Восьтöм

Восьтöм

¹ Тайö гижöдыс – Исус Кристослы Енсянь восьтöм. Енмыс восьтiс тайöс, медым петкöдлыны Аслас кесйöгъяслы, мый колö лоны регыдъя кадö. Кристос мöдöдiс Ассьыс анделсö, медым висьтавны тайöс Аслас кесйöглы – Иоанлы. ² Öнi Иоан аслас висьталöмöн эскöдö Енлысь Кывсö, Исус Кристослысь висьталöмсö да ставсö, мый аддзылiс. ³ Шуда сiйö, кодi лыддьö да кывзö тайö водзвыв висьталöмыслысь кывъяссö да олö на серти. Öд кадыс матын нин. ⁴ Иоан чолöмалö асияса сизим вичкоöс: буралöм да лöнь олöм тiянлы Сысянь, Кодi эм, вöлi да локтас, тшöтш Сылöн пуклöс водзын олысь сизим ловсянь ⁵ да Исус Кристоссянь. Сiйö – эскана Висьталысь, Сiйö медводдзаöн ловзис кулöмысь да юралö мувывса öксыяс вылын. Сылы ми ёна мусаöсь. Аслас Вирöн Сiйö мыськалiс миянöс мыжъясысь, ⁶ пуктiс миянöс öксыясö да вежа кесъялысьясö Енмыслы, Аслас Батьлы. Сылы ошкöмыс, Сылöн ыджыдалöмыс нэмъяс чöж! Аминь. ⁷ – Со, Сiйö локтö кымöръяс вылын, Сiйöс аддзас быд син. Сiйöс аддзасны тшöтш найö, кодъяс бытшкисны Сiйöс. Сэки Сы водзын ырзöмöн бöрддзас мувывса быд кыла войтыр. Тайö тадзи! Аминь. ⁸ «Ме – Альфа и Омега, Панасыс и Помыс», – шуö Господь. Сiйö эм, вöлi и локтас, Сiйö – Ставсöкутысьыс. ⁹ Ме, Иоан, тiян вокныд, тiянкöд öтвыв нуа сьöкыдсö. Тiянлы моз меным тшöтш вичмö Енлöн Юралöмыс да Исус Кристоссянь зумыдлуныс. Ен Кыв вöсна да Исус Кристос йылысь висьталöм вöсна ме вöлi Патмос дi вылын. ¹⁰ Господьлöн лунö ме вöлi тырöма Лолöн. Сэки мыш сайсянь ме кылi гора шы, тайö вöлi труба шы кодь. Сiйö шуис: «Ме – Альфа и Омега, Медводдзаыс и Медбöръяыс. ¹¹ Сiйö, мый аддзан, гиж да мöдöд асияса вичкоясö: Ефесö, Смирнаö, Пергамö, Фиатираö, Сардисö, Филадельфияö да Лаодикияö». ¹² Ме бергöдчи видзöдлыны мекöд сёрнитысь вылö да аддзи сизим зарни бикок. ¹³ Сизим бикок пöвстас быттьö Морт Пи сулалiс. Сiйö вöлi кузь паськöма да морöс весьтöдыс вöлi вöнясьöма зарни вöньöн. ¹⁴ Сылöн юрыс да юрсиыс вöлiны дзик еджыдöсь, быттьö еджыд вурун, быттьö лым, а синъясыс ыпъялiсны би моз. ¹⁵ Сылöн кокъясыс дзирдалiсны пачын донöдöм ыргöн моз, а гöлöс шыыс Сылöн вöлi бузгысь ва шы кодь. ¹⁶ Веськыд киас Сiйö кутiс сизим кодзув, а Сылöн вомысь петiс кыкнанладорсяньыс лэчтöм ёсь шыпурт. Сылöн чужöмыс дзирдалiс яръюгыд шондi моз. ¹⁷ Сiйöс аддзöм бöрын ме уси Сы кок улö да вöлi кулöм морт кодь. Но Сiйö пуктiс ме вылö веськыд кисö да шуис: «Эн пов, Ме – Медводдзаыс и Медбöръяыс. ¹⁸ Ме ловъя. Ме вöлi кулöма, но öнi ловъя нэмъяс чöж. Аминь. Менам киын адысь да кулöмысь восьтаныс. ¹⁹ Сiдзкö, гиж, мый аддзылiн, мый эм да мый лоö бöрыннас. ²⁰ Тэ аддзылiн сизим кодзув, кодъяс вöлiны Менам веськыд киын, да сизим зарни бикок. Налöн гусяторйыс татшöм: сизим кодзулыс – тайö сизим вичколöн анделъяс, а сизим бикокыс, кодъясöс тэ аддзылiн, – тайö сизим вичко».

¹ «Ефес вичкоса анделлы тадзи гиж: – Со мый висьталö Сiйö, кодi кутö веськыд киас сизим кодзув да ветлöдлö сизим зарни бикок пöвстöд. ² Ме тöда тэнсьыд уджъястö, мырсьöмтö да зумыдлунтö. Тöда, тэ он терпит лёк йöзöс. Тэ тöдмалiн найöс, кодъяс нимтöны асьнысö апостолъясöн, но збыльвылас найö абу апостолъяс. Тэ аддзин, мый найö – пöръясьысьяс. ³ Тэ уна нуин сьöкыдсö, но сулалан зумыда. Менам ним вöсна тэ ёна уджалiн, но эн лигышмун. ⁴ Но тэныд паныд кöсъя шуны со мый: тэ эновтiн ассьыд медводдза муслунтö. ⁵ Сiдзкö, мöвпышт, кысянь тэ усин, бергöдчы да вöч ассьыд медводдза уджъястö. Он кö бергöдчы, регыд локта тэ дiнö да вешта тэнсьыд бикоктö места вывсьыс. ⁶ Но öтитор тэ вöчан бура: тэ мустöмтан николаитъяслысь уджъяссö. Налысь уджъяссö Ме тшöтш мустöмта. ⁷ Кодлöн эм пель, мед кылö, мый Лов висьталö вичкояслы. Вермысьлы Ме сета сёйны вотöс Олöмыслöн пуысь, кодi сулалö Енлöн рай шöрын». ⁸ «Смирна вичкоса анделлы тадзи гиж: – Со мый висьталö тiянлы Медводдзаыс и Медбöръяыс, кодi вöлi кулöма, но öнi ловъя. ⁹ Ме тöда тэнсьыд уджъястö, сьöкыдалöмтö да гöльлунтö, но тэ – озыр! Тöда, кыдзи тэнö лёкöдöны асьнысö юдейöн шуысьяс, но найö абу юдейяс, найö – сöтана йöз чукöр. ¹⁰ Некутшöм локтана сьöкыдысь эн пов. Öткымынöс тiян пиысь омöльыс йöршитас дзескыдiнö, медым тöдмавны тiянöс. Сэки дас лун чöж тi кутанныд сьöкыдавны. Но тэ помöдзыс ло эскана, и Ме сета тэныд Олöмыслысь юркытш! ¹¹ Кодлöн эм пель, мед кылö, мый Лов висьталö вичкояслы. Вермысьлы мöд кулöмыс нинöм оз вöч». ¹² «Пергам вичкоса анделлы тадзи гиж: – Со мый висьталö тiянлы Сiйö, кодлöн эм кыкнанладорсяньыс лэчтöм ёсь шыпурт. ¹³ Ме тöда тэнсьыд уджъястö. Тэ олан сэнi, кöнi сöтаналöн юралан пуклöсыс, но тэ зумыда кутчысян Менам нимö. Тэ эн соссьы Меным эскöмысь весиг сэки, кор тiянын, сöтана оланiнын, виисны Антипаöс – Менсьым эскана висьталысьöс. ¹⁴ Но Менам эм мыйсюрö тэныд паныд: тiян пöвстын эмöсь найö, кодъяс кутчысьöны Валаамлöн велöдöмö. Сiйö велöдiс Валакöс кежöдны Израиль войтырöс ылöгас, медым найö сёйисны идоллы вайöм сёян да кырсалiсны. ¹⁵ Тiян пöвстын эмöсь тшöтш найö, кодъяс кутчысьöны николаитъяслöн велöдöмö. Татшöм велöдöмсö Ме мустöмта. ¹⁶ Бергöдчы таысь! Он кö бергöдчы, регыд локта тэ дiнö да тышкася накöд Менам вомысь петысь шыпуртöн. ¹⁷ Кодлöн эм пель, мед кылö, мый Лов висьталö вичкояслы. Вермысьлы Ме сета сёйны дзебöм манна, сета сылы еджыд из, код вылын лоö гижöма вермысьлысь выль нимсö. Тайö нимсö кутас тöдны сöмын тайö изсö босьтысьыс». ¹⁸ «Фиатира вичкоса анделлы тадзи гиж: – Со мый висьталö Ен Пи, кодлöн синъясыс ыпъялöны би моз, а кокъясыс дзирдалöны донöдöм ыргöн моз. ¹⁹ Ме тöда тэнсьыд уджъястö, муслунтö, кесъялöмтö, эскöмтö да зумыдлунтö. Тöда, мый воддзаыс дорысь тэ öнi ёнджыка на уджалан. ²⁰ Но Менам эм мыйсюрö тэныд паныд: тэ лэдзан Езавель аньлы, асьсö пророкöн шуысьлы, велöдны да кежöдны ылöгас Менсьым кесйöгъясöс. Тайö аньыс велöдö найöс кырсавны да сёйны идоллы вайöм сёян. ²¹ Ме сетi сылы кад бергöдчыны кырсалöмсьыс, но сiйö эз бергöдчы. ²² Со, ме топöда сiйöс сьöкыд висьöмöн, а сыкöд кырсалысьяслы ме мöдöда уна сьöкыдлун, оз кö найö бергöдчыны асланыс уджъясысь. ²³ Езавельлöн челядьлы Ме мöдöда кулöм. Сэки быд вичко кутас тöдны, мый Ме – сьöлöм пытшкöс да мöвпъяс Тöдысь, Ме быдöнлы мынтыся уджъясныд серти. ²⁴ Тiянлы да фиатираса мукöд олысьяслы, кодъяс эз сетчыны Езавельлöн велöдöмö да эз пырöдчыны сiдз шусяна "сöтаналöн гуся велöдöмö", висьтала со мый: ме ог сьöктöд тiянöс мукöд тшöктöмъясöн. ²⁵ Шуа сöмын: видзöй Менам локтöдз сiйö, мый тiян эм нин. ²⁶ Вермысьлы, кодi помöдз вöчас Менам тшöктöм серти, Ме сета вын ыджыдавны быд войтыр вылын. ²⁷ Сiйö кутас видзны найöс кöрт беддьöн да сёй дозъясöс моз сiйö жуглас найöс торпыригöдз сiйö жö выннас, кутшöм вын Меным сетiс Батьöй. ²⁸ Вермысьлы Ме сета асъя кодзув. ²⁹ Кодлöн эм пель, мед кылö, мый Лов висьталö вичкояслы».

¹ «Сардис вичкоса анделлы тадзи гиж: – Со мый висьталö Сiйö, кодлöн эм Енлöн сизим лолыс да сизим кодзув. Ме тöда тэнсьыд уджъястö. Тэнö лыддьöны ловъяöн, но тэ кулöмыд. ² Садьмöдчы да ёнмöд сiйö, мый тэнад эм, но мый кулан выйын нин. Ме öд аддза, мый тэнад уджъясыд Менам Ен водзын абу тыр-бурöсь. ³ Эн вунöд сiйö, мый кывлiн да сибöдiн. Видз сiйöс сьöлöмад да бергöдчы мыжъяссьыд! Он кö садьмöдчы, локта тэ дiнö гусясьысь моз тöдлытöг. Тэ весиг он тöдлы, кутшöм кадö локта тэ дiнö. ⁴ Дерт, Сардис карын тэнад эм кымынкö морт, кодъяс видзисны ассьыныс паськöмнысö пежасьöмысь. Найö кутасны ветлыны Мекöд еджыд паськöмаöсь, öд найö шогмöны та вылö. ⁵ Вермысь пасьтасяс еджыд паськöмö, и сылысь нимсö ог вушты Олöмыслöн небöгысь. Аслам Бать водзын да Енлöн анделъяс водзын Ме висьтала, мый сiйö – Менам. ⁶ Кодлöн эм пель, мед кылö, мый Лов висьталö вичкояслы». ⁷ «Филадельфия вичкоса анделлы тадзи гиж: – Со мый висьталö Вежаыс да Збыльыс, код ордын Давидлöн восьтаныс. Сiйö восьтö, и некод оз вермы тупкыны. Сiйö тупкö, и некод оз вермы восьтны. Сiйö висьталö: ⁸ "Ме тöда тэнсьыд уджъястö. Со, Ме восьтi тэ водзын öдзöс, и некод оз вермы тупкыны сiйöс. Дерт, тэ жеб, но видзин Менсьым кывъясöс да эн соссьы Менам нимысь. ⁹ Со, Ме сета тэныд сöтана йöз чукöрысь найöс, кодъяс шуöны асьнысö юдейясöн, но найö абу юдейяс, а пöръясьысьяс. Ме вöча тадзи: найö локтасны да уськöдчасны тэнад кок улö. Сэки тöдмаласны, мый тэ – Меным муса. ¹⁰ Ме тшöктi тэныд зумыда сулавны, и тэ видзин Менсьым тшöктöмöс. Та вöсна видза тэнö локтана сьöкыд кадас. Тайö кадыс лоö став му пасьталаыс, медым тöдмавны мувывса олысьясöс. ¹¹ Регыд Ме локта. Бура видз сiйö, мый тэнад эм, медым некод эз мырддьы тэнсьыд юркытштö. ¹² Вермысьöс Ме сувтöда зумыд сюръя пыдди Менам Енлöн крамын, сiйö пыр лоас сэнi. Ме гижа сы вылö Менам Енлысь нимсö, Ассьым выль нимöс да Менам Ен карлысь нимсö. Тайö карыс – выль Ерусалим, кодi лэччас енэжсяньыс, Менам Енсянь". ¹³ Кодлöн эм пель, мед кылö, мый Лов висьталö вичкояслы». ¹⁴ «Лаодикия вичкоса анделлы тадзи гиж: – Со мый висьталö Аминь, эскана да збыль Висьталысь, Енлöн став вöчöмторлы Подулыс. ¹⁵ Ме тöда тэнсьыд уджъястö. Тэ абу пöсь ни абу кöдзыд. Вöлiн кö эськö пöсьöн либö кöдзыдöн! ¹⁶ Но тэ абу пöсь ни абу кöдзыд, тэ муртса дэбыд. Та вöсна быликта тэнö Аслам вомысь. ¹⁷ Тэ шуан: "Ме озыр. Ме ёна нин озырми, менам ставыс эм". Но тэ öмöй он гöгöрво, мый тэ – коньöрсьыс-коньöр, шудтöм, гöль, синтöм да пасьтöм. ¹⁸ Ме туйдöда тэнö. Ньöб Менсьым зарни, биын весалöмаöс, да озырмы. Ньöб Менсьым еджыд паськöм, медым вермин вевттьысьны, медым эз тыдав тэнö янöдан пасьтöм вир-яйыд. Ньöб Менсьым мавтантор да мавт сiйöн синтö, медым аддзин. ¹⁹ Кодi муса Меным, сiйöс ме янöда-чирышта. Сiдзкö, сьöлöмсяньыд зiль бергöдчыны мыжъяссьыд! ²⁰ Со, Ме сулала öдзöс дорад да игöдча. Кодi кылас Менсьым гöлöс шыöс да восьтас Меным, пыра сы ордö да кутам öтвыв сёйны. ²¹ Ме лои Вермысьöн да пукси Аслам Батькöд орччöн Сылöн пуклöсö. Сiдзкö, вермысьöс ме тшöтш пуксьöда Аскöд орччöн Менам пуклöсö. ²² Кодлöн эм пель, мед кылö, мый Лов висьталö вичкояслы».

¹ Сэсся ме видзöдлi енэжас да аддзи сэтысь восьса öдзöс. Сэсянь ме кылi гöлöс шы, сiйö вöлi труба шы кодь. Тайö гöлöс шысö ме водзынджык кывлi нин. Сiйö шуис меным: «Кыпöдчы татчö! Ме петкöдла тэныд, мый лоö та бöрти». ² Дзик пыр ме тыри Лолöн да аддзи енэжсьыс пуклöс да сы вылын Пукалысьöс. ³ Сылöн чужöмыс дзирдалiс дона изъяс моз, яшма да сердолик моз. А пуклöс весьтас югъялiс изумруд рöма öшкамöшка. ⁴ Пуклöс гöгöрыс вöлi нöшта на кызь нёль пуклöс. Сэнi пукалiсны кызь нёль пöрысь. Найö вöлiны еджыд паськöмаöсь, а юр выланыс вöлiны зарни юркытшъяс. ⁵ Пуклöс дiнас чардалiс-гымалiс, да кылiсны гора шыяс. Пуклöс водзас öзйис сизим би, тайö Енлöн сизим лолыс. ⁶ Пуклöс водзас вöлi стеклöысь саридз, сiйö югъялiс крусталь моз. Пуклöс водзас да сы гöгöрыс вöлi нёль енэжвыв олысь. Водзладорсяньыс да бöрладорсяньыс найö дзоньнас вöлi тырöмаöсь синъясöн. ⁷ Öтиыс на пиысь вöлi лев кодь, мöдыс – öшпи кодь, коймöдыс вöлi быттьö морт чужöма, а нёльöдыс вöлi лэбысь кутш кодь. ⁸ Быдöн на пиысь вöлi квайт бордъя, а налöн борд ортсыыс да пытшкöсыс вöлi тырöмаöсь синъясöн. Лун и вой найö дугдывтöг шуалöны: – Вежа, вежа, вежа Господь Ен, Ставсöкутысь, Кодi вöлi, эм и локтас! ⁹ Кор енэжвыв олысьяс ошкöны-нимöдöны да аттьöалöны пуклöс вылын Пукалысьöс, Помтöг Олысьöс, ¹⁰ сэки кызь нёль пöрысьыс уськöдчöны пуклöс вылын Пукалысь водзö да копыртчылöны Помтöг Олысьлы. Ассьыныс юркытшсö пуклöс водзö пуктöмöн найö шуалöны: ¹¹ – Господьöй! Тэ шогман сибöдны ошкöм-нимöдöмсö да вынсö, öд Тэ вöчин ставсö. Тэнад кöсйöм серти вöчöма ставсö, да ставыс олö.

¹ Юралан пуклöс вылын Пукалысьлöн веськыд киысь ме аддзи гартöм гижöд. Сэтчö вöлi гижöма öтарсяньыс и мöдарсяньыс, да пуктöма сы вылö сизим печать. ² Нöшта ме аддзи вына анделöс, сiйö гораа юалiс: «Кодi шогмас разьны тайö гартöм гижöдсö да жугöдны печатьяссö?» ³ Но енэжас, му вылас да му пыдöсас некод эз вермы разьны тайö гижöдсö либö видзöдлыны сэтчö. ⁴ Ме ёна бöрдi, öд некод эз сюр шогманаыс разьны тайö гижöдсö либö видзöдлыны сэтчö. ⁵ Сэки пöрысьяс пиысь öти шуис меным: «Эн бöрд! Со, Лев, Иуда чужанкотырысь, Давид чужанвужйысь! Сiйö – Вермысь, Сiйö разяс тайö гижöдсö да жугöдас сизимнан печатьсö». ⁶ Сэсся ме видзöдлi да аддзи Баляöс. Сiйö сулалiс юралан пуклöс водзын, нёль енэжвыв олысь да пöрысьяс шöрын. Балясö вöлi быттьö начкöма. Сылöн вöлi сизим сюр да сизим син. Сизим синмыс – тайö Енлöн сизим лолыс, кодъясöс мöдöдöма став му пасьталаыс. ⁷ Баляыс матыстчис пуклöс вылын Пукалысь дiнö да босьтiс Сылöн веськыд киысь гартöм гижöдсö. ⁸ Гижöдсö босьтöм бöрын нёль енэжвыв олысьыс да кызь нёль пöрысьыс уськöдчисны Баля водзö. Быдöн на пиысь киас кутiс арфа да ладан тыра зарни доз. Ладан тшыныс – тайö вежа войтырлöн кевмысьöмъясыс. ⁹ Найö сьылiсны выль сьыланкыв: – Тэ шогман босьтны гартöм гижöдсö да жугöдны печатьсö, öд Тэнö вöлi начкöма. Вирыд вылö Тэ ньöбин миянöс Енмыслы быд чужанвужйысь да чужанкотырысь, быд кыла йöз пытшкысь да войтырысь. ¹⁰ Тэ пуктiн миянöс öксыясö да вежа кесъялысьясö миян Енлы. Ми кутам ыджыдавны му вылас. ¹¹ Ме видзöдлi да кылi уна анделлысь гöлöс шысö. Найö кытшалiсны Енлысь пуклöссö, нёль енэжвыв олысьöс да пöрысьясöс. Анделъяслöн лыдыс вöлi лыдтöм-тшöттöм – сё миллионъясöн. ¹² Найö гораа шуалiсны: – Начкöм Баляыс шогмана сибöдны вынсö, озырлунсö, мывкыдлунсö, ёнлунсö, ошкöм-нимöдöмсö да дзирдлунсö! ¹³ Ме кылi, мый став олысьыс енэжас, му вылас, му пыдöсас да саридзас шуалiсны: – Юралан пуклöс вылын Пукалысьлы да Балялы ошкöм-нимöдöмыс, дзирдлуныс да ыджыдалöмыс нэмъяс чöж! ¹⁴ Сэки енэжвыв нёль олысьыс шуисны: «Аминь!» А кызь нёль пöрысьыс уськöдчисны да копыртчылiсны Помтöг Олысьлы.

¹ Ме аддзи: Баля жугöдiс сизим печать пиысь медводдзасö. Сэсся ме кылi гым кодь гора шы: «Лок да видзöд!» Тайöс шуис нёль енэжвыв олысь пöвстысь öтиыс. ² Ме видзöдлi да аддзи еджыд вöлöс, а сы вылын верзьöма пукалiс. Сылöн киас вöлi ньöввуж, сылы вöлi сетöма юркытш. Сiйö мунiс вермысь моз, да бара на вöлi дась вермыны. ³ Кор Баля жугöдiс мöд печатьсö, ме кылi мöд енэжвыв олысьлысь шуöмсö: «Лок да видзöд!» ⁴ Сэки петiс мöд вöв, сiйö вöлi би гöрд рöма. Сы вылын пукалысьлы вöлi сетöма вын – босьтны му вылысь лöньлунсö, медым йöзыс виалiсны öта-мöднысö. Сылы вöлi сетöма ыджыд шыпурт. ⁵ Кор Баля жугöдiс коймöд печатьсö, ме кылi коймöд енэжвыв олысьлысь шуöмсö: «Лок да видзöд!» Ме видзöдлi да аддзи сьöд вöлöс. Сы вылын пукалысьлöн киас вöлi вески. ⁶ Сэсся нёль енэжвыв олысь шöрысь ме кылi кодлыськö гöлöс шысö. Сiйö шуис: «Öти хиникс шобдiысь – öти динар. Куим хиникс идйысь – тшöтш сы мында. Но выйсö да винасö эн тшыкöд!» ⁷ Кор Баля жугöдiс нёльöд печатьсö, ме кылi нёльöд олысьлысь шуöмсö: «Лок да видзöд!» ⁸ Ме видзöдлi да аддзи быгалöм рöма вöлöс да сы вылын пукалысьöс, кодлöн нимыс – Кулöм. Сы бöрся вöтчис ачыс Адыс. Налы вöлi сетöма ыджыдалан вын мулöн нёльöд юкöныс вылын: виавны йöзсö шыпуртöн да тшыгйöдöмöн, кулан висьöмъясöн да зверъяс отсöгöн. ⁹ Кор Баля жугöдiс витöд печатьсö, висьпуктанiн улысь ме аддзи ловъяссö налысь, кодъясöс вöлi виöма Ен Кыв вöсна да Ен йылысь висьталöм вöсна. ¹⁰ Найö гораа горöдiсны: «Вежа да збыль Ыджыдöй! Кор нин Тэ мыждан мувывса олысьясöс да перъян налысь водзöссö миян вир вöсна?» ¹¹ Сэки быдöнлы налы сетiсны еджыд паськöм да тшöктiсны на виччысьыштны, кытчöдз оз тыр на моз виöмаяслöн лыдыс – налöн вокъяслöн да öтвыв уджалысьяслöн лыдыс. ¹² Кор Баля жугöдiс квайтöд печатьсö, ме аддзи: муыс кутiс ёна вöрны, шондiыс пемдiс да лои сьöд дöра кодь, а тöлысьыс лои вир гöрд рöма. ¹³ Енэжсьыс кодзувъясыс усины му вылö инжир вотöс моз, кор найö гылалöны пу вывсьыс ён тöвнырысь. ¹⁴ Енэжыс гартыштчис тубрасö да саялiс, а керöсъяс да дiяс вешйисны асланыс местаысь. ¹⁵ Мувывса öксыяс, юралысьяс, озыръяс, тышкайöзöн веськöдлысьяс, ыджыдалысьяс, кесйöгъяс да мездлуна йöз, – ставныс дзебсисны кырта горсъясö да керöс потасъясö. ¹⁶ Керöсъяслы да кырталы найö шуалiсны: «Усьöй миян вылö да дзебöй миянöс юралан пуклöс вылын Пукалысьлöн синъясысь да Балялöн скöрлунысь! ¹⁷ Öд Сылöн ыджыд Скöралан луныс воис нин. Кодi вермас Сылы паныд сувтны?»

¹ Та бöрти ме аддзи нёль анделöс. Найö сулалiсны мулöн нёльнан пельöсас да кутiсны мулысь нёльнан тöвнырсö, медым тöлыс эз пöльт му вылö, саридз вылö да некутшöм пу вылö. ² Сэсся ме аддзи нöшта öти анделöс. Сiйö кыпöдчис асыввывсянь, а киас кутiс ловъя Енлысь пас пуктансö. Сiйö гораа шыасис нёль андел дiнö, кодъяслы вöлi сетöма вын вöчны лёксö мулы да саридзлы. Андел шуис: ³ «Энö вöчöй лёксö мулы, саридзлы да пуяслы, кытчöдз огö пуктöй плешканыс пас миян Енлöн кесйöгъяслы». ⁴ Сэсся ме кылi пасйöмаяслысь лыдсö. Тайö лыдыс вöлi сё нелямын нёль сюрс морт. Найö вöлiны Израиль войтырлöн быд чужанкотырысь: ⁵ Иуда чужанкотырысь – дас кык сюрс морт, Рувим чужанкотырысь – дас кык сюрс, Гад чужанкотырысь – дас кык сюрс, ⁶ Асир чужанкотырысь – дас кык сюрс, Неффалим чужанкотырысь – дас кык сюрс, Манассей чужанкотырысь – дас кык сюрс, ⁷ Симеон чужанкотырысь – дас кык сюрс, Левий чужанкотырысь – дас кык сюрс, Иссакар чужанкотырысь – дас кык сюрс, ⁸ Завулон чужанкотырысь – дас кык сюрс, Öсип чужанкотырысь – дас кык сюрс да Вениамин чужанкотырысь – дас кык сюрс морт. ⁹ Сэсся ме видзöдлi да аддзи: юралан пуклöс водзын да Баля водзын сулалiс лыдтöм-тшöттöм йöз чукöр. Найö вöлiны быд чужанвужйысь да чужанкотырысь, быд кыла йöз пытшкысь да войтырысь. Найö вöлiны еджыд паськöмаöсь, а кианыс кутiсны пальма росъяс ¹⁰ да гораа горзiсны: – Мездмöмыс – миян Енсянь – юралан пуклöс вылын Пукалысьсянь да Балясянь! ¹¹ Сэки став анделыс, кодъяс кытшалiсны юралан пуклöссö, пöрысьясöс да нёль енэжвыв олысьсö, кымынь уськöдчисны пуклöс водзö да копыртчылiсны Енмыслы. ¹² Найö шуалiсны: – Аминь! Дзирдлуныс да мывкыдлуныс, выныс да ёнлуныс, ошкöм-нимöдöмыс да аттьöалöмыс миян Енлы нэмъяс чöж! Аминь. ¹³ Сэки пöрысьяс пöвстысь öти юалiс менсьым: «Тайö еджыд паськöмаясыс – найö кодъяс? Кытысь найö локтiсны?» ¹⁴ «Ыджыдöй, тэ ачыд тöдан», – вочавидзи ме. Сэки сiйö шуис меным: – Тайö йöзыс мунiсны уна сьöкыд пыр. Найö мыськисны ассьыныс паськöмсö Баля Вирöн, да налöн паськöмыс лои еджыд. ¹⁵ Та вöсна найö сулалöны Ен пуклöс водзын да лун и вой кесъялöны Енмыслы Сылöн крамын. Пуклöс вылын Пукалысьыс пыр лоö накöд да видзö найöс. ¹⁶ Найö оз нин кутны тшыгъявны, налöн оз косьмы горшыс, найöс оз пöж шондiыс да оз сот гожйыс. ¹⁷ Öд Баляыс, пуклöс водзын Сулалысьыс, кутас видзны найöс, Сiйö вайöдас найöс ловъя ва визувтанiнö, да Енмыс чышкас налысь став синвасö.

¹ Кор Баля жугöдiс сизимöд печатьсö, енэжас час джын мында кежлö лои чöв-лöнь. ² Ме аддзи Ен водзын сулалысь сизим анделöс, налы вöлi сетöма сизим труба. ³ Сэсся матыстчис нöшта öти андел да сувтiс тшынöдчан пызан водзö. Киас сiйö кутiс зарни тшынöдчан доз. Сылы вöлi сетöма уна ладан, медым тшынöдны сiйöс став вежа войтырлöн кевмысьöмъяснас зарни тшынöдчан пызан вылын, кодi сулалiс юралан пуклöс водзын. ⁴ Сэки андел киысь кыптiс Енмыслы вежа войтырлöн кевмысьöмъяснас ладан тшын. ⁵ Сэсся андел босьтiс тшынöдчан доз, пуктiс сэтчö висьпуктанiнысь бисö да шыбитiс сiйöс му вылö. Сэнi кылiсны гора шыяс, чардалiс-гымалiс, да муыс вöрис. ⁶ Сэки сизимнан анделыс, кодъяслöн вöлi сизим труба, дасьтысисны трубитны. ⁷ Кор трубитiс медводдза анделыс, му вылö киссис вир сора биа шер. Сэки сотчис пуяслöн коймöд юкöныс да став веж туруныс. ⁸ Кор трубитiс мöд анделыс, быттьö ыджыд сотчысь керöс уси саридзас, да саридзлöн коймöд юкöныс пöри вирö. ⁹ Сэки саридзын олысьяслöн коймöд юкöныс кулiс, да корабльяслöн коймöд юкöныс вöйис. ¹⁰ Кор трубитiс коймöд анделыс, енэжсьыс уси ыджыд кодзув, кодi ыпъялiс яръюгыд би моз. Сiйö уси юяслöн коймöд юкöныс вылö да ва петанiнъясö. ¹¹ Тайö кодзулыслöн нимыс Курыд турун. Ваыслöн коймöд юкöныс лои зэв курыд, та вöсна уна йöз кулiсны. ¹² Кор трубитiс нёльöд анделыс, шондiлöн, тöлысьлöн да кодзувъяслöн коймöд юкöныс кусiс, налöн коймöд юкöныс пемдiс. Та вöсна луныслöн да войыслöн коймöд юкöныс вöлi пемыд. ¹³ Сэсся ме аддзи енэж шöрöдыс лэбысь анделöс. Сiйö гораа горзiс: «Шог, шог, шог тiянлы, мувывса олысьяслы, мукöд куим анделлöн трубитöмысь, öд найö регыд нин пондасны трубитны!»

¹ Кор трубитiс витöд анделыс, ме аддзи: енэжсянь му вылö усис кодзув. Сылы вöлi сетöма пыдöстöминысь восьтансö. ² Кор сiйö восьтiс пыдöстöминсö, сэтысь ыджыд пачысь моз пуркнитiс тшын. Тайö тшынсьыс пемдiс шондiыс и сынöдыс. ³ Тшын пытшсьыс петiс му вылö саранча чукöр. Налы вöлi сетöма мувывса скорпионъяслöн кодь вын. ⁴ Налы вöлi шуöма, медым эз вöчны неткутшöм лёктор турунлы, быдмöглы либö пулы, сöмын йöзыслы, кодъяслöн плешкас абу Енлöн пасыс. ⁵ Саранчаяслы вöлi шуöма, медым найö эз виавны йöзöс, сöмын мучитiсны найöс вит тöлысь чöж. Налысь мучитöмсö позьö öткодявны скорпионлöн чушкöмкöд. ⁶ Сiйö лунъясö йöзыс кутасны корсьны кулöмсö, но оз аддзыны сiйöс, кöсъясны кувны, но кулöмыс пышъяс наысь. ⁷ Саранчаясыс вöлiны тышö петысь вöвъяс кодьöсь. Юр выланыс налöн вöлi зарни юркытш сяма, а чужöмыс налöн вöлi мортлöн кодь. ⁸ Налöн вöлi аньлöн кодь юрси, а налöн пиньясыс вöлiны левлöн пиньяс кодьöсь. ⁹ На вылын вöлi кышöд, быттьö кöртысь дорöма. Налöн бордъясыс швачкисны сэтшöм гораа, быттьö зэв уна телегаа вöв чукöр котöртiс тышö. ¹⁰ Налöн бöжъясыс вöлiны скорпионлöн кодьöсь, а бöжъясас вöлiны чушканъяс. Налöн вöлi вын вöчны йöзыслы лёксö вит тöлысь чöж. ¹¹ Налöн öксынас вöлi пыдöстöминысь андел. Сылöн нимыс еврей ногöн лоö Авадон, а грек ногöн – Аполион. ¹² Öти шог мунiс, сы бöрся нöшта кык шог локтö. ¹³ Кор трубитiс квайтöд анделыс, ме кылi гöлöс шы. Сiйö кылiс зарни висьпуктанiнлöн нёль сюрсянь. Тайö висьпуктанiныс сулалiс Ен водзын. ¹⁴ Тайö гöлöс шыыс шуис квайтöд анделыслы, кодлöн вöлi труба: «Мезды нёльнан анделсö, кодъясöс кöрталöма ыджыд Евфрат ю дорö». ¹⁵ Сэки нёльнан анделсö вöлi мездöма. Найöс вöлi дасьтöма тайö часыс, луныс, тöлысьыс да воыс кежлö, медым вины йöзыслысь коймöд юкöнсö. ¹⁶ Тайö анделъясыслöн вöлi кыксё миллион тышка морт вöвъяснас. Тайö лыдсö ме ачым кывлi. ¹⁷ Тайö вöвъяссö да тышкайöзсö ме аддзылi вемöсöн. Найö вöлiны татшöмöсь: верзьöмаяс вылын вöлiны би гöрд, пемыдлöз да кольквиж рöма кöрт кышöдъяс. Вöвъяслöн юрныс вöлi левъяслöн юр кодьöсь, налöн вомысь петiс би, тшын да сера. ¹⁸ Тайö куим бырöданторсьыс: биысь, тшынысь да сераысь, кодъяс петiсны вöвъяслöн вомысь, кулiс йöзлöн коймöд юкöныс. ¹⁹ Вöвъяслöн выныс вöлi налöн вомас да бöжас. Налöн бöжъясыс вöлiны змей кодьöсь, öд бöжъясыс вöлiны юраöсь. Тайö юрнас найö чушкисны. ²⁰ Мукöд йöзыс, кодъяс колины ловйöн тайö бырöданторъяссьыс, эз бергöдчыны асланыс лёк уджъясысь. Найö важ мозыс копрасисны мутияслы да зарниысь, эзысьысь, ыргöнысь, изйысь да пуысь вöчöм идолъяслы, кодъяс оз вермыны аддзыны, кывны ни ветлыны. ²¹ Найö эз бергöдчыны морт виöмысь, тшыкöдчöмысь, кырсалöмысь да гусясьöмысь.

¹ Ме аддзи нöшта öти вына анделöс, кодi лэччис енэжсяньыс. Сiйöс кытшалiс кымöрыс, сы юр весьтын вöлi öшкамöшка. Сылöн чужöмыс вöлi шондi кодь, а кокъясыс вöлiны биа сюръяяс кодьöсь. ² Киас сiйö кутiс неыджыд восьса гижöд. Веськыд кокнас сiйö сувтiс саридз вылö, а шуйганас – му вылö, ³ сэсся горöдiс ыджыд шыöн, быттьö лев равöстiс. Сылöн горöдöм бöрын сизим гым кутiсны гораа сёрнитны. ⁴ Сизим гым сёрнитöм бöрын ме кöсйи гижны налысь сёрнисö, но енэжсяньыс ме кылi гöлöс шы. Сiйö шуис меным: «Сизим гымлысь сёрнисö эн гиж, дзеб сiйöс». ⁵ Сэки андел, кодöс ме аддзылi саридз да му вылын öтпырйö сулалысьöн, лэптiс веськыд кисö енэжланьыс ⁶ да кöсйысис Помтöг Олысьöн, кодi вöчис енэжсö да сэнi олысьясöс, мусö да сы вылын олысьясöс, саридзсö да сы пытшкын олысьясöс. Сiйö сетiс кыв: «Кадыс оз нин ло. ⁷ Но сiйö лунö, кор кылас сизимöд анделлöн трубитöм шыыс, сэки збыльмас Енлöн гуся мöвпыштöмыс, мый йылысь Енмыс водзвыв висьталiс пророкъяслы – Аслас кесйöгъяслы». ⁸ Сэсся енэжсяньыс бара кылiс гöлöс шы, кодöс ме кывлi нин. Сiйö шуис меным: «Мун андел дiнö, кодi сулалö саридз да му вылын, да босьт сылöн киысь восьса гижöдсö». ⁹ Ме матыстчи андел дiнö да кори сылысь гижöдсö. Сiйö шуис меным: «Босьт да сёй тайö гижöдсö. Сiйö лоö юмов ма кодь вом пытшкад, но гырк пытшкад лоö курыд». ¹⁰ Андел киысь ме босьтi гижöдсö да сёйи. Менам вомын сiйö вöлi юмов ма кодь. Но бöрыннас менам гырк пытшкöй ёна курдiс сыысь. ¹¹ Сэсся андел шуис меным: «Тэныд бара на ковмас водзвыв висьтавлыны, мый лоö уна войтыркöд да чужанкотыркöд, уна йöзкöд да öксыяскöд».

¹ Меным сетiсны кузь мурталан бедь да шуисны: «Мун да муртав Енлысь крамсö, висьпуктанiнсö да лыддьы крамас юрбитысьяслысь лыдсö. ² Крамлысь ортсы йöрсö эн муртав, сiйöс оз ков муртавны, öд сiйöс сетöма ентöдтöмъяслы. Найö кутасны талявны вежа карсö нелямын кык тöлысь чöж. ³ Ме мöдöда Ассьым кык висьталысьöс. Чорыд дукöсö пасьтасьöмöн найö кутасны пророкавны сюрс кыксё квайтымын лун чöж». ⁴ Тайö висьталысьясыс – кык выя пу да кык бикок, кодъяс сулалöны став мунас веськöдлысь Ен водзын. ⁵ Кодкö кöсъяс кö налы лёк вöчны, на вомысь петас би да ньылыштас налы паныд мунысьясöс. Тадзи быдöнöс, налы лёк вöчысьясöс, лоö бырöдöма. ⁶ Налöн эм вын тупкыны енэжсö, медым налöн висьтавлiгöн эз зэр. Налöн эм вын пöртны васö вирö да тшыкöдны мусö быдпöлöс бырöданторнас, кор сöмын кöсъясны. ⁷ Кор найö дугдасны висьтавлыны, сэки пыдöстöминысь петас звер да кутас тышкасьны накöд. Зверыс вермас найöс да виас. ⁸ Налöн шойясыс кутасны куйлыны ыджыд карлöн туй вылас. Тайö карсö позьö öткодявны Содомкöд да Египеткöд, öд тайö карас вöлi тувъялöма налысь Господьöс. ⁹ Быд кыла йöз пытшкысь да войтырысь, быд чужанвужйысь да чужанкотырысь унаöн кутасны видзöдны налöн шойяс вылö куим лун да джын, но оз лэдзны гуавны найöс. ¹⁰ Мувывса йöзыс кутасны нимкодясьны да гажöдчыны, весиг козьналасны öта-мöдныслы козинъяс, öд тайö кык висьталысьыс ёна мучитiсны найöс. ¹¹ Но куим лун да джын мысти Енмыс пöльыштiс тайö кык висьталысьыс пытшкö олöмыслысь ловсö, да найö чеччисны. Сэки на вылö видзöдысьяс ёна повзисны. ¹² Висьталысьяс кылiсны енэжсяньыс гора шы. Сiйö шуис налы: «Кыпöдчöй татчö!» Сэки найö кыпöдчисны енэжас кымöр вылын, а налы паныд мунысьяс видзöдiсны на вылö. ¹³ Дзик пыр муыс кутiс ёна вöрны, да карыслöн дасöд юкöныс киссис. Му вöригас кулiс сизим сюрс морт, а мукöдыс ёна повзисны да ошкисны енэжвывса Енмöс. ¹⁴ Мöд шогыс помасис, но матысмö нин коймöд шог. ¹⁵ Сизимöд анделыс трубитiс, и енэжас кылiсны гора шыяс. Найö шуалiсны: – Став муюгыдыс лои миян Господьлöн да Сылöн Мавтыштöмалöн юраланiнöн. Сiйö кутас юравны нэмъяс чöж! ¹⁶ Сэки кызь нёль пöрысьыс, кодъяс пукалiсны Ен водзын юралан пуклöсъяс вылын, кымынь уськöдчöмöн копыртчылiсны Енмыслы. ¹⁷ Найö шуалiсны: – Господьöй Енмöй, Ставсöкутысьöй! Ми аттьöалам Тэнö. Тэ эм, вöлiн и лоан! Тэ босьтiн ыджыдалан вынсö Аслад киö, кутiн веськöдлыны ставнас. ¹⁸ Ентöдтöмъяс ёна скöралiсны, но öнi воис Тэнад скöрлуныд. Воис кад мыждыны кулöмаясöс да сетны тырдон Тэнад кесйöгъяслы – пророкъяслы да вежа войтырлы, да Тэнад нимысь полысьяслы – ичöтъяслы и гырысьяслы. Воис кад бырöдны найöс, кодъяс тшыкöдiсны мусö. ¹⁹ Енэжас воссис Енлöн крамыс, и сэтысь тыдовтчис Йитöдлöн куд. Сэки кутiс чардавны-гымавны, кылiсны гора шыяс, муыс кутiс вöрны, да киссис гырысь шер.

¹ Сэсся енэжсьыс ме аддзи ыджыд индысьпас. Ань вöлi гартыштчöма шондiöн. Сылöн кок улас вöлi тöлысь, а юр вылас – дас кык кодзулысь юркытш. ² Сiйö вöлi кынöма, да ёна горзiс чужтан дойсьыс. ³ Сэсся енэжас лои мöд индысьпас. Ме аддзи би гöрд рöма ыджыд гундырöс. Сiйö вöлi сизим юра да дас сюра, а быд юр вылын вöлi юркытш. ⁴ Бöжнас сiйö чышкыштiс енэжсьыс кодзувъяслысь коймöд юкöнсö да шыбитiс найöс му вылö. Сэсся гундыр сувтiс чужтысь аньлы воча, медым чужтöм бöрас сёйны сылысь пузчужöм кагасö. ⁵ Ань чужтiс пиöс, тайö кагаыс кутас веськöдлыны кöрт беддьöн став йöзнас. Аньлысь кагасö вöлi кыпöдöма Ен дiнö, Сылöн юралан пуклöс дiнö. ⁶ Ачыс аньыс пышйис овтöминö. Сэнi Енмыс дасьтöма вöлi оланiн, медым вердны тайö аньсö сюрс кыксё квайтымын лун чöж. ⁷ Сэсся енэжас пансис тыш. Микаил аслас анделъяскöд тышкасис гундырлы паныд, а гундыр аслас анделъяскöд – налы паныд. ⁸ Но гундырöс вöлi вермöма, и сылы да сылöн анделъяслы эз ло местаыс енэжас. ⁹ Ыджыд гундырöс, важ змейöс, вöлi шыбитöма му вылö. Сылöн нимыс – омöль да сöтана. Сiйö ылöдлö муюгыдас став олысьсö. Сыкöд тшöтш вöлi шыбитöма му вылас сылысь анделъяссö. ¹⁰ Сэки ме кылi енэжсянь гора шы: – Öнi воис мездмöмыс, выныс, миян Енлöн юралöмыс да Сылöн Мавтыштöмалöн ыджыдалöмыс. Öд енэжсьыс шыбитöма мыждысьöс. Лун и вой сiйö мыждiс вокъяснымöс миян Ен водзын. ¹¹ Миян вокъяс вермисны мыждысьöс Балялöн Вирöн да збыльсö висьталöмöн. Найö дасьöсь вöлi сетны ассьыныс олöмнысö да эз повны кулöмысь. ¹² Сiдзкö, енэжыс да став сэнi олысьыс, нимкодясьöй! Но курыд шог тiянлы, му вылын да саридзын олысьяслы, öд тiян дiнö лэччис омöльыс! Сiйö тырöма ыджыд скöрлунöн, öд сiйö тöдö, мый сылöн кадыс этша нин. ¹³ Кор гундыр аддзис, мый сiйöс шыбитöма му вылö, сiйö кутiс вöтлысьны пи чужтысь ань бöрся. ¹⁴ Аньлы вöлi сетöма ыджыд кутшлысь кык борд, медым сiйö лэбзис змейысь овтöминö, сылы дасьтöминö. Сэнi кутасны вердны сiйöс куим во да джын. ¹⁵ Аньöс вöтöдiгöн змей быликтiс аслас вомысь ю мында ва, медым кылöдны аньöс, ¹⁶ но муыс отсалiс аньлы. Муыс воссис да ньылыштiс гундыр вомысь петöм юсö. ¹⁷ Гундыр ёна скöрмис ань вылö да мунiс тышкасьны сылöн мукöд челядькöд, кодъяс олöны Ен тшöктöм серти да кутчысьöны Исус Кристослöн висьталöмö.

¹ Сэсся ме сувтi саридз дорö да аддзи саридзысь петöм зверöс. Сiйö вöлi сизим юра да дас сюра. Быд сюрын вöлi öти юркытш, а юръясас вöлi гижалöма Енмöс лёкöдана нимъяс. ² Зверыс, кодöс ме аддзылi, вöлi леопард кодь. Сылöн кокъясыс вöлiны ошлöн кодьöсь, а вомыс – левлöн кодь. Гундыр сетiс сылы ассьыс вынйöрсö, юралан пуклöссö да ыджыдалан вынсö. ³ Ме аддзи: зверлöн öти юрыс вöлi кувмöн доймöма, но тайö кулан дойыс бурдiс. Став мувывса йöзыс таысь ёна шензисны да вöтчисны звер бöрся. Найö копыртчылiсны гундырлы, кодi сетiс зверлы ыджыдалан вынсö. ⁴ Сэсся найö копыртчылiсны зверлы да шуалiсны: – Кодöс позьö öткодявны тайö зверыскöд? Кодi вермас тышкасьны сыкöд? ⁵ Зверлы вöлi сетöма позянлун тшапа сёрнитны да омöльтны Енмöс лёкöдана кывъясöн. Сылы вöлi сетöма вын вöчны тадзи нелямын кык тöлысь чöж. ⁶ Сiйö паськöдiс вомсö да кутiс лёкöдны Енмöс, Сылысь нимсö, оланiнсö да енэжвыв олысьясöс. ⁷ Сылы вöлi сетöма вын тышкасьны вежа войтыркöд да вермыны найöс. Сылöн вöлi вын ыджыдавны быдпöлöс чужанвуж да чужанкотыр вылын, быд кыла йöз да быд войтыр вылын. ⁸ Сылы копыртчыласны мувывса став йöзыс, кодъяслысь нимсö му пуксьöмсяньыс абу гижöма начкöм Балялöн небöгö – Олöмыслöн небöгö. ⁹ Кодлöн эм пель, мед кылö тайö кывъяссö: ¹⁰ Кодi мöд мортсö дзескыдiнö пуксьöдас, ачыс сэтчö веськалас. Кодi шыпуртöн виас, ачыс шыпуртсянь кулас. Татшöм кадас вежа войтырлы колö зумыдлун да эскöм. ¹¹ Сэсся ме аддзи мöд зверöс, кодi петiс му пытшкысь. Сылöн вöлi балялöн кодь кык сюр, но сёрнитiс сiйö гундыр моз. ¹² Сiйö ставсö вöчö воддза зверыслöн син водзын, сылöн ыджыдалан выннас. Став мусö да сэнi олысьясöс сiйö тшöктö копрасьны воддза зверыслы, кодлöн бурдiс кулан дойыс. ¹³ Сiйö вöчö ыджыд шензьöданаторъяс: йöз син водзын сiйö енэжсяньыс уськöдö би му вылö. ¹⁴ Став шензьöданаторсö сiйö вöчö воддза зверыслöн син водзын. Тайö шензьöданаторъяснас сiйö ылöдлö мувывса йöзсö. Сiйö тшöктö йöзыслы вöчны воддза зверыслысь серпассö. Тайö зверсö вöлi дойдöма шыпуртöн, но сiйö ловзис. ¹⁵ Мöд зверыслы вöлi сетöма вын: ловзьöдны воддза зверыслысь серпассö, медым тайö серпасыс сёрнитiс да тшöктiс виавны быдöнöс, кодi оз копыртчыв тайö серпасыслы. ¹⁶ Сiйö тшöктö быдöнлы – ичöтлы и гырысьлы, озырлы и гöльлы, мездлуна мортлы и кесйöглы – пуктыны пас налöн веськыд киас либö плешкас. ¹⁷ Сэки некод оз вермы ньöбны ни вузавны, оз кö ло сылöн тайö пасыс: зверлöн нимыс либö сы нимлöн лыдпасыс. ¹⁸ Танi колö мывкыдлун. Кодлöн эм вежöр, сiйö мед гöгöрвоö звер нимлысь лыдпассö, öд тайö мортлöн лыдпасыс. Тайö лыдпасыс – квайтсё квайтымын квайт.

¹ Сэсся ме видзöдлi да аддзи: Сион керöс вылын сулалiсны Баля да Сыкöд орччöн сё нелямын нёль сюрс морт. Налöн плешканыс вöлi гижöма Сылöн Батьлысь нимсö. ² Ме кылi енэжсяньыс шы. Сiйö вöлi уна валöн бузгысь шы кодь да чорыд гым шы кодь. Сiйö юргис, быттьö арфаöн ворсiсны. ³ Тайö йöзыс сьылiсны выль сьыланкыв юралан пуклöс водзын, нёль енэжвыв олысь да пöрысьяс водзын. Тайö сьыланкывсö некод эз куж сьывнысö. Сiйöс сьылiсны сöмын сё нелямын нёль сюрс морт, кодъясöс ньöбöма му вывсьыс. ⁴ Тайö йöзыс эз пежавны асьнысö аньяскöд узьлöмöн, найö сöстöмöсь. Найö мунöны Баля бöрся быдлаö, кытчö Сiйö мунö. Найöс ньöбöма мувывса йöз пöвстысь, найö – медводдза вайöмтор Енмыслы да Балялы. ⁵ Налöн вомысь некор эз петлыны пöръясян кывъяс, Ен пуклöс водзын найö мыжтöмöсь. ⁶ Сэсся ме аддзи нöшта öти анделöс, кодi лэбис енэж шöрöдыс. Сылöн вöлi помасьлытöм Евангелльö, медым висьтавлыны сiйöс мувывса олысьяслы: быд чужанвужлы да чужанкотырлы, быд кыла йöзлы да войтырлы. ⁷ Сiйö гораа шуалiс: «Полöй Енсьыс да ошкöй Сiйöс! Öд воис Сылöн Мыждан луныс. Копыртчылöй Сылы, кодi вöчис енэжсö да мусö, саридзсö да ва петанiнъяссö!» ⁸ Воддза анделыс бöрся лэбис мöд андел да горзiс: «Киссис, киссис Вавилон, ыджыд кар, öд сылöн кырсалöм понда став йöзыслы ковмис юны Ен скöрлуна вина». ⁹ Кык андел бöрся лэбис нöшта öти андел. Сiйö гораа шуалiс: «Кодi копыртчылас зверлы да сылöн серпаслы да сетас пуктыны зверлысь пассö плешкас либö ки вылас, ¹⁰ сiйö кутас юны Ен скöрлуна вина, соравтöм вина, кодöс сулöдöма Ен скöрлуна чашаын. Сiйö кутас мучитчыны биын да сотчысь сераын вежа анделъяс водзын да Баля водзын. ¹¹ Найöс мучитан билöн тшыныс кутас кыпöдчыны нэмъяс чöж. Найö, кодъяс копыртчыласны зверлы да сылöн серпаслы да сетасны пасйыны асьнысö сылöн нимöн, оз кутны тöдны шойччöгсö лунын ни войын. ¹² Сiдзкö, вежа войтырлы – Ен тшöктöм серти олысьяслы да Исуслы эскысьяслы – колö лоны зумыдöн». ¹³ Сэсся ме кылi енэжсянь гöлöс шы. Сiйö шуис меным: «Гиж тайöс: "Шудаöсь найö, кодъяс öнiсянь куласны Господьлы эскöмöн. Тайö тадзи, – шуö Лов. Найö кутасны шойччыны асланыс сьöкыд уджъясысь, öд налöн уджъясыс мунöны на бöрся"». ¹⁴ Ме видзöдлi да аддзи еджыд кымöр, а сы вылын кодкö Морт Пи кодь пукалiс. Сылöн юр вылас вöлi зарни юркытш, а киас – лэчыд чарла. ¹⁵ Сэсся крамсьыс петiс öти андел да гораа горöдiс кымöр вылын Пукалысьлы: «Босьт ассьыд чарлатö да вунды, öд вундан кадыс воис нин. Му вылын кöдзасыс воöма». ¹⁶ Кымöр вылын Пукалысь шыбитiс ассьыс чарласö му вылö, и кöдзасыс лои вундöма. ¹⁷ Енэжвыв крамысь петiс мöд андел, сылöн тшöтш вöлi лэчыд чарла. ¹⁸ Сэсся висьпуктанiнсянь петiс нöшта öти андел, сылöн вöлi вын би вылын. Сiйö гораа горöдiс лэчыд чарлаа анделлы: «Босьт лэчыд чарлатö да вунды му вылысь виноград розъяссö, öд сылöн вотöсыс кисьмöма нин». ¹⁹ Андел шыбитiс ассьыс чарласö му вылö да вундiс му вылысь виноград розъяссö. Сiйö шыбитiс найöс ыджыд гуö, Ен скöрлуна пычкан гуö. ²⁰ Виноград вотöссö вöлi талялöма кар ортсыас, пычкан гуын. Сэтысь вирыс петiс ортсö да визувтiс сюрс квайтсё стадий ылнаöдз, а джуджтаыс сылöн вöлi вöв домöдз.

¹ Сэсся енэжсьыс ме нöшта на аддзи шензьöдана да ыджыд индысьпас. Ме аддзи сизим анделöс, кодъяслöн вöлi бöръя сизим бырöданторйыс. Тайö бырöданторъяснас помасис Енлöн скöрлуныс. ² Ме аддзи саридз, сiйö вöлi стеклö кодь да пöртмасис биöн. Стеклö саридз дорас сулалiсны найö, кодъяс тышкасисны зверкöд, сылöн серпасыскöд да сы нимлöн лыдпасыскöд да петiсны вермысьясöн. Найö кутiсны кианыс Енлысь арфаяссö ³ да сьылiсны Ен кесйöг Мöисейлысь да Балялысь сьыланкывсö: – Господьöй Енмöй, Ставсöкутысьöй! Тэнад уджъясыд ыджыдöсь да шензьöданаöсь, Тэнад туйясыд веськыдöсь да збыльöсь! Тэ – Öксыыс вежа войтырлы! ⁴ Господьöй, сюрас-ö сэтшöм морт, кодi оз повзьы Тэысь да оз ошкы Тэнсьыд нимтö? Öд Тэ öтнадöн – вежаыс! Быд войтырысь локтасны да копыртчыласны Тэныд, öд воссис Тэнад веськыда мыждöмыд! ⁵ Сэсся ме видзöдлi да аддзи: енэжас воссис крам – Енлöн скинияыс. ⁶ Крамысь петiсны сизим андел, кодъяслöн вöлi сизим бырöданторйыс. Найö вöлi пасьтасьöмаöсь сöстöм да лым еджыд шабдi паськöмö, а морöс весьтöдыс вöлi вöнясьöмаöсь зарни вöньöн. ⁷ Нёль енэжвыв олысь пöвстысь öтиыс сетiс сизим анделлы сизим зарни чаша. Тайö чашаяссö вöлi тыртöма Помтöг Олысь Енлöн скöрлунöн. ⁸ Енлöн дзирдлунысь да Сылöн вынысь крамыс тырис тшынöн. Крамас некод эз вермы пырнысö, кытчöдз эз помась сизим анделлöн сизим бырöданторйöн удж вöчöмыс.

¹ Сэсся крамсьыс ме кылi гора гöлöс шы. Сiйö шуис сизим анделлы: «Мунöй да кисьтöй Ен скöрлуна сизим чашасö му вылö». ² Медводдза анделыс петiс да кисьтiс ассьыс чашасö му вылö. Сэки найö, кодъяс новлöдлiсны зверлысь пассö да копрасисны сылöн серпаслы, вевттьысисны чорыд орзьöм дойясöн. ³ Мöд анделыс кисьтiс ассьыс чашасö саридзö. Сэки саридзыс лои кулöм мортлöн вирыс кодь, да саридзын став олысьыс кулiс. ⁴ Коймöд анделыс кисьтiс ассьыс чашасö юясö да ва петанiнъясö, и ваыс пöри вирö. ⁵ Сэсся ме кылi ваяслöн анделлысь шуöмсö: – Господьöй, Тэ вöлiн и эм, Тэ веськыд да вежа, Тэ öд веськыда мыждан! ⁶ Йöзыс кисьтiсны вежа войтырлысь да пророкъяслысь вирсö, та вöсна Тэ юктöдан найöс вирöн. Тэ мынтысян налы уджъясныс серти! ⁷ Ме кылi висьпуктанiнсянь мöд гöлöс шы. Сiйö шуис: – Господьöй Енмöй, Ставсöкутысьöй, Тэнад мыждöмыд збыль да веськыд! ⁸ Нёльöд анделыс кисьтiс ассьыс чашасö шондi вылö, и шондiыслы вöлi сетöма вын сотны йöзсö биöн. ⁹ Ёна пöжöмысла йöзыс сотчисны да лёкöдiсны Енлысь нимсö, öд Сiйö веськöдлiс тайö бырöданторъяснас. Но йöзыс эз бергöдчыны Енлань да эз ошкыны Сiйöс. ¹⁰ Витöд анделыс кисьтiс ассьыс чашасö зверлöн юралан пуклöс вылö, и зверлöн юраланiнын лои пемыд. Чорыд дойяссьыс йöзыс курччалiсны ассьыныс кывсö ¹¹ да лёкöдiсны енэжвыв Енмöс тайö дойяссьыс да мучитчöмсьыс, но асланыс лёк уджъясысь эз бергöдчыны. ¹² Квайтöд анделыс кисьтiс ассьыс чашасö ыджыд Евфрат юö, и ваыс сэтысь косьмис. Тадзи вöлi дасьтöма туйсö асыввывсянь локтысь öксыяслы. ¹³ Сэсся ме аддзи: гундыр вомысь, звер вомысь да ылöгпророк вомысь петiсны куим пеж лов, найö вöлiны жаба кодьöсь. ¹⁴ Тайö – мутияслöн ловъясыс, кодъяс вöчисны шензьöданаторъяс. Найö мунiсны мувывса став öксыыс дiнö, медым чукöртны найöс Ставсöкутысь Енлöн ыджыд лунся тыш вылö. ¹⁵ «Со, Ме локта гусясьысь моз. Шуда сiйö, кодi оз узь да видзö ассьыс паськöмсö, медым эз коль пасьтöг да некод эз янöд сiйöс». ¹⁶ Пеж ловъяс чукöртiсны мувывса öксыясöс öти местаö. Тайö местаыс шусьö еврей ногöн Армагеддон. ¹⁷ Сизимöд анделыс кисьтiс ассьыс чашасö сынöдас. Сэки енэжвыв крамысь, юралан пуклöс дiнысь, кылiс гора гöлöс шы: «Ставсö вöчöма!» ¹⁸ Сэсся кутiс чардавны-гымавны, кылiсны гора шыяс, да муыс кутiс ёна вöрны. Олöм пуксьöмсяньыс та ыджда му вöрöмыс некор на эз вöвлы! ¹⁹ Сэки Вавилон, ыджыд кар, киссис куим пельö, и мукöд войтырлöн каръясыс тшöтш киссисны. Енмыс ставсö кутiс тöд вылас тайö ыджыд карыс йылысь да сетiс сылы юны вина чашасö, кодi вöлi тырöма Сылöн скöрлунöн. ²⁰ Став дiыс вошис, а керöсъяс бырисны. ²¹ Йöзыс вылö енэжсянь киссис зэв гырысь, комын кило сьöкта шер. Йöзыс лёкöдiсны Енсö тайö шерсьыс, öд тайö бырöданторйыс вайис налы уна сьöкыдлун.

¹ Ме дiнö матыстчис андел. Сiйö вöлi на пöвстысь, кодъяслöн вöлi сизим чаша. Сiйö шуис меным: «Лок татчö, ме петкöдла тэныд, кутшöм мыждöм виччысьö уна вадорын пукалысь аньöс, кодi ёна кырсалiс. ² Мувывса öксыяс кырсалiсны сыкöд, а мувывса олысьяс винаысь моз коддзисны сылöн кырсалöмысь». ³ Сэсся ме вöлi тырöма Лолöн, и андел вайöдiс менö овтöминö. Сэтысь ме аддзи аньöс, кодi пукалiс чим гöрд рöма звер вылын. Сылöн вöлi сизим юр да дас сюр. Тайö зверсö вöлi дзоньнас гижалöма Енмöс лёкöдана кывъясöн. ⁴ Аньыс вöлi пасьтасьöма пурпур рöма да чим гöрд рöма паськöмö. Сы вылын югъялiсны зарниысь, дона изъясысь да жемчугысь мичмöданторъяс. Киас сiйö кутiс зарни доз, кодi вöлi тырöма сылöн кырсалöмысь зывöкнас да пежнас. ⁵ Плешкас сылöн вöлi гижöма гуся вежöртаса ним: «Ыджыд Вавилон – мувывса став зывöкыслöн да кырсалысьяслöн мам». ⁶ Ме аддзи: аньыс вöлi коддзöма вежа войтырлöн да Исус йылысь висьталысьяслöн вир юöмысь. Сiйöс аддзöм бöрын ме ёна шензи. ⁷ Андел шуис меным: «Мый тэ шензян? Ме висьтала тэныд гусятор тайö аньыс йылысь да сiйöс новлöдлысь зверыс йылысь, кодлöн эм сизим юр да дас сюр. ⁸ Зверыс, кодöс тэ аддзылiн, коркö вöлi, но öнi абу. Сiйö петас пыдöстöминысь, но сiйöс лоö бырöдöма. Сэки мувывса олысьяс, кодъяслысь нимсö му пуксьöмсяньыс абу гижöма Олöмыслöн небöгö, зверсö аддзигöн кутасны шензьыны. Öд сiйö вöлi, но öнi абу, и бара лоас. ⁹ Танi колö гöгöрвоöмлун да мывкыдлун. Сизим юрыс – тайö сизим мыльк, кодъяс вылын пукалö аньыс. ¹⁰ Сизим юрыс индöны сизим öксы вылö: витыс на пиысь кулiсны нин, öтиыс веськöдлö, а бöръяыс эз на лок. Кор сiйö локтас, оз кут дыр веськöдлыны. ¹¹ Зверыс, кодi вöлi, но öнi абу, – кöкъямысöд öксы, сiйö тшöтш тайö сизим öксыыс пöвстысь, сiйöс лоö бырöдöма. ¹² Дас сюрыс, кодöс тэ аддзылiн, – тайö дас öксы. Налы абу на сетöма ыджыдалан вынсö, но зверыскöд тшöтш налы лоö сетöма ыджыдалан вынсö сöмын недыр кад кежлö. ¹³ Налöн ставныслöн öти мог, та вöсна став ассьыныс вынйöрсö да ыджыдалан вынсö найö сетасны зверыслы. ¹⁴ Найö кутасны тышкасьны Балякöд, но Баля вермас найöс. Öд Сiйö – ыджыдъяслöн Ыджыдыс да öксыяслöн Öксыыс. Сыкöд тшöтш лоöны Сылöн корöмаясыс, бöрйöмаясыс да эскана йöз». ¹⁵ Сэсся андел шуис меным: «Ваыс, кодöс тэ аддзылiн да кöнi пукалö кырсалысь аньыс, – тайö мувывса йöз да быдпöлöс войтыр, быд чужанкотыр да быд кыла йöз. ¹⁶ Зверыслöн дас сюрыс, кодъясöс тэ аддзылiн, мустöмтасны кырсалысь аньöс. Найö мырддясны сылысь ставсö да пöрччöдасны сы вылысь став паськöмсö, сёясны сылысь вир-яйсö да сотасны би пытшкын. ¹⁷ Öд Енмыс пуктiс налöн сьöлöмö, мед вöчны Сылöн кöсйöм серти да öти кывйö воöмöн сетны зверыслы ассьыныс ыджыдалан вынсö сэтчöдз, кытчöдз оз инны Енлöн кывъясыс. ¹⁸ Аньыс, кодöс тэ аддзылiн, – тайö ыджыд кар, сiйö ыджыдалö мувывса став öксыяс вылын».

¹ Сэсся ме аддзи: енэжсянь лэччис нöшта öти андел. Сылöн вöлi ыджыд вын, и муыс ставнас югдiс сылöн дзирдлунысь. ² Андел зэв гораа горöдiс: – Киссис, киссис ыджыд Вавилон! Сiйö лоис оланiнöн мутияслы да быдпöлöс пеж лолыслы, лоис позйöн быдпöлöс пеж да зывöк лэбачыслы. Аслас кырсалöм вöсна сiйö юктöдiс став йöзсö Ен скöрлуна винаöн. ³ Мувывса öксыяс кырсалiсны сыкöд, а вузасьысьяс озырмисны сылöн лышкыдлунысь. ⁴ Сэсся ме кылi енэжысь мöд гöлöс шы. Сiйö шуис: – Войтырöй Менам, петöй тайö карсьыс, медым энö öтувтчöй сылöн мыж вöчöмас, медым сiйöс моз эз су тiянöс бырöданторйыс. ⁵ Öд сылöн мыжъясыс кыптiсны енэжöдзыс. Енмыс кутö тöд вылас став сылысь лёк вöчöмсö. ⁶ Мынтысьöй сылы сiйöн жö, мыйöн мынтысис тiянлы. Мынтысьöй сылöн уджъясысь кык пöв унджык на. Сылöн чашаö, кытысь сiйö юкталiс тiянöс, дасьтöй сылы винасö кык пöв курыдджыкöс на. ⁷ Мöдöдöй сылы шогсö да мучитчöмсö сы мында, мыйта сiйö курыштiс аслыс озырлунсö да ошкöмсö. Öд сiйö ошйысьö ас йывсьыс: «Ме пукала юралан пуклöс вылын öксы-ань моз. Ме абу дöва, ме некор ог тöдлы шогсö!» ⁸ Та вöсна, став бырöданторйыс: кулöмыс, шогыс да тшыгъялöмыс суас сiйöс öти лунö. Сiйöс сотасны биын, öд Господь Ен, сiйöс Мыждысьыс, – вына! ⁹ Кор мувывса öксыяс аддзасны сылысь сотчöмсö да тшынсö, кутасны сыркъялöмöн бöрдны сы вöсна. Öд найö кырсалiсны да лышкыда гажöдчисны сыкöд. ¹⁰ Найö повзясны сылöн мучитчöмысь да ылыстчасны сыысь и кутасны шуавны: – Шог, шог тэныд Вавилон, ыджыд да вына кар! Öти здукöн суис тэнö мыждöмыс! ¹¹ Став му пасьтала вузасьысьяс кутасны бöрдны да шогсьыны сы понда, öд налысь вузöссö некод оз кут босьтны. ¹² Оз босьтны налысь зарнисö, эзысьсö, дона изъяс да жемчугъяс, шабдi да шöвк дöраяс, пурпур да чим гöрд рöма дöраяс. Оз босьтны налысь чöскыд дука пуяс, слöн лыысь, дона пуысь, ыргöнысь, кöртысь да мраморысь вöчöмторъяс. ¹³ Некод оз босьт налысь корица, ладан, чöскыд дука вый да миро, вина да вый, пызь да шобдi, ыжъясöс, мöсъясöс да вöвъясöс, телегаяс, кесйöгъясöс да мукöд йöзсö. ¹⁴ – Став тэнад сьöлöм бурмöданторйыд быри, став тэнад озырлуныд да мичлуныд воши, тайö тэнад некор нин оз ло. ¹⁵ Найö, кодъяс вузасисны тайöн ставнас да озырмисны сы помысь, ёна повзясны Вавилон карлöн мучитчöмысь да ылыстчасны сыысь. Найö кутасны бöрдны да шогсьыны: ¹⁶ – Шог, шог тэныд, ыджыд кар! Тэ вöлi пасьтасьöмыд шабдi дöраö, пурпур да чим гöрд рöма паськöмö. Тэнö вöлi мичмöдöма зарниöн, дона изъясöн да жемчугöн! ¹⁷ Но став тайö озырлуныс öти здукöн быри! Сэки саридз вылын кывтысьяс, корабльöн веськöдлысьяс, налы отсасьысьяс да вузасьысьяс – ставныс ылыстчисны тайö карсьыс. ¹⁸ Найö видзöдiсны сотчысь карлöн тшыныс вылö да горзiсны: «Позяс öмöй öткодявны тайö ыджыд карсö кутшöмкö мöд каркöд?» ¹⁹ Найö коялiсны юрсö пöимöн, бöрдiсны да шогсисны: – Шог, шог тэныд, ыджыд кар! Аслад озырлунöн тэ озырмöдiн ставнысö, саридз вылын кывтысьясöс. Öти здукöн тэ воштiн ставсö! ²⁰ – Нимкодясь, енэжыс! Нимкодясьöй, вежа апостолъяс да пророкъяс! Енмыс мыждiс тайö карсö тiянлы лёк вöчöмысь. ²¹ Сэсся вына андел босьтiс изки кодь ыджыд из да шыбитiс сiйöс саридзас. Сiйö шуис: – Дзик тадзи лоö шыбитöма Вавилонöс, ыджыд карöс, сiйö вошас пыр кежлö! ²² Тэнад туй вылын некор оз кут кывны сьылöм шы, пöлян да труба шы, некод оз кут ворсны арфаöн. Некор оз кут уджавны танi киподтуя морт, некор оз кут кывны танi изки шы. ²³ Некор оз кут öзйыны танi би, некор оз кут кывны верöспулöн да гöтырпулöн гöлöс шыныс! Тэнад вузасьысьяс ыджыдалiсны тайö му вылас. Аслад тшыкöдчöмöн тэ кыскин став йöзсö ылöгас. ²⁴ Тайö карас вöлi кисьтöма вирсö пророкъяслысь, вежа войтырлысь, да став йöзыслысь, кодъясöс вöлi виöма му вылас.

¹ Та бöрти ме кылi енэжсьыс гора шы, быттьö ыджыд йöз чукöр ызгiс-сёрнитiс. Найö шуалiсны: – Аллилуйя! Мездмöмыс, дзирдлуныс, нималöмыс да выныс – миян Господьлöн. ² Сылöн мыждöмыс збыль да веськыд. Енмыс мыждiс ыджыд карöс, кырсалысь аньöс, öд сiйö пежалiс ставнас мусö аслас пеж оласногöн. Енмыс перйис водзöссö тайö аньыслысь Аслас кесйöгъяслöн вирысь. ³ Сэки бара шуалiсны: – Аллилуйя! Сылöн тшыныс кутас кыпöдчыны нэмъяс чöж! ⁴ Та бöрти кызь нёль пöрысьыс да нёльнан енэжвыв олысьыс кымынь уськöдчöмöн копыртчылiсны юралан пуклöс вылын пукалысь Енлы да шуисны: – Аминь! Аллилуйя! ⁵ Сэсся Ен пуклöссянь кылiс гöлöс шы: – Ошкöй миян Енмöс ставныд: Сылöн кесйöгъяс да Сыысь полысьяс, ичöтъяс и гырысьяс! ⁶ Сэсся ме кылi шы, быттьö ыджыд йöз чукöр ызгiс-сёрнитiс, быттьö уна шор бузгис-визувтiс, быттьö чорыда гымалiс. Найö шуалiсны: – Аллилуйя! Господь, Ставсöкутысь Ен, öнi лоис Юралысьöн! ⁷ Кутам нимкодясьны да гажöдчыны, кутам ошкыны Енмöс! Öд Баля öнi гöтрасьö, Сылöн гöтырпуыс дась нин: ⁸ сiйö пасьтасьöма сöстöм да югъялан шабдi паськöмö. Шабдi паськöмыс – тайö вежа войтырлöн веськыд уджъясыс. ⁹ Сэсся андел шуис меным: «Гиж: "Шудаöсь найö, кодъясöс корöма Балялöн кöлысь вылö!"» Сэсся содтiс: «Тайö Енлöн збыль кывъясыс». ¹⁰ Ме уськöдчи андел кок дорö, медым копыртчывны сылы, но сiйö шуис меным: «Эн вöч тайöс! Öд ме кесъяла Енмыслы, кыдзи тэ да тэнад вокъясыд, кодъяс висьтавлöны Исус йылысь. Енмыслы копыртчыв! Öд Исус йылысь висьталысьяс сёрнитöны пророкалан Ловсянь». ¹¹ Енэжыс воссис менам син водзын, и сэтысь ме аддзи еджыд вöлöс да сы вылын Пукалысьöс. Сылöн нимыс Эскана да Збыль, Сiйö тышкасьö да мыждö веськыда. ¹² Сылöн синъясыс ыпъялiсны биöн, а юр вылас вöлi уна юркытш. Пукалысь вылö вöлi гижöма Сылысь нимсö, и тайö нимсö Сыысь кындзи некод эз тöд. ¹³ Сы вылын вöлi вирöсь паськöм, и нимыс Сылöн – Ен Кыв. ¹⁴ Сы бöрся еджыд вöвъяс вылын мунiсны енэжвывса тышка котыръяс, найö вöлi пасьтасьöмаöсь еджыд да сöстöм шабдi паськöмö. ¹⁵ Вöв вылын Пукалысьлöн вомысь петiс ёсь шыпурт, медым сiйöн бытшкыны мувывса йöзöс. Сiйö кутас веськöдлыны наöн кöрт беддьöн да пычкас Ставсöкутысь Енлысь скöрлуна винасö пычкан гуын. ¹⁶ Сылöн паськöмас да лядьвейас гижöма ним: "Öксыяслöн Öксы, ыджыдъяслöн Ыджыд". ¹⁷ Сэсся ме аддзи шондi вылын сулалысь анделöс. Сiйö гораа горöдiс став лэбачыслы, кодъяс лэбисны енэж шöрöдыс: «Локтöй-чукöртчöй Енлöн ыджыд гаж вылö! ¹⁸ Тi кутанныд сёйны шойяссö öксыяслысь, тышкайöзöн веськöдлысьяслысь, юралысьяслысь, вöвъяслысь, верзьöмаяслысь да став йöзыслысь: мездлуна йöзлысь и кесйöгъяслысь, ичöтлысь и гырысьлысь». ¹⁹ Сэсся ме аддзи зверöс, мувывса öксыясöс да налысь тышка котыръяссö. Найö вöлi чукöртчöмаöсь, медым тышкасьны вöв вылын Пукалыськöд да Сылöн тышка котырыскöд. ²⁰ Зверöс да ылöгпророкöс вöлi кутöма. Ылöгпророкыс вöчлiс шензьöданаторъяс звер нимсянь. Тадзи сiйö ылöдлiс найöс, кодъяс сетiсны пуктыны аслыныс зверлысь пассö, и найöс, кодъяс копрасисны сылöн серпаслы. Зверöс да ылöгпророкöс – кыкнаннысö ловйöн вöлi шыбитöма биöн да сераöн сотчысь тыö, ²¹ а мукöдсö вöлi виöма шыпуртöн. Тайö шыпуртыс петiс вöв вылын Пукалысьлöн вомысь. И став лэбачыс сэсся пöткöдчисны виöмаяслöн шойясöн.

¹ Ме аддзи анделöс, кодi лэччис енэжсянь. Киас сiйö кутiс пыдöстöминысь восьтансö да ыджыд чеп. ² Сiйö тшапнитiс гундырöс, важ змейöс, да дорис сiйöс сюрс во кежлö. Тайö гундырыс – омöль да сöтана. ³ Андел шыбитiс сiйöс пыдöстöминö да йигналiс сэтчö. А петанiнас пуктiс печать, медым гундыр эз пет да эз ылöдлы йöзсö, кытчöдз оз помась сюрс воыс. Та бöрти сiйöс лоö лэдзöма дженьыд кад кежлö. ⁴ Сэсся ме аддзи юралан пуклöсъяс. Сэнi пукалысьяслы вöлi сетöма мыждан вын. Ме аддзи ловъяссö налысь, кодъяслысь юрсö керыштiсны Исус йылысь висьталöм вöсна да Ен Кыв вöсна. Найö эз копыртчывны зверлы да сылöн серпаслы, эз сетны пуктыны зверлысь пассö плешканыс да кианыс. Найö ловзисны да юралiсны Кристоскöд сюрс во чöж. ⁵ А мукöд кулöмаясыс эз ловзьыны, кытчöдз эз помась сюрс воыс. Тайö – кулöмаясöс медводдза ловзьöдöм. ⁶ Шудаöсь да вежаöсь найö, кодъяс ловзясны медводдза ловзьöдiгöн. Мöд кулöмыслöн выныс оз нин ло на вылын. Найö лоöны Енлöн да Кристослöн вежа кесъялысьясöн, найö кутасны ыджыдавны Кристоскöд сюрс во чöж. ⁷ Сюрс во помасьöм бöрын сöтанаöс лоö лэдзöма аслас пыдöстöминысь. Сiйö мунас мулöн нёльнан пельöсас ылöдлыны йöзöс, Гог да Магог войтырöс, да чукöртны найöс тыш вылö. Налöн лыдыс лоö саридздорса лыа мында. ⁸ Найö паськöдчасны став му пасьтала да кытшаласны вежа войтырлысь оланiнсö да Енлысь муса карсö. ⁹ Но енэжсяньыс, Енсянь, усяс би да бырöдас найöс. ¹⁰ Сэки омöльöс, кодi ылöдлiс найöс, лоö шыбитöма биöн да сераöн сотчысь тыö. Сэтчö вöлi шыбитöма тшöтш зверöс да ылöгпророкöс. Найö кутасны мучитчыны лун и вой, нэмъяс чöж. ¹¹ Сэсся ме аддзи ыджыд да еджыд юралан пуклöс да сы вылын Пукалысьöс. Енэжыс да муыс пышйисны Сылöн син водзысь, налы некытчö вöлi дзебсьынысö. ¹² Ме аддзи кулöмаясöс: гырысьясöс да ичöтъясöс, найö сулалiсны Ен водзын. Сэнi вöлiны восьса небöгъяс. Сэсся восьтiсны нöшта öти небöг – Олöмыслысь небöг. Кулöмаясöс мыждiсны налöн уджъясныс серти, мый вöлi гижöма небöгъясас. ¹³ Сэки саридзыс, кулöмыс да адыс сетiсны ассьыныс кулöмаяссö, и быдöнöс найöс вöлi мыждöма уджъясныс серти. ¹⁴ Кулöмсö да адсö вöлi шыбитöма биа тыö. Тайö мöд кулöм. ¹⁵ Быдöнöс, кодлысь нимсö эз вöв гижöма Олöмыслöн небöгö, вöлi шыбитöма биа тыö.

¹ Сэсся ме аддзи выль енэж да выль му. Медводдза енэжыс да муыс бырины, и саридзыс эз нин вöв. ² Ме, Иоан, аддзи вежа кар – выль Ерусалим. Сiйö лэччис енэжсяньыс, Енсянь. Сiйöс вöлi мичмöдöма, быттьö гöтырпуöс верöспуыслы. ³ Ме кылi енэжсянь гора шы. Сiйö шуис: – Со, мувывса йöз пöвстын Енлöн оланiн! Енмыс кутас овны накöд, найö лоöны Сылöн войтырöн. Ачыс Енмыс лоас накöд, да лоö налöн Енмöн, ⁴ Сiйö чышкас налысь став синвасö. Кулöмыс оз нин ло, оз ло шогсьöм, бöрдöм ни висьöм, öд важыс кольöма. ⁵ Юралан пуклöс вылын Пукалысь шуис: «Видзöд, Ме ставсö вöча выльöс!» Сэсся содтiс: «Гиж тайöс, öд тайö кывъясыс веськыдöсь да збыльöсь». ⁶ Сiйö шуис меным: «Ставсö вöчöма! Ме – Альфа и Омега, Панасыс и Помыс. Кодлöн косьмö горшыс, сiйöс дон босьттöг юктöда ваöн, кодi петö ловъя ва визувтанiнысь. ⁷ Вермысьльы Ме сета тайöс ставсö. Ме лоа сылы Енмöн, а сiйö – Меным пиöн. ⁸ Полысьясöс, эскытöмъясöс, зывöк оласногаясöс, морт виысьясöс, кырсалысьясöс, тшыкöдчысьясöс, идоллы юрбитысьясöс да став ылöдчысьсö лоö шыбитöма биöн да сераöн сотчысь тыö. Тайö мöд кулöм». ⁹ Ме дiнö матыстчис андел. Сiйö вöлi сизим андел пöвстысь, кодъяслöн вöлi сизим чаша сизим бöръя бырöданторнас. Андел шуис меным: «Лок татчö, ме петкöдла тэныд Балялысь гöтырпусö, кодi лоас Сылы гöтырöн!» ¹⁰ Ме вöлi тырöма Лолöн, и андел вайöдiс менö ыджыд да джуджыд керöс вылö да петкöдлiс меным ыджыд кар – вежа Ерусалим, кодi лэччис енэжсяньыс, Енсянь. ¹¹ Сiйö югъялiс Ен дзирдлунöн да дзирдалiс дона из моз, югъялысь яшма моз. ¹² Карсö кытшалiс кыз да джуджыд стен. Сэнi вöлi дас кык дзиръя, на дорын сулалiсны дас кык андел. Дзиръяяс вылас вöлi гижöма израильса дас кык чужанкотырлысь нимъяссö. ¹³ Куим дзиръяыс видзöдiсны асыввылö, куимыс – войвылö, куимыс – лунвылö да куимыс – рытыввылö. ¹⁴ Карыслöн стеныс подуласис дас кык из вылö, а изъяс вылас вöлi гижöма Балялöн дас кык апостоллысь нимъяссö. ¹⁵ Мекöд сёрнитысь анделлöн вöлi зарни бедь, медым муртавны карсö, сылысь дзиръяяссö да стенсö. ¹⁶ Карыс вöлi нёль пельöса, сылöн кузьтаыс да пасьтаыс вöлi öткодь. Андел мурталiс карсö бедьнас, и карлöн кузьтаыс лои дас кык сюрс стадий. А карыслöн судта-пасьтаыс вöлi öткодь карыслöн кузьтакöд. ¹⁷ Сэсся андел мурталiс карлысь стенсö, кыдзи мувывса йöз мурталöны, да стенлöн джуджтаыс лои сё нелямын нёль гырддза. ¹⁸ Карлысь стенсö вöлi вöчöма яшмаысь, а асьсö карсö – сöстöм зарниысь, сiйö югъялiс стеклö моз. ¹⁹ Стеныслысь подув изъяссö вöлi мичмöдöма быдпöлöс дона изъясöн. Медводдза подув изйыс вöлi яшмаысь, мöдыс – сапфирысь, коймöдыс – халцедонысь, нёльöдыс – изумрудысь, ²⁰ витöдыс – сардониксысь, квайтöдыс – сердоликысь, сизимöдыс – хризолитысь, кöкъямысöдыс – бериллысь, öкмысöдыс – топазысь, дасöдыс – хризопразысь, дас öтиöдыс – гиацинтысь, дас кыкöдыс – аметистысь. ²¹ Дас кыкнан дзиръясö вöлi вöчöма дас кык жемчугысь, быд дзиръя – öти жемчугысь. Карыслöн паськыд туйыс вöлi сöстöм зарниысь, сiйö югъялiс стеклö моз. ²² Крамсö тайö карсьыс ме эг аддзыв, öд крамыс сэнi – Ставсöкутысь Господь Ен да Баля. ²³ Карыслы оз ков шондi ни тöлысь югзьöдöм вылö, öд Енлöн дзирдлуныс югзьöдö сiйöс, а Баля – сылöн биыс. ²⁴ Быд кыла войтырысь мездмöмаяс кутасны овны сылöн югыдас. Мувывса öксыяс ваясны тайö карас ассьыныс ошйысянторсö да нимöданторсö. ²⁵ Карыслöн дзиръяясыс лоöны пыр восьсаöсь, öд войыс сэнi оз ло. ²⁶ Сэтчö быд войтырысь лоö вайöма ошйысянторсö да нимöданторсö. ²⁷ Нинöм пежыс оз пыр тайö карас, некутшöм пöръясьысь да зывöксö вöчысь оз пыр сэтчö! Сэтчö пырасны сöмын найö, кодъяслысь нимсö гижöма Балялöн небöгö – Олöмыслöн небöгö.

¹ Сэсся андел петкöдлiс меным ю, сэнi визувтiс сöстöм ловъя ва. Сiйö вöлi крусталь кодь югыд. Ваыс петiс Енлöн да Балялöн юралан пуклöссянь. ² Карлöн паськыд туй шöрас, ю öтар-мöдар бокас, быдмис Олöмыслöн пу, кодi вайö вотöссö быд тöлысь, вонас – дас кыкысь. Сылöн коръясыс бурдöдöны йöзöс. ³ Нинöм ёрöмаыс оз ло тайö карас. Сэнi лоö Енлöн да Балялöн юралан пуклöсыс, и Сылöн кесйöгъясыс кутасны кесъявны Сылы. ⁴ Найö аддзасны Енлысь чужöмбансö, да Сылысь нимсö гижасны налöн плешканыс. ⁵ Войыс сэнi оз ло. Налы оз нин ков бисянь либö шондiсянь югыдыс, öд налöн югзьöдысьнас лоас Господь Ен. Найö кутасны ыджыдавны нэмъяс чöж. ⁶ Андел шуис меным: «Тайö кывъясыс веськыдöсь да збыльöсь. Вежа пророкъяслöн Господь Ен мöдöдiс Ассьыс анделсö, медым петкöдлыны Аслас кесйöгъяслы, мый колö лоны регыдъя кадö». ⁷ «Со, Ме регыд локта! Шуда сiйö, кодi олö тайö небöгас водзвыв висьталöмыс серти!» ⁸ Ме, Иоан, ставсö тайöс кывлi да аддзылi. А кывлöм да аддзылöм бöрас ме уськöдчи муас, медым копыртчывны анделлы, кодi петкöдлiс меным ставсö тайöс. ⁹ Но андел шуис меным: «Эн вöч тайöс, öд ме кесъяла Енмыслы тэ моз да тэнад вокъясыд – пророкъяс моз, да на моз, кодъяс олöны тайö небöгас гижöм серти. Енмыслы копыртчыв!» ¹⁰ Сэсся содтiс: «Эн тупкы печатьöн тайö небöгас водзвыв висьталöмасö, öд кадыс матын нин». ¹¹ Лёксö вöчысь мед водзö вöчас лёксö, пеж оласнога мед водзö на вöчас пежсö, веськыда олысь мед водзö вöчас веськыда, а вежа морт мед водзö на вежаммас. ¹² «Со, Ме регыд локта да вая Аскöд удждон, медым быдöнлы мынтысьны сылöн уджъясыс серти. ¹³ Ме – Альфа и Омега, Панасыс и Помыс, Медводдзаыс и Медбöръяыс». ¹⁴ Шудаöсь найö, кодъяс олöны Енлöн тшöктöм серти, öд Енмыс сетас налы пöткöдчыны Олöмыслöн пуысь да пырны тайö карас дзиръяöдыс. ¹⁵ А понъяс, тшыкöдчысьяс, кырсалысьяс, мортвиысьяс, идоллы юрбитысьяс, ылöгсö радейтысьяс да пöръясьысьяс колясны кар ортсыас. ¹⁶ «Ме, Исус, мöдöдi Ассьым анделöс висьтавны тайöс тiянлы вичкоясын. Ме – Давид чужанвужйысь да чужанкотырысь, Ме – асъя югыд кодзулыс». ¹⁷ Лов да гöтырпу шуöны: «Лок!» Тайöс кылысь мед тшöтш шуö: «Лок!» Кодлöн косьмö горшыс, мед локтö! Кодi кöсйö юны, мед босьтö ловъя васö дон мынтытöг. ¹⁸ Ме эскöда быдöнöс, кодi кылö тайö небöгсьыс водзвыв висьталöмасö: кодi содтас мыйкö тайö кывъясыс дiнö, Енмыс мöдöдас сылы бырöданторъяс, мый йылысь гижöма тайö небöгас. ¹⁹ Кодi чинтас мыйкö тайö небöгас водзвыв висьталöмсьыс, Енмыс босьтас сылысь пайсö Олöмыслöн небöгысь, вежа карысь да сыысь, мый йылысь гижöма тайö небöгас. ²⁰ Тайö кывъяссö Висьталысьыс шуö: «Ме регыд локта, тайö тадзи!» Аминь. Лок, Господьöй Исусöй! ²¹ Миян Господь Исус Кристослöн буралöмыс ставныдкöд тiянкöд! Аминь.