2 Петыр

¹ Гижö Симон-Петыр, Исус Кристослöн кесйöг да апостол. Чолöмала тiянöс, миян моз сьöлöманыд эскöмсö босьтысьясöс. Тайö донаторсö ми босьтiм Исус Кристослöн, миян Ен Мездысьнымлöн веськыдлун вöсна. ² Буралöмыс да лöньлуныс мед содас тiянлы Енмöс да Исус Кристос Господьнымöс тöдмалiгöн. ³ Ми тöдмалiм Сiйöс, кодi корис миянöс Аслас дзирдлунö да тыр-бурö. Сылöн Ен вынсянь сетöма миянлы став коланасö, медым ми олiм вежавидзöмöн. ⁴ Миянлы сетöма зэв дона да ыджыд кöсйысьöмъяс, медым на отсöгöн тi верминныд ылыстчыны мувывса пежалана ыштöмъясысь, да медым тiян пытшкын вöлi енмалуныс. ⁵ Та могысь зiльöй петкöдлыны эскöманыд бур вöчöм, бур вöчöманыд – тöдöмлун, ⁶ тöдöмлунаныд – асьтö кутöм, асьтö кутöманыд – зумыдлун, зумыдлунаныд – вежавидзöм, ⁷ вежавидзöманыд – воктö радейтöм, воктö радейтöманыд – муслун. ⁸ Тайö кö тiян эм да содö, сiдзкö, Исус Кристос Господьнымöс тiян тöдмалöмныд оз ло весьшöрö да тi онö кольöй вотöстöг. ⁹ Кодлöн тайö абу, сiйö синтöм, нинöм оз аддзы, сiйö вунöдöма, мый сiйöс мыськалöма важ мыжъяссьыс. ¹⁰ Вокъяс, тiянöс корöма-бöрйöма. Сiдзкö, тöждысьöй, мед тайö лунысь-лун зумыдмас тiян пытшкын. Тадзи вöчиганыд некор онö крукасьöй. ¹¹ Сэки тi восьса öдзöсöд верманныд пырны миян Мездысь Господь Исус Кристослöн помтöм Юраланiнö. ¹² Та вöсна ме быдпöрйö кута казьтывны тiянлы та йылысь, кöть эськö тi тöданныд да зумыда сулаланныд тiянлы висьталöм збыляс. ¹³ Тайö вир-яй чомъяс олiгöн ме лыддя коланаöн садьмöдны тiянöс аслам казьтылöмъясöн. ¹⁴ Тöда, меным регыд ковмас кольны чомйöс. Тайöс восьтiс меным Исус Кристос Господьным. ¹⁵ Кута тöждысьны, медым менам мунöм бöрын ставсö тайöс пыр кутiнныд тöд выланыд. ¹⁶ Ми висьталiм тiянлы миян Господь Исус Кристослöн выныс да локтöмыс йылысь. Тайö абу кутшöмкö лöсьöдöм мойд, ми öд асланым синмöн аддзылiм Сылысь ыджыд вынсö. ¹⁷ Ен Батьыс сетiс Сылы нимöдöмсö да дзирдлунсö, кор Вылысса дзирдлунсяньыс кылiс гöлöс шы: «Тайö Менам муса Пиöй, Ме нимкодяся Сыöн». ¹⁸ Тайö шуöмсö ми кылiм енэжсянь, кор вöлiм Исускöд вежа керöсын. ¹⁹ Нöшта на, миян эм пророкъяслöн веськыд кыв. Тi бура вöчанныд, кутчысянныд кö тайö кывъяс, öд сiйö кыдзи пемыдiнын öзйысь би. Сiйö югдöдас лунъюгыд пуксьытöдзыс да сьöлöманыд асъя кодзув мыччысьтöдзыс. ²⁰ Тöдöй, пророк гижöдсö ачыс мортыс оз вермы гöгöрвоöдны. ²¹ Öд пророк юöрсö некор абу вöлi висьталöма мортлöн кöсйöмсянь. Сiйöс висьтавлiсны Вежа Лов ышöдöмсянь Енлöн вежа йöз.

¹ Израиль войтыр пöвстын вöлiны ылöгпророкъяс, тадзи тiян пöвстын тшöтш лоасны ылöгвелöдысьяс. Найö ваясны тiянлы бырöдан ылöгвелöдöмъяс, весиг соссясны Ыджыдысь, кодi ньöбис найöс. Тадзи найö кöлаласны ас выланыс виччысьтöм бырöдöмсö. ² Унаöн на вылö видзöдöмöн пондасны овны лэдзчысьöм оласногöн. Татшöмъясыс вöсна збыль туйыс лоö серам туйын. ³ Медым курыштны мыйкö аслыныс, найö тывйыштасны тiянöс мудер сёрнинаныс. Но налы мыждöмыс важöн нин дась, найöс бырöдöмыс матын нин. ⁴ Енмыс мыжö усьöм анделъясöс эз видз, шыбитiс найöс пемыд адö да дорис Мыждан лунöдз. ⁵ Эз видз Сiйö и Ентöг олысьясöн тырöм воддза муюгыдсö – бырöдiс ыджыд ваöн. Колис ловъяöн сöмын кöкъямысöс, öтиыс на пиысь вöлi веськыдлун йылысь юöртысь Ной. ⁶ Ен мыждiс Содом да Гомора каръяс, биöн бырöдiс пöимöдз. Тайöн петкöдлiс, мый жö виччысьö водзö Ентöг олысьясöс. ⁷ Но веськыда олысь Лотöс Енмыс мездiс. Лот ёна сьöкыдалiс Ентöг олысьяслöн лэдзчысьöм оласногысь. ⁸ Быд лун тайö веськыда олысьыслöн лолыс горзiс сы гöгöр олысь йöзлысь лёк вöчöмсö аддзöмысь-кылöмысь. ⁹ Господь тöдö, кыдзи мездыны вежавидзысьöс сьöкыдалöмсьыс, а лёк вöчысьöс Сiйö видзö, мед чорыда мыждыны сiйöс Мыждан лунö. ¹⁰ Торъя нин тайö инмö вир-яйлöн лёкколöмнас пежасьöмаяслы да Енлысь Юралöмсö мустöмтысьяслы. Найö яндысьтöмöсь, асныраöсь да оз повны лёкöдны енэжвывса вынъясöс. ¹¹ Анделъяс ёна вынаджыкöсь да ёнджыкöсь на дорысь, но найö оз мыжавны да оз лёкöдны татшöмъяссö Ен водзын. ¹² Тайö йöзыс асьныс оз гöгöрвоны, кодöс лёкöдöны. Найö вöрын шöйтысь вежöртöм пемöсъяс кодьöсь, кодъясöс лöсьöдöма кыйöм-виöм вылö. Пемöсъясöс моз найöс и лоö бырöдöма. ¹³ Лёк вöчöмсьыныс найö босьтасны водзöс. Найö радейтöны гажöдчыны лунъюгыднас, яндысьтöг пукалöны тiянкöд öти пызан сайын да пöръясьöмнас пежалöны ставсö. Тайö налöн чöсмасянторйыс. ¹⁴ Налöн синныс пыр öзъялö нывбабаяс вылö, найö оз пöтлыны мыжсö вöчöмсьыс, ылöдлöны жеб эскысьясöс. Сьöлöмныс налöн тырöма горшлунöн, найö ёрöмыслöн пиян. ¹⁵ Найö кежисны веськыд туйсьыс да ылалiсны. Найö мунöны Восорлöн Валаам пиыс кок туйöд, кодлы лёк ногöн шедöдны озырлунсö вöлi сьöлöм сертиыс. ¹⁶ Но сiйöс янöдöма вöлi лёктор вöчöмсьыс: осёл, кывтöм пемöс, шыасис морт моз да öлöдiс пророкöс йöйталöмсьыс. ¹⁷ Тайö ылöгвелöдысьясыс косьмöм юкмöс да тöвнырöн новлöдлан кымöръяс кодьöсь. Татшöмъясыслы век кежлö дасьтöма сап сьöд пемыдiн. ¹⁸ Тшап да ковтöм сёрнинаныс найö öзтöны вир-яйлысь лёкколöмсö да зiльöны кыскыны лэдзчысьöм оласногö найöс, кодъяс муртса на мынöмаöсь ылалöмаясысь. ¹⁹ Ылöгвелöдысьяс кöсйысьöны сетны налы мездлун, кöть асьныс найö пежыслöн кесйöгъяс. Öд кодi мортсö вермöма, сылöн сiйö и кесйöг. ²⁰ Мездысь Исус Кристос Господьнымöс тöдмалöм бöрын кö мувывса пежсьыс ылыстчысьяс бара бергöдчöны важас, да лёкыс кö вермö найöс, сэки татшöмъясыслы воддза дорсьыс ёна лёкджык лоö. ²¹ Бурджык эськö вöлi, найö кö эз тöдлыны веськыдлуныслысь туйсö. Öд найö тöдiсны тайöс, но бöр бергöдчисны налы сетöм вежа тшöктöмысь. ²² Татшöмъясыслы бура лöсялö тайö шусьöгыс: «Пон бергöдчö аслас вос дорö», да нöшта: «Мыськöм порсь бöр мунö туплясьны няйтö».

¹ Донаясöй, тайö менам мöд гижöд нин тiянлы. Кыкнан гижöдас аслам казьтылöмъясöн зiли ышöдны тiянöс мöвпавны сöстöма. ² Кутöй тöд выланыд вежа пророкьяслысь важысянь шуöмсö да Мездысь Господьлысь апостолъяс пыр сетöм тшöктöмсö. ³ Тöдöй, бöръя кадö локтасны тiянöс серам туйö пуктысьяс, асланыс лёк кöсйöмö сетчöмаяс. ⁴ Найö пондасны шуны: «Кöнi нö сiйö Локтысьыс, кодi кöсйысьлiс тай? Öд миян батьяс кулiсны нин, но ставыс коли важ мозыс: му пуксьöмсяньыс нинöм эз вежсьы». ⁵ Тадзи мöвпалысьяс быттьö оз тöдны, мый Ен Кывйöн артмöдöма енэжсö да мусö, вöчöма ваысь да ва отсöгöн, ⁶ и сэкся муюгыдсö вöлi бырöдöма ваöн. ⁷ Öнiя енэжсö да мусö сiйö жö Кывйыс кутö да видзö биöн бырöдöм вылö. Тайö лоö Мыждан лунö, кор Ентöг олысьясöс лоö бырöдöма. ⁸ Мусаясöй, кутöй тöд выланыд: Господьлöн öти луныс сюрс во кодь, сюрс воыс – öти лун кодь. ⁹ Кодсюрö чайтöны, мый Господьным нюжмасьö олöмö пöртны кöсйысьöмсö, но Сiйö оз нюжмась, а терпитö миянöс. Сiйö оз кöсйы, мед кодкö вошис, но кöсйö, мед быдöн бергöдчис мыжъяссьыс. ¹⁰ Господьлöн луныс воас виччысьтöг, войся гусясьысь моз. Сэки енэжыс ыджыд шыöн бырас, став ентыкöлаыс ыпъялана биысь киссяс, а муыс да ставыс, мый сы вылын, сотчас. ¹¹ Ставыс кö тадзи киссяс, сэки кутшöм вежаöн да веськыдöн колö лоны тiянлы. ¹² Тi öд ёна кöсъянныд да виччысянныд, мед öдйöджык нин воас Енлöн луныс. Сiйö лунö енэжыс ыпъялан биысь сотчас да киссяс, доналöм ентыкöлаыс сылас. ¹³ Но Енлöн кöсйысьöмыс серти ми виччысям выль енэж да выль му, кöнi кутас ыджыдавны веськыдлун. ¹⁴ Сiдзкö, мусаясöй, тайöс виччысиганыд тöждысьöй, медым сувтны Ен водзö сöстöмöн да мыжтöмöн, мед тiян сьöлöмын вöлi лöньлун. ¹⁵ Енлысь терпитöмсö лыддьöй аслыныд мездмöмöн. Та йылысь гижлiс тiянлы Ен вежöра дона Павел вокным. ¹⁶ Татшöмторъяссö сiйö висьталö быд гижöдын. Мыйсюрö сэтысь сьöкыд гöгöрвонысö. Та вöсна унаöн ичöт мывкыднысла да жеб эскöмнысла сылысь гижöдъяссö мукöд Гижöдсö моз бергöдöны мöдарö. Тадзи кöлалöны ас выланыс бырöдöмсö. ¹⁷ Та вöсна, мусаясöй, водзвыв тайöс тöдöмöн видзчысьöй, медым энö шедöй Ентöг олысьяслöн ылöдöмö да энö усьöй зумыд подув вывсьыс. ¹⁸ Быдмöй буралöмас да миян Мездысь Исус Кристос Господьнымöс тöдмалöмас. Сылы ошкöмыс öнi да нэмъяс чöж. Аминь.