1 Timotius

Surat Keeso di Paulus

Kumaa sid di

Timotius

Popela’an

I Timotius nopo dino, Kristian nga omulok po. Yalo dino, mantad sid kota dot Listra sid Asia Tokodok, it bogian dot kotonobon dot Turki ong maakaa. Tidi yo nopo nga bansa dot Yahudi, om it tama yo bansa dot Yunani. Nopili yalo di Paulus dot tambabaya yo om tuup yo kumaraja (Kis 16:1-3). Itit surat diti, tinulis di Paulus tiya dit sid Makedonia yalo, tu niogol yo i Timotius sid Efesus, tu ponudukon dit tongo Kristian siri (1Tim 1:3).

Itit surat diti, tolu ot tomodon: Keeso, monuu i Paulus di Timotius potingkod dit tongo guru dit maamalid dit tongo Kristian sid Efesus. Tu it tudukan doalo diri, tudukan mantad sid tugama dot Yahudi om kapir ot pinigawul. Potuduk poma yoalo dit Tukum di Musa (1Tim 1:6-7), nga nga amu oonong ot gama. Tu tonsi nopo dit tudukan doalo, mogkorootan tu tangon ontok-ko it koturunan om kinowowoyo’on kabarasan dit tongo taki-lombus dot tulun Yahudi (1Tim 1:4). Om moniag po yoalo dit tongo Kristian dot manansawo om mangakan dit piipiro ot bansa dot aakanon (1Tim 4:3). Koduwo, monuduk i Paulus di Timotius dit gama mangaatur dit tongo jemaat siri, ino-no, it gama momili dot ponotua om diaken do jemaat, it gama momiara dit tongo janda, om wookon po.

It pomupusan no, monuduk i Paulus di Timotius supaya kajadi dot turipon di Yesus dot awasi om koowit dit tugas dit niarap do Kinoringan sid doo.

Suwang

Salam do kotimpuunan: 1:1-2

Monuu i Paulus di Timotius potingkod dit tongo guru dot maamalid: 1:3-20

Oturan dot paadsambayang: 2

Bubuatan dit tulun dit aaluk jodion dot ponotua om diaken sid jemaat: 3

Monuu babanar i Paulus di Timotius jumadi do turipon di Kristus dit kaarapan: 4:1–6:21

Salam do Kotimpuunan

¹Iti surat diti mantad sid dogon i Paulus, rasul di Kristus Yesus. Najadi oku dot rasul tu sinuu oku do Kinoringan it Maanalamat daton, om i Kristus Yesus, it arapan tokow. ²Iti surat diti, irikot ku sid dikaw, oy Timotius, it ponokaanak linuwa ku sid koosipan. 1:2 Kis 16:1-3; Tit 1:4

Kososogit konow sid saralom dit kosianan om koosayan do Kinoringan it Tama om i Kristus Yesus i Tuhan tokow.

Nipotingkod di Paulus di Timotius it Tongo Guru dit Maamalid

³Eengin oku dot mimiyon koh po sid kota dot Efesus, ugu-ko it suu ku dikaw tiya dit linumombus oku sid negeri dot Makedonia. Pasal, warot pipirot tulun patanjag dot tudukan dot kapalid. Mangan tiago yoalo, ⁴supaya tumingkod paada do masa sid mogkorootan it kinowowoyo’on dit tongo taki-lombus om it tongo ngaran dit koturunan doalo dit aso gisom. 1:4 It zaman di Paulus, warot piipiro buuk dit kinotulison dit kinowowoyo’on dit koturunan di Abraham om it ngaran dit tanak doalo kabarasan. It tongo kinowowoyo’on diri, wiwinaal om aso sid Kitab, nga nanu doalo dati dot khotbah. Iri no dati ot komoyoon di Paulus. Tu kiawi dino, mongimbulay nôopo dot pigaga’an, om amu posundur dit rancangan do Kinoringan, dot yang-ko it koosipan tokow ot waya’an mamaal. 1:4 Tit 1:14; 3:9 ⁵Koponuu’an ku nopo dikaw dot moniag doalo, supaya mitotoluod yoalo. Dot it gama nopo mitotoluod, subay-ko mantad sid ginawo toborisi, it aso kasala’an, om mantad sid koosipan dit okon-ko misingko-pangangasip nôopo. ⁶Nga warot pipirot tulun dot nokosompiang, om nokotopik sid pinigaga’an dit aso guna. ⁷Eengin dara yoalo jumadi dot guru dit Tukum di Musa, nga yoalo kondiri nga amu-i kaarati nunu it boroson doalo keenong it ibubujol doalo.

⁸Ela’an tokow-i dot it Tukum dino awasi ong syukur oonong mamakay. ⁹Nga subay ondomon tokow, dot okon-i-ko it tulun tabanar pot paanangan dit Tukum dino, ino-i-nga it tulun dit pakaaso dit Tukum dino om it amu mokiporinta, it amu tumaat sid Kinoringan om it ki-duso, it mongowii nôopo dot dang pomogunan om it amu osusi, it maamatay dot tidi om tama, om it maamatay dot tulun, ¹⁰it moonokiagay om it miagay dot sompi kusay, it midadagang dot turipon, it moomudut om it sumasi dot wudut, om isay nopo it lulumawan dit tudukan dot ataatantu. ¹¹It tudukan dot ataatantu diri, mionong dit Tabar Tawasi dit niarap do Kinoringan sid dogon dot ipaabar. It Tabar Tawasi diri, popeelo dit kosunduwo do Kinoringan, it puun do barakat.

Monorimakasi dit Poonisian do Kinoringan

¹²Monorimakasi oku sid di Kristus Yesus i Tuhan tokow, it mongimpapag di ginawo ku. Tu nitung oku Doo dot kaarapan Yo om pinili oku Doo dot turipon Yo, ¹³dot yang-ko baya minonguukuwo oku di Kristus, minanansara oku dit nongo-keemoyo Doo, om minonguukuwo oku doalo dit pupuun-i. Nga sinianan oku Doo, tu tiya diri, amu ku ela’an dot araat it bubuatan ku, tu amu oku po nokeemoyo di Kristus.1:13 Kis 8:3; 9:4-5 ¹⁴Gaam nogi tinuntugan oku di Tuhan tokow dit kosianan Yo. Om tinaakan oku bâanar Doo dot koosipan om toluod dit waro sid di Kristus Yesus. ¹⁵Oonong it boros diti om aaluk dot imoyo’on banar, dot ka, “Nokorikot sitid pomogunan i Kristus Yesus, dot manalamat dit tongo tulun ki-duso,” ka, om yoku no diti ot landu kaara’at. ¹⁶Nga sagay pogi-om nosianan-i dogon i Kristus, tu jinadi oku Dialo do suntu dit kolonuto di ginawo Yo kumaa sid tulun dit paling ki-duso. Jadi, ela’an nôono di tulun wookon sompôori dot yoalo nga kadapat-i mimoyo Dialo om kaanu dot koposiyon tototog. ¹⁷Jadi orumaton om royo’on dot aso kopupusan it Raja misingkoleed, it amu matay, it amu okito, i Kinoringan dit iso no! Amin.

¹⁸Oy ponokaanak ku Timotius, iti tugas diti, yarap ku sid dikaw. Tu di gûulu, waro nubuat dot tulun ontok-ko ikaw, dot pinopeelo dot kaanu koh dit tugas diti. Jadi, ondomo neeno nubuat dino, supaya koponotos koh sid tugas nu, ugu-ko soojar dit sid piparangan. ¹⁹Pogiroto no ot koosipan nu om kada no mamaal dit nela’an nu mâantad dot amu awasi. Tu warot tulun dot amu momoduli dit araat ko awasi ot gama’on, sampay araag ot koosipan. ²⁰I Himeneus om i Aleksander nakaagkum dot ugu dino. Nitaak ku yoalo miduduwo sid rogon, 1:20 Nitaak ... sid rogon, ... Komoyoon nopo di Paulus: sinunsub di Paulus i Himeneus om i Alexander mantad sid jemaat supaya tumoobat. Intangay sid 1Kor 5:5. supaya tumoobat monguukuwo do Kinoringan.

Oturan dot Paadsambayang

¹It keeso no banar ot isuu ku, momintaduwa dot kikiawi ot tulun, dot mokianu, mokitulung, om monorimakasi sid Kinoringan.²It tongo raja om kikiawi it ki-ongo-kuasa nga pintaduwa’an-i, supaya oosay ot koposiyon tokow om asot mangasow daton, sampay kadapat tokow mangalayan do Kinoringan dot oorumat ot gama. ³Tu it momintaduwa do kikiawi ot tulun, hal tawasi om kenginan do Kinoringan, it Maanalamat daton. ⁴Eengin Yalo dot, kikiawi dot tulun asalamat om keelo dit tudukan tabanar ontok-ko it kasalamatan.⁵Tu iso no ot Kinoringan om iso no ot bantaran do Kinoringan om tulun, ino-no i Kristus Yesus, tu Yalo nga tulun-i. ⁶Nitaak Dialo it kondiri Yo dot pongolukat dot kikiawi ot tulun. It kinapatayan di Yesus diri – it najadi tontok dit masa dit natantu mâantad do Kinoringan – ot bukti dot babanar-ko eengin Yalo manalamat dot kikiawi ot tulun.⁷Ino-not tabar dino ot ipaabar dogon. Om ino no kinopongolontikan dogon jumadi dot rasul om guru, tu monuduk dit kemaya’an dit babanar sid tongo tulun dit okon-ko Yahudi. Okon-ko wuwuduton ku iti boros ku diti, babanar. 2:7 2Tim 1:11

⁸Ino nogi, siongo kow nopo miumpug, pokionuwon ku dot mintaduwa kikiawi it tongo kusay meed do posinggor do longon topulang tu tanda dot it ginawo nga osusi-i. Om amu kawasa maarasang ko waro pigogutan tiya dot mintaduwa. ⁹Om it tongo tongondu, eengin oku dot misadangan ot paanampakay, om amu karaag dot mato dot tongo kusay om opintun ot soosokot. Okon-ko padarakan ot gama mangalanji dot tokobuk om okon-ko padarakan manampakay dot tamas keenong muntiara keenong soosokot dot amaal ot torogo. 2:9 1Ptr 3:3 ¹⁰Gaam pong lonjian dit tongo tongondu it kondiri yo dit gagama’on tawasi, it aaluk dot dang tongondu dit tumaat sid Kinoringan. ¹¹It tongondu, subay-ko amu oguriyok tiya dot mokinongow dot tudukan, om subay osiba ot ginawo. 2:11 amu oguriyok tiya dit mokinongow dot tudukan Harfiah: madaada. Nga ki-boros i Paulus sid 1Kor 11:5 dot obbuli-i ot tongondu polombus dot tupono do Kinoringan om mintaduwa dot ki-bongut. Jadi okon-ko amu obbuli mimbongut ot komoyoon di Paulus.¹²Amu oku mongoo dot modtuduk ot tongondu om momorinta dot kusay, om subay amu oguriyok ot tongondu. ¹³Tu i Adam ot gulu urugo, om i Hawa nogi. 2:13 Kej 2:7, 21-22 ¹⁴Makin po, okon-ko i Adam pot nakalan, ino-i-nga it tongondu ot nakalan, sampay minangalanggar dit tiag do Kinoringan. 2:14 Kej 3:1-6 ¹⁵Ino no ot pupuun dot apagon ot tongondu monusu. Nga ugu poma dino nga salamaton-i it tongondu, ong syukur, tumilombus-i mimoyo, otoluod, osusi, om awasi ot takal. 2:15 Ino no ot pupuun dot apagon ot tongondu monusu. Nga ugu poma dino nga salamaton-i ...Tafsiran 2: Salamaton-i it tongondu tu Maanalamat dot tulun ot koturunan yo. Komoyoon, sagay nasalamat i Hawa dit koturunan yo tu i Yesus, it Maanalamat ot koturunan yo. Tafsiran 3: Nokuro ong orualan poma it tongondu tiya dot monusu, nga asalamat-i it ginawo yo. Tafsiran 4: Salamaton-i it tongondu ong syukur amu lumawan dit tadat. It komoyoon siti, it tongondu nopo, andang-âandang maaganak om moomiara dot tanak.

Moongilala dot Jemaat

¹Oonong banar it boros diti, dot ka, “It tulun dit eengin jumadi dot moongilala dot jemaat,3:1 Sid tongo jemaat dit abad keeso, waro duwo ot jawatan utama: ponotua om diaken dot jemaat (Kis 6:1-7). Ngaran koduwo nopo dit ponotua nga kotua, moongilala, keenong gambala. Tugas nopo dit ponotua dit jemaat nga rohani: mingkhotbah, monuduk om mintaduwa. iri no ot tugas tawasi dot kinenginan yo,” ka. ²Nga ong moongilala dot jemaat, subay-ko it tulun dit asot ponuduan, iso no ot sawo, 3:2 iso no ot sawo Tafsiran 2: subay osotia sid sawo. Ka di Yesus sid Mrk 10:6-8: “ki-boros sid Kitab dot, ‘Nurug do Kinoringan yoalo dot kusay om tongondu. Ino not sabap dot tumongkiyad it kusay dot tidi om tama tu miiso dit sawo yo, om ajadi yoalo miduduwo dot iso not koyuwan,’ ka. Jadi okon-no-ko duwo koyuwan po yoalo, ino-i-nga iso po dîino.” Pagka tu noboros di Yesus dot “duwo koyuwan” no, okon-ko tolu keenong lumaba po mantad dino ot kenginan do Kinoringan. atarang ot pongitungan, eelo mongodos dit ginawo yo, ki-tadat, poo’odop dot tulun sid walay yo, 3:2 poo’odop dot tulun sid walay yo: It komoyoon di Paulus, poo’iyon dit pengkhotbah dit mantad sid pomogunan suuway sid walay saralom dot piipiro tadlaw. eelo modtuduk dot tulun, ³amu maagawuk, amu orompus, ino-i-nga osulimod, amu eengin monoki-gagut om amu mokisisiin. ⁴Yalo dino subay-ko eelo mongusay dit sirang yo om kaaranakan om orumaton dit tongo tanak yo. ⁵Tu ong amu eelo ot tulun mongusay dit sirang yo kondiri, kukuro ot gama yo mangaatur dit jemaat do Kinoringan? ⁶It moongilala dino, subay okon-ko it tulun dit koosuwang dot Kristian, tu ong it koosuwang dot Kristian, mîilom sumawat ot ginawo yo om ookuman ugu-ko it Raja do Rogon. 3:6 2Ptr 2:4; Yud 1:6 ⁷Om it moongilala dino, subay-ko tulun dit awasi ot ngaran sid kinogumuan dot tulun dit okon poma-ko Kristian. Tu mîilom kuukuwo’on yalo dot tulun, om kosuwang nôono yalo sid burunsut di Raja do Rogon. 3:2-7 Tit 1:6-9

Tongo Diaken sid Jemaat

⁸It tongo diaken dot jemaat,3:8 Sid tongo gorija dit abad keeso, waro ot duwo jawatan utama: ponotua om diaken. It tugas nopo dit diaken, kotua do kebajikan. Yalo no ot moonguyut dit siin dit jemaat, it pakayon dot monulung dit tongo tulun musikin, tongo janda, om wookon po. Intangay sid Kis 6:1-7. subay-ko tulun dot opondodog, okon-ko duwo milabpang ot dila, 3:8 Okon-ko duwo milabpang ot dila: Komoyoon, amu obbuli dot misisimban ot boroson. okon-ko maagawuk, amu mokisisiin, 3:8 diaken Kis 6:1-6 ⁹ino-i-nga gumirot kumuyut dit tudukan Kristian dit baya niraasia do Kinoringan, dot oborisi ot ginawo. ¹⁰Subay-ko umbalan po manaak dot tugas dot ongo-koodok, om lontikon nogi dot diaken sid jemaat.¹¹It tongo sawo doalo 3:11 It tongo sawo doalo ... Tafsiran 2: It tongo diaken dit tongondu ... nga ugu keeno-i, tu subay-ko tulun dot opondodog, amu moongolimut, eelo mongodos dit ginawo yo, om kaarapan sid nunu nopo. ¹²It tongo diaken dino, subay-ko iso no ot sawo, awasi ot gama mongusay dot tongo tanak yo om it sirang yo. ¹³It tongo diaken dit awasi ot gama mangalayan, makin dot arayow dot awasi om makin togimoyo’on maawala pasal dit koosipan doalo sid di Kristus Yesus.

Tonsi dot Kemaya’an Tokow

¹⁴Oy Timotius, tipagandaa oku no dara dikaw, nga mookoy-i oku dot waro koolungon ku. Iti no ot koponulisan ku diti surat diti, tu ¹⁵kopialung-alung oku poma, nga iti surat diti ot popeelo dikaw, dot kukuro ot padpasi dot aaluk dit sirang do Kinoringan, ino-no it jemaat song-pomogunan, it nasanganu do Kinoringan it Miyaw. It jemaat dino ugu-ko torigi om tukod dit pamapag dot walay, tu posintor om mangajaga dit tudukan tabanar. ¹⁶Tu babanar-ko keeranan it tonsi dit kemaya’an tokow, it niraasia do Kinoringan di gûulu, om it niintalang Yo sid daton, ino-no,

“Minintalang i Kristus Yesus dot sinumiliw do riniba,

naakun dit Tatod do Kinoringan dot abanar Yalo,

neemot dit tongo moleekat,

niabar sid tongo bansa,

minangan imoyo’o sid song-pomogunan,

niinsawat sid surga, sid tompiling do Kinoringan.”

Tugas di Timotius Lumawan dit Tudukan dot Kapalid

¹Nga sinondot banar dit Tatod do Kinoringan momoros dot, it tiya dit koowian do zaman, warot tulun tumolikud mantad sid di Kristus, om maya nôono dit tongo rogon dit maamalid, om it tudukan dit dang rogon. ²It tudukan dit kapalid dino, mantad sid tongo moomudut dit misingko-wawasi. Kinumodow banar it ginawo doalo, sampay amu no eelo popisodiri dot araat om awasi. ³Tiagon doalo ot tulun manansawo om tiagon doalo ot tulun mangakan dit piipiro ot jinis dot aakanon, 4:3 Komoyoon dati di Paulus: tiagon doalo it tongo tulun dot mangakan dot tonsi. Intangay sid Rm 14:21 om 1Kor 8:13. dot yang-ko inot kaakanan dino, andang-ko minangan do Kinoringan urugo dot aakanon. Jadi, itokow dit nokeemoyo sid di Kristus om nokotutun no dot tudukan tabanar nga kawasa-i mangakan dinot kaakanan dino, syukur ong monorimakasi tokow sid Kinoringan. ⁴Tu kikiawi dit nurug do Kinoringan, awasi, 4:4 Kej 1:31 om asot îiso ot amu kawasa dot akanon, ong syukur monorimakasi sid Kinoringan kadung mangaramit diri, ⁵tu it aakanon diri, osusian dit boros do Kinoringan om it doa dot tulun. 4:4-5 asot îiso ... dit boros do Kinoringan: Kis 10:15; Mrk 8:6, 7

I Timotius Turipon Tawasi di Kristus Yesus

⁶Na ong syukur ituduk nu kikiawi it ugu diri sid tongo koobpineeyan, ajadi koh dot turipon tawasi di Kristus Yesus, it makin aralom ot pongila’an sid kemaya’an do tulun Kristian, ino-no it tudukan tataatantu dit nawaya nu. ⁷Insoduay no it tongo tudukan dit mogkorootan, it pakaaso do Kinoringan om aso taatântu. Gaam pong uyaton nu ino kondiri nu tumaat sid Kinoringan. ⁸Tu ka dit panambarasan, “Monguyat dot koyuwan ki-guna-i dara, nga it kataato sid Kinoringan lobi po ki-guna sid nunu nopo, tu it kataato sid Kinoringan ki-janji dot barakat sid koposiyon diti tidino om sompôori,” ka. ⁹Oonong it boros diri om apatut dot imoyo’on. ¹⁰Sagay monotos kito om mising-uyan gumama, tu mangarap sid Kinoringan it Miyaw. Yalo no ot Maanalamat dit kikiawi it tulun, keeso no banar it nongo-keemoyo sid di Kristus.

¹¹Mangan potuduko sid doalo inot kikiawi dino om potonuday no doalo. ¹²Kada no mokiusiba dot tulun pasal dinot omulok koh po. Ino-i-nga pokitiruwan no dit nongo-keemoyo sid di Kristus sid gama nu maawala, bubuatan nu, it toluod nu, it koosipan nu om it koosusi dit kondiri nu. ¹³Namot dot mising-korikot ku, kabagos no mangabaca dot Kitab sid nongo-keemoyo, momuransang om monuduk doalo. ¹⁴It gûulu, warot pinolombus do nubuat sid dikaw, om kinama koh dit tongo ponotua om nokotorima koh dot sinundu. 4:14 sinundu: Komoyoon nopo dot sinundu: bakat rohani atau karunia roh. Intangay sid Rm 12; 1Kor 12 om 1Kor 14. Jadi, kada mialung-alung mamakay dinot sinundu sinod dikaw. ¹⁵Kabagos no mangagama dot ugu diri dot opugu ot ginawo nu, supaya okito dit kikiawi ot tulun dot sumurut it pongila’an nu sid tugas nu.¹⁶Tandayay no inot kondiri nu om inot tudukan nu. Mangan nu kikiawi iri dot osugul, tu ong orulut koh, okon-ko gisom inot kondiri nu no ot asalamat nu, ino-i-nga it tongo tulun po dit mokinongow dikaw.

Gama dot Aaluk sid Tulun

¹Okon-ko sosongiton it kusay dit otuo mantad dikaw, ino-i-nga sulimâadan nu managur doalo dot iradon nu dit tama nu. Om it tongo kusay dit omulok mantad dikaw, iradon nu dot tobpinee nu ot gama nu managur doalo. ²It tongo tongondu dit otuo, iradon nu dot tidi nu kondiri. Om it tongo tongondu dit omulok mantad dikaw, iradon nu dot tinori nu, dot osusi ot ginawo nu.

It Tongo Janda dit Aaluk dot Mangan Tulungay dit Jemaat

³It tongo janda dit napatayan dot sawo om aso koobi no ot aaluk dot tulungan dit jemaat.⁴Nga ong it janda dit ki-anak-i keenong it warot muodu, it tongo tanak om muodu no diri ot aaluk momiara dit moleeng om todu taki doalo. Iri no ot gama doalo monuli dit toluod dot moleeng, om gama tumaat sid Kinoringan. Tu ino no ot koonong sid Kinoringan. ⁵Nga it janda dit aaluk babanar dot tulungon dot jemaat, ino-no it asot momiara doo. Yalo dino, gisom mangarap sid Kinoringan dot mintaduwa sodoy-adlaw dot mokitulung do Kinoringan. ⁶Nga ong it janda dit suka-hati mamaal dit kenginan yo, miyaw poma it koyuwan, nga mad-ko minatay no it ginawo. ⁷Paandamay kikiawi iti sid tongo tulun om sid tongo janda, supaya aso ponuduan doalo. ⁸Tu ong warot tulun dot amu momiara dit koworisan yo, ingko-mamakin ong it sirang yo kondiri, mongolim yalo dit koosipan yo sid di Kristus sampay araat mantad-ko it tulun dit aso koosipan.

⁹It janda dit apatut dot idaftar dot tulungon dot jemaat, subay-ko laba’an onom noopod toon ot tumur, om insan no kasawo, 5:9 insan no kasawo Tafsiran 2: osotia sid sawo yo tiya dit miyaw po it sawo ¹⁰awasi ot ngaran yo tu awasi ot gagama’on, ugu-ko pinosukod dot tongo tanak, poo’odop dot tulun sid walay yo, 5:10 poo’odop dot tulun sid walay yo: Komoyoon nopo, po’odop dit tongo ponginjil sid walay yo dit mamanaw tumikid sid kampung. mangalayan dit tongo sandad Kristian dot osiba ot ginawo, oobing-tulung dit tulun tosusa, komoyoon, ooduya maya sid nunu nopo ot gagama’on tawasi. 5:10 mangalayan dit tongo sandad Kristian dot osiba ot ginawo, Harfiah: minomoog dit takod dit sandad Kristian. Intangay sid Yoh 13:1-17.

¹¹Ong it tongo janda dit amu po koonom noopod toon ot tumur, amu po aaluk dot tulungon dot jemaat. Tu ong mimbulay ot ree doalo, sampay amu no okowii doalo i Kristus, mokisawo kembagu yoalo. ¹²Jadi ookuman yoalo tu amu nôono otuman it janji yo dit mangalayan nôopo di Kristus. ¹³Suway mantad dino, mubas yoalo dot mobul, om sumombol ot indoso’on. Aa-po dot ugu dino, mindoso po mongolimut om osibuk gumawul dot hal dot tulun om aso taatântu dot pibabarasan. ¹⁴Ino nogi, kenginan ku dot it tongo janda dit ongo-mumulok po, gaam po mokisawo kembagu, maganak om mangaatur dot sirang, supaya aso poluang dit musu tokow pakaraat daton. ¹⁵Tu waro no tongo janda dot tinumolikud mantad sid di Kristus, om minaya dit Raja do Rogon.

¹⁶Jadi, ong it tongondu dit Kristian ot ki-koworisan dot janda, yino no bot apatut momiara dit tongo janda diri, supaya amu awagatan it jemaat. Ong ugu dino, adapat dit jemaat monokubang it tongo janda dit apatut babanar dot tulungon.

Tongo Ponotua dot Jemaat

¹⁷Tumopik oku sid tongo ponotua dot jemaat. Ii-nopo ponotua dot jemaat dit awasi ot gama momimpin, mingaam ong agayo ot pongorumatan om gaji yo, makin pong it abagos mingkhotbah om potuduk dit boros do Kinoringan. ¹⁸Tu ka dit Kitab, “Kadaay no toboongay it sapi dit kamasa’an mongogik sampay amu kaakan,” ka, om, “It tulun dit kumaraja subay-ko gojiyan,” ka. 5:18 Ul 25:4; 1Kor 9:9-14; Mat 10:10; Luk 10:7 ¹⁹Okon-ko mimoyo dot tondos kumaa sid ponotua dot jemaat, ong okon-ko waro duwo ko tolu ot sasi. 5:19 Ul 17:6; 19:15; Mat 18:16; 2Kor 13:1 ²⁰It ponotua dit kawaal dot duso, tiago sid tinoguwangon dot jemaat, supaya it wookon nga rumonok-i. ²¹Kikiawi diri, tonudo no dot okon-ko otootondos, om okon-ko warot wowosion om warot raraaton. Kikiawi dit nisuu ku diri, i Kinoringan, i Kristus Yesus om it tongo moleekat dit nongo-pili Yo ot nisasi ku. ²²Okon-ko abpaabpo mangama dot mamarakat dot tulun dot pojodion nu dot ponotua, supaya amu koh ogigilan dit tongo karaatan dit tulun dino, ino-i-nga patatapo no it kosusio dit kondiri nu.

²³Kad pasala, okon-ko monginum dot weeg-ko-weeg, ino-i-nga gowulay tokudik dot liing dot anggur pasal dino gituko nu, tu asasarok koh mari sumakit.

²⁴Gumuli oku kembagu sid hal dot mangalantik dot ponotua. Warot tulun dot amu po alantik, kentalang no mâantad it tongo duso, nga waro tulun dot sompôori om kentalang nogi ot tongo duso. ²⁵It gagama’on tawasi nga ugu keeno-i tu alangkas kentalang, om it olosok poma nga, leed-suleed kentalang-i.

Tongo Turipon

¹It tongo turipon, subay mongorumat dit tuan yo, supaya amu raraaton dot tulun it ngaran do Kinoringan om it tudukan tokow. ²Okon-ko sookat dot Kristian it tuan yo om amu nôono orumaton dit turipon tu miobpinee yoalo sid di Kristus. Ino-i-nga mising-bagos po gumama sid tuan yo, tu ii-nopo tulungon diri nga sandad ki-koosipan dit amu koyuuan. 6:2 turipon ... tuan: Kol 3:22–4:1

Potuduko kiawi ino sid jemaat om juuro no yoalo.

Tudukan dot Kapalid om Kakaya’an Tototog

³Warot tulun dot modtuduk dot amu kopionong dit tudukan dot ataatantu. Amu maya yoalo dit tudukan di Tuhan tokow Yesus Kristus om it tudukan dit gama tumaat sid Kinoringan. ⁴It tulun dino, mising-gagayo tulu, dot asoso-i ot ororotiiyan yo, nga sunduy ooduya monokidaawa om monokigagut ontok-ko it tongo pongoreetan. Kompupuson, aralayan nôono ot midadangki, migagut, mi’u’usiba, mitotondos, ⁵om migagaga dot aso kopupusan. It tongo tulun dit ugu dino, nokosompiang ot takal om nokosimpang mantad sid tudukan tabanar. Jodion doalo dot pogiiman dot koontungan it tugama. ⁶Dot it tugama dino, andang koontung dot tulun ong syukur ooma ot tulun dit ganta ki-waro. ⁷Tu asot nowit tokow sitid pomogunan diti, om asot kopongowit dot nunu nopo sumoliwan mantad sitid pomogunan diti! ⁸Ino nogi, mikunama no ong warot kaakanan om waro soosokot tokow. ⁹Nga ong it tulun dit mokikakaya, aratu sid pensuba’an, oburunsut om apalid dot masam-masam ot kenginan taraat dit aso taatântu om mangaraag. It tongo kenginan diri, paratu dot tulun sid kobinasa’an om kapatayan. ¹⁰Tu it puun dit kikiawi ot karaatan, ino-no it mokisisi’in. Warot tulun dot nokosimpang it koosipan mantad sid di Kristus tu daagan dot mokisisi’in babanar, sampay asansara it kondiri om ogumu ot korualan do ginawo ot kinoompuson.

Suu di Paulus sid di Timotius

¹¹Nga ikaw oy Timotius, pagka tu nasanganu koh no do Kinoringan, insodu no mantad sid kikiawi diri. Gusa’o no it kenginan do Kinoringan, it kataato sid Kinoringan, it koosipan, it toluod, it koosugul om it koosulimod. ¹²Ponotos no monokilumba sid pilumba’an dot koosipan, om solodo no it koposiyon tototog. Tu ino no koposiyon tototog dino ot kinoponginloowan dikaw do Kinoringan. Minangakun koh dot mimoyo koh di Kristus, dot nososiyan dot tulun togumu. ¹³Sid tinoguwangon do Kinoringan, it minamasi dit kikiawi it winangun, om sid tinoguwangon di Kristus Yesus, it minangakun dit kabanaran ontok dit kondiri Yo sid di Pontius Pilatus, pokionuwon ku dikaw, 6:13 Yoh 18:37 ¹⁴tonudo no itit suu ku diti dot asot laba om aso kurang, mising-korikot kembagu di Tuhan tokow Yesus Kristus. ¹⁵Iintalang do Kinoringan Yalo sid tiya dit natantu Yo mâantad. I Kinoringan it puun do barakat, it Ponguasa Keeso, it Raja dot tongo raja om Tuan dit tongo tuan. ¹⁶Yalo no ot asot kapatayan, it miyon-iyon sid tompiling dit amu eensamakan, it amu opikito dot tulun om andang amu okito dot tulun, Yino no ot orumaton om ki-kuasa misingkoleed! Amin. 6:16 Kel 33:20

¹⁷Pelo’o it tulun dit ongo-kakaya sitid pomogunan, okon-ko ponombirangon dot mangarap dit kakaya’an dit oobing-tanus, ino-i-nga mangarap nôono sid Kinoringan. Tu Yalo no ot manaak daton dot nunu nopo dot osima, dot mangan irasa’o. ¹⁸Suuo yoalo supaya mamaal dot awasi, akaya dot kowosian, amu oluki, om maanayad dot nunu nopo sid tulun wookon. ¹⁹Ong ugu dino ot gama, kopongumpug yoalo dot puku sid surga dot pakayon sompôori, supaya kaanu yoalo dot koposiyon dit awasi babanar.

²⁰Oy Timotius, ikaw no ot pinaarapan dit tudukan tataatantu. Jadi, tandayay no momiara ino, supaya amu osimbanan. Tongkiso it tongo pibabarasan dit aso taatântu om amu osusi, om tongo pigaga’an it reetan dot “Pongila’an”. ²¹Tu warot tulun mangakun dot warot pongila’an diri kabarasan, nga kinoompuson yo, sinumompiang mantad sid koosipan sid di Kristus.

Kososogit konow sid saralom dit kosianan om koosayan do Kinoringan.