Ефесö

Ефесö

¹ Гижö Павел, Ен кöсйöм серти Исус Кристослöн апостол. Чолöмала тiянöс, Ефес карын олысьясöс, Исус Кристослы эскысь вежа войтырöс. ² Буралöм да лöнь олöм тiянлы Ен Батьнымсянь да миян Господь Исус Кристоссянь. ³ Ошкöм Енлы, миян Господь Исус Кристослöн Батьлы! Сiйö бурсиöма миянöс Кристос пыр Ловсянь быдпöлöс бурсиöмнас, мый эм енэжас. ⁴ Сiйö бöрйöма миянöс Кристос пытшкын му пуксьытöдзыс на, медым вöлiм Сы водзын вежаöсь да сöстöмöсь. Ми ёна мусаöсь Енмыслы. ⁵ Та вöсна, Исус Кристос пыр Енмыс водзвыв шуис босьтны миянöс Аслыс ныв-пи пыдди. Татшöм Енмыслöн бур кöсйöмыс. ⁶ Сiдзкö, ошкамöй Енсö дзирдлуна буралöмсьыс, кодöс Сiйö козьналiс миянлы Аслас муса Пиыс пыр. ⁷ Кристос ньöбис миянöс Вирыс вылö да прöститiс мыжъяснымöс. Сэтшöм ыджыд Енмыслöн буралöмыс! ⁸ Енмыс лышкыда козьналiс миянлы мывкыдлунсö да гöгöрвоöмлунсö. ⁹ Бур кöсйöмыс вöсна Сiйö восьтiс миянлы Ассьыс гусяторсö – водзвыв мöвпыштöмсö. Тайö гусяторсö Сiйö восьтiс миянлы Кристос пыр, ¹⁰ медым колана кадö öтувтны став енэжвывсасö да мувывсасö Кристос веськöдлöм улö. ¹¹ Кристос пыр ми лоим Ен войтырöн, тадзи водзвыв вöлi мöвпыштöма Енмыслöн. Öд Сiйö ставсö вöчö Ас кöсйöм сертиыс. ¹² Енмыс бöрйис миянöс, Кристос вылö медводдзаясöн лача кутысьясöс, медым миян олöм пыр ошкыссис Сылöн дзирдлуныс. ¹³ Кор тi кылiнныд збыльсö, тiянöс мездöм йылысь Бур Юöрсö, тi тшöтш кутiнныд эскыны Кристослы. Сэки Енмыс пасйис тiянöс кöсйысьöм Вежа Лолöн. ¹⁴ Тайö Лолыс эскöдö миянöс, мый миянлы вичмас Енлöн кöсйысьöмыс, кор Сiйö дзикöдз мездас Ассьыс йöзсö. Сiдзкö, ошкам Енсö Сылöн дзирдлунысь! ¹⁵ Ме кывлi, мый тi эсканныд Господь Исуслы да радейтанныд став вежа войтырсö. ¹⁶ Та вöсна дугдывтöг аттьöала Енсö тiянысь да казьтывла тiянöс аслам кевмысьöмъясын. ¹⁷ Ме кора, мед миян Господь Исус Кристослöн Ен, дзирдлуныслöн Бать, сетас тiянлы мывкыдлуныслысь да восьтöмыслысь Ловсö, медым тi верминныд тöдны Сiйöс. ¹⁸ Сiйö мед югдöдас тiянлысь сьöлöмнытö, медым тi гöгöрвоинныд, кутшöм лачаö Сiйö корöма тiянöс, кутшöм ыджыд озырлун вичмö вежа войтырлы, ¹⁹ да кутшöм ыджыд Сылöн вермана выныс, кодi уджалö миян пытшкын, Сылы эскысьясын! Тайö жö вынсö ²⁰ Енмыс петкöдлiс Кристос пыр, кор ловзьöдiс Сiйöс кулöмысь да пуксьöдiс енэжас, Ас веськыдладорас, ²¹ медся вылö: быдпöлöс юралысь-веськöдлысьясысь, вынаяс-ыджыдалысьясысь да быд нимысь тайö нэмас и локтанаас. ²² Енмыс ставсö пуктiс Кристос кок улö да индiс Сiйöс медыджыдöн, Вичколы юрöн. ²³ Вичкоыс – Кристослöн Вир-яйыс да Сылöн тырвыйöлуныс, Сiйö тыртö Аснас ставсö.

¹ Енмыс ловзьöдiс тiянöс, мыжъясныд да лёк вöчöмныд вöсна кулöмаясöс. ² Öд водзынсö тi олiнныд тайö муюгыдсаыс моз, енэж улас ыджыдалысь антуслысь кывзысьöмöн. Тайö пеж лолыс öнöдз на веськöдлö кывзысьтöмъясöн. ³ Коркö ми ставным вöлiм на кодьöсь: олiм шогмытöма, вир-яйлöн кöсйöм серти. Татшöм оласногысь миянöс мукöдсö моз виччысис Енлöн скöрлуныс. ⁴ Но буралöмнас озыр Ен петкöдлiс Ассьыс ыджыд муслунсö миян дiнö. ⁵ Миянöс, лёк вöчöм вöсна кулöмаясöс, Сiйö ловзьöдiс Кристоскöд тшöтш. Сылöн буралöмыс мездiс тiянöс. ⁶ Сiйö ловзьöдiс миянöс Исус Кристоскöд да пуксьöдiс Сыкöд енэжас, ⁷ медым локтан нэмъясö олысьяслы петкöдлыны Исус Кристос пыр миян дiнö Ассьыс помтöм-дортöм буралöмсö да бурлунсö. ⁸ Öд Енмыслöн буралöмыс мездiс тiянöс эскöмныд пыр. Мездмöмыс абу тiянсянь, сiйö Енсянь козин. ⁹ Бур вöчöмыд оз мезды, медым некод эз ошйысь тайöн. ¹⁰ Ми – Енлöн вöчöмторъяс. Сiйö öтувтöма миянöс Исус Кристоскöд, медым ми вöчим бур уджъяс, кодъясöс Енмыс водзвыв нин вöлi дасьтöма миянлы. ¹¹ Кутöй тöд выланыд, мый тi чужöмсяньныд вöлiнныд ентöдтöмъясöн да вундыштчытöмъясöн. Тадзи нимтылiсны тiянöс юдейяс, вундыштчöмаяс, кодъясöс вöлi морт вундыштö. ¹² Сэки тi олiнныд Кристостöг, энö вöлöй Израиль войтырöн. Енма-тiа костын йитöдыс эз вöв, тiянлы эз вичмыв Сылöн кöсйысьöмыс, тi олiнныд тайö муюгыдас Енсö тöдтöг да лачатöг. ¹³ Коркö тi вöлiнныд ылынöсь Енсьыс, öнi тi – Кристоскöд олысьяс. Сылöн Вирыс матыстiс тiянöс Ен дiнас. ¹⁴ Кристос – миянлы бурасян йитöдыс. Сiйö öтувтiс юдейясöс да мукöд войтырöс öти войтырö да жугöдiс шöракостсьыс мытшöдсö, ¹⁵ тадзи Аслас Вир-яйнас бырöдiс на костысь лёксьöмсö. Сiйö пуктiс пом Индöдлы да сэтчö пырысь быд тшöктöмлы да велöдöмлы, медым юдейясöс да мукöд войтырöс бурöдны öта-мöдныскöд. Сiйö йитiс найöс Аскöдыс да вöчис наысь öти выль олысьöс. ¹⁶ Крест вылын кувлöмнас Сiйö бырöдiс лёксьöмсö. Тадзи öти вир-яйын Кристос бурöдiс Енмыскöд кыкнан войтырсö. ¹⁷ Сiйö локтiс юöртны бурасьöм йылысь тiянлы, кодъяс вöлiнныд ылынöсь Енсьыс, и налы, кодъяс матынöсь Ен дiнас. ¹⁸ Та вöсна ми быдöн, юдейяс да мукöд войтыр, Кристос пыр вермам локны Бать дiнö, öд миянöс ставнымöс йитö öти Лов. ¹⁹ Сiдзкö, тi абу нин бокысаяс да кыськö локтысьяс, тi – ас йöз вежа войтырлы да ныв-пи Енмыслы. ²⁰ Тiянöс сувтöдöма сiйö подув вылас, мый пуктiсны апостолъяс да пророкъяс. Тайö тэчасас пельöс изйыс – Ачыс Исус Кристос. ²¹ Сiйö йитö Аснас став тэчассö, тадзи тэчасыс кыптö да лоö Господьлöн вежа крамöн. ²² Тi – Кристос пытшкынöсь. Сiдзкö, Ен Лов отсöгöн тi тшöтш лоанныд Енмыслы оланiнöн.

¹ Та вöсна ме, Павел, Исус Кристослöн кесъялысь, пукала дзескыдiнын тiян вöсна, мукöд войтыр вöсна. ² Дерт, тi кывлiнныд нин, мый буралöмыс кузя Енмыс сетiс меным удж – кесъявны тiянлы. ³ Восьтöмыс пыр Енмыс сетiс меным тöдны Ассьыс гусяторсö. Та йылысь ме вылынджык дженьыдика гижи нин. ⁴ Тайö гижöдсö лыддигöн тi верманныд тöдмавны, кутшöм бура ме гöгöрвоа Кристослысь гусяторсö. ⁵ Водзын олысьяс эз тöдлыны тайö гусяторйыс йылысь. Öнi Вежа Лов восьтiс сiйöс Кристослöн апостолъяслы да пророкъяслы. ⁶ Тайö гусяторйыс татшöм: мукöд войтыр юдейяс моз тшöтш босьтасны Енсянь вичмöдöмасö, öд Бур Юöр кылöм бöрын найö öтувтчисны Исус Кристоскöд. Сiдзкö, найö – öти вир-яйлöн юкöнъяс, налы тшöтш вичмö Енлöн кöсйысьöмыс. ⁷ Енлöн бурсетöмыс да выныс отсöгöн ме лои тайö Бур Юöрыслы кесъялысьöн. ⁸ Меным, став вежа войтыр пиысь медся тöдчытöмыслы, уси шуд висьтавлыны мукöд войтырлы Кристослöн помтöм-дортöм озырлун йылысь Бур Юöрсö ⁹ да восьтны быдöнлы Енмыслысь водзвыв мöвпыштöм гусяторсö. Енмыс, кодi вöчис ставсö Исус Кристос пыр, видзис тайö гусяторсö Ас пытшкас нэмъяс пуксьытöдзыс на, ¹⁰ медым Вичкоыс пыр öнi петкöдлыны енэжвывса ыджыдалысь-веськöдлысьяслы Ассьыс уна ногöн петкöдчысь мывкыдлунсö. ¹¹ Тадзи нэмъяс пуксьытöдз на лöсьöдöм-мöвпыштöмсö Енмыс пöртiс олöмö миян Господь Исус Кристос пыр. ¹² Ми – Кристос пытшкынöсь, Сылы эскöм пыр ми повтöг-майшасьтöг вермам локны Ен дiнö. ¹³ Вокъяс, кора тiянöс: энö öшöдöй юрнытö, кор ме сьöкыдала тiян вöсна. Öд та пыр вичмö тiянлы ошкöмыс. ¹⁴ Ме сувта пидзöс вылö, миян Господь Исус Кристослöн Бать водзö. ¹⁵ Сiйö сетö ним быд чужанкотырлы енэжас и му вылас. ¹⁶ Ме кора, мед дзирдлуннас озыр Ен Аслас Ловнас да выннас ёнмöдас тiянлысь пытшкöсса морттö, ¹⁷ да эскöмныд пыр Кристос овмöдчас тiян сьöлöмö. ¹⁸ Ме кевма, медым муслуныс вужъясяс тiян сьöлöмö да лоас тiянлы подулöн. Сэки став вежа войтыркöд öтвыв верманныд шымыртны Кристос муслунлысь кузьта-пасьтасö, пыдта-судтасö, ¹⁹ да гöгöрвоны Сылысь вежöрö тöртöм муслунсö. Сэки тiян пытшкын лоö Енлöн став тыр-бурыс. ²⁰ Ошкöм Енлы! Аслас вынöн, кодi уджалö миян пытшкын, Сiйö вöчö ёна унджык миян корöмъяс да мöвпалöмъяс дорысь. ²¹ Ошкöм Сылы Вичкоын, кодi Исус Кристос пытшкын, быд кадö олысь йöзсянь нэмъяс чöж. Аминь.

¹ Ме, Господьлы кесъялöм вöсна дзескыдiнын пукалысь, кора тiянöс: олöй сiдзи, кыдзи колö овны Енлöн корöмаяслы. ² Пыр лоöй мелiöсь, рамöсь, терпитöмöн да мусапырысь бурö пуктöй öта-мöднытö. ³ Зiльöй видзны Ловсянь сетöм öтувъялуннытö да тiянöс йитысь лöньлуннытö. ⁴ Вир-яйыс öти, Лолыс öти, лачаыс, кытчö тiянöс корöма, тшöтш öти. ⁵ Господьыс öти, эскöмыс öти, и пыртчöмыс öти. ⁶ Енмыс öти, Сiйö быдöнлы Бать. Сiйö веськöдлö ставнас, уджалö ставыс пыр да олö ставным пытшкын. ⁷ Кристос Ас кöсйöм сертиыс миянлы быдöнлы лышкыда козьналiс бурсетöмсö. ⁸ Öд Гижöдыс висьталö: – Сiйö кыпöдчис вылiсьыс-вылö, босьтiс Аскöдыс кöрталöмаясöс, йöзлы сеталiс козинъяс. ⁹ Мый лоö "кыпöдчöмыс"? Оз-ö сiйö, мый водзынджык Сiйö лэччылiс му пыдöсöдзыс. ¹⁰ А лэччылiс кö, сiдзкö, кыпöдчис став енэжсьыс вылö, медым тыртны Аснас ставсö. ¹¹ Öтиясöс Сiйö сувтöдiс апостолъясöн, мöдъясöс – пророкъясöн, коймöдъясöс – буръюöртысьясöн, нёльöдъясöс – вичкоса веськöдлысьясöн, витöдъясöс – велöдысьясöн, ¹² медым дасьтыны вежа войтырöс кесъявны да сöвмöдны Кристослысь Вир-яйсö. ¹³ Сэки ми ставным воам öти эскöмö, кутам тöдны Ен Пиöс, быдмам да воöдчам Кристослöн тыр арлыдöдз да Сылöн тырвыйöлунöдз. ¹⁴ Сiдзкö, миянлы оз нин ков ылавны кагаяс моз быдпöлöс тöвйыв велöдöмö. Öд татшöм велöдöмыс петö наян да ылöдчысь йöзсянь. ¹⁵ Мöдарö, збыляс да муслунас кутчысьöмöн, кутам пыр быдмыны да воöдчыны Кристосöдз, öд Сiйö – юрыс. ¹⁶ Сiйö йитö вир-яйлысь став юкöнсö öтиö, тадзи артмö öти вир-яй. Юкöнъясыс топыда йитчöмаöсь öта-мöдныскöд, и быд юкöн вöчö ассьыс удж. Тадзи муслуныс отсöгöн ставнас вир-яйыс быдмö-сöвмö. ¹⁷ Та вöсна, ме ёна кора тiянöс Господь нимöн: водзö энö нин олöй ентöдтöмъяс моз. Налöн мöвпъясыс ковтöмöсь, ¹⁸ вежöрныс пемдöма, найö ылынöсь Ен нога олöмсьыс, öд налöн чорзьöма сьöлöмныс, да Енсö найö оз тöдны. ¹⁹ Найö воштöмаöсь яндзимнысö, лэдзчысьöмаöсь олöмсьыс да быдпöлöс пежсö вöчöны пöтлытöг. ²⁰ Но тiянöс эз тадзи велöдны Кристос йылысь, медым тi олiнныд татшöм ногöн. ²¹ Тi кывлiнныд Сы йылысь, тiянöс велöдiсны сiйö збыльыс серти, мый эм Исусын. ²² Тiянöс велöдiсны: эновтöй важ оласногтö да ыштана лёк кöсйöмъястö, öд найö тшыкöдöны тiянöс. ²³ Выльмöдчöй ловнаныд да вежöрнаныд. ²⁴ Вежсьöй Ен нога выль мортö, кутчысьöй збыляс, веськыдлунас да вежалунас. ²⁵ Сiдзкö, дугдöй пöръясьнытö да сёрнитöй öта-мöдныдкöд веськыда, öд ми – öта-мöдлы юкöнъяс. ²⁶ Скöралiганыд энö мыжмöй: бурасьöй öта-мöдныдкöд шондi пуксьытöдзыс на. ²⁷ Энö сетöй омöльыслы кутчысянiн. ²⁸ Гусясьысь – водзö эн гусясь. Бурджык, уджав да вöч аслад киöн коланасö, медым вермин чуктöдны сэтысь корысьяслы. ²⁹ Некутшöм пеж кыв мед оз пет тiян вомысь, а сöмын бурыс. Öд тайö ёнмöдö йöзыслысь эскöмсö да вайö налы нимкодьлун. ³⁰ Энö шогöдöй Ен Вежа Лолöс, кодöн пасйöма тiянöс мездана лун кежлö. ³¹ Пыр кежлö öвсьöй дöзмöмысь, лёксьöм-скöралöмысь, зыксьöм-суклясьöмысь да быдсяма лёк вöчöмысь. ³² Öта-мöдныд дiнö лоöй бур сьöлöмаöсь да мелiöсь. Енмыс Кристос пыр прöститiс тiянöс, сiдзкö, тi тшöтш прöститöй öта-мöднытö.

¹ Тi – Енлöн муса ныв-пи, сiдзкö, олöй Сы вылö видзöдöмöн. ² Кристослы ми мусаöсь, тi тшöтш лоöй мусаöсь öта-мöдныдлы. Кристос сетiс Ассьыс олöмсö миян вöсна да вайис Асьсö Енлы чöскыд дука вись пыдди. ³ Тi – вежа войтыр. Сiдзкö, некутшöм кырсалöм, пеж оласног да горшасьöм мед эз вöв тiян пöвстын. Весиг энö сёрнитöй та йылысь! ⁴ Ковтöм сёрнияс, пеж кывъяс да мисьтöм шмоньяс мед эз петны тiян вомысь. Мöдарö, аттьöалöй Енсö! ⁵ Тöдöй, мый ни öти кырсалысьлы, пеж оласногалы да горшасьысьлы, кодi копрасьö озырлунлы Енмыслы пыдди, – Кристослöн да Енлöн Юраланiныс оз вичмы. ⁶ Некод мед оз ылöдлы тiянöс ковтöм сёрниясöн, öд таысь кывзысьтöмъясöс суас Енлöн скöрлуныс. ⁷ Татшöмъясыскöд энö öтувтчöй! ⁸ Коркö тi вöлiнныд пемыдöн, öнi тi Господь пытшкынöсь да лоинныд югыднас. Сiдзкö, олöй югыдыслöн ныв-пи моз. ⁹ Öд Ловлöн вотöсыс – бурлун, веськыдлун да збыльлун. ¹⁰ Зiльöй тöдмавны Енмыслы шогманасö. ¹¹ Энö öтувтчöй пемыдас олысьяслöн ковтöм уджъясö, мöдарö, янöдöй найöс. ¹² Öд яндзим весиг висьтавнысö налöн гуся уджъяс йылысь. ¹³ Но югыдас став гусяыс тыдовтчö, öд югыдыс ставсö восьтö. ¹⁴ Сiйöн и шуöма: – Садьмы, узьысь, ловзьы кулöмысь, и тэнö югдöдас Кристос. ¹⁵ Сiдзкö, сюся видзöдöй ас бöрсяныд: олöй мывкыдаяс моз, а энö вежöртöмъяс моз. ¹⁶ Энö коллялöй каднытö весьшöрö, öд тайö лунъясыс тырöмаöсь лёкнас. ¹⁷ Энö лоöй мывкыдтöмöн, а тöдмалöй Енлысь кöсйöмсö. ¹⁸ Энö коддзöдчöй винаöн, öд тасянь овлö олöмас лэдзчысьöмыс. Мöдарö, сетöй Ловлы тыртны асьнытö. ¹⁹ Сьылöй öтвылысь псаломъяс, Енмöс ошкана сьыланкывъяс да бурсьылöмъяс. Сьылöй Господьлы да ошкöй Сiйöс став сьöлöмсяньныд. ²⁰ Быд кадö ставсьыс аттьöалöй Ен Батьöс миян Господь Исус Кристос нимöн. ²¹ Енсьыс полöмöн кывзьысьöй öта-мöдныдлысь. ²² Гöтыръяс, кывзьысьöй асланыд верöсъяслысь Господьлысь моз. ²³ Öд гöтырлы юрыс – верöс, кыдзи Вичколы юрыс – Кристос. Вичколы – Сiйö Мездысь, а Вичкоыс – Сылöн вир-яйыс. ²⁴ Кыдзи Вичкоыс кывзысьö Кристослысь, сiдзи гöтыръяс быдторйын кывзысьöй асланыд верöсъяслысь. ²⁵ Верöсъяс, радейтöй ассьыныд гöтыртö, кыдзи Кристос радейтö Вичкосö. Öд Кристос сетiс Ассьыс олöмсö Вичкоыс вöсна, ²⁶ медым вежöдны сiйöс. Сiйö сöстöммöдiс Вичкосö ваöн да кывнас, ²⁷ медым сувтöдны сiйöс Ас водзас быд боксянь мичаöн: сöстöмöн, вежаöн, медым сылöн эз вöв некутшöм няйттор, чукыр да тырмытöмтор. ²⁸ Верöсъяс, радейтöй ассьыныд гöтырнытö вир-яйтö моз, öд гöтырсö радейтысь – асьсö радейтö. ²⁹ Некод оз мустöмт ассьыс вир-яйсö, мöдарö, шонтö-пöткöдö сiйöс, кыдзи Господь тöждысьö Аслас Вичкоыс вöсна. ³⁰ Öд ми – Сы вир-яйлöн юкöнъяс. ³¹ Гижöдыс висьталö: «Та вöсна морт кольö бать-мамсö да öтлаасьö гöтырыскöд, и тайö кыкыс лоöны öти вир-яйöн». ³² Тайö – ыджыд гусятор. Ме висьтала тайöс Кристос да Вичко йылысь. ³³ Сiдзкö, быдöн мед радейтö гöтырсö асьсö моз, а гöтыр мед пыдди пуктö верöссö.

¹ Челядь, кывзысьöй бать-мамныдлысь Господь вöсна, öд тайö лоö веськыд Сы водзын. ² «Пыдди пукты ассьыд бать-мамтö» – тайö медводдза тшöктöм, кытчö пырö татшöм кöсйысьöм: ³ «сэки ставыс тэнад лоö бур да олöмыд кузь нэма». ⁴ Батьяс, энö дöзмöдöй ассьыныд челядьтö, но быдтöй-велöдöй найöс Господьлöн кöсйöм серти. ⁵ Кесйöгъяс, кывзысьöй асланыд мувывса ыджыдъяслысь Кристослысь моз. Кесъялöй налы восьса сьöлöмöн, полiгтырйи да пыдди пуктöмöн. ⁶ Энö вöчöй тадзи асьнытö йöз водзын ошкöм-петкöдлöм могысь, но Кристослöн кесйöгъяс моз кывзысьöй Енмыслысь став сьöлöмсяньныд. ⁷ Кесъялöй налы нимкодьпырысь Господьлы моз, а энö йöзлы моз. ⁸ Тöдöй, мый быдöн, кесйöг кöть мездлуна морт, босьтас Господьсянь удждонсö бур вöчöмыс серти. ⁹ Ыджыдъяс, тi тшöтш бура кутöй асьнытö асланыд кесйöгъяскöд: энö лоöй чорыдöсь накöд. Тöдöй, мый тiян вылын, и на вылын öти Ыджыдыс енэжас. Сiйö оз видзöд морт чужöм вылö. ¹⁰ Нöшта вокъясöй, ёнмöдöй асьнытö Господькöд öтувъя олöмас Сылöн вермана выннас. ¹¹ Пасьталöй Енсянь став вермасянторсö. Сэки тi верманныд сувтны омöльыслöн наяна лёк вöчöмъяслы паныд. ¹² Öд миян тышыс абу мортлы паныд, ми тышкасям енэжувса юралысь-ыджыдалысь пеж ловъяскöд да тайö мувывса пемыд олöмнас веськöдлысь ловъяскöд. ¹³ Та вöсна, босьтöй Енсянь став вермасянторсö. Сэки тышкасиганыд верманныд водзсасьны лёкыслы паныд да петанныд вермысьясöн. ¹⁴ Сулалöй зумыда! Вöнясьöй збыльнас да пасьтасьöй веськыдлуныслöн кöрт кышöдö. ¹⁵ Кöмкотасьöй да лоöй дасьöсь висьтавлыны лöньлун йылысь Бур Юöрсö. ¹⁶ Та кындзи, топыда кутöй кианыд эскöмлысь сайöдсö, кодöн тi верманныд кусöдны омöльлысь став донöдöм ньöвъяссö. ¹⁷ Нöшта босьтöй юр вевттьöд пыдди мездмöмсö да Ловлысь шыпуртсö – Енлысь Кывсö. ¹⁸ Вöчöй тайöс кевмöмъясöн да корöмъясöн, быд кадö кевмысьöй Лов нуöдöм улын. Лоöй дасьöсь да зiльöй дугдывтöг кевмысьны став вежа войтыр вöсна. ¹⁹ Кевмысьöй тшöтш ме вöсна, медым сёрнитiгöн Енмыс сетiс меным колана кывъяс повтöг висьтавлыны Бур Юöрлысь гусяторсö. ²⁰ Енмыс мöдöдiс менö висьтавлыны Бур Юöрсö, та понда öнi дзескыдiнын. Кевмысьöй ме вöсна, медым висьтавлi сiйöс повтöг да колана ногöн. ²¹ Медым тi тöдiнныд менам олöм-вылöм йылысь, ставсö тiянлы висьталас Тихик. Сiйö – менам муса вок, Господьлöн эскана кесъялысь. ²² Ме мöдöда сiйöс тiян дiнö, медым висьталас миян олöм йылысь да ышöдас тiянöс. ²³ Вокъяс, сиа тiянлы лöнь олöм, муслун да эскöм Ен Батьсянь да Господь Исус Кристоссянь. ²⁴ Енлöн буралöмыс быдöнкöд, кодi радейтö миян Господь Исус Кристосöс бырлытöм муслунöн. Аминь.