1 Коринфö

1 Коринфö

¹ Гижö Павел, Енлöн корöм-кöсйöм серти Исус Кристослöн апостол. Сосфен воккöд ² ми чолöмалам тiянöс, коринфса Ен вичкоöс. Исус Кристос пыр Енмыс вежöдiс тiянöс да корис лоны Аслас вежа войтырöн. Ми чолöмалам быдöнöс, кодi быдлаын миян моз шыасьö Исус Кристос Господьным нимö. ³ Буралöм да лöнь олöм тiянлы миян Ен Батьсянь да Господь Исус Кристоссянь. ⁴ Быд кадö ошка ассьым Енмöс тiян дiнö Сылöн буралöмысь. Тайö буралöмсö Сiйö петкöдлiс Исус Кристос пыр. ⁵ Сы пыр Енмыс озырмöдiс тiянöс быдторнас, тi кужанныд бура сёрнитны, тiян эм быдпöлöс тöдöмлун. ⁶ Кристос йылысь висьталöмыс зумыда вужъясис тiян сьöлöмö, ⁷ та вöсна миян Господь Исус Кристослысь локтöмсö виччысигöн тi озырöсь быдпöлöс бурсетöмнас. ⁸ Енмыс ёнмöдас тiянöс зумыда сулавны помöдз, медым миян Господь Исус Кристослöн лунö тi вöлiнныд сöстöмöсь. ⁹ Енмыс эскана, Сiйö корис öтувтчыны тiянöс Аслас Пиыскöд – миян Господь Исус Кристоскöд. ¹⁰ Вокъяс, кора тiянöс миян Господь Исус Кристос нимöн: ас костаныд энö юксьöй, олöй öти мöвпъясöн, öти видзöдласöн да öти могöн. ¹¹ Вокъяс, Клоялöн гортсасянь ме кывлi, тi пö вензянныд öта-мöдныдкöд. ¹² Ме сёрнита сы йылысь, мый тi быдöн ас йывсьыныд шуанныд: «Ме – Павеллöн», «ме – Аполослöн», «ме – Кифалöн», а «ме – Кристослöн». ¹³ Гашкö, Кристосöс вöлi юклöма? Гашкö, Павелöс вöлi тувъялöма тiян вöсна? Гашкö, Павел нимöн тi пыртчинныд? ¹⁴ Ошка Енмöс, Крисп да Гай кындзи некодöс эг пырт тiян пиысь. ¹⁵ Сiдзкö, некод оз вермы шуны, мый ме пыртi кодöскö аслам нимöн. ¹⁶ Нöшта Степанöс пыртi да сылысь гортсасö, сэсся пыртi-ö кодöскö – ог тöд. ¹⁷ Öд Кристос мöдöдiс менö эз пыртны, а висьтавлыны Ассьыс Бур Юöрсö. Тайö Юöрсö ме висьтала ог мывкыд кывъясöн, медым Кристослöн крестыс эз вошты ассьыс вынсö. ¹⁸ Öд вошöмаяслы крест йылысь висьталöмыс – йöйталöм, а миянлы, мездмöмаяслы – Енлöн выныс. ¹⁹ Гижöма: «Мывкыда йöзлысь мывкыдлунсö бырöда, вежöра йöзлысь вежöрлунсö öтдорта». ²⁰ Кодi нö мывкыда йöзыс? Кодi велöдчöмаыс? Кодi нö тайö му вылас вежöра йöзыс? Эз-ö тайö мувывса мывкыдлунсö Енмыс йöйталöмö бергöд? ²¹ Енмыс Ассьыс мывкыдлунсö петкöдлiс мувывса йöзлы, но йöзыс асланыс мывкыдлунöн Енсö эз гöгöрвоны. Сэки Енмыс мöвпыштiс мездыны найöс, кодъяс эскöны миян висьталöмлы. Тайö висьталöмсö йöзыс шуöны йöйталöмöн. ²² Юдейяс корöны вöчны шензьöданаторъяс, грекъяс – петкöдлыны мывкыдлун, ²³ а ми висьталам тувъялöм Кристос йылысь. Юдейяс крукасьöны тайö висьталöмас, а грекъяс лыддьöны тайöс йöйталöмöн. ²⁴ Но Енлöн корöмаяслы, юдейяслы да грекъяслы, Кристос – Енлöн выныс да мывкыдлуныс. ²⁵ Öд Енлöн "мывкыдтöмлуныс" ёна ыджыдджык морт мывкыдысь, да Енлöн "жеблуныс" ёна вынаджык морт вынысь. ²⁶ Вокъяс, видзöдлöй ас выланыд, кутшöмöсь тi, Енлöн корöмаяс. Морт видзöдлас серти этша тiян пöвстын мывкыдаыс, этша юралысьыс да бур рöдысь петысьыс. ²⁷ Но Енмыс бöрйис тайö муюгыдсьыс мывкыдтöмсö, медым янöдны мывкыдасö, бöрйис жебсö, медым янöдны вынасö, ²⁸ бöрйис тайö муюгыдсьыс медся шогмытöмсö, коньöрсö да увтыртöмсö, медым нинöм туйö пуктыны нималанасö, ²⁹ медым Ен водзын некод эз ошйысь аснас. ³⁰ Енмыс йитiс тiянöс Исус Кристоскöд, кодi лои миянлы мывкыдлуннас. Сы пыр Енмыс мездiс миянöс, вöчис веськыдöн да вежа войтырöн. ³¹ Öд гижöма: «Ошйысьысь мед ошйысьö Господьöн».

¹ Вокъяс, кор ме волi тiян дiнö висьтавны Енсянь юöр, сэки сёрнитi тiянкöд эг мича да мывкыд кывъясöн. ² Ме мöвпыштi, мый тiянын олiгöн кöсъя тöдны сöмын Исус Кристосöс – тувъялöм Кристосöс. ³ Тiян дiнö ме локтi жебöн да полысьöн, сьöлöмöй ёна тiралiс. ⁴ Ме висьтавлi тiянлы да сёрнитi тiянкöд эг аслам мывкыдлунсянь, эг эскöдан кывъясöн, но менам кывъясын вöлi Ловлöн выныс. ⁵ Ме сёрнитi тадзи, медым тiян эскöмныд подуласис Енлöн вын вылö, а эз мортлöн мывкыдлун вылö. ⁶ Мывкыдлун йылысь ми висьталам зумыда эскысьяслы. Ми висьталам огö тайö муюгыдас олысьяслöн да юралысьяслöн мывкыдлун йылысь, öд тайö юралысьяссö лоö бырöдöма. ⁷ Ми висьталам Енлöн гуся мывкыдлуныс йылысь, кодöс быдöнысь вöлi дзебöма. Но олöм пуксьытöдзыс на Енмыс вöлi мöвпыштöма, мый Сылöн мывкыдлуныс ваяс миянлы дзирдлун. ⁸ Тайö муюгыдас юралысьяс пöвстысь некод эз тöд Енлöн мывкыдлуныс йылысь. Тöдiсны кö, найö эськö эз тувъявны дзирдлуна Господьöс. ⁹ Öд гижöма: – Эз аддзывлы син, эз кывлы пель, весиг юрас мортлы эз волы, мый Енмыс дасьтöма Сiйöс радейтысьяслы. ¹⁰ Енмыс восьтiс тайöс миянлы Аслас Ловнас, öд Лолыс ставсö тöдö. Сiйö тöдö Енлысь став пыдта-судтасö. ¹¹ Вермас-ö кодкö тöдны мортлысь мöвпъяссö сылöн лолыс кындзи? Тадзи Енлысь мöвпъяссö некод оз тöд Енлöн Лолыс кындзи. ¹² Ми сибöдiм эгö тайö муюгыдсалысь ловсö, а Енлысь Ловсö, медым вермим тöдны Енлысь сетöмторъяссö. ¹³ Ми висьталам та йылысь огö асланым мывкыдлунсянь, огö ас кывъясöн, а Вежа Ловсянь сетöм кывъясöн. Ловсянь висьталöмсö ми гöгöрвоöдам Лов отсöгöн. ¹⁴ Морт пытшкас кö абу Енлöн Лолыс, сiйö оз вермы сибöдны Ловсянь висьталöмсö да лыддьö тайöс йöйталöмöн. Мортыс оз вермы гöгöрвоны висьталöмсö, öд тайöс позьö донъявны сöмын Енлöн Лолыс отсöгöн. ¹⁵ Морт пытшкас кö эм Енлöн Лолыс, татшöм мортыс вермö донъявны быдтор, а сiйöс донъявны некод оз вермы. ¹⁶ – Кодi гöгöрвоас Господьлысь мывкыдсö? Кодi вермас туйдöдны Сiйöс? Но миян пытшкын Кристослöн мывкыдыс.

¹ Вокъяс, ме эг вермы сёрнитны тiянкöд Лов серти олысьяскöд моз. Ме сёрнитi тiянкöд вир-яй серти олысьяскöд моз, öд тi быттьö век на кагаяс Кристослы эскöмын. ² Ме вердi тiянöс йöлöн, а эг чорыд сёянöн, öд тi энö на вермöй сёйны чорыдсö. Тi öнöдз онö вермöй сёйны сiйöс, ³ öд тi вир-яй серти на оланныд. Тiян костын пыр на овлö вежалöм, вензьöм да юксьöм. Сiдзкö, тi вир-яй серти на оланныд, тi пыр на тайö муюгыдсаыс кодьöсь. ⁴ Öти шуö: «Ме – Павеллöн», мöд шуö: «ме – Аполослöн». Тадзи кö сёрнитанныд, сiдзкö, тi дзик на тайö муюгыдсаыс кодьöсь. ⁵ Кодi нö Павелыс? Кодi Аполосыс? Найö сöмын кесъялысьяс, кодъяс пыр тi эскинныд Кристослы. На пиысь быдöн Господьсянь сетöм удж вöчис. ⁶ Ме кöдзи, Аполос киськалiс, а быдтiс Енмыс. ⁷ Сiдзкö, кöдзысьыс да киськалысьыс нинöм, öд быдтысьыс – Енмыс. ⁸ Кöдзысьыс да киськалысьыс öти удж вöчöны, но быдöн на пиысь удждонсö уджыс серти босьтас. ⁹ Ми – Енкöд öтвыв уджалысьяс, а тi – Сылöн кöдзöм муыс, Сылöн тэчасыс. ¹⁰ Енлöн бурсетöмыс вöсна ме лои бур тэчысьöн да пуктi подувсö, а мöд лэптö сы вылö. Но быдöн мед видзöдö аслас удж бöрся. ¹¹ Подувсö пуктöма нин, тайö – Исус Кристос. Тайö подулыс кындзи мöд подув некод оз вермы пуктыны. ¹² Тайö подув вылас мортыс вермö лэптыны тэчассö зарниысь, эзысьысь, дона изйысь, пуысь, турунысь либö идзасысь, ¹³ но уджыс быдöнлöн ас кадö тыдовтчас. Тайöс Мыждан луныс петкöдлас, öд сiйö биöн локтас. Сэки биыс быдöнлысь уджсö тöдмалас. ¹⁴ Кодлöн вöчöмторйыс кутас зумыда сулавны, сiйö ассьыс удждонсö босьтас. ¹⁵ А сотчас кö, сэки удждонсö воштас. Дерт, асьсö сiйöс лоö мездöма, быттьö биысь перъясны. ¹⁶ Тi öмöй онö тöдöй: тi – Енлöн оланiн, Енлöн Лолыс олö тiян пытшкын. ¹⁷ Кодi жугöдас Енлысь оланiнсö, Енмыс сiйöс асьсö жугöдас. Öд тi – Енлöн оланiн, а Енлöн оланiныс вежа. ¹⁸ Асьнытö энö ылöдлöй. Тайö муюгыдас кö лыддьö кодкö асьсö мывкыдаöн, медводз сiйö мед лоö мывкыдтöмöн. Сэки сiйö збыльысь лоö мывкыда. ¹⁹ Öд Ен син водзын тайö му вылас олысьяслöн мывкыдлуныс – йöйталöм. Гижöма: «Енмыс кыйö мывкыдаясöс асланыс наянлунö». ²⁰ Нöшта гижöма: – Господь тöдö мывкыда йöзлысь мöвпъяссö, налöн мöвпъясыс ковтöмöсь. ²¹ Сiдзкö, некод мед оз ошйысь мортöн, öд ставыс тiян: ²² Павел-ö, Аполос-ö, Кифа-ö, муюгыдыс-ö, олöмыс-ö, кулöмыс-ö, öнiяыс-ö, локтанаыс-ö – ставыс тайö тiян. ²³ Тi – Кристослöн, а Кристос – Енлöн.

¹ Сiдзкö, лыддьöй миянöс Кристослы кесъялысьясöн, кодъяс кывкутöны Енлöн гусяторъяс вöсна. ² Сöмын татшöм кывкутысьяслы колö лоны эсканаöн. ³ Дерт, меным дзик веськодь, тi-ö менö мыжданныд, йöзыс-ö. Ме весиг ачым ачымöс ог мыжды. ⁴ Сьöлöмöй оз мыжды менö, но тайö оз на висьтав менам веськыдлун йылысь. Öд менö мыждысьыс – Господь. ⁵ Та вöсна Господь локтöдз, кадысь водз, некодöс энö мыждöй. Сiйö югдöдас пемыдас дзебöмасö да восьтас мортлысь мöвпъяссö. Сэки быдöнлы вичмас Енсянь ошкöмыс. ⁶ Вокъяс, ставсö тайöс ме серпасалöмöн висьталi тiянлы ас йылысь да Аполос йылысь, медым миян вылö видзöдöмöн тi велöдчинныд гöгöрвоны тайö кывъяссö: «Кутчысьöй Гижöдас». Сэки тi онö кутöй ышнясьны, öтиöс вылö кыпöдны, а мöдöс увтыртны. ⁷ Тэ öмöй бурджык мукöдсьыс? Енлöн сетöмыс кындзи тэнад öмöй эм мыйкö аслад? Абу кö, сiдзкö, мыйла ошйысян, мый ставыс тэнад. ⁸ Тiян ставыс эм, тi ёна нин озырминныд. Öнi тi – öксыяс, а ми – некод. Дерт, ме ёна кöсъя, медым тi збыльысь вöлiнныд öксыясöн. Сэки эськö тiянкöд öтвыв вермим öксыавны! ⁹ Но ме чайта, Енмыс пуктiс миянöс, апостолъясöс, медбöръя лыдас, быттьö кулöм вылö мыждöмаясöс. Öд муюгыдас быд олысьлы – анделъяслы и йöзыслы – ми лоим видзöданторйöн. ¹⁰ Кристос вöсна ми йöйöсь, а тi Кристос пытшкын мывкыдаöсь. Ми жебöсь, а тi вынаöсь. Миянöс лёкöдöны, а тiянöс ошкöны. ¹¹ Ми öнöдз сёйтöг-ютöг олам да лёкиник паськöмöн ветлам. Миянöс нöйтöны, ми пыр туйынöсь. ¹² Кок йылысь усьтöдз уджалам, ас ки помысь кынöмпöт перъям. Миянöс лёкöдöны, а ми бурсиам, миянöс вöтлöны, а ми терпитам. ¹³ Миянöс омöльтöны, а ми бур ногöн сёрнитам. Тайö му вылас олысьяслы ми ёг пыдди, найö öнöдз лыддьöны миянöс шыбласöн. ¹⁴ Гижа тайöс тiянöс туйдöдöм могысь, а ог янöдöм могысь, öд тi менам муса ныв-пи. ¹⁵ Дерт, тiян вермас лоны Кристос йылысь уна сюрс велöдысь, но батьыс сöмын öти, öд Бур Юöрсö тiянлы ме висьтавлi. Тадзи чужтi тiянöс Исус Кристослы эскысьясöн. ¹⁶ Сiдзкö, кора тiянöс: видзöдöй ме вылö, öд ме видзöда Кристос вылö. ¹⁷ Ме мöдöдi тiян дiнö Тимофейöс. Господь пытшкын сiйö менам муса пи да эскана кесъялысь. Сiйö казьтыштас тiянлы Кристоскöд менам öтувъя олöм йылысь. Та йылысь ме велöда быдлаын, быд вичкоын. ¹⁸ Öткымынöн тiян пиысь кутiсны вывтiасьны, чайтöны, мый ог лок тiян дiнö. ¹⁹ Но Енмыс кö сетас, регыд локта да тöдмала тайö йöзыслысь вынсö, ог кут налöн сёрни вылö видзöдны. ²⁰ Öд Енлöн Юралöмыс абу кывъясын, а вынын. ²¹ Сiдзкö, мыйöн локны тiян дiнö: беддьöн али рам сьöлöмöн да муслунöн? Мый бöръянныд?

¹ Ме кывлi, öткымынöн пö тiян пöвстысь кырсалöны, и сiдзи, мый татшöмыс оз овлы весиг ентöдтöмъяс пöвстын. Кодкö пö тiян пиысь узьлö весиг батьыслöн гöтырыскöд. ² Оз öмöй тiянлы ков шогсьыны та вöсна да вöтлыны ас дорсьыныд тайö мортсö? А тi пыр на ышнясянныд. ³ Дерт, вир-яйöн ме абу тiянкöд, но ловнам тiянкöд. Ме быттьö ачым вöлi тiянкöд да мöвпыштi, мый вöчны тайö мортыскöд. ⁴ Кор тi чукöртчанныд миян Господь Исус Кристос нимöн, ловнам лоа тiянкöд, миян Господь Исус Кристослöн выныс тшöтш лоö тiянкöд. ⁵ Сэки тайö мортсö сетöй сöтана киö вир-яйсö жугöдöм вылö, мед лолыс сылöн мездмас миян Господь Исус Кристослöн лунö. ⁶ Тiянлы нинöмöн ошйысьнысö! Тi öмöй онö тöдöй, мый этшаник няньшом шоммöдö дзоньнас кöтассö. ⁷ Сiдзкö, весалöй ас пытшсьыныд няньшомнытö, медым лоинныд выль кöтасöн. Дерт, тiян пытшкын шоммöданторйыс абу нин, öд Кристосöс, Ыджыд лунся Балянымöс, вайöма нин вись пыдди миян вöсна. ⁸ Сiдзкö, огö кутöй пасйыны Ыджыд лунсö важ няньшомöн: лёклунöн да наянлунöн. Кутам пасйыны сiйöс шомтöм няньöн: сöстöмлунöн да збыльöн. ⁹ Водзынджык ме тiянлы гижлi нин: энö кутöй некутшöм йитöд кырсалысьяскöд. ¹⁰ Ме ог сёрнит тайö мувывса кырсалысьяс, горшасьысьяс, гусясьысьяс да идоллы юрбитысьяс йылысь. Сэки эськö ковмис эновтны тiянлы тайö муюгыдсö. ¹¹ Но ме сёрнита сэтшöм морт йылысь, кодi шуö асьсö эскысьöн, но ачыс кырсалö, горшасьö, суклясьö, гусясьö, кодалö да идоллы юрбитö – татшöмыскöд энö кутöй некутшöм йитöд. Весиг энö сёйöй сыкöд öтлаын! ¹² Меным öмöй мыждыны вичкоысь ортсысасö? Енмыс найöс мыждас! А вичкосаöс – тiянлы мыждыны. «Вöтлöй ас дiнсьыныд лёк оласногаöс».

¹ Тi кö мыйыськö вензянныд öта-мöдныдкöд, сэки кыдзи лысьтанныд шыасьны мувывса мыждысьяс дiнö? Оз öмöй вежа войтыр дiнö ков шыасьны? ² Тi öмöй онö тöдöй, мый вежа войтыр кутас мыждыны муюгыдсасö? Кутанныд кö мыждыны муюгыдсасö, мыйла тайö ичöтикторъясыс кузя онö вермöй öти кывйö воны? ³ Тi öмöй онö тöдöй: ми весиг анделъясöс кутам мыждыны? Сiдзкö, дерт нин, быдлунъя могъяс кузя вермам öти кывйö воны. ⁴ Кор тi вензянныд öта-мöдныдкöд быдлунъя могъяс йылысь, сэки тi шыасянныд на дiнö, кодъяс абу вичкосаяс. ⁵ Шуа тайöс тiянöс янöдöм могысь. Оз öмöй тiян пöвстысь сюр мывкыда морт, кодi эськö бурöдiс эскысьясöс öта-мöдныскöд? ⁶ Мöдарö, тi öта-мöднытö мыжданныд да шыасянныд та могысь эскытöмъяс дiнö! ⁷ Тi кö мыжданныд öта-мöднытö, тайöн сöмын янöданныд асьнытö. Оз-ö бурджык ло, кутасны кö вöчны тiянлы лёксö да мырддявны тiянлысь? ⁸ Но тi асьныд лёка вöчанныд да мырддяланныд мукöдлысь, весиг эскысьяслысь. ⁹ Тi öмöй онö тöдöй, мый лёксö вöчысьяслы оз вичмы Енлöн Юраланiныс. Энö ылöдлöй асьнытö! Öд кырсалысьлы, идоллы юрбитысьлы, гозъя олöм пежалысьлы, пеж оласногалы, öта-мöдныскöд узьлысь айуловлы, ¹⁰ гусясьысьлы, горшасьысьлы, кодалысьлы, суклясьысьлы да мырддялысьлы – некодлы оз вичмы Енлöн Юраланiныс. ¹¹ Кодсюрö тiян пöвстысь тшöтш вöлiнныд татшöмöсь. Но миян Господь Исус Кристос нимöн да Ен Лов вынöн тi лоинныд сöстöмöсь, вежаöсь да веськыдöсь. ¹² «Меным ставсö позьö», но абу ставыс бур вылö. «Меным ставсö позьö», но ме ог лэдз, медым мыйкö ыджыдалiс ме вылын. ¹³ Сёяныс – кынöмлы, а кынöмыс – сёянлы. Но Енмыс бырöдас öтисö и мöдсö. Вир-яйыс абу кырсалöм вылö, сiйö – Господьлы, а Господь – вир-яйлы. ¹⁴ Енмыс ловзьöдiс Господьöс, Аслас вынöн Енмыс ловзьöдас тшöтш миянöс. ¹⁵ Тi öмöй онö тöдöй, мый тiян вир-яйныд – Кристос вир-яйлöн юкöн? Сiдзкö, верма öмöй Кристослысь юкöнсö кырсалысь анькöд йитны? Ен мед видзас! ¹⁶ Тi öд тöданныд, мый кырсалысь анькöд öтувтчысь лоö сыкöд öти вир-яйöн. Гижöма: «Кыкыс лоöны öти вир-яйöн». ¹⁷ А Господькöд öтувтчысь лоö Сыкöд öти лола. ¹⁸ Сiдзкö, энö кырсалöй! Мукöд мыжсö вöчысь оз аслас вир-яйлы паныд вöч, а кырсалысь аслас вир-яйлы паныд мыж вöчö. ¹⁹ Тi öмöй онö тöдöй, мый тiян вир-яйныд – Вежа Ловлöн крамыс, Сiйö олö тiян пытшкын. Тайö Ловсö Енмыс сетiс тiянлы, öнi тi абу нин асланыдöсь. ²⁰ Енмыс ньöбис тiянöс ыджыд дон вылö. Сiдзкö, ошкöй Енсö вир-яйнад и ловнад, öд ставыс Сылöн.

¹ Тi меным гижлiнныд да юалiнныд гöтрасьöм йылысь. Та вылö вочавидза тадзи: дерт, тайö бур, мортыс кö оз гöтрась, ² но медым некод эз кырсав, быд мортлöн мед лоö аслас гöтыр да быд аньлöн – аслас верöс. ³ Вольпасьын верöс сет асьтö гöтырлы, а гöтыр сет асьтö верöслы. ⁴ Абу гöтыр аслас вир-яй вылын ыджыдыс, а верöс. Абу верöс аслас вир-яй вылын ыджыдыс, а гöтыр. ⁵ Энö ылыстчöй öта-мöдсьыныд, а ылыстчанныд кö, вöчöй тайöс сёрнитчöмöн, сöмын кутшöмкö кад кежлö, медым ёнджыка на верминныд видзавны да кевмысьны. Сэсся бöр öтлаын лоöй, медым сöтана эз ыштöд тiянöс кутчысьтöм вöснаныд. ⁶ Дерт, тайö абу тшöктöм, но тi верманныд тадзи вöчны. ⁷ Ме кöсйи эськö, медым быдöн олiс ме моз. Но Енмыс быдöнлы вичмöдö торъя бурсетöм: öтилы – сэтшöмöс, мöдлы – татшöмöс. ⁸ Гöтыртöмъяслы да дöваяслы тадзи висьтала: бурджык тiянлы ме моз öткöн овны, ⁹ но онö кö вермöй кутны асьнытö, гöтрасьöй либö верöс сайö петöй. Öд бурджык гöтрасьны либö верöс сайö петны, медым лёкколöмыс эз ыджыдав тiян вылын. ¹⁰ Гозйöн олысьяслы тадзи висьтала: гöтыр мед оз юксьы аслас верöскöд. Тайö абу менам тшöктöм, а Господьлöн. ¹¹ А юксяс кö, мед öтнасöн олö либö бöр бурасьö верöсыскöд. Верöс мед тшöтш оз юксьы аслас гöтыркöд. ¹² Мукöдыслы висьтала ме, оз Господь: кутшöмкö эскысьлöн кö гöтырыс оз эскы, но кöсйö овны верöсыскöд, тайö эскысьыс мед оз юксьы аслас гöтыркöд. ¹³ Тайöс висьтала тшöтш эскысь аньлы: сылöн верöсыс кö оз эскы, но кöсйö овны сыкöд, тайö аньыс мед оз юксьы аслас верöскöд. ¹⁴ Тадзи эскысь гöтырыс пыр Енмыс вежöдö эскытöм верöссö, и мöдарö, эскысь верöсыс пыр вежöдö эскытöм гöтырсö. Эз кö вöв тадзи, тiян ныв-пиныд эськö вöлiны пежöсь, но öнi найö вежаöсь. ¹⁵ Эскытöм верöс либö эскытöм гöтыр кö кöсйö юксьыны, мед юксьö. Сэки эскысь верöсöс либö эскысь гöтырöс нинöм оз кут, öд Енмыс тшöктiс овны миянлы лöня. ¹⁶ Гöтыр, тэ öмöй верман тöдны, мый мездан ассьыд верöстö, а тэ, верöс, ассьыд гöтыртö? ¹⁷ Быдöн тiян пиысь мед олö Енлöн шуöм серти да лоö сэтшöмöн, кутшöмöн вöлi Господьлöн коригас. Тадзи ме велöда быд вичкоын. ¹⁸ Енлöн коригас кö вöлi вундыштöма кодöскö, сiйö мед оз дзеб тайöс. Эз кö вöв вундыштöма – мед оз вундыштчы. ¹⁹ Вундыштöмыс нинöм, и вундыштчытöмыс нинöм, но медшöр могыс – овны Енлöн тшöктöм серти. ²⁰ Быдöн мед лоö сэтшöмöн, кутшöмöн вöлi Енлöн коригас. ²¹ Енлöн коригас кö вöлiн кесйöгöн, эн майшась, но позьö кö мездмыны, бурджыксö бöрйи. ²² Öд Господьлöн коригас кö мортыс кесйöгöн вöлi, öнi сiйö Господьлöн мездлуна морт. А мездлуна кö вöлi, öнi сiйö Кристослöн кесйöг. ²³ Енмыс ньöбис тiянöс ыджыд дон вылö, сiдзкö, энö лоöй мортлöн кесйöгöн. ²⁴ Вокъяс, быдöн лоöй Ен водзын сэтшöмöн, кутшöмöн вöлiнныд Енлöн коригас. ²⁵ Öнi висьтала верöс сайö мунтöмъяслы. Тайö абу Господьлöн тшöктöм, ме висьтала ассьым видзöдласöс. Öд Господьлöн буралöмыс кузя меным позьö эскыны. ²⁶ Ме чайта, тайö сьöкыд кадас мортлы бурджык öткöн кольччыны. ²⁷ Тэ кö гöтыра – эн юксьы. Гöтыртöм кö – эн гöтрась. ²⁸ Дерт, гöтрасян кö, он мыжмы. Ныв кö петас верöс сайö, тшöтш оз ло мыжа. Но гозъя олöмас виччысьö тiянöс уна сьöкыдлун, да таысь кöсъя видзны тiянöс. ²⁹ Вокъяс, кöсъя шуны тiянлы, мый кадыс коли этша нин. Та вöсна гöтыра морт мед олö гöтыртöм моз, ³⁰ бöрдысь – бöрдтöм моз, гажöдчысь – гажöдчытöм моз, а ньöбасьысь – быттьö нинöм эз ньöб. ³¹ Тайö мувывса озырлуннас вöдитчысь мед олö сiдзи, быттьö сылöн нинöм абу. Öд став тайö мувывсаыс регыд бырас. ³² Кöсъя, медым тi нинöм вöсна энö тöждысьöй. Гöтыртöм морт тöждысьö Господьлöн уджъяс вöсна, медым Господьлы шогмыны, ³³ а гöтыра морт тöждысьö быдлунъя могъяс вöсна, медым гöтырыслы шогмыны. Верöс сайö петöм да верöстöм ань öта-мöдсьыс тшöтш торъялöны. ³⁴ Верöстöм ань тöждысьö Господьлöн уджъяс вöсна, медым вир-яйнас да ловнас Сы водзын вежаöн лоны. А верöс сайö петöм ань тöждысьö быдлунъя могъяс вöсна, медым верöсыслы шогмыны. ³⁵ Ме висьтала тайöс тiянлы бур вылö. Ме ог кöсйы тiянöс нинöмöн сьöктöдны. Кöсъя, медым тi олiнныд шогмана ногöн да некытчö ылавтöг сьöлöмсяньныд кесъялiнныд Господьлы. ³⁶ Шуам, мортыслöн эм гöтырпу. Сiйö оз гöтрась сы вылö, но асьсö кутны оз вермы, да лыддьö тайöс лёкторйöн, сiйö мед ас кöсйöм сертиыс вöчö, мед гöтрасьö, тайö абу мыж. ³⁷ Но мортыс кö зумыда кутö ассьыс кывсö – вермö кутны асьсö да шуис овны гöтрасьтöг, сiйö бура вöчö. ³⁸ Та вöсна, мортыс кö гöтрасьö – бура вöчö, а оз кö – нöшта на бурджыка. ³⁹ Индöд серти гöтыр кöртасьöма верöсыскöд, кытчöдз верöсыс ловъя. Кулö кö верöсыс, гöтыр вермö петны верöс сайö, код сайö кöсйö, сöмын верöсыс мед Господьлы эскис. ⁴⁰ Но бурджык лоö, оз кö пет верöс сайö. Чайта, Енлöн Лолыс эм и ме пытшкын, сiйöн тадзи шуа.

¹ Öнi кöсъя сёрнитыштны идоллы вайöм сёян йылысь. Дерт, ми быдöн тöдам та йылысь. Но тöдöмлуныс вайöдö ышнясьöмöдз, а муслуныс ёнмöдö. ² Мортыс кö чайтö, мый сiйö тöдö мыйкö, збыльвылас сiйö нинöм на оз тöд. ³ Но Енмыс кö муса мортыслы, Енмыс сiйöс тöдö. ⁴ Öнi висьтышта идоллы вайöм сёян йылысь. Ми тöдам, мый идолыс збыльвылас абу, эм сöмын öти Ен. ⁵ Дерт, енэжас да му вылас эмöсь сiдз шусяна "енъяс". Öд татшöм "енмыс" да "ыджыдалысьыс" зэв уна, ⁶ но миян эм сöмын öти Ен Бать. Сiйö сетö олöм быдöнлы, Сылы ми олам. Миян эм сöмын öти Господь – Исус Кристос. Сы пыр вöчöма ставсö, и Сы пыр сетöма миянлы олöм. ⁷ Но оз быдöн тöд та йылысь. Öткымынöн вöлiны ёна велалöмаöсь сёйны идоллы вайöм яй. Та вöсна öнi, яй сёйигöн, найö лыддьöны сiйöс идоллы вайöм сёянöн, и налöн сьöлöмыс мыждö найöс, öд найö жебöсь на. ⁸ Но сёяныс оз матыст миянöс Ен дiнö. Öд ми кö огö сёйöй – нинöм огö воштöй, а сёям кö – тайö нинöм оз содты миянлы. ⁹ Дерт, тi верманныд сёйны ставсö, но видзчысьöй, медым энö лоöй крукöдöн жеб эскысьяслы. ¹⁰ Öд жеб эскысь кö аддзас, мый тэ тöдöмöн сёян идоллы вайöм сёян, сэки сiйö тшöтш кутас сёйны татшöм сёянсö, весиг сылöн сьöлöмыс кö мыждö сiйöс. ¹¹ И тэнад тöдöмлун вöсна вошас тайö жеб эскысьыс, тэнад вокыд, код вöсна кулiс Кристос. ¹² Тадзи тi дойданныд жеб вокныдлысь сьöлöмсö да вöчанныд мыж сылы паныд. Сiдзкö, тi вöчанныд мыж Кристослы паныд. ¹³ Та вöсна менам сёянöй кö уськöдö вокöс, ме некор ог кут сёйны яй, медым менам вокöй эз усь.

¹ Ме öмöй абу апостол? Ме öмöй кöртасьöма мыйöнкö? Ме öмöй эг аддзыв Исус Кристосöс, миянлысь Господьöс? Тi – Господь пытшкынöсь. Тайö öмöй абу менам уджлöн вотöсыс? ² Гашкö, мукöдыслы ме абу апостол, но тiянлы апостол. Тi – Господь пытшкынöсь, и тайö висьталö, мый ме збыльысь апостол. ³ Менö мыждысьяс водзын ме тадзи дорйыся. ⁴ Гашкö, миянлы оз позь сёйны-юнысö? ⁵ Гашкö, миянлы оз позь босьтны аскöд эскысь гöтырöс? Öд тадзи вöчöны мукöд апостолыс: Господьлöн вокъяс да Кифа. ⁶ Гашкö, сöмын меным да Варнавалы колö уджавнысö, медым аслыным кынöмпöт перйыны? ⁷ Шыпурта морт öмöй ас тшöт весьтас олö? Виноград быдтысь öмöй оз виноград вотöссö сёй? Пемöс видзысь öмöй оз пемöслысь йöвсö ю? ⁸ Тадзи мöвпалöны оз сöмын йöзыс, тадзи висьталö тшöтш Индöдыс. ⁹ Мöисейлöн Индöдас гижöма: «Вартысь öшлысь вомсö эн тупкы». Енмыс öмöй öш вöсна тöждысьö? ¹⁰ Абу öмöй тайöс миянлы висьталöма? Öд миянлы гижöма: «Гöрысь да вартысь уджалöны лачаöн, медым босьтны ассьыныс пай». ¹¹ Ми кöдзам тiян сьöлöмö Ловсянь кöйдыс. Гашкö, тiянлы вывтi сьöкыд, вичмöданныд кö миянлы быдлунъя олöм вылö? ¹² Öд мукöдыслы кö тi вичмöданныд, сiдзкö, ми ёнджыка на вермам та вылö лача кутны. Но ми нинöм эгö корлöй тiянлысь. Мöдарö, ми нуам став сьöкыдсö, медым эгö вöлöй крукöдöн Кристослöн Бур Юöрлы. ¹³ Тi öд тöданныд, мый крамын кесъялысьяс пöткöдöны асьнысö крамö вайöмторйöн, а висьпуктанiнын кесъялысьяс босьтöны аслыныс пай висьпуктанiнö вайöмторйысь. ¹⁴ Евангелльö висьталысьяслы Господь тшöтш тадзи тшöктiс вöчны: пöткöдчыны Бур Юöр висьталöм помысь. ¹⁵ Но ме некор тадзи эг вöчлы. Ме гижа та йылысь ог аслым мыйкö босьтöм могысь, öд бурджык кувны тадзи вöчöм дорысь! Но тайöн ошйысьöмысь некод оз вермы дугöдны менö. ¹⁶ Ме кö висьтавла Бур Юöр, меным нинöмöн ошйысьнысö, öд тайöс меным Енмыс тшöктiс вöчны. Курыд шог меным, ог кö висьтавлы сiйöс! ¹⁷ Ме кö висьтавла Бур Юöрсö ас кöсйöм серти, сэки меным удждон лоö. Ог кö ас кöсйöм серти, сэки индöм удж вöча. ¹⁸ Сiдзкö, кутшöм менам удждонöй? Удждонöй менам – висьтавлыны Кристос йылысь Бур Юöрсö дон босьттöг. Дерт, ме верма Бур Юöр висьтавлöмысь дон босьтны, но ог кöсйы тадзи вöчны. ¹⁹ Ме некодлы абу кесйöг, но лои кесйöгöн быдöнлы, медым унджык йöзöс вайöдны Кристос дiнö. ²⁰ Юдейяскöд ме кутi ачымöс юдей моз, медым вайöдны найöс Кристос дiнö. Индöд серти олысьяскöд кутi ачымöс на моз, медым вайöдны найöс Кристос дiнö. ²¹ Индöдтöг олысьяскöд кутi ачымöс тшöтш на моз, медым вайöдны найöс Кристос дiнö. Дерт, ме абу Индöдтöг олысь, öд ме ола Кристослöн индöд серти. ²² Жеб эскысьяскöд кутi ачымöс тшöтш на моз, медым вайöдны найöс Кристос дiнö. Ме вöчи став позянасö, медым эськö кымынкö мортöс верми мездыны. ²³ Ставсö тайöс вöча Евангелльö вöсна, мед меным тшöтш вичмис сылöн бурсиöмыс. ²⁴ Тi öмöй онö тöдöй, мый панласигöн котöртöны унаöн, но тырдоныс вичмö сöмын öтилы. Сiдзкö, котöртöй, медым тайö тырдоныс вичмис тiянлы. ²⁵ Быд панласьысь ёна зiльö да кутö асьсö киас, медым котöртöм бöрас сылы вичмис юркытш. Но тайö юркытшыс сiсьмана. Ми кутам асьнымöс киын, медым миянлы вичмис сiсьмытöм юркытш. ²⁶ Та вöсна некытчö кежтöг котöрта помöдз да тышкася ог весьшöрö, менам быд вартöм веськалö коланаинö. ²⁷ Ме топöда ассьым вир-яйöс да тшöкта сiйöс кывзысьны, медым мукöдлы Бур Юöр висьтавлiгöн ачым вöлi шогманаöн.

¹ Вокъяс, кöсъя казьтыштны тiянлы, мый миян батьяс ставныс ветлiсны кымöр улын да вуджисны саридз вомöн. ² Найö ставныс пыртчисны кымöрын да саридзын да лоисны Мöисей бöрся мунысьясöн. ³ Найö ставныс пöткöдчисны öти сёянöн – Ловсянь сёянöн, ⁴ ставныс юисны öти ва – Ловсянь ва. Öд найö юисны Ловсянь сетöм изйысь, кодi ветлöдлiс накöд. Тайö изйыс вöлi Кристос. ⁵ Но унджыкыс на пиысь эз шогмыны Енмыслы да кулiсны овтöминын. ⁶ Ставыс тайö велöдö миянöс, медым миян сьöлöмын эз вöв кöсйöм – на моз вöчны лёксö. ⁷ Энö юрбитöй идолъяслы, кыдзи вöчисны кодсюрö миян батьяс пöвстысь. Гижöдыс висьталö: «Йöзыс сёйисны-юисны, сэсся кутiсны ворсны». ⁸ Энö кырсалöй, кыдзи вöчисны кодсюрö миян батьяс пöвстысь. Сэки öти лунö кулiс на пиысь кызь куим сюрс морт. ⁹ Энö дöзмöдöй Кристосöс, кыдзи дöзмöдiсны кодсюрö миян батьяс пöвстысь, сэсся найö кулiсны змейяс помысь. ¹⁰ Энö шуасьöй, кыдзи шуасисны кодсюрö миян батьяс пöвстысь. Сэсся Андел-Бырöдысь виис найöс. ¹¹ Ставыс тайö вöлi накöд, медым öлöдны йöзсö. Тайöс гижöма, медым велöдны миянöс, бöръя кадас олысьясöс. ¹² Сiдзкö, чайтан кö, мый зумыда сулалан – видзчысь усьöмысь. ¹³ Тiянöс кö суис сьöкыдлун, тайö быд морткöд вермö лоны. Но Енмыс эскана, Сiйö оз сет сьöкыдсö вынысь унджык нуны. Мöдарö, сьöкыдлун дырйи Сiйö индас тiянлы петан туй, да тi венанныд сьöкыдсö. ¹⁴ Сiдзкö, мусаяс, энö юрбитöй идолъяслы. ¹⁵ Ме сёрнита тiянкöд мывкыда йöзкöд моз. Öнi тi асьныд мöвпалöй, мый йылысь висьтала тiянлы. ¹⁶ Ми бурсиам чашасö да чегъялам няньсö. Оз-ö тайö чашаыс йит миянöс Кристос Виркöд? Оз-ö тайö няньыс йит миянöс Кристос Вир-яйкöд? ¹⁷ Няньыс öти. Ми тшöтш öти вир-яй, öд ми ставным тайö öти няньсö сёям, кöть ми унаöн. ¹⁸ Видзöдлöй Израиль войтыр вылö: найö сёйöны крамö вайöм вись. Тадзи вöчигöн оз-ö найö висьпуктанiнкöд öтувтчыны? ¹⁹ Сiдзкö, мый кöсъя шуны тайöн? Гашкö, идолыс либö идоллы вайöм висьыс мыйöнкö тöдчана? ²⁰ Абу! Кор ентöдтöмъяс вайöны вись, найö вайöны пеж ловъяслы, а оз Енлы. Но ме ог кöсйы, медым тi öтувтчинныд пеж ловъяскöд. ²¹ Тi онö вермöй öтпырйö юны Господьлöн чашаысь да пеж ловъяслöн чашаысь. Тi онö вермöй öтпырйö сёйны Господькöд да пеж ловъяскöд. ²² Гашкö, Господьöс кöсъям дöзмöдны? Ми öмöй вынаджыкöсь Сыысь? ²³ «Меным ставсö позьö», но абу ставыс бур вылö. «Меным ставсö позьö», но оз ставыс велöд бур вылö. ²⁴ Энö тöждысьöй сöмын ас вöснаныд, быдöн тöждысьöй вöчны бурсö мöд мортлы. ²⁵ Тi кö ньöбанныд вузасьысьлысь яй, сёйöй сiйöс повтöг. Нинöм энö юасьöй, медым тiян сьöлöмныд эз мыжды тiянöс. ²⁶ Öд муыс, и ставыс, мый эм сы вылын – Господьлöн. ²⁷ Эскытöмъяс пиысь кö кодкö корас тiянöс, да тi мунанныд сы ордö, сёйöй сэнi ставсö. Нинöм энö юасьöй сёяныс йылысь, медым тiян сьöлöмныд эз мыжды тiянöс. ²⁸ Но висьталасны кö тiянлы: «Тайö сёянсö вöлi вайöма идоллы вись пыдди», сэки энö сёйöй тайö сёянсö висьталысьыс вöсна, медым сылöн сьöлöмыс эз мыжды сiйöс. Öд муыс, и ставыс, мый эм сы вылын – Господьлöн. ²⁹ Ме сёрнита ог тiян, а мöд мортлöн сьöлöм мыждöм йылысь. Ме нинöмöн абу кöртасьöма, сiдзкö, мöд мортлöн сьöлöмыс оз вермы мыждыны менö. ³⁰ Ме кö аттьöала Енсö, сiдзкö, мыйла менö мыждынысö, öд ме аттьöала Енсö сёянысь? ³¹ Та вöсна сёянныд-ö, юанныд-ö али нöшта мыйкö вöчанныд – ставсö вöчöй Енмöс ошкöм могысь. ³² Энö лоöй крукöдöн некодлы: ни юдейяслы, ни грекъяслы, ни Енлöн Вичколы. ³³ Олöй ме моз, öд ме быдторйын зiля шогмыны быдöнлы. Ме ог тöждысь ас вöсна, а тöждыся мукöдыс вöсна, мед найö мездмисны.

¹ Видзöдöй ме вылö, öд ме видзöда Кристос вылö. ² Вокъяс, ошка тiянöс, öд тi нинöм абу вунöдöмныд менам висьтавлöмысь. Тi ставсö вöчанныд менам велöдöм серти. ³ Кöсъя, мед тi тöдiнныд, мый быд верöслы юрыс – Кристос, гöтырлы юрыс – верöс, а Кристослы юрыс – Ен. ⁴ Айлов кö кевмысьö либö пророкалö юрсö вевттьöмöн, сiйö ассьыс юрсö янöдö. ⁵ Ань кö кевмысьö либö пророкалö юрсö вевттьытöг, сiйö тшöтш ассьыс юрсö янöдö. Öд сiйö нинöмöн оз торъяв куш юра аньысь. ⁶ Та вöсна ань кö оз вевттьы ассьыс юрсö, мед шырсьö. А яндзим кö сылы лоны шырöмаöн либö куш юраöн, мед вевттьысьö. ⁷ Айловлы оз ков вевттьыны юрсö. Öд сiйö Енлöн пертасыс. Сiйö Енмыслы ошкöм вайö, а гöтыр – верöслы. ⁸ Эз айлов артмы аньсянь, но ань – айловсянь. ⁹ Абу айловöс вöчöма аньлы, но аньöс – айловлы. ¹⁰ Та вöсна аньлы колö вевттьыны юрсö. Тайö лоö пасöн, мый сы вылын эм ыджыдалан вын, медым тöдiсны та йылысь анделъяс. ¹¹ Но Господь пытшкын айлов оз вермы лоны аньтöг, и ань – айловтöг. ¹² Öд ань артмис айловсянь, айлов чужö аньсянь, но ставыс Енсянь. ¹³ Асьныд мöвпыштлöй, бур-ö тайö, ань кö кевмысьö Енмыслы юрсö вевттьытöг? ¹⁴ Оз öмöй олöмыс петкöдлы, мый айловöс кузь юрсиыс янöдö, ¹⁵ а аньöс – мичмöдö. Öд юрсисö аньлы сетöма вевттьöд пыдди. ¹⁶ Кöсйö кö кодкö вензьыны та йылысь, сылы тадзи шуа: ни миянын, ни Енлöн мукöд вичкоясын мöд нога велöдöмыс абу. ¹⁷ Таысь кындзи нöшта шуа тiянлы: меным нинöмысь тiянöс ошкынысö, öд тiян чукöртчöмныд бурыс дорысь унджык лёксö вайö. ¹⁸ Öти-кö, ме кывлi, мый вичкоö чукöртчигöн тiян костын овлöны вензьöмъяс. Ме мыйтакö эска татчö. ¹⁹ Дерт, тiян костын коланаöсь торъя мöвпалöмъясыс, медым тöдмавны, кодi тiян пиысь шогмана Енмыслы. ²⁰ Но кор тi чукöртчанныд öтвыв сёйны, тайöс оз позь шуны Господьлöн рытйöмöн. ²¹ Öд быдöн тiян пиысь тэрмасьö сёйны ассьыс сёянсö. Тадзи кодкö тшыгйöн кольö, а кодкö коддзöма нин. ²² Тi öмöй онö вермöй гортаныд сёйны-юнысö? Мыйла нö нинöм туйö пуктанныд Енлысь Вичкосö да увтыртанныд гöльясöс? Мый меным шуны тiянлы? Гашкö, ошкыны тiянöс? Ог кут! ²³ Ме висьтавлi нин тiянлы, мый Ачыс Господь меным висьталiс. Господь Исус, Сiйöс вузалан войö, босьтiс нянь, ²⁴ Енмöс аттьöалöмöн чегис няньсö да шуис: «Босьтöй, сёйöй, тайö Менам Яй, чегъялöма тiян вöсна. Вöчöй тайöс Менö казьтывлöм могысь». ²⁵ Сёйöм бöрас босьтiс тшöтш чаша да шуис: «Тайö чашаыс – Выль Йитöд, кöрталöма Менам Вирöн. Быдпöрйö, тайö чашасьыс юигöн, казьтывлöй Менö». ²⁶ Тадзи быдпöрйö, сёянныд-ö тайö няньсö, юанныд-ö тайö чашасьыс, тi висьтавланныд Господьлöн кулöм йылысь, кытчöдз оз лок Сiйö. ²⁷ Сiдзкö, кодi шогмытöма сёйö Господьлысь няньсö да юö Сылöн чашаысь, сiйö Господьлöн Яйлы да Вирлы паныд мыж вöчö. ²⁸ Та вöсна, быдöн мед асьсö тöдмалö, сэсся сёйö тайö няньсö да юö тайö чашасьыс. ²⁹ Öд мортыс кö сёйö да юö шогмытöма, Господьлöн Вир-яй йылысь мöвпавтöг, тайöс сiйö вöчö асьсö мыждöм вылö. ³⁰ Та вöсна унаöн тiян пöвстысь жебöсь, унаöн висьöны да унаöн нин кулiсны. ³¹ Ми кö водзвыв тöдмалам асьнымöс, сэки Господь оз кут мыждыны миянöс. ³² А мыждö кö, миянöс бур вылö велöдö, медым тайö муюгыдсаыскöд öтвыв эгö веськалöй мыждöм улö. ³³ Та вöсна вокъяс, кор тi чукöртчанныд сёйны, виччысьöй öта-мöднытö. ³⁴ А тшыг кö кодкö, мед гортас сёйö, сэки тiян чукöртчöмныд оз ло мыждöм вылö. Мукöдторсö висьтала тiянö локтöм бöрын.

¹ Вокъяс, кöсъя, мед тi тöдiнныд Ловсянь сетöмторъяс йылысь. ² Кор тi вöлiнныд ентöдтöмъясöн на, тiянöс ёна кыскис сёрниттöм идолъяс дiнö. Тi асьныд тöданныд та йылысь. ³ Та вöсна висьтала тiянлы: морт пытшкас кö эм Енлöн Лолыс, сiйö некор оз кут ёрны Исусöс. И мöдарö, некод оз вермы шуны Исусöс Господьöн, абу кö сы пытшкын Вежа Лов. ⁴ Сетöмторйыс унапöлöс, но Лолыс öти. ⁵ Кесъялöмыс унапöлöс, но Господь öти. ⁶ Вöчанногыс унапöлöс, но быдöн пытшкын ставсö вöчö öти Ен. ⁷ Сiйö сетö Ловлы быдöн пыр петкöдчыны ас ногыс, öта-мöдлы бур вылö. ⁸ Öтилы Лолыс сетö мывкыд кывъяс, мöдлы – тöдöмлун, мед юксьыны мукöдкöд, ⁹ кодлыкö Лолыс сетö эскöм, кодлыкö – сямлун бурдöдны. ¹⁰ Мукöдыслы Лолыс сетö вын вöчны шензьöданаторъяс, кодлыкö – пророкавны, кодлыкö – сямлун тöдмавны быдпöлöс ловсö. Мукöдыслы Лолыс сетö сямлун сёрнитны мукöд кывъяс вылын, а кодлыкö – гöгöрвоöдны тайö сёрнисö. ¹¹ Ставсö тайöс вöчö öти Лов. Ас кöсйöм сертиыс Сiйö быдöнлы торйöн юклö тайö сетöмторъяссö. ¹² Босьтны кö мортлысь вир-яйсö, сiйö артмöма уна юкöнысь, но öтвылысь найö артмöдöны öти вир-яй. Тайöс позьö шуны тшöтш Кристос йылысь. ¹³ Öд ми: юдейяс и грекъяс, кесйöгъяс и мездлуна йöз – ставным пыртчим öти Лов отсöгöн öти вир-яйö, ставным юим öти Ловсянь. ¹⁴ Мортлöн вир-яйыс артмöма уна юкöнысь, абу öтиысь. ¹⁵ Шуас кö кок: «Ме абу ки, сiдзкö, ме абу вир-яйлöн юкöн». Сiйö öмöй абу тайö вир-яйлöн юкöныс? ¹⁶ Шуас кö пель: «Ме абу син, сiдзкö, ме абу вир-яйлöн юкöн». Сiйö öмöй абу тайö вир-яйлöн юкöныс? ¹⁷ Вир-яйлöн кö эм сöмын син, сэки мыйöн кутас кывзыны? Вир-яйлöн кö эм сöмын пель, сэки мыйöн кутас исавны? ¹⁸ Но Енмыс Ас кöсйöм сертиыс быд юкöн пуктiс вир-яяс коланаинö. ¹⁹ Öд быд юкöн кö вöлi сöмын öтипöлöс, сэки эськö вир-яйыс эз артмы. ²⁰ Та вöсна юкöныс уна, а вир-яйыс öти. ²¹ Син оз вермы шуны килы: «Тэ меным ковтöм». Юр оз вермы шуны коклы: «Тэ меным ковтöм». ²² Мöдарö, вир-яйлöн жебджык юкöнъясыс ёнджыка на коланаöсь. ²³ Вир-яйлысь öткымын юкöнсö ми огö ёна донъялöй, но найöс бура вевттям. ²⁴ Ми зiлям бура вевттьыны миянöс янöдысь юкöнъяссö, а мичаджык юкöныслы вевттьöдыс абу колана. Но Енмыс вир-яйсö тадзи лöсьöдöма: Сiйö ёнджыка на донъялö сiйö юкöнсö, кодöс ми огö ёна донъялöй, ²⁵ медым вир-яй пытшкын эз вöвны вензьöмъяс. Сэки быд юкöн кутас öтмоза тöждысьны öта-мöд вöснаыс. ²⁶ Та вöсна, сьöкыдалö кö вир-яйлöн öти юкöн, сыкöд тшöтш сьöкыдалö мукöд юкöныс. Но ошкöны кö вир-яйлысь öти юкöн, сыкöд тшöтш нимкодясьö мукöд юкöныс. ²⁷ Öтвылысь тi лоанныд Кристослöн вир-яйöн, а торйöнсö – Сылöн юкöнъясöн. ²⁸ Вичкоын Енмыс медводз сувтöдiс апостолъясöс, сэсся пророкъясöс, сэсся велöдысьясöс. Мукöдыслы Енмыс сетiс вын вöчны шензьöданаторъяс, мукöдыслы – сямлун бурдöдны, кодлыкö – отсасьны йöзыслы, кодлыкö – веськöдлыны, а кодлыкö – сёрнитны мукöд кывъяс вылын. ²⁹ Гашкö, ми быдöн апостол? Гашкö, быдöн пророк либö велöдысь? Гашкö, быдöн вöчам шензьöданаторъяс? ³⁰ Гашкö, быдöн вермам бурдöдны? Гашкö, быдöн сёрнитам мукöд кывъяс вылын да вермам сiйöс гöгöрвоöдны? ³¹ Сiдзкö, зiльöй босьтны Ловсянь медбур сетöмторсö. Öнi ме петкöдла тiянлы медбур туйсö.

¹ Ме кö сёрнита морт кывйöн, весиг анделъяслöн кывйöн, а муслуныс кö ме пытшкын абу, сiдзкö, ме троньгысь ыргöн да брунгысь жыннян. ² Ме кö пророкала да тöда став гусяторсö, менам кö эм быдпöлöс тöдöмлун да зумыд эскöм, верма весиг керöсъяс вештавны, а муслуныс кö ме пытшкын абу, сiдзкö, ме нинöм. ³ Ме кö разöда став ассьым эмбурöс да сета ассьым вир-яйöс сотны, а муслуныс кö ме пытшкын абу, тайö меным нинöм оз сет. ⁴ Муслуныс дыр терпитö, мелi сьöлöма, оз вежав, оз ошйысь, оз вылö кыпöдчы, ⁵ оз вöч шогмытöма, аслыс нинöм оз курав, оз дöзмы, оз казьтыв лёксö, ⁶ оз нимкодясь лёкыслы, нимкодясьö збыльыслы. ⁷ Муслуныс ставсö вевттьö, быд кадö эскö да лача кутö, ставсö венö. ⁸ Муслуныс некор оз бырлы. Пророкъяс дугдасны висьтавлыны, йöзыс дугдасны сёрнитны мукöд кывъяс вылын, и тöдöмлуныс бырö, ⁹ öд миян тöдöмлуныс абу тырвыйö, пророкалöмыс тшöтш абу тырвыйö. ¹⁰ Но тырвыйöлуныс воас да, сэки ставыс, мый абу тырвыйö, бырас. ¹¹ Ичöт дырйи ме сёрнитi, вежöртi да мöвпалi кага моз. А верстямми да, коли ассьым кага оласногöс. ¹² Öнi ми аддзам Енсö ылöсас, чусмöм рöмпöштанысь моз, а бöрыннас воча синмöн аддзысям Енмыскöд. Öнi сöмын мыйтакö тöда Енмыс йылысь, а бöрыннас кута тырвыйö тöдны Сы йылысь, кыдзи Енмыс тырвыйö тöдö ме йылысь. ¹³ Öнi кольö куимтор: эскöм, лача да муслун. Но муслуныс на пиысь медыджыд.

¹ Зiльöй кутчысьны муслунас, тöждысьöй босьтны Ловсянь сетöмторъяссö, торйöн нин, медым верминныд пророкавны. ² Кодi сёрнитö мукöд кывъяс вылын, сiйö сёрнитö Енмыскöд, а оз йöзкöд. Сiйöс некод оз гöгöрво, öд сiйö висьтавлö гусяторсö Лов вынöн. ³ А пророкалысь висьтавлö йöзыслы. Сiйö ёнмöдö, ышöдö да бурöдö найöс. ⁴ Мукöд кывъяс вылын сёрнитысь ёнмöдö сöмын асьсö, а пророкалысь ёнмöдö вичкосö. ⁵ Ме кöсъя, медым тi быдöн сёрнитiнныд мукöд кывъяс вылын. Но вöлi эськö бурджык, тi кö пророкалiнныд. Öд пророкалысь ыджыдджык мукöд кывъяс вылын сёрнитысь дорысь. Но мукöд кывъяс вылын сёрнитысь кö вермö гöгöрвоöдны ассьыс висьталöмсö, и тайö ёнмöдö вичкосö, сэки сiйö оз ло ичöтджык пророкалысь дорысь. ⁶ Вокъяс, ме кö локта тiян дiнö да кута сёрнитны мукöд кывъяс вылын, но ог вай тiянлы Енсянь восьтöм да тöдöмлун, ог пророкав да велöд тiянöс, – тайö нинöм оз сет тiянлы. ⁷ Шуам, босьтны кö ворсанторъяс: пöлян либö арфа, да налöн ворсiгöн кö кылö öткодь шы, сэки вермам-ö тöдмавны, мыйöн ворсöны? ⁸ А труба кö сетö гöгöрвотöм шы, сэки кодi дасьтысяс тыш кежлö? ⁹ Тадзи артмö тшöтш тiянкöд: тi кö кутанныд сёрнитны гöгöрвотöм кывйöн, сэки кодi гöгöрвоас тiянöс? Тiян сёрниныд лоö весьшöрö. ¹⁰ Му вылас сёрнитöны унапöлöс кывйöн, но быд кыв позьö гöгöрвоны. ¹¹ А ме кö ог гöгöрво сёрнитысьлысь висьталöмсö, сэки ме сылы локтысь морт кодь, сiйö меным тшöтш. ¹² Тi ёна кöсъянныд босьтны Ловсянь сетöмторъяс, сiдзкö, тöждысьöй унджык босьтны сетöмторсö, медым найö ёнмöдiсны вичко. ¹³ Та вöсна мукöд кывъяс вылын сёрнитысьлы колö кевмысьны, медым сiйö вермис гöгöрвоöдны ассьыс висьталöмсö. ¹⁴ Öд ме кö кевмыся мукöд кывйöн, сэки кевмысьö сöмын лолöй, а вежöрöй нинöм оз гöгöрво. ¹⁵ Сiдзкö, мый меным вöчны? Кута кевмысьны лолöн, кута кевмысьны тшöтш вежöрöн. Кута сьывны лолöн, кута сьывны тшöтш вежöрöн. ¹⁶ Тэ кö кутан ошкыны Енсö сöмын ловнад, сэки орччöн сулалысь морт гöгöрвотöгыс вермас öмöй шуны "аминь" тэнад ошкöм вылö? Öд сiйö оз гöгöрво тэнсьыд висьталöмтö. ¹⁷ Гашкö, тэ бура ошкан, но мöд мортлы тайö нинöм оз сет. ¹⁸ Ошка Енмöс, ме быдöн дорысь на ёнджыка сёрнита мукöд кывъяс вылын. ¹⁹ Но мукöдсö туйдöдöм могысь бурджык лоö, шуа кö вичкоын вит гöгöрвоана кыв уна сюрс гöгöрвотöм кыв дорысь. ²⁰ Вокъяс, энö мöвпалöй челядь моз, мöвпалöй верстьö моз. Но лёксö вöчны лоöй кага кодьöсь. ²¹ Индöдас гижöма: – Кута сёрнитны тайö войтырыскöд мукöд кывъяс вылын, кута висьтавны налы локтысь йöз вомöн, но весиг сэки найö оз кывзыны Менö. Тадзи висьталö Господь. ²² Сiдзкö, мукöд кывъяс вылын сёрнитöмыс – тайö эскытöмъяслы пас, абу эскысьяслы. А пророкалöмыс – эскысьяслы пас, абу эскытöмъяслы. ²³ Тi кö ставныд öтвыв чукöртчанныд вичкоö, да быдöн кутас сёрнитны мукöд кывъяс вылын, и сэтчö пырасны тöдтöм йöз да эскытöмъяс, сэки найö шуасны, тi пö йöйталанныд. ²⁴ Но тi кö быдöн пророкаланныд, да пырас тiян дiнö эскытöм либö тöдтöм морт, сэки Енмыс быдöн пыр янöдас да мыждас сiйöс, ²⁵ сэки сылöн гуся мöвпъясыс воссясны. Тайö мортыс кымынь уськöдчöмöн копыртчылас Енлы да шуас: «Енмыс збыльысь тiянкöд!» ²⁶ Вокъяс, мый нöшта шуны тiянлы? Öтлаö чукöртчигöн быдöн тiян пиысь вермö вöчны мыйкö: кодкö сьылö, кодкö велöдö, кодлöнкö эм Енсянь восьтöм, кодкö сёрнитö мукöд кывъяс вылын, кодкö гöгöрвоöдö сiйöс. Но ставыс мед лоö вичко ёнмöдöм могысь. ²⁷ Эмöсь кö тiян пöвстын мукöд кывъяс вылын сёрнитысьяс, мед сёрнитöны кыкöн либö уна вылö куимöн. Найö мед сёрнитöны сьöрсьöн-бöрсьöн, а кодкö мед гöгöрвоöдö налысь сёрнисö. ²⁸ Абу кö гöгöрвоöдысьыс, сiдзкö, вичкоын мукöд кывъяс вылын мед оз сёрнитны, а сёрнитöны ас кежас да Енмыскöд. ²⁹ Пророкъяс пиысь мед тшöтш висьтавлöны кыкöн либö куимöн, а мукöдыс мед донъялöны налысь висьталöмсö. ³⁰ Пукалысьяс пöвстысь кö кодлыкö лоö Енсянь восьтöм, сэки воддза висьталысьыс мед дугдас сёрнитнысö. ³¹ Тi быдöн верманныд пророкавны сьöрсьöн-бöрсьöн, медым быдöнöс мыйöкö велöдны-ышöдны. ³² Пророкъяс вермöны веськöдлыны Ловсянь сетöм сёрнинас. ³³ Öд Енмыс абу торкалысь Ен, Сiйö – лöньлунсö сетысь Ен. Ен войтырлöн вичкоясын тадзи лöсьöдöма: ³⁴ вичкоö чукöртчигöн аньясныд мед чöла пукалöны, налы оз позь сёрнитны. Öд Индöдыс велöдö найöс кывзысьны. ³⁵ Найö кö кöсйöны тöдмавны мыйкö, та йылысь мед юалöны гортаныс асланыс верöслысь. Öд аньяслы абу лöсьыд вичкоын сёрнитны. ³⁶ Гашкö, чайтанныд, Енлöн Кывйыс тiянсянь петiс? Гашкö, сöмын тiянöдз воис? ³⁷ Кодi лыддьö асьсö пророкöн либö Лов серти олысьöн, сiйö мед тöдö, мый тайö велöдöмыс – Енлöн тшöктöм. ³⁸ Кодi оз кöсйы гöгöрвоны тайöс, мед оз гöгöрво. ³⁹ Вокъяс, тöждысьöй, медым тi верминныд пророкавны, но энö öлöдöй мукöд кывъяс вылын сёрнитöмысь. ⁴⁰ Öд ставсö колö вöчны бура да колана ногöн.

¹ Вокъяс, öнi казьтышта тiянлы Евангелльö йылысь, кодöс висьтавлi нин тiянлы. Тi сибöдiнныд сiйöс да зумыда кутчысянныд сэтчö. ² Тайö Евангелльöыс пыр тi мездманныд, кутанныд кö зумыда кутчысьны менам висьтавлöмö. Онö кö, тiян эскöмныд весьшöрö. ³ Ме висьтавлi тiянлы медколанаторсö, мый ачым босьтi сьöлöмö: Гижöдыс серти Кристос кулiс миян мыжъяс вöсна. ⁴ Сiйöс вöлi гуалöма, но коймöд луннас Енмыс ловзьöдiс Сiйöс. Тадзи висьталöма Гижöдас. ⁵ Сiйö петкöдчис Кифалы, сэсся дас кык велöдчысьыслы, ⁶ сэсся öтпырйö петкöдчис витсёысь унджык воклы. На пиысь унджыкыс ловъяöсь на, öткымынöн мöдар югыдас нин вуджисны. ⁷ Та бöрти Исус петкöдчис Яковлы, сэсся став апостолыслы. ⁸ Медбöрти петкöдчис меным, апостолъяс пиысь медiчöтыслы. ⁹ Öд на пöвстын ме медшогмытöмыс. Ме ог шогмы весиг шусьыны апостолöн, Енлысь Вичкосö вöтлi да. ¹⁰ Но Енлöн буралöмыс вöсна ме сэтшöм, кутшöм эм. Сылöн буралöмыс ме дiнö эз вöв весьшöрö, öд ме уджалi мукöд апостол дорысь ёнджыка на. Дерт, ме эг ачым уджав, а ме пытшкын олысь Енлöн буралöмыс уджалiс. ¹¹ Та вöсна оз ков торйöдны, кодi висьтавлö тiянлы юöрсö: ме либö найö, öд ми быдöн öти юöр висьтавлам. И тайö юöрас тi эскинныд. ¹² Ми висьтавлам ловзьöм Кристос йылысь. Сiдзкö, мыйла тiян пиысь öткымынöн шуöны, кулöмаяс пö оз ловзьыны? ¹³ Öд кулöмаяс кö оз ловзьыны, сiдзкö, Кристос тшöтш эз ловзьы. ¹⁴ Кристос кö эз ловзьы, сiдзкö, миян висьтавлöмыс весьшöрö, и тiян эскöмныд тшöтш весьшöрö. ¹⁵ Сiдзкö, ми лоам Ен йылысь ылöгсö висьталысьясöн, öд ми висьтавлам, мый Енмыс ловзьöдiс Кристосöс. Но тi кö шуанныд, кулöмаяс пö оз ловзьыны, сiдзкö, Енмыс эз ловзьöд Кристосöс. ¹⁶ Öд кулöмаяс кö оз ловзьыны, сiдзкö, Кристос тшöтш эз ловзьы. ¹⁷ Но Кристос кö эз ловзьы, сiдзкö, тi эсканныд весьшöрö, и тiян мыжъясныд пыр на тiян вылын. ¹⁸ Сiдзкö, Кристослы эскысьяс, кодъяс кулiсны нин, пыр кежлö вошисны. ¹⁹ Ми кö Кристос вылö лача кутам сöмын тайö мувывса олöмас, сiдзкö, ми став йöзсьыс на коньöрöсь. ²⁰ Но Кристос ловзис кулöмысь, Сiйö медводдзаöн ловзис кулöмаяс пöвстысь. ²¹ Кулöмыс мортсянь лоис, кулöмысь ловзьöмыс тшöтш мортсянь лоис. ²² Адамсянь лоис став йöзлы кулöмыс, Кристоссянь лоö став йöзлы ловзьöмыс. ²³ Но быдöн ас кадö ловзяс: медводз ловзис Кристос, сэсся Сылöн локтiгас ловзясны Кристослöн войтырыс. ²⁴ Кор Кристос бырöдас быдпöлöс ыджыдалысьясöс, веськöдлысьясöс да вынаясöс, сэки Ассьыс ыджыдалан вынсö сетас Ен Батьыслы. Та бöрти лоö пом. ²⁵ Öд Енмыс шуис ыджыдавны Кристослы сэтчöдз, кытчöдз Енмыс оз пукты Сы кок улö став паныд мунысьсö. ²⁶ Медбöръя паныд мунысьыс – кулöм, и сiйöс лоö бырöдöма. ²⁷ Öд «Енмыс ставсö пуктiс Сы кок улö». Кöть шуöма "ставсö пуктiс", но Ачыс Енмыс оз пыр тайö "став" лыдас. Öд Ачыс Сiйö ставсö пуктiс Кристос кок улö. ²⁸ Кор Енмыс ставсö сетас Кристос кипод улö, сэки Ачыс Пиыс сетас Ассьыс ыджыдалан вынсö Енмыслы, кодi ставсö пуктiс Сы кок улö. Тадзи Енмыс кутас ыджыдавны быдöн вылын да быдлаын. ²⁹ Мыйла йöзыс кулöмаяс пыдди пыртчöны? Öд кулöмаяс кö оз ловзьыны, сiдзкö, мыйла на пыдди пыртчынысö? ³⁰ Сiдзкö, мыйла быд кадö ми паныдасям кулöмыскöд? ³¹ Вокъяс, ме быд лун кулан выйын – тайö збыль, кыдзи збыль и сiйö, мый ме ошйыся тiянöн Исус Кристос Господьным водзын. ³² Ме кö мöвпалi тайö мувывса йöзыс моз, Ефес карын эськö эг кут тышкасьны зверъяскöд, öд тайö меным нинöм оз сет. Кулöмаяс кö оз ловзьыны, сiдзкö, «кутам сёйны-юны, öд аски кулам!» ³³ Видзчысьöй, мед некод оз ылöдлы тiянöс! «Öд лёк оласногаяс тшыкöдöны бур оласногаöс». ³⁴ Пальöдчöй да олöй бур ногöн, дугдöй вöчны мыжсö! Öд öткымынöн тiян пöвстысь оз тöдны Енсö, ме шуа тайöс тiянöс янöдöм могысь. ³⁵ Кодкö вермас юавны: кыдзи нö ловзяс кулöм мортыс? Кутшöм лоö сылöн вир-яйыс? ³⁶ Вежöртöмöй! Кöйдысыс кö оз кув, сэки нинöм оз ловзьы. ³⁷ Кöдзигад тэ он асьсö быдтассö кöдз, а сöмын кöйдыссö. Тайö вермас лоны шобдiлöн либö кутшöмкö мöд быдмöглöн кöйдыс. ³⁸ Сэсся Енмыс Ас кöсйöм сертиыс сетö тайö кöйдысыслы аслыспöлöс паськöм. Быдпöлöс кöйдыслы Сiйö сетö аслыспöлöс паськöм. ³⁹ Быд ловъя олысьлöн аслыспöлöс вир-яй. Шуам, мортлöн вир-яйыс торъялö пемöсысь, черилöн – лэбачысь. ⁴⁰ Эмöсь енэжвывсаторъяс, эмöсь и мувывсаторъяс, но налöн вир-яйыс торъялö öта-мöдсьыныс. Енэжвывсалöн дзирдлуныс öтипöлöс, а мувывсалöн – мöдпöлöс. ⁴¹ Шондi öти ногöн дзирдалö, тöлысь да кодзувъяс – мöд ногöн, но быд кодзув ас ногыс дзирдалö. ⁴² Тадзи артмö тшöтш кулöмаяслöн ловзигöн: гуавсьö сiсьмана вир-яй, ловзьö сiсьмытöм. ⁴³ Гуавсьö мисьтöм вир-яй, ловзьö дзирдалана, гуавсьö жеб вир-яй, ловзьö вына вир-яй. ⁴⁴ Гуавсьö мувывса вир-яй, ловзьö енэжвывса. Эм кö мувывса вир-яй, эм и енэжвывса. ⁴⁵ Гижöдыс висьталö: «Медводдза мортыс, Адам, лоис ловъя олысьöн», а мöд Адамыс лоис олöмсö сетысь Лолöн. ⁴⁶ Медводдза олысьыс вöлi мувывса, эз енэжвывса, сэсся енэжвывсаыс локтiс. ⁴⁷ Медводдза мортыс вöлi мувывса, сiйöс вöлi муысь вöчöма. Мöд мортыс – Господь, кодi локтiс енэжсянь. ⁴⁸ Сiдзкö, мувывса олысьяс öткодьöсь муысь вöчöмторйыскöд. А енэжвывса олысьяс öткодьöсь енэжсянь Локтысьыскöд. ⁴⁹ Öнi ми öткодьöсь муысь вöчöмторйыскöд, коркö лоам öткодьöсь енэжсянь Локтысьыскöд. ⁵⁰ Вокъяс, кöсъя висьтавны тiянлы, мый тайö мувывса вир-яйлы оз вичмы Енлöн Юраланiныс, öд тайö вир-яйыс сiсьмана. ⁵¹ Висьтала тiянлы гусятор: ми огö ставным кулöй, но ставным вежсям. ⁵² Тайö лоö зэв öдйö, син лапнитiгкостi, трубалöн бöръя букöстiгöн. Труба букöстас, и кулöмаяс ловзясны сiсьмытöмöн, а ми – вежсям. ⁵³ Öд тайö сiсьмана вир-яйлы колö вежсьыны сiсьмытöмö, да кулана вир-яйлы – кувлытöмö. ⁵⁴ Кор тайö сiсьмана вир-яйыс вежсяс сiсьмытöмö да кулана вир-яйыс – кувлытöмö, сэки инасны Гижöдысь кывъясыс: – Кулöмсö бырöдöма, вермöма пыр кежлö! ⁵⁵ Кулöм, кöнi тэнад чушканыд? Ад, кöнi тэнад вермöмыд? ⁵⁶ Кулöмыслöн чушканыс – мыж, а вынсö мыжыслы сетö Индöд. ⁵⁷ Ошкöм Енлы! Миян Господь Исус Кристос пыр Сiйö сетö миянлы вермöм! ⁵⁸ Муса вокъяс, сулалöй зумыда да вöрзьывтöг. Быд кадö кесъялöй Господьлы сьöлöмсяньныд. Тöдöй, мый тi кесъяланныд Господьлы онö весьшöрö.

¹ Öнi сёрнитышта вежа войтырлы сьöм чукöртöм йылысь. Та йылысь ме висьтавлi нин галатияса вичкоясын. Сiдзкö, вöчöй менам висьталöм серти: ² вежонса медводдза лунö быдöн торйöдöй сьöмнытö мыйта верманныд да видзöй сiйöс ас орданыд. Сэки менам локтiгкежлö тiян лоö чукöртöма нин. ³ Бöрйöй ас пöвстсьыныд некымын мортöс. Кор воа тiянö, сета налы эскöдан гижöд да мöдöда найöс Ерусалимö, медым нуны сэтчö чукöртöм сьöмнытö. ⁴ Ковмас кö аслым сэтчö муннысö, накöд тшöтш муна. ⁵ Македония кытшовтöм бöрын локта тiян дiнö, öд ме бöрсö кöсъя локны Македония пыр. ⁶ Гашкö, мыйтакö олышта тiян дiнын, гашкö, тöвъя весиг. Сэсся водзö менö мöдöданныд. ⁷ Ме ог кöсйы аддзöдчывны тiянкöд сöмын мунiгмоз. Ен кö сетас, кöсъя дырджык олыштны тiян дiнын. ⁸ Ефес карö ме кольчча Ветымынöд лунöдз. ⁹ Öд Енмыс меным паськыда восьтiс öдзöсъяс уджавны. Дерт, паныд мунысьыс уна жö. ¹⁰ Локтас кö тiян дiнö Тимофей, тöждысьöй сы вöсна, медым сылы нинöмысь эз ковмы майшасьны, öд сiйö ме моз кесъялö Господьлы. ¹¹ Энö увтыртöй сiйöс! Отсалöй сылы лöнь сьöлöмöн бöр локны ме дiнö. Танi мукöд вокъяскöд ме виччыся сiйöс. ¹² Ме ёна кори Аполос вокöс, медым вокъяскöд тшöтш мунiс тiян дiнö, но öнi оз на кöсйы. Вермыны кутас да, локтас. ¹³ Лоöй дасьöсь да зумыда эскöй! Лоöй вынаöсь да повтöмöсь! ¹⁴ Ставсö вöчöй мусапырысь! ¹⁵ Вокъяс, тi тöданныд, мый Степан да сылöн гортсаыс лоины Акайяын медводдза эскысьясöн. Найö сетiсны асьнысö кесъявны вежа войтырлы. Кора тiянöс: ¹⁶ кывзысьöй налысь, тшöтш накöд öтвыв уджалысьяслысь да кесъялысьяслысь. ¹⁷ Степан, Фортунат да Акаик воисны татчö. Меным зэв нимкодь таысь, öд найö öнi тiян пыдди. ¹⁸ Найö кыпöдiсны менсьым лолöс, тшöтш тiянлысь. Вылö пуктöй татшöм йöзсö! ¹⁹ Тiянлы ыстöны чолöм асияса вичкояс. Господь нимöн сьöлöмсяньныс чолöмалöны тiянöс Акил, Прискилла да на ордö чукöртчысьяс. ²⁰ Тiянлы ыстöны чолöм став вокъяс. Чолöмалöй öта-мöднытö вежа окыштöмöн! ²¹ Ме, Павел, аслам киöн гижа тiянлы чолöмöс. ²² Кодi оз радейт Господь Исус Кристосöс, сiйöс лоö ёрöма. Маран-афа. ²³ Миян Господь Исус Кристослöн буралöмыс тiянкöд. ²⁴ Менам муслунöй ставныдкöд, кодъяс Исус Кристос пытшкынöсь. Аминь.