TITO

TITO

¹ Paulo, mutogomi we Mulungu kahi mutumigwa wa Yesu Kilisito, kugendelesa dihuwi dya wasagulwe ne Mulungu no umanyi wawo we ichawelu iikufumila imikalile ye chimulungu, ² mwihuwi dyo uwumi wa majuwa gose, uwene Mulungu, inghekudaha kudanha, hakaulaganisa minyaka mingi ilokile, ³ kahi muchigele chakwe haugubuligwa mumbuli yakwe kwa njila ya mahubili gonyenghigwe kwe dilagiso dye Mulungu iMwihula wetu. ⁴ Kwa Tito, gomwanangu we chawelu mwihuwi dyochihangile: Dihewa ne digoya kulawa kwe Mulungu iBaba na Kilisito Yesu iMwihula wetu fyuwe nagwe. ⁵ Nochanghone nakulekile ku Kilete, uleke ugolose digoya agasigale, na kuwasagula wasehe mu chila ikaya ifene fonakulagise, ⁶ nghona hena munhu munjelu, mulume wa muke yumwedu, kahi awanagwe wena ihuwi kahi wasikusongeswa na mbuli yoyose yo uwihi hegu kuleka kuwa na chogoho. ⁷ Kosoko iasikofu, kagaluka munyamhala we Mulungu, yagila yowe munhu inghekusongeswa na mbuli yoyose; yanghowe munhu iyakiyona, yanghowe munyono, yanghowe mulewaji wo ugimbi hegu mulefi hegu iyekilundila finhu itewa kosoko yakwe, ⁸ ninga yowe mundewa, iyekwenda uswanu, iyekiimila imwenyecho; ⁹ yekuhanangigwa yakolelese imbuli ye chawelu foifusigwe, uleke yadahe kulafa mafuso ge ichawelu, kahi kuwajama wose awekugalema. ¹⁰ Kosoko kwina wanhu wengi awechaka chogoho, wena mbuli sichaka chinhu, kahi wadasi, lugano awo ulwandi lwa wafinigwe; ¹¹ wekuhanangigwa wanyamasigwe, kosoko wekuwabana awanhu we sikaya sose kwa mafuso gawo uleke wapate chinhu, amafuso gowasikwendigwa wafuse. ¹² Yumwedu wawo, imugonese wawo yagamba “Awakilete wowaga wadasi majuwa gose malimu gehile, wadoba kahi wadiisaji” ¹³ Uhomelesi uno ni chawelu. Kosoko yo wagombele kwa ukali, uleke wadahe kuwa womi mwihuwi, ¹⁴ waleke kusitegelesa sisimo se Chiyahudi hegu amalagiso ga wanhu awekuilema ichawelu. ¹⁵ Ifinhu fyose fikugaluka fyela kuwanhu awelile, ninga kuwehi na awasikuhuwila hechaka chinhu chochose ichelile; amahala ne misungu yawo fibanika. ¹⁶ Wakigamba wamumanya Mulungu, ninga wakumulema kwa sinhenda sawo; wena ludeso, wechaka chihuliko, wasagile kwa nhenda yoyose iswanu.

¹ Ninga gweye, fusa amafuso go uwumi. ² Uwalagise awasehe wanghowe na makulu, ninga wowe wasindamafu, wowe na mahala, womi mwihuwi na muuwendo na mungojela. ³ Uwalagise kahi awadala wowe wasindamafu, wanghowe wasigilaji, hegu wonywaji wo ugimbi lugano; ninga awekufusa iswanu, ⁴ kahi na kuwafusa awanawake awadodogi wawende awalume sawo na wana, ⁵ wowe na chihuliko, usunhile, kutogoma milimo musinyumba sawo, waswamu, wowe na chihuliko kuwalume sawo, uleke imbuli ye mulungu inghatofuligwe. ⁶ Nheifo kahi, walolese awajelelo wakituse awecho. ⁷ Kiyonese gomwenyecho musimbuli sose chinhu cha kifusila sinhenda siswanu, kahi mumafuso gako yonesa uchawelu na usito, ⁸ na simbuli so uwumi isisidaha kutofuligwa uleke imunhu iyedaha kulema yengile chinyala, kwa kuswela mbuli ihile ya kulonga muchanhya yetu. ⁹ walagise awatumwa wowe na chogoho kuwakulu wawo, na kuwendesa musimbuli sose; wanghowe wabidulaji, ¹⁰ wanghowe wahiji, ninga wonese uchawelu wose, wagahambe amafuso fe Mwihula wetu Mulungu musimbuli sose. ¹¹ Kosoko dihewa dya Mulungu digubuligwa uleke awanhu wose wehulwe, ¹² nadyo dikuchifusa kuulema uwihi na usulumisi we chilunga, chidahe kwikala fiswanu, na mikalile yo kumogoha Mulungu muchilunga chino, ¹³ akuno nikudigojela dihuwidyetu idilugutisigwe, na magubulo ge ditunyo dye Mulungu wetu imukulu ne Mwihula Yesu Kilisito, ¹⁴ iyakilafa imwenyecho kosoko yetu kuchihula seye kulawa mu wihi wose na kisunhila imwenyecho wanhu wakwe awekupiligala musinhenda siswanu. ¹⁵ Longa simbuli sino; jama na kugombela kwa ludole. Munhu wowose yanghakubese.

¹ Uwagelegese awanhu kinenenghesa kuwandewa na wena udaha, kuwa na chogoho, kuwa tayali kwa chila mulimo muswanu, ² waleke kumulonga munu wowose, wakinege ne ing’omba, wowe waholo na konesa chogoho ku wanhu wose. ³ Kosoko ase nase katali hachuwaga chaka mahala, chichaka chogoho, chagiliswe, watumwa wo usulumisi wa mbuli nyingi, chikale mu wihi ne finju, chisuligwe na wanhu, nase chikisulile munhu na miyagwe; ⁴ ninga ichigele uswanu wakwe na uwendo wakwe Mulungu iMwihula wetu fowoneke, ⁵ hakachihonya seye, si kwa sinhenda setu, so uchawelu sochigolose, ninga kwa ubasi wakwe, kwa kusunhwa kwa kwelekigwa keli na kugoloswa usha ne Muhe Musunhile; ⁶ iyachitilile kwa ugoli wose kugendela Yesu Kilisito iMwihula wetu, ⁷ chidahe kutaliligwa ichawelu kwa dihewa dyakwe uleke chuwe wahasi mwihuwi dyo uwumi wa majuwa gose. ⁸ Ni nonga ya chawelu. Nikukuhananga gweye ulonge simbulisino kwa ludole uleke wose awamuhuwile Mulungu, wagendelele kusigala musinhenda siswanu; simbuli sino ni swanu kahi sina faida kuwanhu. ⁹ Ninga kinege ne sinonga se chibwalasi, sinonga sinhali sa wagono, ing’omba na iwanga kosoko ya malagiso, kosoko gechaka faida kahi gechaka chinhu. ¹⁰ Imunhu mudasi, yanghadaha kujamigwa ichigele cha bosi na cha keli, muleke, ¹¹ umanye fina imunhu yefane yo kagilila kahi yakugolosa sambi; kafulusa kiliganisa imwenyecho. ¹² Ichigele chonikanimutuma Alitema ukwako hegu Tikiko, piligala kwija ukwangu kuno Nikapoli, kosoko nilamula kwikala kuno ichigele che imheho. ¹³ Piligala kuwatasa Sena imulamusi na Apolo munhambo yawo; langisisa wanghahungukilwe na chinhu. ¹⁴ Leka awanhu wetu wefuse kusigala musinhenda siswanu, wadahe kuwatasa awechaka ichawelu, wanghaleke kulela mamudyo maswanu. ¹⁵ Awanhu wose awehamwedu nani wakukulamusa. Walamuse wose awekuchenda seye mwihuwi. Dihewa dyuwe hamwedu nanye mose.