1 Петыр

¹ Гижö Петыр, Исус Кристослöн апостол. Чолöмала йöз муын олысьясöс, Понтö, Галатияö, Каппадокияö, Асияö да Вифинияö разалöм войтырöс. Ен Бать водзысяньыс бöрйöма да вежöдöма тiянöс Аслас Ловнас, медым тi кывзысинныд Исус Кристослысь да сöстöмминныд Сылöн Вирнас. Буралöмыс да лöньлуныс мед содас тiянлы! ³ Ошкöм Енлы, миян Господь Исус Кристослöн Батьлы. Ыджыд буралöмыс вöсна Исус Кристосöс ловзьöдöм пыр Енмыс сетiс миянлы выль олöм. Та вöсна ми кутам ловъя лача ⁴ босьтны сöстöм, сiсьмытöм да бырлытöм озырлун, кодöс видзöма тiянлы енэжын. ⁵ Эскöмныд пыр Енлöн выныс видзö тiянöс мездмöм вылö, и тайö мездмöмыс воссяс бöръя кадас. ⁶ Сiдзкö, нимкодясьöй, весиг ковмас кö öнi шогсьыштны быдпöлöс сьöкыд нуöмысь. ⁷ Зарниыс тöдмавсьö биöн. Тiян эскöмныд, кодi бырана зарниысь донаджык, тöдмавсьö сьöкыдлунъяс дырйи, медым Исус Кристос локтiгöн вичмис тiянлы ошкöм, нимöдöм да дзирдлун. ⁸ Кристосöс тi энö аддзылöй, но Сiйö муса тiянлы. Тi онö на аддзöй Сiйöс, но эсканныд Сылы. Тiян сьöлöмныд тырöма ыджыдсьыс-ыджыд нимкодьлунöн, та йылысь он вермы весиг висьтавнысö. ⁹ Öд эскöмныдлöн медшöр могыс – воöдчыны мездмöмас. ¹⁰ Пророкъяс пыдiсянь тöдмалiсны-туялiсны тайö мездмöмсö. Найö водзвыв висьтавлiсны тiянлы дасьтöм буралöм йылысь. ¹¹ Найö кöсйисны тöдмавны, кутшöм кад вылö да мый вылö индiс на пытшкын олысь Кристослöн Лолыс, кор Сiйö водзвыв висьтавлiс Кристослöн сьöкыдалöмыс да Сiйöс виччысьысь дзирдлуныс йылысь. ¹² Енмыс восьтiс пророкъяслы, мый тайöс юöртiгöн найö кесъялiсны миянлы, а эз аслыныс. Öнi тайöс юöртiсны найö, кодъяс висьталiсны тiянлы Бур Юöрсö енэжсянь мöдöдöм Вежа Лов вынöн. Весиг анделъяс кöсйöны тöдны тайö гусяторсö. ¹³ Сiдзкö, лоöй дасьöсь да олöй садь вежöрöн. Кутöй зумыд лача Енлöн буралöм вылö, кодi вичмас тiянлы Исус Кристос локтiгöн. ¹⁴ Лоöй кывзысьысь челядь кодьöн. Збыльсö тöдтöдз тiянöн веськöдлiсны асланыд кöсйöмъясныд, но öнi энö лэдзöй налы веськöдлыны аснаныд. ¹⁵ Тiянöс Корысьыс вежа. Сы моз лоöй вежаöсь быдторйын. ¹⁶ Гижöма: «Лоöй вежаöсь, öд Ме вежа». ¹⁷ Тi кö шуанныд Батьöн Сiйöс, кодi чужöм вылö видзöдтöг мыждö быдöнöс уджъясыс серти, сiдзкö, олöй тайö му вылас Енсьыс полöмöн. ¹⁸ Тi öд тöданныд, мый тiянöс ньöбöма абу бырана эзысь да зарни вылö, медым мездыны тiянöс весьшöрö олöмысь, кодi вуджис тiянлы батьяссяньныд. ¹⁹ Тiянöс ньöбöма Кристослöн дона Вир вылö. Сiйö вöлi тыр-бур да сöстöм Баля. ²⁰ Енмыс бöрйис Сiйöс му пуксьытöдзыс на да мöдöдiс тiян вöсна бöръя кадас. ²¹ Сы пыр тi эсканныд Енмыслы, кодi ловзьöдiс Сiйöс да сетiс Сылы дзирдлунсö, медым тi эскинныд да кутiнныд лача Енмыс вылö. ²² Лов отсöгöн збыльыслысь кывзысьöмöн тi сöстöмминныд, медым восьса сьöлöмöн верминныд радейтны мукöд эскысьöс. Сiдзкö, сьöлöмсяньныд радейтöй öта-мöднытö. ²³ Тi выльысь чужинныд энö сiсьмана кöйдыссянь, а сiсьмытöмсянь – Енлöн ловъя да бырлытöм Кывсянь. ²⁴ Гижöдыс висьталö: – Мортыс – турун кодь, сылöн мичлуныс – дзоридз кодь. Турун косьмö, дзоридз усьö, ²⁵ а Господьлöн Кывйыс помтöг олö. Тайö Кывйыс – Бур Юöр, кодöс висьталöма тiянлы.

¹ Öвсьöй быдсяма лёк вöчöмысь, ылöдчöмысь, вежалöмысь, суклясьöмысь да энö лоöй кык бана шаньгаясöн. ² Зiльöй пöткöдчыны Ен Кывйöн, кыдзи пузчужöм кагаяс пöткöдчöны йöлöн, медым сы отсöгöн быдминныд да лоинныд мездмöмаöсь. ³ Тi öд тöданныд: Господь бур сьöлöма. ⁴ Сiйö – ловъя из, Енмыслы зэв дона. Йöзыс Сiйöс öтдортiсны, но Енмыс бöрйис Сiйöс. Локтöй Сы дiнö ⁵ да вайöй асьнытö ловъя из пыдди, медым Ен вöчас тiянысь Аслас Ловлы оланiн. Сэки лоанныд вежа кесъялысьясöн да кутанныд вайны Ловсянь вись, кодi шогмана Енмыслы Исус Кристос пыр. ⁶ Гижöдыс висьталö: – Сионö Ме пукта пельöс из. Сiйö – дона из, кодöс Ме бöрйи. Сылы эскысь оз янав. ⁷ Сiдзкö, тiянлы, эскысьяслы, Сiйö дона из. А эскытöмъяслы – тайö изйыс, кодöс шыбитiсны керка лэптысьяс, лоис пельöс изйöн. ⁸ Тайö изъяс найö крукасьöны да усьöны. Найö крукасьöны, öд Ен Кывйыслысь оз кывзысьны. Тадзи налы шуöма лоны. ⁹ Но тi – бöрйöм йöз, Öксылöн вежа кесъялысьяс. Тi – вежа войтыр, Енлöн йöз. Сiйö бöрйис тiянöс, медым висьтавлiнныд Сылöн тыр-бурыс йылысь. Енмыс корис тiянöс пемыдсьыс Аслас шензьöдана югыдö. ¹⁰ Водзынсö тi энö вöлöй Ен войтырöн, öнi тi – Ен войтыр. Водзынсö олiнныд Енлöн бурсетöмтöг, öнi тi босьтiнныд сiйöс. ¹¹ Мусаяс, тайö му вылас тi ветлысь-мунысьяс кодьöсь. Ёна кора тiянöс: энö кывзысьöй асланыд вир-яйлöн лёк кöсйöмъяслысь, öд найö тышкасьöны тiян ловкöд. ¹² Ентöдтöмъяс пöвстын олöй бур ногöн. Сэки найö, кодъяс лёкöдöны тiянöс лёк вöчысьясöс моз, аддзасны бур вöчöмнытö да ошкасны Енсö Сылöн локтiгас. ¹³ Господьöс пыдди пуктöмöн кывзысьöй мортöн индöм быдпöлöс веськöдлысьяслысь: öксылысь, öд сiйö став вылас ыджыдыс, ¹⁴ юралысьяслысь, öд öксы найöс пуктöма мыждыны лёк вöчысьясöс да ошкыны бур вöчысьясöс. ¹⁵ Енмыс кöсйö, медым тi бур вöчöмнаныд тупкинныд мывкыдтöм йöзлысь вомсö. ¹⁶ Тiянлы сетöма мездлун, сöмын мездлунныд мед оз ло вевттьöдöн лёк вöчöмныдлы, но олöй Енлöн кесйöгъяс моз. ¹⁷ Быдöнöс пыдди пуктöй, вокъясöс радейтöй, Енсьыс полöй, öксыöс бурö пуктöй. ¹⁸ Кесйöгъяс, Енсьыс полöмöн кывзысьöй асланыд ыджыдъяслысь. Кывзысьöй энö сöмын буръяслысь да рамъяслысь, а тшöтш скöръяслысь. ¹⁹ Мортыс кö кутö тöд вылас Енлысь кöсйöмсö да нуö сьöкыдсö лёксö вöчтöг – тайö шогмана Енмыслы. ²⁰ Тiянöс кö нöйтöны мыж вöчöмысь да терпитанныд тайöс, сэки мыйысь тiянöс ошкынысö? Но тi кö сьöкыдаланныд бурсö вöчигöн да терпитанныд тайöс – тайö шогмана Енмыслы. ²¹ Дзик та вылö тiянöс корöма, öд Кристос нуис сьöкыдсö тiян вöсна. Тадзи Сiйö петкöдлiс, медым тi олiнныд Сы моз. ²² – Мыжсö Сiйö эз вöчлы, Сiйö некор эз пöръясьлы. ²³ Сiйöс лёкöдiгöн Сiйö воча эз лёкöд. Сьöкыдсö нуигöн эз кöсйысь мынтысьны лёк вöчöмöн, а ставсö сетiс веськыда Мыждысьлы. ²⁴ Миянлысь мыжъяснымöс Аслас вир-яйын Сiйö кыпöдiс крест вылö, медым ми дугдiм вöчны мыжсö да олiм веськыда. Сылöн дойясöн тi бурдiнныд. ²⁵ Тi вöлiнныд вошöм ыжъяс кодьöсь, но öнi бергöдчинныд тiянöс Видзысь да тiян вöсна Тöждысьысь дiнö.

¹ Гöтыръяс, кывзысьöй асланыд верöсъяслысь. Сэки верöсъяс, кодъяс оз эскыны Енлöн Кывлы, тiян олöм вылö видзöдöмöн висьтавтöг-велöдтöг кутасны эскыны. ² Öд найö аддзасны тiянлысь сöстöм да Енсьыс полана оласногнытö. ³ Энö тöждысьöй мичмöдны асьнытö ортсысанас: юрсинытö баситöмöн, зарни öшлöмöн да дона паськöмöн. ⁴ Тiян мичлунныд мед лоö пытшкöсса: рам да лöнь сьöлöм. Тайö мичлуныс бырлытöм, сiйö дона Енмыслы. ⁵ Тадзи асланыс верöсъяслысь кывзысьöмöн важöн мичмöдлiсны асьнысö вежа аньяс, Ен вылö лача кутысьяс. ⁶ Сарра кывзысис Öвраамлысь да шуис сiйöс аслас ыджыдöн. Тi кö вöчанныд бурсö нинöмысь повтöг, сiдзкö, тi – Сарралöн нывъяс. ⁷ Верöсъяс, пыдди пуктöй ассьыныд гöтыръястö, олöй накöд бур мывкыдöн. Дерт, найö тiян дорысь жебджыкöсь, но налы тшöтш вичмö Енсянь буралöмыс да олöмыс. Тадзи кö вöчанныд, кевмысиганыд оз ло мытшöдыс. ⁸ Медбöрти кöсъя шуны тiянлы: олöй öти сьöлöмöн да öти лолöн, радейтöй öта-мöднытö, лоöй мелiöсь да рамöсь. ⁹ Лёк вöчöмысь энö мынтысьöй лёкöн да омöльтöмысь омöльтöмöн. Мöдарö, бурсиöй, öд тi тöданныд, мый та вылö корöма тiянöс. Сэки тiянлы вичмас бурсиöмыс. ¹⁰ – Кодлы муса олöмыс, кодi кöсйö аддзыны шуда лунъяс, сiйö мед видзас ассьыс кывсö лёк сёрниысь да вомсö ылöдчöмысь, ¹¹ мед ылыстчас лёксьыс да вöчас бурсö, корсяс лöньлунсö да кутчысяс сэтчö. ¹² Öд Господь видзöдö веськыда вöчысьяс вылö да кылö налысь кевмöмсö, а лёк вöчысьяслы Господь паныд мунö, медым бырöдны найöс му вывсьыс. ¹³ Кодi вöчас тiянлы лёксö, тi кö сьöлöмсяньныд вöчанныд бурсö? ¹⁴ Тi кö нуанныд сьöкыдсö веськыда олöм вöснаныд, сiдзкö, тi шудаöсь. Энö полöй некодысь да энö майшасьöй нинöмысь. ¹⁵ Господь Енмöс медвылö пуктöй сьöлöманыд. Юалас кö кодкö лачаныд йылысь, пыр лоöй дасьöсь вочавидзны сылы. Вочавидзöй рам сьöлöмöн да Енсьыс полöмöн. ¹⁶ Олöй сiдзи, мед сьöлöмныд эз мыжды тiянöс. Сэки найö, кодъяс лёкöдöны тiянöс лёк вöчысьясöс моз Кристоскöд бур нога олöмысь, яналасны асланыс кывъясысь. ¹⁷ Енмыс кö кöсйö, мед ми нуим сьöкыдсö, бурджык сьöкыдавны бур вöчöмысь лёк вöчöм дорысь. ¹⁸ Кристос öтчыдысь нуис сьöкыдсö миян мыжъяс вöсна, медым вайöдны миянöс Ен дiнö. Сiйö, веськыда олысь, кулiс лёк нога олысьяс вöсна. Сылысь вир-яйсö вöлi виöма, но ловсö вöлi ловзьöдöма. ¹⁹ Ловнас Сiйö мунiс пемыдiнын олысь ловъяс дiнö да висьталiс налы юöрсö. ²⁰ Тайö ловъясыс эз кывзысьны Енмыслысь, но Сiйö дыр виччысис налысь кывзысьöмсö Нойлöн ковчег вöчигдырйи. Сэнi этшаöн, сöмын кöкъямыс морт, мездмисны ва пыр. ²¹ Тайö лоöмторйыс индö миян пыртчöм вылö, сы пыр ми мездмам Исус Кристослöн ловзьöм вöсна. Пыртчöмыс – абу вир-яй вылысь няйт мыськöм, но Ен водзын сöстöм сьöлöмöн кöсйысьöм. ²² Кристос кыпöдчис енэжас да пуксис Ен веськыдладорö, Кристослысь кывзысьöны анделъяс, енэжвыв ыджыдалысьяс да вынъяс.

¹ Кристос вир-яйнас нуис сьöкыдсö миян вöсна. Сiдзкö, тi тшöтш лоöй дасьöсь нуны сьöкыдсö, медым коляс кадсö тайö му вылас олiнныд Ен кöсйöм серти, энö нин асланыд кöсйöм серти. Öд вир-яйнас сьöкыдалысь ылыстчö мыж вöчöмысь. ³ Водзынсö тi вöчинныд ентöдтöмъяс моз: олiнныд лэдзчысьöмöн да лёк кöсйöмныд серти, кырсалiнныд, кодалiнныд-гажöдчинныд да юрбитiнныд зывöк идолъяслы. Тырмас нин тадзи овнытö. ⁴ Öнi ентöдтöмъяс шензьöны, öд тi онö нин олöй на моз лэдзчысьöмöн. Та вöсна найö лёкöдöны тiянöс. ⁵ Но налы ковмас вочавидзны Сылы, кодi регыд кутас мыждыны ловъяясöс да кулöмаясöс. ⁶ Дзик та могысь вöлi висьталöма Бур Юöрсö тшöтш кулöмаяслы. Дерт, вир-яйнас найöс лоö мыждöма став йöзсö моз. Но Бур Юöрсö налы вöлi висьталöма, медым ловнас найö олiсны Ен ногöн. ⁷ Регыд ставыслы воас пом. Сiдзкö, олöй бур мывкыдöн да садь вежöрöн, медым верминныд кевмысьны. ⁸ Сьöлöмсяньныд радейтöй öта-мöднытö, öд муслуныс вевттьö уна мыж. ⁹ Сибöдöй öта-мöднытö шуасьтöг. ¹⁰ Енмыслöн сетöмторйыс унапöлöс. Сiйö быдöнлы козьналiс сетöмторсö, медым тi кесъялiнныд öта-мöдныдлы. Сiдзкö, бур ногöн вöдитчöй Енсянь сетöмторнас. ¹¹ Кодi висьталö, мед висьталö Енсянь. Кодi кесъялö, мед кесъялö Ен вынöн. Сэки быдторйын лоö ошкöмыс Енлы Исус Кристос пыр. Сылы ошкöмыс, Сылöн ыджыдалöмыс нэмъяс чöж. Аминь. ¹² Мусаяс, тiянлы кö паныдасьöны топöдан сьöкыдлунъяс, тайö мед оз шензьöд тiянöс. Öд сьöкыдлуныс паныдасьö, медым тöдмавны тiянöс. ¹³ Мöдарö, нимкодясьöй, öд тi тшöтш нуанныд Кристослысь сьöкыдсö. Сэки Кристослöн дзирдлуныс воссигöн тi кутанныд ёна нимкодясьны. ¹⁴ Тiянöс кö лёкöдöны Кристос ним вöсна, тi шудаöсь. Öд Енлöн дзирдлуна Лолыс тiянкöд. Йöзыс омöльтöны Сiйöс, а тi ошканныд. ¹⁵ Сöмын тiян пиысь некод мед оз сьöкыдав морт виöмысь либö гусясьöмысь, лёк вöчöмысь либö суклясьöмысь. ¹⁶ Но сьöкыдалö кö кодкö Кристослы эскöмысь, мед оз яндысь. Мöдарö, мед ошкö Енсö таысь. ¹⁷ Мыждан кадыс матын нин. Медводз Енмыс кутас мыждыны Ассьыс войтырсö. Сiдзкö, медводз кö кутас мыждыны миянöс, сэки мый виччысьö найöс, кодъяс оз кывзысьны Енлöн Евангелльöлысь? ¹⁸ – Веськыда олысь кö öдва мездмö, мый виччысьö Ентöг олысьöс да мыжаöс? ¹⁹ Сiдзкö, Ен кöсйöм серти сьöкыдсö нуысьяс, сетöй асьнытö дзоньнас эскана Ставсöвöчысьлы да водзö вöчöй бурсö.

¹ Öнi ме шыася вичкоса юрнуöдысьяс дiнö, öд ачым ме тшöтш вичкоса юрнуöдысь. Ме аддзылi Кристослысь сьöкыдалöмсö, да меным тшöтш вичмас дзирдлуныс, кодi воссяс Сылöн локтiгас. Ме ёна кора тiянöс: ² видзöй тiянлы сетöм Енлысь йöз чукöрсö. Тöждысьöй на вöсна нимкодьпырысь да Енлы шогмана ногöн, энö мырдöнпырысь. Вöчöй тайöс сьöлöмсяньныд, а энö аслыныд мыйкö куралöм могысь. ³ Энö ыджыдалöй Енлöн йöз чукöр вылын, но асланыд оласногöн петкöдлöй налы, кыдзи колö овны. ⁴ Медыджыд Видзысьыс локтас да козьналас тiянлы дзирдалан юркытш, кодi оз сiсьмы. ⁵ Томджыкъяс, кывзысьöй вичкоса юрнуöдысьяслысь. Ставныд кывзысьöй öта-мöдныдлысь да лоöй рам сьöлöмаöсь. Öд вылö кыпöдчысьяслы Енмыс паныд мунö, а рамъяс дiнö Сiйö буралö. ⁶ Сiдзкö, сетчöй Енлöн вына кипод улö, и ас кадö Сiйö кыпöдас тiянöс. ⁷ Ассьыныд став тöжд-могтö вайöй Сылы, öд Сiйö тöждысьö тiян вöсна. ⁸ Олöй садь вежöрöн да пыр лоöй дасьöсь. Öд тiянлы паныд мунысьыс, омöльыс, ветлö равзысь лев моз да корсьысьö, кодöс эськö ньылыштны. ⁹ Сувтöй сылы паныд зумыд эскöмöн. Тöдöй, мый став му пасьталаыс вокъясныд тшöтш тiян моз нуöны сьöкыдсö. ¹⁰ Тiянлы этша нин колис сьöкыдавны. Та бöрти буралöмнас озыр Ен, кодi корис тiянöс Исус Кристос пыр Аслас бырлытöм дзирдлунö, мед ёнмöдас да зумыдмöдас тiянöс да вöчас тыр-буръясöн. ¹¹ Сылы ошкöмыс, Сылöн ыджыдалöмыс нэмъяс чöж. Аминь. ¹² Силуан отсöгöн ме гижи тiянлы тайö дженьыдик гижöдсö. Сiйöс ме лыддя эскана вокöн. Кöсъя эскöдны да ышöдны тiянöс: кутчысьöй Енлöн збыль буралöмас, кодöс сетöма тiянлы. ¹³ Тiянöс чолöмалö вавилонса вичко. Енмыс бöрйöма сiйöс тiянöс моз. Тiянöс чолöмалö тшöтш Марк пиöй. ¹⁴ Чолöмалöй öта-мöднытö мусапырысь окыштöмöн. Лöнь олöм ставныдлы, кодъяс Исус Кристос пытшкынöсь. Аминь.