1 Тимофейлы

¹ Гижö Павел, Исус Кристослöн апостол. Миянöс мездысь Ен да Господь Исус Кристос, код вылö ми кутам лача, индiсны менö апостолöн. ² Тимофей, эскöмыд вöсна тэ меным збыльысь пи кодь. Бурсетöм, буралöм да лöнь олöм тэныд Ен Батьнымсянь да миян Господь Исус Кристоссянь. ³ Македонияö мöдöдчигöн ме кори тэнö олыштны Ефесын кодсюрööс öлöдöм могысь, медым найö эз велöдны ылöгас, ⁴ эз кутчысьны мойдъясö да дугдiсны корсьысьны, кодi кутшöм чужанвужйысь петiс. Öд тасянь сöмын вензьöм артмö Енлы кесъялöм пыдди. Енмыслы позьö кесъявны сöмын эскöмöн. ⁵ Миян öлöдöмлöн медшöр могыс – радейтöм. Сiйö петö сöстöм да мыжтöм сьöлöмсянь да восьса сьöлöмöн эскöмсянь. ⁶ Кодсюрö кежисны таысь да сетчисны ковтöм сёрниясö. ⁷ Найö пуктöны асьнысö Индöдö велöдысьясö, но асьныс оз гöгöрвоны, мый висьталöны да мыйö велöдöны. ⁸ Ми тöдам: Индöдыс бур, вöдитчыны кö сыöн бур ногöн. ⁹ Гöгöрвоам, мый Индöдсö лöсьöдöма абу веськыда олысьлы, а сiйöс торкалысьлы да кывзысьтöмлы, Ентöг олысьлы да мыж вöчысьлы, эскытöмлы да Енмöс омöльтысьлы, бать-мам вылö ки лэптысьлы да морт виысьлы, ¹⁰ кырсалысьлы да öта-мöдыскöд узьлысь айуловлы, мортöн вузасьысьлы, пöръясьысьлы, ылöгвисьталысьлы да быдöнлы, кодi паныд мунö веськыд велöдöмлы. ¹¹ Öд тадзи висьталö ошкана Енлöн дзирдлун йылысь Бур Юöрыс, и тайö Юöрсö висьтавлыны Енмыс мöдöдiс менö. ¹² Ме аттьöала миянлысь Господь Исус Кристосöс, öд Сiйö ёнмöдiс менö да лыддис менö шогманаöн кесъявны Сылы. ¹³ Водзынсö ме омöльтi Кристосöс, вöтлi-дзескöдi Сылы эскысьясöс да лёк вöчи налы. Но Кристос вöлi бур сьöлöма ме дiнö, öд тадзисö ме вöчи гöгöрвотöмла да эскытöмла. ¹⁴ Миян Господь озыра тыртiс менö Аслас буралöмнас. Исус Кристос пыр Сiйö сетiс меным эскöм да муслун. ¹⁵ Мый öнi висьтала тiянлы – тайö эскана, сiйöс шогмö сибöдны сьöлöманыд. Исус Кристос локтiс муюгыдас, медым мездыны мыжаясöс, и на пиысь ме медся мыжаыс. ¹⁶ Енмыс вöлi бур сьöлöма ме дiнö. Öд ме пыр, медся мыжаыслöн олöм пыр, Исус Кристос петкöдлiс Ассьыс терпитöмсö налы, кодъяс эскасны Сылы да босьтасны помтöм олöмсö. ¹⁷ Енмыс пыр олысь, Сiйö ыджыдалö помтöг. Ыджыд мывкыда тыдавтöм öти Енлы ошкöм-нимöдöмыс нэмъяс чöж. Аминь. ¹⁸ Тимофей, муса пиöй, кутчысь пророкъяслöн тэ йылысь висьталöмас да вермась бур тышкасьысь моз. ¹⁹ Видз эскöмтö да ов сiдзи, мед сьöлöмыд эз мыжды тэнö. Öд кодсюрö вунöдiсны тайöс, и налöн эскöмыс пасьмунiс. ²⁰ Татшöмöсь Именей Öльöксанкöд. Найöс ме сетi сöтана киö, медым дугдiсны омöльтны Енсö.

¹ Медводз кора тiянöс: кевмысьöй Енмыслы, шыасьöй Сы дiнö корöм-кевмöмöн да аттьöалöмöн став йöзыс вöсна. ² Кевмысьöй юралысьяс да ыджыдалысьяс вöсна, медым ми олiм лöня да зыксьытöг, вежавидзöмöн да шогмана ногöн. ³ Öд тайö бур да шогмö Енмыслы, миян Мездысьлы. ⁴ Сiйö кöсйö, медым став йöзыс мездмисны да тöдiсны збыльсö. ⁵ Енмыс öти. Ен да морт костын сулалысьыс тшöтш öти: Морт, Исус Кристос. ⁶ Сiйö сетiс Асьсö, медым ньöбны став йöзсö. Тайö петкöдлö, мый мездана кадыс воис нин. ⁷ Енмыс сувтöдiс менö, медым юöртны та йылысь. Кристос водзын ме збыльысь висьтала, ог пöръясь: менö индöма апостолöн да ентöдтöмъясöс збыляс-эскöмас велöдысьöн. ⁸ Ме кöсъя, медым айулов быдлаын кевмысисны кинысö кыпöдöмöн, сöстöм сьöлöмöн, лöгавтöг да майшасьтöг. ⁹ Кöсъя, медым аньяс пасьтасисны лючки-бура, мичмöдiсны асьнысö рамлунöн да вежавидзöмöн, а эз юрсинысö баситöмöн, зарни-жемчуг öшлöмöн да дона паськöмöн. ¹⁰ Найö мед мичмöдасны асьнысö бур уджъясöн. Тадзи колö вöчны Ен водзын вежавидзысь аньяслы. ¹¹ Аньяс мед чöла да кывзысьöмöн велöдчасны. ¹² Аньлы ог лэдз велöдны айловöс либö ыджыдавны сы вылын, ань мед чöв олö. ¹³ Öд водзджык вöлi вöчöма Адамöс, сэсся Еваöс. ¹⁴ Эз Адам ылав, но ань ыштöмыс вöсна ылалiс да мыж вöчис. ¹⁵ Но ань мездмас кага чужтöм пыр, кутчысяс кö эскöмас, муслунас, вежавидзöмас да бур оласногас.

¹ Тайö збыль: кодi кöсйö вичкоöн веськöдлыны, сiйö бур удж кöсйö вöчны. ² Вичкоöн веськöдлыны вермö сöстöм оласнога, öти гöтыра, садь да сюсь вежöра, бур оласнога морт. Ветлысь-мунысьöс сибöдö, кужö велöдны, ³ оз ю, оз тышкась, аслыс оз курав, рам сьöлöма, оз пинясь, сьöм вылö оз горшась, ⁴ бура веськöдлö аслас гортнас. Сылöн ныв-пиыс кывзысьöны сылысь да пыдди пуктöны сiйöс. ⁵ Öд сiйö кö оз сяммы веськöдлыны гортнас, вермас-ö тöждысьны Енлöн Вичкоыс вöсна? ⁶ Вичкоса веськöдлысьнас оз вермы лоны морт, кодi сöмын на бергöдчис Ен дiнö. Öд сiйö вермас вылö кыпöдчыны да омöльыс моз веськалас мыждöм улö. ⁷ Зэв колана, медым вичкоысь öтдор мукöдыс тшöтш пыдди пуктiсны сiйöс. Сэки лёк сёрниыс сы йылысь оз паськав, да сiйö оз шед омöльлöн налькйö. ⁸ Вичкоса отсасьысьяс мед лоасны мывкыдаöсь, сёрнитасны веськыда, оз кодавны, аслыныс оз куравны, ⁹ кутчысясны эскöмлöн гусяторйö да видзасны сьöлöмнысö сöстöмöн. ¹⁰ Найöс колö водзвыв тöдмавны, сэсся, шогманаöсь кö, мед кесъялöны. ¹¹ Аньяс мед тшöтш лоасны мывкыдаöсь, садь вежöраöсь, быдторйын эсканаöсь да оз суклясьны. ¹² Вичкоса отсасьысь мед вöлi öти гöтыра, бура веськöдлiс гортнас да ныв-пинас. ¹³ Öд бура кесъялысьöс вылö донъяласны, сiйö кутас повтöг висьтавлыны Исус Кристослы эскöм йылысь. ¹⁴ Лача кута, мый регыд локта тэ дiнö. Гижа тайöс, ¹⁵ медым, падма кö, тэ тöдiн, кыдзи кутны асьтö Ен керкаын, ловъя Енлöн Вичкоын. Öд Вичкоыс – збыльыслöн сюръяыс да подулыс. ¹⁶ Кывшутöг, миян эскöмлöн гусяторйыс ыджыд: Енмыс восьтiс Асьсö вир-яйын, Лолыс петкöдлiс Сылысь веськыдлунсö, Сiйöс аддзылiсны анделъяс, Сы йылысь юöртiсны мукöд войтырлы, Сылы эскисны муюгыдас, Сiйö кыпöдчис дзирдлунас.

¹ Лов веськыда висьталö, мый бöръя кадас кодсюрö кежасны эскöмысь. Найö пондасны кывзыны ылöдчысь ловъясöс да кутчысясны пеж ловъяслöн велöдöмö. ² Татшöм велöдöмыс петö пöръясьысьяссянь, кык бана шаньгаяссянь, кодъяс воштöмаöсь яндзимнысö. ³ Найö оз лэдзны гöтрасьны да сёйны сiйö, мый Енмыс вöчис. Но Енмыс вöчис сёянсö, медым эскысьяс, збыльсö тöдысьяс, сёйисны сiйöс Енсö аттьöалöмöн. ⁴ Öд Енмыслöн став вöчöмторйыс бур. Сёян кö аттьöалöмöн, сэки нинöмысь повнысö. ⁵ Öд кевмысьöм да Енлöн Кывйыс вежöдöны сiйöс. ⁶ Туйдöд тадзи вокъястö, сэки тэ лоан Исус Кристослöн бур кесъялысьöн. Öд тэ пöткöдан асьтö эскöмлöн кывъясöн да бур велöдöмöн, мый серти олан. ⁷ Ылöг да ковтöм мойдъясысь ылыстчы, велöдчы овны вежавидзöмöн. ⁸ Öд вир-яйтö ёнмöдöмысь бурыс этша, а вежавидзана олöмысь – уна. Сiйö сетö лача öнiя да локтана олöм вылö. ⁹ Тайö висьталöмыс эскана, сiйöс шогмö сибöдны сьöлöмад. ¹⁰ Ми ёна мырсям да нуам лёкöдöмсö, öд лачанымöс кутам ловъя Ен вылö. Сiйö – быдöнлы Мездысь, торйöн нин эскысьяслы. ¹¹ Туйдöд-велöд татчö. ¹² Некод мед оз увтырт тэнö томлун вöснаыд. Тэнад сёрниыд, оласногыд, муслуныд, сьöлöмыд, эскöмыд да сöстöмлуныд мед лоö шогмана, мед эскысьяс вермисны овны тэ моз. ¹³ Менам локтöдз лыддьы Енлысь Кывсö да туйдöд-велöд йöзсö. ¹⁴ Видз Енсянь сетöмторсö, кодöс вöлi сетöма тэныд пророклöн висьталöмыс пыр вичкоса юрнуöдысьяслöн ки пуктылiгöн. ¹⁵ Тöждысь та вöсна, ставсö вöч сьöлöмсяньыд, сэки быдöн аддзас тэнсьыд вермöмтö. ¹⁶ Видзöд ас бöрсяыд: кыдзи олан да мыйö велöдан. Вöч тайöс дугдывтöг, öд тадзи вöчигöн тэ асьтö мездан, тшöтш тэнö кывзысьясöс.

¹ Пöрысьясöс чорыда эн öлöд, туйдöд найöс батьтö моз, томджыкъясöс – воктö моз. ² Олöма аньясöс туйдöд мамтö моз, томджыкъясöс велöд сöстöм сьöлöмöн чойтö моз. ³ Тöждысь öткöн олысь дöваяс вöсна. ⁴ Эм кö дöвалöн ныв-пи либö налöн ныв-пи, найö мед вежавидзöмöн тöждысясны гортсаыс вöсна да бурöн мынтысясны бать-мамыслы да пöль-пöчыслы. Öд тайö шогмö Енмыслы. ⁵ Дзик öткöн олысь дöва лача кутö Ен вылö да лун и вой кевмысьö Енмыслы. ⁶ А лышкыда олысь – ловъявывсьыс кулöма. ⁷ Туйдöд тадзи дöваясöс, медым найö олiсны сöстöма. ⁸ Кодi оз тöждысь матыссаыс вöсна, торйöн нин гортсаыс вöсна, сiйö эновтöма эскöмсö да эскытöм дорысь лёкджык на. ⁹ Дöва лыдö позьö пыртны сöмын квайтымын арöсаöс да сыысь ыджыдджык арлыда аньöс, вöлöма кö сiйö öтчыдысь верöс сайын, ¹⁰ да тöдöны сiйöс бур уджъясыс серти: бур ногöн быдтöма-велöдöма ныв-писö, сибöдöма ветлысь-мунысьöс, мыськалöма вежа войтырлысь кокнысö, отсалöма сьöкыдалысьяслы да вöчöма быд бурсö. ¹¹ Томджыкъясöс эн пырт дöваяс лыдö. Кор найö сетчöны ыштöмас, сэки ылыстчöны Кристосысь да тэрмасьöны петны верöс сайö. ¹² Найö мыжмöны, öд найö öтдортчöны эскöмысь. ¹³ Керкаысь керкаö ветлiгöн найö весьшöрö кад коллялöны, суклясьöны, быдлаö сюйсьöны да паськöдöны ковтöм сёрнияс. ¹⁴ Та вöсна кöсъя, медым том дöваяс петiсны верöс сайö, кага чужтiсны да тöждысисны гортныс вöсна. Сэки найö оз сетны помкасö паныд мунысьяслы омöльтны эскысьясöс. ¹⁵ Öд кодсюрö кежисны веськыд туй вывсьыс да мунöны сöтана бöрся. ¹⁶ Эскысьлöн кö матыссаяс пöвстас эм дöва, сылы колö тöждысьны дöваыс вöсна, оз ков Вичкосö сьöктöдны. Сэки Вичкоыс вермас тöждысьны збыль дöваяс вöсна. ¹⁷ Вичкоса юрнуöдысьясöс, кодъяс бура уджалöны, колö вылö донъявны, торйöн нин Ен Кыв висьталысьясöс да велöдысьясöс. Налы колö бура мынтысьны. ¹⁸ Öд Гижöдыс висьталö: «Вартысь öшлысь вомсö эн тупкы» и «Уджалысьлы колö мынтыны уджыс серти». ¹⁹ Вичкоса юрнуöдысьöс кö мыждöны мыйыськö, тайö мыждöмсö эн кывзы, оз кö сiйöс вынсьöдны кык-куим аддзылысь-висьталысь. ²⁰ Мыж вöчысьöс янöд ставныс водзын, медым мукöдыс тшöтш полiсны мыжсö вöчны. ²¹ Кора тэнö Ен водзын, Господь Исус Кристос водзын да бöрйöм анделъяс водзын: кутчысь тайö туйдöдöмъясас. Нинöм эн вöч ассяньыд, чужöм вылö видзöдöмöн. ²² Эн тэрмась ки пуктывны кодкö вылö, медым эн мыжмы сылöн мыж вöчöм вöсна. Видз асьтö сöстöма. ²³ Гырк висьöмыд да тшöкыда нёрпалöмыд вöсна ваысь öтдор юышт тшöтш винатор. ²⁴ Öтияслöн мыжыс тыдалö, и найöс мыждöны нин. Мöдъяслöн мыжыс воссяс бöрыннас. ²⁵ Бур уджъясыд тшöтш тыдалöны, а оз на кö, бöрыннас воссясны.

¹ Сийöсувса кесйöгъяс, быдторйын пыдди пуктöй ыджыдъяснытö, медым эз вöв лёкöдöма Енлысь нимсö да Сылысь велöдöмсö. ² Кесйöглöн ыджыдыс кö эскысь, и эскöм сертиныс найö вокъяс, кесйöг мед оз пукты ыджыдсö нинöм туйö. Мöдарö, мед ёнджыка на кесъялö ыджыдыслы, öд сiйö кесъялö муса эскысь мортлы. Тадзи велöд-туйдöд. ³ Кодi велöдö мöдторйö да оз кутчысь миян Господь Исус Кристослöн веськыд кывъясас да велöдöмас, мый вайöдö вежавидзана оласногö, ⁴ татшöм мортыс вылö пуктö асьсö да нинöм оз гöгöрво. Сiйö пыр кöсйö вензьыны да зыксьыны. А тасянь артмö вежалöм, пинясьöм, лёкöдöм, гусьöн мыждöм ⁵ да помтöм вензьöм на костын, кодъяслöн пемдöма вежöрыс. Найö кежöмаöсь збыльсьыс да вежавидзана оласногыс пыр кöсйöны озырмыны сьöмöн. Татшöмъяссьыс ылыстчы. ⁶ Вежавидзöмыс збыльысь озырмöдö найöс, кодъяс олöны нинöм вылö шуасьтöг. ⁷ Öд ми нинöм эгö вайöй тайö муюгыдас, и нинöм огö нуöй татысь. ⁸ Эм кö сёян-юан да кöм-пась, сiдзкö, тырмöдчам таöн. ⁹ Озырмыны кöсйысьяс сетчöны ыштöмас да шедöны налькйö, сетчöны быдпöлöс мывкыдтöмлунас да лёк кöсйöмас, кодъяс бырöдöны йöзсö да вайöдöны найöс кулöмö. ¹⁰ Öд став лёкыслöн вужйыс – сьöм радейтöм. Сьöм бöрся вöтлысигöн кодсюрö кежисны эскöмысь да кöлалiсны ас выланыс уна шог. ¹¹ Но тэ, Ен мортöй, ылыстчы таысь. Кутчысь веськыдлунас, вежавидзана оласногас, эскöмас, муслунас, зумыдлунас да рамлунас. ¹² Зумыда вермась эскöмыд вöсна, кутчысь помтöм олöмас, кытчö Енмыс корис тэнö. Öд уна йöз водзын тэ восьсöн висьтасин аслад эскöм йылысь. ¹³ Ставыслы олöм сетысь Ен водзын да Исус Кристос водзын, кодi восьсöн висьталiс збыльсö Понтий Пилатлы, ме кора тэнö: ¹⁴ миян Господь Исус Кристос локтöдз ставсö вöч менам тшöктöм серти, сöстöма да веськыда. ¹⁵ Кристослысь локтöмсö ас кадö восьтас миянлы ошкана Ен. Сiйö – öти вына Веськöдлысь, öксыяслöн Öксы, ыджыдъяслöн Ыджыдыс. ¹⁶ Сiйö öтнас кувлытöм, олö югыдас, кытчö матыстчыны он вермы. Морт Сiйöс эз аддзыв, и аддзыны оз вермы. Сiйöс нимöдöмыс, Сылöн ыджыдалöмыс помтöм. Аминь. ¹⁷ Тайö нэмас озыра олысьясöс велöд, медым найö эз вылö кыпöдчыны, эз кутны лачанысö бырана озырлун вылö, а ловъя Ен вылö. Öд Сiйö лышкыда сетö миянлы ставсö, медым ми вермим овны нимкодясьöмöн. ¹⁸ Велöд озыръясöс, медым вöчисны бурсö, озырмисны бур уджъясöн, вöлiны лышкыдöсь да юксисны мукöдкöд. ¹⁹ Тадзи вöчигöн найö чукöртöны аслыныс озырлун – зумыд подув локтанаыслы, медым налы вичмис помтöм олöм. ²⁰ Тимофей, видз тэныд сетöмасö. Эн кывзы йöзыслысь ковтöм сёрнияс да вензьöмъяс, кодъяс петöны ылöг тöдöмлунсянь. ²¹ Öд кодсюрö кутчысисны татшöм тöдöмлунас да кежисны эскöмысь. Енлöн буралöмыс тэкöд. Аминь.