2 Иоан

¹ Ме, пöрысь морт, гижа Енмöн бöрйöм аньлы да сылöн челядьлы. Тi меным збыльысь мусаöсь. Мусаöсь абу сöмын меным, но быдöнлы, кодi тöдö збыльсö. ² Тi меным мусаöсь збыльыс вöсна, öд сiйö олö миян пытшкын да лоö миянкöд нэмъяс чöж. ³ Бурсетöм, буралöм да лöнь олöм тiянлы, збыляс да муслунас кутчысьысьяслы, Ен Батьсянь да Господь Исус Кристоссянь – Батьыслöн Писянь. ⁴ Меным лои зэв нимкодь, кор аддзи, мый тэнад челядь пиысь кодсюрö ветлöны збыляс, Батьлöн тшöктöмыс серти. ⁵ Öнi менам татшöм корöм, дона аньöй, медым ми радейтiм öта-мöднымöс. Тайö тшöктöмыс абу выль, сiйö миян водзысяньыс нин вöлi. ⁶ Радейтны, сiдзкö, овны Ен тшöктöмъяс серти. Дзик тайö тшöктöмсö тi кывлiнныд водзысяньыс, сы серти и колö овны. ⁷ Öнi муюгыдас уна ылöдысьыс. Найö оз эскыны, мый Исус Кристос локтiс вир-яйын. Татшöм мортыс – ылöдысь да антикрист. ⁸ Видзöдöй ас бöрсяныд, медым ми эгö воштöй сiйö, мый вöсна миян уджалöма, мед эськö ми вермим босьтны удждонсö дзоньнас. ⁹ Кодi торкö Кристослысь велöдöмсö да оз кутчысь сэтчö, сыкöд Енмыс абу. Кодi кутчысьö Кристослöн велöдöмас, сыкöд Батьыс и Пиыс. ¹⁰ Тiян дiнö локтысь кö вайö мöд велöдöм, энö сибöдöй сiйöс керка помад, весиг энö чолöмасьöй сыкöд. ¹¹ Сыкöд чолöмасьысь öтувтчö сылöн лёк уджъясö. ¹² Унатор на эм гижнысö тiянлы, но öнi ог кут ставсö гижны кабала вылö чернилаöн. Чайта, артмас волыны тiян дiнö да воча пуксьöмöн сёрнитны, медым тi верминныд тырвыйö нимкодясьны. ¹³ Чолöм тэныд ыстöны бöрйöм чойыдлöн челядьыс. Аминь.