Еврейяслы

Еврейяслы

¹ Енмыс важысянь унаысь да уна ногöн шыасьлiс миян батьяс дiнö пророкъяс пыр. ² Тайö бöръя кадас Сiйö шыасьлiс миян дiнö Пиыс пыр. Енмыс сетiс Сылы ставсö, Сы пыр вöчис ентыкöласö. ³ Пиыс – Енлöн яръюгыд дзирдлуныс, Сылöн пертасыс. Сiйö ставсö кутö Аслас вына кывнас. Аслас Вирнас Сiйö мыськалiс миянлысь мыжъяснымöс, пуксис Вына Енлöн веськыдладорö енэжас ⁴ да лои анделъясысь вылынджык на. Сылöн нимыс ёна тöдчанаджык налöн нимысь. ⁵ Öд ни öти анделлы Енмыс эз шулы: – Тэ – Менам Пи, талун Ме лои Тэнад Батьöн. Ни öти андел йылысь Енмыс эз шулы: – Ме лоа Сылöн Батьöн, Сiйö – Менам Пиöн. ⁶ Муюгыдас Ассьыс медводдза Чужысьсö пыртiгöн Енмыс шуö: – Копыртчылöй Сылы ставныд, Енлöн анделъяс. ⁷ Анделъяс йылысь Енмыс висьталö: – Ассьыс анделъяссö Енмыс вöчö тöвнырöн, Ассьыс кесъялысьяссö – ыпъялан биöн. ⁸ Пиыс йылысь Енмыс тадзи висьталö: – Енмöй, Тэнад юралан пуклöсыд нэмъяс чöж. Тэнад веськöдлан беддьыд – веськыдлун. ⁹ Веськыдлуныс Тэныд муса, а лёксö Тэ мустöмтан. Та вöсна, Енмöй, Тэнад Енмыд мавтыштiс Тэнö нимкодьлунöн мукöд дорысь ёнджыка на. ¹⁰ Нöшта Енмыс шуö: – Господьöй, медводз Тэ вöчин мусö, енэжыс тшöтш Тэнад вöчöмтор, ¹¹ найö бырасны, а Тэ помтöг олан. Ставыс тайö паськöм моз важмас. ¹² Кöлуйöс моз Тэ гартыштан найöс, да найö вежсясны, а Тэ некор он вежсьы. Тэнад олан лунъяслы помыс оз ло. ¹³ Некутшöм анделлы Енмыс эз шулы: – Пукав Менам веськыдладорын, кытчöдз ог пукты Тэнад кок улö Тэныд паныд мунысьясöс. ¹⁴ Анделъяс – тайö кесъялысь ловъяс. Енмыс мöдöдö найöс кесъявны налы, кодъяслы вичмас мездмöмыс.

¹ Та вöсна, миянлы ёнджыка на колö кутчысьны кывлöмаыс дiнö, медым эгö ылалöй. ² Öд анделъяс пыр висьталöм юöрыс кö вöлi вына, да быд кывзысьтöмлунысь да лёк вöчöмысь кö мыждылiсны веськыда, ³ сiдзкö, мынам-ö ми мыждöмсьыс, кутам кö нинöм туйö пуктыны тайö ыджыдторсö – мездмöмсö? Тайö мездмöмыс йылысь медводз висьталiс Господь, сэсся Сысянь кылысьяс эскöдiсны миянöс, мый тайö висьталöмыс збыль. ⁴ Тайö висьталöмсö Енмыс ёнмöдiс тадзи: висьталысьяс пыр Сiйö петкöдлiс индысьпасъяс, вöчис шензьöданаторъяс да быдпöлöс ыджыд уджъяс, Ас кöсйöм сертиыс Сiйö юклiс Вежа Ловсянь сетöмторъяс. ⁵ Енмыс эз сет анделъяслы веськöдлыны локтана муюгыднас, мый йылысь ми сёрнитам. ⁶ Кодкö гижлöма та йылысь: – Мортыс – кодi сэтшöмыс, мый Тэ казьтывлан сiйöс? Мортлöн пиыс – кодi сэтшöмыс, мый Тэ тöждысян сы вöсна? ⁷ Сöмын дженьыд кад кежлö Тэ пуктiн мортсö анделъяс дорысь улöджык, мичмöдiн сiйöс дзирдлунöн да нимöдöмöн, сувтöдiн сiйöс веськöдлыны Аслад вöчöмторнад. ⁸ Тэ ставсö пуктiн сы кок улö! Енмыс ставсö сетiс морт кипод улö, сылы нинöм эз коль сеттöмыс. Дерт, öнi оз на тыдав, мый ставсö нин сетöма морт кипод улö. ⁹ Но ми аддзам Исусöс, кодöс дженьыд кад кежлö вöлi улöджык пуктöма анделъяс дорысь. Енлöн буралöмыс вöсна Сiйö кулiс став йöзыс понда. Тайö сьöкыда кулöм вöснаыс Исусöс öнi мичмöдöма дзирдлунöн да нимöдöмöн. ¹⁰ Енмыс, Ставсöвöчысь да Ставсöкутысь, уна ныв-пиöс кöсйö вайöдны Аслас дзирдлунö. Та вöсна Исуслы, мездмöмас Нуöдысьлы, Енмыс лэдзис нуны сьöкыдсö, медым Сы пыр помöдз вайöдны Ассьыс мöвпыштöмсö. ¹¹ Вежöдысьыс да вежа войтырыс – öти Батьсянь. Та вöсна Исус оз яндысь шуны вежа войтырöс Аслас вокъясöн. ¹² Сiйö шуö: – Ме висьтала Тэ йылысь Аслам вокъяслы, нимöда Тэнö вичко водзын. ¹³ Нöшта шуö: – Ме кута лача Ен вылö, да содтö: – Со, Ме да ныв-пи, кодъясöс сетiс Меным Ен. ¹⁴ Тайö ныв-пиыслöн эм вир-яй. Та вöсна Кристос тшöтш лоис на кодьöн, медым кувлöмнас бырöдны омöльöс, кулöмыс вылын ыджыдалысьöс, ¹⁵ да мездыны кулöмысь полысьясöс. Öд став олöм чöжныс найö вöлiны полöмыслöн кöртöд улынöсь. ¹⁶ Кристос тöждысьö Öвраамсянь чужысьяс вöсна, а оз анделъяс вöсна. ¹⁷ Кристослы ковмис лоны морт кодьöн, Аслас вокъяс кодьöн, медым лоны Сылы бур сьöлöма да Енлысь кывзысьысь Аркирейöн, да медым босьтны Ас вылас йöзлысь мыжъяссö. ¹⁸ Кристос Ачыс нуис сьöкыдсö да ыштöдöмсö, та вöсна вермö отсавны ыштöдöмаяслы.

¹ Вокъяс, ме шыася тiян дiнö, вежа войтыр да Енлöн корöмаяс дiнö: видзöдöй Исус Кристос вылö. Сiйö – Енсянь Локтысь, Аркирей, Сылы ми эскам. ² Енмыс сувтöдiс Сiйöс Аркирейöн. Сiйö кесъялiс Енмыслы кывзысьöмöн, кыдзи Мöисей «быд кадö кывзысьöмöн кесъялiс Ен керкаын». ³ Керка вöчысьсö ёнджыка ошкöны керкасö дорысь. Тадзи Исусöс ёнджыка шогмö ошкыны Мöисейöс дорысь. ⁴ Быд керкалöн эм аслас вöчысь, но Ставсöвöчысьыс – Ен. ⁵ Мöисей «кывзысьöмöн кесъялiс Ен керкаын», но сiйö вöлi сöмын кесъялысь. Аслас олöмнас сiйö водзвыв петкöдлiс, мый Енмыс кöсйис висьтавны бöрынджык. ⁶ Ен керкаын Пиыс – Кристос, Сiйö кывкутöмöн веськöдлö ставнас Ен керканас. Ен керкаыс – тайö ми, лоам кö повтöмöсь да помöдз кутам зумыда кутчысьны лачаас, мыйöн ошйысям. ⁷ Вежа Лов висьталö: – Талун, Енлысь гöлöс шысö кылiгöн, ⁸ энö чорзьöдöй сьöлöмнытö, кыдзи тi вöчинныд овтöминын: кыпöдчинныд Меным паныд да дöзмöдiнныд Менö. ⁹ Сэнi тiян батьясныд нелямын во чöж аддзылiсны Менсьым уджъясöс, да ыштöдiсны-дöзмöдiсны Менö. ¹⁰ Сэки Ме дöзми на вылö да шуи: «Найö пыр ылалöмаöсь», Менам туйöд оз ветлыны. ¹¹ Та вöсна Ме дöзми на вылö да сетi кыв: «Найö оз пырны Менам шойччанiнö». ¹² Вокъяс, видзчысьöй, тiян пиысь мед некод эз вöв эскытöмöн, эз ов лёк мöвпъясöн, медым энö кежöй ловъя Енсьыс. ¹³ Быд лун ышöдöй öта-мöднытö, кытчöдз позьö на шуны "талун", мед тiян пиысь некодлöн эз чорзьы сьöлöмыс мыжлöн ылöдлöм вöсна. ¹⁴ Ми кö водзысяньыс моз помöдз кутам эскыны зумыда, сэки миянлы тшöтш вичмас Кристослöн озырлуныс. ¹⁵ Та йылысь шуöма: – Талун, Енлысь гöлöс шысö кылiгöн, энö чорзьöдöй сьöлöмнытö, кыдзи тi вöчинныд Меным паныд сувтiгöн. ¹⁶ Öд Енлысь гöлöс шысö кылысьяс пиысь кодсюрö паныд сувтiсны Енмыслы, но эз ставныс, кодъяс петiсны Мöисейкöд Египетысь. ¹⁷ Код вылö нö Енмыс скöралiс нелямын во чöжсö? Эз-ö мыж вöчысьяс вылö, кодъяслöн лыясыс колины овтöминö? ¹⁸ Кодлы нö Енмыс кыв сетiс, мый найö оз пырны Сылöн шойччанiнö? Эз-ö кывзысьтöмъяслы? ¹⁹ Ми аддзам, мый эскытöм вöснаныс найö эз пырны Ен шойччанiнö.

¹ Енлöн кöсйысьöмыс, мый ми вермам пырны Сылöн шойччанiнö, öнöдз на вына. Сiдзкö, кутам тöждысьны, мед тiян пиысь некод эз сёрмы пырны Ен шойччанiнö. ² Египетысь петысьяслы вöлi висьталöма Бур Юöрсö миянлы моз, но тайö нинöм эз сет налы, öд найö эз эскыны тайö юöрыслы да эз сибöдны сiйöс сьöлöманыс. ³ Ми эским тайö юöрыслы, сiдзкö, пырам Ен шойччанiнö. Тайö шойччанiн йывсьыс шуöма: – Ме скöрми тайö йöзыс вылö да сетi кыв: «Найö оз пырны Менам шойччанiнö». Енмыс шуис тадзи, кöть муюгыдсö вöчöм бöрын Сылöн дасьтöма нин вöлi шойччанiнсö. ⁴ Öд сизимöд лун йывсьыс Гижöдыс тадзи висьталö: «Сизимöд луннас Енмыс шойччис став Аслас уджъясысь». ⁵ Но вылынджыксö вöлi шуöма нин: «Найö оз пырны Менам шойччанiнö». ⁶ Но кодсюрö пырасны на Ен шойччанiнö. А найö, кодъяслы медводз вöлi висьталöма Ен шойччанiн йывсьыс, эз пырны сэтчö кывзысьтöмлун вöснаныс. ⁷ Та вöсна Енмыс индiс торъя лун – "талун", öд уна во мысти Давид казьтыштiс Енлысь водзынджык шуöм кывъяссö: – Талун, Енлысь гöлöс шысö кылiгöн, энö чорзьöдöй сьöлöмнытö. ⁸ Исус Навин кö вермис сетны шойччöг Египетысь петысьяслы, Енмыс эськö эз нин казьтыв кутшöмкö мöд шойччöг йылысь. ⁹ Сiдзкö, Ен войтырлöн шойччöгыс водзын на. ¹⁰ Öд мортыс кö пырöма нин Ен шойччанiнö, сiйö Енмыс моз шойччö аслас уджъясысь. ¹¹ Сiдзкö, кутам зiльны пырны Ен шойччанiнö, медым тайö кывзысьтöм йöзыс моз эгö кольöй Ен шойччанiнö пыртöг. ¹² Енлöн Кывйыс ловъя да вына. Сiйö ёсьджык на кыкнанладорсяньыс лэчтöм шыпуртысь. Сiйö пыдöдз мöрччö, торйöдö мортлысь ловсö да олöмсö, лысö да вемсö, восьтö мортлысь сьöлöмпытшса мöвпъяссö да кöсйöмсö. ¹³ Енсьыс некод оз дзебсьы, Сылы ставыс восьса, ставыс тыдалана. Сылы ставсьыс сетам воча кыв. ¹⁴ Миян эм ыджыд Аркирей – Исус, Енлöн Пи, кодi мунiс став енэжыс пыр. Сiдзкö, зумыда кутчысям эскöмас. ¹⁵ Миян эм Аркирей, кодi бура гöгöрвоö миянöс жеблун дырйи. Миянöс моз Сiйöс быдторйын вöлi ыштöдöма, но мыжсö Сiйö эз вöчлы. ¹⁶ Та вöсна ми повтöг матыстчам бур сьöлöма Енлöн юралан пуклöс дiнö, медым колана кадö босьтны Енсянь буралöмсö да бурсетöмсö отсöг вылö.

¹ Быд аркирейöс бöрйöны йöз пöвстысь да сувтöдöны кесъявны Енлы, медым вайны висьяс да сетöмторъяс йöзлöн мыжъяс вöсна. ² Татшöм аркирейыс вермö гöгöрвоны мывкыдтöмъясöс да ылалöмаясöс, öд ачыс сiйö на кодь жö вынтöм. ³ Та вöсна сылы колö вайны вись оз сöмын йöзлöн мыжъяс вöсна, тшöтш аслас мыжъяс вöсна. ⁴ Морт оз вермы ачыс асьсö индыны аркирейöн, тайöс вермö вöчны сöмын Ен. Сiйö сувтöдiс Ааронöс аркирейöн. ⁵ Тадзи и Кристос: эз Ачыс Асьсö сувтöд тайö ошкана уджыс вылö – лоны Аркирейöн. Енмыс индiс Сiйöс да шуис Сылы: – Тэ – Менам Пи, талун Ме лои Тэнад Батьöн. ⁶ Мöдлаын Енмыс нöшта висьталö: – Мелкиседек моз Тэ пыр кежлö Аркирей. ⁷ Му вылын олiгöн Исус кыз синваöн да гораа бöрдöмöн корис-кевмысис Сылы, кодi вермис мездыны Сiйöс кулöмысь. Ен кылiс Сылысь кевмöмсö, öд Исус кывзысис Сылысь. ⁸ Исус – Енлöн Пи, но сьöкыдсö нуигöн Сiйö велöдчис кывзысьны. ⁹ Сiйö помöдз вайöдiс Енлысь мöвпыштöмсö да пыр кежлö лои мездмöмсö Сетысьöн быдöнлы, кодi кывзысьö Сылысь. ¹⁰ Мелкиседекöс моз Енмыс индiс Исусöс Аркирейöн. ¹¹ Та йылысь эськö уна на позьö висьтавны, но сьöкыд висьтавнысö, öд тi онö кöсйöй кывзынысö. ¹² Видзöдлыны кö кадыс вылö, тiянлы важöн нин колö лоны велöдысьясöн, но миянлы выльысь лоö висьтавны тiянлы Енлысь Кывсö водзысяньыс. Тiянöс пыр на колö вердны йöлöн, а оз чорыд сёянöн. ¹³ Öд йöлöн пöткöдчысь – кага на, сiйö оз на гöгöрво веськыдлун йылысь велöдöмсö. ¹⁴ Но тыр арлыдаяслы колö пöткöдчыны чорыд сёянöн, öд найö вермöны нин торйöдны бурсö да лёксö.

¹ Сiдзкö, огö кольччöй Кристослöн велöдöмын медводдза воськовъясас, но кутам быдмыны-верстяммыны тыр арлыдаöдз. Миянлы абу нин колана выльысь велöдны тiянöс лёк уджъясысь бергöдчöм да Енлы эскöм йылысь, ² пыртчöм да ки пуктылöм йылысь, кулöмысь ловзьöм да пыр кежлö мыждöм йылысь. ³ Ен кö сетас, мунам водзö. ⁴ Найö, кодъяс тöдлiсны нин Бур Юöрлысь югыдсö, босьтiсны Енсянь сетöмторсö, сибöдiсны сьöлöмас Вежа Лолöс, ⁵ тöдмалiсны Ен Кывлысь бурсö да аддзылiсны локтана нэмлысь вынсö, ⁶ а сэсся бöр кежисны Кристосысь – татшöм йöзсö он нин вермы бергöдны Ен дiнö. Öд найö выльысь тувъялöны Ен Пиöс да пуктöны Сiйöс серам туйö. ⁷ Зэрöн унаысь кöтöдлöм му кö вайö му вöдитысьлы бур быдтас – Енмыс тайö мусö бурсиö. ⁸ Муыс кö быдтö сöмын йöн да ёг турун – татшöм муыс шогмытöм, сiйöс лоö ёрöма да сотöма. ⁹ Мусаяс, кöть ми тадзи шуам, но лача кутам, мый тi – бур муыс, тi кутчысянныд мездмöмас. ¹⁰ Енмыс – веськыд, Сiйö оз вунöд тiянлысь уджъяснытö да Сылöн нимыс дiнö муслуннытö. Öд тайö муслунсö тi петкöдлiнныд вежа войтырлы кесъялiгöн. ¹¹ Ми кöсъям, медым тi помöдз тадзи вöчинныд, сэки тiян лачаныд збыльмас. ¹² Энö дышöдчöй, но лоöй на кодьöсь, кодъяс эскöмöн да терпитöмöн босьтöны Енсянь кöсйысьöмасö. ¹³ Öвраамлы кöсйысигöн Енмыс Аслас нимöн кöсйысис, öд Сылöн нимысь ыджыдджыкыс абу. ¹⁴ Енмыс кöсйысис: «Ме тэнö озыра бурсиа да сета тэныд уна чужысьöс». ¹⁵ Тадзи Öвраам терпитöмыс пыр босьтiс Енсянь кöсйысьöмасö. ¹⁶ Кыв сетiгöн йöзыс кöсйысьöны мыйöнкö ас дорсьыс ыджыдджыкöн. Тайö кыв сетöмыс вынсьöдö налысь шуöмсö да пуктö пом став вензьöмлы. ¹⁷ Та вöсна Ассьыс кöсйысьöмсö Енмыс вынсьöдiс кыв сетöмöн, медым Сысянь кöсйысьöмсö босьтысьяслы бурджыка петкöдлыны, мый Сылöн мöвпъясыс вежсьывлытöмöсь. ¹⁸ Тайö кыкторйыс: Енлöн кöсйысьöмыс да кыв сетöмыс – вежсьывлытöмöсь, öд Енмыс оз вермы ылöдлыны. Тайö кыкторйыс ышöдö миянöс да отсалö кутчысьны сетöм лачаас. ¹⁹ Миян олöмын тайö лачаыс зумыд якöр кодь, сiйö видзö миянöс да отсалö пырны миянлы крамын öшалысь дöра сайö, Вежасьыс-вежаинö. ²⁰ Миянысь водзджык сэтчö пырис Исус да восьтiс миянлы туй. Мелкиседек моз Сiйö пыр кежлö лоис Аркирейöн.

¹ Мелкиседек вöлi Салим карса öксы да Медвылысса Енлöн Аркирей. Сiйö бурсиис Öвраамöс сыкöд паныдасигöн, кор Öвраам локтö вöлi öксыясöс вермöм бöрын. ² Öвраам торйöдiс Мелкиседеклы тышын шедöдöмысь дасöд юкöнсö. Мелкиседек нимлöн вежöртасыс – «веськыдлуныслöн öксы». Сiйö вöлi Салим карса öксы, та вöсна нöшта сiйöс шуöны «лöньлуныслöн öксы». ³ Мелкиседеклöн эз вöв бать-мамыс, эз вöв чужанвужйыс. Сiйö эз чужлы ни эз кувлы. Ен Пи моз сiйö пыр кежлö Аркирей. ⁴ Аддзанныд, кутшöм сiйö ыджыд! Öд ачыс Öвраам, миян айным, сетiс сылы дасöд юкöнсö, тышын шедöдöмысь медбурсö. ⁵ Левий чужанвужйысь бöрйöм попъяслы Индöд серти колö вöлi босьтны йöзлöн эмбурысь дасöд юкöнсö. Тайö юкöнсö найö босьтлiсны асланыс вокъяслысь, Öвраамсянь чужысьяслысь. ⁶ Мелкиседек эз вöв Левий чужанвужйысь, но сiйö босьтiс Öвраамсянь дасöд юкöнсö. Сiйö бурсиис Öвраамöс, кодлöн вöлi нин Енсянь кöсйысьöмыс. ⁷ Кывшутöг, тайö тадзи: ыджыдджык бурсиö ичöтджыкöс. ⁸ Дасöд юкöн босьтысь попъяс кулöны, а Мелкиседек йылысь гижöма, мый Сiйö ловъя. ⁹ Позьö шуны, мый ачыс Левий, дасöд юкöнсö босьтысь, Öвраам пыр сетiс дасöд юкöнсö Мелкиседеклы. ¹⁰ Öд Öвраамлöн Мелкиседеккöд паныдасигöн Левий вöлi нин Öвраам айыс пытшкын. ¹¹ Левий чужанвужйысь попъяслöн кесъялöм йылысь вöлi гижöма Индöдас. Тайö попъяслöн кесъялöм пыр кö вöлi позьö воны тыр-бурас, сэки эськö эз вöв колана локны мöд Аркирейлы, кодi Мелкиседек кодь, абу Аарон кодь. ¹² Попъяслöн кесъяланногыс кö вежсьö, сiдзкö, Индöдсö тшöтш колö вежны. ¹³ Но Сiйö, код йылысь танi висьталöма, вöлi мöд чужанкотырысь. На пиысь некод эз кесъявлы висьпуктанiн дорын. ¹⁴ Ми тöдам, мый миян Господь петiс Иуда чужанкотырысь. Но Мöисей нинöм эз висьтав тайö чужанкотыр йывсьыс, мый сэтысь петасны попъяс. ¹⁵ Тайö бурджыка на лои гöгöрвоана, кор локтiс мöд Аркирей, Мелкиседек кодь. ¹⁶ Сiйö лоис Аркирейöн эз морт чужанвужйысь, эз Индöд тшöктöм серти, Сiйö лоис Аркирейöн помтöм олöмлöн вынсянь. ¹⁷ Öд Гижöдыс висьталö Сы йылысь: – Мелкиседек моз Тэ пыр кежлö Аркирей. ¹⁸ Тадзи воддза тшöктöмсö вынтöмлуныс да ковтöмлуныс вöсна лои бырöдöма. ¹⁹ Öд Индöдыс нинöм эз вермы вайöдны тыр-бурöдз. Та вöсна, миянлы сетöма лача, кодi ёна бурджык Индöдыс дорысь. Тайö лачаыс отсöгöн ми матыстчам Ен дiнö. ²⁰ Тайö лачасö вöлi вынсьöдöма Енлöн кыв сетöмöн. ²¹ Левий чужанвужйысь попъясöс сувтöдiгöн эз вöв некутшöм кыв сетöм, а Исусöс Аркирейöн сувтöдiгöн Енмыс кыв сетiс. Сiйö шуис: – Господь кыв сетiс да оз веж сiйöс. Мелкиседек моз Тэ пыр кежлö Аркирей. ²² Тайö кывъясыс висьталöны, кутшöм вына сiйö йитöдыс, кодöс кöрталöма Исус пыр. ²³ Водзынсö вöлi уна поп, öд кулöм вöснаныс найö эз вермыны дыр кесъявны. ²⁴ Но Исус – Помтöг Олысь, Сiйö пыр кежлö Аркирей. ²⁵ Та вöсна Сiйö быд кадö вермö мездыны Сы пыр Ен дiнö локтысьясöс. Сiйö – Помтöг Олысь, Сiйö пыр кевмысьö на вöсна. ²⁶ Дзик татшöм аркирей колö миянлы: вежа, сöстöм да мыжтöм, кодöс торйöдöма мыжа йöзысь да кыпöдöма енэжсьыс вылöджык на. ²⁷ Мукöд аркирейлы моз Сылы абу колана быд лун вись вайны медводз аслас мыжъяс вöсна, сэсся йöзлöн мыжъяс вöсна. Öд Сiйö вайис нин Асьсö вись пыдди öтчыдысь да пыр кежлö. ²⁸ Индöд серти аркирейöн вермис лоны морт, кодлöн эмöсь тырмытöмторъяс. Но Индöдыс бöрын Енмыс сетiс кыв да сувтöдiс Аркирейöн Писö. Сiйö – тыр-бур Аркирей пыр кежлö.

¹ Миян висьталöмлöн медшöр мöвпыс татшöм: миян эм Аркирей, кодi пукалö енэжын, Вына Енлöн пуклöс веськыдладорын ² да кесъялö енэжвывса вежаинын, Енлöн збыль скинияын. Тайö скиниясö сувтöдiс Господь, а эз морт. ³ Быд аркирейöс сувтöдöны сы могысь, медым вайны вись да сетöмтор Енмыслы. Сiдзкö, миян Аркирейлы, Исуслы, тшöтш колö вöлi вись вайны Енмыслы. ⁴ Сiйö кö кольччис му вылас, сэки эськö эз вöв аркирейöн, öд танi эмöсь нин Индöд серти вись вайысьяс. ⁵ Найö кесъялöны крамын, кодöс вöчöма енэжвывсаöс моз. Крамыс – енэжвывса скиниялöн вуджöрыс, сылöн серпасыс. Та вöсна, мувывса скиниясö вöчтöдз на Енмыс висьталiс Мöисейлы: «Видзöд да ставсö вöч дзик сiдзи, кыдзи петкöдлi тэныд керöс вылын». ⁶ Мукöд аркирейлы дорысь Исуслы вöлi сетöма ёна бурджык кесъялöм. Сiйö йитöдыс, кодöс кöрталöма Исус пыр, тшöтш ёна бурджык, öд тайö йитöдыс подуласьö бурджык кöсйысьöм вылö. ⁷ Воддза йитöдыс кö вöлi тырвыйö бур, сэки эськö мöд йитöдыс эз ковмы. ⁸ Но Енмыс аддзис йöзлысь кывзысьтöмлунсö, та вöсна шуис налы: – Со, матысмöны лунъяс, кор Ме кöртала Израиль да Иуда войтыркöд выль йитöд, – висьталö Господь. ⁹ Тайö йитöдыс абу сэтшöм, кутшöмöс Ме кöрталi налöн батьяскöд, кор петкöдi найöс Египет муысь киöдныс кутöмöн. Найö торкисны Мекöд йитöдсö, та вöсна Ме бергöдчи наысь, – висьталö Господь. ¹⁰ Сiйö лунъяс бöрас Ме кöртала Израиль войтыркöд татшöм йитöд: пукта Ассьым Индöдöс налöн вежöрö да гижа налöн сьöлöмö. Ме лоа налы Енмöн, а найö – Менам войтырöн, – висьталö Господь. ¹¹ Сэки некод оз кут велöдны матыссасö, вокыс оз понды велöдны воксö: «Тöдмав Господьöс!» Öд быдöн, ичöтсянь ыджыдöдз, пондас тöдны Менö. ¹² Ме прöстита налысь мыжъяссö, некор ог казьтыв налысь лёк вöчöмсö. ¹³ Тайö йитöдсö Енмыс шуис Выль Йитöдöн. Тадзи Енмыс петкöдлiс, мый воддза йитöдыс важмис. А ставыс, мый важмöма да ковтöм, регыд бырö.

¹ Важ Йитöдас вöлi сетöма Енлы кесъялöм да мувывса скиния йылысь индöдъяс. ² Мувывса скиниясö вöлi вöчöма тадзи: скиния воддза вежöсас вöлi бикок, пызан да сы вылын Енлы вайöм няньяс. Тайö вежöсыс шусис "Вежаин". ³ Скиниялысь мöд вежöссö вöлi торйöдöма öшöдöм дöраöн. Тайö вежöсыс шусис "Вежасьыс-вежаин". ⁴ Сэнi вöлiны зарниöн эжöм тшынöдчан пызан да Йитöдлöн куд. Тайö кудсö вöлi быд боксянь эжöма зарниöн. Куд пытшкас вöлiны манна тыра зарни доз, Ааронлöн дзоридзалысь бедь да Йитöдлöн изпöвъяс. ⁵ Куд вевт вылас сулалiсны херувимъяс, Ен дзирдлуна анделъяс. Налöн бордъясыс вевттисны куд вевтсö – мыж лэдзанiнсö. Но унасö та йылысь öнi огö кутöй сёрнитны. ⁶ Тадзи вöлi лöсьöдöма скиниясö. Скиния воддза вежöсас быд лун пыравлiсны попъяс кесъявны Енлы. ⁷ Мöд вежöсас сöмын öтчыдысь вонас пырлiс аркирей. Аскöдыс сiйö вайлiс вир аслас мыжъяс вöсна да йöзлöн тöдтöг вöчöм мыжъяс вöсна. ⁸ Тайöн Вежа Лов петкöдлö, мый кытчöдз сулалö скиниялöн воддза вежöсыс, Вежасьыс-вежаинö туйыс тупкыса на. ⁹ Ставыс тайö висьталö талунъя лун йылысь, мый Енлы вайöм вись да сетöмтор оз вермы тырвыйö сöстöммöдны йöзлысь сьöлöмсö. ¹⁰ Öд став тайö вайöмторйыс вöлi йитчöма сöмын вир-яйкöд: сёян-юанкöд да мыссьöмкöд. Татшöм кесъялöмсö Енмыс лöсьöдiс сöмын кад кежлö, выль кесъяланногсö лöсьöдтöдз. ¹¹ Кор локтiс Кристос, бурсö Вайысь Аркирей, Сiйö кутiс кесъявны ёна бурджык да ыджыдджык скинияын, кодöс вöчöма абу киöн, абу мувывса ног. ¹² Кристос пырис Вежасьыс-вежаинö эз кöза вирöн, эз öшпи вирöн, а Аслас Вирöн. Тадзи Сiйö öтчыдысь да пыр кежлö мездiс миянöс мыжъясысь. ¹³ Öшпи вирöн, кöза вирöн да сотöм куканьлöн пöимöн кö резлiсны пежасьöмаясöс, медым сöстöммöдны налысь вир-яйсö, ¹⁴ сiдзкö, кымын пöв ёнджыка сöстöммöдö Кристослöн Вирыс! Вежа Лов вынöн Кристос вайис Асьсö Енлы сöстöм вись пыдди. Та вöсна Сылöн Вирыс мыськалö миянлысь сьöлöмнымöс кулöмö вайöдысь лёк вöчöмъясысь, медым ми вермим кесъявны збыль да ловъя Енлы. ¹⁵ Сiйöн Кристос лои Енма-морта костын Выль Йитöд Кöрталысьöн. Аслас кулöмöн Кристос мездiс йöзсö воддза йитöд дырйи вöчöм мыжъясысь, медым Енлöн корöмаяслы пыр кежлö вичмис Енсянь кöсйысьöмыс. ¹⁶ Мортыс кö кольö ас бöрсяыс кöсйысян гижöд, сiйö лоö вына сöмын мортыслöн кулöм бöрын. ¹⁷ Öд мортыс кö ловъя на, гижöдыс вынтöм. Сiйö лоö вына сöмын мортыслöн кулöм бöрын. ¹⁸ Та вöсна воддза йитöдсö вöлi вынсьöдöма вирöн. ¹⁹ Мöисей висьталiс йöзыслы Индöдысь став тшöктöмсö. Сэсся босьтiс öшпиянлысь да кöзаяслысь ваöн соралöм вир, югыдгöрд вурун, иссоп бедь да резiс тайöн медводз Индöд небöгсö, сэсся став йöзсö. ²⁰ Сiйö шуис: «Тайö вирыс – йитöдлöн вир, Енмыс тшöктiс видзны тайö йитöдсö». ²¹ Сэсся Мöисей резiс вирнас тшöтш скиниясö да став кесъялан кöлуй-дозмуксö. ²² Индöд серти ставыс сöстöммö сöмын вирöн, вир кисьттöг оз вермы лоны мыжсö прöститöмыс. ²³ Сiдзкö, мувывсасö, кодöс вöчöма енэжвывсаöс моз, колö вöлi сöстöммöдны татшöм ногöн. А енэжвывсаыслы колана бурджык вись. ²⁴ Öд Кристос пырис эз киöн вöчöм скинияö, кодöс вöлi вöчöма збыль скиния серти. Сiйö пырис дзик енэжас, медым сувтны Ен водзö миян пыдди да дорйыны миянöс. ²⁵ Сiйö пырис енэжас эз сы могысь, медым выльысь вайны Асьсö вись пыдди. Öд тадзи вöчö аркирей: сiйö воысь-во пырö Вежасьыс-вежаинö пемöс вирöн. ²⁶ Кристос кö вöчис тадзи, му пуксьöмсяньыс эськö унаысь нин ковмылiс Сылы кувны. Но бöръя кадö Сiйö сöмын öтчыдысь вайис Асьсö вись пыдди мыж бырöдöм могысь. ²⁷ Мортыслы шуöма кувны öтчыдысь, сэсся лоö мыждöм. ²⁸ Тадзи Кристос öтчыдысь вайис Асьсö вись пыдди, медым бырöдны мыжсö став йöзыслысь. Мöдысь Сiйö локтас оз мыж бырöдöм могысь, а медым мездыны найöс, кодъяс виччысьöны Сiйöс.

¹ Индöдыс – сöмын локтана бурыслöн вуджöрыс, абу ачыс бурыс. Та вöсна Индöдыс некор оз вермы вöчны тыр-бурöн Ен водзö локтысьясöс, кодъяс воысь-во вайöны öтипöлöс вись. ² Индöдыс кö вермис вöчны найöс тыр-бурöн, найö эськö дугдiсны вайны висьсö. Öд висьсö öтчыдысь вайöмнас найö эськö сöстöммисны пыр кежлö, да налöн сьöлöмыс эз мыжды найöс. ³ Но быд во вайöм висьыс казьтывлö мыж йылысь. ⁴ Öд öшпилöн да кöзалöн вирыс оз вермы бырöдны мортлысь мыжъяссö. ⁵ Та вöсна муюгыдас локтiгöн Кристос шуö: – Вись да ваянтор Тэныд оз ков, Тэ дасьтiн Меным вир-яй. ⁶ Сотöм пемöс да мыж вöсна вись абу шогмана Тэныд. ⁷ Сэки Ме шуи: «Со, Ме локтi, Енмöй, збыльмöдны Тэнсьыд кöсйöмтö. Тадзи водзысяньыс вöлi висьталöма Ме йылысь небöгас». ⁸ Висьсö вайöны Индöд серти, но Кристос шуö: «Вись да ваянтор, сотöм пемöс да мыж вöсна вись Тэныд оз ков, тайö абу шогмана Тэныд». ⁹ Сэсся содтö: «Со, Ме локтi, Енмöй, збыльмöдны Тэнсьыд кöсйöмтö». Тадзи Кристос бырöдiс воддзасö – вись вайöмсö, да вежис сiйöс мöдöн – Ен кöсйöмöн. ¹⁰ Ен кöсйöм серти ми лоим вежаöсь, öд Кристос вайис Ассьыс вир-яйсö вись пыдди öтчыдысь да пыр кежлö. ¹¹ Крамын кесъялiгöн попъяс быд лун вайöны öтипöлöс вись. Но тайö висьыс оз вермы бырöдны мортлысь мыжъяссö. ¹² Кристос вайис мыж вöсна висьсö öтчыдысь да пуксис Ен веськыдладорö пыр кежлö. ¹³ Öнi Сiйö виччысьö сiйö кадсö, кор Енмыс пуктас Сы кок улö паныд мунысьяссö. ¹⁴ Висьсö öтчыдысь вайöмнас Кристос вöчис вежа войтырöс тыр-бурöн пыр кежлö. ¹⁵ Та йылысь висьталö миянлы Вежа Лов: ¹⁶ – Сiйö лунъяс бöрас Ме кöртала накöд татшöм йитöд, – висьталö Господь. Ассьым Индöдöс Ме пукта налöн сьöлöмö, да гижа налöн вежöрö. ¹⁷ Налысь мыжъяссö да лёк вöчöмсö водзö ог нин казьтыв. ¹⁸ Сiдзкö, мыжъяссö кö прöститöма, сэки висьсö вайны оз нин ков. ¹⁹ Вокъяс, Исус Кристослöн Вирöн ми вермам повтöг пырны Вежасьыс-вежаинö, öд Сiйö восьтiс миянлы выль туй, олöмас нуöдысь туй. ²⁰ Тайö туйыс вайöдö миянöс Вежасьыс-вежаинö öшöдöм дöра пыр – Кристослöн вир-яйыс пыр. ²¹ Миян эм ыджыд Аркирей, Сiйö кывкутöмöн веськöдлö ставнас Ен керканас. ²² Сiдзкö, локтам Ен водзö восьса сьöлöмöн да зумыд эскöмöн, öд миян сьöлöмным сöстöм да мыжтöм, миянлысь вир-яйнымöс мыськалöма сöстöм ваöн. ²³ Ми висьталам, мый миян эм лача. Сiдзкö, зумыда кутчысям тайö лачаас, öд миянлы Кöсйысьысьыс эскана. ²⁴ Кутам тöждысьны öта-мöдным вöсна, ышöдны öта-мöдöс муслун да бур уджъяс вылö. ²⁵ Кодсюрö дугöдчöмаöсь öтвыв чукöртчöмысь, но ми тадзи огö вöчöй. Мöдарö, кутам ёнджыка на ышöдны öта-мöднымöс, öд Господьлöн луныс матын нин. ²⁶ Ми кö тöдам збыльсö, но тöдöмöн мыж вöчам, сэки некутшöм вись оз вешты миянлысь мыжнымöс. ²⁷ Сöмын ыджыд полöмöн ковмас виччысьны мыждöмсö да яр бисö, кодi бырöдас Енлы паныд мунысьясöс. ²⁸ Мöисейлысь Индöдсö торкысьöс кö кык либö куим мортлöн висьталöм серти нем жалиттöг мыждылiсны кулöм вылö, ²⁹ сiдзкö, кымын пöв чорыдджыка лоö мыждöма сiйöс, кодi талялö Енлысь Писö, оз лыддьы вежаöн Енкöд йитысь да эскысьöс вежöдысь Вирсö, да нöшта лёкöдö Ловсö, кодi восьтö Енлысь буралöмсö. ³⁰ Ми тöдам тайö кывъяссö Шуысьöс: – Ме – водзöс Перйысьыс, Ме мынтыся ставсьыс, – шуö Господь. Нöшта содтö: – Господь кутас мыждыны Ассьыс войтырсö. ³¹ Ёна повзьöдлö веськавны ловъя Енлöн киö! ³² Видзöдлöй бöрвыланыд: Бур Юöрлысь югыдсö тöдмалöм бöрын тi верминныд мунны уна сьöкыд да тыш пыр. ³³ Тiянöс вöтлiгöн-лёкöдiгöн тi унаысь вöлiнныд серам туйынöсь. Тiян моз сьöкыдсö нуысьяскöд тi вöлiнныд орччöн. ³⁴ Кор ме пукалi дзескыдiнын, тi нуинныд сьöкыдсö мекöд öтвыв. Тiянлысь эмбуртö мырддялiгöн тi нимкодясинныд, öд тi тöдiнныд, мый енэжас тiян эм ёна бурджык да бырлытöм эмбур. ³⁵ Сiдзкö, лоöй повтöмöсь! Öд таысь тiянлы вичмас ыджыд тырдон. ³⁶ Тiянлы колö зумыдлун, медым верминныд збыльмöдны Енлысь тшöктöмсö да босьтны Сысянь кöсйысьöмасö. ³⁷ Öд гижöма: – Регыд, вывтi регыд, и Локтысьыс нюжмасьтöг воас. ³⁸ Веськыда олысь эскöмнас кутас овны, а кежас кö Меысь, Меным сiйö оз шогмы. ³⁹ Но ми абу на пöвстысь, кодi Енсьыс кежö да кулö. Ми на пöвстысь, кодi эскö да босьтö мездмöмсö.

¹ Эскöмыс – виччысянторлöн збыльмöм да аддзытöмсö аддзöм. ² Миян батьяс эскисны, та вöсна найö шогмисны Енлы. ³ Эскöмöн ми гöгöрвоам, мый ентыкöлаыс артмöма Ен Кывйöн. Тадзи аддзытöмсьыс лои аддзанаыс. ⁴ Эскöмöн Авель вайис Енлы бурджык вись Каин дорысь. Авельлöн эскöм вöсна Енмыс сибöдiс сылысь висьсö да лыддис сiйöс веськыдöн. Эскöмнас Авель весиг кулöм бöрас сёрнитö. ⁵ Эскöмыс вöсна Енокöс вöлi кыпöдöма енэжас кулöмсö тöдлытöг: «Сiйö эз ло, öд Енмыс кыпöдiс сiйöс енэжас». Кыпöдтöдзыс на Еноклы вöлi шуöма, мый «сiйö шогмана Енмыслы». ⁶ Эскытöгыд Енмыслы он шогмы. Öд Ен дiнö локтысьлы колö эскыны, мый Енмыс эм, да Сiйöс корсьысьлы Енмыс сетö тырдон. ⁷ Эскöмыс вöсна Нойлы вöлi водзвыв сетöма тöдны аддзытöмсö. Сiйö кывзысис Енмыслысь да вöчис ковчег, медым мездыны ассьыс гортсасö. Эскöмнас сiйö мыждiс муюгыдсö, эскöмыс вöсна сылы вичмис Енсянь веськыдлун. ⁸ Эскöмыс вöсна Öвраам кывзысис Енмыслысь да мунiс кöсйысьöм муö. Сiйö эз тöд, кытчö мунö, но мунiс. ⁹ Эскöмöн Öвраам овмöдчис кöсйысьöм муö да локтысь моз олiс сэнi чомъясын. Сы моз олiсны чомъясын Исаак да Яков, кодъяслы тшöтш вöлi сетöма Енлысь кöсйысьöмсö. ¹⁰ Öвраам виччысис зумыд подула кар, кодöс Серпасалысьыс да Вöчысьыс – Ачыс Енмыс. ¹¹ Сарра эз вермы вайны кага, но эскöмыс вöсна сiйö пондiс нöбасьны, да ыджыд арлыдыс вылö видзöдтöг чужтiс кага. Öд сiйö тöдiс, мый сылы Кöсйысьысьыс – эскана. ¹² Та вöсна öти мортсянь, Öвраамсянь, кодi вöлi пöрысь нин, чужис сы мында олысь. Тайö лыдсö позьö öткодявны лыдтöм-тшöттöм енэжвывса кодзувъяскöд да саридздорса лыакöд. ¹³ Став тайö йöзыс эз удитны босьтны Енсянь кöсйысьöмасö, но найö помöдз видзисны эскöмсö. Найö сöмын ылiсянь аддзылiсны Енсянь кöсйысьöмасö да нимкодясисны сыöн. Ас йывсьыныс найö шуалiсны, ми пö тайö му вылас ветлысь-мунысьяс. ¹⁴ Тадзи шуöмнас найö петкöдлiсны, мый корсьöны чужан мунысö. ¹⁵ Найö кö мöвпалiсны чужан муныс йылысь, кытысь петiсны, эськö бöр на вермисны бергöдчыны сэтчö. ¹⁶ Но найö кöсйисны овмöдчыны бурджык чужан муö – енэжö. Та вöсна Енмыс оз яндысь шуны Асьсö налöн Енмöн, öд Сiйö дасьтiс налы кар. ¹⁷ Эскöмöн Öвраам вайис вись пыдди Исаакöс, кор Енмыс кöсйис тöдмавны сылысь эскöмсö. Öвраам дась вöлi сетны вись пыдди ассьыс öтка писö, кодöс Енмыс сылы кöсйысьлiс. ¹⁸ Исаак йылысь вöлi шуöма: «Исааксянь паськалас тэнад чужанвужйыд». ¹⁹ Öвраам эскис, мый Енмыс вына ловзьöдны весиг кулöмысь. Дзик тадзи и артмис. Исаакöс вöлi бöр сетöма Öвраамлы, быттьö сiйö ловзис кулöмысь. ²⁰ Эскöмöн Исаак бурсиис Яковöс да Исавöс водзö олöмас. ²¹ Эскöмöн Яков бурсиис кулiгас Öсиплысь пиянсö да бедь вылас мыджсьöмöн копыртчылiс Енмыслы. ²² Эскöмöн Öсип кулöм водзвылас висьталiс пияныслы Израиль войтырлöн Египетысь петöм йылысь да тшöктiс петкöдны налы ассьыс лыяссö. ²³ Эскöмöн Мöисейлöн бать-мамыс дзеблалiсны сiйöс чужöм бöрас куим тöлысь чöж. Найö аддзисны, мый кагаыс зэв мича, да эз повзьыны весиг öксылöн тшöктöмысь. ²⁴ Эскöмöн Мöисей быдмöм бöрас дугдiс шуны асьсö фараон нывлöн пиöн. ²⁵ Сiйö лыддис, мый бурджык Ен войтыркöд нуны сьöкыдсö, дженьыдик кадся мыжа олöм дорысь. ²⁶ Кристос вöсна лёкöдöмсö Мöисей лыддис ыджыдджык озырлунöн египетса став озырлун дорысь. Öд сiйö тöдiс, мый сылы лоö сетöма тырдон. ²⁷ Эскöмöн Мöисей петiс Египетысь, эз повзьы öксылöн скöрлунысь. Сiйö вöлi зумыд, öд видзöдiс Тыдавтöмыс вылö. ²⁸ Эскöмöн Мöисей тшöктiс пасйыны Израиль войтырлы Ыджыд лун да мавтыштны öдзöс куричьяссö вирöн, медым Андел-Бырöдысь эз ви Израиль войтырлысь медводдза чужысьяссö. ²⁹ Эскöмöн Израиль войтыр вуджис Гöрд саридз вомöн. Найö мунiсны сэтi косiнтi моз. Египетсаяс тшöтш на моз кöсйисны вуджны, но ставныс вöйисны. ³⁰ Эскöм пыр киссисны Ерикон карса стенъяс сiйöс сизим лун кытшовтöм бöрын. ³¹ Эскöмыс вöсна Раав, кырсалысь ань, эз кув эскытöмъяскöд öтвыв, öд сiйö бур сьöлöмöн сибöдiс израильса кыйöдчысьясöс. ³² Мый нöшта содтыны татчö? Кадыс меным оз тырмы висьтавны Гедеон, Варак, Самсон, Еффай, Давид, Самуил да мукöд пророк йылысь. ³³ Эскöмöн найö тышкасьöм бöрын босьтiсны йöз муяс, ставсö вöчисны веськыда, сибöдiсны Енсянь кöсйысьöмасö, лöньöдiсны левъясöс, ³⁴ кусöдiсны яр би, видзисны асьнысö шыпуртысь, вынтöммиганыс найö ёнмылiсны, тышын вöлiны вынаöсь, йöз муысь воысь тышкасьысьясöс бöр вöтлiсны асланыс муысь, ³⁵ öткымын аньлысь матыссасö ловзьöдiсны кулöмысь. Тайö йöз пöвстысь мукöдсö вöлi дойдалöма кувтöдзыс, öд найö эз кöсйыны босьтны мортсянь вöзйöм мездлунсö, но кöсйисны босьтны бурджыксö – ловзьöмсö. ³⁶ На пиысь мукöдсö нöйтiсны орсöн, лёкöдiсны, да чептöн дорöмöн видзисны дзескыдiнын. ³⁷ Мукöдсö изъялiсны, быдногыс дойдалiсны, пилитiсны шöрипöв да виисны шыпуртöн. Найö ветлiсны кöза да ыж ку паськöмöн, пыкисны гöльлун, найöс нöйтiсны да вöтлiсны. ³⁸ Муюгыдыс эз сулав тайö йöзыс дон, кодъяслы ковмис овны овтöминын да керöсын, кырта горсйын да му потасын. ³⁹ Эскöмныс вöсна став тайö йöзыс вöлiны шогманаöсь Енмыслы, но некод на пиысь эз босьт Енлысь кöсйысьöмасö, ⁴⁰ öд Енмыс дасьтöма миянлы ёна бурджыктор. Та вöсна найö сöмын миянкöд öтвыв воасны тыр-бурас.

¹ Тi аддзанныд: миян гöгöр сы мында эскöм йылысь висьталысьыс! Сiдзкö, эновтам ставсö, мый сьöктöдö миянöс, да мыжсö, мый крукöдö миянöс. Кутам помöдз зумыда котöртны миянлы индöм туйöд ² да видзöдны Исус вылö. Сiйö – миянлы эскöмсö Сетысьыс да тырвыйö эскöмас Вайöдысьыс. Локтана нимкодьлун понда Сiйö нуис крест вылын дойсö, нинöм туйö пуктiс лёкöдöмсö да пуксис Ен пуклöс веськыдладорö. ³ Сiдзкö, мöвпалöй Сы йылысь, кодi нуис сы мында лёкöдöм мыжа йöзсянь, медым энö жебмöй да ловнаныд энö усьöй. ⁴ Тi энö на вирöдз тышкасьöй мыжыслы паныд. ⁵ Тi дзикöдз вунöдöмныд Енсянь ышöдöмсö, öд Сiйö ышöдö тiянöс пиянöс моз: – Пиöй менам! Господьсянь чирыштöмсö эн увтырт, тэнö янöдiгöн ловнад эн усь. ⁶ Кодi Енмыслы муса, сiйöс чирыштö, кодöс пи туйö пуктö, сiйöс нöйтö. ⁷ Тi кö сибöданныд Енсянь чирыштöмсö, сiдзкö, Енмыс лыддьö тiянöс Аслас пиянöн. Сюрас-ö сэтшöм пи, кодöс эськö батьыс эз чирыштлы? ⁸ Тiянöс кö эз чирыштлыны мукöд челядьöс моз, сiдзкö, тi бокысаяс, абу ас ныв-пи. ⁹ Мувывса батьяс миянöс ставнымöс чирыштлiсны, но ми пыдди пуктiм найöс. Сiдзкö, кымын пöв ёнджыка на колö кывзысьны енэжвыв Батьлысь, медым вермим овны? ¹⁰ Мувывса батьяс чирыштлiсны миянöс ас кöсйöм сертиныс регыдик кад кежлö, а Енмыс чирыштö миянöс бур вылö, медым вöлiм Сы кодь вежаöсь. ¹¹ Дерт, быдпöлöс чирыштöм вайö шогсьöм, а оз нимкодьлун. Но бöрыннас татшöм чирыштöмыс вайö мортлы бур вотöс: лöньлун да веськыдлун. ¹² Сiдзкö, ёнмöдöй лигышмунöм кинытö да жебмöм кокнытö! ¹³ Ветлöй шыльыд туйöд, медым чотысь кокныд эз музгыльтчы, а бурдiс. ¹⁴ Тöждысьöй быдöнкöд овны лöня, лоöй вежаöсь, öд вежалунтöг некод оз аддзы Господьöс. ¹⁵ Видзчысьöй, мед тiян пöвстысь некод эз вошты Енлысь буралöмсö. Некутшöм курыд вуж мед оз вужъясь тiян пöвстö, оз вай тiянлы лёксö да оз пежав некодöс. ¹⁶ Тiян пöвстын мед оз ло ни öти кырсалысь да Исав моз Енсьыс кежысь. Öти шыд тасьтi вылö сiйö вежис ассьыс медводдза чужысьлысь нимсö. ¹⁷ Тi öд тöданныд, мый бöрыннас Исав ёна корис батьсяньыс бурсиöмсö, но сылысь корöмсö вöлi öтдортöма. Исав бöрдöмöн корис та йылысь, но эз нин вермы вежны батьыслысь мöвпъяссö. ¹⁸ Тi матыстчинныд энö мувывса ыпъялысь керöс дiнö, паныдасинныд энö бушковкöд да сап пемыдыскöд, ¹⁹ локтiнныд энö труба шы улö да гора сёрни шы улö. Тайö шысö кылöм бöрын йöзыс корисны Енсö, медым дугдiс накöд сёрнитны. ²⁰ Öд найö эз вермыны кывзыны татшöм тшöктöмсö: «Весиг пемöс кö инмöдчас тайö керöсас, сiйöс лоö виöма изъясöн либö ньöвйöн». ²¹ Тайö аддзывлöмторйыс вöлi сэтшöм повзьöдана, весиг ачыс Мöисей шуис: «Менö дзöрöдö полöмöйла». ²² Мöдарö, тi матыстчинныд Сион керöс дiнö да ловъя Енлöн карыс, енэжвыв Ерусалим, дiнö. Тi локтiнныд лыдтöм-тшöттöм анделъяс дiнö ²³ да гажöдчысь йöз чукöр дiнö. Найö – Енлöн медводдза чужысьяс, налысь нимъяссö гижöма енэжас. Тi матыстчинныд став йöзсö мыждысь Ен дiнö да тыр-бурас воöм веськыда олысьяслöн ловъяс дiнö. ²⁴ Тi матыстчинныд Выль Йитöдсö Кöрталысь Исус дiнö да Сылöн сöстöммöдысь Вир дiнö. Сылöн Вирыс бурджыксö висьталö Авельлöн вирыс дорысь. ²⁵ Видзчысьöй, медым энö бергöдчöй тiянлы Висьталысьысь! Енмыс сёрнитiс му вылас Израиль войтыркöд, но найö бергöдчисны Енсьыс. Та вöсна найöс вöлi мыждöма. Сiдзкö, миянöс ёнджыка на лоö мыждöма, огö кö кывзöй енэжсянь Висьталысьöс. ²⁶ Сэки Енлöн гора сёрниыс вöрзьöдлiс мусö, но öнi Сiйö кöсйысис: – Нöшта öтчыдысь вöрзьöда мусö, ог сöмын мусö, вöрзьöда тшöтш енэжсö. ²⁷ "Нöшта öтчыдысь" шуöмыс висьталö, мый став вöчöмторсьыс вöрзянаыс бырас, коляс сöмын вöрзьывтöмыс. ²⁸ Миянлы сетöма вöрзьывтöм Юраланiн. Сiдзкö, аттьöалам Енсö да кесъялам Сылы шогмана ногöн, Сыысь полöмöн да вежавидзöмöн. ²⁹ Öд миян Енным – ставсö сотысь би.

¹ Тiян костын мед пыр лоö муслун. ² Энö вунöдöй сибöдны ветлысь-мунысьясöс. Öд тадзи вöчигöн öткымынöн сибöдiсны анделъясöс, весиг асьныс та йылысь эз тöдны. ³ Тöждысьöй дзескыдiнын пукалысьяс вöсна, быттьö тi на моз пукаланныд дзескыдiнын. Энö вунöдöй найöс, кодъясöс нöйтöны, тi öд асьныд тöданныд, мый сэтшöм дойыс. ⁴ Гозъя олöмныд мед быдöнлöн лоö сöстöм, да вольпасьныд пежасьтöм. Öд кырсалысьöс да гозъя олöм пежалысьöс мыждас Ен. ⁵ Сьöм вылö энö горшасьöй, тырмöдöй сiйö, мый эм. Öд Ачыс Енмыс шуис: – Ог коль тэнö, ог эновт тэнö. ⁶ Та вöсна, ми повтöг шуам: – Господь – менам отсöгыс, меным нинöмысь повнысö. Мый вöчас меным морт? ⁷ Энö вунöдöй ассьыныд веськöдлысьяснытö, öд найö висьтавлiсны тiянлы Ен Кывсö. Видзöдöй налöн олöм пом вылö да эскöй на моз. ⁸ Исус Кристос тöрыт, талун да нэмъяс чöж Сiйö жö. ⁹ Энö лэдзöй кежöдны асьнытö быдпöлöс ылöгвелöдöмас. Бурджык, тi кö ёнмöданныд сьöлöмнытö Енлöн буралöмöн, а онö сёян-юан йылысь велöдöмöн. Öд татшöм велöдöмыс сы серти олысьяслы нинöм бурсö оз сет. ¹⁰ Миян эм сэтшöм висьпуктанiн, кытчö вайöм висьсö оз позь сёйны скинияын кесъялысьяслы. ¹¹ Пемöсъяслысь вирсö аркирей пыртö Вежасьыс-вежаинö, тайö вирыс эм йöзлöн мыжъяс вöсна вайöм вись. А пемöсъяслысь шойсö сотöны кар ортсыас. ¹² Исус тшöтш кулiс кар ортсыас, медым Аслас Вирöн вежöдны йöзсö. ¹³ Сiдзкö, петам Исус дiнö кар ортсыас да Сы моз нуам лёкöдöмсö. ¹⁴ Öд пыр кежлö олöм вылö миянлы абу танi карыс, ми виччысям выль кар. ¹⁵ Сiдзкö, Исус пыр кутам дугдывтöг вайны Енлы аттьöалана вись, асланым вомöн кутам ошкыны Сылысь нимсö. ¹⁶ Энö вунöдöй вöчны бурсö, юксьöй сiйöн, мый эм. Öд татшöм висьыс шогмана Енмыслы. ¹⁷ Кывзысьöй вичкоса веськöдлысьяслысь, кывзöй найöс, öд найö дугдывтöг тöждысьöны тiян вöсна. Налы ковмас вочавидзны Ен водзын тiян вöсна. Кывзысьöй налысь, медым тайö уджсö найö вöчисны долыдпырысь, а эз ышлолалöмöн. Öд таысь тiянлы бурыс оз ло. ¹⁸ Кевмысьöй миян вöсна. Ми тöдам, мый миян сьöлöмным оз мыжды миянöс, öд ми ставсö кöсъям вöчны веськыда. ¹⁹ Торйöн кора кевмысьны, медым ме öдйöджык бöр верми локны тiян дiнö. ²⁰ Лöньлунсö сетысь Ен бырлытöм йитöдлöн Вирöн ловзьöдiс кулöмысь миян Господь Исус Кристосöс, ыжъяслысь вына Видзысьсö. ²¹ Енмыс мед дасьтас тiянöс быдпöлöс бур удж вылö, медым збыльмöдны Ассьыс кöсйöмсö, да Исус Кристос пыр мед вöчас тiян пытшкын Аслыс шогманасö. Енлы ошкöм нэмъяс чöж! Аминь. ²² Вокъяс, кора тiянöс: терпитöмöн сибöдöй менсьым ышöдана кывъясöс, öд ме гижи тiянлы дженьыдика. ²³ Кöсъя, мед тi тöдiнныд: Тимофей вокным петöма дзескыдiнысь. Регыд кö воас, сыкöд öтвыв локтам тiян дiнö. ²⁴ Висьталöй чолöм вичкоса веськöдлысьяслы да став вежа войтырлы. Тiянлы ыстöны чолöм италияса эскысьяс. ²⁵ Енлöн буралöмыс ставныдкöд тiянкöд. Аминь.