1 Фессалоникаö

1 Фессалоникаö

¹ Павел, Силуан да Тимофей чолöмалöны тiянöс, Ен Батьлысь да Господь Исус Кристослысь фессалоникаса вичкоöс. Буралöм да лöнь олöм тiянлы Ен Батьнымсянь да Господь Исус Кристоссянь. ² Быд кадö ошкам Енмöс тiянысь быдöнысь да казьтывлам тiянöс кевмысигъяс дырйи. ³ Ен Батьным водзын ми век казьтывлам тiянöс, öд тiян эскöмныд петкöдчис уджъясын, а муслунныд – сьöлöмсянь вöчöмъясын, тi кутанныд зумыд лача миян Господь Исус Кристос вылö. ⁴ Вокъяс, тi мусаöсь Енмыслы. Ми тöдам, Сiйö бöрйис тiянöс. ⁵ Ми висьтавлiм тiянлы Бур Юöрсö ыджыд эскöмлунöн. Висьтавлiм эгö сöмын кывйöн, сiйö воссис тшöтш Вежа Лов вынсянь вöчöмторъясын. Тi бура тöданныд, кыдзи ми кутiм асьнымöс тiянын олiгöн да отсасим тiянлы. ⁶ Уна сьöкыдлун вылö видзöдтöг тi сибöдiнныд Бур Юöрсö Вежа Ловсянь нимкодьлунöн да кутiнныд вöчны миян моз да Господь моз. ⁷ Тадзи тi лоинныд Македонияын да Акайяын став эскысьыслы бурсö петкöдлысьясöн. ⁸ Ен Кывсö тi паськöдiнныд энö сöмын Македонияын да Акайяын, тiян эскöм йылысь тöдöны быдлаын. Сiдзкö, та йылысь миянлы абу нин колана висьтавлыны. ⁹ Миянлы быдлаын висьтавлöны, кыдзи тi сибöдiнныд миянöс, бергöдчинныд идолъясысь да кутiнныд кесъявны збыль да ловъя Енлы. ¹⁰ Тi кутiнныд виччысьны енэжсянь Енлысь Писö – Исусöс, кодöс Енмыс ловзьöдiс кулöмысь. Сiйö мездас миянöс локтана скöрлунысь.

¹ Вокъяс, тi асьныд тöданныд, мый ми волiм тiян дiнö эгö весьшöрö. ² Тi тöданныд, мый таысь водзджык Филип карын ми уна сьöкыд нуим, миянöс ёна лёкöдiсны да нöйтiсны. Но та вылö видзöдтöг, Ен отсöгöн, восьсöн да повтöг висьтавлiм тiянлы Сылысь Бур Юöрсö. ³ Öд миян велöдöмын эз вöвны наян да пеж мöвпъяс, ми некодöс эгö кöсйöй ылöдлыны. ⁴ Енмыс водзвыв тöдмалiс миянöс да лыддис шогманаясöн висьтавлыны Сылысь Бур Юöрсö, та вöсна и висьтавлам. Ми зiлям шогмыны Енмыслы, а огö йöзыслы, öд Сiйö тöдö миянлысь сьöлöмнымöс. ⁵ Ми некор эгö сёрнитлöй мавтан кывъясöн, тi тöданныд тайöс. Нинöм эгö вöчöй горшасьöмöн, Ен тöдö. ⁶ Ми эгö виччысьöй ошкöмсö йöзсянь, тiянсянь либö мукöдсянь. ⁷ Ми, Кристослöн апостолъяс, вермим эськö локны тiян дiнö юрнымöс чатöртöмöн, но ми вöлiм мелiöсь тiянкöд да тöждысим тiян вöсна, кыдзи мам тöждысьö аслас кагаыс вöсна. ⁸ Ми ёна радейтам тiянöс, та вöсна вöлiм дасьöсь юксьыны тiянкöд Енлöн Бур Юöрнас, весиг сетны ассьыным олöмнымöс. Öд тi сэтшöм мусаöсь миянлы! ⁹ Вокъяс, тi тöданныд, Енлысь Бур Юöрсö висьтавлiгöн ми уджалiм кок йылысь усьтöдз. Мырсим лун и вой, öд тiян пöвстысь некодöс эгö кöсйöй сьöктöднысö. ¹⁰ Тi тöданныд, и Енмыс тöдö, мый тiян дiнын, эскысьяс пöвстын олiгöн, ми ставсö вöчим веськыда да вежавидзöмöн, миянöс нинöмысь вöлi мыждынысö. ¹¹ Тiянлы быдöнлы ми вöлiм бать пыдди, тi асьныд тайöс тöданныд. ¹² Ми туйдöдiм-ышöдiм тiянöс да корим овны Ен ногöн. Öд Енмыс корис тiянöс Аслас Юраланiнö да дзирдлунö. ¹³ Дугдывтöг ошкам Енмöс, öд миян висьталöм бöрын тi сибöдiнныд Енлысь Кывсö сьöлöманыд. Тi сибöдiнныд сiйöс энö мортлысь висьталöмсö моз, а Енлысь Кывсö моз. Тайö збыльысь Енлöн Кыв, сiйö вына тiян пытшкын, эскысьясын. ¹⁴ Вокъяс, мый вöлi Юдеяын Исус Кристослы эскысь Ен вичкояскöд, тайö лои тшöтш тiянкöд. Найö уна сьöкыд нуисны юдейяссянь, а тi – ас войтырсянь. ¹⁵ Господь Исусöс да Сылысь пророкъяссö юдейяс виисны, а миянöс вöтлiсны. Найö дöзмöдöны Енсö да став йöзыслы паныд мунöны. ¹⁶ Найö оз лэдзны миянлы бурвисьтавлыны мукöд войтырлы, медым найö мездмисны. Тадзи найö содтöны ассьыныс мыжъяссö. Но Енлöн скöрлуныс суис нин найöс. ¹⁷ Вокъяс, ми янсавлiм тiянкöд дженьыдик кад кежлö, но сьöлöмöн пыр вöлiм тiянкöд. Ми ёна гажтöмтчим тiянысь да ёнджыка на кöсйим аддзысьлыны тiянкöд. ¹⁸ Ми ёна кöсйим волыны тiян дiнö. Ме, Павел, эг öтчыдысь мöдöдчыв тiян дiнö, но сöтана тупкис туйнымöс. ¹⁹ Миян Господь Исус Кристос локтiгöн ог öмöй тiянöн кутöй ошйысьны Сы водзын? Абу-ö тi миян лачаыс, нимкодьлуныс да ошйысян юркытшыс? ²⁰ Öд тi – миян ошйысянторйыс да нимкодьлуныс.

¹ Миянлы вöлi вывтi сьöкыд тiянкöд янсалöмысь. Та вöсна ми шуим, мый асьным кольччам Афин карö, ² а Тимофей вокнымöс мöдöдам тiян дiнö. Сiйö миянкöд öтвыв кесъялö Енмыслы да отсалö висьтавлыны Кристослысь Бур Юöрсö. Ми мöдöдiм сiйöс тiян дiнö, медым ышöдны тiянöс да ёнмöдны эскöмнытö, ³ медым сьöкыдсö нуигöн тiян пöвстысь некод эз усь. Öд тi асьныд тöданныд, мый миянлы ковмас нуны сьöкыдсö. ⁴ Тiянö волiгöн ми висьтавлiм нин, мый ковмас нуны сьöкыдсö. Тi тöданныд: дзик тадзи и лоис. ⁵ Та вöсна, водзö эг нин вермы виччысьнысö да мöдöдi тiян дiнö Тимофейöс, медым тöдмавны тiян эскöмныд йылысь, эз-ö ылöдлы тiянöс омöльыс, эз-ö ло весьшöрö миян уджным. ⁶ Тимофей сöмын на воис тiян дiнысь да вайис тiян эскöмныд да муслунныд йылысь нимкодь юöр, тi пö век бур ногöн казьтывланныд миянöс да миян моз ёна кöсъянныд аддзысьлыны миянкöд. ⁷ Та вöсна, вокъяс, став тайö сьöкыдсö нуигöн да миянöс вöтлiгöн тiян эскöмныд ышöдiс миянöс. ⁸ Öнi миян сьöлöмын лöнь, öд тi зумыда кутчысянныд Господь дiнö. ⁹ Ми ёна аттьöалам Енсö тiянысь, öд тi сетанныд миянлы позянлун ёна нимкодясьны Ен водзын. ¹⁰ Ми лун и вой сьöлöмсянь кевмысям, медым аддзысьлыны тiянкöд да сетны тiян эскöмлы тырмытöмсö. ¹¹ Ачыс Енмыс, миян Бать, да миян Господь Исус Кристос мед веськöдасны миянлысь туйнымöс тiян дiнö. ¹² Господь мед уна пöв содтас öта-мöдныд дiнö да став йöзыс дiнö муслуннытö. Тiян муслунныд мед лоö сэтшöм жö вына, кутшöм вына тiян дiнö миян муслунным. ¹³ Господь мед ёнмöдас сьöлöмнытö, медым тi вöлiнныд вежаöсь да сöстöмöсь Ен Батьным водзын, кор миян Господь Исус Кристос локтас став Аслас вежа войтыркöд. Аминь.

¹ Вокъяс, тiянлы висьтавлiм нин, медым олiнныд Ен водзын шогмана ногöн. Дерт, тi дзик тадзи и оланныд. Но Исус Кристос нимöн ышöдам да корам тiянöс: олöй нöшта на бурджыка. ² Тi öд тöданныд, кутшöм тшöктöмъяс ми сетiм тiянлы Господь Исуссянь. ³ Енмыс кöсйö, медым тi вöлiнныд вежаöсь да видзинныд асьнытö кырсалöмысь. ⁴ Тiян пиысь быдöн мед видзö ассьыс вир-яйсö вежаöн да шогмана ногöн, ⁵ медым ентöдтöмъяс моз некод оз сетчы ыпъялан лёкколöмас, öд Енсö найö оз тöдны. ⁶ Эскысь мед оз вöч лёксö мöд эскысьлы, оз ылöдлы сiйöс, öд Господь мыждас таысь. Та йылысь висьтавлiм нин тiянлы да öлöдлiм тiянöс. ⁷ Öд Енмыс корис миянöс овны вежа оласногöн, а эз пеж оласногöн. ⁸ Сiдзкö, тайö тшöктöмсö öтдортысь оз мортöс öтдорт, а Енсö, кодi сетiс миянлы Ассьыс Вежа Ловсö. ⁹ Эскысьяс дiнö муслун йылысь абу колана гижны тiянлы, öд Ачыс Енмыс велöдiс тiянöс радейтны öта-мöднытö. ¹⁰ Тi збыльысь радейтанныд Македония пасьтала став эскысьсö. Вокъяс, корам тiянöс: радейтöй öта-мöднытö нöшта на ёнджыка. ¹¹ Зiльöй овны лöня. Быдöн мед вöчö ассьыс удж, ас ки помысь шедöдö олöм вылас. Тадзи ми велöдлiм тiянöс. ¹² Сэки эскытöмъяс тшöтш кутасны пыдди пуктыны тiянöс, тiян ставыс лоö тырмымöн. ¹³ Вокъяс, кöсъя, мед тi тöдiнныд, мый лоö кулöмаяскöд. Сэки эскытöмъяс моз онö кутöй шогсьыны кулöмаяс йылысь, öд эскытöмъяслöн лачаныс абу. ¹⁴ Ми кö эскам, мый Исус кулiс и ловзис, сiдзкö, Исускöд Енмыс вайöдас Ас дiнас тшöтш найöс, кодi эскис Исуслы, но кулiс нин. ¹⁵ Öнi висьталам тiянлы Господьлысь кывъяссö: ми, кодъяс ловъяöсь на Господь локтöдз, огö пановтöй кулöмаясöс. ¹⁶ Кор кылас чукöстöм шы, кор шыасяс архангел да кылас Енлöн труба шыыс, Ачыс Господь лэччас енэжсяньыс. Сэки медводз ловзясны кулöмаяс, кодъяс эскисны Кристослы. ¹⁷ Сэсся миянöс, ловъяясöс, накöд тшöтш лоö кыпöдöма кымöръяс вылын сынöдас, медым аддзысьны сэнi Господькöд. Тадзи пыр лоам Господькöд. ¹⁸ Сiдзкö, ышöдöй öта-мöднытö тайö кывъяснас.

¹ Вокъяс, урчитöм кад йывсьыс абу колана гижны тiянлы. ² Тi öд асьныд бура тöданныд, мый Господьлöн луныс войся гусясьысь моз воас. ³ Кор йöзыс кутасны шуавны: «Гöгöр лöнь, повнысö нинöмысь», сэки тöдлытöг суас найöс кулöм, кыдзи тöдлытöг суö кага чужтысьöс дой. Сэки некод оз вермы пышйынысö. ⁴ Вокъяс, тi онö пемыдас олöй. Сiдзкö, сiйö луныс оз лок тiян дiнö гусясьысь моз тöдлытöг. ⁵ Öд быдöн тi – луныслöн да югыдыслöн ныв-пи. Ми абу пемыдыслöн, абу войыслöн ныв-пи. ⁶ Сiдзкö, мукöдыс моз огö кутöй узьны. Садьмöдчам да кутам овны садь вежöрöн. ⁷ Öд узьысьяс войнас узьöны, да юысьяс войнас кодалöны. ⁸ Ми – луныслöн ныв-пи. Сiдзкö, кутам овны садь вежöрöн. Пасьталам ас выланым муслуныслысь да эскöмыслысь кöрт кышöдсö, а юр вевттьöд пыдди босьтам мездмöм вылö лачасö. ⁹ Öд Енмыс бöрйис миянöс эз сы могысь, медым Сылöн скöрлуныс суис миянöс, но сы могысь, медым Исус Кристос Господьным пыр ми босьтiм мездмöмсö. ¹⁰ Кристос кулiс миян вöсна, медым ми, ловъяöсь али кулöмаöсь, олiм Сыкöд. ¹¹ Сiдзкö, öнiя моз водзö ышöдöй да ёнмöдöй öта-мöднытö. ¹² Вокъяс, корам тiянöс: пыдди пуктöй тiян пöвстын уджалысьясöс, Господькöд öтувъя олöмас тiянöс туйдöдысьясöс да тiянöн веськöдлысьясöс. ¹³ Вылö пуктöй татшöм йöзсö, радейтöй найöс налöн уджысь. Ас костаныд олöй лöня. ¹⁴ Вокъяс, корам тiянöс: дышъясöс туйдöдöй, полысьясöс ышöдöй, жебъясöс кутыштöй, быдöнöс терпитöй. ¹⁵ Видзчысьöй, мед некод лёксьыс эз мынтысь лёкöн. Мöдарö, зiльöй вöчны бурсö öта-мöдныдлы да став йöзыслы. ¹⁶ Пыр нимкодясьöй. ¹⁷ Дугдывтöг кевмысьöй. ¹⁸ Ставсьыс аттьöалöй Енсö, öд татшöмъясöн Енмыс кöсйö аддзыны тiянöс, Исус Кристослы эскысьясöс. ¹⁹ Ловлысь ыпъялöмсö энö кусöдöй. ²⁰ Пророкъяслысь висьталöмсö энö öтдортöй. ²¹ Ставсö тöдмалöй, бурас кутчысьöй. ²² Ылыстчöй быдпöлöс лёксьыс. ²³ Лöньлуныслöн Ен мед Ачыс тырвыйö вежöдас тiянöс да видзас тiянлысь ловнытö, олöмнытö да вир-яйнытö сöстöмöн миян Господь Исус Кристос локтiгкежлö. ²⁴ Сiйö, кодi корис тiянöс, эскана. Сiдзкö, вöчас шуöм сертиыс. ²⁵ Вокъяс, кевмысьöй миян вöсна. ²⁶ Став вокъясöс чолöмалöй вежа окыштöмöн. ²⁷ Кора тiянöс Господь нимöн: лыддьöй тайö гижöдсö став вежа вокъяслы. ²⁸ Миян Господь Исус Кристослöн буралöмыс тiянкöд. Аминь.