1 Иоан

¹ Ми висьталам сы йылысь, мый вöлi водзысяньыс, мый кывлiм, мый аддзылiм ас синмöн, мый видзöдалiм да мый видлалiм ас киöн – ми висьталам олöмыслöн Кыв йылысь. ² Олöмыс петкöдчис, да ми аддзылiм Сiйöс. Öнi висьталам Сы йылысь, юöртам тiянлы помтöм Олöмыс йылысь. Сiйö вöлi Батьыскöд, öнi Сiйöс восьтöма миянлы. ³ Аддзывлöм-кывлöмыс йылысь висьталам тiянлы, мед эськö тi вöлiнныд миянкöд öтув. А ми öтувъяöсь Батьыскöд да Сылöн Исус Кристос Пиыскöд. ⁴ Ми гижам та йылысь, медым тi верминныд тырвыйö нимкодясьны. ⁵ Енмыс эм югыд, Сы пытшкын пемыдыс абу. Тайö юöрсö ми кывлiм Ен Писянь, öнi юöртам сiйöс тiянлы. ⁶ Шуам кö: "Ми öтув Сыкöд", а асьным ветлам пемыдас, сiдзкö, пöръясям да огö олöй збыльыс серти. ⁷ Сы моз кö югыдас ветлам, сэки миян эм öта-мöдкöд öтувтчöм, сэки Исус Кристос Ен Пилöн Вирыс сöстöммöдö миянöс быдпöлöс мыжысь. ⁸ Шуам кö: "Миян мыжыс абу", ми пöрйöдлам асьнымöс, и збыльыс абу миян пытшкын. ⁹ Ми кö висьталам мыжнымöс, сэки веськыд да эскана Ен прöститö миянлысь мыжсö да весалö миянöс быд лёкысь. ¹⁰ Шуам кö: "Ми эгö вöчöй мыжсö", петкöдлам Енсö пöръясьысьöн, да Сылöн кывйыс оз ов миян пытшкын.

¹ Менам челядь! Гижа тайöс тiянлы, медым тi энö вöчöй мыжсö. А мыжмас кö кодкö, тöдöй: Бать водзын миян эм веськыд Дорйысь – Исус Кристос. ² Сiйö – миян мыжъясысь вештысян вись, и абу сöмын миян, а став муюгыдыслöн мыжъясысь. ³ Олам кö Сылöн тшöктöмъяс серти, тайöн петкöдлам, мый ми тöдам Сiйöс. ⁴ Кодi шуö: "Ме тöда Сiйöс", но тшöктöмъяссö Сылысь торкö, сiйö пöръясьö, да сы пытшкын збыльыс абу. ⁵ Кодi олö Сылöн Кывйыс серти, сы пытшкын збыльысь Енлöн муслуныс воöма тыр-бурöдз. Та серти тöдам, мый ми Сы пытшкынöсь. ⁶ Кодi шуö: "Ме Сы пытшкын", сылы колö овны Сы моз. ⁷ Мусаяс, гижа тiянлы ог выль, а важ тшöктöм. Сiйöс тi тöданныд водзысяньыс нин. Тайö кывсö, важ тшöктöмсö, тi кывлiнныд водзынджык нин. ⁸ Збыльвылас, ме гижа выль тшöктöм. Сiйö збыльмö Кристос пытшкын да тiян пытшкын, öд пемыдыс вешйö, а збыль югыдыс югдöдö нин. ⁹ Кодi шуö: "Ме ветла югыдас", а воксö ассьыс мустöмтö, сiйö пемыдас на. ¹⁰ Воксö радейтысь ветлö югыдас, да сы пытшкын крукöдыс абу. ¹¹ Воксö мустöмтысь ветлö пемыдас, сiйö оз тöд, кытчö мунö, öд пемыдыс тупкöма сылысь синсö. ¹² Челядь, тiянлы гижа, öд Кристос ним вöсна прöститöма мыжнытö. ¹³ Батьяс, тiянлы гижа, öд тi тöданныд Водзысянь Олысьсö. Том войтыр, тiянлы гижа, öд тi верминныд омöльсö. Челядь, тiянлы гижа, öд тi тöданныд Ен Батьöс. ¹⁴ Гижи тiянлы, батьяс, öд тi Водзысянь Олысьсö тöданныд. Гижи тiянлы, том войтыр, öд тi ёнöсь, Енлöн Кывйыс олö тiян пытшкын да тi верминныд омöльсö. ¹⁵ Энö радейтöй муюгыдсö да мый сэнi эм. Кодлы муса муюгыдыс, сылы Батьыс абу муса. ¹⁶ Öд тайö муюгыдас ыджыдалö вир-яйлöн кöсйöм, синъяслы колöм да ыкшаасьöм. Тайö абу Батьсянь, ставыс тайö муюгыдыслöн. ¹⁷ Муюгыдыс став аслас колöм-кöсйöмнас бырас, а Ен кöсйöм серти олысь пондас овны помтöг. ¹⁸ Челядь, öнi бöръя кад. Тi кывлiнныд, антикрист пö локтас. Öнi уна антикрист нин петкöдчис. Та серти тöдам, мый бöръя кад пуксис. ¹⁹ Найö петiсны миян пöвстысь, но найö эз вöвны миянкöд öтув. Вöлiны кö миянкöд öтув, кольччисны эськö миянкöд. Но налöн петöмыс висьталö, мый найö абу миянкöд. ²⁰ А тiянöс мавтыштöма Вежаыс, да тi тöданныд ставсö. ²¹ Ме гижа тiянлы ог сы вöсна, мый тi онö тöдöй збыльсö, мöдарö, тi сiйöс тöданныд да. Тi öд тöданныд: збыльсяньыс ылöгыс оз лок. ²² Кодi нö ылöдчысьыс? Абу-ö сiйö, кодi шуö, Исус пö абу Кристос. Татшöмыс антикрист. Сiйö соссьö Батьсьыс да Письыс. ²³ Кодi соссьö Письыс, сылöн абу и Батьыс. Кодi сибöдö Писö, сылöн и Батьыс эм. ²⁴ Сiдзкö, мый тi кывлiнныд водзысяньыс, сiйö мед олас тiян пытшкын. Тайö кö лоö тiян пытшкын, сэки Пиыс да Батьыс пытшкын лоанныд. ²⁵ Сiйö кöсйысис сетны миянлы помтöм олöм. ²⁶ Вылынджык ме гижи тiянöс ылöдысьяс йылысь. ²⁷ Но тiян эм Вежасянь мавтыштöм. Та вöсна абу колана, мед кодкö велöдiс тiянöс. Öд мавтыштöмыс велöдö тiянöс быдторйö, висьталö збыльсö да оз пöръясь. Сiдзкö, олöй велöдöм сертиыс. ²⁸ Челядь, лоöй Сы пытшкынöсь, медым Сылöн локтiгöн ми вöлiм повтöмöсь, мед эз вöв яндзим миянлы сувтны Сы водзö. ²⁹ Тi кö тöданныд, мый Сiйö веськыд, тöдöй: веськыда вöчысь Сысянь чужöма.

¹ Видзöдöй, кутшöм мусаöсь ми Батьлы: Сiйö сетiс миянлы шусьыны да лоны Енлöн ныв-пиöн. Муюгыдсаыс оз тöд миянöс, Сiйöс оз тöд да. ² Мусаясöй, öнi ми Енлöн ныв-пи. Кодöн лоам, тайö эз на воссьы. Тöдам сöмын, кор воссяс, лоам Сы кодьöсь, öд сэки аддзам Сiйöс сэтшöмöн, кутшöм Сiйö эм. ³ Сы вылö татшöм лача кутысь сöстöммöдö асьсö, мед лоны Сы кодь сöстöмöн. ⁴ Мыжсö вöчысь мунö Индöдлы паныд, öд мыжыс – тайö Индöдлы паныд мунöм. ⁵ Тi тöданныд, мый Кристос локтiс босьтны миянлысь мыжъяс. Сы пытшкын мыжыс абу. ⁶ Сы пытшкын олысь мыжсö оз вöч, а мыжсö вöчысь эз аддзыв да оз тöд Сiйöс. ⁷ Челядь, энö сетöй ылöдны тiянöс некодлы. Веськыда вöчысь – сiйö Кристос кодь веськыд. ⁸ А мыжсö вöчысь – омöльсянь, öд омöльыс водзысянь мыжсö вöчö. Та вöсна Ен Пи и локтiс, мед жугöдны омöльыслысь уджъяссö. ⁹ Енсянь чужысь мыжсö оз вöч, сы пытшкö бур кöйдыс вужъясьöма. Татшöмыс мыжсö вöчны оз вермы, öд сiйö Енсянь чужöма. ¹⁰ Кодi оз веськыда вöч, да кодi мустöмтö воксö, сiйö абу Енсянь. Та серти тöдмалам Енлысь ныв-писö да омöльлысь йылöмсö. ¹¹ Миянлы колö радейтны öта-мöдöс. Тайö юöрсö тi кывлiнныд водзысяньыс. ¹² Огö лоöй Каин кодьöсь, öд сiйö вöлi омöльсяньыс, да виис ассьыс воксö. Мыйла виис? Каинлöн уджъясыс вöлiны лёкöсь, а вокыслöн – веськыдöсь. ¹³ Энö шензьöй, вокъясöй, муюгыдсаыс кö мустöмтö тiянöс. ¹⁴ Ми тöдам: ми вуджим кулöмсьыс олöмö, öд радейтам вокъяснымöс. Кодi оз радейт воксö – кольö кулöмас. ¹⁵ Воксö мустöмтысь – сiйö морт виысь. Тi тöданныд, мый морт виысь пытшкын помтöм олöмыс абу. ¹⁶ А муслунсö ми тöдмалiм сы серти, мый Кристос сетiс Ассьыс олöмсö миян вöсна. Сiдзкö, миянлы тшöтш колö сетны олöмнымöс вокъясным вöсна. ¹⁷ Мортыс кö вокыслысь гöльлунсö аддзигöн чорзьöдö сьöлöмсö да оз отсав сылы, кöть сылöн аслас ставыс эм, вермас-ö татшöм морт пытшкас лоны Енлöн муслуныс? ¹⁸ Челядьöй, кутам радейтны öта-мöднымöс огö кывъясöн да сёрниöн, но збыль сертиыс да уджъясöн. ¹⁹ Та серти тöдмалам, мый ми збыльыслöн. Сьöлöм кö мыждö миянöс, ми вермам лöньöдны сьöлöмнымöс Ен водзын. Енмыс öд ыджыдджык миян сьöлöмысь, Сiйö ставсö тöдö. ²¹ Мусаясöй, сьöлöмным кö оз мыжды миянöс, ми вермам повтöг локны Ен водзö. ²² Сэки мый корам, босьтам Сысянь, öд олам Сылöн тшöктöмъяс серти да вöчам Сылы шогманасö. ²³ А Сiйö тшöктiс, медым ми эским Сылöн Пилы, Исус Кристослы, да тшöктöмыс серти радейтiм öта-мöдöс. ²⁴ Кодi кутчысьö Сылöн тшöктöмъясö, сiйö олö Кристос пытшкын, а Кристос – сы пытшкын. А мый Сiйö миян пытшкын, тöдам Ловсяньыс, кодöс Сiйö сетiс миянлы.

¹ Мусаясöй, энö эскöй быд ловлы, тöдмалöй, Енсянь-ö сiйö. Öд уна ылöгпророк öнi муюгыдас. ² Енсянь-ö лолыс, тöдмаланныд тадзи: висьталö кö лолыс, мый Исус Кристос локтiс вир-яйын, сiйö Енсянь. ³ Оз кö висьтав, мый Исус Кристос локтiс вир-яйын, сiйö абу Енсянь, сiйö антикристсянь. Тайö – антикристлöн лолыс, код йылысь тi кывлiнныд, мый сiйö локтас, и öнi сiйö муюгыдас нин. ⁴ Челядь, тi Енсянь. Тi верминныд ылöгпророкъясöс, öд тiян пытшкын Олысьыс ёна ыджыдджык муюгыдсасьыс. ⁵ Найö муюгыдсьыс, та вöсна и сёрнитöны муюгыдсаыс моз, и муюгыдыс кывзö найöс. ⁶ А ми Енсянь. Енсö тöдысь кывзö миянöс, а кодi абу Енсянь, сiйö оз кывзы миянöс. Та серти тöдмалам збыльыслысь ловсö да ылöгыслысь ловсö. ⁷ Мусаясöй, кутам радейтны öта-мöднымöс, öд муслуныс Енсянь. Кодi радейтö, сiйö Енсянь чужöма да тöдö Енсö. ⁸ Кодi оз радейт, сiйö оз тöд Енсö, öд Енмыс эм муслун. ⁹ Енмыс мöдöдiс тайö муюгыдас Ассьыс öтка Писö, медым Сы пыр сетны миянлы олöм. Тадзи Сiйö петкöдлiс миян дiнö Ассьыс муслунсö. ¹⁰ Муслуныс абу сыын, мый Енмыс вöлi муса миянлы, но – сыын, мый ми вöлiм мусаöсь Сылы. Сiйö сетiс Ассьыс Писö вись пыдди, мед вештысьны миян мыжъясысь. ¹¹ Мусаясöй, Енмыс кö татшöма радейтiс миянöс, миянлы тшöтш колö радейтны öта-мöдöс. ¹² Енсö некод некор эз аддзыв. Öта-мöдöс кö радейтам, сiдзкö, Енмыс миян пытшкын да Сылöн муслуныс тыр-бурöдз воис сьöлöманым. ¹³ Ен сетiс миянлы Ассьыс Ловсö. Та серти тöдам, мый ми Сы пытшкынöсь, а Сiйö миян пытшкын. ¹⁴ Батьыс мöдöдiс Писö мездыны муюгыдсö. Ми ас синмöн аддзылiм тайöс, и öнi висьталам та йылысь. ¹⁵ Кодi шуö Исусöс Ен Пиöн, Енмыс сы пытшкын, а сiйö Ен пытшкын. ¹⁶ Ми тöдмалiм Енлысь миян дiнö муслунсö да эским Сылöн муслунас. Енмыс эм муслун. Кодi олö муслун пытшкас, сiйö Ен пытшкын, а Енмыс сы пытшкын. ¹⁷ Сiдзкö, муслуныс тыр-бурöдз воöма миян пытшкын. Та вöсна вермам повтöг сувтны Мыждан лунö, öд ми тайö муюгыдас Кристос кодьöсь. ¹⁸ Муслунас абу полöмыс, öд тыр-бур муслуныс вöтлö полöмсö. Полöмас олö мыждöм, та вöсна полысьлöн муслуныс абу на тыр-бур. ¹⁹ Кутамöй радейтны Енмöс, öд медводз Сiйö радейтiс миянöс. ²⁰ Кодi шуö: "Ме Енсö радейта", а воксö ассьыс мустöмтö, сiйö пöръясьö. Оз кö радейт воксö, кодöс аддзö, вермас-ö радейтны Енсö, кодöс оз аддзы? ²¹ Миян эм Енсянь тшöктöм: «Енмöс радейтысь, радейт тшöтш воктö ассьыд».

¹ Эскам кö, мый Исус – сiйö Кристос, ми Енсянь чужöмаöсь. Муса кö миянлы Чужтысьыс, муса и Сысянь чужысьыс. ² Радейтам кö Енсö да олам Сылöн тшöктöмъяс серти, та серти тöдам, мый ми Ен челядьöс тшöтш радейтам. ³ Тшöктöмъяс серти олöмыс – тайö Енсö радейтöм, а Сылöн тшöктöмъясыс абу сьöкыдöсь. ⁴ Öд Енсянь чужысь вермö муюгыдсö. Тайö вермöмыс – миян эскöм, кодöн муюгыдсö вермöма. ⁵ Кодi нö вермö муюгыдсö? Сiйö, кодi эскö, мый Исус – Енлöн Пи. ⁶ Исус Кристос локтiс ваöн, вирöн да Лолöн, эз сöмын ваöн, но ваöн да вирöн. Та йылысь Лов висьталö, öд Лолыс эм збыльыс. ⁷ Енэжас эм куим висьталысь: Бать, Кыв да Вежа Лов. Тайö куимыс öти. ⁸ Му вылас тшöтш куим висьталысь: Лов, ва да вир. Тайö куимыс висьталö öтитор йылысь. ⁹ Ми сибöдам мортлысь висьталöмсö, но Енлöн висьталöмыс ёна ыджыдджык, öд сiйöс Ачыс Енмыс висьталö. Сiйö висьталö Аслас Пи йылысь. ¹⁰ Кодi эскö Ен Пилы, сылöн сьöлöмас эм тайö висьталöмыс. Кодi оз эскы Енмыслы, пуктö Сiйöс пöръясьысь туйö, öд тайö мортыс оз эскы Пи йывсьыс Енлöн висьталöмыслы. ¹¹ А висьталöмыс татшöм: Ен сетöма миянлы помтöм олöм, и тайö олöмыс Пиыс пытшкын. ¹² Кодлöн эм Пиыс, сылöн эм олöмыс. Кодлöн абу Ен Пиыс, сылöн олöмыс абу. ¹³ Тайöс гижи тiянлы, Ен Пи нимö эскысьяслы, мед тi тöдiнныд, мый Ен Пилы эскöмныд вöсна тiян эм помтöм олöм. ¹⁴ Ми вермам повтöг локны Ен водзö, ми öд тöдам: корöмным кö лöсялö Сылöн кöсйöмлы, Сiйö кылö миянöс. ¹⁵ А тöдам кö, мый Сiйö кылö миянлысь быд корöм, тöдам тшöтш, мый Сiйö сетас корöмасö. ¹⁶ Кор аддзан, мый вокыд мыжö усьöма, но мыжыс оз вайöд кулöмö, кевмысь сы вöсна. Ен сетас сылы олöм, дерт, мыжыс кö оз кулöмö вайöд. Эм кулöмö вайöдысь мыж, но ме ог кор кевмысьны татшöм мыжсö вöчысь вöсна. ¹⁷ Быд лёк вöчöм эм мыж, но оз став мыжыс вайöд кулöмö. ¹⁸ Ми тöдам: Енсянь чужысьяс мыжсö оз вöчны. Енсянь чужысь видзö асьсö, да омöльыс оз вермы инмöдчыны сы дiнö. ¹⁹ Тöдам, мый ми Енсянь, а став муюгыдыс омöльыслöн кипод улын. ²⁰ Нöшта тöдам, мый Ен Пи локтiс да сетiс миянлы мывкыдлун, мед ми тöдiм збыль Енсö. И ми олам тайö збыльыс пытшкын, Исус Кристос Пиыс пытшкын. Сiйö эм збыль Енмыс да помтöм олöмыс. ²¹ Челядь, видзöй асьнытö идолъясысь. Аминь.