Kolose

Surat di Paulus

Kumaa sid Jemaat dot

Kolose

Popela’an

Iti surat diti, tinulis di Paulus tiya dit sid jiil yalo, om irikot yo sid jemaat do Kolose. Iti nopot Kolose diti, iso ot kota sid Asia Tokodok, it bogian dot kotonobon dot Turki ong maakaa. It Kolose diti, ponong sid kosila’on dit kota dot Efesus. Okon-ko i Paulus po ot pinengkakat dit jemaat sid Kolose, ino-i-nga i Epafras (Kol 1:7; 4:12, 13). Duwo toon koleedo i Paulus miyon-iyon sid Efesus dot monuduk do Kitab (Kis 19:1-41). Om waro dîiri ot piipiro tulun mantad sid jemaat dot Efesus dot minongoy sid Kolose tu polombus dit Tabar Tawasi, sampay waro no dîiri ot jemaat sid Kolose.

Sid surat diti, monuu i Paulus dit jemaat supaya maajaga dit tongo guru dot tugama, it moonuduk dot tudukan dot kapalid. Tu ka dit tongo guru dot tugama, “Ong eengin tokow dot asalamat, amu osukup ong gisom mimoyo di Tuhan Yesus; ino-i-nga subay-ko sumamba po dit moleekat om rogon dit momorinta sid tawan om sid tana (Kol 2:8-10). Om subay-ko mokisunat tokow maya dit tugama dot tulun Yahudi, om mutun po dit tongo tadat dot dang kapir,” ka (Kol 2). Sid surat diti, lumawan i Paulus dit tudukan dit tongo guru diri. Ka di Paulus, “Osukup no ong mimoyo tokow nôopo di Yesus, tu i Yesus no ot manaak daton dot koposiyon tototog. I Yesus no ot pinawaya’an do Kinoringan mongurug ditit tawan om tana, om osundu i Yesus mantad dit kikiawi,” ka. Monuduk po i Paulus ontok-ko it bubuatan dit aaluk baagi dit tulun dit nokeemoyo di Tuhan Yesus.

Itit surat diti, nowit di Tikhikus om i Onesimus kumaa sid jemaat dot Kolose. I Onesimus dino, baya turipon di Filemon. I Filemon nopo, iso mantad dit anggota sid jemaat dot Kolose. Minogidu i Onesimus mantad sid di Filemon, nga sinuu di Paulus gumuli kembagu sid di Filemon, ugu-ko it nokotulis sid Surat di Paulus Kumaa sid di Filemon.

Suwang

Salam do kotimpuunan: 1:1-8

It bubuatan om gagama’on di Kristus: 1:9–2:19

It koposiyon kaawagu dot Kristian: 2:20–4:6

Salam do kopupuson: 4:7-18

Salam do Kotimpuunan

¹Iti surat diti, mantad sid dogon i Paulus, it najadi do rasul di Kristus Yesus tu kinenginan do Kinoringan. Iti surat diti, tinulis ya duwo di Timotius it tobpinee tokow. ²Iti surat diti, irikot ya sid tongo umat do Kinoringan it mimoyo sid di Kristus, ino-no it tongo koobpineeyan tokow sid kota dot Kolose.

Kososogit konow sid saralom dit kosianan om koosayan do Kinoringan it Tama tokow.

Pintaduwa dot Monorimakasi

³Titikid dot momintaduwa okoy dikoo, monorimakasi okoy sid Kinoringan tokow it Tama di Tuhan tokow Yesus Kristus, ⁴tu norongow ya ot tabar dot babanar-ko mimoyo kow di Kristus Yesus, om babanar-ko monoluod kow dit kikiawi it tongo umat Yo. ⁵Ugu dino ot gama duyu mimoyo om mitotoluod, tu ki-arapan kow dot kaanu kow dit tongo barakat dit nosodia mâantad do Kinoringan baagi dikoo sid surga. Inot barakat dino, norongow duyu tiya dit nokorongow kow dit tudukan tabanar, ino-no it Tabar Tawasi. ⁶It Tabar Tawasi dino, nokotongkop no sitid pomogunan, om ogumu dîiri ot tulun dot minimoyo, om it padpasi doalo nga minimbawasi dîiri. Ikoo nga irad-i dino, tu kadung norongow duyu it Tabar Tawasi diri, turus noorotiyan duyu babanar dot songkuro kaagayo dit kosianan do Kinoringan kumaa sid dikoo. ⁷Kikiawi dino, nela’an duyu mantad sid di Epafras, it koruang ya kumaraja dit amu ya koyuyuu. Osotia yalo mangalayan di Kristus dot manapan dagay. 1:7 Kol 4:12; Flm 1:23 ⁸Yalo no ot minangaabar sid dagay dot babanar-ko monoluod kow dagay om kikiawi it tongo umat, dot it toluod dino mantad sid Tatod Tosusi.

⁹Sagay pogi, mantad po dit kinaranga’an ya-i dit tabar dino ontok-ko ikoo, aso no tingkod ya momintaduwa dikoo. Mokianu okoy sid Kinoringan, supaya sukupon kow do kopintaran om pongoorotiyan dot dang koosipan, sampay ela’an duyu babanar it kenginan Yo. ¹⁰Ugu dino ot pokionuwon ya, supaya it padpasi duyu, aaluk baagi dit tulun dit maya di Tuhan, om supaya koonong sid ginawo do Kinoringan it gagama’on duyu. Tu ong kaa dino ot padpasi duyu, mamaal kow nôono dot ogumu ot gagama’on tawasi om makin kotutun kow do Kinoringan. ¹¹Mintaduwa okoy po, supaya impapagan kow do Kinoringan dot aawi-awi it kuasa Yo dit osundu, sampay ataan kow mananggung dot nunu nopo, dot alanut it ginawo duyu, otomon kow, ¹²om monorimakasi kow po sid Kinoringan it Tama. Tu Yalo no ot minamangkat dikoo, sampay aaluk kow nôono mompit dit nijanji do Kinoringan sid tongo umat Yo sid linawaw dit Karajaan Yo. ¹³Tu minangan tokow polobuso do Kinoringan mantad sid kuasa do kotuwangan, om niwaliw tokow Doo sid Karajaan dit Tanak Yo dit amu Yo koyuyuu, ¹⁴dot it Tanak Yo diri ot pinongolukat Yo daton, om kinopongompunan dit duso tokow. 1:14 Ef 1:7

I Kristus no ot Keeso Mantad dit Kikiawi

¹⁵I Kristus ugu-ko gambar do Kinoringan,

tu ong i Kinoringan, amu okito.

I Kristus dino, irad-ko Tanak gulu dit kikiawi it nunu nopo it nurug, 1:15 irad-ko Tanak gulu dit kikiawi it nunu nopo it nurug: Sid Kitab, asasarok dot reetan dot Tanak gulu i Yesus, tu budaya nopo dot tulun Yahudi, it tanak gulu diri, agayo ot pangkat. It gulu dot kusay, posusuulon potungkus dit tarata dit tama yo mantad-ko it tongo tinoori yo, om jumadi dot pomimpin dit kikiawi it tongo tinoori yo. Komoyoon, i Yesus no ot keeso dot noposiyan kembagu mantad sid minatay om miyaw misingkoleed (Kol 1:18; Why 1:5), om apangkat mantad dit kikiawi it nurug (Mzm 89:28; Kol 1:15; Ibr 1:6). I Yesus no ot Moonguasa dit kikiawi it tongo tanak dit nopiara do Kinoringan (Rm 8:29; Ibr 2:10-14), om i Yesus no ot pangajamin dot kikiawi dit mabpamaya Doo mangan posiyay kembagu mantad sid kapatayan (1Kor 15:20).

¹⁶tu Yalo no ot tuup do Kinoringan mongurug dit kikiawi it nunu nopo

it sid tawan om it sid tana, 1:16 sid tawan Harfiah: sid tongo tawan: Harfiah: sid tongo tawan. It pongoorotiyan dit tongo tulun tiya dit zaman di Paulus, ilot tawan keenong surga kabarasan, tolu sampay turu mitingkat. It keeso, ino-no it sarup om kawut, om it sid sawat dino, waro po ot piipiro tingkat, it iiyonon dit tongo rogon dit monguasa, om waro pot piipiro tingkat kembagu, sampay sid tingkat dit paling asawat, it iiyonon do Kinoringan.

it okito om it amu okito,

kawaya no kikiawi it tongo rogon dit monguasa om it momorinta.

I Kristus no ot koruang do Kinoringan mongurug di kikiawi,

om i Kristus no ot paanangan dit kikiawi it noorug.

¹⁷Aso pot nunûunu di kikiawi it nunu nopo, sino no mâantad i Kristus.

Om it kikiawi dit nunu nopo nga piara’on Yo dit kuasa Yo.

¹⁸I Kristus no ot monguasa dit jemaat song-pomogunan,

dot ugu-ko it gama dit tulu monguasa dit koyuwan.

I Kristus no ot puun do koposiyon dit jemaat song-pomogunan,

tu Yalo no ot gulu no banar dot pinosiyan do Kinoringan

mantad sid kapatayan,

supaya i Kristus no ot apangkat

mantad-ko it kikiawi it nunu nopo. 1:18 Ef 1:22-23

¹⁹Tu andang kinenginan do Kinoringan dot,

kikiawi dit kobuatano Yo nga naawi-awi

sid di Kristus.

²⁰Om natantu no do Kinoringan dot i Kristus ot bantaran Yo mongusay

dit kikiawi it nunu nopo it sid tana om it sid tawan,

dot i raa dit kinapatayan di Kristus sid salip

ot pinongusay. 1:20 Ef 2:16

²¹Ikoo di gûulu nga osodu kow-i mantad sid Kinoringan, om musuon duyu Yalo sid pongitungan om sid gagama’on duyu dit araat. ²²Nga maakaa dino, noosay kow no do Kinoringan, dot i Kristus dit minatay sid salip ot bantaran. It tiya dino, koyuwan do tulun komimiiyo i Yesus dot minatay sid salip, tu mangaganti daton. Jadi, komoyoon, aangatan tokow nôono do Kinoringan dot tumoguwang Doo dot osusi tokow no, aso not kasala’an, om aso not ponuduan daton. ²³Nga, subay-ko patatapon duyu it koosipan duyu, dot apatog om amu oobing-guyu. Okon-no-ko pisisimbanon duyu po inot tarapan duyu dot kumuyut sid Tabar Tawasi dit norongow duyu diri. It Tabar Tawasi dino, nakaabar sid kikiawi ot tulun sid pootongkop do pomogunan. Om yoku i Paulus, nataakan oku dot tugas dot paabar dino.

Asansara i Paulus tu Monotos Monulung dit Umat

²⁴Jadi maakaa diti, asansara oku poma, nga otomon oku-i tu ino-no koontungan duyu. Tu iti kasansara’an ku diti, mangaawi dit kasansara’an dit natantu mâantad di Kristus dot aajangan ku, tu monulung dit umat, ino-no it koyuwan Yo. 1:24 Tu iti kasansara’an ku diti, mangaawi dit kasansara’an dit natantu mâantad di Kristus: Tiya dit tinumoobat i Paulus, noboros mâantad di Kristus sid dialo dot ogumu ot kasansara’an dot aajangan dialo tu paabar dit Tabar Tawasi (Kis 9:16). Nga waro po pongoorotiyan wookon: Mangaawi oku dit sombogian it tongo kasansara’an dit andang-âandang nga aajangan dot tulun sobolum rumikot i Kristus, tu mangaganti oku dit umat, ino-no it ugu-ko koyuwan di Kristus. Tu ong maya dit Kitab Leed, ogumu po ot kasansara’an dot aajangan dot tulun sobolum korikot i Kristus. Nga natantu no mâantad do Kinoringan dot songkuro kaawagat om koogumu dit tongo kasansara’an dino. Ogumu no ot kasansara’an dot nasalasay di Yesus, jadi itokow nôono, it ugu-ko koyuwan Yo, ot mangaawi dit kasansara’an dino, sampay koguli i Tuhan Yesus. Tu sori nod surga Yalo, om amu no dîiri asansara. Kenginan di Paulus “dot kotimpus di Yesus” it kondiri yo dot asansara (Flp 3:10), supaya eenayan it kasansara’an dit aajangan dit tongo tulun sid Kolose.²⁵Najadi oku di Kinoringan dot palayan dit umat Yo, supaya kapangaabar oku sid dikoo dit kikiawi it Tabar Tawasi dit niarap Doo sid dogon. ²⁶It Tabar Tawasi dino, asot îiso nokeelo mantad dit noorug iti pomogunan, tu niraasia do Kinoringan. Nga maakaa diti, it Tabar Tawasi dino, niintalang nôono sid daton tongo umat Yo. ²⁷Eengin i Kinoringan pentalang sid tongo umat Yo dot songkuro kaaralom om koosundu dit rancangan Yo baagi dit kikiawi it tongo bansa dit okon poma-ko Yahudi. 1:26-27 ... dit rancangan Yo baagi dit kikiawi it tongo bansa dit okon poma-ko Yahudi. It amu po nokorikot i Tuhan Yesus sitid pomogunan, gigisom it tongo bansa dot Israel, ino-no it tongo Yahudi ot nopili do Kinoringan dot salamaton Yo. It rancangan dino, ino-no: Miyon i Kristus sid kondiri duyu, om ki-arapan kow nôono dot kokisib sid tompiling do Kinoringan sompôori. ²⁸Jadi, it Tabar ontok-ko i Kristus no ot yabar ya, tongo rasul! Monotos okoy mamakay dit kopintaran dit nitaak do Kinoringan sid dagay dot mongonosiat om monuduk dot titikid ot tulun, supaya, ong rumikot okoy sid tinoguwangon do Kinoringan sompôori, aangatan ya nôono yoalo dot nosukod no ot koosipan doalo, tu nokeeso no di Kristus. ²⁹Ino no ot tomodon ku matay-patay kumaraja, dot it kuasa di Yesus dit okon-ko aalang-alang ot pokudarat dogon.

¹Eengin oku dot ela’an duyu, dot babanar-ko monotos oku gumama dot monulung dikoo om it tongo tulun sid kota dot Laodikia, om it tongo tulun dit amu po nokotutun dogon. ²Sagay irad diti ot gama ku, supaya yoalo om ikoo, opuransangan it ginawo, dot mi’iso tu mitotoluod. Irad po dino, aawi-awi nôono dot ela’an om oorotiyan duyu it rancangan do Kinoringan dit niraasia Yo di muula, dot it raasia dino, i Kristus. ³Tu i Kristus dino ugu-ko kunci dit pongukab dit pusaka tolosok, tu Yalo no ot minonukab dit kikiawi it kopintaro om pongila’an do Kinoringan, dit ugu-ko it pusaka dit nokolosok.

⁴Boroson ku dot ugu diti, supaya amu kow ababanaran dit boboroson dit oonong ot kararanga’an. ⁵Tu okon-poma-ko muurunggum oku dikoo, nga sisino-i ot ginawo ku. Otomon oku dot korongow dot iseeso ot ginawo duyu om ogirot ot koosipan duyu sid di Kristus.

Koposiyon dit Nokeeso no di Yesus Kristus

⁶Pagka tu notorima duyu no i Kristus Yesus dot Yalo no i Tuhan duyu, tilombus kow-i miiso Doo. ⁷Pomitimpusod kow no sid Doo om jodio duyu no i Kristus dot torigi dot koposiyon duyu. Komoyoon, popotogo duyu no it koosipan duyu sid di Kristus, ugu-ko it nituduk ya sid dikoo. Om subay-ko okon-ko aalang-alang it ginawo duyu monorimakasi sid Kinoringan.

⁸Tandayay duyu no, supaya amu kow ooripon dit tudukan dit kapalid om aso guna. Tu it tudukan dino, okon-ko mantad po sid di Kristus, ino-i-nga mantad sid tadat dot tulun dit pinitutungkusan, om mantad sid rogon dit monguasa diti pomogunan. ⁹Dot i Kristus no ot kinopumpungan dit kikiawi it kobuatano do Kinoringan, nga sid koyuwan dot tulun komimiiyo. ¹⁰Om pagka tu nokeeso kow no di Kristus, komoyoon, nosukup kow no , tu kikiawi dit kosukupan dot manganu dit koposiyon tototog nga waro no sid dikoo. I Kristus no ot agayo ot kuasa mantad dit kikiawi it tongo rogon dit monguasa om momorinta.

¹¹Pagka tu nokeeso kow no di Kristus, nosunatan 2:11 nosunatan: It sunat dit tongo Yahudi ot pangaandaman sid koyuwan doalo, dot yoalo dino, bansa dit nasanganu do Kinoringan, om subay-ko maya dit tongo pinonuu’an do Kinoringan. Nga pinopeelo mâantad i Kinoringan dot it babanar-no-ko kenginan Yo ot sunat, ino-no it sunat sid ginawo dot tulun, komoyoon, it amu no okuasa dit kenginan taraat (Ul 10:16; Yer 4:4). kow no, dot okon-ko sunat dit minangan longono dot tulun, ino-i-nga it sunat dit winaal di Kristus sid ginawo duyu. Komoyoon, it kuasa do kenginan taraat sid ginawo duyu minangan peeduo. ¹²Tu tiya dit pinodsu kow, obbuli boroson dot minatay kow no om nakawaya kow no di Kristus dot linobong. Om kembagu-i, it kinopomodsuan 2:12 kinopomodsuan: It kopomodsuan dit noboros sid Kitab, itolop babanar ot tulun sid weeg om tumindal nogi kembagu, om ino no ot nanu di Paulus dot posuntuan dit kapatayan dit kuasa dit kenginan taraat sid ginawo tokow. dikoo diri, obbuli boroson dot noposiyan kow no mantad sid minatay, tu nakawaya kow di Kristus dot noposiyan, tu mimoyo kow gima dit kuasa do Kinoringan dit minamasi di Kristus mantad sid kapatayan. 2:12 Rm 6:4; Ef 2:6 ¹³I muula, minatay kow no, tu ki-duso kow, om pagka tu okon-ko Yahudi kow, amu kow nosunatan, om andang-âandang nga dang kapir ot bubuatan duyu. Nga maakaa diti, noposiyan kow no tu nakawaya kow no di Kristus dot noposiyan, om noompunan kow no do Kinoringan dit kikiawi it tongo duso duyu. 2:13 Ef 2:1-5, 12 ¹⁴It tongo karaatan tokow, ugu-ko it tutang tokow dit iso om iso ot tinulis sid surat dot poongutangan. Nga kikiawi dino, minangan do Kinoringan tonuso tiya dit nipansang i Kristus sid salip. 2:14 Ef 2:15 ¹⁵Minangan do Kinoringan iduay do kuasa it tongo rogon dit monguasa om momorinta, dot minangan Yo potingaya’ay dot tulun togumu, supaya ela’an no dot tulun song-pomogunan dot nakamanang no i Kristus sid salip.

Pagka tu Nokeeso Tokow no di Kristus, Amu Tokow Nôono Aagatan dit Tongo Tadat dot dang Pomogunan

¹⁶Jadi, oy tongo koobpineeyan, kada tokow no maya dit boros dot tulun dit ka, “Ukumon kow do Kinoringan ong kakal kow po mangakan dot kuwo om kakal kow po monginum dot kuwo. Om ukumon kow do Kinoringan ong aa kow manambut dit tongo tadlaw tagayo dot tulun Yahudi om it wulan wagu om it hari Sabbat,” ka. 2:16 Rm 14:1-6 ¹⁷It tongo toturan leed diri, nitaak do Kinoringan, tu pongingod dit korikatan di Kristus sompôori. It toturan dino, ugu-ko sangay no, nga ong it babanar-no-ko koyuwan, ino-no i Kristus. ¹⁸Kada kow momoduli dit tulun dit momoros dot, “Aa-kow torima’on do Kinoringan ong aa-kow sumamba do moleekat om aa-kow manansara dit kondiri duyu gama pensiba do ginawo,” ka doalo. Tu it tulun dit ugu diri, ki-hak kabarasan jumadi do guru duyu, tu nokokito kabarasan do surga. Om mising-gagayo nôono dot tulu, tu it pongitungan doalo diri, dang pomogunan. ¹⁹It tulun dino, amu mangaarap di Kristus, dot yang-ko i Kristus no ot monguasa dit jemaat song-pomogunan, ugu-ko it tulu dit monguasa dit koyuwan. Tu mantad sid tulu no ot kinopioputan dit kikiawi it tongo tuat om piukakaban, sampay sumurut gumayo it koyuwan diri maya dit kenginan do Kinoringan. 2:19 Ef 4:16

²⁰Pagka tu nakawaya kow no di Kristus matay, komoyoon, nakalabus kow no mantad sid tongo rogon dit monguasa diti pomogunan. Nga nokuro tu kakal kow-i mokiporinta dit rogon diri, dot maya kow dit tongo tadat dot dang pomogunan, dot ka, ²¹“Kadaay kuyutay iti!” “Kadaay tiimay ino!” “Kadaay tuduo ino!” ka?! ²²Dot sabanar no, it aakanon om iinumon dit itiag doalo, oobing-tanus, tu asal naakan, aso no. Makin po, it tongo tadat dino, wiwinaal dot tulun. ²³It tongo tulun dit minomudali dit tongo tadat dino, babanar-ko mad-ko ongo-pipintar kabarasan, sampay minomudali dot tugama kondiri. Monuu yoalo dot tulun supaya mising-sisiba ot ginawo, om manansara dit koyuwan kondiri. 2:23 ... manansara dit koyuwan kondiri. Kiikiro, tiya diri warot tulun momuasa dot adarakan, ko amu mangakan dot tonsi, ko maajaga toleed dot amu modop, sisirid soliwan dot mokisogit toleed, ko mising-bobog kondiri. Iri not gama’on dot tulun tu panantaman doalo ong otomon i Kinoringan dot ugu keeri ot gama doalo. Nga it kikiawi dit tadat dino, aso guugûna, tu it koyuwan nogi ot podulion babanar.

Koposiyon Leed om Koposiyon Wagu

¹Pagka tu noposiyan kow no dot nakawaya kow dit kinoposiyan di Kristus, iimo duyu no it tongo hal dit sid surga. Tu sino no dino i Kristus momorinta, dot mogom-ogom ponong sid wanan do Kinoringan. 3:1 Mzm 110:1 ²Potorontogo duyu no it pongitungan duyu sid hal dit dang surga, om okon-no-ko mongitung po dit hal dit dang pomogunan. ³Tu it koposiyon tokow sitid pomogunan, obbuli boroson dot napatay no, tu nakawaya di Kristus matay. Om it tatod tokow, nakawaya no di Kristus sid surga sid runggum do Kinoringan. Nga it koposiyon tokow kaawagu diri, amu po okitanan , ugu-ko i Kristus, tu amu po okitanan maakaa. ⁴I Kristus no ot puun dit koposiyon tokow, om kadung-ko rumikot kembagu i Kristus sitid pomogunan dot okitanan dot kikiawi ot tulun, baru nogi om okitanan dot itokow diti nga kokisib-i sid tompiling Yo.

⁵Jadi, ugu po dino, tonuso tokow no it kobuatano tokow dit dang pomogunan, ino-no: it monokiagay, it mamaal dot kalaalasu, potuudan ot tiwow, it wookon it kenginan dot araat, om it atamaa, tu it atamaa dino, miinong-i dot sumamba sid ponoko-kinoringan. ⁶Tu inot ugu keeno dino, kaarasangan do Kinoringan [sid tulun dit amu ataat sid Kinoringan.] ⁷Itokow dit gûulu nga ugu dino-i ot padpasi, tu kakal po nokuasa it koposiyon tokow dit kenginan dot dang pomogunan. ⁸Nga ong at maakaa dino, tingkaday tokow no it ugu diti: oobung-rasang, moogkuarab, oobung-sana, moonimba’al, om moongimbuar. ⁹Kada tokow no miwuwudut, tu it bubuatan tokow dit muula om it puakal-akal tokow dit araat diri, nakaada tokow no , ugu-ko it baju dit ginaray no tu nakaada no. 3:9 Ef 4:22 ¹⁰It tidino diti, najadi tokow no dot tulun wagu, ugu-ko it manambaju dot baju wagu. Aso tingkod dot inwoguwan tokow do Kinoringan, it minongurug daton, supaya makin leed nga makin kensuuw tokow Doo. Irad po dino, otutunan tokow nôono babanar i Kinoringan. 3:10 Kej 1:26; Ef 4:24 ¹¹Ugu po dino, amu no opurimanan it pisuwayan dit tulun dot Yahudi om it tulun dit okon-ko Yahudi, it tulun dit nosunatan om it tulun dit amu nosunatan, it tulun magali-ali om it tulun dit kakal po sid timba’an, it turipon om it okon-ko turipon. Tu i Kristus no ot sanganu daton kikiawi, om i Kristus no ot miniyon sid ginawo tokow kikiawi.

¹²Pagka tu nopili tokow no do Kinoringan dot jumadi dot umat Yo dit osusi om amu Yo koyuyuu, subay-ko manampakay tokow dot koobing-sianan, kaawasi do ginawo, koosiba do ginawo, koosulimod om kaalanut do ginawo. ¹³Milalanut tokow no do ginawo om mi’a’ampun tokow no, ong warot tulun dot mamaal dot kasala’an sid tulun wookon. Mi’a’ampun tokow no dot kasala’an, ugu-ko it Tuhan tu minangampun dit tongo kasala’an tokow. 3:12-13 Ef 4:2 3:13 Ef 4:32 ¹⁴Nga it paling oponting mantad dit kikiawi diti, ino-no mitotoluod, tu it toluod no diri ot ugu-ko tagkos dit pongogot dit piisa’an tokow. ¹⁵Nunu nopo ot koputusan dot mangan tokow onuwo, subay-ko it koosayan dit nitaak di Kristus ot monguasa sid ginawo tokow. Sagay linoow tokow do Kinoringan, supaya ajadi tokow dot iso no ot koyuwan om supaya opurimanan tokow it koosayan dino. Ponorimakasi no! ¹⁶Owiwio tokow no paatag sid ginawo tokow it boros di Kristus, supaya kadapat tokow mitutuduk om mititiag dot osusukup ot kopintaran. Lonuwo tokow no it boros dot Mazmur, laalanu dot mangarayow do Kinoringan, om laalanu dit nituduk di Tatod Tosusi, meed dot monorimakasi sid ginawo tokow. ¹⁷Kikiawi dit gagama’on tokow keenong it boboroson tokow, waalo tokow no sid ngaran di Tuhan Yesus, meed dot monorimakasi sid Kinoringan it Tama, baagi dit nunu nopo it minangan di Tuhan Yesus sid daton. 3:16-17 Ef 5:19-20

Tudukan Baagi dit Sompusasawo, Songanak-anak, Turipon om Tuan

¹⁸Oy tongo tongondu, taat kow no dit sawo duyu, tu ino no ot aaluk baagi dit tulun dit nokeeso no di Tuhan. 3:18 Ef 5:22; 1Ptr 3:1

¹⁹Oy tongo kusay, toluodo no it sawo duyu om kadaay duyu no rorongito yoalo. 3:19 Ef 5:25; 1Ptr 3:7

²⁰Oy tongo tanak, woyo’o duyu no kikiawi it boros dit moleeng duyu, tu ino no ot kenginan do Tuhan. 3:20 Ef 6:1

²¹Oy tongo tama, kadaay duyu no rualay do ginawo it tongo tanak duyu, supaya amu odompol it ginawo doalo. 3:21 Ef 6:4

²²Oy tongo turipon, taat kow no sid tuan duyu sitid pomogunan, dot okon-ko tiya no dit intatangan kow dit tuan duyu, tu kumoroyo’on kow nôopo dialo. Ino-i-nga taat kow no sid doalo dot aawi-awi ot ginawo, tu rumonok kow di Tuhan. ²³Nunu nopo ot gama’on duyu, gama’o no dot eensan-insan it ginawo duyu dot, okon-ko tulun ot paanangan, ino-i-nga i Tuhan. ²⁴Ondomo duyu no dot kotorima kow-i dit najanji di Tuhan sid tongo tanak Yo, om iri no ot isuli Dialo sid dikoo. Tu it babanar-no-ko tuan duyu, ino-no i Kristus kondiri. ²⁵Isay nopo ot mamaal dot kasala’an, mangan-i di Tuhan suliay dot mionong dit kasala’an dit nawaal yo, tu i Tuhan, amu momingig dot tulun. 3:22-25 Ef 6:5-8 3:25 Ul 10:17; Ef 6:9

¹Oy tongo tuan, subay-ko aadil om awasi ot paangatag duyu dit turipon duyu. Ondomo no dot ikoo dino nga waro-i ot Tuan sid surga. 4:1 Ef 6:9

Tudukan ontok-ko Gama Mintaduwa om it Kobubuatano Tokow sid Tongo Tulun dit Okon-ko Kristian

²Kabagos kow no mintaduwa meed dot monorimakasi sid Kinoringan, om tandayay duyu no, supaya amu apalid it pongitungan duyu tiya dot mintaduwa kow. ³Kadung-ko mintaduwa kow, pintaduwa’ay okoy no dikoo, supaya taakan okoy do Kinoringan dot kosiwatan dot paabar di Kristus, tu Yalo no it rancangan do Kinoringan manalamat dot tulun, it niraasia do Kinoringan di gûulu. Om ino-not Tabar dino ot kinopongojiilan dogon dat maakaa. 4:3 Kol 1:27 ⁴Pintaduwa’ay oku no dikoo, supaya adapat ku polombus it Tabar ontok-ko i Kristus dot atarang ot gama, maya dit koolukan.

⁵Subay-ko opintar kow pawasi dit bubuatan duyu kumaa sid tulun dit okon-ko Kristian, om guna’o duyu no tawawasi it titikid it kosiwatan duyu. 4:5 Ef 5:15-16 ⁶Om it gama duyu momoros nga subay-ko kensasamod om kagayat do ginawo, sampay ela’an duyu dot nunu ot aaluk dot isimbar duyu sid titikid ot tulun.

Salam do Kopupuson

⁷Suuon ku i Tikhikus mongoy sinod dikoo dot mangaabar ontok-ko yoku. Yalo dino, tobpinee tokow dit aa tokow koyuyuu, it osotia mangalayan di Kristus, om it koruang dagay kumaraja baagi di Tuhan. 4:7 Kis 20:4; 2Tim 4:12 ⁸Sagay suuon ku yalo mongoy sinod dikoo, pangaabaron ku sid dikoo ontok-ko yokoy, supaya eensasamadan it ginawo duyu. 4:7-8 Ef 6:21-22 ⁹It mongoruang di Tikhikus mongoy sid dikoo, yaloy Onesimus it tulun sid dikoo om tobpinee tokow dit osotia om aa-ya koyuyuu. Yoalo no miduduwo dino ot paabar sid dikoo dit kikiawi it tabar dagay siti. 4:9 Flm 1:10-12

¹⁰Kirim salam sid dikoo i Aristarkhus, it rusod ku sitid jiil. Om i Markus, it pinsan di Barnabas nga kirim salam-i. Nabarasan kow no mâantad, dot ong korikot sino i Markus, insomungo duyu no. 4:10 Kis 19:29; 27:2; Flm 1:24; Kis 12:12, 25; 13:13; 15:37-39 ¹¹I Yesus it reetan di Yustus, 4:11 I Yesus it reetan di Yustus sangaran di Tuhan Yesus. nga kirim salam-i sid dikoo. Kikiawi dit tongo koruang ku pengkakat dit Karajaan do Kinoringan, tolu koyuwan no yoalo ot tulun Yahudi. Om yoalo no ot mongimpapag do ginawo ku.

¹²I Epafras, it tulun mantad sinod dikoo nga kirim salam-i sid dikoo. Yalo dino nga mangalayan-i di Kristus Yesus. Abagos yalo mintaduwa baagi dikoo, supaya ogirot om osukod it koosipan duyu, om supaya babanar-ko ayakin kow sid gama maya dit kikiawi it kenginan do Kinoringan. 4:12 Kol 1:7; Flm 1:23 ¹³Yoku kondiri nga sumasi oku dot babanar-ko monotos yalo gumama baagi dikoo om it jemaat sid kota dot Laodikia om sid kota dot Hierapolis.

¹⁴I duktur Lukas dit amu daton koyuyuu om i Demas, nga kirim salam-i sid dikoo. 4:14 2Tim 4:10, 11; Flm 1:24

¹⁵Polombuso duyu no it salam dagay sid tongo koobpineeyan dit sid kota dot Laodikia, om sid di Nimfa, om it jemaat dit sumambayang sid walay yo. ¹⁶Ong opongo kow mangabaca ditit surat diti, ipabaca duyu sid jemaat dit sid kota dot Laodikia. Om arapon ku dot it surat dit nirikot ku sid jemaat sid kota dot Laodikia nga mangan duyu-i baca’o. ¹⁷Om boroson i Arkhipus dot, “Pongoyo no it tugas dit nipakaraja dikaw di Tuhan,” kanto duyu. 4:17 Flm 1:2

¹⁸Dogon kondiri dot longon ot minonulis ditit salam diti: Salam mantad sid dogon i Paulus. Ondomo oku no dikoo sid pintaduwa duyu, tu kakal oku po sitid jiil!

Kososogit konow sid saralom dit kosianan do Kinoringan.