Galatia

Surat di Paulus

Kumaa sid Jemaat do

Galatia

Popela’an

Ino nopot negeri dot Galatia dino, iso ot wilaya dit noporinta do Ruum tiya diri. Inot negeri do Galatia dino, nokeeyon sid tanga dot nagara dot Turki ong maakaa. It tongo jemaat sid negeri dot Galatia dino, i Paulus kondiri ot pinengkakat (Kis 13–14). It sambaagi dit jemaat siri, tulun dot Yahudi, om it kinogumuan doalo, kakal-i maya dit tadat om toturan dit Tukum di Musa, ugu-ko it sunat, it hari Sabbat, it amu kawasa akanon, om wookon po. Nga it kogumuan dit tongo Kristian siri, okon-ko Yahudi po, ino-i-nga baya kapir. Ino not sabap dot amu oobas mâantad yoalo maya dit tongo tadat om toturan dit Tukum di Musa.

Nga, kadung nokeedu no i Paulus mantad sid doalo, waro dîiri ot tulun suuway dot rinumikot siri dot minonuduk doalo dot tudukan dit kapalid. It tongo guru dino, tulun do Yahudi dit nokosuwang sid Kristian. Ka doalo, “Amu osukup dot gisom mimoyo nôopo di Tuhan Yesus, ino-i-nga subay-ko mokisunat kow po, tu maya dit nisuu do Kinoringan sid di Abraham. Om subay-ko tumanud kow dit Tukum di Musa, ino-no, it tadat om toturan dot tugama dot tulun Yahudi,” ka. Tu tiya dit zaman di Paulus, it tugama Kristian nga wagu po, om anggapon dot tulun dot it tugama Kristian dino, gisom denominasi dit tugama Yahudi. Isay nopo ot eengin sumuwang sid tugama Yahudi, subay-ko mokisunat om tumanud dit Tukum di Musa, baru nogi om kajadi yalo dot umat do Kinoringan, om koompit dit tongo janji do Kinoringan sid umat Yo. Rinumasang i Paulus dit nokorongow dit tudukan doalo. Jadi, sitid surat yo diti, pinatarang i Paulus dot, it koosipan tokow no sid di Yesus ot kajadi daton dot tulun tabanar sid tinoguwangon do Kinoringan – okon-ko it mokisunat ko it maya dit tongo tadat om toturan wookon po dit tugama Yahudi. It koosipan sid di Yesus ot kajadi daton dot koturunan di Abraham. Komoyoon, ong mimoyo tokow di Yesus, anggapon do Kinoringan dot tulun tabanar tokow, ugu-ko i Abraham, om kaanu tokow dit tongo barakat dit nijanji do Kinoringan sid di Abraham (3:6-9). It tonsi babanar dit tudukan di Paulus, okitanan sid 2:16 om 5:1.

Nga sobolum iri, sid kotimpuunan dit surat diti, papatog i Paulus dit kondiri yo, tu lumawan dit boros dit tulun dit momoros dot, “Okon-ko babanar-po-ko rasul i Paulus, om it tudukan yo nga amu-i babanar,” ka. Dot sabanar no, andang ki-kuasa i Paulus manantu ki-kuasa yalo manantu dot siongo it tudukan dit nokoonong om siongo it tudukan dit amu nokoonong, tu babanar-ko rasul yalo di Yesus Kristus (pasal 1–2).

Suwang

Salam do kotimpuunan: 1:1-10

Kukuro ot kajajadi di Paulus do Rasul: 1:11–2:21

Pupu’un dot najadi tokow dot tulun tabanar sid tinoguwangon do Kinoringan: 3:1–4:31

Kobebasan om Tanggung-jawap dot tulun Kristian: 5:1–6:10

Tupono om Salam dot kopupuson: 6:11-18

Salam do Kotimpuunan

¹Iti surat diti mantad sid dogon, i Paulus. Yoku diti, rasul dot, okon-ko linantik dot tulun, om okon-ko tulun ot pinajadi, ino-i-nga linantik oku di Yesus Kristus om i Kinoringan it Tama, it minamasi di Yesus mantad sid kapatayan. ²Kikiawi dit tongo koobpineeyan tokow siti nga kirim salam-i dikoo sid tongo jemaat sinod negeri dot Galatia. ³Kososogit konow sid saralom dit kosianan om koosayan do Kinoringan it Tama tokow om i Tuhan Yesus Kristus. ⁴Tu nitaak di Yesus it kondiri Yo dot pananus dit tongo duso tokow, supaya asalamat tokow, om amu tokow kawaya dit bubuatan taraat sitid zaman diti. Ugu diri ot gama di Yesus, tu minaya Yalo dit kenginan do Kinoringan, it Tama tokow. ⁵Royo’o tokow no i Kinoringan sampay misingkoleed! Amin.

Iso no ot Tabar Tawasi

⁶Eeraranan oku babanar dino bubuatan duyu! Linoow kow do Kinoringan supaya mangarap kow dit kosianan di Kristus. 1:6 Tafsiran 2: Lino’ow kow do Kinoringan tu mantad sid kosianan di Kristus. Nga oruruay om tinumolikud kow no mantad sid Doo om minaya kow dit tudukan dit suwâay no, it reetan dot tulun dot, “tabar tawasi” kabarasan. ⁷Dot sabanar no, it reetan dot “tabar tawasi” diri, okon-ko babanar-po-ko Tabar Tawasi. Nga warot tulun dot eengin mongogorusow dino pongitungan duyu, dot goliwongon doalo it Tabar Tawasi ontok-ko i Kristus. ⁸Nga isay nopo tulun paabar sid dikoo dot tabar tawasi, ong kopisuway no dit Tabar Tawasi dit niabar ya sid dikoo, it tulun dino, apatut dot oontok dot suba do Kinoringan! Okon-ko boroson po dot yokoy, moleekat poma mantad sid surga nga apatut dot oontok dot suba 1:8 suba Malayu: tulah do Kinoringan ong paabar yalo dit tabar tawasi dit suuway! ⁹Ugu-ko it noboros ya mâantad sid dikoo di gûulu, tiya dit muurunggum okoy po dikoo, boroson ku kembagu da maakaa dot, ong waro tulun dot mangaabar sid dikoo dit ‘tabar tawasi’ dit suway mantad-ko it notorima duyu mantad sid dagay, apatut dot oontok dot suba do Kinoringan!

¹⁰Panantaman duyu gaam ong kikiawi dit tongo bibinoros ku diri, ponginsanang ku nôopo do ginawo dot tulun? Keenong, panantaman duyu gaam ong ponginsasamod ku nôopo dot tulun? Aso banar dino! Ino-i-nga kikiawi dit bibinoros ku diri, ponginsanang ku do ginawo do Kinoringan. Tu ong ponginsanang ku nôopo do ginawo dot tulun, komoyoon, okon-ko turipon oku po di Kristus.

Okon-ko Mantad sid Tulun po ot Kinoomitan di Paulus dit Tabar Tawasi dit Yabar Yo, ino-i-nga Mantad sid di Kristus

¹¹Oy tongo koobpineeyan ku, eengin oku dot oorotiyan duyu babanar dot, it Tabar Tawasi dit niabar ku sid dikoo diri, okon-ko tabar po dot wiwinaal dot tulun. ¹²Tu okon-ko tulun po ot pinaabar sid dogon dit Tabar Tawasi, om okon-ko tulun po ot pinotuduk sid dogon dit Tabar Tawasi, ino-i-nga it Tabar Tawasi diri, notorima ku kondîiri mantad sid di Yesus Kristus, dot niintalang Doo sid dogon.

¹³Tu, andang norongow duyu no dot nunu ot minangan ku tiya dit kakal oku po maya dit tugama dot Yahudi. Tiya diri, aso gisom ku manansara dit jemaat do Kinoringan, om ogugumu no gama ku monotos dot mongobinasa doalo. 1:13 Kis 8:3; 22:4-5; 26:9-11 ¹⁴Sid gama ku maya dit tugama dot Yahudi, nooliban ku kikiawi it tulun Yahudi dit song-ampon dogon. Tu yoku no ot paling abagos maya dit tongo tadat dit tongo taki-lombus ya. 1:14 Kis 22:3 ¹⁵Nga, ugu poma dino nga pagka tu agayo ot kosianan do Kinoringan sid dogon, nonduyan oku mâantad Doo, tiya dit sid tiyan oku nogi dit tidi ku, dot jodion oku Doo dot rasul sompôori. ¹⁶Jadi insan tadlaw, pinutusan dîiri do Kinoringan dot pentutunon Yo sid dogon it Tanak Yo, supaya paabaron ku it Tabar ontok-ko it Tanak Yo sid tongo tulun dit okon-ko Yahudi. Nga tiya dit koolo’ow oku do Kinoringan, amu oku no minokituduk sid isay nopo sandad tulun. 1:15-16: Kis 9:3-6; 22:6-10; 26:13-18 ¹⁷Om amu oku no minongoy po sid kota dot Yerusalem dot mokituduk dit tulun dit gulu mantad dogon kajadi do rasul. Ino-i-nga turus minongoy oku sid daerah dot Arab, 1:17-24 Arab, Damsyik, Siria om Kilikia: 600 toon ot kinotoliban dit kinapatayan di Paulus, baru nogi om nokembulay ot tugama dot Islam sid Arab. Komoyoon di Paulus, tiya dit kootobat dialo, amu-i turus minongoy yalo sid pusat dot tugama Kristian sid Yerusalem, om amu yalo nokosikul sid tongo rasul dit wookon, ino-i-nga saralom opod om apat toon koleed dot siti-silo no yalo, baru nogi om sinumambat yalo dit tongo rasul dit wookon (2:1). Minsan-ko it tongo umat sid negeri dot Yudea, sid tongo kampung sid mintutuk dot Yerusalem poma nga amu-i kotutun di Paulus (1:22-24). Iri no bukti dot amu nokoongoy i Paulus sori. Jadi, okon-ko mantad sid tulun po ot kinoomitan di Paulus dit tudukan dit yabar yo, ino-i-nga mantad sid di Kristus kondiri. om poguliay ku nogi sid kota dot Damsyik.

¹⁸Tolu toon mantad diri om minongoy oku nogi sid Yerusalem, tu minagandaa oku di Petrus, 1:18 Petrus: Harfiah: Kefas. Iri not ngaran di Petrus sid boros dot Ibrani (intangay sid Yoh 1:42). nga gisom opod om limo tadlaw oku no koleed sid di Petrus.1:18 Kis 9:26-30 ¹⁹Nunu po nga asot îiso dit tongo rasul wookon ot nasambat ku, suway mantad-ko i Yakobus it tobpinee di Tuhan Yesus. ²⁰Kikiawi ditit binoros ku diti, babanar. I Kinoringan ot sasi ku dot aa-ku momudut. ²¹Iri nogi, linumombus oku sid tongo negeri dot Siria om Kilikia. ²²Nga amu oku po insan kasambat dit tongo jemaat di Kristus sid negeri dot Yudea. ²³Gisom norongow dit tongo jemaat dot Yudea ot tabar dot, “It tulun dit minanansara daton di gûulu, maakaa diti, paabar nôono dit koosipan dit pokitotonusan yo dara di gûulu,” ka. ²⁴Om minangarayow dîiri yoalo do Kinoringan pasal dit nagama do Kinoringan sid koposiyon ku.

Nakun i Paulus dit Tongo Rasul Wookon sid Kuta dot Yerusalem

¹Nakatalib ot opod om apat toon mantad dit nangayan ku sid kota dot Yerusalem dit insan-i, minongoy oku no kembagu sori, 2:1 sid kota dot Yerusalem: Siri not pusat dit kikiawi it umat Kristian dit waro tiya diri, tu siri no it tongo rasul. dot duwo okoy di Barnabas, om nangatan ku po i Titus. 2:1 Kis 11:30 ²Koongoy-ongoy ku nopo sori nga minaya oku dit suu do Kinoringan sid ginawo ku. Sid iso ot miting khas dang pomimpin dot jemaat, 2:2 sid iso ot miting: Tinomod di Paulus mongoy sid Yerusalem tiya dit toon 47 Masihi, paatod do rukut baagi dit tongo Kristian dit musikin sid Yerusalem (Kis 11:29, 30), om sumambat sâambil dit tongo rasul di wookon sori. Okon-ko it miting sid Kis 15 dati ot kinomoy, tu duwo toon ot kinotoliban, baru nogi om najadi it miting sid Kis 15, ino-no it toon 48-49 Masihi. Sid miting dit sid Kis 15 diri, noputusan dit tongo rasul dot amu no sunatan it tongo Kristian dit okon-ko Yahudi, tu okon-no-ko it sunat po nôono ot posuwang doalo sid umat do Kinoringan, ino-i-nga it koosipan doalo sid di Yesus (Kis 15:8). Om amu no oporolu yoalo maya dit Tukum di Musa (Kis 15:28). Nga tiya dit minonulis i Paulus ditit surat yo sitid Galatia, amu po najadi it miting diri. nitarang ku sid doalo it tonsi dit Tabar Tawasi dit niabar ku sid tongo tulun dit okon-ko Yahudi. Tu mookoy-i oku dot, ong amu otorima doalo it tonsi dit tudukan ku, porosuma oku nôopo monotos monuduk, mantad dit leleed diri om sompôori.

³Nga minsan-ko i Titus no tu bansa dot Yunani, it koruang ku mongoy sori, nga amu-i pinajalan dit tongo pomimpin dot subay mokisunat. ⁴Andang waro tulun mamajal dot asal tulun Kristian, subay mokisunat. Inot tulun not komoyoon ku dino, ino-no, it tulun dit rinumunggum sid tongo jemaat tokow dot moolosok ot gama; it tulun dit misingko-mabpamaya di Kristus kabarasan. Tomodon nopo doalo, monoyinu om mangaraag dit kobebasan dit opurimanan tokow tu nokeeso tokow no di Kristus. Tu kenginan doalo dot tumaat tokow sid Tukum di Musa, ugu-ko it gama dit tongo turipon tumaat sid tuan yo. ⁵Nga sâabat poma nga amu okoy-i miniboboyo, supaya amu osimbanan it Tabar Tawasi, ino-i-nga opiara ya, supaya babanar it tongo tudukan dit otorima duyu.

⁶Om it tongo pomimpin poma dit ongo-sasawat ot pangkat nga asee ot nununu ot nicadang doalo dot iruang sid Tabar Tawasi dit niabar ku. Dot sabanar no, ong baagi do-yoku, songkuro nopo kaasawat ot pangkat doalo dino, okon-ko ino po ot oponting, tu i Kinoringan okon-ko pangkat po dot tulun ot intangan. 2:6 Ul 10:17 ⁷Gaam-ko yoalo kondiri nga nokeelo-i dot yoku not pinaarapan do Kinoringan dot paabar dit Tabar Tawasi sid tongo tulun dit okon-ko Yahudi, 2:7-9 okon-ko Yahudi Harfiah: amu nosunatan. tongo Yahudi: Harfiah: nosunatan ugu-i-ko i Petrus tu pinaabar dit Tabar Tawasi sid tongo Yahudi. ⁸Tu i Kinoringan ot minanaak dot kuasa om sinundu sid di Petrus dot jumadi do rasul sid tongo tulun dot Yahudi, om i Kinoringan-i ot minanaak sid dogon dot kuasa om sinundu dot jumadi dot rasul sid tongo tulun dit okon-ko Yahudi. ⁹Jadi, asal noorotiyan doalo dot i Kinoringan ot pinataak dit tugas diti sid dogon, sinumalam no dagay di Barnabas, i Yakobus, i Petrus 2:9, 11, 14 i Petrus: Harfiah: i Kefas. Sid 2:11 om 2:14 nga ugu dino-i (intangay ot panarangan sid 1:18). om i Yohanes, it pomimpin dot kikiawi it tongo jemaat, tu tanda dot mangakun yoalo dot yokoy di Barnabas paabar dit Tabar Tawasi sid tongo tulun dit okon-ko Yahudi, om yoalo paabar dit Tabar Tawasi sid tongo Yahudi. ¹⁰Nga iri po ot pinokianu doalo sid dagay, subay monulung okoy dit tongo tulun musikin sid jemaat sid Yerusalem, dot sabanar-no, ino no ot babanar-no-ko totoson ku mamaal. 2:10 Kis 11:28-30; 12:25

Tiniag di Paulus i Petrus Tu Minaya Kembagu i Petrus dit Tadat dot Tulun Yahudi

¹¹Nga tiya dit nakaanda’a i Petrus sid kota dot Antiokhia, linawan ku yalo sid tinoguwangon dit tongo anggota, tu nasala it nawaal yo. ¹²Tu it timpuun-i, oobas i Petrus dot milang dit tongo Kristian dit okon-ko Yahudi dot mangakan. Nga nokorikot nopo it piipiro koyuwan it koruang di Yakobus, ino-no it tongo tulun dot Yahudi dit mantad sid kota dot Yerusalem, amu no dîiri misop i Petrus dit tongo Kristian dit okon-ko Yahudi, om amu no dîiri yalo milang mangakan, tu rumosi yalo dit tongo tulun dot Yahudi dit mamajal dot subay-ko sunatan kiawi ot Kristian. 2:12 dit tongo tulun Yahudi dit mamajal dot subay-ko sunatan kiawi ot Kristian Harfiah: it tongo tulun dit nongo-sunatan2:12 Kis 16:1-3; 21:17-26 ¹³It tongo Kristian wookon dit Yahudi nga tinumiruwan-i di Petrus dot misingko-tataat dit tadat om toturan dot Yahudi, sampay i Barnabas kondiri nga natagayatan-i malid dit gama doalo. 2:13 Kis 9:27

¹⁴Nga kadung nokito ku it bubuatan doalo dit amu mionong dit tudukan tabanar dit nituduk sid Tabar Tawasi, minomoros oku dîiri sid di Petrus sid tinoguwangon dit tongo tulun sid jemaat dot Antiokhia dot, “Ikaw dino, tulun koh dot Yahudi, nga noobas koh no maya dit tadat om toturan dat tulun dat okon-ko Yahudi, tu nokotingkod koh no maya dit tadat tokow Yahudi. Nga nokuro tu mîilom mangangat koh nôono dat tulun dat okon-ko Yahudi dot maya dit daton dot tadat om toturan?” kangku di Petrus. 2:14 mangangat koh ... maya dit daton dot tadat om toturan: Tiya dit zaman di Paulus, it tongo tulun do Yahudi dit amu noko-Kristian, andang amu milang dit tongo bansa wookon mangakan, tu amu oborisi kabarasan. Nga mantad dit timpuun-i, kikiawi dit tulun Yahudi om it tulun dit okon-ko Yahudi dit noko-Kristian no sid jemaat dot Antiokhia nga miilang-i mangakan, tu asal Kristian, amu no oponting it tadat dang Yahudi (Kis 15). Nga i Petrus, mîilom amu dîiri minilang dit tongo umat dit bansa wookon mangakan, tu mookoy-i dot okosupan dit tongo palawat do Yahudi mantad sid pusat do Kristian sid Yerusalem. Jadi it tongo anggota do Yahudi dit wookon nga terpaksa maya nopo di Petrus dot amu milang dit tongo anggota dit okon-ko Yahudi. Jadi pagka tu amu dîiri otorima dit tongo anggota dit Yahudi it okon-ko Yahudi, apajalan dîiri yoalo maya dit tongo oturan dit Tukum di Musa, sampay mokisunat nôono, supaya otorima dit tongo anggota do Yahudi.

Tulun do Yahudi om Okon-ko Yahudi nga Kajadi-i dot Tulun Tabanar Tu Mimoyo di Kristus

¹⁵Om nitarang ku sid di Petrus dot andang babanar-i dot yokoy diti koturunan dot tulun Yahudi, om okon-ko it reetan ya dot ‘tulun kapir dot ki-duso’. ¹⁶Nga Yahudi okoy poma, nga ela’an ya-i dot it kajajadi dot tulun tabanar sid tinoguwangon do Kinoringan, okon-ko pasal po dit tumaat dit Tukum di Musa, ino-i-nga pasal dit mimoyo di Kristus Yesus. Yokoy poma nga nokeemoyo-i di Kristus Yesus, supaya okon-ko pasal po dit minaya okoy dit Tukum di Musa ot kasasabap dot anggapon do Kinoringan dot tulun tabanar okoy, ino-i-nga pasal dit minimoyo okoy di Kristus Yesus. Tu asot îiso tulun dot anggapon do Kinoringan dot tulun tabanar pasal dit minaya dit Tukum di Musa. 2:16 Mzm 143:2; Rm 3:20, 22

¹⁷Jadi, i Kristus ot arapon ya dot pajadi dagay dot tulun tabanar sid tinoguwangon do Kinoringan. Om nela’an ya dîiri dot yokoy kondiri nga tulun-i do ki-duso bala, ugu-ko it tongo tulun dit okon-ko Yahudi. Nga waro dati ot tulun Yahudi momoros dot, “Pagka tu aa-kow dîiri mokikuasa dit Tukum, najadi kow dot tulun dot ki-duso, komoyoon, amu momoduli i Kristus dit tongo duso!” ka. Tad-pom okon-i-i! ¹⁸Ino-i-nga, ong gumuli oku kawaagu sid Tukum di Musa dit nakaada ku no di gûulu, amu mimîilo nga jumadi oku nôono dot maangalanggar dit Tukum dino. ¹⁹Pagka tu aso tinganan ku maya dit Tukum di Musa, ookuman oku dit Tukum diri dot mangan oku patayo. Jadi, minangan ku dîiri anggapo iti kondiri ku dot napatay no baagi dit Tukum, supaya masi oku baagi do Kinoringan. Najadi ot ugu dino tu yoku diti, obbuli boroson dot nakawaya di Kristus dot nisalip. 2:19 Harfiah: Tu minatay oku no baagi dit Tukum dino, tu minangan oku no patayo dit Tukum dino. Komoyoon nopo di Paulus, amu no yalo mokiogot dit Tukum ugu-ko it bangkay tu amu no aagatan dit Tukum. Seera kapatay i Paulus baagi dit Tukum di Musa? I Tuhan Yesus ot minongoontok di Paulus dot minatay sid salip (Gal 3:13). Om pagka tu nokeeso no i Paulus di Kristus, obbuli boroson dot nakawaya i Paulus di Yesus dot minatay. (Intangay sid Rm 6:1-4 om Rm 7:1-4). 2:18-19 Gal 3:10-13 ²⁰Jadi itit miyaw oku maakaa diti, okon-no-ko yoku peeti, ino-i-nga i Kristus ot miyaw sitid kondiri ku. Tu iti koposiyon ku maakaa sitid pomogunan diti, koposiyon dot mangaarap di Tanak do Kinoringan dit minonoluod dogon, dot sampay minanganggur Yalo matay dot minongoontok dogon. ²¹Jadi, amu ku-i paada’on it toluod om kosianan do Kinoringan. Tu ong it gama nogi dara maya dit Tukum di Musa ot kajajadi dot tulun tabanar sid tinoguwangon do Kinoringan, komoyoon, porosuma nôopo it kinapatayan di Kristus!

It Tukum di Musa ot Kasalamat Daton ko it Koosipan sid di Kristus?

¹Oy tongo tulun dot Galatia, nisiongo duyu obo it tutok duyu? Mad-ko noontok kow dot tolimu sampay tinolikudan duyu i Kristus! Dot yang-ko nakatarang ku no sid dikoo it komoyoon dit kinapatayan di Yesus Kristus sid salip! ²Simbaro oku po dikoo: Pasal dit minaya kow gaam dit Tukum di Musa ot kasasabap dot nokotorima kow dit Tatod do Kinoringan, ko pasal dit nokorongow kow dit Tabar Tawasi om turus dot minimoyo kow? Tantu nobo dot pasal dit minimoyo kow.³Nokuro tu ugu dino ot koolowong duyu?! It timpuun-i, minangaarap kow dit Tatod do Kinoringan, nga mîilom mangaarap kow dîiri dit poonotos duyu kondiri mamaal dit awasi! ⁴Kaakatuk ong kikiawi dit naajangan duyu pasal dit mimoyo kow di Kristus ong aso not taraati baagi dikoo! Arapon nopo dot waro tarati baagi dikoo! ⁵Tinaakan kow do Kinoringan dit Tatod Yo, om nimbulayan kow po Doo dot tongo kosunduwo. Nga, kikiawi dino, pasal dit minaya kow gaam dit Tukum di Musa, ko pasal dit minokinongow kow dit Tabar Tawasi om minimoyo kow dîiri di Kristus?

⁶Tantu nobo dot pasal dit minimoyo kow di Kristus. Ondomo duyu pogi it naajangan di Abraham kodori. Ka dit Kitab, “Na, minimoyo nobo i Abraham sid Kinoringan, om minangan dîiri anggapo do Kinoringan dot tulun tabanar yalo pasal dit koosipan yo,” ka. 3:6 Kej 15:6; Rm 4:3; Yak 2:23 ⁷Jadi, orotiyo duyu no pogi dot, it tongo tulun no dit mimoyo do Kinoringan ot babanar-no-ko reetan dot koturunan di Abraham. 3:7 koturunan di Abraham: Komoyoon, it tongo tulun dit minuli dit koosipan di Abraham.3:7 Rm 4:16 ⁸Tu noboros no mâantad sid Kitab dot, ong mimoyo do Kinoringan it tongo tulun dit okon-ko Yahudi, ajadi yoalo dot tulun tabanar sid tinoguwangon do Kinoringan. Tu nakaabar no mâantad sid di Abraham it Tabar Tawasi dot ka, “‘Ikaw ot pawaya’an Ku mamarakat dot kikiawi ot bansa,’ ka do Kinoringan,” ka dit Kitab. 3:8 Kej 12:3 ⁹Jadi it tongo tulun dit mimoyo sid Kinoringan, koompit dit barakat dit nitaak do Kinoringan sid di Abraham dit ki-koosipan.

¹⁰Kikiawi dit tulun dit manantam dot torima’on do Kinoringan it kondiri yo, tu pasal dit gama yo maya dit Tukum di Musa, it tulun dino, waro suba dialo sompôori. Tu waro nokotulis sid Kitab dot, “Titikid it tulun dit amu atatap maya dit nunu nopo it nokotulis sid Tukum di Musa, waro suba dialo sompôori,” ka. 3:10 waro suba dialo sompôori: Tiya dit tiisuwang no it tongo tulun Israel sid tana Kanaan, sinuu yoalo do Kinoringan mising-sumpa dot tumaat sid Tukum di Musa (Ul 27:26). Dot okon-ko yoalo nôopo ot oontok dit sumpa diri, ino-i-nga it tongo koturunan po doalo. 3:10 Ul 27:26 (LXX) ¹¹Jadi, atarang no dot asot îiso tulun dot anggapon do Kinoringan dot tulun tabanar tu daagan tumaat dit Tukum di Musa. Tu waro nokotulis sid Kitab dot, “It tulun no dit ki-koosipan ot abanar sid tinoguwangon do Kinoringan; yalo no ot miyaw misingkoleed,” ka. 3:11 Hab 2:4 ¹²Agayo ot pisuwayan dit kataato sid Tukum di Musa om it koosipan tu, ka dit Kitab, “It tulun no dit tumaat dit Tukum di Musa ot miyaw misingkoleed,” ka. 3:12 Im 18:5 ¹³Nga minangan tokow di Kristus polobuso mantad sid suba dit Tukum di Musa, dot minanganggur Yalo dot matay sid kayu dot salip: Minanganggur i Kristus dot oontok it kondiri Yo dit suba dino, tu minongoontok daton. Tu, waro nokotulis sid Kitab dot, “It tulun dit niginit sid kayu, komoyoon, noontok no dot suba,” ka. 3:13 Ul 21:23 ¹⁴Sagay minanganggur i Kristus dot ugu diri, supaya it tongo tulun dit okon-poma-ko Yahudi nga koompit-i dit barakat dit nijanji do Kinoringan sid di Abraham. Jadi, ugu po dino, pagka tu mimoyo yoalo di Yesus, yoalo nga kotorima-i nôono dit Tatod Tosusi dit nijanji do Kinoringan.

It Tukum di Musa Amu Kapananus dit Janji do Kinoringan sid di Abraham

¹⁵Oy tongo koobpineeyan ku, manganu oku dot posuntuan mantad sid koposiyon dot tulun suwab-suwab: Kiikiro, waro tulun dot mamaal dot surat wasiat keenong surat janji; kadung na-saah no it surat wasiat keenong surat janji diri, asot îiso tulun dot kapananus ko koponimban dot nunu nopo sid surat wasiat keenong surat janji diri. ¹⁶It tongo janji do Kinoringan sid di Abraham om sid koturunan yo nga ugu-ko surat wasiat-i tu amu obbuli simbanan. Om kad pasâala, aso boros do Kinoringan dot, “Sid tongo koturunan nu,” ka, dot ugu-ko ogumu ot koturunan di Abraham dot komoyoon. Ino-i-nga ka do Kinoringan, “Sid koturunan nu,” ka, komoyoon, iso no tulun, ino-no i Kristus. 3:16 Kej 12:7; 22:18 ¹⁷Komoyoon ku nopo ugu diti: It janji do Kinoringan sid di Abraham dit na-sah no mâantad, amu adapat dit Tukum di Musa mananus, tu 430 toon mantad dit pinongojonjiyan do Kinoringan sid di Abraham, om nokembulay nogi it Tukum di Musa. 3:17 Kel 12:40 ¹⁸Kiikiro ong subay-ko maya dit Tukum di Musa ot koturunan di Abraham, baru nogi om kaanu yoalo dit barakat dit nijanji do Kinoringan sid di Abraham diri, komoyoon, okon-no-ko it janji po do Kinoringan ot sabap dot tinaakan dot barakat ot tulun. Nga sabanar no, nitaak bâanar do Kinoringan it barakat diri sid di Abraham, tu andang najanji mâantad do Kinoringan. 3:18 Rm 4:14

Tomodon nopo dit Tukum di Musa, Peentalang dit Kasala’an do Riniba

¹⁹Jadi, andang waro dati ot tulun mongoduat dot, “Ong ugu dino, nunu ot tomodon do Kinoringan pataak dit Tukum di Musa?” ka. Tomodon nopo do Kinoringan pataak dit Tukum di Musa, supaya kentalang it kasala’an do riniba. Nga ii-nopo Tukum di Musa diri, mangan pakayo mising-korikot dit Koturunan di Abraham dit kinomoy sid janji do Kinoringan, ino-no i Kristus. It Tukum di Musa dino, nitaak do Kinoringan sid tongo moleekat dot ipolombus sid di Musa, 3:19 tongo moleekat: Aso noreet sid Kitab Leed dot tongo moleekat ot pinolombus dit Tukum sid di Musa, nga iti diti, najadi dot tradisi dot tulun Yahudi. It noreet sid Kitab Leed, ino-no, sinuu do Kinoringan it moleekat Yo dot monundan doalo sid pamana’an kumaa sid tana Kanaan (Kel 23:20-23; Yos 5:13). Nga ong maya dit Kitab Wagu, it tradisi dit Yahudi diri, babanar-i-ko waro ot moleekat dot najadi dot bantaran (Kis 7:38, 53; Ibr 2:2). om i Musa nôono ot pinolombus sid bansa dot Israel, tu yino ot bantaran. ²⁰Asal waro bantaran, komoyoon, waro duwo pihak. Nga it minangajanji i Kinoringan sid di Abraham, aso bantaran, tu i Kinoringan kondiri ot minangajanji.

²¹Jadi, andang waro dati ot tulun mongoduat dot, “Ong ugu dino, kopilawan gaam dit Tukum di Musa om it tongo janji do Kinoringan?” ka. Andang amu! Tu kiikiro ong waro nogi dara ot Tukum dot kadapat mongowit dot tulun sid koposiyon tototog, komoyoon, tinggal po maya dit Tukum dino, om anggapon-i do Kinoringan dot tulun tabanar tokow. ²²Nga inot ugu keeno dino, aso tinganan, tu waro noboros sid Kitab dot, kikiawi dot tulun nokuasa do duso ugu-ko it tulun dit nojiil. Komoyoon, it tulun no dit mimoyo di Yesus Kristus ot kaanu dit barakat dit najanji do Kinoringan sid di Abraham, tu pasal dit koosipan doalo. 3:22 Gal 3:14

It Tukum di Musa, Ugu-ko Guru Disiplin Mising-korikot di Kristus

²³Tiya dit amu tokow po nokeemoyo sid di Kristus, inot Tukum di Musa dino, ugu-ko jaga sid jiil tu minangan tokow doo totontuo mangajaga om monguasa. Kentalang po i Kristus om keemoyo tokow po, om kalabus tokow nogi mantad sid kuasa dit Tukum di Musa, it ugu-ko jiil diri. ²⁴Jadi it Tukum di Musa dino, ugu-ko guru disiplin tokow 3:24 guru disiplin: It zaman diri, tadat nopo dit tongo tulun takaya dit Ruum om Yunani, waro ot turipon doalo dit ki-tugas dot maananggom dit tanak yo mantad dit onom toon nogi sampay opod om onom toon ot tumur dit tanak. It turipon dino, maawaya dit tanak sumikul om mananggom dialo supaya amu araat ot takal. Kadung osukod no it tanak diri, opongo no it tugas dit guru disiplin. sampay nokorikot i Kristus, supaya anggapon do Kinoringan dot tulun tabanar tokow, tu mimoyo tokow di Yesus Kristus. ²⁵Na maakaa diti tu nokeemoyo tokow no di Kristus, amu tokow no aagatan dit Tukum di Musa, it ugu-ko guru disiplin dit leleed diri.

²⁶Kikiawi daton diti najadi no dot tongo tanak do Kinoringan, tu mimoyo tokow no di Kristus Yesus. ²⁷Om kiawi daton diti, nopodsu no om nokeeso dîiri di Kristus. Jadi, ugu po dino, najadi tokow no dot ugu-ko i Kristus tu ugu-ko nokopononsulung tokow no di Kristus. ²⁸Jadi, ii-ka tulun dot Yahudi ko it tulun dit okon-ko Yahudi, it turipon ko it okon-ko turipon, om it kusay ko it tongondu, kikiawi dit tongo pisuwayan, amu no oponting, tu kikiawi daton nga nokopiiso no sid di Kristus Yesus. ²⁹Jadi, pagka tu i Kristus no ot sanganu daton, najadi tokow no dot tongo tanak di Abraham, om ki-hak tokow nôono dot tumungkus dit barakat dit najanji do Kinoringan sid di Abraham. 3:29: Rm 4:13; Gal 3:8, 14

¹Nga waro po ot itarang ku. Ong amu po osukod it tanak dit tumungkus dit tarata dit tama yo, aso bîida dot turipon po yalo, tu yalo poma ot sanganu dit tongo tarata diri nga, amu po obbuli yalo mamaal dot nununu dot misingko-sukod yo. ²Om inot tanak dino, waro tulun wookon dit monuu om moniag doo om mongurus dit tarata yo, sampay mising-kosukup dit tumur yo dit natantu dit tama yo. ³Itokow nga ugu-i dino di muula tu tiya dit amu tokow po nokotorima di Kristus, ugu-ko tanganak tokow po, tu kakal tokow po nooripon dit tongo rogon dit monguasa diti pomogunan. ⁴Nga kadung norikot it masa dit natantu mâantad do Kinoringan, nirikot Yo no it Tanak Yo sitid pomogunan. Sinumiliw Yalo dot tulun komimiiyo om ataat sid Tukum di Musa, ⁵tu palabus dit kikiawi it tulun dit nokuasa dit Tukum dino, supaya otorima tokow do Kinoringan dot jumadi dot ponoko-tanak Yo.

⁶Jadi pagka tu tongo tanak tokow no do Kinoringan, minangan dîiri do Kinoringan suu’o it Tatod dit Tanak Yo dot sumuwang sid ginawo tokow, supaya koponong-ama tokow nôono do Kinoringan, om koponginloow dot, “Oh Abba, oh Ama!” ka. 4:6 Oh Abba, Oh Ama! It tongo tulun Yahudi tiya dit zaman di Tuhan Yesus oobas-i monong-ama do Kinoringan, dot ka dit poonong-ama doalo Aḅenu “Oh Tama ya”. Nga suway it poonong-ama di Tuhan Yesus, tu mamakay Yalo dit babanar-ko gama dot tanak monong-ama dit tama yo, ino-no i Abba. (Intangay sid Mrk 14:36.) 4:6 Mrk 14:36; Rm 8:15 ⁷Na, ugu po dino, itokow diti, okon-no-ko turipon po, ino-i-nga tongo tanak no do Kinoringan. Jadi, pagka tu tongo tanak tokow no do Kinoringan, kotungkus tokow nôono dit nijanji do Kinoringan. Om kikiawi dino andang gama’on Yo. 4:5-7 Rm 8:15-17

Gumagaw i Paulus dit Koosipan dit Tongo Kristian sid Galatia

⁸Nga ong i gûulu, amu kow po nokotutun babanar do Kinoringan. Tiya diri, minokiuripon kow dit tongo rogon dit reetan duyu dot kinoringan, dot iri diri, okon-ko babanar-po-ko Kinoringan. ⁹Nga maakaa diti, notutunan duyu no i Kinoringan, keenong lobi po oponting, notutunan kow no do Kinoringan. Jadi, kaa po dino, nokuro tu mokiguguli kow po kembagu sid tongo rogon dit monguasa diti pomogunan diti, it orukung om aso guna? Om nokuro tu eengin kow po mokiuripon kembagu dit tongo rogon diri? ¹⁰Kaa dino ot gama ku momoros tumongutun om mamantang kow nôono dit tongo tadat do Yahudi tu ramayon duyu it tongo tadlaw tagayo, tongo wulan wagu, tongo musim om it tongo toon. ¹¹Mookoy-i oku dot porosuma nôopo it poonotos ku monuduk dikoo.

¹²Oy tongo koobpineeyan ku, tiya dit sisino oku po dikoo di gûulu, tinumiruwan oku dikoo dot amu mokiporinta dit Tukum di Musa. Jadi maakaa, pokionuwon ku babanar sid dikoo dot, ikoo nôono ot tumiruwan dogon dot amu mokiporinta dit Tukum di Musa. Patatapo duyu nopo it kowosian duyu sid dogon ugu-ko it gûulu, tu ongo-wawasi kow sid dogon. ¹³Ela’an duyu-i kon dot, sinumakit oku sid pamana’an, om minajang oku dîiri sid dikoo, om iri no ot kasasabap dot waro dîiri ot poluang ku paabar dit Tabar Tawasi sid dikoo. ¹⁴Om it tiya diri, ugu poma diri tu mad-ko koponusa oku dikoo tu it sinumakit oku, nga amu oku-i nusiba ko sinunsub dikoo, ino-i-nga sinamung oku dikoo dot ugu-ko monginsamung do moleekat do Kinoringan keenong i Kristus Yesus. ¹⁵Songkuro kootomon duyu dit tiya diri, nga maakaa dino, siombo no it katamanan duyu? Ela’an ku dot ong it tiya diri, nunu nopo nga ookunan duyu pataak sid dogon. Gaam nogi nga ong adapat duyu no dara, ino linsow do mato duyu nga mangan duyu tiyuko dot itaak duyu sid dogon. ¹⁶Nga maakaa, mad-ko jinadi oku dîiri dikoo dot musu, tu it nokoponuduk oku dikoo dit babanar.

¹⁷It tongo maamalid diri, monotos poma manganu dit ginawo duyu, nga araat ot tomodon. Tu kenginan doalo dot kotongkiyad kow mantad sid dogon, om monotos kow nôono maya doalo. ¹⁸Andang awasi-i dot waro tulun monotos manganu dit ginawo duyu ong awasi nogi ot tomodon, om okon-ko gisom it tiya no dit muurunggum oku dikoo. ¹⁹Oy tongo ponoko-tanak ku dit aa-ku koyuyuu! Asansara oku kembagu pasal dinot bubuatan duyu, dot ugu-ko it kaasansara dit tongondu dit monusu. Om iti kasansara’an ku diti, amu po otingkod ong amu po kentalang it bubuatan di Kristus sid bubuatan duyu. ²⁰Lumangâad oku no dara rumunggum dikoo dat maakaa, supaya koponoki-boboros oku dikoo dot osulimod ot gama, tu aa-ku no ela’an ong kukuoyon ku po ikoo monuduk.

I Hagar om i Sara, Suriban dit Duwo ot Pinijonjiyan do Kinoringan

²¹Oy tongo koobpineeyan dit eengin babanar maya dit Tukum di Musa, poboroso duyu ka sid dogon, oorotiyan duyu-i gaam babanar ot komoyoon dit Tukum di Musa? ²²Tu waro nokotulis sid Tukum di Musa dot, i Abraham kodori, ki-tanak dot duwo koyuwan ot kusay. It tanak dit kotiiso, ino-no, tanak yo sid turipon dit sawo yo, om it tanak yo dit koduwo, ino-no, tanak yo sid sawo yo babanar, it okon-ko turipon po. 4:22 Kej 16:15; 21:2 ²³It tanak nopo di Abraham sid tongondu dit turipon, naanak tu mantad sid kenginan dot tulun komimiiyo. Nga ii-nopo tanak di Abraham sid sawo yo babanar, it okon-ko turipon, naanak tu mantad sid janji do Kinoringan.

²⁴Iti kinowowoyo’on diti, obbuli onuwon dot iso ot suriban. Tu miduduwo dit tongondu diri, ugu-ko it duwo ot Pinijonjiyan do Kinoringan. I Hagar nopo, lambang dit Pinijonjiyan Leed, ino-no it Tukum dit nitaak do Kinoringan sid di Musa sid nuluw do Sinay. It Tukum dino, pajadi dot tulun dot tongo turipon yo ugu-ko i Hagar om it tongo tanak yo. ²⁵Sid suriban diti, i Hagar nopo, lambang dit nuluw dot Sinay, it sid negeri dot Arab, tu siri not pinataakan do Kinoringan dit Tukum Yo. Om lambang po yalo dit Yerusalem sitid pomogunan, tu it tongo tulun Yahudi dit miniyon sid Yerusalem dino, nooripon dit Tukum di Musa. ²⁶Nga i Sara nopo, lambang dit Yerusalem dit sid surga. Tu yalo nopo, ponoko-tidi tokow, tu yalo nopo nga okon-ko turipon po, ugu-ko tokow it amu nooripon dit Tukum di Musa. 4:24-26 duwo ot Pinijonjiyan do Kinoringan. I Hagar nopo, lambang ... dit Tukum dit nitaak do Kinoringan ... sid nuluw do Sinay: I Sara nopo, lambang dit Pinijonjiyan Koduwo, ino-no it Pinijonjiyan Wagu do Kinoringan om it tongo tulun dit mimoyo di Yesus Kristus. It raa di Tuhan Yesus ot pinongogot dit Pinijonjiyan Wagu diri (intangay sid ayat 4:28). It tongo tulun Kristian, okon-no-ko turipon po, tu i Sara nga okon-ko turipon po (ayat 4:26).²⁷Tu waro nokotulis sid Kitab dot,

“Tomon kow no, oy tongo tongondu dit baday, it amu nokoombal monusu!

Tomon kow no om sayaw kow no dot gumara,

oy tongo tongondu dit amu insan kopurimon dit kooruol monusu!

Tu it tongondu dit niduan dit sawo yo,

ogumu nogi ot tanak,

mantad-ko it tongondu dit agagaman dot sawo,”

ka. 4:27 Yes 54:1

²⁸Jadi, oy tongo koobpineeyan ku, itokow diti, najadi dot tongo tanak do Kinoringan, tu mantad sid janji do Kinoringan. Jadi, ugu-ko i Ishak tokow, it tanak di Abraham it naanak tu janji do Kinoringan. ²⁹Nga it tiya diri, it tanak di Abraham dit naanak mantad dit kenginan dot tulun komimiiyo, minanansara di Ishak, it naanak mantad sid kuasa dit Tatod do Kinoringan. Iti maakaa nga ugu-i dino tu it tongo tulun dit nooripon dit Tukum di Musa, manansara dit tongo tulun dit mangarap di Kristus. 4:29 Kej 21:9 ³⁰Nga nunu ka dit Kitab? Ka dit Kitab, “Sunsubo at turipon dilo om at tanak yo, tu amu yalo aaluk dot mompit monungkus dit tungkusan dit tanak dit tongondu dit okon-ko turipon,” ka. 4:30 Kej 21:10 ³¹Jadi, oy tongo koobpineeyan, itokow diti okon-ko ugu-ko tongo tanak po dit tongondu dit turipon diri, komoyoon, okon-ko nokuasa tokow dit Tukum di Musa, ino-i-nga itokow diti, obebas, ugu-ko tongo tanak dit tongondu dit okon-ko turipon.

Sintor Konow sid Kobebasan Duyu

¹Itokow diti, nokobebas no di Kristus. Jadi, ugu po dino, patog konow mingkakat, om kada konow miboboyo dot panaanon kembagu dit Tukum di Musa, tu ajadi kow kembagu do turipon dit Tukum. 5:1 Harfiah: ... om kada no miboboyo dot panaanon kembagu dit kuk dot kooripanan. Tiya dit zaman di Paulus, oobas it tongo tulun Yahudi mongoreet dit Tukum di Musa dot kuk, om positif ot gama doalo momoros pasal dit mokisa’an dit kuk, komoyoon, tumaat sid Tukum di Musa. Nga ong i Paulus, it Tukum dino, reetan yo dot kuk dot kooripanan.²Yoku diti i rasul Paulus, rongo’o duyu no iti boroson ku: Ong mokisunat kow, komoyoon, aso guguna di Kristus sid dikoo. ³Popoondom oku wâagu dit isay-isay it tulun dit mokisunat: Yoalo dino, subay-ko maya babanar dit kikiawi it Tukum di Musa! 5:3 Ka dati dit boros dit tongo maamalid, “Ong eengin kow dot asalamat, subay-ko mimoyo kow di Kristus, om subay-ko mokipodsu nôono, om kaanu kow nôono dit Tatod Tosusi, nga subay-ko mokisunat po, baru om asalamat kow nogi babanar,” ka. Nga ka di Paulus, sabanar-no, it mokisunat dino, tanda dot sumuwang sid tugama dot Yahudi. Om asal noko-Yahudi no, andang-âandang nga subay-ko maya dit kikiawi dit Tukum di Musa. Om it tulun dino, amu nôono mangarap di Kristus baagi dit kasalamatan, ino-i-nga mangarap nôono dit Tukum di Musa. ⁴Nga ikoo dit mangaarap dot anggapon do Kinoringan dot tulun tabanar kow ong tumaat kow sid Tukum di Musa, noputut no it kopiisa’an duyu om i Kristus, om nokotolikud kow no mantad sid kosianan do Kinoringan. ⁵Nga ong yokoy, it Tatod do Kinoringan ot manaak dagay dot koyokinan dot, ong mimoyo okoy di Kristus, anggapon do Kinoringan dot tulun tabanar okoy. ⁶Tu, baagi dit tulun dit nokeeso no di Kristus Yesus, iri-ka ki-sunat ko it aso sunat, miinong-i dot asee ot tarati. Daapun ot ki-tarati, mimoyo babanar sid di Kristus, tu it gama tokow mimoyo sid di Kristus diri, kentalang sid gama tokow monoluod dot tulun wookon.

⁷I gûulu, awasi ot gama duyu milulumba dot sumukod sid koosipan. Nga tidino, isay ot nakaawang dikoo tu amu konow dîiri maya dit tudukan tabanar? ⁸Okon-ko i Kinoringan po ot nokotintid dikoo, tu Yalo no ot minonginloow dikoo. ⁹Tu ka dit paanambarasan dot tulun, “Okukudik poma ot paangambang nga kakambang-i dit kikiawi it tapung,” ka, komoyoon, okudik poma ot maamalid, nga ogumu-i ot tulun dot ogoliwong. 5:9 1Kor 5:6 ¹⁰Nga i Tuhan ot manaak dogon dot koyokinan dot amu kow-i misisimban mantad sid nokotuduk ku. Nga it tulun dit mongogorusow dit pongitungan duyu dino, isay nopo yalo, andang ukumon do Kinoringan. ¹¹Rongo’o duyu no babanar ki, oy tongo koobpineeyan! Waro tulun dit momoros dot monuduk oku kabarasan dot subay-ko mokisunat ot tulun supaya torima’on do Kinoringan. Aso banar! Sagay pogi-om kakal oku-i sansara’on dot tulun, tu iti no ot ituduk ku: Aso no wookon ot kasalamat dot tulun, suway mantad dit kinapatayan di Kristus sid salip. Tu ong piisopon ku nogi dara it tudukan ku dot subay-ko mokisunat po, amu-i kaarasangan dot tulun it tudukan ku. ¹²Jadi, it tongo tulun dit mongogoliwong dit koosipan duyu, pagka tu owosian babanar yoalo dit sunat, gaam po turus mokipubpul nogi yoalo! 5:12 Tafsiran 2, gama monuriban: mokiidu mantad sid jemaat. Andang mokipubpul ot terjemahan harfiah, okon-ko mokiontoluw ugu-ko sid TB.

Mokitarayan Tokonow di Tatod do Kinoringan

¹³Oy tongo koobpineeyan, linoow kow do Kinoringan supaya obebas kow. Nga kadaay duyu no pakayo it kobebasan dino dot pawaya’an duyu mamaal dit kenginan duyu kondiri. Ino-i-nga pembulayo duyu no it toluod duyu sid gama duyu mitutulung. ¹⁴Tu kikiawi dit Tukum di Musa, noompug sid iso no ot pinonuu’an, ino-no, “Toluodo no it sandad nu riniba dot ugu-ko it poonoluod nu dit kondiri nu,” ka. 5:14 Im 19:18 ¹⁵Nga, tandayay duyu no supaya amu kow kotiruwan dit dudupot torongit dit migogogol om mitotolon, tu mîilom soosompi obinasa kow dati.

¹⁶Komoyoon ku nopo, ugu diti: Patarayanay duyu no dit Tatod do Kinoringan it koposiyon duyu, supaya amu kow kawaya dit kenginan duyu kondiri. ¹⁷Tu it kenginan dot tulun om it kenginan dit Tatod do Kinoringan, kopilawan, om it kenginan dit Tatod do Kinoringan om it kenginan dot tulun nga kopilawan-i. Komoyoon, ong ipatarayan duyu dit Tatod do Kinoringan it koposiyon duyu, amu kow kadapat mamaal dit nunu nopo it kenginan duyu. 5:17 Rm 7:15-23 ¹⁸Om, ong mokitarayan kow dit Tatod do Kinoringan, amu kow no okuasa dit Tukum di Musa.

¹⁹Ela’an-i nunu ot tasil ong maya tokow dit kenginan taraat tokow: moonokiagay, mamaal dot kalaalasu, ogilat, ²⁰sumamba sid ponoko-kinoringan, moongolimu dot tulun, misasana, moonokioduw, moongiwogu, oobung-rasang, mookingangaran, oobung-gagut om mitotongkiyad pasal dot tudukan, ²¹dudumangki, maagawuk, rumamay dot adarakan ot gama, om wookon po. Eengin oku popoondom dikoo ugu-ko it noboros ku di gûulu dot, it tulun dit mamaal dot ugu dino, amu kajadi dot raayat sid Karajaan do Kinoringan.

²²Nga it tuwa nopo dit mokitarayan di Tatod do Kinoringan: otoluod, otomon, oosay, alanut oh ginawo, awasi oh ginawo, olumis oh ginawo, osotia, ²³osulimod, om eelo pokodos do ginawo. Asot tukum dot moniag dit tongo hal dit ugu dino. ²⁴It tongo tulun dit nasanganu no di Kristus Yesus, amu no nokuasa dit bubuatan tara’at, tu obbuli boroson dot nakapansang no doalo sid salip it bubuatan tara’at, miampay dit tiwow om it kenginan tara’at doalo. ²⁵Nataakan tokow no dit Tatod do Kinoringan dit koposiyon wagu. Jadi, ugu po dino, subay-ko mokitarayan tokow dit Tatod do Kinoringan. ²⁶Kadaay tokow no pensawato it ginawo tokow dot, miisasana om mi’alib-alib.

Mi’u’up Mamabo dot Awagat

¹Oy tongo koobpineeyan ku, ong waro tulun dot kawaal do duso, ikoo dit mookitarayan dit Tatod do Kinoringan ot potolunung kembagu dit tulun dino, dot osulimod ot gama, meed dot mongilala kow dit kondiri duyu, supaya amu kow kawaya mamaal dot duso dot ugu diri. ²Ong waro tulun dot ki-masaala, tulungay duyu no yalo, tu ugu no dino ot gama maya dit tukum di Kristus. ³Tu ong waro tulun manantam dot it kondiri yo ot lobi po oponting mantad-ko it tulun wookon, momudut yalo dit kondiri yo. ⁴Titikid dot tulun, subay-ko eelo momorisa dit bubuatan yo kondiri dot, awasi ko araat. Ong awasi no it bubuatan yo, obbuli no yalo tumomon. Nga kada no tumomon dot awasi ot doo do bubuatan mantad dit dang tulun do bubuatan. ⁵Tu, titikid dot tulun, waro tanggung-jawap yo kondiri sid tinoguwangon do Kinoringan dit doo om doo dot tongo bubuatan.

⁶It tulun dit notudukan dit boros do Kinoringan, aaluk dot mangagaji dit guru yo mantad sid nunu nopo it naanu-anu yo.

⁷Kadaay duyu wudutay ino kondiri duyu! Amu milod lowongon i Kinoringan. Nunu nopo ot tonomon dot tulun, ino no ot omoton yo, komoyoon, kikiawi dot tulun kotorima dit suli do Kinoringan sid doo, mionong dit nongo-gagama yo sid koposiyon yo. ⁸Tu, ong maya tokow dit kenginan taraat tokow kondiri, aso bîida dot mananom tokow do karaatan, om mongomot tokow do kobinasa’an. Nga ong nunu nopo ot mangan tokow nga maya tokow dit tuduk dit Tatod do Kinoringan, aso bîida dot mananom tokow do kowosian om mongomot tokow dit koposiyon tototog, it itaak dit Tatod do Kinoringan. ⁹Ino nogi, kada tokow no kababasan mamaal dit tongo hal dit ongo-wawasi. Tu ong sampay orikot ot sompôori nga amu tokow tumingkod mamaal dit tongo hal dit ongo-wawasi, waro tuwa tawasi dot omoton tokow. ¹⁰Jadi, ugu po dino, tiya dot waro po ot poluang tokow mamaal do kowosian, kayow no mamaal do kowosian sid kikiawi ot tulun, keeso no babanar, ino-no, sid tongo koobpineeyan tokow dit mimoyo sid di Kristus.

Tupono om Salam dot Kopupuson

¹¹Intangay no babanar, iti tulisan tagayo no ot pongintutunan dot yoku kondiri ot minonulis diti bogian diti!

¹²It tongo tulun dit misingko-wawasi, om monotos mamajal dikoo supaya mokisunat kow, gisom eengin mokirayow dit tongo hal dit sid soribaw. Nga iso no ot tomodon doalo, mogidu mantad sid mangan sansara’o dit tongo tulun dot Yahudi. Tu isay nopo tulun dit monuduk dot it kinapatayan no di Kristus sid salip ot kasalamat do tulun, mangan sansara’o. ¹³Nga, insan-ko yoalo no kondiri tu nosunatan no, amu-i maya dit tadat om toturan dit Tukum di Musa. Nga kenginan doalo dot osunatan kow, supaya kopokirayow yoalo dit osunatan kow om it ajadi kow dot anggota doalo. ¹⁴Nga ong yoku, it kinapatayan di Tuhan tokow Yesus Kristus sid salip ot kenginan ku dot pokiraya’an ku. Tu obbuli boroson dot nakawaya oku no di Yesus dot nakapansang sid salip, om it tongo hal ditit pomogunan, aso no tarati baagi dogon, tu anggapon ku dot nakawaya no dot napatay, om yoku nga aso no tarati baagi dit tongo tulun sitid pomogunan. ¹⁵Tu it ki-sunat ko it aso sunat dot tulun, miduduwo nga amu-i oponting. Iso no ot oponting, ino-no, jumadi dot ugu-ko nurug wagu. ¹⁶Baagi dit kikiawi it tulun dit maya dit tudukan diti, om baagi dit tongo umat Israel dit nasanganu do Kinoringan, it Yahudi om it okon-ko Yahudi, barakatan ku ikoo supaya taakan kow do Kinoringan dot koosayan om kosianan. 6:16 umat Israel dit nasanganu do Kinoringan: Komoyoon di Paulus, it tongo tulun dit mimoyo di Kristus, kosuwang no sid umat wagu dot Israel, ino-no, it Karajaan do Kinoringan. Nga sâambil mintaduwa i Paulus supaya kikiawi it tongo tulun Yahudi, kotorima di Kristus, om supaya kosuwang-i yoalo sid Israel wagu.

¹⁷Sid pomupusan diti, pokionuwon ku sid dikoo dot, kada no dot waro po tulun dot monusa dogon kembagu. Tu sitid koyuwan ku diti, ki-tanda no dot yoku diti babanar-ko i Yesus ot sanganu, tu ki-ongo-kalas. ¹⁸Oy tongo koobpineeyan ku, kososogit konow sid saralom dit kosianan di Tuhan Yesus Kristus. Amin.