2 Коринфö

2 Коринфö

¹ Гижö Павел, Ен кöсйöм серти Исус Кристослöн апостол. Тимофей воккöд ми чолöмалам тiянöс, коринфса вичкоöс, да Акайя пасьтала став вежа войтырöс. ² Буралöм да лöнь олöм тiянлы Ен Батьнымсянь да миян Господь Исус Кристоссянь. ³ Ошкöм Енлы, миян Господь Исус Кристослöн Батьлы. Сiйö – бур сьöлöма Бать да быдторйын бурöдысь Ен! ⁴ Сiйö бурöдö миянöс быд шог дырйи, медым ми тшöтш вермим бурöдны шогö усьöмаясöс Енсянь бурöдöмöн. ⁵ Ми уна нуам Кристослысь сьöкыдсö, но та дырйи ми уна и босьтам Кристоссянь бурöдöмсö. ⁶ Ми кö сьöкыдалам – тiянöс бурöдöм да мездмöм вылö. А мездмöмныд лоö тырвыйö сэки, кор миян моз венанныд сьöкыдлунсö. ⁷ Та вöсна ми кутам тiян вылö зумыд лача. Енмыс кö бурöдö миянöс – тiянлы тшöтш вичмö бурöдöмыс да мездмöмыс. Ми тöдам, тi кö миян моз нуанныд сьöкыдсö, сiдзкö, миянлы моз тiянлы тшöтш вичмас бурöдöмыс. ⁸ Вокъяс, ми кöсъям, мед тi тöдiнныд, кутшöм сьöкыдлунъяс суисны миянöс Асияын. Миянлы вöлi сэтшöм сьöкыд, эгö чайтöй весиг ловйöн кольны. ⁹ Асьнымöс лыддим нин кулöмаясöн, эз вöв некутшöм лача ас выланым, сöмын Ен вылö, кулöмаясöс Ловзьöдысь вылö. ¹⁰ Сiйö видзис миянöс кулöмысь да водзö на видзас. Тi кö отсаланныд миянлы кевмысьöмъяснаныд, ми лача кутам, мый Енмыс нöшта на видзас. Сэки унаöн кутасны ошкыны Енсö миян дiнö буралöмысь. ¹² Ми ошйысям, мый тайö муюгыдас олысьяскöд, торйöн нин тiянкöд, вöлiм восьсаöсь да веськыдöсь, олiм Енлысь кывзысьöмöн. Та вöсна миян сьöлöмным оз мыжды миянöс. Ми öд эгö асланым мывкыд серти олöй, миянöн веськöдлiс Енлöн буралöмыс. ¹³ Ми гижам тiянлы сöмын сiйö, мый лыддянныд да гöгöрвоанныд. Кута лача, тi понданныд тырвыйö гöгöрвоны миянöс. ¹⁴ Дерт, тi мыйтакö öнi гöгöрвоанныд нин миянöс. Сiдзкö, миян Господь Исус Кристослöн лунö ми вермам öтмоза ошйысьны öта-мöдöн. ¹⁵ Татчö зумыда эскöмöн ме водзынджык нин кöсйи волыны тiян дiнö, медым Енлöн буралöмыс кыкысь вичмис тiянлы. ¹⁶ Ме öд кöсйи кежавны тiян дiнö Македонияö мунiгöн, тшöтш бöрсö локтiгöн. Сэсся тi эськö водзö мöдöдiнныд менö Юдеяö. ¹⁷ Гашкö, тадзи мöвпалiгöн ме кокньыд мывкыда вöлi? Гашкö, чайтанныд, тайö кöсйöмыс менам ассянь вöлi? Гашкö, менам öтпырйö артмö "сiдз" и "абу сiдз"? ¹⁸ Ен тöдö, мый тайö збыль: ме некор эг шулы öтпырйö "сiдз" и "абу сiдз". ¹⁹ Силуанкöд да Тимофейкöд ми висьтавлiм тiянлы Ен Пи йылысь – Исус Кристос йылысь. Сiйö некор эз шулы öтпырйö "сiдз" и "абу сiдз". Сы пытшкын ставыс вöлi "сiдз". ²⁰ Енлöн став кöсйысьöмыс збыльмис Исус Кристос пыр. Та вöсна Енмöс ошкöмöн ми шуам Сылы Исус Кристос пыр "Аминь". ²¹ Енмыс, кодi топыда йитö миянöс да тiянöс Кристос пытшкын, мавтыштiс миянöс: ²² Сiйö пасйис миянöс да мöдöдiс миян пытшкö Ассьыс Ловсö, кодi эскöдö миянöс, мый Енлöн став кöсйысьöмыс збыльмас. ²³ Ме висьтала тайöс Ен водзын: сöмын тiянöс жалитöм вöсна ме öнöдз эг волы Коринфö. ²⁴ Ми огö кöсйöй веськöдлыны тiян эскöмöн, сöмын кöсъям отсавны тiянлы, мед тi верминныд нимкодясьны. Öд ми тöдам, мый тiян эскöмныд зумыд.

¹ Ме ог кöсйы бара шогöдны тiянöс. Та вöсна шуи аслым, мый öнi ог на лок тiян дiнö. ² Öд ме кö шогöда тiянöс, кодi менö гажöдас? Оз-ö сiйö, кодöс ме шогöдi. ³ Дзик та йылысь ме гижлi тiянлы, медым тiянö воа да, меным эз ковмы шогсьыны сiйö йöзыс вöсна, код вöсна колö нимкодясьны. Öд ме тöда, меным кö нимкодь, долыд тшöтш ставныдлы тiянлы. ⁴ Воддза гижöдсö ме гижи тiянлы ёна шогсьöмöн, сьöлöм дойöн да кыз синваöн. Ме гижи сiйöс эг тiянöс шогöдöм понда, но медым тi гöгöрвоинныд, кутшöм тi мусаöсь меным. ⁵ Кодкö шогöдiс кö менö, сiйö эз сöмын менö шогöд. Содтавтöг шуа, сiйö шогöдiс мыйтакö тшöтш ставнытö тiянöс. ⁶ Сэтшöмыслы тырмана нин тiянсянь мыждöмыс. ⁷ Бурджык, тi кö прöститанныд да бурöданныд сiйöс, медым ёна шогсьöмысла дзикöдз эз нюкыртчы. ⁸ Та вöсна кора тiянöс: петкöдлöй сы дiнö ассьыныд муслунтö. ⁹ Сiйö гижöдсö ме гижлi тiянлы, медым тöдмавны, быдторйын-ö тi кывзысянныд. ¹⁰ Тi кö прöститанныд кодöскö, ме тшöтш. Ме öд прöстита сiйöс Кристос водзын, эм кö мыйысь прöститнысö. Ме вöча тайöс тiян вöсна, ¹¹ медым сöтана эз ылöдлы миянöс, ми öд тöдам сылысь наян мöвпъяссö. ¹² Кор локтi Троада карö висьтавлыны Кристос йылысь Бур Юöрсö, Господь восьтiс меным öдзöс сэнi уджавны. ¹³ Но сьöлöмöй ёна майшасис, Тит вокöс сэтысь эг аддзы да. Сэки ме янсöдчи сэтчöс йöзкöд да мöдöдчи Македонияö. ¹⁴ Ошкöм Енлы! Кристос пыр Сiйö быд кадö сетö миянлы вермöм да миян пыр быдлаын паськöдö Кристос йылысь чöскыд дука тöдöмлунсö. ¹⁵ Енмыслы ми – Кристослöн чöскыд дука öвтанторъяс. Тайö дуксö тöдöны мездмöмаяс и вошöмаяс. ¹⁶ Öтияслы тайö дукыс вайö кулöм, а мöдъяслы – олöм. Но кодi шогмас та вылö? ¹⁷ Мукöдыс моз ми огö висьтавлöй Енлысь Кывсö дон вылö. Ми висьтавлам сiйöс Ен водзын веськыда, öд ми – Кристослöн кесъялысьяс да Енсянь мöдöдöмаяс.

¹ Гашкö, миянлы выльысь тöдмасьны тiянкöд? Гашкö, мукöдыслы моз миянлы тшöтш колö вайны тiянлы эскöдан гижöдсö? Гашкö, асьныд сiйöс сетанныд? ² Миян эскöдан гижöдыс – тi. Тайö гижöдсö гижöма миян сьöлöмö, сiйöс тöдöны да лыддьöны став йöзыс. ³ Быдöнлы тыдалана, мый тi – Кристослöн гижöдыс. Сiйöс гижöма Ен Лолöн, абу чернилаöн, гижöма морт сьöлöмö, абу шыльöдöм из вылö. Татшöм гижöднас тi лоинныд миян кесъялöм пыр. ⁴ Татшöм зумыд лача ми кутам Ен вылö Кристос пыр. ⁵ Ми лыддям, мый асьным ми нинöм вылö огö туйöй, нинöм огö сяммöй вöчнысö, но Енмыс сетö миянлы сямлунсö. ⁶ Сiйö сетiс миянлы сямлун кесъявны Выль Йитöдлы, кöнi веськöдлö Лов, а оз шыпаса Индöд. Öд шыпаса Индöдыс вайö кулöм, а Лолыс сетö олöм. ⁷ Индöдсö вöлi гижöма шыльöдöм из вылö. Тайö Индöдсö Мöисейлы сетiгöн Енмыслöн дзирдлуныс сэтшöма югдöдiс Мöисейлысь чужöмсö, мый Израиль войтыр весиг эз вермыны видзöдны сы вылö. Но тайö дзирдлуныс вöлi сöмын регыдъя. Сiдзкö, кулöмö вайöдысь Индöдлы кесъялöмыс кö вöлi сэтшöм дзирдалана, ⁸ сэки кымын пöв дзирдаланаджык Ловлы кесъялöмыс? ⁹ Мыждана Индöдлы кесъялöмыс кö вöлi дзирдалана, сэки кымын пöв дзирдаланаджык веськыдлуныслы кесъялöмыс. ¹⁰ Та вöсна öнiя дзирдлуныс вевттьö воддзасö. ¹¹ Сiдзкö, воддзаыс, быранаыс кö вöлi сэтшöм дзирдалана, сэки кымын пöв дзирдаланаджык öнiяыс, бырлытöмыс! ¹² Та вылö лача кутöмöн ми сёрнитам повтöг. ¹³ Ми огö вöчöй Мöисей моз. Сiйö тупкылiс ассьыс чужöмсö вевттьöдöн, медым Израиль войтыр эз аддзы дзирдлуныслысь бырöмсö. ¹⁴ Налöн пемдöма вежöрныс. Важ Йитöд йылысь Гижöдсö лыддигöн на вылын öнöдз куйлö тайö вевттьöдыс, öд сiйöс вештö сöмын Кристос. ¹⁵ Мöисейлысь Индöдсö лыддигöн вевттьöдыс öнöдз на куйлö сьöлöм выланыс. ¹⁶ Но мортыс кö бергöдчö Господь дiнö, сэки вевттьöдыс босьтсьö. ¹⁷ Господь эм Лов. Кöнi Господьлöн Лолыс, сэнi мездлун. ¹⁸ Ми ставным чужöмнымöс вевттьытöг видзöдам Господьлöн дзирдлун вылö да рöмпöштанысь моз аддзам Сылысь дзирдлунсö. Сы вылö видзöдöмöн ми лунысь-лун вежсям да кутам дзирдавны Сы моз жö. Татшöмнас вöчö миянöс Господьлöн Лолыс.

¹ Аслас буралöмыс кузя Енмыс сетiс миянлы тайö кесъялöмсö, та вöсна ми огö öшöдöй юрнымöс. ² Ми огö вöчöй гусясö да янöданасö, огö ылöдчöй, Енлысь Кывсö висьтавлам торкавтöг. Ми восьсöн висьталам збыльсö да быдöнлы сетам донъявны асьнымöс Ен водзын. ³ Кодлыкö тупкыса кö миян буръюöртöмыс, сiйö тупкыса вошöмаяслы. ⁴ Найö оз эскыны, öд тайö муюгыдас ыджыдалысь омöльыс пемдöдöма налысь вежöрсö, мед найö эз аддзыны Бур Юöрлысь югыдсö, кодi восьтö Кристослысь дзирдлунсö, а Кристос – Енлöн пертасыс. ⁵ Ми огö ас йылысь висьтавлöй, а висьтавлам Исус Кристос йылысь, мый Сiйö – Господь. Сiйö мöдöдiс миянöс кесъявны тiянлы. ⁶ Енмыс, кодi тшöктiс пемыдас öзйыны югыдыслы, югдöдiс миянлысь сьöлöмнымöс, медым ми вермим аддзыны Енлысь дзирдлунсö Исус Кристос чужöмбанысь. ⁷ Тайö озырлунсö ми новлöдлам ас пытшканым, кыдзи сёй дозъясын, медым петкöдлыны, мый тайö ыджыдсьыс-ыджыд выныс Енмыслöн, а абу миян. ⁸ Миянöс быд боксянь топöдöны, но йöршитны оз вермыны. Ми шöйöвошлам, но лачанымöс огö воштöй. ⁹ Миянöс вöтлöны, но Енмыс оз эновт миянöс. Миянöс омöльтöны, но бырöдны оз вермыны. ¹⁰ Асланым вир-яйын ми пыр новлöдлам Господь Исуслысь кулöмсö, медым миян вир-яйын тыдовтчис тшöтш Сылöн олöмыс. ¹¹ Ми ловъяöсь, но быд кадö кулан выйынöсь Исус вöсна, медым миян кулана вир-яйын тыдовтчис Сылöн олöмыс. ¹² Тадзи кулöмыс вöчö ассьыс уджсö миян пытшкын, а олöмыс – тiянын. ¹³ Гижöдыс висьталö: «Ме эски, та вöсна и висьталi». Миян пытшкын тайö жö эскан лолыс. Ми тшöтш эскам, та вöсна и висьталам. ¹⁴ Ми тöдам, мый Господь Исусöс Ловзьöдысь Исус пыр ловзьöдас тшöтш миянöс да сувтöдас тiянкöд Ас водзас. ¹⁵ Став сьöкыдсö ми нуам тiян вöсна, медым Енлöн буралöмыс содiс да вичмис уналы на. Сэки унаöн кутасны аттьöавны да ошкыны Енсö. ¹⁶ Та вöсна ми огö öшöдöй юрнымöс. Кöть миян ортсысаыс, вир-яйным, сiсьмö, но пытшкöссаыс лунысь-лун выльмö. ¹⁷ Миян сьöкыдалöмыс кокньыд, сöмын регыдъя, но таысь вичмас миянлы помтöм-дортöм да бырлытöм дзирдлун. ¹⁸ Ми видзöдам тыдавтöмыс вылö, огö тыдаланаыс вылö. Öд тыдавтöмыс бырлытöм, а тыдаланаыс бырана.

¹ Ми тöдам: тайö мувывса чомйыс, миян вир-яйным, кö киссяс, Енмыс сетас миянлы енэжас оланiн – киöн вöчтöмöс, бырлытöмöс. ² Öнi ми сьöкыда ышлолалам, öд ёна кöсъям овмöдчыны енэжвыв оланiнö ³ да пасьтавны выльсö. Сэки ми огö лоöй пасьтöмöсь. ⁴ Тайö вир-яй чомъяс олiгöн ми сьöкыда ышлолалам, öд огö кöсйöй пöрччысьны, но кöсъям пасьтавны выльсö, медым олöмыс вевттис куланасö. ⁵ Дзик та вылö Енмыс дасьтiс миянöс да сетiс миянлы Ассьыс Ловсö. Тайö Лолыс эскöдö миянöс, мый Енлöн став кöсйысьöмыс збыльмас. ⁶ Сiйöн ми пыр повтöмöсь, кöть тöдам, мый тайö вир-яяс олiгöн ми ылынöсь Господьысь. ⁷ Öд ми олам эскöмöн, огö аддзананас. ⁸ Та вöсна ми збыльысь повтöмöсь! Ми кöсъям öдйöджык петны тайö вир-яйсьыс да овмöдчыны гортö, Господь дiнö. ⁹ Та вöсна, олам-ö Сы дiнын али огö на, сьöлöмсянь зiлям шогмыны Господьлы. ¹⁰ Öд миянлы быдöнлы ковмас сувтны Кристослöн ёрд водзö. Сэки быдöнöс лоö мыждöма уджъясыс серти: бурсö али лёксö мортыс вöчис вир-яйын олiгас. ¹¹ Ми тöдам, мый сэтшöм Господьысь полöмыс, та вöсна зiлям эскöдны тшöтш мукöдсö. Енмыслы ми восьсаöсь, чайтам, тiян сьöлöмлы тшöтш восьсаöсь. ¹² Ми огö кöсйöй выльысь петкöдлыны асьнымöс тiян водзын, сöмын сетам тiянлы позянлун ошйысьны миянöн, мед тi верминныд вочавидзны налы, кодi ошйысьö мыйöнкö ортсысанас, а оз пытшкöссанас. ¹³ Ми кö ас вежöрынöсь – тайö тiянлы, абу кö – Енмыслы. ¹⁴ Миянöн веськöдлö Кристослöн муслуныс, сiйöн тадзи мöвпалам, мый öти кö кулiс ставныс вöсна, сiдзкö, ставныс кулiсны. ¹⁵ Кристос кулiс ставныс понда, медым олысьяс эз нин ас вöснаныс овны, но олiсны на понда Кулысь да Ловзьысь вöсна. ¹⁶ Öнiсянь ми некодöс огö донъялöй морт видзöдлас серти. Водзын кö Кристосöс донъялiм морт видзöдлас серти, öнi огö. ¹⁷ Сiдзкö, кодi Кристос пытшкын – сiйö выль олысь. Важыс кольöма, öнi ставыс выль. ¹⁸ Ставыс Енсянь. Исус Кристос пыр Енмыс бурöдiс миянöс Аскöдыс да мöдöдiс миянöс висьтавлыны бурасьöмыс йылысь. ¹⁹ Исус Кристос пыр Енмыс бурöдiс Аскöдыс став йöзсö да оз нин лыддьы найöс мыжаöн. Енмыс сетiс миянлы бурасьöмыс йылысь кывсö. ²⁰ Сiдзкö, ми – Кристослöн мöдöдöмаяс, и Ачыс Енмыс шыасьö миян пыр йöзыс дiнö. Кристос нимöн ми корам: бурасьöй Енмыскöд! ²¹ Кристослöн эз вöв некутшöм мыж, но Енмыс пуктiс Сы вылö миянлысь мыжъяснымöс, медым Сы пыр ми лоим Ен водзын веськыдöн.

¹ Ми, Енкöд öтвыв уджалысьяс, корам тiянöс: сибöдöй Енлысь буралöмсö, мед сiйö эз ло весьшöрö. ² Öд Енмыс висьталö: – Ме кылi тэнö бур кадö, отсалi тэныд мездман лунö. Со öнi бур кадыс, со öнi мездман луныс. ³ Ми некодлы огö сетöй помка шуасьны миян вылö, медым эз ло лёкöдöма кесъялöмнымöс. ⁴ Мöдарö, ми быдторйын петкöдлам асьнымöс Енлöн кесъялысьясöн: ми нуам сьöкыдсö, шогсö, дзескöдöмсö. Ми зумыдöсь, ⁵ кор миянöс нöйтöны, пуксьöдöны дзескыдiнö, вöтлöны, кор ми уджалам ныр вылö усьтöдз, видзалам, коллялам узьтöм войяс. ⁶ Ми олам сöстöма. Миян эм тöдöмлун, терпитöм, бурлун. Миянöн веськöдлö Вежа Лов да сьöлöмсянь муслун. ⁷ Ми висьталам збыльсö, ставсö вöчам Ен вынöн. Миян вермасянторным – веськыдлун. Сiйöн вермасям и водзсасям. ⁸ Ми дасьöсь сибöдны ошкöмсö и янöдöмсö, нимöдöмсö и лёкöдöмсö. Миянöс лыддьöны пöръясьысьясöн, но ми веськыда сёрнитам. ⁹ Ми огö нималöй, но миянöс ставныс тöдöны. Миянöс лыддьöны кулöмаясöн, но ми ловъяöсь. Миянöс нöйтöны, но огö кулöй. ¹⁰ Миянöс шогö вöйтöны, а ми пыр нимкодясям. Ми гöльöсь, но унаöс озырмöдам. Миян нинöм абу, но ставыс эм. ¹¹ Коринфсаяс, ми сёрнитам тiянкöд веськыда, миян сьöлöмным восьса тiянлы. ¹² Ми восьтiм тiянлы сьöлöмнымöс, но тiян сьöлöмныд тупкыса миянлы. ¹³ Ме шуа тiянлы аслам ныв-пилы моз: воча восьтöй сьöлöмнытö миянлы. ¹⁴ Энö сюйöй юрнытö öти сийöс улö эскытöмъяскöд. Вермас öмöй йитны мыйкö веськыдлунсö лёкыскöд? Эм-ö öткодьлуныс югыдыслöн пемыдыскöд? ¹⁵ Вермас öмöй воны öти кывйö Кристос Велиаркöд? Мый вермас йитны эскысьöс эскытöмкöд? ¹⁶ Вермасны öмöй сулавны идолъяс Енлöн крамын? Öд тi – ловъя Енлöн крамыс. Енмыс шуö: – Овмöдча на пытшкö да понда ветлыны накöд. Ме лоа налöн Енмöн, а найö – Менам войтырöн. ¹⁷ Сiдзкö: – Петöй на пöвстысь да ылыстчöй наысь, – висьталö Господь. – Энö инмöдчöй пежас, сэки Ме сибöда тiянöс. ¹⁸ Ме лоа тiянлы Батьöн, а тi – Меным ныв-пиöн, – висьталö Господь, Ставсöкутысь.

¹ Мусаяс, со мыйта кöсйысьöм Енмыс сетöма миянлы! Сiдзкö, весалам ассьыным вир-яйнымöс да ловнымöс став пежсьыс. Кутам овны Енсьыс полöмöн, Сылöн вежалуныс мед тырвыйö лоö миян пытшкын! ² Восьтöй миянлы сьöлöмнытö, öд ми некодöс эгö дöзмöдöй, некодлы лёксö эгö вöчöй, некод помысь эгö озырмöдчöй. ³ Тайöс висьтала ог тiянöс мыждöм могысь. Öд водзынджык тiянлы шулi нин: тi миян сьöлöмынöсь, ми дасьöсь овны и кувны тiянкöд öтвылысь. ⁴ Ме ёна эска тiянлы да ошйыся тiянöн. Шогъяс вылö видзöдтöг ме ёна нимкодяся, öд тi ёна бурöданныд менö. ⁵ Македонияö воöм бöрын миян эз вöв некутшöм шойччöг. Миянлы быд боксянь вöлi сьöкыд: ортсысянь – усьласисны, а пытшкöсаным вöлi полöм. ⁶ Но Енмыс, ловнас усьöмаясöс Ышöдысь, ышöдiс миянöс Тит воöмöн, ⁷ и эз сöмын тайöн. Миян ловным кыпалiс тшöтш сыысь, мый тi ышöдöмныд Титöс. Сiйö висьталiс миянлы, тi пö ёна гажтöмтчанныд меысь, ёна шогсянныд да доръянныд менö. Таысь меным нöшта на нимкодь лои. ⁸ Дерт, менам сьöлöмöй нормылiс, мый аслам гижöдöн шогö уськöдi тiянöс. Но öнi ог нин шогсьы, öд ме аддза, мый гижöдыс шогöдлiс тiянöс сöмын кад кежлö. ⁹ Ме нимкодяся ог тiян шогö усьлöм понда, а нимкодяся сы понда, мый тiян шогсьöмныд бергöдiс тiянöс мыжъяссьыныд. Тайö шогсьöмыс вöлi Ен кöсйöм серти, сiдзкö, нинöм лёксö ми эгö вöчöй тiянлы. ¹⁰ Öд Ен кöсйöм серти шогсьöмыс бергöдö мыжъясысь, а тасянь – мездмöмыс. Сiдзкö, та йылысь жалитны оз ков! А мувывса шогъясыс вайöдöны кулöмöдз. ¹¹ Видзöдлöй, мый вайис тiянлы Ен кöсйöм серти шогсьöмыс: кутшöма тi зiлянныд петкöдлыны ассьыныд мыжтöмлуннытö, дöзманныд лёк вöчысь вылö да поланныд лёк вöчöмысь! Кутшöма тi гажтöмтчанныд миянысь, ловнаныд ыпъяланныд да кöсъянныд мыждыны лёк вöчысьöс! Тi быд боксянь петкöдлiнныд ассьыныд сöстöмлуннытö. ¹² Ме гижи тiянлы эг сы вöсна, кодi вöчис лёксö либö кодлы вöчисны лёксö, а гижи тiянлы, медым тi гöгöрвоинныд Ен водзын, кутшöма ми тöждысям тiян вöсна. ¹³ Сiдзкö, тiян долыдлунныд долыдмöдiс и миянöс. Но нöшта на долыд лоис Титлöн нимкодясьöмысь, öд сылöн сьöлöмыс оз нин майшась тiян вöсна. ¹⁴ Ме ошйысьлi Тит водзын тiянöн, да меным абу яндзим таысь. Ми ставсö висьтавлiм тiянлы веськыда, и Тит водзын миян ошйысьöмным тшöтш вöлi веськыд. ¹⁵ Öнi, тiянöс казьтылiгöн, сылöн сьöлöмас ёнджыка на содö тiян дiнö муслуныс, öд тi ёна кывзысьöмныд сылысь, полöмöн да пыдди пуктöмöн сибöдöмныд сiйöс. ¹⁶ Меным нимкодь, мый быдторйын верма тiян вылö лача кутны.

¹ Вокъяс, ми кöсъям, мед тi тöдiнныд Енлысь ыджыд буралöмсö македонияса вичкояс дiнö. ² Налы ёна сьöкыд, но та вылö видзöдтöг найö ёна нимкодясьöны. Найö вывтi гöльöсь, но та дырйи найö зэв лышкыдöсь. ³ Ме тöда: найö сетöны мыйтöм вермöны, весиг верманасьыс унджык на. ⁴ Найö ёна корисны миянöс босьтны насянь сетöмторсö, медым отсавны вежа войтырлы. ⁵ Найö сетiсны ёна унджык миян виччысьöм дорысь. Ен кöсйöм серти найö сиисны асьнысö медводз Господьлы, сэсся миянлы. ⁶ Та вöсна ми корим Титöс водзö вöчны тайö бур уджсö тiян пöвстын да вайöдны сiйöс помöдз. ⁷ Тi озырöсь быдторнас: эскöмöн, сёрнитны кужöмöн, тöдöмлунöн, зiльöмöн, миян дiнö муслунöн. Сiдзкö, лоöй лышкыдöсь тшöтш отсöг сетiгöн. ⁸ Тайö абу тшöктöм. Ме висьтала тiянлы мукöдыслöн зiльöм йылысь, медым тöдмавны, сьöлöмсянь-ö тi радейтанныд йöзсö. ⁹ Тi тöданныд миян Господь Исус Кристослысь буралöмсö. Сiйö вöлi озыр, но гöльмис тiян вöсна, медым Аслас гöльлунöн озырмöдны тiянöс. ¹⁰ Ме туйдöда тiянöс, öд тайö тiянлы бур вылö. Тi кольöм воö нин кутiнныд вöчны тайö уджсö, и вöчинныд сiйöс окотапырысь. ¹¹ Тi ёна кöсйинныд вöчны тайö уджсö, сiдзкö, вöчöй сiйöс позянлун сертиныд да вайöдöй сiйöс помöдзыс! ¹² Мортыс кö сетö сьöлöмсяньыс, сылысь сетöмторсö донъялöны эмлуныс серти, а оз абутöмлуныс серти. ¹³ Ме ог кöсйы сьöктöдны тiянöс, медым мукöдыслы вöлi кокньыдджык, но кöсъя, медым быдöнлы вöлi öтмоза. ¹⁴ Öнi тiян озырлунныд вевттяс налысь тырмытöмсö, а мöдысь налöн озырлунныс вевттяс тiянлысь тырмытöмсö. Тадзи быдöнлы лоö öтмоза. ¹⁵ Гижöдыс висьталö: Уна чукöртысьлöн эз вöв вывтiыс, этша чукöртысьлöн эз вöв тырмытöмыс. ¹⁶ Ошкöм Енлы! Сiйö пуктöма Тит сьöлöмö тiян вöсна ме кодь жö тöждысьöм. ¹⁷ Тит мунö тiян дiнö оз сöмын менам корöм вöсна. Сiйö ёна тöждысьö тiян вöсна, та понда сiйö мунö ас кöсйöм сертиыс. ¹⁸ Сыкöд ми мöдöдам нöшта öти вокöс. Быд вичко ёна ошкö сiйöс Бур Юöр висьтавлöмысь. ¹⁹ Вичкояс бöрйисны тайö воксö ветлыны миянкöд, медым чукöртны сетöмтор. Тайö уджсö ми вöчам Господьöс ошкöм могысь. Тайöн петкöдлам, мый ми дасьöсь отсасьны тiян моз. ²⁰ Ми огö кöсйöй, медым тайö уна сетöмторсö чукöртiгöн кодкö шуасис миян вылö. ²¹ Ми ставсö зiлям вöчны веськыда огö сöмын Господь водзын, тшöтш йöзыс водзын. ²² Тит да тайö вокыскöд ми мöдöдам нöшта öтиöс. Ассьыс зiльöмсö сiйö петкöдлiс унаысь да унаторйын. Сiйö кутö тiян вылö ыджыд лача, та вöсна öнi ёнджыка на зiльö отсасьны тiянлы. ²³ Шуны кö Тит йылысь, сiйö – менам уджъёрт, сыкöд öтвыв ми кесъялам тiянлы. Мукöд вокъяссö мöдöдiсны вичкояс. Налöн олöмыс вайö Кристослы ошкöм. ²⁴ Сiдзкö, петкöдлöй на дiнö ассьыныд муслунтö. Сэки быд вичко аддзас, мый ми ошйысям тiянöн огö весьшöрö.

¹ Чайта, меным оз ков гижны тiянлы, мед отсасинныд вежа войтырлы. ² Ме тöда тiянлысь зiльöмтö. Македонияса водзын ме ошйыси, мый тi, акайяса, дасьöсь сетны отсöг кольöм восянь нин. Тiян сьöлöмсянь тöждысьöмныд унаöс ышöдiс та вылö. ³ Ме мöдöда тiян дiнö вокъясöс, медым тiянöн ошйысьöмöй эз ло весьшöрö. Ме тiянлы шулi нин: лоöй дасьöсь. ⁴ Öд мекöд тшöтш локтасны кö Македонияысь эскысьяс, а тi абу на дасьöсь, миянлы юр яндзим лоö, ог нин шу тiян йылысь. Ми öд ёна ошйысим тiянöн. ⁵ Та вöсна лыдди коланаöн водзвыв мöдöдны тiян дiнö вокъясöс, медым чукöртны кöсйысьöм сетöмторнытö. Сэки тайö лоö ас кадö дасьтöм да сьöлöмсянь сетöмтор, а оз мырдöн перйöмтор. ⁶ Тöдöй: этша кöдзысь – этша вундас, уна кöдзысь – уна вундас. ⁷ Быдöн сетöй сьöлöм тшöктöм сертиныд: энö мырдöн, энö шогпырысь. Öд долыда сетысь муса Енмыслы. ⁸ Енмыс вына озырмöдны тiянöс быдпöлöс сетöмторнас, медым быд кадö да быдторйын тiян вöлi став коланаыс, да нöшта на верминныд вöчны быдпöлöс бур уджсö. ⁹ Гижöдыс висьталö: – Сiйö лышкыда сеталiс гöльяслы, Сылöн веськыда вöчöмыс некор оз вун. ¹⁰ Кöдзысьлы кöйдыссö Сетысьыс да няньöн Пöткöдысьыс сетö кöйдыссö тшöтш тiянлы. Сiйö быдтö тiянлысь пуктастö да уна пöв содтö тiян веськыда олöмлысь вотöссö, ¹¹ медым тi вöлiнныд озырöсь быдторнас да верминныд лышкыда юксьыны быдöнкöд. Сэки йöзыс кутасны аттьöавны Енсö миян отсöгысь. ¹² Ми отсалам вежа войтырлы огö сöмын налöн гöльлун вöсна. Ми отсалам, медым унаöн аттьöалiсны Енсö. ¹³ Тiянлысь бур вöчöмнытö аддзигöн вежа войтыр кутас ошкыны Енсö, öд тi кывзысьöмöн оланныд Кристослöн Евангелльö серти, мый висьтавланныд. Найö ошкöны Енсö, öд тi лышкыда юксянныд накöд, тшöтш мукöдыскöд. ¹⁴ Найö кевмысьöны тiян вöсна да ёна кöсйöны аддзысьлыны тiянкöд, öд тiян пытшкын сы ыджда Енлöн буралöмыс. ¹⁵ Ошкöм Енлы шуны вермытöм сетöмторсьыс!

¹ Öткымынöн ме йылысь шуöны, мый миян дiнын сiйö рам, а ылын кö – чорыд. Но ме, Павел, шыася тiян дiнö Кристос бурлунöн да мелiлунöн. ² Кора тiянöс: кывзöй менö, мед тiянö локтiгöн меным эз ковмы чорзьöдчыны. Дерт, öткымынкöд ковмас чорыда сёрнитны, öд найö шуöны, мый ми олам тайö муюгыдсаыс моз. ³ Кöть ми олам тайö муюгыдас, но вермасям огö муюгыдсаыс моз. ⁴ Миян вермасянторным абу мортсянь, а Енсянь, сыын эм Енлöн выныс. Ми жугöдам сiйöн чорыд мытшöдъяс, ковтöм мöвпъяс, ⁵ да став кыпöдчöмсö, мый паныд сувтö Енсö тöдмалöмлы. Ми топöдам быдпöлöс мöвпъяс, медым найö кывзысисны Кристослысь. ⁶ Ми дасьöсь мыждыны быдпöлöс кывзысьтöмлунысь, но сöмын сэки, кор тi асьныд кутанныд тырвыйö кывзысьны. ⁷ Видзöдлöй ас выланыд: кодi зумыда эскö, мый сiйö Кристослöн, мед тöдö: ми тшöтш Кристослöн. ⁸ Меным оз ло яндзим, кута кö ошйысьны миянлы сетöм ыджыдалан вынöн. Öд Господь сетiс тайö вынсö тiянöс ёнмöдöм вылö, а эз жугöдöм вылö. ⁹ Ме ог кöсйы, мед тi мöвпалiнныд, быттьö аслам гижöдъясöн повзьöдла тiянöс. ¹⁰ Öд кодсюрö шуöны: «Гижöдъясас сiйö чорыд да вына, а миян дiнын – жеб, да сёрниыс сылöн вынтöм». ¹¹ Татшöмыс мед тöдö: кутшöмöсь ми гижöдын, сэтшöмöсь и тiян дiнын. ¹² Ми огö лысьтöй орччöдны асьнымöс либö öткодявны асьнымöс вывтiасьысьяскöд. Öд найö видзöдöны сöмын ас выланыс да донъялöны асьнысö ас сертиныс. Тадзи вöчигöн найö петкöдлöны ассьыныс мывкыдтöмлунсö. ¹³ Ми огö ошйысьöй этш тöдтöг. Ошйысям сöмын сiйöн, мый Енмыс шуис вöчны миянлы. Сiйö тшöктiс уджавны тшöтш тiян пöвстын. ¹⁴ Ми огö торкалöй Енлысь шуöмсö. Ми кö эськö эгö локтöй тiян дiнö, артмис торкалöм, но ми локтiм тiян дiнö Кристослöн Бур Юöрнас. ¹⁵ Ми огö ошйысьöй этш тöдтöг, огö ошйысьöй мукöдлöн уджъясöн, но лача кутам, кор тiян эскöмныд ёнмас, сэки миян уджыс ёнджыка на паськалас тiян пöвстын. ¹⁶ Сэки ми водзö мунам висьтавлыны Евангелльöсö, огö кутöй мукöдлöн уджъясöн ошйысьны. ¹⁷ Öд шуöма: «Ошйысьысь мед ошйысьö Господьöн!» ¹⁸ Шогмана абу сiйö, кодi асьсö ошкö, а кодöс ошкö Господь.

¹ Кора тiянöс, терпитыштöй менсьым мывкыдтöмлунöс. Чайта, тi терпитыштанныд менö, ² öд ме тöждыся тiян вöсна Енлöн тöждысьöмöн. Ме кöсйыси сетны тiянöс дзик öти верöспулы – Кристослы. Кöсъя, мед тi сувтiнныд Сы водзö сöстöм нылöн. ³ Коркö змей наяна ылöдлiс Еваöс. Ме пола, мый тi сы моз жö ылаланныд да воштанныд ассьыныд восьса йитöднытö Кристоскöд. ⁴ Öд тiян дiнö кö локтас кодкö да кутас висьтавлыны мöд Исус йылысь, код йылысь ми эгö висьтавлöй, либö мöд лов йылысь, кодöс тi энö сибöдлöй, либö мöдпöлöс бур юöр, кодöс энö босьтлöй, сэки тi кокньыда терпитанныд сiйöс. ⁵ Чайта, ме нинöмöн абу лёкджык тайö "ыджыд апостолъясысь". ⁶ Гашкö, ме ог сяммы мичаа сёрнитны, но тöдöмлунöй менам тырмымöн. Тайöс ме петкöдлi тiянлы унаысь да уна ногöн. ⁷ Медым тiянöс вылö пуктыны, ме улö пуктi ачымöс. Гашкö, ме мыжа таысь, мый Енлысь Евангелльöсö висьтавлi тiянлы дон босьттöг? ⁸ Мед кесъявны тiянлы, мукöд вичкояслысь ме босьтлi сьöм, позьö шуны, куштылi найöс. Кöть меным эз вöв ставыс тырмана, тiянын олiгöн ме некодöс эг сьöктöдлы. ⁹ Öд став коланаторсö меным сетiсны Македонияысь локтöм вокъяс. Ме некор эг сьöктöдлы, и ог кут сьöктöдны тiянöс. ¹⁰ Ме пытшкын Кристослöн збыльыс. Та вöсна верма шуны, мый менсьым ошйысьöмöс став Акайя пасьтала некод оз вермы мырддьынысö. ¹¹ Мыйла ог кöсйы сьöктöдны тiянöс? Гашкö, чайтанныд, ог радейт тiянöс? Енмыс тöдö, тi меным мусаöсь! Но кыдзи вöча öнi, сiдзи и водзö кута вöчны. ¹² Ме ог сет некутшöм помка налы, кодъяс ошйысьöны, мый найö кесъялöны Енмыслы миян мозс. ¹³ Тайö ылöгапостолъясыс сöмын пöръясьöны, шуöны асьнысö Кристослöн апостолъясöн. ¹⁴ Но тайö абу шензьöданатор, öд ачыс сöтана петкöдлö асьсö югыдыслöн анделöн. ¹⁵ Сiдзкö, нинöмла шензьынысö, сылöн кесйöгъясыс кö петкöдлöны асьнысö веськыда вöчысьясöн. Но налöн помыс лоö уджныс серти. ¹⁶ Нöшта висьтала тiянлы: энö лыддьöй менö йöйöн. А лыддянныд кö, сибöдöй менö татшöмнас, мед ме верми на мыйтакö ошйысьны. ¹⁷ Дерт, тайö абу Енсянь, но ме кута ошйысьны тiян водзын мывкыдтöм морт моз. ¹⁸ Тайö муюгыдас олысьяс унаöн ошйысьöны, сiдзкö, ме тшöтш ошйыся. ¹⁹ Öд тi, мывкыда йöз, кокньыда терпитанныд мывкыдтöмъясöс. ²⁰ Тi терпитанныд, кор кесйöдлöны тiянöс, мырддялöны да куралöны тiянлысь, ыджыдалöны тiян вылын да кучкалöны чужöманыд. ²¹ Меным зэв яндзим, эгö лысьтöй тадзи вöчнысö да. Кодкö лысьтö кö ошйысьны мыйöнкö, шуа мывкыдтöм морт моз: ме тшöтш ошйыся. ²² Найö юдейяс? Ме тшöтш. Израиль войтыр? Ме тшöтш. Öвраамсянь чужысьяс? Ме тшöтш. ²³ Кристослöн кесъялысьяс? Гашкö, менö лыддянныд дзик йöйöн, но висьтала тiянлы: ме кесъялi Кристослы наысь ёнджыка на. Уджалi ныр вылö усьтöдз, менö ёна нöйтлiсны, на дорысь унджыкысь вöлi дзескыдiнын, унаысь кулан выйын. ²⁴ Юдейяс вит пöрйö нöйтлiсны менö орсöн комын öкмысысь вартöмöн, ²⁵ римсаяс куимысь кучкавлiсны беддьöн, öтчыдысь изъялiсны. Куимысь веськавлi корабль вöйигöн, лун да вой вöлi саридзын. ²⁶ Ме пыр туйын. Менö унаысь сулiсны виччысьтöмторъяс ю вылын, каръясын, овтöминъясын, саридз вылын. Меным унаысь ковмис видзчысьны лёк вöчысьясысь, ас йöзысь, мукöд войтырысь да ылöгвокъясысь. ²⁷ Ме сьöкыда уджавлi, кок йылысь усьтöдз, тшöкыда коллявлi узьтöм войяс, овлi сёйтöг-ютöг, унаысь видзавлi да пасьтöг кынмавлi. ²⁸ Став тайö сьöкыдлунъясыс кындзи меным быд лун лоö сибöдны ас дiнö уна йöзöс, тöждысьны быд вичко вöсна. ²⁹ Лигышмунöма кö кодкö, ме тшöтш. Усьöма кö кодкö, менам сьöлöмöй ёна висьö сы вöсна. ³⁰ Колана кö меным ошйысьны мыйöнкö, кута ошйысьны аслам жеблунöн. ³¹ Енмыс, миян Господь Исус Кристослöн Бать, тöдö: ме ог пöръясь. Ошкöм Сылы нэмъяс чöж! ³² Дамаск карын Арета öксылöн му юкöнöн веськöдлысь тшöктiс видзны карсьыс став петанiнсö, медым кутны менö, но ыджыд чуманын менö лэдзисны öшиньöд стен бердöдыс. Тадзи ме мынi сы киысь.

¹ Тайö, дерт, нинöм оз содты меным, но ме водзö кута ошйысьны. Öнi ме висьтала Господьсянь восьтöм-аддзылöм йылысь. ² Тöда öти мортöс, Кристослы эскысьöс, кодöс дас нёль во сайын вöлi кыпöдöма коймöд енэжас. Вир-яйын-ö вöлi сiйö, лолын-ö, ме ог тöд, Ен тöдö. ³ Ме тöда: тайö мортсö вöлi кыпöдöма райö. Сэнi сiйö кывлöма шуны вермытöм кывъяс, тайöс оз позь висьтавнысö. Вир-яйын-ö вöлi сiйö, лолын-ö, ме ог тöд, Ен тöдö. ⁵ Татшöм мортнас кута ошйысьны, но ог аснам. А ошйыся кö, сöмын аслам вынтöмлунöн. ⁶ Дерт, ме ог ло мывкыдтöмöн, кута кö ошйысьны, ме öд збыльсö висьтала. Но ме ог кут ошйысьны, медым кодкö эз мöвпав ме йылысь унджык сыысь, мый аддзö ме пытшкысь либö кылö месянь. ⁷ Медым тайö ыджыд восьтöмъясысь эг вылö кыпöдчы, менам вир-яйö сетöма чушкысьöс – сöтаналысь анделсö. Сiйö дойдалö менö, оз сет вылö кыпöдчынысö. ⁸ Ме куимысь кори Господьöс, медым мездiс сыысь, ⁹ но Сiйö шуис: «Тырмана тэныд Менам буралöмöй, öд Менам вынöй медъёна тыдовтчö вынтöмлун дырйи». Та вöсна нимкодьпырысь ошйыся аслам вынтöмлунöн, медым Кристослöн выныс тыдалiс ме пыр. ¹⁰ Ме нимкодяся вынтöмлун дырйи, менö лёкöдiгöн, дзескöдiгöн, вöтлiгöн да Кристос вöсна сьöкыдсö нуигöн. Öд кор ме вынтöм, сэки ён! ¹¹ Тiян водзын ошйысигöн ме вöлi мывкыдтöм морт кодь, тi öд асьныд менö вайöдiнныд та выйöдзыс. Дерт, ме нинöм кодь, но тiянлы аслыныд колö вöлi ошкыны менö, ме öд нинöмöн абу лёкджык "ыджыд апостолъясысь". ¹² Ме мудзлытöг вöчи тiян водзын индысьпасъяс, шензьöданаторъяс да ыджыд уджъяс. Ставыс тайö петкöдлö, мый ме збыльысь апостол. ¹³ Мый тiянлы оз тырмы? Öд мукöд вичколы моз ме сетi тiянлы ставсö. Гашкö, сöмын эг сьöктöд тiянöс? Энö мыждöй менö таысь. ¹⁴ Öнi коймöдысь нин мöдöдча тiян дiнö, но ме ог кöсйы сьöктöдны тiянöс. Меным öд тiянсянь нинöм оз ков, тi асьныд меным коланаöсь. Оз ныв-пиыс чукöртны эмбурсö бать-мамыслы, а мöдарö, бать-мамыс – ныв-пиыслы. ¹⁵ Тiян вöсна ме нимкодьпырысь сета ассьым ставсö, весиг ачымöс. Тi менö омöля радейтанныд, гашкö, тiянöс вывтi ёна радейта да? ¹⁶ Ме некор эг сьöктöдлi тiянöс, тайö тадзи. Гашкö, тi лыддянныд менö пöръясьысьöн да наян мортöн? ¹⁷ Гашкö, ме аслым мыйкö курыштi тiян дiнö мöдöдöмаяс пыр? ¹⁸ Ме кори Титöс мунны тiян дiнö, сыкöд тшöтш мöдöдi öти вокöс. Гашкö, Тит мыйкö аслыс курыштiс? Ми öмöй сыкöд абу öти лолаöсь? Эг öмöй öти туй талялöй? ¹⁹ Гашкö, чайтанныд, ми дорйысям тiян водзын? Огö! Ми сёрнитам Ен водзын кыдзи Кристослы кесъялысьяс. Мусаяс, ми ставсö тайöс висьталам тiянöс ёнмöдöм могысь. ²⁰ Ме пола, мый тiянö воа да, аддза тiянöс сэтшöмöн, кутшöмöн ог кöсйы аддзынысö. Сiдзкö, тi тшöтш аддзанныд менö сэтшöмöн, кутшöмöн онö кöсйöй аддзынысö! Ме пола аддзыны тiян костысь зыксьöм, вежалöм, скöралöм, асьтö радейтöм, удтысьöм, суклясьöм, вылö кыпöдчöм да кывзысьтöмлун. ²¹ Ме ог кöсйы, медым тiянö выльысь локтiгöн Енмыс янöдiс менö тiян понда. Сэки меным ковмас бöрдны уна мыж вöчысь вöсна, кодъяс öнöдз на эз бергöдчыны пеж вöчöмысь, кырсалöмысь да лэдзчысьöм оласногысь.

¹ Ме коймöдысь нин мöдöдча тiян дiнö. Гижöдыс висьталö: «Ставсö колö подулавны кык либö куим мортлöн висьталöмöн». ² Водзынсö волiгöн ме öлöдлi нин мыжсö вöчысьясöс. Öнi, кор тiянысь ылын, нöшта на гижа налы, тшöтш мукöдыслы: выльысь локтiгöн ог жалит тiянöс! ³ Тi кöсъянныд тöдны, збыльысь-ö Кристос сёрнитö ме пыр. Сiйö абу вынтöм тiян водзын, Ассьыс вынсö Сiйö петкöдлö тiян пöвстын. ⁴ Крестö тувъялiгöн Сiйö вöлi вынтöм, öнi Ен вынöн Сiйö ловъя. Ми Кристос пытшкынöсь, сiдзкö, ми тшöтш вынтöмöсь, но Сыкöд олам Ен вынöн, медым кесъявны тiянлы. ⁵ Тöдмалöй асьнытö, эм-ö тiян эскöмныд? Видзöдлöй сьöлöманыд! Тi öмöй онö тöдöй, мый Исус Кристос тiян пытшкын! Абу кö тадз, сiдзкö, тi абу найö, кодъясöн колö лоны тiянлы. ⁶ Но ме чайта, мый тi тöданныд: ми найö, кодъясöн колö лоны миянлы. ⁷ Ми кевмам Енлы, медым тi энö вöчöй некутшöм лёктор. Ми огö кевмöй сы могысь, медым петкöдлыны асьнымöс сэтшöмöн, кутшöмöн колö лонысö, но кевмам, медым тi вöчинныд бурсö весиг сэки, ми кö абу сэтшöмöсь, кутшöмöн колö лоны миянлы. ⁸ Ми нинöм огö вермöй вöчны збыльыслы паныд, ми сулалам збыльыс дор. ⁹ Ми нимкодясям, тi кö вынаöсь, а ми вынтöмöсь. Дзик та вöсна кевмысям, мед тi быдторйын вежсинныд бурланьыс. ¹⁰ Ставсö тайöс водзвыв гижа, мед тiянö воа да, эз ковмы петкöдлыны тiянлы ассьым чорыдлунöс да ыджыдалан вынöс. Öд Енмыс сетiс тайö вынсö тiянöс ёнмöдöм вылö, а эз жугöдöм вылö. ¹¹ Вокъяс, нöшта висьтала тiянлы: нимкодясьöй, вежсьöй бурланьыс, сибöдöй меньсьым ышöдана кывъясöс, олöй лöня да öти сьöлöмöн. Сэки муслунсö да лöньлунсö сетысь Ен лоас тiянкöд. ¹² Чолöмалöй öта-мöднытö вежа окыштöмöн. Тiянлы ыстö чолöм став вежа войтырыс! ¹³ Миян Господь Исус Кристослöн буралöмыс, Ен Батьлöн муслуныс да Вежа Ловлöн öтувтöмыс ставныдкöд тiянкöд. Аминь.