Surat Koduwo
di
Petrus
Popela’an
Iti nopo surat koduwo di Petrus diti, irikot dialo sid tulun dit oleed no kosuwang dot Kristian. Tomodon nopo diti surat diti, lumawan dit tongo guru dit monuduk dit kapalid. It tasil dit tudukan doalo, mongowit dot tulun mamaal do karaatan. Monuu i Petrus dot subay-ko tandayan it tongo guru dit maamalid diri, om momuransang doalo, supaya maya babanar di Tuhan Yesus om opirot monguyut dit tongo tudukan tabanar, ino-no it tudukan di tongo tulun dit nakamato om nokorongow kondiri di Yesus. Oruol babanar ot ginawo di Petrus tu minomoros it tongo guru dit maamalid dot, “Amu no gumuli kembagu i Yesus sitid pomogunan, tu oleed tokow no mongindad nga aso po nokoguli,” ka doalo (3:3-4). Ong maya di Petrus, sagay amu po nokoguli i Tuhan Yesus, tu mongindad po i Kinoringan dot tumoobat it tongo tulun taraat, tu alanut ot ginawo do Kinoringan. Eengin babanar i Kinoringan supaya tumoobat kikiawi ot tulun (3:8-9). Nga toori tadlaw, raagon iti pomogunan taraat diti (3:10).
Suwang
Salam do Kotimpuunan: 1:1-2
Subay-ko ruangan tokow dot bubuatan tawasi it koosipan tokow tu gama pobukti dot linoow tokow do Kinoringan: 1:3-21
It tongo guru dit maamalid: 2:1-22
Andang gumuli i Tuhan Yesus: 3:1-18
1Salam do Kotimpuunan
1Oy tongo koobpineeyan ku! Iti surat diti mantad sid dogon, i Simon Petrus, turipon om rasul di Kristus. Pagka tu aadil i Kinoringan om i Maanalamat daton, i Yesus Kristus, nakaanu kow dot koosipan dit miinong-i ot koosu’ul dit dagay dot koosipan tongo rasul.2Kososogit kow no sid saralom dit kosianan om koosayan do Kinoringan dit aso gisom sid dikoo, sid saralom dit kotutun kow do Kinoringan om i Yesus Kristus it Tuhan tokow.
Ruangay Tokow no it Koosipan Tokow dit Bubuatan Tawasi
3Tu asal ong makin kotutun tokow di Yesus Kristus, kikiawi dit koporoluan tokow baagi dit koposiyon tototog om it kataato sid Kinoringan, sukupon Yo-i dit kosunduwo dit koKinoringano Yo. It gama di Yesus mangangat daton, natarik tokow dit kosunduwo om kowosian Yo. 4Andang osundu om awasi i Yesus; sagay pogi-om nijanji Yo sid daton it tongo barakat dit ongo-wawasi om boorogo. Asal monorima tokow dit tongo barakat diri, kotiruwan tokow nôono dit kobubuatano do Kinoringan om keedu tokow nôono mantad sid tongo kenginan dit ongo-raraat. Tu it kenginan dit ongo-rara’at dino, monguasa diti pomogunan, om mangaraag dot koyuwan om ginawo dot tulun. 1:4 kotiruwan tokow nôono dit kobubuatano do Kinoringan: Komoyoon, sompôori amu tokow nôono kawaal do duso om amu no matay, ugu-ko i Kinoringan, tu aso duso om amu matay. Om keeso tokow nôono babanar do Kinoringan.5Ino nogi, pagka tu agayo it tongo kotulungan do Kinoringan sid daton, totoso tokow no mongoruang it koosipan tokow dit bubuatan tawasi. Om it bubuatan tawasi nga ruangay tokow no dot pongila’an. 6It pongila’an, ruangay tokow dot kokodos ot ginawo. It kokodos ot ginawo, ruangay tokow do ginawo talanut it kataan sid kosusa’an. It ginawo talanut, ruangay tokow dot kataato sid Kinoringan. 7It kataato sid Kinoringan, ruangay tokow dot toluod kumaa sid koobpineeyan sandad Kristian. It toluod kumaa sid sandad Kristian, ruangay tokow dot toluod kumaa sid kikiawi ot tulun. 8Ong kikiawi dit bubuatan diri nga ki-waro sid daton om makin gumumu, ino no ot bukti dot babanar-ko kotutun tokow di Yesus Kristus, i Tuhan tokow. Komoyoon, itokow diti, okon-no-ko mabpamaya bâanar di Kristus, ino-i-nga mabpamaya di Kristus dit ki-tasil. 9Nga isay nopo ot aso dit bubuatan tawasi diri, bolow yalo om osowut it mato di ginawo yo, tu noolingan yo dot noogas no it tongo duso yo gûulu , tiya dit sinumuwang nogi yalo sid Kristian.
10Ino nogi, oy koobpineeyan ku, tontuo tokow no om totoso tokow no pobukti dot babanar-ko linoow om pinili tokow do Kinoringan. Ong ugu tokow dino, amu tumanus it koosipan tokow om amu tokow kosunsurut. 11Ong kaa dino, somungon tokow do Kinoringan dot osuaw ot gama ong orikot ot sumuwang tokow sid Karajaan tototog, ino-no Karajaan di Tuhan om Maanalamat daton, i Yesus Kristus.
12Andang nela’an duyu no it hal diri, om ogirot kow no kumuyut dit tudukan tabanar dit notorima duyu diri. Nga ugu poma dino, nga kakal-i dot aso putut ku popoondom dikoo dit tongo hal diri, 13namot po dot miyaw oku. Tu opurimanan ku dot aaluk dot sisiri poondomon ku ikoo dit nongo-boros ku diri, tu pomosik do ginawo duyu. 14Tu nela’an ku no dot amu no oleed ot kapatayan ku, tu noboros no di Tuhan tokow Yesus Kristus sid dogon. 15Sagay monotos oku babanar dot popoondom dikoo, supaya ong koliangan ku, amu duyu oolingan it tongo hal diti.
Andang Ajadi-i it Boros dit tongo Nabi Kodori ontok-ko it Korikatan Kembagu di Kristus
16Oonong it tongo tudukan ya sid dikoo ontok-ko it kuasa om korikatan kembagu di Tuhan tokow Yesus Kristus, tu namato ya kondiri it tompiling di Kristus, om okon-ko tongo tangon po dit wiwinaal dot tulun ot nilombus ya. 17Siri okoy namot dit minangan Yalo orumato om minangan ompilingay do Kinoringan it Tama. Tiya dino, norongow ya ot bongut mantad sid Kinoringan Tasawat dot minomoros sid Doo dot, “Iti no ot Tanak Ku dot aa-Ku koyuyuuan. Yalo no ot potomon do ginawo Ku,” ka. 18Yokoy kondiri ot nokorongow dit bongut dino mantad sid surga, tiya dit nakawaya okoy Doo sid limpapak dit nuluw tosusi. 1:18 Mat 17:1-5; Mrk 9:2-7; Luk 9:28-35
19Suway mantad dino, apatog om imoyo’on babanar it noboros mâantad dit tongo nabi ontok-ko i Tuhan Yesus. Songkuro kaawasi ong imoyo’on duyu babanar it boros diri, tu it boros diri, ugu-ko it babang dit manganawaw sid kotuwangan. Jadi, woyo’o duyu no it boros dit tongo nabi, mising-korikot dit korikatan kembagu di Tuhan Yesus. It korikatan kembagu di Tuhan Yesus, ugu-ko it sumilaw nogi it tadlaw. Om tiya dino, manganawaw Yalo dit ginawo duyu ugu-ko it rombituon dit reetan dot Minsoguwang,1:19 rombituon dit reetan dot Minsoguwang: Gelaran di Tuhan Yesus sid Why 22:16.komoyoon, kotutun kow nôono Dialo dot aawi-awi. 20It keeso no banar dot ondomon duyu ino-no: Asot îiso ot boros do tongo nabi sid Kitab dot obbuli papaarati maya dit kenginan kondiri. 1:20 Asot îiso ot boros do tongo nabi sid Kitab dot obbuli papaarati maya dit kenginan kondiri. Tafsiran 2: Kikiawi dit boros dit tongo nabi dit noboros sid Kitab, okon-ko mantad po sid pongitungan doalo kondiri. 21Tu it tongo boros diri, okon-ko wiwinaal maya dot kenginan dot tulun, ino-i-nga, mantad sid Kinoringan, tu binolinsuu yoalo di Tatod Tosusi polombus dit tongo boros diri.
2It Tongo Maamalid
1It kodori, warot nabi dot maamalid sid pialatan dit umat do Kinoringan. Sinod dikoo nga ugu keeno-i, tu insan tadlaw, waro ot guru dit maamalid. Opintar ot gama doalo pagawul dit tudukan dot kapalid om karaag dot tulun. Olimon doalo i Tuhan Yesus, it Moonguasa Tasawat, om it minongolukat doalo. Iri diri, porikot talangkas yoalo dot karaagan tagayo dot yoalo kondiri ot oonong. 2Om ogumu ot tulun Kristian dot tumiruwan dit padpasi dit tongo guru dit maamalid diri, dot mamaal dot kalaalasu. Yoalo no ot kasabap dot indaraaton dot tulun suuway it tudukan tabanar ontok-ko i Yesus. 3It tongo guru diri, mogiim nôopo dot koontungan, dot it tudukan dit wiwinaal doalo diri ot waya’an doalo mangakal dikoo, tu mokisisi’in. Nga mantad po dit kodori, nokosodia no mâantad do Kinoringan ot tukuman sid doalo. Mindad-indad doalo it kobinasa’an dot amu no eengkok.
4It tongo moleekat dit nakawaal dot duso 2:4 It tongo moleekat dit nakawaal dot duso ... Yoalo nopo dino, moleekat dot ongo-wawasi dit timpuun-i, nga pagka tu nakawaya dit Raja do Rogon dot rumatu sid duso, najadi dîiri dot moleekat dot ongo-rara’at. Tiya dit zaman di Nuh, minanansawo yoalo dot tongondu dot tulun om minaganak dot garagasi (Kej 6:1-4; Yud 1:6). nga amu-i nalayan do Kinoringan mongukum. Minangan yoalo korooto do rantay, om nisuwang nogi sid luwang dit paling otuwong sid naraka, tu pendadon dit Tadlaw dot Pongukuman. 2:4 Kej 6:1-4; Yud 1:6; 1Ptr 3:195It pomogunan kodori nga amu-i nalayan do Kinoringan mongukum. Minangan do Kinoringan polusuwo it pomogunan dit tulun dit pakaaso Doo. I Nuh po om it turu koyuwan it tulun wookon ot sinalamat Yo, tu i Nuh ot minangangat dit tongo tulun dot tumoobat om maya dit kenginan do Kinoringan. 2:5 Kej 6:1–7:246It Sodom om Gomora nga ugu keeri-i, tu minangan do Kinoringan tonuso dot tapuy, supaya ajadi dot suntu om pangaandaman dit tulun dit pakaaso do Kinoringan. 2:6 Kej 19:247Nga sinalamat-i do Kinoringan i Lot, tu tulun tabanar yalo. Nasansara babanar yalo daagan dit gagama’on dit tongo tulun dit mamaal dot kalaalasu om amu momoduli dit araat om awasi. 2:7 Kej 19:1-168I Lot, it tulun tabanar diri, nokorunggum sid tongo tulun taraat diri, om titikid tadlaw nopo yalo kokito om korongow dit gagama’on taraat dit tongo tulun siri, sampay orualan babanar yalo do ginawo. 9Jadi, mantad sid tolu ot suntu diri, atarang no dot eelo-i i Tuhan manalamat dit tongo tulun dit tumaat sid Doo mantad sid pensuba’an. 2:9 ... mantad sid pensuba’an. Tafsiran 2: ... mantad sid bahaya. Om eelo-i i Tuhan mongojiil dit tongo tulun taraat, tu peendadon dit Tadlaw dot Pongukuman. 10It keeso no babanar, ino-no it tulun dit maya dit tiwow dit koosomu, om it amu mongorumat dit isay nopo it ki-pangkat.
It tongo guru dit maamalid dino, osiow om amu rumosi monguukuwo dit ongo-susundu sid sawat. 11Dot yang-ko, insan it tongo moleekat no tu abasag om osundu mantad-ko it tongo guru, nga amu-i kobulun momoros sam keeno. Tu amu-i araat ot boboroson doalo tiya dit minonuntut yoalo dot tukuman baagi dit tongo woyo’on do rogon sid tinoguwangon di Tuhan. 12Nga it tongo guru diri, sumûurag-i monguukuwo dit nunu nopo it amu oorotiyan doalo. Tu yoalo dino, asot takal, ugu-ko it dupot dit maya nopo dit opurimanan sid ginawo. Om it koompuson doalo, ugu-ko it dupot dit nokosulung dot lawa tu mangan binasa’o. 13Mangan yoalo gojiyay dot kasansara’an, tu minanansara yoalo dit tulun wookon. Ong kotomumung dikoo yoalo sid poginakanan dot dang jemaat, koluog om kamaamalu it bubuatan doalo. It babanar-ko kotomon doalo, ino-no, tiya dot tadlaw nga moginum-i dot aso gisom. 2:13 tiya dot tadlaw nga moginum-i: It tadat om koobasan dit tulun namot di Petrus, amu moginum tiya dot tadlaw. Intangay sid Kis 2:15. Opintar yoalo rumunggum daton dot mamalid ot tomodon. 14Amu obobobos yoalo mamaal dot duso, om gilatan it gama doalo mogintong sid tongondu. It tulun dit amu po bâanar apatog ot koosipan, mangan doalo biyayato. Nolumbag no it ginawo doalo dot mangakal dot tulun, tu moginokupan om mokisisiin. Oontok-i yoalo do subado Kinoringan sompôori! 15Napalid yoalo, tu amu yoalo tinumolunung dit ralan dit otulid. Minaya yoalo dit ralan dit winaya’an di Bileam, tanak di Beor. Tu yoalo nga ugu-i di Bileam kodori, tu atamanan dot kaanu dot siin mantad sid araat ot gagama’on. 16Nga, awagat babanar ot pinoniagan sid di Bileam pasal dit duso yo. Tu it kaladay yo dit andang-âandang nga amu keelo momoros diri, mîilom minomoros ugu-ko tulun, dot sinuu i nabi tumingkod dit karaja yo dit mulaw-ulaw. 2:15-16 Bil 22:4-35; 24:10-14
17It tongo guru dit maamalid diri, ugu-ko it towud dot weeg dit narasak om ugu-ko it kawut dit notilib dot sarup tologod dot amu sumondot, komoyoon, amu mongowit dot barakat sid tulun wookon. Nosodia’an no mâantad yoalo do Kinoringan dit keeyonon dit paling otuwong. 18Ongo-raralom kabarasan it tudukan doalo, nga asaso-i ot tonsi. It tiwow dit koosomu om it kalaalasu ot pomiyayat doalo dit tulun dit koo’idu mantad sid bubuatan dot dang tulun dit napalid. 19Momoros kabarasan yoalo dot, “Kayow, obebas tokow no mamaal dot nunu nopo ot kenginan tokow, tu nibebas tokow do Kinoringan!” ka, dot yoalo kondiri nga ooripon dot karaatan dit mongowit doalo sid kobinasa’an. Tu nunu nopo ot amu akala dot tulun, iri no ot monguripon doo. 20Kiikiro ong nokeedu no ot tulun mantad sid karaatan diti pomogunan, tu nokotutun no di Tuhan om it Raja Maanalamat daton i Yesus Kristus, nga ginumuli kembagu mokiporinta dit karaatan diri, komoyoon, araat mantad dit timpuun-i ot koomamanon yo. 21Gaam nogi ong amu nokotutun it tulun diri dit Ralan Tabanar, mantad dot nokotutun om amu-i dîino maya dit pinonuu’an tosusi do Kinoringan, it niabar sid doalo. 22It tulun dino, aso biida dit duwo ot paanambarasan dot tulun dot oonong ot komoyoon, “It tasu, mangakan kembagu dit tilob yo,” ka, om, “It wogok dit nopodsu no, monginlolobuw kembagu sid butak,” ka. 2:22 Ams 26:11
3Andang Gumuli Kembagu i Yesus
1Oy tongo koobpineeyan ku dit aa-ku koyuyuuan! Iti surat diti, surat ku kumeenduwo pakaa sid dikoo. Tomodon ditit surat ku diti, pomosik ku dikoo, supaya osusi it pongitungan duyu om supaya aandaman duyu 2it boros dit tongo nabi tosusi kodori, om it nisuu di Tuhan, it Maanalamat, it nilombus ku om it tongo rasul wookon sid dikoo. 3It keeso no banar dot mangan duyu ila’ay: Kadung miirikot no ot koowian do zaman, waro tulun mimbulay dot it kenginan taraat ot potuudan. Monginwawali yoalo dit korikatan kembagu di Kristus dot monginsasana ot gama, 3:3 Yud 184dot ka, “Okon-ko nakajanji gaam i Kristus dot rumikot kembagu? Siombo no Yalo obo? Mad-ko nongo-patay no it tongo taki-lombus tokow, nga iri-îiri-i itit pomogunan diti, mad aso-i ot nokito ku dot kinosimbanon mantad dit koo’urug,” ka. 5Totomodon bâanar doalo dot amu ela’an kabarasan, dot mantad po dit kodori, ki-waro no mâantad ot tawan dot it boros no do Kinoringan ot pinongurug. Om numpug do Kinoringan it tana sid tanga do weeg tu popitongkiyad dot weeg om tindal. 3:5 Kej 7:11 6Om iri-îiri it boros do Kinoringan om it weeg ot pinananus Yo diti pomogunan kodori, dit minangan Yo polusuwo. 7Om it tawan om tana diri nga, iri-îiri it boros do Kinoringan ot pomiara. Maakaa diti nga kakal po pipiara’on. Nga ong orikot it Tadlaw dot Pongukuman sompôori, it tawan om tana om it tulun taraat, mangan tonuso dot tapuy.
8Nga ikoo, oy koobpineeyan dit aa-ku koyuyuu, iso no ot hal dot subay-ko amu duyu olingan: Ong dang Kinoringan dot pongindanan, oribu toon miinong-i dot sangadlaw no ong tokow, om it sangadlaw no, miinong-i dot oribu toon ong tokow. 9Andang waro tulun monokod dot mialung-alung i Tuhan monuman dit janji Yo dot gumuli kembagu, nga sabanar no, amu oboloti Yalo. Ino-i-nga alanut ot ginawo Yo sid daton, tu amu eengin Yalo dot waro ot tulun dot obinasa. Tu it kenginan Yo, kikiawi dot tulun nga kotoobat.
10Nga ii-nopo Tadlaw dit Korikatan Kembagu di Tuhan, ugu-ko maanakaw dit amu tokow ela’an ot korikatan, tu mîilom poririkot po. Tadlaw dino, tumanus ot tawan meed dot tuni dot opuod babanar ugu-ko tinggorud. Osorob om atanus it tawan miampay dit nunu nopo sid tawan, om it pomogunan nga osorob om atanus. Nga eembulayan kikiawi it nagama dot tulun, tu mangan odilo. 3:10 Mat 24:43; Luk 12:39; 1Tes 5:2; Why 16:15; 20:1111Pagka ugu diri ot gama mananus dit kikiawi diri, kumukuro tokow nôono? Subay-ko osusi om tumaat sid Kinoringan! 12Namot dot miintông tokow no dit tadlaw dot pongukuman do Kinoringan ditit pomogunan, totoso tokow no palangkas it korikatan dit Tadlaw dino. Tadlaw dino, osorob om atanus ot tawan, om it nunu nopo sid tawan, tumangi dot osorob dot tapuy. 13Nga itokow, mongindad dit najanji do Kinoringan, ino-no tawan wagu om pomogunan wagu. Siri no ot iyonon tokow tongo tulun tabanar, om aso not karaatan. 3:13 Yes 65:17; 66:22; Why 21:1
14Ino nogi oy koobpineeyan dit aa-ku koyuyuuan, namot dot miintông tokow no dit Tadlaw dino, totoso tokow no babanar pawasi dit bubuatan tokow, supaya abantalan tokow Dialo dot osusi om aso karaatan, om nokopiusay no do Kinoringan. 15Itungo tokow no babanar dot, it kolonuto do ginawo di Tuhan tokow, kosiwatan dot nitaak Yo sid daton supaya kaanu tokow dot kasalamatan. I Paulus, it tobpinee tokow dit amu koyuyuuan, nga minonulis-i dot ugu diti kumaa sid dikoo, dot minamakay dit pongila’an dit nitaak do Kinoringan sid doo. 16Tu titikid dot monulis yalo ontok-ko it hal diti, iso-i ot tonsi dot boroson yo. Andang warot piipiro ot hal sid surat yo dot apagon mangaarati. Om iri no ot mangan goliwongo dit tulun dit orukung ot koosipan om asot oorotiyan dit hal diri, ugu-ko it gama doalo mongogoliwong dit wookon it boros sid Kitab. Dot iri diri, mongowit dot kobinasa’an sid kondiri doalo.
17Nga ikoo oy koobpineeyan dit aa-ku koyuyuuan, oleed duyu no kela’ay it hal dino. Ino nogi, jaga’o duyu no it tongo guru dit maamalid, it amu momoduli dit araat om awasi, supaya amu kow kawaya doalo dot apalid om supaya amu kow owunsut sid nulokon duyu dit apatog. 18Piruruangay duyu it gama duyu momurimon om mangarap dit kosianan di Yesus Kristus, om posuruto duyu no it gama duyu mongintutun di Tuhan om it Maanalamat daton, i Yesus Kristus. Royo’o tokow no Yalo, mantad tidîino sampay misingkoleed.