Surat
di
Yakobus
Popela’an
Iti surat diti, tinulis di Yakobus. I Yakobus dino, tobpinee di Tuhan Yesus dot iseeso tidi. Yalo dino, ponotua dit jemaat sid Yerusalem (intangay sid Kis 21:18; Gal 2:9). Waro po rantas pusod di Yakobus, ino-no i Yudas, it minonulis dit Surat di Yudas. Sagay okon-ko i Yakobus, it tobpinee di Yohanes, tanak di Zebedeus ot minonulis diti Surat di Yakobus diti, tu i Yakobus nopo dit tanak di Zebedeus, natagas no ot liow (Kis 12:2).
Iti surat diti, porikoton “sid opod om duwo ot suku dot Israel, it nakatanjag sid pootongkop do pomogunan”. Nga ugu poma dino, nga ki-guna-i sid daton titikid tadlaw.
Ii-nopo tema keeso di Yakobus, ino-no it bubuatan dot tulun dit babanar-ko mimoyo do Kinoringan (1:27). Ka di Yakobus, ong momoros tokow dot mimoyo tokow do Kinoringan, nga sunduy dot amu tokow-i maya dit kenginan Yo, porosuma nôopo ot koosipan tokow (2:14-26). Komoyoon, subay-ko pawaal tokow dit koosipan tokow sid gama tokow tumoguwang dot tulun musikin (1:9-11), sid gama tokow dot amu momingig dot tulun (2:1-13), sid gama tokow momoros (3:1-18), sid gama tokow mogidu mantad sid tongo pigogutan (4:1-11) om sid gama mintaduwa (5:7-18).
Suwang
Salam do kotimpuunan: 1:1
Oontung tokow ong ataan tokow sid pensuba’an: 1:2-8
Pangkat dot tulun musikin om tulun takaya sid tinoguwangon do Kinoringan: 1:9-11
It kenginan taraat tokow ot puun do pensuba’an: 1:12-18
Okon-ko gisom rongo’on ino-i-nga waalon it boros do Kinoringan: 1:19-27
Okon-ko momingig dot tulun: 2:1-13
Porosuma nôopo ot koosipan ong aso ot gagama’on tawasi: 2:14-26
Dila om kelo’o mongitung: 3:1-18
Kada monoki-ambabaya dot kasanangan dot dang pomogunan om kada no kotombirang: 4:1–5:6
Kolonuto do ginawo om kuasa do mintaduwa: 5:7-20
1Salam do Kotimpuunan
1Kopiwosian mantad sid dogon! Yoku diti, i Yakobus, turipon do Kinoringan om i Tuhan Yesus Kristus. Iti surat diti, irikot ku sid dikoo, it opod om duwo ot suku dot Israel, it nakatanjag sid pootongkop do pomogunan. 1:1 it opod om duwo ot suku dot Israel: Ino-no, it tongo tulun Yahudi. Ogumu doalo ot noko-Kristian no om nakatanjag sid pootongkop do pomogunan sid mintutuk dot Israel.1:1 Mat 13:55; Mrk 6:3; Kis 15:13; Gal 1:19
Oontung Tokow ong Ataan Tokow sid Pensuba’an
2Oy tongo koobpineeyan ku, kiikiro ong oonong tokow do pensuba’an, anggapon tokow neeri dot koontungan tokow. 3Tu nela’an tokow no mâantad dot, asal oombalan it koosipan tokow, om amu tokow akala, makin kataan tokow nôono sid pensuba’an. 4Jadi, ugu po dino, popotogo tokow no it kaata’an tokow sid pensuba’an, supaya opongo tokow koolun, aso poniagan om aso kurang dit gama maya dit kenginan do Kinoringan.
5Ong waro dikoo ot amu songkuro koopintar, subay-ko mintaduwa sid Kinoringan, supaya taakan do Kinoringan dot kopintaran; tu i Kinoringan aga’an ot ginawo manaak om amu moonusuut. 6Nga ong mintaduwa tokow dot mokianu, subay opugu ot ginawo mangarap sid Kinoringan. Tu ong mipiduwo ot ginawo tokow, aso bîida dit gumbang sid laut dit gumumbang ong oonong do sarup. 7Ong ugu tokow dino, kadaay tokow no imamano po dot warot aanu tokow sid Kinoringan. 8Tu nunu nopot mangan tokow nga rumangkanap-i ot ginawo.
Pangkat dot Tulun Musikin om Tulun Takaya sid Tinoguwangon do Kinoringan
9It koobpineeyan dit usisiba’on dot tulun tu musikin, subay tumomon tu asawat yalo sid tinoguwangon do Kinoringan. 10Om it koobpineeyan dit asawat oh pangkat tu akaya, subay-ko tumomon-i dot pensiba di kondiri yo sid tinoguwangon do Kinoringan. Tu it tulun takaya nopo diri, tumanus ugu-ko it wusak do sakot. 11Tu kadung sumilaw no ot tadlaw om alasu no, lumayu no it sakot, om it tongo wusak nga lumoo, om tumanus nôono it kaasanong yo. Ugu keeri no it tulun takaya, tu matay namot dit kamasa’an yo no monotos mogiim do koontungan. 1:10-11 Yes 40:6-7 (LXX)
It Kenginan Taraat Tokow ot Puun dot Pensuba’an
12Oontung it tulun dit atatap oh ginawo namot dit kaajang do pensuba’an. Tu, ong ataan yalo sid pensuba’an diri, odia’an yalo dot mahkota, ino-no koposiyon tototog, it najanji do Kinoringan sid tulun dit monoluod Doo. 13Ong waro tulun dot oonong do pensuba’an om agayat it ginawo yo mamaal do karaatan, okon-ko pomoroson yalo dot, “I Kinoringan ot nakaangat dogon mamaal do karaatan,” ka. Tu i Kinoringan amu aangatan mamaal do karaatan, om i Kinoringan amu mangangat dot tulun mamaal do karaatan. 14Nga, it kenginan tokow kondiri ot mongowit daton mamaal dot karaatan, tu pitutubaya’an tokow it kondiri tokow dot maya dit kenginan kondiri. 15Ong pitutubaya’an tokow it kenginan tokow dit araat diri, aadsa nôono it duso ugu-ko tontolu, om it duso diri nga gumayo nôono, sampay mongowit nôono sid kapatayan. 1:15 Rm 5:12
16Oy tongo koobpineeyan ku dit aa-ku koyuyuu, kada tokow kolowong! Okon-ko i Kinoringan po ot mangangat daton mamaal dot karaatan.17Tu nunu nopo ot awasi om asanong dot rumikot sid daton, i Kinoringan sid sawat, it minongurug dit tadlaw, wulan om rombituon ot nontodonon. Nga i Kinoringan dino, okon-ko irad-ko it wulan po tu misisimban dot otuwong om anawaw. 18I boros tabanar dit Tabar Tawasi ot noboros sid daton sampay najadi tokow dot nurug wagu, mionong di kinenginan do Kinoringan. Sagay ugu diri ot gama Yo, tu minangan tokow Doo poguluono mongurug kembagu mantad-ko it tongo winangun wookon dit mangan Yo nogi urugo kembagu, ugu-ko it ninggiwit do paray dit nomot mogulu. 1:18 ... ugu-ko it ninggiwit do paray dit nomot mogulu. Okon-ko gisom tulun Kristian no ot urugon kembagu do Kinoringan, ino-i-nga kikiawi diti pomogunan, urugon Yo kembagu, tiya dit korikatan keenduwo di Yesus. Nga itokow tulun Kristian ugu-ko ninggiwit do paray, tu niogulu do Kinoringan mongurug kembagu (intangay sid 1Kor 15:20-23 om it panarangan siri.)
Okon-ko Gisom Rongo’on, Ino-i-nga Waalon it Boros do Kinoringan
19Ondomo tokow no oy koobpineeyan ku dit aa-ku koyuyuuan! Titikid ot tulun, subay-ko eelo mokinongow om amu oobung-simbar om subay amu oobung-rasang. 20Tu, tiya dot rumasang tokow, amu tokow keelo mamaal dot awasi, it kotomon do ginawo do Kinoringan. 21Ino nogi, mangay tokow paada’o it koosomu om kikiawi it takal taraat tokow. Pensiba’o tokow no ot ginawo tokow monorima dit boros do Kinoringan, it tinanom Yo sid ginawo tokow, tu it boros Yo diri, kasalamat daton.
22Okon-ko gisom rongo’on tokow nôopo, ino-i-nga waalon tokow no it noboros do Kinoringan; tu ong okon-ko ugu dino, monipu tokow dit kondiri tokow. 23Tu it tulun dit gisom mokinongow dit boros do Kinoringan, nga amu yo-i waalon, yalo dino ugu-ko it tulun dit mongimpuros dit wuros yo dit komimiiyo sid soromin. 24Nempurasan yo nopo it wuros yo, om nokito yo dot waro tokudik ot murong sid pingas yo, tad pogidu-i yalo, dot noolingan yo no it bubuatan dit wuros yo. 25Nga sûuway no ong it tulun dit mongilo babanar dit Tukum do Kinoringan om orulut maya dit Tukum dit laalandu ot koosusi om it pobebas dot tulun. Tu it tulun diri, okon-ko gisom mokinongow no dit Tukum diri om pinising-olingan yo-i, ino-i-nga pawaal dit Tukum diri. Jadi oontung nôono yalo pasal dit gama yo pawaal diri.
26Ong warot tulun manantam dot ataat kabarasan sid tugama it kondiri yo, nga amu yo uyuyukon it kakabangon yo, monipu nôopo yalo dit kondiri yo. Om it kataato yo diri, porosuma nôopo. 27Ong i Kinoringan i Tama, it gama tumaat sid tugama, subay opugu om oborisi oh ginawo, ino-no: monulung dit osusa, ugu-ko it tasi-asi om tongo janda dit kaajang do kasansara’an, om meed mangajaga dit kondiri, supaya amu ogigilan dit karaatan sitid pomogunan.
2Okon-ko Momingig dot Tulun
1Oy tongo koobpineeyan ku, itokow dit ki-koosipan sid Tuhan Yesus Kristus, it Tuhan tokow dit landu koosundu, kada tokow momingig dot tulun dit akaya ko musikin. 2Tu, kiikiro ong waro duwo koyuwan ot tulun dot maya sid koboktian duyu, dot it keeso, notikid dot pondulung dot tamas it tunturu yo om alanji ot soosokot, tu akaya, om it koduwo, ginaray no it soosokot yo tu musikin. 3Gama duyu mongorumat dit tulun dit ki-soosokot talanji, mangan duyu salamo, om boroson duyu nogi dot, “Tuan, sitid awasi ot dikaw dot ogomon,” ka duyu. Nga ong it tulun musikin, boroson duyu dot, “Baa ikaw, intitiriod silod pipit!”, keenong, “Lansad-i mogom sitid somok ditit uulokon ku!” ka duyu. 4Iri diri, momingig kow dot sandad duyu om mogintong kow dot kakaya’o dot tulun, dot maya kow dit pongitungan taraat duyu.
5Rongo’o duyu no babanar, oy tongo koobpineeyan ku dit aa-ku koyuyuuan! It musikin sitid pomogunan diti ot nopili do Kinoringan dot kumaya sid koosipan. Om ki-hak nôono yoalo jumadi dot raayat sid Karajaan do Kinoringan, it najanji Yo sid tongo tulun dit monoluod Doo. 6Nga ikoo, pokikidian duyu it tulun musikin, dot yang-ko it tongo tulun takaya no ot mongulok-ulok dikoo, om moongowit dikoo sid piukuman. 7Yoalo no ot moongukuwo di Yesus Kristus, it apatut dot orumaton, om it mananganu daton.
8Ong babanar-ko woyo’on tokow it Tukum sid Karajaan do Kinoringan, it nokotulis sid Kitab dot ka, “Toluodo no it sandad nu ugu-ko it poonoluod nu dit kondiri nu!” ka, oonong it gama’on tokow. 2:8 Im 19:18 9Nga ong momingig tokow dot tulun, atantu no dot mamaal tokow do duso, tu mangalanggar tokow dit Tukum diri. 10Tu isay nopo ot maya dit kikiawi it Tukum diri, nga mangalanggar dit iso mantad dit pinonuu’an siri, miinong-i dot nalanggar yo it kikiawi it Tukum. 11Tu i Kinoringan ot minomoros dot, “Okon-ko monokiagay,” ka, om Yino-i ot minomoros dot, “Okon-ko mamatay dot tulun,” ka. Jadi, okon poma-ko monokiagay tokow, nga mamatay tokow, mangalanggar tokow-i dit Tukum. 2:11 Kel 20:13, 14; Ul 5:17, 18
12Tandayay tokow no it boboroson om gagama’on tokow, tu ukumon tokow do Kinoringan, maya dit tukum Yo dit pobebas dot tulun. 13Tu, ong orikot ot mongukum dot tulun i Kinoringan, amu moniisian Yalo dit tulun dit amu mooniisian. Nga, it tulun dit ki-kosianan, aso not ikorosi yo dot mangan ukumo.
Porosuma Nôopo ot Koosipan ong Aso Gagama’on Tawasi
14Oy tongo koobpineeyan ku, nunu ot guna momoros ot tulun dot, “Ki-koosipan oku sid Kinoringan,” ka, dot amu yo-i pentalangon it koosipan yo sid gagama’on yo? Kasalamat gaam doo it koosipan yo diri? 15Kiikiro ong warot tobpinee tokow dot kusay keenong tongondu dot asot soosokot om kaakanan suwab-suwab, 16om waro daton ot momoros sid tulun diri dot, “Taatagon ki! Panambaju dot awasi om pising-wiyaw no mangakan!” ka, sunduy dot amu yo-i tinaakan dot koporoluan it tulun diri, nunu ot guna? 17Irad keeri no ot koosipan, ong amu pentalangon sid gagama’on tawasi, porosuma nôopo.
18Nga, waro dati ot tulun momoros dot, “Ki-koosipan koh gaam do-yikaw?” ka. Simbaron ku yalo dot, “Ay, ong yoku, waro gagama’on tawasi! Nga ikaw, kukuoyon ku mongilo dot waro ko aso ot koosipan nu ong aso-i ot gagama’on nu tawasi? Tu ong yoku, sid gagama’on tawasi ku ot pentalangan ku dit koosipan ku,” kangku nôono.
19Mimoyo tokow-i dot iso no ot Kinoringan. Awasi-i ino! Tongo rogon nga mimoyo-i dit hal dino dot song-kikip rumosi tu ookuman. 20Lowong tokow babanar ong aa tokow kaarati dot, it koosipan dit aso gagama’on tawasi, porosuma nôopo.
21Intangay pogi i Abraham it taki-lombus tokow nga minangan anggapo do Kinoringan dot tulun tabanar yalo pasal dit gagama’on tawasi yo, tu it pinasamba di tanak yo i Ishak dot garason dara’ay sid timpak dit paasamba’an. 2:21 Kej 22:1-14 22Jadi, atarang babanar dot, it koosipan subay-ko kopitooyung dit gagama’on tawasi. It gagama’on tawasi yo ot pinangalangkap dit koosipan yo. 23Iri diri, pinembulay dot babanar-ko oonong it ayat dot Kitab dot, “Minimoyo nobo i Abraham sid Kinoringan, om minangan anggapo do Kinoringan dot tulun tabanar yalo pasal dit koosipan yo,” ka dit Kitab. Iri no korereet dot i Abraham nopo, “Tambabaya do Kinoringan”. 2:23 Kej 15:6; 2Taw 20:7; Yes 41:8 24Na! Maakaa diti, nela’an tokow no babanar dot, mangan tokow anggapo do Kinoringan dot tulun tabanar tokow pasal dit gagama’on tawasi, om okon-ko mimoyo nôopo bâanar.
25I Rahab nga ugu keeri-i, it tongondu dot sundal. Minangan anggapo do Kinoringan dot tulun tabanar i Rahab, 2:25 I Rahab dino, ong sid Kitab Leed, nokosuwang sid tulun dot ki-koosipan. (Intangay sid Yos 2:11). pasal dit gagama’on tawasi yo dit pinolosok yalo dit duwo koyuwan it tulun dit bansa dot Israel, it moonoyinu, om pinotuduk doalo dot winaya’an mogidu. 2:25 Yos 2:1-21
26Jadi, ugu diri no ot koyuwan dot asot tatod, tu koyuwan do minatay. Ugu keeri no it koosipan dit aso gagama’on tawasi, tu porosuma nôopo.
3Dila dot Tulun
1Oy tongo koobpineeyan ku! Kada kow-i kogumu jumadi dot guru do Kitab sid jemaat. Ela’an tokow-i dot yokoy dit moonuduk sid jemaat, mangan ukumo do Kinoringan dot awagat mantad dit tukuman sid tulun wookon. 2Tu kikiawi daton, asasarok mamaal dot kasala’an. Nga ong warot tulun dot amu insan kasala ot kakabangon yo, yino no ot nopongo koolun. Om iri no tanda dot okuasa yo it sangkayu it koyuwan yo. 3Sagay kakangan tokow ot kabang do kuda, supaya maya it kuda dit kenginan tokow. It kakang diri ot potumbongon dit songinan it koyuwan dit kuda. 4Kapal nga ugu-i dino, tu nokuro ong agayo poma ot kapal om sarup tologod ot papanaw, nga it komudi dit okôokodok ot potumbongon maya dit kenginan dit tulun dit mongomudi. 5Dila tokow nga ugu keeri-i, tu okôokodok poma nga keelo-i monombirang dit hal tongo-gagayo.
Songkuro kookodok dot tanak ngapuy, nga kosorob-i dot timba’an tagayo! 6Dila nga ugu keeno-i. Sitid koyuwan tokow diti, dila no ot ugu-ko kinaatagon dit kikiawi it karaatan sitid pomogunan. It dila no ot patanjag do karaatan sid pootongkop dit koyuwan tokow. Om it dila dino, ugu-ko tapuy dot naraka. Komoyoon ku, kadang-kadang it boros tokow mantad sid rogon, tu mangaraag dit koposiyon kondiri om tulun wookon. 7Nunu nopo song-dupot dit orongit, tombolog, dupot dot rumoloy om sada, adapat monuyu om waro no tulun nokoponuyu. 8Nga, asot îiso tulun koponuyu dit dila yo kondiri. Tu, dila nopo ara’at, amu milod kuasa’on, om noponu do pinodos dot kapatay. 9Dila ot pangarayow tokow do Kinoringan it Tama tokow, om dila-i ot pongintulus tokow dot sandad tulun, dot yang-ko it tulun diri, nurug-i dot miyeeyo do Kinoringan. 3:9 Kej 1:26 10Iri-iri kabang diri ot poobusan dot pangarayow om pongintulus. Oy koobpineeyan ku, itit hal diti amu apatut dot ajadi! 11Asot towud dot kopongimbulay dot weeg tapalo om weeg topeet sid iseeso ot towud. 12Oy tongo koobpineeyan ku, ka disay ma dot nunuk monguwa do zaitun, om anggur monguwa do nunuk? It towud dot oosin nga amu-i kopongimbulay dot weeg tapalo.
Kopintaran dit Mantad sid Kinoringan
13Waro gaam daton ot opintar om eelo mongitung? Ong waro, subay-ko pembulayon sid koposiyon yo it bubuatan tawasi, om subay-ko osiba ot ginawo, tu iri no ot aaluk dot tulun topintar. 14Nga, ong dumangki tokow, om mokigagayo do ngaran, kada tokow no mokirayow dot opintar tokow kabarasan. Tu ong ugu tokow dino, momudut om monolikud tokow dit tudukan tabanar. 15Tu it kopintaran dit ugu dino, okon-ko mantad sid Kinoringan po, ino-i-nga mantad sid pomogunan, mantad sid tiwow dot tulun, om mantad sid tongo rogon. 16Tu siombo nopo ot midangki ot tulun om mokigagayo dot ngaran, siri no ot imbulayon dot tongo pigaga’an om tongo karaatan. 17Nga, ong it tulun dit mantad sid Kinoringan it kopintaran yo, keeso no banar osusi ot ginawo, eengin dot kopiusayan, osulimod, olomi ot ginawo, oobing-sianan, oobing-tulung, amu momingig om amu misingko-wawasi. 18It kopiusayan nopo, ugu-ko it bibit dit mangan tonomo. Jadi, ong mongusay tokow dot tulun, kaanu tokow dot tasil tawasi, ino-no it padpasi dit kenginan do Kinoringan.
4Kada Monoki-Ambabaya dot dang Pomogunan dot Kasanangan
1Nunu obot pupuun dit piogutan om pigaga’an duyu? Daagan dit tongo kenginan taraat duyu dit asot tingkod dot milawan sinod ginawo duyu! 2Waro dara kenginan duyu, nga amu duyu aanu, jadi mokipamatay kow nôono. Warot ikosolon duyu nga amu kow kaanu, jadi, migaga kow om migagut kow nôono. Dot, sagay amu duyu aanu it kenginan duyu diri, amu kow mokianu sid Kinoringan. 3Om mokianu kow poma sid Kinoringan nga amu kow-i ataakan, tu araat ot tomodon duyu. Tu it pokionuwon duyu diri, onuwon duyu dot kasanangan duyu kondiri.
4Oy tongo moonokiagay! Andang amu kow osotia sid Kinoringan, ugu-ko it tulun dit amu osotia sid sawo. Amu duyu gaam ela’an dot, ong monoki-ambabaya dit tongo kasanangan dot dang pomogunan, ajadi dot musu do Kinoringan? Ino nogi, isay nopo ot monoki-ambabaya dit tongo kasanangan dot dang pomogunan, jumadi dot musu do Kinoringan. 5Panantaman duyu gaam ong asot paadakan dit boros do Kinoringan sid Kitab, dot, “It tatod tokow dit niiyon do Kinoringan sid daton, kenginan babanar do Kinoringan dot osotia sid Doo, dot mad-ko mongiwogu ot gama.” 4:5It tatod tokow dit niiyon do Kinoringan sid daton, kenginan babanar do Kinoringan dot osotia sid Doo, dot mad-ko mongiwogu ot gama. Tafsiran 2: It tatod tokow dit niiyon do Kinoringan sid daton, okon-ko aalang-alang ot kenginan taraat yo.4:5 Kel 20:5 6Minsan-ko ugu dino, ingko-gagayo dit kosianan do Kinoringan sid daton. Sagay nitulis sid Kitab dot,
“Lawanon do Kinoringan
it tulun dit asawat ot ginawo,
agayo it kosianan Yo sid tulun dit osiba ot ginawo,”
ka. 4:6 Ams 3:34 (LXX)
7Ino nogi, taat kow no sid Kinoringan. Mangay duyu lawano it Raja do Rogon, tu mogidu-i. 8Insomok kow no sid Kinoringan, om i Kinoringan nga minsomok-i sid dikoo. Oy ki-ongo-duso kow, tingkod kow no mamaal dot duso! Oy tongo mipiduwo ot ginawo, potumbongono duyu no inot ginawo duyu kumaa sid Kinoringan! 4:8 Mzm 24:3-6 9Panasal kow no dit kaara’at duyu, meed dot osusa ot ginawo, om mogkorudu! Gontiay duyu dot korudu it tirak duyu, om it katamanan duyu, gontiay duyu dot kolunguyan! 10Pensiba’o duyu no ot ginawo duyu sid tinoguwangon di Tuhan, om insawatan kow-i Doo.
11Oy tongo koobpineeyan ku, kada tokow no misisimbaal om misususun. Isay nopo ot monimbaal om monunusun dit tobpinee yo sandad Kristian, pakaraat om monunusun yalo dit Tukum do Kinoringan. Ong osususun tokow dit Tukum do Kinoringan, komoyoon amu tokow maya dit Tukum dino, ino-i-nga jumadi tokow nôono dot takim dit Tukum. 12Yang-ko iso no ot mamaal dot Tukum om mangaratu dot tukum sid tulun, ino-no i Kinoringan dit ki-kuasa manalamat om mominasa dot tulun. Nga, nunu tokow song-tulun tu kobulun tokow monunusun dit sandad tokow?
Okon-ko Otombirang
13Jadi, rongo’o duyu no oy koobpineeyan dit moomoros dot, “Biano keenong suuwab mongoy okoy sorid kuwo dot miyon siri sontoon koleed tu midadagang okoy, om andang ogumu ot tuntung ya,” ka. 14Dot okon-ko ela’an duyu nunu ot ajadi suuwab! Tu it koposiyon tokow oruay, ugu-ko lisun tu, oruruay dot okito om atanus no. 4:13-14 Ams 27:1 15It aaluk nôono dara dot boroson duyu, kaa dino, “Ong kenginan do Kinoringan, om kakal okoy po miyaw, iti ilo ot mangan ya,” ka duyu nôono. 16Nga ikoo nopo maakaa, asawat ot ginawo duyu sampay monombirang kow. Dot it monombirang dino araat.
17Jadi, ong it tulun dit nokeelo no dot nunu ot awasi om apatut dot mangan yo, nga amu yo-i mangan, ki-duso it tulun dino.
5Asabak it Tulun Takaya
1Oy tongo tulun takaya, rongo’o duyu no! Pogiad kow no om pogkorudu kow no, tu oonong kow do kasansara’an! 2Tumanus no it kakaya’an duyu, om it soosokot duyu nga nokokot no do lipos. 3Togoron no it tamas om it pirok dit nipumpun duyu, om it togor no diri ot bukti dot oluki kow. Nipumpun duyu ot tarata duyu sitid pomogunan, dot yang-ko amu no oleed ot koowian do zaman! Ino nogi, asansara kow, ugu-ko osorob dot tapuy it tonsi duyu. 5:2-3 Mat 6:19 4Amu duyu ginojiyan it tongo tulun dit kinumaraja sid tumo duyu. It siin dit gaji doalo sid pakit duyu, monginggiyak dot monondos dikoo sid tinoguwangon do Kinoringan. It gagaabon dit tongo tulun dit minongomot sid tumo duyu diri, norongow no do Kinoringan, it Panglima dit Tantara do Surga. 5:4 Panglima dit Tantara do Surga: Ino-no, iso pongoreetan do Kinoringan. Sid Kitab Leed, asasarok dot reetan dot Panglima dit Tantara do Surga i Kinoringan, tu Yalo no ot monguasa dit kikiawi it sid surga om sitid pomogunan. Nga ugu poma dino, nga mongumbal nogi do Kinoringan it tongo tulun takaya, dot amu doalo bayaran it gajidit tongo tulun doalo. Nga pagka tu Kinoringan dino ki-kuasa, mangan Yo tulungay it tongo tulun dit ulalakan. Intangay sid Mal 3:4, 5; Ul 24:14-15.5:4 Ul 24:14-15 5Ikoo nopo ugu-ko it tuyog do sapi dit monotos mangakan, tu amu yo ela’an dot moosomok no it tadlaw dot pangagarasan dit kondiri yo. Tu iri not ela’an duyu: mogiim dot kasanangan om monotos monumboyo dit kenginan duyu sitid pomogunan. Dot amu no oleed om mangan kow no ukumo do Kinoringan.6Pining-ukuman duyu it tulun tabanar om pinatay duyu nogi, dot okon-ko kalawan po yoalo dikoo.
Polonuto Tokow no ot Ginawo Tokow
7Ino nogi oy koobpineeyan ku, polonuto tokow no ot ginawo tokow mising-korikot di Tuhan! Intangay tokow pogi at moongumo nga alanut ot ginawo mongindad dot tasil dit tongo tinanom yo, om mongindad dot kotimpuunan sampay kotingkadan do gompus. 8Itokow nga subay-ko alanut ot ginawo, om popotogon tokow ot ginawo tu amu no leed ot kogulian di Tuhan. 9Oy tongo koobpineeyan ku, okon-ko songongut-ongut om mi’insala tokow supaya amu tokow ukumon do Kinoringan. Tu sabanar no pengkakat no sid longobon it Takim.
10Oy tongo koobpineeyan ku, tiruwanay tokow no it kaalanut om kaapatog dit ginawo dit tongo nabi dit minangan sansara’o, tu sinuu di Tuhan polombus dit boros Yo! 11Sabanar no, reetan tokow yoalo dot oontung, tu nakataan sid kasansara’an. Norongow tokow no it kaalanut dit ginawo di Ayub, om nela’an tokow-i it kinoompuson yo, tu binarakatan-i yalo do Kinoringan. Tu oobing-sianan om otoluod i Kinoringan. 5:11 Ayb 1:21-22; 2:10; Mzm 103:8
12Oy tongo koobpineeyan ku, keeso no banar, kada tokow no mising-sumpa dot, “Tutudlungan oku dat surga ong momudut oku no,” ka. Om kada tokow mising-sumpa dot isasi ot tana ko nunu nopo, ino-i-nga ong babanar, boroson nopo dot, “Oõ,” ka; ong amu babanar, boroson nopo dot, “Amu,” ka, supaya amu tokow ookuman do Kinoringan. 5:12 Mat 5:34-37
Kuasa do Mintaduwa
13Ong waro daton ot osusa, subay mintaduwa! Ong waro daton ot otomon, subay-ko minlaalanu dot mangarayow do Kinoringan. 14Ong waro daton ot sumakit, subay monginloow dot tongo ponotua dot jemaat dot mintaduwa, om mongisu dit sumakit diri dot tinasak 5:14 tinasak: It boros sid Yunani it elayonka, obbuli mangan sintako dot tinasak ko tinasak dot zaitun. Sid zaman di Yakobus, amu ogumu ot bansa dot tinasak, om iri not tinasak zaitun ot pakayon sid lampu, pongisu do pilat, pangansak do rinapa, om ponginasak dot tulu keenong koyuwan, om ituntug sid tulu do raja om nabi dit mangan lontiko. Nga ong sid ayat diti, it tinasak nopo diri, iso ot pangaandaman dit tongo doa dit tongo pomimpin do jemaat, om lambang dot siri i Tatod Tosusi dot monulung. meed monginloow dit ngaran di Tuhan. 5:14 Mrk 6:13 15Ong babanar-ko ayakin yoalo dit doa diri, lingasan-i di Tuhan it tulun sumakit diri. Om, ong nakawaal yalo dot duso, oompunan-i it tongo duso yo. 16Ino nogi, isay nopo ot sumakit, subay mangakun dit tongo duso yo sid tulun dit pokipintaduwa’an yo. Om pitatabangay duyu no momintaduwa it tulun dit sumakit, supaya olingasan. Agayo ot kuasa dit doa dit tulun tabanar. 17I nabi Elia nga ugu-ko itokow no, tu tulun komimiiyo. Minonotos yalo mintaduwa supaya amu dumarun. Nunu po, tolu notoon sitanga koleed dot amu dinumarun. 5:17 1Raj 17:1; 18:1 18Om pintaduwa kembagu yalo dot mokianu do darun, nga sinumondot ot darun, om sinumuni nogi dîiri it tongo totonomon. 5:18 1Raj 18:42-45
19Oy tongo koobpineeyan ku, ong waro daton ot sinumimpang mantad sid tudukan tabanar om waro nôono ot tulun mangangat daton gumuli sid Kinoringan, awasi babanar ino. 20Tu ela’an tokow itit ayat diti: Isay-isay ot mangangat dot tulun ki-duso gumuli mantad sid ralan dot napalid, it tulun diri nakapanalamat dit tulun ki-duso mantad sid kapatayan misingkoleed. Om songkuro poma koogumu ot duso dit tulun dit nangatan gumuli diri, oompunan-i do Kinoringan. 5:20 Ams 10:12; 1Ptr 4:8