Матвей

Матвей

¹ Исус Кристослöн ордпуыс петö Öвраамсянь, сэсся Давидсянь. Сылöн чужанвужйыс татшöм: ² Öвраамлöн чужöма Исаак, Исааклöн – Яков, Яковлöн чужöмаöсь Иуда да сылöн вокъясыс. ³ Иудалöн чужöмаöсь Фарес да Зарей, налöн мамныс вöлöма Фамар. Фареслöн чужöма Есром, Есромлöн – Арам, ⁴ Арамлöн – Аминадав, Аминадавлöн – Наассон, Наассонлöн – Салмон. ⁵ Салмонлöн чужöма Вооз, сылöн мамыс вöлöма Ракав. Воозлöн чужöма Овид, сылöн мамыс вöлöма Руфа. Овидлöн чужöма Ессей, ⁶ Ессейлöн чужöма Давид öксы. Давид öксылöн чужöма Соломон, сылöн мамыс вöлöма Урийлöн гöтыр. ⁷ Соломонлöн чужöма Ровоам, Ровоамлöн – Авей, Авейлöн – Аса, ⁸ Асалöн – Иосафат, Иосафатлöн – Иорам, Иорамлöн – Озей. ⁹ Озейлöн чужöма Иоафам, Иоафамлöн – Аказ, Аказлöн – Езекей. ¹⁰ Езекейлöн чужöма Манассей, Манассейлöн – Амон, Амонлöн – Иосей. ¹¹ Иосейлöн чужöма Иоаким, Иоакимлöн чужöмаöсь Еконей да сылöн вокъясыс. Тайö вöлöма Израиль войтырöс Вавилон муö вöтлытöдз на. ¹² Вавилонö вöтлöм бöрын Еконейлöн чужöма Салафиль, Салафильлöн – Зоровавель, ¹³ Зоровавельлöн – Авиуд, Авиудлöн – Елиаким, Елиакимлöн – Азор. ¹⁴ Азорлöн чужöма Садок, Садоклöн – Аким, Акимлöн – Елиуд, ¹⁵ Елиудлöн – Елеазар, Елеазарлöн – Матфан, Матфанлöн – Яков. ¹⁶ Яковлöн чужис Öсип. Сылöн Мария гöтырыс чужтiс Исусöс, кодöс шуисны Кристосöн. ¹⁷ Тадзи Öвраамсянь Давидöдз ставнас вöлi дас нёль чужанвуж. Вавилонö вöтлытöдз Давидсянь дас нёль чужанвуж. Вавилонö вöтлöмсянь Кристосöдз бара дас нёль чужанвуж. ¹⁸ Исус Кристос чужис тадзи. Исуслöн Мария мамыс вöлi кикутöма Öсипкöд. Öтлаасьтöдзныс на тöдмалiсны Мариялöн Вежа Ловсянь сьöктöм йылысь. ¹⁹ Öсип вöлi веськыда олысь морт. Сiйö эз кöсйы йöзöдны Марияöс, та вöсна шуис гусьöн лэдзны сiйöс. ²⁰ Кор Öсип мöвпалiс тадзи, Господьлöн андел петкöдчис сылы вöтас да шуис: «Öсип, Давид пи, эн пов босьтны Мариятö гöтырö. Сьöлöм улас сылöн кагаыс Вежа Ловсянь. ²¹ Марияыд ваяс пи, пуктан Сылы Исус ним, Сiйö мездас Ассьыс войтырсö мыжъяссьыныс». ²² Ставыс тадзи артмис, медым инiс пророк пыр Господьлöн шуöмыс: ²³ – Ныв сьöктас, сэсся пи чужтас. Эммануил ним Сылы пуктасны. Нимыс висьталö: миянкöд Ен. ²⁴ Садьмöм бöрас Öсип вöчис Господьлöн андел тшöктöм серти: босьтiс Марияöс гöтырö, ²⁵ но эз инмöдчыв сы дiнö. Мария чужтiс пи, ассьыс медводдза кагасö, и Öсип пуктiс Сылы Исус ним.

¹ Исус чужис Юдея муын, Виплием карын, Ирöд öксы веськöдлан кадö. Исуслöн чужöм мысти асыввылысь Ерусалим карö воисны кодзув тöдысьяс. ² Найö юалiсны: «Кöнi юдейяслöн пузчужöм öксыыс? Асыввылысь ми аддзылiм Сылысь кодзувсö да локтiм Сылы копыртчывны». ³ Тайöс кылöмысь Ирöд öксы инас эз кут öшйыны, шызис тшöтш дзоньнас Ерусалим карыс. ⁴ Ирöд корис аркирейясöс Индöдö велöдысьяскöд да юалiс налысь: «Кöнi Кристос чужас?» ⁵ Найö вочавидзисны: «Юдея муын, Виплием карын. Тадзи пророклöн гижöма: ⁶ – Тэ, Иуда муын Виплием кар, Иудалöн мукöд юрнуöдан каръясысь абу ичöтджык. Тэнад карысь буретш юралысь петас, Менсьым ыжъясöс, Израиль войтырöс, Сiйö видзны кутас». ⁷ Тöдысьясöс ас дiнас гусьöн корöмöн Ирöд юалiс налысь кодзув петан кадсö. ⁸ Сэсся мöдöдiс найöс Виплиемö да шуис: «Ветлöй, кага йывсьыс ставсö тöдмалöй. Кагасö аддзöм бöрын юöртöй меным, ме тшöтш вола копыртчывны Сылы». ⁹ Öксылöн шуöм бöрын тöдысьяс петiсны туйö. Асыввылысь аддзылöм кодзулыс кывтiс на водзвылын. Сэсся сiйö сувтiс буретш сэтчö, кöнi вöлi кагаыс. ¹⁰ Кодзув аддзöмысь тöдысьяслы лои зэв нимкодь. ¹¹ Керкаö пырöм бöрын найö аддзисны кагаöс Мария мамыскöд. Пидзöс выланыс уськöдчöмöн найö копыртчылiсны кагалы да сетiсны Сылы дона козинъяс: зарни, ладан да смирна. ¹² Узиганыс Ен öлöдiс тöдысьясöс Ирöд дiнö бöр мунöмысь, та вöсна найö мöдiсны ас муаныс мöд туйöд. ¹³ Тöдысьяслöн мунöм бöрын Господьлöн андел петкöдчис Öсиплы вöтас да шуис: «Чеччы, босьт кагатö мамыскöд да пышйы Египет муö, ов сэнi менам шутöдз. Ирöд кутас корсьны кагатö, мед вины Сiйöс». ¹⁴ Öсип садьмис, босьтiс кагасö мамыскöд да войнас мöдöдчис Египет муö. ¹⁵ Сэнi сiйö олiс Ирöд кувтöдз. Тадзи инiс пророк пыр Господьлöн шуöмыс: «Египет муысь Ме кори Пиöс». ¹⁶ Ирöд тöдмалiс тöдысьяслысь ылöдлöмсö да ёна скöрмис таысь. Сiйö мöдöдiс шыпуртаясöс, тшöктiс вины Виплием карысь да сы гöгöрысь кык арöса да ичöтджык став пи кагасö, тöдысьяссянь тöдмалöм кадö чужöмаясöс. ¹⁷ Тадзи инiс Еремей пророклöн шуöмыс: ¹⁸ – Рама карын ырзöм-бöрдöм кылö. Ракель аслас ныв-пи вöсна бöрдö, оз кöсйы ланьтны бöрдöмсьыс, öд найö абуöсь нин. ¹⁹ Ирöд кулöм бöрын Египет муын Господьлöн андел петкöдчис Öсиплы вöтас ²⁰ да шуис: «Чеччы, босьт кагатö мамыскöд да бöр мун Израиль муö. Кагатö вины кöсйысьяс абу нин ловъяöсь». ²¹ Öсип чеччис, босьтiс кагасö мамыскöд да мунiс Израиль муö. ²² Сэки Юдея муын веськöдлiс Ирöд öксылöн Аркелай пиыс. Тайöс кывлöм бöрын Öсип повзис сэтчö мунöмысь. Сэки вöтас сылы вöлi шуöма мунны Галилея муö. ²³ Сэтчö воöм бöрын Öсип овмöдчис Назарет карö. Тадзи инiс пророкъяс пыр шуöмыс: «Назаретсаöн Сiйöс шуасны».

¹ Сiйö кадö локтiс Пыртысь Иоан да юöртiс Юдея овтöминын: ² «Бергöдчöй мыжъяссьыныд! Енэжвыв Юралöмыс матын нин». ³ Иоан йылысь Исай пророк висьтавлöма тадзи: – Овтöминын кылö горзысьлöн шы: «Лöсьöдöй туйсö Господьлы, веськöдöй-шыльöдöй ордымъяс Сылы!» ⁴ Иоан новлiс верблюд гöнысь кыöм паськöм да коскас кучик тасма, сёйлiс чирк да видзвыв ма. ⁵ Сы дiнö локтiс уна йöз Ерусалим карысь, Юдея му пасьталаысь да Йöрдан ю пöлöнысь. ⁶ Асланыс мыжъясысь висьтасьöм бöрын Иоан пыртiс йöзсö Йöрдан юын. ⁷ Уна фарисей да саддукей локтiсны Иоан дiнö пыртчыны. Иоан аддзис найöс да шуис: «Вижля йылöм! Кодi туйдöдiс тiянöс пышйыны локтана скöрлунысь? ⁸ Олöмнад петкöдлöй мыжъяссьыныд бергöдчöмнытö. ⁹ Энö лысьтöй мöвпавны, мый тiян батьныд Öвраам. Висьтала тiянлы: тайö изъясысь Ен вермö вöчны Öвраамлы ныв-писö. ¹⁰ Черыс пу вужйыс дорын нин куйлö. Пуыс кö оз вай бур вотöс, сiйöс кералöны да шыбитöны биö. ¹¹ Ме пырта тiянöс ваöн. Тайö петкöдлас мыжъяссьыныд бергöдчöмнытö. Ме бöрын Локтысьыс ме дорысь вынаджык, ме ог шогмы пöрччöдны Сылысь кöмсö. Сiйö пыртас тiянöс Вежа Лолöн да биöн. ¹² Сы киын тöлöдчан зырйыс. Сiйö весалас гумласö: шобдiсö йöртöдö чукöртас, кыдсö куслытöм биын сотас». ¹³ Сэки Исус локтiс Галилеяысь Йöрдан ю дорö, мед Иоан пыртас Сiйöс. ¹⁴ Иоан öлöдiг шуис: «Тэ-ö локтан ме дiнö? Тэныд колö менö пыртнысö!» ¹⁵ Исус шуис: «Эн сувт паныд. Миянлы колö вöчны веськыдлуныс серти». Сэки Иоан пыртiс Сiйöс. ¹⁶ Пыртчöм бöрас Исус петiс васьыс. Сэки енэжыс воссис, и Исус аддзис: Енлöн Лолыс гулю моз лэччис Сы вылö. ¹⁷ Енэжсянь кылiс гöлöс шы: «Тайö Менам муса Пиöй, Ме нимкодяся Сыöн».

¹ Та бöрын Лов нуöдiс Исусöс овтöминö, медым омöльыс ыштöдiс Сiйöс. ² Нелямын лун да нелямын вой видзалöм бöрын Исуслöн кынöмыс сюммис. ³ Сэки Сы дiнö локтiс ыштöдысь да шуис: «Тэ кö Ен Пи, пöрт тайö изъяссö няньö». ⁴ Исус воча шуис: «Гижöма: "Оз куш няньöн мортыд ов, а Енсянь быд шуöм кывйöн"». ⁵ Сэсся омöль нуöдiс Исусöс вежа карö, сувтöдiс Сiйöс крам вевт вылö ⁶ да шуис: «Тэ кö Ен Пи, шыбитчы увлань. Öд гижöма: "Аслас анделъяслы Сiйö тшöктö видзны Тэнö. Найö нуасны Тэнö ки выланыс, видзасны изйö крукасьöмысь"». ⁷ Исус воча шуис: «Гижöма тшöтш: "Эн дöзмöд ассьыд Господь Ентö!"» ⁸ Омöль бара вайöдiс Исусöс зэв джуджыд керöс йылö да петкöдлiс Сылы таладор югыдсьыс став мусö, налысь мичлун-озырлунсö. ⁹ Сэсся шуис: «Ставсö тайöс сета Тэныд, копыртчылан кö меным». ¹⁰ Исус шуис сылы: «Вешйы Ме дiнысь, сöтана! Гижöма: "Аслад Господь Енлы копрась да сöмын Сылы кесъяв"». ¹¹ Сэки омöль эновтiс Исусöс. Сэсся воисны анделъяс да кесъялiсны Исуслы. ¹² Кор Исус тöдмалiс Иоанöс дзескыдiнö пуксьöдöм йылысь, мунiс Галилеяö. ¹³ Сiйö колис Назарет карсö да овмöдчис тыдорса Капернаум карö, Завулон да Неффалим муö. ¹⁴ Тадзи инiс Исай пророклöн шуöмыс: ¹⁵ – Завулон му, Неффалим му, саридз туй вылын, Йöрдан ю сайын мукöд войтыра Галилея му! ¹⁶ Пемыдын олысь войтыр яр биа югыд аддзис. Кулан вуджöр улын олысьяслы югыд кыа петiс. ¹⁷ Тайö кадсянь Исус пондiс юöртны-висьтавлыны: «Бергöдчöй мыжъяссьыныд! Енэжвыв Юралöмыс матын нин». ¹⁸ Галилея ты пöлöн мунiгöн Исус аддзис кык вокöс: Симонöс, кодöс нимтiсны Петырöн, да сылысь Öндрей воксö. Найö вöлiны чери кыйысьяс. Кык вок буретш вöйтасисны ты вылын. ¹⁹ Исус шуис налы: «Локтöй Ме бöрся. Ме вöча тiянысь морт кыйысьясöс». ²⁰ Кык вок дзик пыр эновтiсны тывъяснысö да мунiсны Исус бöрся. ²¹ Исус мунiс водзö да аддзис пыжысь мöд кык вокöс: Яковöс да Иоанöс. Зеведей батьныскöд найö дзоньталiсны тывъяс. Исус чукöстiс вокъясöс. ²² Найö дзик пыр колисны пыжсö, батьнысö да мунiсны Исус бöрся. ²³ Исус ветлöдлiс Галилея му пасьтала. Сiйö велöдiс синагогаясын, висьтавлiс Ен Юралöм йылысь Евангелльö да бурдöдалiс йöзöс быд висьöм-доймöмысь. ²⁴ Сы йылысь юöрыс разалiс Сирия му пасьтала. Исус дiнö вайöдлiсны быдсикас висьысьöс-вермытöмöс, пеж лолöн кутöмаясöс, шыблалан висьöмöн висьысьясöс, ки-коксö вöрзьöдны вермытöмъясöс. Сiйö быдöнöс бурдöдiс. ²⁵ Исус бöрся мунiс зэв уна йöз Галилеяысь, Даскарысь, Юдеяысь, Ерусалим карысь да Йöрдан ю сайысь.

¹ Уна йöзöс аддзöм бöрын Исус кайис керöсö да пуксис. Сы дiнö матыстчисны велöдчысьяс. ² Исус пондiс велöдны: ³ «Шудаöсь ловныслы корысьяс, öд налöн эм Енэжвыв Юралöм. ⁴ Шудаöсь шогсьысьяс, öд найöс шогсьыс пальöдасны. ⁵ Шудаöсь рамъяс, öд налы вуджас кöсйысьöм муыс. ⁶ Шудаöсь веськыдлуннас пöткöдчыны кöсйысьяс, öд найöс пöткöдасны. ⁷ Шудаöсь бур сьöлöмаяс, öд налы бур сьöлöмсянь вöчасны. ⁸ Шудаöсь сöстöм сьöлöмаяс, öд найö Енмöс аддзасны. ⁹ Шудаöсь йöзöс бурöдысьяс, öд найöс Енлöн ныв-пиöн шуасны. ¹⁰ Шудаöсь веськыдлун вöсна вöтлöмаяс, öд налöн эм Енэжвыв Юралöм. ¹¹ Тi шудаöсь, Ме вöсна кö тiянöс лёкöдöны, вöтлöны да быдногыс омöльтöны-суклялöны. ¹² Долыда нимкодясьöй, öд ыджыд тырдон виччысьö тiянöс енэжас. Тадзи войдöр тшöтш вöтлiсны пророкъясöс». ¹³ «Тi муюгыдыслы сов. Солыс кö воштас ассьыс вынсö, кыдзи сiйöс бöр соланас вöчан? Сэки сiйö нинöм вылö оз шогмы, сiйöс сöмын койыштöны ветлысьяс кок улö. ¹⁴ Тi йöзыслы югыд. Керöсын сулалысь кар оз вермы саявны. ¹⁵ Öзтöм битö оз пуктыны доз улö, сiйöс пуктöны бикок вылö. Сэки керкаын югыдыс быдлаö веськалö. ¹⁶ Тадзи мед югдöдас тiян югыдныд, медым йöзыс аддзасны тiянлысь бур вöчöмнытö да ошкасны енэжвыв Батьнытö». ¹⁷ «Тi чайтанныд, Ме локтi бырöдны Индöдсö да пророк гижöдъяс? Энö мöвпалöй тадзи. Ме эг лок бырöдны, а локтi олöмö пöртны. ¹⁸ Веськыда висьтала тiянлы: енэжыс да муыс быртöдз да ставыс збыльмытöдз весиг öти ичöт шыпас да чуттор оз вош Индöдысь. ¹⁹ Кодi торкас Ен тшöктöмъясысь весиг öти ичöттор да велöдас тадзи вöчны мукöдöс, Енэжвыв Юраланiнын сiйöс медiчöтö пуктасны. Кодi олас тшöктöмъясыс серти да велöдас тадзи овны мукöдöс, Енэжвыв Юраланiнын сiйöс ыджыд мортö пуктасны. ²⁰ Висьтала тiянлы: тiян веськыда олöмныд кö оз ло Индöдö велöдысьяслöн да фарисейяслöн дорысь бурджык, Енэжвыв Юраланiнö онö пырöй». ²¹ «Тi кывлiнныд, важ йöзлы вöлi шуöма: "Эн ви", и нöшта шуöма: "Виысьöс мыждасны". ²² Ме шуа тiянлы: кодi лöгалö вокыс вылö нинöм абусьыс, сiйöс мыждасны. Кодi вокыслы шуас: "Тэ бöб", сiйöс вылыс ёрд мыждас. Кодi йöйöн шуас, сiйö куслытöм биö веськалас. ²³ Сетантортö вайигад кö висьпуктанiн дорын тöд вылад усяс, мый вокыд лöгалö тэ вылö, ²⁴ сэки коль висьпуктанiн дорö сетантортö. Мун, водзджык бурась вокыдкöд, сэсся лок да пукты висьпуктанiнö сетантортö. ²⁵ Тэнö мыжалыськöд бурась öдйöджык, ёрдö вотöдз на. Он кö вöч тадзи, сiйö сетас тэнö ёрдысьлы, ёрдысь сетас тэнö видзысьлы, сэсся тэнö йöртасны дзескыдiнö. ²⁶ Веськыда висьтала тэныд: бöръя сьöмтö сеттöдз он пет сэтысь». ²⁷ «Тi кывлiнныд, важ йöзлы вöлi шуöма: "Гозъя олöмтö эн пежав!" ²⁸ Ме шуа тiянлы: ань вылö ыштöмöн видзöдысь сьöлöмас гозъя олöмсö пежалiс нин. ²⁹ Веськыд синмыд кö ыштöдö тэнö, перйы сiйöс да шыбит. Бурджык син пöвтö воштыны вир-яйтö дзоньнас куслытöм биö шыбитöм дорысь. ³⁰ Веськыд киыд кö ыштöдö тэнö, керышт сiйöс да шыбит. Бурджык ки пöвтö воштыны вир-яйтö дзоньнас куслытöм биö шыбитöм дорысь. ³¹ Нöшта шуöма: "Гöтырсö эновтысь мед сетас сылы торйöдчан гижöд". ³² Ме шуа тiянлы: верöсыс кö эновтö гöтырсö, а гöтырыс оз кырсав, сiйö сетö помка гöтырыслы пежавны гозъя олöмсö. Юксьöм аньöс гöтырö босьтысь тшöтш пежалö». ³³ «Тi кывлiнныд, важ йöзлы вöлi шуöма: "Сетöм кывтö эн торк! Господь водзын сетöм кывтö кут!" ³⁴ Шуа тiянлы: кыв сеттöг ов! Эн сет кывтö енэж водзын – сiйö Енлöн пукаланiныс. ³⁵ Эн сет кывтö му водзын – сiйö Енлöн кок улыс. Эн сет кывтö Ерусалим кар водзын – сiйö ыджыд Öксылöн кар. ³⁶ Аслад юрöн эн кöсйысь, öд тэ весиг öти юрси сi он вермы пöртны еджыдö либö сьöдö. ³⁷ Тiян "да"-ныд мед лоö сöмын "да", тiян "ог"-ныд мед лоö сöмын "ог", а содтöд кывъясыс – омöльсяньыс». ³⁸ «Тi кывлiнныд, вöлi шуöма: "Син понда син, пинь понда пинь". ³⁹ Ме шуа тiянлы: тэныд лёксö вöчысьлы паныд эн сувт. Веськыд банад кö кучкасны, лöсьöд шуйгасö. ⁴⁰ Зiльö кö кодкö ёрд пыр дöрöмтö босьтны, сет сылы тшöтш вылыс паськöмтö. ⁴¹ Тшöктö кö кодкö мунны сыкöд öти верст, мун сыкöд кыкöс. ⁴² Тэнсьыд корысьлы сет, водзöсöн босьтысьöс эн вöтлы». ⁴³ «Тi кывлiнныд, вöлi шуöма: "Радейт матыссатö да мустöмт тэныд паныд мунысьöс". ⁴⁴ Ме шуа тiянлы: радейтöй тiянлы паныд мунысьясöс, бурсиöй тiянöс ёрысьясöс, бурсö вöчöй тiянöс мустöмтысьяслы, кевмысьöй тiянöс öтдортысьяс да вöтлысьяс вöсна. ⁴⁵ Сэки лоанныд енэжвыв Батьныдлы ныв-пиöн. Сiйö тшöктö шондiыслы öтмоза шонтыны лёк да бур йöзöс, сетö зэрсö веськыда да лёк нога олысьяслы. ⁴⁶ Радейтанныд кö тiянöс радейтысьясöс, мыйысь удждонсö виччысянныд? Оз öмöй тадзи вöчны тшöтш вот перйысьяс? ⁴⁷ Тi кö чолöмаланныд-сибöданныд сöмын вокъяснытö, тi öмöй бурджыка вöчанныд? Оз öмöй тадзи вöчны тшöтш ентöдтöмъяс? ⁴⁸ Лоöй енэжвыв Батьныд моз тырвыйö бурöсь».

¹ «Видзчысьöй, тiян бур вöчöмныд мед оз ло йöз водзын петкöдлöм могысь. Тадзи кö, оз ло тiянлы енэжвыв Батьныдсянь удждон. ² Корысьлы кö сетан, эн йöзöд тайöс. Тадзи вöчöны кык бана шаньгаяс синагогаясын да йöзаинъясын, öд найö йöзсянь ошкöм виччысьöны. Веськыда висьтала тiянлы: найö босьтöны нин ассьыныс удждонсö. ³ Корысьлы сетiгад шуйга киыд мед оз тöд веськыд киыдлысь вöчöмсö. ⁴ Тэнад бур вöчöм йылысь мукöдлы тöднысö оз ков. Гусясö аддзысь Батьыд сетас тэныд аддзымöнъя». ⁵ «Эн кевмысь кык бана шаньгаяс моз. Асьнысö йöз водзын петкöдлöм могысь найö радейтöны синагогаясын да туйвежъясын сулалöмöн кевмысьны. Веськыда висьтала тiянлы: найö босьтöны нин ассьыныс удждонсö. ⁶ Но тэ пыр аслад вежöсö, öдзöстö пöдлав да кевмысь тыдавтöм Батьыдлы. Гусясö аддзысь Батьыд сетас тэныд аддзымöнъя. ⁷ Кевмысиганыд ентöдтöмъяс моз энö шуалöй ковтöмсö. Найö чайтöны, мый уна кыв шуöмнысла Енмыс кылас найöс. ⁸ Энö лоöй на кодьöсь. Тiян кортöдз на Батьныд тöдö тiянлы коланасö. ⁹ Кевмысьöй тадзи: – Батьöй миян, Тэ енэжъяс вылын олан. Мед лоö вежаöн Тэнад нимыд. ¹⁰ Мед воас Тэнад Юралöмыд. Мед инас Тэнад кöсйöмыд му вылын енэжын моз. ¹¹ Сет миянлы талун кежлö няньнымöс. ¹² И прöстит миянлысь мыжъяснымöс, кыдзи ми прöститам миян водзын мыжаясöс. ¹³ Эн сет миянлы ылавны, но видз миянöс омöльысь. Öд Тэнад Юралöмыд, выныд да дзирдлуныд помасьлытöм. Аминь. ¹⁴ Прöститанныд кö мöдлысь мыжъяссö, сэки енэжвыв Батьныд прöститас тiянöс. ¹⁵ Онö кö прöститöй, сэки Батьныд тiянлысь мыжъяснытö оз прöстит». ¹⁶ «Видзалiганыд энö лоöй жугыльöсь кык бана шаньгаяс моз. Найö ветлöны шог чужöмöн видзалöмсö петкöдлöм могысь. Веськыда висьтала тiянлы: найö босьтöны нин ассьыныс удждонсö. ¹⁷ Мöдарö, видзалiгад юрситö шыльöд, чужöмтö мыськы, ¹⁸ йöзыс мед оз тöдлыны тэнсьыд видзалöмтö. Видзав аслад тыдавтöм Батьыд водзын. Гусясö аддзысь Батьыд сетас тэныд аддзымöнъя». ¹⁹ «Энö чöжöй аслыныд озырлун му вылын. Танi воз да сiм сiйöс сёйö, гусясьысьяс пырöны да нуöны ставсö. ²⁰ Мöдарö, чöжöй озырлунтö енэжö. Сэнi воз да сiм оз сёй сiйöс, гусясьысьяс оз пырны да оз нуны. ²¹ Кöнi озырлунныд, сэнi лоö и сьöлöмныд. ²² Синмыд – вир-яйтö югдöдысь. Синмыд кö бур, став вир-яйыд югыдын. ²³ Синмыд кö лёк, став вир-яйыд пемыдын. Югыдыс кö тэ пытшкын пемыд, сэки кутшöм ачыс пемыдыс? ²⁴ Морт оз вермы кесъявны кык ыджыдлы. Öтисö кö радейтö, мöдсö мустöмтö. Öтисö кö пыдди пуктö, мöдсö увтыртö. Тi онö вермöй кесъявны Енлы, кесъяланныд кö озырлунлы». ²⁵ «Та вöсна шуа тiянлы: энö майшасьöй сёян-юан да паськöм вöсна. Олöмныд абу öмöй донаджык сёян-юанысь да вир-яйныд паськöмысь? ²⁶ Видзöдлöй енэжвыв лэбачьяс вылö: найö оз кöдзны, оз вундыны, оз чукöртны йöртöдъясö, но енэжвыв Батьныд вердö найöс. Тi öмöй наысь абу донаджыкöсь? ²⁷ Вермас-ö тiян пиысь кодкö зiльöмöн-тöждысьöмöн нюжöдыштны ассьыс олан нэмсö? ²⁸ Мыйла паськöмныд вöсна майшасянныд? Видзöдлöй видзвыв дзоридзьяслöн быдмöм вылö: найö оз мырсьыны, оз печкыны. ²⁹ Висьтала тiянлы: ачыс Соломон став озырлун дырйиыс эз пасьтасьлы весиг öти татшöм дзоридзысь мичаджыка. ³⁰ Енмыс кö тадзи пасьтöдö видзвыв турунöс, кодi талун быдмö, а аски шыбитасны пачö, оз öмöй Сiйö пасьтöд тiянöс, этша эскысьяс! ³¹ Та вöсна энö шуалöй: "Мый сёйны-юны да мый пасьтавны?" ³² Тайö ставыс майшöдлö ентöдтöмъясöс. Но енэжвыв Батьныд тöдö, мый ставыс тайö колö тiянлы. ³³ Медводз корсьöй Енлысь Юралöмсö да Сылысь веськыдлунсö, сэки тiян ставыс тайö лоö. ³⁴ Энö майшасьöй аскиа луныс вöсна, аскиыс ас вöснаыс тöждысяс. Быд лунлы аслас тöждыс тырмö».

¹ «Энö мыждöй, сэки тiянöс оз мыждыны. ² Öд тiян мыждöмныд ас выланыд бöр воас. Асланыд мурталöм серти тiянлы мурталасны. ³ Кыдзи тэ верман вокыд синмысь ёгторсö аддзыны, аслад синмысь кö керсö он казяв? ⁴ Кыдзи тэ верман шуны вокыдлы: "Вай перъя синсьыд ёгторсö", аслад синмад кö кер? ⁵ Кык бана шаньга! Водзджык аслад синмысь керсö перйы, сэки вокыдлöн синмысь ёгторсö верман перйыны. ⁶ Вежасö энö сетöй понъяслы да донаторнытö энö коялöй порсьяслы. Вöчанныд кö тадзи, понъяс уськöдчасны да косявласны тiянöс, а порсьяс ставсö таляласны». ⁷ «Корöй, и тiянлы сетасны, корсьöй, и тi аддзанныд, игöдчöй, и тiянлы восьтасны. ⁸ Öд корысьлы сетöны, корсьысьлы сюрö да игöдчысьлы восьтöны. ⁹ Кодi тiян пöвстысь пиыслы сетас из, корас кö сiйö нянь? ¹⁰ Сетас-ö змейöс, корас кö пиыс чери? ¹¹ Тi лёкöсь, а сямманныд бурсö сетны асланыд ныв-пилы. Дерт нин, енэжвыв Батьныд уна пöвстöн бурсö сетас Сылысь корысьяслы. ¹² Мый кöсъянныд, медым йöзыс вöчисны тiянлы, сiйöс и тi вöчöй налы. Тадзи Индöд да пророк гижöдъяс велöдöны». ¹³ «Пырöй векньыд öдзöсöд. Öд паськыд öдзöсыс да паськыд туйыс кулöмö нуöдöны, и унаöн сэтi мунöны. ¹⁴ Векньыд öдзöсыс да векньыд туйыс олöмö нуöдöны, и тайöс аддзысьыс этша». ¹⁵ «Видзöй асьнытö ылöгпророкъясысь. Найö локтöны тiян дiнö ыжъяс кодьöн, а збыльвылас найö горш кöинъяс. ¹⁶ Вотöсныс серти тi тöдмаланныд найöс. Чукöртлöны öмöй лежнöг вылысь виноград да тусяпу вылысь инжир? ¹⁷ Бур пу вайö бур вотöс, лёк пу – лёкöс. ¹⁸ Бур пу оз вермы вайны лёк вотöс, лёк пу – бур вотöс. ¹⁹ Пуыс кö оз вай бур вотöс, сiйöс кералöны да шыбитöны биö. ²⁰ Тадзи вайöм вотöс сертиыс тi тöдмаланныд ылöгпророкъясöс. ²¹ Оз быдöн, кодi шуö Меным: "Господьöй, Господьöй", пыр Енэжвыв Юраланiнö. Пырас сöмын Менам енэжвыв Батьлöн кöсйöм серти олысь. ²² Сiйö лунö Меным унаöн шуасны: "Господьöй, Господьöй, эг-ö Тэнад нимсянь ми пророкалöй? Эг-ö Тэнад нимöн пеж ловъясöс вöтлалöй? Эг-ö Тэнад нимöн шензьöданаторъяс вöчалöй?" ²³ Сэки Ме вочавидза налы: "Ог тöд тiянöс. Мунöй Ме дорысь, лёксö вöчысьяс!"» ²⁴ «Кодi кылö Менсьым кывъясöс да олö на серти, сiйö из вылö керкасö лэптысь сюсь вежöра морт кодь. ²⁵ Чорыда кö зэрмас, юяс ойдасны, ыджыд тöвныр петас да керкасö мöдас пöрöдны, тайö керкаыс сэки оз пöр, öд сiйöс из вылö лэптöма. ²⁶ А кодi кылö Менсьым кывъясöс да оз ов на серти, сiйö лыа вылö керкасö лэптысь вежöртöм морт кодь. ²⁷ Чорыда кö зэрмас, юяс ойдасны, ыджыд тöвныр петас да керкасö мöдас пöрöдны, тайö керкаыс сэки дзоньнас киссяс». ²⁸ Исусöс кывзöм бöрын йöзыс ёна шензисны Сылöн велöдöмысь. ²⁹ Öд Исус велöдiс ыджыдалысьö пуктöм морт моз, эз Индöдö велöдысьяс да фарисейяс моз.

¹ Кор Исус лэччис керöсысь, уна йöз вöтчис Сы бöрся. ² Проказаöн висьысь матыстчис Исус дiнö да Сы водзö уськöдчöмöн шуис: «Господьöй, кöсъян кö, верман менö сöстöммöдны». ³ Исус нюжöдiс кисö, инмöдчылiс сы дiнö да шуис: «Кöсъя. Сöстöммы». Висьысьлöн дойясыс дзик пыр бырисны, да сiйö бурдiс. ⁴ Исус шуис сылы: «Та йылысь некодлы эн висьтав. Мун, петкöдлы асьтö поплы, сэсся Мöисей тшöктöм серти вай вись. Тадзи тöдмаласны тэнад бурдöм йылысь». ⁵ Исус пырис Капернаум карö. Сы дiнö локтiс шыпуртаяслöн веськöдлысь да корис отсавны: ⁶ «Господьöй, менам кесйöгöй гортам куйлö, ки-коксö вöрзьöдны оз вермы, вывтi сьöкыда висьö». ⁷ Исус шуис сылы: «Ме локта, бурдöда сiйöс». ⁸ Веськöдлысь воча шуис: «Господьöй, ме ог сулав сы доныс, медым Тэ пырин менам керка вевт улö. Сöмын кыв шу, и кесйöгöй бурдас. ⁹ Ме ачым киподувса морт, но и менам кипод улын эмöсь шыпуртаяс. Öтилы шуа: "Мун", и сiйö мунö. Мöдлы тшöкта локны, и сiйö локтö. Кесйöглы шуа: "Вöч тайöс", и сiйö вöчö». ¹⁰ Тайö мортыслöн висьталöмыс шензьöдiс Исусöс. Сiйö шуис Ас бöрсяыс мунысьяслы: «Веськыда висьтала тiянлы: татшöм ыджыд эскöмсö Ме весиг Израильысь эг аддзыв. ¹¹ Висьтала тiянлы: унаöн локтасны асыввылысь да рытыввылысь Енэжвыв Юраланiнö. Найö öти пызан сайö пуксясны Öвраамкöд, Исааккöд да Яковкöд. ¹² А кодлы водзысяньыс вöлi дасьтöма Енлысь Юраланiнсö, найöс шыбитасны пемыдас. Сэнi лоö бöрдöм да пинь йирöм». ¹³ Сэсся шыпуртаяслöн веськöдлысьлы Исус шуис: «Мун гортад. Мед лоас эскöмыд серти». Веськöдлысьлöн кесйöгыс дзик пыр бурдiс. ¹⁴ Исус локтiс Петыр ордö. Сэнi аддзис, мый Петыр гöтырлöн мамыс куйлö вольпасьын биа висьöмöн. ¹⁵ Исус инмöдчылiс висьысьлы киас, и биа висьöмыс эновтiс сiйöс. Ань чеччис да пондiс кесъявны налы. ¹⁶ Рытнас Исус дiнö вайöдiсны пеж лолöн кутöм уна йöзöс. Исус кыв шуöмöн вöтлалiс пеж ловъясöс, бурдöдалiс висьысьясöс, ¹⁷ медым инiс Исай пророклöн шуöмыс: – Миянлысь нёрпалöмъяс Сiйö босьтiс да миянлысь висьöмъяс Сiйö вештiс. ¹⁸ Ас гöгöрсьыс уна йöзöс казялöм бöрын Исус тшöктiс велöдчысьясыслы вуджны ты мöдлапöлö. ¹⁹ Индöдö велöдысьясысь öти матыстчис Сы дiнö да шуис: «Велöдысьöй, ме быдлаö Тэ бöрся муна». ²⁰ Исус шуис сылы: «Ручьяслöн эмöсь пырмöсъяс, и енэжвыв лэбачьяслöн эмöсь позъяс, сöмын Морт Пилöн шойччанiныс абу». ²¹ Исуслöн öти велöдчысь корис: «Господьöй, лэдзлы менö медводз батьöс дзебны». ²² Исус шуис сылы: «Лок Ме бöрся, кулöмаяс мед дзебасны кулöмаяснысö». ²³ Исус пуксис пыжö, велöдчысьясыс Сы бöрся. ²⁴ Виччысьтöг ты вылын кыптiс ыджыд тöвныр, ёна гызис, да пыжыс кутiс тырны ванас. Исус вöлi узьö. ²⁵ Велöдчысьяс садьмöдiсны Сiйöс шуалöмöн: «Господьöй, мезды миянöс! Вöям!» ²⁶ Исус шуис: «Мыйла тi сэтшöм полысьöсь, этша эскысьяс?» Сэсся Исус чеччис, öлöдiс тöвсö да васö, и вöвлытöм чöв-лöнь пуксис. ²⁷ Велöдчысьяс чуймисны, öта-мöдныслысь пондiсны юасьны: «Кодi Сiйö? Весиг тöлыс да ваыс кывзысьö Сылысь». ²⁸ Та бöрти Исус вуджис ты мöдлапöлö, Гергесин муö. Сылы воча петiсны шойгу кыртаысь кык морт, пеж ловъясöн кутöмаяс. Найö вöлiны лёксьыс-лёкöсь, та вöсна йöзыс полiсны ветлыны тайö туйöдыс. ²⁹ «Мый Тэныд миянсянь колö, Исус, Ен Пи? Локтiн-ö индöм кадысь водзджык песны миянöс?» – горзiсны найö. ³⁰ Ылынкодь йирсис ыджыд порсь чукöр. ³¹ Пеж ловъяс корисны Исусöс: «Вöтлан кö миянöс, ысты порсьяс пытшкö». ³² Исус шуис налы: «Мунöй!» Пеж ловъяс петiсны да пырисны порсьяс пытшкö. А порсьяс кыр йывсянь уськöдчисны тыö да ставныс пöдiсны. ³³ Порсь видзысьяс котöрöн пышйисны сэтысь карö да висьталiсны сэнi аддзывлöмтор йывсьыс, пеж ловъясöс вöтлöм йылысь. ³⁴ Сэки став карыс петiс Исуслы воча. Исусöс аддзöм бöрын йöзыс корисны Сiйöс мунны налöн муысь.

¹ Исус пуксис пыжö, бöр вуджис тысö да воис Аслас карö. ² Сэнi вайисны Сы дiнö вольпасьын куйлысь, вöрзьöдчыны вермытöм мортöс. Налысь эскöмсö аддзöмöн Исус шуис висьысьлы: «Эн пов, пиöй! Тэнсьыд мыжъястö прöститöма». ³ Индöдö велöдысьясысь кодсюрö ас пытшканыс мöвпалiсны: «Сiйö Енмöс омöльтö». ⁴ Налысь мöвпъяссö тöдöмöн Исус шуис: «Мыйла сьöлöманыд лэдзанныд лёк мöвпъяссö? ⁵ Мый кокньыдджык шуны: "Тэнсьыд мыжъястö прöститöма" либö "Чеччы да ветлы"? ⁶ Öнi тi тöдмаланныд: Морт Пи вермö прöститны мыжъяс му вылын». Сэсся шуис висьысьлы: «Чеччы, босьт вольпасьтö да мун гортад». ⁷ Сiйö чеччис да мунiс гортас. ⁸ Тайöс аддзöм бöрын йöзыс шензьöмöн ошкисны Енмöс, öд та ыджда вын сетöма мувывса йöзлы. ⁹ Исус водзö мунiс да аддзис вотчукöртанiнын пукалысь Матвей нима мортöс. Исус шуис сылы: «Лок Ме бöрся». Сiйö чеччис да мунiс Исус бöрся. ¹⁰ Исус сёйö вöлi Матвей ордын, кор сэтчö локтiсны вот перйысьяс да мукöд мыжа йöз. Исускöд да Сылöн велöдчысьяскöд найö пукалiсны öти пызан сайын. ¹¹ Тайöс аддзисны фарисейяс да юалiсны Исуслöн велöдчысьяслысь: «Мыйла тiян Велöдысьныд сёйö-юö вот перйысьяскöд да мыжа йöзкöд?» ¹² Исус кылiс тайöс да шуис налы: «Дзоньвидзалы бурдöдысьыд оз ков, сiйö висьысьлы колö. ¹³ "Буралöм тiянсянь кöсъя, ог вись вайöм" – мунöй да гöгöрвоöй тайö кывъяссö. Ме локтi корны Ен дiнö мыжаясöс, эг веськыда олысьясöс». ¹⁴ Иоанлöн велöдчысьясыс локтiсны Исус дiнö да юалiсны: «Ми уна видзалам, фарисейяс тшöтш уна видзалöны. Мыйла Тэнад велöдчысьясыд оз?» ¹⁵ Исус вочавидзис: «Вермöны-ö ёртъясыс шогавны кöлысь вылын, кор верöспуыс накöд? Воасны на сійö лунъясыс, кор колясны верöспутöг, сэки и видзаласны. ¹⁶ Важ паськöмтö оз дöмны выль дöра дöмасöн. Тадзи кö вöчан, выль дöмас дортiыс нёйдас-косяссяс паськöмыд, розьыс ёнджыка на ыдждас. ¹⁷ Выль винатö оз кисьтны важ кучик дозйö. Тадзи кö вöчан, кучик дозйыс потас, и винаыс киссяс. Выль винатö кисьтöны выль кучик дозйö. Сэки кыкнанныс дзонь колясны». ¹⁸ Исуслöн сёрнитiгкостi локтiс Сы дiнö öти юралысь да пидзöс вылас уськöдчöмöн корис: «Менам нылöй муртса на кулiс. Лок, пуктыв сы вылö китö, мед сiйö ловзяс». ¹⁹ Исус чеччис да мунiс велöдчысьясыскöд юралысь бöрся. ²⁰ Исус дiнö мышсяньыс матыстчис ань да инмöдчылiс Исуслы паськöм дорышас. Дас кык во чöж тайö аньыс висьöма вир мунöмöн. ²¹ Сiйö мöвпалiс: «Сöмын инмöдчыла кö Сылöн паськöмö, бурда». ²² Исус бергöдчис, аддзис аньöс да шуис: «Эн пов, нылöй. Эскöмыд мездiс тэнö». Аньыс дзик пыр бурдiс. ²³ Юралысь керкаö воöм мысти Исус аддзис пöлянöн ворсысьясöс да гораа бöрдысь йöзöс. ²⁴ Исус шуис налы: «Мунöй татысь! Нылыс эз кув, сiйö узьö». Исус вылын пондiсны серавны. ²⁵ Йöзöс вöтлöм бöрын Исус пырис нывка дiнö да босьтiс сiйöс киöдыс. Нывка чеччис. ²⁶ Та йылысь юöрыс разалiс сэтчöс му пасьтала. ²⁷ Сэтысь мунiгöн Исус бöрся вöтчисны кык синтöм морт. Найö горöдiсны: «Ло бур сьöлöма миян дiнö, Давид Пи!» ²⁸ Исус пырис керкаö, синтöмъяс Сы бöрся. Исус юалiс налысь: «Эсканныд-ö, мый Ме верма бурдöдны тiянöс?» Найö шуисны: «Эскам, Господьöй!» ²⁹ Сэки Исус инмöдчылiс налы синмас да шуис: «Мед лоö тiянлы эскöм сертиныд». ³⁰ Найö кутiсны аддзыны. Исус кыкнаннысö чорыда öлöдiс: «Та йылысь некодлы энö висьтавлöй». ³¹ Но керкаысь петöм бöрын найö висьтавлiсны Исус йылысь сэтчöс му пасьталаыс. ³² Бурдöмаяслöн мунöм бöрын Исус дiнö вайöдiсны пеж лолöн кутöм сёрниттöм мортöс. ³³ Исус вöтлiс сы пытшкысь пеж ловсö, да мортыс пондiс сёрнитны. Йöзыс шензисны, татшöмторйыс пö Израиль муын эз на вöвлы. ³⁴ А фарисейяс шуисны, Сiйö пö вöтлалö пеж ловъясöс налöн юралысь вынöн. ³⁵ Исус ветлiс-кытшовтiс став сикт-карсö. Сiйö велöдiс синагогаясын, висьтавлiс Ен Юралöм йылысь Евангелльö да бурдöдалiс йöзсö быд висьöм-доймöмысь. ³⁶ Йöз вылö видзöдiгöн Исуслöн сьöлöмыс нормис, öд найö вöлiны сэтшöм мудзöсь, эбöстöм-вынтöмöсь, видзысьтöг кольöм ыжъяс кодьöсь. ³⁷ Сiйö шуис велöдчысьясыслы: «Вунданыс уна, а вундысьыс этша. ³⁸ Кевмöй вунданiнын Ыджыдыслы, мед ыстас Аслас вунданiнö уджалысьясöс».

¹ Исус корис дас кыкнан велöдчысьсö да сетiс налы вын вöтлавны пеж ловъясöс да бурдöдавны йöзöс быд висьöм-доймöмысь. ² Дас кык апостолсö шуисны тадзи: Симон, кодöс шуисны Петырöн, сылöн Öндрей вокыс, Зеведей Яков да сылöн Иоан вокыс, ³ Филип, Варфоломей, Фома, вот перйысь Матвей, Алфей Яков, Леввей, кодöс шуисны Фаддейöн, ⁴ Кананит Симон да Искариот Иуда, Исусöс вузалысь. ⁵ Тайö дас кыксö мöдöдiгöн Исус велöдiс найöс: «Йöз муясö энö мунöй, Самария каръясö энö пырöй. ⁶ Мунöй израильса вошöм ыжъяс дiнö ⁷ да юöртöй: "Енэжвыв Юралöмыс матын нин". ⁸ Висьысьясöс бурдöдалöй, кулöмаясöс ловзьöдöй, проказаысь сöстöммöдöй, пеж ловъясöс вöтлалöй. Дон мынтытöг босьтiнныд, дон босьттöг и сетöй. ⁹ Туяныд энö босьтöй зарни, эзысь, ыргöн, ¹⁰ ноп, вежан кöм-пась да бедь. Öд уджалысь кынöмпöттöг оз коль. ¹¹ Сиктö-карö пыриганыд корсьöй туяна-шогмана мортöс, мунтöдзныд олöй сы ордын. ¹² Керкаас пыриганыд сиöй лöнь олöм. ¹³ Олысьясыс кö шогмöны, бурсиöмныд коляс налы. Оз кö шогмыны, бурсиöмныд бергöдчас тiянлы. ¹⁴ Оз кö сибöдны-кывзыны тiянöс, сэки сiйö керкасьыс либö карсьыс петiганыд пыркöдöй коксьыныд буссö. ¹⁵ Веськыда висьтала тiянлы: Мыждан лунö Содом да Гомора каръяслы лоас кокньыдджык сiйö карыслы дорысь. ¹⁶ Ме мöдöда тiянöс ыжъясöс моз кöинъяс пöвстö. Лоöй змей кодь сюсьöсь да гулю кодь рамöсь. ¹⁷ Видзчысьöй йöзысь, öд найö кыскасны тiянöс ёрдö да асланыс синагогаясын нöйтасны тiянöс. ¹⁸ Ме вöсна нуöдасны тiянöс юралысьяс да öксыяс водзö, медым найö да ентöдтöмъяс тöдiсны Ме йылысь. ¹⁹ Кор нуöдасны тiянöс ёрдö, энö майшасьöй, кыдзи да мый шуны, öд сiйö кадас тiянлы воасны колана кывъяс. ²⁰ Сэки онö тi кутöй сёрнитны, но Ен Батьныдлöн Лолыс сёрнитас тiян пыр. ²¹ Вокыс воксö сетас вины, батьыс – писö. Ныв-пи сувтасны бать-мамыслы паныд да виасны найöс. ²² Менам ним вöсна унаöн мустöмтасны тiянöс, но сьöкыдсö помöдз нуысь мездмас. ²³ Öти карысь кö тiянöс вöтласны, пышйöй мöдö. Веськыда висьтала тiянлы: Израильысь став карсö кытшовттöдзныд на Морт Пи локтас. ²⁴ Велöдчысь абу ыджыдджык велöдысьысь, да кесйöг абу ыджыдджык аслас ыджыдысь. ²⁵ Велöдчысьлы тырмымöн быдмыны велöдысьыс кодьöдз, кесйöглы – ыджыдыс кодьöдз. Керка кутысьöс кö Вельзевулöн шуасны, сылысь гортсасö лёкджыка на нимтасны. ²⁶ Энö полöй тiянöс мустöмтысьясысь. Став дзебöмаыс тыдовтчас да став гусяыс йöзасяс. ²⁷ Мый Ме шуа тiянлы пемыдын, висьталöй югыдын. Пеляныд вашкöдöмасö юöртöй керка вывсянь. ²⁸ Энö полöй вир-яйтö виысьясысь, ловтö найö вины оз вермыны. Полöй Сыысь, кодi вермö бырöдны ловтö да вир-яйтö куслытöм биын. ²⁹ Оз-ö сöмын öти урысь вузавны кык пышкайöс? На пиысь весиг öти оз усь муö тiян Батьлöн шутöг. ³⁰ А тiянлысь став юрсинытö лыддьöма. ³¹ Сiдзкö, энö полöй, тi öд донаджыкöсь пышкайясысь». ³² «Кодi оз яндысь Меысь йöз водзын, сыысь Ме ог яндысь Аслам енэжвыв Бать водзын. ³³ Кодi соссяс Меысь йöз водзын, сыысь Ме сосся Аслам енэжвыв Бать водзын. ³⁴ Энö мöвпалöй, мый Ме локтi вайны му вылö лöнь олöм. Локтi вайны эг лöнь олöм, но шыпурт. ³⁵ Ме локтi торйöдны писö батьсьыс, нывсö мамсьыс, моньсö энькасьыс. ³⁶ Мортлы паныд мунысьыс – сылöн гортсаяс. ³⁷ Кодлы бать-мамыс Ме дорысь мусаджык, Меным сiйö оз шогмы. Кодлы ныв-пиыс Ме дорысь мусаджык, Меным сiйö оз шогмы. ³⁸ Кодi оз босьт ассьыс крестсö да оз мун Ме бöрся, Меным сiйö оз шогмы. ³⁹ Ассьыс олöмсö видзысь воштас сiйöс, Ме вöсна олöмсö воштысь аддзас сiйöс. ⁴⁰ Тiянöс сибöдысь Менö сибöдö, а Менö сибöдысь сибöдö Менö Мöдöдысьöс. ⁴¹ Кодi пророкöс сибöдас пророкöс моз, сылы сетасны пророклы кодь удждон. Кодi веськыда олысьöс сибöдас веськыда олысьöс моз, сылы сетасны веськыда олысьлы кодь удждон. ⁴² Веськыда висьтала тiянлы: кодi кöдзыд ваöн юкталас тайö медiчöтъясысь öтиöс Менсьым велöдчысьöс моз, сiйö оз коль удждонтöг».

¹ Дас кыкнан велöдчысьсö велöдöм-туйдöдöм бöрын Исус мунiс юöртны да велöдны мукöд каръясö. ² Дзескыдiнын пукалiгас Иоан кывлiс Кристослöн уджъяс йылысь. Сiйö мöдöдiс ассьыс кык велöдчысьсö ³ юавны Исуслысь: «Тэ-ö сiйö Локтысьыс? Колö-ö миянлы мöдöс виччысьны?» ⁴ Исус вочавидзис: «Мунöй, висьталöй Иоанлы, мый кыланныд да аддзанныд: ⁵ – Синтöмъяс аддзöны, коктöмъяс ветлöны, проказаысь сöстöммöны, пельтöмъяс кылöны, кулöмаяс ловзьöны, коньöръяслы Бур Юöр висьтавлöны. ⁶ Шуда сiйö, кодi оз ылав Меысь». ⁷ Кор Иоанлöн велöдчысьясыс мунiсны, Исус пондiс висьтавны йöзыслы Иоан йылысь: «Мый видзöдны ветлiнныд овтöминас? Тöлöн вöрöдысь идзас-ö? ⁸ Мый видзöдны ветлiнныд? Мича да озыр паськöма мортöс? Татшöм паськöма йöзыс олöны öксы оланiнъясын. ⁹ Кодöс видзöдны ветлiнныд? Пророкöс-ö? Шуа тiянлы: тi аддзылiнныд пророкысь ыджыдöс. ¹⁰ Сы йылысь гижöма: – Ыста Ассьым юöртысьöс Тэ водзвылын, сiйö Тэныд туйсö дасьтас. ¹¹ Веськыда висьтала тiянлы: му вылын чужысьясысь эз вöвлы Пыртысь Иоанысь ыджыдджыкыс, но Енэжвыв Юраланiнын медiчöтыс сы дорысь ыджыдджык. ¹² Пыртысь Иоан лунъяссянь да öнöдз Енэжвыв Юралöмсö дзескöдöны, и паныд мунысьяс зiльöны мырддьыны сiйöс. ¹³ Став пророкыс да Индöдыс Иоанöдз на юöртлiсны Енлöн Юралöм йылысь. ¹⁴ Кöсъянныд кö тöдны, сiйö буретш Илля, кодлы колö вöлi локны. ¹⁵ Кодлöн эм пель, мед кылö! ¹⁶ Кодкöд Ме öткодяла öнiя олысьясöс? Найö изэрд вылын пукалысь челядь кодьöсь, кодъяс ёртъясыслы ¹⁷ шуалöны: "Ми ворсiм тiянлы пöлянöн, а тi энö йöктöй. Ми сьылiм тiянлы бöрдöдчанкывъяс, а тi энö бöрдöй". ¹⁸ Иоан локтiс, оз сёй, вина оз ю, шуöны, сы пытшкын пö пеж лов. ¹⁹ Морт Пи локтiс, сёйö-юö, Сы йылысь шуöны, рушку тыртысь да вина юысь пö, вот перйысьяскöд да мыжаяскöд ёртасьысь пö. Мывкыдлунсö пыдди пуктöны мывкыдлуныслöн челядьыс». ²⁰ Сэсся Исус пондiс мыжавны каръяс сыысь, мый сэтчöс йöзыс эз бергöдчыны мыжъяссьыныс, öд тайö каръясас Исус вöчис медуна шензьöданатор. ²¹ «Курыд шог тэныд, Коразин кар! Курыд шог тэныд, Випсаида кар! Тир да Сидон каръясын кö аддзылiсны тiянын кодь вöчöм шензьöданаторъяссö, сэки эськö сэтчöс олысьясыс важöн нин бергöдчисны мыжъяссьыныс, шогалан паськöм пасьталiсны да юрнысö пöимöн киськалiсны. ²² Висьтала тiянлы: Мыждан лунö Тир да Сидон каръяслы лоас кокньыдджык тiянлы дорысь. ²³ Тэ, Капернаум кар, чайтан енэжöдз кыпöдчыны? Ад пыдöсöдз усян! Содом карын кö аддзылiсны тiянын кодь вöчöм шензьöданаторъяссö, сiйö эськö öнi на сулалiс. ²⁴ Висьтала тiянлы: Мыждан лунö Содом мулы лоас кокньыдджык тэныд дорысь». ²⁵ Сэки Исус шуис: «Ошка Тэнö, Батьöй, енэжыс да муыс вылын Ыджыдалысьöс! Тэ дзебин тайöс сюсь вежöраясысь да восьтiн кага коддьöмлы. ²⁶ Татшöм вöлi Тэнад бур кöсйöмыд, Батьöй. ²⁷ Батьöй ставсö сетiс Меным. Сöмын Батьыс тöдö Писö, да сöмын Пиыс тöдö Батьсö, и нöшта сiйö, кодлы Пиыс кöсйö восьтны. ²⁸ Локтöй Ме дiнö мудзöмаяс да сьöкыда мырсьысьяс, Ме тiянöс шойччöда. ²⁹ Босьтöй Менсьым сийöсöс да велöдчöй Месянь, öд Ме рам да небыд сьöлöма. Сэки тiян ловлы сюрас шойччöг. ³⁰ Öд Менам сийöсöй оз личкы, да Менам нöбйöй оз сьöктöд».

¹ Шойччан лунö Исус мунö вöлi кöдзöм муяс вомöн. Велöдчысьяслöн кынöмыс кутiс сюмавны, и мунiгмозныс найö пондiсны нетшкыны шепсö да сёйны. ² Тайöс аддзылiсны фарисейяс да шуисны Исуслы: «Видзöдлы, мый Тэнад велöдчысьясыд вöчöны! Тайöс оз позь вöчны шойччан лунö». ³ Исус воча шуис: «Тi öмöй энö лыддьылöй, мый вöчис Давид, кор тшыгъялiс аслас йöзкöд? ⁴ Сiйö пырис Ен керкаö да сёйис аслас йöзкöд Енлы вайöм няньсö. Тайöс налы вöчнысö эз позь, сöмын попъяслы позис. ⁵ Тi öмöй энö лыддьылöй Индöдысь, мый шойччан лунö попъяс уджалöны крамын, но шойччан лунсö торкалöмысь найö абу мыжаöсь. ⁶ Висьтала тiянлы: танi Сiйö, кодi крам дорысь ыджыдджык. ⁷ Тöдiнныд кö тайöс, мый "буралöм тiянсянь кöсъя, ог вись вайöм", сэки эськö энö мыжалöй мыжтöмъясöс. ⁸ Морт Пи шойччан лун вылын ыджыдыс». ⁹ Сэтысь мунöм бöрын Исус пырис синагогаö. ¹⁰ Сэнi вöлi косьмöм киа морт. Фарисейяс корсисны помка мыжавны Исусöс да юалiсны Сылысь: «Позьö-ö шойччан лунö бурдöднысö?» ¹¹ Исус вочавидзис: «Тiян ыжныд кö шойччан лунö усяс гуö, онö öмöй лэптöй сiйöс сэтысь? ¹² Мортыс абу öмöй донаджык ыжысь? Сiдзкö, бурсö позьö вöчны шойччан лунö». ¹³ Сэсся Исус шуис висьысьлы: «Нюжöд китö». Сiйö нюжöдiс, и киыс пырысь-пыр бурдiс, лои мöдыс кодь. ¹⁴ Сэки фарисейяс петiсны да панiсны сёрни Исусöс виöм йылысь. ¹⁵ Кор Исус тöдмалiс та йылысь, мунiс сэтысь. Сы бöрся вöтчис уна йöз. Исус бурдöдалiс висьысьясöс ¹⁶ да öлöдiс найöс Сы йылысь висьтавлöмысь. ¹⁷ Тадзи инiс Исай пророклöн шуöмыс: ¹⁸ – Тайö Менам бöрйöм кесъялысьöй, сьöлöм бурöдысьöй да олан гажöй. Ме сета Сылы Ассьым Лолöс. Сiйö юöртас Менсьым веськыда мыждöмöс быд кыла войтырлы. ¹⁹ Оз вензьы, оз горзы Сiйö, ывлаысь Сiйöс он кыв. ²⁰ Веськыда мыждöмсö пöрттöдз Сiйö идзастор оз чег да дзузган би оз кусöд. ²¹ Сы вылö лача пондас кутны быд кыла войтыр. ²² Исус дiнö вайöдiсны пеж лолöн кутöмаöс. Тайö мортыс вöлi синтöм да эз сёрнит. Исус бурдöдiс сiйöс, мöдыс пондiс сёрнитны да аддзыны. ²³ Став йöзыс чуймисны, öта-мöдныслысь юасисны: «Збыльысь-ö сiйö Давид Пи?» ²⁴ Тайöс кывлiсны фарисейяс да шуисны, Сiйö пö вöтлалö пеж ловъясöс налöн Вельзевул юралысь вынöн. ²⁵ Налысь мöвпъяссö тöдöмöн Исус шуис: «Ас муын олысьяс кö ас костаныс тышкасьöны, тайö муыс кушмас. Зыксьöмöн олысь карыд да керкаыд дыр оз сулав. ²⁶ Сöтанаыс кö сöтанасö вöтлö, сiйö аслыс паныд тышкасьö. Дыр-ö кутчысяс сылöн ыджыдалöмыс? ²⁷ Ме кö вöтлала пеж ловъясöс Вельзевул вынöн, кутшöм вынöн, сiдзкö, тiян йöзыд вöтлалöны? Найö тiянöс мыждасны. ²⁸ Ме кö Ен Лолöн вöтлала пеж ловъясöс, сiдзкö, Енлöн Юралöмыс воис тiянöдз. ²⁹ Вермас-ö кодкö пырны вына мортлöн керкаö да сiйöс кöртавтöг босьтны сылысь эмбурсö? Вына мортöс кöрталöм бöрын сöмын вермас босьтны эмбурсö. ³⁰ Кодi абу Мекöд, сiйö Меным паныд, кодi оз чукöрт Мекöд, сiйö разöдö. ³¹ Та вöсна висьтала тiянлы: мортлысь быд мыж да быд омöльтöм лоö прöститöма, но Вежа Лолöс омöльтöм оз ло прöститöма. ³² Лёкöдан кö Морт Пиöс, лоан прöститöма. Лёкöдан кö Вежа Лолöс, он ло прöститöма тайö олöмас, весиг локтанаас». ³³ «Бур пу вайö бур вотöс, лёк пу – лёкöс. Путö донъялöны вотöс сертиыс. ³⁴ Вижля йылöм! Верманныд-ö бурсö висьтавны, асьныд кö лёкöсь? Öд мыйöн тырöма мортыслöн сьöлöмыс, сiйö вомсьыс и петö. ³⁵ Бур морт аслас бур видзанiнысь бурсö петкöдö, лёк морт аслас лёк видзанiнысь лёксö петкöдö. ³⁶ Шуа тiянлы: быд ковтöм кывйысь Мыждан лунö ковмас кывкутны. ³⁷ Аслад кывъясысь мыжман, аслад кывъясысь мездман мыждöмысь». ³⁸ Сэки фарисейяс да Индöдö велöдысьяс пиысь кодсюрö корисны: «Велöдысь, петкöдлы миянлы индысьпас». ³⁹ Исус воча шуис: «Лёк да пежас ылалöм йöз кöсйöны аддзывны индысьпас, но Иона пророк пасысь кындзи оз ло налы мöдыс. ⁴⁰ Куим лун да куим вой Иона вöлi ыджыд чери рушкуын. Тадзи Морт Пи лоö му пыдöсын куим лун да куим вой. ⁴¹ Ниневия карын олысьяс сувтасны Мыждан лунö öнiя олысьяскöд да мыжаласны найöс. Öд Ионалöн юöртöм бöрын ниневияса йöз бергöдчисны асланыс мыжъясысь. Танi Иона дорысь ыджыдджык. ⁴² Лунвыв муысь öксы-ань сувтас Мыждан лунö öнiя олысьяскöд да мыжалас найöс. Öд сiйö му помсяньыс волiс кывзыны Соломонлысь мывкыд сёрнисö. Танi Соломон дорысь ыджыдджык». ⁴³ «Морт пытшкысь петöм бöрын пеж лов шöйтö ватöминъястi, корсьö шойччанiн да оз аддзы. ⁴⁴ Сэки шуö: "Бöр муна важ оланiнö, кытысь петi". Локтöм бöрас аддзö: оланiнсö чышкöма-пелькöдöма, и олысьыс сэнi абу. ⁴⁵ Сэки мунö да босьтö аскöдыс сизим пеж лолöс, ассьыс на лёкджыкъясöс, сэсся ставныс найö овмöдчöны важ оланiнас. Тайö мортыслы воддза дорсьыс нöшта на лёкджык лоö. Тадзи жö лоö öнiя лёк йöзлы». ⁴⁶ Йöзкöд сёрнитiгкостiыс локтiсны Исуслöн мамыс да вокъясыс. Найö сулалiсны ывлаас да кöсйисны сёрнитыштны Сыкöд. ⁴⁷ Öти морт шуис Исуслы: «Мамыд вокъясыдкöд ывлаасöсь, Тэкöд кöсйöны сёрнитны». ⁴⁸ Исус воча шуис: «Кодi Меным мамыс? Кодъяс Меным вокъясыс?» ⁴⁹ Велöдчысьяс вылас индöмöн шуис: «Найö Менам вокъясöй да Менам мамöй. ⁵⁰ Енэжвыв Батьлöн кöсйöм серти олысь – Меным вок, чой да мам».

¹ Сiйö лунö керкаысь петöм бöрын Исус лэччис ты дорö да пуксис. ² Зэв уна йöз чукöртчис Исус дiнö, Сылы весиг ковмис пуксьыны пыжö, а йöзыс сулалiсны вадорас. ³ Исус висьталiс налы уна велöданвисьт: «Морт кöдзны петас. ⁴ Кöдзигас кымынкö кöйдыс усяс туй бокö. Сэтчö воасны лэбачьяс да кокаласны. ⁵ Кымынкö кöйдыс усяс изъяинö. Этша муыс вöсна ляпкыдiнад найö öдйö чужасны. ⁶ Петас шондi, пöжны пондас, и омöль вужъя петасыд косьмас. ⁷ Кымынкö кöйдыс усяс лежнöг пöвстö. Быдмигас лежнöгыс пöдтас петассö. ⁸ Мукöд кöйдысыс усяс бур муö да ваяс уна тусь: öтияс – сё пöв, мöдъяс – квайтымын пöв, коймöдъяс – комын пöв. ⁹ Кодлöн эм пель, мед кылö!» ¹⁰ Велöдчысьяс матыстчисны Исус дiнö да юалiсны: «Мыйла Тэ сёрнитан йöзыскöд велöданвисьтъясöн?» ¹¹ Исус вочавидзис: «Енэжвыв Юралöмлысь гусяторъяссö тiянлы сетöма тöдны, а налы абу. ¹² Кодлöн эм, сылы коланасьыс унджык на сетасны. Кодлöн абу, сылысь бöръясö босьтасны. ¹³ Найö видзöдöны да оз аддзыны, кывзöны да оз кывны и оз гöгöрвоны. Та вöсна сёрнита накöд велöданвисьтъясöн. ¹⁴ Исай пророклöн шуöмыс инö: – Пельнаныд кутанныд кывзыны да онö гöгöрвоöй, синнаныд кутанныд видзöдны да онö аддзöй. ¹⁵ Чорзьöма тайö войтырыслöн сьöлöмыс, сьöкыд пеляöсь, куньса синмаöсь. Аддзынысö оз зiльны, кывзынысö оз кöсйыны, сьöлöмнаныс оз гöгöрвоны. Мелань бергöдчынысö оз кöсйыны, медым Ме бурдöдi найöс. ¹⁶ Тi шудаöсь, öд тiян синныд аддзö да пельныд кылö. ¹⁷ Веськыда висьтала тiянлы: уна пророк да веськыда олысь кöсйисны аддзывны, мый тi аддзанныд, но эз аддзывны. Кöсйисны кывны, мый тi кыланныд, но эз кывлыны». ¹⁸ «Кывзöй, Ме гöгöрвоöда тiянлы кöдзысь йылысь велöданвисьтöс. ¹⁹ Мортыс кылö Енлöн Юралöм йылысь да оз гöгöрво. Сы дiнö локтö омöльыс да гусялö сьöлöмас кöдзöмасö. Тайöс петкöдлö туй бокö усьöм кöйдыс. ²⁰ Изъяинö усьöм кöйдысыс петкöдлö: мортыс кылö Кывсö да дзик пыр долыдпырысь босьтö сiйöс сьöлöмас, ²¹ но вужъясьтöмысла оз дыр эскы, Ен Кыв вöсна дзескöдiгöн-вöтлiгöн сiйö эновтчö эскöмсьыс. ²² Лежнöг пöвстö усьöм кöйдысыс петкöдлö: мортыс кылö Кывсö, но быдлунъя тöждыс да озырмыны ыштöмыс пöдтö кöдзöм Кывсö, и сiйö оз вай вотöссö. ²³ Бур муö кöдзöм кöйдысыс петкöдлö: мортыс кылö Кывсö, гöгöрвоö сiйöс да вайö вотöс: öтияс – сё пöв, мöдъяс – квайтымын пöв, коймöдъяс – комын пöв». ²⁴ Исус висьталiс мöд велöданвисьт: «Енэжвыв Юралöмыс татшöм. Морт кöдзас аслас муö бур кöйдыс. ²⁵ Войнас узигкостiыс локтас паныд мунысь да шобдi кöйдыс костас ёг турун кöдзас, сэсся мунас. ²⁶ Шобдi петас, кутас шептасьны, ёг турун тшöтш мыччысяс. ²⁷ Кесйöгъяс локтасны овмöс кутысьныс дiнö да шуасны: "Ыджыдöй, эн-ö бур кöйдыс тэ кöдзлы муад? Кытысь нö ёг туруныс сэтчö петöма?" ²⁸ Сiйö вочавидзас: "Паныд мунысь тайöс вöчöма". Кесйöгъяс шуасны: "Кöсъян кö, ёг турунсö ми нетшкам". ²⁹ Мöдыс вочавидзас: "Оз ков. Ёг турун сорнас шобдi петассö тшöтш верманныд нетшыштны. ³⁰ Кольöй, мед быдмасны öтлаын вундан кадöдзыс. Сэки ме тшöкта вундысьяслы: медводз ёг турунсö чукöртöй, сэсся кольтаясö кöртавлöй да сотöй, а шобдiсö идралöй менам йöртöдö"». ³¹ Мöд велöданвисьт Исус висьталiс налы: «Енэжвыв Юралöмыс муö кöдзöм горчица тусь кодь. ³² Став кöйдыссьыс сiйö медпосни. Сiйö быдмö да лоö пу кодь, став пуктассьыс ыджыд, весиг енэжвыв лэбачьяс поздысьöны вожъясас». ³³ Исус нöшта öти велöданвисьт висьталiс: «Енэжвыв Юралöмыс няньшом кодь. Ань гудралас сэтчö куим шомöс тыр пызь, кад мысти няньыс ловзяс». ³⁴ Ставсö тайöс Исус висьталiс йöзыслы велöданвисьтъясöн. Висьтъястöг эз сёрнитлы накöд, ³⁵ медым инiс пророклöн шуöмыс: – Ме велöданвисьтъясöн сёрнита, му пуксьöмсяньыс дзебöмасö юöрта. ³⁶ Йöзсö кольöм бöрын Исус пырис керкаö. Сэтчö локтiсны велöдчысьясыс да найö корисны: «Гöгöрвоöд миянлы ёг турун йылысь висьттö». ³⁷ Исус висьталiс: «Бур кöйдыссö кöдзысьыс – Морт Пи. ³⁸ Кöдза муыс – муюгыд. Бур кöйдысыс – Енлöн йöзыс, ёг туруныс – омöльлöн йöзыс. ³⁹ Паныд мунысьыс, ёг турунсö кöдзысьыс, – омöль. Вундан кадыс – нэм пом, вундысьясыс – анделъяс. ⁴⁰ Кыдзи чукöртöм ёг турунсö сотöны, тадзи лоö нэм помасигöн. ⁴¹ Морт Пи Ассьыс анделъяссö мöдöдас чукöртны Аслас Юраланiнысь став ыштöдысьсö да лёк вöчысьсö. ⁴² Сэсся шыбитасны найöс биö. Сэнi лоö бöрдöм да пинь йирöм. ⁴³ Веськыда олысьяс сэки Батьныс Юраланiнын шондi моз кутасны югъявны. Кодлöн эм пель, мед кылö!» ⁴⁴ «Енэжвыв Юралöмыс муö дзебöм озырлун кодь. Морт аддзас муысь озырлун да сiйöс бöр гуалас. Нимкодьысла сiйö мунас, вузалас ассьыс став овмöссö да ньöбас тайö мусö. ⁴⁵ Енэжвыв Юралöмыс татшöм. Дона изъясöн вузасьысь мунас корсьны мича изъяс ⁴⁶ да аддзас донасьыс-дона из. Сiйö мунас, вузалас ассьыс став овмöссö да ньöбас тайö изсö». ⁴⁷ «Енэжвыв Юралöмыс саридзö вöйталöм тыв кодь. Быдсяма чериыс сэтчö шедас. ⁴⁸ Тывсö вадорö лэптöм бöрын чери кыйысьяс бур черисö дозйö чукöртасны, лёксö шыблаласны. ⁴⁹ Тадзи лоö нэм помасигöн: анделъяс локтасны, торйöдасны лёк йöзöс веськыда олысьясысь ⁵⁰ да биö шыбитасны. Сэнi лоö бöрдöм да пинь йирöм». ⁵¹ Исус юалiс: «Ставсö-ö гöгöрвоинныд?» Велöдчысьяс вочавидзисны: «Гöгöрвоим, Господь». ⁵² Исус шуис налы: «Индöдö велöдысь, кодi тöдö Енлысь Юралöмсö, керка кутысь кодь, кодi аслас видзанiнысь выльсö и важсö петкöдö». ⁵³ Тайö велöданвисьтъяссö висьталöм бöрын Исус мунiс сэтысь ⁵⁴ Аслас карö. Сэнi велöдiс йöзсö синагогаын. Кывзысьяс шензьöмöн шуалiсны: «Кытысь Сылöн татшöм мывкыдлуныс да татшöм выныс? ⁵⁵ Абу-ö Сiйö тшупсьысьлöн пи? Абу-ö Сылöн мамыс Мария, а вокъясыс – Яков, Иосей, Симон да Иуда? ⁵⁶ Оз-ö танi овны Сылöн чойясыс? Кытысь Сылöн ставыс тайö?» ⁵⁷ Тадзи Сiйöс öтдортiсны. Исус шуис налы: «Пророкöс пыдди пуктöны быдлаын, сöмын ас карас да ас гортас оз». ⁵⁸ Йöзыслöн эскытöм вöсна Исус эз вöч сэнi уна шензьöданаторсö.

¹ Сiйö кадö Ирöд öксы кылiс Исус йылысь. ² Аслас кесъялысьяслы Ирöд шуис: «Тайö Пыртысь Иоан, сiйö ловзьöма, та вöсна вермö вöчны шензьöданаторъяс». ³ Филип вокыслöн Ирöдиада гöтырыс вöсна Ирöд тшöктылiс босьтны Иоанöс да дорöмöн пуксьöдны дзескыдiнö. ⁴ Öд Иоан öлöдлiс Ирöдöс: «Тайö аньыскöд тэныд оз позь овнытö». ⁵ Ирöд кöсйис вины Иоанöс, сöмын йöзсьыс полiс, öд найö пуктiсны Иоанöс пророкö. ⁶ Ирöд нимлунасигöн Ирöдиадалöн нылыс йöктiс гажöдчысьяс водзын. Тайö воис Ирöдлы сьöлöм вылас. ⁷ Сiйö кыв сетiс нывлы: «Сета тэныд, мый коран». ⁸ Мамыс велöдöм серти ныв шуис: «Вай меным тасьтiын Пыртысь Иоанлысь юрсö». ⁹ Öксы шогö усис. Гажöдчысьяс водзын сетöм кывйыс вöсна сiйö тшöктiс вöчны нывлöн корöм серти. ¹⁰ Ирöд ыстiс ассьыс йöзсö дзескыдiнö керыштны Иоанлысь юрсö. ¹¹ Сэсся вайисны тасьтiын юрсö да сетiсны нывлы, нылыс нуис сiйöс мамыслы. ¹² Иоанлöн велöдчысьясыс локтiсны шойысла да дзебисны сiйöс. Сэсся мунiсны да юöртiсны лоöмтор йывсьыс Исуслы. ¹³ Тайöс кылöм бöрын Исус öтнас пыжöн мöдiс овтöминö. Йöзыс тöдмалiсны та йылысь да подöн мунiсны каръяссьыныс Сы бöрся. ¹⁴ Пыжысь чеччигöн Исус аддзис уна йöзöс. Сылöн сьöлöмыс нормис на вöсна, и Сiйö бурдöдiс висьысьясöс. ¹⁵ Рытнас матыстчисны Исус дiнö велöдчысьясыс да шуисны: «Танi овтöмин, и кадыс сёр нин. Ысты йöзсö сиктъясö сёянтор ньöбны». ¹⁶ Исус шуис: «Оз ков налы муннысö. Тi сетöй налы сёянсö». ¹⁷ Велöдчысьяс воча шуисны: «Миян сьöраным сöмын вит нянь да кык чери». ¹⁸ Исус шуис: «Вайöй меным татчö». ¹⁹ Сiйö тшöктiс йöзыслы пуксявны муас. Ачыс босьтiс вит няньсö да кык черисö, видзöдлiс енэжö да Енмöс аттьöалöмöн чегис няньсö, сэсся сетiс велöдчысьясыслы. Велöдчысьяс разöдiсны йöзыслы. ²⁰ Ставныс пöттöдзныс сёйисны, коляссö дас кык куд тыр чукöртiсны. ²¹ Аньясысь да челядьысь öтдор сёйысьыс вöлi вит сюрс гöгöр. ²² Та бöрын Исус тшöктiс велöдчысьясыслы пуксьыны пыжö да вуджны Сытöг ты мöдлапöлö. Ачыс кольччис да мöдöдалiс йöзсö. ²³ Йöзöс ыстöм бöрын Исус кайис керöсö кевмысьны да рытсö сэнi вöлi öтнас. ²⁴ Сiйö кадö пыжаяс вöлiны ты шöрасöсь, вермасисны гыяскöд да паныд тöвкöд. ²⁵ Асъядорыс Исус мöдöдчис ва вывтi велöдчысьяс дiнас. ²⁶ Кор найö аддзисны ва вывтi восьлалысь Исусöс, повзьöмнысла горöдiсны: «Тайö орт!» ²⁷ Исус шуис: «Лöньöй, тайö Ме. Энö полöй». ²⁸ Сэки Петыр шуис: «Господьöй, тайö кö Тэ, тшöкты меным ва вывтiыс локны Тэ дiнö». ²⁹ Исус шуис: «Лок». Пыжсьыс воськовтöмöн Петыр мöдiс ва вывтiыс Исус дiнö. ³⁰ Ыджыд тöвнырысь Петырöс полöм босьтiс. Сiйö вöйны пондiс да горöдiс: «Господьöй, мезды менö!» ³¹ Исус дзик пыр нюжöдiс кисö Петырлы, кутiс сiйöс да шуис: «Этша эскысьöй, мыйла падъялан?» ³² Пыжö пуксиганыс тöлыс лöнис. ³³ Пыжын пукалысьяс уськöдчисны Исус водзö да шуисны: «Тэ збыльысь Ен Пи». ³⁴ Тысö вуджöм бöрын найö воисны Генесарет муö. ³⁵ Сэтчöс йöзыс тöдмалiсны Исусöс да юöртiсны та йылысь матiгöгöрас олысьяслы. Найö вайöдiсны Исус дiнö став висьысьсö ³⁶ да корисны, мед висьысьяслы Исус лэдзас инмöдчывны паськöм дорышас. Инмöдчылысьяс ставöн бурдiсны.

¹ Сэки Ерусалимысь Исус дiнö воисны фарисейяс Индöдö велöдысьяскöд да шуисны Сылы: ² «Мыйла велöдчысьясыд пöрысьяслысь шуöмсö торкöны: сёйöм водзвылас кинысö оз мыськавны?» ³ Исус воча шуис налы: «Асьныд тi мыйла кутчысянныд батьяслöн шуöмö да торканныд Енлысь тшöктöмсö? ⁴ Енмыс шуöма: "Пыдди пукты ассьыд бать-мамтö", "Омöльтан кö бать-мамтö, тэнö кулöм вылö мыждасны". ⁵ А тi велöданныд: морт кö бать-мамыслы сетöм пыдди кöсйысяс сетны Енлы, ⁶ тайöн бать-мам пыдди пуктöмсö сiйö оз торк. Батьяслöн шуöм вöсна тi вештанныд Енлысь тшöктöмсö. ⁷ Кык бана шаньгаяс! Бура шуöма тiян йылысь Исай пророк: ⁸ – Тайö йöзыс вомнас пыдди пуктöны Менö, но налöн сьöлöмыс ылын Меысь. ⁹ Весьшöрö ыдждöдлöны Менö мортсянь тшöктöмъясö велöдiгöн». ¹⁰ Ас дiнас йöзöс корöмöн Исус шуис: «Кывзöй да гöгöрвоöй. ¹¹ Мортöс оз пежав сiйö, мый вомас пырö, а пежалö, мый вомсьыс петö». ¹² Велöдчысьясыс матыстчисны Исус дiнö да шуисны: «Тöдан-ö Тэ, мый фарисейяс дöзмöмаöсь Тэнад сёрнияссьыд?» ¹³ Сiйö вочавидзис: «Быдмöгсö кö абу енэжвыв Батьöй пуктöма, сiйöс вужнас нетшыштасны. ¹⁴ Кольöй найöс, найö синтöмъясöс синтöм нуöдысьяс. Синтöм кö нуöдö синтöмöс, кыкнанныс гуранö усясны». ¹⁵ Петыр шуис: «Гöгöрвоöд миянлы висьталöмтö». ¹⁶ Исус вочавидзис: «Весиг тi онö на гöгöрвоöй! ¹⁷ Онö öмöй вежöртöй: мый пырö вомö, сiйö веськалö кынöмö, сэсся ортсö петö. ¹⁸ Мый петö вомысь, сiйö петö сьöлöмысь да пежалö мортöс. ¹⁹ Буретш сьöлöмысь петöны лёк мöвпъяс, морт виöм, гозъя олöм пежалöм, кырсалöм, гусясьöм, пöръясьöм да омöльтöм. ²⁰ Тайö пежалö мортсö. А мыськавтöм киöн сёйöмыд морттö оз пежав». ²¹ Сэсся Исус мунiс Тир да Сидон муясö. ²² Сы дiнö локтiс сэнi олысь ханаанса ань да пондiс горзыны: «Господьöй, Давид Пи! Ло бур сьöлöма ме дiнö! Пеж лов пырöма менам ныв пытшкö да чорыда песлöдлö сiйöс». ²³ Исус кыв эз шу аньлы. Велöдчысьясыс матыстчисны Исус дiнö да шуисны: «Лэдз аньсö, сiйö горзöмöн бöрсяньным ветлöдлö». ²⁴ Исус шуис: «Менö мöдöдöма сöмын израильса вошöм ыжъяс дiнö». ²⁵ Ань матыстчис да Исус водзö уськöдчöмöн корис: «Господьöй, отсав меным!» ²⁶ Исус шуис: «Абу бур мырддьыны ныв-пилысь няньсö да шыбитны сiйöс понпиянлы». ²⁷ Ань воча шуис: «Сiдз, Господьöй. Но понъяс тшöтш сёйöны кöзяиныслöн пызан вылысь гылалöм торпыригсö». ²⁸ Исус шуис: «Ыджыд тэнад эскöмыд, аньöй. Мед лоö тэнад кöсйöм сертиыд». Аньлöн нылыс дзик пыр бурдiс. ²⁹ Сэтысь Исус водзö мöдiс. Сiйö мунiс Галилея ты пöлöн, сэсся кайис керöсö да пуксис. ³⁰ Сы дiнö чукöртчис уна йöз. На пöвстын вöлiны китöм-коктöмъяс, синтöмъяс, сёрниттöмъяс да мукöд висьысьяс. Найöс вайöдiсны Исус водзö, и Сiйö бурдöдалiс найöс. ³¹ Йöзыс чуймисны, кор налöн син водзын сёрниттöмъяс кутiсны сёрнитны, китöмъяс бурдны, коктöмъяс ветлыны да синтöмъяс аддзыны. Ставöн ошкисны Израильлысь Енмöс. ³² Исус корис велöдчысьяссö да шуис: «Менам сьöлöмöй висьö тайö йöзыс вöсна. Найö куим лун нин танöсь, а налöн сёяныс абу. Ог кöсйы мöдöдны найöс сёйтöгыс, мед туяс дзикöдз оз эбöстöммыны». ³³ Велöдчысьяс шуисны: «Кытысь босьтны овтöминас сы мында няньсö, медым вердны та мындасö?» ³⁴ Исус юалiс: «Уна-ö тiян няньныд?» Найö вочавидзисны: «Сизим. Кымынкö посни чери на эм». ³⁵ Исус тшöктiс йöзыслы пуксявны муас. ³⁶ Ачыс босьтiс сизим няньсö да черисö, Енмöс аттьöалöмöн чегис няньсö да сетiс велöдчысьясыслы, а велöдчысьяс – йöзыслы. ³⁷ Ставöн пöттöдзныс сёйисны, коляссö сизим куд тыр чукöртiсны. ³⁸ Аньясысь да челядьысь öтдор сёйысьыс вöлi нёль сюрс морт. ³⁹ Йöзсö мöдöдалöм бöрын Исус пуксис пыжö да кывтiс Магдала муö.

¹ Фарисейяс да саддукейяс локтiсны Исус дiнö да Сiйöс кыйöм могысь корисны петкöдлыны енэжсянь индысьпас. ² Исус шуис налы: «Рытнас тi шуанныд: "Енэжыс гöрд – аски лоö мича". ³ Асывводзнас шуанныд: "Енэжыс пемыдгöрд – кыптас бушков". Кык бана шаньгаяс! Енэжлысь чужöмбансö кужанныд тöдмавны, а кадлысь пасъяссö онö. ⁴ Лёк да пежас ылалöм йöз кöсйöны аддзывны индысьпас, но Иона пророк пасысь кындзи оз ло налы мöдыс». Сэсся Исус колис найöс да мунiс сэтысь. ⁵ Ты мöдлапöлö вуджиганыс велöдчысьяс казялiсны, мый вунöдöмаöсь босьтны няньсö. ⁶ Исус шуис налы: «Видзчысьöй фарисей да саддукей няньшомысь». ⁷ Велöдчысьяс ас костаныс сёрнитiсны: «Няньтö тай босьтны вунöдiм». ⁸ Тайöс казялöмöн Исус шуис налы: «Этша эскысьяс! Мый нö сёрнитанныд нянь абутöм йывсьыд? ⁹ Онö öмöй гöгöрвоöй? Вунöдiнныд öмöй вит сюрс мортöс вит няньöн вердöм йылысь? Кымын куд тыр сэки коляссö чукöртiнныд? ¹⁰ А нёль сюрс мортöс сизим няньöн вердiгöн, кымын куд тыр чукöртiнныд? ¹¹ Кыдзи тi онö гöгöрвоöй, эг öд нянь йылысь Ме тiянлы висьтав, мися, видзчысьöй фарисей да саддукей няньшомысь!» ¹² Сэки найö гöгöрвоисны, мый Исус тшöктiс видзчысьны налы фарисейяслöн да саддукейяслöн велöдöмысь, эз няньшомысь. ¹³ Исус воис Филиплöн Кесария муö да юалiс велöдчысьясыслысь: «Код туйö йöзыс пуктöны Менö, Морт Пиöс?» ¹⁴ Найö вочавидзисны: «Öтияс шуöны, Пыртысь Иоан пö, мöдъяс шуöны, Илля пö, кодсюрö шуöны, Еремей пö, а гашкö, нöшта на мöд пророк». ¹⁵ Исус юалiс: «Код туйö тi Менö пуктанныд?» ¹⁶ Симон-Петыр вочавидзис: «Тэ – Кристос, ловъя Енлöн Пи». ¹⁷ Исус шуис Петырлы: «Тэ шуда, Симон, Ионалöн пи. Öд тайöс тэныд эз морт висьтав, но Менам енэжвыв Батьöй восьтiс тэныд. ¹⁸ Ме шуа тэныд: Тэ – Петыр, из. Тайö из вылас Ме лэпта Ассьым Вичко, да сiйöс адлöн выныс оз вермы. ¹⁹ Ме сета тэныд Енэжвыв Юраланiнысь восьтанъяс. Мый кöрталан му вылын, сiйö кöрталöма лоö енэжын. Мый разян му вылын, сiйö разьöма лоö енэжын». ²⁰ Исус öлöдiс велöдчысьяссö, медым некодлы эз висьтавны, мый Сiйö – Кристос. ²¹ Тайö кадсянь Исус кутiс висьтавлыны велöдчысьясыслы, мый Сылы ковмас мунны Ерусалимö да уна сьöкыд сэнi нуны пöрысьяссянь, аркирейяссянь да Индöдö велöдысьяссянь. Сiйöс виасны, но коймöд луннас Сiйö ловзяс. ²² Исусöс бокö корöмöн Петыр шуис: «Ен мед видзас Тэнö, Господьöй. Мед оз ло тайö!» ²³ Бергöдчöмöн Исус шуис Петырлы: «Вешйы Ме дiнысь, сöтана! Тэ Менö крукöдан, öд тэнад мöвпъясыд мортсянь, абу Енсянь». ²⁴ Исус шуис велöдчысьясыслы: «Кодi кöсйö мунны Ме бöрся, мед вунöдас асьсö, мед босьтас ассьыс крестсö да локтас Ме бöрся. ²⁵ Кодi кöсйö видзны ассьыс олöмсö, воштас сiйöс. Ме вöсна олöмсö воштысь аддзас сiйöс. ²⁶ Лоас-ö мортыслы бур, босьтас кö аслыс став муюгыдсö, а олöмсö воштас? Вермас-ö бöр ньöбны ассьыс олöмсö? ²⁷ Морт Пи локтас Батьыслöн дзирдлунöн Сылöн анделъяскöд да быдöнлы уджъяс сертиыс мынтас. ²⁸ Веськыда висьтала тiянлы: кодсюрö танi сулалысьяс пиысь кувтöдзныс на аддзасны юравны локтысь Морт Пиöс».

¹ Квайт лун мысти Исус босьтiс Аскöдыс Петырöс да Яковöс Иоан вокыскöд да кайис накöд джуджыд керöсö. ² Велöдчысьяс син водзын Исуслöн мыгöрыс вежсис: чужöмыс пондiс шондi моз югъявны, паськöмыс лои дзирдалана еджыд. ³ Сэки велöдчысьяс аддзисны Мöисейöс да Илляöс, найö сёрнитiсны Исускöд. ⁴ Петыр шуис Исуслы: «Господьöй, миянлы танi лöсьыд. Кöсъян кö, куим чом татчö сувтöдам: Тэныд, Мöисейлы да Иллялы». ⁵ Петырлöн сёрнитiгкостi югыд кымöр вевттис найöс, кымöрсянь кылiс гöлöс шы: «Тайö Менам муса Пиöй, Ме нимкодяся Сыöн. Сiйöс кывзöй». ⁶ Тайöс кылöмысь велöдчысьяс ёна повзисны, чужöмнысö тупкöмöн уськöдчисны муас. ⁷ Исус матыстчис, инмöдчылiс на дiнö да шуис: «Чеччöй, энö полöй». ⁸ Юрнысö лэптöм бöрын найö аддзисны сöмын Исусöс. ⁹ Керöсысь лэччиганыс Исус шуис налы: «Морт Пилöн ловзьытöдз некодлы энö висьталöй, мый аддзылiнныд». ¹⁰ Велöдчысьяс юалiсны Исуслысь: «Мыйла Индöдö велöдысьяс шуöны, Иллялы пö колö водзджык локны?» ¹¹ Сiйö вочавидзис: «Дерт, Иллялы колö водзджык локны да ставсö лöсьöдны. ¹² Висьтала тiянлы: Илля локтiс нин. Сöмын йöзыс сiйöс эз тöдны, сыкöд вöчисны, мый кöсйисны. Тадзи тшöтш Морт Пилы уна сьöкыд насянь вичмас». ¹³ Велöдчысьяс сэки гöгöрвоисны, мый Исус висьталiс налы Пыртысь Иоан йылысь. ¹⁴ Найö мöдöдчисны йöз чукöрлань. Мунiганыс матыстчис Исус дiнö морт, сiйö пидзöс вылас сувтöмöн ¹⁵ корис: «Господьöй, ло бур сьöлöма менам пи дiнö. Сiйö шыблалан висьöмöн висьö, тшöкыда биö-ваö усьлö, таысь сылы ёна сьöкыд. ¹⁶ Ме вайöдлi сiйöс велöдчысьяс дiнад, но найö бурдöднысö эз вермыны». ¹⁷ Исус шуис: «Эскытöм-ылалöм йöз! Дыр-ö на Меным овнысö тiянкöд? Дыр-ö на Меным видзöдны тiянöс? Вайöдöй Ме дiнö зонкасö». ¹⁸ Исус öлöдiс пеж лолöс. Сэки пеж лов петiс зонка пытшкысь, и зонка пырысьтöм-пыр бурдiс. ¹⁹ Ас кежаныс кольöм бöрын велöдчысьяс юалiсны Исуслысь: «Мыйла ми эгö вермöй вöтлыны пеж ловсö?» ²⁰ Исус шуис: «Онö эскöй да. Веськыда висьтала тiянлы: лоас кö тiян эскöмныд горчица тусь ыджда, верманныд шуны тайö керöсыслы: "Вешйы тасянь сэтчö" – и сiйö вешъяс. Тiянлы нинöм вермытöмыс оз ло. ²¹ Видзавтöг да кевмысьтöг татшöм пеж ловъяссö вöтлыны онö вермöй». ²² Галилеяö локтöм бöрын Исус шуис велöдчысьясыслы: «Морт Пиöс сетасны йöзлöн киö. ²³ Сiйöс виасны, но коймöд луннас Сiйö ловзяс». Велöдчысьяс шогö усисны. ²⁴ Исус велöдчысьясыскöд локтiс Капернаум карö. Сэнi Петыр дiнö матыстчисны крамлы вот чукöртысьяс да юалiсны: «Мынтö-ö тiян Велöдысьныд вотсö?» ²⁵ Петыр вочавидзис: «Мынтö». Кор Петыр пырис керкаö, Исус дзик пыр юалiс: «Симон, тэ ногöн, кодлысь öксыяс вотсö перйöны: ас войтырыслысь али мукöдлысь?» ²⁶ Сiйö вочавидзис: «Мукöдлысь». Исус шуис: «Сiдзкö, ас войтырыс вотсö оз мынтыны. ²⁷ Мед оз дöзмыны найö, мун ты дорас да чöвт вугыртö. Медводдза шедöм чери вомсьыс тэ аддзан эзысь сьöм. Босьт сiйöс да мынты налы Ме пыдди и ас пыддиыд».

¹ Сэки локтiсны Исус дiнö велöдчысьясыс да юалiсны Сылысь: «Кодi Енэжвыв Юраланiнас ыджыдджыкыс?» ² Исус корис кагаöс да на шöрö сiйöс сувтöдöмöн ³ шуис: «Веськыда висьтала тiянлы: онö кö вежсьöй да лоöй челядь кодьöсь, Енэжвыв Юраланiнö онö пырöй. ⁴ Тайö кага кодьö асьсö пуктысь лоас Енэжвыв Юраланiнын ыджыдджык. ⁵ Кодi Менам ним вöсна сибöдö öти татшöм кагаöс, сiйö сибöдö Менö». ⁶ «Кодi ыштöдас тайö ичöтъясысь öтикöс, Меным эскысьöс, сылы бурджык лоö, сьылiас кö ыджыд изки öшöдасны да вöйтасны джуджыд саридзö. ⁷ Курыд шог муюгыдыслы ыштöдöмъясысь! Ыштöдöмъяслы колö локнысö, но курыд шог сiйö мортлы, код пыр локтöны ыштöдöмъясыс! ⁸ Ки-кокыд кö ыштöдö тэнö, керышт да шыбит сiйöс. Бурджык пырны помтöм олöмö ки пöлаöн либö кок пöлаöн куслытöм биö тэнö киа-кокаöн шыбитöм дорысь. ⁹ Синмыд кö ыштöдö тэнö, перйы да шыбит сiйöс. Бурджык пырны помтöм олöмö син пöлаöн куслытöм биö тэнö синмаöн шыбитöм дорысь». ¹⁰ «Кывзöй, тайö ичöтъясысь весиг öтикöс энö öтдортöй. Висьтала тiянлы: енэжын налöн анделъясныс пыр енэжвыв Батьлöн чужöмбан водзынöсь. ¹¹ Морт Пи локтiс корсьны да мездыны вошöмаясöс. ¹² Мый тi шуанныд? Мортлöн кö сё ыжсьыс öти вошас, оз-ö сiйö коль öкмысдас öкмыссö керöсö да мун корсьны вошöмасö? ¹³ Веськыда висьтала тiянлы: аддзас кö сiйöс, ёнджыка нимкодясяс öти вöснаыс вошлытöм öкмысдас öкмысыс дорысь. ¹⁴ Тадзи енэжвыв Батьныд оз кöсйы, медым тайö ичöтъясысь весигтö öти вошис». ¹⁵ «Вокыд кö мыж вöчас тэныд паныд, мун да ас кежаныд янöд сiйöс. Кывзас кö тэнö, сiйö тэныд вокöн кольö. ¹⁶ Оз кö кывзы тэнö, босьт аскöдыд öти-кык мортöс, öд "ставсö колö подулавны кык либö куим мортлöн висьталöмöн". ¹⁷ Оз кö сiйö кывзы найöс, висьтав вичко водзын. Весиг кö найöс оз кывзы, лыддьы сiйöс ентöдтöмöн, вот перйысьяс лыдö пукты. ¹⁸ Веськыда висьтала тiянлы: мый кöрталанныд му вылын, сiйö кöрталöма лоö енэжын. Мый разянныд му вылын, сiйö разьöма лоö енэжын. ¹⁹ Висьтала тiянлы: тiян пиысь кö кыкöн öтвыв корасны мыйкö, енэжвыв Батьöй сетас налы. ²⁰ Öд кöнi кыкöн-куимöн чукöртчасны Менам нимöн, сэнi Ме на шöрын лоа». ²¹ Сэки Петыр матыстчис Исус дiнö да юалiс: «Господьöй, меным кö вокöй лёк вöчö, кымынысь колö сiйöс прöститнысö? Сизимысь-ö?» ²² Исус вочавидзис: «Оз сизимысь, а сизимдас пöв сизимысь! ²³ Енэжвыв Юралöмыс татшöм. Öксы шуис артавны аслас кесйöгъяслысь уджйöзсö. ²⁴ Арталiгас öксы водзö вайöдiсны öти кесйöгöс, кодлöн уджйöзыс вöлi дас сюрс талант. ²⁵ Мынтынысö сiйö эз вермы. Сэки öксы тшöктiс вузавны тайö кесйöгсö, сылысь гöтырсö, ныв-писö да овмöссö, медым тадзи бергöдны уджйöзсö. ²⁶ Кесйöг уськöдчис öксы водзö да пондiс корны: "Ыджыдöй, ло бур сьöлöма! Ме ставсö тэныд мынта". ²⁷ Öксылöн сьöлöмыс небзис. Сiйö шуис лэдзны кесйöгсö да вунöдны уджйöзсö. ²⁸ Ывлаö петöм бöрын кесйöг аддзис уджъёртсö. Ёртыс вöлi уджйöза сылы сё динар. Сiйöс джагöдöмöн шуалiс: "Мынты уджйöзтö!" ²⁹ Ёртыс пидзöс вылас уськöдчöмöн корис: "Ло бур сьöлöма! Ставсö мынта". ³⁰ Мöдыс эз кöсйы виччысьнысö да йöртiс ёртсö дзескыдiнö уджйöзсö мынтытöдзыс. ³¹ Тайöс аддзылöмысь мукöд кесйöгыс шогö усисны. Найö мунiсны öксы дiнö да висьталiсны сылы ставсö. ³² Öксы корис ас дiнас сiйö кесйöгсö да шуис: "Лёк морт тэ вöлöмыд! Тэнад корöм серти ме вунöдi тэнсьыд став уджйöзтö. ³³ Эз öмöй ков тэныд ме моз лоны бур сьöлöмаöн?" ³⁴ Скöрмöм öксы чорыда мыждiс кесйöгсö да йöртiс сiйöс дзескыдiнö уджйöзсö дзоньнас вештытöдзыс. ³⁵ Тадзи Менам енэжвыв Бать вöчас тiянлы, онö кö сьöлöмсяньныд прöститöй вокнытö».

¹ Тайöс висьталöм бöрын Исус петiс Галилея муысь да мунiс Йöрдан ю мöдлапöлöд Юдея муö. ² Зэв уна йöз вöтчис Сы бöрся, и Сiйö бурдöдалiс найöс. ³ Исус дiнö матыстчисны фарисейяс да Сiйöс кыйöм могысь юалiсны: «Быд помка вöсна-ö морт вермас юксьыны гöтырыскöд?» ⁴ Исус вочавидзис: «Энö öмöй лыддьылöй, мый медводз Ен вöчис аймортöс да аньöс? ⁵ Сiйö шуис: "Та вöсна морт кольö бать-мамсö да öтлаасьö гöтырыскöд, и тайö кыкыс лоöны öти вир-яйöн". ⁶ Сiдзкö, найö абу нин кык, а öти вир-яй. Мый йитöма Енмыс, морт мед оз торйöд». ⁷ Фарисейяс шуисны: «Мыйла нö Мöисей тшöктiс гöтыртö эновтiгöн сетны сылы торйöдчан гижöд?» ⁸ Исус вочавидзис: «Чорыд сьöлöмныд вöсна Мöисей лэдзис тiянлы эновтны гöтыръяснытö. Водзынсö эз вöв тадзи. ⁹ Ме шуа тiянлы: верöсыс кö эновтö гöтырсö, а гöтырыс оз кырсав, да гöтрасьö мöдкöд, сiйö гозъя олöм пежалö. Юксьöм аньöс гöтырö босьтысь тшöтш пежалö». ¹⁰ Велöдчысьясыс шуисны: «Бурджык, сiдзкö, гöтрасьтöг овны». ¹¹ Исус шуис: «Оз быдöн вермы тадзи овнысö, сöмын кодлы тайöс сетöма. ¹² Уна помка вöсна морт оз вермы гöтрасьны: öтияс мам кынöмсяньыс нин татшöмöсь, мöдъясöс вöчисны татшöмъясöн, коймöдъяс Енлы кесъялöм вöсна гöтрасьтöг олöны. Верман кö тадзи овны, ов». ¹³ Исус дiнö вайöдiсны челядьöс, медым Сiйö кисö пуктылöмöн кевмысис. Велöдчысьяс шуасисны вайöдысьяс вылö. ¹⁴ Исус шуис: «Лэдзöй челядьсö. Энö кутöй найöс Ме дiнö локтöмысь. Енэжвыв Юраланiнсö öд на коддьöмлы лöсьöдöма». ¹⁵ Исус пуктылiс на вылö кисö, сэсся мунiс сэтысь. ¹⁶ Öти морт локтiс Исус дiнö да юалiс: «Бур Велöдысьöй, кутшöм буртор меным колö вöчны, мед менам вöлi помтöм олöм?» ¹⁷ Исус вочавидзис: «Мыйла тэ шуан Менö бурöн? Некод абу бурыс, сöмын Енмыс бур. Кöсъян кö пырны помтöм олöмö, ов тшöктöмъяс серти». ¹⁸ Мортыс юалiс: «Кутшöм тшöктöмъяс серти?» Исус вочавидзис: «Эн ви, гозъя олöмтö эн пежав, эн гусясь, эн пöръясь, ¹⁹ пыдди пукты ассьыд бать-мамтö, радейт матыссатö асьтö моз». ²⁰ Том морт шуис: «Ме ола тайö тшöктöмъяс сертиыс. Мый нöшта оз тырмы?» ²¹ Исус шуис: «Кöсъян кö тырвыйö бурöн лоны, мун, овмöстö вузав да сьöмсö сет гöльяслы. Сэки тэныд енэжын озырлуныс вичмас. Сэсся лок Ме бöрся». ²² Тайö кывъяссö кылöм бöрын том морт жугыля мунiс, öд сылöн озырлуныс вöлi уна. ²³ Велöдчысьясыслы Исус шуис: «Веськыда висьтала тiянлы: озырлы сьöкыд пырны Енэжвыв Юраланiнö. ²⁴ Нöшта шуа: озырлы Енлöн Юраланiнö пырöм дорысь верблюдлы кокньыдджык пырны ем пысöд». ²⁵ Велöдчысьясöс тайö чуймöдiс, и найö юалiсны: «Кодi нö, сiдзкö, вермас мездмынысö?» ²⁶ На вылö видзöдлöмöн Исус шуис: «Мортлы тайö вермытöмтор, но Енмыслы ставыс вермана». ²⁷ Сэки Петыр шуис: «Ми ставсö эновтiм да мунiм Тэ бöрся. Мый миянлы вичмас таысь?» ²⁸ Исус шуис: «Веськыда висьтала тiянлы: выль олöмын Морт Пи пуксяс дзирдлуныслöн юралан пуклöсö. Тшöтш тi, Ме бöрся мунысьяс, пуксянныд дас кык юралан пуклöсö мыждыны израильса дас кык чужанкотырöс. ²⁹ Кодi Менам ним вöсна коляс керкасö, чой-воксö, бать-мамсö, гöтырсö, ныв-писö, видз-мусö, сылы сё пöвстöн бöр воас, нöшта помтöм олöм сылы вичмас. ³⁰ Воддзаясысь унаöн лоöны бöръяöн, бöръяясысь – воддзаöн».

¹ «Енэжвыв Юралöмыс татшöм. Овмöс кутысь водз асывнас мунас медавны аслас виноград йöрö уджалысьясöс. ² Уджалысьяскöд сёрнитчас лунысь динар мынтыны, сэсся мöдöдас найöс виноград йöрас. ³ Öкмыс часын овмöс кутысь петас да аддзас медасянiнысь уджтöг сулалысь йöзöс. ⁴ Сiйö шуас налы: "Мунöй менам виноград йöрö. Ме мынта тiянлы лöсялан удждонсö". ⁵ Найö мунасны. Дас кыкын, сэсся куим часын овмöс кутысь бара петас да воддза мозыс вöчас. ⁶ Сэсся вит час гöгöрын петас да аддзас, кодсюрö сулалöны на. Сiйö юалас налысь: "Мый танi сулаланныд кузь лунтырсö?" ⁷ Найö вочавидзасны: "Миянöс эз медавны". Сэки сiйö шуас налы: "Мунöй менам виноград йöрö. Ме мынта тiянлы лöсялан удждонсö". ⁸ Рытнас овмöс кутысь шуас уджöн веськöдлысьыслы: "Кор уджалысьястö да мынтысь налы. Бöрынджык локтöмаяслы мынты водзджык, сэсся воддзаясыслы". ⁹ Вит часын локтöмаяс босьтiсны динарöн. ¹⁰ Воддза локтöмаяс мöвпыштiсны, мый унджык босьтасны, но налы тшöтш динар мынтiсны. ¹¹ Удждон босьтöм бöрын найö элясясны овмöс кутысьлы: ¹² "Ми кузь лунтыр гож водзын мырсим, а бöрынджык локтöмаяс сöмын час уджалiсны, да налы тэ дзик миянлы моз мынтiн". ¹³ Овмöс кутысь на пиысь öтилы шуас: "Ёртöй, ме эг пöрйöдлы тэнö. Тэ öмöй эн динарысь сёрнитчыв мекöд? ¹⁴ Бость динартö да мун. Ме кöсъя бöрынджык локтöмалы мынтыны тшöтш тэныд моз. ¹⁵ Ог öмöй ме вермы ассьым сьöмöс видзны ас кöсйöм серти? Тэнад öмöй вежыд петö, мый ме бур сьöлöма?" ¹⁶ Тадзи бöръяяс лоöны воддзаöн, а воддзаяс – бöръяöн. Унаöс корöма, но этшаöс бöрйöма». ¹⁷ Ерусалимö кайигöн Исус корис дас кыкнан велöдчысьсö да мунiгмозыс висьталiс налы: ¹⁸ «Öнi ми мунам Ерусалимö. Сэнi Морт Пиöс сетасны аркирейяслы да Индöдö велöдысьяслы. Найö шуасны вины Сiйöс, ¹⁹ сетасны ентöдтöмъяс киö. Найö сераласны Сiйöс, чорыда нöйтасны, сэсся тувъяласны крестö. Но коймöд луннас Сiйö ловзяс». ²⁰ Зеведей пиянлöн мамыс пияныскöд локтiс аслас корöмöн Исус дiнö. Ань копыртчис Исус водзö. ²¹ Исус юалiс: «Мый тэ кöсъян?» Ань вочавидзис: «Пуксьöд Аскöдыд Юраланiнад менсьым кыкнан пиöс, öтисö веськыдладорад, мöдсö шуйгаладорад». ²² Исус шуис: «Онö тöдöй, мый коранныд. Верманныд-ö юны Меным лöсьöдöм чашасö да Менам пыртчöмöн пыртчыны?» Найö вочавидзисны: «Вермам». ²³ Исус шуис: «Менсьым чашасö понданныд юны да Менам пыртчöмöн понданныд пыртчыны. Но мед пуксьöдны веськыдладорам да шуйгаладорам – тайö абу Ме сайын. Менам Бать сэтчö пуксьöдысьыс». ²⁴ Кык воклöн сёрниыс дöзмöдiс мукöд дас велöдчысьсö. ²⁵ Исус корис велöдчысьяссö да шуис: «Тi тöданныд, мый юралысьяс ыджыдалöны йöз вылын, да веськöдлысьяс кипод улас кутöны йöзöс. ²⁶ Но тi тадзи энö вöчöй. Кöсъян кö ыджыдö пуксьыны – кесъяв, ²⁷ кöсъян кö юралысьö пуксьыны – ло кесйöг туйын. ²⁸ Öд Морт Пи эз лок, медым Сылы кесъялiсны. Сiйö локтiс кесъявны да сетны Ассьыс олöмсö унаöс ньöбöм могысь». ²⁹ Ерикон карысь петiганыс Исус бöрся вöтчис зэв уна йöз. ³⁰ Туй дорас пукалiсны кык синтöм морт. Кор кылiсны Исуслысь на дортi мунöмсö, горöдiсны: «Господьöй, Давид Пи! Ло бур сьöлöма миян дiнö!» ³¹ Йöзыс öлöдiсны найöс горзöмысь, но найö ёнджыка на пондiсны горзыны: «Господьöй, Давид Пи! Ло бур сьöлöма!» ³² Исус сувтiс, корис найöс да юалiс: «Мый тi кöсъянныд?» ³³ Найö вочавидзисны: «Господьöй, кöсъям аддзыны». ³⁴ Исуслöн сьöлöмыс нормис на вöсна. Сiйö инмöдчылiс налы синмас, да найö дзик пыр кутiсны аддзыны. Сэсся кыкнанныс мунiсны Исус бöрся.

¹ Ерусалимлань матыстчигöн Исус велöдчысьясыскöд воис Олив керöсын сулалысь Виффагия сикт дорö. Ассьыс кык велöдчысьсö мöдöдiгöн Исус ² шуис: «Мунöй тайö сиктас. Сэтчö пыриганыд аддзанныд домалöм чаня осёлöс. Разьöй да вайöдöй найöс Ме дiнö. ³ Тiянлы кö мыйкö шуасны, вочавидзöй, мый найö колöны Господьлы. Сэки тiянлы дзик пыр сетасны». ⁴ Ставыс тадзи артмис, медым инiс пророклöн шуöмыс: ⁵ – Висьталöй Сион нывлы: Видзöд, Öксыыд локтö тэ дiнö! Сiйö рам, пукалö осёл вылын, сийöсалöм осёллöн чань вылын. ⁶ Велöдчысьяс мунiсны да вöчисны Исуслöн тшöктöм серти. ⁷ Вайöдiсны осёлöс чаньыскöд да пукталiсны на вылö паськöмнысö, сэсся Исус пуксис. ⁸ Унаöн вольсавлiсны ассьыныс паськöмнысö туй вылас, мукöдыс чегъялiсны пу вожъяс да тшöтш пукталiсны туй вылас. ⁹ Водзас да бöрас мунысьяс горзiсны: – Осанна! Ошкöм Давид Пилы! Бурсиöма Господь нимöн Локтысьöс! Ошкöм Медвылыссалы! ¹⁰ Кор Исус пырис Ерусалимö, став карыс шызис, быдöн юасис: «Кодi тайö?» ¹¹ Йöзыс шуалiсны: «Тайö Исус, Галилеяса Назарет карысь Пророк». ¹² Исус пырис Енлöн крамö да вöтлалiс сэтысь став вузасьысь-ньöбасьысьсö, пöрлöдлiс сьöм вежысьяслысь пызанъяссö да гулюöн вузасьысьяслысь пуклöсъяссö. ¹³ Сiйö шуис налы: «Гижöма: "Менам керкаöй кевмысян керка лоö". А тi сыысь вöчинныд лёк вöчысьяслы дзебсянiн». ¹⁴ Крамын матыстчисны Исус дiнö синтöмъяс да коктöмъяс. Исус бурдöдалiс найöс. ¹⁵ Кор аркирейяс Индöдö велöдысьяскöд аддзисны Сылысь шензьöданаторъяс вöчöмсö да кылiсны крамын челядьлысь горзöм: «Ошкöм Давид Пилы!», ёна дöзмисны. ¹⁶ Исуслы шуисны: «Кылан-ö, мый найö шуалöны?» Исус вочавидзис: «Кыла. Тi öмöй энö лыддьылöй: "Тэ лöсьöдiн, медым кагаяс да челядь ошкисны Тэнö"». ¹⁷ Сэсся Исус эновтiс найöс, петiс карсьыс да мунiс вой кежлас Вифания сиктö. ¹⁸ Асывводзнас карö бöр локтiгас Исуслöн кынöмыс пондiс сюмавны. ¹⁹ Туй дорсьыс Сiйö аддзис инжир пу. Матыстчис да аддзис сы вылысь сöмын коръяссö. Исус шуис пуыслы: «Пыр кежлö вотöстöг колян». Инжир пуыс пырысь-пыр косьмис. ²⁰ Тайöс аддзылiсны велöдчысьяс да чуймöмöн шуисны: «Мыйла пуыс татшöм öдйö косьмис?» ²¹ Исус вочавидзис: «Веськыда висьтала тiянлы: эсканныд кö да онö майшасьöй, сэки онö сöмын тайöс вöчöй. Шуанныд кö тайö керöсыслы: "Кыпöдчы да шыбитчы саридзас", лоö тадзи. ²² Мый коранныд эскöмöн кевмысигад, лоö тiянлы». ²³ Исус локтiс крамö. Сэнi велöдiгас Сы дiнö матыстчисны аркирейяс пöрысьяскöд да юалiсны: «Кутшöм вынöн Тэ ставсö тайöс вöчан? Кодi Тэнö пуктiс тайöс вöчнысö?» ²⁴ Исус воча шуис: «Ме тшöтш тiянлысь öтитор юала. Вочавидзанныд кö, висьтала, кутшöм вынöн ставсö тайöс вöча. ²⁵ Иоанлöн пыртöмыс кодсянь вöлi? Енсянь али мортсянь?» Найö ас костаныс сёрнитiсны: «Шуам кö: "Енсянь", Сiйö миянлы шуас: "Мыйла сылы энö эскöй?" ²⁶ Шуам кö: "Мортсянь", йöзсьыс ковмас повны, öд Иоанöс ставныс пророкö пуктöны». ²⁷ Найö вочавидзисны: «Огö тöдöй». Сэки Исус шуис: «Сiдзкö, Ме тшöтш ог висьтав, кутшöм вынöн ставсö тайöс вöча». ²⁸ «Мый тi шуанныд та йылысь? Öти мортлöн вöлi кык пи. Öти пи дiнас матыстчöмöн сiйö шуас: "Пиöй, мун талун уджышт виноград йöрын". ²⁹ Пиыс вочавидзас: "Ог кöсйы". Бöрынджык вежас мöвпсö да мунас. ³⁰ Батьыс матыстчас мöд пиыс дiнö да тшöтш тадзи шуас. Пиыс вочавидзас: "Батьöй, муна, дерт", но ачыс оз мун. ³¹ Кодныс нö батьыслöн кöсйöм сертиыс вöчис?» Вочавидзисны: «Воддзаыс». Исус шуис: «Веськыда висьтала тiянлы: вот перйысьяс да кырсалысь аньяс тiян водзвылын мунöны Енлöн Юраланiнö. ³² Иоан локтiс индыны тiянлы веськыдлуныслысь туйсö, а тi сылы энö эскöй. Вот перйысьяс да кырсалысь аньяс эскисны сылы. Тi весиг тайöс аддзылöм бöрын энö бергöдчöй мыжъяссьыныд да энö эскöй сылы». ³³ «Кывзöй мöд велöданвисьт. Овмöс кутысь пуктас аслас йöрö виноград, гöгöрыс потшас, вотöс ныранiн кодъяс да джуджыд лэбув лэптас. Сэсся йöрсö виноград быдтысьяслы кöртымö сетас, ачыс мунас. ³⁴ Вотöс чукöртан кадö овмöс кутысь мöдöдас кесйöгъяссö босьтны вотöсысь ассьыс пайсö. ³⁵ Виноград быдтысьяс кутасны кесйöгъяссö: öтиöс нöйтасны, мöдöс виасны, мукöдсö изъяласны. ³⁶ Овмöс кутысь мöдöдас мукöд кесйöгъясöс, воддза сертиыс унджыкöс. Накöд тшöтш сiдзи вöчасны. ³⁷ Медбöрти виноград быдтысьяс дiнö овмöс кутысь мöдöдас ассьыс писö, мöвпыштас: "Менам пиысь, гашкö, яндысясны". ³⁸ Писö аддзöм бöрын виноград быдтысьяс шуасны öта-мöдныслы: "Тайö мортыслы вуджас овмöсыс. Мунам да виам сiйöс, медым овмöсыс миянлы коляс". ³⁹ Найö кутасны сiйöс, петкöдасны виноград йöрсьыс да виасны. ⁴⁰ Мый вöчас овмöс кутысь виноград быдтысьяскöд локтöм мыстиыс?» ⁴¹ Вочавидзисны: «Тайö лёк йöзсö сiйö лёк нога виас. Виноград йöрсö кöртымö сетас мукöдлы, кодъяс индöм кадö сетасны сылы вотöсысь пайсö». ⁴² Исус шуис: «Энö öмöй Гижöдсьыс лыддьылöй: – Изйыс, кодöс шыбитiсны керка лэптысьяс, лоис пельöс изйöн. Тайö Господьсянь да шензяна миян синъяслы. ⁴³ Та вöсна шуа тiянлы: Енсянь Юралöмсö мырддясны тiянлысь да сетасны войтырлы, кодi вайö Ен Юралöмлысь вотöссö. ⁴⁴ Кодi усяс тайö изйыс вылö, сiйö пасьмунас. Код вылö изйыс усяс, сiйöс лямöдас». ⁴⁵ Тайö велöданвисьтъяссö кылöм бöрын аркирейяс да фарисейяс гöгöрвоисны, мый Исус висьталiс на йылысь. ⁴⁶ Найö кöсйисны кутны Сiйöс, но полiсны йöзсьыс, öд йöзыс Сiйöс пророкö пуктiсны.

¹ Исус висьталiс нöшта öти велöданвисьт: ² «Енэжвыв Юралöмыс татшöм. Öксы аслас пиыслы кöлысь вöчас. ³ Сiйö ыстас ассьыс кесйöгъяссö корны йöзöс кöлысь вылö. Корöмаяс оз кöсйыны локнысö. ⁴ Öксы бара мöдöдас мукöд кесйöгъясöс да тшöктас висьтавны корöмаяслы: "Сёян-юан менам дасьтöма, öшъяс-куканьяс начкöма, ставыс дась. Локтöй кöлысясьны!" ⁵ Корöмаяс пыдди оз пуктыны корöмсö: öтияс мунасны видз-му выланыс, мöдъяс вузасьны. ⁶ Мукöдыс кутасны öксылысь кесйöгъяссö да кувтöдзыс найöс нöйтасны. ⁷ Öксы кывлас та йылысь да ёна скöрмас. Сiйö мöдöдас ассьыс шыпуртаяссö вины морт виысьясöс, а карсö тшöктас сотны. ⁸ Сэсся аслас кесйöгъяслы шуас: "Кöлысь дась. Корöмаясыд вöлöмкö шогмытöмöсь. ⁹ Мунöй туйвежъясö да корöй кöлысь вылö быдöнöс". ¹⁰ Кесйöгъяс мунасны да корасны быдöнöс: лёкъясöс и буръясöс. Кöлысь гажöдчанiн тырас. ¹¹ Öксы пырас гажöдчанiнö видзöдлыны воöмаясöс да аддзас мортöс, кодi абу кöлысь паськöма. ¹² Öксы юалас сылысь: "Ёртöй, кыдзи тэ пырин татчö кöлысь паськöмтöгыс?" Сiйö кыв оз шу. ¹³ Сэки öксы тшöктас кесйöгъясыслы: "Ки-коксö кöрталöмöн шыбитöй сiйöс пемыдас. Сэнi лоö бöрдöм да пинь йирöм". ¹⁴ Шуа тiянлы: унаöс корöма, но этшаöс бöрйöма». ¹⁵ Фарисейяс мунiсны да ас костаныс сёрнитчисны кыйны Исусöс сёрниас. ¹⁶ Найö мöдöдiсны Сы дiнö Ирöдлысь йöзсö да ассьыныс велöдчысьяссö. Локтöмаяс шуисны: «Велöдысь, ми тöдам, мый Тэ веськыда сёрнитан да веськыда велöдан Енлöн туйö. Тэ он пов йöзлöн шуасьöмысь, он видзöд морт вылö. ¹⁷ Висьтав, колö-ö кесарлы вот мынтыны?» ¹⁸ Налысь наянлунсö тöдöмöн Исус шуис: «Кык бана шаньгаяс! Мыйла тi зiлянныд кыйны Менö? ¹⁹ Петкöдлöй Меным вот мынтан сьöмнытö». Найö мыччисны Сылы динар. ²⁰ Исус юалiс: «Кодлöн танi чужöмыс-нимыс?» ²¹ Найö вочавидзисны: «Кесарлöн». Исус шуис налы: «Кесарлысь сетöй кесарлы, а Енлысь – Енлы». ²² Тайöс кылöмысь найö чуймисны, сэсся колисны Исусöс да мунiсны. ²³ Сiйö лунö локтiсны Исус дiнö саддукейяс, кодъяс шуöны, ловзьöмыс пö абу. Найö юалiсны Исуслысь: ²⁴ «Велöдысь, Мöисей шулöма, мый "ныв-питöм морт кö кулас, вокыслы колö босьтны сылысь гöтырсö да нюжöдны аслас вокыслысь рöдсö". ²⁵ Танi миян вöлi сизим вок. Ыджыдыс гöтрасис, сэсся кулiс, ныв-пиыс эз коль. Гöтырсö вокыс босьтiс. ²⁶ Тадзи лои мöд вокыскöд, коймöдыскöд, став сизимнанныскöд. ²⁷ Медбöрын аньыс кулiс. ²⁸ Ловзьöм бöрас кодлы сiйö гöтырöн лоас, öд сизим верöс сылöн вöлi?» ²⁹ Исус вочавидзис: «Тi ылалöмныд Гижöдъяссö да Енлысь вынсö тöдтöмныдла. ³⁰ Ловзьöмаяс оз гöтрасьны да верöс сайö оз мунны. Найö Енлöн енэжвыв анделъяс кодьöсь. ³¹ Ловзьöм йылысь шуа – тi öмöй энö лыддьылöй, Енмыс öд шуöма: ³² "Ме Öвраамлöн Ен, Исааклöн Ен да Яковлöн Ен"? Енмыс абу кулöмаяслöн Ен, Сiйö ловъяяслöн Ен». ³³ Йöзыс шензисны Сылöн велöдöмысь. ³⁴ Фарисейяс кор кылiсны, мый Исус ланьтöдöма саддукейясöс, чукöртчисны öтлаö. ³⁵ На пиысь öти, Индöдö велöдысь, Исусöс кыйöм могысь юалiс: ³⁶ «Велöдысь, Индöдас кутшöм тшöктöм медыджыд?» ³⁷ Исус шуис: «Радейт ассьыд Господь Ентö став сьöлöмнад, став олöмнад да став мывкыднад. ³⁸ Тайö медыджыд да медтöдчана тшöктöм. ³⁹ Сы кодь мöд тшöктöмыс: радейт матыссатö асьтö моз. ⁴⁰ Тайö кык тшöктöмыс вылö подуласьö став Индöдыс да пророк гижöдъяс». ⁴¹ Исус юалiс чукöртчöм фарисейяслысь: ⁴² «Мый шуанныд Кристос йылысь? Кодлöн Сiйö пи?» Найö вочавидзисны: «Давидлöн». ⁴³ Сэки Исус юалiс: «Мыйла нö Ловсянь сёрнитiгас Давид шуö Сiйöс Господьöн: ⁴⁴ – Господь шуис менам Господьлы: "Пукав Менам веськыдладорын, кытчöдз ог пукты Тэнад кок улö Тэныд паныд мунысьясöс". ⁴⁵ Давид кö шуö Сiйöс Господьöн, кыдзи нö Сiйö сылы пиöн лоö?» ⁴⁶ Исуслы некод эз вермы воча кыв шуны. Сiйö лунсянь некод нин эз лысьт юасьны Сылысь.

¹ Йöз чукöрлы да велöдчысьясыслы Исус висьталiс: ² «Мöисей пуклöсö пуксисны Индöдö велöдысьяс да фарисейяс. ³ Кывзöй найöс да вöчöй ставсö налöн шуöм серти. Сöмын на ног энö олöй: найö öтитор шуöны, а мöдтор вöчöны. ⁴ Найö кöртавлöны сьöкыд, нуны вермытöм нöбъяс да пуктöны йöзлы пельпом вылас. Но асьныс весиг чунь помнас вöрзьöдны оз кöсйыны. ⁵ Найö ставсö вöчöны йöзлы петкöдлöм могысь: öшлöны ас выланыс ыджыд кудъяс, кузьмöдöны паськöм дорыш тугъяссö. ⁶ Найö радейтöны гажöдчанiнын бурджыклаö пуксьыны, синагогаын водзын пукавны ⁷ да йöзаинын чолöмалöмъяс кывзыны. Налы сьöлöм вылас воö, ыдждöдлöны кö найöс велöдысьöн. ⁸ Но тi энö пуксьöй велöдысьö, öд Велöдысьыс тiян öти – Кристос, а тi öта-мöдныдлы вокъяс. ⁹ Тайö му вылас некодöс энö ыдждöдлöй батьöн, öд Батьыс тiян öти – енэжъяс вылын. ¹⁰ Энö пуксьöй туйдöдысьö, öд Туйдöдысьыс тiян öти – Кристос. ¹¹ Тiян пöвстысь ыджыдджыкыс мед лоö тiянлы кесъялысьöн. ¹² Öд асьсö вылö пуктысьöс лэдзасны, асьсö улö пуктысьöс кыпöдасны». ¹³ «Курыд шог тiянлы, Индöдö велöдысьяс да фарисейяс! Кык бана шаньгаяс! Тi Енэжвыв Юраланiнысь öдзöссö йöз водзын пöдлаланныд. Асьныд онö пырöй да пырны кöсйысьясöс онö лэдзöй. ¹⁴ Курыд шог тiянлы, Индöдö велöдысьяс да фарисейяс! Кык бана шаньгаяс! Тi дöваяслысь керкасö куштанныд да асьнытö петкöдлöм могысь дыр кевмысянныд. Таысь тiянöс чорыда мыждасны. ¹⁵ Курыд шог тiянлы, Индöдö велöдысьяс да фарисейяс! Кык бана шаньгаяс! Тi мусö да васö вуджанныд, медым аддзыны тiян бöрся öти мунысьöс. А сюрас кö, тi вöчанныд сыысь куслытöм биö мунысьöс, кык пöв лёкджыкöс на ас дорсьыныд. ¹⁶ Курыд шог тiянлы, синтöм нуöдысьяс! Тi шуанныд: "Мортыс кö крам водзын кыв сетас, тайö кывсö позьö торкны. Сетас кö кывсö крамлöн зарни водзын, таысь кывкутас". ¹⁷ Синтöмъяс да мывкыдтöмъяс! Мый ыджыдджык: зарниыс али зарнисö вежöдысь крамыс? ¹⁸ Тi шуанныд: "Мортыс кö висьпуктанiн водзын кыв сетас, тайö кывсö позьö торкны. Сетас кö кывсö висьпуктанiнö вайöмтор водзын, таысь кывкутас". ¹⁹ Синтöмъяс! Мый ыджыдджык: вайöмторйыс али вайöмторсö вежöдысь висьпуктанiныс? ²⁰ Мортыс кö висьпуктанiн водзын кыв сетö, сiйö кыв сетö тшöтш став вайöмторйыс водзын. ²¹ Крам водзын кö кыв сетö, сiйö кыв сетö тшöтш сэнi Олысьыс водзын. ²² Мортыс кö енэж водзын кыв сетö, сiйö кыв сетö Ен пуклöс водзын да Пукалысьыс водзын. ²³ Курыд шог тiянлы, Индöдö велöдысьяс да фарисейяс! Кык бана шаньгаяс! Тi сетанныд исань турунысь, укропысь да тминысь дасöд юкöнсö. А Индöдысь коланаджыкторсö эновтiнныд: веськыда мыждöмсö, буралöмсö да эскöмсö. Тайöс колö вöчны да мукöдторсö оз ков вунöдны. ²⁴ Синтöм нуöдысьяс! Номйöс сöдзöданныд да верблюдöс ньылаланныд! ²⁵ Курыд шог тiянлы, Индöдö велöдысьяс да фарисейяс! Кык бана шаньгаяс! Тi тасьтi-дозмуклысь ортсысö весаланныд, а пытшкöсыс гусясьöмöн да ылöдчöмöн тырöма. ²⁶ Синтöм фарисей, медводз пытшкöссяньыс весав тасьтi-дозмуктö, сэки ортсысяньыс тшöтш сöстöммас. ²⁷ Курыд шог тiянлы, Индöдö велöдысьяс да фарисейяс! Кык бана шаньгаяс! Тi еджыдöн мавтöм гортъяс кодьöсь. Ортсысяньыс сiйö мича, а пытшкöсас тырыс шой лы да быд пежыс. ²⁸ Ортсысяньныд, видзöдны кö, веськыда олысьяс кодьöсь, а пытшкöсныд пöръясьöмöн да лёк вöчöмöн тырöма. ²⁹ Курыд шог тiянлы, Индöдö велöдысьяс да фарисейяс! Кык бана шаньгаяс! Тi сувтöданныд пророкъяс дзебанiнö казьтылан изъяс да мичмöданныд веськыда олысьяслысь дзебанiнъяссö. ³⁰ Тi шуанныд: "Овлiм кö ми батьяслöн кадö, эгö эськö öтувтчöй накöд кисьтны пророкъяслысь вирсö". ³¹ Тi асьныд висьталанныд, мый тi пророк виысьяслöн пиян. ³² Тыртöй батьясныдлысь лыдсö! ³³ Змейяс! Вижля йылöм! Мынанныд-ö куслытöм биö мыждöмысь? ³⁴ Ме мöдöда тiян дiнö пророкъясöс, сюсь вежöра йöзöс да велöдысьясöс. Öтиясöс вианныд да крестö тувъяланныд, мöдъясöс синагогаын чорыда нöйтанныд да карысь карö вöтланныд. ³⁵ Тадзи тiянöс мыждасны став веськыда олысьыслöн вирысь: веськыда олысь Авель вирсянь Варакейлöн Закар пи вирöдз, кодöс тi виинныд крам да висьпуктанiн костын. ³⁶ Веськыда висьтала тiянлы: таысь ставсьыс мыжыс усьö öнiя олысьяс вылö!» ³⁷ «Ерусалим, Ерусалим! Пророкъясöс виалысь да тэ дiнö ыстöмаясöс изъялысь! Кымынысь Ме кöсйи чукöртны тэнсьыд ныв-питö, кыдзи лэбач чукöртö ассьыс пиянсö борд улас, но тi энö кöсйöй. ³⁸ Со, тiян крамныд тыртöммас. ³⁹ Шуа тiянлы: онö аддзöй Менö тайö кывъяссö шутöдз: "Бурсиöма Господь нимöн Локтысьöс!"»

¹ Исус петiс крамысь да мöдöдчис мунны. Сы дiнö матыстчисны велöдчысьясыс, медым петкöдлыны Сылы крамсö. ² Исус шуис налы: «Аддзанныд-ö ставсö тайöс? Веськыда висьтала тiянлы: татчö из вылö из оз коль, ставсö жугöдасны». ³ Кор Исус вöлi пукалö Олив керöсын, Сы дiнö локтiсны велöдчысьясыс да юалiсны: «Висьтав, кор ставыс тайö лоас? Мый серти ми тöдмалам Тэнсьыд локтöмтö да нэм помасьöмсö?» ⁴ Исус шуис: «Видзчысьöй, мед эз ылöдны тiянöс. ⁵ Унаöн Менам нимöн локтасны да шуасны, ме пö Кристос, да унаöс ылöдасны. ⁶ Тi кыланныд тыш мунöмъяс да тыш йылысь юöръяс, сöмын энö полöй. Тайö ставыслы колö лонысö, сöмын тайö абу на пом. ⁷ Войтыр войтырлы паныд сувтас, муяс öта-мöдныслы паныд кыпöдчасны. Уналаын лоас му вöрöм да тшыгъялöм, йöзсö суас кулан висьöм. ⁸ Но тайö ставыс чужтöм водзвывса дойяс на. ⁹ Тiянöс пондасны дзескöдны да унаöс виасны. Менам ним вöсна став йöзыс мустöмтасны тiянöс. ¹⁰ Сэки унаöн эновтчасны эскöмсьыс, öта-мöднысö вузаласны да мустöмтасны. ¹¹ Уна ылöгпророк локтас, унаöс найö ылöдасны. ¹² Лёкыс содöм вöсна уналöн муслуныс кöдзалас. ¹³ Но сьöкыдсö помöдз нуысь мездмас. ¹⁴ Ен Юралöм йылысь Евангелльöсö висьталасны муюгыд пасьтала, быд кыла войтырлы тöдмöнъя. Сэсся воас пом». ¹⁵ «Кор тi аддзанныд вежаинсьыс пеж зывöксö, мый йылысь Даниил пророк на висьтавлiс, – лыддьысьысь мед гöгöрвоö – ¹⁶ сэки Юдея муын олысьяс мед пышъясны керöсъясö. ¹⁷ Кодi лоас керка вылас, мед оз пыр керкаас босьтны мыйкö. ¹⁸ Кодi лоас видз-му вылас, мед оз кос гортас паськöмысла. ¹⁹ Сiйö лунъясö ёна сьöкыд лоö нöбасьысьяслы да нёньöдчысьяслы. ²⁰ Кевмысьöй, мед эз ковмы пышйынытö тöлын либö шойччан лунö. ²¹ Сэки ыджыд шог суас йöзсö, татшöмыс му пуксьöмсяньыс эз на вöвлы да оз нин ло. ²² Енмыс кö тайö кадсö оз дженьдöд, ловъя морт оз коль. Но Аслас бöрйöмаяс вöсна Сiйö дженьдöдас тайö кадсö. ²³ Сэки шуасны кö тiянлы: "Кристос танi", либö шуасны: "Кристос сэнi", энö эскöй. ²⁴ Öд ылöгкристосъяс да ылöгпророкъяс локтасны да пондасны вöчны ыджыд шензьöданаторъяс, медым ылöдны, позяс кö, весиг бöрйöмаясöс. ²⁵ Со, Ме водзвыв висьталi тiянлы. ²⁶ Тiянлы кö шуасны: "Сiйö овтöминын", энö мунöй. Шуасны кö: "Сiйö керка пытшкын", энö эскöй. ²⁷ Енэжсö асыввывсянь рытыввылöдз югдöдысь чардби моз Морт Пи локтас. ²⁸ Кöнi шой, сэтчö чукöртчасны кутшъяс». ²⁹ «Регыд тайö шог лунъяс бöрын шондiыс пемдас, тöлысьыс кусас, енэжысь кодзувъяс усясны, енэжвыв вынъяс вöрзясны. ³⁰ Сэки енэжас тыдовтчас Морт Пилöн пас. Мувывса став йöзыс ырзöмöн бöрддзасны, кор аддзасны кымöръяс вылын ыджыд вынöн да дзирдлунöн локтысь Морт Пиöс. ³¹ Кор кылас трубалöн гора шыыс, Сiйö мöдöдас анделъяссö нёльнан му вежтасас, медым чукöртны Ассьыс бöрйöмаяссö став му пельöссьыс. ³² Инжир пу вылö кö видзöдам, аддзам: вожъясыс кö ловзьöны да коръясыс потöны, сiдзкö, гожöмыс матын. ³³ Тадзи, ставсö тайöс аддзигöн тöдöй: сiйö кадыс матын, öдзöс дорад нин. ³⁴ Веськыда висьтала тiянлы: ставыс тайö лоас öнiя олысьяс дырйи на. ³⁵ Енэжыс да муыс бырас, а Менам кывъясöй оз бырны. ³⁶ Сiйö лунсö да сiйö кадсö некод оз тöд. Анделъяс оз тöдны, сöмын Батьöй тöдö. ³⁷ Кыдзи вöлi Ной лунъяс дырйи, сiдзи лоö Морт Пи локтiгöн. ³⁸ Ыджыд ойдöм водзвылас, ковчегö Нойлöн пыртöдз йöзыс сёйисны-юисны, гöтрасисны да верöс сайö мунiсны. ³⁹ Кытчöдз эз су найöс ойдöмыс да ваö пöдöмыс, найö эз вежöртны, мый виччысьö найöс. Тадзи жö лоас Морт Пи локтiгöн. ⁴⁰ Сэки видз-му вылын лоасны кыкöн: öтисö босьтасны, мöдсö колясны. ⁴¹ Изанiнын лоасны кык ань: öтисö босьтасны, мöдсö колясны. ⁴² Лоöй дасьöсь, öд онö тöдöй Господьныдлысь локтан кадсö. ⁴³ Тi тöданныд: керка кутысь кö тöдiс гусясьысьлысь локтан кадсö, сэки эськö эз узь да эз лэдз керкаас. ⁴⁴ Лоöй дасьöсь, öд Морт Пи локтас виччысьтöг». ⁴⁵ «Лоöй эскана да мывкыда кесйöг кодьöсь. Татшöмсö ыджыдыс пуктас веськöдлыны мукöд кесйöгъясöн, медым ас кадö налы сёян-юан сетны. ⁴⁶ Кесйöгыс шуда, ыджыдыс кö гортас воигöн аддзас сiйöс тадзи вöчöмöн. ⁴⁷ Веськыда висьтала тiянлы: ыджыдыс пуктас сiйöс веськöдлыны став аслас овмöсöн. ⁴⁸ Шогмытöм кесйöг вермас мöвпыштны: "Ыджыдöй дыр на оз лок". ⁴⁹ Сiйö пондас нöйтны уджъёртъяссö да сёйны-юны кодалысьяскöд. ⁵⁰ Но виччысьтöм лунö, лöсявтöм кадö кесйöглöн ыджыдыс воас. ⁵¹ Сiйö кералас кесйöгсö да шыбитас сiйöс кык бана шаньгаяс дiнö. Сэнi лоö бöрдöм да пинь йирöм».

¹ «Енэжвыв Юралöмыс татшöм. Дас ныв биясöн верöспулы воча петасны. ² Витыс вöлi мывкыдтöм, мöд витыс – мывкыда. ³ Мывкыдтöмъяс бинысö босьтасны, а выйсö оз. ⁴ Мывкыдаяс биысь öтдор вый тыра дознысö босьтасны. ⁵ Верöспуыс дыр оз во, и ставныс вугыртасны да унмовсясны. ⁶ Вой шöрнас кылас горöдöм: "Верöспу локтö. Петöй сылы воча!" ⁷ Нывъяс садьмасны да лöсьöдасны бияснысö. ⁸ Мывкыдтöм нывъяс шуасны мывкыдаяслы: "Миян биным кусö, вайыштöй выйнытö!" ⁹ Мывкыдаяс шуасны: "Огö. Ставнымлы выйыс оз тырмы. Мунöй да ньöбöй вузалысьяслысь". ¹⁰ Мывкыдтöм нывъяслöн выйла ветлiгкостi верöспуыд воас. Нывъяс, кодъяс вöлiны дасьöсь, пырасны сыкöд кöлысь вылö, да на бöрся öдзöссö йигналасны. ¹¹ Сёрöнджык мöд витыс локтас. Найö пондасны вöзйысьны: "Ыджыдöй, ыджыдöй, восьт миянлы!" ¹² Сiйö вочавидзас: "Веськыда висьтала тiянлы: ог тöд тiянöс". ¹³ Лоöй дасьöсь, öд онö тöдöй Морт Пилысь локтан лунсö да кадсö». ¹⁴ «Öти морт ылi туйö мöдöдчигас корас ас дорас кесйöгъяссö да коляс налы ассьыс овмöссö. ¹⁵ Быдöнлы сямыс-выныс серти сетас зарни сьöм: öтилы вит талант, мöдлы кык, коймöдлы öти талант. Сэсся мунас. ¹⁶ Вит талант босьтысь пырысь-пыр сьöмсö уджö бергöдас да содтöд босьтас вит талант. ¹⁷ Тадзи вöчас тшöтш мöдыс да содтöд босьтас кык талант. ¹⁸ Öти талант босьтысь мунас, кодъяс гу да аслас ыджыдлысь сьöмсö гуалас. ¹⁹ Дыр мысти кесйöгъяслöн ыджыдыс локтас да юалас найöс сьöм йывсьыс. ²⁰ Вит талант босьтысь содтöд ваяс вит талант да шуас: "Ыджыдöй, тэ меным витöс сетлiн. Видзöдлы, нöшта менам вит содiс". ²¹ Ыджыдыс шуас: "Бура вöчин. Тэ бур да эскана кесйöг. Ичöтас тэ эскана вöлiн, уна вылö тэнö пукта. Лок, öтлаын гажöдчам-нимкодясям". ²² Кык талант босьтысь локтас да шуас: "Ыджыдöй, тэ меным кык талант сетлiн. Видзöдлы, нöшта менам кык содiс". ²³ Ыджыдыс шуас сылы: "Бура вöчин. Тэ бур да эскана кесйöг. Ичöтас тэ эскана вöлiн, уна вылö тэнö пукта. Лок, öтлаын гажöдчам-нимкодясям". ²⁴ Сэсся öти талант босьтысь локтас да шуас: "Ыджыдöй, ме тöда, тэ чорыд морт: вундан, кытчö эн кöдзлы, да чукöртан, кытчö кöйдыссö эн шыбитлы. ²⁵ Тэысь полöмöйла ме мунi да гуалi таланттö. Со, тэнад сьöмыд". ²⁶ Ыджыдыс шуас сылы: "Тэ шогмытöм дыш кесйöг. Тэ тöдiн, мый ме вунда, кытчö эг кöдзлы, да чукöрта, кытчö кöйдыссö эг шыбитлы. ²⁷ Тэныд колö вöлi менсьым талантöс сьöмчукöртанiнö пуктыны, локтöм бöрам эськö содтöдöн босьтi. ²⁸ Мырддьöй сылысь талантсö да сетöй дас талантаыслы. ²⁹ Кодлöн эм, сылы коланасьыс унджык на сетасны. Кодлöн абу, сылысь бöръясö босьтасны. ³⁰ Тайö шогмытöм кесйöгсö шыбитöй пемыдас. Сэнi лоö бöрдöм да пинь йирöм"». Тайöс висьталöм бöрын Исус горöдöмöн шуис: «Кодлöн эм пель, мед кылö!» ³¹ «Морт Пи локтас Аслас дзирдлунöн вежа анделъяскöд да пуксяс дзирдлуныслöн юралан пуклöсö. ³² Сэки чукöртчас Сы водзö быд кыла войтыр, да Сiйö торйöдас найöс, кыдзи видзысь торйöдö ыжъяссö кöзаяссьыс. ³³ Ыжъяссö сувтöдас веськыдладорас, кöзаяссö шуйгаладорас. ³⁴ Сэки веськыдладорын сулалысьяслы Öксы шуас: "Локтöй, менам Батьлöн бурсиöмаяс. Тiянлы вуджö Енлöн Юраланiныс, кодöс дасьтöма тiянлы му пуксьöмсяньыс. ³⁵ Кор Менам кынöмöй сюмалiс, тi Менö вердiнныд, кор горшöй косьмис, тi Менö юкталiнныд. Кор Ме локтi мöд муысь, тi Менö керкаад сибöдiнныд, ³⁶ кор вöлi пасьтöм, тi Менö пасьтöдiнныд. Висигöн тi видлалiнныд Менö, дзескыдiнын пукалiгöн волывлiнныд Ме дiнö". ³⁷ Сэки веськыда олысьяс Сылы шуасны: "Господьöй, кор ми аддзылiм Тэнö тшыгъялöмöн да вердiм, горш косьмöмöн да юкталiм? ³⁸ Кор ми аддзылiм Тэнö мöд муысь локтысьöн да сибöдiм, пасьтöмöн да пасьтöдiм? ³⁹ Кор ми аддзылiм Тэнö висьöмöн да видлалiм, дзескыдiнын пукалысьöн да волывлiм Тэ дiнö?" ⁴⁰ Öксы шуас налы: "Веськыда висьтала тiянлы: тайöс кö тi вöчинныд Менам ичöт вокъясысь öтилы, сiдзкö, вöчинныд Меным". ⁴¹ Сэсся Сiйö шуйгаладорын сулалысьяслы шуас: "Вешйöй Ме дiнысь, ёрöмаяс. Мунöй омöльыслы да сылöн анделъяслы дасьтöм куслытöм биö. ⁴² Кор Менам кынöмöй сюмалiс, тi Менö энö вердöй, кор горшöй косьмис, тi Менö энö юкталöй. ⁴³ Кор Ме локтi мöд муысь, тi Менö энö сибöдöй, кор вöлi пасьтöм, тi Менö энö пасьтöдöй. Висигöн тi энö видлалöй Менö, дзескыдiнын пукалiгöн энö волывлöй Ме дiнö". ⁴⁴ Сэки найö юаласны Сылысь: "Господьöй, кор ми аддзылiм Тэнö тшыгъялöмöн, горш косьмöмöн, мöд муысь локтысьöн, пасьтöмöн, висьöмöн, дзескыдiнын пукалысьöн да эгö отсалöй Тэныд?" ⁴⁵ Сэки Сiйö вочавидзас: "Веськыда висьтала тiянлы: тайöс кö тi энö вöчöй ичöтъяс пиысь öтилы, сiдзкö, энö вöчöй Меным". ⁴⁶ Сэсся найö мунасны помтöм мучитчöмö, а веськыда олысьяс – помтöм олöмö».

¹ Тайöс ставсö висьталöм бöрын Исус шуис велöдчысьясыслы: ² «Кык лун мысти, тi тöданныд, Ыджыд лун лоö. Тайö кадö Морт Пиöс вузаласны да крестö тувъяласны». ³ Аркирейяс, Индöдö велöдысьяс да пöрысьяс чукöртчисны Каиаф нима аркирей керкаö. ⁴ Найö сёрнитчисны ылöдлöмöн босьтны Исусöс да вины. ⁵ Но шуисны, Ыджыд лунö пö оз ков, öд йöзыс вермасны шызьыны. ⁶ Исус вöлi Вифания сиктын, проказаысь бурдöм Симон ордын. ⁷ Исус дiнö локтiс ань, сiйö вайис вальдi дозйын дона вый. Исуслöн сёйигöн ань кисьталiс выйсö Исуслы юр вылас. ⁸ Велöдчысьяс аддзисны да пондiсны шуасьны: «Мыйла, бара, лотö-а? ⁹ Тайö выйсö позис ыджыд донысь вузавны да сьöмсö сетны гöльяслы». ¹⁰ Тайöс казялöмöн Исус шуис налы: «Мыйла тi шöйöвоштанныд аньсö? Сiйö буртор вöчис Меным. ¹¹ Гöльяс пыр лоасны тiянкöд, а Ме тiянкöд ог пыр ло. ¹² Выйöн киськалöмнас аньыс дасьтiс Менö дзебигкежлö. ¹³ Веськыда висьтала тiянлы: муюгыд пасьтала, кöнi висьталасны тайö Евангелльöсö, сэнi казьтыштасны тайö аньсö да висьталасны, мый сiйö вöчис». ¹⁴ Искариот Иуда вöлi дас кык велöдчысьысь öти. Сiйö мунiс аркирейяс дiнö ¹⁵ да шуис: «Мый сетанныд, вузала кö тiянлы Исусöс?» Найö вöзйисны сылы комын эзысь сьöм. ¹⁶ Сэксянь Иуда пондiс корсьны лöсялан кад, медым вузавны Исусöс. ¹⁷ Шомтöм нянь сёян лунъяс дырйи медводдза лунö Исус дiнö локтiсны велöдчысьясыс да юалiсны: «Кöнi кöсъян сёйны Ыджыд лунся ыжöс? Ми мунам да дасьтам». ¹⁸ Исус шуис: «Мунöй карö сэтшöмтö морт дiнö да висьталöй сылы: "Велöдысь шуис: Менам кадöй матысмö. Тэ ордын велöдчысьяскöд пасъя Ыджыд лунсö"». ¹⁹ Велöдчысьяс вöчисны Исуслöн тшöктöм серти, дасьтiсны Ыджыд лунся сёян. ²⁰ Рытнас Исус пуксис дас кыкнан велöдчысьыскöд сёйны. ²¹ Сёйиганыс шуис налы: «Веськыда висьтала тiянлы: тiян пиысь öти вузалас Менö». ²² Шогö усьöмöн быдöн кутiс юасьны: «Ог-ö ме, Господьöй?» ²³ Исус вочавидзис: «Менö вузалысь Мекöд öти тасьтiысь сёйö. ²⁴ Морт Пи мунö, кыдзи гижöма Сы йылысь. Но курыд шог Сiйöс вузалысьлы! Бурджык сылы вöлi, эз кö чужлы». ²⁵ Сэки Сiйöс вузалысь Иуда шыасис: «Велöдысьöй, абу-ö ме?» Исус вочавидзис: «Тэ шуин». ²⁶ Сёйиганыс Исус босьтiс нянь, Енмöс аттьöалöмöн чегис няньсö да велöдчысьяслы сетiгас шуис: «Босьтöй, сёйöй, тайö Менам Яй». ²⁷ Сэсся босьтiс чаша, аттьöалiс Енмöс да велöдчысьяслы сетiгас шуис: «Юöй татысь быдöн. ²⁸ Тайö Менам Вир – Выль Йитöдлöн Вир – киссьö уналысь мыжъяссö прöститöм вöсна. ²⁹ Висьтала тiянлы: öнiсянь ог понды юны тайö виноград юансö сiйö лунöдз, кор понда юны тiянкöд выльöс Менам Батьлöн Юраланiнын». ³⁰ Енлы сьылöм бöрын найö кайисны Олив керöсö. ³¹ Исус шуис велöдчысьясыслы: «Тавой тi ставныд эновтанныд Менö. Гижöма: "Видзысьсö кувмöн дойда, да ыжъясыс разаласны". ³² Ловзьöм бöрам Ме виччыся тiянöс Галилеяын». ³³ Петыр шуис: «Ставныс кö эновтасны Тэнö, ме ог». ³⁴ Исус вочавидзис: «Веськыда висьтала тэныд: тавой петук чукöсттöдз на тэ куимысь соссян Меысь». ³⁵ Петыр шуис: «Весиг кö кувны ковмас Тэкöд, ог соссьы». Тадзи шуалiсны тшöтш мукöд велöдчысьыс. ³⁶ Сэсся Исус велöдчысьясыскöд локтiс Гефсиманö. Сiйö шуис налы: «Пукалыштöй танi, Ме ветла кевмысьны». ³⁷ Аскöдыс босьтiс Петырöс да Зеведейлысь кыкнан писö. Исусöс гажтöм да шогалöм босьтiс. ³⁸ Сiйö шуис: «Шогöй кувмöн топöдö лолöс. Олыштöй танi Мекöд да энö узьöй». ³⁹ Ачыс водзлань муныштiс да чужöмнас муö уськöдчöмöн кевмысис: «Батьöй, позьö кö, вешты Ме дiнысь тайö чашасö. Сöмын мед лоас Тэнад кöсйöм серти, а оз Менам». ⁴⁰ Исус матыстчис велöдчысьяс дiнас да аддзис: найö унмовсьöмаöсь. Петырлы шуис: «Öти час весиг энö вермöй узьтöг олыштны Мекöд. ⁴¹ Энö узьöй, кевмысьöй, мед ыштöдöмыс эз вермы тiянöс. Лолыд öд пыр дась, а вир-яйыд жеб». ⁴² Исус мöдысь мунiс да бара кевмысис: «Батьöй, Ме дiнысь кö оз позь вештыны тайö чашасö, а Меным кö колö юны сiйöс, мед лоас Тэнад кöсйöм серти». ⁴³ Локтöм бöрас бара аддзис: велöдчысьяссö унмыс топыда личкöма. ⁴⁴ Исус колис найöс да бара мунiс, воддза мозыс коймöдысь кевмысис. ⁴⁵ Сэсся локтiс велöдчысьяс дiнас да шуис налы: «Пыр на узянныд да шойччанныд? Кадыс воис. Морт Пиöс мыжаяс киö сетöны. ⁴⁶ Чеччöй, мунамöй. Менö вузалысь матын нин». ⁴⁷ Исуслöн сёрнитiгкостi локтiс Иуда, дас кык велöдчысьысь öти. Сыкöд тшöтш локтiсны зоръясöн да шыпуртъясöн уна йöз. Найöс мöдöдöмаöсь аркирейяс да пöрысьяс. ⁴⁸ Исусöс вузалысь шуöма локтöмаяслы, кодöс пö окышта, Сiйöс и босьтöй. ⁴⁹ Иуда веськыда мунiс Исус дiнö да шуис: «Видза олан, Велöдысьöй», сэсся окыштiс Сiйöс. ⁵⁰ Исус шуис сылы: «Ёртöй, та понда-ö тэ локтiн!» Сэки кытшалiсны да босьтiсны Исусöс. ⁵¹ Исускöд вöлысьясысь öти перйис шыпуртсö да керыштiс аркирей кесйöглысь пельсö. ⁵² Исус шуис сылы: «Бöр сюй шыпурттö. Шыпурт босьтысь шыпурт помысь кулас. ⁵³ Он öмöй тöд, Ме кö öнi кора Батьöйлысь, Сiйö вермас мöдöдны уна дас сюрс анделöс. ⁵⁴ Кыдзи нö сэки Гижöдъясыс инасны? Сэнi шуöма, тадзи колö лоны». ⁵⁵ Йöз чукöрлы Исус шуис: «Лёк вöчысьöс моз зорйöн-шыпуртöн локтiнныд босьтны Менö. Ме быд лун тiян крамын пукалi-велöдi, да тi энö босьтöй Менö. ⁵⁶ Ставыс тадзи артмис, медым инiсны пророк гижöдъяс». Сэки велöдчысьяс ставныс эновтiсны Исусöс да пышйисны. ⁵⁷ Исусöс кутысьяс вайöдiсны Сiйöс Каиаф аркирей ордö, кöнi вöлi чукöртчöмаöсь Индöдö велöдысьяс пöрысьяскöд. ⁵⁸ Петыр бöрö кольччöмöн вöтчис Исус бöрся аркирей керка дорöдз. Пырис йöрас да пуксис кесйöгъяскöд орччöн – кöсйис помсö аддзывны. ⁵⁹ Аркирейяс, пöрысьяс да став веськöдлан котырыс корсисны Исуслы паныд ылöгвисьталысьясöс, медым сэсся мыждыны да вины Сiйöс. ⁶⁰ Уна пöръясьысь волiс, но колана висьталысьыс эз сюр. Бöрынджык нöшта кык ылöгвисьталысь локтiсны. ⁶¹ Найö висьталiсны: «Сiйö шулiс, верма пö Енлысь крамсö жугöдны, сэсся пö куим лунöн сiйöс бöр лэптыны». ⁶² Сэки аркирей сувтiс да юалiс Исуслысь: «Мый воча шуан?» ⁶³ Исус чöв олiс. Аркирей шуис: «Ловъя Ен водзын висьтав миянлы, Тэ-ö Кристос, Ен Пи». ⁶⁴ Исус вочавидзис: «Тэ шуин. Висьтала тiянлы: öнiсянь аддзанныд Морт Пиöс, Ставсöвермысьлöн веськыдладорас пукалысьöс да кымöръяс вылын локтысьöс». ⁶⁵ Сэки аркирей косялiс ассьыс паськöмсö да шуис: «Сiйö Енмöс омöльтö! Висьталысьяс миянлы оз нин ковны, тi асьныд кывлiнныд Сылысь омöльтöмсö. ⁶⁶ Мый шуанныд?» Вочавидзисны: «Мыжа! Вины Сiйöс!» ⁶⁷ Сэсся сьöлалiсны Исуслы чужöмас, нöйтiсны Сiйöс да чужöмас кучкалöмöн ⁶⁸ шуалiсны: «Висьтав, Кристос, кодi кучкис Тэнö?» ⁶⁹ Петыр пукалiс йöрас. Öти кесйöг ань матыстчис сы дiнö да шуис: «Тэ тшöтш галилеяса Исускöд вöлiн». ⁷⁰ Петыр став йöз водзас соссис: «Ог гöгöрво, мый висьталан», ⁷¹ сэсся вешйис дзиръя дорö. Петырöс казялiс мöд ань да шуис сэнi сулалысьяслы: «Тайö мортыс Назаретса Исускöд вöлi». ⁷² Петыр бара соссис, чорыда шуис: «Ме ог тöд тайö Мортсö!» ⁷³ Бöрынджык сэнi сулалысьяс матыстчисны да шуисны Петырлы: «Тэ дзик на пиысь, сёрниыд на кодь». ⁷⁴ Петыр енмасьöмöн пондiс соссьыны: «Ог тöд тайö Мортсö». Дзик пыр кылiс петуклöн чукöстöм. ⁷⁵ Сэки Петырлы уси тöд вылас Исуслöн шуöмыс: «Петук чукöсттöдз на тэ куимысь соссян Меысь». Петыр петiс да курыда бöрддзис.

¹ Асывводзнас чукöртчисны став аркирейыс пöрысьяскöд, сёрнитчöмöн найö воисны öти кывйö: вины Исусöс. ² Сiйöс кöрталöмöн нуöдiсны юралысь Понтий Пилат дiнö да сетiсны сылы. ³ Исусöс мыждöм йылысь тöдмалöм бöрын Иуда, Сiйöс вузалысь, гöгöрвоис ассьыс мыжсö. Сэки бöр нуис комын эзысь сьöмсö аркирейяслы да пöрысьяслы ⁴ да шуис налы: «Ме мыж вöчи, мыжтöм мортöс вузалi». Найö вочавидзисны: «Миянлы нö мый? Ачыд öд тöдiн». ⁵ Иуда шыбитiс сьöмсö крамас, сэсся петiс сэтысь, мунiс да джагöдчис. ⁶ Аркирейяс сьöмсö чукöртöм бöрын шуисны: «Оз позь тайö сьöмсö пуктыны крамса сьöм видзанiнö, сiйö вирлöн дон». ⁷ Сёрнитчöм бöрын найö ньöбисны гырнич вöчысьлысь мусö, шуисны вöчны сэтчö йöз муысь воöмаяслы шойна. ⁸ Та вöсна тайö муыслы пуктiсны "Вир му" ним, тадзи öнöдз на нимтöны. ⁹ Тадзи инiс Еремей пророклöн шуöмыс: – Босьтiсны найö комын эзысь сьöмсö, Израиль войтырöн тайö Мортысь шуöм донсö, ¹⁰ да ньöбисны сы вылö гырнич вöчысьлысь мусö. Тадзи шуис меным Господь. ¹¹ Исусöс вайöдiсны юралысь водзö. Юралысь юалiс: «Тэ-ö юдейяслöн Öксыыс?» Исус вочавидзис: «Тэ шуан». ¹² Аркирейяс да пöрысьяс мыжалiсны Исусöс, но Сiйö чöв олiс. ¹³ Пилат сэки шуис Сылы: «Тэ öмöй он кыв, кымынöн висьталöны Тэныд паныд?» ¹⁴ Исус весиг воча кыв эз шу. Юралысьöс тайö ёна шензьöдiс. ¹⁵ Быд во Ыджыд лунö йöз корöм серти юралысь лэдзлiс дзескыдiнысь öти мортöс. ¹⁶ Сэки дзескыдiнын пукалiс ставлы тöдса Варавва нима морт. ¹⁷ Чукöртчöм йöзлысь Пилат юалiс: «Кодöс кöсъянныд, мед ме лэдза, Варавваöс али Исусöс, кодöс шуöны Кристосöн?» ¹⁸ Пилат тöдiс, мый Исусöс вайöдiсны вежалöмныс понда. ¹⁹ Сэки Пилатлöн гöтырыс мöдöдас мыжданiнö висьтавны верöсыслы: «Тайö веськыда олысьыслы лёксö эн вöч. Тавой вöтын ме ёна шогси Сы понда». ²⁰ Аркирейяс пöрысьяскöд ыззьöдiсны йöзсö, мед корасны лэдзны Варавваöс, а Исусöс вины. ²¹ Пилат юалiс: «Кодöс на пиысь шуанныд лэдзны?» Воча шуисны: «Варавваöс». ²² Пилат юалiс: «Мый шуанныд вöчны Исускöд, кодöс Кристосöн шуöны?» Ставныс горöдiсны: «Тувъявны!» ²³ «Мый лёксö Сiйö вöчис?» – юалiс Пилат. Йöзыс гораджыка на горöдiсны: «Тувъявны Сiйöс!» ²⁴ Пилат аддзис: йöзыс оз лöньны, мöдарö, ёнджыка на шызьöны. Сэки налöн син водзын Пилат мыськис кисö да шуис: «Ме абу мыжа тайö веськыда олысь мортсö виöмысь. Видзöдöй асьныд». ²⁵ Став йöзыс воча горöдiсны: «Мед Сылöн вирыс миян вылö да миян челядьным вылö коляс». ²⁶ Сэки Пилат лэдзис Варавваöс, а Исусöс нöйтöм бöрын сетiс тувъявны. ²⁷ Шыпуртаяс нуöдiсны Исусöс юралысьлöн керкаö, сэтчö чукöртiсны и мукöд шыпуртаясöс. ²⁸ Сэсся пöрччöдiсны Исусöс да пасьтöдiсны Сiйöс гöрд кышанö, ²⁹ юрас пуктiсны лежнöгысь кыöм юркытш, веськыд киас сетiсны бедь. Сэсся пидзöс выланыс Сы водзö сувтöмöн шуалiсны сералiгтырйи: «Мед олас юдейяслöн Öксы!» ³⁰ Сьöлалiсны Сiйöс да кучкалiсны юрас беддьöн. ³¹ Сералöм-лёкöдöм бöраныс найö босьтiсны Исус вылысь гöрд кышансö да бöр пасьтöдiсны Сiйöс Аслас паськöмö, сэсся нуöдiсны тувъявны. ³² Карсьыс петiганыс налы вочаасис киринеяса Симон, сылы тшöктiсны нуны Исуслысь крестсö. ³³ Сэсся воисны Голгопа керöсö, нимыслöн вежöртасыс лоö "Юр лы". ³⁴ Сэнi Исуслы сетiсны юны сöп сора вина, но видлöм бöрас Сiйö эз кут юны. ³⁵ Исусöс тувъялöм бöрын шыпуртаяс пудъясьöмöн юкисны Сылысь паськöмсö. ³⁶ Сэсся пуксисны видзны Сiйöс. ³⁷ Юр весьтас öшöдiсны мыжалан пасйöд: «Тайö Исус, юдейяслöн Öксы». ³⁸ Сыкöд орччöн тувъялiсны кык лёк вöчысьöс: öтисö веськыдладорас, мöдсö шуйгаладорас. ³⁹ Сэтi мунысьяс лёкысь видзöдöмöн омöльтiсны Исусöс: ⁴⁰ «Крам жугöдысь да куим лунöн сiйöс лэптысь, мезды Асьтö! Тэ кö Ен Пи, лэччы крест вывсьыд!» ⁴¹ Сiйöс лёкöдiсны тшöтш аркирейяс, Индöдö велöдысьяс, пöрысьяс да фарисейяс: ⁴² «Мукöдöс мездiс, а Асьсö мездыны оз вермы! Сiйö кö Израиль Öксы, мед лэччас крест вывсьыс, сэки эскам Сылы! ⁴³ Сiйö Ен вылö лачаöн олiс. Мед Енмыс мездас öнi, дона кö Сылы. Шулiс öд, Ме пö Ен Пи». ⁴⁴ Тадзи тшöтш лёкöдiсны Исусöс орччöн тувъялöм лёк вöчысьяс. ⁴⁵ Лун шöр кадö пемдiс став му пасьталаыс, пемыдыс сулалiс куим часöдз. ⁴⁶ Куим час гöгöрын Исус ыджыд шыöн горöдiс: «Эли, Эли, лама сабактани? Енмöй, Енмöй, мыйла Тэ колин Менö?» ⁴⁷ Сэнi сулалысьясысь кодсюрö шуисны, Илляöс пö корö. ⁴⁸ На пиысь öти дзик пыр котöртiс, босьтiс губка да кöтöдiс шома винаöн, сэсся бедь помö сатшкöмöн мыччис сiйöс Исуслы. ⁴⁹ Мукöдыс шуисны: «Энлы! Видзöдлам, локтас оз Илля мездыны Сiйöс». ⁵⁰ Исус ыджыд шыöн горöдöм бöрын лэдзис ловсö. ⁵¹ Сэки крамын öшалысь дöраыс вывсяньыс улöдзыс кык пельö косяссис. Муыс вöрзис, из керöсъяс потiсны. ⁵² Шойгу кыртаяс воссялiсны, уна вежа войтырлöн шойыс ловзис, ⁵³ да найö петiсны дзебанiнъясысь. Исуслöн ловзьöм бöрын найö пырисны вежа карö, унаöн аддзылiсны найöс. ⁵⁴ Му вöрöмысь да став лоöмторсö аддзöмысь Исусöс видзысьяс веськöдлысьныскöд ёна повзисны да шуисны: «Тайö Мортыс збыльысь Ен Пи вöлöма». ⁵⁵ Сэнi вöлi уна ань, кодъяс ылiсянь видзöдiсны. Найö Галилеясянь ветлöдлiсны Исускöд да кесъялiсны Сылы. ⁵⁶ На пöвстын вöлiны Магдала Марья, Яковлöн да Иосейлöн Марья мамныс да Зеведей пиянлöн мамныс. ⁵⁷ Рытнас Аримафея карысь воис Öсип нима озыр морт, Исуслöн велöдчысь. ⁵⁸ Сiйö мунiс Пилат дiнö да корис Исуслысь шойсö. Пилат тшöктiс сетны. ⁵⁹ Öсип босьтiс шойсö, гартыштiс сöстöм шабдi дöраö ⁶⁰ да пуктiс кыртаö кералöм выль дзебанiнö. Пыранiнас путкыльтiс ыджыд из, сэсся мунiс. ⁶¹ Дзебанiнлы воча пукалiс Магдала Марья мöд Марьякöд. ⁶² Мöд луннас, шойччан лунö, аркирейяс фарисейяскöд локтiсны Пилат дiнö ⁶³ да шуисны: «Ыджыдöй, миянлы тöд выланым усис: ловъя дырйиыс на эсiйö пöръясьысьыс шулiс, куим лун мысти пö ловзя. ⁶⁴ Тшöкты видзны дзебанiнсö коймöд лунöдзыс. Велöдчысьясыс вермасны локны войнас да гусявны шойсö, сэсся шуны йöзыслы, Сiйö пö ловзьöма. Тайö бöръя пöръялöмыс лоас воддзасьыс на лёкджык». ⁶⁵ Пилат шуис: «Босьтöй видзысьясöс да видзöй, колöкö». ⁶⁶ Найö мунiсны, пасйисны пыранiнысь изсö печатьöн да тшöктiсны шыпуртаяслы видзны.

¹ Шойччан лун бöрын водз асывнас Магдала Марья да мöд Марья локтiсны видзöдлыны дзебанiнсö. ² Виччысьтöг муыс ёна вöрзис: Господьлöн андел лэччис енэжсяньыс. Сiйö вештiс изсö пыранiнсьыс да пуксис сы вылö. ³ Андел югъялiс чардби моз, паськöмыс вöлi лым кодь еджыд. ⁴ Видзысьяс кувмöныс повзисны, найöс дзöрöм босьтiс. ⁵ Андел шыасис аньяс дiнö: «Энö полöй. Ме тöда, тi корсянныд тувъявлöм Исусöс. ⁶ Сiйö танi абу. Сiйö ловзис Аслас шуöм серти. Локтöй, видзöдлöй Господьлысь куйланiнсö. ⁷ Мунöй öдйöджык да юöртöй велöдчысьясыслы, мый Исус ловзьöма да виччысьö найöс Галилеяын, сэтысь найö аддзасны Сiйöс. Татшöм юöр менам тiянлы». ⁸ Аньяс пырысьтöм-пыр петiсны дзебанiнысь да полiгтыр, но ёна нимкодясьöмöн, котöртiсны юöртны та йылысь Исуслöн велöдчысьяслы. ⁹ Туй выланыс аньяскöд паныдасис Исус да шуис: «Нимкодясьöй!» Найö уськöдчисны Сы водзö да кутчысисны кокас. ¹⁰ Исус шуис: «Энö полöй! Мунöй, висьталöй вокъяслы, мед мунасны Галилеяö, сэтысь аддзасны Менö». ¹¹ Аньяслöн мунöм бöрын дзебанiн видзысьясысь кодсюрö мунiсны карас да висьталiсны став лоöмтор йывсьыс аркирейяслы. ¹² Аркирейяс чукöртчисны пöрысьяскöд, сёрнитчöм бöраныс сетiсны шыпуртаяслы уна сьöм ¹³ да шуисны: «Висьталöй, мый войнас тiян узигкостi велöдчысьясыс волöмаöсь да гусялöмаöсь шойсö. ¹⁴ Кывсяс кö тайö юралысьöдз, ми сiйöс эскöдам да тiянöс доръям». ¹⁵ Шыпуртаяс босьтiсны сьöмсö да вöчисны аркирейяслöн тшöктöм серти. Тайö юöрыс паськалiс юдейяс пöвстын, весиг öнöдз на олö. ¹⁶ Исуслöн тшöктöм серти дас öти велöдчысьыс мунiсны Галилеяö да кайисны керöсö. ¹⁷ Исусöс аддзöм бöрын найö муöдзыс копыртчылiсны Сы водзö, кодсюрöлы сьöкыд вöлi эскынысö. ¹⁸ Велöдчысьяс дiнö матыстчöмöн Исус шуис: «Меным сетöма ыджыдавны енэжын да му вылын. ¹⁹ Мунöй быд кыла войтыр дiнö, вöчöй найöс Менам велöдчысьясöн да пыртöй найöс Бать, Пи да Вежа Лов нимöн. ²⁰ Велöдöй найöс овны став Менам тшöктöм серти. Тöдöй: Ме пыр тiянкöд нэмъяс помасьтöдз». Аминь.