2 Tesalonika

2 Tes

Surat Koduwo di Paulus

kumaa sid Jemaat dot

Tesalonika

Popela’an

Tiya dit minonulis i Paulus diti surat koduwo diti, kakal po ogoliwangan it tongo tulun sid jemaat dot Tesalonika ontok-ko it korikatan kembagu di Tuhan Yesus. Jadi, itit Surat Koduwo diti, potumbongon i Paulus dit kogoliwangan doalo, it reetan-ko nokorikot no kembagu i Tuhan Yesus, dot sabanar no, amu po. Manarang i Paulus dot, gulu dot korikatan kembagu di Yesus, amu mimîilo nga “ogumu ot tulun monolikud di Kristus, om kembulay it reetan dit Raja do Karaatan,” ka (2Tes 2:3-4). Inot tulun dino, reetan di Yohanes dot Mising-kiKristus keenong Anti-Kristus (1Yoh 2:18), om sid Kitab di nabi Daniel nga noreetan-i yalo dino (Dan 11:36-37).

Apatong i Paulus monuu dit tongo tulun sid Tesalonika, dot subay-ko gumirot yoalo kumuyut sid koosipan sid Kristus dot nokuro ong osusa om asansara poma (2Tes 1:4-5; 2:15), momuroti kondiri, ugu-ko i Paulus om it tongo koruang yo gumama (3:7-12), om abagos mamaal dot kowosian.

Suwang

Salam do kotimpuunan: 1:1-2

Pintaduwa dot monorimakasi: 1:3-12

Korikatan kembagu di Yesus om korikatan di Anti-Kristus keenong Raja do Karaatan: 2:1-17

Okon-ko oobul gumama: 3:1-15

Salam do kopupuson: 3:16-18

Salam do Kotimpuunan

¹Iti surat diti, mantad sid dagay i Paulus, i Silas 1:1 i Silas: Harfiah: i Silwanus. I Silwanus nopo, ngaran yo sid boros dot Latin om Yunani (intangay sid Kis 15:22, 40; 17:4). I Silas dino, ngaran yo sid boros dot Ibrani. om i Timotius, irikot ya sid jemaat sid Tesalonika, it nasanganu do Kinoringan, it Tama tokow, om i Tuhan Yesus Kristus. 1:1 Kis 17:1

²Kososogit konow sid saralom dit kosianan om koosayan do Kinoringan it Tama tokow om i Tuhan Yesus Kristus.

Pintaduwa dot Monorimakasi

³Oy tongo koobpineeyan ya, apatut dot monorimakâasi okoy nopo sid Kinoringan dot aso putut pasal dikoo. Andang apatut dot ugu okoy dino, tu matog banar it kemaya’an om it poomitoluod duyu. ⁴Ino no ot pasal dot royo’on ya ikoo titikid korikot okoy sid wookon it jemaat do Kinoringan. Om royo’on ya po ikoo tu osugul kow om kakal-i opirot ot koosipan duyu, songkuro poma ot paanansara om kosusa’an dit goosan duyu.

⁵It kaata’an duyu sid kasansara’an diri, iso bukti dot aadil it koputusan do Kinoringan dot aaluk kow jumadi raayat sid karajaan Yo. Tu minsan-ko mangan kow poma sansara’o dot tulun pasal dit Karajaan do Kinoringan, nga ataan kow-i. ⁶Andang aadil i Kinoringan, tu sulian Yo manansara it tulun dit manansara dikoo. ⁷Asansara kow poma maakaa diti, nga ong rumikot kembagu i Tuhan Yesus mantad sid surga, tonuson Yo it kasansara’an duyu, om yokoy nga ugu-i dino. Kadung rumikot Yalo, woyo’on Yalo dit tongo moleekat Yo dit ki-sinundu, ⁸om ki-tapuy Yalo dot miisikit dot ponuli dit tongo tulun dit amu kotutun do Kinoringan om amu tumanud dit Tabar Tawasi ontok-ko i Tuhan tokow Yesus. 1:8 Mzm 79:6 (LXX); Yer 10:25; Yes 66:15 ⁹Ookuman yoalo dot obinasa misingkoleed, iinsodu mantad sid tinoguwangon di Tuhan om mantad sid kabaako dit tompiling Yo. 1:9 Yes 2:10 ¹⁰Ong korikot i Tuhan dit tadlaw dino, eeraranan om mangarayow Doo kikiawi it tongo umat Yo – ino-no, kikiawi dit nokeemoyo Doo. Ikoo nga kaagkum kow-i dit umat Yo, tu nokeemoyo kow dit niabar ya sid dikoo diri.

¹¹Ino-no ot sabap dot aso tingkod ya momintaduwa dikoo, supaya pojodion kow do Kinoringan dot mialuk dit kinoponginloowan Yo. Om mintaduwa okoy dot posukupon kow dit kuasa do Kinoringan, sampay kadapat kow papanaw dit kenginan duyu dot mamaal dot kowosian tu tasil dit koosipan duyu. ¹²Ong ugu dino ot kobuatano duyu, arayow i ngaran di Yesus i Tuhan tokow. Om ikoo nga royo’on-i di Tuhan Yesus. Om kikiawi diri, tasil dit kosianan do Kinoringan tokow om i Tuhan Yesus Kristus.

Korikatan dit Raja do Karaatan

¹Jadi, oy tongo koobpineeyan, waro ot pokionuwon ya dikoo ontok dit korikatan kembagu di Tuhan tokow Yesus Kristus, om it koporungguman daton sid di Yesus. 2:1 1Tes 4:15-17 ²Okon-ko oobing-goliwong kow keenong oobing-tigagang kow, tu norikot no kabarasan it Tadlaw dit Korikatan Kembagu di Tuhan Yesus. Ong waro poma nubuat ko tabar ko surat ot mantad sid dagay kabarasan, nga kada no mimoyo. ³Kukuro nopo ot gama dot tulun mamalid dikoo, kada kow no mokipalid! Tu amu po orikot ino Tadlaw dino, ong okon-po-ko ogumu ot tulun dot monolikud di Tuhan, om subay-ko kembulay po it Raja do Karaatan. 2:3 Raja do Karaatan: Yalo nobo dino it Anti-Kristus (1Yoh 2:18; 1Yoh 4:3; 2Yoh 1:7), keenong it tulun dit Mising-kiKristus ko it Misingko-Raja Maanalamat (Mat 24:24), om it Dupot (Why 13). Ogumu ot pongoreetan yo, nga iseeso ot tulun. It Raja do Karaatan dino, natantu no mâantad do Kinoringan dot obinasaa, 2:3 Dan 7:24-26 ⁴tu yalo nopo dino, musu do Kinoringan, tu monginsawat dit kondiri yo mantad dit kikiawi it sasamba’on dot tulun, om kikiawi it reetan dot kinoringan. Mogom yalo sid Saasambayangon Tagayo sid Yerusalem,2:4 Mogom yalo sid Saasambayangon Tagayo sid Yerusalem ... It toon 70, minangan uyaso dit tongo soojar dot Ruum it Saasambayangon Tagayo sid Yerusalem. Nga waalon kembagu sompôori, dot iyonon dot tulun Yahudi sumamba. Kadung-ko mogom siri it Anti-Kristus diri keenong Raja do Karaatan, aso no wookon ot tomodon, mokisamba dot tulun. om mangakun dot Kinoringan it kondiri yo. 2:4 Dan 11:36-37; Yeh 28:2; Mat 24:15; Mrk 13:14

⁵Amu duyu gaam aandaman, tiya dit muurunggum oku po dikoo, dot asasarok oku no momoros dikoo dit ugu diri? ⁶Nga maakaa diti, nela’an duyu-i dot warot mangawang dit Raja do Karaatan diri. 2:6 Dan 12:1; Why 13:7-14 Orikot po ot masa dit natantu do Kinoringan, om mimbulay nogi yalo. ⁷Tu nokotimpuun no papanaw it rancangan dit tongo rogon dit awaya’an sompôori dit Raja do Karaatan diri. 2:7 1Yoh 2:18; 1Yoh 4:3 Nga maakaa diti, olosok it rancangan diri tu waro ot mangawang. Eedu po it nakaawang ⁸om mintalang nogi it Raja do Karaatan dino. Nga patayon di Tuhan Yesus dit pinuobo dit mantad sid kabang Yo it Raja do Karaatan diri, om tonuson Doo yalo dit tompiling Yo tiya dit Korikatan Yo kembagu.2:8 Yes 11:4 ⁹It Raja do Karaatan diri, rumikot dot nokuasa dit Raja do Rogon. Kadapat yalo pembulay dot masam-masam ot tanda do kosunduwo, om keeranan dot mamalid dot tulun.2:9 Mat 24:24; Kis 2:22 ¹⁰Mangakal yalo dit tongo tulun dit obinasa misingkoleed, dot masam-masam nopo ot karaatan. Sagay obinasa yoalo, amu monorima om amu eengin dit tudukan tabanar dit kasalamat doalo. ¹¹Ino no ot sabap dot porikot i Kinoringan dot kuasa sid doalo dot mamalid, sampay mimoyo yoalo dit wudut dino, ¹²supaya ookuman kikiawi it tulun dit amu mimoyo dit tudukan tabanar diri, om owosian dot karaatan.

Pinili Kow dot Mangan Salamato

¹³Oy tongo koobpineeyan, it aa koyuuan di Tuhan, aaluk-i dot aso putut ya monorimakasi sid Kinoringan baagi dikoo. Tu mantad dit kinotimpuunan diti pomogunan, nopili kow no mâantad do Kinoringan dot mangan salamato. Iti no ot gama Dialo manalamat dikoo, susian kow dit Tatod Yo om keemoyo kow dit tudukan tabanar. ¹⁴Linoow kow do Kinoringan, tiya dit niabar ya sid dikoo it Tabar Tawasi, supaya asalamat kow, om supaya kokisib kow nôono sid tompiling di Yesus Kristus, i Tuhan tokow. ¹⁵Ino nogi, oy tongo koobpineeyan, patog kow no mingkakat om girot kow no kumuyut sid tongo tudukan dit nilombus ya sid dikoo, ii-ka it nigotuwang keenong it tinulis ya.

¹⁶Pagka tu amu tokow koyuu do Kinoringan, insasamadan tokow Dialo dot aso gisom. Om pagka tu sianan tokow do Kinoringan, ki-arapan tokow dot opirot. Jadi, barakatan ku ikoo supaya i Tuhan tokow Yesus Kristus kondiri, om i Kinoringan Tama tokow ¹⁷ot momuransang dikoo om papatog di ginawo duyu, supaya kadapat kow mamaal om momoros dot awasi.

Pintaduwa’ay Okoy no Dikoo

¹Pomupusan oy tongo koobpineeyan, pintaduwa’ay okoy no dikoo, supaya alangkas katanjag it boros di Tuhan, sampay otorima dot tulun dot ugu-ko it sid dikoo di gûulu.²Om pintaduwa’ay okoy po supaya salamaton okoy do Kinoringan mantad sid tongo tulun torongit om araat, pasal okon-ko kikiawi pot tulun nga keemoyo di Kristus.

³Nga osotia i Tuhan; Yino ot mongimpatog dit ginawo duyu om mongolikup dikoo dit raraaton kow dit Raja do Rogon. 3:3 Mat 6:13; Yoh 17:15 ⁴I Tuhan ot manaak dagay do koyokinan, dot woyo’on duyu it nisuu ya dikoo, om tumilombus kow-i maya dit suu ya.

⁵Pintaduwa’an ku ikoo supaya undalanan kow do Kinoringan mangaarati dot amu kow koyuu do Kinoringan, om supaya kataan kow sid kasansara’an ugu-ko i Kristus.

Subay Abagos Gumama

⁶Oy tongo koobpineeyan, sid ngaran di Tuhan tokow Yesus Kristus, suuon ya ikoo dot insodu kow no mantad sid koobpineeyan duyu dit ongo-oobul kumaraja om amu tumanud dit tudukan dit nilombus ya sid dikoo. ⁷Tu nela’an duyu no mâantad dot subay tumiruwan kow dagay. Tu tiya dit muurunggum okoy po dikoo diri, amu okoy oobul. ⁸Okon-ko minokiakan okoy bâanar dikoo, ino-i-nga sodoy-adlaw okoy no maapatay gumama, supaya amu okoy kopokitundun sid disay nopo dikoo. ⁹Irad okoy poma dino, okon-ko komoyoon dot amu okoy apatut mokitundun dikoo, nga mokitiruwan okoy dikoo. ¹⁰Tu ii-poma muurunggum okoy po dikoo diri, niampangil ya mâantad sid dikoo dot, “It tulun dit amu gumama, amu paakanon,” kanja diri.

¹¹Sagay pogi ugu dino ot boros ya, norongow ya dot warot piipiro tulun sinod dikoo dot oobul. Aa-po dot ugu dino yoalo, osibuk po dot gumawul dot hal dot tulun. ¹²It tongo tulun dot ugu dino, suuon om pajalan ya sid ngaran di Tuhan Yesus Kristus dot tutumantu gumama, om momuroti kondiri dot kaakanan.

¹³Nga wookon dikoo oy koobpineeyan ku, subay-ko amu kow oobing-bobos mamaal dot awasi. ¹⁴Ong warot tulun dot amu tumanud dit noboros ya sitid surat diti, intutunay duyu no it tulun dino om okon-ko rumunggum doalo, supaya omomoluan yoalo. ¹⁵Nga okon-ko pooguon nu it tulun diri dot ugu-ko musu, ino-i-nga, tiago no yalo dot ugu-ko tobpinee.

Salam do Kopupuson

¹⁶I Tuhan ot puun do koosayan. Jadi barakatan ku ikoo supaya taakan kow Dialo dot koosayan sid nunu nopo song-hal om sesêera nopo. I Tuhan ot maawaya dikoo kikiawi.

¹⁷Tinunturu ku kondiri monulis itit salam diti: Kopiwosian mantad sid di Paulus. Ugu keeti nobo ot poonulis ku, tanda dot itit surat diti babanar-ko mantad sid dogon om iti no ot seen ku.

¹⁸Kososogit konow sid saralom dit kosianan di Tuhan tokow Yesus Kristus.