Surat Keeso
di
Petrus
Popela’an
Iti surat diti, surat keeso dot tinulis di Petrus. I Petrus dino, iso mantad dit opod om duwo it rasul di Yesus. Iti surat diti, irikot di Petrus sid tulun Kristian, it miyon sid Asia Tokodok. Inot Asia Tokodok dino, boogian dot kotonobon do Turki ong maakaa.
It tongo Kristian siri, minangan sansara’o dot tulun daagan dit koosipan doalo sid di Yesus tiya diri. Warot raraaton dot tulun om waro po ot simbaalan dot tulun (2:11-12; 2:15; 3:16; 4:4). Warot turipon dit minangan sansara’o dit tuan yo kondiri (2:18-20), om waro-i ot piipirot tongondu dot Kristian, dot it sawo yo amu mimoyo di Yesus (3:1, 6). Iti no ot kinoponulisan di Petrus diti surat diti, tu momuransang doalo om papatog dit koosipan doalo, supaya ataan yoalo sid kasansara’an. Ki-boros i Petrus dot, it tomodon nopo dit kasansara’an dino, mongilo dot apatog ko amu ot koosipan tokow (1:6-7; 4:12). Ong mangan tokow sansara’o dot tulun daagan dit koosipan tokow, subay-ko mangarap tokow do Kinoringan om subay-ko awasi ot bubuatan tokow. Ogumu ot gama di Petrus papatog dit ginawo dot tulun supaya mangarap do Kinoringan, mamaal dit awasi, om ataan sid kasansara’an.
Suwang
Salam do kotimpuunan: 1:1-2
Agayo ot tarapan tokow, tu salamaton tokow do Kinoringan: 1:3-12
Pagka tu nasalamat tokow no, posusio tokow no it koposiyon tokow: 1:13–2:10
Bubuatan tiya dot kosusa’an: Omitay tokow no it kinasansara’an di Kristus: 2:11–4:19
Tupono baagi dit tongo pomimpin do jemaat: Gama momiara dot jemaat, subay osiba ot ginawo: 5:1-11
Salam dot kopupuson: 5:12-14
1Salam do Kotimpuunan
1Oy tongo koobpineeyan ku! Iti surat diti mantad sid dogon i Petrus, rasul di Yesus Kristus. Iti surat diti, porikoton ku sid dikoo, it tongo umat dit nopili do Kinoringan, it ugu-ko tulun magali-ali sid tisop dot tulun kapir, 1:1 it ugu-ko tulun magali-ali sid tisop dot tulun kapir: Komoyoon, pagka tu nosusu tokow kembagu (intangay sid Kol 3:3), okon-no-ko tulun tokow po dot dang pomogunan (Yoh 15:19), ino-i-nga dang surga. Sid ayat 1:17 nga ugu dino-i. om miyon sid tongo negeri dot Pontus, Galatia, Kapadokia, Asia Tokodok1:1 It Asia Tokodok diti, okon-ko it reetan dot benua dot Asia diti maakaa, ino-i-nga it bogian dot kotonobon dot Turki ong maakaa, it sambaagi dit Kotonobon dot Asia. Obbuli boroson dot it tongo negeri dot Pontus, Galatia, Kapadokia om Bitinia dino nga kosuwang-i sid Turki ong maakaa. om Bitinia. 2Nopili kow do Kinoringan dot mionong dit neetung mâantad do Kinoringan, it Tama tokow. Om sususian kow dit Tatod do Kinoringan, supaya tumaat kow sid di Yesus Kristus om owoogan kow dit raa Yo.
Kososogit konow sid saralom dit kosianan om koosayan do Kinoringan dit aso gisom sid dikoo.
Tarapan dot Opirot
3Royo’o tokow no i Kinoringan, it Tama di Tuhan tokow Yesus Kristus! Minamasi Yalo di Yesus mantad sid kapatayan, om iri no ralan Yo pajadi daton dot nurug wagu. Eemot siri it kaagayo dit kosianan Yo sid daton. Om opirot nôono ot tarapan tokow 4dot kaanu dit barakat dit niatag do Kinoringan sid surga baagi daton. It tongo barakat dino, amu rumaag, amu eensosomuan om amu tumalup. 5Asanganu tokow-i it tongo barakat diri, tu ong mimoyo tokow di Kristus, mangan tokow do Kinoringan piara’o dit kuasa Yo, sampay otorima tokow babanar it kasalamatan. 1:5 ... sampay otorima tokow babanar it kasalamatan. Andang waro no mâantad ot kasalamatan dot notorima tokow sitid pomogunan, nga amu po osukup. Tu it kasalamatan diri, ugu-ko tiket tokow nôopo sumuwang sid surga. Om tadi osukup it kasalamatan tokow, kosuwang tokow sid surga sompôori. It kasalamatan diri, nosodia mâantad do Kinoringan dot pentalangon dot orikot ot koowian do zaman. 1:5 Yoh 6:39-40
6Jadi tomon kow no dit tarapan dino dot nokuro ong waro poma ot kosusa’an duyu toruay maakaa diti, tu kaajang kow dot soro-susuway ot pensuba’an. 7Tu tomodon nopo dit tongo pensuba’an diri, mongilo dot apatog ko amu ot koosipan duyu. Tu tamas poma nga mangan-i lanako dot tapuy, tu mongumbal dot atandas ko amu dot tamas. Saampod po it koosipan duyu dit boorogo mantad-ko it tamas dit oobung-raag om amu no umbalan. Ong ataan kow, mangan kow royo’o, orumaton kow om insawatan kow do Kinoringan, sid tadlaw dit rumikot kembagu i Yesus Kristus. 1:7 Yak 1:1-2, 12 8Amu duyu poma insan kokito Yalo nga toluodon duyu-i. Om amu duyu poma okitanan Yalo ditit maakaa nga mimoyo kow-i Dialo. Iri not pasal dot tumomon kow, om asanang ot ginawo duyu dot aso keenong om amu milod boroson ot kootomon. 9Tu it pokigagampatan dit koosipan duyu, agampot duyu-i sompôori, ino-no it kasalamatan duyu.
10It kasalamatan duyu diri, nokoboros no mâantad dit tongo nabi kodori , dot amu poma oorotiyan babanar doalo dot nunu ot komoyoon. Om minonotos no yoalo mongilo om monolidik dot kukuro ot kasasalamat dot tulun, ino-no asalamat tokow tu agayo it kosianan do Kinoringan sid daton. 11Nokoboros no mâantad it Tatod Tosusi di Kristus 1:11 Tatod Tosusi di Kristus: Miinong-i di Tatod do Kinoringan om Tatod Tosusi. sid ginawo dit tongo nabi kodori dot, asansara po i Raja Maanalamat om insawatan nogi. Eengin yoalo mongilo dot, “Isay it Raja Maanalamat dit rumikot dino?” Om “Seera ot kotulukan dino?”12Nga minangan do Kinoringan pelo’o it tongo nabi dot, okon-ko yoalo kondiri ot porikatan dit tongo hal dit noboros doalo diri, ino-i-nga ikoo. It tongo hal dit nokoboros mâantad dit tongo nabi diri, nokolombus no sid dikoo dot atarang ot gama sid Tabar Tawasi. Tu it tongo tulun dit minangaabar sid dikoo dit Tabar Tawasi diri, nokuasa di Tatod Tosusi, dit sinuu do Kinoringan mantad sid surga. Om okon-ko gisom it tongo nabi no kodori ot eengin mongilo babanar dit tongo hal diri, ino-i-nga it tongo moleekat po. 1:12 Kis 2:14-40; Mat 13:16-17
Kosusian om Toluod Songobpinee
13Ino nogi, oy tongo koobpineeyan ku, posodia’o duyu no it tongo pongitungan duyu om pokodoso duyu no inot ginawo duyu. Om owiwio duyu no ot ginawo duyu mangaarap dit tongo barakat dit itaak do Kinoringan sid dikoo ong korikot kembagu i Yesus Kristus. 14Jadi kow no dot tanak tolimodok do Kinoringan, om okon-no-ko potuudan duyu po it kenginan taraat duyu gûulu, tiya dit aso po ot oorotiyan duyu ontok-ko i Kristus. 15Ino-i-nga subay-ko osusi kow sid nunu nopot mangan duyu, ugu-ko it koosusi do Kinoringan, it minonginloow dikoo jumadi dot tanak Yo. 16Tu nokotulis sid Kitab dot, “Kosusi kow no, tu Yoku diti, osusi,” ka do Kinoringan.1:16 Im 11:44-45; 19:2
17Jadi, ondomo duyu no dot i Kinoringan dit Ama’on duyu sid doa duyu diri, Yalo no ot mangaratu dot tukum sid tulun, dot mionong dit doo om doo dot nagama, dot asot kuyutan om wilian Yo. Jadi, pagka ugu dino, subay-ko rumonok kow Dialo tiya dit kakal kow po sitid pomogunan dot ugu-ko tulun magali-ali kow. 1:17 dot ugu-ko tulun magali-ali kow: Pooguon di Petrus dot tulun magali-ali it koposiyon tokow sitid pomogunan, tu sid surga ot babanar-no-ko nontodonon tokow (Flp 3:20) tu raayat tokow dit Karajaan do Kinoringan. Jadi iti no sabap dot irad-ko tulun magali-ali tokow sid tanga dot tulun dit amu mimoyo di Yesus (1Ptr 1:1; Ef 2:19; Ibr 11:9). Jadi pagka tu ugu dino, subay-ko rumosi tokow dit tukuman sompôori tu it koposiyon tokow sitid pomogunan, oruruay.18Tu nela’an duyu-i nunu ot pinongolukat dot pineedu dikoo mantad sid padpasi dot aso guna, it notungkusan duyu mantad sid taki-lombus duyu. Tu it pinongolukat dino, okon-ko tamas ko pirok, tu kikiawi dino oobung-raag, 19ino-i-nga it raa di Kristus dit boorogo babanar. Tu i Kristus diri, ugu-ko it tuyog do domba dit pangaraa tu aso gonto om aso pasat. 1:19 Im 22:21; Bil 19:2; Ibr 9:12 20I Kristus dino, noonduyan mâantad do Kinoringan dit amu po noorug iti pomogunan, nga maakaa tu me’awi-awi no itit zaman diti, om nokorikot nogi Yalo sitid pomogunan dot manalamat daton. 21Om Yalo no ot waya’an duyu mimoyo do Kinoringan, it minamasi Dialo mantad sid minatay om minamangkat Dialo dot asawat ot pangkat. Jadi, i Kinoringan nôono ot imoyo’on duyu om arapon duyu.
22Pagka tu tumaat kow no dit tudukan tabanar, nosusian no it ginawo duyu. Om kadapat kow nôono monoluod dit tobpinee duyu sandad Kristian dot oborisi ot ginawo. Ino nogi, pitotoluod kow no dot opugu ot ginawo. 23Tu naanak kow no kembagu, dot okon-ko sinusu dot tulun dit oobing-patay, ino-i-nga pasal dit nokotorima kow no dit boros do Kinoringan, dit miyaw om ototog misingkoleed. 24Tu ka dit Kitab,
“Kikiawi dot tulun ugu-ko sakot,
om kikiawi dit kenrayow doalo ugu-ko wusak do sakot.
Rumuyow it sakot, it wusak tumantag,
25nga boros do Kinoringan, ototog misingkoleed,”
ka. Om iri no ot Tabar Tawasi dot nakaabar sid dikoo. 1:24-25 Yes 40:6-8 (LXX)
21Ino nogi, tingkaday duyu no kikiawi it karaatan duyu; kada no monipu, misingko-wawasi, dumangki om monimbaal. 2Ino-i-nga, jadi kow no dot ugu-ko it ragang dit koosusu, tu maatangop nopo sumusu. Komoyoon, subay-ko monotos kow mokinongow dit Boros do Kinoringan dit osompipi, supaya sumurut kow om asalamat kow. 3Tu nembaya’an duyu no gima dot awasi babanar i Tuhan. 2:3 Mzm 34:9
I Kristus Ugu-ko Pampang dit Miyaw
4Jadi, toronong kow no sid Tuhan. Yalo dino, ugu-ko pampang dit miyaw dot poonolipar do walay. Niada Yalo dit tongo tukang mamaal do walay, tu panantaman ong aso guna. Nga Yalo nogi ot nopili do Kinoringan, tu Yalo no ot pampang dot boorogo. 5Toronong kow no sid Tuhan supaya ikoo nga ajadi-i irad-ko it pampang dit miyaw, it pakayon dot pamaal dit Saasambayangon dit iyonon di Tatod Tosusi. 2:5 Komoyoon nopo ditit suriban di Petrus diti, subay asanggup tokow dot pakayon do Kinoringan pengkakat do jemaat. Tu komoyoon nopo dit Saasambayangon dit iyonon di Tatod Tosusi, ino-no it jemaat song-pomogunan, tu i Tatod Tosusi nga siti nod daton maakaa. Om ajadi kow nôono dot tongo timam tosusi, tu pasamba kow dot korban dit okon-ko dupot, ino-i-nga it kondiri duyu. 2:5 parsamba’an: Oobas it tongo tulun Yahudi mangagaras dot tongo pangayam dot isamba sid Kinoringan, tu iri no ot nisuu sid Tukum di Musa: tongo sadaka, sogit, pangaraa om garason dot sorobon. Ugu poma dino nga noboros mâantad do Kinoringan sid Kitab Leed dot okon-ko iri ot babanar no-ko kenginan Yo, ino-i-nga: it ginawo dit moonorimakasi (Mzm 50:14), tumoobat (Mzm 51:16-19), mintaduwa (Mzm 141:2), mamaal dit kenginan do Kinoringan (Yes 1:11-15; Mi 6:6-8), om osotia sid Kinoringan (Hos 6:6). It kapatayan di Tuhan Yesus pangaganti dit manadaka, mangaraa, monogit om it gagarason dot sorobon. Ii-nopot isamba tokow sid Tuhan: manaak do siin supaya kaabar it Tabar Tawasi (Flp 4:18), minlaalanu dot mangarayow do Kinoringan (Ibr 13:15), mamaal do kowosian, om monulung dit tulun tosusa (Ibr 13:16). Om iri no ot parsamba’an dit koonong sid ginawo do Kinoringan, tu nokeeso kow no di Yesus Kristus. 6Tu waro nokotulis sid Kitab dot, ka do Kinoringan,
“Intangay, pilion Ku isot pampang dot boorogo babanar,
dot powilion Ku sid kota do Sion, 2:6 Sion diti, ngaran dit sokid dit pinaagaman dit Saasambayangon Tagayo sid kota dot Yerusalem, om it Sion dino, ngaran koduwo dit kota dot Yerusalem.
tu onuwon Ku dotponolipar do walay.
Om isay nopo ot mimoyo Doo, amu pokooson,”
ka. 2:6 Yes 28:16 (LXX); Ef 2:20 7It pampang dino, agayo babanar ot guna sid daton dit mimoyo. Nga iti not amaran do Kitab baagi dit tulun dit amu mimoyo,
“It pampang dit niada dit tongo tukang do walay,
iri nogi ot ajadi dot ponolipar do walay dot paling ki-guna,” ka dit Kitab.
2:7 Mzm 118:22 8Om Yalo dino nga ajadi-i dot,
“Pampang do koosoduwon dot tulun,
om pampang do kootobpo’on doalo,”
ka dit Kitab. 2:8 Yes 8:14-15 Sagay kasadu yoalo, amu yoalo mimoyo dit boros do Kinoringan. Iri no ot natantu do Kinoringan sid doalo. 2:8 Yes 6:9-10; Mat 13:14-15
9Nga ikoo no ot umat dot nopili, om tongo timam dit mangalayan do Raja, om bansa tosusi, it nasanganu do Kinoringan. Nopili kow supaya yabar duyu it nongo-gagama Yo dit keeranan, ino-no, nangatan kow do Kinoringan sumoliwan mantad sid kotuwangan, dot sumuwang sid linawaw Yo dit aso keenong. 2:9 Kel 19:5-6; Yes 43:20-21 (LXX); Ul 4:20; 7:6; 14:2; Tit 2:14; Yes 9:1 10I muula, amu kow po nakaagkum sid umat do Kinoringan, nga maakaa diti, nakaagkum kow no. I muula, amu kow sianan do Kinoringan, nga maakaa diti, sinianan kow dîiri Doo. 2:10 It amu po nokorikot i Tuhan Yesus sitid pomogunan, it bansa no dot Yahudi ot najadi dot umat do Kinoringan om nasanganu Yo. Nga pagka tu minatay i Yesus dot minongontok dit kikiawi it tongo bansa, maakaa diti, kikiawi dit tulun dit mimoyo Doo, najadi dîiri dot umat Yo. Intangay sid Hos 2:22; Ef 2:11-22.
Padpasi dit Aaluk dot dang Turipon do Kinoringan
11Oy tongo koobpineeyan dit aa-ku koyuyuuan! Itokow diti, ugu-ko it tulun magali-ali dot nokotumpang sitid pomogunan. Jadi, pokionuwon ku babanar dikoo, okon-ko potuudan duyu it kenginan taraat, it lumawan dit kenginan tawasi dit ginawo duyu. 12Powosio duyu no ot bubuatan duyu sid pialalatan dit tulun kapir. Tu simbaalan kow poma doalo dot tulun taraat kow kabarasan, nga eetung kembagu doalo dot awasi-i bala’ay ot minangan duyu. Jadi kaa po dino, mangarayow nôono yoalo do Kinoringan tiya dit tadlaw dit korikatan do Kinoringan mongukum dot tulun. 2:12 Mat 5:16
13Pagka tu mimoyo tokow di Tuhan, subay-ko maya tokow dot pomorinta, ino-no it raja, tu yalo ot asawat ot kuasa, 14keenong it gobinor dit linantik dit raja dot mangaratu dot tukum sid tulun taraat, om mangarayow dit tulun dit mamaal dot awasi. 15Tu kenginan nopo do Kinoringan, mamaal tokow dit ongo-wawasi supaya kokuntom it kabang dit tulun tolowong dit asot elala’an, it moomoros dot araat. 16Nokobebas tokow pasal di Yesus, nga kadaay tokow pakayo it kobebasan tokow diri dot mamaal dot karaatan, ino-i-nga mokiuripon tokow nôono do Kinoringan. 2:16 Gal 5:13 17Orumato tokow no kikiawi ot tulun, mitotoluod tokow no songobpinee sandad Kristian, ronoko tokow no i Kinoringan om orumato tokow no it raja.
It Kinasansara’an di Kristus ot Omitan
18Oy tongo kooripanan kow, ronok om taat kow no sid tuan duyu, dot okon-ko gisom sid tuan nôopo dit awasi ot pugiginawo keenong it oobung-sianan, ino-i-nga, sid tuan dit orongit poma. 2:18 ronok om taat kow no sid tuan duyu, Tafsiran 2: taat kow no sid tuan duyu, tu rumonok kow do Kinoringan, 19Tu nokuro ong amu poma aadil ot pangaatagan doalo dikoo, tu daagan dit kaata’at duyu sid Kinoringan, nga tumaan kow nopo, tu mangan kow-i barakatay do Kinoringan. 20Tu nunu ma ot pokiraya’an duyu dot ataan kow poma dot bobogon, ong apatut ot kapamabagan dikoo tu ki-sala kow? Nga ong ataan kow sid kasansara’an dit mangan kow bobogo pasal dit awasi it giginama duyu, mangan kow-i barakatay do Kinoringan. 2:19-20 Luk 6:32-34 21Tu iri no ot kinoponginloowan do Kinoringan dikoo, tu i Kristus kondiri nga nasansara-i minongontok dikoo, dot it bubuatan Yo dit ataan sid kasansara’an ot ajadi dot suntu baagi dikoo. 22Yalo dino, amu insan kawaal do kasala’an om amu insan momudut. 2:22 Yes 53:9; Yoh 8:46; 2Kor 5:21 23Tiya dit nusiba Yalo, amu Yalo sinumuli mongusiba. Tiya dit sinansara Yalo, amu-i Yalo minongindoronok dot tulun, gaam nogi niuli di Yesus sid Kinoringan dot ombo-ko i Kinoringan ot mongukum, tu Yalo no ot Takim dot aadil. 2:23 Yes 53:7 24I Kristus ot minamabo dit tongo duso tokow sid koyuwan Yo kondiri sid kayu do salip, supaya keedu tokow mantad sid duso. 2:24 supaya keedu tokow mantad sid duso Harfiah: supaya matay tokow baagi dit duso. Komoyoon, amu tokow no nokuasa’an do duso, ugu-ko it tulun minatay, tu amu no kawaal do duso om amu no osuu mamaal do duso. Ino-i-nga dang Kristus nôono ot koposiyon tokow. Intangay sid Rm 6:1-11. Om maakaa diti, maya nôono dit kenginan do Kinoringan ot tomodon dit koposiyon tokow. Om it tongo maran no sid koyuwan Yo ot mongolingos daton. 2:24 Yes 53:4-5 25Tu it gûulu nopo, ugu-ko tongo domba tokow dit napalid, nga maakaa diti, nokooli tokow no sid Moomiara om Maananggom daton , ino-no i Kristus. 2:25 Yes 53:6
3Sompusasawo
1Om ikoo oy tongo tongondu dit ki-ongo-sawo, subay-ko tumaat kow sid sawo duyu. Tu ong waro doalo ot amu mimoyo dit boros do Kinoringan, it bubuatan duyu ot katagayat doalo mimoyo sid di Kristus, dot aso poma boroson duyu sid doalo, 3:1 Ef 5:22; Kol 3:18 2tu okito doalo dot rumonok kow do Kinoringan om asot ponuduan dit bubuatan duyu. 3Okon-ko sid soribaw no ot lonjion duyu, komoyoon, okon-ko adadarak ot gama mongusay dot tokobuk, mamakay dot tamas keenong monong-soosokot dot tongo-lalanji. 3:3 1Tim 2:9 4Ino-i-nga, subay-ko it kolonjian mantad sid ginawo ot suuton, it amu okitanan dot tulun, ino-no it ginawo tosulimod om oponod. Ino no ot kolonjian dot otiru om boorogo sid tinoguwangon do Kinoringan. 5Tu iri not poogulanji dit tongo tongondu tosusi kodori, it mangarap do Kinoringan: tumaat dit sawo yo. 6Ugu-ko i Sara, tu tumaat di Abraham om monong-tuan dialo. Om ikoo dino, ajadi kow dot ugu-ko tongo tanak di Sara, ong awasi ot gagama’on duyu om asot ikorosi duyu. 3:6 Kej 18:12
7Om itokow oy tongo kookusayan dit ki-ongo-sawo no, wosio tokow no ot paangatag tokow dit sawo tokow. Itungo tokow no babanar dot orukung it sawo tokow mantad daton. Orumato tokow no yoalo, tu yoalo nga koompit-i daton dot kaanu dit koposiyon tototog dit itaak bâanar do Kinoringan. Tu ong amu tokow mongorumat dit tongo sawo tokow, amu rongo’on do Kinoringan it tongo doa tokow. 3:7 Ef 5:25; Kol 3:19
Asansara tu Awasi ot Gagama’on
8Kopupusan dot boroson ku, iniyo’o tokow no ot pongitungan. Kiikiro ong koduton ot poo do gibang, opurimanan sid wanan. Mitotoluod tokow no ugu-ko miobpinee, oobing-sianan om osiba ot ginawo. 9Okon-ko sulian do karaatan it karaatan, keenong sumuli mongusiba; ino-i-nga pabarakatay tokow do Kinoringan it tulun dino. Tu, sagay linoow tokow do Kinoringan, supaya kotorima tokow dot barakat. 10Tu ka dit Kitab,
“Isay-isay ot mokipupurimon dot kasanangan do ginawo
om eengin dot awaya’an yo po it tongo tadlaw tawasi,
tandayan no it dila yo dot koboros dot araat
om amu momudut.
11Insoduan yo it araat,
it tongo-wawasi ot mangan yo;
om monotos babanar mogiim dot kopiusayan,
om monokiwasi dot tulun wookon.
12Tu intatangan di Tuhan it tulun dit maya dit kenginan Yo,
om rorongo’on Yo it doa doalo,
nga lawanon di Tuhan it tulun dit mamaal dot karaatan,”
ka. 3:10-12 Mzm 34:13-17 (LXX)
13Isay obo ot mangaraat dikoo ong abagos kow mamaal do kowosian? 14Nga, mangan kow poma sansara’o dot tulun tu awasi ot winaal duyu, nga oontung kow-i! Kada kow no rumosi dot isay nopo, om kada kow no tumangkangaw. 3:14 Mat 5:10 15Gaam nogi, orumato duyu no babanar i Kristus sid suwang do ginawo duyu, dot Yalo no ot Tuhan duyu. Posodia’o duyu mâantad ot isimbar duyu ong warot tulun mongoduat dikoo dot, “Nokuro tu kakal kow-i mangaarap di Yesus?” ka. 3:14-15 Yes 8:12-13 (LXX) 16Nga subay-ko osulimod om asaayu ot gama duyu sumimbar. Om tandayan duyu no supaya oborisi ot ginawo duyu. Ong kaa dino, mangan kow poma simbaalay dot tulun pasal dit awasi ot padpasi duyu tu nokeeso kow no di Kristus, nga it tulun dit minonimbaal diri kondiri ot omomoluan. 17Gaam pong asansara pasal dot awasi ot waalon – ong iri no ot kenginan do Kinoringan – mantad dot asansara pasal dot araat ot waalon. 18Tu i Kristus poma nga insan daas no kapatay, supaya oompunan ot duso tokow. Asot sala Dialo, nga minatay tu minongontok dit tulun dot ki-sala, supaya aangatan tokow Doo kumaa sid Kinoringan. Pinatay i Kristus sid koyuwan dot dang riniba, nga pinosiyan kembagu sid koyuwan dot dang osundu. 19Nga it amu po noposiyan Yalo, minongoy po i tatod Yo sid naraka dot mangaabar sid tongo moleekat taraat dit minangan jiilo siri , dot nakamanang no Yalo. 3:19 sid tongo moleekat taraat dit minangan jiilo siri: Komoyoon nopo, it tongo moleekat taraat dit naratu sid duso om minanansawo dot tongondu dot tulun (Kej 6:1-4). Minangan yoalo jiilo mising-korikot dit Tadlaw dot Pongukuman diti pomogunan, baru nogi om isubo sid tapuy (Yud 1:6; 2Ptr 2:4). 20It tongo moleekat taraat diri, ino-no it tongo moleekat dit amu tinumaat sid Kinoringan tiya dit zaman di Nuh. Tiya diri, alanut ot ginawo do Kinoringan mongindad dot tumoobat it tongo tulun, namot dit mamaal i Nuh dit gaman. Nga okûukudik ot tulun dot tinumoobat om nasalamat mantad sid liyud; walu koyuwan no ot sinumuwang sid gaman. 3:20 Kej 6:1–7:24 21It liyud nopo diri, kopibaabayu dit kopomodsuan tidîino tu manalamat daton. It kopomodsuan dino, okon-ko mokiugas po dit murong sid koyuwan, ino-i-nga mokisusi do ginawo sid Kinoringan. Kadapat tokow mokisusi do ginawo, tu noposiyan no i Yesus Kristus mantad sid minatay. 3:21 It gama momodsu (mangabaptis) sid zaman dit sid Kitab, itolop babanar ot tulun sid weeg om posoriba’on nogi kembagu. It itolop diri, mad-ko minatay tokow om nolobong, ugu-ko i Yesus dit minatay om nolobong diri. It tulun dit minatay, amu nôono kawaal do duso, om itokow nga irad-i diri tu amu nôono nokuasa dot duso. (Rm 6:1-16; Kol 2:12-13). It posoriba’on, mad-ko noposiyan tokow kembagu ugu-ko i Yesus dit noposiyan diri. Om ajadi tokow nôono dot ugu-ko tulun wagu (1Ptr 1:3).22Maakaa diti, nokeensawat no i Yesus sid surga dot kumoruang do Kinoringan momorinta. Om momorinta dîiri Yalo dit kikiawi it tongo moleekat, tongo woyo’on do rogon om ponguasa dot ongo-susundu. 3:22 Mzm 110:1; 8:6
4It Koposiyon Kaawagu dit Tulun dit Mimoyo do Kinoringan
1Pagka tu koyuwan kondiri di Kristus ot nokopurimon do kasansara’an, subay-ko ki-lugu ot ginawo duyu dot ugu diri dot manganggur dot asansara. Tu ii-nopo tulun dit nokopurimon dot kasansara’an dot ugu diri sid koyuwan kondiri, nokotingkod no mamaal do duso. 2Ong ugu dino, subay-ko tontuon duyu mamakay it masa tiya dot miyaw kow po sitid pomogunan, dot okon-ko maya dit kenginan duyu kondiri, ino-i-nga maya dit kenginan do Kinoringan. 3Tu ogumu no masa duyu dot nakaada dot tumiruwan dit kenginan dit tulun kapir, ino-no it kobuatano dit kalaalasu, potuudan it kenginan taraat, maagawuk, moginakan dot aso gisom, rumamay dot adarakan, om mamaal dot kalaalasu tiya dot sumamba do patung. 4Iri no ot keeran-iran dit baya koruang duyu dot kapir, tu amu kow dîiri koowas dit koosomu ot bubuatan doalo, sampay simbaalan kow doalo. 5Nga, amu mimîilo dot aa kotoguwang yoalo do Kinoringan patarang dit giginama yo. Tu nakaanta no mâantad i Kinoringan mongukum dit tulun dit miyaw om minatay. 6Tu iri no ot sabap dot it tongo Kristian dit minatay no maakaa, nga naabaran-i dit Tabar Tawasi tiya dit miyaw po yoalo. Minatay no yoalo, tu iri no ot tukum do Kinoringan kumaa sid kikiawi ot tulun. Nga tomodon nopo dit nabaran yoalo dit Tabar Tawasi diri, supaya oposiyan-i kembagu yoalo dot ki-koyuwan tosundu nôono ugu-ko i Kinoringan.
Gama Mamakay dit Sinundu dit Nitaak do Kinoringan
7Oruay no orikot ot kopupusan dit nunu nopo. Ino nogi, subay-ko eelo tokow pokodos do ginawo, om tandayay tokow no it pongitungan tokow supaya kopintaduwa tokow. 8Nga it keeso no babanar, mitotoluod tokow no dot aawi-awi ot ginawo, tu ong mitotoluod tokow, asanggup tokow mii’a’ampun. 4:8 Ams 10:12; Yak 5:20 9Mi’indakod tokow no do walay dot ongo-susuaw tokow, om kada tokow song-rarasang ong warot sandad Kristian dot modop sid walay tokow. 10Titikid daton nokotorima no dot soro-susuway ot sinundu mantad sid Kinoringan. 4:10 Sinundu: bakat rohani keenong karunia roh it itaak do Kinoringan sid tulun dit mimoyo. Ino nogi, subay jumadi tokow dot pongurus tawasi dit sinundu diri, om pakayo tokow no it sinundu diri dot koguna’an dot kikiawi ot tulun. 11Jadi isay nopo ot ki-sinundu dot eelo mooboros, subay-ko it boros mantad sid Kinoringan ot iboros. Isay nopo ot ki-sinundu dot monulung dot tulun wookon, subay-ko it kabasagan mantad sid Kinoringan ot pakayon, supaya sid nunu nopo ot waalon tokow, eensawatan i Kinoringan pasal di Yesus Kristus. Yalo no ot ki-kuasa om apatut dot insawatan sampay misingkoleed. Amin.
Asansara Kow Tu Kristian Kow
12Oy tongo koobpineeyan dit aa-ku koyuyuuan! Kada kow keeranan ong sansara’on kow dot tulun pasal dit maya kow di Yesus. Maakaa diti, sansara’on kow om kopurimon kow dot oruol, dot ugu-ko nolonuk dot tapuy. It tongo kasansara’an dino nga mongumbal dikoo dot apatog ko amu ot koosipan duyu. Jadi, kada kow monokod dot kajajarangan inot najangan duyu dino. 13Ino-i-nga, makin koompot kow di Kristus dot nasansara, makin dot otomon kow. Ong ugu dino, ingko-totomon duyu ong rumikot kembagu i Kristus sompôori dot ki-tompiling. 14Ong usiba’on kow pasal dot mabpamaya kow di Kristus, oontung kow, tu komoyoon nopo nga sino nod dikoo it Tatod do Kinoringan it landu dot osundu. 4:13-14 Mat 5:11-12 15Kada dot waro dikoo ot asansara pasal dot maamatay dot tulun, maanakaw, ara’at keenong osibuk dot muwas dot hal dot tulun. 16Nga, ong asansara kow pasal dot Kristian kow, kada kow komomoluan. Ino-i-nga papana’o duyu no it koposiyon duyu dot mialuk dot reetan dot tulun Kristian, supaya enrayow i Kinoringan.
17Tu norikot no ot masa do Kinoringan mongukum diti pomogunan. Nga itokow it tongo umat Yo ot poguluonon Yo mongukum. Pagka tu itokow it tongo umat Yo ot poguluonon Yo mongukum, sâampod po it tulun dit amu mimoyo dit Tabar Tawasi mantad sid Kinoringan, om amu no ukumon do Kinoringan.18Tu, ka dit nokotulis sid Kitab,
“Pagka tu it tulun tabanar poma nga apagon-i manalamat,
sâampod po it tulun dit pakaaso do Kinoringan om it maamaal dot duso,”
ka. 4:18 Ams 11:31 (LXX)
19Ino nogi, ong waro tulun dot asansara tu kenginan do Kinoringan, subay-ko pataakon it kondiri yo sid Kinoringan, i minongurug dit osotia, meed dot tumilombus-i mamaal dot awasi.
5Tudukan Kumaa sid Tongo Ponotua do Jemaat om Tongo Sukod Wagu
1Oy tongo ponotua do jemaat, waro pokionuwon ku sid dikoo, tu yoku nga ponotua-i do jemaat, it nakamato dit kinasansara’an di Kristus. Om yoku nga kokisib-i dit tompiling di Kristus dit iintalang sompôori. Jadi, iti no ot pokionuwon ku sid dikoo: 2Mangay duyu babanar piara’o it jemaat duyu ugu-ko it baanan do domba do Kinoringan, dot okon-ko paapajalon oh ginawo, ino-i-nga mantad sid kagaanan do ginawo kondiri, tu iri no ot kenginan do Kinoringan. Jaga’o duyu no yoalo dot okon-ko pongonuwan duyu nôopo dot koontungan, ino-i-nga agayo ot ginawo mangalayan. 5:2 Yoh 21:15-17; Kis 20:28 3Om okon-ko porinta’on duyu it tulun dit niarap sid dikoo, ino-i-nga jadi kow no dot suntuan doalo. 4Ong korikot sompôori it Kotua dit tongo Moomiara do Domba, ataakan kow dot mahkota dot dang pangkat. It mahkota dino, amu tumalup ot kaasanong.
5Om ikoo oy tongo sukod wagu, taat kow no sid ponotua do jemaat. Om ikoo kikiawi, pensiba’o duyu no it tongo ginawo duyu, om pitutulung kow no dot osiba ot ginawo. Tu ka dit boros do Kitab,
“Lawanon do Kinoringan it tulun dit asawat ot ginawo,
nga sianan it tulun dit osiba ot ginawo,”
ka. 5:5 Ams 3:34 (LXX) 6Ino nogi, insiba kow no sid tinoguwangon do Kinoringan dit ki-kuasa, supaya insawatan kow Doo sid masa dit natantu Yo mâantad. 5:6 Mat 23:12; Luk 14:11; 18:14 7Pataako duyu sid Doo kikiawi it katangkanga’an duyu, tu piara’on kow-i Doo.
8Jajaga kow om sodia kow no! Tu it musu duyu, it Raja do Rogon, miumpapata ugu-ko singa dit mongongor mogiim dot tulun dot mangan yo tabpa’ay om akanon nogi. 9Lawano duyu no yalo dot koosipan tapatog, tu nela’an duyu no dot it koobpineeyan duyu sid pootongkop do pomogunan nga noonong-i do kasansara’an ugu-ko ikoo. 5:9 Yak 4:7; Ef 6:13
10Nga, kadung katalib it kasansara’an duyu toruruay diri, poolion do Kinoringan it susunduwan duyu, om mangan Yo patatapo it ginawo duyu. Pogiroton om papapagon Yo po it koosipan duyu. Tu i Kinoringan no ot puun do kikiawi ot kosianan. Om Yalo no ot minonginloow dikoo dot kumisib sid tompiling Yo dit ototog, tu nokeeso kow no di Kristus Yesus. 11Yalo no ot ki-kuasa misingkoleed! Amin.
Salam do Kopupuson
12Iti surat ku tonîibak diti, tinulis ku pakaa sid dikoo dot nuupan oku di Silas, it anggapon ku dot ponoko-tobpinee ku sid Kristian it kaarapan babanar. Tomodon ku nopo monulis diti surat diti, momuransang om pasasi oku sid dikoo dot kukuro nopo ot kasansara’an dot aajangan duyu, kakal-i dot totonudon kow dit kosianan do Kinoringan. Girot kow no babanar sid kosianan Yo dino. 5:12 Kis 15:22, 40
13It tongo kinoruangan sid jemaat dot Babel, it ugu-ko ikoo tu nopili do Kinoringan, kirim salam sid dikoo. 5:13 Babel diti, pinakay di Petrus do pangaganti dit ngaran yo babanar, ino-no, Ruum. It ngaran diri, popoondom dit pambaca keeso tiya dit nosunsub it tulun Israel sid Babel. I Markus it ponokaanak ku nga kirim salam-i sid dikoo.5:13 Kis 12:12, 25; 13:13; 15:37-39; Kol 4:10; Flm 1:24 14Pisasalam kow no dot mitotoluod. 5:14 Pisasalam kow no dot mitotoluod. Harfiah: Pisasalam kow no dot misisingud tanda dot mitotoluod.
Kososogit konow kikiawi sid saralom dit koosayan do Kinoringan, tu nokopiiso kow no sid di Kristus. Amin.