2 Timotius

Surat Koduwo di Paulus

Kumaa sid di

Timotius

Popela’an

Iti surat diti, tinulis di Paulus tiya dit nojiil yalo sid kota do Ruum (2Tim 1:16-17). Iti surat diti, surat di Paulus dot kopupuson sid Kitab, tu amu no leed dot rotuan yalo dot tukum do patayon (2Tim 4:6). Jadi, obbuli boroson dot, iti surat diti, tupono dot nikowili di Paulus sid di Timotius. I Timotius, it tuup om koruang di Paulus, kakal po momiara dit jemaat sid kota dot Efesus, nga yalo dino, omulok po. Jadi, tonsi babanar diti surat diti, papatog i Paulus dit ginawo di Timotius, supaya tumilombus-i papanaw dit tugas yo dit niarap do Kinoringan sid doo, dot ensan-insan ot ginawo. Subay tumaan yalo, nokuro ong asansara poma om warot lumawan. Om subay potingkod dit tongo guru dit monuduk dit kapalid, om subay momiara dit tudukan dit babanar om oonong, it nilombus di Paulus sid doo, supaya amu simbanan. Om kenginan di Paulus dot kaandaa talangkas i Timotius sid doo (4:9, 21), tu lumangad yalo di Timotius (1:3-5).

Suwang

Salam do kotimpuunan: 1:1-2

Monuu babanar i Paulus di Timotius supaya tumilombus-i paabar dit Tabar Tawasi nokuro ong asansara poma: 1:3–2:13

Monuu i Paulus di Timotius potingkod dit tongo guru dit maamalid: 2:14–3:9

Kikiawi it nokotulis sid Kitab, nituduk di Tatod do Kinoringan sid ginawo dit tulun dit minonulis, om ki-guna dot monuduk: 3:10–4:5

Tuturan dit kinowowoyo’on di Paulus: 4:6-18

Tupono dot nikowili: 4:19-22

Salam do Kotimpuunan

¹Iti surat diti, mantad sid dogon i Paulus. Kinenginan do Kinoringan dot jumadi oku dot rasul di Kristus Yesus, tu paabar dit janji do Kinoringan: ino-no, it janji Yo dot manaak dot koposiyon tototog sid tulun dit nokeeso no di Kristus Yesus. ²Irikot ku iti surat diti sid dikaw, oy ponokaanak ku Timotius it aa-ku koyuyuu.

Kososogit no sid saralom dit kosianan om koosayan do Kinoringan it Tama om i Kristus Yesus i Tuhan tokow. 1:2 Kis 16:1

Monuu Babanar i Paulus di Timotius Supaya Osiow Posintor dit Tabar Tawasi

³Monorimakasi oku sid Kinoringan it layanon ku, dot osusi ot ginawo, ugu-ko it gama dit taki-lombus ku mangalayan do Kinoringan. Om aso putut ku mongoondom dikaw tiya dot mintaduwa oku sodoy-adlaw. ⁴Tu kadung aandaman ku dot miitiri it romow nu, tisambâat oku no kembagu dikaw, supaya osukup ot kootomon ku. ⁵Tu aandaman ku it koosipan nu dit amu maakaso, ugu-ko it koosipan dit todu nu i Lois om it tidi nu i Eunike. Yoalo dino, nokopogulu mimoyo mantad dikaw. Om ayakin oku dot ikaw nga ki-koosipan-i dot ugu diri. 1:5 Kis 16:1 ⁶Jadi poondomon ku ikaw, dot posinggalapo kembagu it sinundu nu dit nitaak do Kinoringan. It sinundu dino, nokotimporon sid dikaw tiya dit kinama ku ikaw dot mangalantik dikaw sid tugas nu. 1:6 sinundu: Komoyoon nopo dot sinundu: bakat rohani atau karunia roh. Intangay sid Rm 12; 1Kor 12 om 1Kor 14.⁷Tu it Tatod Tosusi dit nitaak do Kinoringan sid daton, okon-i-ko patalow daton, ino-i-nga manaak daton dot kuasa, om monulung daton supaya monoluod om kokodos ot ginawo.

⁸Ino nogi, okon-ko mongikum sumasi di Tuhan tokow, om okon-ko omomoluan ditit nojiil oku pasal di Tuhan. Gaam nogi rundun dogon sumansara pasal dit Tabar Tawasi, tu eempapagan koh dit kuasa do Kinoringan. ⁹I Kinoringan ot minanalamat om minangangat daton jumadi dot osusi. Dot okon-ko mantad sid awasi it nagama tokow, ino-i-nga mantad sid Doo do koginawa’an dot monian daton. Amu po noorug iti pomogunan, ki-rancangan no mâantad i Kinoringan pentalang dit kosianan Yo dino sid daton, syukur ong miiso tokow di Kristus Yesus. ¹⁰Om maakaa diti, niintalang do Kinoringan it kosianan Yo sid daton dot nirikot Yo i Kristus Yesus, it Maanalamat daton. I Yesus no ot minangala dit kuasa do kapatayan, om Yalo no ot pinatarang sid Tabar Tawasi dot warot koposiyon tototog om koyuwan dit amu oobing-patay. ¹¹Iti no ot kinopongolontikan do Kinoringan dogon dot rasul om guru, tu paabar dit Tabar Tawasi. 1:11 1Tim 2:7 ¹²Om ino no ot pasal dot nakaajang oku do kasansara’an dot ugu diti. Nga amu oku-i eekum, tu ela’an ku dot i Kinoringan ot imoyo’on ku. Om keemoyo oku dot ki-kuasa Yalo momiara dit Tabar Tawasi dit niarap Yo sid dogon, mising-korikot dit tadlaw dot koowian. 1:12 dit Tabar Tawasi dit niarap Yo sid dogon Tafsiran 2: dit Tabar Tawasi dit niarap Ku sid Dialo. Komoyoon nopo dit miduduwo it tafsiran dino: amu no oleed dot matay i Paulus. Om ogumu ot guru dit mamalid sid tongo gorija. Jadi mookoy-i i Paulus dot mangan doalo simbanay it tonsi dit Tabar Tawasi, sampay amu nôono oonong. Nga mimoyo yalo dot jaga’an-i do Kinoringan it tudukan dino, supaya amu simbanan dit tongo guru palsu.¹³It tudukan dit noomitan nu sid dogon, jodio dot suntu dot tudukan dot ataatantu. Om girot no sid koosipan om toluod dit waro sid di Kristus Yesus. ¹⁴Ikaw ot pinaarapan do Kinoringan dit tudukan tataatantu dit boorogo diri. Jadi, pokiimpapag no di Tatod Tosusi dit miyon-iyon sid dikaw, supaya atandayan nu momiara it tudukan diri, dot amu osimbanan.

¹⁵Nela’an nu no dot niduan oku di Figelus om i Hermogenes om it kikiawi it tongo Kristian sid negeri dot Asia Tokodok. 1:15 Negeri dot Asia Tokodok diti, okon-ko it reetan dot benua Asia diti maakaa, ino-i-nga it boogian dot kotonobon dot Turki ong maakaa, it sambaagi dit Kotonobon dot Asia. Tiya diri, it kota dot Efesus ot ibu kota dit negeri dot Asia Tokodok diri.¹⁶Mokianu oku sid Tuhan dot sianan Dialo it sirang di Onesiforus, tu miguguli monginsasamod dogon om amu eekum ditit nojiil oku. ¹⁷Ino-i-nga, kadung nokorikot yalo sid kota dot Ruum, natab oku dialo mogiim sampay nasambat oku. ¹⁸Om nela’an nu-i tiya dit sid kota dot Efesus oku, ogumu banar ot nitulung dialo dogon. Arapon nopo dot sianan yalo di Tuhan sid tadlaw dot koowian.

Soojar di Kristus dit Osotia

¹Ino nogi, oy ponokaanak ku, patog no tu agayo it kotulungan di Kristus Yesus. ²It tudukan ku gûulu dit norongow nu diri, it nososiyan dot tulun togumu, polombuso no potuduk sid tongo tulun dit kaarapan om it keelo monuduk dot tulun wookon.

³Turub dogon sumansara ugu-ko it soojar di Kristus Yesus dit osotia. ⁴Tu it soojar dit kamasa’an no sumurung miparang, amu pisokikingon dit wookon ot gama’on, supaya owosian it kotua yo. ⁵Om ugu keeno no it tulun dit monokilumba manangkus, tadi kaanu dot odia dot kamanangan, kawaya dit oturan dot milumba. ⁶It moomutanom dit monotos kumaraja, yino ot apatut dot momulasung mangakan dit tasil dit ginama’an yo. ⁷Tukuay-laaday no mongitung itit binoros ku diti, tu i Tuhan ot paarati dikaw dit kikiawi dino.

⁸Ondomo no: I Yesus Kristus koturunan di raja Daud, noposiyan mantad sid kapatayan. Iti no ot Tabar Tawasi diti ot yabar ku. ⁹Pasal nobo dot paabar oku dit Tabar Tawasi ot nasansara oku, om kinopongorootan dogon dot ugu-ko tulun oku taraat. Nga ong it boros do Kinoringan, aa milod korooton. ¹⁰Ino no ot pasal dot ginoos ku kikiawi ino baagi dit tongo umat dit nopili do Kinoringan, supaya yoalo nga asalamat-i pasal di Kristus Yesus om koompit dit tompiling misingkoleed. ¹¹Oonong it boros diti, dot ka,

“Ong kotimpus tokow Dialo matay,

kotimpus tokow-i Doo dot oposiyan. 2:11 Kol 2:20; 3:3

¹²Ong gumoos tokow dot asansara,

kawaya tokow Doo dot momorinta.

Ong olimon tokow Yalo,

Tokow nga olimon-i Dialo. 2:12 Mat 10:33; Luk 12:9

¹³Ong amu tokow osotia,

kukukuro-i nga osotia-i Yalo,

tu amu oolim Dialo it kondiri Yo,”

ka.

Gugumama dit Arayow do Kinoringan

¹⁴Paandamay no dit tongo tulun Kristian it kikiawi diri, om pososiyo no i Kinoringan dit gama nu monuu doalo, dot okon-ko misiwal ontok-ko it tongo pongoreetan. Tu ino dino, tad-pom aso guna, gaam-gaam karaag dot koosipan dit tongo tulun dit mokinongow. ¹⁵Ponotos no gumama supaya okunon koh do Kinoringan, dot ikaw no ot gugumama tawasi, it amu omomoluan dit karaja. Polintotoko no potuduk it tudukan tabanar. ¹⁶Insodu mantad sid tongo pibabarasan dit aso taatântu, om it mongindaraat do Kinoringan, it koowit dot tulun minsodu mantad sid Kinoringan. ¹⁷It tongo pibabarasan dit aso taatântu diri, ugu-ko pilat dit rumanay om amu lumingos. Masam keeri no it tudukan di Himeneus om i Filetus. ¹⁸Sinumompiang yoalo mantad sid tudukan tabanar, tu minomoros dot nakatalib no kabarasan it koposiyan dot tulun minatay. 2:18 It tajaran dot kapalid, it boros dit ... nakatalib no kabarasan it koposiyan dot tulun minatay. Amu ela’an nunu it tonsi babanar no dit tudukan dot kapalid dino. Nga andang amu-i keensodu babanar mantad sid tudukan dit kapalid it lawanon di Paulus sid 1Kor 15. Om iri no ot nakaraag dit koosipan dit piipiro ot tulun.

¹⁹Ugu poma dino, nga apapag it jemaat do Kinoringan song-pomogunan, ugu-ko it soripaldot torigi dot walay, 2:19 nga apapag it jemaat do Kinoringan song-pomogunan Tafsiran 2: nga ototog om amu sumimban it boros om tudukan do Kinoringan Harfiah: nga apapag it soripal dit walay do Kinoringan dot ki-tulis sid soribaw: “Otutunan-i di Tuhan it tulun dit Yino sanganu,” 2:19 Bil 16:5 (LXX) ka, om, “Isay nopo ot mangakun dot i Tuhan ot sanganu dit kondiri yo, subay tumingkod mamaal dot karaatan,” 2:19 Yes 52:11; Yl 3:5 ka.

²⁰Tu sid walay dot tulun takaya, masam-masam no ot kosukupan. Waro tamas keenong pirok ot winaal, waro kayu keenong tana ot winaal. It kosukupan dit tamas om pirok ot winaal, it tongo wawasi ot koguna’an. It kosukupan dit kayu keenong tana ot winaal, it tongo raraat ot koguna’an. 2:20 Komoyoon nopo ditit suriban diti: it jemaat song-pomogunan ugu-ko it walay dot tulun takaya dit masam-masam ot kosukupan. It tongo tulun dit babanar-ko Kristian sid jemaat dino, ugu-ko it pinggan om salapa talanji. Nga ii-nopot tongo guru dit maamalid, ugu-ko gayung sid tandas ko it poonumadan do tasu. It tongo guru dit maamalid dino, obbuli jumadi dot tongo Kristian dit ki-guna, asal nopo ong tingkadan doalo it tudukan taraat dino om maya dit tudukan tawasi.²¹Ino nogi, isay nopo ot peedu dit kondiri yo mantad sid kikiawi it tudukan dot kapalid diri, ajadi dot kosukupan sid walay dot awasi ot koguna’an. Ong ugu dino, osusian nôono yoalo om oguna nôono dit Sanganu dot walay, om kenta’an mâantad mangaraja dit nunu nopo ot awasi.

²²Jadi, insodu no mantad sid nunu nopo it kenginan taraat dit tongo tulun tomulok. Om tanud no dit tongo tulun dit monginloow dit ngaran dit Tuhan dot monotos mongogusa dit kenginan do Kinoringan, koosipan, toluod om kopiusayan, dot osusi ot ginawo. ²³Okon-ko mundang sid pidadaawa’an dit aso taatântu om aso tarati, tu ela’an nu no, dot ino dino, pembulay dot pigogutan. 2:23 Tit 3:9 ²⁴Tu ong turipon di Tuhan, amu aaluk dot migagut, ino-i-nga otoowa sid kikiawi ot tulun, eelo monuduk, alanut ot ginawo, ²⁵om osulimod ot gama modtuduk dit tongo tulun dit lulumawan doo. Tu kalu ong giangon do Kinoringan it ginawo doalo dot tumoobat, sampay otorima doalo it tudukan tabanar. ²⁶Om oolit kembagu it pongitungan doalo sampay kalabus mantad sid burunsut dot Raja do Rogon. Tu tinabpa’an yoalo om pinajalan nogi maya dit kenginan yo.

Karaatan dot Tulun dot Moosomok it Kogulian di Yesus

¹Ondomo no, moosomok it pongoowian do zaman, ogumu ot kosusa’an dot mimbulay. ²Maya ot tulun dit kenginan kondiri tu moginokupan, otombirang, om mising-gagayo tulu, moongusiba, lumawan do moleeng, amu keelo monorimakasi, amu mongowii dot tugama, ³amu monoluod, amu monokiusay, moongolimut, amu eelo pokodos do ginawo, orongit, amu eengin do kowosian, ⁴moonolikud do koruang, onibak ot pongitungan, asawat ot ginawo, gaamon po doalo ot karamayan do pomogunan mantad-ko monoluod do Kinoringan. ⁵Tumaat banar kabarasan yoalo sid tugama, nga monginwawali dit kuasa do Kinoringan. Insoduay it tongo tulun dit ugu diri. ⁶Masam keeri no it tongo guru dit tumikid dit tongo walay dot mamalid dit sirang ot tomodon, tu monipu dit tongo tongondu dit opibaabaya’an. Nawagatan it tongo tongondu diri dot duso, sampay otintid dot masam-masam ot kenginan dot araat. ⁷Sunduy dot asot tingkod doalo mokituduk, nga amu-i milod poorotiyon dit tudukan tabanar. ⁸It tongo guru dit maamalid diri, ugu-ko it gama di Yanes om i Yambres 3:8 Yanes om i Yambres: Ong maya dit kobudayaan dot tulun Yahudi, iri no ot ngaran dit duwo koyuwan it ki-tolimu diri, it pinembulay dot kosunduwo sid tinoguwangon di Firaun tu lumawan di Musa. Kel 7:11-22; 8:3-19 dit linumawan di Musa, tu it tongo guru dit maamalid diri nga lumawan-i dit tudukan tabanar. Naraag ot pongitungan doalo om notitimurok ot koosipan. ⁹Nga leed-suleed, amu nôono kadapat yoalo mamalid dot tulun, tu ela’an nôono dot kikiawi dot tulun it koolowong doalo, ugu-ko it koolowong di Yanes om i Yambres.

Girot No Kumuyut sid Napalajaran Nu

¹⁰Nga ong ikaw, notiruwanan nu no it tudukan ku, it bubuatan ku, it tomodon dit koposiyon ku, it koosipan ku, it kolonuto ku, it toluod ku, it koosugul ku. ¹¹Namato nu kondiri dot kukuro ot kaasansara om koo’indoso dot kinowowoyo’on ku sid kota dot Antiokhia, sid kota dot Ikonium om sid kota dot Listra. Om ela’an nu-i dot minangan oku sansara’o dot landu kaara’at, nga sid kikiawi diri, sinalamat oku di Tuhan. 3:11 Antiokhia, Ikonium, Listra: Kis 13:14–14:23 ¹²Andang kikiawi ot tulun dit eengin tumaat sid Kinoringan dot nokeeso di Kristus Yesus, mangan sansara’o. ¹³Nga it tongo tulun dot araat om it tongo maangakal, sumagayan banar ruma’at; mangakal yoalo dot tulun wookon nga yino kondiri nga aakalan-i. ¹⁴Nga ikaw, oy Timotius, girot no kumuyut sid kikiawi it nabalajar nu om minangan nu banar imoyo’o, tu ela’an nu-i it tongo tulun dit minangajar dikaw. ¹⁵Om mantad dit okodok koh po, nokotutun koh no dot Kitab Tosusi. It Kitab Tosusi dino, pinopintar dikaw sampay nakaanu koh dit kasalamatan tu mimoyo di Kristus Yesus. ¹⁶Tu kikiawi it nokotulis sid Kitab, nituduk di Tatod do Kinoringan sid ginawo dit tulun dit minonulis. Om kikiawi dino, ki-guna dot monuduk, patarang om potumbongon dit nasala, om mongubas dot tulun maya dit kenginan do Kinoringan. ¹⁷Ong balajar do Kitab, titikid dit tulun dit mangalayan do Kinoringan, owiwion monukup sampay eelo mamaal dit nunu nopo it gagama’on tawasi.

¹Ondomo no dot gumuli po kembagu i Kristus Yesus dot mangaratu dot tukum dit tulun miyaw om minatay, om momorinta sid Karajaan Yo. Jadi sid tinoguwangon do Kinoringan om i Kristus Yesus, suuon teekaw ²dot paabar dit boros do Kinoringan, dot okon-ko momili dit araat ko awasi ot masa: sumodia nopo. Patarango no it karaatan doalo, tiago om potumbongono yoalo dot alanut ot ginawo nu om osulimod ot gama nu. ³Pasal waro masa rumikot, dot amu no mokinongow ot tulun dit tudukan dit ataatantu; gaam-gaam nogi pumpungon doalo it tongo guru dit kenginan doalo, dot modtuduk dit nunu nopo it awasi karanga’an. ⁴Sonsongon doalo it tolingo yo sid tudukan tabanar, ibanta sid tongo tudukan dit mogkorootan. ⁵Nunu nopot kowowoyo’on, pokodoso no inot ginawo nu! Kokosog no sid kasansara’an, mangay no polombuso it karaja nu dit paabar dit Tabar Tawasi, om pongoyo no banar kikiawi mamaal it tugas dit niarap do Kinoringan sid dikaw.

⁶Tu ontok do yoku, amu no songkuro koleed om patayon oku no, nga iti koposiyon ku, isamba ku sid Kinoringan. 4:6 ... nga iti koposiyon ku isamba ku sid Kinoringan. Harfiah: ... nga nokotimpuun no tumuntug it raa ku ugu-ko liing dot anggur dot isamba ku sid Kinoringan. Ong sid Kitab Leed, waro piipiro ot gama dot mangagaras do pangayam dot isamba sid Kinoringan, dot subay-ko tuntugan dot liing dot anggur it tonsi dit pangayam diri. Intangay sid Kel 29:38-41 om Bil 15:1-12. Okon-ko komoyoon di Paulus dot babanar-ko it raa yo ot isamba sid Kinoringan, ino-i-nga pawaya’an yo nôopo momoros dot mangan patayo it kondiri yo.4:6 Kel 29:38-41 ⁷Nokoponotos oku no banar manangkus sid pilumba’an, om nokosuku oku no sid sukuon ku. Osotia oku di Kristus sampay sid kopupuson. ⁸Maakaa diti, mindad-indad it mahkota, it odia dit kinamanangan ku dit itaak di Tuhan sid dogon sid tadlaw dit pongukuman do pomogunan. It mahkota no diri ot gama do Kinoringan mangakun dot nakawaya oku dit kenginan Yo, tu Yalo no ot Takim dot Aadil. Nga okon-ko yoku no ot ataakan dot mahkota, ino-i-nga kikiawi it tulun dit miintong dit korikatan di Tuhan.

Tupono dot Nikowili

⁹Ponotos no mogiim do ralan dot kaangangayan nu talangkas sitid dogon. ¹⁰Tu niduan oku di Demas, tu gaamon po doo itit pomogunan. Minogidu yalo sid kota dot Tesalonika. I Kreskes nga sori nod negeri dot Galatia, om i Titus sid negeri dot Dalmatia. 4:10 Kol 4:14; Flm 1:24; 2Kor 8:23; Gal 2:3; Tit 1:4 ¹¹I Lukas pot sitid dogon. Pagka ugu dino, angatay i Markus sitid dogon, tu ki-guna yalo monulung dogon sid gagama’on ku. 4:11 Kol 4:14; Flm 1:24 Markus: Kis 12:12, 25; 13:5, 13; 15:37-39; Kol 4:10 ¹²I Tikhikus, minangan ku poongoyo sid kota dot Efesus. 4:12 Kalu ong i Tikhikus ot pinoowitan di Paulus ditit surat diti.4:12: Kis 20:4; Ef 6:21-22; Kol 4:7-8 ¹³Kadung mongoy koh siti, owiton dogon it baju ku takapal, it nokoogol ku sid kota dot Troas sid walay di Karpus. Om it tongo buuk ku, keeso no banar it kulit ot winaal. 4:13: Kis 20:6

¹⁴I Aleksander it moodsupu diri, ogumu no ot karaatan dot nawaal yo sid dogon. Nga sulian-i yalo di Tuhan dot maya dit nongo-gagama yo diri. 4:14: 1Tim 1:20; Mzm 28:4; Mzm 62:13; Ams 24:12; Rm 2:6 ¹⁵Ino nogi, ikaw poma nga tandayay no yalo, tu landu kookuat ot gama yo lumawan dit tudukan tokow.

¹⁶It tinsâan oku-i sid piukuman, asot îisot minonginsuup dogon, niduan oku doalo kikiawi. 4:16 Mzm 22:2 Arapon ku dot amu insala’on do Kinoringan yoalo sid hal diti! ¹⁷Nga i Tuhan ot maawaya dogon om pinapatog dogon, sampay nopongo no it karaja ku dot paabar dit Tabar Tawasi, sampay kikiawi dit tongo bansa dit okon-ko Yahudi nga nokorongow no dit Tabar diri. 4:17 Mzm 22:18 Om sinalamat oku-i di Tuhan mantad sid tukuman dot patayon. 4:17 Om sinalamat oku-i di Tuhan mantad sid tukuman dot patayon. Harfiah: Om sinalamat oku-i di Tuhan dit isumad oku dara sid singa. / Om sinalamat oku-i di Tuhan mantad sid kabang dit tongo singa. 4:17 Mzm 22:14, 22¹⁸Andang salamaton oku do Kinoringan mantad sid nunu nopo ot karaatan. Owiton oku Doo sumuwang sid Karajaan Yo sid surga dot asalamat oku. Yalo no ot insawatan misingkoleed! Amin.

¹⁹Kirim salam oku sid di Priskila om i Akwila, om sid sirang di Onesiforus. 4:19: Kis 18:2; 2Tim 1:16-17 ²⁰Minogol i Erastus sid kota dot Korintus, nga i Trofimus niogol ku sid kota dot Miletus tu sumakit. 4:20: Kis 19:22; Rm 16:23; Kis 20:4; 21:29 ²¹Ponotos no mogiim do ralan dot kaangangayan nu sitid dogon dot amu po orikot ot musim tosogit.

Kirim salam dikaw i Ebulus, i Pudes, i Linus, i Klaudia om it kikiawi it tongo koobpineeyan siti.

²²Totonudon koh-i di Tuhan.

Kososogit konow sid saralom dit kosianan di Tuhan.