MALUKO

MALUKO

¹ Inghonga ya Imbuli swanu ya Yesu Kilisito Mwana we Mulungu, ² fina yofoitulumwe ne mugonesi Isaya: “Langa nikumutuma imutumigwa wangu kumwande yako Iyakwenda yaigolose injila yako. ³ Dijwi dye imunhu yekujoja munyika Igoloseni injila ye Mundewa; Sigoloseni si njila sakwe!” ⁴ Yohana mubatisaji yasololoka munyika, yakuhubili ubatiso wo Kulamba uwukwigala kuleusiligwa uwihi. ⁵ Iyisi yose ya Uyahudi wejawamulutila na wanhu wose wa Yelusalemu; na kuwabatisa mulwanda lwa Yolodani, wakulamba uwihi wawo. ⁶ Yohana hakafala singa se ngamia na mukanda we nghingo muchuno chakwe, chakudiya chakwe sige na uki wa filambo. ⁷ Yawahubiliya awanhu, yakugamba, “Hanyuma yangu yakwija yena udaha kusuma niye, aniye sagiligwe kufunama na kudohola sisigi se filwatu fyakwe. ⁸ Aniye nikumubatisani kwa meji, ninga imwene yakwenda yamubatiseni kwa Muhe Musunhile.” ⁹ Amajuwa gago Yesu yeja kulawa Nasaleti ya Galilaya, hoyabatisigwa na Yohana mu ulwanda lwa Yolodani. ¹⁰ Kamei yakalawe kunje ya meji, chimwande yeja yona ulanga ugubuka na Muhe yakudulika muchanhya yakwe kifana huwa; ¹¹ dijwi dyalawa kulanga, “Agweye no mwanangu mwendigwa; nyendesigwa nagweye.” ¹² Chimwande Muhe Musunhile kamulongosa kunyika. ¹³ Naye yowa uko kunyika kwa majuwa makumi mane; yakugesigwa na Luhoma, yowaga na makewe ga kumbago, na malaika wende womutogomela. ¹⁴ Hambiya, Yohana yakohigwe, Yesu yeja Galilaya, yakuhubili imbuli swanu ye Mulungu ¹⁵ yakugamba, “Ugele wija, undewa we Mulungu usegelela, Mulambe, na kuihuwila imbuli swanu.” ¹⁶ Ugele foyagendage munghingi ye bahali ya Galilaya, yamona Simoni ne munduguse Andelea, wakuguma ulwafu lwawo mubahali, kosoko hawowa walowaji wa somba. ¹⁷ Yesu yawagamba, “Nyandamileni, nani nowagolosa muwe walowa wanhu.” ¹⁸ Kamei chimwande wejawaleka si nyafu sawo na kumwandamila. ¹⁹ Hawaluta hamwande habehibehi, hawamona Yakobo wa Sebedayo, na Yohana imunduguse, nawo nheifiya hawowa mu chiya, wakusigolosa si nyafu sawo, ²⁰ Kamei chimwande, yeja yawenanga; howomuleka iBaba yawo Sebedayo mu chiya hamwedu na wanhu we maliho, na kumwandamila. ²¹ Wejawaluta Kapelinaumu, chimwande dijuwa dye sabato yejayengila mwisinagogi na kufusa. ²² Wejawajuma lugano kosoko ya mafuso gakwe, kosoko yendeyofusa fina munhu yena udaha, kahi si fina watulumi. ²³ Kamei chimwande, hamuwa na munhu yena digini dihile umo mwisinagogi dyawo; ²⁴ kamei hakajoja China choni nagweye, “Yesu wa Nasaleti? Togola kwija uchimalagise? Nikumanya gwegwe no Imusunhile we Mulungu.” ²⁵ Ninga Yesu yaigombela yakugamba, “Nyamala na umulawe!” ²⁶ Kamei dyamuguma chisilisi, na kujoja kwa ijwi ikulu na kumulawa. ²⁷ Wose wejawajuma, wakiyusa, wakugamba, “Choni chino? Ifuso isha! Kwa udaha yakulagisa hata magini gehile nago gakumuhulika.” ²⁸ Simbuli sakwe hosikwenela chimwande ku si iisi sose sikusunguluta Galilaya. ²⁹ Kamei chimwande wakalawe mwisinagogi, wejawengila ukaya kwa cha Simoni na Andelea, hamwedu na Yakobo na Yohana. ³⁰ Imukwewe wa Simoni, ing’ina we imuke, hakowa mwisasi, kena mhungo; kamei chimwande wejawamutamila simbuli sakwe. ³¹ Hoyamusegelela, na kumwinula kwa kumukola umukono, imhungo haimuleka, na kuwatogomela. ³² Hegulo iya dijuwa dikoswe, wejawamwigalila wose awowile na sinhamu na wowile na magini. ³³ Awanhu wose we ikaya iya howokwija howomema hamulango. ³⁴ Hakawahonya matewa na matamu ga hayo hayo, na kulafa magini itewa, nghagalekile magini galonge, kosoko hagamumanya. ³⁵ Nhosikusiku, kwikali malisalisa, yejayenuka na kuluta kunhu kwichaka wanhu, uko yowa na mawombi. ³⁶ iSimoni na wayagwe hawamwandamila, ³⁷ na kumona hawamugamba, “Awanhu wose wakukuhananga.” ³⁸ Yawagamba, “Chigendeni kwingi, kufikaya fihamwande, uleke nihubili uko nako kosoko iyo nochileka nejile.” ³⁹ Yaluta kuhubili, iisi yose ya Galilaya mumasinagogi gawo na kulafa magini. ⁴⁰ Yamwijila munhu yena ukoma, yakumugongelesa kwa kumufugamila, yakugamba, “Unghenda ukudaha kunihonya.” ⁴¹ Naye yamonele ubasi, na kugolola umukono wakwe, na kumukwafa, yakugamba, “Nikwenda, uhone.” ⁴² Kamei chimwande ukoma wamuleuka hakahonyigwa. ⁴³ kamei Yesu yamugamba yalute chimwande ⁴⁴ na kumugamba, “Langa, unghamutamile munhu mbuli yoyose; nanga ulute ukakiyonese ku watambiki, go mwenyecho ukalafe isadaka foyalagisa iMusa, kosoko ya kuhona kwako; chuwe chitangilo ukwawo.” ⁴⁵ Ninga, hakalawa na kukonga kuibwambwasa na kuyenesa imbuli iya mpaka isidahike kahi kwa Yesu kwingila mukaya yakoneke na wanhu. Ninga hakasigala kunje ahanhu hasowile na wanhu, hawamulutila kulawa chila ulwandi.

¹ Gakaloke majuwa makefu, yoya kahi Kapelinaumu, hawahulika fina kowa ukaya. ² Wanhu itewa weja welunda hamwedu mpaka hamulango, hokukuwa chaka luneka kosoko yawo; naye yendeyowahubili imbuli yakwe. ³ Haweja wanhu wegale mutamu yaholole, kenuligwa na wanhu wane. ⁴ Wakalemeligwe kumusegelela kosoko ya matewa, Howaimola ikano, ahaya hoyowile. Wakamale kuitobola hawamuhulumusa mwisasi dyoyagonele ayuya iyaholole. ⁵ Kamei Yesu yakone dihuwi dyawo, hakamugamba ayuya iyaholole, “Mwanangu kuleusiligwa uwihi wako.” ⁶ Awamonga wa Watulumi awowile uko, hawekala na kudoga mufidoga fyawo, ⁷ “Nhani yuno yakulonga nhafi? Yakutofula. No nani yakudaha kuleusa uwihi langa yu mwedu du naye no Mulungu!” ⁸ Chimwande Yesu, yakamanye muchidoga chakwe fina wakudoga nheifo mufidoga fyawo, yawagamba, “Nhani mukudoga nhafi mufidoga fyenu? ⁹ Chihufu no chihoki, kumugamba yaholole, ‘Kuleusiligwa uwihi wako,’ ama kugamba, ‘Inuka, kitwike disasi dyako, ulute?’ ¹⁰ Ninga mumanye fina Mwana we Munhu kena udaha muchilunga wo kuleusa uwihi.” Kamei yamugamba ayuya yaholole ¹¹ Nikugamba, “Inuka kitwike disasi dyako ulute ukaya ukwako.” ¹² Chimwande hakenuka, na kitwika disasi dyakwe na kulawa kumwande yawo wose. Wose wejawajuma na kumutunya Mulungu, wakugamba, “Chisinati chone chinhu fina chino ugele wowose!” ¹³ Hakaleuka kahi na kuluta kunghingi ye bahali, ditewa dyose hodimusunguluta, hoyowafusa: ¹⁴ Foyalokage, yamona Lawi imwana wa Alifayo, kekala hachibanda cho kulihila kodi, hakamugamba, “Nyandamile. Hakenuka na kumwandamila.” ¹⁵ Ugele foyekale wakudiya kunyumba yakwe ditewa dye wakonghosa kodi na wena uwihi hawekala hamwedu na Yesu, na wefusa wakwe, kosoko hawowa itewa wamwandamilage. ¹⁶ Watulumi na Mafalisayo fowamonile yakudiya hamwedu na wakonghosa kodi na wena uwihi, hawawagamba awefusa wakwe, “Nhani yakudiya hamwedu na wakonghosa kodi na wena uwihi?” ¹⁷ Yesu yakahulike hoyowagamba, “Awomi wasikuhananga muganga ninga awatamu. Sijile kwinanga awomi ninga awene wihi.” ¹⁸ Awefusa wa Yohana na Wamafalisayo weja wafungaga; kamei, haweja, wakumugamba, “Nhani awefusa wa Yohana na wefusa wa Mafalisayo wakufunga, ninga awefusa awako wasikufunga?” ¹⁹ Yesu hakawagamba, “Awowile mu halusi wakudaha kufunga nhani ugele ibwana halusi kahamwedu nawo?” Ichigele chose nghona ibwana halusi ye hamwedu nawo, wasikudaha kufunga. ²⁰ Ninga amajuwa gakwija iBwana halusi yakwija yoleusigwa, dijuwa dyo noho wakawofunga. ²¹ Hechaka munhu yakusona ndame nyisha mu suke ya katali, yanghasona, achiya ichisha chikuigolosa idegeke aiya isuke ya katali, ahaya ahadegeke hakongeseka kudegeka. ²² Kahe hechaka munhu yakuguma difai nyisha muchibuyu cha katali, yanghaguma aiya idifai nyisha ikwenda ifitule ifibuyu fiya, ninga difai nyisha ikugumigwa mufibuyu fisha. ²³ Yakowe yakuloka mumigunda ye ngano dijuwa dye sabato; fowaleukage awefusa wakwe hawakonga kukwanyula masanja ge ingano. ²⁴ Mafalisayo hawamugamba, “Langa, nhani wakugolosa dilemesigwe kugolosa mwijuwa dye Sabato?” ²⁵ Kamei yawagamba, “Musinati musome hohose foyagolose Daudi, foyowile na njala, imwene na wayagwe: ²⁶ ifene foyengile mu nyumba ye Mulungu, ugele we mutambiki mukulu Abiyasali, na kudiya imikate iya yokonesa iyene isikudiigwa na wanhu wowose ninga na watambiki du, na kuwenghawayagwe?” ²⁷ Hoyowagamba, “Isabato haigoloseka kosoko ye munhu; siyo imunhu kosoko ye isabato. ²⁸ Ninga Mwana we Munhu no Mundewa we sabato nheifia.”

¹ Yengila kahi mwisinagogi; umo hamuwa munhu yena mukono uholole. ² Wende womutegela uleke wone nghona yomuhonya dijuwa dye sabato; uleke wamukole chikono. ³ Kamei yamugamba ayuya yena umukono uholole nyagula ⁴ Hakawagamba, “Ni fiswanu dijuwa dye sabato kugolosa maswanu ama gehile, Kuhonya chidoga ama kukoma?” Ninga hawanyamala. ⁵ Hakawakumhulila meso kose kose kwa nyono, yena usungu kosoko yo ukugutu we fidoga fyawo. Yakumugamba ayuya imunhu, “Golola umukono wako. Naye hakaugolola, na umukono wakwe houhona.” ⁶ Amafalisayo hawalawa na chimwande haweka njama hamwedu na Mahelodiya kosoko yakwe uleke wamukome. ⁷ Yesu yaleuke hamwedu na wefusa wakwe, kuluta kunghingi ye bahali na wanhu itewa kulawa Galilaya weja wamwandamila; kahi kulawa Uyahudi, ⁸ na Yelusalemu, na Idumaya, na umwambu wa Yolodani, na ulwandi lwa Tilo na Sidoni. Itewa ikulu, wakahulike simbuli sose soyagolose, hawamwijila. ⁹ Hakawalonga awefusa wakwe fina wamwikile chiya habehi naye, kosoko ya ditewa dya wanhu, wangheje womukanhamisa; ¹⁰ Kosoko hakahonya matewa, hata awaya awowile na sinhamu, weja wakisegesaga uleke wamukwafe. ¹¹ Na wena magini gehile chila fowakumona, wakugwa na kujoja, wakugamba, “Agweye no umwana we Mulungu.” ¹² Hakawalemesa lugano, wanghamubwambwase kuwanhu. ¹³ Kahi hakakwila kwitunda na kuwenanga wose woyendile howomwijila.. ¹⁴ Kamei yawasagula ikumi na weli, wowe hamwedu naye, uleke yawatume kuhubili. ¹⁵ Kahi wowe na udaha wa kulafa magini: ¹⁶ Simoni yamwingha disina dya Petulo; ¹⁷ Yakobo imwana wa Sebedayo, na Yohana imunduguse wa Yakobo, yoyawengha disina dya Boanege, nong’amba, “Wana we ididimo;” ¹⁸ Andilea na Filipo, na Batolomayo, na Matayo, na Tomaso, na Yakobo imwana wa Alufayo na Tadei na Simoni Mukananayo, ¹⁹ na Yuda Isikalioti, iyamusongesa. Kamei hakaluta ukaya. ²⁰ Ditewa dya wanhu dyakitang’anyila kahi, hata awene wasapata luneka lwa kudiya. ²¹ Awanduguse wakahulike simbuli so, hawamulutila uleke wamukole; kosoko hawagamba, “Ditwi dyakwe dijuguma.” ²² Na Watulumi awadulike kulawa Yelusalemu, hawagamba, “Kena Belisebuli, na yakulafa simhepo kwa udaha we mukulu wa magini.” ²³ Hakawenanga, na kuwatamila kwa mbasi: “Iluhoma kodaha kumulafa Luhoma? ²⁴ Nghona Undewa unghakitemanula uwecho kwa wecho usikudaha kugendelela. ²⁵ Na inyumba inghakitemanula iyecho kwa iyecho, inyumba yo isikudaha kugendelela. ²⁶ Iluhoma yanghakisuhila imwecho na kigawa nghekudaha kugendelela, ninga indumo yakwe ija. ²⁷ Kwechaka munhu yekudaha kwingila kunyumba ye munhu yena ludole na kulonda ifinhu fyakwe, mpaka yakonge kumoha imunhu wo ludole; noho yakudaha kulonda inyumba yakwe. ²⁸ Chawelu, nikumutamilani, uwihi wose wa awanhu wakudaha kuleusiligwa, na matofulo gose gowekulonga; ²⁹ Ninga imunhu iyakwenda yamutofule Muhe Musunhile yakuwa na wihi wa majuwa gose.” ³⁰ Kosoko wagambile fina Kena magini gehile. ³¹ Haweja ing’ina ne wanduguse: Wema kunje, walagisa munhu yamwinange. ³² Amatewa hawowa wekale, wamusunguluta, wamugamba, “Langa, ing’inako na wanduguso, wowa kunje wakukuhananga.” ³³ Yawabidula, yekugamba, “Imayi na wandugu sangu no chenani?” ³⁴ Yawalanga awaya awekale na kumusunguluta kose kose na kuwagamba, “Langa! Imayi na wandugu sangu! ³⁵ Kosoko imunhu wowose iyakugolosa foyakuhananga iMulungu, ayo no mundugusangu, no lumbu dyangu no ng’inangu.”

¹ Yakonga kahi kuwafusa kunghingi ye bahali. Ditewa ikulu lugano dya wanhu, dyamusunguluta, imwene yengile muchiya, na kwikala muchiya ulwandi lwe bahali, ditewa hodikuwa kunje ye bahali, kuisi kwichaka meji. ² Yawafusa mbuli nyingi kwa mbasi, mumafuso gakwe yawagamba: ³ Hulikiseni! “Imuhandi yaluta kuhanda. ⁴ Kamei ugele foyahandage imbeyu imonga hoilagalila munghanda ye njila, ifidege hofiidiya. ⁵ Imonga hailagala hena diwe, hahowa na ulongo mukefu. Chimwande hoikota kosoko ya ulongo mukefu. ⁶ Kamei dijuwa dikalawe, hailakala, na kosoko ichaka misisi hainyala. ⁷ Isimonga hosilagala ahena imiwa, imiwa iya yakula na kuikanhamisa, hoileka kweleka mhule. ⁸ Simonga hosilagala hena ulongo umuswanu hosikweleka, hasota na kukula, na kweleka: Imonga mhule makumi madatu, imonga makumi mutandatu, na mhule imonga igana dimwedu. ⁹ Yena singhutwi so kuhulika yahulike!” ¹⁰ Naye yakowe ye imwene awaya awanhu awamusungulute na waya ikumi na weli, howomusa difuso dye mbasi. ¹¹ Yawagamba, “Anyeye mumotesigwa kumanya imbuli ifisigwe ya undewa we Mulungu, ninga kwa waya wowile kunje gose gakugolosigwa kifana mbasi, ¹² uleke hata wanghalanga, walange wanghone, ‘Na wanghahulika, wahulike wanghamanye, Wangheje wobiduka na kulekeleligwa.’” ¹³ Kahi yawagamba, “Musikuimanya imbasi ino? Simbasi simonga mosimanya nhani? ¹⁴ Imuhandi ayo yakuhanda imbuli. ¹⁵ Awano no wowile munghanda ye injila ichigele choikuhandigwa imbeyu; awene, wanghahulika imbuli, chimwande yakwija Luhoma na kuileusa aiya imbuli ihandigwe mufidoga fyawo. ¹⁶ Nheifo awa nawo nowaya wahandigwe mu mawe, awene wakuhulika iya imbuli. Chimwande waihokela kwa chinyemi. ¹⁷ Ninga wachaka misisi mugati yao, wakugendelela chipisi chiguhi. Kughalawanisa migogolo kosoko ya iya imbuli, wakuleka kuhuwila. ¹⁸ Na wano nowaya wakuhandigwa mumiwa. Ni wanhu wakuihulika imbuli, ¹⁹ na simbuli se chilunga, na udasi we mali, na kukwegigwa na finhu, sikukanhamisa iya imbuli mpaka imbuli iya isikudaha kweleka. ²⁰ Na wano nowaya wahandigwe mu ulongo muswanu, no wanhu wakuihulika imbuli na kuihokela, na kweleka si mhule: Aino makumi madatu, aino makumi mutandatu, na aino igana dimwedu.” ²¹ Yawagamba, “Itaa ikwija igubikigwe? Si kwikigwa muchigwaso? ²² Kosoko kwechaka mbuli ifisigwe ninga kosoko ije imanyike, kahi kwechaka difisigwe ninga dije dyoneke pwi, pwi, pwi. ²³ Imunhu nghona yena nghutwi sa kuhulika yahulike.” ²⁴ Hakawagamba, “Mulangisise go mukuhulika, imhishi iya yo mukupima, noyo mukamupimiligwa na kahi mukongeseligwa. ²⁵ Kosoko yena chinhu yakwenda yenghigwe, na ayuya yechaka chinhu, hata chiya choyenacho yakuhokigwa.” ²⁶ Yagamba, “Undewa we Mulungu ukifana munhu yanyagile imbeyu musanga, ²⁷ yakugona na kwinuka, chilo ne imisi, na imbeyu hoikota na kukula, fonghamanyile. ²⁸ Kosoko iisi ikweleka iyecho, ikukonga dinyagala, kamei chida, kamei disanja dye ingano ikangale mwisanga. ²⁹ Inghakangala, yakwingisa ihengo yakwe kosoko ugele wokududula ufika.” ³⁰ Yagamba, “Chiliganise na choni undewa we Mulungu? Kahi chiugume mu mbasi yaki? ³¹ Ikifana imbeyu yo umheja, iyene foikuhandigwa mu ulongo ni ndodogi kusuma si mbeyu sose suwile mu chilunga; ³² ninga inghahandigwa, ikukula kusuma amabiki gose, ikuwa na matambi makulu mpaka amadege ga kulanga gakujenga amafulu gawo mwipeho dyakwe.” ³³ Kwa mbasi nyingi sifanile ino, hakalonga nawo imbuli fowadahile kuhulika. ³⁴ Ninga bila mbasi nghalongile nawo, kamei yawatamila awefusa wakwe we imwene. ³⁵ Dijuwa diya ikowe hegulo, yawagamba, “Chiloke mpaka umwambu.” ³⁶ Na fowadilekile ditewa dya wanhu kunyuma, hawamulonda imwene hamwedu nawo muchiya nheifiya foyowile. Na Ifiya fimonga, hafyua baho hamwedu naye. ³⁷ Lwalawa luputa lukulu lwa imheho, amawingo hagatowa ichiya, na kukonga kumema meji. ³⁸ Imwene hakowa kunyuma ye ichiya kagona mu muto. Hawamwinusa, wakumugamba, “Mwalimu, nghukona ubasi aseye fochikufa?” ³⁹ Hakenuka, na kuigombela imheho, yakuigamba ibahali, “Nyamala twi!” ⁴⁰ Hakawagamba, “Nhani mukogoha? Mwichaka ihuwi?” ⁴¹ Hawengiligwa na chogoho chikulu, na kukonga kulonga awecho kwa wecho, “Ayuno nani, imwene imheho ne bahali fikumuhulika?”

¹ Hawaloka umwambu we bahali, mpaka muiisi ya Wagelasi. ² Yakahulumuke mu chiya, chimwande, haketang’anyila ne munhu, yalawile kufilalo, yena imhepo ihile; ³ ukalo wakwe hauwa kufilalo; hahowa chaka munhu wowose yadahile kumoha kahi, hata kwa minyolo; ⁴ kosoko hakohigwa kengi na kengi kwa mhingu ne minyolo na kuidumula aiya iminyolo, na kusitulatula asiya simhingu; kahi hahowa chaka munhu wowose yadahile kumusuma. ⁵ Na majuwa gose, chilo ne misi hakowaga kufilalo na kumatunda, yakutula chowe na kitema tema na mawe. ⁶ Yakamone Yesu kwa hatali; yabilima na kumufugamila. ⁷ Yakujoja kwa dijwi dya muchanya, yekugamba, “Nina choni nagweye, Yesu, Mwana we Mulungu! Yowile kuchanhya? Nikutasa kwedisina dye Mulungu unghanidumangise!” ⁸ Kosoko hakadigamba digini diya, “Agwe go digini dihile mulawe imunhu yuno!” ⁹ Hakadyusa, “Disina dyako nani? Hodibidula Disina dyangu nene Legioni kosoko cha itewa!” ¹⁰ Hadimugongelesa yanghagegale kutali ne iisi iya. ¹¹ Baho hetunda hahowa itewa dya nguluwe sikudima; ¹² Kamei amagini gose hagamugongelesa, gakugamba, “Chigale kusinguluwe uleke chisingile isene.” ¹³ Naye hoyogengha luneka amagini gehile hogelawa, na kwingila musinguluwe siya. Ditewa dyose dyadulika chimwandemwande kwigenge, na kwingila mubahali, hasuwa figulu fili nhafi; hosikunywa munghabu. ¹⁴ Awadimi wew singuluwe hawatija, na kuwatamilisa simbuli so mukaya na kunje ye ikaya. Awanhu hawalawa uleke wone imbuli igoloseke. ¹⁵ Hawamulutila Yesu; hawamona yuya yowile na magini, kekala, kafala suke, kena misungu yakwe; naye noyowile na diya ditewa howokogoha. ¹⁶ Na waya awonile hawawatamila simbuli sagoloseke kwe munhu yuya wa magini, na simbuli se singuluwe. ¹⁷ Kamei wejawakonga kumutasa Yesu yaleuke muisi yawo. ¹⁸ Naye foyendeyokwingila muchiya, ayuya yowile na magini hakamutasa fina yowe hamwedu naye. ¹⁹ Ninga Yesu nghamufumile. Yamugamba, “Luta ukaya kuwambwiyasako, ukawahubili wa ukwenu kawatamile simbuli singhulu iMundewa soyakugolosele na ifene foyakonele ubasi.” ²⁰ Hakaluta, na kukonga kuhubili mu isi ya Dekapoli simbuli singhulu isene Yesu soyamugolosele, wanhu wose hawakisina. ²¹ Yesu yakafuluse kuloka kuya umwambu muchiya, hawamwijila itewa ikulu, naye hakowa munghingi ye bahali. ²² Hakeja munhu yumonga mu wakulu wa disinagogi, disina dyakwe Yayilo; yakamone, yamufugamila. ²³ Hakamugongelesa lugano, yakugamba, “I mwanangu we chike imudodo mutamu lugano kahabehi na kufa. Nikukutasa wije umwikile umukono wako muchanhya yakwe, uleke yahone, na yowe mumi.” ²⁴ Yaluta hamwedu naye. Itewa ikulu dyeja dyamwandamila wakumufinhafinha. ²⁵ Kamei mwanamuke yumonga yena utamu wa kulawa sakame kwa minyaka ikumi na mili, ²⁶ hakaluta kuwaganga wengi lugano, na kupata magayo mengi. Hakamala imali yakwe yose, ninga kusamutasile hata hadodogi, inyuwa yakwe hoigendelele kwiha kusuma foyowile kunghonga. ²⁷ Yakahulike simbuli sa Yesu, yagenda muchiligati che ditewa kwa kunyuma, na kukwafa isuke yakwe; ²⁸ kosoko hakagamba, “Ninghasikwafa sisuke sakwe du, nikuhona.” ²⁹ Chimwande inhyoko ye sakame yakwe yanyala; naye hakamanya mumutufi wakwe fina kahona utamu wakwe. ³⁰ Kamei Yesu yakamanye fina udaha umulawa umwakwe, chimwande yabiduke mu ditewa, hoyogamba, “Nani yanikwafile?” ³¹ Awefusa wakwe hawamugamba, “Togola nghukona amatewa fowakukukanhamisa ulwandi lwose; nagwe ukugamba Nani yanikwafile?” ³² Yalanga ulwandi lwose uleke yamone iyagolose didyo. ³³ Na yuya imwanamuke yengilwa na chogoho na kuchichima, yakamanye chigoloseke umwakwe, yeja na kumugwila na yakumutamila yose. ³⁴ Yamugamba, “Mundele dihuwi dyako dikuhonya. Ugende mheho, uwe mumi, unghowe na utamu wako kahi.” ³⁵ Ugele foyalongage, haweja wanhu kulawa kwa yuya imukulu wa disinagogi, wakugamba, “Imwanago we chike kafulusa kubanika. Nhani ugendelele kumwidasa imwalimu?” ³⁶ Ninga Yesu yakahulike imbuli iyo ikulongigwa, yamugamba imukulu wa disinagogi, “Unghogohe, huwila du.” ³⁷ Hakawalemesa awanhu wanghamwandamile, ninga Petulo, na Yakobo, na Yohana imunduguse wa Yakobo. ³⁸ Fowengile kugati kwa yuya imukulu wa disinagogi, yona wanhu wengi wakulila, na kuhongesa lugano, ³⁹ yakafuluse kwingila yagamba, “Nhani mukujoja na kulila? Imundele yuno nghafile, ninga kagona du!” ⁴⁰ Hawamuseka lugano. Yakawalafe kunje wose, hakamulonda iBabakwe ne ing’ina wa yuya imundele, na waya awowile hamwedu na kwingila kugati koyowile imundele yuya. ⁴¹ Hakamukola umukono imundele yuya, na kumugamba, “Talita kumi,” no ng’amba, “Mundele nikukugamba Inuka!” ⁴² Chimwande imundele yuya yemanyima na kugenda, (kosoko hakowa mukulu wa minyaka ikumi na mili.) Chimwande weja wajuma ijumo ikulu. ⁴³ Yawalemesa lugano, wanghatamile munhu imbuli iyo. Yawalonga, wamwinghe chakudiya.

¹ Yaleuka uko na kuluta kuiisi ya ukwawo, awefusa wakwe wejawamwandamila. ² Ikowe sabato, yakonga kufusa mwisinagogi. Matewa wakahulike wejawakisina, hawagamba, “Ayuno kapata hoki agano? Na misungu yaki ino yoyenghigwe yuno? Kahi yakugolosa amajumo gano goyakugolosa kwe mikono yakwe? ³ Ayuno si yuya muselemala imwana wa Maliamu na, mundugu sawo wa cha Yakobo, na Yose, na Yuda na Simoni na walumbuse wasibaha ahetu?” Hawamulema. ⁴ Yesu yagamba, “Imugonesi yakwinghigwa chogoho chila hanhu ninga kuisi yakwe ka imwecho na kuwanhu wo lukolo lwakwe na inyumba iyakwe.” ⁵ Nghagolose ijumo dyodyose uko, ninga hakeka imikono yakwe muwatamu wakefu, hakawahonya. ⁶ Hakajuma kosoko yo kuleka kuhuwila kwawo. Yesu yasunguluta mufikaya fiya na kufusa. ⁷ Yawenanga awaya ikumi na weli, na kukonga kuwatuma weli weli, na kuwengha udaha muchanhya ya magini gehile. ⁸ Yawalemesa wanghalonde chinhu chochose cha munjila, ninga mhandodu; kefana mikate, mufuko wa nghingo, mapesa ga mumifuko. ⁹ Ninga wafale filwatu, kahi wanghalonde nghasu ya sigafu ninga mhando du. ¹⁰ Hakawagamba, “Kunyumba yomukwingila mwikale baho mpaka fomukuleuka. ¹¹ Na hanhu hohose wanghaleka kumuhokelani ama kuwategelesa hona mukuleuka uko, mukung’unhe dinghundi dyuwile mumigulu yenu, yuwe chitangilo chokumulemani.” ¹² Hawalawa kuhubili fina awanhu walambe. ¹³ Hawalafa magini mengi, na kuwabaka mafuta wanhu wengi na kuwahonya. ¹⁴ Mundewa Helode yakahulike simbuli so, kosoko disina dya Yesu hadimanyika kosekose, awamonga hawagamba, “Yohana Mubatisaji kenuligwa mu wanhu wafile; nochanghone uludole lwakwe lukiyonesa mumilimo yakwe.” ¹⁵ Wamonga weja wagamba, “Ayuno Eliya.” Na wamonga hawagamba, “Ayuno ni mugonesi fina yumwedu wa wagonesi wa katali.” ¹⁶ Ninga Helode yakahulike, yagamba, “Yohana, wonadumule ditwi, kenuka.” ¹⁷ Kosoko Helode imwecho yatuma wanhu, hawamukola Yohana, na kumoha mwigelesa, kosoko ya Helodia, imuke wa Filipo imunduguse, kosoko hakamutola. ¹⁸ Kosoko Yohana hakamulonga Helode fina, “Si fiswanu agweye kuwa ne muke we mukuluwo.” ¹⁹ Ihelodiya hakowa na finju na Yohana, na hakahananga kumukoma. Ninga nghapatile luneka, ²⁰ kosoko Helode yendeyomwogoha Yohana; hakamanya fina ni munhu we chawelu na musunhile, na hakamwika hanhu haswanu. Foyamuhuwile hakakisina lugano, kahi hakenda kumuhulikisa kwa chinyemi. ²¹ Ichigele hachifika, ugele Helode yakagolose sikukuu ya dijuwa dyo kwelekigwa kwakwe, yawagolosela madiya, wakulu wa wasilikali ne filongosi, na wanhu awena undewa wa Galilaya. ²² Noho imwanagwe we chike wa Helodia, yengila na kufina, yamwendesa Helode na wose wowile naye hachakudiya chiya. iMundewa yamugamba imundele yuya, “Nitase chochose cho ukuhananga ani nikukwingha.” ²³ Yamwilahila, “Chochose choukutasa nikukwingha, hata ulwandi lyo undewa wangu!” ²⁴ Kamei hakaluta na kumusa ing’ina, “Nitase choni?” Naye yamugamba, “Ditwi dya Yohana Mubatisaji.” ²⁵ Kamei yengila chimwandemwande kumwande ye Mundewa, hoyotasa, yakugamba, “Nikuhananga uninghe hambiya hano ditwi dya Yohana Mubatisaji mwisahani.” ²⁶ iMundewa yona usungu lugano, ninga kosoko ye nyilaha yakwe na kosoko ya waya awowile hechakudiya, yasumwa kulema. ²⁷ Chimwande yamutuma musilikali iyowile mu samu na kumugamba yegale ditwi dya Yohana. Kamei yaluta na kumudumula ditwi amuya mwigelesa; ²⁸ Yegala ditwi dyakwe mwisahani na kumwingha imundele yuya, naye imundele hakamwingha ing’ina. ²⁹ Awefusa wakwe wakahulike imbuli iyo haweja na kulonda umutufi wakwe na kumusika. ³⁰ Awefusa hawoya kwa Yesu; na kumutamila agaya gose gowagolose, na kufusa. ³¹ Kamei hakawagamba, “Mwije anyeye mwikale hanhu haposike mukabwihile hadodo.” Kosoko hahowa na wanhu wengi, wakwija na kuleuka, awene howoswela luneka lwa kudiya. ³² Hawaluta awene muhala muchiya ahanhu howile chaka wanhu. ³³ Awanhu hawawona wakuluta, na wengi hawamanya hawaluta uko kwa lumangho kulawa sikaya sose na kuwalongolela. ³⁴ Yakahumuluke muchiya, hoyokona itewa ikulu, akawonela ubasi, kosoko hawowa kifana ngholo sichaka mudimi. Kamei hakakonga kuwafusa mbuli itewa. ³⁵ Chikaloke chipisi chitali cha nemisi, awefusa wakwe hawamulutila wakugamba, “Ahanhu hano nyika muhala, dijuwa nadyo duswa; ³⁶ uwelage awanhu wano, uleke walute kufikaya fya munghanda wakakigulile chakudiya.” ³⁷ Ninga hakawagamba, “Wengheni nyeye chakudiya.” Wamugamba, “Togola chilute chikagule mikate ya dinali magana meli uleke chiwenghe chakudiya?” ³⁸ Yawagamba, “Mwinayo mikate mingahi?” Luteni mukalange. Wakafuluse kumanya weja wagamba, “Mishano na somba mbili.” ³⁹ Yawatuma wawagambe awanhu wekale wose, fitewa tewa, mumbago injolo. ⁴⁰ Howokwikala kwa misitali ahano igana, ahano makumi mashano. ⁴¹ Foyailondile aiya imikate mishano na siya sisomba si mbili, yenula meso kuchanya kulanga, na kuilugutisa na kuibendula imikate iya na kuwengha awefusa wakwe wawagawile wanhu na siya sisomba si mbili hawawagawila wose. ⁴² Awanhu wose hawadiya na kwiguta. ⁴³ Hawalonda ifibendu fye mikate na sisomba sasigale na kumemesa fisege ikumi na fili. ⁴⁴ Wadiile imikate yiyo hawowa wagosi figulu fishano. ⁴⁵ Chimwande yawalonga awefusa wakwe wengile muchiya, wamulongelele kuluta Betisaida, umwambu we bahali, ugele imwene foyakilagage ditewa dya wanhu. ⁴⁶ Yakamale kilaga na wanhu, hakakwila kwitunda kutasa. ⁴⁷ Ikafike hegulo ichiya hachuwa muchiligati ye bahali, imwene hakowa yemwene kuiisi, kunje ye bahali. ⁴⁸ Hokawona awefusa wakwe wakugaya na kuyusigwa muchiya chawo kosoko imheho yendeitowa kwa ludole kulawa kowakuluta. Habehi na kucha, yawejila yakugenda mubahali, na kuhananga kuwaloka, ⁴⁹ Nawo wakamone yakugenda mumeji ge bahali; hawamanya nhagela ni isoki, hawatula chowe; ⁵⁰ kosoko wose hawamona hawogoha. Chimwande yalonga nawo, “Sangalaleni noniye, munghogohe.” ⁵¹ Yengila muchiya chiya; imheho yanyamala na kisina; howokisina lugano mufidoga fyawo, ⁵² kosoko wasatangile simbuli se mikate iya, ninga fidoga fyawo hafyuwa fikugutu. ⁵³ Wakafuluse kuloka, hawafika iisi ya Genesaleti, kamei hawemisa ichiya chawo baho. ⁵⁴ Wakafuluse kulawa mu chiya, chimwande wanhu hawamutanga. ⁵⁵ Hawabilima lumangho musikaya sose sihabehi na kukonga kuwegala awatamu mumasasi kuluta chila hanhu howahulike fina kauko. ⁵⁶ Chila koyalutile yengila kufikaya na kusikaya ama kumigunda, haweka watamu mumagulilo, wakumutasa fina wakwafe hata dihepu du dye suke yakwe; na wose wamukwafile howahona.

¹ Kamei Amafalisayo na wamonga wa watulumi kulawa Yelusalemu, fowejile ukwakwe. ² Hawona awamonga wa wefusa wakwe wakudiya ne mikono ichuchile. ³ (Kosoko Amafalisayo na Wayahudi wose wanghaleka kunawa imikono ichiganja chose wasikudiya; wakolelesa amahokelo ga wasehe wawo; ⁴ Kahi wanghalawa kwigulilo, wanghaleka kusunha imigulu wasikudiya na gauko mengi gowakolile, fina kusunha ifikombe, na madumu, ne fiya fya shaba.) ⁵ Awaya Mafalisayo na Watulumi howomusa Yesu, “Nhani awefusa wako wasikwandamila amahokelo gawasehe ninga wakudiya ne mikono ichuchile?” ⁶ Kamei hakawagamba, “Mugonesi Isaya hakalonga fiswanu muchanya yenu! Anyeye mwine chimwefe! Fina foitulumwe: ‘Awanhu wano wakunitunya kwa milomo yawo, Amba fidoga fyawo fya kutali na niye. ⁷ Nawo wakufuga chaka, na kufusa amafuso ga malagiso ga wanhu!’ ⁸ Anye mukuleka amalagiso ge Mulungu na kukola amahokelo ga wanhu.” ⁹ Hakawagamba, “Fiswanu!” mukulema amalagiso ge Mulungu uleke mukole amahokelo genu! ¹⁰ Kosoko iMusa hakagamba, “Uwahulike iBabako ne ng’inako, na iyakumuliga iBabakwe ama ing’ina kufa na yafe. ¹¹ Ninga anyeye mukugamba imunhu yanghamugamba iBabakwe ama ing’ina Ni kolibani, (nong’amba nikwika chinhu changu cha kulafa kwa Mulungu, ichikwenda chimutase hechaka mbuli.) ¹² Kahi musikutuma hanyuma ya gago kumugolosela mbuli iBabakwe au ing’inakwe. ¹³ Ako ni kubesa imbuli ya Mulungu kwa mahokelo genu gomukuhokela; kahi mukugolosa mbuli nyingi kifana siso.” ¹⁴ Hakawenanga amatewa kahi yekuwagamba, “Mhulikeni mose na kumanya.” ¹⁵ Kwechaka chinhu chuwile kunje ye munhu ichikudaha kumugolosa yowe na wihi. Ninga afiya ifikulawa mugati ye munhu, nofikumuguma uwihi. ¹⁶ Imunhu ghona kena nghutwi sa kuhulika yahulike. ¹⁷ Yakengile kugati kadileka ditewa kunje, awefusa wakwe weja wamusa muchanya ye imbasi iya. ¹⁸ Yawagamba, “Hata nyeye mwechaka misungu? Musikumanya fina chila chinhu chuwile kunje ye munhu chinghamwingila, chisikudaha kumwingha uwihi; ¹⁹ Kosoko chisikumwingila muchidoga, ninga, munda du, kamei chikulawa kucholo?” (Kwa kulonga nhaifo kafitenda fyakudiya fyose fuwe fiswanu.) ²⁰ Yagamba, “Ichikumulawa imunhu nochikumuguma uwihi. ²¹ Kosoko mufidoga fya wanhu mukulawa magelegela gehile, dihabwa, ²² uhiji, kukoma, ugoni, kusulumila kwihile, migogolo, udasi, chimwefe, chigiso, maligo, usisi, ubwalasi ²³ Agano gose gehile gakulawa kugati, nago gakumuguma imunhu uwihi.” ²⁴ Yakaleuke uko, yaluta umwambu kuisi ya Tilo na Sidoni. Yengila nyumba imonga, yahananga yanghamanye munhu wowose, ninga isadahike kifisa. ²⁵ Ninga, chimwande, mwanamuke, imwene imwanagwe we chike hakowa na igini dihile, yahulika simbuli sakwe, yeja na kumugwila hamigulu yakwe. ²⁶ Naye imwanamuke yuya hakowa Muyunani, dikabila dyakwe Musilofoinike. Yamutasa, yailafe imhepo mwe mwanagwe we chike. ²⁷ Yamugamba, “Waleke awana wende kwiguta, kosoko siyo fiswanu kuchilonda ichakudiya cha wana na kugakubitila mabwa.” ²⁸ Ninga yabidule, yakugamba, “Heye, Mundewa, Ninga hata amabwa gowile hasi ye imesa, gakudiya fowakulagasa awana.” ²⁹ Hakemugamba, “Kosoko ye imbuli iyo, Luta, imhepo imulawa imwanago we chike.” ³⁰ Yaluta ukaya ukwakwe, na kumufika ayuya imundele katambalala mwisasi; na digini diya difulusa kumuleuka. ³¹ Yaleuka mumihaka ya Tilo, yagenda mugatigati ya Sidoni, na kupulutila mpaka kubahali ya Galilaya, kupulutila Dekapoli. ³² Hawamwigalila munhu nghakuhulika chihuli, kahi nghakulonga, hawamugongelesa yamwikile mikono. ³³ Hakamusegesa kunghanda ne ditewa yemwene, na kuguma ifidole fyakwe musinghutwi sakwe na kuguma mate, na kumukwafa mwilimi, ³⁴ ghakalanga kuchanhya, na kugula, na kugamba, “Efata, nong’amba Kumuka!” ³⁵ Chimwande singhutwi sakwe hasigubuka, ichifundo cha dilimi dyakwe, hachilegela na kulonga fiswanu. ³⁶ Hakawalemesa wanghamutamile munhu; ninga foyagendelele kuwasigilila, nofowagendele kubwambwasa simbuli. ³⁷ Howakisina lugano kusuma fowasowele, wakugamba, “Kagolosa finhu fyose fiswanu! Wasikuhulika kawagolosa wahulike, ne fimumu walonge.”

¹ Mumajuwa gago, itewa dya wanhu wengi fowakitanganyile. Na hawowa wechaka chakudiya, yawenanga awefusa wakwe, yakuwagamba, ² “Nikuwonela ubasi amatewa kosoko wekala hamwedu na niye, gafika majuwa madatu, na wechaka chinhu cha kudiya. ³ Ninghawelaga walute kusikwawo, wafungile, wakusilika munjila, na wamonga walawa kutali.” ⁴ Awefusa wakwe wamusa, wakugamba, “Togola kwina munhu yakudaha kuwegusa mikate awanhu ahano hanyika?” ⁵ Kawosa, “Mwina mikate mingahi?” Hawagamba, “Mufungate.” ⁶ Yawalonga wanhu wekale hasi, na kulonda imikate iya mufungate, yamulumba Mulungu, na kwibendula, na kuwengha awefusa wakwe wawagawile wanhu ditewa. ⁷ Hawowa na fisomba fikefu hakafilungutisa na kuwagamba wawagawile afyo nafyo. ⁸ Weja wadiya na kwiguta na kudondola ifibedu fye mikate fisigale, fisege mufungate fimemile. ⁹ Awanhu awadiyile wakufika figulu fine. Hakawelaga. ¹⁰ Chimwande hakakwila muchiya, hamwedu na wefusa wakwe, na kuluta ulwandi lwa Dalumanusa. ¹¹ Howalawanisa Mafalisayo, na hawakonga kuwa na lukani naye, wakuhananga kulawa ukwakwe ijumo dikulawa kulanga, wakumugesa. ¹² Hakona usungu muchidoga chakwe, “Nhani icheleko chino chikuhananga ijumo? Chawelu nikumutamilani! Chisikwinghigwa chitangilo icheleko chino!” ¹³ Hakawaleka, na kwingila kahi muchiya, hakaluta mpaka umwambu; ¹⁴ Hawasimilwa kulonda mikate, kahi muchiya hawowa chaka ninga mukate umwedu du. ¹⁵ Hakawajama, yakugamba, “Muwe meso ne inungo ya Mafalisayo na ya Helode.” ¹⁶ Hawowa na lukani wene kwa wene yagamba Chichaka mikate. ¹⁷ Yesu hakamanya, hoyowagamba, “Nhani mwina lukani kosoko mwechaka mukate? Musinati mumanye, kahi musikutanga? Togoleni! Fidoga fyenu fisito? ¹⁸ Mwina meso musikona. Mwina nghutwi musikuhulika; kahi musikugelegela. ¹⁹ Fonabendule haya imikate mishano na kuwengha awaya wanhu figulu fishano hamulonda fisege fingahi fimemile ifibendu?” Wamugamba, “Ikumi na fili.” ²⁰ Na iya mufungate na kuwengha wanhu figulu fine, Hamulonda fisege fingahi fimemile fibesu? Howomugamba, “Mufungate.” ²¹ Yawagamba, “Musinati mumanye, mukali?” ²² Hawafika Betisaida, wamwigalila munhu nghakona, wamutasa yamukwafe. ²³ Hakamukola mukono, hakamusegesa kunje ye chikaya na kumutwila mate kumeso, yamwikila mikono yakwe, yamusa, “Ukona chinhu?” ²⁴ Hakalanga kuchanhya hoyogamba, “Nikona wanhu kifana mabiki gakugenda.” ²⁵ Hakeka kahi mikono yakwe mumeso gakwe, na kulanga lugano; na kuwa mumi, hakona ifinhu fyose fiswanu. ²⁶ Yesu hakamugamba yalute ukaya ukwakwe, na kumugamba, “Unghengile kahe mufijiji fya munjila.” ²⁷ Yesu hakaleuke na wefusa wakwe, na kuluta ku fikaya fya Kaisalia, Filipi, munjila yawosa awefusa wakwe, yakugamba, “Awanhu wakunigamba niye nene nani?” ²⁸ Hawamubidula wakugamba, “Yohana Mubatisaji, wamonga Eliya, wamonga, yumwedu wa wagonesi.” ²⁹ Yawosa: “Anyeye mukugamba niye nene nani?” Petulo hakamubidula, yekumugamba, “Agweye no Kilisito.” ³⁰ Hakawalemesa wanghamutamile munhu wowose simbuli sakwe. ³¹ Hakakonga kuwafusa fina: Imwagila iMwana we munhu yapate magayo mengi, na kulemigwa na wasehe, na wakulu wa watambiki, na watulumi. Na kukomigwa, na fogakuloka majuwa madatu yakwinuka muchilalo. ³² Yendeyolonga imbuli iyo bila chifiso. iPetulo hakamulonda na kukonga kumugombela. ³³ Hakabiduka, yakuwalanga awefusa wakwe na kumugombela Petulo, yakugamba, “Luta kunyuma yangu Luhoma, Kosoko nghukudoga simbuli se Mulungu ninga sa wanhu!” ³⁴ Hakawenanga ditewa hamwedu na wefusa wakwe, hakawagamba, “I munhu wowose iyekuhananga kunyandamila yakileme imwecho na yalonde umusalaba wakwe, yanyandamile.” ³⁵ Kosoko imunhu iyakuhananga kuhonya ichidoga chakwe, yakuchagilisa, imunhu yakwagilisa chidoga chakwe kosoko yangu na kosoko ya imbuli iswanu, ayo yakuchihonya. ³⁶ Kosoko ikwenda imutase nhani imunhu yanghapata ichilunga chose na kwagilisa ichidoga chakwe? ³⁷ Kahe imunhu yalafe choni ahanhu hokulafa ichidoga chakwe. ³⁸ Kosoko chila munhu yakunyonela chinyala, aniye na simbuli sangu mucheleko chino ichisikumuhuwila Mulungu na wihi, iMwana we Munhu yakwija yomonela chinyala imunhu yuyo nghona yakiyokwija mu ditunyo dye Babakwe, hamwedu na malaika wasunhile.

¹ Hakawagamba, “Chawelu, nikuwatamilani, mu wanhu wemile hano hena wanhu awene wasikwenda wafe ugele wanghali kuwona undewa we Mulungu ukwija kwa ludole.” ² Gakaloke majuwa mutandatu, Yesu hakawalonda Petulo, na Yakobo, na Yohana, yawegala kuditunda ditali wemwene, hakahiluka ifuta yakwe, kumwande yao, ³ sisuke sakwe hasikonga kwakaika, njelu swe, kwechaka munhu mu iisi yakudaha kusigolosa suwe njelu nheifo. ⁴ Kamei hawalawanisila Eliya, hamwedu na Musa, awene wawo wakusimulila na Yesu. ⁵ Petulo hakabidula, yakumugamba: “Mukulu, ni fiswamu aseye chuwe hano. Chijenge fibanda fidatu, chimwedu chako gweye, chimwedu cha Musa, na chimwedu cha Eliya.” ⁶ Kosoko, nghamanyile choyakulonga, kosoko hawengiligwa na itisi ikulu. ⁷ Hadilawanisa ifunde, hadiwagubika, dijwi hadilawa umuya mwifunde, “Ayuno no Mwanangu mwendigwa, mumuhulike imwene.” ⁸ Ugele uwo wakalange kuno na kuno wasonile munhu hamwedu nawo; ninga Yesu du yemwene. ⁹ Ugele fowadulikage kulawa kwitunda, hakawalemesa wanghamutamile munhu wowose gowonile, mpaka iMwana we Munhu ugele woyakuwa kafulusa kwinuka kulawa kuwanhu wafile. ¹⁰ Hawaikola imbuli iya, wakiyusa awecho kwa wecho, “Akuno kukwinuka kulawa kuwafile no choni?” ¹¹ Hawamusa wakugamba, “Awatulumi wakugamba fina iwagila Eliya yakonge kwija?” ¹² Hakawabidula, yawagamba, “Chawelu, Eliya yakulongola kwija, na kugolosa usha finhu fyose, ninga, hamwedu na gago, foyatulumigwe nhani Mwana we Munhu fina yakwende yadumangisigwe madumangiso mengi na kubesigwa? ¹³ Ninga nikumutamilani, fina Eliya kafulusa kwija, nawo wamugolosela gose gowendile fina foitulumigwe.” ¹⁴ Ugele fowejile kuwefusa wamonga hawona itewa ikulu diwasunguluta na watulumi wena lukani nawo. ¹⁵ Chimwande ditewa dyose wakamone hawakisina, hawamubilimila, kumulamusa. ¹⁶ Hakawosa, “Mwina lukani lwa choni nawano?” ¹⁷ Imunhu yumonga kulawa muditewa hakabidula, “Mwalimu nimwigala imwanangu ukwako, kena igini kahi chimumu.” ¹⁸ Chila ugele foikumwijila ikumukinya hasi, yakulawa ifulo kumulomo na kugwegwejula meno kahi yakugagamala. Nilonga na wefusa wako wadilafe digini, waduga. ¹⁹ Hakabidula yakuwagamba, “Anyeye cheleko chichaka dihuwi! Nikale nanyeye mpaka milaki? Nimulondeni fomuwile mpaka milaki? Mwigaleni ukwangu!” ²⁰ Hawamwigala imujelelo ukwakwe. Kamei digini dikamone hadimuguma chisilisi na kugwa mpaka hasi, hakasambalagata na kulawa ifulo kumulomo. ²¹ Yesu hakamusa iBabakwe, “Kakongigwa milaki?” Hakagamba, “Kulawa udodo.” ²² Ugele mwingi dimuguma mumoto na mumeji uleke dimukome, ninga unghadaha mbuli yoyose, uchonele ubasi na uchitase! ²³ Yesu yamugamba, “Unghadaha! Gose gakudahika ukwakwe yena dihuwi.” ²⁴ Chimwande iBabakwe we mujelelo yuya yenula dijwi, yakugamba, “Nikuhuwila, nitase kusumigwa kuhuwila kwangu!” ²⁵ Yesu yakone ditewa dikubilima dikwija, hakadigombela digini diya dihile, yakugamba, “Agwe go digini, chimumu na chihuli,” nikukugamba, “Mulawe yuno, kahi unghamuwile!” ²⁶ Hakalapa, hadimuguma chisilisi lugano na kulawa. Naye hakowa kifana kafa, hata wengi hawagamba, “Kofa!” ²⁷ Ninga Yesu hakamukola mukono na kumwinula, naye hakemanyima. ²⁸ Yakengile munyumba, awefusa wakwe hawamusa wemwene, “Nhani seye chisadahile kuilafa?” ²⁹ Hoyawagamba, “Digini difanile dino disikulawa kwa njila yoyose iya, ninga kwa mawombi du.” ³⁰ Hawaleuka uko hawalokela mugatigati ya Galilaya. Nghahanange munhu wowose yamanye, ³¹ kosoko yendeyowafusa awefusa wakwe: Yakuwagamba, “Mwana we Munhu yakuluta kugumigwa mumikono ya wanhu. Nawo wakumukoma, yanghafulusa kukomigwa, ganghaloka majuwa madatu yakwinuka muchilalo.” ³² Ninga wasaimanyile imbuli iyo, hawogoha kumusa. ³³ Hawaje Kapelinaumu, yakowe munyumba hakawosa, “Mwende mutowa lukani lwaki munjila?” ³⁴ hawanyamala, kosoko munjila wendewotowa lukani awecho kwa wecho, imukulusi no nani. ³⁵ Hoyokwikala hasi, na kuwenanga awaya ikumi na weli na kuwagamba, “I munhu yakuhananga kulongola yakuwa wa kunyuma kusuma wose, mutogomi wa wose.” ³⁶ Hakalonda chana chidodogi, na kuchika muchiligati chawo. Hakachidinghula, na kukawagamba, ³⁷ “I munhu yanghachihokela chana chimwedu fina chino kwi sina dyangu, kanihokela niye; na imunhu yanghanihokela niye, yakumuhokela, si niye du, ninga ayuya imwene yanitumile.” ³⁸ Yohana kamubidula, yakugamba, “Mwalimu, chimona munhu yakulafa simhepo kwa disina dyako, hachimulemesa kosoko nghakiyandamila naseye.” ³⁹ Yesu hakagamba, “Munghamulemese. Kosoko kwachaka munhu yakudaha kugolosa ijumo kwa disina dyangu kahi ugele uwo na kunilonga mbuli sihile. ⁴⁰ Kosoko inghowile chinyume chetu ka ulwandi ulwetu. ⁴¹ Kosoko wowose iyakumwinghani ichikombe cha meji, kosoko nyeye mwina disina dya Kilisito, chawelu; nikumutamilani, nghakuswela digelo dyakwe.” ⁴² “Ne munhu yakwenda yamugolose yumwedu wa wadodogi wano awanihuwile yagolose wihi, kagiligwa yohigwe ulwala musingo yakwe na kukubitigwa mubahali. ⁴³ Na umukono wako unghakugolosa ugolose wihi, udumule! Ibeka kwingila kuumi kwina mukono umwedu, kusuma kuwa na mikono yose mili na kuluta Jehanumu. ⁴⁴ Namo umo sinhende sakwe sisikufa ninga umoto wakwe uusikusima ⁴⁵ Na umugulu wako unghakugolosa ugolose wihi, udumule! Ibeka kwingila kuumi na kwina mugulu umwedu, kusuma kuwa na migulu mili na kutagigwa kwi jehanumu. ⁴⁶ Namo sinhende sakwe sisikufa kahiumoto usikusima ⁴⁷ Na digiso dyako dinghakutenda ugolose wihi, ding’ole uditage! Ibeka kwingila kuundewa wa Mulungu kwina igiso dimwedu, kusuma kuwa na meso meli na kutagigwa kwi jehanumu. ⁴⁸ Amo umo Sinhende sakwe sisikufa, kahiumoto wakwe usikusima. ⁴⁹ Kosoko chila munhu kokwikigwa digoya kwa munyu na kusunhigwa kwa moto. ⁵⁰ “Umunyu muswanu; ninga umunyu unghasusuka, si munyu kahi wogumigwa choni ukolele? Muwe munyu mugati yenu, mukekale kwa digoya muwecho kwa wecho.”

¹ Yesu yaleuka uko yaluta ulwandi lwa Uyahudi, yaloka ulwandi lwa Yolodani. Ditewa dya wanhu dyawandamila, kahi fina foyasowela yakonga kuwafusa. ² Amafalisayo weja wamulutila, wakumusa, “Togola! Ni fiswanu imunhu kumuleka imuke? Wakumugesa.” ³ Naye yawabidula yekugamba, “I Musa hakawalagisa choni?” ⁴ Hawagamba fina, “Musa hakafumisa fina munhu yawandike kalatasi ya malekeni kumuleka.” ⁵ Yesu yawagamba, “Kosoko ya ukugutu we fidoga fyenu hakamwinghani dilagiso dino. ⁶ Ninga kulawa kukumba iisi Mulungu hakagolosa mugosi na mwanamuke. ⁷ ‘Kosoko iyo imunhu yakumuleka iBabakwe ne ing’ina wakiyandamila ne imuke. ⁸ Nawo aweli wakuwa mutufi umwedu. Wagaluka si weli kahi, ninga mutufi umwedu.’ ⁹ Choyahasile Mulungu, imunhu yanghachitemanule.” ¹⁰ Wakowe ukaya kahi awefusa wakwe hawomusa muchanhya ye simbuli siso. ¹¹ Hakawagamba, “Chila munhu yakumuleka imuke na kutola mwanamuke yungi, basi yakugolosa ugoni na yuya. ¹² Na imwanamuke yanghamuleka imulume na kutoligwa na mugosi yungi, yakugolosa ugoni naye.” ¹³ Kamei, hawamwigalila awana wadodogi uleke yawakwafe, awefusa wakwe hawawagombela. ¹⁴ Yesu yakone nheifo hakona nyono lugano, hakawagamba, “Walekeni awana wadodogi weje ukwangu, munghawalemese, kosoko awana fina wano undewa wa Mulungu ni wao. ¹⁵ Chawelu, nikumutamilani, imunhu inghakuhokela undewa wa Mulungu kifana mwana mudodogi, nghakuwingila ng’o.” ¹⁶ Hakawadinghula, na kwika mikono yakwe muchanhya yawo na kuwalugutisa. ¹⁷ Ugele foyalawage kuluta kunjila, munhu yumonga hakamwijila lumangho, na kumufugamila, yakumusa, “Mwalimu muswamu nigolose nhani uleke niuhokele uwumi wa majuwa gose?” ¹⁸ Yesu hakamugamba, “Nhani ukuninanga muswamu?” Kwachaka imunhu muswanu ninga yumwedu du ni Mulungu. ¹⁹ Kugamanya amalagiso: “Unghakome; unghagolose dihabwa; unghahije; unghamusigile munhu udasi, Wogohe iBabako ne ng’inako.” ²⁰ Hoyomugamba, “Mwalimu! Aga gose nigakola kulawa udodo wangu.” ²¹ iYesu yamukumhulila meso, hakamwenda na, kumugamba, “Kuhungukiligwa na mbuli imwedu. Luta ukambase fyose fyowinafyo, uwenghe awakiwa imali yako, nagwe ukuwa na ugoli kulanga; kamei wije unyandamile.” ²² Ninga imwene hakakunyanghala ichihanga chakwe kosoko ye imbuli yo, hakaleuka kwa usungu kosoko hakowa na sawo nyingi. ²³ Yesu hoyalanga kose kose, hakawagamba awefusa wakwe, “Foikuwa nghugutu ku wanhu wagoli kukwingila kuundewa we Mulungu!” ²⁴ Awefusa hawakisina kosoko ya simbuli siso isakwe. Yesu hakawabidula kahi, yakugamba: “Mowana, fikugutu lugano kwingila ku undewa wa Mulungu! ²⁵ Fihufu inhembo kwingila muchihengele che singano, kusuma imugoli kwingila mu undewa we Mulungu.” ²⁶ Nawo hawakisina lugano, wakumugamba, “No nani yekudaha kuhona?” ²⁷ Yesu yawakumhulila meso, yagamba, “Ku wanhu isikudahika, ninga kwa Mulungu si nhaifo; kosoko gose gakudahika kwa Mulungu.” ²⁸ Petulo yakonga kumugamba, “Langa, aseye chileka fyose chikwandamila gweye.” ²⁹ Yesu hakagamba, “Chawelu nikumutamilani Hechaka munhu yalekile nyumba, ama wanduguse wagosi, ama walumbu sakwe, ama ng’ina, ama Babakwe, ama wanagwe, ama migunda, kosoko yangu na kosoko ya imbuli swanu. ³⁰ Inghakwinghigwa mikono igana muchigele chino cha hambiya; nyumba, na wandugu wagosi, na wechike, wang’ina munhu, na wana, na migunda hamwedu ne migogolo. Na muchilunga chikwija uwumi wa majuwa gose. ³¹ Ninga wengi wakunghonga wakuwa wakunyuma, na wakunyuma wakuwa wa wakunghonga.” ³² Nawo hawowa munjila wakukwila kuluta Yelusalemu, na Yesu, hakowa yawalongolele, hawakisina, awaya fowamwandamilage hawogoha. Hakawalonda kahi awaya ikumi na weli hakakonga kuwatamila agakwenda gamupate. ³³ Hakagamba, “Langeni chikuluta Yelusalemu, iMwana we munhu yakwenda yagumigwe mumikono ya wakulu wa watambiki na watulumi, nawo wakulamula fina yakomigwe, wakumuguma mu mikono ya wamemb, ³⁴ nawo, wakwenda wamuhowe na kumutwila mate, kumutowa na mikotya, na kumukoma; ganghaloka majuwa madatu yekwinuka muchilalo.” ³⁵ Yakobo na Yohana, awana wa Sebedayo, hawamulutila, wakugamba, “Mwalimu! Chikuhananga uchigolosele dyo dyose dyochikukutasa.” ³⁶ Yawagamba, “Mukuhananga niwagoloseleni choni?” ³⁷ Hawamugamba, “Uchinghe seye kwikala, yumonga kumukono wako wo kulume na yumonga kumukono wako wokumoso muditunyo dyako.” ³⁸ Yesu hakawagamba, “Musimanyile chomukutasa. Mukudaha kunywila ichikombe chonikunywila niye? Kahe kubatisigwa ubatiso wonikubatisigwa niye?” ³⁹ Hawamugamba, “Chikudaha.” Yesu hakawagamba, “Ichikombe chonikunywila niye mukuchunywila, na ubatiso wonikubatisigwa niye mobatiswa. ⁴⁰ Ninga imbuli yo kwikala ku mukono wangu wo kulume ama wo kumoso, si dyangu kuwenghani, ninga wakwenda wenghigwe awafulusa kwikiligwa.” ⁴¹ Awaya ikumi wakahulike hawakonga kuwasuhila Yakobo na Yohana. ⁴² Yesu hakawenanga, na kuwagamba, “Mumanya fina awaya awakutaligwa kuwa wakulu wa Mataifa, wakutawala kwa ludole, na wakulu wawo wakuwatumagisa. ⁴³ Ninga isikuwa nhaifo ukwenu; ⁴⁴ ninga imunhu yakuhananga yowe mukulu kwenu, yakuwa munhu mutogomi wenu. ⁴⁵ Kosoko iMwana we munhu naye nghejile kutogomeligwa; ninga kutogoma na kulafa uumi wakwe udahe kuhonya wengi.” ⁴⁶ Wakafike Yeliko, yakowe yekuleuka kulawa Yeliko, hamwedu na wefusa wakwe, ditewa ikulu dya wanhu, imwana wa Timayo, Batolomayo, ayuya imutasaji imudula, hakekala hanghanda ye injila. ⁴⁷ Naye yakahulike fina no Yesu Munasaleti, Hakakonga kutula chowe na kugamba, “Mwana wa Daudi, Yesu, Nyonele ubasi!” ⁴⁸ Wengi hawamugombela uleke yanyamale. Ninga hakongesa kwinula dijwi, “Mwana wa Daudi nyonele ubasi!” ⁴⁹ Yesu hakema, yokugamba, “Mwinangeni.” Hawamwinanga ayuya imudula, wakumugamba, “Kiinghe moyo! Inuka, yakukwinanga.” ⁵⁰ Hakakubita dikasu dyakwe, na kujumha, na kumulutila Yesu. ⁵¹ Yesu yamubidula, yamugamba, “Ukuhananga nikugolosele choni?” Ayuya imudula yamugamba, “Mwalimu wangu! Nikuhananga nidahe kona.” ⁵² Yesu hakamugamba, “Luta, dihuwi dyako dikuhonya.” Chimwande hakona; hakamwandamila Yesu munjila.

¹ Ichigele fowasegele habehi na Yelusalemu, Betifage na Betania, habehi ne ditunda dya Miseituni, baho hawatuma weli wa wefusa wakwe ² hoyawagamba: “Luteni kuchikaya chiya chuwile kumwande yenu. Fomukwingila umo mofika mwana we dipunda, dyohigwe, idyene disinati dikwiligwe na munhu. Didoholeni munigalile. ³ Ne munhu yanghamusani Nhani mukutenda nheifo, gambeni, iMundewa yakudihananga yakwenda yadyuwise lulubaha.” ⁴ Kamei howoluta, na kudyona dipunda diya didodogi, dyohigwa hamulango, kunje, hawadidohola, ⁵ awanhu awemile uko weja wawagamba, “Mukugolosa choni kudidohola dipunda didodogi?” ⁶ Hawawatamila fina Yesu foyawasigilile, nawo howowengha. ⁷ Hawamwigalila Yesu dipunda diya didodogi, na kutandika sisuke sawo muchanhya yakwe. ⁸ Wanhu itewa hawatandalike sisuke sawo munjila, na wamonga amatambi gowabenile mumigunda. ⁹ Na awanhu awalongole na waya awandamile kunyuma howokwinula amajwi, “Hosana! Noyamotesigwe iyakwija kudisina dye Mundewa! ¹⁰ Umotesigwa na undewa ukwija we Baba yetu Daudi! Hosana kuchanhya kulanga!” ¹¹ Naye hakengila Yelusalemu mpaka kugati ya dihekalu, yakafuluse kulanga kose kose. Kosoko hayuwa ugele wa hegulo, hakalawa, hakaluta Betania hamwedu nawaya ikumi na weli. ¹² Dijuwa dyandamile fowalawile Betania, hakowa na njala. ¹³ Hakona kwa hatali musada wina manyagala, hoyoluta kosoko, nhegela kokona chinhu muchanhya yakwe. Yakafike bahaya nghonile chinhu ila manyagala; kosoko usowile ugele wo kwifa kwa masada. ¹⁴ Hakaugamba nhafi, “Kulawa diyelo na majuwa gose imunhu yanghadiye imudyo ukwako.” Awefusa wakwe hawahulika. ¹⁵ Hawafika Yelusalemu, naye foyengile kwihekalu, yakonga kuwawinga awaya awenda wokwambasa na wenda wogula kwihekalu kugati. Hakasibidula si mesa sawaya awende wobadili mapesa, na magoda gawo wambasage si njiwa, ¹⁶ ninga nghalekile munhu yalonde chinhu mwihekalu. ¹⁷ Hakawafusa, hakagamba: “Togoleni! Isitulumigwe, fina, ‘Inyumba yangu yokwinangigwa nyumba ya kutasila ku mataifa gose.’ Ninga anyeye muyigolosa kifana ipango dya wahiji!” ¹⁸ Awakulu wa watambiki na watulumi hawahulika, hawahananga njila ya kumukoma kosoko hawamogoha. Kosoko amatewa gose hawajuma ku mafuso gakwe. ¹⁹ Ikafike hegulo hakaleuka mukaya. ²⁰ Nhosikusiku wakowe wakuloka howowona umusada uya unyala kulawa kwisina. ²¹ iPetulo hakagelegela, hakamugamba, “Labi, langa, dibiki dowaligitise dinyala nya.” ²² Yesu hakabidula, “Muhuwileni Mulungu.” ²³ Chawelu nikumutamilani, wowose yakugamba ditunda dino Ng’oka ukakubitigwe kubahali yaleke kuwa na manhonge muchidoga chakwe ninga yahuwile gago goyalongile gogoloseka, gakuwa gakwe. ²⁴ Kosoko iyo nikumutamilani: Gogose gomukutasa huwileni fina mukugahokela. ²⁵ Nanye chila fomukwima na kufuga, lekeleleni hona mwina mbuli yoyose na munhu, uleke iBaba yenu yowile kulanga yawalekelele nanyeye kubana kwenu. ²⁶ Ninga nghonaga nyeye musikulekelela, iBaba yenu yowile kulanga nghakumulekelelani na nyeye kubana kwenu. ²⁷ Kahi haweja Yelusalemu. Kamei foyagendage mwihekalu, howomulutila awakulu wa watambiki na watulumi, na wasehe, ²⁸ wakumugamba, “Kwa udaha waki ukugolosa gano? No nani yakwinghile udaha uwo ugolose gano?” ²⁹ Yesu hakawagamba, “Nikumusani mbuli imwedu, munibidule, kamei nikwenda niwatamileni kwa udaha waki nikugolosa gano. ³⁰ Ubatiso wa Yohana haulawa kulanga ama kuwanhu? Nhamileni.” ³¹ Howokonga kuwanga awecho kwa wecho wakugamba fina chinghagamba, “Haulawa kulanga,” yakwenda yachigambe, “Nhani musamuhuwile?” ³² Chinghagamba, “Haulawa kuwanhu,” (Hawogoha wanhu, kosoko awanhu wose hawona iYohana fina mugonesi we chawelu.) ³³ Hawamubidula Yesu, wakugamba, “Chisimanyile.” Yesu hakawagamba, “Aniye nani sikuwatamilani nyeye ni kwa udaha waki nikugolosa gano.”

¹ Hakakonga kulonga nawo kwa mbasi, “Munhu yumonga yahanda mugunda wakwe wa misabibu, hakasungulusila ikigo, na kukata ikolongo dya kukamila, hakajenga ilingo, hoyokwika wemilisi, hoyoluta ku iisi ya kutali. ² Ugele wakwe ukafike hakatuma imutumwa wakwe kuwaya wakwimilisa umugunda wakwe, yamwigalile si sabibu. ³ Hawamulonda, hawamutowa, hawamutaga kunje, mikono muhala. ⁴ Hakatuma kahi ukwawo mutumwa yungi, ayu naye hawamubulaga na kumuguma malonda mwitwi na kumugolosela wihi. ⁵ Hakatuma yungi, ayo hawamukoma; na wamonga wengi hawawatowa, na wamonga kumukoma. ⁶ Hakowa na yumwedu yasigale, imwanagwe mwendigwa wakwe, ayuno naye hakamutuma ukwawo kundumiliso yakugamba, ‘Wakwenda wamogohe imwanangu,’ ⁷ Ninga awaya awakwimilisa umugunda, hawakitamila wakugamba, ‘Ayuno no muhasi. Handikoni chimukome, na uhasi ukuwa wetu!’ ⁸ Hawamukola na kumukoma, na kumutaga kunje yo mugunda we misabibu. ⁹ “Kamei yatende nhani ayuya iMundewa, imwenyemugunda we misabibu? Yakwija na kuwakoma awemilisi waya, na umugunda uya we misabibu yakwende yeke wemilisi wengi. ¹⁰ Diwandiko dino musinati mudisome? ‘Isumbi yalemigwe na wajengaji iyo igalukagaluka no sumbi inghulu ya hagati. ¹¹ Imbuli ino ilawa kwe Mundewa; Nadyo ni ijumo mumeso getu!’” ¹² Nawo hawahananga kumukola ninga hawogoha amatewa, kosoko hawamanya fina imbasi iya kawalonga awene. Hawamuleka na kuleuka. ¹³ Howotuma ukwakwe wamonga wa Mafalisayo na Mahelode, uleke wa mutegele kwa simbuli sakwe. ¹⁴ Baho fowamufikile, hawamugamba, “Mwalimu, chimanya fina agweye kwa munhu wa chawelu, kahi nghukogoha ukulu wa munhu, kosoko nghukulanga sifuta sa wanhu, ninga muchawelu ukuifusa injila ye Mulungu. Togola ni fiswanu kuliha kodi kwa Kaisali ama si nheifo? ¹⁵ Chimwinghe, chinghamwinghe?” Naye yakamanye ichimwefe chawo, hakawagamba, “Nhani mukunigesa? Nigalileni ifesa niilange.” ¹⁶ Hawegala. Kamei hakawagamba, “Isanamu ino lubonoto lunolwani?” Hawamugamba, “Lwa Kaisali,” ¹⁷ Yesu hakabidula yekugamba, “Mwingheni Kaisali aga Kaisali, na ge Mulungu mwingheni Mulungu.” Hawamwisina lugano. ¹⁸ Kamei amasadukayo, wanhu wakugamba fina kwachaka kwinuka awafile, hawamulutila, na kumusa wekugamba, ¹⁹ “Mwalimu, Musa hakachiwandikila, ‘Fina imunduguse we munhu yangafa yanghamuleka imuke kachaka mwana, imunduguse yamulonde imwanamuke yuya uleke yamwelekele imunduguse wana.’ ²⁰ Heja howa na wanhu mufungate we ndugu; imukulu hakatole mwanamuke, na kufa, ngheleke naye. ²¹ Iwakeli naye hakamulonda, hoyokufa, naye nghalekile mwana. Na wakadatu naye nheifia, ²² hata wose mufungate, wasalekile wana. Kundumo, ayuya imwanamuke naye hoyokufa. ²³ Mukwinuka wafile kokuwa muke wa yehoki? Kosoko wose mufungate hawamutola.” ²⁴ Yesu hakabidula, yekugamba, “Togoleni musikwagilila kosoko musimanyile amawandiko kahi udaha we Mulungu? ²⁵ Kosoko awanhu ma wakwinuka kulawa kuwafile, wasikutola kahiwasikutoligwa, ninga wakuwa fina malaika wowile kulanga. ²⁶ Na fina awafile wakwinuligwa: ‘Musisomile muchitabu cha Musa, sula ye chibiki?’ Fina iMulungu foyamutamile yakugamba, ‘Aniye na Mulungu wa Ibulahimu, na Mulungu wa Isaka, na Mulungu wa Yakobo.’ ²⁷ Si Mulungu wa wafile, ninga wa womi, kwa nheifo mukwagilila lugano.” ²⁸ Yumonga wa watulumi hakeja na kuwahulika wakulonga naye. Hakona fina kawabidula fiswamu, hakamusa: “Mumalagiso gose dilagiso dihoki no dikumwande ya gose?” ²⁹ Yesu hakamubidula yekumugamba, “Dye nghonga nodi ’Hulika gweye Isilaeli! iMundewa Mulungu wetu ni Mundewa yumwedu. ³⁰ Nagwe umwende iMundewa Mulungu wako, no umoyo wako wose, ne chidoga chako chose, ne misungu yako yose, no ludole lwako lwose.’ ³¹ Na dyakeli no dino: ’Umwende imiyago fina foukiyenda gomwecho.’ Hechaka ilagiso dingi dikulu kusuma gano.” ³² Ayuya imutulumi yamugamba “Chawelu, Mwalimu! Kulonga fiswanu fina iMulungu ni yumwedu, ninga kwachaka yungi, ninga imwene du. ³³ Na kumwenda imwene kwa moyo wose, na umanyi wose, na kwa ludole lose; na kumwenda imiyago fina fyo ukiyenda gomwecho. Imbuli nghulu kusuma kumulafila iMulungu nhambiko yokusomigwa na kwingha kose.” ³⁴ Naye Yesu yakone fina kabidula kwa misungu, yamugamba “Agweye ghwihatali na undewa wa Mulungu.” Kulawa baho hachaka munhu wowose yagesile kumusa mbuli kahi. ³⁵ Ugele Yesu foyafusage mwihekalu, hakawagamba, “Awatulumi wakugamba Kilisito ni Mwana wa Daudi? ³⁶ iDaudi imwecho kwa udaha wa Muhe wa Musunhile hakagamba: ‘Mundewa yamugamba iMundewa wangu: Ikala umukono wangu wo kulume, mpaka niweke awanghondo wako, wowe hasi ye migulu yako.’” ³⁷ Daudi imwecho yakugamba, “Mundewa aho kagaluka mwanagwe nhani?” Na ditewa dyose wende womutegelesa kwa chinyemi. ³⁸ Mumafuso gakwe hakawagamba, “Muwe meso na watulumi, awakwenda kugenda wafalile makasu matali na kulamusigwa mumagulilo, ³⁹ na kwikala kumwande mumasinagogi, na magoda ga kumwande mufyakudiya fye si sikukuu. ⁴⁰ Wakudiya kusinyumba sa wegane, na kwa chimwefe wakuwomba mawombi matali. Awano wakwija wapata iliganiso dikulu dijuwa dye ndumo.” ⁴¹ Naye yekale kulanga disanduku dyowakuguma fowakumulafila Mulungu, kalanga amatewa fowaguma amapesa musanduku. Wagoli wengi hawaguma mengi; ⁴² yeja mwanamuke yumwedu mwigane, mukiwa, yalafa sendi mbili, kifana nusu ya dipesa. ⁴³ Yawenanga awefusa wakwe, yawagamba, “Chawelu nikumutamilani, Ayuno imwanamuke, imwigane imukiwa kaguma nyingi kusuma wose wakuguma musanduku. ⁴⁴ Kosoko awo wose waguma sigafu; ninga yuno mu ukiwa wakwe, kaguma fyose foyenafyo ne chakudiya chakwe chose nacho.”

¹ Ugele foyalawage mwihekalu, yumwedu wa wefusa wakwe, hakamugamba, “Mwalimu Langa, uswanu wa amawe na majengo gano!” ² Yesu hoyobidula, yamugamba, “Ukugona amajengo gano amakulu? Disikwenda disigale iwe muchanhya ya diwe idyene disikwenda dije dimoligwe.” ³ Yakekale mwitunda dya miseituni, kumwande ye dihekalu, Petulo na Yakobo na Yohana na Andelea hawamusa wemwene. ⁴ Chitamile simbuli sino sikuwa milaki, nacho ichitangilo ni choni cha ugele wa ago gose kumemelesigwa? ⁵ Yesu yakonga kuwatamila, “Mulangisise imunhu yanghawadanhilise.” ⁶ Matewa gokwija mwisina dyangu, wakugamba, “Ani no niye!” nawo wakwenda wawadanhilise wengi ⁷ Nanye munghahulika simbuli sa inghondo, na minong’ono ye inghondo, munghogohe, ago gakwenda galawanise. Ninga indumo yecho ikali. ⁸ Kosoko ditaifa dikulewa nghondo na undewa ukulawa nghondo. Kukuwa na dimasingisa dye iyisi ako nako, kukuwa na njala. Ago no nghonga ya usungu fina wo kweleka chali. ⁹ Nanye mukilangisise muwenyecho. Kosoko wakwenda wamwigaleni kumabalasa. Na kumasinagogi mukutowigwa; nanye mukwende mwigaligwe ku majumbe na wandewa kosoko yangu, kuwa uhomelesi ukwawo. ¹⁰ Na imbuli swanu, ikwenda ihubiliigwe ku mataifa gose. ¹¹ Na fowakuwalonda nyeye na kuwasongesa, munghadoge go mukwenda mulonge; ninga dyo dyose dyomukwinghigwa ugele uwo, dilongeni. Kosoko si nyeye mukulonga; ninga ni Muhe Musunhile. ¹² Kahi indugu yakumusongesa imunduguse uleke yakomigwe na Baba yakumusongesa imwanagwe. Kahi awana wakuwenukila awaweleke na kuwakoma. ¹³ Nanye mukwenda musuligwe na wanhu wose kosoko ya disina dyangu. Ninga iyakugendelela mpaka kundumo, ayo noyakuhona. ¹⁴ “Munghona ludeso lwima ahanhu ahene lusikuhanangigwa lwima (iyakusoma yamanye).” Noho awowile, “Uyahudi watijile kumatunda. ¹⁵ Na imunhu yowile mukano yanghahumuluke, kahi yanghengile kulonda chinhu munyumba yakwe. ¹⁶ Naye yowile kumugunda yanghoye ukaya kulonda suke yakwe. ¹⁷ Usungu wawo awasokesi, na waya awakonghesa amajuwa gago! ¹⁸ Mutase unghowe ugele we inyota! ¹⁹ Kosoko amajuwa gago gakuwa na mugogolo, uwo usinati uwe kulawa inghonga ya kumba, foyombile iMulungu mpaka hambiya. Ninga isikuwa nheifo kahi. ²⁰ Mhali iMundewa nghagadumukise amajuwa gago; hasowile hakuhona munhu wowose, ninga kosoko ya wasaguligwe woyawasagule. Kagadumukisa amajuwa go.” ²¹ Na ugele uwo imunhu yanghawagamba, “Langa, Kilisito!” kowa akuno ama akuya munghahuwile. ²² Kosoko wakwenda wenukile Makilisito ga udasi, na wagonesi wa udasi, wakonesa fitangilo na majumo, uleke wawadanhilise, kulonga chelu hata na wasaguligwe. ²³ Ninga anyeye mukilangisise, nifulusa kuwatamila, ugele fisinati filawanise. ²⁴ “Ninga amajuwa gago, unghaloka umugogolo uwo, dijuwa dikutukuwala, umwesi nao usikumulika, ²⁵ sinyelesi sa kulanga solagala, na uludole lwa kuchanhya losingisika.” ²⁶ Baho noho wakiyawomona iMwana we Munhu yakwija mumafunde kwa ludole mwingi na ditunyo. ²⁷ Noho yakayotuma malaika na kuwakonghola awasagulwa wakwe kulawa si sandi sose ine, kulawa ulwandi lwa kundumo lwe yisi mpaka ulwandi lwe ndumo yo ulanga. ²⁸ “Mukifuse difuso dyo musada. Amanhambi gakwe fogakuwa majolo jolo na kukonga kutuguta, mukutanga fina ugele wo kuhanda wahabehi; ²⁹ Nanye nheifiya fomukona simbuli so sikukonga, manyeni fina kahabehi mumilango. ³⁰ Chawelu, nikuwatamileni, Icheleko chino chisikuloka mpaka ago gamemelesigwe. ³¹ Ulanga na iisi fikuloka, ninga simbuli sangu sisikuloka ng’o.” ³² “Ninga imbuli ya ugele uya, ne chipisi chiya, hachaka yamanyile, hata malaika awowile kulanga, kahii Mwana; ninga Baba. ³³ Mulangisise, Muwe meso, kosoko musimanyile ugele wuya wokuwa milaki. ³⁴ Imbasi yakwe ni kifana imunhu yekuluta nhambo, kaileka inyumba yakwe, kawalekela awatumwa wakwe malagiso, na chila munhu no umulimo wakwe, naye kamulagisa imwimilisi wa hamulango yowe meso. ³⁵ Muwe meso, kosoko, musimanyile imwenye nyumba yakwija ugele waki, yokuwa hegulo ama muchilo mugati, ama ugele wo kwika dijogolo, ama nhosikusiku. ³⁶ Yangheje yolawanisa chimwande na kumufikani mugonile. ³⁷ Na dyonikumutamilani nyeye, nikuwatamila wose: Muwe meso!”

¹ Gakaloke majuwa meli hadyuwa ijuwa ikulu dye Pasaka, na dijuwa dikulu dye mikate isilungigwe. Awakulu wa watambiki na watulumi hawahananga njila ya kumukola kwa chifiso na kumukoma. ² Kosoko hawagamba, “Inghowe ugele we sikukuu, ingheje ikuwa nghondo mu wanhu.” ³ Yakowe Betania munyumba ya Simoni mukoma, yakudiya chakudiya, hoyokwija mwanamuke yena chichupa cha mafuta ge mhungile gakwinangigwa nalido ge iliho ikulu. Hakachitula na kumwitilila Yesu mwitwi dyakwe. ⁴ Hahowa na wanhu awene wasuhile mufidoga fyawo wakugamba, “Nhani kwagilisa mafuta ge diliho nhaifino? ⁵ Kosoko mafuta ge diliho dino hagowa gakudaha kuguligwa kwa dinali magana madatu ama na musapu, na kugawiligwa awakiwa!” Hawamusuhila lugano imwanamuke yuya. ⁶ Yesu hakagamba, “Mulekeni! Nhani mukumwidasa? Kanigolosela chinhu chiswanu. ⁷ Kosoko majuwa gose mwenawo wakiwa hamwedu nanye, na chila fomukwenda mukudaha kuwagolosela maswanu. Ninga niye si hamwedu nanye majuwa gose. ⁸ Kagolosa foyadahile; kalongola kuubaka umutufi wangu malihamu kosoko ya kusikigwa kwangu. ⁹ Chawelu, nikumutamilani, chila koikuhubiliigwa imbuli swanu, muchilunga chose na dino doyagolose yuno dyotambuligwa kwa kumugelegela.” ¹⁰ Yuda Isikalioti, yumwedu wa waya ikumi na weli, yaluta kuwakulu wa watambiki, uleke yamusongese ukwawo. ¹¹ Nawo wakahulike hawasekelela lugano, na kulagana naye wamwinghe mapesa. Hakahananga luneka lwa kumusongesa. ¹² Dijuwa dye nghonga dye mikate isilungigwe, wakachinje ingholo ye iPasaka, awefusa wakwe wamugamba, “No hoki koukuhananga chikugolosele udiile iPasaka?” ¹³ Hawatuma weli mu wefusa wakwe, yakuwagamba, “Luteni ukaya, mokitang’anyila na mugosi yakitwikile ibiga dya meji. Mwandamileni ¹⁴ na hohose hoyakwingila, mumugambe imukaya: Mwalimu yakugamba, ‘Chuwa hoki ichibuha changu ichawageni, nidiye iPasaka umo hamwedu na wefusa wangu?’ ¹⁵ Naye imwecho yakwenda yamoneseni chibuha chikulu che golofa, chifulusa kuhambigwa, muchitengele umo.” ¹⁶ Awefusa hawaleuka, hawaluta ukaya, hawona kifana fowasigililigwe; na kutenga chakudiya che sikukuu ye Pasaka. ¹⁷ Ikafike hegulo, iYesu hakeja hamwedu na waya ikumi na weli. ¹⁸ Wakekale hachakudiya wakudiya, Yesu hakagamba, “Chawelu, nikumutamilani yumwedu wenu iyakudiya hamwedu na niye yakunisongesa.” ¹⁹ Hawakonga kona usungu, na kulonga yumwe yumwe. Togola no niye? ²⁰ Kawagamba, “Ni yumwedu wa anyeye ikumi na weli, iyakusanhisa hamwedu na niye mwibakuli. ²¹ Kosoko iMwana wa munhu yakuluta fina foyawandikiligwe; ninga usungu wakwe imunhu yuya iyakumusongesa iMwana wa munhu! Hayuwa ikuwa ibeka kwi munhu yuyo nhanga nghelekwe!” ²² Ugele fowadiyage, yalonda umukate, na kuulugutisa na kuumogola, kawengha, yakugamba, “Londeni mudiye, auno no mutufi wangu.” ²³ Yalonda ichikombe, yakamale kulumba; hakawengha; na wose hawonywila. ²⁴ Hakawagamba, “Aino no sakame yangu ya dilagano, iikwitika kosoko ya wengi. ²⁵ Chawelu, nikumutamilani nyeye, Sikunywa kahi cheleko cho musabibu, mpaka dijuwa diya donikanikunywa umusha mu undewa wa Mulungu.” ²⁶ Nawo wakamale kwimba, howolawa kuluta kuditunda dya Miseituni. ²⁷ Yesu yawagamba, “Anye mose monileka ichilo cha diyelo,” Kosoko nofyo iwandikwe, “Nikumutowa imudimi, na singholo sikiyagala. ²⁸ Ninga ninghafulusa kwinuka kulawa muchilalo, nikuwalongolela kuluta Galilaya.” ²⁹ Petulo hakamugamba, “Hata wose wakuleke aniye sikukuleka!” ³⁰ Yesu yamugamba, “Chawelu nikukutamila gweye, ichilo cha diyelo, ugele dijogolo disinati dike keli, ukuwa unikanile kadatu.” ³¹ Naye yagendelela kulonga, “Hata inghowa kufa hamwedu nagwe, sikwenda nikukane ng’o!” Wose hawalonga nheifo. ³² Kamei haweja kumululu iikwinangigwa Getisemane na kuwagamba awefusa wakwe, “Kaleni hano ugele fonikuwomba.” ³³ Hoyamulonda Petulo, na Yohana, na Yakobo hamwedu naye. Yakonga kona usungu muchidoga chakwe na kugaya, ³⁴ hoyowagamba, “Ichidoga changu china usungu mwingi habehi na kufa. Ikaleni hano mwikale meso.” ³⁵ Yakalute kumwande chidodogi, hokogwa funama, yakuwomba, fina inghadahika ichipisi chicho chimuleukile. ³⁶ Hakagamba, “Tate, go Babangu! Gose gakudahika ukwako. Unileusile ichikombe chino, si fina fonikwenda niye, ninga, foukwenda agweye.” ³⁷ Yakwija yakuwafika wagona sinhongo, yamugamba Petulo, “Togola Simoni kugona? Kulemeligwa kwikala meso hata disaa dimwedu?” ³⁸ Ikaleni meso muwombe, munghengile mumagesa. Chidoga chikudaha amba umutufi wachaka ludole. ³⁹ Hakaluta kahi, kuwomba, yakulonga imbuli iya. ⁴⁰ Hakeja kahi hakawafika wagona; kosoko ameso gawo hagowa masito. Kahi wasamanyile dya kumubidula. ⁴¹ Hakeja kahi lwakadatu, hakawagamba, “Mwikali timbula nhongo du na kubwihila? Ifuluka ugele nouuno! Langeni, iMwana we Munhu yakugumigwa mu mikono yawo awena uwihi. ⁴² Inukeni, chigendeni, langeni ayuya yakunisongesa kasegelela.” ⁴³ Baho ugele yakulonga, Yuda hakeja, yumwedu wa waya ikumi na weli hamwedu naye itewa. Wena mapanga na mapulo, walawa ku wakulu wa watambiki, na watulumi, na wasehe. ⁴⁴ Ayuya musongesi kawengha chitangilo: Yakugamba, “Wonikamunonela, no mwene. Mukoleni mumulonde kwa kumwimilisa.” ⁴⁵ Kamei yakeje, chimwande hoyomulutila, hoyagamba, “Mukulu!” hoyomunonela. ⁴⁶ Hawagolola imikono yawo na kumukola. ⁴⁷ Yumwedu wawo yowile baho, hakakwega dipanga dyakwe hakamunghenya mutumwa wa mutambiki mukulu na kumudumula inghutwi. ⁴⁸ Yesu hakabidula yekuwagamba, “Nhafo! Mwija mukola muhiji na mapanga na mapulo kunilonda niye? ⁴⁹ Chila ijuwa hanuwa hamwedu na nyeye mwihekalu nikufusa, musanikolile. Ninga adino dilawanisa uleke amatulumo gamemelesigwe.” ⁵⁰ Baho hawamuleka, na kutija wose. ⁵¹ Na mwanike yumonga hakamwandamila, kegubika suke ya bafuta. Hawamukola, ⁵² hakaleka aiya isuke yakwe ye bafuta hakatija mwasi. ⁵³ Hawamulonda Yesu, hawamwigala kwa mutambiki mukulu, hawamumemelela wose, awakulu wa watambiki na wasehe na watulumi. ⁵⁴ Petulo yamwandamila kwa kutali, mpaka kugati ku dikumbo dye mutambiki mukulu. Yekala hamwedu na wemilisi, yakotela moto. ⁵⁵ Baho awakulu wa watambiki na dibalasa dyose hawahananga uhomelesi muchanhya ya Yesu uleke wamukome, ninga hawaswela. ⁵⁶ Kosoko wengi hawahomelesa udasi, ninga hawaswela uhomelesi wawo usaligane. ⁵⁷ Kamei wamonga hawema na kumuhomelela udasi wakugamba: ⁵⁸ Aseye hachimuhulika yakugamba, “Aniye nikudimola dihekalu dino dijengigwe kwa mikono, na fogakuloka majuwa madatu nikujenga dingi idisikugolosigwa kwa mikono. ⁵⁹ Hata nheifo, uhomelesi wawo usaliganile.” ⁶⁰ Kamei imutambiki Mukulu hakema muchiligati, yokumusa Yesu yakugamba, “Nghukubidula mbuli? Awano wakukuhomelesa choni?” ⁶¹ Ninga hakanyamala kahe nghamubidule mbuli. Imutambiki Mukulu yamusa kahi, yekumugamba, “Agweye no Kilisito, Imwana we Yamotesigwe?” ⁶² Yesu yagamba, “Heye, noniye! Nanye mukamumona iMwana we Munhu, yekale ku mukono wo kulume wo ludole, yakwija mumafunde gakulanga!” ⁶³ iMutambiki mukulu yadega si suke sakwe, yakugamba, “China soko yaki yakuhananga wahomelesi? ⁶⁴ Muhulika ulubeso lwakwe. Mukona nhani nyeye?” Wose hawalamula fina iwagila yakomigwe: ⁶⁵ Wamonga, hawakonga kumutwila mate, hawamugubika ichihanga, na kumutowa, na kumugamba, “Haya tanga!” Hata awasilikali nawo hwamuhokela kwa kumutowa makofi. ⁶⁶ Petulo hakowa kwikumbo; hakamwijila mutogomi we chike we mutambiki mukulu. ⁶⁷ Hakamona Petulo yakotela moto, hakamukumhulila meso yakumugamba, “Agwe nagwe hakuwa hamwedu na yuya iYesu Munasaleti.” ⁶⁸ Hokakana na kugamba, “Simanyile kahi sikuhulika so ukulonga gweye, hoyolawa kunje mpaka kwilango.” Dijogolo hodikwika Yakana. Dijogolo hodikwika. ⁶⁹ Na yuya imutumishi we chike hoyomona kahi, hoyokonga kuwatamila awemile bahaya, “Ayuno yumwedu wawo!” ⁷⁰ Hoyokana kahi. Chipisi chidodogi kahi awaya awemile bahaya howomugamba Petulo, “Chawelu agweye kwa yumwedu wawo, kosoko kwa Mugalilaya gweye.” ⁷¹ Hoyokonga kuligitisa na kilaha, “Simumanyile imunhu yuno yo mukumulonga!” ⁷² Chimwande dijogolo dyeka keli. Petulo hoyogelegela aiya imbuli iyalongigwe na Yesu, “Ugele dijogolo disinati dike lwakeli ukuwa unikanile kadatu.” Na yakakonge kudoga hoyolila.

¹ Chimwande nhosikusiku awakulu wa watambiki hawekala hebalasa hamwedu na wasehe wa watulumi na dibalasa dyose, hawamoha Yesu, hawamulonda, hawamwigala kwa Pilato. ² Pilato yamusa, “Agweye no gwegwe go, Mundewa wa Wayahudi?” Yabidula yakumugamba, “Agwe kuilonga.” ³ Awakulu wa watambiki wende womuhomelela mbuli nyingi. ⁴ Pilato kamusa kahi yakugamba, “Nghukubidula? Langa ni mbuli nyingahi sowakukuhomelesa.” ⁵ Ninga Yesu nghabidule mbuli kahi, Pilato hakakisina! ⁶ Ugele we sikukuu yakowadoholela mufungwa yumwedu, wowakumutasa. ⁷ Hahowa na munhu yakwinangigwa Balaba, kohigwa hamwedu na wanhu awagolose finju na kukoma mufinju iyo. ⁸ Amatewa howokwija hawakonga kutasa yawatendele fina foyasowele, ⁹ Pilato yawabidula, yakugamba, “Togoleni mukuhanaga niwadoholeleni iMundewa wa Wayahudi?” ¹⁰ Kosoko hakamanya fina awakulu wa watambiki hawamulafa kwa chimwefe. ¹¹ Ninga awakulu wa watambiki howowasonghesa amatewa fina ibeka yawadoholele Balaba. ¹² Pilato yawabidula kahi yakuwagamba, “Nimutende nhani ayuno yo mukumugamba Mundewa wa Wayahudi?” ¹³ Hawatula chowe kahi wakugamba, “Mudumangise!” ¹⁴ Pilato yawagamba, “Kwina wihi waki woyagolose?” Weja wagendelele kutula chowe, “Musambase!” ¹⁵ Pilato yakende kuwendesa matewa, hakewadoholela Balaba; yakafuluse kumujola ne mikotya hakemulafa Yesu yadumangiswe. ¹⁶ Awasilikali hawamulonda hawamwigala kwi kumbo dikwinangwa Plaitolia. hawawalonda chitewa chose. ¹⁷ Hawamufasa isuke idunghundunghu, hawaluka nghofia ya miwa, hawamufasa mwitwi dyakwe. ¹⁸ Hawakonga kumulamusa: “Baho hako Go Mundewa wa Wayahudi!” ¹⁹ Hawamutowa ne chigwami mwitwi, hawamutwila mate, hawafugama, wakumufunamila. ²⁰ Wakamale kumuseyigila, hawamuhambula dikasu diya didunghudunghu, hawamufasa sisuke sakwe imwecho. Hawamulafa kunje uleke wamudumangise. ²¹ Kamei hawamudindilisa imunhu yalokage kulawa kumugunda, Simoni Mukilene, Baba yawo cha Isikanda na Lufo, uleke yaudinghule musalaba wakwe. ²² Hawamwigala ahanhu hakwinangigwa Goligota, nong’amba, Ahanhu he diguha dye ditwi. ²³ Hawamwingha difai ihanganisigwe manemane, ninga ghayunywile. ²⁴ Hawamutungika, na kugawa si suke sakwe, hawatowa kula chila munhu yapate choni. ²⁵ Hayuwa chipisi cha saa ya kadatu, hawamutungika mumusalaba. ²⁶ Hahowa na anuwani muchanhya yakwe, “MUNDEWA WA WAYAHUDI.” ²⁷ Hamwedu naye hawatungikigwa wahiji weli, yumonga kumukono wakwe wokulume, na yumonga kumukono wakwe wokumoso. ²⁸ Uleke diwandiko dimemelekele idikugamba, “Yasambaswa hamwedu na wehi.” ²⁹ Wagendage munjila howomuliga, hawafumila kwa kusingisasingisa amatwi gawo wakugamba, “Ahaa! Agweye ukudaha kudimola dihekalu na kudijenga kwa majuwa madatu! ³⁰ Kihonye gomwecho, uhumuluke mumusalaba!” ³¹ Awakulu wa Watambiki nawo hawamuseyigila awecho kwa wecho, hamwedu na watulumi wakugamba, “Hakahonya wamonga,” nghakudaha kihonya imwecho! ³² Kilisito iMundewa wa Isilaeli na hayahulumuka hambiya mumusalaba uleke chone, chimuhuwile! Awaya nawo awatungikigwe hamwedu naye howomuliga. ³³ Ikowe saa ya mutandatu hokukuwa chisa, iisi yose mpaka saa ya dikenda, ³⁴ Ikafike saa ya dikenda, Yesu yekwinula dijwi dyakwe kwa ludole, “Eloi, Eloi, lama sabakitani?” No kugamba, “Mulungu wangu Mulungu wangu nhani unilekile?” ³⁵ Awamonga awemile baho awahulika na kugamba, “Langa, yakumwinanga Eliya!” ³⁶ Yumonga hayabilima lumangho, na kutubwisa didodoki na kudifabika musiki. Hakamwingha yonywe, yakugamba, “Lekeni! Chilange nghonaga Eliya kokwija kumuhulumusa!” ³⁷ Naye Yesu yalafa ijwi ikulu, kamei na kufa. ³⁸ Dipasiya dya hekalu dyadegeka fibemhe fili, kulawa kuchanya mpaka hasi. ³⁹ Yuya iyakida, iyemile baho yakumulanga, yakone kafa kwanjila iyo. Hoyagamba, “Chawelu ayuno hakowa Mwana wa Mulungu!” ⁴⁰ Hahowa na wanawake wakulanga kwa hatali. Mugati yawo hakowa Maliamu Magidalene, na Maliam ing’ina yawo cha Yakobo imudodo na Yose, na Salome. ⁴¹ Awo nowakiyandamile naye ako Galilaya, na kumutogomela. Na wamonga wengi awejile naye mpaka Yelusalemu. ⁴² Ikowe hegulo, kosoko ni Matandilo, nadyo ijuwa dikulongolela isabato. ⁴³ Hakaluta Yusufu munhu wa Alimataya, munhu mukulu, munhu wa dibalasa dya mahonge. Imwene imwecho yakugojela undewa we Mulungu, yagolosa chigosi, yekwingila kwa Pilato, na kumutasa umutufi wakwe Yesu. ⁴⁴ Pilato yekisina lugano kosoko fina kafulusa kufa. Hakamwinanga iyakida yuya, na kumusa fina kufa kafulusa katali. ⁴⁵ Yakafuluse kupata ichawelu kwi Akida yuya, na kumwingha Yusufu umutufi wa Yesu. ⁴⁶ Naye hakagula sanda ya bafuta, hakamuhulumusa, na kumufasa isanda iya, yamwika muchilalo chisongoligwe mudiwe. Hakafingilisa diwe kumulango we chilalo. ⁴⁷ Naye Maliamu Magidalene na Maliamu ng’inakwe wa Yose, hawalanga ahaya hoyekigwe.

¹ Isabato ikaloke Maliamu Magidalene, na Maliamu ing’ina wa Yakobo, na Salome, hawagula mafuta gena mhungile swanu wakamubake. ² Kwikali lwisalwisa, dijuwa dye inghonga dye dijuma, hawaluta kuchilalo ugele dijuwa fodyakongage kutonhomoka. ³ Hawakonga kulonga awecho kwa wecho, “Nani yakuchifingilisila diwe diya hamulango we chilalo?” ⁴ Wakalange na kona diwe diya difulusa kufingilisigwa; nadyo hadyuwa ikulu lugano. ⁵ Hawengila kuchilalo, na kona mwanike yekale ulwandi lo kulume kafala suke njelu, hawakisina. ⁶ Yawagamba, “Munghakisine! Mukumuhananga Yesu Munasaleti, iyatungikigwe. Kenuka muchilalo! Kahechaka hano, halangeni howamwikile. ⁷ Ninga luteni mukawatamile awefusa wakwe, na Petulo: Fina kawalongolela kuluta Galilaya, mukamona uko fina foyamutamileni.” ⁸ Hawalawa kunje, hawabilima kulawa hachilalo, kosoko wakutetema na kisina. Kahi wasamutamile munhu mbuli kosoko hawogoha. [ ⁹ Naye yakenuke nhosikusiku dijuwa dye inghonga dye kukonga dye dijuma, hoyokiyonesa kunghonga kwa Maliamu Magidalene, imwene wo yamulafa simhepo mufungate. ¹⁰ Aye hoyoluta hoyowatamila awaya awowile hamwedu naye. Nawo wakali hongesa na kulila; ¹¹ Ninga awene fowahulike fina mumi, naye kawona, wasahuwile. ¹² Kahi hakakiyonesa na weli wawo na kena futa ingi; nawo wende wagenda wakuluta kumugunda. ¹³ Awa nawo hawaluta hawawatamila awaya wamonga, awene nawo hawaleka kuhuwila. ¹⁴ Hanyuma, hakoneka na waya ikumi na yumwedu fowende wodiya. Hokawagombela kosoko ya kuswela dihuwi kwawo na ukugutu we fidoga fyawo, kosoko wasawahuwile awaya awamwonile foyenuke muchilalo. ¹⁵ Hakawagamba, “Luteni kuchilunga chose mukahubili imbuli swanu kwa chila munhu. ¹⁶ Iyakuhuwila na kubatisigwa yakuhona; inghakuhuwila yakulamuliligwa. ¹⁷ Fitangilo fino fikwende fikiyandamile na awaya awakuhuwila. Kwi sina dyangu wolafa si mhepo; wolonga kwa nonga nyisha; ¹⁸ wokola majoka, hata wanghadiya chinhu cha kukoma chisikuwabulaga ng’o; wokwika imikono yawo muwatamu, nawo wakuhona.” ¹⁹ Basi Mundewa Yesu yakamale kulonga nawo, hakenuligwa kulanga na kwikala umukono wo kulume we Mulungu ²⁰ Nawo awaya hawalawa hawaluta kuhubili kosekose, iMundewa yakugolosa milimo hamwedu nawo na kumemelesa aiya imbuli kwa fitangilo ifyakiyandamile nayo. Hano.]