KOLOS

Mɛkana mɛte yi Pol kɛtima kɛnjɛ ɓotu ɓe

Kolos

Yo Pol, mɔ tomun Yesus Krist kɛtɛ mɛkana mɛte yɔkɔ, yite a kɛ jɔɓɔ kɛ Rom. Yo yâkaŋgwɛ ɓɛ Epafras kusɛ njɔŋ ɓekritɛn ɓete ɓe Kolos.

Nyaŋgwɛ to lɛpi, yo nde, Krist kwa̧ mɛyasi hɛnɛ. Ɓaŋa ɓomɔ nja̧ teɗye yiŋa kɔtu mɛyasi nyɛ ɓekritɛn ɓe Kolos. Mɛyasi mɛte yeti kɛ yaka nɛ Kimɔ Tom te yi Yesus Krist na. Mɛyasi mɛte wúla kɛ mɛmboŋga mɛ misɔn te yi Ɓeyudɛn nɛ̀ yi Ɓegrɛk kɛ kasi kanna ɓejaki, kɛ kasi pɛsina yotu ɓembam nɛ̀ kɛ kasi ɓeŋgwa yiŋa mɛmboŋga mɛte yi wulɛ kɛ ɗyanɔ ɓomɔ. Pol kɛ kɛtɔ kɛnjɛ ɓo nde, Yesus Krist laŋsa mɛyasi hɛnɛ. Kɛ njoka Njambiyɛ ɓenɛ ɓomɔ kinɛ mbaŋa mumɔ ho mbaŋa sisiŋ na, ndi Yesus Krist nyɛpɔ.

Wusɛ yakama ɓakɛ mɛkana maka kɛ mɛŋgaɓiyɛ yitati:

1. Yesus Krist kwa̧ mɛyasi hɛnɛ (kumte 1).

2. Ɓekritɛn ɓe Kolos ɗîy nɛ sɔsɔ nɛ kɔtu teɗya mɛyasi (kumte 2).

3. Joŋgwɛ kritɛn komɛ nyɛ ɗiyɛ saŋgwate ɓenɛ Krist kɛ́ (kumte 3-4).

¹Yo mi Pol, mi yi Njambiyɛ tɔkuma nda yi nyɛ kwaɗya nde, mi ɓɛ̂ki mɔ tomun Krist Yesus kɔ, yo mi sinɛ maŋ wusu Timɔte ²kɛtɛ mɛkana maka kɛnjɛ wunɛ ɓotu ɓete ɓe Njambiyɛ tɔkuma nde, wunɛ ɓɛ̂ki ɓenɛ, wunɛ ɓe ɗiyɛ kɛ Kolos ɓaka. Wusɛ kɛ́ti kɛnjɛ wunɛ ɓenjɔŋ ɓusu ɓe tikɛ temɔ kɛ yi *Krist nɛ temɔ yun hɛnɛ mate ɓaka. Njambiyɛ Saŋgwɛ wusu kêl ŋgikwa nɛ wunɛ, nyɛ sendi wunɛ tɛte.

³Wusɛ kɛ nyɛ Njambiyɛ te Saŋgwɛ nɛ̀ Nyaŋgwɛ Kumande wusu Yesus Krist wosoko, ŋgwɛta mɛŋgimɔ hɛnɛ kɛto yun, ⁴kɛto wusɛ wokuma kasi tikina temɔ te yi wunɛ tikɛ kɛ yi Krist Yesus nɛ̀ mɛkwaɗya mɛte yi wunɛ nɔ suŋgwɛ nɛ ɓotu ɓe Njambiyɛ hɛnɛ kɛ́. ⁵Wunɛ kél ɗete, kɛto wunɛ nɛ ɓiɓina temɔ kɛ mɛyasi mɛte yi Njambiyɛ siyma kombile tikɛ wunɛ kɛ ɗyoɓɔ kɛ́. Wunɛ dúkwɛ mɛyasi mɛte kandɛ kɛ ŋgimɔ te yi wunɛ wokuma nɛ Kimɔ Tom te yi lɛpɛ gbakasi kɛ́. ⁶Kimɔ Tom te kumma pɛ yun. Yo ka̧ kɛndɔ mbɔmbu nyanja yaka nɛ mɛnɛti maka hɛnɛ, punjɛ kimɔ mɛkele kɛ joŋgwɛ ɓomɔ. Yo kɛ kelna sendi ɗete kɛ yun kandɛ kɛ yesɔ te yi wunɛ wokuma duwɛ gbate nde, Njambiyɛ nɛ ŋgikwa kɛ́. ⁷Wunɛ wóku Kimɔ Tom te kɛ numbu mɔ njɔŋ wusu Epafras, sɔŋ temɔ su. Yo sinɛ ɓo kelɛ mɛsay. Temɔ su kɛ yotu nɛ. A kelma mɛsay kɛ njoka yun kɛ numbu su, nyɛ temɔ nɛ hɛnɛ kɛ mɛsay mɛ *Krist. ⁸Ɛ nyɛ nje yekiɗye nyɛ wusɛ nda yi Kimɔ Sisiŋ nya wunɛ temɔ mɛkwaɗya kɛ́.

Pol kɛ ŋgwɛta kɛto ɓekritɛn ɓe Kolos.

Krist namɛ mɛyasi hɛnɛ

⁹Ɗete, kandɛ yesɔ te yi wusɛ ma wóku nɛ mɛyasi mɛte yi ɓo lɛpɛ kɛ kasi yun, wusɛ kɛ ŋgwɛta nɛ Njambiyɛ mɛŋgimɔ hɛnɛ kɛto yun, diyɛ nyɛ nde, wunɛ ɓɛ̂ki tondunate nɛ duwa̧ yasi te yi nyɛ kwaɗyɛ kɛ́ nɛ nje nyɛna yun ɗyanɔ hɛnɛ, ɓu̧ duwa̧ yasi te yi Kimɔ Sisiŋ nyɛ mumɔ kɛ́. ¹⁰A nyɛ̂ki wunɛ yo, nɛ́ wunɛ joŋna nda yi ɓotu ɓete ɓe ɓeŋgwɛ Nyaŋgwɛ Kumande yâkaŋgwɛ joŋna kelɔ mɛyasi hɛnɛ nda yi nyɛ gɔrɛ. Ɗete, wunɛ ta kelɔ kimɔ mɛkele kɛ mɛyasi hɛnɛ te yi wunɛ kelɛ. Sendi, duwa̧ Njambiyɛ te yi wunɛ duwɛ kɛ́ ta ɗɔkɔ ɗɔkɔ kɛ̀ nɔ mbɔmbu. ¹¹Wusɛ kɛ ŋgwɛta sendi nɛ Njambiyɛ nde, wunɛ ɓɛ̂ki jelnate nɛ ŋgbiŋgim nɛ nje ŋguŋguɗyɛ te yi teɗye mɛluksa mɛnɛ kɛ́, nɛ́ wunɛ disima mɛyasi hɛnɛ kɛ̀ nɔ mbɔmbu. ¹²Wunɛ nyɛ̂ki saŋgwɛ Njambiyɛ wosoko nɛ mɛsosa, kɛto a nya wunɛ ɗeti te yi ɓɛ nɛ ŋgaɓiyɛ kɛ kimɔ mɛyasi mɛte yi nyɛ sima kombile tikɛ ɓotu ɓenɛ kɛ mbɛy te yi mɛjasi panɛ kɛ́. ¹³A joŋgwa wusɛ soŋɛ kɛ mɛɓɔ mɛ ɗetina mɛyasi mɛte yi kelɛ mɛsay nɛ nje te yi yitil kpalɔ kɛnjɛ wusɛ kɛ *Kandɔ te yi Mɔnɔ wenɛ, sɔŋ temɔ nɛ. ¹⁴Yo Mɔnɔ wenɛ te kolɛ wusɛ tikɔ wusɛ nɛ ŋgwɛtɛ kɛ mɛɓeyɔ musu.

¹⁵Njambiyɛ te yi mumɔ yeti nɛ ɗeti te yi ɓɛŋɛ kɔ, tɛri nɛ kɛ ɓɛŋna kɛ yotu Mɔnɔ wenɛ. Nyɛ tomba mɔy kɛ mɛyasi hɛnɛ te yi Njambiyɛ kusuma, ¹⁶kɛto Njambiyɛ kwaŋma nɛ nyɛ yí kusɔ nɛ mɛyasi hɛnɛ, kandɛ kɛ mɛyasi mɛte yi ɗiyɛ kɛ kwey kumɔ kɛ yikɛ yi ɗiyɛ kɛ mɛnɛti, yikɛ yi mumɔ ɓɛŋɛ nɛ̀ yikɛ yi nyɛ ti ɓɛ́ŋa kɛ́. Njambiyɛ kwaŋma nɛ nyɛ yí kusɔ nɛ mɛyasi mɛte yi nɛ nyaŋgwɛ ɗeti yi ɗiyɛ kɛ kwey, ko ɓejaki ko ɓekum ɓejaki ko nyaŋgwɛ ɓekum ɓan. Kɛ mɛyasi mɛnɔri hɛnɛ Njambiyɛ kwaŋma nɛ Mɔnɔ yí kusɔ nɛ yo, na ɗiy nɛ mɛyasi mɛte. ¹⁷A ɓa̧ gba kɛte piŋɔ te yi mɛyasi hɛnɛ te yi ɗiyɛ kɛ to mbokɔ tì pa kusuna na. Yo gba nyɛ kelɛ nde, yasi hɛnɛ ɗîy ndi kɛ mbɛy te wenɛ. ¹⁸Kɛ njɔŋ ɓotu ɓete ɓe tikɛ temɔ kɛ yenɛ, yo nyɛ ɓɛ to te nda yi to ɗiyɛ nɛ yotu kɛ́. Yo nyɛ ɓutɛ nje jɔnja joŋgwɛ te yi Njambiyɛ nyɛ mumɔ kɛ́. Yo nyɛ bosa mɔ te ɛ womiya kɛ njoka ɓemuŋ, na nam mɛyasi hɛnɛ nda tomba mɔy. ¹⁹Yo nde, Njambiyɛ ɓɛŋma kimɔte yí ɗiyɔ kɛ nyɛ nɛ ɗeti nɛ̀ mɛluksa mɛnɛ hɛnɛ. ²⁰A ɓɛŋma sendi kimɔte yí kwa̧ nɛ nyɛ yí kelɔ nde, mɛyasi hɛnɛ yɔ̂kwɛ nje kɛ yenɛ, Njambiyɛ. Yo nde, a nya tɛte kɛ mbokɔ nɛ nje mɛkiyɔ mɛ Mɔnɔ wenɛ yi punduma kɛ kroa kɛ́. Ɗete, a kelma nde, mɛyasi hɛnɛ yɔ̂kwɛ nɛ tɛ nje kɛ yenɛ, ko yikɛ yi ɗiyɛ kɛ mɛnɛti ko yikɛ yi ɗiyɛ kɛ kwey.

²¹Kɛ ɓɛ wunɛ, wunɛ tì ɓɛ yun saŋgwate nɛ mbɔmbu wúnɛ ɓe Njambiyɛ na. Wunɛ ɓa̧ ɓependɔ ɓenɛ, kɛto ɓeya mɛtakɛ mɛte yi wunɛ ɓa̧ nɔ nɛ̀ ɓeya mɛkele mɛte yi wunɛ ɗikima kelɔ kɛ́. ²²Ma ndana, Njambiyɛ ma jaŋgwɛ njoka nɛ wúnɛ ɓo nɛ nje sɔŋ te yi Mɔnɔ wenɛ gwa̧ kɛ pay te yi mɛmbundɔ kɛ́. A kelma ɗete, nɛ́ wunɛ tɛm lalɛ kɛ mbɔmbu wenɛ nɛ mɛtemɔ pupunate kinɛ mɛndeya na kinɛ mɔnɔ yaŋa te yi ɓo yakama lɛpɔ ɓeyate nɛ wunɛ kɛte na. ²³A ta kelɔ nde, wunɛ tɛ̂ma ɗete kɛ mbɔmbu wenɛ, ŋgɛ wunɛ kɛ̀ ndi mbɔmbu tikɔ temɔ kɛ yi Kumande Yesus, ɗiyɔ jelnate nɛ ŋgbiŋgim, ɓɛ nɛ ɓiɓina temɔ kɛ̀ nɔ mbɔmbu kɛ mɛyasi mɛte yi Kimɔ Tom lɛpɛ nyɛ wunɛ kɛ́. Kimɔ Tom te, ɓo pelma yo nyɛ mumɔ hɛnɛ kɛ to mɛnɛti. Kɛ ɓɛ mi Pol, Njambiyɛ tɔkuma mbɛ mi nde, mi ɓɛ̂ki sendi mɔ lɛpina Kimɔ Tom te.

Ɗyambi te yi Pol lu̧ kɛ́

²⁴Mi ndana nɛ mɛsosa kɛ mɛbɔnɛ mɛte yi mi saŋgwa nɔ kɛto yun kɛ́. Kɛto nɛ nje te yite kɛ yotu mbɛ mi kɛ tonjɛ ɓukwɛ mɛbɔnɛ mɛ *Krist kɛto yotu nɛ. Yotu Krist te, yo njɔŋ ɓotu ɓete ɓe tikɛ temɔ kɛ yenɛ. Mi sáŋgwaŋgwɛ sendi nɛ mɛbɔnɛ ɗete yí tonjɛ nɛ mɛsay mɛnɛ. ²⁵Njambiyɛ tɔkuma mi nde, mi ɓɛ̂ki mɔ mɛsay wenɛ kɛ njoka njɔŋ ɓotu ɓete. A nya mi mɛsay mɛte kɛto yun yí lɛpɔ nɛ mɛlɛpi mɛnɛ hɛnɛ nyɛ ɓomɔ. ²⁶Yo nde, njombu yaŋa kandɛ nɛ ɓetomba ɓe mbɔmbu mɛlɛpi mɛnɛ ɓa̧ sɔɗyate nɛ gbɔl nɛ ɓomɔ. Ma ndana a punja yo nyɛ ɓomɔ ɓenɛ. ²⁷Njambiyɛ kwaɗya teɗye nyɛ ɓomɔ ɓenɛ nde, yasi te yi nyɛ si kombile kɛ́ gba kimɔte ɓuɗyate kɛ yi mɛkandɔ mɛ ɓotu ɓete ɓe yeti kɛ duwɛ nyɛ ɓaka. Yasi te yi ma ɓɛ́ki sɔɗyate nɛ mbɔmbu kɛ́, yo nde, Krist kɛ yotu yun. Yo téɗya nde, wunɛ nɛ ɓiɓina temɔ nde, wúnɛ ɓe Krist ta ɗiyɔ kɛ mbɛy mɛluksa mɛnɛ. ²⁸Yo Krist te yi wusɛ lɛpɛ kasi nɛ kitɛ mumɔ hɛnɛ teɗye ɓo mɛyasi nɛ ɗyanɔ. Wusɛ kél ɗete, nɛ́ mumɔ hɛnɛ ɓɛ nda goto mumɔ kɛ ɗiyɔ te yi nyɛ ɗiyɛ saŋgwate ɓenɛ Krist kɛ́, nɛ́ wusɛ nje kaŋɛ nyɛ nyɛ Njambiyɛ. ²⁹Yo kɛto te yite yi mi kelɛ mɛsay lu̧ ɗyambi nɛ sosu mbɛ hɛnɛ, nɛ́ mi kɛ̀ kɛndɔ mbɔmbu nɛ ɗeti te yi Krist yi kelɛ mɛsay nɛ ŋguŋguɗyɛ kɛ yotu mbɛ kɛ́.

¹Yasi te yi mi kwaɗyɛ kɛ́, yo nde, wunɛ ɗûkwɛ gbate nde, mi kɛ lu̧ nyaŋgwɛ ɗyambi kɛto yun, kɛto ɓotu ɓete ɓe tikɛ temɔ kɛ yi Kumande Yesus kɛ Lawodise nɛ̀ ɓaka hɛnɛ ɓe tì pa ɓɛŋɛ mbɔmbu mbɛ wɛtɛ yesɔ ɓaka. ²Mi lóŋ ɗyambi ɗete yí sa̧ nde, mɛtemɔ mun ɓôŋ ɗeti, nɛ́ wunɛ kwaɗya, ɓɛ saŋgwate, ɓɛ sendi tondunate nɛ duwa̧ yasi yí duwɛ nɛ yasi te yi Njambiyɛ ma sɔ́ɗyukwɛ nɛ mbɔmbu kɛ́. Yasi te, yo *Krist. ³Kpasa ɗyanɔ nɛ̀ kpasa duwa̧ yasi hɛnɛ te yi wulɛ kɛ yi Njambiyɛ kɛ́, yo kɛ mɛɓɔ mɛ Krist.

⁴Yikɛ yi mi lɛpɛ nyɛ wunɛ kɛ́, mi lɛ́pi, ma wɛtɛ mumɔ mɛ nje seɓile wunɛ nɛ yiŋa sɔnna mɛlɛpi mɛ ja̧. ⁵Wunɛ dûkwɛ nde: Ko nde, mi lɔndunate nɛ wunɛ, ma kɛ ɗyanɔ ɗyembɛ sinɛ wunɛ saŋgwate. Mi nɛ mɛsosa, kɛto mi duwa̧ nde, wunɛ kɛ joŋna nɛ ŋgbeŋ tikɔ temɔ nɛ ŋgbik kɛ yi *Krist.

Kasi ɗiyɔ saŋgwate nɛ Krist

⁶Ɗete, nda yi wunɛ ma jayɛ nde, Krist Yesus nyɛ Nyaŋgwɛ Kumande wun, wunɛ kɛ̂n mbɔmbu ɓeŋgwɛ nyɛ. ⁷Wunɛ lôku mɛgata sumɔ joŋgwɛ ɗyun kɛ yenɛ, tikɔ sendi temɔ nɛ ŋgbik kɛ yenɛ nda yi ɓo teɗya wunɛ kɛ́. Wunɛ nyɛ̂ki Njambiyɛ wosoko nɛ temɔ yun hɛnɛ.

⁸Wunɛ ɗîy nɛ sɔsɔ, ma mumɔ mɛ nje lɛpɔ lɛpi ja̧ te yi wulɛ kɛ ɗyanɔ ɗyenɛ kɛ́ seɓile nɛ wunɛ. Lɛpi nɛ̀ ɗyanɔ te yite ti wúla kɛ yi *Krist na. Yo wúla kɛ mɛkele mɛ ɓomɔ nɛ ŋguru wan, wulɛ sendi kɛ mɛyasi mɛte yi ɓotu ɓe mɛnɛti maka teɗye kɛ́. ⁹Wusɛ lɛ́pi nde, wunɛ kêl ɗete, kɛto yo ndi kɛ yotu Krist yi mɛyasi hɛnɛ te yi ɓɛŋna kɛ yi Njambiyɛ ɓɛŋna sendi kɛ yenɛ kɛ mɛyasi hɛnɛ. ¹⁰Ɗete, Njambiyɛ ma tonjɛ wunɛ nɛ mɛyasi hɛnɛ, kɛto wúnɛ ɓe Krist mɛ saŋgwate. Yo nyɛ Krist namɛ ɓekum ɓejaki hɛnɛ nɛ̀ nyaŋgwɛ ɓekum ɓan. ¹¹Wúnɛ ɓe Yesus mɛ saŋgwate. Ɗete, Njambiyɛ kwɛtima yiŋa yɔ kɛ yotu yun nda yi Ɓeyudɛn pɛsɛ nɛ yotu ɓembam kɛ́. Ma kɛ yun, yeti ɓomɔ kwɛtɛ wunɛ yɔ te na, yasi wɛtɛ, yo Krist. To yɔ te nde: Krist ma soŋɛ ɓeya joŋgwɛ mɛwoɓɔ te yi wusɛ ɓa̧ nɔ mbɔmbu kɛ́. ¹²Yo nde, tɔpuna te yi ɓo tɔpuma nɛ wunɛ kɛ mɔrɔku kɛ́ kɛ teɗye nde, ɓo pumbuma wunɛ wúnɛ ɓe Krist, ɛ wúnɛ ɓe Krist nje womiyɛ sendi. Wúnɛ ɓe Krist wómkwɛ yite nɛ nje tikina temɔ te yi wunɛ tikɛ kɛ yi Njambiyɛ nde, a womiya nyɛ soŋɛ kɛ njoka ɓemuŋ nɛ ŋguŋguɗyɛ nɛ kɛ́. ¹³Wunɛ ɓa̧ mbɔmbu muŋte kɛ misi mɛ Njambiyɛ kɛto mɛjɔsɔ mun. Sendi, wunɛ tì pɛsina nda yi ɓa̧ nde, ɓembam yâkaŋgwɛ kelɔ kɛ́ na. Ma ndana, Njambiyɛ ma nyɛ wunɛ jɔnja joŋgwɛ wúnɛ ɓe Krist tikɔ wusɛ nɛ ŋgwɛtɛ kɛ mɛjɔsɔ musu hɛnɛ. ¹⁴Njambiyɛ ɓoŋma mɛkana mɛte yi teɗye ɓeya mɛkele musu yi ɗiyma kɛ to su nda pilo kɛ́ si nyukute. A soŋma yo kɛ to su ɓu̧ ŋgba kɛ kroa. ¹⁵Komɛte, a soŋma ɗeti te yi mɛsisiŋ nɛ̀ yi ɓekum ɓan ɓa̧ nɔ kɛ́, wuŋgwɛ ɓo kɛ misi mɛ ɓomɔ, kpatile ɓo, ŋganɛ kwa̧ nɔ kɛ njoka ɓotu ɓete ɓe ŋganɛ ɗyambi ɓaka, kɛto Mɔnɔ wenɛ laŋsama ɓo kɛ kroa.

¹⁶Ɗete, ko mumɔ wɛtɛ nɛ wɛtɛ tî lɛpinaŋgwɛ nɛ wunɛ kɛ kasi yasi te yi wunɛ ɗye nɛ̀ yi wunɛ hɔɓiye kɛ́ na. Sendi, mumɔ tî njaŋgwɛ wunɛ, kɛto wunɛ yeti kɛ ɓeŋgwɛ yiŋa mɛtu mɛ jesɔ nda jesɔ te yi ɓo kelɛ kɛ jɔnja ŋgwɛndɛ, ho wɛɗya kɛ mɛyesɔ nda yesɔ *Saba na. ¹⁷Mɛyasi mɛnɔri hɛnɛ ɓa̧ kɛ teɗye gbɛla yekambiyɛ yiŋa yasi te yi ta nje kɛ́. Ma ŋgbak ŋgbak yasi te, yo *Krist nɛ ŋguru wenɛ. ¹⁸Wunɛ tî jaya nde, wɛtɛ mumɔ kwâŋ nɛ nje yiŋa yasi te yi nyɛ nɛ ŋguru wenɛ ɓɛŋɛ kimɔte nda piɗya yotu nɛ̀ kanna ɓejaki yí kɔpiɗye nɛ wunɛ yasi te yi ɓa̧ nde, wunɛ ɓɛ̂ki nɔ kɛ siyna mɛsay mun kɛ́ na. Njɛl ɓomɔ nda ɓɛte ɗíy ndi lɛpina mɛyasi mɛte yi ɓo ɓɛŋɛ yi pundɛ kɛ to yan nda nyɛnɔ kɛ́. Ɓo kɛ́ ɓendiɗye yotu nɛ gbɛlate kɛ mɛyasi mɛte yi wulɛ kɛ ɗyanɔ ɗyan kɛ́. ¹⁹Ɓotu ɓete yeti saŋgwate ɓenɛ ɓe Krist te ɛ ɗiyɛ to kɔ na. Krist ɗiyɛ nɛ njɔŋ ɓotu ɓete ɓe tikɛ temɔ kɛ yenɛ ɓaka nda yi to ɗiyɛ nɛ ndiŋgɛlɛ yotu kɛ́. Yo nyɛ Krist kelɛ nde, ndiŋgɛlɛ njɔŋ ɓotu ɓete ɓe tikɛ temɔ kɛ yenɛ ɓaka ɓɛ̂ki saŋgwate nda yi mɛsisɔ ɓɛ saŋgwate nɛ mɛdoku mɛ yotu hɛnɛ kɛ́. Yo nyɛ Krist kelɛ nde, ndiŋgɛlɛ njɔŋ ɓotu ɓete ɓôŋ ɗeti ɗɔkɔ ɗɔkɔ kɛ̀ nɔ mbɔmbu ɓeŋgwɛ kwaɗya te yi Njambiyɛ.

Kasi njombu joŋgwɛ

nɛ̀ jɔnja joŋgwɛ

²⁰Ma wúnɛ ɓe Krist gwa̧ gbate yí ɗuwɛ kɛ sɛkɛ sɛkɛ mɛyasi mɛte yi ɓotu ɓe mɛnɛti maka teɗye kɛ́. Ɗete, kɛto ŋge yi wunɛ nje joŋna sendi nda wunɛ wókunaŋgwɛ nɛ ɓotu ɓe mɛnɛti maka kɛ́? Kɛto ŋge yi wunɛ nje jayɛ nde, ɓo ɓêndi to yun lɛpɔ nyɛ wunɛ nde: ²¹‹Wɛ tî ɓoŋ yikɛ!› ‹Wɛ tî ɓoɓa yiri!› ‹Wɛ tî kpoka yikɛ!› kɛ́? Wunɛ jáya yite kɛto ŋge? ²²Mɛtumbu nɛ̀ teɗya mɛyasi mɛte yite wúla ndi kɛ yi ɓomɔ. Mɛyasi mɛte yi ɓo lɛpɛ nɔ kɛ́, yo mɛyasi mɛte yi ta ɓeyɔ yambile, ŋgɛ mumɔ si ɗye ho ɓiyna nɔ. ²³Gbate, mɛmboŋga mɛte kɛ ɓɛŋna kɛ misi nda kpasa yasi, kɛto yo lɛ́pi nde, mumɔ kân Njambiyɛ nda yi nyɛ kwaɗyɛ, a pîɗyikwɛ yotu, a têɗya yotu nɛ mɛbɔnɛ. Ko ɓɛkɔ ɗete, kelna mɛyasi mɛte yinɔri tí kamɛ mɔnɔ yaŋa nɛ mbɛt na, yo tónjukwɛ ndi gbɛla mɛwoɓɔ mɛte yi mɛmbundɔ.

¹Nda wúnɛ ɓe *Krist womiya kɛ́, wunɛ sâŋ mɛyasi mɛte yi kwey kɛ mbɛy komɛ Krist ɗiyɛ mɛtiɗyɛ kɛ mbam ɓɔ Njambiyɛ kɛ́. ²Wunɛ nyɛ̂ki temɔ yun kɛ mɛyasi mɛ kwey, yeti kɛ mɛyasi mɛ mɛnɛti maka na. ³Kɛto wunɛ sima gwe, ma Njambiyɛ sɔɗya joŋgwɛ ɗyun wúnɛ ɓe Krist kɛ mɛɓɔ mɛnɛ. ⁴Komɛ Krist te joŋgwɛ wun ta punjɛ yotu kɛ́, wunɛ ta punjɛ sendi yotu wúnɛ ɓe Krist kɛ mɔy mɛluksa.

⁵Ɗete, wunɛ sôŋa yotu kɛ ɓeya mɛkele mɛ mɛnɛti maka ɓɛŋɛ yo nda muŋ mɛyasi. Mɛyasi mɛte, yo kelna mɛwanja, yo kelna mɛkele mɛ mɛmi nɛ̀ ŋgɔrɔ nɛ̀ ɓeya mɛwoɓɔ nɛ̀ nyɛna temɔ kɛ mɛyasi. Wunɛ dûkwɛ nde, nyɛna temɔ kɛ mɛyasi, yo nda kanna yiŋa mɛyasi tikɔ Njambiyɛ. ⁶Yo kɛto kelna kwalɔ mɛkele mɛte yinɔri yi Njambiyɛ punjɛ ŋgambi nɛ suŋgwɛ nɛ ɓotu ɓete ɓe kelɛ ɗa mɛtɔ nɛ nyɛ ɓaka. ⁷Wunɛ ɗikima kelɔ mbɔmbu sendi ɗete kɛ ŋgimɔ te yi wunɛ ɗikima joŋna nɛ pitik kɛ mɔy ɓeya mɛkele mɛte kɛ́. ⁸Ma ndana, wunɛ tîki mɛyasi mɛte hɛnɛ: Ŋgambi, joŋjoŋ temɔ, ɓeya yasi, tikɔ sendi mɛndoy. Lɛpi janji tî pundu kɛ numbu yun na. ⁹Mumɔ tî kel ja̧ nyɛ jakɔsɔ na, kɛto wunɛ ma tikɔ njombu joŋgwɛ nɛ̀ ɓeya mɛkele mɛte yi wunɛ ɓa̧ nɔ mbɔmbu kɛ́. ¹⁰Ma ndana, wunɛ mɛ nɛ jɔnja joŋgwɛ yi kɛ sɛnjɔ kɛ̀ nɔ mbɔmbu, nɛ́ yo ɓoŋna nɛ yi mɔ te ɛ kusuma yo kɔ, nɛ́ wunɛ duwɛ nyɛ kimɔ duwa̧te kumɔ njena. ¹¹Ɗete, kinɛ se nde, ɓaka yeti Ɓeyudɛn ho ɓaka Ɓeyudɛn na. Kinɛ yiŋa se nde, ɓembam te ɓaka sima pɛsina, ho nde, ɓaka tì pa pɛsina na. Kinɛ se nde, ɓaka yeti kɛ duwɛ joŋgwɛ, ho nde, ɓaka kɛ joŋna nda ɓenyamɔ na. Kinɛ se nde, ɓaka ɓebala, ho nde, ɓaka yeti ɓebala na. Siya mumɔ te yi ɓomɔ yâkaŋgwɛ duwɛ, yo ndi *Krist. Krist kɛ yi ɓomɔ hɛnɛ.

¹²Njambiyɛ tɔkuma wunɛ, nɛ́ wunɛ ɓɛ ɓomɔ ɓenɛ, sɔŋ temɔ nɛ. Ɗete, wunɛ ɓɛ̂ki ɓotu ɓe gwe ŋgwɛtɛ ɓɛsɔ, ɓɛ ɓotu ɓe ŋgikwa, ɓɛ sendi ɓotu ɓe piɗyɛ yotu. Wunɛ ɓɛ̂ki ɓotu ɓete ɓe joŋna nɛ tɛ, ɓɛ nɛ gbisa. ¹³Ɓaka gbîsi ɓɛsɔ. Ŋgɛ wɛtɛ mumɔ kɛ njoka yun ɓɛŋɛ nde, maŋ kelma yiŋa ɓeya yasi suŋgwɛ nɛ nyɛ, na tîki nyɛ nɛ ŋgwɛtɛ. Yɔkɔ tîki jakɔsɔ nɛ ŋgwɛtɛ nda yi *Krist tikima wunɛ nɛ ŋgwɛtɛ kɛ́. Wunɛ sendi, wunɛ kêl ɗete. ¹⁴Kɛ mɛyasi mɛnɔri hɛnɛ, yasi te yi kwa̧ mbɔmbu, yo nde, wunɛ kwâɗyaŋgwɛ nɛ temɔ yun hɛnɛ, kɛto yo mɛkwaɗya kelɛ nde, ɓomɔ ɓɛ̂ki saŋgwate, ɓɛ temɔ wɛtɛ kɛ mɛyasi hɛnɛ. ¹⁵Tɛte yi wulɛ kɛ yi Krist kɛ́ nâm mɛtemɔ mun, kɛto Njambiyɛ jeɓama wunɛ hɛnɛ nda mumɔ wɛtɛ, nɛ́ wunɛ ɓɛ nɛ tɛte. Ma, wunɛ nyɛ̂ki Njambiyɛ wosoko. ¹⁶Mɛlɛpi mɛ Krist ɓɛ̂ki tondunate kɛ mɛtemɔ mun. Ɓaka têɗya ɓɛsɔ yasi nɛ̀ wunɛ kîtinaŋgwɛ nɛ kpasa ɗyanɔ. Wunɛ jêmbinaŋgwɛ, nyɛ Njambiyɛ wosoko nɛ temɔ yun hɛnɛ. Wunɛ jêmbi mɛjembi yí ŋgwɛta nɛ Njambiyɛ, jembɔ sendi mɛjembi mɛte yi Kimɔ Sisiŋ ta nyɛ wunɛ ɗeti te yi jembɔ kɛ́. ¹⁷Kɛ mɛyasi hɛnɛ te yi wunɛ kelɛ, ko kɛ ndapi ko kɛ mɛkele, wunɛ kêl mɛyasi hɛnɛ nɛ ɗinɔ Nyaŋgwɛ Kumande Yesus, kwa̧ nɛ nyɛ yí nyɛ nɛ Njambiyɛ wosoko.

Joŋgwɛ ɓotu ɓe Njambiyɛ

kɛ mɔy tu̧ ɗyan

¹⁸Wunɛ ɓomari, nyari hɛnɛ tɛ̂kwɛ to wokuna nɛ njoŋɔ te wenɛ. Wunɛ kêl ɗete nda ɓoma ɓete ɓe wokuna nɛ Nyaŋgwɛ Kumande yâkaŋgwɛ kelɔ kɛ́. ¹⁹Ma wunɛ ɓembam, mumɔ hɛnɛ kwâɗyikwɛ nyari wenɛ. Mbam tî ɗiy nɛ nyapipi suŋgwɛ nɛ nyari wenɛ na. ²⁰Wunɛ ɓɔnɔsikɛ, wunɛ wôkunaŋgwɛ nɛ ɓotu ɓete ɓe jama wunɛ ɓaka kɛ mɛyasi hɛnɛ, kɛto yo kimɔte ɗete kɛ mbɔmbu Nyaŋgwɛ Kumande. ²¹Ma wunɛ ɓesaŋgwɛ nɛ ɓɔnɔ, wunɛ tî kel yasi te yi ta kwaɗye temɔ ɓɔnɔ ɓun na, kambɔ yotu yan mɛ nje tɛkɔ. ²²Wunɛ ɓebala, wunɛ wôkunaŋgwɛ nɛ ɓotu ɓete ɓe ɗiyɛ nɛ wunɛ kɛ mɛnɛti maka kɛ mɛyasi hɛnɛ. Wunɛ tî kel yasi, kɛto ɓo kɛ kɔŋ yun kɛ pɛmɔ wunɛ, nɛ́ ɓo ɓɛ nɛ mɛsosa na. Yo nde, wunɛ kêl mɛsay nɛ temɔ yun hɛnɛ, kɛto wunɛ kɛ kambɔ Nyaŋgwɛ Kumande. ²³Kɛ mɛyasi hɛnɛ te yi wunɛ kelɛ, wunɛ kêl yo nɛ kimɔ temɔ. Yo nde, wunɛ kêl nda wunɛ kêl nyɛ Nyaŋgwɛ Kumande, yeti nyɛ ɓomɔ na. ²⁴Wunɛ dûkwɛ nde, yo gba Nyaŋgwɛ Kumande ta gbo nduku mɛsay mun. Wunɛ ta ɓɛ nɛ mɛyasi mɛte yi nyɛ ma kombile, na nyɛ ɓotu ɓenɛ kɛ́. Yo Krist te Nyaŋgwɛ Kumande yi wunɛ kelɛ mɛsay nyɛ nyɛ. ²⁵Pɛ ɓaka ɓe kelɛ kɔtu mɛkele, mumɔ hɛnɛ ta ɓɛ nɛ sol ɓeŋgwɛ kɔtu mɛkele mɛte yi nyɛ kelma kɛ́, kɛto Njambiyɛ yeti kɛ gwe mbɛri misi mɛ mumɔ na.

¹Ma wunɛ ɓotu ɓete ɓe ɗiyɛ nɛ ɓebala ɓaka, wunɛ kêl yasi nɛ ŋgbeŋ, joŋna kimɔte wúnɛ ɓebala ɓun. Wunɛ dûkwɛ nde, wunɛ sendi nɛ mɔ te ɛ ɗiyɛ nɛ wunɛ kɔ kɛ kwey.

Pol kɛ nyɛ ɓotu ɓe Kolos mɛŋgitɛ

²Wunɛ kɛ̂n ndi mbɔmbu yí ŋgwɛta nɛ Njambiyɛ mɛŋgimɔ hɛnɛ. Nɛ tî yaki na. Wunɛ ŋgwɛ̂taŋgwɛ ɗete yí nyɛ nɛ Njambiyɛ wosoko. ³Wunɛ ŋgwɛ̂taŋgwɛ sendi nɛ Njambiyɛ kɛto su, na ɓuti nje lɛpina Kimɔ Tom nɛ nyɛ wusɛ, nɛ́ mi lɛpi yasi te yi ma ɓɛ́ki sɔɗyate nɛ mbɔmbu kɛ kasi *Krist kɛ́ nyɛ ɓomɔ. Yo yite kelɛ nde, mi ɓɛ̂ki ndana wotunate nɛ mɛkol mɛ sumba kɛ jɔɓɔ. ⁴Wunɛ ŋgwɛ̂taŋgwɛ nɛ Njambiyɛ, nɛ́ mi nɛmbi yasi te yi ma ɓɛ́ki mbɔmbu sɔɗyate kɛ kasi Krist kɛ́ nɛ saŋsaŋ nyɛ ɓomɔ ɓeŋgwɛ yasi te yi mi yâkaŋgwɛ lɛpɔ kɛ́. ⁵Wunɛ jôŋnaŋgwɛ nɛ ɗyanɔ wúnɛ ɓotu ɓete ɓe tì pa tikɔ temɔ kɛ yi Krist ɓaka. Ŋgimɔ hɛnɛ te yi ɗya̧ nde, wunɛ kêl mɛsay, wunɛ kêl. ⁶Mɛlɛpi mɛte yi wunɛ lɛpɛ nyɛ ɓomɔ kɛ́ ɓɛ̂ki wɛynate mɛŋgimɔ hɛnɛ. Yo ɓɛ̂ki sendi kimɔte nda som kwa, nɛ́ wunɛ duwɛ nda yi wunɛ yakama yeŋsa nɛ yasi kimɔte nyɛ mumɔ hɛnɛ.

Pol kɛ jana nɛ ɓotu ɓe Kolos

⁷Ndana kɛ yembɛ, wunɛ ta wokɔ kasi mbɛ kɛ mɛyasi hɛnɛ kɛ numbu kimɔ maŋ wusu Tisik. Nyɛ mɔ njɔŋ wombɛ kɛ mɛsay mɛ Nyaŋgwɛ Kumande. A nya sosu nɛ hɛnɛ kɛ mɛsay mɛte. ⁸Mi jéki tomɔ nyɛ kɛnjɛ, na kɛ̀ lɛpi tɛri su nyɛ wunɛ, nyɛ sendi wunɛ ɗeti kɛ temɔ. ⁹Mi kɛ tomɔ nyɛ ɓenɛ maŋ wusu Onesim, sɔŋ temɔ su, mɔ ɗya ɗyun. A kɛ ɓeŋgwɛ Kumande Yesus nɛ temɔ nɛ hɛnɛ. Ɓo ta lɛpɔ mɛyasi hɛnɛ te yi kwaŋna woŋga kɛ́ nyɛ wunɛ. ¹⁰Aristark te yi sinɛ nyɛ kɛ jɔɓɔ kɔ kɛ nyɛnɔ wunɛ. Mark te mɔnɔ maŋ nɛ saŋgwɛ nɛ Barnabas kɛ nyɛnɔ sendi wunɛ. Wunɛ ma wokɔ yasi te yi wunɛ yâkaŋgwɛ kelɔ kɛ kasi nɛ kɛ́. Ŋgɛ nyɛ ɗya̧ wɛri kɛ yun, wunɛ ɓôŋ nyɛ kimɔte. ¹¹Yesus te yi ɓo jeɓa nde Yustus kɔ kɛ nyɛnɔ wunɛ sendi. Kɛ njoka Ɓeyudɛn hɛnɛ ɓe yeŋsama temɔ jayɛ Nyaŋgwɛ Kumande ɓaka ndi ɓembam ɓaka ɓetati nya ɓɔ kɛ kelna mɛsay sinɛ ɓo yí ɗalɛ nɛ ɓomɔ nyinje kɛ *Kandɔ Njambiyɛ. Ɓo nya sendi mi ɗeti kɛ yotu ɓuɗyate. ¹²Mɔ ɗya ɗyun Epafras te mɔ mɛsay mɛ Yesus Krist kɛ nyɛnɔ sendi wunɛ. A kɛ lu̧ ɗyambi mɛŋgimɔ hɛnɛ kɛto yun nɛ nje mɛŋgwɛta nɛ Njambiyɛ, nɛ́ wunɛ tiki temɔ nɛ ŋgbik, ɓɛ jelnate nda goto ɓomɔ yí kelɔ mɛsay hɛnɛ te yi Njambiyɛ kwaɗyɛ nde, wunɛ kêl kɛ́. ¹³Kɛ yasi te yi mi ɓɛŋma duwɛ kɛ kasi Epafras, mi kɛ lɛpɔ gbate nde, a kɛ kelɔ mɛsay saŋgwa nɛ mɛbɔnɛ kɛto yun, kɛto ɓotu ɓe Lawodise nɛ̀ ɓotu ɓe Yerapolis. ¹⁴Maŋ wusu Lukas te dɔkita, sɔŋ temɔ su kɛ nyɛnɔ wunɛ ɓenɛ Demas. ¹⁵Wunɛ nyɛ̂n ɓenjɔŋ ɓusu ɓe ɗiyɛ kɛ Lawodise ɓaka, nyɛnɔ sendi Nimfa nɛ̀ njɔŋ ɓotu ɓete ɓe tikɛ temɔ kɛ yi Yesus Krist ɓe wesiɗya kɛ tu̧ ɗyenɛ ɓaka. ¹⁶Komɛ wunɛ ta si tɔlɔ mɛkana maka kɛ mbɔmbu ɓomɔ hɛnɛ kɛ́, nɛ̀ wunɛ kwâŋɗya yo kɛnjɛ sendi njɔŋ ɓotu ɓete ɓe tikɛ temɔ kɛ yi Kumande Yesus Krist kɛ Lawodise ɓaka. Kɛ kɔŋte, nɛ̀ wunɛ tɔ̂l sendi mɛkana mɛte yi ta wulɛ Lawodise nje kɛ́. ¹⁷Nɛ̀ wunɛ lɛ̂pi nyɛ Arisip nde, a kêl tiŋ te yi tonjɛ mɛsay mɛte yi Nyaŋgwɛ Kumande nya nyɛ kɛ́. ¹⁸Yí nyɛnɔ nɛ wunɛ, yo gba mi Pol kɛtɛ yite nɛ gba ɓɔ mbɛ. Wunɛ tî leŋsaŋgwɛ nde, mi wotunate kɛ jɔɓɔ na. Njambiyɛ kêl ŋgikwa nɛ wunɛ.