1 Yohanes

Surat Keeso

di

Yohanes

Popela’an

Iti surat diti tinulis di Yohanes, it rantas pusod di Yakobus. I Yohanes om i Yakobus dino, tanak di Zebedeus, om rasul di Tuhan Yesus. Suway mantad keeti surat diti, waro pot apat ot Kitab dot tinulis di Yohanes, ino-no it Surat Koduwo di Yohanes om Surat Kotolu di Yohanes, om it Kitab po dit Tabar Tawasi dit Tinulis di Yohanes, om it Kitab Wahyu (Niintalang).

Iti nopo Surat Keeso di Yohanes diti, duwo ot tomodon. Keeso, monuu babanar dit tongo pambaca, supaya kopiiso sid Kinoringan om it Tanak Yo i Yesus Kristus. Koduwo, moniag doalo supaya amu maya dit tudukan dot kapalid, it mangaraag dit kopiisa’an dino. Minomoros it tongo guru dit maamalid dot amu kabarasan nosiliw i Yesus dot tulun; kokitanan nôopo dot ugu-ko tulun. Om ka doalo, nokuro ong araat poma ot bubuatan tokow, ong oborisi-i ot ginawo tokow, nga simoyo’on-i.

It gama di Yohanes mangalawan dit tudukan dino, nitarang yo dot babanar-ko nosiliw i Yesus dot tulun. Ong kotutun tokow di Tuhan, maya tokow nôono dit kenginan Yo. Komoyoon, mogidu tokow mantad sid karaatan, om maya nôono dit pinonuu’an Yo, om mitotoluod tokow nôono. Sid surat diti, ogumu ot abaca tokow dot kempapag dit ginawo tokow, supaya ela’an tokow dot asalamat tokow (2:3, 5-6; 3:10, 14, 24; 5:11-12, 18-20).

Suwang

Boros dot kapasi: 1:1-4

Papanaw do koposiyon sid kanawa’an om kotuwangan: 1:5–2:27

Tongo tanak do Kinoringan om tongo tanak dit Raja do Rogon: 2:28–3:24

Pongintutunan dot isay ot tulun dot notudukan di Tatod Tosusi dit abanar om isay ot tulun dot notudukan do rogon dit moomudut: 4:1-6

Kinoringan dino otoluod: 4:7-21

Koosipan kakala dot karaatan ditit pomogunan: 5:1-21

Boros dot Kapasi

¹Tonsi nopo diti surat diti nga ontok-ko i Yesus Kristus. Yalo no ot reetan dit Boros dot Kapasi, it nokosopol mâantad, tiya dit amu po noorug iti pomogunan. It Boros dot Kapasi dino, norongow ya, namato ya, nempurasan ya om nokuyutan ya kondiri. 1:1: Yoh 1:1 ²Tu it Kapasi dino, nokorikot no sitid pomogunan om nokito ya nogi. Jadi maakaa, sumasi okoy, om paabar okoy sid dikoo dot Yalo no ot manaak dot koposiyon tototog. Yalo dino, sosorid Tama tokow sid surga mantad di gulu po, nga maakaa nokorikot no sid dagay. 1:2: Yoh 1:14; 14:6 ³Nunu it nokito om norongow ya, ino no ot yabar ya sid dikoo, supaya ikoo nga koompit-i dit piniisa’an ya. It piniisa’an dino, piniisa’an tokow sid Tama om it Tanak Yo i Yesus Kristus. ⁴Iti no koponulisan ya dit surat diti, supaya aawi-awi ot kootomon do ginawo tokow.

Masi Sid Tanawaw ko Masi sid Kotuwangan

⁵Iti no ot tabar dit norongow ya mantad sid di Yesus Kristus, it yabar ya sid dikoo: I Kinoringan dino, linawaw, om tad-pom asot otuwong sid Doo. 1:5: Yoh 1:9; Why 21:23; Mat 5:14 ⁶Ong momoros tokow dot nokeeso tokow no Doo, nga sunduy dot sid kotuwangan-i ot padpasi tokow, momudut tokow om amu mamaal dit kopionong dit babanar. ⁷Nga ong masi tokow sid tanawaw, ugu-ko i Kinoringan tu sisirid tanawaw, warot piisa’an tokow song-koruangan, om woogan dit raa di Yesus Tanak do Kinoringan it kikiawi dit duso tokow.

⁸Ong momoros tokow dot aso duso tokow, monipu tokow dit kondiri tokow, om amu nakaatag sid ginawo tokow it tudukan tabanar mantad sid Kinoringan.⁹Nga ong okunon tokow kikiawi it duso tokow sid Kinoringan, ompunon Yo-i it tongo duso tokow, om woogan Yo-i kikiawi it karaatan tokow, tu osotia om aadil Yalo. ¹⁰Nga ong momoros tokow dot, amu tokow insan mamaal do duso, komoyoon, pokowudut tokow do Kinoringan, om it boros Yo amu nakaatag sid ginawo tokow.

¹Oy tongo ponokaanak ku! Kinoponulisan ku nopo ditit surat diti sid dikoo, supaya amu kow kawaal dot duso. Nga ong waro daton ot nakawaal dot duso, warot monginsuup daton sid tinoguwangon di Tama tokow, ino-no i Yesus Kristus it abanar. ²Yalo no ot najadi dot pinangaraa 2:2 pinangaraa: It duso tokow, kaarasangan do Kinoringan sampay amu tokow kawasa tumoguwang Doo. Tu inot dosa dino kalaalasu daton. It kodori, koobasan dot Momogun, it tongo pangayam nôopo ot garason dot isamba tu pangaraa, tu ino no ot waro, nga amu po osukup. Daapun-i ot osukup, ino-no i Yesus it minatay sid salip, it pinangaraa om pinongugas do Kinoringan dit duso dot tulun, tu i Yesus no ot abanar. Iti diti, tinarang sid Surat sid Ibrani, tu it tadat dot tongo Yahudi om it tadat kodori dot Momogun, miinong sâabat sid hal dot mangaraa (intangay sid Ibr 7:27; 9:6-15; 10:1, 4, 9-10). supaya oompunan it duso tokow, dot okon-ko gisom it daton no dot duso, ino-i-nga it duso po dit kikiawi ot tulun.

Pinonuu’an dot Kaawagu

³Ong maya tokow dit tongo pinonuu’an do Kinoringan, ino no ot tanda dot kotutun tokow Doo. ⁴Ong warot tulun momoros dot, “Kotutun oku do Kinoringan,” ka, sunduy amu-i maya dit tongo pinonuu’an do Kinoringan, it tulun dit ugu keeno, moomudut, om amu nakaatag sid ginawo yo it tudukan tabanar mantad sid Kinoringan. ⁵Nga isay-isay ot maya dit boros do Kinoringan, yalo no ot babanar-no-ko neeso ot ginawo monoluod do Kinoringan. Iri no ot pongintutunan dot nokeeso tokow no do Kinoringan. ⁶Isay-isay ot momoros dot nokeeso no do Kinoringan it kondiri yo, subay-ko minsuuw dit padpasi di Kristus.

⁷Oy tongo koobpineeyan dit aa-ku koyuyuuan, itit tutulison ku diti, okon-ko pinonuu’an dot kaawagu, ino-i-nga pinonuu’an leed. Tu it pinonuu’an diti, opirorongow duyu no mantad dit tinumimpuun kow nogi mimoyo di Kristus. 2:7 Yoh 13:34 ⁸Nga ugu poma dino nga, obbuli boroson dot itit pinonuu’an ditit tutulison ku diti, isot pinonuu’an kaawagu, tu nokentalang no sid padpasi di Kristus om sid padpasi duyu dot it pinonuu’an dino, wagu po. Tu metatanus no it kotuwangan, om it anawaw babanar nga makin sumibarak.

⁹Isay-isay ot momoros dot, sid kanawa’an no it kondiri yo, nga asana dit tobpinee yo sandad Kristian, it tulun dino, kakal-i sid kotuwangan sampay tidîino. ¹⁰Isay-isay ot monoluod dit tobpinee yo, sisirid kanawa’an, om amu paratu dot tulun sid duso. ¹¹Nga isay-isay ot sumana dit tobpinee yo, kakal-i sid kotuwangan. Yalo dino, ugu-ko it tulun dit mamanaw sid kotuwangan, om amu yo ela’an siombot pakaayan yo, tu nosompon it mato yo dit kotuwangan.

It Tongo Kristian om it Karaatan sid Pomogunan

¹²Oy tongo ponokaanak ku dit aa-ku koyuyuuan, 2:12 Oy tongo ponokaanak ku ... Kogumuay dit tongo maangarati ot momoros dot ugu-ko it sid pasal 2:1 dot kikiawi dit tongo umat reetan di Yohanes dot ponokaanak yo, tu keeso otuo no yalo, om yalo dino, pomimpin. sagay pogi-om monulis oku dot surat sid dikoo, tu popoondom oku dikoo dot noompunan no ot duso duyu pasal di Kristus.

¹³Oy tongo koobpineeyan ku dit nosukod no ot koosipan, 2:13 Oy tongo koobpineeyan ku dit nosukod no ot koosipan, ... Harfiah: Oy tongo kamaman om tongo taki ... sagay pogi-om monulis oku dot surat sid dikoo, tu popoondom oku dikoo dot nokotutun kow no di Kristus, it nokosopol mantad dit timpuun po.

Oy tongo koobpineeyan dit omulok po ot koosipan, 2:13 Oy tongo koobpineeyan dit omulok po ot koosipan, ... Harfiah: Oy tongo koobpineeyan ku dit sukod wagu ... sagay pogi-om monulis oku dot surat sid dikoo, tu popoondom oku dikoo dot nakala duyu no it karajaan do rogon.

¹⁴Oy tongo ponokaanak ku, sagay pogi-om monulis oku dot surat sid dikoo, tu popoondom oku dikoo dot nokotutun kow no do Kinoringan it Tama.

Oy koobpineeyan dit nongo-sukod no ot koosipan, sagay pogi-om monulis oku dot surat sid dikoo, tu popoondom oku dikoo dot nokotutun kow no di Kristus it nokosopol mantad dit timpuun po.

Oy tongo koobpineeyan dit amu po osukod ot koosipan, sagay monulis oku dot surat sid dikoo, tu popoondom oku dikoo dot atatap ot ginawo duyu, niatag duyu sid ginawo duyu it boros do Kinoringan, om nakala duyu no it karajaan do rogon.

¹⁵Jadi, kada kow maya dit dang pomogunan dot kenginan om kada kow no dot amu mongoyuu dit nunu nopo sitid pomogunan. Tu ong amu kow mongoyuu ditit pomogunan, komoyoon, mongoyuu kow do Kinoringan it Tama. ¹⁶Tu kikiawi dit waro sitid pomogunan diti, ino-no kenginan taraat dit ginawo tokow om kaasalanan do mato om it mookirayow, okon-ko mantad po sid Kinoringan it Tama, ino-i-nga mantad sitid karaato ditit pomogunan. ¹⁷Iti nopo pomogunan om kikiawi it kenginan taraat dot tulun, tumanus-i. Nga it tulun dit mamaal dit kenginan do Kinoringan, miyaw misingkoleed.

Kada no Maya dit Tongo Guru dit Maamalid

¹⁸Oy tongo ponokaanak ku, iti tidino diti, koowian no ot zaman. Norongow duyu no mâantad dot rumikot it Misingko-Raja Maanalamat, it reetan dot Anti-Kristus. Om maakaa diti, ogumu no ot guru dot maamalid dot nokembulay, dot it pugiginawo om it kobubuatano doalo, ugu-ko it pugiginawo om it kobubuatano dit Misingko-Raja Maanalamat. Ino no ot pongintutunan tokow dot koowian do zaman. ¹⁹It tongo guru dino, andang-ko mantad sid jemaat tokow di gûulu, nga okon-ko babanar-po-ko koruang tokow, sagay pogi-om tinumongkiyad yoalo daton. Tu ong babanar-ko koruang tokow yoalo, atantu no dot kakal-i sisitid daton yoalo. Nga pagka tu tinumongkiyad yoalo daton, atarang no dot asot îiso doalo ot koruang tokow.

²⁰Nga, ikoo nopo dino, nataakan kow no di Kristus di Tatod Tosusi Yo. Jadi ugu po dino, kikiawi dikoo nga keelo no popitongkiyad dit tudukan tabanar om it kapalid.²¹Jadi, okon-ko it amu kow po keelo dot tudukan tabanar ot kinoponulisan ku sid dikoo, ino-i-nga it keelo kow nôono; om ela’an duyu po dot asot wudut sid tudukan tabanar. ²²Isay nopo ot momoros dot, “I Yesus dino, okon-ko Raja po dot Maanalamat it najanji do Kinoringan,” ka, it pugiginawo om kobubuatano dit tulun dino, ugu-ko it pugiginawo om kobubuatano dit Misingko-Raja Maanalamat, tu olimon yo it Tama om it Tanak. ²³Tu isay nopo ot mongolim dot Tanak do Kinoringan i Yesus, inot tulun dino, amu kotutun do Kinoringan, it Tama. Isay nopo ot mangakun dot Tanak do Kinoringan i Yesus, kotutun do Kinoringan, it Tama. ²⁴Ino nogi, paatago duyu no sid ginawo duyu it tudukan dit norongow duyu mantad dit tinumimpuun kow nogi mimoyo sid di Kristus. Ong nakaatag sid ginawo duyu it tudukan dit norongow duyu diri, kopiiso kow nôono dit Tanak om it Tama. ²⁵Om iti no ot najanji di Kristus sid daton, ino-no it koposiyon tototog.

²⁶Kikiawi dit tinulis ku sid dikoo diri, ontok-ko it tongo tulun dit monotos mokipamalid dikoo. ²⁷Nga, ontok-ko ikoo, nataakan kow no di Kristus dit Tatod Tosusi Yo, om it Tatod Tosusi Yo dino, sisiri nôonod dikoo. Jadi kaa po dino, amu no oporolu dot tudukan kow dot tulun, tu it Tatod Tosusi di Kristus ot monuduk dikoo ontok-ko it nunu nopo, om it tudukan Yo dino babanar, okon-ko owudut. Ino nogi, woyo’o duyu no it tudukan dit Tatod Tosusi di Kristus, om tatap kow no miiso sid di Kristus.

Tongo Tanak do Kinoringan

²⁸Beeno oy tongo ponokaanak ku, tatap kow no miiso sid di Kristus, supaya ong rumikot kembagu Yalo, kosoromo tokow-i tumoguwang Doo, om amu tokow moolosok tu mongikum. ²⁹Nela’an duyu no mâantad dot, i Kristus nopo nga andang maya dit kenginan do Kinoringan. Jadi, ila’ay duyu no dot, isay-isay ot maya dit kenginan do Kinoringan, najadi no dot tanak do Kinoringan.

Itokow no ot Tongo Tanak do Kinoringan

¹Intangay pogi, songkuro kootoluod di Kinoringan it Tama sid daton, sampay rineetan tokow Doo dot tanak Yo. Om andang nogi dot tanak tokow Doo. Nga amu tokow otutunan dit tongo tulun sitid pomogunan dot itokow diti, tanak do Kinoringan, tu amu yoalo kotutun do Kinoringan. 3:1 Yoh 1:12 ²Oy tongo koobpineeyan ku dit aa-ku koyuyuuan, maakaa diti tanak tokow no do Kinoringan, nga amu po ela’an dot nunu ot kosilion tokow sompôori. It ela’an tokow, kadung korikot kembagu i Kristus, ajadi tokow dot ugu-ko Yalo, tu okitanan tokow nogi nôono babanar dot okukuro it kobubuatano Yo. ³Titikid dit tulun dit ki-arapan dot kokito di Kristus, subay-ko moologot monusi dit kondiri yo supaya koogu di Kristus tu osusi. ⁴Isay nopo ot mamaal dot duso, lumawan do Kinoringan. 3:4 lumawan do Kinoringan Harfiah: mangalanggar dit Tukum do Kinoringan Tu komoyoon nopo dot duso, lumawan do Kinoringan. ⁵Om nela’an duyu no dot, nokorikot sitid pomogunan i Kristus dot mananus dit duso tokow, om Yalo kondiri dino, asot duso. 3:5 Yoh 1:29 ⁶Titikid dit tulun dit nokeeso no di Kristus, amu no mamaal dot duso. Isay nopo ot amu tumingkod mamaal dot duso, amu insan kokito om amu insan kotutun di Kristus.

⁷Oy ponokaanak ku, kada kow mokipalid disay nopo. Isay nopo ot maya dit kenginan do Kinoringan, yino no ot abanar, ugu-ko i Kristus tu abanar. ⁸Isay nopo ot amu tumingkod mamaal dot duso, inot tulun dino tanak dit Raja do Rogon. Tu nokosopol mâantad ot duso dit Raja do Rogon. Iri no ot tinomod dit Tanak do Kinoringan sitid pomogunan, tu mananus dit gagama’on dit Raja do Rogon.

⁹Isay nopo ot najadi dot tanak do Kinoringan, amu tumilombus mamaal dot duso tu nokoturun no sid doo it bubuatan do Kinoringan. Pagka tu najadi no yalo dot tanak do Kinoringan, amu no yalo tumilombus mamaal dot duso. ¹⁰Kaa diti ot pisuwayan dit tongo tanak do Kinoringan om tongo tanak di Raja do Rogon: Isay nopo ot amu maya dit kenginan do Kinoringan, keenong amu monoluod dit tobpinee yo, inot tulun dino, okon-ko tanak po do Kinoringan.

Mitotoluod

¹¹Iti no ot tabar dot norongow duyu mantad dit timpuun-i: Subay-ko mitotoluod tokow. 3:11 Yoh 13:34 ¹²Kada tokow tumiruwan di Kain, tu yalo nopo nga nokuasa do Rogon, sampay minamatay dot tobpinee kondiri. Nokuro tu pinatay di Kain it tobpinee yo? Pasal nopo, it doo dot gagama’on araat, nga it dang tobpinee yo dot gagama’on, awasi. 3:12 Kej 4:8

¹³Ino nogi oy tongo koobpineeyan ku, okon-ko eeraranan kow ong sumana dikoo ot tongo tulun sitid pomogunan diti. ¹⁴Nela’an tokow no, dot nokeedu tokow no mantad sid kapatayan om nokosuwang tokow no sid koposiyon tototog, tu monoluod tokow dit koobpineeyan tokow sandad Kristian. Nga isay nopo ot amu monoluod dit koobpineeyan sandad Kristian, inot tulun dino sisiri nôonod kapatayan. 3:14 Yoh 5:24 ¹⁵Isay nopo ot sumana dit tobpinee yo, yalo dino, aso biida dit tulun dit maamatay dot tulun. Nela’an duyu-i, dot isay nopo ot maamatay, amu kaanu dit koposiyon tototog. ¹⁶Sid kowowoyo’on diti ot kela’an tokow dot gama monoluod dit tulun wookon: Minanganggur i Kristus matay tu manalamat daton. Jadi, itokow nga subay-ko sumodia dot manganggur matay tu monulung dit tongo koobpineeyan tokow sandad Kristian. ¹⁷Isay nopo ot osusukup sitid pomogunan, dot kokito dit tobpinee yo sandad Kristian dot osompitan, nga totomodon yo dot amu monulung, kukuoyon yo momoros dot monoluod do Kinoringan it kondiri yo? ¹⁸Oy tongo ponokaanak ku, mitotoluod tokow no dot okon-ko gisom kabang no, ino-i-nga pentalangon sid gagama’on it kotoluadan diri, tu iri no reetan dot monoluod.

Kosoromo Tumoguwang do Kinoringan

¹⁹Jadi, it gama tokow no dot mitotoluod ot pongintutunan dot maya tokow dit tudukan tabanar, om iri no kasanang dit ginawo tokow tumoguwang do Kinoringan. ²⁰Ong mongitung tokow dot amu tokow aaluk tumoguwang do Kinoringan tu ki-sala, kada tokow-i rumosi. Tu ela’an-i do Kinoringan it kikiawi it koposiyon tokow, om it toluod Yo sid daton, kaalib dit pongitungan tokow dit monginsala daton kondiri.

²¹Jadi, oy koobpineeyan ku dit aa-ku koyuyuuan, ong amu monginsala daton it ginawo tokow, kosoromo tokow babanar tumoguwang do Kinoringan, ²²om nunu nopot pokionuwon tokow, ataakan tokow-i, tu maya tokow dit nisuu Yo, om mamaal tokow dit kotomon di ginawo Yo. ²³It nisuu Yo: Subay-ko mimoyo tokow di Yesus Kristus it Tanak Yo, om mitotoluod ugu-ko it nisuu di Kristus sid daton. 3:23 Yoh 13:34; 15:12, 17 ²⁴Isay nopo ot maya dit pinonuu’an do Kinoringan, kopiiso do Kinoringan, om i Kinoringan nga kopiiso-i dit tulun dino. Ela’an tokow-i dot nokeeso no daton i Kinoringan, tu nakataak Yo no sid daton it Tatod Yo.

Gama Mongingkosup dit Nontodonon do Tongo Nubuat: Mantad sid Tatod do Kinoringan ko Mantad sid Rogon

¹Oy tongo koobpineeyan dit aa-ku koyuyuuan! Okon-ko turus imoyo’on duyu it tulun dit nokotorima kabarasan do nubuat mantad sid Kinoringan, ino-i-nga umbalan duyu po yoalo, tu pongingkosupan dot babanar-ko notudukan yoalo di Tatod do Kinoringan ko amu, tu ogumu ot nabi dot maamalid dot mootongkop sitid pomogunan. ²Kaa diti ot gama duyu mongingkosup dot it tulun dino notudukan di Tatod do Kinoringan: Ong mangakun yalo dot i Yesus no ot Raja Maanalamat dit rinumikot sitid pomogunan, dot nakaanu do koyuwan do tulun komimiiyo, komoyoon, babanar-ko notudukan di Tatod do Kinoringan it tulun dino. ³Nga isay nopo tulun dot amu mangakun dot i Yesus dino rinumikot sitid pomogunan dot najadi dot tulun banar, it tulun dit amu mangakun dino, amu notudukan dit Tatod do Kinoringan, ino-i-nga notudukan dit iso mantad dit tumpug do rogon dit sokutu dit Anti-Kristus. Baya norongow duyu no dot rumikot it Misingko-Raja Maanalamat, it reetan dot Anti-Kristus, om maakaa diti, siti nod pomogunan it tongo rogon yo. 4:1-3 2Yoh 1:7

⁴Nga ikoo nopo oy tongo ponokaanak ku dit aa-ku koyuyuuan, Kinoringan ot sanganu dikoo. Nakala duyu no it tongo nabi dit maamalid diri, tu it Tatod Tosusi dit waro sinod dikoo, osundu mantad-ko it tongo rogon di Misingko-Raja Maanalamat dit waro sitid pomogunan diti. ⁵It tongo nabi diri, mantad sid pomogunan taraat diti, om it tongo tudukan doalo nga mantad-i sitid pomogunan taraat diti ot nimbulayon. Om iri no ot sabap dot it tudukan doalo diri, rongo’on babanar dit tongo tulun sitid pomogunan dit amu mimoyo di Tuhan Yesus. ⁶Nga itokow diti, Kinoringan ot sanganu. Isay nopo tulun dot kotutun do Kinoringan, mokinongow daton. Nga it tulun dit okon-ko Kinoringan ot sanganu, amu mokinongow daton. Iri no ot pongintutunan tokow dot isay ot tulun dot notudukan di Tatod Tosusi dit Moonuduk dit babanar, om isay ot tulun dot notudukan dit rogon dit moomudut.

Kinoringan dino Otoluod

⁷Oy tongo koobpineeyan dit aa-ku koyuyuuan, mitotoluod tokow no, tu toluod dino, Kinoringan ot nontodonon. Isay nopo ot otoluod, najadi no dot tanak do Kinoringan om kotutun do Kinoringan. ⁸Isay nopo ot amu otoluod, amu kotutun do Kinoringan, tu Kinoringan dino otoluod. ⁹Iti no ot gama do Kinoringan pembulay dit toluod Yo sid daton: Sinuu Yo mongoy sitid pomogunan it Tanak Yo dit iso no, supaya kaanu tokow dot koposiyon tototog mantad sid Dialo. ¹⁰Iti no ot komoyoon dot toluod: Okon-i-ko itokow po ot minonoluod do Kinoringan, ino-i-nga i Kinoringan ot minonoluod daton, sampay sinuu Yo it Tanak Yo mongoy sitid pomogunan jumadi dot pangaraa, supaya oompunan it tongo duso tokow.

¹¹Oy tongo koobpineeyan dit aa-ku koyuyuuan, pagka ugu dino ot poonoluod do Kinoringan daton, itokow nga apatut-i dot mitotoluod. ¹²Tu aso pot îiso tulun dot nokokito do Kinoringan. Nga ong mitotoluod tokow, miso nôono i Kinoringan sid daton, om aawi-awi it ginawo tokow monoluod dit tulun wookon ugu-ko it poonoluod do Kinoringan sid daton. 4:12 Yoh 1:18

¹³Iti no ot pongila’an dot nokeeso tokow no do Kinoringan, om i Kinoringan nga nokeeso no daton, tu nakataak no do Kinoringan it Tatod Tosusi Yo sid daton. 4:13 1Yoh 3:24 ¹⁴Yokoy kondiri ot nakamato dit Tanak do Kinoringan dino, om sumasi okoy dot Yalo dino, sinuu do Kinoringan rumikot sitid pomogunan dot jumadi dot Maanalamat. ¹⁵Isay nopo ot mangakun dot Tanak do Kinoringan i Yesus, nokeeso no i Kinoringan dit tulun dino, om it tulun dino nga nokeeso no do Kinoringan. ¹⁶Nela’an tokow no om mimoyo tokow dot babanar-ko monoluod daton i Kinoringan. Tu i Kinoringan dino otoluod. Isay nopo ot aso putut monoluod dit sandad yo, it tulun dino, nokeeso no do Kinoringan, om i Kinoringan nga nokeeso-i dialo.

¹⁷Jadi, ong mitotoluod tokow, iri not tanda dot aawi-awi it ginawo tokow monoluod do Kinoringan. Om kosoromo tokow nôono babanar tumoguwang do Kinoringan tiya dit tadlaw dot pongukuman do pomogunan. Andang-ko sumiow tokow, tu it kobubuatano tokow sitid pomogunan ugu-ko it kobubuatano di Kristus. ¹⁸Tulun nopo dit nokopurimon dit toluod do Kinoringan, aso no ot koorosiyan. Pagka tu aawi-awi it ginawo do Kinoringan monoluod daton, aso no ot ikorosi tokow Dialo. Tu it ikorosi dot tulun, mangan ukumo. Jadi, ong kakal tokow po rumosi dot ukumon, komoyoon, amu tokow po nokopurimon dit toluod Yo.

¹⁹Sagay monoluod tokow do Kinoringan om tulun wookon, nokopogulu no i Kinoringan monoluod daton. ²⁰Bang warot tulun momoros dot, “Monoluod oku-i do Kinoringan,” ka, nga sunduy sumana-i dit tobpinee yo, inot tulun dino, moomudut. Ong amu yo toluodon it tobpinee yo dit okito yo-i, sâampod po i Kinoringan dit amu yo okito om toluodon yo no! ²¹Jadi, iti no ot nisuu di Kristus sid daton: Isay nopo ot monoluod do Kinoringan, subay monoluod dit tobpinee yo sandad Kristian.

Koosipan ot Kakala dot Karaatan do Pomogunan

¹Isay nopo ot mimoyo, dot i Yesus ot Raja Maanalamat it sinuu do Kinoringan, inot tulun dino, najadi no dot tanak do Kinoringan. Om isay nopo ot monoluod dit Tama, monoluod-i dit tongo tanak Yo. ²Irad diti ot pongila’an tokow dot babanar-ko monoluod tokow dit tongo tanak do Kinoringan: Monoluod tokow do Kinoringan om maya tokow dit tongo pinonuu’an Yo. ³Tu komoyoon nopo dot monoluod do Kinoringan, maya dit tongo pinonuu’an do Kinoringan. Om it pinonuu’an Yo diri amu tokow-i awagatan. 5:3 Yoh 14:15; Mat 11:28-30 ⁴Tu, titikid dit tulun dit najadi no dot tanak do Kinoringan, kakala dit karaatan do pomogunan. It pangala dit karaatan ditit pomogunan, ino-no it koosipan tokow. ⁵Isay po wookon ot kakala dot karaatan do pomogunan, sumala-ko it tulun dit mimoyo, dot i Yesus dino Tanak do Kinoringan?

I Yesus dino Tanak do Kinoringan dit Nosiliw dot Tulun Banar

⁶I Yesus Kristus nopo dino, Tanak do Kinoringan dot rinumikot sitid pomogunan.5:6 I Yesus Kristus nopo dino, Tanak do Kinoringan dot rinumikot sitid pomogunan. Harfiah: Yalo no ot rinumikot dot weeg om raa ot waya’an. Kalu ong waro dati ot guru dot maamalid ot momoros dot, it amu po nopodsu i Yesus, okon-po-ko Tanak do Kinoringan Yalo, ino-i-nga tulun komimiiyo dit amu osundu. Nopodsu no Yalo, om najadi nogi dot Tanak do Kinoringan kabarasan. Om it amu po minatay Yalo, minuli sid surga it “Kristus surgawi” dit sinumarung sid koyuwan Yo, om najadi nôono kembagu Yalo dot tulun komimiiyo kabarasan. Nga komoyoon di Yohanes: it tomodon nopo di Kristus rumikot sitid pomogunan, ino-no, matay sid salip. Jadi ii-nopo it kinopomodsuan Yo diri, iso ot upacara mangarasmi dit kotimpuunan Yo papanaw dit tugas Yo. Om waro-i ot tulun manganggap dot it weeg om it raa dit kinomoy di Yohanes, ino-no it rinaat dit sinumoliwan mantad sid tobik di Yesus, tiya dit minangan toboko dot tandus it bangkay Yo (intangay sid Yoh 19:34). Jadi siti, atarang no babanar dot i Kristus no diri it pinodsu dot weeg, om it pinatay.Tu Yalo no it pinodsu dot weeg om it nopuraa’an sid salip. Jadi, atarang babanar dot Yalo dino Tanak do Kinoringan, tu okon-ko gisom minangan no podsuo, ino-i-nga minangan po patayo. Om it Tatod Tosusi nga pinabanar-i dot i Yesus dino Tanak do Kinoringan. Om it binoros dit Tatod Tosusi dino, andang babanar. ⁷Warot tolu ot sasi dot Tanak do Kinoringan i Yesus, ino-no, ⁸i Tatod Tosusi, it weeg om it raa; inot tolu ot sasi dino, miinong-i ot kososiyan. ⁹Na, it kososiyan dot tulun, imoyo’on tokow, nga ingko-papatog dit dang Kinoringan dot kososiyan. Tu it kososiyan nopo do Kinoringan, i Yesus dino, Tanak Yo. ¹⁰Jadi isay nopo ot mimoyo dot i Yesus dino Tanak do Kinoringan, nokosokot sid ginawo yo it kososiyan diri. Nga isay-isay ot amu mimoyo do Kinoringan, pookowudut do Kinoringan, tu inot tulun dino, amu mimoyo dit kososiyan do Kinoringan ontok-ko it Tanak Yo. ¹¹Iti neet kososiyan do Kinoringan: Tinaakan tokow do Kinoringan dot koposiyon tototog, dot sid Tanak Yo ot puun do koposiyon tokow. 5:11 Yoh 3:36 ¹²Isay nopo ot nokeeso dit Tanak do Kinoringan, ino no ot kaanu dit koposiyon tototog diri; om isay nopo ot amu nokeeso dit Tanak do Kinoringan, amu kaanu dit koposiyon tototog diri.

Ayakin Tokow dot Kaanu Tokow dit Koposiyon Tototog

¹³Kinoponulisan ku nopo ditit surat kumaa sid dikoo, it mimoyo dit Tanak do Kinoringan, supaya ela’an duyu dot nasanganu duyu no it koposiyon tototog. ¹⁴Sagay kosoromo tokow-i tumoguwang do Kinoringan, tu mimoyo tokow dot tumboyo’on tokow-i Doo dit doa tokow, syukur ong kopionong dit kenginan Yo ot pokionuwon tokow. ¹⁵Pagka tu ela’an tokow dot kinongo’on tokow-i Doo ong mokianu tokow sid Doo, na, ela’an tokow-i dot nunu nopot pokionuwon tokow, taakan tokow-i Doo.

¹⁶Ong waro dit tobpinee nu sandad Kristian ot okito nu dot nakawaal dot duso, it okon-ko mongowit doo sid naraka, pintaduwa’ay yalo sid Kinoringan. Om taakan nôono yalo do Kinoringan dot koposiyon tototog. Komoyoon ku nopo, it tulun dit nakawaal dot duso dot okon-ko mongowit doo sid naraka. Nga warot duso dot sampay mongowit sid naraka; ong ino, amu oku momoros dot subay mangan duyu pintaduwa’ay. ¹⁷Nunu nopot karaatan, andang duso. Nga warot duso dot okon-ko sampay koowit sid naraka.

¹⁸Nela’an tokow no dot kikiawi dit tulun dit najadi no dot tongo tanak do Kinoringan, amu tumilombus mamaal dot duso, tu likupan dit Tanak do Kinoringan, om amu akasow yoalo dit tongo rogon. ¹⁹Nela’an tokow no dot Kinoringan ot sanganu daton, om ii-nopot tulun wookon sid pootongkop do pomogunan diti, nokuasa di Raja do Rogon. ²⁰Nga nela’an tokow no dot, nokorikot no sitid pomogunan it Tanak do Kinoringan dot minanaak daton dot pongoorotiyan, supaya kotutun tokow dit babanar-no-ko Kinoringan. Nokeeso tokow no dit babanar-no-ko Kinoringan, tu nokeeso tokow no dit Tanak Yo i Yesus Kristus; Yino no dino it babanar-no-ko Kinoringan om it puun dit koposiyon tototog.

²¹Oy tongo ponokaanak ku, insoduay duyu it tongo ponoko-kinoringan!