Римö

Римö

¹ Гижö Павел, Исус Кристослöн кесйöг, Енмöн корöм апостол. Менö бöрйöма висьтавлыны Енлысь Бур Юöрсö. ² Тайö Юöрыс йылысь Енмыс важысянь кöсйысьöма Аслас пророкъяс пыр вежа Гижöдъясын. ³ Бур Юöрас висьтавсьö Сылöн Пи йылысь, кодi чужис мортöн да вöлi Давид чужанвужйысь. ⁴ Кулöмысь ловзьöмнас Сiйö воссис Вына Ен Пиöн да Ловсянь вежаöн. Сiйö – Исус Кристос, миян Господь. ⁵ Сы пыр ми босьтiм бурсетöмсö: апостолавны Кристос ним вöсна, медым вайöдны быд кыла войтырöс эскöмас да Енлы кывзысьöмас. ⁶ Тайö войтыр лыдö пыранныд тшöтш тi, Исус Кристосöн корöмаяс. ⁷ Ставныдлы, Римын олысьяслы, буралöм да лöнь олöм Ен Батьнымсянь да Господь Исус Кристоссянь. Енмыслы тi мусаöсь, тi Сылöн корöм вежа войтыр. ⁸ Медводз, Исус Кристос нимöн аттьöала Енмöс ставсьыныд, öд тiян эскöм йылысь висьталöны став му пасьталаыс. ⁹ Енмыс аддзö, мый ме став сьöлöмöн кесъяла Сылы, висьтала Пиыс йылысь Бур Юöр да пыр казьтывла тiянöс кевмысигъясöн. ¹⁰ Быдпöрйö кевма Енлы, медым коркö верми волыны тiян дiнö, но тайö мед Сылöн кöсйöм серти вöлi. ¹¹ Ёна кöсъя аддзöдчывны тiянкöд да юксьыштны Ловсянь бурсетöмöн, медым ёнмöдны тiянöс. ¹² Тадзи ми ышöдам öта-мöдöс эскöмнаным: ме – тiянöс, а тi – менö. ¹³ Вокъяс, тöдöй: ме унаысь лöсьöдчывлi волыны тiян дiнö, но пыр кутшöмкö мытшöдъяс паныдасьöны. Мукöд войтыр пöвстын моз тшöтш тiянын ме кöсъя аддзыны бурвисьталöмлысь вотöссö. ¹⁴ Ме уджйöза грекъяслы и варваръяслы, вежöраяслы и вежöртöмъяслы. ¹⁵ Ёна кöсъя висьтавны Бур Юöрсö тшöтш тiянлы, Римын олысьяслы. ¹⁶ Ме ог яндысь висьтавлыны Кристослысь Бур Юöрсö, öд сiйö Енлöн выныс, мездö быд эскысьöс: медводз юдейясöс, сэсся грекъясöс. ¹⁷ Бур Юöрыс восьтö Енлысь веськыдлунсö эскöмсянь да эскöм пыр. Гижöма: «Веськыда олысь эскöмнас пондас овны». ¹⁸ Йöзлöн Ентöг олöм да лёк вöчöм вылö лэччö енэжсянь Енлöн скöрлуныс, öд найö лёк вöчöмнас пöдтöны збыльсö. ¹⁹ Найö тöдöны Ен йылысь тöдны позянасö, öд тайöс налы Енмыс восьтiс. ²⁰ Му пуксьöмсяньыс Енлöн став вöчöмторйысь позьö аддзыны тыдавтöмсö: Енлысь помтöм вынсö да Сылысь енмалунсö. Та вöсна налы дорйысьнысö нинöмöн. ²¹ Но Енсö тöдiгöн найö эз пуктыны Сiйöс Ен туйö да эз аттьöавны Сiйöс, мöвпалiсны ковтöмсö да налöн вежöрыс пемдiс. ²² Асьнысö мывкыдаöн шуигöн вежöртöмъясö пöрины. ²³ Пыр олысь Енмöс нимöдöм пыдди пондiсны юрбитны быранаыслы: морт, лэбач, пемöс да веглясьысь сяма вöчöмторъяслы. ²⁴ Та вöсна Енмыс колис найöс асланыс лёкколöмö. Ыштöмнаныс найö пежалiсны ассьыныс вир-яйсö, ²⁵ Енлысь збыльсö бергöдiсны пöръясьöмö, юрбитiсны вöчöмторъяслы, а эз Ставсöвöчысьлы. Ошкöм Сылы нэмъяс чöж! Аминь. ²⁶ Та вöсна Ен эновтiс найöс янöдана ыштöмас. Найö пондiсны овны мöдарö: нывбаба пондiс узьлыны нывбабакöд, ²⁷ айулов эновтчис нывбабакöд узьлöмысь, öзйис лёкколöмöн öта-мöд дiнас да пондiс вöчны быдпöлöс зывöксö. Асланыс ылалöмысь найö босьтöны нин лöсялана водзöссö. ²⁸ Найö эз лыддьыны коланаöн тöдны Енсö, та вöсна Ен колис найöс торксьöм вежöрас вöчны ковтöмторсö. ²⁹ Найö тырöмаöсь быдпöлöс ылöгнас да лёкнас. Кырсалöны, горшасьöны, лöгалöны, вежалöны, виöны, вензьöны, пöръясьöны да лёксьöны. ³⁰ Найö лёк сёрниаöсь, удтысьöны, Енсö мустöмтöны, мукöдöс дöзмöдöны, асьнысö вылö пуктöны да ошйысьöны. Найö зiльöсь лёксö вöчны, бать-мамныслысь оз кывзысьны, ³¹ найö мывкыдтöмöсь, кывсö оз кутны, оз бурасьны, кын сьöлöмаöсь да чорыдöсь. ³² Найö тöдöны Енлысь веськыда мыждöмсö, мый татшöмтор вöчысьöс виччысьö кулöм. Но та вылö видзöдтöг найö вöчöны лёксö, весиг ошкöны тадзи вöчысьясöс.

¹ Тöд, мортöй, мöдöс мыждiгöн тэныд оз сюр дорйысян кывйыд. Мöдöс мыждöмнад ачыд мыжман, öд ачыд тшöтш сы моз вöчан. ² Ми тöдам, мый Енмыс веськыда мыждö тадзи вöчысьясöс. ³ Мортöй, тэ чайтан, тадзи вöчысьöс мыждöмнад пышъян Енлöн мыждöмысь? Ачыд öд сiйö жö вöчан. ⁴ Гашкö, тэ нинöм туйö пуктан Енлысь ыджыд бурлунсö, мелiлунсö да терпитöмсö? Он öмöй гöгöрво, мый Енлöн бурлуныс вайöдö тэнö мыжъяссьыд бергöдчöмö. ⁵ Но чорыд сьöлöмыд вöсна тэ он кöсйы бергöдчыны мыжъяссьыд, тадзи ас вылад чукöртан Енлысь скöрлунсö. Сiйö киссяс тэ вылö Скöралан лунö Енмыслöн веськыда мыждiгöн. ⁶ Сэки Енмыс быдöнлы мынтас уджыс серти. ⁷ Помтöм олöм налы, кодъяс бур вöчöмнас мудзлытöг корсьöны бырлытöмсö, дзирдлунсö да нимöдöмсö. ⁸ Асьсö сöмын радейтысьясöс да збыляс пыдди ылöгас сетчысьясöс виччысьö чорыд скöрлун. ⁹ Ыджыд шог да сьöкыдалöм быдöнлы, кодi вöчö лёксö: медводз юдейлы, сэсся греклы. ¹⁰ Мöдарö, дзирдлун, нимöдöм да лöньлун быдöнлы, кодi вöчö бурсö: медводз юдейлы, сэсся греклы. ¹¹ Енмыс оз видзöд чужöм вылö. ¹² Мыжсö кö вöчöма Индöдсö тöдтöг, Индöдтöгыс и бырöдасны. Вöчöма кö мыжсö Индöдсö тöдöмöн, Индöд сертиыс и мыждасны. ¹³ Ен водзын веськыдöсь абу Индöдсö кывлысьяс, а сы серти олысьяс. ¹⁴ Мукöд войтырлöн Индöдыс абу, но Индöд нога вöчöмыс тыдалö налöн оласногысь. Найö асьныс аслыныс индöдыс. ¹⁵ Тайö петкöдлö, мый Индöдсö гижöма налöн сьöлöмас. Буретш та йылысь и висьталö налöн сьöлöмыс да мöвпъясыс, найö либö мыждöны, либö дорйöны найöс. ¹⁶ Но воас лун, кор Исус Кристос пыр Ен кутас мыждыны мортлысь гусяторъяссö. Та йылысь ме висьтавлi нин буръюöртiгöн. ¹⁷ Со, тэ шусян юдейöн, кутчысян Индöдас да ошйысян Енмöн. ¹⁸ Индöдсьыс тэ тöдмалiн Сылысь кöсйöмсö да велöдчин торйöдны медбурсö. ¹⁹ Индöдас гижöм збыльсö тöдöмнад тэ лыддян асьтö синтöмъясöс нуöдысьöн, пемыдас олысьяслы югыдöн, вежöртöмъясöс туйдöдысьöн да гöгöрвотöмъясöс велöдысьöн. ²¹ Мöдöс велöдан, а асьтö он велöд? ²² Тэ висьталан: «Гусясьны оз позь», ачыд гусясян. Шуан: «Гозъя олöмтö эн пежав», ачыд пежалан. Идолъясöс мустöмтан, ачыд налысь крамсö куштан. ²³ Ошйысян Индöднас, ачыд сiйöс торкалöмнад Енсö нинöмö пуктан. ²⁴ Гижöма: «Тiян вöсна ентöдтöмъяс омöльтöны Енлысь нимсö». ²⁵ Вундыштчöмыд бур, олан кö Индöдыс серти. Он кö ов Индöдыс серти, сэки тэнад вундыштчöмыд нинöм. ²⁶ Вундыштчытöм кö олö Индöд сертиыс, оз-ö сiйöс лыддьыны вундыштчöмаöн? ²⁷ Индöд серти олысь, кодi абу вундыштчöма, кутас мыждыны тэнö, вундыштчöмаöс да Индöд тöдысьöс, öд тэ торкалан Индöдсö. ²⁸ Юдейыд абу сiйö, кодi чужöма юдейöн, да вундыштчöмыд абу яй вылад вундыштöм пас. ²⁹ Юдейыд сiйö, кодi сьöлöмнас юдей. Вундыштöм пассö пуктöма сылы сьöлöмас абу Индöд серти, сiйöс Лов пуктöма. Татшöмыслы ошкöмыс лоö Енсянь, а оз мортсянь.

¹ Мый бурыс, тэ кö юдей? Мый сетö вундыштчöмыс? ² Унатор сетö, да быд боксянь бур. Медводз, налы вöлi сетöма Ен Кывсö. ³ На пöвстысь кö кодсюрö эз эскыны, налöн эскытöмысь öмöй бырö Енлöн эсканлуныс? ⁴ Дерт, оз. Енмыс эскана, а мортыс пöръясьысь. Гижöма: – Шуöмыд Тэнад веськыд, Аслад ёрд вылын Тэ верман. ⁵ Миян лёк вöчöм кö восьтö Енлысь веськыдлунсö, сэки мый миянлы шуны? Енмыс öмöй абу веськыд, кисьтö кö миян вылö Ассьыс скöрлунсö? Тадзи мортыс мöвпалö. ⁶ Дерт, тайö абу тадз. Енмыс кö оз ло веськыд, вермас-ö Сiйö мыждыны муюгыдсö? ⁷ Менам ылалöмысь кö тыдовтчö Енлöн збыльыс да Сiйöс ошкöмыс содö, сiдзкö, мыйла менö мыждынысö мыжаöс моз? ⁸ Гашкö, пондам вöчны лёксö, мед вöлi бур? Кодсюрö омöльтöны миянöс да шуöны, мый ми тадзи велöдам. Татшöмъяссö виччысьö веськыда мыждöм. ⁹ Сiдзкö, ми, юдейяс, бурджыкöсь öмöй мыйöнкö? Нинöмöн абу. Ме водзынджык нин висьтавлi: юдейяс, кöть грекъяс – ставныс мыжыслöн кипод улынöсь. ¹⁰ Гижöма: – Веськыда олысьыс весиг öти абу, ¹¹ абу гöгöрвоысьыс, некод оз корсь Енсö. ¹² Ставныс кежöмаöсь, öтитöг шогмытöмöсь, бурсö вöчысьыс весиг абу. ¹³ Горшныс налöн восьса гу, кыв вылас налöн сöмын пöръясьöм, льöб выланыс змей яд. ¹⁴ Вомныс курдöма ёрччöмысь, ¹⁵ кокныс тэрыб вир кисьтны, ¹⁶ ветлан туйыс налöн – бырöдöм да пикö воштöм. ¹⁷ Найö оз тöдны бурасян туйсö, ¹⁸ налöн абу Енсьыс полöмыс. ¹⁹ Ми тöдам, мый Индöдыс висьталö Индöд улын олысьяслы. Та вöсна некод оз вермы мыйкö паныд шуны, öд став муюгыдыс Ен мыждöм улын. ²⁰ Индöд серти уджъяс некодöс оз вöчны Ен водзас веськыдöн. Индöдыс сöмын восьтö мыжсö. ²¹ Öнi Индöд вылö видзöдтöг воссис Енлöн веськыдлуныс. Та йылысь висьталö Индöдыс да пророк гижöдъяс. ²² Исус Кристослы эскöм пыр сетöма веськыдлунсö быд эскысьлы, Енмыс некодöс оз торйöд. ²³ Öд ставныс мыжмисны да олöны Ен дзирдлунтöг. ²⁴ Но Сылöн буралöмсянь, дон мынтытöг найö лоöны веськыдöн, öд Исус Кристос став пыддиыс вештысис. ²⁵ Енмыс сетiс Кристосöс бурасян вись пыдди, Сылöн Вирыс мездö быдöнöс эскöм пырыс. Терпитöмнас Ен петкöдлiс Ассьыс веськыдлунсö: прöститiс йöзлысь важся мыжъяссö. Öнi Енмыс петкöдлö Ассьыс веськыдлунсö сыын, мый Сiйö Ачыс веськыд да вöчö веськыдöн Исуслы эскысьясöс. ²⁷ Сюрас-ö миян ошйысянторйыс? Оз. Сiйöс бырöдöма. Мыйöн? Индöд серти уджъясöн? Абу. Эскöмöн. ²⁸ Ми аддзам, мый мортсö веськыднас вöчö эскöмыс, а оз Индöд серти уджъясыс. ²⁹ Енмыс öмöй сöмын юдейяслöн Ен, абу-ö тшöтш мукöд войтырлöн? Дерт, тшöтш мукöд войтырлöн. ³⁰ Енмыс öти. Сiйö вундыштчöмаöс и вундыштчытöмöс вöчö веськыдöн эскöм пырыс. ³¹ Сiдзкö, мый артмö? Эскöмнаным ми бырöдам Индöдсö? Огö. Мöдарö, вынсьöдам.

¹ Мый шуам Öвраам батьным йылысь? Мый сiйö босьтiс олiгас на? ² Öвраамöс кö вöлi шуöма веськыдöн уджъясыс серти, сэки сiйö вермис тайöн ошйысьны, сöмын эз Ен водзын. ³ Гижöдас мый висьталöма? «Öвраам эскис Енлы, та вöсна Енмыс шуис сiйöс веськыдöн». ⁴ Уджалысьлы öд удждонсö оз козьнавны, а уджсьыс мынтöны. ⁵ Мортыс кö уджъястöг эскö Енмыслы, кодi Ентöг олысьöс вöчö веськыдöн, сэки сылысь эскöмсö Енмыс лыддьö веськыдлунöн. ⁶ Тадзи Давид лыддьö шудаöн сiйöс, кодöс уджъястöгыс Енмыс шуö веськыдöн: ⁷ – Шудаöсь найö, кодъяслысь вунöдöма став лёк вöчöмсö да вевттьöма мыжъяссö. ⁸ Шуда сiйö, кодлы Господь оз казьтышт мыжсö. ⁹ Шудаöн шуöмыс сöмын вундыштчöмаяслы али вундыштчытöмъяслы тшöтш лöсялö? Ми висьталам: «Öвраамöс вöлi шуöма веськыдöн эскöм вöснаыс». ¹⁰ Кор шуöма? Вундыштчытöдзыс либö вундыштчöм бöрас? Вундыштчытöдзыс. ¹¹ Вундыштöм пасыс Öвраамлы висьталiс, мый сiйö вундыштчытöдзыс на эскис, та вöсна лои веськыдöн. Тадзи Öвраам лои батьöн став вундыштчытöм эскысьыслы, медым и найö эскöм пырыс вермисны лоны веськыдöн. ¹² Сiйö бать тшöтш вундыштчöмаяслы, кодъяс эз сöмын вундыштчыны, но Öвраам батьным моз ветлöны эскöмыслöн туйöд, кытi ветлiс сiйö вундыштчытöдзыс на. ¹³ Ен кöсйысис сетны Öвраамлы да сысянь чужысьяслы муюгыдсö. Кöсйысис сылы эз Индöд серти олöм вöснаыс, но эскöм вöснаыс сiйö лои веськыдöн да. ¹⁴ Кöсйысьöмасö кö позис босьтны сöмын Индöд отсöгöн, сэки эскöмыс ковтöм да кöсйысьöмыс вынтöм. ¹⁵ А Индöдсö торкалöмысь лэччö Енлöн скöрлун. Эз кö вöв Индöдыс, эз вöв и Индöдсö торкалöмыс. ¹⁶ Кöсйысьöмыс подуласьö эскöм вылö, медым сiйö вöлi бурсетöмöн. Тадзи кöсйысьöмыс вына Öвраамсянь став чужысьыслы, абу сöмын Индöд улын олысьяслы, но и Öвраам моз эскысьяслы. Öвраам – ставнымлы бать. ¹⁷ Гижöма: «Ме пуктi тэнö уна войтырлы батьöн». Сiйö Ен водзын миянлы бать. Öвраам эскис Енлы, кулöмаöс Ловзьöдысьлы да вöвлытöмторсö олöмö Пöртысьлы. ¹⁸ Öвраамлöн эз нин вöв некутшöм лача, но сiйö эскис, мый лоас уна войтырлы на батьöн, да та дырйи эз вошты лачасö. Шуöма вöлi: «Унасьыс унаöн тэсянь чужасны!» ¹⁹ Öвраам эз лигышмун эскöмас, мед кöть и матö сё арöсалöн вир-яйыс ёна нин вöлi пöрысьмöма, и Сарра гöтырыслöн гырк пытшкöсыс вöлi нин шоймöма. ²⁰ Öвраам эз вошты эскöмсö, но падъявтöг эскис Енлöн кöсйысьöмö да ошкис Енмöс. Эскöмыс ёнмöдiс сiйöс. ²¹ Öвраам зумыда эскис, мый Енмыс вына пöртны олöмö Ассьыс кöсйысьöмсö. ²² Та вöсна сiйöс шуöма веськыдöн. ²³ "Сiйöс шуöма веськыдöн" кывъяссö гижöма абу сöмын Öвраам йылысь, ²⁴ тшöтш миян йылысь. Ен шуас веськыда олысьясöн тшöтш миянöс, эскам кö Сылы, Исус Господьнымöс Ловзьöдысьлы. ²⁵ Енмыс сетiс миян мыжъяс вöсна Кристосöс да ловзьöдiс Сiйöс, медым ми вöлiм веськыдöсь.

¹ Тадзи, эскöмным вöсна миянöс шуöма веськыдöн да Исус Кристос Господьным пыр миян эм Енкöд бурасьöм. ² Эскöмным пыр Кристос восьтiс миянлы Ен буралöмö öдзöссö. Буралöмас олiгöн ми лача кутöмöн нимкодясям, öд лоам Енлöн дзирдлунас. ³ Сьöкыдсö нуигöн тшöтш нимкодясям, öд тöдам: сьöкыдсö нуöмыс чужтö зумыдлун, ⁴ зумыдлуныс – сьöкыдсö венöм, сьöкыдсö венöмыс – лача. ⁵ А лачаыс миян абу весьшöрö, öд Ен сетiс миянлы Вежа Ловсö да Сы пыр кисьтiс сьöлöманым Ассьыс муслунсö. ⁶ Кор на ми вöлiм жебöсь, индöм кадö Кристос кулiс ми коддьöм Ентöг олысьяс вöсна. ⁷ Öдвакö, кодкö сетас олöмсö веськыда вöчысь вöсна. Гашкö, бурсö вöчысь вöсна и вермас на сетны олöмсö. ⁸ Но кор ми олiм мыжас на, Кристос кулiс миян вöсна. Тайöн Енмыс петкöдлiс миян дiнö Ассьыс муслунсö. ⁹ Öнi Кристослöн Вирыс пыр миянöс шуöма веськыдöн, сiдзкö, дерт нин, Кристос пыр ми мынам локтана скöрлунысь. ¹⁰ Ми кö, Енмыслы коркöя паныд мунысьяс, бурасим Сыкöд Пиыслöн кулöм пыр, дерт нин, öнi ми, бурасьöмаяс, мездмам Кристослöн олöм пыр. ¹¹ Но тайö абу на ставыс. Ми нимкодясям нöшта Енмöн, öд Исус Кристос Господьным пыр миян эм Енкöд бурасьöм. ¹² Öти морт пыр муюгыдас пырис мыжыс, мыжнас – кулöмыс. Тадзи кулöмыс вуджис быд морт вылö, öд ставныс мыжмисны. ¹³ Дерт, Индöдсö сеттöдз мыжыс вöлi нин муюгыдас, но Индöдтöгыс мыж вöчöмыс оз лыддьыссьы мыжöн. ¹⁴ Кулöмыс ыджыдалiс Адамсянь Мöисейöдз. Ыджыдалiс весиг на вылын, кодъяс эз вöчны Адам моз мыжсö. Адам вöлi Локтысьыслöн пертас. ¹⁵ Бурсетöмыс öд абу мыж вöчöмыс кодь. Öти мортлöн мыжыс кö вайис ставныслы кулöм, дерт нин, öти морт пыр, Исус Кристос пыр, дзик ставныслы да уна пöвстöн вичмас Енлöн буралöмыс да бурсетöмыс. ¹⁶ Бурсетöмсö оз позь öткодявны öтилöн мыж вöчöмкöд. Öд öтилöн мыж вöчöм вöсна локтiс мыждöм, а уналöн мыж вöчöм вöсна сетöма буралöм. Буралöмыс вöчö мортсö веськыдöн. ¹⁷ Öтилöн мыж вöчöм вöсна кö пондiс ыджыдавны кулöм, сэки, дерт нин, öти морт пыр, Исус Кристос пыр, Енсянь ыджыд буралöмсö да веськыдлунсö босьтысьяс пондасны ыджыдавны олöмас. ¹⁸ Öтилöн мыж вöчöм вöсна кö мыждöма став мувывса йöзсö, тадзи öтилöн веськыда вöчöм вöсна став йöзсö шуöма веськыдöн да сетöма налы олöм. ¹⁹ Öтилöн кывзысьтöм вöсна кö ставöн лоисны мыжаöсь, тадзи öтилöн кывзысьöм вöсна ставöн лоасны веськыдöсь. ²⁰ Индöдсö сетöма, медым петкöдлыны, кутшöм уна мыж вöчöмыс. Кöнi мыж вöчöмыс уна, сэнi ёнджыка на петкöдчö буралöмыс. ²¹ Кыдзи мыжыс ыджыдалiс да кыскис кулöмас, тадзи буралöмыс тшöтш пондас ыджыдавны веськыдлуннас да вайöдас миянöс Исус Кристос Господьным пыр помтöм олöмас.

¹ Мый нö шуам? Пондам-ö водзö овны мыжас, медым буралöмыс содiс? Дерт, огö. ² Ми кулiм мыжыслы, позьö öмöй водзö овны мыжас? ³ Онö öмöй тöдöй, мый ми ставным пыртчиганым йитчим Кристоскöд да Сылöн кулöмкöд? ⁴ Пыртчöмнаным ми кулiм Кристоскöд да миянöс вöлi гуалöма Сыкöд. Но Батьыслöн дзирдлунöн Кристосöс вöлi ловзьöдöма, та вöсна, ми тшöтш вермам овны выль олöмöн. ⁵ Ми кö йитчим Сылöн кулöмкöд, сiдзкö, йитчам тшöтш Сылöн ловзьöмкöд. ⁶ Ми тöдам: миянлысь важ мортсö тувъялöма Кристоскöд, медым тайö мыжа вир-яйыс эз нин ыджыдав, и ми эгö нин вöлöй мыжыслöн кипод улынöсь. ⁷ Öд кодi кулiс, сiйö мынiс мыжыслöн кипод улысь. ⁸ Ми кö кулiм Кристоскöд, эскам, мый пондам и овны Сыкöд. ⁹ Ми тöдам: ловзьöм бöрас Кристос оз нин кув, öд кулöмыс Сы вылын оз нин ыджыдав. ¹⁰ Сiйö кулiс мыжыслы öтчыдысь да пыр кежлö. Öнi Сiйö ловъя да олö Енмыслы. ¹¹ Тадзи тi, миян Господь Исус Кристос пытшкын олысьяс, лыддьöй асьнытö мыжыслы кулöмаöн, а Енмыслы ловъяöн. ¹² Энö лэдзöй мыжсö ыджыдавны тiян кулана вир-яйын да ыштöдны тiянöс аслас лёк кöсйöмъясöн. ¹³ Вир-яйныдлысь весиг öти юкöн энö сетöй мыжыслы лёксö вöчöм вылö. Öнi тi – кулöмысь ловзьöмаяс. Сiдзкö, сетöй асьнытö да вир-яйныдлысь быд юкöн Енмыслы, мед вöчны веськыд уджъяс. ¹⁴ Мыжыс оз вермы ыджыдавны тiян вылын, öд тi буралöм улынöсь, абу Индöд улынöсь. ¹⁵ Мый артмö? Ми кö абу Индöд улынöсь, а буралöм улынöсь, пондам-ö вöчны лёксö? Огö. ¹⁶ Тi öмöй онö тöдöй: кодлы тi сетанныд асьнытö кесъявны, сылöн тi и кесйöгъяс. Кывзысянныд кö мыжыслысь – куланныд, Енмыслысь кö кывзысянныд – веськыдöн лоанныд. ¹⁷ Ошкöм Енлы, öд коркö тi вöлiнныд мыжыслöн кесйöгъяс, öнi кывзысьöмöн став сьöлöмнад кутчысянныд тiянлы висьталöм велöдöмас. ¹⁸ Мыжысь мынöм бöраныд тi лоинныд веськыдлуныслöн кесйöгъяс. ¹⁹ Ме сёрнита тiянкöд быдлунъя олöмсьыс босьтöм кывъясöн, медым тi верминныд гöгöрвоны менö. Водзын кö тi вир-яйныдлысь быд юкöн сетiнныд пежыслы вöчны лёк уджъяс, öнi быд юкöн сетöй веськыдлуныслы вöчны вежа уджъяс. ²⁰ Мыжыслы кесъялiганыд тi энö вермöй кесъявны веськыдлуныслы. ²¹ Кутшöм вотöс тi сэки чукöртiнныд? Öнi сыысь весиг аслыныд яндзим, öд сiйö вайö кулöм. ²² Тi мынiнныд мыжсьыс, öнi тi Енлöн кесйöгъяс. Тiян вотöсныд – вежалун, и тайö вайöдас тiянöс помтöм олöмö. ²³ Мыжыс öд мынтысьö кулöмöн, а Енмыс – помтöм олöмöн миян Мездысь Исус Кристос пыр.

¹ Вокъяс, висьтала тiянлы, Индöдсö тöдысьяслы. Тi бура тöданныд, мый Индöдыс вына морт вылын ловъя дырйиыс. ² Верöс сайö петöм аньöс Индöдыс кöрталö ловья верöсыскöд. Верöсыс кö кулö, сiйö мынö кöрталан Индöдсьыс. ³ Ловъя верöс дырйиыс кö петас мöд сайö, лоö гозъя олöмсö пежалысьöн. Верöсыс кö кулö, сiйö мынö гозъя олöм индöдсьыс. Сэки петас кö мöд сайö, оз ло гозъя олöмсö пежалысьöн. ⁴ Тадзи тшöтш тiянкöд, вокъясöй: Кристос вир-яйö йитчöмнаныд тi кулiнныд Индöдыслы да лоинныд Мöдыслöн, кулöмаясысь Ловзьысьыслöн, медым вайны Енлы вотöс. ⁵ Тшыкöм вир-яйын олiганым лёк кöсйöмыс ыджыдалiс миян пытшкын Индöдыс отсöгöн, сэки ми вайим вотöс кулöмыслы. ⁶ Öнi ми кулiм Индöдыслы, мынiм сылöн став кöртöдысь. Ми кесъялам Енмыслы выль ногöн, Лов серти, а огö важ мозыс, Индöдлöн шыпас серти. ⁷ Мый шуам татчö? Индöдыс öмöй мыжыс? Дерт, абу. Индöдыс восьтiс меным мыжсö. Индöдыс кö эз висьтав: «Эн ышты», ме эськö эг и гöгöрволы ыштöмсö. ⁸ Тадзи мыжыс Индöдысь тшöктöмсö босьтöмöн кыпöдiс ме пытшкын быдпöлöс ыштöмсö. Мыжыс öд Индöдтöгыс кулöма. ⁹ Водзынсö ме олi Индöдсö тöдтöг, но Индöдысь тшöктöмсö кор кылi, сэки мыжыс ловзис, ¹⁰ а ме кулi. Тадзи олöмсö сетысь Индöдыс вайис меным кулöм. ¹¹ Индöдлöн тшöктöмыс пыр мыжыс кежöдiс менö да виис сы отсöгöн. ¹² Но Индöдыс вежа, тшöктöмыс тшöтш вежа, веськыд да бур. ¹³ Сiдзкö, бурыс вайис меным кулöмсö? Эз. Мыжыс вайис. Сiйö веськöдiс бурсö, мед вины менö. Тадзи мыжыс восьтiс ачыс асьсö, и тшöктöмыс пыр ми аддзим мыжсö лёксьыс-лёкöн. ¹⁴ Ми тöдам: Индöдыс Ловсянь, а менö, тшыкöм вир-яйын олысьöс, вузалöма мыжыслы. ¹⁵ Ачым ог гöгöрво, мый вöча: кöсъянасö ог вöч, а мустöмсö вöча. ¹⁶ Вöча кö сiйö, мый ог кöсйы, сэки гöгöрвоа, мый Индöдыс бур вылö. ¹⁷ Збыльвылас, ог ме тайöс вöч, но ме пытшкын олысь мыжыс вöчö. ¹⁸ Тöда, мый ме пытшкын, менам тшыкöм вир-яйын, бурыс абу. Бурсö вöчны кöсйöмыс эм, но сiйö оз артмы. ¹⁹ Бурсö кöсъя да, ог вöч, лёксö ог кöсйы да, вöча. ²⁰ Ме кö вöча кöсйытöмсö, сiдзкö, сiйöс ог нин ме вöч, но ме пытшкын олысь мыжыс вöчö. ²¹ Казяла ас пытшкысь татшöм индöд: кöсъя кö вöчны бурсö, менам артмö лёкыс. ²² Менам пытшкöсса мортыс нимкодьпырысь сибöдö Енлысь Индöдсö, ²³ но вир-яйысь ме аддза мöдпöлöс индöд. Сiйö паныд сувтö пытшкöсса индöдлы да кöрталö менö вир-яйын олысь мыжыслöн индöдöн. ²⁴ Коньöр ме морт! Кодi мездас менö тайö кулана вир-яйсьыс? ²⁵ Аттьöала Енмöс миян Господь Исус Кристосысь! Тадзи менам пытшкöсса мортыс кывзысьö Ен Индöдлысь, а тшыкöм вир-яйыс – мыжыслöн индöдлысь.

¹ Сiдзкö, öнi абу некутшöм мыждöм Исус Кристос пытшкын олысьяслы, кодъяс олöны Лов серти, а оз вир-яй серти. ² Öд Ловлöн индöдыс, кодi сетö олöм Исус Кристос пытшкын, мездiс менö мыжыслöн да кулöмыслöн индöдысь. ³ Ен вöчис сiйö, мый эз вöв вермана Индöдыслы, öд мортлöн тшыкöм вир-яй вöсна Индöдыс вöлi вынтöм. Миян мыжъяс вöсна Енмыс мöдöдiс Ассьыс Писö мыжа морт кодьöн. Тадзи морт вир-яйын Сiйö мыждiс мортлысь мыжсö, ⁴ медым Индöдас висьталöм веськыдлуныс збыльмис миян пытшкын, кодъясöн веськöдлö Лолыс, а оз вир-яйыс. ⁵ Вир-яй серти олысьлöн – тшыкöм мöвпъяс, а Лов серти олысьлöн – Ловсянь мöвпъяс. ⁶ Вир-яйсянь мöвпалöмыд вайö кулöм, а Ловсянь мöвпалöмыд сетö олöм да лöньлун. ⁷ Вир-яйсянь мöвпалöмыд эм Енлы паныд мунöм. Татшöм мортыс оз сетчы Ен Индöдлы, да и оз вермы. ⁸ Вир-яй серти олысьяс Енмыслы оз шогмыны. ⁹ Тiян пытшкын кö збыльысь олö Енлöн Лолыс, сiдзкö, тi Лов веськöдлöм улынöсь, абу вир-яйлöн ыджыдалöм улынöсь. Код пытшкын абу Кристослöн Лолыс, сiйö абу Сылöн. ¹⁰ Кристос кö тiян пытшкын, сэки ловныд олö веськыдлуныс вöсна, кöть вир-яйныд кулöма мыжыс вöсна. ¹¹ Тiян пытшкын кö олö Енлöн Лолыс, кодi ловзьöдiс Исусöс кулöмысь, сiдзкö, Кристосöс Ловзьöдысь ловзьöдас тшöтш тiянлысь кулана вир-яйтö сiйö Ловнас, кодi олö тiян пытшкын. ¹² Вокъяс, сiдзкö, ми абу уджйöзаöсь тшыкöм вир-яйлы, и миянлы оз ков овны сы ног. ¹³ Оланныд кö вир-яй серти, куланныд, а Ен Лолöн кö вианныд тшыкöм уджъяснытö, понданныд овны. ¹⁴ Кодъясöс нуöдö Енлöн Лолыс, найö Енлöн ныв-пи. ¹⁵ Тi öд энö сибöдöй нартитысь лолöс, медым бара овны полöм улын, мöдарö, тi сибöдiнныд тiянöс ныв-пиö босьтысь Лолöс. Тайö Лолöн ми шыасям: «Авва, Батьöй!» ¹⁶ Ачыс Лолыс висьталö миян ловлы, мый ми Енлöн ныв-пи. ¹⁷ Ми кö Енмыслöн ныв-пи, сiдзкö, Кристоскöд босьтам Енсянь вичмöдöмасö. Сыкöд öтвыв кö сьöкыдсö нуам, öтвыв Сыкöд и дзирдлунас лоам. ¹⁸ Ме тадзи мöвпала: öнiя сьöкыд нуöмсö кö öткодявны сiйö дзирдлуныскöд, мый воссяс миянлы, тайö сьöкыд нуöмыс нинöм оз сулав. ¹⁹ Енлöн став вöчöмторйыс ёна виччысьö Ен ныв-пилысь воссьöмсö. ²⁰ Öд став вöчöмторйыс эз ас кöсйöмсяньыс веськав сiсьмöм-бырöм улö. Тадзи вöлi шуöма Енмыслöн. Сiдзкö, эм лача, мый став вöчöмторйыс мынас сiсьмана-бырана кутöдысь да воас Ен ныв-пилöн мездлунö да дзирдлунö. ²² Ми тöдам: став вöчöмторйыс öнöдз на сьöкыда ружтö-ойзö кага вайöм дырйи моз. ²³ Да оз сöмын найö, тшöтш ми, кодъяслöн эм Енсянь Лолыс, тайö медводдза сетöмторйыс, ружтöмöн-ойзöмöн виччысям Енлöн ныв-пиöн лоöмсö, вир-яйнымöс мездöмсö. ²⁴ Дерт, ми мездмöмаöсь нин лача кутöмным пыр. Но лачаыд кö збыльмöма, сэки сiйö абу нин лача. Кутöны öмöй лачасö аддзана-лоöма вылас? ²⁵ Ми кö лача кутам аддзытöм вылас, сэки виччысям терпитöмöн. ²⁶ Жеблун дырйиным Лолыс отсалö миянлы. Ми весиг огö тöдöй мый йылысь да кыдзи колö кевмысьнысö. Сэки Ачыс Лолыс ышлолалöмöн кывъяс шутöг кевмысьö миян вöсна. ²⁷ Енмыс ставсö аддзö миян сьöлöмысь да тöдö Лолыслысь мöвпъяссö. Öд Енлöн кöсйöм серти Лолыс корö-кевмö вежа войтыр вöсна. ²⁸ Ми тöдам, мый Енсö радейтысьяслы, Сылöн шуöм сертиыс корöмаяслы, Сiйö ставсö бергöдö бур вылö. ²⁹ Сiдзкö, кодъясöс Енмыс водзысяньыс тöдiс, найöс и лöсьöдiс лоны Аслас Пи кодьöн, медым Пиыс вöлi медводдза чужысьöн уна вок пöвстын. ³⁰ Кодъясöс Сiйö водзысяньыс лöсьöдiс, найöс и корис, кодъясöс корис, найöс и вöчис веськыдöн, кодъясöс вöчис веськыдöн, найöс и мичмöдiс Аслас дзирдлунöн. ³¹ Мый та вылö шуам? Енмыс кö миян дор, кодi миянлы паныд? ³² Öд Енмыс Ассьыс Писö эз жалит, а сетiс Сiйöс ставным вöсна. Сыкöд тшöтш оз öмöй сет миянлы и став мукöдторсö? ³³ Кодi вермас мыжавны Енлысь бöрйöмаяссö? Сöмын Енмыс. Но Сiйö шуö миянöс веськыдöн. ³⁴ Кодi вермас мыждыны найöс? Сöмын Кристос. Но Сiйö кулiс, ловзис да öнi Ен веськыдладорын кевмысьö миян вöсна. ³⁵ Мый вермас торйöдны миянöс Енлöн муслунысь? Гашкö, шог, дзескöдöм, вöтлöм? Гашкö, тшыгъялöм, кöм-пасьтöг кольöм? Гашкö, неминуча суöм, шыпуртысь кулöм? ³⁶ Гижöма: «Тэ вöсна быд лун миянöс виöны, лыддьöны начкыны дасьтöм ыжъясöн». ³⁷ Но став тайö сьöкыдлун дырйиыс миянöс Радейтысь сетö миянлы тырвыйö вермöм. ³⁸ Ме тöда: кулöмыс ни олöмыс, анделъяс ни енэжвыв юралысьяс да вынъяс, öнiяыс ни локтанаыс, ³⁹ пыдтаыс ни судтаыс, – некутшöм вöчöмтор оз вермы торйöдны миянöс Ен муслунысь, мый восьтöма миянлы Исус Кристос Господьным пыр.

¹ Кристос водзын шуа: ме висьтала збыльсö, сьöлöмöй Вежа Ловкöд оз сетны меным пöръявны. ² Менам сьöлöмöй ёна шогсьö да дугдывтöг бöрдö ас войтырса вокъясöй вöсна. Ме весиг дась лоны на вöсна ёрöмаöн, Кристосысь торйöдöмаöн. ⁴ Израиль войтырöс öд шуöма Ен пиянöн, восьтöма налы Ен дзирдлунсö, кöрталöма накöд йитöдъяс, сетöма налы Индöд, сувтöдöма найöс Енлы кесъявны, налы уна кöсйысьöма, ⁵ и налöн эмöсь батьяс. Тайö войтырысь петiс Кристос, Сiйö чужис морт кодьöн. Сiйö став вылас медыджыд Ен. Ошкöм Сылы нэмъяс чöж! Аминь. ⁶ Енмыслöн кывйыс эз вожав. Öд абу став израильсаыс Израильлöн, ⁷ Öвраамсянь чужысьяс абу ставныс Öвраамлöн ныв-пи. Вöлi шуöма: «Исааксянь чужысьясöс шуасны тэнад ныв-пиöн». ⁸ Сiдзкö, Енлöн ныв-пиыс абу мортсянь, но Ен кöсйысьöмсянь чужысьяс. ⁹ А кöсйысьöмыс вöлi татшöм: «Дзик тайö кадас бöр локта, да Сарралöн чужас пи». ¹⁰ Тадзи вöлi тшöтш Ревеккакöд. Сiйö сьöктiс Исаак батьнымсянь кык пиöн. ¹¹ Пияныслöн чужтöдз на, бурсö-лёксö налöн вöчтöдз на, Енмыс шуис Ревеккалы: «Ыджыдджыкыс пондас кесъявны ичöтджыкыслы». Енмыс тайöн петкöдлiс, мый бöрйöмыс Сы сайын. Сiйö бöрйö оз мортлöн уджъяс серти, но Аслас лöсьöдöм да корöм сертиыс. ¹³ Гижöма: «Яков Меным муса, а Исавöс Ме мустöмтi». ¹⁴ Мый шуам? Енмыс оз веськыда вöч? Дзик веськыда. ¹⁵ Мöисейлы Енмыс шуö: «Код дiнö кö лоа бур сьöлöма, код дiнö кö небзьöда сьöлöмöс». ¹⁶ Тадзи ставыс Енлöн буралöм сайын, абу мортлöн кöсйöм-зiльöм сайын. ¹⁷ Гижöдас шуöма фараонлы: «Ме пуктi тэнö, мед петкöдлыны тэ вылын Ассьым вынöс, медым Менсьым нимöс тöдiсны став му пасьталаыс». ¹⁸ Тадзи Енмыс код дiнö кö бур сьöлöма, а кодöс кö Сiйö чорзьöдö. ¹⁹ Гашкö, тэ юалан: «Мыйысь нö Енмыс, сiдзкö, мыжалö? Вермас-ö кодкö паныд сувтны Енмыслöн кöсйöмлы?» ²⁰ Мортöй, кодi тэ сэтшöмыс, мый Енкöд вензян? Вöчöмторйыс öмöй вермас шуны вöчысьыслы: «Мыйла тэ менö татшöмнас вöчин?» ²¹ Гырнич вöчалысь абу öмöй вына сёй вылас? Оз-ö сiйö öти лятисьыс вермы вöчны быд лунö вöдитчан и торъя лунъясö вöдитчан доз? ²² Тадзи Енмыс кöсйö петкöдлыны Ассьыс скöрлунсö да вынсö. Ыджыд терпитöмыс вöсна Сiйö видзö на бырöдны шуöм "скöрлуныслысь дозъяссö", ²³ медым петкöдлыны Ассьыс помасьлытöм дзирдлунсö "буралöмыслöн дозъяс" вылын, кодъясöс дасьтöма дзирдавны. ²⁴ "Буралöмыслöн дозъясыс" – тайö ми, öд Ен корис миянöс. Корис эз сöмын юдейясöс, но тшöтш мукöд войтырöс. ²⁵ Осия небöгын Сiйö висьталö: – Кодъяс эз вöвны Менам войтырöн, шуа Асламöн, мустöмöс шуа мусаöн. ²⁶ Кöнi шуöма вöлi: «Тi абу Менам войтыр», сэнi шуасны найöс ловъя Енлöн ныв-пиöн. ²⁷ Израиль йылысь Исай тадзи висьталö: – Израиль войтырлöн лыдыс кö лоас весигтö саридздор лыа мында, мездмас сöмын колясыс. ²⁸ Регыд Господь эштöдас му вылын веськыда вöчöмсö, Ассьыс шуöмсö пöртас олöмö. ²⁹ Исай водзвыв висьтавлiс: – Господь Саваоф кö эз коль миянлы чужан кöйдыссö, ми эськö бырим Содом моз да вöлiм Гомора кодьöсь. ³⁰ Сiдзкö, мый артмö? Мукöд войтыр эз корсьлыны веськыдлунсö, да босьтiсны сiйöс. Найö босьтiсны веськыдлунсö эскöмныс пыр. ³¹ Израиль, мöдарö, Индöд отсöгöн корсис веськыдлунсö, да тайö эз ло сылы. ³² Мыйла? Веськыдлунсö сiйö зiлис шедöдны Индöд серти уджъяснас, эз эскöмнас. Тадзи сiйö изйö крукасис. ³³ Та йылысь гижöма: – Ме пукта Сионö из, унаöн сэтчö крукасясны да унаöн сы вылö усясны. Но Сылы эскысь оз янав.

¹ Вокъяс, ме сьöлöмсянь кора да кевмыся Енлы Израильлöн мездмöм вöсна. ² Ме тöда: налöн сьöлöмыс öзъялö Енмыслы, но налы оз тырмы гöгöрвоöмлуныс. ³ Найö оз гöгöрвоны Енмыслысь веськыдлунсö да зiльöны сувтöдны ассьыныс веськыдлун. Та вöсна найö эз сетчыны Ен веськыдлунлы. ⁴ Кристос – Индöдыслöн пом. Сiдзкö, быдöн, кодi эскö Сылы, лоö веськыдöн. ⁵ Индöд серти веськыдлун йылысь Мöисей гижö: «Индöд серти олысь Индöднас пондас овны». ⁶ Эскöмсянь веськыдлуныс висьталö: «Эн мöвпав сьöлöмад: "Кодi каяс енэжö?"» – мед лэччöдны Кристосöс. ⁷ «Либö: "Кодi лэччас пыдöстöминö?"» – мед кыпöдны Кристосöс кулöмысь. ⁸ Гижöдыс мый висьталö? – Матын тэныд кывйыс, тэнад вомын да тэнад сьöлöмын. Тайö эскöмыслöн кыв, мый йылысь ми висьталам. ⁹ Öд вомнад кö висьталан Исусöс Господьöн да сьöлöмнад кö эскан, мый Енмыс ловзьöдiс Сiйöс кулöмысь, мездман. ¹⁰ Сьöлöмнад эскöмыд вöчö веськыдöн, вомнад висьталöмыд – мездö. ¹¹ Гижöдыс висьталö: «Сылы эскысь оз янав». ¹² Юдейяс да грекъяс костын торъялöмыс абу. Быдöнлöн öти Господь. Сiйö лышкыда сетö быдöнлы, кодi шыасьö Сы дiнö. ¹³ Öд быдöн, кодi шыасяс Господь нимö, мездмас. ¹⁴ Кыдзи нö шыасясны Господь дiнö, оз кö эскыны Сылы? Кыдзи нö эскасны, эз кö кывлыны Сы йылысь? Кыдзи нö кывласны, абу кö висьталысьыс? ¹⁵ Кыдзи нö висьталасны, абу кö мöдöдöма висьтавнысö? Гижöма: «Майбырöсь кокъясыс лöнь олöм да бур юöр вайысьлöн». ¹⁶ Но эз ставныс кывзыны Бур Юöрсö. Исай шуö: «Господьöй, кодi нö эскис миян висьталöмö?» ¹⁷ Эскöмыс öд кылöмсянь, а кылöмыс Ен Кывсянь. ¹⁸ Юала: «Найö öмöй эз кывлыны?» Кывлiсны, дерт. – Став му пасьталаыс кылiс налöн висьталöм шыыс, став му пельöсöдзыс воис налöн кывйыс. ¹⁹ Нöшта юала: «Израиль öмöй эз гöгöрво?» Öд Мöисей пыр на Енмыс шулiс: – Ме кыпöда тiян пытшкын вежалöм сiйö войтыр дiнö, кодöс оз позь шуны войтырöн. Дöзмöда тiянöс вежöртöм йöз пыр. ²⁰ Исай повтöг висьталö Енлысь шуöмсö: – Менö аддзисны найö, кодъяс эз корсьлыны Менö, восьтi Ачымöс налы, кодъяс эз юасьлыны Ме йылысь. ²¹ Израиль йылысь Енмыс тадзи шуö: – Ме лунтыр сулалi кывзысьтöм да асныра войтырлы киöс нюжöдöмöн.

¹ Юала: «Енмыс öмöй эновтiс Ассьыс йöзсö?» Дерт, эз. Ме ачым израильса, Öвраам чужанвужйысь, Вениамин чужанкотырысь. ² Енмыс эз эновт Ассьыс водзвыв бöрйöм войтырсö. Онö öмöй тöдöй, мый висьталöма Гижöдас Илля йылысь? Сiйö норасьö Енлы Израиль вылö: ³ «Господьöй, Тэнсьыд пророкъястö виисны, висьпуктанiнъястö жугöдiсны. Ме öтнамöн коли, тшöтш менам олöм вылö ыштöны». ⁴ Мый сылы Енмыс воча шуö? «Ме коли Аслым сизим сюрс мортöс. Найö эз пидзöсчанясьны Ваал водзö». ⁵ Тадзи и öнi: Енмыс буралöмыс кузя видзöма коляссö, Ассьыс бöрйöмаясöс. ⁶ Бöрйöма буралöмыс вöсна, абу мортлöн уджъяс серти. Бöрйöма кö вöлi уджъяс серти, сэки эськö буралöмыс эз вöв буралöмöн. ⁷ Сiдзкö, мый артмö? Израиль эз аддзы, мый корсис, сöмын бöрйöмаяс аддзисны. Мукöдыс чорзьöдчисны, ⁸ öд гижöма: – Енмыс сетiс налы чорзьöм лов. Налöн синныс куньса, пельныс тупкыса, и öнöдз на тадз. ⁹ Давид висьталö: – Мед чöсмасян пызанныс лоö налы тывйö дзугсьöмöн, налькйö шедöмöн, изйö крукасьöмöн. Тайö лоö налы водзöс пыдди. ¹⁰ Синмыс налöн мед бердас, аддзыны оз кут, сюрса лыыс мед кусыньтчас пыр кежлö. ¹¹ Сiдзкö, юала: «Найö öмöй усьмöныс крукасисны?» Эз. Налöн крукасьöмыс вайис мездмöм мукöд войтырлы. Та вöсна на пытшкын кыптiс мукöд войтыр дiнö вежалöм. ¹² Налöн крукасьöмыс кö вайис озырлун муюгыдыслы да Енсьыс кежöмыс кö озырмöдiс мукöд войтырöс, сэки мыйта озырлун ваяс став Израильлöн Ен дiнö бергöдчöмыс? ¹³ Тiянлы, мукöд войтырлы, висьтала: менö сувтöдöма апостолавны тiянлы, и ме ошйыся аслам кесъялöмöн. ¹⁴ Гашкö, верма кыпöдны ас войтыр пытшкын веж петöмсö да отсавны мездмыны кодсюрöлы. ¹⁵ Найöс öдтортöмыс кö вайис бурасьöм муюгыдыслы, сэки мый ваяс найöс сибöдöмыс? Оз-ö кулöмысь ловзьöм? ¹⁶ Медводдза пöжасыс кö вежа, сiдзкö, кöтасыс ставнас вежа. Пулöн вужйыс кö вежа, вожъясыс тшöтш вежаöсь. ¹⁷ Быдтöм вый пуысь кö öткымын вож чегисны, а тэнö, вöрса вый пу вожöс, йитiсны чегöминас, да тэ мукöд вожыскöд öти вужсянь кутiн босьтны быдман вынсö, ¹⁸ сэки эн ошйысь мукöд вожыс водзын. А кöсъян кö ошйысьны, тöд: он тэ кут вужсö, а вужйыс – тэнö. ¹⁹ Гашкö, тэ шуан: «Менö йитöм могысь вожъяссö чегисны». ²⁰ Тайö тадз. Найöс чегисны эскытöмысла, а тэ кутчысян эскöмнад. Асьтö вылö эн пукты, но полöмпырысь ов. ²¹ Енмыс кö эз жалит быдтöм вый пулысь вожъяссö, жалитас-ö тэнö? ²² Тöд: Енмыс бур сьöлöма, но вермö лоны и чорыдöн. Чорыд усьöмаяс дiнö, бур сьöлöма тэ дiнö, сöмын кутчысян кö Сылöн бурлунö. Он кö, тэнö тшöтш керыштасны. ²³ Юдейяс кö оз кольччыны эскытöмлунас, найöс лоö йитöма. Енмыс вына бöр йитны найöс. ²⁴ Тэнö öд керыштöма вöлi вöрса пуысь да йитöма быдтöм пуыс дiнö. А быдтöм пу вожлы ёна кокньыдджык бöр йитчыны мам пуыс дiнö. ²⁵ Вокъяс, мед тi энö мöвпалöй ас мывкыдсяньныд, висьтала тiянлы тайö гусяторсö: Израиль войтырысь сöмын кутшöмкö юкöн чорзьöдчис. Налöн чорзьöдчöмыс кыссяс сэтчöдз, кытчöдз оз мездмы мукöд войтырыс колана лыдöдз. ²⁶ Сэки став Израиль мездмас. Öд гижöма: – Сионсянь локтас Мездысь, Сiйö бырöдас Яков чужанвужйысь Ентöг олöмсö. ²⁷ Ме босьта налысь мыжъяссö, тайö лоö Менам йитöд накöд. ²⁸ Найö эз сибöдны Бур Юöрсö, Енлы паныд мунiсны. Тайö лои тiян вöсна. Но найö бöрйöм войтыр, и Енмыс радейтö найöс батьясныс вöсна. ²⁹ Енмыс Ассьыс корöмаяссö оз вунöд, Сiйö бöр оз босьт сетöмасö. ³⁰ Коркö тi, мукöд войтыр, энö кывзысьöй Енмыслысь, но Израильлöн кывзысьтöмлун вöсна Енмыс вöлi бур сьöлöма тiян дiнö. ³¹ Öнi найö оз кывзысьны, медым тiян дiнö моз Сiйö вöлi бур сьöлöма тшöтш на дiнö. ³² Енмыс ставнысö кöрталiс кывзысьтöмлуннас, медым ставныс дiнö лоны бур сьöлöмаöн. ³³ Енлöн озырлуныс пыдöстöм, Сылöн мывкыдлуныс да тöдöмлуныс шымыртны вермытöм. Шуöм кывйыс вежöрö тöрöдтöм, туйыс Сылöн туявтöм! ³⁴ Кодi вермас тöдны Господьлысь мöвпъяссö? Кодi вермас Сiйöс туйдöдны? ³⁵ Кодлы Сiйö уджйöза, медым мынтысьны? ³⁶ Öд ставыс Сысянь, Сы пыр да Сылы. Ошкöм Сылы нэмъяс чöж! Аминь.

¹ Вокъяс, Енлöн ыджыд буралöмыс вöсна кора тiянöс: сетöй асьнытö Енлы ловъя, вежа да шогмана вись пыдди. Тайö лоö бур мывкыда кесъялöм Енмыслы. ² Энö вужъясьöй тайö мувывса оласногас. Лэдзöй Енмыслы вежны тiянöс, выльмöдны вежöрнытö, медым тöдны тiянлы Сылысь кöсйöмсö: мый колана, шогмана да тыр-бур. ³ Енсянь меным бурсетöм вöсна висьтала тiянлы быдöнлы: энö мöвпалöй ас йывсьыныд вывтi, коланасьыс унджык, но мöвпалöй ышнясьтöг, Енмöн сетöм эскöм сертиныд. ⁴ Кыдзи öти вир-яйлöн эм уна юкöн, и быд юкöн вöчö ассьыс удж, ⁵ тадзи Кристос пытшкын ставным ми öтлаынсö – öти вир-яй, а торйöнсö – öта-мöдлы юкöн. ⁶ Енмыс Аслас буралöмнас быдöнлы миянлы сетöма торъя бурсетöм: пророкавны кö – пророкав эскöм сертиыд, ⁷ кесъявны кö – кесъяв, велöдны кö – велöд, ⁸ ышöдны кö – ышöд, сетны кö – сет сьöлöмсяньыд, веськöдлыны кö – веськöдлы тöждысьöмöн, бур вöчны кö – вöч долыд сьöлöмöн. ⁹ Радейтöй восьса сьöлöмöн, ылыстчöй лёксьыс да кутчысьöй бурас. ¹⁰ Радейтöй öта-мöднытö чой-вокöс моз, пуктöй öта-мöднытö ассьыд вылöджык. ¹¹ Тöждысиганыд энö дышмöй, ловнад öзъялöй, Енмыслы кесъялöй. ¹² Лачанытö кутöй нимкодьпырысь, шогъястö нуöй терпитöмöн, дугдывтöг кевмысьöй. ¹³ Вежа войтырлы отсалöй абутöмлун дырйиныс, сибöдöй ветлысь-мунысьясöс, ¹⁴ бурсиöй тiянöс вöтлысьясöс, бурсиöй найöс, а энö ёрöй. ¹⁵ Нимкодясьысьяскöд нимкодясьöй, бöрдысьяскöд бöрдöй. ¹⁶ Ас костаныд лоöй öти сьöлöмаöсь, энö лыддьöй асьнытö бурджыкöн, коньöръясöс энö öтдортöй да сюсьö энö пуксьöй. ¹⁷ Лёк вöчöмысь лёкöн энö мынтысьöй, йöзыс водзын ставсö зiльöй вöчны веськыда. ¹⁸ Верманныд кö, олöй лöня ставныскöд. ¹⁹ Мусаяс, энö перйöй водзöс ас вöснаныд, сетöй тайöс вöчны Енлöн скöрлунлы. Öд гижöма: «Ме мынтыся, Ме перъя водзöссö», – висьталö Господь. ²⁰ «Тэныд паныд мунысь кö тшыгъялö, верд сiйöс, горшыс кö косьмö, юктав сiйöс. Тадзи тэ чукöртан сылы юр вылас биа öгыръяс». ²¹ Эн сет лёкыслы вермыны тэнö, но вермы лёксö бурнас.

¹ Быдöн мед кывзысьö аслас юралысьыслысь, öд юралöмсö Ен лöсьöдöма, и юралысьсö тшöтш Ен пуктöма. ² Юралысьлы паныд сувтысь паныд сувтö Енмыслöн лöсьöдöмлы. Тадзи вöчысь кöлалö ас вылас мыждöм. ³ Юралысьясысь полöны лёктор вöчигöн, а оз бурсö вöчигöн. Кöсъян кö наысь повтöг овны, вöч веськыда, сэки лоö насянь ошкöмыс. ⁴ Юралысь – сiйö Енлöн кесйöг, сiйöс пуктöма тэныд бур вылö. Вöчан кö лёксö, пов! Оз öд весьшöрö сiйö новлöдлы шыпурт. Сiйö Енлöн кесйöг, вермö чорыда дойдны лёк вöчысьöс. ⁵ Сiдзкö, кутам кывзысьны юралысьяслысь огö мыждöмысь полöм вöсна, но сьöлöмным висьталöм серти. ⁶ Тайö уджыс налöн Енлы кесъялöм, та вöсна тi мынтанныд налы вотсö. ⁷ Сiдзкö, сетöй быдöнлы коланасö: кодлы вот сетны – сылы вот сетöй, кодлы руга – сылы руга, кодысь колö повны – сыысь полöй, кодöс колö пыдди пуктыны – сiйöс пыдди пуктöй. ⁸ Энö кольöй некодлы уджйöзаöн, öта-мöдтö радейтöм кындзи. Öд мöдöс радейтöмнад тэ тырвыйö пöртан олöмö Индöдсö. ⁹ Тайö тшöктöмъяссö: «Гозъя олöмтö эн пежав», «Эн ви», «Эн гусясь», «Эн пöръясь», «Эн ышты» да став мукöд тшöктöмсö шымыртöма öти тшöктöмö: «Радейт матыссатö асьтö моз». ¹⁰ Муслуныс оз вай лёксö матыссаыдлы. Муслуныс – тайö Индöдсö тырвыйö олöмö пöртöм. ¹¹ Тадзи вöчöй, тi öд тöданныд, мый воис нин кад садьмыны миянлы. Мездмöмыс öнi ёна нин матын сэкъя дорысь, кор ми сöмын на пондiм эскыны. ¹² Войыс кольö, луныс матыстчö. Сiдзкö, шыбитам пемыдыслысь уджъяссö да пасьтасям югыдыслöн вермасянторйö. ¹³ Лунъюгыдын моз пондам овны бур ногöн. Огö сетчöй гажöдчöмö да кодалöмö, гозъя олöм пежалöмö да лэдзчысьöм оласногö, вензьöмö да вежалöмö. ¹⁴ Мед тiян паськöмöн лоö Исус Кристос Господьным. Вир-яйныд вöсна тöждысьöмсö энö бергöдöй сылысь лёк кöсйöмсö могмöдöмö.

¹ Жеб эскысьöс сибöдöй, энö вензьöй, сылöн видзöдласыс кö торъялö. ² Öти эскö, мый позьö сёйны быдтор, а мöдыс, жеб эскысьыс, сёйö сöмын быдмöг. ³ Быдтор сёйысь, эн увтырт быдмöг сёйысьöс, и тэ, быдмöг сёйысь, эн мыжав быдтор сёйысьöс. Енмыс öд кыкнаннытö сибöдö. ⁴ Кодi тэ сэтшöмыс, мый йöз кесйöгöс мыжалан? Сулалö-ö, усьöма-ö сiйö, сылöн Ыджыдыс тöдö. Сiйö кутас сулавны, öд Енмыс вына сувтöдны сiйöс. ⁵ Кодкö торйöдö лунъяс, а кодлыкö став луныс öткодь. Быдöн вöч аслад гöгöрвоöмлун серти. ⁶ Лунъяс торйöдысь – Господь понда найöс торйöдö, кодi оз торйöд – Господь понда оз торйöд. Быдтор сёйысь – Господь понда сёйö да Енсö аттьöалö, кодi оз сёй быдторсö – Господь понда оз сёй да тшöтш Енсö аттьöалö. ⁷ Öд некод миян пиысь оз ов да оз кув ас пондаыс. ⁸ Та вöсна, олам кö – Енлы олам, кулам кö – Енлы кулам. Ловъяöсь-ö, кулöмаöсь-ö – ми Енмыслöн. ⁹ Кристос öд кулiс, ловзис да олö, медым ыджыдавны кулöмаяс да ловъяяс вылын. ¹⁰ Мый тэ мыжалан воктö? Мыйла нинöм туйö пуктан сiйöс? Ставным öд сувтам Кристослöн ёрд водзö. ¹¹ Гижöма: – Ме ловъя, висьталö Господь, – Ме водзö пидзöсчанясяс быд морт, да быд вомсянь кыптас ошкöм Енлы. ¹² Тадзи быдöн ас вöснаыс кывкутас Ен водзын. ¹³ Водзö огö кутöй мыжавны öта-мöдöс. Мöдарö, видзöдöй, мед эськö энö крукöдöй да уськöдöй вокнытö. ¹⁴ Ме бура тöда да эска Господь Исуслы, мый, збыльвылас, нинöм абу пежа. Сöмын сылы лоö пежа, кодi лыддьö мыйкö пежаöн. ¹⁵ Тэ кö шогö уськöдан воктö сёян вöсна, сiдзкö, тэ он вöч мусапырысь. Эн жугöд сiйöс аслад сёянöн, öд сы вöсна кулiс Кристос. ¹⁶ Энö лэдзöй серамвыв лэптыны сiйö, мый тi лыддянныд бурöн. ¹⁷ Öд Енлöн Юралöмыс абу сёйöм да юöм, тайö Вежа Ловсянь веськыдлун, лöньлун да нимкодьлун. ¹⁸ Кристослы тадзи кесъялысь шогмана Енмыслы да пыдди пуктана йöзöн. ¹⁹ Зiлямöй овны лöня öта-мöдöс ёнмöдöмöн. ²⁰ Сёян вöсна эн жугöд Енлысь уджсö. Ставыс сöстöм, но мортыслы лёк, крукöдö кö аслас сёянöн мöдсö. ²¹ Бурджык, он кö сёй яй, он ю вина, он вöч нинöм сэтшöмсö, мыйö вокыд крукасьö да усьö. ²² Тэнад эм эскöм? Видз сiйöс сьöлöмад Ен водзын. Шуда сiйö, кодi оз мыжав асьсö сыысь, мый бöрйö. ²³ Майшасьöмöн сёйысь мыжмö, öд сiйö эскытöг вöчö. А эскытöг вöчöмыд эм мыж. ²⁴ Ошкöм Сылы, кодi сетö тiянлы зумыда кутчысьны меöн висьталöм Бур Юöрö, Исус Кристослöн велöдöмö. Сэнi висьталöма важысянь дзебöм гусяторсö. ²⁵ Тайö Бур Юöрсö öнi восьтöма пророк гижöдъяс пыр да помтöг олысь Енлöн тшöктöмыс серти висьталöма быд кыла войтырлы, медым вайöдны найöс кывзысьöмас да эскöмас. ²⁶ Дзик öти ыджыд мывкыда Енлы ошкöмыс Исус Кристос пыр нэмъяс чöж! Аминь.

¹ Миянлы, вынаяслы, колö лоны бур сьöлöмаöн вынтöмъяс дiнö налöн вермытöмлун дырйи, оз ков мöвпавны куш ас йывсьыным. ² Быдöнлы колö мöвпавны матыссалы бур вöчöм йылысь, сiйöс ёнмöдöм могысь. ³ Öд Кристос эз Ас йывсьыс мöвпав. Гижöма: «Тэнö омöльтысьяслöн лёкöдöмыс уси Ме вылö». ⁴ Став воддза гижöдсö вöлi гижöма миянöс велöдöм да бурöдöм могысь, медым Гижöд пырыс ми вермим ёнмыны да зумыд лача кутны. ⁵ Бурöдöмсö да зумыдлунсö сетысь Ен мед сетас тiянлы öти сьöлöм. Öд Исус Кристос велöдö, ⁶ мед тi öти лолöн да öти вомöн ошкинныд Енсö, миян Господь Исус Кристослысь Батьсö. ⁷ Сiдзкö, сибöдöй öта-мöднытö Кристос сибыдлунöн, медым ошкыссис Енмыс. ⁸ Ме тадзи гöгöрвоа: Исус Кристос локтiс кесъявны юдейяслы, медым збыльмöдны батьяслы кöсйысьöмсö да петкöдлыны, мый Енмыс кутö Ассьыс кывсö. ⁹ Кристос локтiс кесъявны тшöтш мукöд войтырлы, мед и найö вермисны ошкыны Енсö на дiнö буралöмысь. Та йылысь гижöма: – Таысь ме кута нимöдны Тэнö мукöд войтыр пöвстын, понда сьылöмъясöн ошкыны Тэнсьыд нимтö. ¹⁰ Нöшта гижöма: – Нимкодясьöй, мукöд войтыр, Сылöн войтыркöд! ¹¹ И нöшта на: – Ошкöй Господьöс, быд кыла войтыр! Нимöдöй Сiйöс, став мувывса йöз! ¹² Исай висьталö: – Ессей вужсянь петас вож. Сiйö кутас веськöдлыны быд войтырöн, найö Сы вылö лача кутны пондасны. ¹³ Лачасö сетысь Ен мед тыртас тiянöс нимкодьлунöн да лöньлунöн эскöманыд, медым Вежа Лов вынöн тi зумыда сулалiнныд лача кутöмас. ¹⁴ Вокъяс, ме тöда, тiян бурлуныс да тöдöмлуныс тырвыйö, тi верманныд туйдöдны öта-мöднытö. ¹⁵ Но тiянлы казьтыштöм могысь ме мыйсюрö гижи повтöг. Тадзи вöчи, öд Енмыс Аслас буралöмнас корис менö ¹⁶ кесъявны Исус Кристослы ентöдтöмъяс пöвстын. Менö сувтöдöма вöчны вежа удж: висьтавны Енлысь Бур Юöрсö да вайны ентöдтöмъясöс Ен водзö шогмана да Вежа Лолöн вежöдöм вись пыдди. ¹⁷ Исус Кристос пытшкын ме верма ошйысьны Енлы кесъялöмöн. ¹⁸ Лысьта висьтавны сöмын сы йылысь, мый Кристос вöчис ме пыр, медым вайöдны ентöдтöмъясöс Енлысь кывзысьöмас. Сiйö вöчис тайöс Енмыслöн Лов вынöн менам сёрниöй да уджöй пыр, индысьпасъяс да шензьöданаторъяс пыр. Ерусалимсянь да водзö ме паськöдi Кристос йылысь Бур Юöрсö, весиг Иллирикöдз вои. ²⁰ Мед эз ло вöчöма мукöдлöн подув вылын, ме зiли висьтавны Бур Юöрсö сэнi, кöнi Кристос нимсö эз на кывлыны. ²¹ Та йылысь гижöма: – Кодъяслы эз висьтавлыны Сы йылысь, найö аддзасны, кодъяс эз на кывлыны, найö тöдмаласны. ²² Тайö уджыс унаысь кутiс менö тiян дiнö волöмысь. ²³ Öнi менам помалöма танi уджсö. Гашкö, уна вося кöсйöмöй волыны тiян дiнö сэсся збыльмас. ²⁴ Испанияö мунiгöн пырала тiян дiнö. Ёна кöсъя аддзысьлыны тiянкöд, медым кöть этшаник вермим öтлаын нимкодьясьыштны. Лача кута, мый сэсся отсаланныд меным водзö туйö петны. ²⁵ Öнi ме мöдöдча Ерусалимö кесъявны вежа войтырлы. ²⁶ Македонияса да акайяса эскысьяс шуисны сетны кутшöмсюрö отсöг ерусалимса гöль эскысьяслы. ²⁷ Тадзи шуисны вöчны, öд найö уджйöзаöсь юдейяслы: юдейяс пыр налы вичмис енэжвывса бурсиöмыс. Сiдзкö, налы тшöтш колö отсавны вежа войтырлы налöн быдлунъя олöмын. ²⁸ Тайö отсöгсö нуöм бöрын вöлисти муна Испанияö. Сэтчö мунiгмоз кежала тiян дiнö. ²⁹ Ме тöда: ме локта тiян дiнö Кристос Бур Юöрсянь тыр бурсиöмöн. ³⁰ Вокъяс, миян Господь Исус Кристос нимöн да Вежа Ловсянь муслунöн кора тiянöс: öтвывтчöй менам тышъясö да кевмысьöй ме вöсна Енмыслы, ³¹ медым эг веськав Юдеяын эскытöмъяс киö, да вайöм отсöгыс мед шогмас ерусалимса вежа войтырлы. ³² Ен кö сетас, нимкодьпырысь локта тiян дiнö да шойччышта тiян ордын. ³³ Лöньлунсö сетысь Ен ставныдкöд тiянкöд. Аминь.

¹ Ме тöдмöда тiянöс Фива чойкöд. Сiйö Кенкреяын вичкоса отсасьысь. ² Сибöдöй сiйöс Господь нимсянь, кыдзи лöсялö вежа войтырлы, ковмас кö, отсыштöй сылы. Ачыс сiйö уналы отсалiс, тшöтш меным. ³ Висьталöй чолöм Прискиллалы да Акиллы. Найö мекöд öтвыв кесъялöны Исус Кристослы. ⁴ Найö вöлiны дасьöсь олöмнысö сетны ме вöсна. Да ог сöмын öтнам ме аттьöав найöс, тшöтш мукöд войтырса вичкояс. ⁵ Чолöм тшöтш на ордын чукöртчысь эскысьяслы. Чолöм менам муса Епенетлы, Акайяын сiйö медводз эскис Кристослы. ⁶ Чолöм Мариамлы, сiйö уна уджалiс-отсасис миянлы. ⁷ Чолöм менам ас войтырсалы: Андрониклы да Юниялы, накöд ме пукавлi дзескыдiнын. Найö пыдди пуктана йöз апостолъяс пöвстын, и найö меысь водз эскисны Кристослы. ⁸ Чолöм Амплийлы, сiйö менам муса вок. ⁹ Чолöм Урбанлы, сiйö миян моз тшöтш кесъялö Кристослы. Чолöм муса Стакий ёртлы. ¹⁰ Чолöм Апелеслы. Сiйö Кристос вöсна уна сьöкыд пыр мунiс. Чолöм Аристовуллöн гортсалы. ¹¹ Чолöм менам Иродион рöдвужлы. Висьталöй чолöм Наркислöн гортсаяс пиысь налы, кодъяс эскöны Господьлы. ¹² Чолöм тшöтш мöдöда Енлысь уджсö вöчысьяслы: Трифеналы да Трифосалы. Чолöм муса Персида чойлы, сiйö ёна уджалiс Господьлы. ¹³ Чолöм Руфослы, Господьöн бöрйöмалы, да сылöн мамыслы, öд сiйö меным тшöтш мам кодь. ¹⁴ Чолöм Асинкритлы, Флегонтлы, Ермлы, Патровлы, Ермийлы да накöд уджалысь вокъяслы. ¹⁵ Чолöм Филологлы да Юлиялы, Нирейлы да сылöн чойыслы, Олимпанлы да накöд сэнi став вежа войтырлы. ¹⁶ Чолöмалöй öта-мöднытö вежа окыштöмöн. Кристослöн быд вичкосянь тiянлы чолöм. ¹⁷ Вокъяс, кора тiянöс, видзчысьöй наысь, кодъяс пыртöны вичкоад вензьöмъяс, да кежöдöны эскöмсьыс. Ылыстчöй татшöмъяссьыс. ¹⁸ Татшöм йöзыс кесъялöны оз Исус Кристос Господьнымлы, но асланыс рушкулы. Мича сёрнинас найö кокньыда ылöдлöны восьса сьöлöмаясöс. ¹⁹ Тiян кывзысяна олöмныд быдöнлы бура тöдса. Таысь меным нимкодь. Кöсъя, мед эськö тi вöлiнныд тэрыбöсь бурыс вылö, но ньöжмыдöсь лёкыс вылö. ²⁰ Лöньлунсö сетысь Ен регыд песовтас сöтанасö тiян кокъяс улö. Миян Господь Исус Кристослöн буралöмыс тiянкöд. Аминь. ²¹ Тiянлы ыстöны чолöм менам Тимофей уджъёртöй да ас войтырысь Луций, Ясон да Сосипатр вокъяс. ²² Чолöмала тiянöс тшöтш ме, Тертий, тайö гижöдсö гижысь. ²³ Чолöм Гайсянь. Сiйö сибöдö ас ордас став эскысьсö, тшöтш и менö. Тiянлы ыстöны чолöм Кварт вок да карса сьöм видзысь Ераст. ²⁴ Миян Господь Исус Кристослöн буралöмыс ставныдкöд тiянкöд. Аминь.