WAFILIPI

WAFILIPI

¹ Aniye Paulo na Timoseyo, watogomi wa Kilisito Yesu, Kuwasunhile wose mugati ya Kilisito Yesu awowile Filipi, hamwedu na maasikofu na mashemasi: ² Dihewa dyuwe hamwedu nanye ne digoya dikulawa kwe Mulungu iBaba yetu ne Mundewa wetu Yesu Kilisito. ³ Nikumulumba iMulungu wangu chila fonikumugelegelani; ⁴ majuwa gose fonikumutasilani anyeye mose na kulonga sisala sangu kwa chinyemi, ⁵ nikulumba kosoko ya ulugota lwenu mung’endelesa imbuli swanu kulawa dijuwa dya bosi mpaka hambiya. ⁶ Na dyonihuwile fina chawelu nodino, iyakongese umulimo umuswamu mumimoyo yenu kowigala ku ndumiliso hata mwijuwa dya Yesu Kilisito. ⁷ Nhafo nofo nikwendigwa nimudogeni anyeye mose, kosoko muwa mumoyo wangu, kosoko chose chihangila imboto ino, iyokohigwa kwangu na umulimo wo kuimilisa na kuimilila imbuli ye Mulungu. ⁸ Kosoko iMulungu no muhomelesi wangu, ifene fonikumonelani nghwina anyeye mose muwendo wakwe Kilisito Yesu. ⁹ Diwombi dyangu nodino, uwendo wenu wongesekele kahi lugano, muumanyi ne misungu yose, ¹⁰ uleke mugafumile amaswanu lugano, kahi muwe na fidoga fiswanu mwijuwa dya Kilisito, ¹¹ mumemesigwe mamudyo ge chelu, agekwija kwa njila ya Yesu Kilisito, kwa kutogolwa na kutunyigwa kwe Mulungu. ¹² Nikuhananga anyeye wandugusangu mumanye fina gose aganipatile ganipata chawelu kosoko ya kuigendelesa mbuli swanu, ¹³ hata awasilikali na wamonga matewa wamanya fina inyohigwa yangu ni kosoko ya Kilisito; ¹⁴ na wengi wa wandugusangu wasindamikwa mugati ye Mundewa kosoko ye nyohigwa yangu na kugendelela kuwa wakangasi mu imbuli ye Mulungu wechaka chogoho. ¹⁵ Awamonga wekumuhubili Kilisito kwa chimwefe na nyisuma, ninga awamonga kwa fidoga fiswamu. ¹⁶ Awakeli wekumuhubili kwa wendo, wamanyile fina nyikigwa kosoko niimilile injili; ¹⁷ awenghonga wekumuhubili Kilisito kwa chimwefe, ng’o si kwa mimoyo mijelu, wamanyile fina wokongesa amagayo ge nyohigwa yangu. ¹⁸ Kahi choni? Amba kwa sinjila sose, yuwe kwa kiigilisa ama ye chawelu, Kilisito yakuhubiligwa; naniye nina chinyemi. ¹⁹ Heye, nobwedelela. Kosoko nimanya fina kwa njila ya mawombi genu ne utasi wa Muhe wa Yesu Kilisito agano gogaluka kulekeleligwa nyihulwa yangu, ²⁰ ifene fonigojele na kuhuwila lugano fina sidaha kupata chinyala ng’o, amba kwa usindamiki mukulu fina majuwa gose Kilisito yakutunyigwa mumutufi wangu, inghowa kwa uwumi kahi kwa difa. ²¹ Kosoko ukwangu aniye kuwa mumi ni Kilisito, na kufa ni nyongesa. ²² Inghowa kuwa mumi chimutufi, ago no mamudyo go umulimo ukwangu. Nikali mumanhonge dyonikwendigwa nisagule sikutanga. ²³ Nikanhamiswa hagati ya mabuli meli. Nikusulumila kuleuka nghekale na Kilisito, ayo no iswanu lugano. ²⁴ Ninga kusigala chimutufi kukuhanangigwa lugano kosoko ya nyeye. ²⁵ Nihuwile nheifo, nimanya fina nosigala na kugendelela nanyeye mose, ya magendelelo genu ne chinyemi mwihuwi, ²⁶ uleke mudahe kongeseka kuwa ne itunyo mugati ya Kilisito Yesu, kosoko ye nyija yangu ukwenu kahi. ²⁷ Ninga sinhenda senu suwe kifana Imbuli swanu ya Kilisito foikulagisa, uleke ningheja na kumonani anyeye, kahi nghona sijile, nihulike sinhenda senu, fina mwima ngwingwingwi mu Muhe yumwedu, na chidoga chimwedu kosoko ye dihuwi dye imbuli swanu, ²⁸ munghogohe mbuli yoyose ya wanghondo wenu. Achino no chitangilo cha hajelu cho kwagilila kwawo, ninga uhonyi wenu uwukulawa kwe Mulungu. ²⁹ Kosoko mwinghigwa anyeye kosoko ya Kilisito si kumuhuwila du, ninga na kudumangiswa kosoko yakwe, ³⁰ mwingisigwa munghondo iya yomuyonile ukwangu, na hambiya mukuhulika fina ninayo.

¹ Hambiya inghowa kwina sindamiko yoyose mugati ya Kilisito, ganghowa baho mahoso gogose ga wendo, unghowa baho lugota wowose we Muhe, nghona kwina ndekelela yoyose no ubasi, ² memeleseni inyemo yangu, mudahe kuwa na chidoga chimwedu, wendo umwedu, moyo umwedu, mudoge hamwedu. ³ Munghagolose mbuli yoyose kwa kisuma ama kwa kiyona, ninga kwa uholo chila munhu yamone imiyagwe muswamu kusuma imwenecho. ⁴ Chila munhu yanghalongose simbuli sakwe, ninga yalongose simbuli sawayagwe. ⁵ Yuweni na chidoga chicho mugati yenu, ichuwile mugati ya Kilisito Yesu, ⁶ yuyo, iyowile kulawa kunghonga futa ya Mulungu nghonile inyuwa muliganyo ne Mulungu chinhu cha kikolelela nacho, ⁷ amba hakegolosa kechaka kulu, kuwa kefana mutumwa, kwelekwa kefana wanhu wose. ⁸ Kahe foyoneke kena futa ya munhu, hakakidulisa na kuwa muholo hata mwifa, mwifa dyo musalaba. ⁹ Hambiya iMulungu hakamukwisa lugano, na kumulugutisa disina dyakwe kusuma masina gose, ¹⁰ noho kwa disina dya Yesu chila ifindi difugame, dya ifinhu fyose fya kulanga na fye yisi na ifyuwile hasi ye yisi, ¹¹ na chila ilimi digambe nhafi Yesu Kilisito no Mundewa kwa ukulu we Mulungu Baba. ¹² Hambiya, wendigwa wangu, fina amajuwa gose fomugendelele kuwa na moyo wa chogoho, siyo ichigele chonyowile nanyeye du, amba hambiya lugano ichigele chosuwile nanye, togomeni kwa kogoha na kutetema kosoko yo uhonya wenu; ¹³ kosoko iMulungu noyekutogoma mulimo mugati yenu, kwenda kwenu na kutogoma kwenu, muumemelesi we nyenda yakwe. ¹⁴ Goloseni chila mbuli bila ya nghalasi ama nyiyusa, ¹⁵ mudahe kuwa wana we Mulungu mwichaka ilema, kahi udasi, mwichaka chinhu chochose chikumusigani mu cheleko chino cho ufudutu, ichagilile, chomukoneka anyeye mukwakaika muchilunga, ¹⁶ mukolelele imbuli yo uumi, nidahe kuwa na soko ya kitunya mwijuwa dya Kilisito, nhafi sabilime chaka ama sakiidasa chaka. ¹⁷ Hata ninghalafigwa uumi wangu kefana sadaka kosoko ye dihuwi dyenu kwe Mulungu, nokuwa na nyemo lugano, kahe nosangalala hamwedu nanye mu nyemo yiyo. ¹⁸ Anyeye nanye nheifo bwedeleleni kahe bwedeleleni hamwedu naniye. ¹⁹ Mundewa Yesu yanghenda, nikuhuwila kumutuma Timoseyo ukwenu chimwande, nidahe kugumigwa moyo nani ne simbuli se inyuwa yenu. ²⁰ Kosoko nechaka munhu yungi ye hamwedu nani kefana imwene, iyodaha kumulangililani kwa moyo. ²¹ Kosoko awanhu wengi wekwenda simbuli sawo siyo sa Kilisito Yesu. ²² Anyeye mose mumumanya Timoseyo ne nyituma yakwe kefana mwana na Babakwe mumulimo we Injili. ²³ Hambiya nikuhuwila kumutuma yuyo chimwande fonikanimanya agakanipata; ²⁴ nani nimuhuwila Mundewa fina nokwija nimwenecho chimwande kahe. ²⁵ Amba hanidoga yendesa kumutuma ukwenu Epafulodito, mundugusangu kahe mutogomi nani kahe chitung’ati miyangu, kahe mutumigwa wenu na mutogomi we finhu fonikwenda, ²⁶ kosoko hakowa na nghwina nanye mose lugano, kuwa na usungu nanye lugano, kwasoko hamuhulika hakowa mutamu. ²⁷ Chawelu hakowa mutamu, habehi na kufa. Ninga iMulungu hakamonela ubasi, kahe siyo ukwenu du amba no ukwangu nani, uleke ninghowe na sungu muchanhya yo usungu. ²⁸ Hambiya nghitahidi lugano kumutuma, uleke munghamona kahi mumwayemwaye nani mhungulilwe usungu wangu. ²⁹ Ninga muhokeleni imwene mugati ye Mundewa kwa nyemo yose; kahe muwe na chogoho na wanhu kefana imwene, ³⁰ kosoko hakowa habehi kufa na kwangamisa uwumi wakwe kosoko yo mulimo wa Kilisito, uleke yamalagise agahunguke mu mulimo wenu ukwangu.

¹ Kumalagisa, wandugusangu, bwedeleleni mwi Mundewa. Kuwawandikilani simbuli sisiya sonawandikile sikusoka kosoko sowatasa nyeye. ² Kinegeni ne awanhu wefane mabwa, kinegeni na wekugolosa uwihi, kinegeni na wanhu awekitema mumitufi yawo. ³ Kosoko aseye chawalami we chawelu, ichikumufuga Mulungu mu muye, ne ditunyo dya Kilisito Yesu, na wanhu wesikihuwisila simbuli se chimutufi. ⁴ Ninga aniye nani nikudaha kihuwisila simbuli se chimutufi. Nghona hena munhu yakudoga yakudaha kihuwisila simbuli se chimutufi aniye ninaso itewa: ⁵ nafinigwa dijuwa dya munana, na munhu wa ditaifa dya Isilaeli, wa dikabila dya Benyamini, Muebulaniya nyelekwe na Waebulaniya; munghola itolati aniye na Ifalisayo, ⁶ kunyituma nadidumangisage dikanisa, muchawelu ye itolati hanyuwa namunjelu. Ninga amabuli gose gonyonage gena faida ukwangu, hanigawala hasala kosoko ya Kilisito. ⁷ Ninga amabuli gose gonyonage gena faida ukwangu, hanigawala hasala kosoko ya Kilisito. ⁸ Chawelu nikugatala amabuli gose kefana hasala kosoko yo uswamu wichaka muliganyo wo kumumanya Kilisito Yesu Mundewa wangu. Kosoko yakwe mhata hasala ya mabuli gose, nikugatala kefana chinhu chilemigwe uleke nimupate Kilisito ⁹ na koneka mwe imwene, nechaka chawelu yangu nimwenyecho, iikupatigwa kwa kwandamila sheliya, ninga iikupatigwa kwa kumuhuwila Kilisito, ichawelu iikulawa kwe Mulungu iihuwile dihuwi; ¹⁰ uleke nimumanye imwene na uludole wo kwinuka kwakwe muchilalo, na ulugota wa magayo gakwe, na kuliganiswa ne difa yakwe, ¹¹ uleke inghadahika nani nije ninuligwe kulawa kwa wofile. ¹² Sidaha kugamba ngaluka nisuma ama ngaluka memelekela; amba nikudoha uleke nidigolose dyuwe dyangu, kwasoko iKilisito Yesu kanigolosa nuwe wakwe. ¹³ Wandugusangu, sidaha kugamba ngaluka nidikola; amba imbuli imwedu yonikulonga noyino, kugasimilwa gose agowile kunyuma na kuchunyunhila ku agowile kumwande yangu, ¹⁴ nikudoha uleke nidipate digeleko idiswamu lugano dyo ulwinango mukulu we Mulungu mugati ya Kilisito Yesu. ¹⁵ Lekeni aseye chose chiwakangasi chidoge nheifo; hata munghadoga gengi mu mbuli yoyose, Mulungu kowagubulilani didyo nadyo. ¹⁶ Ninga chigendelele kuwa muchawelu yenele yochinayo. ¹⁷ Wandugusangu, munyandamile aniye, na kuwalanga awanhu awekwandamila umufano wochiwenghileni. ¹⁸ Kosoko awengi, wa awenele nigendelele kumutamilani kahe hambiya nikumutamilalani kwa masosi, wakwila kefana wanghondo wo musalaba wa Kilisito. ¹⁹ Indumo yawo ni kubanigwa, mulungu wawo ni sinda, kahi wekitunya mu chinyala chawo, awekudoga amabuli ge chilunga. ²⁰ Ninga ukaya wetu aseye wuwa kulanga, kahi kulawa uko chikumugojela iMwihula, iMundewa Yesu Kilisito, ²¹ iyakayeubidula umutufi wetu uwichaka ludole, udahe kuliganila no mutufi wakwe we ditunyo, kwa udaha uwukumudahisa kufigolosa ifinhu fyose fyuwe hasi yakwe.

¹ Hambiya, wandugusangu, wonikumwendani na kumonelani ngwina, inyemo yangu ne nghofiya yangu, gendeleleni kwima ngwingwingwimwe Mundewa wendigwa wangu. ² Nikumutasa Ewudiya na Sindike wowe na chidoga chimwedu mwe Mundewa. ³ Kahe nikukutasa agwe nagwe, mwituma we chawelu, uwatase awanawake wano, kosoko hawagolosaga hamwedu naniye umulimo we mbuli swanu hamwedu na Kilemendi na awamonga wochagolosanyage umulimo, awandikwe masina gawo mu chitabu cho uwumi. ⁴ Bwedeleleni mwi Mundewa majuwa gose; kahi nikugamba, bwedeleleni. ⁵ Awanhu wose waumanye uholo wenu. iMundewa kamala keja. ⁶ Munghakiidase kwa mbuli yoyose, ninga kwa chila chinhu kwa kutasa na kufuga hamwedu ne dilumbo lekeni ifinhu fomukwenda fimanyike ne Mulungu. ⁷ Ne digoya dye Mulungu, idilokile umanyi wose, didime imimoyo yenu ne misungu yenu mu Kilisito Yesu. ⁸ Kumalagisa, wandugusangu, simbuli sose se chawelu, simbuli sose se chogoho, simbuli sose sichaka koneligwa, simbuli sose selile, simbuli sose so uyendo, simbuli sose se ditunyo diswamu, inghowa kwina chinhu chochose cha kutunya, dogeni simbuli senele siso. ⁹ Simbuli somukifusile na kuhokela na kuhulika na kona ukwangu, sigoloseni; ne iMulungu we toyoyo kokuwa hamwedu nanye. ¹⁰ Nina chinyemi mwe Mundewa lugano kosoko hambiya monesa ifyene fomowile hamwedu nani; hamuwa hamwedu nani chawelu, ninga hamuswela luneka. ¹¹ Sikulonga gano kosoko nechaka chinhu nihungukiligwa; kosoko nghifusa kumemeswa na hali yoyose yoninayo. ¹² Nimanya kuwa na finhu fikefu kahe nimanya kuwa na fingi; mu hali yoyose nikifusa isili yo kwiguta na kona njala, kuwanafyo na kuwa chaka. ¹³ Nina udaha wa kusuma simbuli sose mugati ye mwene iyekuniguma uludole. ¹⁴ Amba hamugolosa fiswamu, kwa kuwa hamwedu nani mumagayo gangu. ¹⁵ Kahe anyeye mo Wafilipi mowenyecho mumanya fina mu nghonga ye Injili, fonaleguke Makedoniya, hasowile na ikanisa dingi idyowile hamwedu nani mu ndafa na kuhokela ninga anyeye mwiwene; ¹⁶ kosoko hata kuya Sesalonike hamunigalila finhu fya kunisapusa siyo kamwedu amba majuwa itewa. ¹⁷ Munghagambe nikusulumila ifinhu fomwanyingile du; amba nikusulumila amamudyo ge nyongeseka yenu. ¹⁸ Ninafyo finhu fingi, na kongesekela; nimemelekela, mhokela kwa mukono wa Epafulodito ifinhu afiya ifilawile ukwenu, mhungile ya mafuta, sadaka yendeke, iikumwendesa Mulungu. ¹⁹ Ne Mulungu wangu yawamemeleseni chila chomukwenda ifyenele ugoli wakwe fouwile, mu ditunyo dhya Kilisito Yesu. ²⁰ Kwe Mulungu wetu na Baba ditunyo dyuwe ukwakwe amajuwa gose. Hano. ²¹ Munamusile chila musunhile mugati ya Kilisito Yesu. Awandugusangu awowile na niye wekumulamusani. ²² Awasunhile wose wekumulamusani, awaya awowile mu nyumba ya Kaisali. ²³ Dihewa dye Mundewa Yesu Kilisito dyuwe hamwedu ne fidoga fyenu.