WALOMA

WALOMA

¹ Paulo, imutogomi wa Yesu Kilisito, kenangigwa kuwa Mutumigwa, yasaguligwe kosoko ye imbuli swanu ye Mulungu, ² iyalaganisigwe ne Mulungu kulawa katali kupulutila awagonesi wakwe mumatulumo gasunhile, ³ imbuli swanu ni kosoko ya mwanagwe yalawile mulukolo lwa Daudi kwa chimutufi ⁴ na kutambusigwa kuwa Mwana we Mulungu hamwedu na ludole kosoko ya Muhe wo Usunhile kwa kwinuligwa kwakwe kulawa mudifa, Yesu Kilisito Mundewa wetu, ⁵ kulokela imwene chihokela dihewa, na utumigwa wo kwigala habehi ichihuliko che dihuwi mugati ya wose Amataifa kosoko ye disina dyakwe, ⁶ hamwedu na nyeye muwecho mwinangwe muwe wa Yesu Kilisito, ⁷ kuwose wendigwa ne Mulungu woile Loma wenangwe kuwa wasunhile: ⁸ Kunghonga, nikumulumba Mulungu wangu kulokela Yesu Kilisito kosoko yenu mose, kosoko ye dihuwi dyenu idikuhubiliigwa muchilunga chose. ⁹ kosoko iMulungu no muhomesi wangu, wonikumutogomela hamwedu ne muhe kwa kutamila imbuli swanu ye Mwanagwe, bila kuleka nigendelela kuwagelegela kwa kuwatasilani majuwa gose munhasa yangu, ¹⁰ nikutasa fina Mulungu yanghenda nidahe kwija ukwenu. ¹¹ Kosoko nikusulumila niwoneni uleke niwengheni finghwa fye chimuhe na kuwagumani ludole, ¹² uleke chuwe wakangasi wasindamafu kwa dihuwi dya chila munhu na miyagwe kosekose ukwenu na ukwangu. ¹³ Nikuhananga mumanye wandugu sangu fina mikangha mingi hanihananga kwija ukwenu (ninga hanilemesigwa) uleke nidahe kugola ugolaji ukwenu na nheifiya kifana kuwamembe wasigale. ¹⁴ Nikudaiigwa kuhubili Imbuli swanu kuwanhu wose Awayunani na Awasigendelele kuwene misungu na awabwalasi: ¹⁵ kosoko ya iyo nikuhananga kuhubili Imbuli swanu hata ukwenu nyeye muwile Loma. ¹⁶ Kosoko sikuyonela chinyala Imbuli swanu; ni ludole lwa Mulungu kwa uhonya wa chila munhu yene dihuwi, kwa Muyahudi kunghonga na kahi kwa Muyunani. ¹⁷ Kosoko kwa iyo ichawelu ye Mulungu igubuligwa kugendela dihuwi kwa dihuwi fina foitulumigwe kugamba; “Imuchawelu kokwikala kwa kulokela dihuwi” ¹⁸ Kosoko inyono ye Mulungu yonesigwa kulawa kulanga kuwanhu wose awasikwenda Mulungu na wihi wa awakukanhamisa ichawelu. ¹⁹ Kosoko iikudaha kumanyika muchanhya ye Mulungu ni chalinse ukwawo, kosoko iMulungu kayonesa ukwawo. ²⁰ Kulawa kukumbigwa kwe chilunga inyuwa yakwe ye ludole yo kuleka koneka na udaha wa majuwa gose waumanya na kuona kulokela finhu fyumbigwe. Nong’amba wechaka chibalalilo. ²¹ Kosoko hawamumanya Mulungu, ninga wasimwinghile chogoho kifana Mulungu ama kumulumba, ninga hawagilila mudasi mumadoga gawo kamei misungu yawo hoigumigwa chisa ²² Wakidai wena misungu wagaluka, wabwalasi; ²³ na kubidula ditunyo dye Mulungu idichaka ubani kuwa futa ye chimunhu iikubanika, na fidege na fikewe hamwedu na ifikutambala. ²⁴ Kosoko ya iyo Mulungu kawengha mukusulumila mumimoyo yawo uwihi kuleka kiyogoha mumitufi yawo awecho ²⁵ kosoko wabidula ichawelu ye Mulungu kuudasi na kufuga fyumbigwe na kufifugamila na kuleka Iyombile, imutunyigwa wa majuwa gose! Hano. ²⁶ Kosoko ya iyo Mulungu kawengha usulumisi wichaka chogoho. Wanawake wao nawo wabidula sinhenda kulawa fosumbigwe kuluta kusisumbigwe, ²⁷ nheifiya awagosi nawo, hawaleka sinhenda ifene foyumbigwe kuwa nawake sawo na kikola usulumisi wecho kwa wecho. Hata wagosi wagolosa mbuli sa chinyala na wagosi wayawo na kuhokela itoso dya nhenda sawo sihile. ²⁸ Na kosoko wasonile fiswanu kumumanya Mulungu, Mulungu hakawaleka wandamile madoga gawo gehile agasiku hanangigwa wagolose. ²⁹ Hawamema na chila ilalago dya wihi, ulwafu, usulumisi, chigiso, wamemile finju, ukomaji, unghondo, udanhilisaji, kubalalila, na walongaji we mbuli sa wamonga, ³⁰ wakusigila wayawo, awasikumwenda Mulungu, wetogosi, weyoni, lubeso, wanhu wakudoga gehile, na awasikuhulika awaweleke, ³¹ wabwalasi, wechaka dihuwi, wakomaji wa mimoyo ya wanhu, wechaka ubasi na munhu. ³² Hata inghowa wamanyile ulamusi we Mulungu, fina awaya wakugolosa gago wagiligwa kufe, ninga siyo du wakugagolosa du kahi wakubwedelela wamonga nomowakugagolosa.

¹ Hambiya kwichaka chibalalilo, kwawowose, nomo ukuliganisa wamonga; kosoko kwa kuwaliganisa wamonga ukilamula gomwecho, kosoko agweye gomulamulaji nagwe ukugolosa wihi uuya. ² “Chimanya fina ulamusi we Mulungu kwa wayawakugolosa gago ni wachawelu”. ³ Ukudoga, gweye fina nomoukulamula awakugolosa gago kamei nagweye ukugagolosa nghukwija udaha kuitija inyono ye ulamusi we Mulungu? ⁴ Ama ukubesa uugoli we uwendo na ufinyilisi wakwe. Nghumanyile fina wendo we Mulungu wabaho kukulongosa gweye kukulamba? ⁵ Ninga kosoko youkugutu na kuleka kufinyilisa kwa umoyo wako ukiikila nyono muchanhya yako mwijuwa dye inyono ugele uliganiso we chawelu we Mulungu foukwija ukoneka ⁶ Kosoko Mulungu komuliha chila munhu fina foyaliganile: ⁷ Kuwanya awakufinyilisa mukugolosa maswanu wahananga kumutunya Mulungu na kumogoha na kowengha uumi wa majuwa gose; ⁸ na kuwamonga awakwandamila njila sao wenyecho na wasikwenda kuihulika ichawelu ninga uwihi, inyono ye Mulungu yofungha ukwawo. ⁹ Kokuwa na magayo na kutamigwa kwa chila iyakugolosa uwihi, kukongela kwa Muyahudi na kwe Muyunani, ¹⁰ ninga ditunyo na chogoho hamwedu na dihewa dyuwe kwa chila munhu iyakugolosa uswanu, kwa Muyahudi kunghonga kamei ne Muyunani naye. ¹¹ Kosoko Mulungu kechaka kwendelela. ¹² Kosoko awaya wose wagolose wihi bila dilagiso wakwagilila nheifiya bila dilagiso na wose wagolose wihi mudilagiso wolamuligwe ne dilagiso. ¹³ Kosoko siyo wakuhulika dilagiso nowene nhenda swanu hamwande ye Mulungu, ninga awagolosaji we dilagiso nowakwija wataliligwa nhenda swanu. ¹⁴ Nghona awamembe, awechaka dilagiso wakumanya chowakuhanagigwa wagolose, awano, awechaka dilagiso, wagaluka ilagiso awecho. ¹⁵ Wakonesa fina ichikuhanangigwa ne dilagiso chiyandikigwa mumimoyo yao, na madoga gawo gakuwahomelesa na kuwasongesa ama kuwabalalila ¹⁶ mwijuwa dye uliganiso fina imbuli yangu swanu foilongile, Mulungu kulokela Yesu Kilisito, yakwija yaliganisa amadoga gose agakifisile. ¹⁷ Ninga nghonaga ukiinanga Muyahudi na ukuhuwila dilagiso ukiyona kosoko ya Mulungu ¹⁸ na mumanya iMulungu choyakuhananga na kufumilisa ichiswanusi kosoko mulolesigwa mwilagiso, ¹⁹ na nghona umanyile fina kwamulongosaji wa wamudula na fina agweye no ujelu kwawaya woile muchisa, ²⁰ ni mulolesaji wa wabwalasi na mufusaji wa wana wadodogi mumalagiso uwine umanyi we chawelu mugati yako, ²¹ agweye, goukufusa awamonga nghudaha kifusa gomwecho? Ukuhubili uhiji sambi gomwecho kahi ukuhija? ²² Agweye ukulemesa dihabwa, gomwecho ukugolosa ihabwa? Agweye ukudesekela fisikimunhu ukuhija mumahekalu? ²³ Agweye ukitunyila mwilagiso, kahi ukumubesa Mulungu kwa kubena malagiso gakwe? ²⁴ Kosoko, fina foitulumigwe, “Disina dye Mulungu dikutofuligwa mugati ya Wamembe kosoko yenu.” ²⁵ Dikumbi dikuwa na chambusi nghona mukukola dilagiso amba nghona mukubana dilagiso mugaluka fina wanhu wasifinigwe. ²⁶ Kosoko iyo, nghona munhu inghafinigwe yakukola malagiso kuleka kufunigwa kwakwe kusikugaluka kufinigwa? ²⁷ Kamei na waya wasifinigwe chimutufi, ninga wakukola dilagiso wowalamula nyeye mwina umulundo wa matulumo na dikumbi, ninga mukubana dilagiso. ²⁸ Kosoko iMuyahudi we chawelu nghakiyonesa kwa kunje, ama dikumbi dya chawelu siyo chinhu cha kunje ama cha chimutufi. ²⁹ iMuyahudi wa chawelu no yuya iMuyahudi kwa kugati, na dikumbi dye chawelu dyuwa mumoyo, ayi ni mbuli ya chimuhe na siyo mawandiko du. Uleke munhu yahokele ditunyo siyo kulawa kuwanhu, ninga kwe Mulungu.

¹ Kahi, iMuyahudi kena choni chongeseke ama ichambusi che dikumbi no chihoki? ² Telele, chila hanhu. Kosoko kunghonga, Awayahudi hawenghigwa imbuli ye Mulungu. ³ Nhani ghona wamonga wasowile wanhu wakuhuwilika togoleni nonghamba kuleke kuhuwilika kwawo no kuleka kuhuwilika kwe Mulungu? ⁴ Gwe putu! Lekeni Mulungu yagendelele kuwa muchawelu hata nomowamonga wakuwa wadasi fina foitulumigwe, “Uleke utaliligwe chawelu musimbuli sako, na ukasume mwijuwa dyo uliganiso.” ⁵ Ninga inghowa wihi wetu unghagoloseka konesa ichawelu ye Mulungu, chigambeki kogamba Mulungu ni mwihi yakwigala nyono muchanhya yetu? (Nikulonga chimutufi.) ⁶ Gwe putu! Aho mbiya kodaha nhani Mulungu kuchiliganisa ichilunga? ⁷ Ninga inghowa kulokela udasi wangu ichawelu ye Mulungu yohigwa mwitunyo dyakwe, nhani nigendelele kuliganiswa kuwa mwihi? ⁸ Na nhani chinghalonge (kifana wamonga fowakuchisigila kwa kulonga gaya gochikulonga). “Chigolose gehile uleke maswanu geje?” Sigafu ye uliganiso wao ikuwagojela! ⁹ Chigambeki? Aseye Chiwayahudi chawaswanusi? Gwe putu! Kosoko nifulusa kuwalamula wose Awayahudi na Wayunani fina wowa hasi ya ludole lwe wihi; ¹⁰ fina foitulumigwe, kugamba, “Hechaka muchawelu, hechaka hata yumwedu ¹¹ hechaka yamanyile, hechaka yakumuhananga Mulungu. ¹² Wose wagilila, wose wagolosa wihi, hechaka hata yumwedu yakugolosa uswanu, hechaka hata yumwedu.” ¹³ “Malaka gawo ni makabuli gagubuligwe wakutumiya malimi gawo kudanhilisa.” “Usungu mukali wa majoka wuwa mumilomo yawo.” ¹⁴ “Milomo yawo imema kuligitisa na usungu lugano.” ¹⁵ “Migulu yawo ikubilima lumangho kwitila sakama; ¹⁶ Ubani na magayo gowa musinjila sawo, ¹⁷ na njila ye digoya wasiimanyile.” ¹⁸ “Wechaka chogoho cha Mulungu kumwande ya meso gawo.” ¹⁹ Hambiya chimanya fina chochose ichikulongigwa ne dilagiso, dikuwalonga waya wowile hasi ye dilagiso, uleke chila mulomo unyamale, na chilunga chose chilamuligwe ne Mulungu. ²⁰ Kosoko “Hechaka munhu yene mutufi yakudaha kutaliligwa chawelu kwa kona” nhenda sa dilagiso, kosoko kulokela dilagiso no kwija kumanya kwe wihi. ²¹ Ninga hambiya, ichawelu ye Mulungu ifulusa konesigwa kahi kunje ye dilagiso, hata inghowa dilagiso ne wagonesi fikuhomelela imbuli ayi, ²² uchawelu we Mulungu kugendela dihuwi mwa Yesu Kilisito kwa wose wakuhuwila, kosoko kwachaka kubagula. ²³ Kosoko awanhu wose wagolosa wihi na kuhungukiligwa ne ditunyo dye Mulungu; ²⁴ wakutaliligwa chawelu chaka kwa njila ya dihewa, kulokela uhonya wuwile mugati ya Kilisito Yesu; ²⁵ yalafigwe ne Mulungu kuwa maliho kwa sakama yakwe kwa waya wene dihuwi ukwakwe. Ayino hayuwa kosoko yo konesa uchawelu we Mulungu, kosoko muufinyilisi wakwe we chilungu nghaulangile uwihi wa katali; ²⁶ hayuwa kuhomelela kwa chigele chino kuwa imwene imwecho ni muchawelu na yamutalile chawelu yuya iyakumuhuwila Yesu. ²⁷ Kahi inyiyona yetu ikulawahi? Yahechaka. Kwa dilagiso dihoki? Kwa milimo ihoki? Ninga putu! Ninga kwa dilagiso dyuwile mwihuwi. ²⁸ Kosoko chimanya fina munhu yakutaliligwa nhenda swanu ninga kwa ihuwi ninga siyo kwa kukola malagiso. ²⁹ Ama iMulungu ni wa Wayahudi muhala? Si Mulungu wa Wamembe nheifiya? Heye na Wamembe nheifiya, ³⁰ kosoko Mulungu ni yumwedu naye kawagolosa wechawelu wafinigwe kwa dihuwi dyawo, na wasifinigwe nawo kulokela dihuwi dyawo, ³¹ nong’amba chikubesa dilagiso kwa dihuwi dino? Putu! Ahanhu hakwe chikudimilila dilagiso.

¹ Chilonge choni, kosoko ya Ibulahim iBaba yetu kwa chimutufi? ² Kosoko inghowa Ibulahimu hakataliligwa nhenda swanu kwa njila ya milimo, kena chinhu cha kitunyila, ninga si hamwande ye Mulungu. ³ Kosoko matulumo gakugambaki? “Ibulahimu hakamuhuwila Mulungu, na haitaligwa kwe mwene fina Muchawelu.” ⁴ Hambiya kwa yuya yakutogoma mulimo, maliho siyo gakutaligwa kifana chinghwa, ninga kifana chinhu chimwagile. ⁵ Na kwa yuya inghakutogoma yakumuhuwila imwene iyakutalila wanhu awasimulungu, dihuwi dijo ditaligwa kifana uchawelu. ⁶ Nheifo Daudi yakulonga kwa kumotesa awaya wataliligwe chawelu ne Mulungu bila kugolosela milimo: ⁷ “Wamotesigwa wose awalekeleligwe wihi wao, na wihi wawo ugubikigwa. ⁸ Kamotesigwa munhu imwene Mundewa nghemutalila uwihi wakwe” ⁹ Togoleni mboto sino silongikwa ni kwa waya du wafinigwe ama na kwa wasifinigwe? Chikugamba, “Kwa Ibulahimu dihuwi dyakwe haditaligwa kuwa chawelu.” ¹⁰ Hakataliligwa finhani? Hayuwa foyowa yenghati yafinigwe? Hayowile ugele yafinigwe, ninga foyowile yekali. ¹¹ Hakahokela chitangilo cha kufinigwa, mutojo wa ichawelu woyowile nawo kwa njila ya ihuwi chigele foyowa yekali kufinigwa. Hayuwa kumugolosa yowe Baba wa wose awakuhuwila hata ugele wasinati wafinigwe, ninga wena ichawelu yowataliligwe, ¹² no nheifo yowe Baba wa waya wafinigwe, si kwa kufinigwa du ninga wandamile mbasi ye dihuwi adiya dyoyowile nadyo Baba yetu Ibulahimu chigele yenati yafinigwe. ¹³ Kwa dihuwiso dyoyakwija yahala, ichilunga hachilawile kwa Ibulahimu ama kwa lukolo lwakwe kwakulokela dilagiso, ninga kwa kulokela ichawelu ye dihuwi. ¹⁴ Kosoko inghowa awaya we dilagiso nowahasi, dihuwi digaluga dyachaka na dihuwiso nheifiya. ¹⁵ Kosoko dilagiso dikwigala nyono, ninga ahanhu hechaka ilagiso, basi hechaka ubanike. ¹⁶ Kosoko ya iyo dilagiso dima mwihuwi, uleke dihuwi dikale mwihewa na kuwa na nghinyo mulukolo wakwe wose, siyo du kwawakukola dilagiso, ninga kwa waya wakuhanga mwihuwi dya Ibulahimu (kosoko imwene ni Baba wa seye chose, ¹⁷ fina foitulumigwe, “Nikugolosa gweye uwe Baba wa mataifa mengi”) hamwande ye Mulungu imwene woyamuhuwile, iyakwinanga finhu ifisiuko na kufitenda fyuwe uko. ¹⁸ Yakuhuwila agasikuhuwilika, uleke yowe Baba wa mataifa mengi, “Kosoko yagaya galongigwe, no nheifo lukolo lwako usikwija utalika.” ¹⁹ Nghahunguke mwihuwi ugele foyadogage muchanhya ye mutufi wakwe, fowowile ufulusa kufa, (foyowa na minyaka kifana igana dimwedu) ne umusilatungulu we sinda se muke Sala. ²⁰ Ghowile na manhonge muchanya ye dihuwiso dye Mulungu, ninga hakakula kwa ludole mwihuwi dyakwe na kumutunya Mulungu, ²¹ na kuhuwila fina Mulungu kogolosa gose goyamuhuwise. ²² Kamei “Hayitaligwa ukwakwe kuwa chawelu.” ²³ Hambiya simbuli, “Haitaligwa ukwakwe,” haitulumigwe fina sikosoko yakwe muhala, ²⁴ ninga naseye nase. Yotaliligwa na ukwetu naseye chikumuhuwila imwene yamwinule Yesu Mundewa wetu kulawa muchilalo, ²⁵ iyalafigwe kufa kosoko ya wihi wetu na kwinuligwa kosoko ya kutaliligwa chawelu.

¹ Hambiya, kosoko chitaliligwa chawelu kwa njila ya ihuwi, china digoya hamwedu ne Mulungu kulokela Mundewa wetu Yesu Kilisito, ² kulawa muimwene chipata mboto mwiiyo chikwima; na chikitunyila dihuwi dyetu dyo kuhangila ditunyo dye Mulungu. ³ Na sididyo muhala, ninga kahi chikitunyila magayo, chimanya fina magayo gakwigala ufinyilisi, ⁴ na ufinyilisi ukwigala kupimigwa, na kupimigwa kukwigala ihuwi, ⁵ na dihuwi hadikudaha kumuleka munhu, kosoko wendo lwe Mulungu witiligwa mumimoyo yetu kwa njila ya Muhe Musunhile wochinghigwe. ⁶ Kosoko chigele fochahungukiligwe, muchigele chiswanu chikafike Kilisito hakofa kosoko ya wanhu awasimumanyile Mulungu. ⁷ Kosoko ni fikugutu munhu yafe kosoko ya muchawelu, ninga kosoko ya munhu muswanu yakudaha kufa. ⁸ Ninga Mulungu yakuchonesa wendo wakwe hata chigele fochowile wehi Kilisito hakofa kosoko yetu. ⁹ Ichikulu lugano hambiya, ni kutaliligwa chawelu kwa sakame yakwe, na chihonyigwa kulokela imwene ne inyono ye Mulungu. ¹⁰ Kosoko inghowa fochowile wanghondo hachilamuliligwa ne Mulungu kulokela difa dye Mwanagwe, nheifo chawelu lugano, kulamuliligwa, na kuhonyigwa kwa wumi wakwe. ¹¹ Si nheifo du, ninga chikitunyila Mulungu kulokela Mundewa wetu Yesu Kilisito, muimwene hambiya chihokela ulamulo. ¹² No nheifo, kifana wihi fowingile muchilunga kwa njila ya munhu yumwedu, na difa nadyo hadija kwanjila ya wihi, kamei difa hodikwenela kwa wose kosoko wose wagolosa wihi, ¹³ wihi hawuwa muchilunga hata chigele dilagiso disinati dije, ninga wihi usikutaligwa inghowa hechaka ilagiso. ¹⁴ Ninga difa hadyuwa uko kulawa Adamu mpaka Musa, na hadiwalongosa hata awasigolose wihi ufina wa Adamu umufano wa yuya yakwenda yeje. ¹⁵ Ninga ichighwa sichifanile wihi uya. Kosoko inghowa matewa wafa kosoko ya kubana kwa munhu yumwedu, nheifo chawelu dihewa dya munhu yumwedu Yesu Kilisito dyongeseka kosoko ya matewa. ¹⁶ Na ichinghwa chisikifanile wihi uya we munhu yumwedu. Kosoko uliganiso ukwandamila dikosa dye munhu yumwedu na kwigala uliganiso, ninga ichingwa ichene chikwandamila makosa mengi chikwigala kutaliligwa chawelu. ¹⁷ Kosoko inghowa kwa kubana kwa munhu yumwedu, difa dyenela kosoko ya yuya munhu yumwedu, yokuwa lugano kwawaya wakuhokela dihewa dimemile na chiya ichingwa che chawelu wohala uumi kwayuya munhu yumwedu, Yesu Kilisito. ¹⁸ Kahi fina uwihi wa munhu yumwedu fowigale difa kuwanhu wose, no nheifo igolosa ya uchawelu wa munhu yumwedu ikwigala uwumi na kulekeleligwa kuwanhu wose. ¹⁹ Kosoko ya kuleka kuwa na chogoho kwe munhu yumwedu wengi hawagolosa wihi, nheifiya kosoko ya chogoho cha munhu yumwedu wengi wokuwa wachawelu. ²⁰ Ninga dilagiso hadingila, hamwedu nadyo ubani hawongeseka, ninga wihi fowongeseke dihewa dye Mulungu hadyongeseka lugano, ²¹ uleke kifana, wihi foukulongosa mudifa, nheifo dihewa nadyo dilongose mukutaliligwa chawelu, kwingila kuwumi wa majuwa gose kulokela Yesu Kilisito Mundewa wetu.

¹ Togoleni chigambeki? Chigendelele muwihi uleke dihewa dyongeseke? ² Gwe putu! Yokuwa nhani aseye chufile muwihi kahi chuwe womi muwihi? ³ Hamumanyile fina chose chibatisigwe mugati ya Kilisito Yesu hachibatisigwa mudifa dyakwe? ⁴ Kwanheifo hachisikigwa hamwedu naye kwa njila ya ubatiso mudifa, uleke kifana Kilisito foyenuke kulawa mudifa kwa itunyo dye Baba, ase nase chigende muusha we uwumi. ⁵ Hambiya halika chihanga naye mudifa kifana idyakwe, chohanga naye kahi mukwinuka kwakwe. ⁶ Chimanya fina unhu wetu wa katali usambasigwa hamwedu naye, uleke umutufi we wihi ubanigwe, uleke chinghowe watumwa wa wihi keli. ⁷ Kosoko imwene iyafile kalekeleligwa kutali ne wihi. ⁸ Ninga inghowa chufa hamwedu na Kilisito chikuhuwila chokwikala hamwedu naye. ⁹ Chimanya fina Kilisito, foyafulusa kwinuligwa mudifa, nghakufa keli; difa dichaka ludole muchanya yakwe keli. ¹⁰ Kosoko difa dyoyafile hakaufila wihi lumwedu du, ninga uumi woyowile nawo kenawo kosoko ye Mulungu. ¹¹ Kosko iyo nanye dogeni muwecho kuwa wafile muwihi womi muKilisito Yesu. ¹² Kwanheifo, munghaleke wihi ulongose mitufi yenu iikubanika na kuhulikisa sulumisi sakwe. ¹³ Munghagendelele kahi kulafa filungo fyenu fyuwe fiya fya kugolosa wihi, ninga kilafeni muwecho kwe Mulungu kifana wanhu walawile kudifa kwija kuwumi, na kulafa filungo fyenu kwe Mulungu fyuwe fiya fye ichawelu. ¹⁴ Kosoko iyo wihi wokuwa wichaka ulongosi mugati yenu, kosoko hamuwile hasi ye dilagiso ninga mudihewa. ¹⁵ Togoleni! Nong’amba chigolose wihi kosoko hachuwile hasi ye dilagiso, ninga hasi ye dihewa? Gwe putu! ¹⁶ Hamumanyile fina kwayuya wowose womukilafa ukwakwe kifana watumwa wakogoha, mugaluka watumwa ukwakwe wo mukogoha, hegu yuwe wihi ukulongosa kudifa ama chogoho ichikulongosa kuuchawelu? ¹⁷ Ninga yalumbigwe Mulungu kosoko anyeye, mowile watumwa wo wihi, mugaluka wanhu wakuhulika kulawa kufidoga kugati, amafuso ge umanyi uya womwekigwe hasi yakwe, ¹⁸ na mulekeleligwa kutali kulawa kuwihi, mugaluka mbiya watumwa we chawelu. ¹⁹ Nikulonga chimunhumunhu kosoko ye inyuwa yenu ye chimutufi. Kifana fomwakilafile filungo fyenu kuwa watumwa wa kugolosa mbuli so wihi mukulu na mukulusi, nheifo lafeni filungo fyenu fyuwe watumwa we kugolosa ichawelu kwa usunhile. ²⁰ Kosoko fomowile watumwa wa wihi hamuwa kutali ne ichawelu. ²¹ Hamupata chotoko chaki majuwa gaya kwa kugolosa mbuli sa chinyala? Indumo ya mbuli aso ni difa. ²² Ninga hambiya mulekeleligwa kulawa wihi na kugolosigwa watumwa we Mulungu, chotoko cho mukupata ni usunhile. Na indumo yakwe uwumi wa majuwa gose. ²³ Kosoko digelo dyo wihi ni difa, ninga ichinghwa che Mulungu ni uwumi wa majuwa gose mugati ya Kilisito Yesu Mundewa wetu.

¹ Hamumanyile, wandugu sangu, kosoko nikulonga na waya awamanyile dilagiso, fina togoleni dilagiso dikumoha munhu nomo yemumi? ² Ni kifana mwanamuke yatoligwe foyohigwe ne dilagiso kwe mulume nomo ye mumi; ninga mulume yanghafa yakuwa kalekeleligwa ne dilagiso muchanhya ye mulume. ³ No nheifo kokwinangwa kena ihabwa inghowa yakwikala na mulume yungi chigele mulume kabaho mumi. Ninga inghowa mulume yeja yafa, basi kalekeligwa ne dilagiso, na halika kotoligwa na mugosi yungi hakudaha yenangwe kena ihabwa. ⁴ No nheifo, wambuya sangu, hamufa mudilagiso kulokela mutufi wa Kilisito, uleke muwe kwa yungi ambaye no imwene yenuligwe mudifa uleke cheleke mamudyo kwe Mulungu. ⁵ Fochowa munhenda se chimutufi, musulumisi we wihi, ukulemana ne dilagiso hachitogoma milimo na kweleka mamudyo ga difa. ⁶ Ninga hambiya chilafigwa kulawa mudilagiso, mudifa idyachikolile muutumwa, uleke chitogome muusha na siyo munyuwa ya katali ye diwandiko, ninga mumikalile misha ye Muhe. ⁷ Hambiya chigambeki kahi? Togoleni idilagiso digaluka wihi? Du hata! Ninga woile si dilagiso sowile nikuumanya wihi, hata sowile nikumanya dilagiso dikugamba, “unghasulumile chinhu che miyago.” ⁸ Ninga wihi haupata luneka kwa diya dilagiso, na kweleka mugati yangu chila usulumisi wihile. Kosoko wihi muhala bila dilagiso ufa. ⁹ Hanuwa mumi fonowile nachaka dilagiso, ninga dikeje adiya dilagiso wihi winuka keli ¹⁰ kamei honikufa, kamei idilagiso dyonahuwile fina dyokwigala uwumi digaluka ifa ukwangu. ¹¹ Kosoko wihi kwa kupata luneka mudilagiso, haunidanhilisa na kulokela didyo hounikoma. ¹² Kosoko tolati isunhika kahi ne dilagiso ni isunhi na dyachawelu kahi iswanu. ¹³ Togoleni nong’amba idiswanu kahi digaluka ifa ukwangu? Gwe putu? Hawuwa wihi, wendeunikoma mugati yangu kulokela gaya maswanu, uleke wihi woneke fina ni wihi, na fina kulokela dilagiso uwe wihi wihise lugano. ¹⁴ Kosoko chimanya fina dilagiso ni kosoko ya kugati ye muhe; ninga aniye nuwa mumutufi, niguligwe muutumwa we wihi. ¹⁵ Sikimanya chonikugolosa nimwecho. Kosoko agaya gonikuhananga nigolosa sikugolosa, ninga nikugolosa agaya gonisikuhananga. ¹⁶ Hambiya inghowa nikugolosa agaya gonisikwenda, nikudifumila dilagiso fina ni swanu. ¹⁷ Ninga chawelu siniye nikwenda kugolosa gano, ninga uwihi uya wuwile mugati yangu. ¹⁸ Kosko nimanya fina mwichaka uswanu wowose ukwikala mugati yangu, uwile mumutufi wangu. Kugolosa diswanu dyonikuhananga, ninga sikudaha kudigolosa. ¹⁹ Kosoko sikugolosa diswanu dyonikuhananga, ninga dihile dyonisikwenda kugolosa. ²⁰ Hambiya halika nikugolosa idyosikwenda, basi siniye muchidoga changu nikugolosa, ninga uwihi uya wuwile mugati yangu. ²¹ Hambiya nyona fina nomo nikuhanaga nigolose dilagiso, kwina dihile dikunijila. ²² Kosoko nikudibwedelela dilagiso dye Mulungu mugati yangu, ²³ ninga nikona mufilungo fyangu ilagiso dingi dikitowa ne chidoga changu, na kunigolosa niye mutumwa kwilagiso dye wihi adiya dikwikala mugati ye filungo fyangu. ²⁴ Usungu wangu mukiwa nikufilaki niye! Nani yakwenda yanihonye kulawa mumutufi awu we difa? ²⁵ Nikumulumba Mulungu kulokela Yesu Kilisito Mundewa wetu! Hambiya inghowa nonheifo basi niye mumisungu yangu nikuditogomela dilagiso dye Mulungu, ninga mumutufi nigaluka namutumwa wa ilagiso dya wihi.

¹ Hambiya hechaka uliganiso kwa waya woile mugati ya Kilisito Yesu. ² Kosoko dilagiso dye Muhe we uwumi wuwile mugati ya Kilisito Yesu unika hatali ne dilagiso dye wihi ne difa. ³ Kosoko Mulungu kagolosa gahunguligwe ne dilagiso kosoko ye umutufi we chimunhu kwa njila ya kumwigala Mwanagwe imwecho kwa futa ya uunhu une wihi uleke yauleuse wihi na kuuliganisa chimutufi. ⁴ Uleke agakuhanangigwa mwilagiso gamemelekele mugati yetu seye, chikugenda si kwa mutufi, ninga kwa Muhe na kwika fidoga fyetu musimbuli se chimuhe. ⁵ Kosko awaya wakwandamila mitufi weka fidoga fyawo musimbuli se chimutufi, ninga awaya wakwandamila mutufi weka fidoga fyawo Mumuhe. ⁶ Kosoko chidoga che mutufi ni difa, ninga chidoga cha Muhe ni wumi na digoya. ⁷ Kosoko iyo, ichidoga chikwandamila mutufi ni chinghondo kwe Mulungu, kosoko hachikudaha kufumila dilagiso dye Mulungu na chisikwija chifumila. ⁸ Na wose awakwandamila mitufi wasikudaha kumwedesa Mulungu. ⁹ Ninga inghowa Muhe we Mulungu yakwikala mugati yenu, basi nyeye musikwandamila mutufi, ninga Muhe. Munhu wowose yechaka Muhe wa Kilisito ayo siyo wakwe.. ¹⁰ Ninga inghowa Kilisito kowa mugati yenu, basi mutufi wufa kosoko ye wihi, na Muhe wa mumi kosoko ye ichawelu. ¹¹ Inghowa Muhe wakwe imwene iyamwinule Yesu Kilisito muchilalo ukwikala mugati yenu, imwene iyamwinule Yesu Kilisito kulawa muchilalo komwinghani wumi mumitufi yenu yuwile mukufa kwa kulokela Muhe wakwe iyakwikala mugati yenu. ¹² Hambiya wandugu sangu, chikudaigwa, siyo chimutufi, ninga chikale chimutufi, ¹³ kosoko inghowa ukugenda kwa kwandamila mutufi, mukuhananga kufa; ninga inghowa mukwandamila Muhe na kukoma nhenda sihile se chimutufi, mokuwa womi. ¹⁴ Kosoko wose wakulongosigwa ne Muhe we Mulungu awo no wana we Mulungu. ¹⁵ Kosoko musihokele muhe wa chitumwa na manhonge, ninga muhe wa kugoloswa wana. Nomo chikulila “Aba! Nong’amba Baba!” ¹⁶ Muhe imwecho yakuhomelela hamwedu ne fidoga fyetu, fina aseye cha wana we Mulungu, ¹⁷ na inghowa cha wana kahi cha wahasi, wahasi we Mulungu hamwedu na Kilisito, inghowa chikusambasika ni uleke chije chitunyigwe hamwedu na imwene. ¹⁸ Nikona fina magayo ge chigele chino gasifanile ne ditunyo dyonikwija nipata chigele cho kugubuligwa kwakwe ukwetu. ¹⁹ Kosoko fyumbe fyose fikugojela kwa nghwina lugano ulugubulo lwe wana we Mulungu; ²⁰ Kosoko fiyumbe fyose hafikiigwa hasi ye uliganiso, siyo fofikwenda ifyecho, ninga foyakwenda imwene iyafikile hasi, mwihuwi. ²¹ Kosoko fyumbe ifyecho nafyo fyolekeleligwa kulawa muutumwa wo kudoda, uleke fipate indekelelwa ye ditunyo dya wana we Mulungu. ²² Chimanya fina fyumbe fyose fikugula usungu hamwedu mpaka hambiya; ²³ ninga siyo du fiyumbe, ninga hata seye chiwecho, ichine mamudyo gaya ge nghonga ge Muhe, chikugula na kugojela kugoloswa kwetu, uhonya we mitufi yetu. ²⁴ Kosoko kwa ihuwilo hachihonyigwa. Hambiya ihuwiso idikoneka si ihuwiso kahi, kosoko nani yakugendelele kuhuwila ichinhu chifuluse kwija? ²⁵ Ninga inghowa chikuhuwila ichinhu ichisikoneka, basi chikuchigojela kwa ufinyilisi. ²⁶ No nheifo na Muhe naye yakuchitasa mukuhungukiligwa kwetu; kosoko chisidahile kutasa ifene fo ikuhanangigwa, ninga Muhe imwecho yakuchitasila mbuli nghugutu na hata kwa kulila. ²⁷ Na Imulungu iyakulanga mimoyo, kamanya ichidoga che Muhe kuwatasila wasunhile kwa kwandamila ifene foyakwenda Mulungu. ²⁸ Chimanya fina musimbuli sose, Mulungu yakutogoma milimo hamwedu na maswanu na waya awakumwenda, awenangigwe kwa nyenda yakwe. ²⁹ Kosoko awaya yawamanyile kulawa katali, hakawasagula, wowe futa kifana ye Mwanagwe, uleke yowe Nghulahanju mugati ya wandugu wengi. ³⁰ Kahi awaya woyawasagule kulawa katali hakawenanga; na waya woyenange hakawatalila chawelu; na waya woyewatalile chawelu kahi hakawatunya. ³¹ Togoleni chigambeki musimbuli sino? iMulungu yanghowa ulwandi lwetu, nani yokuwa muchanhya yetu? ³² Imwene inghamulekelele Mwanagwe, ninga hakamulafa kosoko yetu, togoleni nghochinga chila chochikuhanaga? ³³ Nani yakwenda yawalahe awasaguligwe ne Mulungu? iMulungu no ya watalilile chawelu. ³⁴ Nani yakwenda yawaliganise? Si Yesu Kilisito yafile, heye, imwene yenuligwe muchilalo, yowile mukono we kulume we Mulungu, iyakuchitasila ³⁵ Nani yakwenda yachibagule seye no wendo wa Kilisito? Wokuwa ukuguguti, ama tabu, hegu magayo, ama njala, au sakasa, ukomikomi, hegu ipanga? ³⁶ Fina foitulumigwe kugamba, “Kosoko yako chikukomigwa chilo na misi; chikoneka kifana ngholo sa kuchinjigwa.” ³⁷ Gwe putu, musimbuli sose sino aseye cha wasumi kahi kuloka awasumi kwa kulokela imwene iyachendile. ³⁸ Kosoko hambiya nimanya fina sidifa, hegu wumi, ama malaika, kahi si mukulu wa isi, ifihambiya hegi ifikwija, hechaka udaha, ³⁹ agekuchanhya kahi agehasi, ama chochose chumbigwe ichikudaha kunibagula ne wendo we Mulungu mu Kilisisto Yesu Mundewa wetu.

¹ Nikulonga ichawelu mugati ya Kilisito, na ninga sikudanha; chidoga changu chikunihomelela ne Muhe Musunhile. ² Nina usungu lugano na magayo agasikuhela mumoyo wangu. ³ Kosoko nikutasa hata niye nimwecho nidahe kusamisigwa na kutagigwa kutali na Kilisito kosoko ya wandugu sangu, wandugu we chimutufi. ⁴ Awano ni Waisilaeli, awagoloswe kuwa wana na wanhu we ditunyo ne dilagano, na kwinghigwa dilagiso, na kumufuga Mulungu, na mahuwiso gakwe; ⁵ awene no wene waBaba, na kulawa muwene kwa kwandamila mutufi nomo yalawile masihi iyejile muchanhya ya wose, iyakutunyigwa majuwa gose. Hano. ⁶ Siyo kugamba fina imbuli ye Mulungu idugikana. Kosoko si Waisilaeli wose ni walawile muisilaeli ⁷ na kahi siwose ni wana wa chawelu wa Ibulahimu; ninga, “Kwa kulokela Isaka wana wako wokwinangigwa.” ⁸ Ayino sikugamba fina wose wana we chimutufi ni wana we Mulungu, ninga awana we dihuwiso wakutaligwa fina ni wana wa welekwa. ⁹ Kosoko nhafi nofodikulonga dihuwiso kugamba, “Muchigele chikifane chino nokuya na Sala kokuwa na mwana.” ¹⁰ Ninga si nheifo du; chinhu chikifane chicho hachigoloseka kwa Lebeka, ugele foyowile na inda ye wanagwe kwe mugosi wakwe yumwedu, iBaba yetu Isaka. ¹¹ Hata fowowile wekali kwelekigwa, na kugolosa mbuli yoyose swanu au ihile ( uleke nyenda ya Mulungu yo kusagula igendelele, ¹² siyo kwa nhenda, ninga kwa lwinango lwakwe) mwanamuke yuya hakatamiligwa fina, “Mukulu komutogomela mudodo.” ¹³ Fina foitulumwe, “Nimwenda Yakobo ninga Esau nimudesekela.” ¹⁴ Togoleni hambiya chogambaki? Mulungu kena kwendelela? Du hata! ¹⁵ Kosoko hakamugamba Musa, “Nomonela ubasi ayuya wonikumonela ubasi, kahi nomonela usungu ayuya wonikumonela usungu.” ¹⁶ Hambiya siyo du kwa chimunhumunhu kahi kwa kwenda kwa munhu, ninga kwe Mulungu iyakonesa ubasi. ¹⁷ Kosoko matulumo gagamba kwa Falao, “Hanikwinula gweye kwasoko ya konesa udaha wangu ukwako, uleke disina dyangu ditagusigwe muchilunga chose.” ¹⁸ Hakamonesa ubasi wakwe kwa yuya woyasagule imwecho, na kuiguma ukugutu mimoyo ya waya woyasagule. ¹⁹ Wamonga wonigamba, “halika no nheifo nhani ho yekali yakulonga muchanhya ya wihi wa wanhu? Nonani yodaha kulemesa nyenda yakwe?” ²⁰ Ninga agweye kwanani ukudaha kuwanga ne Mulungu? Togoleni Mumbi kodaha kuwanga ne ichumbo? Chumbo chigambe, “Nhani gweye unyumbile kifana nhafi?” ²¹ Ama imumbi nong’amba kechaka udaha muulongo, siyakuliganisa du awuno niugolosele chinhu achi na wuno nogolosele chiya cha itunyo? ²² Chogolosa choni inghowa Mulungu yanghamua konesa inyono yakwe ne udaha wakwe, kwa ufinyilisi mukulu hakakilondela na fiya fiya foyagolose fifuluse kubanigwa; ²³ na yokuwa nhani ighowa kagolosa nheifo uleke yonese ugoli we ditunyo dyakwe kufiya fyoyonele ubasi, foyagolose kulawa katali fyuwe na itunyo; ²⁴ hata seye si hakachinanga, siyo kwa Wayahudi du, ninga hata na Wamembe? ²⁵ Hata nheifo yakugamba muchitabu cha Hosea, “Awaya wasowile wanhu wangu nowenanga wanhu wangu, na inghendigwe nomwinanga mwendigwa.” ²⁶ “Kamei yokuwa ahanhu wenagwe, ‘Siyo wanhu wangu,’ wokwinangigwa wana we Mulungu ye mumi.” ²⁷ Hata Isaya yakulila soko ya waisilaeli, “Chinghatala waisilaeli ni matewa kifana isanga ye bahali, ninga wakefu wakwija wahonyigwa, ²⁸ kosoko Mundewa kogolosa fina foyalongile imbuli yakwe na kuimalagisa chimwande kwa chawelu.” ²⁹ Na kifana Isaya foyagonese, “Inghowa Mundewa we inghondo woile nghachilekele cheleko hachisomigwa moto kifana Sodoma na kugolosigwa kifana Gomola.” ³⁰ Togoleni hambiya chigambeki? Awamembe wanhu wasimanyile chawelu, waipata ichawelu kwa kulokela dihuwi; ³¹ ninga awaisilaeli wamanyile ichawelu, yuwile mudilagiso, wasumigwa kudimemelesa dilagiso diya. ³² Nhani? Ni kosoko hawandamile dilagiso diya kwa njila ya ihuwi, ninga kwa nhenda sawo. Watowa nghwalo mwiwe dya munghanda, ³³ fina foitulumwe, “Langeni nikwika diwe Musayuni, iwe dikutowesa wanhu nghwalo, ikangalawe dikuwagolosa wogwe, kahi wowose yakumuhuwila imwene nghegumigwa chinyala.”

¹ Wandugu sangu, kwenda kwe umoyo wangu ne inhasa kwe Mulungu ni kosoko yenu mudahe kuhonyigwa. ² Kosoko nikudaha kuwahomelela fina, wena ludole kwe Mulungu, ninga wasigumigwe ujelu. ³ Kosoko inghowa hawaimanyile ichawelu ikulawa kwe Mulungu, na kuhananga kukongha chawelu yawo awecho, wamwichaka muchawelu ye Mulungu. ⁴ Kosoko Kilisito no ndumo ye dilagiso, uleke chila yakuhuwila yataliligwe chawelu. ⁵ Musa hakatuluma muchanhya ye ichawelu ikulawa mwilagiso, kugamba, “Munhu iyakugolosa didyo kokwikala na kugenda mudidyo.” ⁶ Ninga ichawelu iya ikulawa mwihuwi ikugamba, “Unghagambe kumoyo wako nani yokwila kulanga?” (uleke, yamwigale Kilisito hasi) ⁷ ama, “Nani yodulika mpaka hasihasisi?” (uleke yamukwise Kilisito kuchanhya kulawa kwa wafile). ⁸ Ninga igambigwaki? “Imbuli yahabehi nagwe, mumilomo yako na mumoyo wako.” (nong’amba, imbuli aiya ye dihuwi yochikutagusa); ⁹ Kosoko unghalamba kwa mulomo wako fina Yesu ni Mundewa na kuhuwila kugati yo moyo wako fina Mulungu hakamwinula kulawa muchilalo, kohonyigwa. ¹⁰ Kosoko kwa moyo munhu yakuhuwila na kupata ichawelu, na kwa mulomo yakulamba na kuhonyigwa. ¹¹ Matulumo gakugamba nhafi, “Hechaka yamuhuwile kamei yagumigwa chinyala.” ¹² Kosoko hechaka Muyahudi hegu Muyunani imwene ni Mundewa wa wose, yakuwengha wose wakumwinanga kwa undewa. ¹³ Kosoko, “Chila yakwinanga mwisina dye Mundewa kohonyigwa.” ¹⁴ Ninga womwinanga nhani munhu awasimuhuwile? Kahi womuhuwila finhani munhu wasimuhulike? Hata nheifo womuhulika nhani bila munhu kuwahubiliya? ¹⁵ Kahi wohubili nhani bila kwigaligwa? Fina foitulumigwe, “Ni miswanu lugano migulu yawo waya awakwigala imbuli swanu!” ¹⁶ Ninga si wose waihulikise imbuli swanu; kosoko mugonesi Isaya yakugamba, “Mundewa nani yahuwile simbuli setu?” ¹⁷ Hambiya nong’amba, dihuwi dikwija kwa njila ya kuhulika, na kuhulika kukwigaligwa ne imbuli ya Kilisito. ¹⁸ Ninga nikusa togoleni hawahulike? Du wahulika; kosoko, “Majwi gawo gahulikika muchilunga chose, na mbuli sawo kundumo ye chilunga.” ¹⁹ Keli kahi nikusa, waisilaeli wasimanyile? Kunghonga Musa hakagamba, “Nowaguma finju awanhu awasiditaifa; hamwedu na ditaifa dibwalate nowaguma nyono.” ²⁰ Kamei Isaya yakulonga kwa nghinyo kugamba, “Nyonekana kuwanhu awasendewanikongha; nikionesa kwa wanhu wasinusile.” ²¹ Ninga kwa waisilaeli yakugamba, “Misi na chilo haniwanyooshela mikono yangu wanhu wasikuhulika na wechaka chihuliko.”

¹ Hambiya, nikusa, togoleni Mulungu hakawalema wanhu wakwe? Gwe putu! Aniye du nimwecho namuisilaeli, mwana wa lukolo lwa Ibulahimu, nilawa mwikabila dya Benyamini. ² Mulungu nghawalemile wanhu wakwe woyawamanyile kulawa katali. Nghumanyile matulumo fogakulonga muchanhya ya Eliya, ifene foyawasongese awaisilaeli hamwende ye Mulungu? Yakugamba, ³ “Mundewa wawakoma awagonesi wako, wamola ahanhu ho kufugila; nisigala niye niwaiyeka, nawo wanikongha wanikome.” ⁴ Ninga Mulungu hakamubidula nhani? “Niikikila fugasi ya wanhu figulu mutandatu awasikumufugamila Baali.” ⁵ Hambiya no nheifo kwa chigele chino cha hambiya, kwina wanhu wasigala, wasaguligwa kwa mboto. ⁶ Ninga inghowa kwa mboto, basi ichaka haja ya kutogomela milimo, hegu mboto ileke kuwa mboto. ⁷ Yanhani hambiya? Awaisilaeli wasumwa kupata chiya chowendewakonha. Ninga awaya wasaguligwe hawachipata, ninga wasigale hawowa wakugutu, ⁸ fina foitulumwe kugamba, “Mulungu hakawengha muhe wa ukugutu, wena meso ninga wasikona na nghutwi ninga wasikuhulika, mpaka diyelo.” ⁹ Kahi Daudi yakugamba, “Chakudiya chawo na chuwe italuma na mutego, hanhu ho kutowa nghwalo na maliho ukwawo; ¹⁰ meso gawo gowe lwisa uleke wanghone, ne migongo yawo igonje chigele chose.” ¹¹ Hambiya nikusa, togoleni watowa nghwalo na kugwa? Gwe putu! Ninga kulokela kutowa nghwalo kwawo uhonya hauwijila wamembe, uleke kuwengha finju awaisislaeli. ¹² Hambiya halika kutowa nghwalo kwawo, kwigala ugoli kuchilunga, basi na kusumwa kwawo kwigala ugoli Kuwamembe, hambiya siikuwa lugano kuumemi wawo! ¹³ Ninga nikulonga na nyeye Muwamembe. Foinimutumigwa wa Wamembe, nikutunya umulimo wangu ¹⁴ uleke niwagume finju Awayahudi wayangu, nhegele nohonya wamonga. ¹⁵ Kosoko inghowa kulema kwawo kwigala kulewanisa kwe chilunga, ninga kuhokeligwa kwawo yokuwa yoni halika siyo umi wawo chigele cho kufa! ¹⁶ Inghowa mamudyo ga kulafigwa kunghonga ni masunhile, nheifo ne mugunda wose ugaluka muswanu, kosoko inghowa idisina dye dibiki disunhika basi ne manhambi nago gasunhika. ¹⁷ Ninga inghowa manhambi gamonga hagadumuligwa, kamei agweye go museituni wa kumbago kuhandigwa mugati yawo, basi kugaluka muhangi nagwe ukuhanga umemi lwe ugoli we dibiki, ¹⁸ unghakitunyile mumanhambi. Kosoko unghakitunya, gelegela fina siyo no gweye ukudahisa idisina dye dibiki, ninga idisina idyecho no dikukudahisa gweye. ¹⁹ Nhegela kogamba, “Manhambi hagadumuligwa uleke nikigwe niye.” ²⁰ Ayo ni chawelu. Kuwa hagadumuligwa kosoko ya kuleka kuhuwila kwawo, ninga gweye ukwima kosoko ye dihuwi du. Hambiya unghowe mwiyoni, ninga ukilangisise. ²¹ Kosoko inghowa Mulungu nghagalekile manhambi agecho ge dibiki, nhegela hakwanga yakuleke nagweye. ²² Uutange uswanu ne ufinyilisi we Mulungu: Ufinyilisi kuwanya wogwile, ninga uswanu we Mulungu ukwenu, ukuwagolosa nyeye mugendelele muuswanu wakwe; sinheifo nhegela anye nanye nhanga du mudumuligwe. ²³ Hambiya hata awamonga muisilaeli, woile wahuwile nhanga wengisigwe, kosoko Mulungu kena ludole lwa kuwengisa keli. ²⁴ Kosoko inghowa kudumuligwa kulawa hanhu howoile katali hene museituni wa kumbago na kwingisigwa kwingi kusikwawo, ninga kumuseituni umuswanu, siikuwa lugano kwawaya awemuseituni wawo wa katali kwingisigwa ukwawo. ²⁵ Hambiya mungheje mukigamba mwina misungu kusuma fomuwile wandugu sangu, nikuhananga mumanye ichifiso chino fina ukugutu uwejila wanhu wa Isilaeli, mpaka Awamembe wowe wengi awakwingila. ²⁶ Kwanheifo awaisilaeli wose wohonyigwa; fina foitulumigwe, “Mwihula kokwija kulawa Sayuni kobana isimbuli sihile kulawa kwa Yakobo; ²⁷ na adino dyokuwa ilagano dyangu hamwedu nawo nomonikuwaleusila wihi wawo.” ²⁸ Kosoko ye imbuli swanu wagaluka wanghondo we Mulungu, kosoko yenu; ninga kwa kusaguligwa wagaluka wendigwa kosoko ya waBaba sawo. ²⁹ Kosoko fighwa ne lwinango lwe Mulungu lwichaka chibidubidu. ³⁰ kifana katali fomowile mwichaka chihuliko kwe Mulungu, ninga hambiya muhokela ubasi kosoko ya kuwachaka chihuliko kwawo, ³¹ Hambiya wagaluka wasikwenda kuhulika, uleke kwa ubasi wonesigwe ukwenu nawo wauhokele. ³² Kosoko Mulungu kawomba wanhu wowe nheifo uleke yonese ubasi wakwe kwa wose. ³³ Kusi ye ugoli no ubala ne misungu yakwe Mulungu! Isiikudaha kusakuligwa, nani yodaha kuumanya uliganiso lwakwe ne sinjila sakwe! ³⁴ “Kosoko nonani yachimanyile ichidoga che Mundewa, ama nani yakudaha kuwa mulolesi wakwe?” ³⁵ “Hegu nani yekudaha kumwingha ichinghwa yamuwisile?” ³⁶ Kosoko kulawa muimwene na kulokela imwene finhu fyose fyumbigwa. Ditunyo dina imwene majuwa gose. Hano.

¹ Hambiya nikuwatasani wandugu sangu, kwa ubasi wa Mulungu, lafeni mitufi yenu yuwe kifana nhambiko imumi isunhile, kahi ikuhokeligwa kwe Mulungu, ayo no ifuga yenu ye chimuhe. ² Munghandamile mbuli se chilunga chino, ninga muwe washa mufidonga fyenu mudahe kutanga go yakwenda Mulungu, kahi goni amaswanu na gamemelekele. ³ Na kosoko ya mboto yo ninghigwe ne Mulungu, nikumuhananga chila munhu ukwenu yanghakiyone imwene munhu mukulu lugano kusuma foyakuhanangigwa yowe, ninga yakiyone musindamafu na yalamule ifene foikuhanagigwa mudihuwi dyoyenghigwe ne Mulungu. ⁴ Kosoko mumutufi umwedu china filungo fingi na filungo fyose fisikutogoma mulimo umwedu, ⁵ nheifo ase nase cha wengi ninga cha mutufi umwedu mugati ya Kilisito, chila munhu na miyagwe. ⁶ Chine ifinghwa fisiligane, kosoko ye imboto yakwe yo yachinghile chitogomele; inghowa ugonesi basi chiugolose kwa dihuwi dyetu ⁷ Inghowa kutogoma, chitogome na iyakufusa na yafuse, ⁸ iyakujama na yajame, iyakulafa na yalafe kwa undewa. Iyakutasa na yagolose yanghasoke; iyakonela wanhu ubasi na yagolose kwa chinyemi. ⁹ Wendo umeme, desekeleni wihi, koleni lugano amaswanu; ¹⁰ wendo lwe chindugu uwe mugati ya chila munhu na miyagwe, kiyoneseni chogoho nyenye kwa nyenye. ¹¹ Munghowe wadoba, ninga muwe na ludole mumimuhe yenu kumutogomela Mulungu. ¹² Bwedeleleni mwihuwi, muwe wafinyilisi mumagayo, wanhu wa mataso. ¹³ Lafeni finhu fyenu muwatase awasunhile, yuweni wandewa kuwageni. ¹⁴ Wamoteseni awaya wakuwasambasafibi; wamoteseni munghawaligitise. ¹⁵ Bwedeleleni na waya awakubwedelela, lileni na waya awakulila. ¹⁶ Mwikale kwa kifumilisa munhu na miyagwe, munghadoge makulu, ninga goloseni na amadodogi nago, yuweni waholo kahi munghakiyone fina mwina ubala kusuma wayenu. ¹⁷ Munghakilihe wihi kwa wihi, ninga amaswanu kumwande ya wanhu wose. ¹⁸ Inghadahika, kuulwandi lwenu, kaleni digoya na wanhu wose. ¹⁹ Wandugu, munghakilihe wihi nyenye kwa nyenye, ninga lekeni inyono ye Mulungu imwecho ilamule, kosoko itulumwa fina “Maliho ga wihi kwa wihi ni gangu nimwecho noliha, yakulonga Mundewa.” ²⁰ Sinheifo du, “Ninga hata inghowa wanghondo wako wena njala wenghe chakudiya; wena nghilu wenghe meji, kosoko kwa kugolosa nheifo ukuwagumila moto wa makala mumatwi gawo.” ²¹ Munghasumwe ne wihi, ninga usumeni wihi kwa uswanu.

¹ Chila munhu yawahulike awene ludole, kosoko hechaka ludole uusilawile kwe Mulungu; hata uya wibaho ulawa kwe Mulungu. ² Hambiya munhu wowose yakulemana ne ludole uwo yakulemana ne Mulungu iyawikile, nawo wakulemana na uwo wohokela uliganiso. ³ Kosoko awakulongosa hawakutowa wanhu kosoko ya nhenda swanu, ninga sihile. Ukuhananga uwe munhu yechaka chogoho ne wasilikali? Golosa maswanu na kohokela ditunyo dyakwe; ⁴ Kosoko imwene ni mutogomi we Mulungu ukwako kosoko ya maswanu. Ninga inghowa ukugolosa gehile gowogoha, kosoko uludole wusikulonda dipanga bila mbuli ihile! Kosoko ni mutogomi we Mulungu yakumuliha chila imugolosa wihi. ⁵ Hambiya ukuhanangigwa uhulikise, siyo du kosoko ya kogoha, ninga kwa chidoga. ⁶ Kosoko ya iyo mukuliha kodi, kosoko awene ludole ni watogomi wa Mulungu wakiidasa musimbuli sino. ⁷ Liheni gose agakuhanangigwa na wene, munhu wa kodi mwingheni kodi yakwe, munhu wa ushulu mwingheni ushulu wakwe, munhu wa chogoho mwingheni chogoho. ⁸ Munghadaiigwe chinhu na munhu wowose ninga, kiyendeni nyenye kwa nyenye, kosoko iyakumwende miyagwe kamemelesa dilagiso. ⁹ Kosoko dilagiso digamba, “Unghagolose dihabwa, unghakome, unghahije; unghasulumile”; na malagiso goose gohigwa mwimbuli imwedu nayo ni “Mwende miyago fona foikiyenda gomwecho.” ¹⁰ Wendo lusikumugolosela munhu mbuli ihile, hambiya nong’amba wendo no umemesi we dilagiso. ¹¹ Chinghaleka gago, ninga manyeni ichigele, fina ugele wo kugona hambiya uhela inukeni musinhongo. Kosoko uhonya uchisegelela hambiya kusuma fochowile chikali kuhuwila; ¹² chilo chigendelela lugano, misi yahabehi. Chileke simbuli se chisa na kufala filama fye ujelu; ¹³ chigendeni kwa uswanu kifana wanhu wa hemisi, siyo kwa ukobo na ulefi wa gimbi, siyo kwa mbuli sihile na dihabwa, na kugomba na finju. ¹⁴ Ninga, mufaleni Mundewa Yesu Kilisito, na muunghaulange mutufi na kwaka kwa usulumisi wakwe wihile.

¹ Wahokeleni waya wahungukiligwe mwihuwi, ninga munghalemane na madonga gawo. ² Wamonga wakuhuwile kudiya chila chinhu, chigele wamonga wakwenda mboga muhala. ³ Awakudiya wanghawabese awasikudiya, naye inghakudiya yanghamubese inghadiile, kosoko Mulungu kamuhokela. ⁴ Agweye nonani ukwenda kumuliganisa mutogomi wa miyago? KweMundewa wakwe imwecho yakwima au yakugwa. Ninga kokwinuligwa kosoko Mundewa yakudaha kumwinula. ⁵ Wamonga wakuliganisa fina, dijuwa dimonga iswanu lugano kusuma dimonga, chigele wamonga wakuliganisa majuwa gose fina galigana. Chila munhu na yatange mumisungu yakwe imwecho. ⁶ Awaya wakukola majuwa, wakugakola na kugatunya kosoko ye Mundewa, na waya wakudiya wakudiya mwitunyo dye Mundewa, kosoko wakumwingha ilumbo Mulungu, na yuya inghakudiya nghadiile mwitunyo dye Mundewa, naye yakumulumba Mulungu. ⁷ Kosoko hechaka munhu mugati yetu iyakwikala kosoko yakwe imwecho, kahi hachikufa kosoko yetu chiwecho,. ⁸ Inghowa chikwikala chikwikala kosoko ye Mundewa, na inghowa chikufa chikufa kosoko ye Mundewa; basi hambiya, yuwe chufa ama chikwikala, aseye chawanhu wakwe Mundewa. ⁹ Kosoko Kilisito hakofa na kwinuka yekale keli, uleke yowe Mundewa wa fyose fyufile na ifyumi. ¹⁰ Nhani umuliganise imunduguso? Ama nhani gweye umubese munduguso? Kosoko chose chikwija chikwima hamwende ye uliganiso we Mulungu. ¹¹ Kosoko itulumigwa, “Fina fonikwikala yakulonga Mundewa, chila ifindi dyofugama hamwande yangu, na chila ilimi dyotunya kulamba Mulungu.” ¹² Basi hambiya, chila yumwedu wetu kolafa nhala yakwe kwe Mulungu. ¹³ Hambiya chileke kiliganisa chiwecho, ninga ibeka mulamule fina munhu yanghamukwakwalise miyagwe na kumukinya hegu kumuhindila njila. ¹⁴ Nimanya kahi, nitanga MwiMundewa Yesu fina hechaka chinhu chelekigwe chinyamafu, ninga chigaluka chinyamafu kosoko munhu kadoga fina ni chinyamafu, na chawelu ukwakwe munhu yo ni chinyamafu. ¹⁵ Inghowa mundugu sako yakubulagigwa ne fyakudiya fyoukudiya, kugaluka hukugenda muuwendo. Unghaleke fyakudiya fyoukudiya fimudese miyago, kosoko Kilisito hakofa kosoko ya yuyo naye. ¹⁶ Uswanu wako unghalongigwe kuwa wihi. ¹⁷ Kosoko undewa we Mulungu siyo kudiya na kunywa, ninga ichawelu ne digoya, kamei ne chinyemi mwiMuhe Musunhile. ¹⁸ Kosoko iyakumutogomela Kilisito mugago, ayo kahokeligwa ne Mulungu na kufumiligwa na wanhu. ¹⁹ Chandamile mbuli sa digoya, uswanu na mbuli sikujenga. ²⁰ Unghaibane milimo ye Mulungu kosoko ya chakudiya. Chawelu fyose ni fiswanu, ninga fiha kwa yuya iyakuwakwakwalisa wayagwe kosoko ya fyakudiya fyakwe. ²¹ Yokuwa ibeka uleke kudiya, inghowa kudiya kwako kukuwakwakwalisa na kuwagolosa wayago wogwe. ²² Dihuwi diya dyowinadyo, uwe nadyo mumoyo wako gomwecho hamwande ye Mulungu. Ibeka awaya awechaka soko ya kiliganisa kosoko ya gaya gowakufumila. ²³ Ninga waya wene manhonge waliganisigwa nomowakudiya, kosoko wasikugolosa kwa ihuwi. Na chila idisikulawa mwihuwi ni wihi.

¹ Hambiya chikuhanangigwa seye chine ludole, chikilonde na waya wechaka ludole, na siyo kiendesa chiwecho du. ² Chila yumwedu wetu yamwendese miyagwe uleke chijenge undugu. ³ Kosoko hata Kilisito nghakiyendese imwecho muhala, ninga fina foitulumwe, “Maligo gawo gowakuligile gweye haganugwila niye.” ⁴ Kosoko gose gatulumigwe chigele chilokile, hakatulumigwa kuchilolesa seye, uleke kwa ufinyilisi na kuguma moyo kwa njila ya matulumo chidahe kuwa na ihuwilo. ⁵ Mulungu we ufinyilisi na mugumi we moyo yawengheni kwikala muuhamwendu munhu na miyagwe, kifana Kilisito Yesu, ⁶ uleke kwa hamwedu na ijwi dimwedu mudahe kumutunya Mulungu na Baba we Mundewa wetu Yesu Kilisito. ⁷ Kihokeleni nyenye kwa nyenye, kifana Kilisito foyawahokeleni nyeye mwitunyo dye Mulungu. ⁸ Kosoko nikumutamilani fina Kilisito kagaluka mutogomi we dilagano dyo kufinigwa kosoko ye chawelu ye Mulungu uleke yadahe konesa mahuwiso galafigwe ne waBaba. ⁹ Kahi uleke Awamembe wadahe kumutunya Mulungu kwa ubasi wakwe. Fina foitulumigwe, “Kwanheifo nokulumba mugati ya Wamembe, na kwimba matunyo ge disina dyako.” ¹⁰ Kahi yakugamba, “Bwedeleleni, nyenye Muwamembe, hamwedu na wanhu wakwe;” ¹¹ na kahi, “Mutunyeni Mundewa, anye mose Muwamembe, na wanhu wose wamutunye;” ¹² Na kahi Isaya yakugamba, “Mulukolo lwa Yese kolawa munhu yokwinula na kulongosa Wamembe; umwakwe Wamembe wohuwila.” ¹³ Mulungu we dihuwi yawengheni mose chinyemi, ne digoya mukuhuwila, uleke mwikale mwihuwi kwa ludole lwa Muhe Musunhile. ¹⁴ Aniye nimwecho nifumiliswa muchanhya yenu nyenye wandugu sangu fina nyenye nanye mumema uswanu, na ubala wose, na fina mudaha kilolesa munhu na miyagwe. ¹⁵ Hata nheifo mbuli simonga niwawandikila kwa ludole lugano uleke kuwagelegesa, soko ye dihuwi diya dyoninghigwe ne Mulungu ¹⁶ kuwa mutogomi wa Kilisito Yesu Kuwamembe muutambiki nimugolosele milimo imbuli swanu ye Mulungu, uleke filafwa fya Wamembe fidahe kuhokeligwa, kwa kutambikiligwa na Muhe Musunhile. ¹⁷ Mu Kilisito Yesu, nina soko ya kitunyila milimo yangu kwe Mulungu. ¹⁸ Kosoko sikugesa kulonga mbuli ingi, ninga ayiya du yoyamalagise Kilisito, uleke Wamembe wafumile na kuhulika kwa mbuli ama kwa nhenda. ¹⁹ Kwa ludole lwa fitangilo na majumo, kulokela ludole lwe Muhe Musunhile, igaluka kulawa Yelusalemu mpaka Ililiko, nihubili lugano mbuli swanu ya Kilisito. ²⁰ Kwanheifo nikiyoha lugano kuihubili mbuli swanu, ninga ninghaihubili hanhu Kilisito yafuluse kuhubiliigwa, uleke ninghajenge muchanhya ya nghindiso ya munhu yungi; ²¹ ninga fina foitulumigwe, “Awaya wasihubiliigwe mbuli sakwe wokona, na waya awasihulike womanya.” ²² Nochileka nikulemesigwa chila fonikuhananga kwija ukwenu. ²³ Ninga hambiya nichaka hanhu kahi mumikowa ino, kwa chipisi chitali hambiya nikuhananga kwija ukwenu ²⁴ nomonikuluta Hisipaniya. Kosoko nikuhuwila fina nowonani munhambo yangu na kwigaligwa na nyenye, hanuwa na chinyemi lugano kuwa hamwedu na nyenye kwa chipisi chiguhi. ²⁵ Kwa hambiya, nikuluta Yelusalemu, nikawatogomele awasunhile; ²⁶ Kosoko iwendesa wanhu wa Makedoniya na Akaya kuhanga finhu fyawo na wakiwa hamwedu na wasunhile ako Yelusalemu. ²⁷ Hawendesigwa kugolosa dino, na chawelu wapata ideni nawo; Kosoko inghowa Wamembe weja wahangila simboto sawo se chimuhe, ikuhanangigwa wawatogomele na gechimutufi nago. ²⁸ Hambiya fonikumala mulimo uno, na kuwengha gose na kuhokela achiya chilafigwe, nolokela ukwenu, kuluta Hisipaniya. ²⁹ Nani nimanya fina ningheja ukwenu nokwija na umemelesi wose we simboto sa Kilisito. ³⁰ Nikuwatasani, wandugu sangu kulokela Mundewa wetu Yesu Kilisito na wendo we Muhe, muhange na niye lugano kunitasila hamwande ye Mulungu kosoko yangu. ³¹ uleke nidahe kuhonyigwa na wanhu wehile ako Yudea, na kahi umulimo wangu woninawo ako Yelusalemu uhokeligwe na wasunhile, ³² uleke kwa nyenda ya Mulungu nidahe kwija ukwenu kwa chinyemi na kuwasangalasani mwitewa dyenu. ³³ Mulungu we digoya yowe hamwendu nanye mose. Hano.

¹ Nikumutunya ukwenu, lumbudyetu Foibe, imutogomi we dikanisa dyuwile Kenkileya, ² uleke mudahe kumuhokela mwiMundewa fina foikuhanangikwa kuwasunhile, na kumutasa mugose goyahananga ukwenu, kosoko kagaluka mutasi mukulu kwa wengi, na ukwangu lugano. ³ Mulamuseni Pilisika na Akila, watogomi hamwedu na niye muKilisito Yesu, ⁴ na kilafa hata kukoma ugima wawo kosoko yangu, nikuwalumba lugano, ninga hamwedu na makanisa gose ga Wamembe. ⁵ Dilamuse ne dikanisa dyuwile munyumba yawo. Mulamuse mwendigwa wangu Epayineto, iyowile munhu we nghonga kumuhuwila Kilisito ako Asiya. ⁶ Mulamuseni na Maliamu, iyakidasile lugano mugati yenu. ⁷ Mulamuseni kahi na Aduloniko na Juliya, awano hawowa na niye kuchifungo, ni wanhu wamanyike lugano mugati ya watumigwa, nawo hawanilongolela kuwa mugati ya Kilisito. ⁸ Mulamuse lugano, Ampuliato, mwendigwa wangu MwiMundewa. ⁹ Mulamuse Ulubano, mutogomi miyetu muKilisito, na mwendigwa wangu Sitakisi. ¹⁰ Mulamuse Apele, imunhu yahomeleligwe muKilisito. Walamuse wanhu wa mukaya ya Alisitobulo. ¹¹ Walamuse wandugu sangu cha Helodioni. Kamei lamusa na woile mwiMundewa, wanhu wa mukaya ya Nalisisi. ¹² Walamuse watogomi wose mwiMundewa, cha Tulufena, na Tulofosa. Mulamuse na mwendigwa wangu Pesisi, munhu yakilafile lugano kosoko ye Mundewa. ¹³ Mulamuseni Lufu, musagulwa we Mundewa; kamei lamusa ne nghinakwe, nghinangu na niye. ¹⁴ Kamei mulamuse na Asikilito, Filegoni, Helime, Patiloba, Hemasi, na wandugu woile hamwedu naye. ¹⁵ Nilamusile Filologo na Yuliya, Neleya, ne dada yakwe, na Olipa, na wasunhile wose woile hamwedu nawo. ¹⁶ Kilamuseni nyenye kwa nyenye kwa kinonela kusunhile. Makanisa gose ga Kilisito gakuwalamusani. ¹⁷ Nikuwatasani wandugu sangu, walangisiseni lugano awaya wakwigala mbuli sa finju na kukwakwalisa, na kulema mafuso gomuhokele; kinegeni nawo. ¹⁸ Kosoko wanhu kifana wo wasikumutogomela Mundewa wetu Kilisito hata, ninga kwenda kudiya, na wakulonga nonga sisimulile na sa udasi uleke kuyagilisa mimoyo ya wanhu waswanu. ¹⁹ Kulawa chigele fochimanyike ichihuliko chenu kuwanhu wose, uleke nidahe kubwedelela muchanhya yenu, nikuhananga muwe wabala mumaswanu na muuleme wihi. ²⁰ Mulungu we digoya komukinya Shetani chimwande hasi ye migulu yenu. Dihewa dye Mundewa wetu Yesu Kilisito dyuwe hamwedu nanye. ²¹ Timoseyo, imutogomi miyangu yakuwalamusani; na Lukio, Yasoni na Sosipita, awandugu sangu, ²² Aniye Telitio, iniwandike baluwa yino, nikumulamusani mwisina dye MwiMundewa. ²³ Gayo, imukaya wetu, na kwe dikanisa dyose yakumulamusani. Elasito Imwikaji wa mapesa ge kaya yakulamusa, na Kwato naye yakulamusa. ²⁴ Dihewa dye Mundewa wetu Yesu Kilisito dyuwe nanye mose. Hano. ²⁵ Hambiya Mulungu iyakudaha kuwagumani ludole, kwa imbuli iya swanu yonahubili ya Yesu Kilisito, kwa ugubulo we chifiso chekigwe kulawa katali ²⁶ ninga hambiya chigubuligwa, na kulokela matulumo go ugonesi chigoloswa chimanyike Kuwamembe, kosoko ye dilagiso dya majuwa gose dye Mulungu, kwigala habehi ichihuliko che dihuwi ²⁷ kwe Mulungu yena ubala yemwene, kulokela Yesu Kilisito ditunyo dina imwene majuwa gose. Hano.