1 TIMƆTE

Bosa Mɛkana

mɛte yi Pol kɛtima kɛnjɛ

Timɔte

Yo Pol, mɔ tomun Yesus Krist kɛtɛ mɛkana mɛte yɔkɔ kɛnjɛ Timɔte. Yo bosa mɛkana mɛte yi nyɛ kɛtima kɛnjɛ nyɛ kɛ́. A kɛ jeɓa nyɛ nde Mɔnɔ wenɛ, kɛto yo nyɛ teɗye nyɛ mɛyasi kɛ kasi tikina temɔ kɛ yi Kumande Yesus Krist. Enis, nyaŋgwɛ nɛ Timɔte ɓa̧ ŋgɔndu Yudɛn, a ɓa̧ kɛ ɓeŋgwɛ nje Njambiyɛ ɓuɗyate. Saŋgwɛ wenɛ ɓa̧ mɔ Ɓegrɛk. Pol dól Timɔte kɛ kɛndi yiɓate yi nyɛ ka̧ nɔ kɛ̀ pelna Kimɔ Tom kɛ́. Ɛ Timɔte kandɛ mɛsay ɓenɛ nyɛ nɛ tɛlɛ tɛlɛ kɛ̀ nɔ.

Mɛkana mɛte jéki teɗye nda yi kritɛn yâkaŋgwɛ joŋna nɔ kɛ mɔy misɔn kɛ́. Yo kɛ njoka mɛkana mɛte yi teɗye nda yi ɓotu ɓete ɓe kɛndɛ nɛ njɔŋ ɓekritɛn yâkaŋgwɛ kelɔ mɛsay kɛ́.

Wusɛ yakama ɓakɛ mɛkana maka kɛ mɛŋgaɓiyɛ yitan jɔ yiɓa:

1. Wusɛ ɗîy nɛ sɔsɔ nɛ kɔtu teɗya mɛyasi (kumte 1).

2. Pol kɛ lɛpɔ kasi nɛ nɛ ŋguru wenɛ, kitɛ sendi Timɔte (kumte 1).

3. Kasi mɛŋgwɛta nɛ̀ kasi tɛri ɓomari kɛ mɔy njɔŋ ɓekritɛn (kumte 2).

4. Tɛri ɓotu ɓete ɓe kɛndɛ nɛ njɔŋ ɓekritɛn ɓaka (kumte 3).

5. Tɛri kpasa mɔ mɛsay mɛ Yesus Krist (kumte 4).

6. Mɛsay mɛte yi kpasa mɔ mɛsay mɛ Yesus Krist yâkaŋgwɛ kelɔ kɛ́ (kumte 5).

7. Mɛŋgitɛ mɛte yi ɓɛŋɛ kpasa mɔ mɛsay mɛ Yesus Krist (kumte 6).

¹Yo mi Pol kɛtɛ mɛkana maka. Mi mɔ tomun Krist Yesus nda yi Njambiyɛ ɓenɛ Krist Yesus lɛpima nde, mi ɓɛ̂ki kɛ́. Yo Njambiyɛ te joŋgwɛ wusɛ. Yo sendi Krist Yesus yi wusɛ ɓɛ nɛ ɓiɓina temɔ kɛ yenɛ. ²Timɔte, mi kɛ́ti mɛkana maka kɛnjɛ wɛ, wɛ gba mɔnmbɛ, kɛto wɛ sendi kɛ tikɔ temɔ kɛ yi Yesus Krist. Da Njambiyɛ nɛ̀ Nyaŋgwɛ Kumande wusu Krist Yesus kêl ŋgikwa nɛ wɛ. Ɓo gwâki ŋgwɛtɛ yɔ, nyɛ sendi wɛ tɛte.

Kasi ɓotu ɓete ɓe teɗye

kɔtu mɛyasi ɓaka

³Mi kɛ lɛpɔ nyɛ wɛ nde: Ɗiyɔ kɛ Efɛs nda yi mi ma lɛ́pi nyɛ wɛ kɛ ŋgimɔ te yi mi kwaŋma nɔ kɛ̀ pɛlɛ Maseduwan kɛ́. Ɗiyɔ ndi mate, nɔ̀ lɛ̂pi kimɔte nyɛ ɓaŋa ɓomɔ nde, ɓo tî kɛn mbɔmbu yí teɗye yiŋa mɛyasi dɛlɛ na. ⁴Lɛpɔ nyɛ ɓo nde, ɓo tî kɛn mbɔmbu yí nyɛ sosu yan kɛ yaw yaw mɛkanɔ nɛ̀ kɛ kasi mɛkana mɛte yi nɛ ŋgbɛnjɛ ŋgbɛnjɛ mɛɗinɔ mɛ ɓebaba kɛte kɛ́ na. Mɛyasi mɛnɔri kpál kelɔ ndi nde, mɛtandɔ ɗyâŋ. Yo yeti kɛ kamɛ yaŋa kɛ mɛsay mɛte yi Njambiyɛ sima kpo yí joŋgwɛ nɛ ɓomɔ kɛ́ na. Wusɛ dúkwɛ mɛsay mɛte nɛ nje tikina temɔ te yi wusɛ tikɛ kɛ yenɛ kɛ́. ⁵Yasi te yi wɛ yâkaŋgwɛ lɛpɔ kɛ́, yo kasi mɛkwaɗya mɛte yi wulɛ kɛ pupuna temɔ, wulɛ sendi kɛ temɔ te yi nɛ tɛ nɛ̀ kɛ tikina temɔ kɛ yi Njambiyɛ kinɛ likisi na. ⁶Ɓaŋa ɓomɔ sima tumɔ kɔŋ nɛ mɛyasi mɛnɔri kpalɔ jatɔ kɛ mɛtandɔ mɛte yi aɓalmba. ⁷Ɓo kɛ kwaɗyɛ teɗye yotu nde, ɓo nyaŋgwɛ ɓotu ɓe teɗya mɛmboŋga mɛ Njambiyɛ. Yasi wɛtɛ, ɓo yeti kɛ duwɛ yasi te yi ɓo lɛpɛ nɛ̀ yasi te yi ɓo jayɛ nɛ saŋsaŋ nde, yo kɛ nje kɛ́ na. ⁸Ma wusɛ duwa̧ nde, mɛmboŋga mɛ Njambiyɛ kimɔte, ŋgɛ mumɔ kelɛ nda yi ɓo lɛpɛ kɛ́. ⁹Wusɛ dûkwɛ nde, Njambiyɛ tì tɛmbiɗye mɛmboŋga kɛto ŋgbeŋ ɓomɔ na, yasi wɛtɛ, a tɛ́mbiɗya mɛmboŋga kɛto ɓeya ɓotu ɓete ɓe joŋna kinɛ ɓeŋgwɛ mɛmboŋga ɓaka. A tɛ́mbiɗya sendi yo kɛto ɓotu ɓe mbandɔ, kɛto ɓotu ɓete ɓe kelɛ ɗetina to suŋgwɛ nɛ nyɛ ɓaka nɛ̀ kɛto ɓotu ɓe mɛɓeyɔ. A tɛ́mbiɗya yo kɛto ɓotu ɓete ɓe gbutɛ nɛ nyɛ ɓaka nɛ̀ ɓotu ɓete ɓe yɛliyɛ mɛyasi mɛ Njambiyɛ ɓaka. A tɛ́mbiɗya sendi yo kɛto ɓotu ɓete ɓe wo ɓesaŋgwɛ ɓan nɛ̀ ɓenyaŋgwɛ ɓan nɛ̀ kɛto ɓotu ɓete ɓe wo ɓɛsɔ ɓomɔ ɓaka. ¹⁰Njambiyɛ tɛ́mbiɗya sendi mɛmboŋga kɛto ɓotu ɓe kelna mɛwanja, kɛto ɓembam ɓete ɓe kelɛ wanja tandɛ yan ɓembam, ho ɓoma ɓete ɓe kelɛ wanja tandɛ yan ɓoma nda yi mbam ɗiyɛ nɔ ɓenɛ nyari kɛ́. A tɛ́mbiɗya yo kɛto ɓotu ɓete ɓe ɗyaŋgwɛ ɓɛsɔ ɓomɔ nda ɓebala ɓaka nɛ̀ kɛto ɓotu ɓe ja̧. A tɛ́mbiɗya sendi yo kɛto ɓotu ɓete ɓe kinja yotu yí seɓile nɛ ɓɛsɔ. Njambiyɛ tɛ́mbiɗya mɛmboŋga kɛto ɓomɔ hɛnɛ ɓe teɗye yiŋa yasi dɛlɛ tikɔ yenɛ ɓaka. ¹¹Teɗya yasi te yi mi lɛpɛ nɔ waka kɛ́, yo kɛ mɔy Kimɔ Tom te yi nyɛ kaŋma nyɛ mi kɛ́. Kimɔ Tom te nɛ mɛluksa mɛte yi wulɛ pɛlɛ yi Njambiyɛ. Mɛnyɔŋɔ hɛnɛ wúla pɛlɛ yenɛ.

Pol kɛ nyɛ Njambiyɛ wosoko

kɛto ŋgikwa nɛ

¹²Mi kɛ nyɛ Nyaŋgwɛ Kumande wusu Krist Yesus wosoko, kɛto a nya mi ɗeti kɛ mɛsay mɛte yi mi kelɛ kɛ́. Sendi, a ɓɛŋma nde, a yakama ɓɛ nɛ ɓiɓina temɔ nɛ mi yí tɛmbiɗye mi nde, mi kêl mɛsay mɛnɛ. ¹³A tɔkuma mi, ko ɓɛkɔ nde, nɛ mbɔmbu mi ɗikima lɛpɔ lɛpi gbutu suŋgwɛ nɛ nyɛ, ɓeŋgwɛ ɓotu ɓenɛ yí teɗye ɓo nyaŋgwɛ mɛbɔnɛ. A tɔkuma mi, ko ɓɛkɔ nde, mi ɓa̧ mɔ ɓeya to suŋgwɛ nɛ ɓɛsɔ. Yasi wɛtɛ, a gwa̧ ŋgwɛtɛ wombɛ, kɛto mi ɗikima kelɔ yasi tukute kinɛ duwɛ na, mi tì tikɛ temɔ kɛ yenɛ na. ¹⁴Ma ŋgikwa te yi Nyaŋgwɛ Kumande wusu kpalma nje kwa̧ to te, a kelma nde, mi tîki temɔ kɛ yenɛ, nyɛ sendi mi temɔ te yi mɛkwaɗya, kɛto sinɛ ɓe Krist Yesus saŋgwate. ¹⁵Lɛpi te yi mi ta lɛpɔ ndana kɛ́ yakama nde, ɓomɔ tîki temɔ kɛte jayɛ sendi yo nɛ temɔ yan hɛnɛ. Yo nde: Krist Yesus nja̧ kɛ mɛnɛti maka yí nje joŋgwɛ ɓotu ɓe mɛɓeyɔ. Kɛ njoka ɓotu ɓenɔri, yo mi ɓɛ tokondo te. ¹⁶Yasi wɛtɛ, Krist Yesus gwa̧ ŋgwɛtɛ wombɛ, mi mɔ te ɛ ɓa̧ tokondo mɛɓeyɔ kɔ. A kelma ɗete yí teɗye ɓomɔ nde, a nɛ gbisa ɓuɗyate. A kelma sendi ɗete nɛ mi yí kamɛ nɛ ɓotu ɓete ɓe ta tikɔ temɔ kɛ yenɛ yí ɓɛ nɛ joŋgwɛ te yi kpo nɛ kpo. ¹⁷Ɓomɔ lûksa sombile Kumande te ɛ ti gwáki kɔ. A nɛ joŋ kpo nɛ kpo. Nyɛ mɔ te yi ɓomɔ yeti nɛ ɗeti te yi ɓɛŋɛ na. Siya Njambiyɛ ndi nyɛ nyɛpɔ, *amɛn.

¹⁸Timɔte mɔnmbɛ, mi kɛ kaŋɛ mɛlɛpi maka ndana nyɛ kɛ mɔy mɛɓɔ mɔ nda yi ɓotu ɓe punja mɛlɛpi mɛ Njambiyɛ kikima lɛpɔ nɛ mbɔmbu kɛ kasi yɔ kɛ́. Ɓiya yo nɛ koŋ koŋ, nɛ́ wɛ lu̧ ɗyambi kimɔte. ¹⁹Kɛn mbɔmbu yí tikɔ temɔ kɛ yi Njambiyɛ, ɓɛ nɛ temɔ nɛ tɛ. Ɓaŋa ɓomɔ tikima nje te yite, ɛ tikina temɔ te yi ɓo ɓa̧ nɔ kɛ́ si yambile. ²⁰Kɛ njoka ɓotu ɓenɔri Himene ɓenɛ Alɛksaŋdɛrɛ ɓa̧ sendi kɛte, ɛ mi kaŋɛ ɓo nyɛ kɛ mɛɓɔ mɛ *Satan, simande yo ta nyɛ ɓo ɗyanɔ, ma ɓo nje kɛ̀ mbɔmbu yí gbutɔ nɛ Njambiyɛ.

Kasi mɛŋgwɛta kɛto ɓomɔ hɛnɛ

¹Ma wunɛ njɔŋ, kɛ yasi hɛnɛ, bosa yasi te yi mi lɛpɛ nde, wunɛ kânda kelɔ kɛ́, yo nde: Wunɛ dîya Njambiyɛ mɛyasi, ŋgwɛta nɛ nyɛ, jaɓa kɛto ɓomɔ hɛnɛ, nyɛ sendi nyɛ wosoko kɛto yan hɛnɛ. ²Wunɛ ŋgwɛ̂taŋgwɛ nɛ nyɛ kɛto ɓekumande nɛ̀ kɛto ɓomɔ hɛnɛ te ɓe ɗiyɛ nɛ ɓɛsɔ ɓaka, simande wusɛ ta joŋna nɛ tɛ kinɛ mɛnjaŋgwɛ na, jɛsɔ Njambiyɛ kɛ mɛnje hɛnɛ, joŋna kimɔte ɗisɛ yotu. ³Ŋgɛ wunɛ ŋgwɛta ɗete, yo kimɔte, yo kɛ nyɛ Njambiyɛ te ɛ joŋgwɛ wusɛ kɔ mɛsosa. ⁴A kwáɗyikwɛ joŋgwɛ ɓomɔ hɛnɛ, kwaɗyɛ sendi nde, ɓomɔ hɛnɛ dûkwɛ gbakasi. ⁵A kwáɗyikwɛ ɗete, kɛto Njambiyɛ ndi wɛtɛ nɛ wɛtɛ. Sendi, kɛ njoka Njambiyɛ ɓenɛ ɓomɔ, yo ndi nɛ mumɔ wɛtɛ nɛ wɛtɛ ɛ kelɛ mɛsay mɛ njuŋɔ kɛ njoka yan. Yo Krist Yesus ɛ nja̧ nje ɓɛ mumɔ kɔ. ⁶A nya yotu nɛ nɛ ŋguru wenɛ yí kolɔ nɛ ɓomɔ hɛnɛ. Yo yite teɗye ɓomɔ nde, Njambiyɛ kwaɗya joŋgwɛ ɓo kɛ ŋgimɔ te yi nyɛ pɛsima kɛ́. ⁷Ɗete, Njambiyɛ tɛmbiɗya mi nde, mi ɓɛ̂ki mɔ pelna Kimɔ Tom, mi ɓɛ̂ki mɔ tomun wenɛ. Mi lɛ́pi gbakasi, mi yeti kɛ kelɔ ja̧ na. A nya mi say teɗya kasi tikina temɔ nɛ̀ kasi gbakasi nyɛ ɓotu ɓete ɓe yeti Ɓeyudɛn ɓaka. ⁸Ɗete, mi kwáɗyikwɛ nde, kɛ mɛmbɛy hɛnɛ ɓembam ŋgwɛ̂taŋgwɛ nɛ Njambiyɛ kaŋɛ mɛɓɔ kɛnjɛ kwey nɛ pupuna temɔ kinɛ ŋgambi kinɛ ɗyanɔ te yi mɛtandɔ na.

Kasi mɛsay mɛ ɓomari

kɛ njoka ɓekritɛn

⁹Mi kwáɗyikwɛ sendi nde, ɓomari lɛ̂ŋa mɛlambɔ mɛte yi ta ɗisɛ ɓo. Ɓo lɛ̂ŋa mɛlambɔ mɛte yi ta yaka nɛ ɓo, yeti yí teɗya yotu na. Ɓo tî ɓɔya mɛto yí ɗalɛ nɛ temɔ ɓomɔ na. Ɓo tî lɛŋa mɛyasi mɛte yi ɓo kelɛ nɛ lɔr ho nɛ diyamaŋ ho lɛŋɛ mɛyasi mɛte yi ɗye ɓuɗya mɔni kɛ́ na. ¹⁰Yasi wɛtɛ, mɛlɛŋgwe mɛ kɔndukwɛ te yan kpâl nje ɓɛ kelna kimɔ mɛkele nda yi ɓoma ɓete ɓe teɗye nde, ɓo kɛ kambɔ Njambiyɛ yâkaŋgwɛ kelɔ kɛ́. ¹¹Ɓomari yâkaŋgwɛ lɛŋgwɛ mɛtɔ ɗiyɔ nɛ sɛm kɛ ŋgimɔ te yi ɓo teɗye ɓomɔ mɛlɛpi mɛ Njambiyɛ kɛ́. ¹²Mi yeti kɛ jayɛ nde, nyari têɗya yasi ho kelɔ yasi kwa̧ to mbam na. Yasi wɛtɛ, a ɗîy nɛ sɛm. ¹³Kɛto Njambiyɛ kandima kusɔ Adam mbɔmbu, kɛ kɔŋte Eva. ¹⁴*Satan ti ma séɓila Adam na, a séɓila Eva, ɛ nyɛ yaŋgile mboŋga Njambiyɛ. ¹⁵Ma yo nde, Njambiyɛ ta joŋgwɛ nyari, kɛto a ta ja ɓɔnɔsikɛ. Njambiyɛ ta joŋgwɛ nyɛ ɗete, ŋgɛ nyɛ kɛ̀ mbɔmbu tikɔ temɔ kɛ yenɛ, kwaɗyɛ ɓɛsɔ ɓomɔ, ɓakiɗye yotu pupunate kɛ mbɔmbu wenɛ kinɛ teɗya yotu na.

Kasi tɛri ɓotu ɓete ɓe kɛndɛ

nɛ ɓekritɛn ɓaka

¹Lɛpi te yi mi ta lɛpɔ ndana kɛ́, gbakasi. Yo nde, ŋgɛ mumɔ kwaɗyɛ ɓɛ mɔ te ɛ kɛndɛ nɛ njɔŋ ɓotu ɓe Njambiyɛ, yite mɔ te gɔruma kpasa mɛsay. ²Mɔ te ɛ kɛndɛ nɛ njɔŋ ɓotu ɓe Njambiyɛ kɔ tî ɓɛki nɛ yiŋa mɛjɔsɔ te yi ɓo yakama ndeyɛ nyɛ kɛte na. A ɓɛ̂ki ndi nɛ nyari wɛtɛ. A tî jeki nyɛ temɔ kɛ mɛyasi na. A ɓɛ̂ki mɔ te ɛ ɓiye temɔ nɛ, ɗisɛ sendi yotu nɛ. A ɓɛ̂ki sendi mɔ te ɛ ɓu̧ ɓomɔ kimɔte kɛ mbɛy nɛ, ɓɛ sendi kpasa mɔ teɗya yasi. ³A tî ɓɛki bala mɛnjam ho mɔ mɛtumbɔ na. A ɓɛ̂ki tɛ mumɔ. A tî ɓɛki mɔ saŋna wɔw ho mɔ kwaɗya mɔni na. ⁴A ɓɛ̂ki mɔ te ɛ duwɛ ɓakiɗye ŋgbak ŋgbak ɓotu ɓe tu̧ ɗyenɛ kelɔ nde, ɓɔnɔ ɓenɛ wôkunaŋgwɛ nɛ nyɛ nɛ jɛsɛ hɛnɛ. ⁵Kɛto ŋgɛ mumɔ ti duwɛ ɓakiɗye ŋgbak ŋgbak ɓotu ɓe tu̧ ɗyenɛ, a má nje kelɔ ɓa nan yí ɓakiɗye nɛ njɔŋ ɓotu ɓete ɓe tikɛ temɔ kɛ yi Njambiyɛ ɓaka? ⁶A tî ɓɛki mɔ te ɛ yeŋsama temɔ ndi kwey kwey na, yite a ta susule yotu, ɔ ɓɛ́ŋa, lɛpi má ɓiye nyɛ nda yi ɓiyma nɛ *Kum ɓeya mɛkele kɛ́. ⁷Yo díya sendi nde, ɓotu ɓete ɓe yeti kɛ tikɔ temɔ kɛ yi Kumande Yesus ɓaka jâya mɔ te, kambɔ ɓo mɛ nje yɛliyɛ nyɛ, ɔ ɓɛ́ŋa, a ɓalma kɛ mɛpɔndɔ mɛ *Kum ɓeya mɛkele.

⁸Ɓediyakɛrɛ ɗîsikwɛ sendi yotu yan. Ɓo tî ɓɛki nɛ ɗyem yiɓa nda ŋgɔmbu na. Ɓo tî jeki ɗye mɛnjam na. Ɓo tî kwaŋ nɛ ɓeya mɛnje yí sɔmbɔ nɛ mɔni na. ⁹Ɓo jâya, nyɛ sosu kɛ lɛpi te yi Njambiyɛ punja kɛ́ nɛ pupuna temɔ. ¹⁰Ɓo pâŋ pa kandɛ ɓoɓɛ sendi ɓo, kɛ kɔŋte, ɓo má nje kandɛ yɛy mɛsay man nda ɓediyakɛrɛ, ŋgɛ ɓɛ nde, ɓo kinɛ mɔnɔ ɓeya yaŋa te yi ɓo yakama lɛpina nɛ ɓo kɛte na. ¹¹Ɓoma ɓete ɓe kelɛ say ɓediyakɛrɛ ɓaka yâkaŋgwɛ ɗisɛ sendi yotu yan. Ɓo tî ɓɛki ɓotu ɓe kutu na. Ɓo tî jeki nyɛ temɔ kɛ mɛyasi na. Ɓo tônjukwɛ mɛyasi hɛnɛ kumɔ njena. ¹²Kɛ yi ɓembam, mumɔ hɛnɛ ɓɛ̂ki ndi nɛ nyari wɛtɛ. Ɓo yâkaŋgwɛ mbo ɓɔnɔ ɓan nɛ̀ ŋgbak ŋgbak ɓotu ɓe tu̧ ɗyan kimɔte. ¹³Ɓediyakɛrɛ ɓete ɓe kelɛ mɛsay man kimɔte ɓaka, ɓomɔ ta jɛsɔ ɓo. Ɓediyakɛrɛ ɓete má lɛpɔ sendi kasi tikina temɔ te yi wusɛ tikɛ kɛ yi Krist Yesus kɛ́ kinɛ wɔ̧ na.

Kasi nyaŋgwɛ yasi te yi Njambiyɛ

punja kɛ́

¹⁴Mi kɛ kɛtɔ mɛyasi maka kɛnjɛ wɛ. Mi nɛ ɓiɓina temɔ nde, mi ta kɛ̀ ɓɛŋɛ wɛ nɛdɔ. ¹⁵Ma ŋgɛ wɛ ti ɓɛŋɛ mi nɛdɔ na, mɛkana maka ta teɗye nda yi wɛ yâkaŋgwɛ joŋna nɔ kɛ mɔy *Kandɔ Njambiyɛ kɛ́. Kandɔ te, yo njɔŋ ɓotu ɓete ɓe tikɛ temɔ kɛ yi Kumande Yesus ɓaka. Ɓotu ɓete wókunaŋgwɛ nɛ Njambiyɛ te ɛ nɛ joŋ kɔ. Ɓo kɛ lɛpɔ kasi gbakasi sukɔ yo nda yi saŋgwɛ kondu sukɛ nɛ tu̧ kɛ́. ¹⁶Wusɛ kɛ jayɛ gbate nde, kpasa lɛpi te yi Njambiyɛ sɔɗya nɛ mbɔmbu kɛ́ gba nyaŋgwɛ yasi ɓuɗyate. Yo kɛ teɗye wusɛ nda yi wusɛ yâkaŋgwɛ joŋna nɔ sinɛ ɓe Njambiyɛ. Kpasa lɛpi te, yo nde: A nja̧ yeŋsa ɓɛ gba mumɔ nɛ mɛmbundɔ. Kimɔ Sisiŋ teɗya nde, a nɛ ŋgbeŋ. Ɓejaki ɓe Njambiyɛ ɓɛŋma gba nyɛ. Ɓomɔ pelma kasi nɛ nyɛ ɓotu ɓete ɓe yeti kɛ duwɛ Njambiyɛ ɓaka. Ɓotu ɓe mɛnɛti maka tikima temɔ kɛ yenɛ. Njambiyɛ nja̧ yɔkiɗye nyɛ kɛnjɛ ɗyoɓɔ kɛ mbɛy mɛluksa.

Kasi kpasa mɔ mɛsay mɛ

Yesus Krist

¹Kimɔ Sisiŋ kɛ kombile lɛpɔ nde: Yí kɛ̀ nɔ kɛ siyna mbokɔ, ɓaŋa ɓomɔ tí tikɔ se temɔ kɛ yi Njambiyɛ kɛ̀ nɔ mbɔmbu na. Ɓo ta nyɛ mɛtɔ kɛ mɛlɛpi mɛte yi mɛsisiŋ mɛ ja̧ lɛpɛ kɛ́ nɛ̀ kɛ mɛyasi mɛte yi ɓeya mɛsisiŋ teɗye kɛ́. ²Ɓotu ɓe lɛpina nɛ likisi nɛ̀ ja̧ ɓaka ta jatiɗye ɓo kɛ ɓeya nje. Mɛtemɔ man mɛ ɗekɛ nɛ ɓiŋɓili nda ɓo ɗumma yo nɛ yaki. ³Ɓotu ɓete kɛ kiɗyɛ ɓo nde, ɓo tî ɓoŋ ɓoma na, ɓo tî ɗyaki yiŋa mɛyasi na. Ma Njambiyɛ kusuma mɛyasi mɛte, nɛ́ ɓotu ɓete ɓe tikɛ temɔ kɛ yenɛ duwɛ sendi kasi gbakasi ɓaka ɗye yo nɛ nyɛna nɛ wosoko. ⁴Ma yasi hɛnɛ te yi Njambiyɛ kusuma kɛ́ kimɔte. Yaŋa te yi mumɔ yakama payɛ kɛ njoka te yeti na, siya te ndi nde, mumɔ ɓôŋ yo nɛ nyɛna Njambiyɛ wosoko. ⁵Mɛyasi mɛte hɛnɛ mɛ kimɔte kɛ mbɔmbu wenɛ, kɛto mɛlɛpi mɛnɛ nɛ̀ mɛŋgwɛta kɛ pupuɗye yo.

⁶Ŋgɛ wɛ teɗye ɗete nyɛ ɓemaŋ ɓusu, wɛ ta ɓɛ kpasa mɔ mɛsay mɛ Krist Yesus, wɛ má ɗɔkɔ kɛ nje Njambiyɛ kɛ̀ nɔ mbɔmbu kɛto mɛlɛpi mɛ Njambiyɛ yi kelɛ nde, mumɔ tîki temɔ kɛ yenɛ kɛ́. Sendi, kɛto wɛ kɛ ɓeŋgwɛ ŋgbeŋ yasi te yi ɓo teɗya wɛ kɛ́ kimɔte. ⁷Pupa mɛtɔ kɛ yaw yaw mɛkanɔ mɛte yi ɓɛŋɛ ndi kasi joŋgwɛ te yi mɛnɛti yi njombu ɓomari ɗiki yekiɗye kɛ́. Yasi wɛtɛ, kpalɔ nyɛ sosu yɔ hɛnɛ yí joŋna nda yi Njambiyɛ kwaɗyɛ kɛ́. ⁸Kelɔ ɗete, kɛto ŋgbɔkisa yotu hɛnɛ te yi mumɔ yakama kelɔ yí ɓu̧ nɛ ɗeti kɛ́ yeti kɛ kamɛ nyɛ pɔkɛ na. Yasi wɛtɛ, ŋgɛ mumɔ joŋna nda yi Njambiyɛ kwaɗyɛ, yite kɛ kamɛ nyɛ kɛ mɛnje hɛnɛ. Yo kɛ kelɔ nde, Njambiyɛ nyɛ̂ki wusɛ joŋgwɛ ndana nɛ̀ kɛ mɛtu mɛte yi nje mbɔmbu kɛ́. ⁹Lɛpi te yi mi ta lɛpɔ ndana kɛ́ yakama nde, ɓomɔ tîki temɔ kɛte, jayɛ sendi yo nɛ temɔ yan hɛnɛ. ¹⁰Yo kɛto te yite yi wusɛ kelɛ mɛsay wɔndɔ ɓiriki lu̧ ɗyambi, kɛto wusɛ nɛ ɓiɓina temɔ kɛ yi Njambiyɛ te ɛ nɛ joŋ kɔ. Yo nyɛ kɛ joŋgwɛ ɓomɔ hɛnɛ, jekɔ kwa̧ kwaŋgɔ ɓotu ɓete ɓe tikɛ temɔ kɛ yenɛ ɓaka. ¹¹Kombila pelɛ mɛyasi maka kɛ̀ nɔ mbɔmbu teɗye sendi yo hɛnɛ. ¹²Wɛ tî jaya nde, mumɔ yɛ̂lkwɛ wɛ, kɛto wɛ ndi mɔnɔsikɛ na. Kelɔ nde, ɓotu ɓe Njambiyɛ jôŋnaŋgwɛ nda wɛ. Yo ta wulɛ kɛ ndapi yɔ, kɛ joŋgwɛ ɗyɔ nɛ̀ kɛ mɛkwaɗya mɛte yi wɛ kwaɗyɛ nɛ ɓo kɛ́. Yo ta wulɛ sendi kɛ tikina temɔ te yi wɛ tikɛ kɛ yi Njambiyɛ nɛ̀ kɛ pupuna temɔ te yi wɛ nɔ kɛ́. ¹³Nyɛkɔ temɔ yɔ kɛ tɔlna mɛkana mɛ Njambiyɛ kɛ ŋgil, kɛ kitina ɓomɔ nɛ̀ kɛ teɗya yan mɛyasi kumɔ kɛ ŋgimɔ te yi mi ta ɗya̧ kɛ́. ¹⁴Wɛ tî yɛlkwɛ jɛŋ te yi Njambiyɛ kelma ŋgikwa nyɛ nɛ wɛ kɛ́ na. A nya wɛ yo nɛ nje yasi te yi ɓotu ɓe punja mɛlɛpi mɛnɛ lɛpima kɛ́, nɛ nje kasa mɛɓɔ te yi njɔŋ ɓetomba kasa kɛ yotu yɔ kɛ́. ¹⁵Ndana yɛy, nyɛkɔ temɔ yɔ nɛ̀ ndiŋgɛlɛ joŋgwɛ ɗyɔ hɛnɛ kɛ kelna mɛyasi maka, nɛ́ ɓomɔ hɛnɛ ɓɛŋ nda yi mɛsay mɔ ɗɔkɛ ɗɔkɔ kɛ̀ nɔ mbɔmbu kɛ́. ¹⁶Wɛ nɛ ŋguru wɔ, pɛmɔ joŋgwɛ ɗyɔ kimɔte nɛ̀ yasi te yi wɛ teɗye sendi kɛ́. Kelɔ ɗete nɛ tiŋ, kɛto ŋgɛ wɛ kelɛ ɗete, wɛ ta joŋgwɛ yotu yɔ nɛ ŋguru wɔ, joŋgwɛ sendi ɓotu ɓete ɓe wokɛ yasi te yi wɛ lɛpɛ kɛ́.

Kasi kitina ɓetomba nɛ̀ ɓekusɔ

nɛ̀ ɓebala

¹Wɛ tî ɓamaŋgwɛ kɛ to tomba na. Yasi wɛtɛ, lɛpinaŋgwɛ nyɛ nyɛ tɛtɛki nda nyɛ sɔŋgwɛ. Ɓɛŋa ɓegwanjɔ nda ɓemɔŋ. ²Ɓɛŋa goto ɓoma nda ɓenyɔŋgwɛ, ɓɛŋɛ ɓeŋgɔndu nɛ pupuna temɔ nda ɓeɗyɔmbu ɓɔ. ³Jɛsɔ ɓekusɔ ɓoma ɓete ɓe joŋna nda faŋ ɓekusɔ ɓaka. ⁴Ŋgɛ kusɔ nyari ɓɛ nɛ ɓɔnɔsikɛ ho ɓɛ nɛ ɓenday, nɛ̀ ɓɔnɔ ɓete pâŋ pa jekɛ kelna ŋgay suŋgwɛ nɛ ŋgbak ŋgbak ɓotu ɓe tu̧ ɗyan, yɔkiɗye sendi mɛɗɔkwa mɛte yi ɓotu ɓete ɓe jama ɓo kelma nɛ ɓo kɛ́, kɛto Njambiyɛ ɓɛ́ŋa yite kimɔte. ⁵Kusɔ nya te ɛ joŋna nda faŋ kusɔ joŋna ndi nyɛpɔ kɔ kɛ nyɛ ɓiɓina temɔ nɛ kɛ yi Njambiyɛ. A kɛ kelɔ tiŋ te yi diyɛ Njambiyɛ mɛyasi ŋgwɛta nɛ nyɛ tu nɛ̀ yesɔ. ⁶Ma yɔkɔ ɛ joŋna kɛ nyɛm nyɛm joŋgwɛ kɔ mɛ muŋte, ko ɓɛkɔ nde, a nɛ joŋ. ⁷Kombila pelɛ ɗete nyɛ ɓo, ma ɓo mɛ nje kelɔ yiŋa yasi te yi mumɔ yakama ndeyɛ ɓo kɛte. ⁸Ŋgɛ mumɔ ti kombile ɓakiɗye ɓejaɗyɛ ɓenɛ, jekɔ kwa̧ kwaŋgɔ ŋgbak ŋgbak ɓotu ɓe tu̧ ɗyenɛ kimɔte na, yite téɗya nde, a payma tikina temɔ te yi nyɛ ɓa̧ nɔ kɛ yi Njambiyɛ kɛ́. Mumɔ nda mbɛte ŋgboro kwa̧ mɔ te ɛ yeti kɛ tikɔ temɔ kɛ yi Njambiyɛ kɔ. ⁹Kɛ njoka ɓekusɔ ɓoma ɓete yi ɓo yâkaŋgwɛ kamɛ ɓaka, wɛ ta kɛtɔ ɗinɔ kusɔ te ɛ mɛ nɛ mɛsew kamɔtan jɔ kamɔ wɛtɛ kɔ. Wɛ ta kɛtɔ ɗinɔ ɗyenɛ, ŋgɛ ɓɛ nde, a ɓa̧ ndi nɛ mbam wɛtɛ kɛ joŋgwɛ ɗyenɛ. ¹⁰Sendi, ŋgɛ ɓɛ nde, ɓomɔ ɗikima jayɛ mɛkele mɛnɛ, ŋgɛ ɓɛ nde, a duwa̧ ɓakiɗye ɓɔnɔ ɓenɛ kimɔte, ɓu̧ ɓomɔ kimɔte kɛ mbɛy nɛ, weyɛ mɛkol mɛ ɓotu ɓe Njambiyɛ, kamɛ ɓotu ɓe ŋgwɛtɛ ho kelɔ yiŋa kwalɔ kimɔ mɛkele hɛnɛ, wɛ má kɛtɔ ɗinɔ ɗyenɛ. ¹¹Ma wɛ tî kɛti ɗinɔ ɓekusɔ ɓoma ɓete ɓe ndi ɓeŋgɔndu ɓaka na, kɛto komɛ mɛwoɓɔ ta ɗya̧ ɓo kɛ́, ɓo ta tumɔ kɔŋ nɛ *Krist gɔsɔ nje mɛgwaki. ¹²Ɔ ɓɛ́ŋa, lɛpi ɓalma kɛ to yan, kɛto ɓo tikima yasi te yi ɓo sima kpo kwey kɛ mbɔmbu Njambiyɛ nde, ɓo ta kelɔ mɛsay nyɛ nyɛ kɛ́. ¹³Sendi, ɗyɛm ta si kanje ɓo, ɓo má nje ɓɛ nda njɛkɔ yombila kɛ̀ mɛtu̧ nɛ̀ mɛtu̧. Yeti ndi ɗyɛm nyɛpɔ na, ndapi tí ɗuwɛ kɛ numbu yan na, ɓo ta nyɛ numbu kɛ mɛlɛpi mɛte yi ti ɓɛ́ŋa ɓo kɛ́, lɛpɔ mɛlɛpi mɛjanji kɛ̀ nɔ. ¹⁴Ɗete, mi gɔ́ru nde, ɓekusɔ ɓoma ɓete ɓe ndi ɓeŋgɔndu ɓaka kɛ̂n mɛgwaki, ɓɛ nɛ ɓɔnɔsikɛ, kombile kɛndɔ nɛ tu̧ ɗyan, ma ɓotu ɓete ɓe ɓenɛ wusɛ ɓaka mɛ nje kweɗya nje te yi lɛpina ɓeyate nɛ wusɛ. ¹⁵Mi lɛ́pi ɗete, kɛto ɓaŋa kɛ njokate ma ɗuwɛ kɛ ŋgbeŋ nje kpalɔ ɓeŋgwɛ *Satan. ¹⁶Ŋgɛ mbaŋa nya te ɛ tikɛ temɔ kɛ yi Krist kɔ ɓɛ nɛ ɓaŋa ɓekusɔ ɓoma nde, ɓo ɓejaɗyɛ ɓenɛ, na kama ɓo yí soŋɛ nɛ mapi te yite kɛ to njɔŋ ɓotu ɓete ɓe tikɛ temɔ kɛ yi Kumande Yesus ɓaka, nɛ́ njɔŋ ɓotu ɓete ɓɛ nɛ ɗeti te yi kamɛ ɓekusɔ ɓoma ɓete ɓe joŋna nda faŋ ɓekusɔ ɓaka.

¹⁷Ɓetomba mbanjɔ Njambiyɛ ɓe kɛndɛ kimɔte nɛ njɔŋ ɓotu ɓe Njambiyɛ ɓaka yakama nde, ɓo lûksa ɓo mɛŋga yiɓa, jekɔ kwa̧ kwaŋgɔ ɓaka ɓe nyɛ sosu kɛ lɛpina mɛlɛpi mɛ Njambiyɛ nɛ̀ kɛ teɗyate kɛ̀ nɔ ɓaka. ¹⁸Yo ɗete yi mɛkana mɛ Njambiyɛ lɛpɛ nde: ‹Wɛ tî kanja numbu nday piŋɔ te yi nyɛ kɛ kelɔ mɛsay mɛ natina nyambi yí ɓakɛ nɛ kɔpu te nɛ̀ njɔsɔ te kɛ́ na.› Kɛ yiŋa mbɛy, yo lɛ́pi sendi nde: ‹Mɔ mɛsay yâkaŋgwɛ ɗye nduku mɛsay mɛnɛ.› ¹⁹Ŋgɛ wɛtɛ mumɔ nje sɔmse wɛtɛ tomba mbanjɔ Njambiyɛ nde, a kelma yiŋa ɓeya yasi, wɛ tî yaki jayɛ kinɛ nde, ɓomɔ yiɓa ho yitati ɓe ɗiyma kɛ mbɛy te lɛ̂pi sendi ɗete na. ²⁰Ndeya ɓotu ɓete ɓe kelɛ ɓeya yasi ɓaka kɛ misi mɛ ɓomɔ hɛnɛ, nɛ́ ɓukwɛ ɓotu te ɓari nje kambi kelna ɓeya yasi sendi. ²¹Mi kɛ kombile lɛpɔ nyɛ wɛ kɛ mbɔmbu Njambiyɛ, kɛ mbɔmbu Krist Yesus nɛ̀ kɛ mbɔmbu ɓejaki ɓete ɓe Njambiyɛ tɔkuma ɓaka nde: Kelɔ nda yi mi lɛpɛ nyɛ wɛ kɛ́. Wɛ tî ɗiy kɛ kɔŋ mumɔ ho gwe mbɛri misi mɛ mumɔ na. ²²Wɛ tî pepiɗyaŋgwɛ yí kasɛ ɓɔ kɛ yotu mumɔ yí nyɛ nɛ nyɛ yiŋa say kɛ njoka njɔŋ ɓotu ɓe Njambiyɛ na. Wɛ tî nyɛki ɓɔ kɛ ɓeya mɛkele mɛ mumɔ na. Wɛ nɛ ŋguru wɔ ɓakiɗya temɔ yɔ pupunate. ²³Wɛ tî kɛn se mbɔmbu yí hɔɓiye ndi gbɛla mɔrɔku na. Kɛ̂ hɔɓiya mɔnɔ tena mɛnjam lalɛ nɛ mbɛt, kɛto kɔn te yi kɛ ɓundɔ yɔ kɛ́ nɛ̀ ɓuɗya jaki jaki mɔnɔ mɛkɔn mɛte yi tɛkwɛ yotu yɔ kɛ́. ²⁴Ɓeya mɛkele mɛte yi ɓaŋa ɓomɔ kelɛ kɛ́ kɛ ɓɛŋna kɛ misi, ko piŋɔ te yi ɓo tì pa pɛsɔ jɔsi yan na. Ma kɛ yi ɓaŋa, yo njáki nje pundɔ puyɛ ndi njimɛ, ŋgɛ ɓo si pɛsɔ jɔsi yan. ²⁵Sendi, kimɔ mɛkele ɓɛ́ŋnaŋgwɛ kɛ misi. Ko nde, yiŋa kɛ njokate tì ɓɛŋna ndana ndana na, yo tí tika sɔɗyate kinɛ pundɔ kɛ puyɛ na.

¹Ɓotu ɓe Njambiyɛ hɛnɛ ɓe kɛ ɗiyɔ bala ɓaka yâkaŋgwɛ jɛsɔ ɓemasa ɓan kɛ mɛnje hɛnɛ, ma ɓomɔ nje lɛpɔ lɛpi gbutu suŋgwɛ nɛ ɗinɔ Njambiyɛ, suŋgwɛ sendi nɛ mɛlɛpi mɛnɛ yi wusɛ teɗye kɛ́. ²Ma ŋgɛ ɓɛ nde, ɓemasa ɓan kɛ tikɔ temɔ kɛ yi Njambiyɛ, ɓebala ɓete tî yɛlkwɛ ɓo lɛpɔ nde, ɓo ɓemaŋ ɓan kɛto te yite na. Ɓo kpâl kelɔ mɛsay nyɛ ɓo kwa̧ to te yí kamɛ nɛ ɓo, kɛto ɓotu ɓete yi ɓo kelɛ kimɔ mɛsay nyɛ ɓo ɗete ɓaka kɛ tikɔ sendi temɔ kɛ yi Njambiyɛ. Sendi, kɛto ɓebala ɓete kɛ kwaɗyɛ ɓo ɓuɗyate. Mɛyasi mɛte yi wɛ yâkaŋgwɛ teɗye kitɛ ɓomɔ nde, ɓo kêl kɛ́, yori.

Kasi ɓeya teɗya yasi nɛ̀ kasi

kwaɗya mɔni

³Ŋgɛ mumɔ nje teɗye yiŋa yasi dɛlɛ tikɔ kpasa mɛlɛpi mɛte yi Nyaŋgwɛ Kumande wusu Yesus Krist, ŋgɛ nyɛ ti kwaɗyɛ jayɛ yasi te yi wusɛ teɗye nda yi nyɛ yâkaŋgwɛ joŋna nɔ ɓenɛ Njambiyɛ kɛ́, ⁴yite ɓendiɗya yotu ma namɔ nyɛ, a yeti kɛ duwɛ ko mɔnɔ yaŋa nɛ mbɛt na. A kɛ kwaɗyɛ mɛlombɔ, nyɛ mɔ mɛtandɔ kɛ gbɛla lem mɛlɛpi. Yo kɛ kelɔ nde, gɔruna yasi ɗyâŋ kɛ temɔ mumɔ. Yo kél sendi nde, ɓomɔ lômbiɗyaŋgwɛ, ɓo tôynaŋgwɛ, ɓo ɓɛ̂ki nɛ ɓeya mɛtakɛ nde, ɓaŋa kelma yiŋa ɓeya yasi sɔɗyate. ⁵Ɓendiɗya yotu te ɗáka sendi ŋgbɛnjɛ ŋgbɛnjɛ mɛtandɔ kɛ njoka ɓotu ɓete ɓe nɛ ɓeya ɗyanɔ, ɓe ti dúkwɛ se gbakasi ɓaka. Ɓo táka nde, ŋgɛ mumɔ joŋna ɓenɛ Njambiyɛ, yo nje dolna mɛyasi mɛ mɛnɛti. ⁶Gbate, ŋgɛ mumɔ joŋna ɓenɛ Njambiyɛ, yo nje dolna nyaŋgwɛ kpasa mɛyasi mɛte yi Njambiyɛ nyɛ mumɔ kɛ́, ŋgɛ mumɔ kɛ̀ mbɔmbu ɓɛŋɛ nde, mɛyasi mɛte yi nyɛ nɔ kɛ́ yakama nyɛ. ⁷Kɛto ko wusɛ tì nje nɛ yiŋa yaŋa kɛ mɛnɛti maka na. Sendi, yaŋa te yi wusɛ ta ɓu̧ ɗuwɛ nɔ kɛ mɛnɛti yeti na. ⁸Ɗete, ŋgɛ wusɛ ɓɛ nɛ yasi te yi wusɛ yakama ɗye nɛ̀ yi wusɛ yakama lɛŋɛ, yite yakama. ⁹Ma ɓotu ɓete ɓe kwaɗyɛ ɓɛ nɛ ɓuɗya mɛyasi ɓaka kɛ saŋgwa nɛ mɛɓoɓilan ɓalɔ kɛ mɛpɔndɔ mɛ *Satan nɛ̀ kɛ ɓuɗya jaki jaki lem ɓeya mɛwoɓɔ mɛte yi ɓekiɗye ɓomɔ kelɔ nde, ɓo yâmbila kɛ́. ¹⁰Yo nde, njuku kwalɔ mɛbɔnɛ hɛnɛ wúla kɛ kwaɗya mɔni. Ɓaŋa ɓomɔ nyinja to kɛte, ɛ ɓo jatɛ kɛ ɓeya nje lɔndɔ tikɔ tikina temɔ te yi ɓo ɓa̧ nɔ kɛ yi Njambiyɛ kɛ́ nje ɓu̧ nɛ mapi mɛbɔnɛ nyɛ kɛ temɔ yan nɛ ŋguru wan.

Njena mɛŋgitɛ

¹¹Kɛ ɓɛ wɛ, wɛ mɔ Njambiyɛ, kɛn mbɔmbu tumɔ kɔŋ lɔndɔ nɛ ɓeya mɛyasi mɛnɔri. Nyɛkɔ sosu yí sa̧ nje te yi joŋna nɛ ŋgbeŋ kɛ mbɔmbu Njambiyɛ. Saŋgɔ nje te yi joŋna nda yi Njambiyɛ kwaɗyɛ tikɔ temɔ kɛ yenɛ kɛ̀ nɔ mbɔmbu, kwaɗyɛ ɓɛsɔ ɓomɔ, ɓɛ nɛ temɔ gbisa, joŋna sendi nɛ tɛ wúnɛ ɓɛsɔ. ¹²Loŋgɔ ɗyambi nyɛ sosu kɛ tikina temɔ kɛ yi Njambiyɛ kimɔte kɛ̀ nɔ mbɔmbu. Ɓiya joŋgwɛ te yi kpo nɛ kpo yi Njambiyɛ jeɓama wɛ nde, nɔ ɓɛ nɔ kɛ́ nɛ gbem. Wɛ kombila lɛpɔ jayɛ tikina temɔ yɔ kɛ kasi joŋgwɛ te nɛ saŋsaŋ kɛ mbɔmbu ɓuɗya ɓomɔ. ¹³Mi kɛ kombile lɛpɔ nyɛ wɛ kɛ mbɔmbu Njambiyɛ te ɛ kelɛ nde, mɛyasi hɛnɛ ɓɛ̂ki nɛ joŋ kɔ nɛ̀ kɛ mbɔmbu Krist Yesus. Komɛ nyɛ tɛmma kɛ mbɔmbu Pɔnsi Pilat kɛ́, a lɛpima ndi gbakasi nɛ saŋsaŋ. ¹⁴Yo nde, mi kɛ kombile lɛpɔ nyɛ wɛ kɛ mbɔmbu yan nde: Ɓakiɗya yasi te yi mi lɛpima nyɛ wɛ kɛ́ nɛ pupuna temɔ, joŋna kinɛ yaŋa te yi mumɔ yakama ndeyɛ wɛ kɛte na. Kelɔ ɗete kumɔ kɛ ŋgimɔ te yi Nyaŋgwɛ Kumande wusu Yesus Krist ta nje kɛ́. ¹⁵Njambiyɛ ta kelɔ nde, a pûnjukwɛ yotu kɛ ŋgimɔ te yi nyɛ Njambiyɛ sima pɛsɔ kɛ́. Nyɛ Njambiyɛ te yi mɛnyɔŋɔ hɛnɛ wulɛ pɛlɛ yenɛ. Siya mɔ te ɛ namɛ mɛyasi hɛnɛ ndi nyɛ nyɛpɔ. Nyɛ Kumande ɓekumande. Nyɛ sendi Baba Mbokɔ ɛ laŋsama ɓebaba mbokɔ. ¹⁶Ko a ti yaka gwe wɛtɛ yesɔ na. A ɗíy kɛ yol mɛjasi mɛte yi mumɔ ti yaka wuta nɛ yo na. Ko mumɔ wɛtɛ nɛ wɛtɛ tì ɓɛŋɛ nyɛ wɛtɛ yesɔ na. Ko mumɔ wɛtɛ nɛ wɛtɛ yeti nɛ ɗeti te yi ɓɛŋɛ nyɛ na. Ɓomɔ sômbila nyɛ, a nɛ ŋguŋguɗyɛ kpo nɛ kpo, *amɛn.

¹⁷Kɛ yi ɓotu ɓete ɓe nɛ mɛkusuku muka ɓaka, kombila lɛpɔ nyɛ ɓo nde, ɓo tî ɓendiɗya yotu na. Ɓo tî ɓɛki nɛ ɓiɓina temɔ kɛ mɛkusuku mɛte yi yakama yambile nɛmɛnɔ kɛ́ na. Yasi wɛtɛ, ɓo kpâl ɓɛ nɛ ɓiɓina temɔ kɛ yi Njambiyɛ te ɛ nyɛ wusɛ ɓuɗya kimɔ mɛyasi kɔ, nɛ́ wusɛ ɓu̧ mɛyasi mɛte nɛ mɛsosa. ¹⁸Ɓo kêl kimɔ yasi. Yasi hɛnɛ te yi ɓo kelɛ ɓɛ̂ki kimɔ mɛkele. Ɓo ɓɛ̂ki ɓotu ɓe ŋgay kaɓiɗya mɛyasi ɓenɛ ɓɛsɔ ɓomɔ. ¹⁹Ŋgɛ ɓo kelɛ ɗete, ɓo kɛ ndɛmɔ kpasa mɛyasi mɛte yi tí yambile na yí laɗye nɛ mɛtu mɛte yi nje kɛ́, nɛ́ ɓo ɓɛ nɛ kpasa joŋgwɛ te yi kpo nɛ kpo.

²⁰Ma Timɔte, ɓakiɗya yasi kɛ yi Njambiyɛ sima kaŋɛ nyɛ wɛ kɛ́ kimɔte. Wɛ tî nyɛki numbu yɔ kɛ yaw yaw mɛlɛpi na. Wɛ tî nyɛki sendi numbu kɛ mɛlombɔ mɛte yi wulɛ kɛ teɗya yasi te yi ɓo lɛpɛ lɛpɔ nde faŋ duwa̧ yasi kɛ́ na. ²¹Ɓaŋa ɓomɔ kɛ lɛpɔ nde, ɓo nɛ faŋ duwa̧ yasi te. Ɗete, ɛ ɓo si lɔndɔ nɛ tikina temɔ te yi ɓo ɓa̧ nɔ nɛ mbɔmbu kɛ yi Njambiyɛ kɛ́. Njambiyɛ kêl ŋgikwa nɛ wunɛ.