Pilipi

Surat di Paulus

Kumaa sid Jemaat dot

Filipi

Popela’an

Iti surat diti, tinulis di Paulus kumaa sid jemaat dot Filipi. Inot jemaat dot Filipi dino, jemaat dit niingkakat mogulu di Paulus sid Eropah. Inot kota dot Filipi dino, nokeeyon sid negeri dot Makedonia, iso ot wilaya dit noporinta dot Ruum tiya diri. Iti surat diti, tinulis di Paulus namot dit sid jiil yalo. Osusa ot ginawo dialo, tu warot tongo ponginjil dot lumawan doo, om warot monuduk dot tudukan do kapalid sid jemaat dot Filipi. Nga ugu poma diri, nga iti surat diti, noponu dot katamanan om tarapan di Paulus, tu apatog it koosipan yo sid di Yesus Kristus.

It tomodon babanar di Paulus monulis ditit surat diti, monorimakasi yalo dit tongo baabalanja dit jemaat dot Filipi sid kondiri yo tiya dit nokosipan yalo. Om momuransang yalo sâambil dit jemaat diri, supaya matog it koosipan doalo (Flp 1:25), om supaya osiow om ataan, dot nokuro ong sid saralom poma do kosusa’an.

Suwang

Salam do kotimpuunan: 1:1-11

Otomon i Paulus: Nokuro ong sid jiil poma yalo nga kakal-i ogumu ot tulun dot korongow dit Tabar Tawasi: 1:12-26

Puakal-akal dit aaluk dang tulun Kristian: Mi’iso om pensiba dit kondiri irad-ko i Kristus: 1:27–2:18

Kikiro’on di Paulus pooli i Timotius om i Epafroditus sid Filipi: 2:19-30

Tiag supaya amu maya dit tongo guru dit maamalid dot jemaat: 3:1–4:9

Monorimakasi i Paulus sid jemaat dot Filipi baagi dit tongo baabalanja dit nitaak sid doo: 4:10-20

Salam dot kopupuson: 4:21-23

Salam do Kotimpuunan

¹Iti surat diti mantad sid dagay, i Paulus om i Timotius, it sompi turipon di Kristus Yesus. Iti surat diti, irikot ya sid kikiawi it umat sid Filipi, it nokeeso di Kristus Yesus, om it ponotua om it tongo diaken sid jemaat. 1:1 Kis 16:12

²Kososogit konow sid saralom dit kosianan om koosayan do Kinoringan it Tama tokow om i Tuhan Yesus Kristus.

Doa di Paulus Baagi dit Jemaat dot Filipi

³Monorimakasi oku sid Kinoringan ku moninikid dot aandaman ku ikoo. ⁴Om titikid dot momintaduwa oku dikoo kikiawi, otôomon oku nopo mintaduwa, ⁵tu nakatabang kow dogon paabar dit Tabar Tawasi, mantad dit tinumimpuun kow nogi mimoyo sampay itit maakaa. ⁶Om ayakin oku dot pongoyon-i do Kinoringan it gagama’on tawasi dit notimpuunan Dialo sid ginawo duyu, mising-korikot dit Tadlaw dit Korikatan Kembagu di Kristus Yesus. ⁷Andang-ko aaluk no babanar dot anggapon ku ikoo dot awasi kow, tu amu kow tumanus sid pangandaman ku. Nokosokubang kow sid tugas dit nitaak do Kinoringan sid dogon, ii-ka it tiya dit sitid jiil oku, keenong it tiya dit posintor om pabanar oku dit Tabar Tawasi. ⁸I Kinoringan ot sasi ku dot babanar-ko lumangad oku dikoo kikiawi ugu-ko it langad di Kristus Yesus dit amu mongoyuu dikoo.

⁹Iti no ot tonsi dit pintaduwa ku: supaya makin rumalom it pongila’an om pongoorotiyan duyu sid gama mitotoluod, ¹⁰sampay eelo kow misomili dit nunu it awasi. Osusi kow nôono om asot karaatan duyu mising-korikot dit Tadlaw dit Korikatan Kembagu di Kristus. ¹¹Om mintaduwa oku po supaya monguwa it koposiyon duyu do kowosian. It tuwa diri ot tasil dit ginama di Kristus Yesus sid kondiri duyu, supaya insawatan om royo’on dot tulun i Kinoringan.

Kososiyan di Paulus sid Saralom dot Jiil

¹²Oy koobpineeyan ku, awasi dara dot ela’an duyu, dot it nabambaran ku diti ot kasasabap dot sumurut tumanjag it Tabar Tawasi. ¹³Om oorotiyan banar dit tongo maangajaga dit istana om it kikiawi it tulun wookon, dot kojijiil ku nopo diti nga pinolombus dit Tabar Tawasi ontok-ko i Kristus. 1:13 Kis 28:30 ¹⁴Pagka norongow dit tongo koobpineeyan it kinowowoyo’on ku sid jiil, neempapagan it koosipan doalo sid di Tuhan sampay amu no rumosi, ino-i-nga sumiow nogi patanjag dit boros do Kinoringan.

¹⁵Andang warot piipiro koyuwan doalo ot paabar di Kristus tu dumangki dogon om eengin mokingangaran. Nga waro-i it wookon ot paabar di Kristus dot babanar-ko mantad sid kotulido do ginawo. ¹⁶Yoalo dino paabar di Kristus tu otoluod, tu ela’an doalo dot nopili oku do Kinoringan dot posintor dit Tabar Tawasi. ¹⁷Nga it tulun wookon, paabar di Kristus dot amu awasi ot tomodon, tu monokiagil-agil nôopo. Panantaman doalo ong kodurun dogon dot asansara sitid jiil. ¹⁸Nga amu-i mongunguro! Otomon oku-i, ong syukur yabar i Kristus dot kukuro nopo ot gama, ii-ka it araat ko it awasi ot tomodon.

Om tumilombus oku-i tumomon, ¹⁹tu ela’an ku-i dot kukûuro nopo ot kosungguwon dit kikiawi diti, nga polobuson oku-i mantad sid jiil, tu it pipintaduwa’an oku dikoo om it tutulungan oku dit Tatod Tosusi di Yesus Kristus. ²⁰Tu ino no ot jajangka’on ku om ararapon ku: Amu oku agagal papanaw dit tugas ku om amu oku omomoluan sid tinoguwangon do Kinoringan, ino-i-nga kosoromo oku ugu-ko it koobasan, supaya matay miyaw oku nga eensawatan i ngaran di Kristus sid nunu nopo ot aajangan ku. ²¹Tu it miyaw oku diti, dang Kristus itit koposiyon ku; nga ong it patayon oku, koontungan ku. ²²Nga ong it miyaw oku sitid pomogunan diti, ogumu po ot gama’on dot ki-guna dot adapat ku mamaal. Jadi amu ku otontuan dot siombo ot pilion ku. ²³Opidsalang oku momili dot siombo tiso pilion ku: Banar-ko eengin oku dara matay om rumunggum di Kristus, tu ino dino, lobi po awasi. ²⁴Nga oporolu oku po dot miyaw sitid pomogunan supaya kotulung oku dikoo. ²⁵Ayakin oku dit hal diri. Jadi ela’an ku dot inaru po do Tuhan ot sukud ku tu monulung dikoo, supaya matog kow om tumomon kow sid saralom dit koosipan. ²⁶Tu ong kalabus oku mantad sitid jiil om koguli oku sinod dikoo, ingko-mamakin po dit paangarayow duyu di Kristus Yesus pasal dogon.

²⁷Kukukuro nopo, subay-ko kopionong dit bubuatan duyu om it Tabar Tawasi ontok-ko i Kristus, supaya aaluk kow dot raayat sid Karajaan do Surga. Tu ong korikot oku nga okitanan ku-i, om aa-ku poma korikot nga orongow ku-i ot tabar dot apatog kow-i sumintor om mitatabang posurut dit koosipan mantad sid Tabar Tawasi, dot iso no ot tomodon om miseeso ot ginawo. ²⁸Sâabat poma nga kada kow rumosi dit tongo lawan duyu. Tu ong osiow kow, ino no ot tanda sid doalo dot obinasa yoalo, om ikoo asalamat. Kikiawi dino, mantad sid Kinoringan, ²⁹tu minangan kow suulaydo Kinoringan dot okon-ko gisom mimoyo kow di Kristus, ino-i-nga sumansara kow pasal Dialo. ³⁰Maakaa dino, kasandad kow no dogon sid kasansara’an pasal di Kristus, ugu-ko it nokito duyu mâantad sid dogon di gûulu, om iti maakaa nga orongow duyu-i. 1:30 Kis 16:19-40

Mi’iso om Monginsiba dit Kondiri dot Irad-ko i Kristus

¹Neempapagan it ginawo duyu tu mini’iiso kow di Kristus. Neensasamadan kow, tu toluodon kow di Kristus. Sosompi ki-Tatod Tosusi sid ginawo duyu, om, ong koduton it poo do gibang, opurimanan dot poo do wanan, om misisianan kow. ²Pagka ugu dino, potomono duyu no iti ginawo ku dot aawi-awi, dot mi’iiso pongitungan, mitotoluod, iseeso ot ginawo om iseeso ot tomodon. ³Kada kow no mamaal dot nunu nopo ot kosuulan dit kondiri, keenong mokirayow dot aso koonongo. Gaam-ko, gama dot koosiba do ginawo, itungo duyu no dot it tulun wookon lobi po awasi mantad-ko it kondiri duyu. ⁴Kada kow no mongitung dot subay-ko it dikoo no dot kenginan ot woyo’on, ino-i-nga subay itungon duyu it dang wookon dot kenginan om koporoluan.

⁵Tiruwanay duyu no it bubuatan di Kristus Yesus, tu:

⁶Sabanar no, Kinoringan-i babanar i Yesus,

nga amu Yo-i nisintor it koKinoringano Yo dino,

⁷ino-i-nga niwiliw Yo it kikiawi dino,

om jinumadi dot turipon,

om nosinorung koolun.

⁸Nokoriniba no Yalo,

niinsiba’an Yo po babanar it kondiri Yo,

om otuboyo do Kinoringan sampay minatay,

dot sid salip nogi ot kinapatayon. 2:8 dot sid salip nogi ot kinapatayon: Kamaamalu babanar ot kapatayan sid salip. Tu, tiya dit zaman di Yesus, ii-no tulun dit agayo babanar ot kasala’an om it aso pangkat ot mangan posolipo ot gama mamatay. Nga ong warga dot Ruum, agayo poma ot kasala’an nga amu-i mangan posolipo.

⁹Ino no ot sabap dot,

ninsawatan babanar do Kinoringan i Yesus,

om tinaakan Yo i Yesus

dot ngaran om pangkat,

dot asawat mantad-ko it kikiawi ot ngaran om pangkat,

¹⁰supaya it nunu nopo it eelo sumamba,

it tongo winangun sid tawan om sid soribaw dot tana

om it sid saralom dot tana om sid namatay, 2:10 sid saralom dot tana om sid namatay Harfiah: sid saralom dot tana. Komoyoon, it tongo rogon dit miyon sid tana om it tongo namatay. Tu it panganggapan dot tulun, it pomogunan dit tongo namatay, sid saralom dot tana.

sumingkotud kikiawi dot sumamba di Yesus,

¹¹om mamangakun kikiawi it eelo momoros dot,

“I Yesus Kristus no ot Tuhan,” ka, 2:10-11 Yes 45:23 (LXX)

supaya eensawatan i Kinoringan it Tama.

Poowa’o No it Koposiyon Duyu

¹²Oy tongo koobpineeyan ku dit aa-ku koyuuan, ela’an ku dot ataat kow sid Kinoringan sampay maakaa. Jadi, pagka tu nasalamat kow no, poowa’o duyu no it koposiyon duyu 2:12 poowa’o duyu no it koposiyon duyuHarfiah: pagama’o duyu no it kasalamatan duyu. It komoyoon di Paulus sid ayat diti, subay porila’on tokow i Kinoringan momorisi dit koposiyon tokow. Asal mimoyo tokow di Yesus, asalamat tokow no, nga titikid tadlaw mangan tokow susiay do Kinoringan, mising-korikot di Tuhan Yesus keenong orikot ot matay tokow. Korikot po i Tuhan Yesus, keenong matay tokow po, om osompurna tokow nogi. Komoyoon, syukur ong atatap tokow sid Tuhan Yesus, matay tokow poma sobolum korikot i Tuhan Yesus nga osompurna tokow-i. meed dot rumosi om rumonok kow do Kinoringan, dot okon-ko tiya no dit muurunggum oku dikoo, ino-i-nga itit nokotongkiyad oku poma dikoo. ¹³Tu i Kinoringan ot gumama sid ginawo duyu, supaya it kenginan om it gagama’on duyu maya dit kenginan do Kinoringan.

¹⁴Gama’o duyu no it kikiawi dot aso song-totongur om migaga, ¹⁵supaya aso karaatan duyu om opulang ot ginawo duyu. Pagka tu tongo tanak kow do Kinoringan, subay-ko aso poniagan duyu dot korunggum kow poma dit tulun dit ongo-rara’at om napalid. Om subay-ko ki-binaang kow sid doalo, ugu-ko it tongo rombituon sid tawan, ¹⁶tu polombus kow sid doalo dit boros dot kapasi. Ong ugu kow dino, otomon oku pasal dikoo sid Tadlaw dit Kogulian di Kristus, tu okitanan Yo dot okon-ko porosuma it gama ku mising-uyan om matay-patay kumaraja.

¹⁷It koosipan duyu om it gama duyu mangalayan Dialo, irad-ko korban dot isamba sid Kinoringan. Jadi, nokuro ong korundun oku poma dit korban dit nisamba duyu – komoyoon, nokuro ong matay oku poma sid tugas ku – nga kakal-i dot otomon oku om maya oku dikoo tumomon. ¹⁸Irad po dino, ikoo nga aaluk-i dot tumomon, om waya kow no dogon tumomon.

Monuu i Paulus di Timotius om i Epafroditus sid Filipi

¹⁹Aarap oku dot, ong syukur kenginan di Tuhan Yesus, kadapat oku monuu talangkas di Timotius sid dikoo, supaya asanang itit ginawo ku korongow dit tabar duyu. ²⁰Tu asot îisot koruang ku dot irad-ko i Timotius, tu yalo no ot koogu do ginawo ku, om babanar-ko mongowii dikoo. ²¹Tu it wookon, okowii nogi ot monukup dit kondiri yo, om tolikudan it kenginan di Yesus Kristus. ²²Ela’an duyu no dot it kosotia’an di Timotius dino, noombalan no mâantad, tu it tinumabang yalo dogon mangaabar dit Tabar Tawasi, ugu-ko it gama dit tanak tumabang dit tama yo. ²³Pagka tu ugu dino, asal ela’an ku dot okukuro ot koputusan dot pongukuman sid dogon, poongoyon ku no yalo sid dikoo. ²⁴Ayakin oku banar dot tulungan oku di Tuhan, supaya kokondiri oku talangkas sinod dikoo.

²⁵Om pasal dit tobpinee tokow, i Epafroditus, it sinuu duyu mongoy siti dot monulung dogon, babanar-ko noko’uup yalo dogon. Yalo dino, koruang ku dot irad-ko soojar sid di Kristus. Nga opurimanan ku dot oporolu dot suuon ku gumuli talangkas sinod dikoo, ²⁶tu lumangad banar yalo dikoo kikiawi, om osusa banar i ginawo doo dit norongow duyu dot sumakit yalo.

²⁷Andang babanar-i-ko sinumakit yalo om ogon-ogon pong minatay. Nga sinianan yalo do Kinoringan om liningasan-i, nga okon-ko gisom yalo no ot sinianan do Kinoringan, yoku nga sinianan-i, supaya amu oku sumagayan mogilunguy ong matay yalo. ²⁸Ino no ot koponuuan ku talangkas dialo poguli sinod dikoo, supaya kadung okito duyu yalo, osuaw kow, om oliong it tangkangaw ku. ²⁹Jadi, insomungo duyu no yalo ugu-ko tobpinee duyu sid Tuhan, dot aawi-awi ot katamanan duyu. Om orumato no it tongo tulun dit ugu-ko yalo. ³⁰Tu ogon po ong minatay i Epafroditus dino, dot daagan dialo gumama dit gagama’on di Kristus. Ginumoos yalo dot kapatay kowiyaw nga monulung dogon, ombo it amu duyu adapat.

Kotutun om Kopiiso di Kristus, Agayo ot Koontungan Mantad dit Nunu Nopo

¹Jadi suway mantad dino, oy tongo koobpineeyan ku, tomon kow no tu nokeeso kow no di Tuhan. Amu oku awagatan monunsurut monulis dot ugu diti, tu iti diti, mongimpatog dit koosipan duyu. ²Tandayay duyu no it tongo guru dit maamalid! Tu yoalo dino, ugu-ko it tasu dit koosomu! Monuduk yoalo sid tulun dit okon-ko Yahudi dot amu asalamat kabarasan ong amu no osunatan. 3:2 Monuduk yoalo sid tulun dit okon-ko Yahudi dot amu asalamat kabarasan ong amu no osunatan. Harfiah: Tandayay duyu no it tongo moongorutad dot tonsi. 3:2 Gal 2:12; 5:12; Tit 1:10; Kis 15:1, 2 ³Dot sabanar no, itokow no diti ot tongo Kristian dit ki-sunat dot ataatantu sid suwang do ginawo; okon-ko yoalo. 3:3 tongo Kristian dit ki-sunat dot ataatantu sid suwang do ginawo: Dot nidu it bubuatan dot tulun dit andang-âandang nga ki-duso (intangay sid Kol 2:11). Tu itokow diti, kadung sumamba tokow do Kinoringan, tulungon tokow dit Tatod Yo, om i Kristus Yesus no ot pokiraya’an tokow, om amu mangarap dit daton kondiri dot buwag. ⁴Dot ong babanar no, yoku nga waro-i ot pawaya’an ku mangarap dit dogon kondiri dot buwag. Tu ong warot tulun wookon dot manantam ong kadapat yalo mangarap dit doo kondiri dot buwag, osusundur oku po do-yoku. ⁵Tu sinunatan oku tiya dit sominggu ot tumur ku, mionong dit Tukum di Musa. 3:5 Tu sinunatan oku tiya dit sominggu ot tumur ku, ... Harfiah: tadlaw kawalu. Tu ong it gama doalo mongitob, keetob no it tadlaw dot kinosusuwan. Nga ong itokow ot mongitob, it tarati dino, sominggu mantad dit kinosusuwan. Om antad oku sid bansa dot Israel, suku oku di Benyamin, balagasan oku dot Ibrani. 3:5 Ibrani: Israel, Yahudi om Ibrani, tolu ot pongoreetan nga iseeso-i ot bansa. Om ontok-ko it gama maya dit Tukum di Musa, minaya oku dit pati politik om tugama dot Yahudi it banar-ko atagas, ino-no it pati politik dot Farisi. 3:5 Kis 23:6; 26:5; Rm 11:1; Kej 17:9-14; 2Kor 11:22 ⁶Ontok-ko it poonotos ku posintor dit tugama ku dot Yahudi, minanansara oku dit tongo tulun dit mimoyo di Yesus. Komoyoon, ong gama maya dit Tukum di Musa, yoku no ot tulun tabanar dot aso kokurangan. 3:6 Kis 8:3; 22:4; 26:9-11

⁷Nga, ombo it kinoontungan ku dit mûula, maakaa diti, kiro’on ku no dot korugian ku pasal di Kristus. ⁸Gaam-ko osusundur po mantad dino, tu itungon ku kikiawi dot korugian ong popiinongon dit kaagayo dot koontungan dit nokotutun oku di Kristus Yesus it Tuhan ku. Pagka tu minaya oku di Kristus, niduan ku it nunu nopo; om kiro’on ku kikiawi ino dot ugu-ko sinupot, supaya oontung oku tu kasanganu oku di Kristus, ⁹om keeseeso oku banar Doo. Okon-ko kumuyut dit Tukum di Musa ot kajajadi dot tulun tabanar oku, ino-i-nga it koosipan ku sid di Kristus. Minangan anggapo do Kinoringan dot tulun tabanar oku tu pasal dit koosipan ku. ¹⁰It kenginan ku no diti, ino-no kotutun banar di Kristus om kaanu dit kuasa dit minamasi Doo mantad sid kapatayan. Om eengin oku dot kotimpus Doo sumansara, om kotiruwan Doo sid kinapatayan Yo, ¹¹supaya posiyan oku-i kembagu do Kinoringan mantad sid kapatayan.

¹²Okon-ko komoyoon ku dot naanu ku no kikiawi iri, keenong osompurna oku no, ino-i-nga mongogusa oku babanar dit tomodon ku diri, tu ino-no tomodon dino ot kinoponginloowan dogon di Kristus Yesus. ¹³Oy tongo koobpineeyan ku, amu oku manantam dot nagampot ku no it tomodon dino. Nga iso no ot mangan ku, olingan ku it nakatalib, om sumuku oku sid tinoguwangon ku. ¹⁴Monotos oku gumusa manangkus kumaa sid sukuon, supaya aanu ku it odia, ino-no, loowon oku do Kinoringan kumaa sid surga, dot koongoy-ongoy ku nopo sori nga pasal dit giginama di Kristus Yesus. 3:12-14 2Tim 4:7-8

¹⁵Sabap ino, itokow dit osukod no it koosipan, subay ki-ginawo om ki-tomodon dot ugu-ko it kinomoy ku diri. Ong waro po dikoo ot mongitung dot suwâay no, ino nga patarangon-i do Kinoringan sid dikoo. ¹⁶Kukukûuro poma nga ombo it pongila’an dit naanu tokow no, ino no ot woyo’on tokow.

¹⁷Oy tongo koobpineeyan ku, tiruwan kow no dogon. Intangay duyu no it tulun dit ugu-ko yokoy ot padpasi, om tiruwan kow no doalo. 3:17 1Kor 4:16; 11:1 ¹⁸Ugu-ko it opiboboros ku sid dikoo, mangan ku kembagu poboroso sid dikoo diti maakaa dot miad-iad oku. Ogumu ot tulun dit mangakun dot Kristian, nga it gagama’on doalo milawan dit tarati dit kinapatayan di Kristus sid salip. ¹⁹It kosungguwon doalo dino, ino-no kobinasa’an misingkoleed; it tiwow doalo ot kinoringan doalo; it pokiraya’an doalo dino, ino-no it gagama’on doalo dit mangamamalu doalo kondiri; aso no wookon ot itungon doalo, sumala mantad dot dang pomogunan no. ²⁰Nga itokow diti, raayat dot surga. Agayo ot arapan tokow mongindad dit kogulian dit Maanalamat daton i Tuhan Yesus Kristus, mantad sid surga. ²¹Kadung koguli kembagu Yalo, silion Doo it koyuwan tokow dit orukung om oobing-patay diti, dot keenong dit koyuwan Doo dit osundu om amu matay. 3:21 1Kor 15 Tu pakayon Yo it kuasa Yo dit koponguasa dit nunu nopo.

Tupono dot Kopupuson

¹Sabap ino, oy tongo koobpineeyan ku dit aa-ku koyuyuuan, popotogo duyu no it koosipan duyu sid Tuhan. Lumangâad oku no dikoo, tu ikoo no ot koobpineeyan ku dit aa-ku koyuyuuan, it potomon do ginawo ku om it tasil dit giginama ku dot sampay arayow oku di Yesus sompôori.

²Pokionuwon ku i Euodia om i Sintikhe dot miusay om miiso ot ginawo, tu miobpinee sid Tuhan. ³Mokitulung oku dit koruang ku dit osotia dot popiusay dat duwo tongondu dilo. Tu yoalo dilo, nakatatad babanar dogon dot matay-patay posurut dit Tabar Tawasi. Miniu’up yoalo di Klemens om it tongo koruang ku wookon. It tongo ngaran doalo nokotulis sid Buuk dit pinotulisan dit ngaran dit tulun dit kaanu dit Koposiyon Tototog.

⁴Tomon kow no dot aso tingkod, tu nokeeso kow no di Tuhan! Boroson ku kembagu, tomon kow no! ⁵Pentalango no it kolomio om kolonuto dit ginawo duyu sid kikiawi ot tulun. Tu oruay no it korikatan kembagu di Tuhan. ⁶Kada kow no tumangkangaw dot nunu nopo, ino-i-nga pawala’o no sid Kinoringan it nunu nopo it pokionuwon duyu, dot mintaduwa om mokitulung, dot meed monorimakasi. ⁷Tu ong kaa dino, it koosayan dit mantad sid Kinoringan ot momiara dit ginawo om pongitungan duyu, tu nokeeso kow di Kristus Yesus. It koosayan dino, katalib dit kikiawi it pongoorotiyan dot tulun.

⁸Koompusan, oy tongo koobpineeyan ku, ombo it abanar, ombo it ki-orumat, ombo it aadil, ombo it oborisi, ombo it awasi, ombo it asanong karanga’an, ombo it apatut om it aaluk dot royo’on, ino no ot mangay duyu itungo. ⁹Gama’o no it nabalajaran, it notorima, it norongow om it neemot duyu sid dogon. Ong ugu dino, i Kinoringan – it puun do koosayan – maawaya dikoo.

Monorimakasi i Paulus dit Tongo Baabalanja Mantad sid Jemaat dot Filipi

¹⁰Bâabanar-ko otomon oku om monorimakasi di Tuhan, tu niintalang duyu kembagu it gama duyu momoduli dogon, dit pinatod kow dot balanja ku. Andang-ko amu oku-i noolingan dikoo momoduli, nga aso kosiwatan duyu. ¹¹Okon-ko sookat dot boroson ku dot ugu dino, om osompitan oku, tu ong yoku, noobas oku no dot okukudik poma nga osukup oku-i. ¹²Noobas oku no dot okosipan om osima. Nokeelo oku no mongogotuwang dot nunu nopo ot kowowoyo’on. Witilon dot owiyaw, nga otomon oku-i; osima dot osompitan, nga otomon oku-i. ¹³Nunu nopo ot aajangan ku nga ogoosan ku-i mongogotuwang, tu i Yesus ot mongimpapag dogon.

¹⁴Nga awasi-i it nawaal duyu tu nokosokubang kow sitid kasansara’an ku. ¹⁵Oy tongo tulun dot Filipi, ikoo kondiri nga nokeelo-i dit kinowowoyo’on ku. Tinumongkiyad oku dikoo mantad sinod negeri dot Makedonia, tu paabar dit Tabar Tawasi sid tampat wookon. Aso no wookon ot jemaat dot minamalanja dogon suway mantad-ko ikoo. Ikoo no ot koruang ku misuli dot siin om barakat. ¹⁶Tu minsan-ko it sisiri oku pod negeri dot Makedonia, sid kota dot Tesalonika, nga insan induwo kow-i pangatod dot balanja sid dogon. 4:15-16 2Kor 11:9 4:16 Kis 17:1 ¹⁷Okon-ko it balanja duyu po ot kenginan ku, ino-i-nga eengin oku mogintong dot gumumu it bunga dit siin duyu sid surga. ¹⁸Naramit ku no kikiawi it nipoowit duyu di Epafroditus; tidino ki-balanja oku no, gaam-ko nalaba’an po mantad dit poroluon ku. It nitataak duyu diri ugu-ko korban dot orongolis, om it kenginan banar do Kinoringan monorima. 4:18 Kel 29:18; Kis 10:4 ¹⁹Pagka tu amu milod owion it kakaya’an di Kinoringan ku, sukupon-i Dialo it nunu nopo it koporoluan duyu tu nokeeso kow no di Kristus Yesus. ²⁰Jadi royo’o no i Kinoringan, it Tama tokow misingkoleed! Amin.

Salam dot Kopupuson

²¹Polombuso duyu no it salam ku sid titikid it umat tosusi it nasanganu di Kristus Yesus. Om kirim salam it tongo koobpineeyan ku siti. ²²Kikiawi it umat siti kirim salam sid dikoo, it keeso no babanar it tulun sid istana di Kaisar.

²³Kososogit konow kikiawi sid saralom dit kosianan di Tuhan Yesus Kristus.