2 Фессалоникаö

2 Фессалоникаö

¹ Павел, Силуан да Тимофей чолöмалöны тiянöс, миян Ен Батьлысь да Господь Исус Кристослысь фессалоникаса вичкоöс. ² Буралöм да лöнь олöм тiянлы Ен Батьнымсянь да Господь Исус Кристоссянь! ³ Вокъяс, миянлы век колö ошкыны Енсö тiянысь, öд тiян эскöмныд лунысь-лун ёнмö да öта-мöд костаныд муслунныд ёнджыка на содö. ⁴ Та вöсна ми ошйысям тiянöн Ен вичкоясын, öд быдпöлöс сьöкыдсö нуигöн да тiянöс вöтлiгöн тi зумыда эсканныд. ⁵ Енмыс лыддьö тiянöс шогманаясöн пырны Аслас Юраланiнö, öд дзик та понда тi нуанныд сьöкыдсö. Таын тыдалö Енлöн веськыдлуныс. ⁶ Енмыс веськыда вöчö: тiянöс дзескöдысьяслы Сiйö мынтысьö дзескöдöмöн. ⁷ А тiянлы да миянлы, сьöкыдсö нуысьяслы, Енмыс сетас шойччöг, кор Господь Исус Аслас вына анделъяскöд лэччас енэжсянь ⁸ ыпъялан би пытшкын да мыждас найöс, кодъяс оз тöдны Енсö да оз кывзыны миян Господь Исус Кристослысь Бур Юöрсö. ⁹ Найöс лоö мыждöма пыр кежлö кулöм вылö, торйöдöма Господьысь, Сылöн дзирдлунысь да вынысь. ¹⁰ Тайö лоö сiйö лунö, кор Господь локтас. Сэки Сылöн став вежа войтырыс кутас ошкыны Господьöс да став эскысьыс кутас шензьыны Сы вылö. Тi тшöтш лоанныд на лыдын, öд тi эскинныд миян висьталöмö. ¹¹ Та вöсна, дугдывтöг кевмысям тiян вöсна, медым Енным лыддяс тiянöс шогманаясöн лоны Аслас корöмаяс лыдын, медым Аслас вынöн Сiйö ёнмöдас тiянлысь бур кöсйöмнытö да эскöмныд пыр отсалас помöдз вайöдны бур уджъяснытö. ¹² Сэки миян Господь Исус Кристослöн нимыс ошкыссяс тiян пыр, а тi – Сы пыр, миян Ен да Господь Исус Кристослöн буралöмыс кузя.

¹ Öнi гижам тiянлы миян Господь Исус Кристослöн локтöм йылысь да Сы дiнö миян чукöртчöм йылысь. Вокъяс, корам тiянöс: ² энö майшасьöй некутшöм гижöдысь либö кодлöнкö сёрниысь, быттьö сiйö Ловсянь висьталö, мый Кристослöн луныс воис нин. Энö полöй, весиг висьталасны кö тiянлы, мый тайöс ми гижим. ³ Энö сетöй асьнытö ылöдлыны некодлы, öд сiйö луныс воас сöмын сэки, кор йöзыс кежасны Енсьыс. Сэки локтас мыжыслöн морт, кулöмыслöн пи, ⁴ Енлы паныд мунысь. Сiйö пуктас асьсö ставсьыс вылö, мый йöзыс Енмöн лыддьöны да шуöны вежаöн. Сiйö пуксяс Енлöн крамö быттьö Ен да кутас шуны асьсö Енмöн. ⁵ Тiянö волiгöн ме висьтавлi нин та йылысь, тi öмöй вунöдiнныд? ⁶ Öнi тi тöданныд, мый кутö паныд мунысьöс кадысь водз воссьöмысь. ⁷ Ен Индöдлы паныд мунысь вöчö нин ассьыс гуся уджъяссö. Кор лоö босьтöма сылöн туй вылысь сiйöс кутысьöс, ⁸ сэки паныд мунысь воссяс. Но Господь Исус локтiгас виас сiйöс Аслас лолыштöмнас да бырöдас сiйöс Аслас дзирдлуннас. ⁹ Паныд мунысьыс локтас сöтанасянь. Ыджыд вынöн сiйö кутас петкöдлыны индысьпасъяс да вöчны ылöг шензьöданаторъяс. ¹⁰ Сiйö быдногыс кутас ылöдлыны найöс, кодъяс мунöны кулöмас. Öд найö мустöмтiсны мездана збыльсö. ¹¹ Та вöсна Енмыс лэдзас ылöдлыны найöс, медым найö эскисны ылöгыслы. ¹² Тадзи лоö мыждöма быдöнöс, кодi радейтö ылöгсö да оз эскы збыльыслы. ¹³ Вокъяс, миянлы дугдывтöг колö ошкыны Енсö тiянысь. Тi ёна мусаöсь Господьлы, öд Енмыс водзысяньыс бöрйис тiянöс мездмöм вылö. Тайö мездмöмсö Сiйö сетö тiянлы Ловлöн вежöдöмыс пыр да збыльыслы эскöмныд пыр. ¹⁴ Ми висьтавлiм тiянлы Бур Юöрсö, код пыр Енмыс корис тiянöс мездмöмас, мед миян Господь Исус Кристослöн дзирдлуныс вичмис тiянлы. ¹⁵ Сiдзкö, вокъяс, зумыда сулалöй да кутчысьöй сэтчö, мыйö велöдiм тiянöс да мый гижим тiянлы. ¹⁶ Ен Батьнымлы ми ёна мусаöсь. Буралöмыс вöсна Сiйö сетiс миянлы пыр кежлö бурöдöм да зумыд лача. Ачыс Исус Кристос Господьным да Ен Батьным ¹⁷ мед бурöдасны тiянлысь сьöлöмнытö да ышöдасны тiянöс бур уджъяс вылö да бур сёрни вылö.

¹ Вокъяс, медбöрти корам тiянöс: кевмысьöй миян вöсна, мед Господьлöн Кывйыс öдйö паськалас, медым йöзыс тiян моз сибöдасны сiйöс пыдди пуктöмöн. ² Нöшта кевмысьöй, мед Ен видзас миянöс шогмытöм да лёк йöзысь, öд оз быдöн эскы. ³ Но Господь эскана, Сiйö ёнмöдас тiянöс да видзас омöльысь. ⁴ Господь эскöдö миянöс, мый тi вöчанныд нин миян тшöктöм серти да водзö на сiдзи кутанныд вöчны. ⁵ Ачыс Господь мед веськöдас тiянлысь сьöлöмнытö Енлöн муслунас да Кристослöн зумыдлунас. ⁶ Вокъяс, миян Господь Исус Кристос нимöн тшöктам тiянлы: ылыстчöй эскысь вокысь, кодi весь олö да оз ов миян велöдöм серти. ⁷ Тi öд асьныд тöданныд, мый тiянлы колö овны миян моз. Тiян дiнын ми весь эгö олöй, ⁸ некодлысь дась нянь эгö сёйöй. Лун и вой пöсь петтöдз уджалiм, öд некодöс тiян пöвстысь эгö кöсйöй сьöктöднысö. ⁹ Дерт, ми вермим весь овны, но тадзи эгö вöчöй. Ми кöсйим, мед тi видзöдiнныд миян вылö да олiнныд миян моз. ¹⁰ Öд тiянö волiгöн ми шулiм нин: «Кодi оз кöсйы уджавны, сiйö мед оз сёй». ¹¹ Миянлы кывсис, тiян пöвстысь пö öткымынöн весьшöрö кадсö коллялöны. Найö оз уджавны да нырсö быдлаö сюйöны. ¹² Татшöм йöзсö миян Господь Исус Кристос нимöн корам да ышöдам: уджалöй рам сьöлöмöн да ас ки помысь шедöдöй аслыныд кынöмпöттö. ¹³ Вокъяс, бурсö вöчигöн энö лигышмунöй. ¹⁴ Кодi оз вöч тайö гижöдас висьталöм серти, сiйöс кутöй тöд выланыд. Татшöм мортыскöд энö кутöй некутшöм йитöд. Тадзи тi янöданныд сiйöс. ¹⁵ Сöмын энö лыддьöй сiйöс паныд мунысьöн, а туйдöдöй сiйöс вокöс моз. ¹⁶ Ачыс Господь, лöньлунсö Сетысь, мед быд кадö да быдторйын сетас тiянлы лöньлунсö. Господь мед лоас ставныдкöд тiянкöд! ¹⁷ Ме, Павел, аслам киöн гижа тiянлы чолöмöс, кодi лоö пасöн, мый гижöдыс месянь. Ме гижа тадзи быд гижöдын: ¹⁸ миян Господь Исус Кристослöн буралöмыс ставныдкöд тiянкöд. Аминь.