Filemon

Surat di Paulus

Kumaa sid di

Filemon

Popela’an

I Filemon dino, tulun Kristian dot agayo ot ngaran. Om tulun bala yalo sid jemaat sid kota dot Kolose. Ki-turipon yalo, dot reetan di Onesimus. Komoyoon nopo dit ngaran di “Onesimus” dino, “Ki-guna”. I Onesimus dino, minogidu mantad sid di Filemon. Tiya diri, ong maya dot tundang-undang do Ruum, it turipon dit minogidu, ukumon dot lubakan mamasut keenong patayon.

Amu ela’an ong kukuro ot kopituututun di Paulus om i Onesimus tiya dit sid jiil i Paulus. Kalu ong naangatan yalo dot tambabaya yo mongoy sid jiil dot magandaa di Paulus. Nga andang natantu dot kosusuwang nopo di Onesimus do Kristian nga neenjil di Paulus.

Itit surat diti, mongolimumuud i Paulus di Filemon supaya miusay di Onesimus. Sinuu di Paulus i Onesimus gumuli sid tuan yo, dot iti surat diti ot nipoowit. Pinokianu di Paulus dot torima’on kembagu di Filemon i Onesimus, dot okon-ko gisom turipon dit noompunan no, ino-i-nga, ponoko-tobpinee po sid Kristian.

Suwang

Salam do kotimpuunan: 1:1-3

It toluod om koosipan di Filemon: 1:4-7

Pokionuwon sid di Filemon: 1:8-22

Salam do kopupuson: 1:23-25

Salam do Kotimpuunan

¹Iti surat diti, mantad sid dogon i Paulus, it nojiil daagan paabar dit Tabar ontok-ko i Kristus Yesus, om mantad sid di Timotius it tobpinee tokow. Iti surat diti, irikot ku sid dikaw oy Filemon, it koruang ya dit aa ya koyuyuuan, ²om sid di Apfia it tobpinee tokow tongondu, om sid di Arkhipus it koruang tokow tongo soojar di Kristus, om sid jemaat dit miumpug sid walay nu. 1:2 Kol 4:17

³Kososogit konow sid saralom dit kosianan om koosayan do Kinoringan it Tama om Tuhan tokow Yesus Kristus.

Toluod om Koosipan di Filemon

⁴Oy obpinee Filemon, titikid dot momintaduwa oku dikaw, monorimakasi oku sid Kinoringan, ⁵tu, naabaran oku dot monoluod koh dit kikiawi it umat tosusi, om babanar-ko mimoyo koh di Tuhan Yesus. ⁶Mintaduwa oku supaya kaarati koh dit kikiawi it kowosian dit waro sid daton, tu nokeeso no di Kristus. Ong ugu dino, momuasil it koosipan nu sid kopi’isa’an dit tulun Kristian di wookon. ⁷Oy obpinee ku, natamanan oku banar om nempapagan kembagu iti ginawo ku dit gama nu monoluod dit tongo umat tosusi. Minangan nu potomono it ginawo dit kikiawi it tongo umat.

It Pokionuwon di Paulus sid di Filemon baagi di Onesimus

⁸Jadi, pagka tu rasul oku di Kristus, warot kuasa ku dot monuu dikaw dit nunu nopo it aaluk dot gama’on nu. ⁹Nga pagka tu mitoluod kito, aa-ku-i monuu, gisom mokianu oku sid dikaw, tu yoku diti i Paulus lumeeng no, om nojiil oku, pasal di Kristus Yesus. ¹⁰Ino no ot pokionuwon ku dikaw, ontok dit iso ot ponokaanak ku sid koosipan, it neenjil ku sitid jiil, ino-no i Onesimus. 1:10 Kol 4:9 ¹¹Mad aso guugûna nu dialo di guulu, nga ong tiidino laba-ko ki-guna, 1:11 Komoyoon dit ngaran di Onesimus, ki-guna. dot okon-ko gisom sid dikaw no, ino-i-nga sid dogon po.

¹²Aa-ku dara koyuu yalo, nga suuon ku kembagu gumuli sid dikaw. ¹³Kenginan ku dara’ay dot sisition ku-i yalo’d dogon, tu gumanti dara dikaw dot monulung dogon, namot dot sitid jiil oku pasal dit Tabar Tawasi. ¹⁴Nga aa-ku-i eengin mangaawud dialo dot okon-ko ookunan nu. Kenginan ku dara’ay ong monulung koh dogon, dot okon-ko pajalan ku ikaw, ino-i-nga mantad sid kenginan nu kondiri.

¹⁵Ino no dati ot sabap dot nokopitongkiyad kow toruay di Onesimus, supaya kopirunggum kow dialo misingkoleed. ¹⁶Beeno okon-ko gisom turipon nu yalo, ino-i-nga lumaba po mantad dino, tu tobpinee nu yalo dit aa koyuyuuan. Aa-ku koyuuan yalo, sâampod pong ikaw, tu turipon nu-i om tobpinee nu-i yalo sid Tuhan.

¹⁷Ino nogi, ong eetung nu dot koruang oku dikaw, ulio kembagu yalo dot ugu-ko it kondiri ku. ¹⁸Ong ki-sala yalo keenong ki-utang sid dikaw, 1:18 Ong ki-sala yalo keenong ki-utang sid dikaw, ... Pomorini dati dot minanakaw. yoku ot mamaray. ¹⁹Yoku i Paulus, tinunturu ku kondiri monulis iti: Yoku ot mamayar kikiawi diri. Om aa-ku no ondomon dot ki-utang koh sid dogon dit koposiyon tototog nu. ²⁰Oy obpinee, mokisuli oku sâabat dit kowosian dit notorima nu mantad sid Tuhan, paasago dogon iti ginawo ku sid di Kristus.

²¹Kosoromo oku monulis ditit surat diti, tu ela’an ku dot monumboyo koh-i ditit pokionuwon ku dikaw. Om ela’an ku-i dot lumaba po mantad dinot pinokianu ku ot mangan nu waalo. ²²Suway mantad dino, sodia’an oku do lamin sid walay nu, tu aarap oku dot tumboyo’on do Kinoringan it pintaduwa duyu, dot pogulion oku sinod dikoo.

Salam do Kopupuson

²³Kirim salam dikaw i Epafras it rusod ku sitid jiil pasal di Kristus Yesus, 1:23 Kol 1:7; 4:12 ²⁴om it tongo tuup ku gumama, ino-no i Markus, i Aristarkhus, i Demas om i Lukas. 1:24 Kis 12:12, 25; 13:13; 15:37-39; 19:29; 27:2; Kol 4:10, 14; 2Tim 4:10, 11

²⁵Kososogit kow no sid saralom dit kosianan di Tuhan tokow Yesus Kristus.