Яков

Яков

¹ Гижö Яков, Енлöн да Господь Исус Кристослöн кесйöг. Чолöмала дас кык чужанкотырöс, кодъяс разалöмаöсь став му пасьталаыс. ² Вокъяс, долыда нимкодясьöй, кор тiянлы ковмас нуны быдпöлöс сьöкыдсö. ³ Тi öд тöданныд: эскöмöн кö нуанныд сьöкыдсö, тi лоанныд зумыдöсь. ⁴ А зумыдлуныс мед вайöдас ассьыс уджсö тiян пытшкын помöдз, медым тi вöлiнныд дзоньнас тыр-бурöсь, да тiян эз вöв некутшöм тырмытöмтор. ⁵ Тiян пиысь кö кодлыкö оз тырмы мывкыдлуныс, мед корö Енмыслысь, и сылы лоö сетöма. Öд Енмыс быдöнлы сетö лышкыда да шуасьтöг. ⁶ Сöмын корöй эскöмöн да майшасьтöг. Öд майшасьысь морт – саридзвывса гы кодь, кодöс кыпöдö тöвнырыс да новлöдлö öтарö-мöдарö. ⁷ Мортыс кö кык ногöн мöвпалö öтитор йывсьыс, сiйö нинöм оз вöч зумыдпырысь. Татшöм мортыс мед оз чайт босьтны мыйкö Енсяньыс. ⁹ Гöль вок мед ошйысьö вылö пуктöмнас. ¹⁰ Озыр вок мед ошйысьö улö пуктöмнас, öд сiйö турунвывса дзоридз моз бырас. ¹¹ Шондi петас, пöжас да косьтас турунсö. Дзоридзыс сылöн усьö и мичлуныс бырö. Дзик тадзи кусö озыр мортлöн мырсян-пессян олöмыс. ¹² Шуда сiйö, кодi вермö венны ыштöдöмсö, öд та бöрти сылы лоö сетöма Олöмыслысь юркытш. Тайö юркытшсö Господь кöсйысис сетны Сiйöс радейтысьяслы. ¹³ Ыштöдöм дырйи некод мед оз шу: «Енмыс менö ыштöдö». Öд лёк вылас Енсö некод оз вермы ыштöдны, и Ачыс Енмыс некодöс оз ыштöд. ¹⁴ Но быд мортöс ыштöдö сылöн лёк кöсйöмыс, öд сiйö ылöдлö мортсö да кыскö сiйöс лёкас. ¹⁵ Лёк кöсйöмыс содö-быдмö да чужтö мыж, а вöчöм мыжыс чужтö кулöм. ¹⁶ Муса вокъяс, некодлы энö сетöй асьнытö ылöдлыны. ¹⁷ Быдпöлöс бурсетöмыс да тыр-бур козиныс воö вылiсянь, югыдыслöн Батьсянь. Сiйö некор оз вежсьыв, Сылöн югыдыс некор оз кус. ¹⁸ Ас кöсйöм сертиыс Сiйö чужтiс миянöс Збыльыслöн Кывнас, медым Сылöн вöчöмторъясысь ми вöлiм медводдзаясöн. ¹⁹ Муса вокъяс, быдöн мед лоö тэрыб кывзыны, но ньöжмыд сёрнитны да скöрмыны. ²⁰ Öд мортлöн скöралöмыс оз вай Ен нога веськыд олöмсö. ²¹ Та вöсна эновтчöй быдпöлöс пежсьыс да лёк вöчöмысь, рам сьöлöмöн сибöдöй тiянлы висьталöм Кывсö, öд сiйö вына мездыны тiянлысь ловнытö. ²² Энö лоöй сöмын кывзысьясöн, но Кывйыс серти олысьясöн. Öд куш кывзöмнад сöмын ылöдланныд асьнытö. ²³ Кодi кылö Енлысь Кывсö, но оз ов сы серти, сiйö рöмпöштанö чужöмсö видзöдысь кодь. ²⁴ Сiйö видзöдлас ас вылас, а вешйöм бöрас дзик пыр вунöдас чужöмсö. ²⁵ Но кодi видзöдö мездлунсö сетысь тыр-бур Индöд вылö да олö сы серти, сiйöс лоö бурсиöма уджъясыс пыр. Öд сiйö оз вунöд кывлöмасö, но олö сы серти. ²⁶ Кодкö тiян пиысь кö лыддьö асьсö вежавидзысьöн, но быдлаö вомсö восьтö, сiйö ылöдлö асьсö. Татшöм мортыслöн вежавидзöмыс нинöм оз сулав. ²⁷ Мортыс кö тöждысьö батьтöм-мамтöм челядь вöсна да дöваяс вöсна налöн сьöкыд нуигöн, да видзö асьсö тайö мувывса пежсьыс, – тайö эм Ен Бать водзын сöстöм да пежасьтöм вежавидзöм.

¹ Вокъяс, тi эсканныд Исус Кристослы, миян дзирдлуна Господьлы. Сiдзкö, энö торйöдöй йöзсö чужöм вылö видзöдöмöн. ² Шуам, тiян чукöртчанiнö пырас озыр паськöма, зарни чунькытша морт, пырас тшöтш омöлик паськöма гöль морт, ³ и озыр паськöмыс вылö видзöдöмöн тi шуанныд сылы: «Пуксьы татчö, танi бурджык местаыс», а гöль мортлы шуанныд: «Тэ сэтчö сувт» либö «Татчö пуксьы, менам кок дорö». ⁴ Но тадзи вöчигöн тi юкланныд йöзсö бурджык да лёкджык вылö да лоанныд лёк нога мыждысьясöн. ⁵ Кывзöй, муса вокъяс! Енмыс бöрйис тайö муюгыдсьыс гöльясöс, медым озырмöдны найöс эскöмöн да вичмöдны налы Юраланiнсö, кодöс Енмыс кöсйысис сетны Сiйöс радейтысьяслы. ⁶ Но тi увтыртанныд гöльясöс. Оз öмöй озыръяс дзескöдны тiянöс да кыскыны тiянöс ёрдö? ⁷ Оз öмöй озыръяс лёкöдны бур нимнытö, кодöс сетöма тiянлы? ⁸ Тi кö збыльысь оланныд Гижöдыслöн медыджыд Индöд серти: «Радейт матыссатö асьтö моз», – бура вöчанныд. ⁹ Но тi кö торйöданныд йöзсö чужöм вылö видзöдöмöн, сэки мыж вöчанныд, тiянöс мыждасны Индöдсö торкалысьöс моз. ¹⁰ Кодi олö Индöдыс серти, но торкö Индöдсьыс кöть öти тшöктöм, сiйö лоö дзоньнас Индöдсö торкалысьöн. ¹¹ Кодi шуис: «Гозъя олöмтö эн пежав», Сiйö тшöтш шуис: «Эн ви». Та вöсна, гозъя олöмтö кö он пежав, но виан кодöскö, – лоан Индöдсö торкалысьöн. ¹² Сiдзкö, олöй да сёрнитöй на моз, кодъясöс кутасны мыждыны мездлунсö сетысь индöд серти. ¹³ Öд бурсьöлöмлун ёна ыджыдджык мыждöм дорысь. Но кодi оз ло бур сьöлöма мöд дiнö, сiйöс лоö мыждöма бур сьöлöмтöг. ¹⁴ Вокъяс, кодi шуö «ме эска», а уджъясыс сылöн абуöсь, мый нö таысь бурыс? Вермас-ö татшöм эскöмыс мездыны сiйöс? ¹⁵ Шуам, кутшöмкö чойлöн либö воклöн кö абу колана паськöмыс, весиг лун кежлö сёяныс, ¹⁶ а тiян пиысь кодкö шуас сылы: «Мун лöнь сьöлöмöн, шонтысь да пöткöдчы», но ачыс оз сет сылы коланаторсö олöм вылö, мый таысь бурыс? ¹⁷ Тайöс позьö шуны тшöтш эскöм йылысь: мортыслöн уджъясыс кö абуöсь, сылöн эскöмыс кулöма. ¹⁸ Дерт, кодкö вермас шуны: «Öтилöн эм эскöм, а мöдлöн – уджъяс». Сылы тадзи вочавидза: «Петкöдлы ассьыд эскöмтö уджъястöгыд, а ме петкöдла ассьым эскöмöс уджъясын». ¹⁹ Тэ эскан: Енмыс öти, тэ бура вöчан. Весиг пеж ловъяс тадзи эскöны да тiралöны полöмнысла. ²⁰ Но кöсъян-ö тöдны, мывкыдтöм мортöй, мый уджъястöм эскöмыд – кулöм эскöм. ²¹ Миян батьным, Öвраам, вайис Исаакöс, ассьыс писö, висьпуктанiнö. Эз-ö тадзи вöчигöн сiйö ло Ен водзын веськыдöн? ²² Тэ аддзан, мый сылöн эскöмыс вöлi йитчöма уджъяскöд, а уджыс пыр сылöн эскöмыс лои тыр-бурöн. ²³ Тадзи инiсны Гижöдысь кывъясыс: «Öвраам эскис Енлы, та вöсна Енмыс шуис сiйöс веськыдöн». Та вöсна сiйöс шуöма Енлöн ёртöн. ²⁴ Тi аддзанныд, мый мортыс лоö веськыдöн оз сöмын эскöмыс пыр, но и уджъясыс пыр. ²⁵ Тадзи вöлi тшöтш Раавкöд, кырсалысь анькöд. Сiйö сибöдiс гортас израильса кыйöдчысьясöс да отсалiс налы пышйыны мöд туйöд. Тайö бур вöчöмыс вöсна Енмыс лыддис сiйöс веськыдöн. ²⁶ Кыдзи вир-яйыс ловтöг кулöма, тадзи эскöмыс уджъястöг кулöма.

¹ Вокъяс, энö унаöн зiльöй лоны велöдысьясöн. Тi öд тöданныд, мый миянöс, велöдысьясöс, кутасны чорыдджыка на мыждыны мукöдыс дорысь. ² Ми ставным унаторйын мыжмам. Кодi оз мыжмы сёрнинас, сiйö тыр-бур морт да вермö дзоньнас кутны ассьыс вир-яйсö. ³ Ми кöртвомалам вöлöс, медым сiйö кывзысис миянлысь. Тадзи ми веськöдлам сылöн став вир-яйнас. ⁴ Босьтны кö корабльяс, найö сэтшöм ыджыдöсь, найöс новлöдлö ыджыд тöвныр, но ичöтик руль отсöгöн бöжалысьыс веськöдлö корабльнас кытчö кöсйö. ⁵ Тадзи артмö и кывнымкöд: миян вир-яйын кывным – ичöтик юкöн, но сiйö вермö ошйысьны ыджыд уджъясöн. Ичöтик би вермö бырöдны уна вöр! ⁶ Миян кывным – тайö би. Миян вир-яйын сiйö – лёк чукöртанiн, сiйö пежалö дзоньнас вир-яйнымöс. Ад бисянь öзйöмöн сiйö сотö миянлысь став олöмнымöс. ⁷ Мортыс вермö лöньöдны быдпöлöс олысьöс: пемöсöс, лэбачöс, нюглясьысьöс да саридзын уялысьöс. Мортыс найöс лöньöдöма нин, ⁸ а кывсö лöньöдны некод оз вермы. Лёкыс вöсна кывсö лöньöдны он вермы, сiйö тырöма виана ядöн. ⁹ Кывйöн ми ошкам Ен Батьöс, кывйöн и ёрам Ен нога вöчöм мортöс. ¹⁰ Öти вомысь петö ошкöм и ёрöм. Вокъяс, тадзи оз вермы лоны! ¹¹ Вермас öмöй öти визувтанiнысь петны юмов да курыд ва? ¹² Вокъяс, инжир пу оз вермы вайны выя вотöс, либö виноград пу – инжир вотöс. Öти визувтанiнысь оз вермы петны сола да юмов ва. ¹³ Эм-ö тiян пöвстын мывкыда да сюсь вежöра морт? Эм кö, сiйö мед петкöдлас ассьыс мывкыдлунсö рам сьöлöмыс да бур оласногыс пыр. ¹⁴ Но тiян сьöлöмын кö эм курыд вежалöм да асьтö радейтöм, сiдзкö, энö ошйысьöй да асланыд ылöгöн энö вевттьöй збыльсö. ¹⁵ Öд татшöм мывкыдыс – абу вылiсянь сетöм мывкыд, сiйö – мувывса, мортсянь да пеж ловъяссянь. ¹⁶ Кöнi вежалöм да сöмын асьтö радейтöм, сэнi кывзысьтöмлун да быдпöлöс лёкыс. ¹⁷ Но вылiсянь сетöм мывкыдлуныс – медвойдöр сöстöм, сэсся лöнь, рам, кывзысьысь, тырöма буралöмöн да бур уджъясöн. Сiйö оз торйöд мортсö чужöм вылö видзöдöмöн, сiйö ставсö вöчö сьöлöмсяньыс. ¹⁸ Лöньлунсö вайысьяс кöдзöны лöньлунлысь кöйдыс, а тайö кöйдысыс вайö веськыда олöмыслысь вотöс.

¹ Кытысь артмö тiян пöвстын лёксьöмыс да вензьöмыс? Оз-ö чужны найö тiян ыштöмъяссянь, кодъяс дугдывтöг ыпъялöны-тышкасьöны тiян вир-яйын? ² Тi ыштанныд мый вылö кö, но нинöм онö босьтöй. Тi виаланныд да вежаланныд, но тiянлы нинöм оз вичмы. Тi вензянныд да лёксянныд, но тiян нинöм абу, öд тi онö корöй. ³ А коранныд кö, тiянлы оз ло сетöма, öд тi онö бур вылö корöй. Тi кöсъянныд могмöдны сöмын ассьыныд ыштöмтö. ⁴ Енсö эновтысьяс, тi öмöй онö тöдöй, мый мувывсакöд öтувтчысь – Енлы паныд мунö? Сiдзкö, кодi кöсйö öтувтчыны мувывсакöд, сiйö Енлы паныд мунö. ⁵ Гашкö, тi чайтанныд, мый Гижöдыс весьшöрö висьталö: «вежöгтöмöн радейтö лолыс, кодi олö миян пытшкын». ⁶ Но Енлöн буралöмыс миян дiнö ёна ыджыдджык. Öд Гижöдыс висьталö: – Вылö кыпöдчысьяслы Енмыс паныд мунö, а рамъяс дiнö Сiйö буралö. ⁷ Сiдзкö, сетчöй Енмыслы, паныд сувтöй омöльыслы, и сiйö пышъяс тiян дiнысь. ⁸ Матыстчöй Ен дiнас, и Сiйö матыстчас тiян дiнö. Мыськöй кинытö, мыж вöчысьяс! Кык бана шаньгаяс, сöстöммöдöй сьöлöмнытö! ⁹ Шогсьöй, сыркъялöй да бöрдöй! Тiян серамныд мед пöрас бöрдöмö, а гажöдчöмныд – шогсьöмö. ¹⁰ Раммöдчöй Господь водзын, и Сiйö кыпöдас тiянöс. ¹¹ Вокъяс, энö лёкöдöй öта-мöднытö! Лёкöдö кö кодкö либö мыждö ассьыс воксö, сiйö паныд мунö Индöдыслы да мыждö Индöдсö. Но тэ кö мыждан Индöдсö, сiдзкö, тэ абу Индöд серти олысь, а мыждысь. ¹² Но Индöдсö Сетысьыс да Мыждысьыс – öти. Сiйö вермö мездыны и бырöдны. А тэ кодi сэтшöмыс, медым мöдсö мыждыны? ¹³ Öнi висьтала тiянлы, тадзи шуысьяслы: «Талун-аски ми мöдöдчам сэтшöмтö карö да олам сэнi во чöж. Сэнi кутам вузасьны да озырмöдчыны». ¹⁴ Но тi весиг онö тöдöй, мый ваяс тiянлы аскиа луныс. Öд тiян олöмныд ру кодь, петкöдчылас дженьыдик кад кежлö, а сэсся бырас. ¹⁵ Бурджык тайö кывъясыс пыдди шуны тiянлы: «Шогмана кö Господьлы да ловъяöсь лоам, вöчам сiйö либö тайö». ¹⁶ А тi сöмын вылö кыпöдчанныд да ошйысянныд аснаныд. Но став тайö ошйысьöмыс – лёктор. ¹⁷ Сiдзкö, кодi тöдö, мый колö бурсö вöчны, но оз вöч, сiйö мыжмö.

¹ Öнi висьтала тiянлы, озыръяс: сыркъялöмöн бöрдöй ыджыд шогъясысь, кодъяс суасны тiянöс. ² Тiян озырлунныд сiсьмöма, паськöмнытö воз сёйöма. ³ Тiян зарниныд да эзысьныд сiмöма. Тайö сiмыс кутас висьтавны тiян мыжлун йылысь. Сiйö би моз сотас тiянлысь вир-яйнытö. Тайö бöръя кадас тi чукöртiнныд аслыныд озырлунсö. ⁴ Со, кылö горзöмыс тiян му вылын уджалысьяслöн, кодъяслы тi энö мынтысьöй. Öнi найö гораа горзöны, и налöн горзöмыс воис Господь Саваоф пельясöдз. ⁵ Тi олiнныд тайö му вылас лышкыда да быдторнас чöсмасинныд. Тi тшöгöдiнныд асьнытö, кыдзи пемöсъясöс тшöгöдöны весиг начкысян лунö. ⁶ Тi мыждiнныд да виинныд веськыда олысьöс, сiйö оз нин водзсась тiянлы. ⁷ Вокъяс, терпитöмöн виччысьöй Господьлысь локтöмсö. Видзöдлöй, кутшöм терпитöмöн виччысьö му вöдитысь, медым босьтны мулысь дона быдтассö. Сiйö виччысьö арся да тувсов зэръяс. ⁸ Тi тшöтш дыр терпитöй да лоöй зумыдöсь, öд Господьлöн локтöмыс матын нин. ⁹ Вокъяс, энö мыжалöй öта-мöднытö, медым Енмыс эз мыжды тiянöс. Öд Мыждысьыс сулалö нин öдзöс дорын. ¹⁰ Вокъяс, видзöдöй пророкъяс вылö, кодъяс сёрнитiсны Господь нимсянь. Найö терпитöмöн нуисны сьöкыдсö. ¹¹ Ми лыддям шудаöн найöс, кодъяс зумыда сулалiсны помöдз. Тi, дерт, кывлiнныд Иовлöн зумыдлун йылысь да тöданныд, мый Господь дасьтiс сылы. Öд Господь мелi да бур сьöлöма. ¹² Вокъясöй, медвойдöр кора тiянöс, энö кöсйысьöй ни енэжöн, ни муöн, ни мукöдторйöн. Тiян "да"-ныд мед лоö сöмын "да", тiян "ог"-ныд мед лоö сöмын "ог". Сэки тiянöс оз мыждыны. ¹³ Тiян пиысь кö кодкö сьöкыдалö, мед кевмысьö. Нимкодясьö кö, мед сьылö Енмöс ошкана сьыланкывъяс. ¹⁴ Висьö кö кодкö, мед корö вичкоса юрнуöдысьясöс. Найö мавтыштасны висьысьöс выйöн Господь нимсянь да кевмысясны сы вöсна. ¹⁵ Сэки эскöмöн кевмысьöмыс отсалас висьысьлы, и Господь бурдöдас сiйöс. А вöчис кö сiйö мыжъяс, сылысь мыжъяссö лоö прöститöма. ¹⁶ Висьталöй öта-мöд водзаныд ассьыныд мыжъястö да кевмысьöй öта-мöд вöснаныд, медым бурдiнныд. Öд веськыда олысьлöн кевмысьöмыс вына, сiйö вермö вöчны унатор! ¹⁷ Илля вöлi миян кодь морт. Сiйö сьöлöмсяньыс кевмысис, медым эз зэр, и му вылас эз вöв зэрыс куим во да джын. ¹⁸ Сэсся бара кевмысис, и енэжсяньыс киссис зэр. Сэки муыс сетiс быдтас. ¹⁹ Вокъяс, тiян пиысь кö кодкö кежас збыльсьыс, а мöд морт бöр бергöдас сiйöс збыляс, ²⁰ тöдöй, мый мыжа мортöс ылöг туй вылысь бергöдысь мездö сiйöс кулöмысь да вевттьö сылысь уна мыж.