахда жашайды. ¹⁶ Биз да Аллахны бизге болгъан сюймеклигин билгенбиз эм ол сюймекликге ийнаннганбыз. Аллах сюймекликди, сюймекликде жашагъан адам Аллахда жашайды, Аллах да ол адамда жашайды. ¹⁷ Сюймеклик бизде алай толулукъгъа жетгенинден, бизни къыямат кюннге таукеллигибиз барды; нек десегиз Масих къалай эсе, биз да дунияда алайбыз. ¹⁸ Сюймекликде къоркъуу жокъду, алай а толу сюймеклик къоркъууну къыстайды. Нек десегиз къоркъууда азап барды; къоркъгъан адам сюймекликден жетишимли тюйюлдю. ¹⁹ Биз сюебиз, нек десегиз Аллах бизни алгъа сюйгенди. ²⁰ «Мен Аллахны сюеме», – деп кесини къарындашын а кёрюп болмагъан адам ётюрюкчюдю. Нек десегиз кесини кёре тургъан къарындашын сюймеген ол кеси кёрмеген Аллахны уа къалай сюяллыкъды? ²¹ «Аллахны сюйген кесини къарындашын да сюйсюн» деген фарызны биз Масихден алгъанбыз.

¹ Иссаны Масих болгъанына ийнаннган хар адам Аллахдан туугъанды. Туудургъанны сюйген хар адам Андан туугъанны да сюеди. ² Биз Аллахны сабийлерин сюйгенибизни уа, Аллахны сюйюп, Аны фарызларын тутханыбыздан билебиз. ³ Нек десегиз биз Аны фарызларын тутсакъ, ол Аллахны сюймекликди. Аны фарызлары уа къыйын тюйюлдюле. ⁴ Нек десегиз Аллахдан туугъан хар адам бу дунияны хорлайды. Бу дунияны хорлагъан бу хорлауубуз а бизни ийманыбызды. ⁵ Исса Аллахны Уланы болгъанына ийнаннган адамдан башха ким хорлайды бу дунияны? ⁶ Ол суу бла эм къан бла Келген Масих Иссады. Жангыз суу бла тюйюл, алай а суу бла эм къан бла келгенди. Анга шагъат лыкъ этген Нюрдю; нек десегиз Нюр хакъ кертиди. ⁷ Нек десегиз кёкде шагъатлыкъ этгенле ючдюле: Ата, Сёз, Сыйлы Нюр. Быланы ючюсюню да болуму бирди. ⁸ Жерде да шагъатлыкъ этгенле ючдюле: Нюр, суу, къан. Была ючюсю да бир затны юсюнден шагъатлыкъ этедиле. ⁹ Биз адамны шагъатлыгъын къабыл эте эсек, Аллахны шагъатлыгъы уа андан уллуду; нек десегиз ол а Аллах Кесини Уланыны юсюнден этген шагъатлыкъды. ¹⁰ Аллахны Уланына ийнаннганны кесини кесинде шагъатлыгъы барды. Аллахха ийнанмагъан, Аны ётюрюкчю сунады; нек десегиз Аллах Кесини Уланыны юсюнден этген шагъатлыкъгъа ийнанмагъанды. ¹¹ Бу шагъатлыкъ мындан болады: Аллах бизге ёмюрлюк жашау бергенди, бу жашау а Аны Уланындады. ¹² Аллахны Уланы анда бар болгъанны жашауу барды, Аллахны Уланы анда болмагъанны жашауу жокъду. ¹³ Мен быланы сизге, Аллахны Уланыны атына ийнаннганлагъа, Аллахны Уланына ийнаныуугъуз бла, сизни ёмюрлюк жашауугъуз болгъанын сиз билир ючюн жазгъанма. ¹⁴ Ма, бизни Аны аллында къаллай таукеллигибиз барды: Аны буйругъуна кёре, биз Андан не тилесек да, Ол бизге тынгылайды. ¹⁵ Биз Андан не тилесек да, Ол бизге тынгылагъанын билгенибизге кёре уа, Андан тилегенлерибизни алгъаныбызны да билебиз. ¹⁶ Къарындашы ёлюмге тийишли болмагъан гюнях этгенин кёрген адам, аны ючюн тилек этсин; Аллах да ёлюмге тийишли болмагъан гюнях этген къарындашха жашау берир. Барды ёлюмге тийишли гюнях, аны ючюн тилек этсин демейме. ¹⁷ Хар тюрлю аман иш гюняхды, алай а ёлюмге тийишли болмагъан гюнях да барды. ¹⁸ Аллахдан туугъан адам гюнях этмегенин биз билебиз; алай а Аллахдан туугъан Масих аны сакълайды, ибилис анга тиймейди. ¹⁹ Биз Аллахдан болгъаныбызны эм битеу дуния ибилисни оноуунда тургъанын билебиз. ²⁰ Эмда Аллахны Уланы келип, биз хакъ керти Аллахны билир ючюн бизге акъыл бергенин билебиз. Биз хакъ керти Аллахдабыз эмда Аны Уланы Масих Иссадабыз. Ол а хакъ керти Аллахды эм ёмюрлюк жашауду. ²¹ Сабийле! Кесигизни идолладан сакълагъыз. Амин.