Иоан
11 Медводз вöлi Кыв. Кывйыс вöлi Енкöд. Кывйыс вöлi Ен. 2 Кывйыс водзысяньыс вöлi Енкöд. 3 Ставсö Сы пыр вöчöма. Сытöг немтор абу вöчöма. 4 Сы пытшкын вöлi олöм. Олöмыс йöзыслы вöлi югыдöн. 5 Пемыдас югдöдö югыдыс, эз пöдты сiйöс пемыдыс. 6 Ен мöдöдiс Иоан нима мортöс. 7 Сiйö локтiс висьтавны Югыдыс йылысь, медым быдöн эскис Югыдыслы. 8 Ачыс сiйö эз вöв югыдыс, сiйö локтiс висьтавны Югыдыс йылысь. 9 Збыль Югыдыс, быд мортöс Югдöдысь, локтiс муюгыдас. 10 Сiйö вöлi муюгыдас, Сы пыр вöчöма муюгыдсö, но муюгыдыс эз тöд Сiйöс. 11 Сiйö локтiс Ас йöз дiнас, но найö эз сибöдны Сiйöс. 12 Сiйöс сибöдысьяслы, Сылы эскысьяслы, Сiйö сетiс позянлун лоны Енлöн ныв-пиöн. 13 Найö чужисны эз вирсянь, эз морт кöсйöмсянь да верöс кöсйöмсянь, найö чужисны Енсянь. 14 Кывйыс лоис мортöн, Сiйö олiс миянкöд буралöм-збыльнас тыр. Ми аддзылiм Сылысь дзирдлунсö. Сöмын öтка Пиыслы вуджö татшöм дзирдлуныс Батьсяньыс. 15 Иоан гораа юöртлiс Сы йылысь: «Тайö дзик сiйö Мортыс, код йылысь ме висьтавлi, мый ме бöрся Локтысьыс меысь ыджыдджык, öд Сiйö меысь водзджык вöлöма». 16 Миянлы быдöнлы Сы озырлунысь вичмис буралöм вылö буралöм. 17 Индöдсö вöлi сетöма Мöисей пыр, а буралöмыс да збыльыс воис Исус Кристос пыр. 18 Йöзыс Енсö эз аддзывлыны, сöмын öтка Пиыс, Бать дiнас олысьыс, восьтiс Сiйöс миянлы. 19 Юдейяслöн веськöдлысьяс мöдöдiсны Ерусалимысь попъясöс да левитъясöс юавны Иоанлысь: «Кодi тэ?» 20 Иоан соссьытöг веськыда шуис: «Ме абу Кристос». 21 Сэки сылысь юалiсны: «Кодi нö тэ? Илля?» Сiйö шуис: «Абу». Найö бара юалiсны: «Пророк-ö тэ?» Сiйö вочавидзис: «Абу». 22 Сэки сылы шуисны: «Кодi нö тэ? Мый миянлы вочавидзны миянöс мöдöдысьяслы? Мый шуан ас йывсьыд?» 23 Иоан вочавидзис налы: «Ме овтöминын горзысьлöн шыыс: "Веськöдöй-шыльöдöй туйсö Господьлы". Тадзи коркö висьталiс Исай пророк». 24 Фарисейяссянь мöдöдöмаяс 25 юалiсны Иоанлысь: «Тэ кö абу Кристос, абу Илля, абу пророк, мыйла, сiдзкö, йöзсö пыртан?» 26 Иоан вочавидзис налы: «Ме пырта сöмын ваöн, но тiян пöвстын эм морт, кодöс тi онö тöдöй. 27 Сiйö ме бöрын локтö, но Сiйö меысь водзджык нин вöлöма. Ме ог шогмы разьны Сылысь кöмкот кöвсö». 28 Тайö вöлi Вифаварын, Йöрдан ю сайын, кöнi Иоан пыртлiс йöзсö. 29 Аскинас Иоан аддзис сы дiнö локтысь Исусöс да шуис: «Видзöдлöй, тайö Енлöн Баля. Сiйö вештö йöзлысь мыжъяссö. 30 Сы йылысь ме висьтавлi нин, мый ме бöрся локтö Морт, кодi меысь ыджыдджык, öд Сiйö меысь водзджык вöлöма. 31 Сiйöс ме эг тöдлы, но локтi ваöн пыртны, медым Израиль тöдмалiс Сiйöс». 32 Иоан веськыда висьталiс: «Ме аддзылi, кыдзи енэжсянь гулю моз лэччис Лов да кольччис Сы вылö. 33 Ме эг тöдлы Сiйöс, но ваöн пыртны менö Мöдöдысь шуис меным: "Кор Тэ аддзан, мый код вылö кö лэччас Лов да кольччас Сы вылö, буретш Сiйö кутас пыртны Вежа Лолöн". 34 Ме аддзылi тайöс да эскöда тiянöс: Сiйö – Ен Пи». 35 Мöд луннас Иоан аслас кык велöдчыськöд бара сулалiс ю дорын. 36 Локтысь Исусöс аддзигöн сiйö шуис: «Видзöдлöй, тайö Енлöн Баля!» 37 Тайöс кылöм бöрын кыкнан велöдчысьыс мöдöдчисны Исус бöрся. 38 Исус бергöдчылiс, аддзис Сы бöрся локтысьясöс да юалiс налысь: «Мый тiянлы колö?» Найö вочавидзисны: «Велöдысь, кöнi Тэ олан?» 39 Исус шуис налы: «Локтöй да видзöдлöй». Найö мунiсны, аддзисны Сылысь оланiнсö да кольччисны сэтчö лунтыр кежлö. Вöлi нёль час гöгöр. 40 Иоанлöн велöдчысьяс да Исус бöрся мунысьяс пиысь öтиыс вöлi Öндрей, Симон-Петырлöн вокыс. 41 Сiйö медводз корсис Симон воксö да висьталiс сылы: «Ми аддзим Мессияöс!» Мöд ногöн кö, тайö лоö Кристос. 42 Öндрей вайöдiс воксö Исус дiнö. Исус видзöдлiс сы вылö да шуис: «Тэ Симон, Ионалöн пи. Тэнад нимыд лоас Кифа». Сылöн вежöртасыс – из, мöд ногöн кö – Петыр. 43 Аскинас Исус мöдöдчис Галилея муö. Сэтысь аддзис Филипöс да шуис сылы: «Лок Ме бöрся». 44 Öндрей да Петыр моз Филип вöлi Випсаида карысь. 45 Филип аддзис Нафанаилöс да шуис сылы: «Ми аддзим Сiйöс, код йылысь вöлi висьталöма Мöисей Индöдын да пророк гижöдъясын. Тайö Назаретысь Исус, Öсиплöн пи». 46 Нафанаил шуис Филиплы: «Вермас-ö мыйкö бурыс лоны Назаретысь?» Филип вочавидзис: «Лок да ачыд видзöдлы». 47 Исус аддзис Сы дiнö локтысь Нафанаилöс да шуис сы йылысь: «Тайö збыльысь израильса морт, сiйö оз ылöдчы». 48 Нафанаил юалiс Сылысь: «Кытысь Тэ тöдан менö?» Исус вочавидзис: «Филип кортöдз на Ме аддзылi тэнö инжир пу улысь». 49 Нафанаил шуис: «Велöдысьöй, Тэ Ен Пи, Тэ Израиль Öксы!» 50 Исус шуис сылы: «Ме шуи, мый аддзылi тэнö инжир пу улысь, да та вöсна тэ эскан. Но таысь ыджыдджыкöс на тэ аддзан». 51 Сэсся содтiс: «Веськыда, веськыда висьтала тiянлы: öнiсянь тi кутанныд аддзыны восьса енэжсö да Енлысь анделъяссö, кодъяс лэччöны Ен Пи дiнö да кыпöдчöны енэжас».
21 Кык лун мысти Галилеяса Кана карын вöлi кöлысь. Сэнi вöлi Исуслöн мамыс. 2 Исусöс да велöдчысьяссö тшöтш вöлi корöмаöсь кöлысь вылас. 3 Кор винаыс помасис, Исуслöн мамыс шуис Сылы: «Налöн винаыс бырöма». 4 Исус вочавидзис: «Аньöй, мый Меным таöдз, öд Менам кадыс эз на во». 5 Мамыс шуис кесйöгъяслы: «Ставсö вöчöй Сылöн шуöм серти». 6 Сэнi вöлi изйысь вöчöм квайт ва доз, быд дозйö ваыс вöлi тöрö сё литра гöгöр. Тайö дозъяснас юдейяс вöдитчисны сöстöммöдчöм могысь. 7 Исус шуис кесйöгъяслы: «Тыртöй дозъяссö ваöн». Найö тырысöдзыс кисьталiсны васö дозъясас. 8 Сэсся шуис налы: «Öнi гумовтöй васö да мыччöй сiйöс кöлысь нуöдысьлы». Найö мыччисны. 9 Кöлысь нуöдысь видлiс ваысь артмöм винасö, но сiйö эз тöд, кытысь тайö винаыс. Та йылысь тöдiсны сöмын ва дозъяссö тыртысьяс. Сэки кöлысь нуöдысь корис верöспусö 10 да шуис сылы: «Ставныс медводз бур винанас юктасьöны, сэсся йöз коддзöм бöрас лёкджыкнас. А тэ öнöдз бур винасö видзöмыд». 11 Тайö медводдза шензьöданаторсö Исус вöчис Галилеяса Кана карын. Тадзи петкöдлiс Сiйö Ассьыс дзирдлунсö, и велöдчысьясыс кутiсны эскыны Сылы. 12 Та бöрти Исус мамыскöд, вокъясыскöд да велöдчысьясыскöд мунiсны Капернаум карö. Сэтчö найö кольччисны лун-мöд кежлö. 13 Матыстчис юдейяслöн Ыджыд лун, и Исус локтiс Ерусалимö. 14 Сiйö аддзис: крамын вузалöны öшъясöс, ыжъясöс, гулюясöс да вежлалöны сьöм. 15 Исус кöвъясысь кыыштiс орс да кутiс вöтлавны сiйöн крамысь вузасьысьяссö, тшöтш налысь ыжъяссö да öшъяссö. Сiйö пöрлöдлiс сьöм вежысьяслысь пызанъяссö да кисьталiс налысь сьöмнысö. 16 Гулюöн вузасьысьяслы Сiйö шуис: «Босьтöй найöс татысь! Энö пöртöй Менам Батьлысь керкасö вузасянiнö!» 17 Сэки Исуслöн велöдчысьяслы тöд выланыс уси Гижöдас висьталöмыс: «Тэнад керка вöсна вежöгтöмыс топöдö Менсьым сьöлöмöс». 18 Юдейяслöн веськöдлысьяс шуисны Исуслы: «Кутшöм ногöн Тэ эскöдан миянöс, мый Тэныд позьö тадзи вöчнысö?» 19 Исус вочавидзис: «Жугöдöй тайö крамсö, и Ме куим лунöн выльысь лэпта сiйöс». 20 Найö воча шуисны Исуслы: «Тайö крамсö лэптiсны нелямын квайт во чöж, а Тэ куим лунöн кöсъян лэптыны сiйöс?» 21 Крам йылысь сёрнитiгöн збыльвылас Исус висьталiс Аслас вир-яй йылысь. 22 Исуслöн ловзьöм бöрын велöдчысьясыслы усины тöд выланыс Сылöн кывъясыс. Сэки найö эскисны Гижöдö да Исуслöн кывъясö. 23 Ерусалимын Ыджыд лун дырйи унаöн аддзылiсны Исуслысь шензьöданаторъяс вöчöмсö да эскисны Сылы. 24 Но Исус эз эскы налы, öд Сiйö тöдiс найöс ставнысö. 25 Сылы эз ковны йöз йылысь висьталысьяс, öд Сiйö тöдiс быд мортлысь сьöлöмсö.
31 Юдейяслöн веськöдлысьяс пöвстын вöлi Никодим нима фарисей. 2 Войнас сiйö локтiс Исус дiнö да шуис Сылы: «Велöдысьöй, ми тöдам: Тэ Енсянь локтöм Велöдысь. Öд Тэ моз некод оз вермы вöчны шензьöданаторъяссö, оз кö ло сыкöд Ен». 3 Исус вочавидзис: «Веськыда, веськыда висьтала тэныд: мортыс оз вермы аддзыны Енлысь Юраланiнсö, оз кö сiйö выльысь чуж». 4 Никодим юалiс Сылысь: «Вермас-ö мортыс выльысь чужны, пöрысь кö нин сiйö? Öд сiйö оз вермы мам кынöмас бöр пырны да мöдысь чужны». 5 Исус вочавидзис: «Веськыда, веськыда висьтала тэныд: мортыс кö оз чуж васянь да Ловсянь, сiйö оз вермы пырны Енлöн Юраланiнö. 6 Вир-яйсянь чужысь эм вир-яй, а Ловсянь чужысь эм лов. 7 Эн шензьы, Ме кö висьтала, мый тiянлы колö выльысь чужны. 8 Тöв пöльтö, кöнi кöсйö. Сылысь шысö кылан, сöмын он тöд, кысянь сiйö локтö да кытчö мунö. Ловсянь чужыськöд тшöтш тадзи овлö». 9 Никодим юалiс Сылысь: «Вермас öмöй тадзи лоны?» 10 Исус вочавидзис: «Ачыд тэ – Израиль войтырöс велöдысь, а тайöс весиг он тöд? 11 Веськыда, веськыда висьтала тэныд: ми сёрнитам сы йылысь, мый тöдам, да висьталам сы йылысь, мый аддзылiм, но тi миян висьталöмö онö эскöй. 12 Ме висьталi тiянлы мувывсаыс йылысь, но тi энö эскöй Меным. Эсканныд-ö, висьтала кö тiянлы енэжвывсаыс йылысь? 13 Енэжас олысь да енэжсянь лэччöм Морт Пиысь кындзи енэжас некод на эз кыпöдчыв. 14 Кыдзи овтöминын Мöисей вывлань кыпöдiс змейöс, тадзи лоö кыпöдöма тшöтш Морт Пиöс, 15 медым Сылы эскысь эз быр, а помтöг олiс. 16 Öд Енмыслы сэтшöм мусаöсь йöзыс, мый сетiс Ассьыс öтка писö, медым Сылы эскысь эз быр, а помтöг олiс. 17 Енмыс мöдöдiс Ассьыс Писö муюгыдас йöзöс мездыны, а эз мыждыны. 18 Сылы эскысьöс оз ло мыждöма, а эскытöмöс мыждöма нин, öд сiйö эз эскы Енлöн öтка Пилы. 19 Мыждöмыс сыын, мый му вылас локтiс югыдыс, но йöзыслы мусаджык вöлi пемыдыс, öд налöн уджъясыс лёкöсь. 20 Лёксö вöчысь мустöмтö югыдсö. Сiйö оз лок югыдас, медым сылöн лёк уджъясыс эз йöзасьны. 21 Збыль серти олысь локтö югыдас, медым тыдовтчисны сылöн Енсянь уджъясыс». 22 Та бöрти Исус локтiс велöдчысьясыскöд Юдея муö, сэнi олiс накöд да пыртiс йöзсö. 23 Иоан тшöтш пыртiс йöзсö Енонын, Салимсянь матын, öд ваыс сэнi уна вöлi. Йöзыс волiсны сэтчö пыртчыны. 24 Сэки Иоанöс абу на вöлi пуксьöдöмаöсь дзескыдiнö. 25 Öтчыд Иоанлöн велöдчысьясыс венö воисны юдейяскöд сöстöммöдчöм йылысь. 26 Велöдчысьясыс локтiсны Иоан дiнö да шуисны: «Велöдысь, сiйö Мортыс, кодi вöлi тэкöд Йöрдан ю мöдлапöлын да код йылысь тэ висьтавлiн, öнi Сiйö тшöтш пыртö. Сы дiнö ставныс мунöны». 27 Иоан вочавидзис: «Мортыс нинöм оз вермы босьтны аслыс, оз кö ло сетöма сылы енэжсянь. 28 Тi асьныд кывлiнныд менсьым висьталöмöс: "Ме абу Кристос, ме сöмын Сы водзвылын мöдöдöмаыс". 29 Верöспуöн шуöны сiйöс, кодлöн эм гöтырпу. Верöспулöн ёртыс орччöн сулалö да нимкодясьöмöн кывзö сылысь сёрнисö. Ме тшöтш тадзи нимкодяся, и менам нимкодьлунöй помтöм-дортöм. 30 Кристослы колö быдмыны, а меным ичöтмыны». 31 Вылiсянь Локтысьыс ставсьыс вылын. Мувывса мортсö вöчöма муысь, сiйö сёрнитö мувывсаыс йылысь. А енэжсянь Локтысьыс ставсьыс вылын. 32 Сiйö висьталö, мый аддзылiс да кывлiс, но Сылысь висьталöмсö йöзыс сьöлöманыс оз сибöдны. 33 Мортыс кö сибöдö Сылысь кывъяссö, тайöн петкöдлö, мый Енмыс висьталö збыльсö. 34 Кодöс Енмыс мöдöдiс, Сiйö Енлысь кывъяссö висьталö, öд Енмыс Сылы лышкыда Ловсö сетö. 35 Пиыс муса Батьыслы, и Батьыс ставсö сетiс Сы киö. 36 Кодi эскö Пиыслы, сылöн эм помтöм олöм. Кодi оз эскы Пиыслы, сылöн оз ло олöмыс, но Енлöн скöрлуныс лоас сы вылын.
41 Фарисейяс кывлöмаöсь, Исуслöн пö Иоан дорысь унджык нин велöдчысьыс, Сiйö пö унджык йöзöс пыртö. Дерт, Исус эз Ачыс пырт, а пыртiсны Сылöн велöдчысьясыс. Кор Исус тöдмалiс, мый фарисейяс кывлöмаöсь та йылысь, 3 Сiйö эновтiс Юдея му да бöр мунiс Галилеяö. 4 Сылы ковмис мунны Самария му пыр. 5 Исус воис Самария муö, Сикар нима карö. Тайö карсяньыс матын вöлi му, кодöс Яков сетлöма Öсип пиыслы. 6 Сэнi вöлi Яковлöн юкмöс. Дыр мунöмысла Исус мудзис да пуксис шойччыштны юкмöс дорас. Вöлi лун шöр гöгöр. 7 Самарияса ань локтiс сэтчö вала. Исус шыасис сы дiнö: «Юктöдышт Менö ванад». 8 Исуслöн велöдчысьясыс вöлi мунöмаöсь карö сёян ньöбны. 9 Ань шуис Исуслы: «Ачыд Тэ юдей, а коран менсьым, самарияса аньлысь, ва юны?» Юдейяс öд самарияса войтыркöд оз волысьны. 10 Исус вочавидзис аньлы: «Тэ кö тöдiн Енлысь сетöмторсö да Сiйöс, кодi шуö тэныд тайö кывъяссö: "Юктöдышт Менö ванад", тэ эськö ачыд корин Сылысь васö, и Сiйö сетiс тэныд ловъя ва». 11 Ань шуис Сылы: «Господьöй, юкмöсыс öд джуджыд, мыйöн нö Тэ сэтысь гумовтан? Кытысь Тэ ловъя васö босьтан? 12 Тэ öмöй Яков батьным дорысь ыджыдджык? Тайö юкмöссö сiйö сетöма миянлы. Татысь сiйö ачыс юлöма, тшöтш сылöн пияныс да пемöсъясыс». 13 Исус вочавидзис: «Тайö васö юысьлöн горшыс бара на косьмас. 14 Но Ме сета ва, и кодi кутас юны тайö васö, сылöн горшыс некор оз кут косьмыны. Ваыс, кодöс Ме сета сылы, лоö сы пытшкын помтöм олöмö визувтысь дзулькйöн». 15 Ань шуис Сылы: «Господьöй, вай меным тайö васö, медым менам горшöй эз нин косьмы. Сэки татчö ваысла волыны оз ковмы». 16 Исус шуис аньлы: «Ветлы, кор верöстö да лок татчö». 17 Ань вочавидзис: «Верöсöй менам абу». Исус шуис: «Тэ веськыда висьталiн, мый тэнад верöсыд абу. 18 Тэ витысь верöс сайын вöлiн, но сiйö мортыс, кодкöд тэ öнi олан, абу верöс тэныд. Тэ збыльсö висьталан». 19 Ань шуис Сылы: «Господьöй, ме аддза, мый Тэ – пророк. 20 Миян батьяс копрасисны-кевмысисны Енмыслы тайö керöсас. А тi, юдейяс, шуанныд, колö пö копрасьны Енмыслы сöмын Ерусалимын». 21 Исус шуис сылы: «Аньöй, эскы Меным, воас кад, кор тi онö кутöй копрасьны Батьлы тайö керöсас да Ерусалимын. 22 Тi, самарияса войтыр, копрасянныд Сылы, кодöс онö тöдöй. А ми копрасям Сылы, кодöс тöдам, öд мездмöмыс воö юдейяссянь. 23 Воас кад да воис нин, кор Батьлы збыльысь копрасьысьяс кутасны кевмысьны Сылы Ловсянь да збыльыс серти. Татшöм кевмысьысьясöс корсьö Аслыс Бать. 24 Енмыс эм Лов. Сiдзкö, Енлы кевмысьысьяслы колö кевмысьны Ловсянь да збыльыс серти». 25 Ань шуис Исуслы: «Тöда, мый локтас Мессия-Кристос. Сiйö локтас да, ставсö висьталас миянлы». 26 Исус шуис аньлы: «Тайö Ме, тэкöд Сёрнитысьыс». 27 Сiйö кадас воисны велöдчысьясыс. Найö шензисны, мый Исус сёрнитö анькöд. Сöмын некод на пиысь эз юав, мыйла да мый йылысь Сiйö сёрнитö анькöд. 28 Сэки ань колис ва дозсö, мунiс карас да шуис йöзыслы: 29 «Локтöй, видзöдлöй тайö Мортыс вылö. Сiйö висьталiс меным ставсö, мый ме вöчлi. Абу-ö Сiйö Кристос?» 30 Йöзыс петiсны карсьыс да локтiсны Исус дiнö. 31 Сэккостi велöдчысьясыс корисны Исусöс: «Велöдысь, лок сёйны!» 32 Исус шуис налы: «Менам эм сёян, код йылысь тi онö тöдöй». 33 Велöдчысьясыс ас костаныс шензисны: «Эз-ö кодкö вай Сылы сёянсö?» 34 Исус шуис налы: «Менам сёянöй – ставсö вöчны Менö Мöдöдысьлöн кöсйöм серти да эштöдны Сылысь уджсö. 35 Тi шуанныд, нёль тöлысь мысти пö воас вундан кад. Висьтала тiянлы: видзöдлöй кöдзöм муяс вылö. Найö кельдöдöмаöсь нин вундiгкежлö. 36 Вундысь босьтö удждонсö öнi нин, сiйö чукöртö няньсö помтöм олöмö. Та вöсна кöдзысь да вундысь öтвыв нимкодясьöны. 37 Кывйöз веськыда висьталö: "Öти кöдзö, а мöд вундö". 38 Ме мöдöдi тiянöс вундыны му вылö, кытчö тi энö кöдзлöй. Сэнi мырсисны мукöдыс, но тi накöд тшöтш идраланныд быдтöмторсö». 39 Ань шуис сiйö карас олысьяслы: «Исус висьталiс меным ставсö, мый ме вöчлi». Та вöсна самарияса йöз унаöн пондiсны эскыны Исуслы. 40 Найö локтiсны Исус дiнö да корисны олыштны Сiйöс на ордын. Сiйö кольччылiс сэтчö кык лун кежлö. 41 Ачыс Исус сёрнитiс накöд, та вöсна нöшта на унджыкöн эскисны Сылы. 42 Найö шуисны аньлы: «Öнi ми эскам огö сöмын тэнад висьталöм вöсна. Ми эскам сы понда, мый асьным кывлiм Сiйöс да тöдам: Сiйö збыльысь муюгыдсö Мездысь, Кристос». 43 Кык лун мысти Исус мунiс сэтысь Галилея муö. 44 Исус шулiс, пророкöс пö ас муас оз пыдди пуктыны. 45 Кор Исус локтiс Галилеяö, сэтчöс йöзыс сибöдiсны Сiйöс. Öд найö тшöтш ветлiсны Ерусалимö Ыджыд лун кежлö да аддзылiсны, мый Исус вöчлiс сэнi. 46 Исус бара локтiс Галилеяса Кана карö, кöнi Сiйö васö пöртлiс винаö. Галилеяса Капернаум карын олiс öксылöн отсасьысь, кодлöн пиыс вöлi висьö. 47 Отсасьысь кывлiс, мый Исус локтöма Юдея муысь Галилеяö. Сiйö локтiс Исус дiнö да корис Сiйöс бурдöдны писö, кодi вöлi кулан выйын. 48 Исус шуис сылы: «Тi онö эскöй, онö кö аддзылöй индысьпасъяс да шензьöданаторъяс!» 49 Öксылöн отсасьысь шуис Исуслы: «Господьöй, волы кытчöдз пиöй ловъя на!» 50 Исус шуис сылы: «Мун, тэнад пиыд бурдiс». Öксылöн отсасьысь эскис Исуслöн кывъясö да мунiс гортас. 51 Туяс сылы паныдасисны кесйöгъясыс. Найö шуисны: «Тэнад пиыд бурдiс!» 52 Сiйö юалiс налысь, корджык пиыслы кокньöдiс. Найö вочавидзисны: «Тöрыт, час лунö, биа висьöмыс эновтiс сiйöс». 53 Сэки батьыс гöгöрвоис, мый буретш сiйö кадас воис бурдöмыс, кор Исус шуис сылы: «Тэнад пиыд бурдiс». Сэки батьыс да став сылöн гортсаыс эскисны Исуслы. 54 Тайö вöлi мöд шензьöданатор, кодöс вöчис Исус Юдея муысь Галилеяö воöм бöрын.
51 Исус мöдöдчис Ерусалимö, сэки вöлi юдейяслöн гажöдчан кад. 2 Ерусалимын, Ыж дзиръя дорын, вöлi ва йöртöд. Юдейяс ва йöртöдлы сетлöмаöсь Вифезда ним. Ва йöртöд дiнас вöлi вит пыранiн, найö вöлiны вевт улынöсь. 3 Пыранiнъясас куйлiсны уна висьысь: синтöмъяс, коктöмъяс, косьмöм ки-кокаяс. Найö виччысисны ва гызьöм. 4 Господьлöн анделыс корсюрö лэччывлiс йöртöдö гызьöдны васö. Гызьöм ваö медводдза пырысьыс быдпöлöс висьöмысь бурдлiс. 5 Сэнi пыранiнас куйлiс комын кöкъямыс во чöж висьысь морт. 6 Исус тöдiс, мый тайö мортыс дыр нин висьö. Исус аддзис сiйöс да юалiс: «Кöсъян-ö тэ бурдны?» 7 Висьысь вочавидзис: «Господьöй, гызьöм ваас пырнысö отсалысьыс меным абу. Менам пыртöдз кодкö мöд нин удитö пырны». 8 Исус шуис сылы: «Чеччы, босьт вольпасьтö да ветлы». 9 Сiйö дзик пыр бурдiс, босьтiс вольпасьсö да пондiс ветлöдлыны. Тайö вöлi шойччан лунö. 10 Та вöсна юдейяслöн веськöдлысьяс шуисны бурдöм мортлы: «Талун шойччан лун, тэныд оз позь вольпасьтö нуны». 11 Сiйö вочавидзис: «Бурдöдысьöй шуис меным: "Босьт вольпасьтö да ветлы"». 12 Сылысь юалiсны: «Кодi тэныд тшöктiс босьтны вольпасьтö да ветлыны?» 13 Но бурдöм мортыс эз тöд, кодi Сiйö, öд Исус саялiс йöз пöвстас. 14 Та бöрти Исус аддзис бурдöм мортöс крамысь да шуис сылы: «Öнi тэ бурдiн. Водзö эн вöч мыжсö, медым тэныд лёкджык эз ло». 15 Мортыс мунiс да висьталiс юдейяслöн веськöдлысьяслы, мый сiйöс бурдöдiс Исус. 16 Шойччан лунö татшöмторсö вöчöмысь юдейяслöн веськöдлысьяс пондiсны дзескöдны Исусöс да кöсйисны вины Сiйöс. 17 Исус шуис налы: «Менам Батьöй дугдывтöг уджалö, и Ме уджала». 18 Сэки юдейяслöн веськöдлысьяс ёнджыка на кöсйисны вины Исусöс, öд Сiйö торкис шойччан лунсö да шуис Енсö Аслас Батьöн. Тадзи öткодялiс Асьсö Енкöд. 19 Исус шуис налы: «Веськыда, веськыда висьтала тiянлы: Пиыс нинöм оз вермы вöчны Ассяньыс, оз кö аддзыв Батьыслысь вöчöмсö. Öд мый Батьыс вöчö, сiйöс тшöтш Пиыс вöчö. 20 Пиыс муса Батьыслы. Ставсö, мый вöчö Батьыс, Пиыслы петкöдлö. Батьыс нöшта на ыджыдджык уджъяс Пиыслы петкöдлас, тi весиг чуйманныд. 21 Батьыс ловзьöдö кулöмаясöс да сетö налы олöм. Пиыс тшöтш сетö олöм, кодлы кöсйö. 22 Батьыс некодöс оз мыжды. Мыждан вынсö Сiйö сетiс Пиыслы, 23 медым став йöзыс бурö пуктiсны Писö Батьсö моз. Кодi оз бурö пукты Писö, сiйö оз бурö пукты и Батьсö, кодi мöдöдiс Писö. 24 Веськыда, веськыда висьтала тiянлы: кодi кывзö Менсьым кывъясöс да эскö Менö Мöдöдысьлы, сылöн эм помтöм олöм. Сiйöс оз кутны мыждыны, но кулöмсьыс сiйö вуджис нин олöмас. 25 Веськыда, веськыда висьтала тiянлы: воас кад да воис нин, кор кулöмаяс кыласны Ен Пилысь гöлöс шысö. Сэки Сiйöс кылысьяс ловзясны. 26 Батьыс сетö олöм быдöнлы, Пиыслы Сiйö тшöтш сетiс вын – сетны олöм быдöнлы. 27 Батьыс сетiс Пиыслы вын мыждыны, öд сiйö Морт Пи. 28 Энö шензьöй, мый воас кад, кор гуын куйлысьяс кыласны Морт Пилысь гöлöс шысö 29 да найö ловзясны. Бур вöчысьяс кутасны овны, а лёк вöчысьясöс лоö мыждöма. 30 Ме нинöм ог вöч Ассянь. Ме мыжда сы серти, мый кыла Батьсянь, та вöсна Менам мыждöмöй веськыд. Öд Ме вöча ог Ас кöсйöм серти, а Менö мöдöдысь Батьлöн кöсйöм серти». 31 «Ме кö Ачым Ас йылысь висьтала, сэки Менам висьталöмöй абу эскана. 32 Но Ме йылысь мöд висьталö. Ме тöда, мый сылöн висьталöмыс веськыд. 33 Тi мöдöдлiнныд йöзöс Иоан дiнö, медым тöдмавны Ме йылысь. Сiйö збыльсö висьталiс. 34 Дерт, меным оз ков йöзлöн висьталöмыс. Ме шуа тайöс сы могысь, медым тi мездминныд. 35 Иоан вöлi яръюгыда öзъялысь би, сöмын этша кад тi кöсйинныд нимкодясьны сылöн югöр улын. 36 Но Ме йылысь висьталö мöдтор, Иоан висьталöмысь на мöрччанаджык. Батьлöн тшöктöм серти вöчöм уджъясöй петкöдлöны, мый Менö Батьöй мöдöдiс. 37 Менö мöдöдысь Батьöй Ачыс висьталö Ме йылысь. Тi Сылысь гöлöс шысö некор энö кывлöй, Сылысь чужöмсö энö аддзылöй, 38 Сылысь кывъяссö сьöлöманыд онö видзöй, öд тi онö эскöй Сысянь Мöдöдöмалы. 39 Тi тöдмаланныд-туяланныд Гижöдъяссö, медым тiянлы вичмис помтöм олöм, а Гижöдъясыс висьталöны Ме йылысь. 40 Но тi онö кöсйöй локны Ме дiнö, медым тiянлы вичмис олöм. 41 Йöзлöн ошкöмыс Меным оз ков. 42 Ме тöда тiянöс: Енмыс тiянлы абу муса. 43 Ме локтi тiян дiнö Бать нимсянь, но тi онö сибöдöй Менö. Локтас кö кодкö ас нимсяньыс, сiйöс тi сибöданныд. 44 Тi сибöданныд ошкöмсö öта-мöдсяньныд, но öти Енсянь петысь ошкöмсö онö корсьöй. Сiдзкö, кыдзи тi верманныд эскыны! 45 Энö мöвпалöй, мый Бать водзын кута мыждыны тiянöс. Тiянöс мыждысьыс – Мöисей, код вылö тi лача кутанныд. 46 Тi кö эсканныд Мöисейлы, эскинныд эськö тшöтш Меным, öд сiйö гижис Ме йылысь. 47 Но сылöн гижöдъясö кö онö эскöй, верманныд-ö эскыны Менам кывъясö?»
61 Сэсся Исус вуджис Галилея ты, мöд ногöн кö, Тиверия ты, мöдлапöлö. 2 Сы бöрся мунiс уна йöз, öд найö аддзылiсны, кыдзи Исус вöчис шензьöданаторъяс висьысьясöс бурдöдiгöн. 3 Исус кайис керöсö да пуксис сэтчö велöдчысьясыскöд. 4 Матыстчис Ыджыд лун, юдейяслöн гажöдчан кад. 5 Исус видзöдлiс да аддзис, мый Сы дiнö локтö уна йöз. Сiйö шуис Филиплы: «Кытысь миянлы ньöбны найöс вердмöн няньсö?» 6 Исус шуис тайöс, медым тöдмавны Филиплысь эскöмсö. Но Ачыс Сiйö тöдiс нин, мый вöчны. 7 Филип вочавидзис: «Кыксё динар вылö ньöбöм няньыс этша лоö, весиг ичöтиктор оз вичмы быдöнлы». 8 Öндрей нима велöдчысь, Симон-Петырлöн вокыс, шуис Исуслы: 9 «Танi öти зонкалöн эм вит ид нянь да кык чери. Тайö öмöй тырмас та мындаыслы?» 10 Исус шуис: «Тшöктöй йöзыслы пуксявны». Сiйö местаыс вöлi туруна. Йöзыс пуксялiсны, вöлi вит сюрс гöгöр морт. 11 Исус босьтiс няньсö, аттьöалiс Енмöс да сетiс велöдчысьясыслы. Велöдчысьяс разöдiсны няньсö пукалысьяслы. Черисö тшöтш разöдiсны быдöнлы, кодi мыйта кöсйис. 12 Кор йöзыс пöтiсны, Исус шуис велöдчысьясыслы: «Чукöртöй коляссö, нинöм энö воштöй». 13 Велöдчысьяс чукöртiсны вит ид няньысь коляссö да тыртiсны дас кык куд. 14 Сэки найö, кодъяс аддзылiсны Исуслысь шензьöданатор вöчöмсö, шуисны: «Тайö збыльысь сiйö Пророкыс, кодлы колö вöлi локны муюгыдас». 15 Исус тöдiс, мый йöзыс мырдöн кöсйöны пуктыны Сiйöс öксыö, та вöсна öтнас бöр кайис керöсö. 16 Рытнас велöдчысьясыс лэччисны ты дорö, 17 пуксисны пыжö да мöдöдчисны ты мöдлапöлö, Капернаум карö. Пемдiс нин, но Исус пыр на эз лок на дiнö. 18 Пöльтiс ыджыд тöв, тыыс ёна гызис. 19 Нёль-ö-вит верст сынöм бöрын велöдчысьясыс аддзисны Исусöс: Сiйö ва вывтi матыстчис налöн пыж дiнö. Найö ёна повзисны. 20 Исус шуис: «Энö полöй, тайö Ме». 21 Найö кöсйисны босьтны Исусöс пыжас, но пыжыс пырысь-пыр матыстчис мöдлапöлас, кытчö найö кывтiсны. 22 Мöд луннас, ты дорын сулалiгöн йöзыслы тöд выланыс уси, мый тöрыт танi вöлi сöмын öти пыж, и тайö пыжнас велöдчысьясыс вуджисны öтнаныс, Исус эз вöв накöд. 23 Тиверия карсянь локтiсны пыжаяс да сувтiсны сэтчö, кöнi Енмöс аттьöалöмöн Господь водзынджык вердiс йöзсö. 24 Кор йöзыс аддзисны, мый Исус да велöдчысьясыс абуöсь сэнi, найö пуксисны пыжъясö да вуджисны Капернаумö корсьны Исусöс. 25 Найö аддзисны Исусöс ты мöдлапöвсьыс да юалiсны Сылысь: «Велöдысь, Тэ нö кор татчö вуджин?» 26 Исус вочавидзис: «Веськыда, веськыда висьтала тiянлы: тi корсянныд Менö онö шензьöданаторъяс аддзылöм вöсна, а сы понда, мый пöттöдзныд няньсö сёйинныд. 27 Энö тöждысьöй бырана сёян вöсна, а тöждысьöй помтöм олöмсö сетысь сёян вöсна. Тайö сёянсö сетас тiянлы Морт Пи, кодöс пасйöма Ачыс Ен Бать». 28 Йöзыс юалiсны Исуслысь: «Мый миянлы вöчны, медым уджъясным вöлiны шогманаöсь Енмыслы?» 29 Исус вочавидзис: «Эскöй Енсянь Мöдöдöмалы. Тайö шогмана Енмыслы». 30 Найö шуисны Исуслы: «Кутшöм шензьöданатор Тэ вöчан, медым сiйöс аддзылöм бöрын ми эским Тэныд? Мый Тэ вöчан? 31 Миян батьяс овтöминын сёйисны манна. Та йылысь висьталö Гижöдыс: "Енэжсянь Сiйö сетiс налы сёйны нянь"». 32 Исус шуис налы: «Веськыда, веськыда висьтала тiянлы: эз Мöисей сет тiянлы няньсö енэжсянь, но Менам Батьöй сетö тiянлы збыль няньсö енэжсянь. 33 Енлöн няньыс лэччö енэжсянь да сетö йöзыслы олöм». 34 Найö шуисны Исуслы: «Господьöй, татшöм няньсö пыр сет миянлы». 35 Исус шуис: «Ме олöмыслöн нянь. Ме дiнö локтысь некор оз кут тшыгъявны, Меным эскысьлöн горшыс некор оз кут косьмыны. 36 Тiянлы Ме висьтавлi нин: тi аддзылiнныд Менö, сöмын онö эскöй. 37 Быдöн, кодöс сетö Меным Бать, локтас Ме дiнö. Ме дiнö локтысьöс ог вöтлы. 38 Ме öд лэччи енэжсянь эг Ас кöсйöм серти вöчны, но лэччи, медым вöчны Менö мöдöдысь Батьлöн кöсйöм серти. 39 Менö мöдöдысь Батьöй кöсйö, медым Меным сетöмаясысь весиг öтикöс эг вошты да ставнысö найöс ловзьöдi медбöръя лунö. 40 Менö Мöдöдысьöй кöсйö, медым быдöнлы, кодi аддзö Писö да эскö Сылы, вичмис помтöм олöм. Медбöръя лунö Ме ловзьöда найöс». 41 Юдейяс дöзмисны, мый Исус шуис: «Ме енэжсянь лэччöм нянь». 42 Найö сёрнитiсны: «Абу-ö тайö Исус, Öсиплöн пи? Ми öд тöдам Сылысь бать-мамсö. Мыйла нö Сiйö шуö, Ме пö лэччи енэжсянь?» 43 Исус шуис налы: «Энö шуасьöй ас костаныд. 44 Некод оз вермы локны Ме дiнö, оз кö вайöд сiйöс Менö мöдöдысь Батьöй. Ме дiнö локтысьöс Ме ловзьöда медбöръя лунö. 45 Пророкъяслöн гижöма: "Енмыс быдöнöс велöдас". Быдöн, кодi кывзö Батьöс да Сысянь велöдчö, локтö Ме дiнö. 46 Йöзыс эз аддзывлыны Батьöс, сöмын Енсянь Локтысь аддзылiс Батьöс. 47 Веськыда, веськыда висьтала тiянлы: Меным эскысьлöн эм помтöм олöм. 48 Ме олöмыслöн нянь. 49 Тiян батьясныд овтöминын сёйлiсны манна, но найö кулiсны. 50 А енэжсянь лэччöм няньсö сёйысь оз кув. 51 Ме енэжсянь лэччöм ловъя нянь, тайö няньсö сёйысь помтöг олö. Няньыс, кодöс Ме сета, – тайö Менам Яй. Ме сета сiйöс йöзыслöн олöм вöсна». 52 Сэки юдейяс пондiсны вензьыны ас костаныс: «Кыдзи Сiйö вермас сетны Ассьыс Яйсö сёйны миянлы?» 53 Исус шуис налы: «Веськыда, веськыда висьтала тiянлы: онö кö сёйöй Морт Пилысь Яйсö да юöй Сылысь Вирсö, тiян пытшкын олöмыс оз ло. 54 Менсьым Яйöс сёйысь да Менсьым Вирöс юысь помтöг олö, и сiйöс Ме ловзьöда медбöръя лунö. 55 Менам Яйöй öд збыльысь сёян, Менам Вирöй öд збыльысь юан. 56 Менсьым Яйöс сёйысь да Менсьым Вирöс юысь олö Ме пытшкын, а Ме – сы пытшкын. 57 Менö мöдöдiс ловъя Бать, Меным олöмыс вичмис Батьсянь. Тадзи Месянь олöмыс вичмас Менö сёйысьлы. 58 Тайö енэжсянь лэччöм нянь, тайö мöдсикас сёян. Тiян батьясныд сёйисны манна да кулiсны, а тайö няньсö сёйысь помтöг олö». 59 Исус висьталiс тайöс Капернаумын, синагогаын велöдiгöн. 60 Исуслысь висьталöмсö кывзiгöн велöдчысьяс пöвстысь унаöн шуасисны: «Кутшöм гöгöрвотöмторъяс Сiйö висьталö! Кодi вермас кывзыны тайöс?» 61 Исус тöдiс, мый велöдчысьясыс шуасьöны, да шуис налы: «Тiянöс öмöй дöзмöдö Менам висьталöмöй? 62 Мый эськö шуанныд, аддзанныд кö Морт Пилысь кыпöдчöмсö сэтчö, кöнi Сiйö вöлi водзынджык? 63 Сöмын Лов вермö ловзьöдны, а вир-яй тайöс вöчны оз вермы. Менам кывъясöй сетöны тiянлы Лов да олöм. 64 Но кодсюрö тiян пиысь оз эскыны». Исус водзвыв тöдiс, кодi оз эскы Сылы да кодi вузалас Сiйöс. 65 Исус водзö сёрнитiс: «Та понда Ме висьтавлi тiянлы, мый некод оз вермы Ме дiнö локнысö, оз кö ло тайö Батьсянь». 66 Та бöрти уна велöдчысь эновтiсны Сiйöс, эз нин ветлöдлыны Сыкöд. 67 Сэки Исус юалiс дас кык велöдчысьыслысь: «Гашкö, тi тшöтш кöсъянныд эновтны Менö?» 68 Симон-Петыр вочавидзис: «Господьöй, код дiнö миянлы муннысö? Öд Тэнад кывъясыд сетöны помтöм олöмсö. 69 Ми эскам да тöдам: Тэ – Кристос, ловъя Енлöн Пи». 70 Исус шуис налы: «Эг öмöй Ме бöрйы тiянöс дас кыкнаннытö? Но тiян пиысь öтиыс – сöтана». 71 Тайöс шуигöн Исус кутiс тöд вылас Иудаöс, Симон-Искариот пиöс. Сiйö вöлi дас кыксьыс öтиыс, кодi сэсся вузалас Исусöс.
71 Та бöрти Исус ветлöдлiс Галилеятi. Юдея муöд Сiйö эз кöсйы ветлöдлыны, öд юдейяслöн веськöдлысьяс кöсйисны вины Сiйöс. 2 Матыстчис юдейяслöн гажöдчан кад, чомъяс вöчан лунъяс. 3 Исуслöн вокъясыс шуисны Сылы: «Эн кольччы татчö, мун Юдея муö, медым велöдчысьясыд тшöтш аддзисны Тэнсьыд уджъястö. 4 Öд мортыс кö кöсйö, медым тöдiсны сы йылысь, сiйö оз кут дзебны ассьыс уджъяссö. Тэ сы ыджда уджъяс вöчан, сiдзкö, петкöдчы йöзыслы». 5 Исуслöн вокъясыс эз эскыны Сылы. 6 Исус шуис налы: «Менам кадöй эз на во, а тiянлы быд кад лöсялö. 7 Тiянöс йöзыс оз мустöмтны, а Менö мустöмтöны, öд Ме висьтала, мый налöн уджъясыс лёкöсь. 8 Тi мунöй гажöдчанiнас, а Ме ог на мун, öд Менам кадöй эз на во». 9 Тайöс шуöм бöрын Исус кольччис Галилеяö, 10 но кор вокъясыс мунiсны гажöдчанiнö, Исус тшöтш мунiс сэтчö гусьöн. 11 Юдейяслöн веськöдлысьяс корсисны Исусöс гажöдчанiнысь да юасисны: «Кöнi Сiйö?» 12 Йöз пöвстын унаöн вензисны Сы йылысь. Öтияс сёрнитiсны, Сiйö пö бур, мöдъяс шуисны, Сiйö пö ылöдлö йöзсö. 13 Но йöзыс сёрнитiсны Исус йылысь гусьöн, öд найö полiсны юдейяслöн веськöдлысьясысь. 14 Гажöдчан кад шöрас Исус пырис крамö да кутiс велöдны. 15 Юдейяслöн веськöдлысьяс шензисны: «Кытысь Сiйö велöдчытöгыс тöдö Гижöдъяссö?» 16 Исус вочавидзис: «Менам велöдöмöй абу Месянь, но Менö Мöдöдысьсянь. 17 Кодi кöсйö вöчны Ен кöсйöм серти, сiйö тöдмалас, Енсянь-ö тайö велöдöмыс, либö Ассянь Ме висьтала. 18 Кодi ассяньыс висьталö, сiйö аслыс ошкöмсö корсьö. Кодi тöждысьö, медым ошкöмыс вичмис Сiйöс Мöдöдысьлы, Сiйö збыльсö висьталö да оз ылöдчы. 19 Эз-ö Мöисей сет тiянлы Индöдсö? Но некод тiян пиысь оз ов Индöд сертиыс. Сiдзкö, мыйла кöсъянныд Менö винысö?» 20 Йöзыс шуисны: «Пеж лов Тэ пытшкын! Кодi кöсйö Тэнö винысö?» 21 Исус вочавидзис: «Ме вöчи öтитор, да тi ставныд шензянныд. 22 Мöисей тшöктiс тiянлы вундыштчыны. Дерт, тайö тшöктöмыс абу Мöисейсянь, а батьяссяньныд. Тi весиг шойччан лунö вундыштанныд мортсö. 23 Тi кö вундыштанныд мортсö шойччан лунö, медым энö торкöй Мöисейлысь Индöдсö, сiдзкö, мыйла Ме вылö скöраланныд, Ме кö дзоньнас мортсö бурдöдi шойччан лунö? 24 Энö мыждöй чужöм вылö видзöдöмöн, а мыждöй веськыда». 25 Кодсюрö ерусалимсаяс пöвстысь сёрнитiсны: «Абу-ö тайö сiйö Мортыс, кодöс вины кöсйöны? 26 Сiйö сёрнитö восьсöн, и некод весиг оз öлöд Сiйöс. Гашкö, веськöдлысьяс збыльысь Сiйöс Кристос туйö пуктöны? 27 Ми тöдам, кытысь тайö Мортыс. А кор локтас Кристос, некод оз кут тöдны, кытысь Сiйö». 28 Крамын велöдiгöн Исус гораа шуис: «Тi тöданныд Менö, и тöданныд, кытысь Ме. Ме локтi эг Ассянь. Менö мöдöдiс Сiйö, кодi эм Збыльыс, сöмын Сiйöс тi онö тöдöй. 29 А Ме тöда Сiйöс, öд Сы дорысь локтi, Сiйö мöдöдiс Менö». 30 Сэки кöсйисны кутны Исусöс, но некод эз лысьт инмöдчыны Сы дiнö, öд Сылöн кадыс эз на во. 31 Йöзыс унаöн эскисны Исуслы. Найö сёрнитiсны: «Кор локтас Кристос, Сiйö öмöй тайö Мортыс дорысь унджык шензьöданаторсö вöчас?» 32 Кор фарисейяс кылiсны Исус йылысь татшöм сёрнисö, аркирейяскöд öтвыв найö мöдöдiсны крам видзысьясöс кутны Исусöс. 33 Исус шуис налы: «Ме ог нин дыр ло тiянкöд, регыд муна Менö Мöдöдысь дiнö. 34 Тi кутанныд корсьны Менö, но онö аддзöй. Кöнi Ме лоа, сэтчö тi онö вермöй локнысö». 35 Юдейяслöн веськöдлысьяс ас костаныс сёрнитiсны: «Кытчö Сiйö кöсйö мунны, мый огö вермöй аддзыны Сiйöс? Оз-ö кöсйы мунны миян йöз дiнö, кодъяс олöны грекъяс пöвстын? Оз-ö кöсйы грек войтырöс велöдны? 36 Кыдзи гöгöрвоны Сылысь кывъяссö: "Тi кутанныд корсьны Менö, но онö аддзöй. Кöнi Ме лоа, сэтчö тi онö вермöй локнысö"?» 37 Бöръя медыджыд гажöдчан лунö Исус сувтiс да гораа шуис: «Кодлöн горшыс косьмö, мед локтö Ме дiнö да юö! 38 Кодi эскö Меным, сылöн пытшкöсысь визувтасны ловъя валöн юяс. Тадзи висьталö Гижöдыс». 39 Исус висьталiс тайöс Лов йылысь, кодöс сибöдасны Сылы эскысьяс. Öд Вежа Ловсö эз на вöв сетöма налы, Исуслöн дзирдлуныс эз на воссьы да. 40 Тайö кывъяссö кылöм бöрын йöз пöвстысь унаöн шуалiсны: «Сiйö збыльысь пророк». 41 Öтияс шуисны: «Тайö Кристос». Мöдъяс сёрнитiсны: «Локтас öмöй Кристос Галилеяысь? 42 Оз öмöй висьтав Гижöдыс, мый Кристос петас Давид вужйысь, Виплием карысь, Давид чужанiнысь?» 43 Тадзи йöзыс кутiсны вензьыны Сы йылысь. 44 Кодсюрö кöсйисны кутны Исусöс, но некод эз лысьт инмöдчыны Сы дiнö. 45 Исусöс кутны мöдöдлöмаяс бöр локтiсны аркирейяс да фарисейяс дiнö. Найö юалiсны: «Мыйла тi энö вайöдöй Сiйöс?» 46 Мöдöдлöмаяс вочавидзисны: «Тайö Мортыс моз öнöдз на некод эз сёрнитлы». 47 Фарисейяс шуисны налы: «Гашкö, тiянöс тшöтш ылöдлiс да? 48 Эскö-ö Сылы кодкö веськöдлысьяс да фарисейяс пöвстысь? 49 Но йöзыс оз тöдны Индöдсö, найöс ставнысö ёрöма». 50 Никодим нима фарисей, кодi войнас волiс Исус дiнö, шуис аркирейяслы да фарисейяслы: 51 «Миян Индöд серти позьö öмöй мыждыны мортсö, оз кö медводз кывзыны сiйöс да тöдмавны, мый сiйö вöчис?» 52 Сылы вочавидзисны: «Гашкö, тэ тшöтш Галилеяысь? Лыддьы Гижöдсö да тэ аддзан, мый Галилеяысь пророкыд оз лок». 53 Сэки ставныс муналiсны гортаныс.
81 Исус кайис Олив керöсö. 2 Асывводзнас Сiйö бара локтiс крамö. Сы гöгöр чукöртчис уна йöз. Исус пуксис да кутiс велöдны найöс. 3 Индöдö велöдысьяс да фарисейяс вайöдiсны Исус дiнö аньöс, кодöс вöлi кутöмаöсь гозъя олöм пежалöмысь. Йöз водзö сiйöс сувтöдöмöн 4 найö шуисны Исуслы: «Велöдысь, тайö аньсö кутöма гозъя олöм пежалöмысь. 5 Мöисей Индöдас тшöктöма вины татшöмъяссö изъясöн. Мый Тэ шуан?» 6 Найö шуалiсны тадзи, медым кыйны да мыжавны Исусöс. Но Исус эз кывзы найöс, а улö копыртчöмöн чуньнас кутiс гижны муас. 7 Найö водзö дöзмöдiсны Исусöс юасьöмъяснас. Сэки Сійö веськöдчис да шуис налы: «Тiян пöвстысь мыжтöмыс медводз мед лыяс аньсö изнас». 8 Сэсся копыртчис да бара кутiс гижны муас. 9 Исуслысь кывъяссö кылöм бöрын йöзыс кутiсны разöдчыны сьöрсьöн-бöрсьöн, öд налöн сьöлöмыс мыждiс найöс. Медводз мунiсны пöрысьджыкъяс, сэсся мукöдыс. Колис сöмын Исус, и Сы водзын сулалысь ань. 10 Исус веськöдчис да аддзис сöмын аньöс. Сiйö юалiс: «Аньöй, кöнöсь тэнö мыждысьясыд? Мыждiс-ö кодкö тэнö?» 11 Ань вочавидзис: «Эз, Господьöй!» Исус шуис сылы: «Ме тшöтш ог мыжды. Мун да водзö мыжтö эн нин вöч». 12 Исус бара сёрнитiс йöзыскöд. Сiйö шуис: «Ме йöзыслы югыдыс. Ме бöрся мунысь оз кут ветлыны пемыдас, сылöн лоö олöмыслöн югыдыс». 13 Фарисейяс шуисны: «Тэ Ачыд Ас йывсьыд висьталан, та вöсна Тэнад висьталöмыд абу эскана». 14 Исус вочавидзис: «Ме кö висьтала Ас йылысь, Менам висьталöмöй веськыд, öд Ме тöда, кытысь локтi да кытчö муна. А тi онö тöдöй, кытысь Ме локтi да кытчö муна. 15 Тi мыжданныд мортсö йöзыс моз. Ме некодöс ог мыжды. 16 А мыжда кö, мыжда веськыда, öд Ме абу öтнам. Мекöд Менö мöдöдысь Батьöй. 17 Тiян Индöдын гижöма, мый кык мортлöн висьталöмыс эскöдана. 18 Ме Ачым висьтала Ас йылысь. Ме йылысь висьталö тшöтш Менö мöдöдысь Батьöй». 19 Сэки юалiсны Исуслысь: «Кöнi Тэнад Батьыд?» Исус вочавидзис: «Тi онö тöдöй Менö и онö тöдöй Менсьым Батьöс. Тi кö эськö тöдiнныд Менö, сэки тöдiнныд тшöтш Менсьым Батьöс». 20 Тайö кывъяссö Исус висьталiс крамын велöдiгöн, сьöм чукöртан куд дорын. Сiйöс некод эз кут, öд Сылöн кадыс эз на во. 21 Исус бара висьталiс йöзыслы: «Ме регыд муна. Тi кутанныд корсьны Менö, но мыж пытшканыд куланныд. Кытчö Ме муна, сэтчö тi онö вермöй локнысö». 22 Юдейяслöн веськöдлысьяс шензисны: «Гашкö, Сiйö кöсйö вины Асьсö, öд шуалö, кытчö пö Ме муна, сэтчö тi онö вермöй локнысö». 23 Исус шуис налы: «Тi улiсянь, а Ме вылiсянь. Тi тайö муюгыдсьыс, а Ме абу тайö муюгыдсьыс. 24 Ме шуи тiянлы: тi куланныд мыж пытшканыд. Онö кö эскöй, мый Ме збыльысь Сiйö, кодöн шуа Ачымöс, куланныд мыж пытшканыд». 25 Найö юалiсны: «Кодi нö Тэ?» Исус вочавидзис: «Ме – Сiйö, кодöн шулi Ачымöс водзысяньыс. 26 Ме унатор на верма висьтавны тiян йылысь, унаторйысь мыждыны тiянöс. Но Ме юöрта муюгыдыслы сöмын сiйö, мый кывлi Менö Мöдöдысьсянь, öд Сiйö збыльсö висьталö». 27 Найö эз гöгöрвоны, мый Исус висьталö Батьыс йылысь. 28 Исус шуис налы: «Морт Пиöс кыпöдöм бöрын тi тöдмаланныд: Ме збыльысь Сiйö, кодöн шуа Ачымöс. Ме нинöм ог вöч Ассянь, Ме висьтала сöмын сiйö, мыйö велöдiс Менö Батьöй. 29 Менö Мöдöдысьöй Мекöд. Батьöй эз коль Менö öтнамöс, öд Ме ставсö вöча Сылöн кöсйöм серти». 30 Тайö висьталöмсö кывзiгöн унаöн эскисны Исуслы. 31 Сэки Исус шуис Сылы эскысь юдейяслы: «Менам кывъяс серти кö оланныд, тi збыльысь Менам велöдчысьяс. 32 Тi тöдмаланныд збыльсö, и збыльыс мездас тiянöс». 33 Найö вочавидзисны: «Ми Öвраамсянь чужысьяс, некор эгö вöлöй кесйöг туйынöсь. Сiдзкö, мыйла Тэ шуан, мый ми мездмам?» 34 Исус вочавидзис: «Веськыда, веськыда висьтала тiянлы: мыжсö вöчысь – мыжыслöн кесйöг. 35 Кесйöг оз вермы кольччыны керкаас пыр кежлö, а пиыс олö сэнi помтöг. 36 Пиыс кö мездас тiянöс, тi збыльысь мездманныд. 37 Ме тöда: тi Öвраамсянь чужысьяс, но кöсъянныд вины Менö, öд тiян сьöлöмö оз тöрны Менам кывъясöй. 38 Ме висьтала сы йылысь, мый аддзылi Аслам Бать ордысь. А тi вöчанныд сы серти, мый аддзылiнныд асланыд бать ордысь». 39 Найö вочавидзисны: «Миян батьным Öвраам». Исус шуис налы: «Тi кö Öвраамлöн ныв-пи, вöчинныд эськö Öвраам ног. 40 Ме висьталi тiянлы Енсянь кывлöм збыльсö, а тi кöсъянныд вины Менö. Öвраам тадзи эз вöчлы. 41 Тi вöчанныд батьныд ног». Юдейяс шуисны Исуслы: «Ми абу чуркаяс. Миян эм öти Бать, тайö Ен». 42 Исус шуис: «Енмыс кö тiянлы Бать, Ме эськö муса вöлi тiянлы, öд Ме Енсянь локтi. Ме эг Ассянь лок, Енмыс мöдöдiс Менö. 43 Мыйла тi онö гöгöрвоöй Менсьым висьталöмöс? Тi онö гöгöрвоöй, öд онö сибöдöй Менсьым кывъясöс. 44 Омöльыс – тiян батьныд. Тi ставсö кöсъянныд вöчны сы моз. Сiйö водзысяньыс вöлi морт виысь. Збыльсьыс сiйö ылын, збыльыс сы пытшкын абу. Кор сiйö ылöдлö, висьталö ассяньыс, öд сiйö ылöдчысь, ылöгыслöн бать. 45 Тi онö эскöй Меным, öд Ме збыльсö висьтала. 46 Кодi тiян пиысь вермас мыждыны Менö лёк вöчöмысь? Ме кö збыльсö висьтала, мыйла онö эскöй Меным? 47 Кодi Енсянь, сiйö кывзö Енлысь кывъяссö. А тi онö кывзöй, öд тi абу Енсянь». 48 Юдейяс шуисны Исуслы: «Ми веськыда висьталам: Тэ Самарияысь, Тэ пытшкын пеж лов». 49 Исус вочавидзис: «Ме пытшкын пеж лолыс абу. Ме бурö пукта Ассьым Батьöс, но тi Менö омöльтанныд. 50 Ме ог корсь Аслым ошкöмсö. Эм Сiйö, кодi сетас Меным ошкöмсö. Сiйö – веськыда Мыждысьыс. 51 Веськыда, веськыда висьтала тiянлы: Менам кывъяс серти олысь некор оз кув». 52 Юдейяс шуисны Исуслы: «Öнi ми тöдам, мый Тэ пытшкын пеж лов. Öвраам кулiс, пророкъяс кулiсны, а Тэ шуан: "Менам кывъяс серти олысь некор оз кув". 53 Тэ öмöй Öвраам батьным дорысь ыджыдджык? Сiйö кулiс, пророкъяс тшöтш кулiсны. Тэ нö Асьтö код туйö пуктан?» 54 Исус вочавидзис: «Ме кö ошка Ачымöс, Менам ошкöмöй нинöм дон оз сулав. Менö ошкö Менам Батьöй, код йылысь тi шуанныд, мый Сiйö тiян Ен. 55 Тi онö тöдöй Сiйöс, а Ме тöда Сiйöс. Ме кö шуа, мый ог тöд Сiйöс, сэки лоа тiян кодь пöръясьысьöн. Но Ме тöда Сiйöс да ола Сылöн кывъясыс серти. 56 Тiян Öвраам батьныд нимкодьпырысь виччысис Менсьым локтан лунöс. Сiйö аддзис тайö лунсö да ёна нимкодясис». 57 Юдейяс шуисны Исуслы: «Тэ аддзылiн Öвраамöс? Тэныд öд ветымын арöсыс на абу». 58 Исус шуис налы: «Веськыда, веськыда висьтала тiянлы: Öвраам чужтöдз на Ме вöлi». 59 Сэки найö босьтiсны изъяс да кöсйисны лыйлыны Исусöс, но Исус саймовтчöмöн петiс крамсьыс да мунiс сэтысь.
91 Мунiгмозыс Исус аддзис чужöмсяньыс синтöм мортöс. 2 Велöдчысьяс юалiсны Исуслысь: «Велöдысь, кодлöн мыж вöсна сiйö синтöмöн чужöма? Ачыс-ö сiйö мыжа, бать-мамыс-ö?» 3 Исус вочавидзис: «Сiйö абу мыжа, бать-мамыс тшöтш абу мыжаöсь. Сiйö синтöм, медым сы пыр петкöдчасны Енлöн уджъясыс. 4 Öнi, лунъюгыднас, Меным колö вöчны Менö Мöдöдысьлысь уджъяссö. Пуксяс вой, сэки некод оз вермы уджавны. 5 Му вылын олiгöн Ме йöзыслы югыдыс». 6 Тайöс шуöм бöрын Исус сьöлыштiс муас, сьöлыштöмсьыс вöчис ляти да синтöм мортлысь синсö мавтiс лятинас. 7 Сэсся шуис: «Мун да мыссьы Силоам ва йöртöдын». Силоам нимыс, вуджöдны кö: мöдöдöма. Синтöм морт мунiс, мыссис да кутiс аддзыны. 8 Сыкöд орччöн олысьяс да сiйöс синтöмöн аддзылысьяс шензисны: «Абу-ö тайö сiйö мортыс, кодi пукалiс да сьöм корис?» 9 Öтияс шуалiсны: «Тайö дзик сiйö мортыс», мöдъяс шуалiсны: «Абу, тайö сöмын сы вылö мунö». Ачыс сiйö висьталiс: «Тайö ме». 10 Сэки юалiсны сылысь: «Кыдзи нö тэ аддзыны кутiн?» 11 Сiйö вочавидзис: «Исус нима морт вöчис ляти, мавтiс сiйöн менсьым синмöс да шуис: "Мун да мыссьы Силоам ва йöртöдын". Ме мунi да мысси, öнi аддза». 12 Сэки юалiсны сылысь: «Кöнi тэнö Бурдöдысьыд?» Мöдыс вочавидзис: «Ог тöд». 13 Мортöс, кодi водзынджык эз аддзы, нуöдiсны фарисейяс дiнö. 14 Тайö вöлi шойччан лунö, кор Исус вöчис ляти да бурдöдiс синтöмöс. 15 Фарисейяс тшöтш юалiсны синтöм мортлысь, кыдзи сiйö кутiс аддзыны. Сiйö вочавидзис: «Исус пуктiс син вылам ляти, сэсся ме мысси да кутi аддзыны». 16 Сэки фарисейяс пöвстысь кодсюрö шуисны: «Тайö Бурдöдысьыс абу Енсянь, öд Сiйö торкö тшöктöмсö – уджалö шойччан лунö». Мукöдыс сёрнитiсны: «Вермас öмöй мыжа морт вöчны татшöм шензьöданаторъяссö?» Тадзи лыбис на костын вен. 17 Синтöм мортлысь бара юалiсны: «Тэ шуан, мый Сiйö бурдöдiс тэнсьыд синтö? Кодi Сiйö тэ ногöн?» Морт вочавидзис: «Пророк». 18 Юдейяслöн веськöдлысьяс эз эскыны, мый тайö мортыс вöлi синтöм да пондiс аддзыны. Сэки найö корисны сылысь бать-мамсö 19 да юалiсны налысь: «Тайö тiян пиныд? Тi шуанныд, сiйö пö чужöмсяньыс синтöм. Кыдзи нö сiйö аддзö öнi?» 20 Бать-мамыс вочавидзисны: «Ми тöдам: тайö миян пиным. Сiйö чужис синтöмöн, 21 но кыдзи кутiс аддзыны да кодi бурдöдiс сiйöс, тайöс ми огö тöдöй. Юалöй сылысь, öд сiйö тыр арлыда нин, вермас ачыс вочавидзны». 22 Бать-мамыс шуисны тадзи, öд найö полiсны юдейяслöн веськöдлысьясысь. Веськöдлысьяс водзджык нин сёрнитчисны, мый быдöнöс, кодi Исусöс пуктö Кристос туйö, вöтласны синагогаысь. 23 Та вöсна бать-мамыс шуисны: «Юалöй сылысь, öд сiйö тыр арлыда нин». 24 Сэсся мöдысь корисны сiйö мортсö, кодi вöлi синтöм, да шуисны сылы: «Кöсйысь Ен водзын, мый збыльсö висьталан. Ми тöдам: тэнö Бурдöдысьыс – мыжа морт». 25 Сiйö вочавидзис: «Мыжа-ö Сiйö, ме ог тöд. Но öтитор тöда: ме вöлi синтöм, а öнi аддза». 26 Сылысь выльысь юалiсны: «Мый Сiйö вöчис тэныд? Кыдзи Сiйö бурдöдiс тэнö?» 27 Мортыс вочавидзис: «Ме тiянлы висьталi нин, сöмын тi энö кывзöй. Мый нöшта кöсъянныд кывны месянь? Гашкö, тi тшöтш кöсъянныд лоны Сылöн велöдчысьясöн?» 28 Юдейяслöн веськöдлысьяс кутiсны видны тайö мортсö да шуисны сылы: «Тэ Сылöн велöдчысь, а ми – Мöисейлöн. 29 Ми тöдам, мый Ачыс Енмыс сёрнитiс Мöисейкöд. А кытысь тайö Мортыс, ми огö тöдöй». 30 Бурдöм морт вочавидзис: «Тайö ёна шензьöдö! Сiйö бурдöдiс менсьым синмöс, а тi онö тöдöй, кытысь Сiйö. 31 Ми тöдам, мый Ен оз кывзы мыжаясöс. Но кодi бурö пуктö Енсö да олö Сылöн кöсйöм серти, Енмыс кывзö сiйöс. 32 Му пуксьöмсяньыс эз на вöв татшöмыс, мый чужöмсяньыс синтöмöс кодкö бурдöдiс. 33 Менö Бурдöдысьыс кö эз вöв Енсянь, нинöм эськö вöчны эз вермы». 34 Сылы вочавидзисны: «Тэ дзоньнас мыж пытшкын чужöмыд, а лысьтан миянöс велöдны!» Сэсся вöтлiсны сiйöс. 35 Исус кывлiс бурдöдöм мортöс вöтлöм йылысь, корсис сiйöс да шуис: «Эскан-ö тэ Ен Пилы?» 36 Мöдыс вочавидзис: «Господьöй, кодi нö Сiйö? Висьтав, медым ме верми эскыны». 37 Исус шуис: «Тэ аддзылiн Сiйöс, Сiйö сёрнитö тэкöд». 38 Бурдöм мортыс шуис: «Эска, Господьöй!» Сэсся копыртчылiс Сылы. 39 Исус шуис: «Ме локтi муюгыдас мыждыны, медым синтöмъяс аддзисны да аддзысьяс синтöммисны». 40 Тайöс кылöм бöрын öткымын фарисей, кодъяс вöлiны Исус дiнын, юалiсны Сылысь: «Гашкö, ми тшöтш синтöмöсь да?» 41 Исус вочавидзис: «Вöлiнныд кö тi синтöмöсь, сэки эськö энö мыжмöй. Но тi шуанныд, аддзам пö. Сiдзкö, мыжныд ас выланыд кольö».
101 «Веськыда, веськыда висьтала тiянлы: кодi пырö ыж йöрö оз öдзöсöд, а мöдлатi, сiйö – гусясьысь да лёк вöчысь. 2 Öдзöсöд пырысьыс – ыж видзысь, 3 сылы йöр видзысь восьтö öдзöссö. Ыжъяс кывзöны ыж видзысьлысь гöлöс шысö. Сiйö чуксалö ыжъяссö нимъяснас да петкöдö найöс йöр ортсыö. 4 Ыжъяссö лэдзалöм бöрын сiйö мунö водзвыланыс. Ыжъясыс локтöны бöрсяньыс, öд найö тöдöны сылысь гöлöс шысö. 5 А тöдтöм бöрся ыжъяс оз мунны. Найö пышйöны сыысь, öд найö оз тöдны сылысь гöлöс шысö». 6 Исус висьталiс фарисейяслы тайö велöданвисьтсö, сöмын найö эз гöгöрвоны, мый йылысь сёрнитiс Исус. 7 Сэки Исус водзö висьталiс налы: «Веськыда, веськыда висьтала тiянлы: Ме – ыжъяслы öдзöсыс. 8 Меöдз волысьяс – ставныс гусясьысьяс да лёк вöчысьяс. Ыжъяс эз кывзыны найöс. 9 Ме – öдзöсыс. Меöд пырысьыс мездмас. Сiйö пырас, петас да йирсянiн аддзас. 10 Гусясьысь локтö сöмын гусявны, вины да бырöдны. А Ме локтi сетны олöм, тырвыйö олöм. 11 Ме – ыжъяслы бур видзысь. Бур видзысь сетö ассьыс олöмсö ыжъясыс вöсна. 12 Меда морт оз ассьыс ыжъяссö видз. Кор аддзö локтысь кöинöс, сiйö эновтö ыжъяссö да пышйö. Сэки кöин косявлö ыжъяссö, да найö разалöны. 13 Меда морт пышйö, öд сiйöс сöмын медалöма, сылы веськодь, мый лоö ыжъясыскöд. 14 Ме – ыжъяслы бур видзысь. Ассьым ыжъясöс Ме тöда, и Менам ыжъясöй тöдöны Менö. 15 Кыдзи Батьöй тöдö Менö, сiдзи Ме тöда Батьöс. Ассьым олöмöс Ме сета ыжъясöй вöсна. 16 Тайö йöрас кындзи Менам эмöсь мукöд ыжъяс, Меным тшöтш колö вайöдны найöс. Найö кыласны Менсьым гöлöс шыöс, сэки лоас öти чукöр да öти видзысь. 17 Батьöйлы Ме муса, öд Ме сета Ассьым олöмöс, медым бöр босьтны сiйöс. 18 Менсьым олöмöс некод оз вермы мырддьыны, Ме Ачым сета сiйöс. Ме верма сетны сiйöс, и верма бöр босьтны. Тадзи тшöктiс вöчны Менам Батьöй». 19 Тайö кывъясысь юдейяс венö воисны. 20 Унаöн на пöвстысь шуалiсны: «Сiйöс пеж лов кутöма, Сiйö йöйталö. Мыйла Сiйöс кывзанныд?» 21 Мукöдыс шуалiсны: «Пеж лолöн кутöм морт оз вермы тадзи сёрнитны. Вермас öмöй пеж лов синтöмъясöс бурдöдны?» 22 Вöлi тöв. Ерусалимын вöлi гажöдчан кад – крам вежöдöмсö казьтылöм. 23 Исус ветлöдлiс крамдорса Соломон йöрöд. 24 Сэки юдейяс кытшалiсны Исусöс да шуисны: «Тэ дыр на кутан миянöс бöбйöдлыны? Тэ кö Кристос, веськыда висьтав миянлы». 25 Исус вочавидзис: «Ме висьталi нин тiянлы, но тi онö эскöй. Менам уджъясöй, кодъясöс Ме вöча Бать нимсянь, висьталöны Ме йылысь. 26 Но тi онö эскöй, öд тi абу Менам ыжъяс. Тайöс Ме висьтавлi нин тiянлы. 27 Менам ыжъясöй кывзöны Менсьым гöлöс шыöс, и найöс Ме тöда. Найö локтöны Ме бöрся. 28 Ме сета налы помтöм олöм, и найö некор оз бырны. Некод оз мырддьы найöс Менам киысь. 29 Менам Батьöй, кодi сетiс Меным найöс, ставсьыс медыджыд. Некод оз вермы мырддьыны найöс Менам Батьлöн киысь. 30 Ме да Бать – ми öти». 31 Сэки юдейяс босьтiсны изъяс, медым лыйлыны Исусöс. 32 Сiйö шуис налы: «Батьлöн тшöктöм серти уна бур удж Ме вöчи тiян пöвстын. Кутшöм уджысь нö кöсъянныд изъявны Менö?» 33 Юдейяс вочавидзисны: «Огö бур уджысь Тэнö изъялöй, изъялам Енмöс омöльтöмысь. Тэ морт, а Енмö пуксян». 34 Исус вочавидзис: «Абу-ö гижöма тiян Индöдын, мый "Ме шуи: тi – енъяс"? 35 Гижöдыс оз вежсьы. Енмыс кö шуис енъясöн найöс, кодъяслы сетiс Ассьыс Кывсö, 36 сiдзкö, мыйла тi шуанныд Менö Енмöс омöльтысьöн, Ме кö шуа ачымöс Ен Пиöн? Öд Менö Батьöй вежöдiс да мöдöдiс муюгыдас. 37 Ме кö ог вöч Батьлысь уджъяссö, энö эскöй Меным. 38 А вöча кö, эскöй кöть Менам уджъясö, Меным онö эскöй да. Сэки тi тöдмаланныд да эсканныд, мый Батьöй Ме пытшкын, а Ме – Сы пытшкын». 39 Сэки юдейяс бара кöсйисны кутны Исусöс, но Сiйö эз сетчы налы. 40 Исус бара вуджис Йöрдан ю мöдлапöлö, кöнi Иоан пыртлiс йöзсö, да кольччис сэтчö. 41 Сы дiнö локтiс уна йöз. Найö шуалiсны: Иоан шензьöданаторсö эз вöчлы, но ставыс, мый Иоан висьтавлiс тайö Мортыс йылысь – тайö збыль. 42 Сэнi унаöн эскисны Исуслы.
111 Вифания сиктын олiс Лазар нима морт, сiйö висис. Сэнi олiсны тшöтш Лазарлöн Марья да Марпа чойясыс. 2 Буретш тайö Марьяыс бöрынджык мавтас Господьöс чöскыд дука выйöн да чышкалас Сылысь коксö аслас юрсиöн. Висьысь Лазар вöлi Марьялöн вокыс. 3 Чойяс мöдöдiсны мортöс висьтавны Исуслы: «Господьöй, Тэнад муса ёртыд висьö». 4 Тайöс кылöм бöрын Исус шуис: «Тайö висьöмыс абу кулöм вылö, но Енмöс ошкöм вылö. Та пыр воссяс Ен Пилöн дзирдлуныс». 5 Лазар, Марпа да сылöн чойыс вöлiны мусаöсь Исуслы. 6 Кор Исус тöдмалiс Лазарлöн висьöм йылысь, Сiйö кольччылiс на кык лун кежлö сэтчö, кöнi вöлi. 7 Сэсся шуис велöдчысьясыслы: «Бöр мунамöй Юдеяö». 8 Велöдчысьясыс шуисны Исуслы: «Велöдысь, Юдея муын сöмын на кöсйисны вины Тэнö изъясöн, а Тэ бара нин мунан сэтчö?» 9 Исус вочавидзис: «Лунын öмöй абу дас кык час? Луннас ветлысь оз крукась, öд сiйö аддзö тайö мувывса югыдсö. 10 Войнас ветлысь крукасьö, öд сылöн югыдыс абу». 11 Тайöс шуöм бöрын Исус содтiс: «Миян Лазар ёртным унмовсьöма. Ме муна сiйöс садьмöдны». 12 Велöдчысьясыс шуисны Сылы: «Господьöй, унмовсьöма кö, бурдас». 13 Исус сёрнитiс Лазарлöн кулöм йылысь, а велöдчысьясыс мöвпалiсны, мый Исус сёрнитö узьöм йылысь. 14 Сэки Исус веськыда шуис налы: «Лазар кулöма. 15 Ме нимкодяся тiян вöсна, мый эг вöв сэнi, öд öнi тi понданныд эскыны. Локтöй, мунамöй сы дiнö». 16 Сэки Фома, кодöс шуисны Двöйнипöлöн, шуис мукöд велöдчысьыслы: «Мунам да Сыкöд öтлаын кулам». 17 Локтöм бöрас Исуслы висьталiсны, Лазарöс пö нёль лун сайын нин дзебисны. 18 Вифания сикт вöлi Ерусалимсянь матын, кык-куим верст ылнаын. 19 Уна йöз вöлi локтöмаöсь Марпа да Марья ордö, медым пальöдны кулöм вок вöснаыс налысь шогсö. 20 Марпа кылiс Исуслöн локтöм йылысь да петiс Сылы воча. Марья пукалiс гортас. 21 Марпа шуис Исуслы: «Господьöй, вöлiн кö Тэ танi, менам вокöй эськö эз кув. 22 Но весиг öнi тöда: мый коран Енмыслысь, Сiйö сетас Тэныд». 23 Исус вочавидзис: «Ловзяс тэнад вокыд». 24 Марпа шуис Сылы: «Тöда, сiйö ловзяс медбöръя лунö, кор ловзясны кулöмаяс». 25 Исус шуис: «Ме – Ловзьöдысьыс да Олöмыс. Меным эскысь весиг кулöм бöрас кутас овны. 26 Быдöн, кодi олiгас эскö Меным, некор оз кув. Эскан-ö таö?» 27 Марпа шуис: «Эска, Господьöй! Ме эска, мый Тэ – Кристос, Ен Пи, кодлы колö вöлi локны муюгыдас». 28 Тайöс шуöм бöрын Марпа мунiс Марья чойыс дiнö да гусьöн висьталiс сылы: «Велöдысьным танi, тэнö корö». 29 Тайöс кылöм мысти Марья дзик пыр чеччис да мунiс Исус дiнö. 30 Исус абу на вöлi пырöма сиктас. Сiйö вöлi сэнi, кöнi паныдасис Марпакöд. 31 Йöзыс, кодъяс вöлiны Марьякöд керкаын да пальöдiсны сылысь шогсö, аддзисны Марьялысь тэрмасьöмöн мöдöдчöмсö да петiсны сы бöрся. Найö чайтiсны, мый сiйö мунö дзебанiнö бöрдны. 32 Кор Марья локтiс Исус дiнö да аддзис Сiйöс, уськöдчис Сы водзö да шуис: «Господьöй, вöлiн кö Тэ танi, вокöй эськö эз кув». 33 Марьялысь да сыкöд локтысь йöзлысь бöрдöмсö аддзöмысь Исуслöн сьöлöмыс нормис. Сiйö сьöкыда ышловзис 34 да юалiс: «Кытчö тi пуктiнныд сiйöс?» Сылы вочавидзисны: «Господьöй, лок видзöдлы». 35 Исуслöн синваыс петiс. 36 Сэки йöзыс сёрнитiсны: «Видзöдлöй, кутшöм муса вöлöм Сылы Лазарыс». 37 Öткымынöн шуисны: «Сiйö бурдöдiс синтöмöс. Эз öмöй Сiйö вермы видзны Лазарöс кулöмысь?» 38 Исус локтiс дзебанiнас нормöм сьöлöмöн. Дзебанiныс вöлi кырта горсйын, а пыранiнсö вöлi тупкöма изйöн. 39 Исус шуис: «Вештöй изсö». Марпа, кулöм мортлöн чойыс, шуис: «Господьöй, сiйö дуксьöма нин, öд нёльöд лун нин дзебанiнын». 40 Исус шуис Марпалы: «Эг öмöй тэныд шулы, мый эскан кö, аддзан Енлысь дзирдлунсö?» 41 Сэки вештiсны изсö дзебанiнысь, кöнi куйлiс кулöм Лазар. Енэжö видзöдлöмöн Исус шуис: «Батьöй, Ме аттьöала Тэнö, мый кылiн Менö. 42 Ме тöда: Тэ пыр кылан Менö. Тайöс Ме шуи танi сулалысь йöзыс вöсна, медым найö эскисны, мый Тэ Менö мöдöдiн». 43 Тайöс шуöм бöрын Исус гораа шыасис: «Лазар, пет сэтысь!» 44 Кулöм Лазар петiс. Сылысь ки-коксö вöлi гартлöма дзебан дöраясöн, чужöмсö гартыштöма чышъянöн. Исус шуис: «Разьöй дöраяссö, мед мунас». 45 Унаöн, кодъяс волiсны Марья дiнö да аддзылiсны, мый Исус вöчис, пондiсны эскыны Исуслы. 46 Мукöдыс мунiсны фарисейяс дiнö да висьталiсны налы, мый Исус вöчис. 47 Аркирейяс да фарисейяс чукöртiсны веськöдлан котыр да сёрнитiсны: «Мый миянлы вöчны? Тайö Мортыс уна шензьöданатор вöчö. 48 Лэдзам кö Сылы водзö тадзи вöчны, ставныс кутасны эскыны Сылы. Сэки локтасны римсаяс да бырöдасны миянлысь вежаиннымöс да войтырнымöс». 49 Каиаф нима морт, кодi сiйö вонас аркиреялiс, шуис налы: «Тi нинöм онö вежöртöй. 50 Тi öмöй онö гöгöрвоöй, мый миянлы лоö бурджык, öти морт кö кулас войтыр вöсна, дзоньнас войтырыс бырöм дорысь». 51 Тайö кывъяссö сiйö шуис эз ассяньыс. Тайö вонас сiйö аркиреялiс, та вöсна водзвыв висьталiс, мый Исус кулас войтырыс вöсна. 52 Кулас оз сöмын тайö войтырыс вöсна, но медым öтлаö чукöртны Енлысь разалöм ныв-писö. 53 Тайö лунсяньыс найö шуисны вины Исусöс. 54 Та вöсна Исус эз нин ветлы восьсöн Юдея муöд. Сiйö мунiс сэтысь овтöминланьö, Ефраим карö, да кольччис сэтчö велöдчысьясыскöд. 55 Матыстчис юдейяслöн Ыджыд лун. Сиктъясысь унаöн локтiсны Ерусалимö, медым сöстöммöдчыны Ыджыд лун водзвылын. 56 Найö корсисны Исусöс, крамын сулалiганыс сёрнитiсны öта-мöдныскöд: «Кыдзи тi чайтанныд, локтас оз Сiйö татчö Ыджыд лун кежлö?» 57 Аркирейяс да фарисейяс водзвыв тшöктiсны йöзыслы: аддзас кö кодкö Исусöс, мед юöртас та йылысь, медым кутны Исусöс.
121 Ыджыд лунысь квайт лун водзджык Исус воис Вифания сиктö, кöнi олiс Лазар. Буретш сiйöс Исус ловзьöдiс. 2 Сэнi Исуслы лöсьöдiсны рытъя сёян. Марпа кесъялiс. Исускöд сёйысьяс пöвстын вöлi и Лазар. 3 Марья босьтiс литра джын зэв дона нард вый да мавтiс Исуслысь коксö, сэсся чышкалiс найöс юрсинас. Керкаас öвтiс чöскыд дукöн. 4 Велöдчысьяс пöвстын вöлi Иуда, Симон-Искариотлöн пиыс, кодi сэсся вузалас Исусöс. Сiйö шуис: 5 «Мыйла тайö выйсö эз вузавны куимсё динарысь? Сьöмсö эськö позис сетавны гöльяслы». 6 Дерт, Иуда эз тöждысь гöльяс вöсна. Сiйö шуис тадзи, ачыс вöлi гусясьысь да. Сы ордын вöлi öтувъя сьöм куд, кытысь сiйö босьтлывлiс аслыс. 7 Исус шуис: «Öвсьöй сыысь! Сiйö видзис тайö выйсö Менö дзебигкежлö. 8 Гöльяс пыр лоасны тiянкöд, а Ме ог пыр ло». 9 Йöзыс унаöн тöдмалiсны Исуслöн Вифания сиктö воöм йылысь. Найö локтiсны сэтчö эз сöмын Исус понда, но медым аддзывны тшöтш Лазарöс, кодöс Исус ловзьöдiс кулöмысь. 10 Аркирейяс шуисны вины тшöтш Лазарöс. 11 Öд Лазар вöсна йöзыс унаöн öтдортчисны наысь да кутiсны эскыны Исуслы. 12 Мöд луннас гажöдчанiнö чукöртчöм йöз кылiсны, мый Исус локтö Ерусалимö. 13 Пальма росъяс босьтöмöн найö петiсны Исуслы воча да горзiсны: – Осанна! Бурсиöма Господь нимöн Локтысьöс, Израиль Öксыöс! 14 Исус аддзис том осёлöс да пуксис сы вылö. Öд тадзи гижöма: 15 – Эн пов, Сион ныв! Видзöд, Öксыыд локтö осёл чань вылын пукалöмöн. 16 Сэки велöдчысьясыс эз на гöгöрвоны тайöс. Но Исуслöн дзирдлуныс воссьöм бöрын налы уси тöд выланыс, мый тадзи вöлi гижöма Сы йылысь, и тадзи найö паныдалiсны Сiйöс. 17 Найö, кодъяс вöлiны Исускöд, кор Сiйö чукöстiс Лазарöс дзебанiнысь да ловзьöдiс сiйöс, висьталiсны йöзыслы 18 тайö шензьöданатор йывсьыс. Та вöсна йöзыс чукöрöн петiсны Исуслы воча. 19 Фарисейяс сёрнитiсны ас костаныс: «Аддзанныд-ö, ми нинöм огö вермöй вöчны. Став йöзыс мунöны Сы бöрся». 20 Гажöдчан кад дырйи Енлы юрбитны локтiс тшöтш кымынкö грек. 21 Найö матыстчисны Филип дiнö, кодi вöлi Галилеяса Випсаидаысь, да корисны: «Ыджыдöй, ми кöсъям аддзывны Исусöс». 22 Филип мунiс да висьталiс та йылысь Öндрейлы. Сэсся Öндрей Филипкöд висьталiсны та йылысь Исуслы. 23 Исус шуис налы: «Воис кад – воссьыны Морт Пилöн дзирдлунлы. 24 Веськыда, веськыда висьтала тiянлы: шобдi тусь кö муö усьöм бöрас оз кув, сэки öтнас кольö. Кулас кö, уна тусь ваяс. 25 Тэныд кö муса олöмыд, воштан сiйöс. Мустöмтан кö ассьыд олöмтö тайö муюгыдас, видзан сiйöс помтöм олöмö. 26 Меным кесъялысь мед локтö Ме бöрся. Кöнi Ме лоа, сэнi тшöтш лоö Менам кесъялысьöй. И Меным кесъялысьöс Батьöй бурö пуктас. 27 Öнi Менам сьöлöмöй ёна майшасьö. Мый Меным шуны? Батьöй, мезды Менö тайö кадсьыс! Но дзик тайö кад кежлас Ме локтi. 28 Батьöй, восьт Аслад нимлысь дзирдлунсö!» Сэки енэжсянь кылiс гöлöс шы: «Ме восьтi нин да нöшта на восьта». 29 Сэнi сулалысь йöзыс тайöс кылöм бöрын шуалiсны: «Тайö гым». Мöдъяс шуалiсны: «Андел Сыкöд сёрнитiс». 30 Исус шуис: «Тайö висьталöмыс эз вöв Меным, а тiянлы. 31 Öнi тайö муюгыдсö лоö мыждöма. Öнi тайö муюгыдас ыджыдалысьсö лоö вöтлöма. 32 Му вылысь Менö кыпöдöм бöрын Ме ставнысö Ас дiнö сибöда». 33 Тайö висьталöмнас Сiйö гöгöрвоöдiс, кутшöм ногöн Сiйö кулас. 34 Йöзыс шуисны Сылы: «Ми тöдам Индöдысь, мый Кристос помтöг олö. Сiдзкö, мыйла Тэ шуан, Морт Пиöс пö кыпöдасны? Кодi сiйö Морт Пиыс?» 35 Сэки Исус шуис налы: «Этшаник кад югыдыс лоас на тiянкöд. Сiдзкö, ветлöй югыдыс дырйи, медым пемыдыс эз пöдты тiянöс. Öд пемыдас ветлысь оз тöд, кытчö мунö. 36 Кытчöдз югыдыс тiянкöд, эскöй югыдыслы. Сэки лоанныд югыдыслöн ныв-пиöн». Тайöс висьталöм бöрын Исус ылыстчис на дiнысь да саялiс. 37 Сы мында шензьöданатор Исус вöчис йöзыс водзын, но найö эз эскыны Сылы. 38 Тадзи инiсны Исай пророклöн кывъясыс: – Господьöй, кодi эскис миянсянь кывлöмас? Кодлы петкöдчис Господьлöн вына киыс? 39 Найö эз вермыны эскыны, кыдзи висьтавлiс на йылысь Исай: 40 – Енмыс тупкис налысь синнысö, чорзьöдiс налысь сьöлöмнысö, медым эз аддзыны синнаныс, эз гöгöрвоны сьöлöмнаныс да эз бергöдчыны Мелань, медым Ме бурдöдi найöс. 41 Исай шуис тайö кывъяссö Исуслысь дзирдлунсö аддзылiгас, да висьталiс Сы йылысь. 42 Веськöдлысьяс пöвстысь унаöн эскисны Исуслы. Сöмын фарисейясысь полöмнысла найö эз лысьтны висьтавны та йылысь веськыда, медым эз вöтлыны найöс синагогаысь. 43 Öд Енлöн ошкöм дорысь налы мусаджык вöлi йöзлöн ошкöмыс. 44 Исус гораа шыасис: «Меным эскысь оз Меным эскы, а Менö Мöдöдысьлы. 45 Менö аддзысь аддзö Менö Мöдöдысьöс. 46 Ме – югыдыс. Ме локтi му вылö, медым Меным эскысь эз коль пемыдас. 47 Менсьым кывъясöс кылысь кö оз эскы, Ме сiйöс ог мыжды. Ме öд локтi муюгыдсö мездыны, а эг мыждыны. 48 Кодi оз сибöд Менö да оз босьт Менсьым кывъясöс, сылöн эм аслас мыждысь: Менам висьталöм кывйöй медбöръя лунö мыждас сiйöс. 49 Ме висьталi эг Ассянь. Менö мöдöдысь Батьöй Ачыс велöдiс Менö, мый шуны да юöртны. 50 Ме тöда: Сылöн тшöктöмыс вайö помтöм олöм. Сiдзкö, Менам висьталöмöй – Батьлöн шуöм серти висьталöм».
131 Тайö вöлi Ыджыд лун водзвылын. Исус тöдiс, мый Сылы воис кад мунны тайö муюгыдсьыс Батьыс дiнö. Исуслы вöлi мусаöсь найö, кодъяс эскисны Сылы, Сiйö помöдз петкöдлiс налы Ассьыс муслунсö. 2 Рытнас найö чукöртчисны сёйны. Омöльыс вöлi ышöдöма нин Иудаöс, Симон-Искариот пиöс, вузавны Исусöс. 3 Исус тöдiс, мый Батьыс ставсö сетiс Сы киö, и мый Сiйö локтiс Енсянь да бöр Сы дiнö мунö. 4 Сёйигас Исус чеччис, пöрччис вылыс паськöмсö да вöнясис ки чышкöдöн. 5 Кисьтiс дозйö ва да кутiс мыськавны велöдчысьяслысь кокнысö, а вöнялöм чышкöднас чышкалiс найöс. 6 Исус матыстчис Симон-Петыр дiнö. Петыр шуис: «Господьöй, Тэ-ö менсьым кокöс мыськан?» 7 Исус вочавидзис: «Тэ öнi он на гöгöрво, мый Ме вöча, но бöрынджык гöгöрвоан». 8 Петыр шуис Сылы: «Некор он мыськав менсьым кокöс!» Исус воча шуис: «Ог кö мыськав тэнö, он ло Мекöд». 9 Симон-Петыр шуис Сылы: «Господьöй, мыськы тшöтш менсьым киöс да юрöс, эн сöмын кокöс!» 10 Исус вочавидзис: «Мыськалöмалысь колö мыськавны сöмын коксö, öд дзоньнассö сiйö сöстöм нин. Тi сöстöмöсь нин, сöмын абу ставныд». 11 Исус тöдiс, кодi Сiйöс вузалас, та вöсна шуис, абу пö ставныд сöстöмöсь. 12 Налысь кокнысö мыськалöм бöрын Исус пасьтасис да бара пуксис сёйны. Сiйö шуис велöдчысьясыслы: «Гöгöрвоанныд-ö, мый Ме öнi вöчи? 13 Тi шуанныд Менö Велöдысьöн да Господьöн. Тi веськыда шуанныд, Ме буретш сiйö. 14 Ме кö, тiян Господь да Велöдысь, мыськалi тiянлысь кокнытö, сiдзкö, тiянлы тшöтш колö мыськавны öта-мöдныдлысь кокнытö. 15 Тадзи Ме вöчи, медым тi вöчинныд Ме моз. 16 Веськыда, веськыда висьтала тiянлы: кесйöг абу ыджыдджык аслас ыджыдысь, да мöдöдöм морт абу ыджыдджык сiйöс мöдöдысьысь. 17 Тайöс кö тöданныд да та серти оланныд, тi шудаöсь. 18 Ме ог висьтав ставныд йылысь, öд Ассьым бöрйöмаясöс Ме тöда. Но Гижöдыслы колö инны: "Мекöд сёйысьыс мунас Меным паныд". 19 Ме водзвыв висьтала тайöс, медым лоöм бöрас тi эскинныд, мый Ме збыльысь Сiйö, кодöн шуа Ачымöс. 20 Веськыда, веськыда висьтала тiянлы: кодi сибöдö Месянь мöдöдöмаöс, сiйö сибöдö Менö. А Менö сибöдысь сибöдö Менö Мöдöдысьöс». 21 Тайöс висьталöм бöрын Исуслöн нормис сьöлöмыс. Сiйö шуис: «Веськыда, веськыда висьтала тiянлы: тiян пиысь öти вузалас Менö». 22 Сэки велöдчысьясыс видзöдлiсны öта-мöдныс вылö. Найö эз гöгöрвоны, код йылысь Сiйö сёрнитö. 23 Велöдчысьяс пиысь öти, кодi вöлi муса Исуслы, нёровтчöмöн пукалiс Исус бердын. 24 Симон-Петыр довкнитiс сылы, юав пö Исуслысь, код йылысь Сiйö сёрнитö. 25 Исуслы морöс бердас топöдчöмöн велöдчысьыс шуис: «Господьöй, кодi нö сiйö?» 26 Исус вочавидзис: «Сiйö мортыслы Ме сета кöтöдöм нянь тор». Исус кöтöдiс нянь тор да сетiс сiйöс Симон-Искариот Иудалы. 27 Тайö нянь тор бöрас Иуда пытшкö пырис сöтана. Исус шуис Иудалы: «Мый кöсъян вöчны, вöч öдйöджык». 28 Сёйысьяс пöвстысь некод эз гöгöрво, мыйла Исус шуис тадзи. 29 Кодсюрö чайтiсны, мый Исус тшöктiс ньöбны коланаторсö Ыджыд лун кежлö либö сетны мыйкö гöльяслы. Öд сьöм кудйыс вöлi Иуда ордын. 30 Нянь торсö босьтöм бöрын Иуда дзик пыр петiс ывлаö. Вöлi вой. 31 Иудалöн петöм бöрын Исус шуис: «Öнi воссис Морт Пилöн дзирдлуныс, а Пиыс пыр воссис Енлöн дзирдлуныс. 32 Енлöн дзирдлуныс кö воссис Пиыс пыр, сэки Енмыс Ас пытшкас восьтас Пиыслысь дзирдлунсö. Тайö лоö регыд нин. 33 Челядь, Меным этша нин колис овны тiянкöд, сэсся кутанныд корсьны Менö. Öнi висьтала тiянлы сiйö, мый коркö висьтавлi мукöдыслы: кытчö Ме муна, сэтчö тi онö вермöй локнысö. 34 Выль тшöктöм сета тiянлы: радейтöй öта-мöднытö! Кыдзи Ме радейта тiянöс, сiдзи тi радейтöй öта-мöднытö. 35 Радейтанныд кö öта-мöднытö, сэки быдöн аддзас, мый тi – Менам велöдчысьяс». 36 Симон-Петыр юалiс: «Господьöй, кытчö Тэ мунан?» Исус вочавидзис: «Кытчö Ме муна, сэтчö тэ öнi он вермы муннысö. Локтан Ме бöрся бöрынджык». 37 Петыр шуис: «Господьöй, мыйла öнi ог вермы Тэ бöрся муннысö? Ме ассьым олöмöс сета Тэ вöсна!» 38 Исус вочавидзис: «Тэ шуан, мый ассьыд олöмтö сетан Ме вöсна. Веськыда, веськыда висьтала тэныд: петук чукöсттöдз на тэ куимысь соссян Меысь».
141 «Мед оз майшась тiян сьöлöмныд. Эскöй Енлы да эскöй Меным. 2 Менам Бать керкаын вежöсыс уна. Эз кö вöв сiдзи, Ме эськö эг шу: муна дасьтыны тiянлы оланiн. 3 Ме дасьта оланiн да бöр локта босьтны тiянöс Ас дiнö, медым тi вöлiнныд Мекöд. 4 Тi тöданныд, кытчö Ме муна, туйсö тшöтш тöданныд». 5 Фома шуис Сылы: «Господьöй, ми огö тöдöй, кытчö Тэ мунан. Кыдзи нö ми вермам туйсö тöдны?» 6 Исус шуис сылы: «Ме – туйыс, збыльыс да олöмыс. Бать дiнö позьö локны сöмын Ме пыр, мöд туйыс абу. 7 Тi кö тöданныд Менö, тöданныд тшöтш Менсьым Батьöс. Öнi тi тöданныд Сiйöс, весиг аддзылiнныд Сiйöс». 8 Филип шуис Сылы: «Господьöй, петкöдлы миянлы Батьтö. Унджыксö ми огö кöсйöй». 9 Исус вочавидзис: «Он öмöй тöд Менö, Филип, Ме öд сы дыра нин ола тiянкöд? Менö аддзылысь и Батьöс аддзылiс. Мыйла тэ шуан, петкöдлы пö миянлы Батьтö? 10 Ме – Бать пытшкын, а Бать – Ме пытшкын. Эскан-ö таö? Сiйö кывъяссö, мый висьтала тiянлы, ог Ассянь висьтав. Тайö Ме пытшкын олысь Батьöй вöчö уджъяссö. 11 Эскöй Менам кывъясö: Ме – Бать пытшкын, а Бать – Ме пытшкын. Онö кö эскöй таö, эскöй Меным уджъясöй серти. 12 Веськыда, веськыда висьтала тiянлы: Меным эскысь кутас вöчны Ме кодь жö уджъяс, весиг наысь ыджыдджыкöс на, öд Ме муна Батьöй дiнö. 13 Мый коранныд Батьлысь Менам нимöн, сiйöс Ме вöча, медым Батьлöн дзирдлуныс воссис Пиыс пыр. 14 Мый коранныд Менам нимöн, сiйöс Ме вöча». 15 «Ме кö муса тiянлы, олöй Менам тшöктöмъяс серти. 16 Ме кора Батьлысь, и Бать сетас тiянлы мöд Дорйысьöс. Сiйö пыр лоас тiянкöд. 17 Тайö Дорйысьыс – Збыльыслöн Лолыс. Муюгыдыс оз аддзы да оз тöд Сiйöс, та вöсна оз вермы сибöдны. Тi тöданныд Сiйöс, öд Сiйö тiянкöд да тiян пытшкын. 18 Öтнанытö ог коль тiянöс, Ме бöр локта тiян дiнö. 19 Регыд муюгыдыс оз нин аддзы Менö, а тi кутанныд аддзыны Менö. Ме ола, та вöсна тi тшöтш кутанныд овны. 20 Сiйö лунö тi тöдмаланныд, мый Ме – Бать пытшкын, тi – Ме пытшкынöсь, а Ме – тiян пытшкын. 21 Кодi видзö сьöлöмас Менсьым тшöктöмъясöс да олö на серти, сiйö радейтö Менö. Кодi Менö радейтö, сiйöс Менам Батьöй радейтö. Ме сiйöс тшöтш радейта да восся сылы». 22 Мöд Иуда, абу Искариот, шуис Исуслы: «Господьöй, мыйла Тэ кöсъян воссьыны миянлы, а он муюгыдыслы?» 23 Исус вочавидзис: «Кодi радейтö Менö, сiйö олö Менам кывъяс серти. Менам Батьöй радейтö сiйöс. Ми локтам Батькöд да овмöдчам сы дiнö. 24 Кодi оз радейт Менö, сiйö оз ов Менам кывъяс серти. Сiйö кывъясыс, мый тi кыланныд, абу Месянь, найö – Менö мöдöдысь Батьсянь. 25 Тайöс висьталi тiянлы, кор Ме öні тiянкöд на. 26 Менам Батьöй мöдöдас Менам ним кузя Дорйысьöс – Вежа Лолöс. Сiйö велöдас тiянöс быдторйö да казьтыштас тiянлы ставсö, мый Ме висьтавлi тiянлы. 27 Лöньлун коля тiянлы. Ассьым лöньлунöс сета тiянлы, сiйö абу муюгыдыслöн лöньлун кодь. Энö майшасьöй да энö полöй. 28 Тi öд кывлiнныд Менсьым кывъясöс: "Ме муна да бöр локта тiян дiнö". Ме кö муса тiянлы, тi эськö нимкодясинныд Бать дiнö Менам мунöмысь, öд Батьöй Меысь ыджыдджык. 29 Ме водзвыв висьтала тайöс, медым лоöм бöрас тi эскинныд Меным. 30 Ог нин уна сёрнит тiянкöд, öд тайö муюгыдас ыджыдалысьыс локтö нин. Ме вылын сiйö ыджыдавны оз вермы. 31 Но медым муюгыдыс тöдiс, мый Бать Меным муса, ставсö вöча Батьлöн тшöктöм серти. Чеччöй, мунамöй татысь».
151 «Ме – збыль виноград пуыс, Менам Батьöй – виноград быдтысьыс. 2 Вотöс вайтöм увъяссö Сiйö кералö, а вотöс вайысь увсö Сiйö весалö, медым вайис унджык вотöс на. 3 Тi сöстöмöсь нин, öд Менам кывъясöй весалiсны тiянöс. 4 Лоöй Ме пытшкын, и Ме лоа тiян пытшкын. Увйыс кö абу йитчöма пуыскöд, ачыс сiйö оз вермы вайны вотöссö. Тi тшöтш онö вермöй вайны вотöссö, онö кö лоöй Ме пытшкын. 5 Ме – пуыс, тi – увъясыс. Кодi олö Ме пытшкын, а Ме сы пытшкын, сiйö вайö уна вотöс. Öд Метöг тi нинöм онö вермöй вöчнысö. 6 Кодi оз ло Ме пытшкын, увйöс моз сiйöс шыбитасны ортсö. А косьмöм увъяссö чукöртöны да шыбитöны биö. 7 Лоанныд кö Ме пытшкын, да Менам кывъясöй кö лоöны тiян пытшкын, сэки корöй, мый кöсъянныд, и лоас тiянлы. 8 Тi кö ваянныд уна вотöс да лоанныд Менам велöдчысьясöн, сэки воссяс Батьлöн дзирдлуныс. 9 Батьлы Ме ёна муса, тi Меным тшöтш ёна мусаöсь. Сiдзкö, олöй Менам муслун пытшкын. 10 Ме ставсö вöча Батьлöн тшöктöм серти да ола Сылöн муслун пытшкын. Тi кö вöчанныд Менам тшöктöм серти, сэки тшöтш кутанныд овны Менам муслун пытшкын. 11 Тайöс Ме висьталi тiянлы, медым Менам нимкодьлунöй вуджис тiянлы да тыртiс сьöлöмнытö. 12 Менам тшöктöмöй татшöм: радейтöй öта-мöднытö, кыдзи Ме радейта тiянöс. 13 Мортыс кö сетас олöмсö ёртыс вöсна, таысь ыджыдджык муслуныс абу. 14 Оланныд кö Менам тшöктöм серти, тi – Менам ёртъяс. 15 Ме ог нин шу тiянöс кесйöгъясöн. Öд кесйöг оз тöд, мый ыджыдыс вöчö. Ме шуа тiянöс ёртъясöн, öд Ме висьталi тiянлы ставсö, мый кывлi Батьсянь. 16 Энö тi Менö бöрйöй. Ме бöрйи тiянöс да мöдöдi, медым вайинныд бырлытöм вотöс. Тадзи кö вöчанныд, Батьöй сетас тiянлы ставсö, мый коранныд Сылысь Менам нимöн. 17 Ме тшöкта тiянлы: радейтöй öта-мöднытö». 18 «Муюгыдыс кö мустöмтö тiянöс, тöдöй: тiянысь водзджык на сiйö мустöмтiс Менö. 19 Тi кö вöлiнныд муюгыдсьыс, сэки эськö мусаöсь вöлiнныд муюгыдыслы. Но тi абу муюгыдсьыс, öд Ме бöрйи тiянöс сэтысь, сiйöн муюгыдыс мустöмтö тiянöс. 20 Кутöй тöд выланыд Менсьым кывъясöс: кесйöг абу ыджыдджык аслас ыджыдысь. Менö кö вöтлiсны, вöтласны тшöтш тiянöс. Менсьым кывъясöс кö кывзiсны, кывзасны тшöтш тiянлысь. 21 Ставсö тайöс найö вöчасны Менам ним вöсна, öд найö оз тöдны Менö Мöдöдысьöс. 22 Эг кö Ме лок да сёрнит накöд, найö эськö эз вöвны мыжаöсь. Öнi найö оз вермыны шуны, мый абу мыжаöсь. 23 Менö мустöмтысь Менсьым Батьöс тшöтш мустöмтö. 24 Ме кö эг вöч налöн син водзын сiйö уджъяссö, кодъясöс некод эз вöчлы, сэки эськö найö эз вöвны мыжаöсь. Öнi найö аддзылiсны Менсьым уджъясöс, но Менö да Менсьым Батьöс мустöмтöны. 25 Тадзи инö налöн Индöдын гижöмаыс: "Мустöмтöны Менö весьшöрö". 26 Ме мöдöда тiянлы Батьсянь Дорйысьöс, Сiйö – Збыльыслöн Лолыс. Сiйö локтас Батьсянь да висьталас Ме йылысь. 27 Тi тшöтш кутанныд висьтавны Ме йылысь, öд тi водзысяньыс Мекöд».
161 «Тайöс висьталi тiянлы, медым ті энö эновтчöй эскöмысь. 2 Тiянöс вöтласны синагогаысь. Весиг воас сэтшöм кад, кор тiянöс виысьяс кутасны чайтны, мый татшöм ногöн найö кесъялöны Енмыслы. 3 Найö вöчасны тадзи, öд Батьöс да Менö найö оз тöдны. 4 Тайöс Ме висьталi тiянлы, медым сiйö кадыс воигöн тi тöд выланыд уськöдiнныд Менсьым кывъясöс. Водзынсö тайöс эг висьтавлы тiянлы, öд Ме вöлi тiянкöд». 5 «Öнi муна Менö Мöдöдысь дiнö. Но некод тiян пиысь оз юав Менсьым, кытчö Ме муна. 6 Öд Менам висьталöмысь тiян сьöлöмныд тырис шогöн. 7 Ме висьтала тiянлы збыльсö: бурджык лоö, Ме кö муна. Öд ог кö мун, сэки Дорйысь оз лок тiян дiнö, а муна кö, мöдöда Сiйöс тiян дiнö. 8 Дорйысьыс локтас да эрдöдас муюгыдыслысь ылалöмсö – Сiйö висьталас налы мыж йылысь, веськыдлун йылысь да мыждöм йылысь. 9 Мыжыс сыын, мый оз эскыны Меным. 10 Веськыдлуныс сыын, мый Ме муна Батьöй дiнö да тi онö нин аддзöй Менö. 11 Мыждöмыс сыын, мый тайö муюгыдас ыджыдалысьсö мыждöма нин. 12 Унатор на верма висьтавны тiянлы, но öнi тi онö вермöй ставсö тöрöдны. 13 Збыльыслöн Лолыс локтас да велöдас тiянöс збыляс. Сiйö оз Ассяньыс кут висьтавны, а висьталас кывлöмсö да юöртас тiянлы водзö лоанасö. 14 Сiйö нимöдас Менö, öд Месянь кывлöмсö тiянлы юöртас. 15 Ставыс, мый Батьлöн, тшöтш Менам. Сiйöн Ме шуи, мый Месянь кывлöмсö тiянлы юöртас». 16 «Регыд тi онö аддзöй Менö, сэсся регыд бара аддзанныд Менö, öд Ме муна Бать дiнö». 17 Велöдчысьяс пиысь кодсюрö сёрнитiсны öта-мöдныскöд: «Мыйла Сiйö шуö: "Регыд тi онö аддзöй Менö, сэсся регыд бара аддзанныд Менö?" Мыйла Сiйö висьталö, Ме пö муна Бать дiнö?» 18 Найö шензисны: «Кыдзи гöгöрвоны Сылысь кывъяссö, кор шуö, регыд пö? Ми огö гöгöрвоöй Сылысь висьталöмсö». 19 Исус тöдiс, мый йылысь велöдчысьясыс кöсйöны юавны Сылысь, да шуис налы: «Сы йылысь-ö тi сёрнитанныд öта-мöдныдкöд, мый Ме кöсйи висьтавны тайö кывъяснас: "Регыд тi онö аддзöй Менö, сэсся регыд бара аддзанныд Менö"? 20 Веськыда, веськыда висьтала тiянлы: тi кутанныд сыркъялöмöн бöрдны, а муюгыдыс кутас нимкодясьны. Тi шогö усянныд, но тiян шогныд бергöдчас нимкодьлунö. 21 Кага вайысь ань шогсьö, кор воас кад чужтыны. Но чужтöм бöрас сылöн шогыс вунö нимкодьысла, öд муюгыдас морт чужис. 22 Öнi тi тшöтш шогсянныд, но Ме бара аддзыся тiянкöд. Сэки тiян сьöлöмныд тырас нимкодьлунöн, и тiянлысь нимкодьлунтö некод оз мырддьы. 23 Сiйö лунö тi нинöм нин онö юалöй Менсьым. Веськыда, веськыда висьтала тiянлы: Бать сетас тiянлы ставсö, мый коранныд Сылысь Менам нимöн. 24 Öнöдз тi нинöм энö корлöй Менам нимöн. Корöй, и лоö сетöма тiянлы. Сэки тiян нимкодьлунныд лоö помтöм-дортöм. 25 Ме висьтавлi тiянлы велöданвисьтъясöн. Но воас кад, кор ог нин кут тадзи сёрнитны. Сэки веськыда висьтала тiянлы Бать йылысь. 26 Сiйö лунö тi асьныд кутанныд корны Батьлысь Менам нимöн. Меным абу нин колана кевмысьны Батьлы тiян вöсна. 27 Тi асьныд мусаöсь Батьлы, öд тi радейтанныд Менö да эсканныд, мый Ме локтi Енсянь. 28 Ме локтi муюгыдас Бать дiнсянь. Öнi Ме коля муюгыдсö да бöр муна Бать дiнö». 29 Велöдчысьясыс шуисны Исуслы: «Öнi Тэ веськыда висьталан, он нин сёрнит велöданвисьтъясöн. 30 Öнi ми аддзам, мый Тэ тöдан ставсö. Миян юавтöдз на Тэ тöдан нин, мый вочавидзны. Та вöсна эскам: Тэ локтiн Енсянь». 31 Исус шуис: «Öнi тi эсканныд? 32 Воас кад да воис нин, кор тi ставныд разаланныд, Менö öтнамöс колянныд. Но Ме абу öтнам, öд Мекöд Батьöй. 33 Тайöс висьталi тiянлы, медым тiян вöлi лöньлун Ме пытшкын. Муюгыдас лоö сьöкыд тiянлы, но энö полöй, öд Ме верми муюгыдсö».
171 Тайöс висьталöм бöрын Исус видзöдлiс енэжас да шуис: «Батьöй, воис кад восьтны Пиыдлысь дзирдлунсö, медым Пиыд вермис восьтны Тэнсьыд дзирдлунтö. 2 Тэ индiн Питö ыджыдавны быдöн вылын. Сiйö сетас помтöм олöм быдöнлы, кодöс Тэ сетiн Сылы. 3 Помтöм олöмыс – тайö тöдны Тэнö, öти збыль Енмöс, да Тэöн мöдöдöм Исус Кристосöс. 4 Му вылас олiгöн Ме восьтi Тэнсьыд дзирдлунтö да вöчи Меным сетöм уджтö. 5 Батьöй, öнi сет Меным сiйö жö дзирдлунсö, кутшöм вöлi Менам дзирдлунöй му пуксьытöдзыс на, кор Ме вöлi Тэкöд. 6 Ме восьтi Тэнсьыд нимтö йöзыслы, кодъясöс Тэ сетiн Меным муюгыдсьыс. Найö – Тэнадöсь, Тэ Меным сетiн найöс. Найö видзисны Тэнсьыд Кывтö. 7 Öнi найö гöгöрвоöны: ставыс, мый Тэ сетiн Меным, тайö – Тэсянь. 8 Ме висьталi налы Тэнсьыд кывъястö. Найö сибöдiсны тайö кывъяссö да збыльысь тöдöны, мый Ме Тэсянь локтi. Найö эскöны, мый Тэ Менö мöдöдiн. 9 Ме кевмыся на вöсна. Ог став йöзыс вöсна кевмысь, кевмыся сöмын Меным сетöмаясыд вöсна, öд найö Тэнадöсь. 10 Ставыс, мый Менам, сiйö Тэнад, а мый Тэнад – сiйö Менам. Менам дзирдлунöй воссяс на пыр. 11 Ме абу нин муюгыдас, но найö муюгыдасöсь на. Ме Тэ дiнö локта. Вежа Батьöй, видз Меным сетöмаясöс Аслад нимöн, медым найö вöлiны Миян моз öтвыв. 12 Накöд муюгыдас олiгöн Ме видзи найöс, Меным сетöмаясöс, Тэнад нимöн. Ме видзи найöс, да некод эз вош на пиысь сы кындзи, кодлы колö вöлi вошнысö. Тадзи инiс Гижöдыс. 13 Öнi локта Тэ дiнö. Ме висьтала тайöс муюгыдас олiгöн на, медым Менам нимкодьлунöй тыртiс налысь сьöлöмнысö. 14 Ме висьталi налы Тэнсьыд кывтö. Муюгыдыс мустöмтö найöс, öд найö Ме моз абу тайö муюгыдсьыс. 15 Ог кевмы босьтны найöс муюгыдсьыс, кевма видзны найöс омöльысь. 16 Найö Ме моз абу тайö муюгыдсьыс. 17 Вежöд найöс збыльыд пыр. Збыльыс – тайö Тэнад кывйыд. 18 Тэ мöдöдiн Менö муюгыдас. Тэ моз жö Ме мöдöдi найöс муюгыдас. 19 На вöсна Ме сета Тэныд Ачымöс, медым збыльыс вежöдiс найöс. 20 Кевмыся ог сöмын на вöсна, кевмыся тшöтш мукöдыс вöсна, кодъяс эскöны Меным налöн висьталöм пыр. 21 Кевмыся, мед найö ставныс лоасны öтвыв. Кыдзи Тэ, Батьöй, Ме пытшкын, а Ме – Тэ пытшкын, тадзи мед найö лоасны öтвыв Миян пытшкын. Сэки муюгыдыс эскас, мый Тэ Менö мöдöдiн. 22 Меным сетöм дзирдлунтö Ме сетi тшöтш налы, медым найö вöлiны Миян моз öтвыв. 23 Ме кö на пытшкын, а Тэ – Ме пытшкын, сэки найö ставныс лоасны öтвыв. Тадзи муюгыдыс тöдмалас, мый Тэ Менö мöдöдiн, и найö мусаöсь Тэныд, кыдзи Ме муса Тэныд. 24 Батьöй, Ме кöсъя, медым Меным сетöмаясыд лоасны сэнi, кöнi Ме лоа, да аддзасны Менсьым дзирдлунöс, кодöс Тэ сетiн Меным. Öд Ме муса вöлi Тэныд му пуксьытöдзыс на. 25 Веськыда вöчысь Батьöй, муюгыдыс оз тöд Тэнö, а Ме тöда Тэнö. Öнi Тэнад сетöмаясыд тшöтш тöдöны, мый Тэ Менö мöдöдiн. 26 Ме велöдi найöс тöдны Тэнсьыд нимтö да нöшта на велöда, медым Ме вöлi на пытшкын, да медым на пытшкын вöлi сэтшöм муслун, кутшöм Тэнад муслуныд Ме дiнö».
181 Тайöс шуöм бöрын Исус мунiс велöдчысьясыскöд Кедрон ю сайö да пырис накöд сад йöрö. 2 Найö унаысь чукöртчылiсны сэтчö, сiйöн тайö йöрсö тöдiс тшöтш Иуда, Исусöс вузалысь. 3 Иуда вайöдiс сэтчö шыпуртаясöс да крам видзысьясöс, кодъясöс мöдöдiсны аркирейяс да фарисейяс. Найö локтiсны пöнаръясöн, биясöн да шыпуртъясöн. 4 Исус тöдiс нин, мый лоö Сыкöд, да воча петiс налы. Сiйö юалiс: «Кодöс тi корсянныд?» 5 Сылы вочавидзисны: «Назаретса Исусöс». Исус шуис: «Тайö Ме». Накöд орччöн сулалiс тшöтш Иуда, Исусöс вузалысь. 6 Кор Исус шуис: «Тайö Ме», шыпуртаяс бöрыньтчисны да усисны муас. 7 Исус бара юалiс: «Кодöс тi корсянныд?» Найö вочавидзисны: «Назаретса Исусöс». 8 Исус шуис налы: «Ме висьталi нин тiянлы, тайö Ме. Менö кö корсянныд, лэдзöй мукöдсö мунны». 9 Исус шуис тадзи, медым инiсны Сылöн кывъясыс: «Меным сетöмаясысь весиг öтикöс эг вошты». 10 Симон-Петырлöн вöлi шыпурт. Сiйö кыскис шыпуртсö да керыштiс аркирей кесйöглысь веськыд пельсö. Кесйöглöн нимыс вöлi Малк. 11 Исус шуис Петырлы: «Бöр пукты шыпурттö пуртöсас. Ог öмöй Ме ю сiйö чашасö, кодöс сетiс Меным Батьöй?» 12 Сэки шыпуртаяс, налöн веськöдлысьыс да крам видзысьяс босьтiсны Исусöс. Сiйöс кöрталöмöн 13 нуöдiсны медводз Аннас дiнö, Каиаф гöтырлöн бать дiнö. Сiйö вонас Каиаф аркиреялiс. 14 Буретш сiйö шулiс юдейяслöн веськöдлысьяслы, бурджык пö öти мортлы кувны войтырыс вöсна. 15 Симон-Петыр да нöшта öти велöдчысь мунiсны Исус бöрся. Аркирейлы тöдса вöлi тайö велöдчысьыс, та вöсна сiйö пырис Исускöд аркирей йöр пытшкö. 16 Петыр сулалiс йöр ортсыас, дзиръя дорас. Аркирейлы тöдса велöдчысьыс петiс, сёрнитыштiс дзиръя восьталысь анькöд да вайöдiс Петырöс йöр пытшкас. 17 Сэки аньыс юалiс Петырлысь: «Абу-ö тэ тшöтш тайö Мортыслöн велöдчысь?» Петыр шуис: «Абу». 18 Кöдзыд вöлi, та вöсна кесйöгъяс да крам видзысьяс пестiсны бипур да сы гöгöр сулалöмöн шонтысисны. Петыр тшöтш сулалiс накöд да шонтысис. 19 Аркирей юалiс Исуслысь Сылöн велöдöмыс да велöдчысьясыс йылысь. 20 Исус вочавидзис: «Ме ставсö висьтавлi восьсöн. Ме велöдi йöзсö синагогаясын да крамын, кöнi найö пыр чукöртчывлöны. Ме нинöм эг висьтавлы гусьöн. 21 Мыйла тэ Менсьым юасян? Юав Менö кывзысьяслысь, мый Ме висьтавлi налы. Найö тöдöны Менсьым висьтавлöмöс». 22 Кор Исус шуис тайöс, орччöн сулалысь видзысьыс кучкис Сылы чужöмас да шуис: «Тадзи тэ сёрнитан аркирейкöд?» 23 Исус вочавидзис: «Шуи кö мыйкö лёка, висьтав, мый лёксö шуи. Шуи кö веськыда, мыйла Менö нöйтан?» 24 Исусöс кöртавлöмöн Аннас мöдöдiс Сiйöс Каиаф аркирей дiнö. 25 Симон-Петыр сулалiс бипур дорын да шонтысис. Сылысь юалiсны: «Абу-ö тэ тшöтш Сылöн велöдчысь?» Сiйö соссис: «Абу». 26 Сэнi вöлi аркирейлöн кесйöг. Тайö кесйöгыс вöлi рöдвуж сылы, кодлысь пельсö Петыр керыштiс. Сiйö юалiс Петырлысь: «Эн-ö тэ вöв Сыкöд тшöтш сад йöрас?» 27 Петыр бара соссис. Дзик пыр кылiс петуклöн чукöстöм. 28 Асывводзнас Каиафсянь Исусöс нуöдiсны римса юралысьлöн керкаö. Юдейяслöн веськöдлысьяс эз пырны керка пытшкас, медым эз пежасьны да вермисны сёйны Ыджыд лунся сёян. 29 Пилат петiс на дiнö да шуис: «Мыйысь тi мыжаланныд тайö Мортсö?» 30 Найö вочавидзисны: «Эз кö вöв Сiйö лёк вöчысь, ми эськö эгö вайöдöй Сiйöс тэ дiнö». 31 Пилат шуис налы: «Босьтöй Сiйöс да мыждöй асланыд Индöд серти». Юдейяслöн веськöдлысьяс шуисны сылы: «Миянлы оз позь мыждыны мортöс кулöм вылö». 32 Тадзи инiсны Исуслöн кывъясыс, кутшöм ногöн Сiйö кулас. 33 Пилат бара пырис керкаö, корис ас дiнас Исусöс да юалiс: «Тэ-ö юдейяслöн Öксыыс?» 34 Исус воча шуис: «Ачыд-ö тэ тадзи мöвпалан, либö мукöдыс тадзи шуöны Ме йылысь?» 35 Пилат шуис: «Ме öд абу юдей. Тэнад войтырыд да аркирейяс сетiсны Тэнö менам киö. Мый Тэ вöчин?» 36 Исус вочавидзис: «Менам Юралöмöй абу тайö муюгыдсьыс. Вöлi кö тадзи, Менам кесъялысьясöй эськö тышкасисны Ме вöсна, медым эг шед веськöдлысьяслöн киö. Но Менам Юралöмöй абу татысь». 37 Пилат шуис Сылы: «Сiдзкö, Тэ Öксы?» Исус вочавидзис: «Тэ ачыд шуан, мый Ме Öксы. Ме чужи да локтi муюгыдас, медым висьтавны збыль йывсьыс. Кодi збыльыслöн, сiйö кывзö Менсьым кывъясöс». 38 Пилат юалiс: «Мый сiйö збыльыс?» Тайöс шуöм бöрын Пилат петiс юдейяс дiнö да шуис налы: «Ме некутшöм мыж Сылысь ог аддзы. 39 Тiян кöсйöм серти Ыджыд лун водзвылын быд во ме лэдза дзескыдiнысь öти мортöс. Кöсъянныд-ö, медым ме лэдзи тiянлы юдейяслысь Öксысö?» 40 Сэки ставныс горöдiсны: «Эн Сiйöс, а Варавваöс лэдз!» Варавва вöлi лёк вöчысь.
191 Сэки Пилат тшöктiс чорыда нöйтны Исусöс. 2 Шыпуртаяс пуктiсны Исуслы юрас лежнöгысь кыöм юркытш, пасьтöдiсны Сiйöс пемыдгöрд паськöмö 3 да шуалiсны: «Мед олас юдейяслöн Öксы!» Сэсся кучкалiсны чужöмас. 4 Пилат бара петiс йöзыс дiнö да шуис: «Ме петкöда Сiйöс тiян дiнö, медым тöдiнныд: ме некутшöм мыж Сылысь ог аддзы». 5 Исус петiс пемыдгöрд паськöма, юр вылас вöлi лежнöгысь юркытш. Пилат шуис йöзыслы: «Со, тайö Мортыс». 6 Исусöс аддзигöн аркирейяс да крам видзысьяс горöдiсны: «Тувъяв! Тувъяв Сiйöс!» Пилат шуис налы: «Тi асьныд босьтöй да тувъялöй Сiйöс. Ме некутшöм мыж Сылысь ог аддзы». 7 Найö вочавидзисны: «Миян эм Индöд. Индöдным серти Сылы колö кувны, öд Асьсö Сiйö Ен Пиöн шуö». 8 Тайöс кылöм мысти Пилат ёнджыка на повзис. 9 Сiйö пырис керкаас да юалiс Исуслысь: «Тэ кытысь?» Исус сылы нинöм эз вочавидз. 10 Пилат шуис: «Он кöсйы сёрнитны мекöд? Он öмöй Тэ тöд, мый ме верма тувъявны Тэнö, верма и мездыны?» 11 Исус вочавидзис: «Тэ эськö нинöм эн вермы вöчны Мекöд, эз кö вöв сетöма тэныд вылiсянь. Та вöсна Менö вузалысь ёнджыка на мыжа». 12 Та бöрти Пилат ёнджыка на кöсйис лэдзны Исусöс, но юдейяс горзiсны: «Сiйöс кö лэдзан, кесарлы тэ абу ёрт. Öд кодi пуктö асьсö öксыö, сiйö паныд мунö кесарлы». 13 Тайöс кылöм бöрын Пилат петкöдiс Исусöс ывлаö, ачыс пуксис мыждан пуклöсö, кодi сулалiс Изэрд вылын. Юдейяс тайö Изэрдсö шуисны Гаввафаöн. 14 Тайö вöлi Ыджыд лунлы паныд, лун шöрнас. Пилат шуис юдейяслы: «Со, тiян Öксыныд!» 15 Найö горöдiсны: «Босьт, тувъяв Сiйöс!» Пилат юалiс: «Тiянлысь Öксытö тувъяла?» Аркирейяс вочавидзисны: «Кесарысь кындзи миян öксыыс абу». 16 Сэки Пилат сетiс Исусöс тувъявны крестö. Исусöс нуöдiсны сэтысь. 17 Крестсö нуигтыр Исус кайис Юр лы нима керöсö, юдейяс тайö керöссö шуисны Голгопаöн. 18 Сэнi Сiйöс тувъялiсны крестö. Сыкöд орччöн öтар-мöдарсяньыс тувъялiсны кык мортöс, а шöракостаныс – Исусöс. 19 Пöвтор вылö Пилат тшöктiс гижны: «Назаретса Исус, юдейяслöн Öксы». Гижöдсö öшöдiсны крестас. 20 Тайö гижöдсö унаöн лыддисны, öд Исусöс тувъяланiныс вöлi карсянь матын. Гижöдсö вöлi гижöма еврей, грек да латин кывйöн. 21 Аркирейяс шуисны Пилатлы: «Эн гиж: "Юдейяслöн Öксы". Гиж, мый Сiйö шулiс: "Ме – юдейяслöн Öксы"». 22 Пилат вочавидзис: «Мый гижи, сiйöс гижöма нин». 23 Исусöс тувъялöм бöрын шыпуртаяс босьтiсны Сылысь паськöмсö да юкисны нёль пельö, быдöнлы вичмис öти тор. Босьтiсны тшöтш дöрöмсö. Дöрöмыс вöлi вурыстöм, дзоньнас кыöма. 24 Найö шуисны öта-мöдныслы: «Огö косявлöй дöрöмсö, вай пудъясям, кодлы сiйö вичмас». Тадзи инiс Гижöдыс: – Юкисны ас костаныс Менсьым паськöмöс, пудъясисны Менам дöрöм вöсна. Тадзи вöчисны шыпуртаяс. 25 Крест дорын сулалiсны Исуслöн мамыс, мамыслöн чойыс, Клопаслöн Марья нима гöтырыс да Магдала Марья. 26 Сэнi сулалысь мамсö да муса велöдчысьсö аддзигöн Исус шуис мамыслы: «Аньöй, тайö тэнад пиыд». 27 Сэсся шуис велöдчысьыслы: «Тайö тэнад мамыд». Сэксянь тайö велöдчысьыс босьтiс Марияöс ас дiнас. 28 Исус тöдiс, мый ставсö нин вöчöма. Сiйö шуис: «Горшöй косьмö». Тадзи инiс Гижöдыс. 29 Сэнi сулалiс шома вина тыра доз. Шыпуртаяс кöтöдiсны винаöн губка, сэсся иссоп бедь помö сатшкöмöн матыстiсны сiйöс Исуслы вомдорас. 30 Винасö видлöм бöрын Исус шуис: «Ставсö вöчöма!» Сэсся нёровтiс юрсö да лэдзис ловсö. 31 Ставыс тайö вöлi Ыджыд лунлы паныд лунö. Юдейяслöн веськöдлысьяс эз кöсйыны, медым шойясыс колисны крестын öшавны шойччан лун кежлö, öд матыстчис Ыджыд лун. Та вöсна корисны Пилатöс, медым тшöктiс чегъявны тувъялöмаяслысь кокчöр лыяссö да лэдзны найöс крест вылысь. 32 Шыпуртаяс локтiсны да чегъялiсны Исускöд орччöн тувъялöмаяслысь кокчöр лыяссö. 33 Исус дiнö матыстчöм бöрын найö аддзисны, мый Сiйö кулöма нин. Та вöсна кокчöр лыяссö Сылысь эз чегъявны. 34 Шыпуртаяс пиысь öти бытшкис Исуслы шынас ордлы костас, сэтысь чепöсйис вир да ва. 35 Тайöс аддзылысь висьталö та йылысь, медым тi эскинныд. Öд сылöн висьталöмыс веськыд. Сiйö тöдö, мый висьталö збыльсö. 36 Ставыс артмис Гижöдыс серти: «Сылысь лысö оз ло чегъялöма». 37 Мöдлаын тшöтш гижöма: «Кутасны видзöдны Сы вылö, кодöс бытшкасны». 38 Аримафея карысь Öсип вöлi Исуслöн гуся велöдчысь, öд сiйö полiс юдейяслöн веськöдлысьясысь. Сiйö мунiс Пилат дiнö да корис Исуслысь шойсö. Пилат тшöктiс босьтны. Öсип мунiс да босьтiс Исуслысь шойсö. 39 Сэтчö локтiс тшöтш Никодим, кодi водзынджык волiс Исус дiнö войнас. Сiйö вайис комын кило кымын смирнаысь да алоэысь вöчöм мавтас. 40 Найö босьтiсны Исуслысь шойсö да гартыштiсны сiйöс дзебан дöраö, кодöс вöлi кöтöдöма чöскыд дука мавтасöн. Тадзи дзеблiсны юдейяс кулöмаясöс. 41 Исусöс тувъяланiнсянь матын вöлi сад йöр, сэнi вöлi выль дзебанiн. Сэтчö некодöс на эз дзеблыны. 42 Матыстчис юдейяслöн шойччан лун, та вöсна Исуслысь шойсö пуктiсны тайö дзебанiнас, öд дзебанiныс вöлi матын.
201 Шойччан лун бöрын асъя рöмыдас Магдала Марья локтiс дзебанiнö. Сiйö аддзис: изсö вöлi вештöма пыранiнсьыс. 2 Сэки котöртiс Симон-Петыр дiнö да мöд велöдчысь дiнö, кодi вöлi муса Исуслы, да шуис налы: «Господьтö нуöмаöсь дзебанiнсьыс, но огö тöдöй, кытчö Сiйöс пуктöмаöсь». 3 Петыр мöд велöдчыськöд мöдöдчисны дзебанiнас. 4 Найö кыкнанныс котöртiсны. Мöд велöдчысьыс котöртiс Петырысь тэрыбджыка да водзджык воис дзебанiн дорас. 5 Сiйö копыртчис да аддзис дзебан дöраяссö, но пытшкас эз пыр. 6 Сы бöрся локтiс Симон-Петыр, пырис дзебанiнас да аддзис сэтысь дзебан дöраяссö. 7 Юрсö гартыштан чышъянсö вöлi тубыртöма, да куйлiс мöдлаын, дöраясысь торйöн. 8 Дзебанiнас пырис тшöтш мöд велöдчысьыс, кодi водзджык воис. Сiйö аддзис тайöс да эскис. 9 Öд найö эз на гöгöрвоны Гижöдсьыс, мый Исус ловзяс. 10 Сэсся велöдчысьяс бöр мунiсны гортаныс. 11 Марья бöрдiгтыр сулалiс дзебанiн дорас. Бöрдiгмозыс сiйö копыртчöмöн видзöдлiс дзебанiн пытшкас 12 да аддзис сэтысь еджыд паськöма кык анделöс. Öтиыс пукалiс шой вöвлöминас юрладорас, а мöдыс – кокладорас. 13 Найö юалiсны: «Аньöй, мыйла тэ бöрдан?» Марья вочавидзис: «Нуöмаöсь менсьым Господьöс, и ог тöд, кытчö Сiйöс пуктöмаöсь». 14 Тайöс шуöм бöрын Марья бергöдчис бöрланьыс да аддзис сулалысь Исусöс, сöмын эз тöд Сiйöс. 15 Исус юалiс: «Аньöй, мыйла тэ бöрдан? Кодöс корсян?» Марья чайтiс, мый сыкöд сёрнитö сад йöрын уджалысь, да шуис сылы: «Ыджыдöй, тэ кö петкöдiн Сiйöс, висьтав, кытчö пуктiн. Ме босьта Сiйöс». 16 Исус шуис: «Марья!» Марья бергöдчис да шуис: «Раввуни!» Тайö лоö: «Велöдысьöй!» 17 Исус шуис сылы: «Эн инмöдчы Ме дiнö, Ме öд эг на кыпöдчы Батьöй дiнö. Мун Менам вокъяс дiнö да висьтав налы: Ме кыпöдча Аслам Батьöй да тiян Батьныд дiнö, Аслам Енмöй да тiян Енныд дiнö». 18 Магдала Марья мунiс да юöртiс велöдчысьяслы, мый аддзылiс Господьöс, да висьталiс налы Исуслысь кывъяссö. 19 Шойччан лун бöрын рытнас велöдчысьяс чукöртчисны öтлаö. Найö полiсны юдейяслöн веськöдлысьясысь да йигналiсны öдзöсъяссö. Виччысьтöг локтiс Исус, сувтiс на шöрö да шуис: «Лöнь олöм тiянлы!» 20 Тайöс шуöм бöрын Сiйö петкöдлiс налы Ассьыс кисö да ордлыяссö. Господьöс аддзигöн велöдчысьяс долыдмисны. 21 Исус шуис налы мöдысь: «Лöнь олöм тiянлы! Кыдзи Бать мöдöдiс Менö, сiдзи Ме мöдöда тiянöс». 22 Тайöс шуöм бöрын Сiйö пöльыштiс налань да шуис: «Сибöдöй Вежа Лолöс. 23 Кодлысь мыжъяссö прöститанныд, сiйöс лоö прöститöма. Кодлысь онö прöститöй, сы вылö мыжыс коляс». 24 Исус волiгöн дас кыксьыс öти, Двöйнипöв Фома, эз вöв накöд. 25 Мукöд велöдчысьыс висьталiсны сылы: «Ми аддзылiм Господьöс». Фома воча шуис: «Ог кö аддзыв кисьыс кöрттув дойяссö да ог пуктыв сэтчö чуньöс, да ог кö пуктыв ассьым киöс сылы ордлыас, ог эскы». 26 Вежон мысти велöдчысьясыс бара вöлiны керкаынöсь, Фома тшöтш вöлi накöд. Öдзöсъясыс вöлiны йиганаöсь. Исус сувтiс на шöрö да шуис: «Лöнь олöм тiянлы!» 27 Сэсся шуис Фомалы: «Нюжöдлы чуньтö да видзöдлы Менсьым киöс. Нюжöдлы китö да пуктыв Менам ордлыö. Эн ло эскытöмöн, но ло эскысьöн». 28 Фома вочавидзис: «Господьöй, менам Енмöй!» 29 Исус шуис сылы: «Тэ эскан, Менö аддзылiн да. Шудаöсь найö, кодъяс оз аддзыны, но эскöны!» 30 Исус вöчис велöдчысьясыс дырйи уна мукöд шензьöданатор. На йылысь абу гижöма тайö небöгас. 31 Тайöс гижöма, медым тi эскинныд, мый Исус эм Кристос, Ен Пи. Эсканныд кö, Сылöн нимыс пыр тiянлы вичмас олöм.
211 Та бöрти Исус петкöдчис велöдчысьясыслы Тиверия ты дорын. Сiйö петкöдчис тадзи. 2 Симон-Петыр, Двöйнипöв Фома, Галилеяса Канаысь Нафанаил, Зеведейлöн пияныс да нöшта кык велöдчысь вöлiны öтлаынöсь. 3 Симон-Петыр шуис: «Ме муна чери кыйны». Сылы шуисны: «Ми тшöтш тэкöд мунам». Найö дзик пыр пуксисны пыжö да петiсны ва вылö. Сiйö войнас налы нинöм эз шед. 4 Водз асывнас Исус сулалiс вадорас. Велöдчысьясыс эз тöдны Сiйöс. 5 Исус юалiс налысь: «Ёртъясöй, шедiс-ö тiянлы чериныд?» Найö шуисны: «Эз». 6 Исус шуис: «Чöвтöй тывнытö пыж веськыдладорас, сэки шедас». Найö чöвтiсны. Чериыс шедiс сэтшöм уна, весиг васьыс тывсö эз вермыны кыскыны. 7 Сэки велöдчысьыс, кодi вöлi муса Исуслы, шуис Петырлы: «Тайö Господь». Симон-Петыр сэки вöлi пöрччысьöма. Кор кылiс, мый тайö Господь, сiйö öдйö пасьтасис да чеччыштiс ваас. 8 Мукöд велöдчысьыс локтiсны пыжнас да кыскисны чери тыра тывсö. Найö вöлiны матынöсь вадорсяньыс, воськов кыксё сайын. 9 Вадорас матыстчöм бöрын öгыръяс вылысь аддзисны чери, орччöн вöлi нянь. 10 Исус шуис налы: «Вайыштöй кыйöм черинытö». 11 Симон-Петыр мунiс да кыскис му вылас тывсö. Сэнi тырыс вöлi гырысь чери. Чериыс вöлi сё ветымын куим, но тывйыс эз косяссьы. 12 Исус шуис налы: «Локтöй, сёйöй». Велöдчысьясыс эз лысьтны юавны Сылысь: «Кодi Тэ?» Найö тöдiсны, мый Сiйö Господь. 13 Исус локтiс, босьтiс нянь да сетiс сiйöс велöдчысьясыслы, сетiс тшöтш черисö. 14 Тайö вöлi коймöдысь нин, кор Исус петкöдчис Аслас велöдчысьяслы ловзьöм бöрас. 15 Сёйöм бöраныс Исус шуис Симон-Петырлы: «Симон, Ионалöн пи, мусаджык-ö Ме тэныд налы дорысь?» Петыр шуис Сылы: «Мусаджык, Господьöй! Тэ тöдан, мый Тэ меным муса». Исус шуис сылы: «Йирсьöд Менсьым баляясöс». 16 Сэсся мöдысь юалiс Петырлысь: «Симон, Ионалöн пи, муса-ö Ме тэныд?» Петыр шуис Сылы: «Муса, Господьöй. Тэ тöдан, мый Тэ меным муса». Исус шуис сылы: «Видз Менсьым ыжъясöс». 17 Сэсся коймöдысь юалiс: «Симон, Ионалöн пи, муса-ö Ме тэныд?» Петыр шогö усис, мый Исус коймöдысь юалiс сылысь: «Муса-ö Ме тэныд?» Сiйö вочавидзис: «Господьöй, Тэ ставсö тöдан. Тэ тöдан, мый Тэ меным муса». Исус шуис сылы: «Йирсьöд Менсьым ыжъясöс. 18 Веськыда, веськыда висьтала тэныд: том дырйиыд тэ ачыд вöнясьлiн да ветлiн, кытчö кöсйин. Пöрысьмöм бöрад нюжöдан китö, сэки мöд тэнö вöньöдас да нуöдас, кытчö он кöсйы». 19 Тайöс висьталöмнас Исус сетiс тöдны, кутшöм ногöн ковмас кувны Петырлы да нимöдны Енмöс. Сэсся шуис Петырлы: «Лок Ме бöрся». 20 Петыр бергöдчис бöрланьыс да аддзис: на бöрся локтiс сiйö велöдчысьыс, кодi вöлi муса Исуслы. Рытъя сёйигöн Исуслы морöс бердас топöдчöмöн буретш сiйö юавлiс: «Господьöй, кодi нö Тэнö вузалас?» 21 Сiйöс аддзигöн Петыр юалiс Исуслысь: «Господьöй, а сiйöс мый виччысьö?» 22 Исус шуис Петырлы: «Ме кö кöсъя, медым сiйö олiс Менам локтöдз, мый тэ майшасян та вöсна? Тэ лок Ме бöрся». 23 Та вöсна эскысьяс пöвстын паськалiс сёрни, мый тайö велöдчысьыс оз кув. Исус эз шу Петырлы, мый тайö велöдчысьыс оз кув. Сiйö шуис сöмын: «Ме кö кöсъя, медым сiйö олiс Менам локтöдз, мый тэ майшасян та вöсна?» 24 Буретш сiйö велöдчысьыс висьталö та йылысь да гижис тайöс. Ми тöдам, мый сылöн висьталöмыс веськыд. 25 Уна мукöдтор на вöчис Исус. Но гижны кö та йылысь ставсö, сэки, ме чайта, муюгыдас эськö эз тöр та мында небöгыс. Аминь.