Efesus

Surat di Paulus

Kumaa sid Jemaat dot

Efesus

Popela’an

Iti nopo surat di Paulus diti, tinulis dialo kumaa sid tulun Kristian sid kota dot Efesus, tiya dit sid jiil yalo, tu, paabar yalo dit Tabar Tawasi ontok-ko i Tuhan Yesus Kristus. Ino nopot Efesus dino, iso ot kota sid Asia Tokodok, it bogian dot kotonobon dot Turki ong maakaa. Duwo toon laba’an i Paulus monuduk siri (Kis 19:8-10; 20:31). It tulun sid Efesus di gûulu, kapir po om kakal po nokuasa dit tongo rogon om ponoko-kinoringan doalo. Nga kadung notudukan yoalo di Paulus, minogidu no yoalo mantad sid kuasa do rogon (Kis 19:11-20). Jadi, pagka tu baya nokuasa yoalo dit tongo rogon, nanu dîiri di Paulus dot tema utama sid surat diti: it kuasa do Kinoringan, aso katalib dot kaagayo (Ef 1:19-21; 3:16, 20) om, “It lawanon tokow, okon-i-ko sandad tulun po, ino-i-nga tongo rogon (Ef 6:12).” Awasi ot kodudukan tokow tulun Kristian, tu tinaakan tokow di Kristus dit kikiawi it tongo barakat tosundu dit waro sid surga (1:3). Om tinaakan tokow dit Tatod Tosusi Yo sabagay ponogulu.

Suwang

Salam do kotimpuunan: 1:1-2

A. It rancangan do Kinoringan baagi dit umat Yo: 1:3–3:21

a. Kikiawi dit tongo barakat tosundu dit waro sid surga, nitaak sid daton tu nokeeso tokow no di Kristus: 1:3-23

b. Tinaakan tokow do koposiyon wagu, om minangan di Kristus popiiso’o it tongo tulun do Yahudi om it tongo tulun dit okon-ko Yahudi: 2:1–3:13

c. Doa di Paulus: supaya oorotiyan tokow songkuro kaagayo dit amu poongoyuu di Kristus daton: 3:14-21

B. It koposiyon wagu dot tulun Kristian: 4:1–6:20

a. It Kopiisa’an dot Jemaat Song-pomogunan om it Soro-susuway ot Sinundu: 4:1-16

b. Paada’o tokow no it bubuatan leed, ugu-ko it gama paada dit soosokot leed: 4:17–5:21

c. It bubuatan dit aaluk baagi sompusasawo, baagi tongo tanak om moleeng, om baagi turipon om tuan: 5:22–6:9

d. Toriyap miparang mantad sid Kinoringan tu lumawan do rogon: 6:10-20

Salam do Kopupuson: 6:21-24

Salam do Kotimpuunan

¹Iti surat diti mantad sid dogon i Paulus, it najadi do rasul di Kristus Yesus tu kinenginan do Kinoringan. Iti surat diti, irikot ku sid tongo umat sid Efesus, it mimoyo di Yesus Kristus. 1:1 Kis 18:19-21; 19:1 ²Kososogit konow sid saralom dit kosianan om koosayan do Kinoringan it Tama tokow om i Tuhan Yesus Kristus.

Tinaakan Tokow di Kristus dit Kikiawi it Tongo Barakat Tosundu dit Waro sid Surga

³Royo’o tokow no i Kinoringan, i Tama di Tuhan tokow Yesus Kristus, tu Yalo no ot minanaak daton dit kikiawi it tongo barakat tosundu dit waro sid surga, 1:3 sid surga Harfiah: sid tongo tawan. It pongitungan dit tongo tulun Yahudi om Yunani kodori, miinong-i dit pongitungan dit tongo Momogun kodori, tu turu mitingkat kabarasan ot tawan. Ii-nopo tingkat koturu diri kabarasan, iiyonon do Kinoringan. Om ii-nopo onom mitingkat diri kabarasan, iiyonon dit tongo rogon om moleekat (intangay sid Ef 6:12). Aso poongoreetan dot surga sid boros do Yunani: surga nga reetan-i dot tawan. tu nokeeso tokow no di Kristus. ⁴Amu po noorug iti pomogunan, nopili tokow no mâantad do Kinoringan dot mangan peeso’o sid di Kristus, supaya osusi om aso karaatan tokow sid tinoguwangon Yo. Pagka tu otoluod i Kinoringan, ⁵kinenginan Yo om tinantu Yo mantad dit timpuun po, dot itokow diti, jodion Yo dot tanak Yo, dot i Yesus Kristus ot bantaran. Sagay winaal Dialo ot tirad diri, ⁶supaya royo’on tokow Yalo, tu agayo banar om aso gisom dit kosianan Yo dit nitaak Yo sid daton, dot it Tanak Yo dit amu Yo koyuyuuan ot bantaran. ⁷Tu it raa dit kinapatayan di Kristus ot pinongolukat daton mantad sid tongo duso tokow. Komoyoon, noompunan no do Kinoringan it duso tokow tu okon-ko aalang-alang kaagayo 1:7 Kol 1:14 ⁸om koogumu dit kosianan Yo sid daton. Om minangan tokow po Doo taakay dot soro-susuway ot kopintaro om pongoorotiyan, ⁹tu pongilo dit rancangan do Kinoringan dit niraasia Yo di gûulu, it niintalang Yo maakaa. It rancangan dino, kinenginan Yo om tinantu Yo mâantad dot i Kristus ot papanaw. ¹⁰Om it rancangan Yo dino, pongoyon Yo-i sid masa dit natantu Yo no mâantad. Jadi, it rancangan Yo dino, ino-no, popiiso dit nunu nopo it nurug Yo, ii-ka it sid surga, keenong it sid pomogunan, dot i Kristus ot kotua.

¹¹Andang gama’on do Kinoringan it nunu nopo maya dit kenginan Yo. Tu, mantad dit timpuun po, nopili tokow no mâantad Doo, tu eengin Yalo dot ajadi tokow dot umat Yo, dot it piisa’an tokow di Kristus ot pawaya’an. ¹²It tomodon do Kinoringan momili dagay, supaya yokoy, tulun Yahudi, it gulu dot mangarap di Kristus, kadapat okoy mangangat dit tongo tulun wookon dot mangarayow dit kasawato dit ngaran do Kinoringan! ¹³Ikoo dit okon-ko tulun dot Yahudi, nga minimoyo-i tiya dit nokorongow kow dit tudukan tabanar, ino-no it Tabar Tawasi, it kasalamat dikoo. Pagka nokeeso kow no di Kristus, tinaakan kow dîiri do Kinoringan dit Tatod Tosusi Yo, dit najanji Yo mâantad, tu pinananda dot ikoo dino, i Kinoringan no ot sanganu. 1:13 Kis 15:6-7 ¹⁴Om i Tatod Tosusi no ot ponogulu dit tongo barakat wookon it najanji mâantad do Kinoringan sid tongo umat Yo. Inot tongo barakat dino, aanu tokow dot orikot ot pamangayan dit panalamatan Yo daton. Jadi aaluk no babanar dot royo’on om insawatan tokow i Kinoringan.

Mintaduwa i Paulus Supaya it Tongo Kristian sid Efesus Kaarati dit Pangkat di Kristus

¹⁵Mantad dit norongow ku it tabar ontok-ko it koosipan duyu sid Tuhan Yesus om it toluod duyu sid kikiawi it tongo umat, ¹⁶aso putut ku monorimakasi sid Kinoringan baagi dikoo. Om titikid ong mintaduwa oku, owîiton ku nopo ikoo sid doa ku. ¹⁷Mokisisian oku sid Kinoringan di Tuhan tokow Yesus Kristus, it Tama dit landu koosundu, supaya taakan kow Dialo dit Tatod Tosusi Yo. It Tatod dino, popintar dikoo om pentalang do Kinoringan sid dikoo, sampay kotutun kow nôono babanar do Kinoringan. ¹⁸Om mintaduwa oku po sid Kinoringan supaya koongkalat it mato dit ginawo duyu, om oorotiyan duyu nôono dot nunu song-tarapan it sid suwang dit kinoponginloowan Yo dikoo. Om supaya ela’an duyu songkuro kaagayo dit barakat dit najanji do Kinoringan kumaa sid umat Yo. ¹⁹Mintaduwa oku po supaya ela’an duyu dot songkuro kaagayo dit kuasa Yo baagi daton it tulun dit mimoyo. It kuasa dino, miinong kaagayo dit kosunduwo Yo ²⁰dit pinakay Yo mamasi di Kristus mantad sid kapatayan. Om it kosunduwo no diri ot pinakay Yo poogom di Kristus ponong sid wanan Yo sid surga dot momorinta. 1:20 surga Harfiah: Tongo tawan. Intangay ot panarangan sid Ef 1:3.1:20 Mzm 110:1

²¹It sino dino, i Kristus no ot asawat mantad-ko it kikiawi it tongo rogon dit monguasa om momorinta, om apangkat mantad dit nunu nopo ot apangkat sitid zaman diti om sid zaman dit rumikot. ²²Kikiawi dit nunu nopo, nipokuasa no do Kinoringan di Kristus, om pinangkat po do Kinoringan i Kristus dot ugu-ko tulu dit jemaat song-pomogunan, tu monguasa dit nunu nopo. 1:22 Mzm 8:7 ²³It jemaat dot song-pomogunan diti, it ugu-ko koyuwan di Kristus, sukupon om imponuan di Kristus dit kuasa Yo. Om kikiawi dit nunu nopo om siombo nopo nga sukupon om imponuan di Kristus dit kuasa Yo. 1:22-23 Kol 1:18

It Kowosian do Kinoringan ot Manalamat Daton

¹Ikoo dino, ugu-ko minatay kow no di gûulu, daagan dit tongo karaatan om duso duyu. ²It tiya diri, minaya kow dit koobasan dot dang pomogunan. Komoyoon, minaya kow dit Raja do Rogon, it monguasa sid tawan, om it monguasa dit tongo ginawo om pongitungan dat tongo tulun tidîino, it aa mimoyo di Kristus.³Sabanar no, itokow kikiawi nga ugu-i doalo di gûulu, tu minaya tokow dit kenginan taraat tokow kondiri, dot it tiwow om it pongitungan taraat ot potuudan. Komoyoon, miinong tokow-i doalo tu kaarasangan-i do Kinoringan.

⁴Nga, pagka tu landu ot koobing-sianan do Kinoringan sid daton om babanar-ko monoluod Yalo daton, ⁵nokuro ong obbuli boroson dot minatay tokow no daagan dit duso tokow, nga minangan tokow-i Doo posiyay kembagu dot nakawaya tokow no di Kristus masi. Jadi, it kogoyo’o dit kosianan do Kinoringan ot minanalamat daton. 2:1-5 Kol 2:13 ⁶Pagka tu nokeeso tokow no di Kristus Yesus, nakawaya tokow nôono Doo dot pinosiyan do Kinoringan, om nakawaya tokow nôono Dialo momorinta sid surga. 2:6: surga Harfiah: Tongo tawan. Intangay ot panarangan sid Ef 1:3.2:6 Mat 19:28; Luk 22:30; Why 3:21

⁷Sagay ugu diri ot gama do Kinoringan, supaya sid tongo zaman dot rumikot, kokito kikiawi ot tulun dot aso katalib dit kaagayo dit kosianan do Kinoringan. It kosianan do Kinoringan dino, kembulay sid gama di Kristus Yesus monoluod daton. ⁸Okon-ko nunu po kinapanalamatan do Kinoringan dikoo, ino-i-nga it kosianan do Kinoringan kumaa sid dikoo tu mimoyo kow di Yesus. It kasalamatan dino, nitaak bâanar do Kinoringan. Jadi, okon-ko momoros kow dot, “Sinalamat oku do Kinoringan tu ongo-wawâasi nopo ot mangan ku,” ka. ⁹Tu it kasalamatan tokow diri okon-ko mantad po sid kinapanatan tokow, supaya asot tulun dot kopokirayow. ¹⁰Tu itokow nopo diti, nurug do Kinoringan om najadi tokow no dot tulun wagu tu nokeeso tokow no di Kristus Yesus, supaya mamaal tokow dit tongo gagama’on tawasi, it nosodia mâantad do Kinoringan.

I Kristus ot Popiiso dit Tongo Bansa

¹¹Ikoo oy tongo koobpineeyan ku dit okon-ko Yahudi! Ondomo duyu no, dot it gûulu diri, boroson kow dit tongo tulun Yahudi dot, “aso sunat duyu,” ka, tu okon-ko tulun kow po dot Yahudi om amu kow nokosuwang sid pinijonjiyan do Kinoringan. Om yoalo nopo tu tulun dot Yahudi, reetan doalo dot “ki-sunat” it kondiri yo. Babanar-i-ko ki-sunat-i dara yoalo, nga it sunat doalo diri, sid koyuwan no, tu tulun ot minonunat. ¹²It tiya diri, osodu kow po sid di Kristus, om amu kow po nokosuwang sid bansa dot Israel, it tongo umat dit nopili do Kinoringan. Om amu kow po koompit sid pinijonjiyan do Kinoringan sid tongo umat Yo keenong sid janji Yo dot monuu dit Raja Maanalamat. Komoyoon, it koposiyon duyu sitid pomogunan di gûulu, aso tarapan om aso Kinoringan.

¹³Nga ong at maakaa dino, pagka tu nokeeso kow no di Kristus Yesus, ikoo dit osodu gûulu mantad sid Kinoringan, niinsomok kow dit raa dit kinapatayan di Kristus. ¹⁴Tu i Kristus kondiri ot pinopiusay dagay om ikoo, ino-no it tulun dot Yahudi om it tulun dit okon-ko Yahudi, supaya kopiiso tokow om ajadi tokow dot iso no bansa. Minangan Dialo uyaso it tobon dit popitongkiyad daton, ino-no it mitodok ot wulu. Nitaak Yo it koyuwan Yo dot ipapatay sid salip, ¹⁵tu pananus dit Tukum di Musa om it nunu nopo song-tadat om it tongo pinonuu’an dit nokotulis siri, supaya miduduwo dit bansa diri, ajadi dot iso no ot bansa dot wagu. Tu it Tukum di Musa no ot puun dot mitodok ot wulu dit duwo it bansa diri. Iri no gama di Kristus popiusay dit duwo it bansa diri. ¹⁶It kinapatayan no di Kristus sid salip diri ot pinananus dit pimusuan, tu popiiso dit duwo it bansa diri, supaya ajadi dot ugu-ko iso not koyuwan, om popiusay doalo om i Kinoringan. 2:16 Kol 1:20 ¹⁷Jadi, rinumikot i Kristus tu paabar dit Tabar dot kopiusayan kumaa sid dikoo, tulun dit okon-ko Yahudi, it osodu sid Kinoringan gûulu om kumaa sid dagay tulun Yahudi, it osomok sid Kinoringan. 2:17 Yes 57:19 ¹⁸Tu, pagka nokeeso tokow no di Kristus, kikiawi daton, ii-ka tulun Yahudi ko it okon-ko Yahudi, kadapat tokow nôono minsomok sid Kinoringan it Tama, dot iso no it Tatod Tosusi ot waya’an.

¹⁹Jadi ugu po dino, ikoo dit okon poma-ko Yahudi, okon-no-ko tulun kow po dot suuway ot bansa ko tulun dit gisom nokotungkap, ino-i-nga najadi kow no dot umat do Kinoringan, raayat sid Karajaan Yo, om sirang do Kinoringan. ²⁰Itokow diti ugu-ko iso walay, dot ii-nopo torigi nga it tudukan dit tongo rasul om tongo nabi, 2:20 nabi Tafsiran 2: poolombus do nubuat. Kiikiro ong “nabi” yoalo, komoyoon, yoalo dino, it tongo nabi sid Pinijonjiyan Leed (Perjanjian Lama) dit iseeso ot pangkat dit tongo rasul sid Pinijonjiyan Wagu. Nga kiikiro ong “poolombus do nubuat” yoalo, komoyoon, yoalo dino, tulun dit sid Pinijonjiyan Wagu (Perjanjian Baru) dit numbur duwa dot rasul ot pangkat. dot i Kristus no ot soripal ko pinaagaman. ²¹Sid di Kristus no ot koogomon dit walay diri, dot makin gumayo om oolud ot gama mamaal, sampay ajadi nôono dot iso walay tosusi dit andang-âandang nga dang Tuhan. ²²Pagka tu nokeeso tokow no di Kristus, nunu nopo ot bansa tokow, itokow no ot ajadi dot pakakas dot pamaal dit walay dit iyonon do Kinoringan, tu sino no it Tatod Tosusi miyon.

Paabar i Paulus dit Raasia do Kinoringan sid Tongo Tulun dit Okon-ko Yahudi

¹Yoku diti, i Paulus, nojiil tu sinuu okoy di Kristus Yesus mangalayan dikoo, tulun dit okon-ko Yahudi. ²Andang norongow duyu no it kosianan do Kinoringan kumaa sid dogon, tu tinaakan oku Doo dot tugas dot moonuduk dikoo. ³Minangan do Kinoringan pembulayo sid dogon it raasia Yo, ugu-ko it nokotulis ku silod sawat dot onibak ot gama. ⁴Kadung abaca duyu iri, siri ot kela’an duyu dit pongoorotiyan ku dit raasia ontok-ko i Kristus. 3:3-4 Ef 1:9-10 ⁵It gûulu, amu niilo sid tongo tulun it raasia diri, nga maakaa diti, minangan pembulayo dit Tatod Tosusi do Kinoringan kumaa sid tongo rasul om sid tongo nabi 3:5 nabi: It poolombus do nubuat dit komoyoon siti diti, amu miinong dit tongo nabi kodori, ino-i-nga it anggota biasa dit keelo monorima om polombus do nubuat do Kinoringan. Sid bahasa asli, iseeso ot poongoreetan dot “nabi” om “poolombus do nubuat,” nga kopisuway ot pangkat om gama’on doalo sid Pinijonjiyan Leed (Perjanjian Lama) om sid Pinijonjiyan Wagu (Perjanjian Baru). Yo dit osusi. ⁶It raasia diri, ino-no: It tulun dit okon-poma-ko Yahudi nga koompit-i dit tongo tulun Yahudi dit tongo barakat mantad sid Kinoringan, tu mimoyo yoalo dit Tabar Tawasi. Om it duwo bansa diri, najadi no dot pakakas sid iso koyuwan, om kaanu dit nijanji do Kinoringan tu nokeeso no di Yesus Kristus. 3:4-6 Kol 1:26-27

⁷Mantad sid kosianan do Kinoringan, tinaakan oku Doo do tugas dot paabar dit Tabar Tawasi diri, dot it kuasa Yo ot pokudarat dogon. ⁸Kikiawi dot umat do Kinoringan, yoku no ot landu koosiba. Nga, yoku ot nisusuuldo Kinoringan manaak dot tugas dot paabar dit Tabar Tawasi kumaa sid tulun dit okon-ko Yahudi ontok-ko it barakat mantad sid di Kristus. It kogoyo’o dit barakat Yo dino, amu otolop dot tulun mongitung. ⁹Om sinuu oku po do Kinoringan dot patarang sid kikiawi ot tulun dot okukuro gama do Kinoringan papanaw dit rancangan Yo dit niraasia Yo diri. Tu mantad po di kodori, it rancangan dino, niraasia do Kinoringan, it Minongurug dot Pomogunan. ¹⁰Tomodon nopo do Kinoringan, supaya maakaa diti, eemot dit tongo rogon dit momorinta om monguasa sid tawan 3:10 tawan Harfiah: Tongo tawan. Intangay ot panarangan sid Ef 1:3; 6:12.dot songkuro karalom dit kopintaran do Kinoringan dit masam ragi, dot sid jemaat song-pomogunan ot kokitanan.

¹¹Iri no ot rancangan do Kinoringan, mantad dit amu po noorug iti pomogunan, it nipanaw di Kristus Yesus i Tuhan tokow. ¹²Pagka mimoyo tokow di Kristus om nokeeso tokow no Doo, obebas tokow no minsomok do Kinoringan, dot oponu ot koyokinan. ¹³Ino nogi, pokionuwon ku sid dikoo, dot amu apalo ot ginawo duyu, dot nokorongow kow dit kasansara’an ku baagi dikoo. Tu iti kasansara’an ku diti, koontungan duyu.

Doa di Paulus

¹⁴Eetung ku it rancangan tagayo do Kinoringan diri, sumingkotud oku sumamba sid Kinoringan, it Tama tokow. ¹⁵Yino no ot ponoko-Tama dit kikiawi it tongo bansa dit tongo moleekat dit miyon sid surga om tongo bansa dot tulun sitid pomogunan. ¹⁶Mintaduwa oku sid Kinoringan, it amu milod owion ot kuasa, supaya impapagan dit Tatod Yo it ginawo duyu. ¹⁷Om mokisisian oku sid Kinoringan supaya miyon i Kristus sid ginawo duyu pasal mimoyo kow Doo, dot it toluod di Kristus ot pamatog dit koosipan duyu, sampay ikoo nga mitotoluod nôono. ¹⁸Ong kaa dino, kawaya kow dit kikiawi it tongo umat tosusi, dot kadapat kow mangaarati dit kosiwango, konoruwo, kasawato om korolomo dit amu poongoyuu di Kristus dikoo, ¹⁹it amu otolop babanar dot tulun mangaarati. Nga pintaduwa’an ku ikoo supaya otolop duyu babanar mangaarati it amu poongoyuu di Kristus dikoo, sampay aawi-awi sid dikoo it kobubuatano do Kinoringan.

²⁰Royo’o tokow no i Kinoringan, tu ki-kuasa Yalo mamaal dot ogumu mantad dit pokionuwon om it itungon tokow, dot kopionong dit kuasa Yo dit gumama sid daton. ²¹Pitutungkusay tokow no monginsawat i Kinoringan sid jemaat, dot i Kristus Yesus ot pawaya’an. Royo’o tokow no Yalo sampay misingkoleed. Amin.

Kopiisa’an dot Umat Song-pomogunan om Sinundu dot Soro-susuway

¹Ela’an duyu-i dot kojijiil ku nopo diti, nga daagan dot mangalayan di Tuhan. Jadi pokionuwon ku babanar sid dikoo dot atago duyu no it bubuatan duyu, supaya it bubuatan duyu dino, mionong dit kinoponginloowan do Kinoringan dikoo. ²Posiba’o duyu no ot ginawo duyu, dot osulimod om alanut. Pembulayo duyu it toluod duyu, dot amu kow mitotoyow. 4:2 Kol 3:12-13 ³Totoso duyu no babanar miusay, supaya opiara duyu it kopiisa’an dit nitaak di Tatod Tosusi. ⁴Tu itokow nopo diti, najadi dot irad-ko iso not koyuwan, dot ki-Tatod Tosusi dot iso no. Ugu keeno no it kinoponginloowan dikoo, supaya eeniyo kow dot kasanganu dit tarapan dit iso no diri. ⁵Iso no ot Tuhan, iso no ot koosipan, om iso no i Yesus ot kinopomodsuan daton. ⁶Om itokow diti, iso no Kinoringan om iso no ot Tama tokow kikiawi. Yalo no ot momorinta daton kikiawi, kumaraja sid daton kikiawi, om miyon sid daton kikiawi.

⁷Nga, titikid daton nokotorima no dit doo om doo dot sinundu, 4:7 sinundu Malayu: karunia roh atau bakat rohani maya dit sukatan dit itaak di Kristus. ⁸Ino no ot sabap dot noboros sid Kitab ontok-ko i Kristus dot,

“Tiya dit nakamanang Yalo sid piparangan, mininsawat Yalo sid asawat babanar,

nowit Dialo it tongo tulun dit natabpa’an Yo;

om pining-taakan Yo it tongo tulun Yo sitid riniba dot soro-susuway ot odia,”

ka. 4:8 Mzm 68:19

⁹Na, pagka noboros dot, “Mininsawat Yalo” ka, komoyoon nopo nga minindoo po Yalo mogulu sid saralom dot tana om mininsawat nogi kembagu. ¹⁰Yalo dit minindoo diri, Yalo nobo it mininsawat sid asawat babanar mantad-ko at tongo tawan, supaya oponu dit kuasa Yo iti pomogunan. ¹¹Jadi, i Kristus no diri ot minanaak sid tongo tulun dit doo om doo dot sinundu. Waro nong rasul, waro nong nabi, waro nong pa’abar dit Tabar Tawasi, om waro nong tongo gambala om tongo guru. ¹²Sagay kinaa do Kinoringan iri, supaya osukup it umat Yo kumaraja sid palayanan, baagi dot keengkakatan dot jemaat, ino-no it koyuwan di Kristus. ¹³Ugu po dino, subay-ko totoson tokow pengkakat ot jemaat, sampay kopiiso tokow sid koosipan, om kopiiso ot pongoorotiyan ontok-ko it Tanak do Kinoringan, sampay osukod tokow nôono sid koosipan, om sampay aawi-awi sid daton it kobuatano do Kinoringan dit ugu-ko it waro sid di Kristus.

¹⁴Jadi, itokow diti, okon-no-ko ugu-ko tanganak po, dit ugu-ko osoogi dot sarup tu miboboyo dot popiwowowoson dit titikid it tudukan dot tulun dit otuakal om moomudut. ¹⁵Ino-i-nga, subay-ko iintalang tokow it tudukan tabanar, dot mitotoluod ot gama, om sumurut it bubuatan tokow dit awasi, supaya koogu tokow dit bubuatan di Kristus, it ponoko-tulu tokow. ¹⁶Tu i Kristus no ot kinopioputan dit tongo anggota jemaat, ugu-ko it tulu sid iso ot koyuwan, tu iri no ot kinopioputan dit tongo tuat om piukakaban om kikiawi dit pakakas sid koyuwan. Jadi kaa po dino, ong titikid dit pakakas dot koyuwan diri nga eelo papanaw dit doo om doo dot tugas, dot oonong ot padgama, komoyoon, sumurut om gumayo nôono it koyuwan diri tu mitotoluod. 4:16 Kol 2:19

Koposiyon Kaawagu dit Tulun dit Nokeeso no di Kristus

¹⁷Kaa po dino, apatong ot gama ku momoros sid dikoo, dot isasi ku i Tuhan: Kada kow no dot ugu-ko it tulun kapir, it aso paadakan dit pongitungan. ¹⁸Tu yoalo diri, asot oororotîiyan. Osodu yoalo mantad sid koposiyon dit nitaak do Kinoringan, tu tad-pom asot pongila’an doalo ontok-ko i Kinoringan, tu okodow it ginawo doalo. ¹⁹Amu no kopurimon yoalo dot eekukuman, sampay aso gisom monumboyo dit tiwow dit koosomu om mamaal dit nunu nopo it kalaalasu.

²⁰Nga, okon-ko ugu keeri poobo it noomitan duyu sid di Kristus. ²¹Tu, andang baya nokorongow kow no pasal di Kristus. Om notudukan kow no dit tudukan tabanar, ontok-ko it padpasi di Yesus. ²²Ino nogi, paada’o duyu no it bubuatan leed om it koposiyon leed duyu, ugu-ko it gama paada dit soosokot leed. Tu it bubuatan leed duyu diri, mangaraag dikoo, tu okuasa kow dit kenginan taraat duyu dit kapalid. 4:22 Kol 3:9 ²³Ino nogi, subay-ko inwoguwan it ginawo om pongitungan duyu dit Tatod do Kinoringan. ²⁴Om subay-ko ugu-ko it gama mamakay dot baju wagu, ot gama duyu jumadi dot tulun wagu, it nurug do Kinoringan dot niinsu’uw dit bubuatan Yo. Komoyoon, ikoo dino, ajadi nôono dot tulun dit babanar-ko osusi om monotos mamaal dit kenginan do Kinoringan. 4:24 Kej 1:26; Kol 3:10

²⁵Pagka ugu dino, kada kow no miwuwudut. Pomoros kow no dot babanar sid tulun wookon, tu kikiawi daton diti pakakas dit koyuwan di Kristus. 4:25 Za 8:16 ²⁶Om kadung rumasang kow, kada sampay dot aratu kow sid duso, om it rasang duyu dino, kadaay duyu no owito modop, 4:26 Mzm 4:5 (LXX) ²⁷supaya amu tokow kapanaak di rogon dot iyonon sid ginawo tokow. ²⁸It tulun dit maanakaw, tumingkod no manakaw. Gaam po monotos gumama kondiri, supaya waro balanja yo om koponulung po dit tulun wookon dit osompitan.

²⁹Ong momoros kow, okon-ko momoros kow dot koosomu, ko it koruol do ginawo dot tulun. Ino-i-nga, pomoros kow no dit boros dit awasi, it keenwasi do ginawo dot tulun mionong dit koporoluan, supaya it boros duyu diri, ajadi dot barakat sid tulun dit mokinongow. ³⁰Om, kadaay duyu pokorualay do ginawo it Tatod Tosusi do Kinoringan, tu Yalo no ot pinananda do Kinoringan dikoo, dot nasanganu kow Doo, mising-korikot dit tadlaw dot panalamatan om pongolukatan dikoo. ³¹Tonuso duyu kikiawi it ruol do ginawo, it tigiranan, it rumasang, it migaga, om it simbaal. Om tingkaday no kikiawi it pugiginawo dit eengin mamaal dot araat sid tulun. ³²Powosio duyu no ot ginawo om pisisianan kow no, om pi’a’ampun kow no do kasala’an, dot ugu-ko it gama do Kinoringan mangampun dit kasala’an duyu tu nokeeso kow no di Kristus. 4:32 Kol 3:13; Mat 18:21-35

Masi sid Anawaw

¹Pagka ikoo dino, tu tongo tanganak kow no do Kinoringan, dit amu Yo koyuuan, tiruwan kow no do Kinoringan. ²Pentalango duyu no it bubuatan duyu dot otoluod kow, ugu-ko i Kristus tu pinentalang dit toluod Yo sid daton. Minanganggur Yalo matay baagi daton, dot jinumadi dot pangaraa dit orongolis, om kasanang di ginawo do Kinoringan. 5:2 Kel 29:18; Mzm 40:7

³Pagka umat tosusi kow no do Kinoringan, amu no apatut po dot oreetan sinod dikoo it kalaalasu, kobuatano dit koosomu ko it mooginokupan. ⁴It boboroson dit ogilat, it aso guna, om it koosomu, amu no aaluk dot oboros duyu po. Daapun-i ot aaluk, ino-no monorimakasi kow sid Kinoringan. ⁵Jadi, ondomo duyu no babanar dot: Asot îiso ot tulun dit maamaal do kalaalasu, maamaal dot koosomu, it mooginokupan ot ajadi dot raayat sid Karajaan di Kristus om i Kinoringan. Tu it mooginokupan, aso bîida dot sumamba dot ponoko-kinoringan. ⁶Kada kow no mokipalid dit wudut dot tulun dit momoros dot, “Okon-ko koduso peeri,” ka. Tu it tongo bubuatan taraat diri, kaarasangan do Kinoringan sid tongo tulun dit amu maya dit boros Yo. ⁷Jadi, okon-ko kumoruang kow dit tulun dit ugu keeno.

⁸It gûulu, ugu-ko sid kotuwangan ot koposiyon duyu. Nga, pagka tu nokeeso kow no di Tuhan, sid kanawa’an dîiri ot koposiyon duyu. Jadi, it bubuatan duyu, subay-ko ugu-ko it tulun dit masi sid tanawaw. 5:8 Kol 1:12-13 ⁹Tu it koposiyon sid tanawaw, pembulay dit gagama’on tawasi, aadil om otulid. ¹⁰Totoso duyu no mongilo it kenginan di Tuhan. ¹¹Okon-no-ko maya kow po dit gagama’on dit aso guna, ino-no it gagama’on dit tulun dit kakal po sid kotuwangan. Gaam nogi, mangay duyu pentalango ot karaatan dit gagama’on doalo dit aso guna diri. ¹²Tu, it gagama’on doalo dit olosok diri, oreetan nôopo nga kamaamalu no babanar. ¹³Nga sesêera ong mangan duyu pentalango sid tanawaw it ginama doalo sid kotuwangan diri, andang-ko ela’an no dot iri diri, araat. ¹⁴Tu ong sid tanawaw, okitanan kikiawi. Sagay pogi-om naanu dot sasambatan dot,

“Posik kow no, oy nongo-koodop,

om tungag kow no mantad sid kapatayan!

Om inawa’an kow nôono dit linawaw di Kristus,”

ka.

¹⁵Ino nogi, tandayay duyu no babanar inot bubuatan duyu. Kada kow kolowong, ino-i-nga, kopintar kow no. ¹⁶Om tandayay duyu no mamakay it kosiwatan dit waro sid dikoo, tu itit tiidino, ongo-ra’at ot gama’on dot tulun. 5:16 Kol 4:5 ¹⁷Kada kow kolowong, ino-i-nga orotiyo duyu no babanar it kenginan di Tuhan. ¹⁸Okon-ko magawuk kow, tu karaag dot koposiyon duyu. Ino-i-nga pokikuasa kow no dit Tatod Tosusi. ¹⁹Sid gama duyu mipupuransang, lolonuwo duyu no it tongo Mazmur, it tongo laalanu dot mangarayow do Kinoringan om it tongo laalanu dit nituduk di Tatod Tosusi. Pinlalanu kow no om pangarayow kow no do Tuhan dot aawi-awi ot ginawo. ²⁰Ponorimakasi kow no sid Tuhan i Tama dot aso gisom, baagi dit nunu nopo, sid ngaran di Tuhan tokow Yesus Kristus. 5:19-20 Kol 3:16-17

Sompusasawo

²¹Pi’insiba kow no do ginawo, dot rumonok di Kristus.

²²Ikoo oy tongo tongondu dit ki-sawo no! Taat kow no sid sawo duyu, ugu-ko it gama duyu tumaat sid Tuhan. 5:22 Kol 3:18; 1Ptr 3:1 ²³Tu it kusay no ot kotua dit sawo yo, ugu-ko i Kristus tu kotua dit jemaat song-pomogunan. Om Yalo no ot Maanalamat dit jemaat diri, ino-no it ugu-ko it koyuwan Yo. ²⁴Jadi, kukuro nopo ot gama dit jemaat song-pomogunan diri tumaat sid di Kristus, subay-ko it tongondu nga ugu keeno-i ot gama tumaat sid sawo yo, sid nunu nopo ot hal.

²⁵Ikoo oy tongo kusay dit ki-sawo no! Toluodo duyu no it sawo duyu, ugu-ko it poonoluod di Kristus dit jemaat song-pomogunan, tu minanganggur Yalo matay baagi dit jemaat diri. 5:25 Kol 3:19; 1Ptr 3:7 ²⁶Sagay ugu diri ot gama di Kristus, tu monusi Yalo dit jemaat Yo, dot it pinomodsuan om it Boros Yo ot ponusi, 5:26-27 it pinomodsuan: Sid gama dit tongo tulun Yahudi misasawo, podsuon po do weeg it pangantin dot tongondu om panampakayon nogi dit baju pangantin. Om owiton nogi tumoguwang sid pangantin do kusay. Itokow umat di Kristus nga pinodsu-i (binaptis-i), supaya asanganu tokow Doo, ugu-ko it pangantin dot tongondu dit sowo’on. It baju dit aso murong, ino-no it bubuatan tosusi dit tongo umat do Kinoringan (intangay sid Why 19:7-8).5:26 Ef 1:13; Tit 3:5; Yoh 13:10; 15:3 ²⁷supaya keeyon Yo it jemaat diri sid tinoguwangon Yo, ugu-ko it pangantin dot tongondu dit alanji, amu ojunggut, om aso murong, ino-i-nga osusi om sâabat poma nga aso karaatan.

²⁸It kusay nga ugu keeno-i, tu subay-ko monoluod dit sawo yo, ugu-ko it poonoluod yo no dit koyuwan yo kondiri: Tu isay nopo kusay dot monoluod dit sawo yo, komoyoon, monoluod-i dit kondiri yo. ²⁹Tu, aso po tulun nokoombal dot asana dit koyuwan yo kondiri. Ino-i-nga pakanon om piara’on yo it koyuwan yo, ugu-ko it gama di Kristus mangajaga dit jemaat, ³⁰tu tokow diti, pakakas dit koyuwan di Kristus. ³¹“Ino no ot sabap dot, it tanak kusay, tumongkiyad dot tidi om tama, tu miiso dit sawo yo, om ajadi yoalo miduduwo dot iso no ot koyuwan,” ka dit Kitab. 5:31 Kej 2:24 ³²It ayat diti, warot komoyoon dot olosok, nga ong dogon do pongoorotiyan, ino-no, it kopiisa’an di Kristus om it jemaat. ³³Nga, waro-i ot kopianangan sid dikoo, ino-no, titikid dit kusay, subay-ko monoluod dit sawo yo, dot ugu-ko it poonoluod yo no dit kondiri yo. Om titikid dit tongondu, subay-ko mongorumat dit sawo yo.

Tanak om Moleeng

¹Ikoo oy tongo tanak kow, tonudo duyu no it tudukan dit moleeng duyu, tu ino no ot aaluk do mangan duyu tu nokeeso kow no di Tuhan. 6:1 Kol 3:20 ²Ino-no, “Orumato no it tidi om tama nu,” ka. Iri no ot pinonuu’an keeso do Kinoringan dit tinonudan Yo do janji dot, ³“supaya ososogit om otoguy kow sitid pomogunan,” ka. 6:2-3 Kel 20:12; Ul 5:16

⁴Om ikoo oy tongo tama kow, okon-ko pokorualan duyu do ginawo it tongo tanak duyu. Ino-i nga, suruto duyu no yoalo dit tudukan om tiag di Tuhan. 6:4 Kol 3:21

Turipon om Tuan

⁵Ikoo oy tongo turipon kow, taato duyu no it tuan duyu sitid pomogunan dot rumonok om mongorumat kow dialo. Puguo duyu no ot ginawo duyu kumaraja dot nunu nopo, ugu-ko it gama duyu maya dit nisuu di Kristus. ⁶Nga, okon-ko tiya no dit intatangan kow dit tuan duyu, tu kumoroyo’on kow nôopo dialo. Ino-i-nga, owiwio duyu no maya dit kenginan do Kinoringan, tu ikoo dino, turipon di Kristus. ⁷Gama’o duyu it karaja duyu dot otomon ot ginawo duyu, tu sabanar no, mad-ko i Tuhan ot layanon duyu dino, okon-ko gisom tulun no. ⁸Ondomo duyu no, dot titikid ot tulun, ii-ka it turipon ko it okon-ko turipon, kotorima-i dit isuli di Tuhan baagi dit ongo-wawasi it ginama yo. 6:5-8 Kol 3:22-25

⁹Ikoo oy tongo tuan kow! Wosio duyu no ot pangataakan duyu dot turipon duyu. Okon-ko mangan duyu poronoko yoalo. Ondomo duyu no dot, ikoo om it turipon duyu, iso-i ot Tuan, ino-no i Tuhan sid surga it amu momingig dot tulun. 6:9 Ul 10:17; Kol 3:25; 4:1

Toriyap Miparang Mantad sid Kinoringan

¹⁰Pomupusan dot boroson ku sid dikoo, patog kow no sid Tuhan, dot it kuasa tagayo di Tuhan ot kapatagan duyu, tu nokeeso kow no Doo. ¹¹Om mangay duyu no pakayo it toriyap miparang mantad sid Kinoringan, supaya kadapat kow lumawan dit takal-akalan do rogon. ¹²Tu it lawanon tokow okon-i-ko sandad tulun po, ino-i-nga tongo rogon om it tongo pomimpin doalo dit momorinta om monguasa sid tawan, 6:12 tawan Harfiah: tongo tawan. I minilalapis it onom ot tawan it iiyonon dit tongo-susundu om rogon ot ot komoyoon. Intangay ot panarangan sid Ef 1:3. it monguasa ditit zaman taraat, om it tongo mogkuasa do kotuwangan.

¹³Ino nogi, mangay duyu pakayo it dang Kinoringan dot toriyap miparang, supaya ong orikot it tadlaw taraat diri, kadapat kow lumawan dit musu duyu, dot kakal kow-i pengkakat sampay opongo miparang. ¹⁴Jadi, sintor kow no mingkakat! Ii-nopo ponoko-tagkos duyu, ino-no it tudukan tabanar, om ii-nopo ponoko-kolid do kangkab duyu, ino-no it gama mamaal dit kenginan do Kinoringan. 6:14 Yes 11:5; 59:17 ¹⁵Ponong-kasut kow no dit ginawo dit neeso babanar paabar dit Tabar Tawasi, dot popeelo sid tongo tulun dot itokow om i Kinoringan, kadapat-i miusay.6:15 Yes 52:7 ¹⁶Kadaay duyu latangay mamakay it koosipan, dot ponoko-kolid sid longon duyu. Tu it koosipan duyu diri ot kopisok dit ramok do rogon dit ki-tapuy. ¹⁷Om torima’o duyu no it kasalamatan mantad sid Kinoringan, dot ugu-ko ponoko-tupi duyu dot basi, om ponong-sapadang kow no dit sapadang dit nitaak di Tatod Tosusi, ino-no it boros do Kinoringan. 6:17 Yes 59:17 ¹⁸Gama’o duyu kikiawi ino, meed dot mintaduwa om mokitulung do Kinoringan. Pintaduwa kow no dot maya dit ituduk di Tatod Tosusi. Om jaga kow no om kada kow kumala. It umat do Kinoringan nga pintaduwa’ay duyu-i dot aso putut. ¹⁹Om yoku nga pintaduwa’ay duyu-i, supaya tudukan oku do Kinoringan dot nunu ot boroson ku, om supaya sumiow oku paabar dit Tabar Tawasi dino, dit baya niraasia. ²⁰Jadi, iti poma diti, tu sitid jiil oku, nga yoku diti, nosuu oku do Kinoringan paabar dit Tabar Tawasi. Ugu po dino, pintaduwa’ay oku no dikoo, supaya osiow oku paabar dit Tabar Tawasi dino, dot mionong dit tugas ku.

Salam do Kopupuson

²¹I Tikhikus, it tobpinee tokow dit aa tokow koyuyuu, it palayan dot osotia sid gagama’on di Tuhan, ot popeelo dikoo dot nunu nopo pasal dogon, supaya ela’an duyu ot koomamanon ku om gama’on ku. 6:21 Kis 20:4; 2Tim 4:12 ²²Ino no ot kinoponuuan ku dialo sinod dikoo, tu popeelo dikoo dot koomamanon ya, om papatog dit ginawo duyu. 6:21-22 Kol 4:7-8

²³Oy tongo koobpineeyan, barakatan ku ikoo, supaya taakan kow do Kinoringan i Tama om i Tuhan Yesus Kristus do koosayan, om toluod dit miampay do koosipan. ²⁴Kumaa sid dikoo kikiawi it monoluod di Tuhan tokow i Yesus Kristus dot aso kopupusan, kososogit kow no sid saralom dit kosianan Doo.