Галатияö

Галатияö

¹ Гижö Павел, Исус Кристосöн да Сiйöс ловзьöдысь Ен Батьöн пуктöм апостол. Эз морт менö пукты, да абу йöзлöн кöсйöм серти тайö. ² Вокъяскöд ми ставöн чолöмалам галатияса вичкояс. ³ Буралöм да лöнь олöм тiянлы Ен Батьсянь да миян Господь Исус Кристоссянь. ⁴ Ен Батьнымлöн кöсйöмыс серти Кристос сетiс Асьсö миян мыжъяс вöсна, медым мездыны миянöс лёкнас тырöм муюгыдсьыс. ⁵ Ошкöм Сылы нэмъяс чöж! Аминь. ⁶ Ме шензя: тi сэтшöм öдйö кежинныд Сыысь, кодi Кристослöн буралöмнас корис тiянöс. Кутшöм тэрыба тi сибöданныд мöдпöлöс юöрсö. ⁷ Збыльвылас кö, мöд бур юöрыс абу, эмöсь сöмын тiянöс шöйöвоштысьяс. Найö зiльöны мöдарö бергöдны Кристос йылысь Бур Юöрсö. ⁸ Но весиг кö ми либö енэжсянь андел пондам висьтавны мöд нога, огö сiйö Бур Юöрсö, мый водзынсö тiянлы висьтавлiм – мед лоö ёрöма! ⁹ Водзынсö ми шулiм нин, öнi нöшта шуа: пондас кö кодкö висьтавны оз сiйö Бур Юöрсö, мый тi миянсянь сибöдiнныд, мед лоö ёрöма сiйöс! ¹⁰ Йöзсянь-ö, Енсянь-ö виччыся ме ошкöмсö? Йöзлы öмöй зiля шогмынысö? Ме кö зiли шогмыны йöзлы, сэки эськö эг вöв Кристослöн кесйöг. ¹¹ Вокъяс, тöдöй: меöн висьталöм Евангелльöыс абу мортсянь. ¹² Эг мортсянь ме сiйöс босьт, эз морт менö велöд, но ачыс Исус Кристос восьтiс меным сiйöс. ¹³ Тi, дерт, кывлiнныд, мый водзынсö ме юдей эскöм дор вöлi, ёна вöтлi Енлысь Вичкосö да зiли бырöдны сiйöс. ¹⁴ Юдей эскöмын ме пановтi тшöтшъяясöс, ме вöлi чорыда кутчысьöма батьяслöн шуöмö. ¹⁵ Но Енмыс менö мам кынöмсянь нин бöрйöма да Аслас буралöмнас корöма. ¹⁶ Сiйö восьтiс меным Ассьыс Писö, медым ме висьтавлi Сы йылысь Бур Юöрсö ентöдтöмъяслы. Сэки ме эг кут корсьны мортсянь туйдöдöм, ¹⁷ весиг эг мун Ерусалимö меöдз на пуктöм апостолъяс дiнö. Ме мунi Аравияö, сэсянь бöр локтi Дамаскö. ¹⁸ Сöмын куим во мысти ветлi Ерусалимö тöдмасьны Петыркöд, кык вежон олi сы ордын. ¹⁹ Мукöд апостолсö ме эг аддзыв Господьлысь Яков воксö кындзи. ²⁰ Ен водзын шуа: мый гижа тiянлы, ставыс збыль. ²¹ Сэсся ме мунi Сирия да Киликия муясö. ²² Юдеяын Кристослöн вичкояс менö весиг эз на аддзывны. ²³ Сöмын кывлöмаöсь ме йылысь, миянöс пö вöтлысь, эскöмсö бырöдысь öнi ачыс ышöдö эскыны. ²⁴ Найö аттьöалiсны да ошкисны Енсö меысь.

¹ Дас нёль во мысти Варнавакöд ме бара ветлi Ерусалимö, аскöд тшöтш босьтi Титöс. ² Мунi сэтчö Енлöн восьтöмыс серти. Сэнi ме сёрнитi вичкоса пыдди пуктана йöзкöд да тöдмöдi найöс ентöдтöмъяслы висьталöм Бур Юöрöн, мед кывны, мый ог весьшöрö уджав. ³ Весиг мекöд локтысь Титöс, кöть сiйö грек войтырысь, найö эз тшöктыны вундыштчыны. ⁴ Тайöс ёна кöсйисны ылöгвокъяс. Найö сибöдчисны миян дiнö кыйöдчысьяс моз, мед тöдмавны, мыйсяма мездлун миян эм Исус Кристоссянь. Найö зiлисны бöр сюйны миянöс Индöд улö. ⁵ Но ми весиг öти здук кежлö эгö сетчылöй налы, медым Бур Юöрлöн збыльыс коли торкавтöг тiянын. ⁶ Вичкоса пыдди пуктана йöз – налöн нималöм-тöдчанлун вылö ме ог видзöд, Ен водзын ми ставным öткодьöсь – эз лыддьыны коланаöн мыйкö содтыны меöн висьталöм Бур Юöр дiнö. ⁷ Найö аддзисны, мый менö Петырöс моз Енмыс сувтöдöма буръюöртнысö: Петырöс – юдейяслы, менö – мукöд войтырлы. ⁸ Енмыс Петырлы сетiс вын апостолавны юдейяс пöвстын, меным – мукöд войтыр пöвстын. ⁹ Яков, Петыр да Иоан, кодъясöс лыддисны зумыд сюръяясöн, гöгöрвоисны, мый менö Енмыс корöма. Сэки миянлы Варнавакöд кинысö сетiсны, медым вöчны öтувъя удж. Сёрнитчим, мый найö мунасны юдейяс дiнö, ми – мукöд войтыр дiнö. ¹⁰ Сöмын найö корисны, медым ми эгö вунöдöй ерусалимса гöль эскысьясöс. Ме пыр зiля тöждысьны на вöсна. ¹¹ Петырлöн Антиокияö волiгас ме став дырйиыс паныд сувтi сылы, öд сiйö эз веськыда ов. ¹² Яковсянь мöдöдöмаяс вотöдз Петыр öтлаын сёйис мукöд войтырсакöд, а Яковлöн йöз локтöм бöрын сiйö пондiс сайласьны да öтдортчыны. Öд сiйö полiс вундыштчöм дор сулалысьясысь. ¹³ Сы моз тшöтш вöчисны мукöд юдейяс, весиг Варнава вöлi ылалöма на моз. ¹⁴ Ме аддзи, мый найö оз овны Евангелльöлöн збыльыс серти. Сэки ставныс дырйи шуи Петырлы: «Тэ, юдей, ачыд кö олан мукöд войтыр моз, а он юдей ног, мыйла мукöд войтырсö тшöктан кутчысьны юдей оласногö?» ¹⁵ Ми чужöмсяньным юдейяс, абу мыжа ентöдтöмъяс. ¹⁶ Ми тöдам, мый мортсö веськыднас вöчö Исус Кристослы эскöм, а оз Индöд серти уджъясыс. Ми эским Исус Кристослы, медым вöлiм веськыдöсь Кристослы эскöмöн, а эгö Индöд серти уджъясöн. Öд Индöд серти уджъяс некодöс оз вöчны Ен водзас веськыдöн. ¹⁷ Кристослöн веськыдлунö нырччиганым кö ми мыжмам Индöдыс водзын, сiдзкö, Кристос öмöй мыжаыс? Абу! ¹⁸ Ме кö выльысь лöсьöда мый жугöдлi, ме, сiдзкö, Индöд торкысь. ¹⁹ Мед овны Енкöд, Индöдыс пыр ме кулi Индöдыслы. Менö тувъялöма Кристоскöд. ²⁰ Öнi ог нин ме ов, но ме пытшкын олö Кристос. Ме кö ола тайö вир-яяс на, ола Ен Пилы эскöмöн. Сiйö сетiс Асьсö ме вöсна, öд ме Сылы муса. ²¹ Енлысь буралöмсö ме ог öтдорт. Öд веськыдлунсö кö вермим босьтны Индöдыс пыр, сiдзкö, Кристос весьшöрö кулiс.

¹ Тi, галатиясаяс, дзикöдз вежöртö воштöмныд! Кодi тiянлысь синнытö пöртiс, медым энö кывзысьöй збыльыслысь? Öд тiян син водзын, позьö шуны, вöлi тувъялöма Исус Кристосöс. ² Öтитор кöсъя юавны: Индöд серти уджъясöн али кывлöм Бур Юöрö эскöмöн тi сибöдiнныд Вежа Ловсö? ³ Сы выйöдз-ö тi вежöртöмöсь? Лов вынöн панiнныд, ас вынöн помаланныд? ⁴ Тi öмöй весьшöрö нуинныд сы мында сьöкыдсö? Дерт, энö весьшöрö. ⁵ Енмыс öмöй Индöд серти уджъясныд вöсна сетö Вежа Ловсö да вöчö тiян пöвстын шензьöданаторъяссö? Оз öмöй кывлöм Бур Юöрö эскöмныд вöсна? ⁶ Öвраам эскис Енлы, та вöсна Енмыс шуис сiйöс веськыдöн. ⁷ Тöдöй: эскысьяс – найö Öвраамлöн ныв-пи. ⁸ Гижöдас водзвыв висьталöма, мый эскöмныс вöсна Ен шуас веськыдöн быд войтырöс. Медводз Öвраамлы вöлi юöртöма: «Тэ пыр вуджас бурсиöмыс быд войтырлы». ⁹ Тадзи эскысь Öвраамкöд бурсиöма быд эскысьöс. ¹⁰ А Индöдö кутчысьысьяс ёрöм улынöсь. Öд гижöма: «Ёрöма быдöнöс, кодi оз ов став тшöктöмыс серти, мый гижöма Индöд небöгö». ¹¹ Индöд пыр мортыс оз ло веськыднас Ен водзын – тайö гöгöрвоана. Öд «веськыда олысь эскöмнас пондас овны». ¹² Индöдыс оз подулась эскöм вылö. Гижöма: «Индöд серти олысь Индöднас пондас овны». ¹³ Кристос ньöбис миянöс Индöдыслöн ёрöм улысь. Сiйöс лои ёрöма миян пыдди. Öд гижöма: «Ёрöма быдöнöс, кодi öшалö пу вылын». ¹⁴ Тадзи лои, медым Öвраамлы кöсйысьöм бурсиöмыс вуджис быд войтырлы Исус Кристос пыр, да медым кöсйысьöм Ловсö ми сибöдiм эскöмöн. ¹⁵ Вокъяс, весигтö олöмас тадзи: мортыс кö кольö ас бöрсяыс вынсьöдöм кöсйысян гижöд, сэки некод оз вермы торкны гижöмасö да мыйкö содтыны сэтчö. ¹⁶ Кöсйысьöмсö вöлi сетöма Öвраамлы да сысянь чужысьлы. Абу шуöма "чужысьяслы", шуöма "тэсянь чужысьлы". Тайö шуöма Кристос йылысь. ¹⁷ Ме кöсъя шуны: нёльсё комын во бöрын петöм Индöдыс оз вермы бокö вештыны Кристос йылысь Енлысь кöсйысьöмсö да бырöдны сiйöс. ¹⁸ Индöд пыр кö вуджö вичмöдöмаыс, сэки сiйö оз ло кöсйысьöм пыр. Öвраамлы Енмыс сетiс вичмöдöмасö кöсйысьöм пыр. ¹⁹ Мыйла, сiдзкö, колö Индöдыс? Сiйöс сетöма вöлi бöрынджык йöзыслöн мыж вöчöм вöсна, да сiйö вöлi вына кöсйысьöм серти чужысьлöн локтöдз. Индöдсö сетöма анделъяс пыр да шöракостас сулалысьлöн киöн. ²⁰ Но öти дырйи шöракостас сулалысьыс оз овлы, а Енмыс – öти. ²¹ Индöдыс öмöй паныд Ен кöсйысьöмлы? Абу! Индöдыс кö вермис сетны олöм, сэки веськыдлунсö эськö босьтiм Индöдыс пыр. ²² Гижöдыс йöртiс ставнысö мыж улас. Та вöсна кöсйысьöмасö эскысьяс вермасны босьтны Исус Кристослы эскöм пыр. ²³ Эскан кадыс вотöдз ми вöлiм Индöдлöн синъялöм улынöсь, вöлiм кöртöдынöсь эскöм воссьытöдзыс. ²⁴ Тадзи Индöдыс быдтiс-видзис миянöс Кристос локтöдз, медым эскöмным пыр ми лоим веськыдöсь. ²⁵ Кор воис эскан кадыс, ми мынiм видзысьлöн синъялöмысь. ²⁶ Исус Кристослы эскöм пыр тi ставныд – Енлöн ныв-пи. ²⁷ Тi пыртчинныд Кристосö, сiдзкö, тiян паськöмöн лои Кристос. ²⁸ Юдей-ö, грек-ö, кесйöг-ö, мездлуна морт-ö, айлов-ö, ань-ö – Исус Кристос пытшкын торъялöмыс абу. ²⁹ Тi кö Кристослöн, сiдзкö, Öвраамсянь чужысьяс да кöсйысьöмасö босьтысьяс.

¹ Нöшта висьтала: пиыс, кодлы вуджö бать овмöсыс, ичöт арлыднас нинöмöн оз торъяв кесйöгысь, кöть сiйö став вылас нин ыджыд. ² Батьыслöн урчитöм кадöдз керканас веськöдлöны мукöдъяс, ачыс пиыс кага видзысь киын. ³ Кодыр ми вöлiм кага кодьöсь, вöлiм муюгыд вынъяслöн кабыр улынöсь. ⁴ Кор воис урчитöм кадыс, Енмыс мöдöдiс Ассьыс Писö, кодöс ань чужтiс. Ен Пи олiс Индöд улын, ⁵ медым ньöбны Индöд улын олысьясöс, босьтны миянöс ныв-пи пыдди. ⁶ Öнi тi Енмыслöн ныв-пи. Та вöсна Ен сетiс сьöлöманыд Пиыслысь Ловсö. Тайö Лолыс шыасьö: «Авва, Батьöй!» ⁷ Сiдзкö, тi абу нин кесйöгъяс, тi – ныв-пи. Ныв-пи кö, сiдзкö, Исус Кристос пыр Енсянь вичмöдöмасö босьтысьяс. ⁸ Кор тi энö на тöдöй Енсö, вöлiнныд мукöд енъяслöн кипод улынöсь. Збыльвылас, найö абу енъяс. ⁹ Но öнi тi тöданныд Енсö, бурджык шуны, Енмыс тöдö тiянöс. Сiдзкö, мыйла тi бöр бергöдчанныд муюгыдса ковтöм жеб вынъяс дiнö да важ мозыс бара кöртасянныд сэтчö? ¹⁰ Кутчысянныд торъя лунъясö, тöлысьясö, воясö да кадъясö. ¹¹ Пола тiян вöсна, весьшöрö, буракö, менам мырсьöма-уджалöма. ¹² Вокъяс, кора тiянöс, лоöй ме кодь, öд ме тiян кодь жö. Тi менö нинöмöн энö дöзмöдöй. ¹³ Тöданныд, мый тiян дiнö волiгöн ме висьми, но тайö сетiс позянлун медводдзаысь висьтавны тiянлы Бур Юöрсö. ¹⁴ Висьöмöй вылö видзöдтöг тi сибöдiнныд менö, энö кедзовтöй да энö эновтöй. Сибöдiнныд Ен анделöс моз, Исус Кристосöс моз. ¹⁵ Кутшöм шудаöсь тi сэки вöлiнныд. А öнi мый лои? Тiян йылысь верма шуны: позис кö, тi ассьыныд синтö эськö перйинныд да сетiнныд меным. ¹⁶ Збыльсö висьталöм вöсна ме öмöй тiянлы паныд мунысьöн лои? ¹⁷ Кодсюрö оз бур могысь тöждысьны тiян вöсна. Найö кöсйöны янсöдны миянöс, медым тi тöждысинныд на вöсна. ¹⁸ Тöждысьöмыд бур, вöчанныд кö тайöс пыр, онö сöмын ме дырйи. ¹⁹ Челядь, меным бара лоö сьöкыда чужтыны тiянöс, кытчöдз Кристос оз тыдовтчы тiян олöмын. ²⁰ Кöсйи эськö öнi лоны тiян дiнын, мед тöдны, кутшöм ногöн сёрнитны тiянкöд. Ме ог гöгöрво тiянöс! ²¹ Висьталöй меным, Индöд улын овны кöсйысьяс, гöгöрвоанныд-ö тi, мый висьталö Индöдыс? ²² Сэнi гижöма, мый Öвраамлöн вöлi кык пи: öтисö чужтiс кесйöгыс, мöдсö – гöтырыс. ²³ Кесйöглöн пиыс чужис морт кöсйöмсянь, гöтырыслöн – Енлöн кöсйысьöм серти. ²⁴ Тайö висьталö кык йитöд йылысь. Öти йитöдсö вöлi кöрталöма Синай керöсын – тайö Агар, сылöн ныв-пиыс кесйöгъяс. ²⁵ Агарыс индö Аравияын Синай керöс вылö да лöсялö öнiя Ерусалимлы. Сiйö аслас челядькöд кесйöг туйын. ²⁶ Енэжвыв Ерусалимыс – мездлуна кар, сiйö миян ставнымлöн мам. ²⁷ Гижöма: – Нимкодясь, сьöктыны вермытöм да кага вайлытöм! Гораа нимкодясь, долыда гажöдчы, чужтан дойсö тöдлытöм! Öд эновтöмаыслöн ныв-пиыс ёна уна, унджык верöсыскöд олысьлöн дорысь. ²⁸ Вокъяс, ми Исаак моз кöсйысьöм серти чужысь ныв-пи. ²⁹ Сэки вир-яй кöсйöмсянь чужысьыс вöтлiс Ловсянь чужысьсö. Тадзи тшöтш öнi. ³⁰ Гижöдыс мый висьталö? Вöтлы кесйöг мамсö пиыскöд, медым кесйöг пиыслы тшöтш эз вудж гöтыр пилы кольöм овмöсыс. ³¹ Вокъяс, ми абу кесйöглöн ныв-пи, ми – гöтырыслöн.

¹ Кристос мездiс миянöс. Сідзкö, зумыда сулалöй сетöм мездлунас да энö бара пырöй сийöс улö. ² Ме, Павел, шуа тiянлы: вундыштчанныд кö, Кристос тiянлы абу колана. ³ Нöшта шуа: вундыштчöмалы колö овны Индöдлöн став тшöктöмыс серти. ⁴ Тi корсинныд веськыдлунсö Индöдö кутчысьöмöн да колинныд Кристостöг, вешйинныд буралöмсьыс бокö. ⁵ Но миянлы эскöмным пыр Енлöн Лолыс сетiс лача воöдчыны веськыдлунас. ⁶ Тэ кö Исус Кристос пытшкын, вундыштчöмыд-ö, абу-ö вундыштчöмыд, тайö нинöм оз сет. Колана сöмын муслуна эскöм. ⁷ Тi бура мунiнныд. Кодi нö падмöдiс тiянöс збыльыслысь кывзысьöмысь? ⁸ Тайö абу Сысянь, кодi корис тiянöс. ⁹ Этшаник няньшом шоммöдö дзоньнас кöтассö. ¹⁰ Господь вылö лача кутöмöн эска, мый онö кутöй мöвпавны мöд ног. Тiянöс падмöдысьясöс Енмыс мыждас. ¹¹ Вокъяс, ме кö öнi важ мозыс на сулалi вундыштчöм дор, менö нинöмысь вöлi вöтлынысö. Сэки эськö крестыс некодлы эз ло мытшöдöн. ¹² Тiянöс падмöдысьяс, колö кö, мед кодзасны асьнысö! ¹³ Вокъяс, тiянöс корöма мездлунас. Сöмын мездлунсö энö бергöдöй вир-яйлысь кöсйöмсö могмöдöмö, но мусапырысь кесъялöй öта-мöдныдлы. ¹⁴ Öд став Индöдсö шымыртöма öти шуöмö: «Радейт матыссатö асьтö моз». ¹⁵ Тi кö йиранныд-пуранныд öта-мöднытö, видзчысьöй, мед öта-мöдтö дзикöдз энö бырöдöй. ¹⁶ Висьтала тiянлы: олöй Лов серти, сэки вир-яйлысь кöсйöмсö онö могмöдöй. ¹⁷ Öд вир-яй кöсйö, мый Лов оз кöсйы, а Лов кöсйö, мый вир-яй оз кöсйы. Найö паныд сувтöны öта-мöдныслы. Та вöсна тi онö вермöй вöчны кöсъянасö. ¹⁸ Тiянöн кö Лов веськöдлö, сiдзкö, тi абу Индöдыс улынöсь. ¹⁹ Вир-яйлöн уджыс тöдса: гозъя олöм пежалöм, кырсалöм, пеж вöчöм, лэдзчысьöм оласног, ²⁰ идоллы юрбитöм, тшыкöдчöм, лöгалöм, пинясьöм, вежöгтöм, скöралöм, асьтö радейтöм, юксьöм, ылöгвелöдöм, ²¹ вежалöм, виöм, кодалöм-гажöдчöм да мукöд шогмытöмтор на. Водзынсö висьтавлi нин, öнi нöшта висьтала: татшöмторсö вöчысьлы Енлöн Юраланiныс оз вичмы. ²² Ловлöн вотöсыс – муслун, нимкодьлун, лöньлун, терпитöм, мелiлун, бурлун, эскöм, ²³ рамлун, асьтö кутöм. Таысь Индöдыс оз мыжды. ²⁴ Кодъяс Кристослöн, найö тувъялiсны вир-яйсö став сылöн лёк кöсйöмнас. ²⁵ Олам кö Лов серти, Ловлысь кöсйöмсö вöчам. ²⁶ Огö пондöй вывтiасьны, öта-мöдöс дöзмöдны да öта-мöдлы вежавны.

¹ Вокъяс, кодкö кö мыжмас, тi, Лов серти олысьяс, веськöдöй сэтшöмсö рам сьöлöмöн. Видзöдöй ас бöрсяныд, мед асьныд энö шедöй ылöгас. ² Нуöй öта-мöдныдлысь сьöкыдсö, тадзи пöртанныд олöмö Кристослысь тшöктöмсö. ³ Ас йывсьыс вывтiа мöвпалысь, кодi збыльвылас нинöм, ылöдлö ачыс асьсö. ⁴ Видзöдлы аслад уджъяс вылö, сэки мукöд водзын кыпöдчытöг верман донъявны асьтö. ⁵ Öд быдöн нуö ассьыс нöб. ⁶ Ен Кывйöн туйдöдöмаыс мед юксяс быд бурнас туйдöдысьыскöд. ⁷ Асьнытö энö ылöдлöй – Енмыс серам туйын оз ло. Мортыд мый кöдзас, сiйöс и вундас. ⁸ Кöдзас кö вир-яяс, вундас сысянь кулöм. Лолас кö кöдзас, вундас Ловсянь помтöм олöм. ⁹ Бурсö вöчигöн огö сетчöй мудзöмас, öд ас кадö вундам, огö кö лэдзöй кинымöс. ¹⁰ Эм кö на позянлун, вöчамöй бурсö быдöнлы, торъя нин эскысь чой-воклы. ¹¹ Гижа тiянлы аслам киöн, тi аддзанныд менсьым гырысь шыпасъяссö. ¹² Найö, кодъяс кöсйöны шогмыны йöзлы, тшöктöны тiянöс вундыштчыны сöмын сы могысь, медым найöс эз вöтлыны Кристос крест вöсна. ¹³ Öд вундыштчöмаяс асьныс оз овны Индöд сертиыс. Тiян вундыштчöмныд налы сöмын помка ошйысьны. ¹⁴ Ме ог кöсйы ошйысьны нинöмöн, сöмын миян Господь Исус Кристослöн крестöн. Сэнi тувъялöма муюгыдсö меным да менö – муюгыдыслы. ¹⁵ Тэ кö Исус Кристос пытшкын, вундыштчöмыд-ö, абу-ö вундыштчöмыд, тайö нинöм оз сет. Колö, мед тэ выль морт вöлiн. ¹⁶ Буралöм да лöньлун тайöс тöд выланыс кутысьяслы да Енлöн Израильлы. ¹⁷ Водзö энö сьöктöдöй менö, öд вир-яйын ме нуа Господь Исуслысь дойяссö. ¹⁸ Вокъяс, миян Господь Исус Кристослöн буралöмыс тiянкöд. Аминь.