Surat Kotolu
di
Yohanes
Popela’an
Iti Surat Kotolu di Yohanes diti, tinulis dit “ponotua dot jemaat”, ino-no i Yohanes kondiri, it tanak di Zebedeus om rantas pusod di Yakobus. Iti surat diti, nirikot yo sid di Gayus, it iso ot ponotua dot jemaat. Mangarayow i Yohanes di Gayus, tu it minonulung i Gayus dit tongo tulun Kristian. Nga tiniag di Yohanes i Gayus, supaya amu tumiruwan dit karaatan dit iso ot kusay it reetan di Diotrefes.
Suway mantad keeti surat diti, waro pot apat ot Kitab dot tinulis di Yohanes, ino-no, it Surat Keeso om Surat Koduwo di Yohanes, om it Tabar Tawasi di Yohanes om it Kitab Wahyu (Niintalang).
Suwang
Salam do kotimpuunan: 1:1-4
Narayow di Yohanes i Gayus: 1:5-8
Insala’on i Diotrefes om Royo’on i Demetrius: 1:9-12
Salam do Kopupuson: 1:13-15
1Salam do Kotimpuunan
1Iti surat diti, mantad sid dogon it ponotua dot jemaat, irikot ku sid dikaw, oy ambaya ku Gayus, it babanar-ko aa-ku koyuyuuan. 1:1 Kis 19:29; Rm 16:23; 1Kor 1:14
2Oy obpinee dit aa-ku koyuyuuan, mintaduwa oku, supaya aali-ali om awawasi koh-i, ugu-ko it koosipan nu tu awawasi-i. 3Laalandu kootomon ku tiya dit nokorikot it pipirot tobpinee tokow sandad Kristian, pinopeelo dogon dot landu koogirot nu sid tudukan tabanar, om andang banar dot tinumilombus koh-i maya dit tudukan tabanar. 4Aso no wookon ot kasanang diti ginawo ku sumala mantad dit norongow ku dot, it tongo ponokaanak ku, maya dit tudukan tabanar.
Narayow di Yohanes i Gayus
5Oy obpinee dit aa-ku koyuyuuan, osotia banar inot gama nu monulung dit tongo koobpineeyan tokow sandad Kristian, tu it tulun Kristian poma dit amu nu po otutunan nga tinulungan nu-i. 6It gama nu monulung doalo, nisasi doalo sid jemaat siti. Jadi maakaa diti, pokionuwon ku sid dikaw dot tulungan nu kembagu yoalo dot balanja, dot mionong dit kenginan do Kinoringan, supaya kolombus yoalo sid pamana’an. 7Tu it tomodon doalo mamanaw diri, mangaabar dit Tabar di Kristus, om asot totongoh ot kotulungan dot aramit doalo mantad sid tongo tulun dit okon-ko Kristian. 8Jadi, tokow tongo tulun Kristian, subay monulung dit tongo mabpamaya sandad Kristian dit ugu diri, supaya katabang tokow doalo monotos paabar dit tudukan tabanar.
Insala’on i Diotrefes om Royo’on i Demetrius
9Nokoponulis oku no dot surat tonîibak kumaa sid jemaat duyu, nga amu minangan rongo’o di Diotrefes it boros ku, tu subay-ko yino ot mogkuasa dit jemaat. 10Pagka ugu dino, kadung korikot oku sinod dikoo sompôori, owiwion ku monuturan it nongo-waal dialo, ino-no it pakaraat om minonimbaal dagay! Nûuntuwan po dialo dot, ong warot tobpinee mantad sid kampung wookon dot koongoy siri tu paabar dit Tabar Tawasi, amu peendokodon dialo, gaam nogi nga tiagon dialo om ping-sunsuban dialo mantad sid jemaat it tongo tulun dit eengin dara pendakod dit tongo koobpineeyan diri!
11Oy obpinee dit aa-ku koyuyuuan, okon-ko moniruwan dot araat, it awasi nôono ot tiruwanay. Tu isay-isay ot mamaal dot awasi, tanak do Kinoringan. Isay-isay ot mamaal dot araat, amu po nokotutun do Kinoringan.
12Nga ong i Demetrius, kikiawi ot tulun mangarayow dialo. 1:12 Demetrius: Kakalu dati ong i Demetrius ot minongowit ditit surat diti kumaa sid di Gayus. Iti diti, sangaran di Demetrius it sid kota dot Efesus (intangay sid Kis 19:24). Andang aaluk dot royo’on yalo, tu maya banar dit tudukan tabanar. Yokoy nga mangarayow-i doo, om nela’an duyu-i, dot andang babanar ot binoros ya.
Salam do Kopupuson
13Ogumu po dara ot boroson ku sid dikaw, nga amu ku tulison sitid surat diti. 14Arapon ku dot kasambat oku talangkas dikaw, om kopitoguwang kito miboboros.
15Kososogit konow sid saralom dit koosayan do Kinoringan.
It tongo tambabaya nu siti, kirim salam sid dikaw. Om kirim salam oku sid iso-om-iso it tongo tambabaya ku sino.