Колосö

Колосö

¹ Гижö Павел, Ен кöсйöм серти Исус Кристослöн апостол. Тимофей воккöд ² ми чолöмалам колосса вежа войтырöс, Исус Кристослы эскысь вокъясöс. ³ Буралöм да лöнь олöм тiянлы Ен Батьнымсянь да Господь Исус Кристоссянь. Тiян вöсна кевмысигъясöн ми пыр аттьöалам Енмöс, миян Господь Исус Кристослысь Батьсö. ⁴ Ми кывлiм Кристослы тiян эскöм йылысь да став вежа войтыр дiнö муслунныд йылысь. ⁵ Тайö тiян эм, öд тi оланныд енэжас дасьтöмаыс вылö лачаöн. Лача йывсьыс тi кывлiнныд нин, кор тiянöдз воис Бур Юöрлöн збыль кывйыс. ⁶ Тайö кывйыс паськалö став му пасьталаыс да вайö вотöс. Öнi сiйö паськалö да вайö вотöссö тшöтш тiян пöвстын. Бур Юöрсö кылöм бöрын тi збыльысь гöгöрвоинныд Енлысь буралöмсö. ⁷ Тi кылiнныд тайöс миян муса Епафрас уджъёртсянь, кодi уджалö тiян пöвстын. Сiйö – Кристослöн эскана кесъялысь. ⁸ Епафрас висьталiс миянлы Ловсянь чужöм муслунныд йылысь. ⁹ Ставсö тайöс кылöмсянь ми дугдывтöг кевмысям тiян вöсна. Кевмам, медым тiян вöлi Ловсянь мывкыдлун да гöгöрвоöм, медым тi бура тöдiнныд Енлысь кöсйöмсö. ¹⁰ Кевмысям, мед эськö тiян олöмын ошкыссис Господь, медым тi быдторйын шогминныд Сылы, бурсö вöчöмöн вайинныд вотöс да быдминныд Енсö тöдмалöмас. ¹¹ Енмыс мед ёнмöдас да вынсьöдас тiянöс дзирдлуна выннас, медым тi быдторйын вöлiнныд зумыдöсь да терпитöмöн нуинныд быдпöлöс сьöкыдсö. ¹² Долыда ошкöй Ен Батьöс, öд Сiйö вöчис миянöс шогманаясöн, медым ми тшöтш вермим босьтны Югыдiнас вежа войтырлы вичмöдöмасö. ¹³ Сiйö мездiс миянöс пемыдыслöн вын улысь да пыртiс муса Пиыслöн Юраланiнö. ¹⁴ Öд Пиыслöн Вирöн миянöс мездöма да мыжъяснымöс прöститöма. ¹⁵ Сiйö тыдавтöм Енмыслöн пертас, чужöма став вöчöмторсьыс медводз. ¹⁶ Сы пыр вöчöма став енэжвывсасö да мувывсасö, аддзанасö да аддзытöмсö: юралöм-ö, ыджыдалöм-ö, веськöдлöм-ö, вынъяс-ö, – ставсö вöчöма Сы пыр да Сылы. ¹⁷ Сiйö ставсьыс Медводдзаыс, Сы вылын кутчысьö ставыс. ¹⁸ Сiйö вир-яйыслöн, Вичколöн, Юрыс. Сiйö эм Панасыс. Сiйö кулöмаясысь медводдза Ловзьысь, медым быдторйын лоны медводдзаöн. ¹⁹ Тадзи Енмыс лöсьöдiс, медым Пиыс пытшкын олiс став тыр-бурыс, ²⁰ медым Сы пыр сетны бурасьöм, да Сылöн крествывса Вирнас бурöдны Аскöдыс мувывсасö да енэжвывсасö. ²¹ Коркö тi вöлiнныд Енмыслы паныд мунысьяс, лёк вöчöмныд вöсна Сыысь ылынöсь. ²² Öнi Сiйö бурöдiс тiянöс Аскöдыс Кристос Вир-яйын, Сылöн кулöмыс пыр, медым сувтöдны тiянöс Ас водзас вежаöн, сöстöмöн да мыжтöмöн. ²³ Сöмын тiянлы колö вöрзьывтöг сулавны эскöмас да зумыда кутны лача Бур Юöрас. Бур Юöрсö тi кывлiнныд, сiйöс юöртöма енэж улын став олысьыслы. Ме, Павел, лои тайö Бур Юöрыслы кесъяслысьöн. ²⁴ Öнi ме нимкодяся тiян вöсна сьöкыдалiгöн. Кристослöн Вир-яйыс вöсна, Сылöн Вичко вöсна, аслам вир-яйын сьöкыдсö нуигöн ме тырта Кристос шогъяслысь лыдсö. ²⁵ Енмыс пуктiс менö кесъявны вичкоыслы, сетiс меным удж: тырвыйö юöртны тiянлы Ен Кывсö. ²⁶ Сылöн Кывйыс нэмсö вöлi мувывса чужысьяслы гусяторйöн, öнi сiйöс восьтöма Сылöн вежа войтырлы. ²⁷ Енмыс кöсйис, мед найö тöдiсны, кутшöм ыджыд озырлун вайö тайö гусяторйыс быд войтырлы. Гусяторйыс – тайö Кристос тiян пытшкын, локтана дзирдлуныс вылö лачаныд. ²⁸ Сы йылысь ми висьтавлам быдöнлы, велöдам-туйдöдам став мывкыдлунöн, медым сувтöдны быдöнöс Ен водзö Кристос пытшкын сöвмöмаясöн. ²⁹ Та могысь ме уджала да вермася ме пытшкын олысь Кристос вынöн.

¹ Кöсъя, мед тi тöдiнныд, кутшöм ыджыд тыш мунö менам тiян вöсна да лаодикияса вöсна, тшöтш на вöсна, кодъяс менö весиг эз на аддзывны. ² Ме вермася, медым налöн муслунöн öтувтöм сьöлöманыс вöлi повтöмлун, медым найö вöлiны озырöсь тырвыйö тöдöмлунöн. Сэки найö вермасны гöгöрвоны Ен Батьлысь гусяторсö – Кристосöс. ³ Сы пытшкын мывкыдлуныслöн да тöдöмлуныслöн став озырлуныс. ⁴ Висьтала тайöс, медым некод эз кежöд тiянöс аслас эскöдана сёрниöн. ⁵ Кöть ме вир-яйöн абу тiянкöд, но лолöн тiянкöд. Меным зэв нимкодь аддзыны, мый тi оланныд öти сьöлöмöн да зумыда эсканныд Кристослы. ⁶ Тi кö сибöдiнныд Господь Исус Кристосöс, сiдзкö, олöй Сы пытшкын. ⁷ Быдмöй-сöвмöй Сы пытшкö вужъясьöмöн, ёнмöй эскöмас, кыдзи тiянöс велöдöма. Сьöлöмныд мед век вöлi тыр аттьöалöмнас. ⁸ Видзчысьöй, мед кодкö эз тывйышт тiянöс мувывса мывкыдлуннас да ылöг сёрнинас. Найö подуласьöны мортлöн велöдöм вылö да муюгыд вынъяс вылö, а оз Кристос вылö. ⁹ Кристосын, Сылöн морт вир-яйын, тыдовтчис Енлöн став тырвыйöлуныс. ¹⁰ Кристос пытшкын тiян тшöтш эм тырвыйöлуныс. Сiйö быд ыджыдалысьлы да быдпöлöс вынъяслы Юр. ¹¹ Сы пытшкын тiянöс вундыштöма, но вундыштöма абу морт киöн. Кристослöн вундыштöмыс мездiс тiянöс мыжа тшыкöм вир-яйысь. ¹² Пыртчиганыд тiянöс гуалöма Кристоскöд, да Сiйöс Ловзьöдысьыслöн вынö эскöмныд пыр тiянöс ловзьöдöма Сыкöд. ¹³ Тiянöс, вундыштчытöмныд да мыжъясныд вöсна кулöмаясöс, Енмыс ловзьöдiс Кристоскöд. Сiйö прöститiс миянлысь став лёк вöчöмнымöс, ¹⁴ вуштыштiс мыжалан гижöдсö став тшöктöмъяснас, кодъяс сьöктöдiсны миянöс, бырöдiс сiйöс крестö тувъялöмöн. ¹⁵ Сiйö песовтiс ыджыдалысьясöс да вынаясöс, шыбитiс найöс яналöмас да вермис Кристос пыр. ¹⁶ Сiдзкö, некод мед оз мыжав тiянöс сёян-юанысь, вежа лунъясысь, тöлысь чужöм пасйöмысь да шойччан лунö кутчысьöмысь, ¹⁷ öд ставыс тайö сöмын локтанаыслöн вуджöр, а збыльыс – Кристос. ¹⁸ Некод мед оз ылöд тiянöс аслас рамлунöн, анделъяслы юрбитöмöн да ылöг аддзылöмъяснас ошйысьöмöн. Морт вежöрнаныс мöвпалiгöн найö вылö пуктöны асьнысö. ¹⁹ Тайö йöзыс абу йитчöмаöсь Юрыскöд. Юрыс öд веськöдлö став вир-яйнас, кöнi быд юкöн йитöма-тэчöма сöн-лутш отсöгöн. Тадзи вир-яйыс быдмö-сöвмö Ен ногöн. ²⁰ Тi кö кулiнныд Кристоскöд, мынiнныд муюгыд вынъясысь, сiдзкö, мыйла мувывсаяс моз кутчысянныд тайö шуöмъясас: ²¹ "эн инмöдчы", "эн сёй", "эн вöрзьöд"? ²² Тайö сöмын мортсянь тшöктöм-велöдöм, шуöма быранаторъяс йылысь. ²³ Ылöг вежавидзöмнас, рамлуннас, вир-яйсö тшыгйöдöмнас найö петкöдлöны асьнысö мывкыдаöн. Но тайö оз отсав вермыны вир-яйлысь колöм-кöсйöмсö.

¹ Тi кö ловзинныд Кристоскöд, корсьöй енэжвывсасö. Öд енэжас, Ен веськыдладорын, пукалö Кристос. ² Мöвпалöй енэжвывсаыс йылысь, а энö мувывсаыс йылысь. ³ Тi öд кулiнныд, да тiянлысь олöмнытö дзебöма Кристоскöд Ен пытшкö. ⁴ Тiян олöмыс – Кристос. Кор Сiйö локтас, Сыкöд тшöтш и тi тыдовтчанныд Сылöн дзирдлунас. ⁵ Та вöсна бырöдöй ас пытшсьыныд мувывсасö: кырсалöм, пеж оласног, лёкколöм, лёк вылö ыштöм, горшасьöм – ставыс тайö идоллы юрбитöм. ⁶ Таысь кывзысьтöм йöз вылö лэччö Енлöн скöрлуныс. ⁷ Коркö тi асьныд татшöмöсь вöлiнныд да тадзи олiнныд. ⁸ Öнi шыбитöй ставсö тайöс: скöралöм, лёксьöм, лöгалöм, омöльтöм, пеж сёрни. ⁹ Энö пöръясьöй, тi öд пöрччинныд важ мортсö став сылöн уджнас ¹⁰ да пасьтасинныд выль мортö, кодi выльмö Ставсöвöчысьöс тöдмалöмнас да лоö Сы кодь. ¹¹ Грек-ö, юдей-ö, вундыштчöма-ö, абу-ö вундыштчöма, варвар-ö, скиф-ö, кесйöг-ö, мездлуна морт-ö – торъялöмыс абу. Ставыс да ставас Кристос. ¹² Сiдзкö, лоöй бур сьöлöмаöсь, мелiöсь, авъяöсь да рамöсь, терпитöй öта-мöднытö. Тi öд Енлöн бöрйöмаяс, вежаяс да Сылöн мусаяс. ¹³ Дöзмытöг сибöдöй öта-мöднытö. Эм кö код вылö норасьöм, прöститöй сiйöс. Кристос öд тiянöс прöститiс, тi тшöтш Сы моз прöститöй. ¹⁴ Медыджыдтор – кутчысьöй муслунас, öд муслуныс ставсö йитö да вайöдö тыр-бурöдз. ¹⁵ Тiян сьöлöмын мед ыджыдалас Енлöн лöньлуныс, кытчö корöма тiянöс, тi öд öти вир-яйынöсь. Быд кадö ошкöй Енмöс. ¹⁶ Кристослöн кывйыс мед озыра овмöдчас тiян пытшкö. Велöдöй-туйдöдöй öта-мöднытö став мывкыдлуннас. Господьöс аттьöалöмöн сьöлöмсяньныд сьылöй псаломъяс, ошкана сьыланкывъяс да бурсьылöмъяс. ¹⁷ Кывйöн-ö, уджöн-ö мыйкö вöчанныд, ставсö вöчöй Господь Исус Кристос нимöн да ошкöй Сы пыр Ен Батьöс. ¹⁸ Гöтыръяс, кывзысьöй верöсныдлысь, öд тадзи лöсялö вöчны Господь войтырлы. ¹⁹ Верöсъяс, радейтöй гöтырнытö, энö лоöй накöд чорыдöсь. ²⁰ Челядь, быдторйын кывзысьöй бать-мамныдлысь, öд Господьлы нимкодь таысь. ²¹ Батьяс, энö дöзмöдöй ныв-пинытö, медым найö эз жугыльмыны. ²² Кесйöгъяс, быдторйын кывзысьöй асланыд мувывса ыджыдъяслысь. Кесъялöй налы восьса сьöлöмöн да Енмысь полöмöн, а энö йöз водзын асьнытö петкöдлöм могысь. ²³ Ставсö вöчöй сьöлöмсяньныд Господьлы моз, энö мортлы моз. ²⁴ Тöдöй, тiянлы вичмас Господьсянь тырдон, öд тi кесъяланныд Кристослы, асланыд Господьлы. ²⁵ А лёксö вöчысь аслас уджъяс серти босьтас, öд Енмыс оз видзöд морт чужöм вылö.

¹ Ыджыдъяс, лоöй веськыдöсь кесйöгныдкöд, быдöнöс сибöдöй öтмоза. Тöдöй, енэжас тiян вылын тшöтш эм Ыджыдыс. ² Дугдывтöг кевмысьöй. Вöчöй тайöс садьмöдчöмöн да Енмöс аттьöалöмöн. ³ Кевмысьöй тшöтш миян вöсна, Енмыс мед восьтас миянлы öдзöсъяс висьтавны Кристос йылысь гусяторсö. Дзик та вöсна ме и пукала дзескыдiнын. ⁴ Кевмысьöй, медым ме верми восьтны гусяторсö да колана ногöн висьтавны сiйöс. ⁵ Лоöй мывкыдаöсь эскытöмъяскöд, эм кö позянлун, сёрнитöй накöд быд кадö. ⁶ Сёрнитöй бур сьöлöмöн, сёрниныд мед век вöлi солыштöма, сэки быдöнлы кужанныд вочавидзны колана ногöн. ⁷ Ме йылысь ставсö тiянлы висьталас муса Тихик вок, миян уджъёртным, сiйö – Господьлöн эскана кесъялысь. ⁸ Мöдöда сiйöс тiян дiнö, медым тöдмавны олöм-вылöмныд йылысь, нöшта ышöдны тiянöс. ⁹ Сыкöд тшöтш мöдöда миян муса да эскана Öнисим вокöс, сiйö öд тiянысь петiс. Найö висьталасны ставсö, мый миян вöчсьö танi. ¹⁰ Чолöм тiянлы Аристарксянь, сiйö мекöд öтлаын пукалö дзескыдiнын. Чолöм ыстö тшöтш Варнавалöн Марк нима воча вокыс. Тiянлы ме гижлi сы йылысь, мися, локтас кö, сибöдöй сiйöс. ¹¹ Чолöм Исуссянь, кодöс нимтöны Юстöн. Вундыштчöмаяс пиысь сöмын найö мекöд уджалöны Енлöн Юралöм вöсна. Найö ёна отсасьöны меным. ¹² Чолöм ыстö тiян Епафрас, Исус Кристослöн кесйöг. Кевмысигас сiйö пыр тышын тiян вöсна, мед эськö тi век сулалiнныд зумыда да быдторйын тöдiнныд Енлысь кöсйöмсö. ¹³ Висьтала тiянлы, сiйö ёна уджалö-шогсьö тiян вöсна, тшöтш лаодикияса да иерапольса вöсна. ¹⁴ Чолöм ыстöны миян дона бурдöдысь Лука да Димас. ¹⁵ Чолöм висьталöй лаодикияса вокъяслы, тшöтш Нимфалы да сы ордын чукöртчысь эскысьяслы. ¹⁶ Тайö гижöдсö лыддьöм бöраныд тöждысьöй, медым Лаодикия вичкоын сiйöс тшöтш лыддясны. А тi лыддьöй Лаодикияö мöдöдöм гижöдсö. ¹⁷ Аркиплы висьталöй, мед бура уджалас да помöдз вайöдас Енсянь сетöм уджсö. ¹⁸ Ме, Павел, аслам киöн гижа тiянлы чолöмöс. Тöд выланыд кутöй менсьым дзескыдiнын пукалöмöс. Енлöн буралöмыс ставныдкöд тiянкöд. Аминь.