2 Тимофейлы

¹ Гижö Павел, Ен кöсйöм серти Исус Кристослöн апостол. Менö мöдöдöма висьтавны кöсйысьöм пыр сетöм олöм йылысь. Тайö олöмыс Исус Кристос пытшкын. ² Бурсетöм, буралöм да лöнь олöм тэныд, муса Тимофей пиöй, Ен Батьсянь да миян Господь Исус Кристоссянь. ³ Лун и вой аслам кевмысьöмъясын ме пыр казьтывла тэнö да ошка Енмöс, ме кесъяла Сылы батьясным моз сöстöм сьöлöмöн. ⁴ Тэнад синваыд оз вунлы менам. Та вöсна ёна кöсъя аддзöдчывны тэкöд, медым тырны нимкодьлунöн. ⁵ Казьтывла тэнсьыд сьöлöмсянь эскöмтö. Тадзи эскылiсны тэнад Лоида пöчыд да Евника мамыд. Тöда, тэ тшöтш на моз эскан. ⁶ Та вöсна, казьтышта тэныд: эн кусöд Енсянь сетöмторлысь бисö. Тайö сетöмторсö тэ сибöдiн менам ки пуктылöм пыр. ⁷ Енмыс öд сетiс миянлы эз полöмыслысь лов, а выныслысь, муслуныслысь да бур мывкыдыслысь лов. ⁸ Сiдзкö, эн яндысь висьтавлыны Господьным йылысь. Эн яндысь и меысь, Кристос вöсна дзескыдiнö йöртöмаысь. Мöдарö, Ен вынöн тэ тшöтш ну Бур Юöр вöсна сьöкыдсö. ⁹ Енмыс öд мездiс миянöс да корис вежа олöмас эз миян уджъясным вöсна, а Аслас шуöмыс да буралöмыс вöсна, кодöс Сiйö сетöма миянлы олöм пуксьытöдзыс на Исус Кристос пытшкын. ¹⁰ Öнi миян Мездысь Исус Кристослöн локтöмыс восьтiс буралöмсö. Кристос бырöдiс кулöмсö да Бур Юöр пыр восьтiс олöмсö да бырлытöмсö. ¹¹ Та вылö менö и пуктöма, медым висьтавлыны Бур Юöрсö, апостолавны да велöдны мукöд войтырöс. ¹² Дзик та вöсна ме öнi сьöкыдсö нуа да ог яндысь таысь, öд ме тöда, кодлы ме эска. Тöда, Сiйö вына видзны меным сетöмасö Аслас локтан лунöдз. ¹³ Кутчысь месянь кывлöм веськыд велöдöмас Исус Кристоссянь босьтöм эскöмнад да муслуннад. ¹⁴ Видз тэныд сетöм бурсö Вежа Лов отсöгöн, кодi олö сьöлöманым. ¹⁵ Тэ тöдан, Асияын ставныс эновтiсны менö, весиг Фигел Ермогенкöд. ¹⁶ Господь мед лоас бур сьöлöма Öнисифорлöн гортса дiнö, öд сiйö унаысь ышöдлiс менö да эз яндысьлы менам пукалöмысь. ¹⁷ Римö волiгас сiйö быдлаысь корсис менö да аддзис. ¹⁸ Мед Господь лоас бур сьöлöма сы дiнö Аслас локтан лунö. Мыйтöм сiйö отсасис меным Ефесын, тэ бурджыка тöдан.

¹ Ёнмöдчы, муса пиöй, Исус Кристослöн буралöмнас. ² Ставсö, мый тэ кывлiн месянь уна йöз дырйи, юксьы эскана йöзкöд, кодъяс сяммасны велöдны мукöдöс. ³ Исус Кристослöн бур тышкасьысь моз ло дась нуны сьöкыдсö. ⁴ Шыпурта морт кольö быдлунъя тöждъяссö, медым шогмыны веськöдлысьыслы. ⁵ Панласьысь кö торкас ордйысянногсö, сылы оз шед вермысьлöн нимыс. ⁶ Быдтасысь пайсö медводз босьтö сьöкыд удж вöчысь. ⁷ Вежöрт, мый висьтала. Господь мед отсалас тэныд ставсö гöгöрвоны. ⁸ Кут тöд вылад Исус Кристосöс, Давид вужйысь Чужысьöс да кулöмысь Ловзьысьöс. Тадзи висьталö меöн юöртöм Бур Юöрыс. ⁹ Тайö юöр вöснаыс ме и нуа сьöкыдсö. Менö дорисны лёк вöчысьöс моз, но Енлысь Кывсö абу дорöма. ¹⁰ Та вöсна ме муна став сьöкыд пырыс. Вöча тайöс Енлöн бöрйöмаяс вöсна, медым найö тшöтш босьтiсны Исус Кристоссянь мездмöмсö да помасьлытöм дзирдлунсö. ¹¹ Тайö кывйыс эскана: – Ми кö кулiм Сыкöд, Сыкöд пондам овны. ¹² Мунам кö сьöкыдыс пыр, Сыкöд пондам ыджыдавны. Соссям кö Сыысь, Сiйö соссяс миянысь. ¹³ Ми кö эновтам Сiйöс, Сiйö оз эновт миянöс, öд Ачыс Ассьыс соссьыны оз вермы. ¹⁴ Казьтыв тайöс да Господь водзын öлöд кывъяс понда венö пырöмысь. Öд тайö бурсö оз вай, сöмын виö кывзысьясöс. ¹⁵ Тöждысь шогмыны Енлы, аслад уджысь эн яндысь, збыльсö висьтав веськыда. ¹⁶ Ковтöм сёрниысь ылыстчы, öд татшöмъясыс лунысь-лун пондасны ёнджыка сетчыны Ентöг олöмас. ¹⁷ Налöн велöдöмыс рак висьöм моз паськалö. Именей да Филит тшöтш на лыдынöсь. ¹⁸ Найö кежисны збыльсьыс, висьталöны, ловзьöмыс пö вöлi нин. Татшöм сёрнинас найö жугöдöны кодсюрöлысь эскöмсö. ¹⁹ Но Енмöн пуктöм подулыс вöрзьывтöм. Сэтчö пасйöма: «Господь тöдö Ассьыс йöзсö», нöшта пасйöма: «Господьлысь нимсö висьталысь мед эновтчас лёксьыс». ²⁰ Ыджыд керкаад абу сöмын зарни да эзысь дозъяс, эмöсь и пу да сёй дозъяс. Öтияснас вöдитчöны торъя лунъясö, мöдъяснас – быд лун. ²¹ Кодi весалöма асьсö став пежсьыс, сiйö зарни да эзысь доз кодь: вежа, ыджыдыслы ёна колана да бур уджъяс вылö шогмана. ²² Ылыстчы томдырся ыштöмъясысь. Ен дiнö сьöлöмсяньыс шыасьысьяскöд кутчысь веськыдлунас, эскöмас, муслунас да лöньлунас. ²³ Ковтöм да мывкыдтöм вензьöмъясысь ылыстчы. Тöд, тайö вайöдö зыксьöмöдз. ²⁴ Господьлöн кесйöг оз вензьы, мöдарö, сiйö быдöнкöд мелi, кужö велöдны да оз дöзмы. ²⁵ Сiйö рам сьöлöмöн туйдöдö паныд мунысьясöс, гашкö, Енмыс сетас налы позянлун бергöдчыны мыжъяссьыныс да тöдмавны збыльсö. ²⁶ Сэки найö казяласны да мынасны омöльыслöн налькйысь, öд омöльыс кыйöма найöс, медым веськöдлыны.

¹ Тöд, бöръя лунъясö пуксяс сьöкыд кад. ² Йöзыс пондасны радейтны сöмын асьнысö, ыштыны сьöм вылö, пондасны ошйысьны, асьнысö вылö пуктыны, Енсö омöльтны, бать-мамсö оз кутны кывзыны. Найö öдйö вунöдöны бурсö, эскытöмöсь, ³ чорыд сьöлöмаöсь, оз бурасьны, суклясьöны, асьнысö оз кутны, скöрöсь, бурсö мустöмтöны, ⁴ öта-мöдсö вузалöны, этшсö оз тöдны да тшапöсь. Енмыс дорысь налы мусаджык лышкыда олöмыс. ⁵ Ортсысяньыс видзöдны кö, найö кутчысьöны вежавидзöмö, но, збыльвылас, найö оз эскыны Енмыслöн вынö. Татшöмъяссьыс ылыстчы. ⁶ Кодсюрö на пöвстысь наяна пырöны керкаясö да кыскöны асланьыс коньöр аньясöс, кодъяс оз вермыны мынтöдчыны асланыс мыжъясысь да кокньыда сетчöны асланыс кöсйöмъясö. ⁷ Найö öтарö велöдчöны, но збыльыс налы оз пуксьы вежöрас. ⁸ Кыдзи коркö Янний да Ямврий паныд сувтiсны Мöисейлы, öнi тайö йöзыс паныд сувтöны збыльыслы. Налöн вежöрыс торксьöма да эскöмыс абу шогмана. ⁹ Но найö оз кутны дыр нимавны, Мöисейлы паныд сувтысьяслöн моз налöн йöйталöмыс тыдовтчас. ¹⁰ Тэ став сьöлöмнад йитчин менам велöдöмö, менам олöмö да менам могъясö. Мекöд тшöтш тэ эскин, терпитiн, радейтiн да зумыда сулалiн, ¹¹ кор менö суисны Антиокияын, Иконияын да Листраын вöтлöмъяс да сьöкыдлунъяс. Ме мунi сэки ыджыд вöтлöмъяс пыр, и Господь ставсьыс менö мездiс. ¹² Быдöнöс, кодi кöсйö овны вежа олöмöн Исус Кристос пытшкын, пондасны вöтлыны. ¹³ А лёк да пöръясьысь йöзлöн лёк вöчöмыс кутас содны. Найö унаöс ылöдасны, асьныс тшöтш ылаласны. ¹⁴ А тэ зумыда кутчысь сэтчö, мыйö тэнö велöдöма да мыйö тэ эскин. Тэ öд тöдан, кодi велöдiс тэнö. ¹⁵ Тэ ичöтсяньыд тöдан вежа Гижöдъяс. Гижöдыс сетö мывкыдлун, медым Исус Кристослы эскöмöн тэ вермин мездмыны. ¹⁶ Ставнас Гижöдыс Ен Ловсянь да вайö сöмын бур. Сiйö велöдö, янöдö, вежö да туйдöдö веськыд олöмас, ¹⁷ медым Енлöн морт вöлi тыр-бур да вöлi дась вöчны быдпöлöс бур уджсö.

¹ Ен водзын да Господь Исус Кристос водзын, кодi кутас мыждыны ловъяясöс да кулöмаясöс, Сылысь локтöмсö да Юралöмсö тöд вылын кутöмöн кора тэнö: ² ло дась висьтавны Енлысь Кывсö лöсялан и лöсявтöм кадö. Бур велöдысь моз терпитöмöн янöд, öлöд да туйдöд. ³ Öд воас кад, веськыд велöдöмсö оз пондыны кывзыны. Бöръясны аслыныс сьöлöм сертиыс велöдысьясöс, медым найöс кывзыны. ⁴ Пельнысö тупкасны збыльыслы да бергöдчасны мойдъяслань. ⁵ Но мед тэнад вежöрыд лоö ясыд быдторйын, сьöкыд нуигъясад кутчысь, висьтавлы Бур Юöрсö да кесъяв помöдз. ⁶ Öнi ме Ен водзö вайöм вись кодь, воис кад меным мунны. ⁷ Ме бура вермаси, помöдзыс котöртi, эскöмöс видзи. ⁸ Öнi менö виччысьö веськыдлуныслöн юркытш. Веськыда мыждысь Господь Аслас лунö сетас сiйöс меным да быдöнлы, кодi став сьöлöмнас виччысьö Сылысь локтöмсö. ⁹ Тэрмась локны ме дiнö регыдъя кадö. ¹⁰ Димас колис менö да мунiс Фессалоникаö. Сылы тайö мувывса олöмыс мусаджык вöлöма. Крискент мунiс Галатияö, Тит – Далматияö, öтнас Лука мекöд. ¹¹ Босьт аскöдыд Маркöс, сiйö бур отсасьысь менам уджын. ¹² Тихикöс ме мöдöдi Ефесö. ¹³ Локтiгад вай менсьым кышанöс, сiйöс ме коли Троадö Карп ордö. Босьт нöшта менсьым небöгъясöс, торйöн нин кучик вылö гижöмасö. ¹⁴ Уна лёк меным вöчис кузнеч Öльöксан. Господь Ачыс мед перъяс сылысь водзöссö став уджсьыс. ¹⁵ Видзчысь сыысь. Сiйö ёна паныд мунiс миян велöдöмлы. ¹⁶ Ёрдын медводдза дорйысигöн некод эз сувт ме дор, ставныс эновтiсны менö. Мед оз ло лыддьöма тайöс налы мыжöн. ¹⁷ Ачыс Господь вöлi ме дор. Сiйö ёнмöдiс менö, медым ме верми тырвыйö буръюöртны, медым став кыла войтырыс кылiсны тайö Бур Юöрсö. Господь мездiс менö весиг лев вомысь. ¹⁸ Тöда, Сiйö видзас менö став лёксьыс, мездас да вайöдас Аслас енэжвыв Юраланiнö. Ошкöм Сылы нэмъяс чöж! Аминь. ¹⁹ Висьтав чолöм Прискиллалы да Акиллы, тшöтш Öнисифорлöн гортсалы. ²⁰ Ераст кольччис Коринфö, Трöпимöс ме кольöдi Милитö, висьмис да. ²¹ Вермöдчы локны тöлöдзыс. Тэныд ыстöны чолöм Еввул, Пуд, Лин, Клавдия да став вокъяс. ²² Господь Исус Кристос тэкöд. Енлöн буралöмыс тiянкöд. Аминь.