UGUBULO

UGUBULO

¹ Ugubulo waYesu Kilisito wo yenghigwe ne Mulungu konesa watogomi wakwe akakuhanangigwe gowe uko chimwande; hakagagolosa goneka kwa kumutuma malaika wakwe kwe mutumigwa wakwe Yohana, ² imwene yahomelele imbuli ye Mulungu na kuuhomelesi wa Yesu Kilisito, na kwawaya wose woyonile. ³ Ibeka imunhu yuya iyakusoma simbuli so ugonesi wuno, kahi ibeka awakuhulika, na kukola agakuwandikigwa umo. Kosoko ugele wa habehi. ⁴ Yohana kumakanisa mufungate agowile ako Asia: Dihewa ukwenu ne digoya kulawa ukwakwe iyebaho, iyowile baho na iyekwija kahi kulawa kumimuhe mufungate wowile kumwande ye digoda dyakwe dye undewa, ⁵ na kulawa kwa Yesu Kilisito imuhomelesi we chawelu, imwelekigwa we inghonga wa wafile na mutawala wa wandewa wose we iisi. Ukwakwe imwene iyachendile na kuchilekelela na kuchisunha wihi wetu kwa sakame yakwe, ⁶ na kuchigolosa chuwe wandewa na makuhani watogomi we Mulungu wakwe na Baba, ukwakwe dyuwe itunyo na udaha majuwa gose. Hano. ⁷ Langa! Yakwija na mafunde; chila igiso dikwija dimona, hata awaya awamudomile; na makabila gose ge chilunga gokwijagalila kosoko yakwe kosoko nofoikwija ikuwa. Hano. ⁸ “Aniye no Alufa na Omega,” yakulonga Mundewa Mulungu, iyeuko na iyekwija, Iyene udaha wose. ⁹ Aniye Yohana, Mundugu senu iyekuhangila magayo muKilisito hamwedu nanye muundewa na ufinyilisi, hanuwa muchisiwa chikwinangwa Patimo kosoko ya imbuli ye Mulungu na uhomelesi wa Yesu. ¹⁰ Hanuwa mumuhe mwijuwa dye Mundewa, na hanihulika ijwi ikulu kunyuma yangu dikifana ijwi dya igunda ¹¹ dikugamba, “Andika muchitabu goukona kamei ugegale kumakanisa mufungate kuile Efeso, Similina, Peligamu, Tilatila, Salidi, Filedefiya, na Laodikiya.” ¹² Kamei honibiduka kulanga dijwi dilongile na niye, nikabiduke honikona figwaso fya kwikila taa mufungate fya sahabu, ¹³ na muchiligati che figwaso yumonga kifana mwana wa munhu kafala ikasu ijelu na mukowa wa sahabu kusunguluta muchifa chakwe; ¹⁴ Ditwi na sinjwili sakwe hasuwa njelu swee kifana pamba, na meso gakwe gakwakaika kifana ililimba dya moto ¹⁵ imigulu yakwe kifana shaba isunhugwe mumoto swanu lugano na dijwi dyakwe kifana ibumo dya meji mengi; ¹⁶ kakola nyelesi mufungate mumukono wakwe wo kulume, kumulomo wakwe kukulawa ipanga ikali dikutem kosekose, na ichihanga chakwe kifana dijuwa idikwakaika kwa singufu sakwe sose. ¹⁷ Nikamone honikugwa hamigulu yakwe kifana nufa. Ninga hoyonikola no mukono wakwe wo kulume, yakugamba, “Unghogohe; Aniye no we nghonga na we ndumiliso, ¹⁸ na ni mumu. Hanyufa, na langa, Namumi sakalakale, na nenaso sifunguo se Difa na se Kusimu. ¹⁹ Hambiya yandika gowonile, agebahano, na agakwenda galawanise hanyuma. ²⁰ Agechifiso mu sinyelesi mufungate gowonile mumukono wangu wo kulume, na ifigwaso mufungate fye sitaa se sahabu, sinyelesi mufungate ni malaika na makanisa gaya mufungate na ifigwaso fiya mufungate ni makanisa gaya mufungate.”

¹ “Kwimalaika wa Efeso wandika: Asino no simbuli sa yuya iyakolile sinyelesi mufungate mumukono wakwe wo kulume iyakugendagenda muchiligati che figwaso mufungate fye sitaa se sahabu: ² Nimanya imilimo yako, kupiligala kwako na kufinyilisa kwako, na ninga nghukudaha kugendelela na wanhu wehile, ninga kuwagesa awaya wakiinanga watumigwa, ninga sichawelu na kuwatanga fina wadasi. ³ Kahi nimanya fina kwamufinyilisi kosoko ye disina dyangu na nghusokile. ⁴ Ninga nina nonga muchanhya yako gweye, kuleka wendo wowowile nawo kunghonga. ⁵ Gelegela ichikugwise, lamba na ugolose imilimo iya yowagolosage kunghonga, nghona sinheifo, nikukwijila na kuleusa ichigwaso che taa yako ahanhu hakwe unghaleka kulamba. ⁶ Achino chiswanu chowinacho ni fina nghukwenda imilimo ya Wanikolai, yene aniye nani sikuyenda. ⁷ Ayuya yene singhutwi yahulike, Imuhe foyakulonga kumakanisa. Kwayuya yakusuma nikumwingha kudiya kulawa mwibiki dyo uumi dyuwile kulanga kuswanu kwe Mulungu.” ⁸ “Na kwe malaika we dikanisa dyuwile Similina wandika: Asino ni nonga sakwe ye we bosi na we ndumo, iyafile na yenuke: ⁹ Nimanya amagayo gako na ukiwa wako, ninga kwa mugoli. Na nimanya amateto gawo waya wakigamba wene Wayahudi ninga siyo, ninga ni isinagogi dya Shetani. ¹⁰ Unghogohe amagayo agakukwijila chimwande, langa diluhoma dikwenda dimugumeni wamonga wenu mwigelesa na kwa majuwa ikumi mukuwa mumagayo, muwe wanhu we dihuwi mpaka kufa, nani nomwinghani ikofiya ye chindewa ye wumi, ya usumi wenhu. ¹¹ Ayuya yena singhutwi yahulike iMuhe choyakulonga kumakanisa, ayuya yakusuma nghakwenda yabulagigwe ne difa dya keli.” ¹² “Na kwamalaika we dikanisa dyuwile ako Peligamo wandika: Asino no simbuli sakwe imwene yene dipanga dikali dikutema akuno na kuno. ¹³ Nimanya houkwikala hedigoda dya Shetani. Nagwe kukolelela disina dyangu nghukanile dihuwi dyako ukwangu hata ugele wa Antipasi muhomelesi wangu, imuhuwilika wangu, yakomigwe mugati yenu, ahanhu hoyakwikala Shetani. ¹⁴ Ninga nina finhu fikefu fya kulonga muchanhya yako: Kwina wanhu baho awakolile mafuso ga Balaamu, iyamufusile Balaki kwigala chikwakwaliso kumwande ya waisilaeli, uleke wadiye fyakudiya filafigwe nhambiko kumasikimunhu, na kugolosa dihabwa. ¹⁵ Agwe nagwe kwinawo wamonga awakolile mafuuso ga wanikolao ¹⁶ Hambiya ulambe, amba unghaleka kulamba nikukwijila chimwande na kulewa nghondo nawo ne dipanga dye mulomo wangu. ¹⁷ Yene singhutwi yahulike Muhe foyakulonga nonga ino kumakanisa. Kwayuya iyakusuma nikumwingha imana ifisigwe, na nomwingha iwe ijelu, na isina disha diwandikigwe mudiwe na hechaka yadimanyile ninga imwene iyakudihokela.” ¹⁸ “Ku malaika we dikanisa dyuwile ako Siwatila wandika: Asino no simbuli se Mwana we Mulungu, iyena meso kifana ililimba dya moto, yena migulu kifana shaba isunhigwe, ikwakaika. ¹⁹ Nimanya imilimo yako ne migendelele yako na kufinyilisa kwako na fina milimo yako ye nyuma isuma iya ilongole.” ²⁰ Ninga nina nonga muchanhya yako: “Ukugendelela kifinyilisa ne mwanamuke Yesebeli, iyekiinanga mugonesi iyakufusa na kuwagilisa watogomi wangu uleke wagolose dihabwa na kudiya fyakudiya fye nhambiko kufisikimunhu. ²¹ Hanimwingha chipisi uleke nghegela kolamba, ninga hoyolema kulamba dihabwa dyakwe. ²² Langa, nikwenda nimutage mwisasi, na wose awakugolosa dihabwa hamwedu naye nowaguma magayo makulu lugano, inghowa wasikulamba sinhenda sakwe. ²³ Na nikwenda niwatowe na kuwakoma awanangwe. Na makanisa gose gomanya fina aniye noniimanyile imisungu kahi nonikumulika mbuli se mimoyo ya wanhu, na kumuliha chila munhu foifane milimo yakwe.” ²⁴ Ninga kwa nyenye musigale ako Siwatila, anyeye musikolile amafuso gago, musikifusile wamonga gowakugamba, “Nni mafuso ga kugati lugano ga Shetani,” ukwenu nyeye nikugamba sikumwikilani musigo wingi. ²⁵ mukolelese chomwinacho hata ugele fonikwija. ²⁶ Ayuya yakusuma na yakolile milimo yangu, mpaka kukumalagisa, nikwenda nimwinghi udaha muchanhya ya mataifa; ²⁷ kulongosa kwa mhando ya chuma, fina sinyungu sa ulongo fosikutulika. ²⁸ Fina niye fonihokele udaha kulawa kwa Baba. Ayuya yakusuma nomwingha Inyelesi ya nhousikusiku. ²⁹ Ayuya yena singhutwi yahulike iMuhe foyakulonga kumakanisa.

¹ “Na kwa malaika we dikanisa dya Salidi wandika: Imbuli ya yuya yena imimuhe mufungate ye Mulungu ne sinyelesi mufungate, nimanya imilimo yako kwina isina dya uwumi, ninga gweye kufa. ² Inuka kulafa mudifa, guma ludole mumilimo ihabehi kufa, kosoko sonile fina imilimo yako imemelekela hameso ge Mulungu wangu. ³ Gelegela sowahulike na sowahokele sikole na ulambe, unghaleka kwinuka nikukwijila kifana muhiji, na nghukwenda umanye chigele chinikwija. ⁴ Ninga kwinawo wanhu wakefu ako Salidi, awasichuchise sisuke sawo na wagenda hamwedu na niye, wafala suse sinjelu, kosoko wagiligwa. ⁵ Ayuya yakusuma yakwenda yafasigwe suke njelu, na sikuleusa disina dyakwe muchitabu cho uwumi, nikwenda nihomelele disina dyakwe kwa Baba na malaika wakwe. ⁶ Ayuya yena singhutwi yahulike iMuhe choyakulonga.” ⁷ “Na kwa malaika we dikanisa dyuwile ako Filedefiya wandika: Simbuli se Imusunhile iyena ifunguwo ya Daudi yekukumula na hechaka yakudaha kuhinda, na yakuhinda kahi hechaka yakudaha kukumula. ⁸ Nimanya imilimo yako, langa nikwingha mulango ukumuligwe, na hechaka munhu yakudaha kuhinda, nimanya fina kwina ludole ludodogi, hata nheifo kukola imbuli yangu na nghukanile disina dyangu. ⁹ Langa nikwenda niwagolose awaya we disinagogi dya Shetani awakigamba fina Wayahudi, kumbe si chawelu ninga wekudanha, langa nikwenda niwegale na wafugame hamigulu yako, na wakifuse fina nikukwenda gweye. ¹⁰ Kosoko kuikola imbuli yangu kwa kufinyilisa, ani nani nikwenda nikukolelese ugele wa magayo agakwija muisi, kuwagesa awaya awekale muchilunga. ¹¹ Nikwija chimwande, chikolelese chowinacho uleke munhu wowose yangheje yalonde inghofiya yako ye chindewa yo kusuma. ¹² Ayuya yekusuma, nikumugolosa sumbi mdihekalu dye Mulungu wangu, nghakulawa, kahi nghakulawa umo ugele wose na niwandika umwakwe disina dye Mulungu wangu na dye ikaya ye Mulungu, Yelusalemu Nyisha, ikulawa kuchanhya kwe Mulungu wangu na disina dyangu disha nimwecho. ¹³ Ayuya yena singhutwi na yahulike ifene Muhe foyakulonga kumakanisa.” ¹⁴ “Na kwa malaika we dikanisa dyuwile ako Laodikiya wandika: Simbuli sa Hano, imuchawelu na muhomelesi iyakuhuwilika, inghonga ye kumba kwe Mulungu. ¹⁵ Nimanya imilimo yako, nghwi mheho, kahi nghwi moto, ibeka hegu we mheho ama wi moto. ¹⁶ Hambiya kosoko, kwa lufufunghonde, nghwi mheho kahi nghwi moto nikwenda nikudeke kulawa kumulomo wangu. ¹⁷ Kosoko ukugamba aniye na mugoli, nichaka chinhu chonikuhananga; nghumanyile fina kwichaka chochose, kwa munhu wakoneligwa ubasi kwa mukiwa, kahi kwa mudula n akwa mwasi. ¹⁸ Ani nikukusugula ugule ukwangu, shabu isunhigwe ne moto uleke uwe mugoli na ufale suke njelu na kukuleusila chinyala chokuwa mwasi kwako koneka na kukubaka miti mumeso gako udahe kona. ¹⁹ Awaya wonikuwenda nikuwagombela na kuwatosa kosoko iyo upiligale na kulamba. ²⁰ Langa nikwima hamulango na kugong’onda, imunhu wowose yakuhulika dijwi dyangu na kukumula umulango nikwingila ukwakwe na kudiya hamwedu naye imwene naye hamwedu na niye ²¹ Ayuya yakusuma, nikwikala naye mwigoda dyangu dya undewa, fina aniye fonasumile na kwikala hamwedu ne Baba mwigoda dyakwe dya undewa. ²² Ayuya yena singhutwi so kuhulika na yahulike iMuhe choyakulong kumakanisa.”

¹ Sikaloke sino hanilanga, kumbe umulango wa kulanga hougubuka, idijwi dye nghonga dyonahulike dikulonga na niye dikifana igunda, dikugamba, “Wije kuno nikwenda nikonese agakwenda galawanise kulawa agano” ² Chimwande hanuwa Mumuhe, kumbe kulanga kwikigwa igoda dye chindewa, na yumonga yekale umo. ³ Ayuya yekale umo koneka kifana alimasi, na diwe didunghu diswanu, na digoda dye undewa disungulutigwa na diwuta dye ifula difanile diwe dya alimasi dikwakaika. ⁴ Kusunguluta digoda dye undewa kwina magoda ge undewa makumi meli na mane na wekale mumagoda gago wasehe makumi meli na wane, wafasigwa makasu majelu na nghofiya sa chindewa sa sahabu mumatwi gawo. ⁵ Kulawa kwigoda dye undewa kwina fimuli fya ujelu na majwi na dibumo ikulu na kumwande ye digoda dye chindewa kwina fimuli mufungate fikumulikamulika moto imumuhe mufungate ye Mulungu, ⁶ kahi kumwande ye digoda dye undewa kwina chinhu chifanile bahali ya chikombe cha chiyoo, hameso ikoneka kifana meji gagandile na kusunguluta digoda dyo undewa chila ulwandi kwina fiyumbe fyumi fina meso kumwande na kunyuma: ⁷ chiyumbe che nghonga chakifana simba, ichiyumbe cha keli ichumi chakifana nghambaku ya ng’ombe, ichuyumbe cha kadatu china chihanga cha munhu ne chiyumbe cha kane chikifana numba ikupululuka. ⁸ Na ifyumbe fiya fine chila chimwedu china mabawa mutandatu fimema meso kunje na kugati na fisikuleka kwimba misi na chilo, kugamba, “Musunhile, musunhile, musunhile, ni Mundewa Mulungu wetu yena udaha wose, yowile baho, iyebaho na yekwija.” ⁹ Na chila ugele ifyumbe ifyumi fiya fikulafa ditunyo na chogoho kugamba, kwimange kwa ayuya yekale mwigoda dya undewa iyakwikala majuwa gose, ¹⁰ awaya wasehe makumi meli na wane wakugwa kumwande yakwe ayuya yekale mwigoda na kumufuga ayuya iyakwikala majuwa gose, aku wakutaga singhofiya sawo kumwande ye digoda dyo undewa na kwimba, ¹¹ “Kwagiligwa gweye Mundewa na Mulungu wetu, kuhokela ditunyo na ukulu na udaha, kosoko gweye no wumbile ifinhu fyose na kwa kwenda kwako fyabaho na hafyumbigwa.”

¹ Hanyona mumukono wa kulume wa yuya yekale mwigoda dye chindewa chitabu chiwandikigwe kunje na kugati nacho chohigwa na fikanhamiso mufungate; ² Na honimona malaika mukulu yakulonga kwa ijwi ikulu kugamba, “Nona yagile kuchigubula ichitabu na kubena fikanhamiso fyakwe?” ³ Nhoneke hata yumwedu kulanga na hasi ye siisi yadahile kuchigubula ichitabu ama kuchilanga. ⁴ Honililila lugano kosoko nghoneke munhu wowose yawagilwe kuchigubula ama kuchilanga. ⁵ Yumonga wa wasehe hoyonigamba, “Unghalile Simba we dikabila dya Yuda Ulukolo lwa Daudi kasuma kosoko iyo yakudaha kuchigubula ichitabu na kufibena ifikanhamiso fyakwe.” ⁶ Hagati ye digoda dye undewa na fiya ifiyumbe fyumi mugati ya wasehe, honikona Mwana ngholo yemile kifana kachinjigwa kena mahembe mufungate na meso mufungate, isene so no mimuhe mufungate ye Mulungu itumigwe muchilunga chose. ⁷ Hakaluta na kuchilonda achiya ichitabu kulawa mumukono wo kulume wa yuya yekale mwigoda dye undewa. ⁸ Yakafuluse kuchilonda ichitabu ifiyumbe ifine na waya wasehe makumi na wane howomugwila yuya Mwana ngholo, chila yumwedu kakola ibwalimbwa na mabakuli ge sahabu gamemila ufumba na kutasa kwa wasunhile. ⁹ Wakwimba lwimbo lusha wakugamba: “Kwagiligwa agweye kulonda ichitabu na kubena ifikanhamiso fyakwe, kosoko agweye hakuchinjigwa na kwa sakame yako kuwagula wanhu wowe wa Mulungu, wanhu kulawa chila ikabila, nonga na mataifa gose; ¹⁰ na kuwagolosa wowe wandewa na makuhani wakutogoma kwe Mulungu wetu, na wakwenda watawale muchilunga.” ¹¹ Kamei honilanga na kuhulika ijwi dya malaika matewa wakusunguluta digoda dye undewa na fiya fiyumbe ifyumi na wasehe; wasikudaha kutalika, figulu na figulu, ¹² wakwimba kwa ijwi dya muchanhya lugano, “Kagiligwa Imwana ngholo iyachinjigwe kuhokela udaha na ugoli na ubala na kusuma chogoho na itunyo na mboto!” ¹³ Hanihulika chila chiyumbe kulanga na hasi ye iisi hata kubahali kose uko fikugamba, “Kwayuyo yekale mwigoda dye chindewa na kwe Mwana ngholo yuwe mboto na chogoho na itunyo na ludole majuwa gose hano!” ¹⁴ Kamei ifiyumbe fiya fine hofigamba, “Hano!” Kamei na wasehe wakugwa hasi na kufuga.

¹ Kamei honikona Mwana ngholo yakukubula chimwedu che fikanhamiso mufungate, na kuhulika yumwedu wa fiyumbe ifine yakwinanga kwa ijwi ikulu ijwi kifa dya ibumo, “Wije!” ² Na honikona langa falasi njelu, na iyasikwilile kena uta na kofiya ye chindewa yoyenghigwe hoyoluta kuchilunga na kosoko ya kusuma kwakwe na kusuma kahi. ³ Kahi foyagubule chikanhamiso cha keli hanimuhulika ichuyumbe ichumi cha keli, chikugamba, “Wije!” ⁴ Hoikwija falasi ingi ndunghu gu, iyakwilile hakenghigwa udaha wa kuleusa idigoya muchilunga, uleke awanhu wakikome chila munhu na miyagwe, hakenghigwa ipanga ikulu. ⁵ Yakakumule ichikanhamiso cha kadatu, hanihulika chiyumbe cha kadatu chikwinanga kwa ijwi ikulu, “Wije!” Hanilanga na kona Falasi ingi nhitu imunhu yakwilile hakowa na misani ya kupimila mumikono yakwe. ⁶ Kahi hanihulika chinhu kifana ijwi mugati ye fiyumbe fyumi ifine, ikugamba, “Chibaba chimwedu che usage we ngano kwa dinali na fibaba fidatu fye usage we shaili kwa dinali, ninga wanghabane mafuta ne difayi.” ⁷ Yakakumule ichikanhamiso cha kadatu, hanihulika dijwi dye chiyumbe china wumi cha kane chikugamba, “Wije!” ⁸ Honikona langa, ifalasi ina langi ya difu, ayuya yakwilile, yakwinangwa ifa na kusimu kukumwandamila hoyokwinghigwa udaha mulobo imwedu ye chilunga, kukoma kwa ipanga na njala na kwa matamu na kwa makala ge muchilunga,. ⁹ Yakakumule, ichikanhamiso cha shano, honikona hasi ye hefugilo fidoga fyawo wanhu wakomigwe kosoko ye imbuli ye Mulungu na uhomelesi wawo wowalongile, ¹⁰ howojoja kwa ijwi ikulu, “Agwe go Mundewa Mukulu musunhile na we chawelu, mpaka milaki ukuchiliganisa na kuwaliha chisasi che sakame yetu muchanhya ya wekale muchilunga?” ¹¹ Kamei chila yumwedu hakenghigwa nghasu njelu na kugambigwa wagojele chidodogi, mpaka ifike inhala ya wayawo watumigwa fina wene, yuwe imemelekela, awene awakwenda wakomigwe fina awene fowakomigwe. ¹² Yakakumule ichikanhamiso cha mutandatu, hanilanga na kona, isingisi ikulu na dijuwa hodikuwa ititu kifana iguniya, umwesi wose houkuwa kifana sakame. ¹³ Na sinyelesi sa kulanga hosilagala hasi fina umukuyu foukulagasa singhuyu sisikangale maukusingisigwa na uluputa lwa imheho ikupumunha ugele we inyota. ¹⁴ Ulanga haukikunja kifana kalatasi, na chila itunda na chisiwa hafileusigwa ahanhu hawo. ¹⁵ Kamei awandewa we chilunga awanhu wakulu na wakulu we selikali na wagoli na wena ludole na chila munhu mutumwa na isimutumwa, wakifisa mumapango na mumawe ga matunda ¹⁶ wakugamba amatunda na mawe, “Chugwileni ma muchifise kumwande ye chihanga chakwe ayuya yekale mwigoda dya undewa na inyono ye Mwana ngholo; ¹⁷ kosoko dijuwa dikulu dye inyono yawo difika nani yakwenda yadahe kwima hamwande yakwe?”

¹ Ichinhu chandamile chonyonile hachuwa malaika wane wemile kulwandi sose ine se chilunga, waikolelese imheho inghapumunhe muchilunga na mubahali na mumabiki. ² Honikona malaika yungi kulawa kulwandi we dijuwa kena chikanhamiso che Mulungu imumi. Hoyokwinanga kwa ijwi ikulu kumalaika awaya wane awenghigwe udaha wo kubana iisi ne bahali, ³ wakugamba, “Munghabane iisi hegu ibahali hegu mabiki, mpaka niwagume ifitangilo fye fikanhamiso awatumigwa we Mulungu mufihanga fyawo.” ⁴ Honihulika ihesabu yawo waya wagumigwe ifitangilo fye fikanhamiso, figulu makumi mane na wane kulawa chila ikabila dya wana wa Isilaeli: ⁵ Kulawa mwikabila dya Yuda wagumigwe chitangilo wanhu figulu ikumi na fili, mwikabila dya Leubeni figulu ikumi na fili, kulawa mwikabila dya Gadi figulu ikumi na fili, ⁶ kulawa mwikabila dya Asheli figulu ikumi na fili, dikabila dya Nafutali figulu ikumi na fili, dikabila dya manase figulu kumi na fili, ⁷ kulawa mwikabila dya Simionifigulu ikumi na fili. Mwikabila dya Lawi figulu ikumi na fili. Mwikabila dya Isakali figulu ikumi na fili, ⁸ kulawa mwikabila dya Sabuloni figulu ikumi na fili, kulawa mwikabila dya Yusufu figulu ikumi na fili na mwikabila dya Benyamini figulu ikumi na fili wagumigwe chitangilo ⁹ Chikaloke chino hanilanga ditewa dya wanhu awasikudaha kutalika fonu wengi, kulawa chila itaifa na makabila gose na kumwande ya digoda dya undewa na kumwande ye Mwana ngholo, wafasigwa nghasu njelu swee na matambi ge mitende mumikono yawo. ¹⁰ Kujoja kwa ijwi ikulu kugamba, “Uhonya uwa kwe Mulungu wetu yekale mwigoda dya undewa we kwe Mwana ngholo!” ¹¹ Kamei malaika wose howokwima kusunguluta digoda dye undewa na wasehe ne fiyumbe fyose, howokugwa chifunhifunhi na kumufuga Mulungu, ¹² wakwimba kugamba, “Hano! Imboto na ditunyo na ubala na malumbo na chogoho na uludole na udaha uwe ukwako Mulungu wetu wa majuwa gose! Hano.” ¹³ Kamei yumwedu wa wasehe hoyolonga na niye yakugamba, “Awano chenani woukona wafalile makasu majelu kahi walawa hoki?” ¹⁴ Honimugamba, “Mukulu kumanya gweye.” Kamei hoyonigamba, “Awano nowaya walawile mumagayo makulu lugano, wafuwa singhasu sawo na kusigolosa suwe njelu musakame ye Mwana we ngholo. ¹⁵ Kosoko iyo wowe kumwande ye digoda dyo undewa dye Mulungu, na wakumutogomela chilo ne imisi mwi hekalu dyakwe na yuyo yekale mwigoda dya undewa yakuwagubika na nyuwa yakwe baho. ¹⁶ Wasikuwa na njala kahi nghilu, dijuwa disikwenda diwasome, hegu kuwalakasa; ¹⁷ kosoko Mwana we ngholo yakuwa muchiligati ye digoda dyo undewa na kuwa mudimi wawo, naye kowalongosa kusinhyoko sa meji ga uwumi na Mulungu yakwenda yawahamuse chila isosi mumeso gawo.”

¹ Ugele Mwana ngholo yakagubule ichikanhamiso che mufungate, kulanga hakunyamala posi kwa chigele cha nusu saa. ² Kamei honikona malaika mufungate awakwima kumwande ye Mulungu, howokwinghigwa magunda mufungate. ³ Malaika yumonga kena chiya cho kusomela ubani cha sahabu na kwima hefugilo, hakenghigwa ubani mwingi yalafe hamwedu na mataso ge wasunhile wose, hamwande ye difugilo diya dye sahabu dyuwile hamwande ye digoda dyo undewa. ⁴ Kamei umosi wo ubani uya houkwila hamwedu na mataso ga wasunhile mpaka hamwande ye Mulungu kulawa mumukono wa yuya malaika. ⁵ Kahi malaika hakalonda ichiya cho kusomela ubani na hoyochimemesa, kamei moto kulawa hefugilo na kuukubita kuchilunga, hukukuwa na kudidima, chowe, imwemwe kupulika na disingisi dye chilunga ⁶ Kamei malaika mufungate awile na magunda mufungate howokonga kuyatowa magunda gawo. ⁷ Imalaika we nghonga hoyotowa digunda dyakwe kame haitonya fula ya mawe na moto ihasile ne sakame, hoitonya muchilunga kamei isehemu inghulu ye chilunga hailakala, na ulwandi lwa mabiki gago hogatikitila, ne nyasi yose ikwani hoyilakala fibi. ⁸ Imalaika wa keli hakatowa naye digunda dyakwe kamei hachilawanisa chinhu, kifana itunda ikulu dikwaka moto, hodikubitigwa kubahali. ⁹ hayuwa sakame mubahali kalibu fiyumbe fyose ifyumi mubahali hofikufa na simeli sose hasibanika. ¹⁰ Imalaika wa kadatu hakatowa naye digunda dyakwe, kamei, dinyelesi ikulu hadalagala kulawa kulanga dikwaka kifana imuli, hadilagala kalibu musisanda sose ne sinhyoko sa meji. ¹¹ Disina dye dinyelesi diya ni Sungwi. Ameji kalibu gose hogagaluka sungwi na wengi howokufa kosoko ya meji gago kosoko hagowa ga usungu lugano. ¹² Imalaika wa kane hakatowa naye digunda dyakwe, isehemu yose ye dijuwa haibanigwa ne mwesi wose ne sinyelesi, kamei fyose hofititihala, na imisi hoikuwa chilo. ¹³ Kamei hanilanga na kuhulika inumba dikulapa kwa ijwi ikulu ugele fodyapululukage mulanga dikugamba, “Usungu, usungu, usungu lugano kwa waya wekale muchilunga nemamagunda gamonga agehabehi kutoigwa nawaya malaika wadatu awasigale!”

¹ Kamei malaika wa shano hakatowa naye digunda dyakwe, hanyona nyelesi ikulagala kulawa kulanga mpaka hasi, kamei hoikwinghigwa ifunguwo ikukumula dikolongo dya kusimu; ² yakadikumule dikolongo diya, hakulawa mosi ukifane mosi wa ililimba dya moto kamei idijuwa ne ujelu we iisi hofititihala kosoko ya umosi. ³ Kamei kulawa muumosi uwo hakulawa sige muchilunga, sige siya hasinghigwa ludole kifana chisuswe. ⁴ Hosigambigwa singhabane imbago hegu chinhu chochose, ama mabiki ninga awanhu waya wechaka ichitangilo che chikanhamiso che Mulungu mufihanga fyawo. ⁵ Hasigambigwa siwasambase kwa chigele cha minyesi mishano, ninga singahwakome, usungu wakwe hawuwa kifana usungu wa munhu yalumigwe ne chisuswe. ⁶ Na ugele wa majuwa gago gose wohananga difa ninga wasikudipata, wosulumila wafe ninga difa dikwenda diwatije. ⁷ Na koneka kwawo sige siya sakifana falasi sikuluta kunghondo, mumatwi gawo sifala finhu kifana kofiya sa undewa sa sahabu, ifihanga fyawo fya kifana wanhu. ⁸ ubahila wawo wakifana njwili sa wanawake na meno gawo kifana ga simba; ⁹ hawowa na misani ikifane ngulo ya chuma mufiya fyawo, na ichowe che mabawa gawo hachuwa kifana chowe cha matuka mengi agekukwegigwa na falasi sikubilimila kunghondo. ¹⁰ Sina mikila kifana fisuswe, na ikuluma kahi ina uludole lwa kuwagaisa wanhu kwa minyesi mishano wowe mumikila yawo. ¹¹ Wenaye mundewa wawo imalaika we dikolongo dye kusimu; disina dyakwe kwa Chiyebulaniya yakwinagwa Abadoni na Chiyunani yakwinangwa Apoliyoni. ¹² Usungu we nghonga uloka, langa sikaili sungu mbili sikwija. ¹³ Kamei imalaika we mutandatu hoyotowa naye digunda dyakwe, hanihulika ijwi ikulu kulawa msimhembe ine se difugilo dye sahabu dyuwile hamwande ye Mulungu, ¹⁴ dikugamba, imalaika we mutandatu iyowile ne digunda, “Walekele amalaika wane wohigwe kulwanda uya mukulu lwa Fulati.” ¹⁵ Kamei malaika waya wane howalekeligwa, awafuluse kwikigwa kosoko ye chipisi, dijuwa, na mwesi, na mwaka, wakome cheleko kalibu chose cha wanhu. ¹⁶ Ihesabu ya awasilikali wakwilile sifalasi hayuwa; miliyoni magana meli, honihulika ihesabu yawo. ¹⁷ Nhafi nofonyonile sifalasi munyona yangu: Awapandile wafala mufifa fyawo ngulo se chuma sina langi ndunghu kifana moto, fikifane mawe ga ugoli mwingi, na matwi ge sifalasi siso gakifana matwi ga simba, na mumilomo yawo kukulawa moto na mosi kifana wa chibiliti. ¹⁸ Kwa magayo gano madatu sehemu nghulu ya wanhu haikomigwa, kwa umoto na umosi na chibiliti fikulawa kumilomo ye sifalasi siso. ¹⁹ Kosoko uludole lwe sifalasi luwa mumilomo yawo na mumikila yawo, imikila yawo ikifana majoka gena matwi na kwa matwi gawo gago gakubulaga. ²⁰ Awanhu wasigale awasikomigwe ne mafa gago nowaya wasalambile imilimo yawo ye mikono yawo kahi kufuga simhepo ne milungu ye sahabu ne pesa na shaba na mawe na mabiki, iyene isikona hegu kuhulika, ama kugenda; ²¹ wasalambile, kukoma kwawo, ninga hata uhayi wawo na dihabwa dyawo na uhiji wawo.

¹ Kahi hanyona malaika yungi wa ludole yakwija kulawa kulanga kafala difunde; ne diwuta dye ifula muchanhya ye ditwi dyakwe, na ichihanga chakwe hachuwa kifana ijuwa ne imigulu yakwe kifana sumbi sa moto. ² Na mumukono wakwe hakowa na chitabu chidodogi, na hakajata umugulu wakwe wo kulume mubahali na umugulu wakwe wo kumoso muulongo kunje ye bahali, ³ hoyokwinanga kwa ijwi ikulu kifana disimba dikubuluma, yakenange imibumo mufungate hoihulikika. ⁴ kamei ikahulikike iya mibumo mufungate, nendenihananga niwandike, kamei hanihulika kahi ijwi kulwa kulanga dikugamba, “Kanhamisa ifikanhamiso fyako, isimbuli silongigwe ne mibumo unghawandike.” ⁵ Na imalaika yuya wonyonile yajatile mugulu umonga mubahali umonga muulongo kunje ye bahali, hakenula umukono wakwe wo kulume kulanga ⁶ na kilaha kwa yuya imumi wa majuwa gose yombile ulanga na fyose fyuwile muchilungana mubahali na fyose kahi fuwile umo, yakugamba, “Kunghowe na kusululuka, ⁷ ninga ugele wa majuwa go kutoigwa digunda na malaika mufungate, ichifiso che Mulungu chomemelekela, fina foyalongile kuwagonesi wakwe.” ⁸ Kahi ijwi, hanidihulika kulawa kulanga, dikunigamba, keli, gamba, “Luta londa ichitabu chigubuligwe mumukono we Malaika yuya yemile mugulu umonga mubahali na umonga kunje ye bahali.” ⁹ Kamei hanimulutila imalaika na kumugamba yaninghe chitabu chiya; naye hoyonigamba, “Chilonde na uchidiye, chokuwa chausungu kunda, ninga chamulile kifana uki mumulomo wako.” ¹⁰ Kamei honilonda kulawa mumukono we malaika ichitabu chiya, na kuchidiya, chawelu hachuwa chamulile hamulomo kifana uki, ninga nikamale kudiya kunda hakuwa kwausungu kifana sungwi. ¹¹ Kamei hawanigamba, “Hambiya ukonge kugonesa lwa keli, muchanhya ye wanhu matewa na mataifa, ne sinonga kahi na wandewa.”

¹ Kamei honikwinghigwa chibiki cha kupimila chikifana mhando, honigambigwa, “Wije na upime dihekalu dye Mulungu ne difugilo na wose awakufuga umo, ² ninga unghapime dikumbo kunje ye dihekalu kosoko dyo dinghigwa awamataifa wakwenda waijate ikaya isunhile kwa minyesi makumi na mane na meli. ³ Nikwenda niwenghe wahomelesi weli udaha wo kutamila, chigele cha minyaka chigulu chimwedu magana meli naminyesi mutandatu wafalile maguniya.” ⁴ Agano no mabiki meli ge miseituni na figwaso fili fye sitaa fimile kumwande ye Mundewa we isi. ⁵ Na munhu wowose yanghenda kuwabulaga, moto kulawa mumilomo yawo ukuwalakasa awanghondo wawo; na wowose iyewakoma nhafo nofoyakwenda yatendigwe. ⁶ Wena udaha kuhinda ulanga, ifula inghatonye, uleke kunghowe na fula nomowakugonesa, kahi wena udaha muchanhya ya meji, kugabidula gowe sakame, na kuibulaga dunia na matamu fina fowakwenda. ⁷ Fowakumala uhomelesi wawo, dikala dkwenda dije kulawa kwikolongo dya kusimu na kulewa nghondo na kuwasuma na hata kuwakoma, ⁸ na mitufi yawo ikutagigwa munje mudikaya diya dikulu idifane Sodoma na Misili kwa chimuhe, ahanhu Mundewa wawo hoyasambasigwe. ⁹ Kwa chigele cha majuwa madatu na nusu, wandugu we wawo wafile, na makabila na chila nonga na mataifa wolanga mifimba yawo na kulema kuwasika; ¹⁰ na wakaya we chilunga wobwedelela kosoko yawo kwa chinyemi na kiingha fipengwa kosoko awaya wagonesi wawagaisa wanhu we chilunga. ¹¹ Ninga gakaloke majuwa madatu, muhe wa Mulungu wija uwengila, na howokwima kwa migulu yawo, wanhu wawonile hawakolwa na itisi lugano. ¹² Kamei hawahulika ijwi ikulu kulawa kulanga dikugamba, “Kwileni kuno!” Howokwila kulanga mwifunde chigele cho awanghondo wawo wakuwalanga. ¹³ Muchigele chicho hakuwa na isingisi dya chilunga, iisi na wasigale howokogoha na kumwingha itunyo Mulungu wa kulanga. ¹⁴ Usungu wa keli uloka. Usungu wa kadatu ukwija chimwande. ¹⁵ Kamei malaika wa mufungate katowa naye digunda dyakwe, hakuwa na ijwi ikulu kulanga, dikugamba, “Undewa we chilunga ungaluka ndewa wa Mundewa wetu ne Masihi wakwe, naye kulongosa minyaka kwa minyaka.” ¹⁶ Kamei wasehe waya makumi meli na wane awakwima hegoda dye undewa hamwande ye Mulungu wogwa wose hasi na kumufuga Mulungu, ¹⁷ wakwimba nhafi, “Chikukwingha malumbo, Mundewa Mulungu Mukulu, uwowile uko kahi ukwija kosoko kuulonda udaha wako mukulu kahi hakukonga kudima. ¹⁸ Amataifa hagadeseka, ninga nyono yako ija, na chigele cha kuwaliganisa wafile, kwa kuwaliha awatogomi wako na wagonesi na wasunhile na wose wendewogoha disina dyako, wose wakulu kwa wadodogi, na kuwabulaga waya awabulage ichilunga.” ¹⁹ Kamei dihekalu dye Mulungu kulanga hodikumuka kumu! Kamei disafina dye dilagano dyakwe hadyoneka mugati ye dihekalu; kahi hakuwa na fimuli fikumulika, na majwi kudidima, ne dimasingisa, na fula nghulu ya mawe.

¹ Kahi chitangilo chikulu hachoneka, langa mwanamuke yafalile idijuwa na umwesi hasi ye migulu yakwe na mwitwi dyakwe nghofiya ina nyelesi ikumi na na mbili, ² hakowa na inda na kosoko ya usungu umukali wo kidohola hakalila lugano. ³ Na chitangilo chingi hochikoneka kulanga, langa hakuwa na ijoka ikulu idunghu dina matwi mufungate na mahembe ikumi gena kofiya sa chindewa mufungate mwitwi dyakwe, ⁴ umukila wakwe houkwelegeta kalibu sinyelesi sose sa kulanga na kusilagasa hasi, na dijoka diya hadima habehi ne mwanamuke yuya yowile habehi na kweleka uleke dichimese ichali. ⁵ Mwanamuke yuya hakakidohola mwana wa chigosi, imwene iyakwenda yadime na kulongosa amataifa gose ne mhando ye chuma, kamei imwanagwe yuya hoyokwinuligwa mpaka kulanga kudigoda dye Mulungu. ⁶ Mwanamuke hakatijila kunyika kuwile na hanhu hekigwe ne Mulungu, nghakwinghigwa chakudiya kwa majuwa chigulu chimwedu na magana meli na makumi mutandatu. ⁷ Hambiya, inghondo haikonga kulanga, Mikaeli na malaika wakwe, wakulewa ne dijoka, nadyo dijoka nadyo na malaika sakwe hodilewa nawo nghondo. Ninga dijoka na wayagwe howotoigwa lugano, ⁸ kahi hawasumwa, na hakuwa kwichaka luneka kwa wene kahi kwikala kulanga. ⁹ Idijoka diya dikulu haditagigwa hasi, dijoka dya katali, dikwinagwa Luhoma na Shetani, imudasi we chilunga chose, hoyotagwa hasi kuchilunga, na malaika sakwe hamwedu naye. ¹⁰ Kamei hanihulika ijwi ikulu kulanga, dikugamba, “Hambiya uhonya ne ludole fija ne undewa we Mulungu wetu na udaha we Masihi wakwe, kosoko imusongesi we wandugu setu katagigwa hasi, iyendeyawasongesa misi na chilo hamwande ye Mulungu wetu. ¹¹ Ninga howomusuma kwa sakame ye Mwanangholo na kwa mbuli ya uhomelesi wawo, kosoko hawendile nyikala yawo mpaka kufa. ¹² Bwedeleleni hambiya, anyeye ulanga na waya wakwikala umo! Ninga usungu kwichilunga ne mubahali, kosoko luhoma katagigwa ukwenu kena nyono ikufungha, kosoko kamanya fina ugele wakwe mukefu!” ¹³ Hambiya ugele dijoka dikamanye fina ditagigwa hasi ye chilunga, hodikonga kumwidasa mwanamuke yuya yeleke imwana we chigosi. ¹⁴ Ninga mwanamuke yuya hakenghigwa mabawa meli ge dinumba dikulu uleke yapululuke kulawa hedijoka mpaka kunyika ku a hanhu hoyekiligwe yekale na kwinghigwa chakudiya kwa minyaka midatu na minyesi mutandatu. ¹⁵ Kamei dijoka hodilafa kulawa mumulomo wakwe meji kunyuma ye mwanamuke yuya, meji gaya hagowa kifana lwanda uleke gamukome kwa kunywa munghabu. ¹⁶ Ninga iisi hoikwija na kumutasa imwanamuke iisi hagubula mulomo wakwe na kuyonywa ameji gose dijoka godyalafile kumulomo wakwe. ¹⁷ Dijoka hadisuha ne mwanamuke yuya hadiluta na kulewa nghondo ne wanagwe kuwaya awakukola amalagiso ge Mulungu na kuhomelela muchanhya ya Yesu. ¹⁸ Kamei dijoka hodikwima munghingi, kusanga ye bahali.

¹ Kamei hanyona ikala dyenuke kulawa mubahali dine mahembe ikumi na matwi mufungate, chila ihembe dina kofiya ya chindewa na isina dya kutofula muchanhya yakwe. ² Na dikala diya dyonyonile dikifana duma, migulu yakwe kifana migulu ya idubu, na dilomo dyakwe dikifana ilomo dya simba, kamei idijoka hodidingha dikala diya udaha ana nghofiya yakwe ye chidewa na ludole mukulu. ³ Ditwi dyakwe dimonga dyoneka kifana dina ilonda ikulu dya kukoma, ninga dilonda dyakwe diya hadihona, na ichilunga chose hochidyandamila dikala diya kwa majumo. ⁴ Hawadifugamila dijoka diya, kosoko hadingigwa udaha wakwe kulawa kwe dikala, howodifuga dikala wakugamba, “Nonani yafanile gweye go dikala kahi nani yakudaha kitowa na gweye?” ⁵ Dikala hodikwinghigwa mulomo na kubwata mbuli sa kitogola na kutofula, hadilekeligwa konesa udaha wakwe kwa minyesi makumi mane na mili. ⁶ Hadigubula mulomo wakwe na kulonga matofulo kwe Mulungu, nqa kutofula disina dyakwe na wikalo wakwe na waya wakwikala kulanga. ⁷ Hodikwinghigwa udaha kulewa nghondo na wasunhile kahi hodiwasuma, kahi hadinghigwa udaha kuchila ikabila, chila wanhu, na chila nonga na chila itaifa, ⁸ na wose woile muchilunga wakwija wadifuga, chila munhu imwene disina dyakwe disiwandikigwe muchitabu che Mwana ngholo iyachinjigwe. ⁹ Munhu wowose yena singhutwi yahulike. ¹⁰ Munhu wowose yanghalondigwa kuwa mutumwa yakuluta kuutumwa; unghakoma kwa ipanga nagwe kuwagila ukomigwe kwa ipanga. Alono no lwinango lwo kufinyilisa ne dihuwi dya wasunhile. ¹¹ Kahi hanyona ikala dingi dyasololoka muchilunga; haduwa na mhembe mbili sakifana mhembe sa ngholo na dilonga kifana ijoka. ¹² Dikugolosa udaha wose wa diya dikala dye nghonga kumwande yakwe, na kuwagolosa we chilunga chose wafuge kwi kala diya dye nghonga, dyahonile dilonda dyakwe dyo kufa. ¹³ Dikugolosa majumo hata kwigala umoto kulawa kulanga kwija kuisi kumwande ya meso ga wanhu. ¹⁴ Na majumo gaya godyagolosage kumwande ye dikala, dikudanhilisa awekwikala muchilunga, diwalonga wagolosa sisanamu sa diya dikala dyowile na dilonda dyo kukoma dyabulagigwe ne dipanga ninga dikali dyumi, ¹⁵ hodikwinghigwa udaha kuguma muhe kudisanamu diya dye dikala mpaka kudaha kulonga na kuwagolosa waya awakulema kufuga wachijigwe. ¹⁶ Na kuwagolosa wanhu wose wadodogi na wakulu, awagoli na wakiwa awaya awatumwa na awasiwetumwa kugumigwa chitangilo mumukono wo kulume ama muchihanga, ¹⁷ uleke munhu wowose yanghadahe kugula hegu kwambasa, ninga ayuya du yene ichitangilo chicho che dikala diya ama ihesabu ye disina dyakwe. ¹⁸ Ayino ikuhananga ubala: Ayuya yena misungu yamanye ihesabu ye dikala, kosoko ni hesabu ya chimunhumunhu. Ihesabu yakwe ni magana mutandatu na makumi mutandatu na mutandatu.

¹ Kamei hanilanga, na hahowa na Mwanangholo, yemile Mwitunda dya Sayuni! Hamwedu ne mwene wema wanhu figulu igana dimwedu na makumi mane na ine awowile ne disina dyakwe kamei ne disina dye Babakwe diwandikigwe mufihanga fyawo. ² Hanihulika ijwi kulawa kulanga kifana ijwi dya meji mengi, na kifana ijwi ikulu dikudidima, dijwi diya dyonahulike hadyuwa kifana wanhu wakutowa fibwalimbwa fyawo, ³ wakwimba lwimbo lusha kumwande ye fiyumbe fine ifyumi na kumwande ya wasehe. Kwichaka munhu wowose yadahile kifusa kwimba ulwimbo uya ninga awaya du figulu igana dimwedu na makumi mane na wane awene awahonyigwe kulawa kuyisi. ⁴ Nowaya awasikibanile ne wihi we dihabwa, kosoko ni mabikila; awano no wamwandamile Mwanangholo kokose koyalutile. Wahonyigwa kulawa muwanhu wowe kifana mamudyo ge nghonga kwe Mulungu na kwe Mwanangholo, ⁵ na usoneka udasi wowose mumilomo yawo; wanhu wechaka ilema. ⁶ Kahi hanyona malaika yakupululuka muchiligati cho ulanga, kena mbuli swanu ye majuwa gose yakuhubili kuwaya awomi woile muchilunga kwa chila itaifa na ikabila, nonga na chila wanhu. ⁷ Yakulonga kwa ijwi ikulu lugano kugamba, “Mogoheni Mulungu kahi mwingheni itunyo, kosoko ugele we uliganiso wakwe wija; kahi mufugeni imwene yombile isi ne ulanga, bahali ne nhyoko sa meji.” ⁸ Kame malaika yungi wa keli, hakandamila, yakugamba, “Kugwa, kugwa, agweye Babeli go mukulu mugima! Iyawagolose mataifa wonywe difayi ye nyono ye dihabwa dyakwe.” ⁹ Kamei malaika yungi wa kadatu, hakawandamila, yakujoja kwa ijwi ikulu lugano yakugamba, “Imunhu wowose yakudaha kudifuga, dikala ne isanamu yakwe na kuhokela ichitangilo muchihanga chakwe ama mumukono wakwe, ¹⁰ naye yakwenda yonywe idifayi ya inyono ye Mulungu na yakwenda yalakasigwe na umoto we chibiliti kumwande ye malaika wasunhile na kumwande ya Mwanangholo. ¹¹ Na umosi wo kulakala kwawo ukuluta kulanga minyaka na minyaka, na wasikubwihila misi na chilo wawo wafugile dikala na isanamu yakwe, na chila munhu iyakuhokela ichitangilo che disina dyakwe.” ¹² Aluno ni lwinango lwa kufinyilisa, kosoko ya wasunhile awaya awakolile amalagiso ge Mulungu na dihuwi dya Yesu. ¹³ Honihulika kahi ijwi kulawa kulanga dikugamba, “Wandika dino fina. Ibeka awafile, awakufila mwihuwi dye Mundewa kulawa hambiya,” Heye yakulonga Imuhe, “Wabwihile kulawa mutabu yawo, kosoko nhenda sawo siligana nawo.” ¹⁴ Kamei hanyona, langa hahowa na ifunde ijelu, na yekale mwifunde didyo munhu yafane Mwana wa Munhu, kena nghofiya ya sahabu mwitwi dyakwe, na sengo nghali lugano mumukono wakwe! ¹⁵ Malaika yungi hakalawa kulawa kwihekalu, yakumwinanga yuya yekale mwifunde dijelu kwa ijwi ikulu lugano yakugamba, “Konga kusenga ne isengo yako ugole, kosoko ichigele cho kugola chifika, na kosoko indiya yokugola muisi ifulusa kukangala.” ¹⁶ Kamei ayuya yekale mwifunde, hoyoikubita isengo yakwe muchilunga, na fyechilunga hofigoligwa. ¹⁷ Kamei malika yungi hakalawanisa kulawa mwihekalu dya kulanga, naye hakakola sengo nghali lugano. ¹⁸ Kamei malaika yungi kahi hakalawanisa kulawa hefugilo, hakowa malaika yena udaha mukulu muchanhya ye moto, hoyomwinanga kwa ijwi ikulu ayuy yowile ne sengo inghali, “Guma isengo yako kudumula imisabibu yuwile mumigunda ye misabibu muisi kosoko sisabibu sifulusa kwifa.” ¹⁹ Baho iamalaika hoyotema ne sengo yakwe kulunda sisabibu sose muchilunga na kusiguma ahanhu hagolosigwe kukamila sisabibu ne inyono ye Mulungu; ²⁰ na hokukamila sisabibu hahowa kunje ye ikaya, na isakame kulawa ahanhu haya hokukamila hoikwitika kifana lwanda lukulu lwa meji na kwingila hasi yendeifika musingo, kamei utali wakwe kifana maili magana meli.

¹ Kamei hanyona chitangilo chingi kulanga, chikulu na cha ijumo, malaika mufungate na magayo mufungate ge kumalagisa, kosoko ya wawo inyono ye Mulungu imemelekela. ² Na hanyona chinhu kifana bahali ifanile chiyoo chihangile na umoto, na awaya wadisumile dikala diya ne sanamu yakwe ne hesabu ye disina dyakwe, hawema munghingi ye bahali ye chiyoo wena fibwalimbwa fye Mulungu mumikono yawo. ³ Wakwimba lwimbo lwa Musa, mutogomi we Mulungu, na kwimba lwimbo lwe Mwanangholo kugamba: “Singhenda sako nghulu na sa majumo, Mundewa Mulungu Mukulu! Sinjila sako siliganila na sa chawelu, Mundewa wa mataifa! ⁴ Mundewa, nonani inghakwenda yogohe na kuditunya disina dyako? Kosoko agweye muhala no musunhile. Mataifa gose gokwija na kufuga hamwande yako, kosoko uliganiso wako ugubuligwa.” ⁵ Gakaloke gano hanilanga kahi na kona, dihekalu dye dihema dye uhomelesi dikumuligwa kulanga, ⁶ kulawa umo mwihekalu hawa malaika mufungate wena fililo mufungate wena suke sifanile bafuta sikwakaika na mufifa fyawo wafala mikanda ya sahabu. ⁷ Na yumwendu we fiyumbe ifyumi hakawengha malaika mufungate mabakuli ga sahabu gamemile inyono ye Mulungu ye kwikala majuwa gose, ⁸ na dihekalu hadimemesigwa mosi kulawa mwitunyo dye Mulungu na kulawa muludole lwakwe, na hechaka munhu yadahile kwingila kwihekalu kugati mpaka fililo mufungate fuya fya malaika mufungate fihele.

¹ Kamei hanihulika ijwi ikulu kulawa kwihekalu dikuwagamba amalaika mufungate, “Luteni muketile kuchilunga amabakuli mufungate ge inyono ye Mulungu.” ² Imalaika we nghonga hakaluta na kwitila dibakuli dyakwe muchilunga, awanhu hawapata malonda gehile awaya wose woile ne chitangilo che dikala ne wafugile isanamu yakwe. ³ Imalaika wa keli hoyokwitila dibakuli dyakwe mubahali, bahali hayuwa kifana sakame ye munhu yafile, na chila chowile umo hochikufa. ⁴ Imalaika wa kadatu haketila dibakuli dyakwe musisanda na musinhyoko, kamei hoikuwa sakame lugano. ⁵ Na hanihulika malaika we chililo cha meji yakugamba, “Agweye gouliganile mukuliganisa kwako, Agweyo musunhile, Agwe gowi baho, na wowile baho, kosoko kusiliganisa simbuli sino; ⁶ kosoko hawetila sakame ya wasunhile na wagonesi, na gweye kuwengha isakame kunywa. Nonheifo iwawagile!” ⁷ Kamei hanihulika dihekalu dikubidula kugamba, “Heye, Agweye Mundewa Mulungu, Mukulu mudaha wa fyose, uliganisi wako ni wachawelu na uliganila!” ⁸ Imalaika wa kane haketila dibakuli dyakwe mwijuwa, hodikuwa na ukali lugano hodisoma wanhu kwa moto, ⁹ wanhu howolakala lugano ne dililimba dyo moto, ninga hawaliga disina dye Mulungu, iyene udaha mumalilo gano na hawalambile hegu kumwingha itunyo ¹⁰ Imalaika wa shano haketila dibakuli dyakwe muchanhya ye digoda dye undewa we dikala diya, na muundewa wakwe wose homubanika lugano na kwingila chisa; wanhu hawaluma malimi gawo kwa usungu mukulu, ¹¹ na kumuliga Mulungu wa kulanga kosoko yo usungu wawo na malonda gawo, ninga wasalambile singhenda sawo. ¹² Imalaika wa mutandatu, haketila dibakuli dyakwe mulwanda uya mukulu lwa Efulata, na meji gakwe hoganyala, uleke kugolosa njila sa sa kuloka wandewa kulawa kundawilo ye dijuwa. ¹³ Kamei hanyona mhepo ndatu sihile kifana mabula sikulawa kumulomo we dijoka ne kumulomo we dikala na kumulomo we mugonesi yuya wo udasi. ¹⁴ Asino no simhepo isikutogoma fitangilo, fikuluta kuwandewa we chilunga chose, kuwagala hamwedu kwa nyitowa nghondo mwijuwa diya dikulu dye nghondo ye Mulungu Mukulu. ¹⁵ “Langa, nikwija kifana imuhiji nomayakwija hechilo! Ibeka ayuya yakwikala meso na yafalile suse, yanghoneke fina kechaka suke yanghapate chinyala.” ¹⁶ Howalunda hamwedu hanhu hakwinangwa munonga ya Chiyebulaniya Halimagedoni. ¹⁷ Imalaika we mufungate haketila dibakuli dyakwe mumheho muchanhya, kamei dijwi ikulu hodilawa kulawa kwihekalu, kwigoda dyo undewa dikugamba, “Ifuluka!” ¹⁸ Hakuwa na lumwemwe lukumulika, ujelu, kudidima na disingisi ikulu lugano. ¹⁹ Dikaya dikulu hoditemanhuligwa sandi ndatu na sikaya sa mataifa hosikugwa na Mulungu hakagelegela dikaya dikulu dya Babeli, kudigolosa dunywe na kumalagisa ichikombe che inyono ye Mulungu. ²⁰ Chila chisiwa hachitija kutali, na hahowa hechaka cha itunda dyodyose dyasigale; ²¹ na ifula nghulu ya mawe ga usito wa kilo makumi mashano hogowalagalila wanhu kulawa kulanga, mpaka wanhu hawamuliga Mulungu kosoko ya digayo dye ifula ya mawe, adino haduwa igayo dya kogoha lugano.

¹ Kamei yumwedu wa malaika waya yowile ne mabakuli mufungate hoyokwija na kunigamba, “Wije nikwenda nikonese uliganiso we mwanamuke we dihabwa dikulu iyekale mumeji mengi, ² imwene hata awandewa we isi wagenda naye, na ugimbi wakwe wo kugenda na wagose wekale muisi walewa kosoko ya iyo.” ³ Kamei hakanilonda kwa muhe, mpaka kunyika, na uko honikona mwanamuke gowa hamwedu ne ikewe dimonga idunghu dimemile masina go kutofula, dikala diya haduwa na matwi mufungate, na mhembe ikumi. ⁴ Mwanamuke hakafala isuke dya usulunge na idunghudunghu, dihambigwe na fihambo fya sahabu na mawe ga maliho makulu, na lulu kamei mumukono wakwe kakola chikombe cha sahabu chimememile maligo na masinhu gehile na uwafu wose we dihabwa dyakwe, ⁵ na muchihanga chakwe mwanamuke yuya hamwandikigwa isina dya chifiso, dikugamba, “Babeli mukulu, ing’inamunhu mukulu we dihabwa na gehile gose ge chilunga.” ⁶ Hanyona fina mwanamuke yuya hakalewa na sakame ya wasunhile, ne sakama ya wahomelesi wa Yesu. ⁷ Ninga malaika yuya hoyonigamba, “Nhani ukujumha? Nokutamila ichifiso che mwanamuke yuno, ne dikala diya idine matwi mufungate ne simhembe ikumi. ⁸ Adiya dikala dyowonile haduwaga uko, ninga hambiya dyakwichaka, ndyo dikwenda kukwila kulawa kwikolongo dya kusimu na kuluta kukwangamila. Na awanhu wa muchilunga awene masina gawo gasiwandikwe muchitabu cho uwumi kulawa mukumbigwa chilunga, wojumha ugele fowakwija wakona dikala, kosoko haduwa uko na hambiya dyakwichaka, kahi dokwija.” ⁹ Mbuli ino ikuhananga misungu na ubala mukulu! Amatwi gaya mufungate gowonile ni matunda mufungate goyekale mwanamuke yuya; kahi hena wandewa mufungate, ¹⁰ muwawo washano wafa, yumwedu yekali mumi, na wamonga wekali kwija; na foyakwija kokwikala chipisi chiguhi du. ¹¹ Na kwa diya dikala idyowile uko kame hambiya dyakwichaka ni dya munane mugati ya waya mufungate, nadyo dikuluta kukwagilia. ¹² “Na simhembe ikumi sowonile, ni wandewa ikumi awekali kuhokela undewa wawo, ninga wohokela na kuwa wandewa kwa disaa dimwedu muhala, hamwedu na diya dikala. ¹³ Awano wa hamwedu, nawo wakudingha diya dikala ludole na udaha, ¹⁴ wakwenda wagolose nghondo ne Mwanangholo, ne Mwanangholo yakwenda yawasume, kosoko imwene ni Mundewa wa wandewa wose na Mukulu wa wakulu wose, na waya woile ne mwene wakwinangwa wasaguligwe na awakuhuwilika.” ¹⁵ Na hoyonigamba, “Ameji gaya gowonile, ahanhu haya howonile yekale imwanamuke yuya we dihabwa, ni wanhu na matewa na mataifa na nonga. ¹⁶ Na simhembe siya ikumi sowonile, awene na dikala womudesekela; womugolosa mukiwa na wakwenda wamuleke yemwene, kahi ye mwasi wodiya inyama yakwe na kumusoma mumoto. ¹⁷ Kosoko Mulungu kaguma gano mumimoyo yawo, kumemelesa agaya goyahanange kugolosa, kwa kifumilisa hamwedu na kudingha dikala diya undewa wawo, mpka mbuli se Mulungu simemelekele. ¹⁸ Imwanamuke wowumonile, ni dikaya diya dikulu dikulongosigwa na wandewa we chilunga.”

¹ Gakaloke gag, hanyona malaika yungi yakulawa kulanga kena udaha lugano, ichilunga hochikwakaika kosoko ye ditunyo dyakwe. ² Hakenanga kwa ijwi ikulu lugano kugamba, “Dyugwa, dyugwa dya, dikaya dikulu dya Babeli! digaluka lwikalo lwa simhepo, njila ya kugenda chila mamuhe gehile, njila ya kugendela chila idege dihile, njila ya kugenda chila ikewe dihile. ³ Kosoko amataifa gose galewesigwa idifayi yakwe we dihabwa na wandewa we chilunga wagendile naye, na wachulusi we chilunga wagaluka wagoli kosoko ye inyikala yakwe ye kibwedesa.” ⁴ Kahi hanihulika ijwi dingi kulawa kulanga dikugamba, “Laweni kunje yakwe, wanhu wangu, uleke munghahangile wihi wakwe, hegu kuwa na umwedu naye mufililo fyakwe; ⁵ kosoko uwihi wakwe ulundigwa chilundo chifikile kulanga, na Mulungu kagelegela uwihi wakwe wose. ⁶ Muliheni nheifiya fina foyamuliheni nyenye, kahi muliheni mikangha mili ifanile sinhenda sakwe; mumuhasile mikangha mili muchikombe choyahasile. ⁷ Ifene foyakitogole imwecho na kugolosa dihabwa mwinghe ichipimo chiliganile na kona usungu na kulila, kosoko ku moyo wakwe yakugamba, ‘Aniye namundewa fina malikiya; aniye si na mwigane hata, kahi sikwija nikona chililo.’ ⁸ Hambiya malilo gakwe gomwijila ijuwa dimwedu utamu, ndilo ne njala naye kosomigwa mumoto; kosoko imukulu ni Mundewa Mulungu iyakwija yamulamula.” ⁹ Na awandewa we chilunga, wagolose dihabwa na kwikala mubwedelela hamwedu anye, wolila na kuhongesa lugano muchinhya yakwe nomowakwija wakona umosi wo kulakala kwakwe; ¹⁰ wokwima kutali kosoko ya usungu na magayo ge mwanamuke yuyo, nawo wogamba, “Usungu, usungu agweye go dikaya dikulu dyoludole dya Babeli, ni chipisi cha disaa dimwedu ulamusi ukwija.” ¹¹ Na wachulusi we chilunga wakulila kosoko yakwe, kosoko hechaka munhu kahi yakukugula ifinhu fyakwe, ¹² ikanda dye sahabu, fesa ne mawe ge maliho makulu, suke sa bafuta, samawi, halili na suke ndunghu, na chila fiswanu na finhu figolosigwe na simbali sa simhembe, finhu fya diyombe dikulu, fya mabiki, shaba, chuma, na masambalawe, ¹³ mudalasini, filungo, ubani, manemane, wudi, difayi, mafuta, usage wa ngano, ng’ombe na ngholo, falasi na mikokoteni, na watumwa, nong’amba ifidoga fya wanhu. ¹⁴ “Isigafu sahuwiligwe ne moyo wako siluta kutali na gweye, na ugoli wose ne ditunyo dyako fifulusa kuleuka ukwako, hafikuya keli!” ¹⁵ Awachulusi wawo wapatile finhu fyo ugoli kosoko ye imwene wokawakwima kutali kosoko yo kogoha amagayo gakwe wakulila na kuhongesa wakujoja wakugamba, ¹⁶ “Usungu, usungu, ikaya iya inghulu, ifasigwe suke swanu, sowile ne udunghudunghu, ihambigwe ne sahabu, hamwedu ne masambaluwe gakwakaika! ¹⁷ Kosoko kwa chipisi chiguhi ugoli wose uya wagilila!” Na awena simeli, na wose wakugenda mumeji na awachulusi wakwe wose wokwima kutali ¹⁸ ma kulila kwa usungu fowakona umosi ukumusoma, “Hena kaya yaki ifanile ikaya ino inghulu?” ¹⁹ Howokitilila diluli mumatwi gawo, fowakulila na kuhongesa, na kugamba, Usungu mukulu, usungu mukulu ikaya iya inghulu, umo nomowanhu wose wapatile ugoli kwa ugoli wakwe! Kosoko kwa chipisi chimwedu kahi chiguhi fyose fyagilila. ²⁰ Bwedelela gweye Go ulanga kosoko yakwe, anyenye muwasunhile na muwatumigwa na wagonesi! ²¹ Kamei malaika yumonga we ludole kenula iwe difanile iwe dya lwala lukulu na kudikubita mubahali na kugamba, “Nheifo nofonikwenda nikukubite agweye go dikaya dikulu dya Babeli na nghukwija ukoneka keli; ²² kamei ijwi dye wakutowa ifibwalimbwa ne figoma, awekutowa sifuluti na magunda gasikwenda gahulikike kahi ukwako; ²³ ujelu we itaa usikwenda woneke ukwako kahi, ninga dijwi dya bwana halusi au bibi halusi disikwenda dihulikike ukwako; awachulusi wako na wowile wakulu we chilunga na wanhu wose hawadanhilisigwa na uganga wako.” ²⁴ Umwakwe umo hayoneka sakame ya wagonesi na ya wasunhile na wose wakomigwe muchilunga.

¹ Gakaloke gano, honihulika chinhu, chowile kifana ijwi, matewa ga wanhu kulanga wakugamba, “Haleluya! uhonya na ditunyo na udaha wina Mulungu wetu, ² kosoko uliganisi wakwe ni wa chawelu na uliganila, kumuliganisa iwe dihabwa dikulu, iyabanile iisi yose ne dihabwa dyakwe, na kumulamula imwene kuligana ne isakame ya watumigwa wakwe.” ³ Kahi hawajija wakugamba, “Haleluya! Umosi kulawa umwakwe ukufililika majuwa gose.” ⁴ Na wasehe makumi meli na ine na ifyumbigwe fine ifyumi hawogwa hasi kumufuga Mulungu, yekale mwigoda dye undewa wakugamba, “Hano. Haleluya!” ⁵ Na kulawa kudigoda dyo undewa hodihulikika dijwi dikugamba, “Yatunyigwe Mulungu wetu, anye moose muwatogomi wakwe, anye mukumogoha, wadodo na wakulu.” ⁶ Kamei hanihulika chinhu chowile kifana chowe cha itewa ikulu, kifana ijwi dya meji mengi, na kifana ijwi na madidimo ga ludole, gakugamba, “Haleluya! Kosoko iMundewa wetu Mulungu Imukulu no yakudima. ⁷ Haya chisekelele na kumwinula na kumwingha ditunyo, kosoko utole we Mwana we nholo ufika, na ibibi halusi wakwe kafulusa kitandila ⁸ hoyokwinghigwa kufala suke swanu sa bafuta njelu sikwakaika kahi swanu” kosoko sisuke siswanu se bafuta no sinhenda siswanu sa wasunhile. ⁹ Kamei imalaika hoyonigamba, “Wandika dino: Wamoteswe no waya awegonekwe kuchakudiya che halusi cha Mwana ngholo.” Hakanigamba, “Asino ni mbuli sa chawelu se Mulungu.” ¹⁰ Kamei hanugwa hamigulu kumufuga, ninga hakanigamba, “Unghagolose nheifo aniye namutogomi miyago hamwedu nagwe, na wanduguso wose awena uhomelesi wa Yesu mufuge iMulungu! Kosoko uhomelesi wa Yesu ni muhe wa ugonesi.” ¹¹ Kamei hanyona ulanga ugubuke na langa falasi njelu na yuya iyakwilile muchanhya yakwe, yakwinangwa Muhuwiliki na Wachawelu, na kwa chawelu na uliganiso na yakulewa nghondo. ¹² Ameso gakwe kakifana ililimba dya moto na mwitwi dyakwe mwina kofiya nyingi sa chindewa na kena isina diwandikwe, idyene hechaka yakudaha kudimanya ninga imwene imwenyecho du. ¹³ Kafasigwa isuke dilowekigwe musakame na disina dyoyakwinangwa ni Imbuli ya Mulungu. ¹⁴ Na matewa ga wasilikali wa kulanga wafalile suke sa bafuta njelu na swanu, wakumwandamila woile musifalasi sinjelu. ¹⁵ Mulomo wakwe ukulawa ipanga ikali dyokusuma mataifa, na yakwenda yawatawale kwa mhando ya chuma, yakwenda yawakome muchiya cha kukamila difayi che inyono ye Mulungu yo udaha wose. ¹⁶ Mwikasu dyakwe na mwihaja dyakwe kena isina diwandikwe, “Mundewa wa wandewa Mukulu wa wakulu.” ¹⁷ Kahi hanyona malaika yemile mwijuwa, hoyokwinanga kwa ijwi ikulu kumadege goose agekupululuka mugatigati yo ulanga, “Mwije mukilunde kosoko ye chakudiya che Mulungu, ¹⁸ kudiya sinyama sa wandewa na se fitung’ati nyama sa wanhu wo ludole, nyama se sifalasi na waya awakukwila sifalasi na sinyama sa wanhu wose awetumwa na awasiwetumwa, wakulu na wadodo.” ¹⁹ Honikona dikala na wandewa wa muchilunga, na wasilikali wawo, wakikonghola uleke wakitowe nghondo na yuya yekale mufalasi na ditewa dya wasilikali wakwe. ²⁰ Na dikala hodikoligwa hamwedu nadyo ayuya imugonesi wa udasi, imwene kumwande yakwe hakagolosa majumo goyawadanhilise awaya woile ne chitangilo, cha dikala diya na waya awafugile isanamu yakwe. Awano aweli howokundugisigwa awomi mwibwawa dyo umoto ukwaka ne chibiliti. ²¹ Awasigale howochinjigwa ne dipanga dya yuya yekale mufalasi, dipanga dikulawa kumulomo wakwe na madege gose hogokwiguta inyama yakwe.

¹ Kame hanyona malaika yakudulika kulawa kulanga, yakolile mumukono wakwe ifunguo ye dikolongo idichaka ndumo na dinyolo dikulu. ² Hakadisuma diya dijoka dya katali idikwinangwa, yehile na Shetani, hakadifunga na kudiguma mwikolongo kwa minyaka figulu fidatu, ³ hakadihinda na kudihiliwa muchanhya yakwe uleke dinhagendelele kuwadanhilisa awamataifa keli, mpaka iminyaka chigulu chimwedu iloke. Inghaloka dikudoholeligwa kwa chigele chidodogi. ⁴ Kamei hanyona magoda ga undewa na wekale umo no waya aweli wenghigwe mulimo wo ulamusi, kahi haniwona waya wadumuligwe amatwi gawo kosoko yo uhomelesi wawo muchanhya ya Yesu na kuimbuli ye Mulungu, na awene wo wasadifugile dikala diya ne isanamu yakwe kahi wasagumigwe ichitangilo chakwe muchihanga chawo hegu mumikono yawo. Howokwinuka kulawa mudifa, na kutawala hamwedu na Kilisito minyaka chigulu chimwedu. ⁵ Awamonga awafile hawenuke kulawa mudifa mpaka minyaka chigulu chimwedu ikahele, akuno no kwinuka kwa wafile kwe nghonga. ⁶ Kamoteswa na Musunhile ayuya yowile hamwedu na waya mu kwinuka kwa wafile kwe nghonga kosoko ukwawo difa dya keli dichaka udaha, ninga wakuwa makuhani we Mulungu na wa Kilisito, na wakweda watawale hamwedu naye kwa minyaka chigulu chimwedu. ⁷ Ne minyaka chigulu chimwedu inghahela, Shetani yakudoholigwa kulawa kukohigwa kwakwe ⁸ na yakwenda yalawe kugadanhilisa mataifa agowile kusisandi ine che chilunga. Gogi, na Magogi, uleke kuwahinda hamwedu walewe nghondo; hawowa matewa kifana disanga dye bahali. ⁹ Hawagenda chilunga chose na kusunguluta inghambi ya wasunhile ne ikaya ye Mulungu yoyakwenda, ninga umoto houkwija kulawa kulanga na kuwalakasa. ¹⁰ Na iluhoma iyawadanhilise hoyogumigwa mudibwawa dyo umoto ne chibiliti, ukowile ne dikala duya ne mugonesi wa udasi, nawo wakwenda wagaye no usungu chilo ne misi majuwa gose. ¹¹ Hanyona igoda dye chindewa ijelu na yuya yekale umo, ichilunga na ulanga hofitija na hafyoneke kahi hohose haya. ¹² Na hanyona awafile wakulu na wadodo kumwande ye digoda dyo undewa na fitabu figubuligwe. Kahi na chitabu chingi hochigubuligwa ichene no chitabu cho uwumi. Na wafile hawalamuligwa kwandamila foiwandikwe mufitabu kwa gaya gowagolose. ¹³ Ibahali hoiwalafa wafile woile umo, difa na kusimu hofiwalafa wafile woile uko, na wose howolamuligwa kwa gaya gowagolose. ¹⁴ Kamei Difa na Kusimu hofikugumigwa kudibwawa dye umoto adino no difa dya keli, dibwawa dyo umoto; ¹⁵ na nghona disina dya munhu disoneke muchitabu cho wumi hakagumigwa kumoto.

¹ Kamei hanyona ulanga musha na chilunga chisha; kosoko ulanga we ngonga na chilunga che inghonga hachileuka na hakuwa chaka bahali. ² Honikona ikaya isunhile Yelusalemu nyisha ikudulika kulawa kulanga kwe Mulungu, ikigwa kifana bibi halusi yahambigwe kosoko ye mulume. ³ Honihulika ijwi ikulu kulawa kudogoda dye undewa dikugamba, “Langeni ulwikasi lwe Mulungu ni hamwedu na wanhu, yekwikala nawo wakuwa wanhu wakwe, na iMulungu imwecho yakuwa hamwedu nawo; ⁴ yakwenda yahamuse masosi mumeso gawo, na difa dikuwa hechaka, kahi chililo na kuhongesa na usungu wowose, kosoko agekatali gafulusa kuloka.” ⁵ Na yuya yekale mwigoda dyo undewa hoyogamba, “Langa nikugolosa finhu fyose fisha.” Kahi hoyogamba, “Wandika ino simbuli sino sakuhuwilika kahi sa chawelu.” ⁶ Kamei hakanigamba, “Ifulusa kugoloseka! Aniye noni Alufa na Omega, we nghonga ne we indumo. Iyena inghilu nikumwingha ameji gekulawa munhyoko ya meji ga uwumi chaka. ⁷ Iyekusuma yakupata uhasi uno aniye nikuwa Mulungu wakwe naye yakuwa mwanangu. ⁸ Ninga kwa waya awawoga, na wechaka dihuwi, awasinhenda sihile fina wakukoma wanhu, na we dihabwa na wahayi, awakufuga sisanamu na wadasi woose ahanhu hawo hakuwa kudibwawa dikwaka moto na chibiliti idyene no difa dya keli.” ⁹ Kamei hoyokwija yumwedu we malaika yowile ne mabakuli mufungate ga magayo ge ndumo, hoyolonga na niye yakuganba, “Wije nokonesa ibib halusi imuke we Mwanangholo.” ¹⁰ Na kwa chimuhe hoyonilonda na kunigala kwitunda itali, na kunyonesa ikaya isunhile Yelusalemu ikudulika kulawa kwe Mulungu, ¹¹ ina ditunyo dye Mulungu, inyakaika yakwe ni kifana iwe dya iyombe ikulu lugano kahi dikoneka kifana chilole. ¹² Hayuwa isungulutigwe na lukasi, lukulu na milango ikumi na meli, na mumilango malaika ikumi na weli na mumilango iyo hamuwa na masina ga makabila ga wana wa Isilaeli ikumi na meli gawandikwa mumilango. ¹³ Kwindawilo ye dijuwa milango midatu na ulwandi lwe kasikasini milango midatu na ulwandi lwe kwikulu milango midatu na kutwe milango midatu. ¹⁴ Na ulukasi we ikaya hawuwa na misingi ikumi na mine na mumisingi masina makmi na meli ge wefusa we Mwanangholo. ¹⁵ Naye yalongage na niye hakowa na chibiki cha sahabu cha kupimila ikaya ulukasi lwakwe. ¹⁶ Ikaya iya ni mhembe ine utali wakwe na ugalamu wakwe uligana, hoyoipima ikaya ne chibiki chakwe, ukulu wakwe hayuwa kilometai kifana figulu fili na magana mane. ¹⁷ Kahi hoyopima ulukasi wakwe, hoyopima kilometa makumi mutandatu kuchipimo cha wanhu no ng’amba cha malaika. ¹⁸ Ulukasi ujengigwa na mawe madungu ga diyombe dikulu, ikaya yose hayuwa ya sahabu swanu kifana chilole. ¹⁹ Umusingi we lukasi we ikaya iya hauhambigwa na chila mawe ge diyombe dikulu, dye inghonga hadyuwa iwe idunghu kahi dya keli dya safilo na dya kadatu kalikedoni dya kane samaladi, ²⁰ na dya shano salidoniki, dya mutandatu kaneliani, dya mufungate kilisolito, dya munana ni belulo, dya ikenda topasi, dya ikumi kulusopulaso na dye dikumi na imwedu jasindo, dya ikumi na keli amasesito. ²¹ Na imilango ikumi na mbili hayuwa lulu ikumi na mbili, chila mulango umwedu ugolosigwa kwa lulu imwedu, na chila ibalabala hadyuwa sahabu swanu, ikoneka kifana chilole. ²² Sonile ihekalu mukaya iyo, kosoko dihekalu dyakwe ni Mulungu imwecho we udaha wose ne Mwanangholo. ²³ Ikaya yo isikuhananga ijuwa hegu mwesi kwalika umo, kosoko ditunyo dye Mulungu no ujelu wakwe no itaa yakwe ne Mwana we ngholo. ²⁴ Amataifa gakwanga gagende muujelu na wandewa we chilunga wakwigala ditunyo umo. ²⁵ Na imilango yakwe isikuhindigwa ne misi na uko kukuwa kwechaka chilo. ²⁶ Wanhu wakwenda wegale umo ditunyo na chogoho cha mataifa. ²⁷ Ninga kwachaka chinhu chochose chihile ichikudaha kwingila umo, hegu munhu wowose yakulonga udasi ninga awaya du awawandikigwe muchitabu cha Mwanangholo cha uwumi.

¹ Kamei hoyanyonesa ulwanda wa meji ga uwumi lukwakaika kifana chilole, gakudulika kulawa kudigoda dya undewa wa Mulungu na dya Mwanagholo. ² Ulwanda lukugenda mugatigati ye kaya. Kahi munghanda ya ulwanda kosekose, dibiki dya uwumi, na mamudyo gakwe ga milijo ikumi na meli gakweleka mamudyo chila mwesi, na amanyagala ge dibiki gakuhonya amataifa. ³ Kusikuwa na chochose chiligitigwa, ninga kukuwa na digoda dya undewa wa Mulungu na dye Mwanangholo na gawaumo, na awatumigwa wakwe womufuga. ⁴ Wakwenda wachone ichihanga chakwe na disina dyakwe dyokuwa diwandikigwe mufihanaga fyawo. ⁵ Kusikuwa na chilo, wasikuhanga ujelu wa taa hegu dijuwa kosoko Mulungu wawo no ujelu nawo wakwenda watawale ugele wose. ⁶ Hoyonigamba, “Simbuli sino ni sa kuhuwilika na sa chawelu. Na Imukulu, iMulungu we mimuhe ya wagonesi katuma amalaika sakwe konesa awatumigwa wakwe agakwenda galawanise muchigele chidodogi. ⁷ Na langa nikwija chimwande, kamoteswa ayuya iyakolile simbuli sa ugonesi we chitabu chino.” ⁸ Aniye, Yohana inahulike na kona simbuli sino, honikugwa hamigulu ya malaika yuya iyanyonese ifinhu afi. ⁹ Ninga hakanigamba, “Unghagolose nheifo! Aniye namutumigwa miyago fina gweye na wanduguso awagonesi na waya wakolile simbuli se chitabu chino, mufuge Mulungu!” ¹⁰ Hoyonigamba, “Simbuli sino so ugonesi unghasigume chikanhamso kosoko ugele wa habei. ¹¹ Ayuya yakugolosa wihi yagendelele kuwa muswanu, na imusunhile yowe musunhile.” ¹² “Langa na habehi kwija, nikwija na maliho gangu kumuliha chila munhu fina foyagolose. ¹³ Aniye no Alufa na Omega we ghonga ne we ndumo we kukongela na kumalagisila.” ¹⁴ Wamotesigwa awaya wakufuwa sisuke saww uleke wowe na luneka wa kulutila dibiki dyo uwumi na kudaha kwingila dikaya kulokela milango yakwe. ¹⁵ Kunje kwina mabwa na wahayi na wedihabwa, na awakukoma wanhu, awaya wakufuga sisanamu na chila munhu iyakwenda udasi na kudanha. ¹⁶ “Aniye Yesu nimutuma malaika wangu ukwako na uhomelesi uno kumakanisa, Aniye nonimusisi wo lukolo lwa Daudi inyelesi ikwakaika iyenhousikusiku.” ¹⁷ Imuhe ne bibi halusi yakugamba, “Wije.” Na yuya iyekuhulika na yagamba, “Wije.” Na yuya yene inghilu yeje. Iyakwenda yalonde meji go uwumi chaka. ¹⁸ Nikumujama chila munhu iyakuhulika simbuli sa ugonesi wa chitabu chino, munhu wowose yanghongesela, simbuli so ugonesi we chitabu chino, Mulungu naye yakwenda yamongesele amagayo gawandikigwe muchitabu chino. ¹⁹ Na imunhu wowose yanghahungula simbuli se chitabu chino so ugonesi iMulungu yakumuleusile umugawo wakwe mudibiki dya uwumi na mukaya isunhile, iwandikigwe muchitabu chino. ²⁰ Iyekuhomelesa kusimbuli sino yakugamba, “Chawelu nikwija chimwande.” Hano. Wije Mundewa Yesu! ²¹ Dihewa dye Mundewa wetu Yesu dyuwe na wasunhile wose. Hano.