Титлы

¹ Гижö Павел, Енлöн кесйöг да Исус Кристослöн апостол. Менö мöдöдöма, мед отсавны Енлöн бöрйöмаяслы эскыны да тöдны збыльсö, медым эськö найö вермисны овны вежавидзöмöн ² да помтöм олöм вылö лачаöн. Помтöм олöмсö Ен кöсйысис му пуксьытöдзыс на, и Ассьыс кывсö Сiйö оз веж. ³ Ас кадö Сiйö сетiс тöдны кывсö бурвисьталöм пыр, та вылö менö и сувтöдiс. Тайö вöлi Ен Мездысьнымлöн тшöктöм. ⁴ Чолöмала тэнö, Тит. Öтувъя эскöманым тэ меным збыльысь пи кодь. Бурсетöм, буралöм да лöнь олöм тэныд Ен Батьсянь да миян Мездысь Исус Кристос Господьсянь. ⁵ Ме коли тэнö Критö, мед тэ эштöдiн сэнi помавтöмторсö да быд карын индiн вичкоса юрнуöдысьясöс, кыдзи тай ме тэныд тшöктылi. ⁶ Юрнуöдысь мед вöлi бур оласнога, öти гöтыра, ныв-пиыс мед эскисны, быдторйын кывзысисны да лэдзчысьöмöн эз овны, на йылысь мед эз кыв лёк сёрни. ⁷ Вичкоса веськöдлысьöн вермö лоны сöмын бур оласнога морт, öд сылы сетöма вöчны Енлысь удж. Мед сiйö эз вöв асныра, эз вöв дöзмысь, эз ю, эз усьлась мукöд вылö, аслыс эз курав, ⁸ ветлысь-мунысьöс мед сибöдiс, бурсö радейтiс, вöлi сюсь вежöра, быдторйын веськыд, вежавидзысь да кужис асьсö кутны. ⁹ Сiйö мед вöлi зумыда кутчысьöма велöдöмыслöн збыль кывъясö, кужис веськыд велöдöмнас туйдöдны мукöдöс да вермис янöдны паныд мунысьöс. ¹⁰ Öд унаöн аснырасьöны, ковтöмсö сёрнитöны да мукöдсö пöрйöдлöны, и унджыкыс найö вундыштчöмаяс пöвстысь. ¹¹ Татшöмъясыслысь колö тупкыны вомсö. Яндысьтöм горшлунныс вöсна найö асланыс велöдöмöн шöйöвоштöны дзонь керкаяс, мыйö оз ков велöдöны. ¹² Налöн асланыс гижысьыс весиг шулöма: – Критсаяс – пöръясьысьяс, скöр понъяс, горш кöинъяс да дыш руньöяс. ¹³ Веськыда шуöма. Та вöсна чорыда янöд татшöм йöзсö, медым налöн эскöмыс вöлi веськыд. ¹⁴ Найö мед оз кывзыны юдейяслысь мойдъяссö да йöзлысь ас лöсьöдöм тшöктöмъяссö. Татшöм йöзыс öд кежöмаöсь збыльсьыс. ¹⁵ Сöстöмлы ставыс сöстöм, а пежасьöмалы да эскытöмлы нинöм абу сöстöм. Налöн пежасьöма вежöрыс, весиг сьöлöмыс. ¹⁶ Найö шуöны, тöдам пö Енсö, но уджыс налöн мöдтор йылысь висьталö. Найö мустöмöсь, кывзысьтöмöсь и бурсö вöчны оз сяммыны.

¹ Тэ висьтавлы веськыд велöдöмыслы лöсяланасö. ² Олöма айуловöс велöд лоны авъяöн, садь да сюсь вежöраöн. Мед найö топыда кутчысясны эскöмас, муслунас да зумыдлунас. ³ Олöма аньяс мед оласны вежавидзöмöн, оз суклясьны, вина оз юны, туйдöдасны томджыкъясöс бурас, ⁴ велöдасны найöс радейтны верöснысö да ныв-писö, ⁵ медым эськö том аньяс вöлiны сюсь вежöраöсь, сöстöм сьöлöмаöсь, шаньöсь, мед тöждысясны гортныс вöсна да кывзысясны верöсныслысь. Сэки Ен Кывсö оз ло омöльтöма. ⁶ Зонъясöс тшöтш велöд лоны сюсь вежöраöн. ⁷ Вöч быд бурсö, мед мукöдыс тэ вылö видзöдöмöн тшöтш велаласны татчö. Велöд сöстöм сьöлöмöн, вежавидзöмöн да Кывсö торкавтöг. ⁸ Сёрнит веськыда да тырвыйö эскöд, медым паныд мунысь яналас да оз вермы шуны миян йылысь нинöм лёксö. ⁹ Кесйöгъяс мед быдторйын кывзысясны асланыс ыджыдныслысь, зiлясны кывшутöг шогмыны сылы. ¹⁰ Мед оз гусясьны, мöдарö, быдторйын мед петкöдласны, мый налы позьö тырвыйö эскыны. Сэки на пыр пыдди пуктöма лоö Ен Мездысьнымлысь велöдöмсö. ¹¹ Енмыс петкöдлiс Ассьыс буралöмсö, медым став йöзсö мездыны. ¹² Буралöмыс велöдö миянöс, мед ми эновтчим Ентöг олöмсьыс да быдпöлöс мувывса ыштöмсьыс, вöлiм сюсь вежöраöсь тайö нэмас, олiм веськыда да вежавидзöмöн, ¹³ виччысим вына Енлысь да миян Мездысь Исус Кристослысь дзирдлуна воссьöмсö да шуда лачанымлысь збыльмöмсö. ¹⁴ Кристос сетiс Асьсö миян вöсна, медым мездыны миянöс быд лёксьыс, сöстöммöдны миянöс да торйöдны Аслыс войтырöс, кодi сьöлöмсяньыс пондас вöчны бурсö. ¹⁵ Тадзи велöд, ышöд да янöд тэныд сетöм вынöн. Эн сет асьтö некодлы увтыртны.

¹ Казьтыв эскысьяслы, медым кывзысясны юралысьяслысь да пуктöм йöзлысь, пыдди пуктасны налысь веськöдлöмсö да лоасны дасьöсь вöчны быд бурсö. ² Мед оз омöльтны некодöс, зыкö оз пырны, лоасны шаньöсь да быдöнкöд рамöсь. ³ Ми öд асьным коркö вöлiм вежöртöмöсь да кывзысьтöмöсь, вошöмаöсь олöмас, сетчöмаöсь ыштöмас да быдпöлöс ковтöм гажöдчöмас. Олiм лёк пытшкас, вежалiм, вöлiм мустöмöсь, да мукöдсö тшöтш мустöмтiм. ⁴ Но Ен Мездысьным петкöдлiс миян дiнö Ассьыс бурлунсö да муслунсö. ⁵ Сiйö мездiс миянöс. Мездiс эз веськыд уджъясным серти, но Аслас буралöмыс вöсна. Ен мыськалiс миянöс да сетiс миянлы выльысь чужны. Сiйö выльмöдiс миянöс Вежа Ловнас. ⁶ Исус Кристос Мездысьным пыр Сiйö лышкыда кисьтiс миян пытшкö Вежа Ловсö, ⁷ медым Сылöн буралöмсянь ми лоим веськыдöсь да миянлы вичмис помтöм олöм. Тайö и эм миян лачаным. ⁸ Тайö кывъясыс эсканаöсь. Ме кöсъя, мед тэ тöдчöдöмöн пыр казьтылiн тайöс, медым Енлы эскысьяс тöждысисны бурсö вöчны. Тайö бур да йöзыслы колана. ⁹ Тöлктöм вензяна сёрниысь, ордпу да Индöд кузя зыксьöм-пинясьöмысь ылыстчы. Ставыс тайö ковтöмтор да весьшöрö. ¹⁰ Ылöгас кежöдысьöс öтчыд да мöдысь öлöдöм бöрын эновт. ¹¹ Тöд, татшöм мортыс тшыкöма, мыж вöчöмнас сiйö ачыс асьсö мыждöм улас сюйö. ¹² Артемöс либö Тихикöс кор мöдöда тэ дiнö, тэрмась волыны ме дiнö Никопольö. Сэнi тай шуи тöвйынысö. ¹³ Отсав петны туйö оланпас тöдысь Зинейлы да Аполослы, медым налы ставыс вöлi судзсяна-тырмана. ¹⁴ Миян эскысьяс мед тшöтш велöдчасны бурсö вöчны, сетны колана отсöг, сэки найö вотöстöг оз кольны. ¹⁵ Чолöм тэныд ыстöны танi ставныс. Висьтав чолöм миянöс радейтысь эскысь чой-воклы. Енлöн буралöмыс ставныдкöд тiянкöд. Аминь.