MATAYO

MATAYO

¹ Chitabu cho lukolo lwa Yesu Kilisito, imwana wa Daudi, imwana wa Ibulahimu. ² Ibulahimu hakamweleka Isaka, Isaka hakamweleka Yakobo, Yakobo hakamweleka Yuda na Wanduguse, ³ Yuda hakamweleka Pelesi na Sela kwa Tamali, Pelesi hakamweleka Esilomu, Esilomu hakamweleka Alamu, ⁴ Alamu hakamweleka Aminadabu, Aminadabu hakamweleka Nashoni, Nashoni hakamweleka Salimoni, ⁵ Salimoni hakamweleka Boasi kwa Lahabu, Boasi hakamweleka Obedi kwa Lusi, Obedi hakamweleka Yese, ⁶ Yese hakamweleka Mundewa Daudi. Daudi hakamweleka Sulemani kwe muke wa Uliya, ⁷ Sulemani hakamweleka Lehoboamu, Lehoboamu hakamweleka Abiya, Abiya hakamweleka Asa, ⁸ Asa hakamweleka Yehoshafati, Yehoshafati hakamweleka Yolamu, Yolamu hakamweleka Usiya, ⁹ Usiya hakamweleka Yosamu, Yosamu hakamweleka Ahasi, Ahasi hakamweleka Hesekia ¹⁰ Hesekia kamweleka Manase, Manase kamweleka Amoni, Amoni hakamweleka Yosia, ¹¹ Yosia hakamweleka Yekonia na wanduguse, ugele wo kusanyiligwa Babeli. ¹² Kusanyiligwa Babeli kukahele, Yekonia hakamweleka Shelitieli, Shelitieli kamweleka Selubabeli, ¹³ Selubabeli hakamweleka Abihudi, Abihudi hakamweleka Eliyakimu, Eliyakimu hakamweleka Asoli, ¹⁴ Asoli hakamweleka Sadoki, Sadoki hakamweleka Akimu, Akimu hakamweleka Eliudi, ¹⁵ Eliudi hakamweleka Eliesa, Eliesa hakamweleka Matani, Matani hakamweleka Yakobo, ¹⁶ Yakobo hakamweleka Yusufu, mulume wa Maliamu yamweleke Yesu yekwinangigwa Kilisito. ¹⁷ Hambiya, ifyeleko fyose kulawa Ibulahim mpaka Daudi hafyuwa fyeleko ikumi na fine, na kulawa Daudi mpaka kusanyiligwa Babeli fyeleko ikumi na fine; na kulawa kusanyiligwa Babeli mpaka Kilisito hafyuwa fyeleko ikumi na fine. ¹⁸ Kwelekigwa kwa Yesu Kilisito hakuwa nhafi; Maliamu ing’ina ugele woyowile katumisigwa na Yusufu, ugele wasinati wakitole, hakoneka kena inda kwa udaha wa Muhe Musunhile. ¹⁹ Na Yusufu, kosoko hakowa munhu wechawelu nghendile kumuguma chinyala, hakona yamuleke chinyelenyele. ²⁰ Hambiya, ugele foyendeyodoga aso; langa, malaika we Mundewa hakamwijila musinjosi, yakugamba, “Yusufu gomwana wa Daudi, unghogohe kumulonda Maliamu imukago, kosoko iinda yakwe ni kwa udaha wa Muhe Musunhile. ²¹ Naye yakwenda yeleke mwana, nagwe komwinanga disina dyakwe Yesu, kosoko imwene noyakwenda yawahonye awanhu wakwe na uwihi wawo.” ²² Ago gose ganheifo, uleke imbuli iya iyalongigwe ne Mundewa kwa njila ye inonga ye mugonesi yagambile, ²³ “Langa bikila yakwinula inda, naye yakwenda yeleke mwana. Nawo wakwenda wamwinange disina dyakwe Imanueli” (nong’amba, “Imulungu kahamwedu nase”). ²⁴ Yusufu yakenuke musinhongo hakagolosa nheifiya fina foyalongile imalaika we Mundewa. Hoyomutola. ²⁵ Nghagendile naye ka, mpaka yakweleka imwanagwe; kamwingha disina dyakwe Yesu.

¹ Mundewa Yesu foyelekigwa Betelehemu ku iisi ya Uyahudi ugele we Mundewa Helode, langa, mamajusi wa ulwandi lwa kundawilo ye dijuwa, haweja Yelusalemu wakugamba, ² “Kowa hoki iMundewa wa Wayahudi yelekigwe? Kosoko hachiyona inyelesi yakwe kundawilo yedijuwa, nase chija, uleke chimufugamile.” ³ Kamei Mundewa Helode yakahulike nheifo, hakasinanghala, na wanhu wose wa Yelusalemu hamwedu naye. ⁴ Hoyokwinanga ifilongosi wose wa makuhani, na watulumi yawosa fina, “Kilisito yakwelekigwa hoki?” ⁵ Nawo howomugamba, “kuBetelehemu ya Uyahudi; Kosoko nofo itulumigwe ne Mugonesi, ⁶ ‘Nagwe Betelehemu muisi ya Yuda, mu wakulu wa Yuda, iyakwenda yawadime wanhu wangu Isilaeli.’” ⁷ Kamei Helode hoyowenanga awaya mamajusi hanghanda, hoyopata ichawelu kulawa fowakongile kuyona inyelesi iya. ⁸ Hoyowegala Betelehemu, hoyogamba, “Yandamileni injila ino, mkosilise lugano simbuli se mwana yuyo, munghafulusa kumona munitamile uleke nani nilute nikamufugamile.” ⁹ Nawo wakahulike simbuli, se Mundewa, howolongosa injila, kamei inyelesi iya yowonile kundawilo ye dijuwa hoiwalongolela, hoikwima ahanhu hoyowile imwana. ¹⁰ Fowayonile inyelesi iya hawowa na chinyemi chikulu lugano. ¹¹ Howokwingila kugati, howomwona imwana hamwedu na Maliamu ing’ina, howomusegelela, howomufugamila, wakamale kudohola sihasina sawo, howomulafila simhongesi sawo, sahabu, ufumba, na manemane. ¹² Nawo wakamale kutamiligwa na Mulungu musinjosi wanghamuwile Helode; howogenda njila ingi. ¹³ Awaya wakafuluse kuleuka, kamei imalaika we Mulungu hoyomwijila Yusufu musinjosi, hakagamba, “Leuka, umulonde imwana hamwedu ne ing’ina, utijile Misili, wikale uko mpaka nikutamile, kosoko Helode yakuhananga yamulangise imwana uleke yamukome.” ¹⁴ Hakenuka, hoyomulonda mwana ne ing’ina nechilo; hoyoluta Misili; ¹⁵ hoyokwikala uko mpaka foyafile Helode; uleke yoneke fina chawelu imbuli yalongigwe ne Mundewa kusimbuli salongigwe na wagonesi wagambile, “Kulawa Misili hanimwinanga imwanangu.” ¹⁶ Helode yakone kadanhilisigwa na waya mamajusi, hakasuha lugano; hoyotuma wanhu hoyowakoma awana we chigosi wose, awoile ako Betelehemu, ne filunga fyose fikihakane na Betelehemu, kukongela wana we minyaka mili mpaka awasinati wafike minyaka mili, kwandamila fowalongile awaya mamajusi. ¹⁷ Hoiliganila imbuli yoyalongile imugonesi Yelemia. ¹⁸ “Chililo chihulikika Lama, Laheli yakuwalilila wanagwe, kosoko wahechaka.” ¹⁹ Kamei Helode yakafe, noho malaika we Mundewa yamwijila Yusufu musinjosi uko Misili, ²⁰ yakugamba, “Handiko leuka, umulonde imwana ne ing’ina, ulute mpaka kuisi ya Isilaeli; kosoko awahanange ichidoga che imwana wafulusa kufa.” ²¹ Yaleuka na kumulonda imwana hamwedu ne ing’ina, howoluta mpaka iisi ya Isilaeli. ²² Yakahulike fina Alikelao yakudima ako Uyahudi ahanhu ha Helode iBabakwe, yaluta ulwandi lwa Galilaya, ²³ Hakaluta, hakekala mukaya yendeikwinangigwa Nasaleti; Uleke iliganile imbuli yoyalongile imugonesi “Kokwinangwa Munasalayo.”

¹ Mumajuwa gago yalawanisa Yohana mubatisaji yakuhubili munyika ya Uyahudi, yakugamba, ² “Mulambe; Kosoko undewa wa kulanga usegelela.” ³ Kosoko ayo no yalongigwe ne mugonesi Isaya, yakugamba, “Dijwi dye imunhu yakujoja mwibalangu, Igoloseni injila ye Mundewa, Musigolole si njila sakwe!” ⁴ Naye Yohana imwecho hakafala suke igolosigwe na singa se ngamia, na mukanda wa nghingo, muchuno chakwe; na chakudiya chakwe hachuwa sige na uuki wa kumbago. ⁵ Weja wamulutila awanhu wose wa Yelusalemu na Uyahudi na si isi sose sisungulute Yolodani; ⁶ Hakawabatisa mulwanda lwa Yolodani, akuno wakulamba u wihi wawo. ⁷ Yakone matewa ga Mafalisayo na Masadukayo, wakwijila ubatiso wakwe, yawagamba, “Anyeye muwana wa majoka nani yamujanjaluseni kutija inyono ikwija?” ⁸ Hambiya, mweleke mamudyo gakonesa kulamba, “Munghakidanhilise mufidoga fyenu fina, china Baba yetu Ibulahimu,” kosoko nikumutamilani fina Mulungu mumawe agano yekudaha kumwinulila Ibulahimu wana. ⁹ Munghakidanhilise mufidoga fyenu fina, china Baba yetu Ibulahimu; kosoko nikumutamilani fina Mulungu mumawe agano yakudaha kumwinulila Ibulahimu wana. ¹⁰ Inhemo ifulusa kwikigwa hamasina ga mabiki; chila ibiki disikweleka mamudyo maswanu, dikung’enyigwa na kugumigwa mumoto. ¹¹ “Chawelu aniye nikuwabatisa na meji kosoko yo kulamba; amba iyakwija kunyuma yangu kena ludole kusuma niye, kahi aniye sikudaha hata kulonda ifilwatu fyakwe; imwene yakwenda yamubatiseni kwa Muhe Musunhile na kwa moto. ¹² Imwene diselo dyakwe kenadyo mumikono yakwe, naye yakweda yasunhe ahanhu hakwe; ingano yakwe yakuilunda mukano, makohele yakwenda yagasome no moto uusikusima.” ¹³ Ugele uwo Yesu hoyokwija kulawa Galilaya mpaka Yolodani kwa Yohana uleke yabatisigwe. ¹⁴ Ninga Yohana hoyohananga kumulemesa, yakugamba, “Aniye nikuhananga nibatisigwe na gweye, agweye nagwe ukwija ukwangu?” ¹⁵ Mundewa Yesu yamubidula yagamba, “Fumila du hambiya; kosoko ikuhanangigwa kwandamila ichelu yose.” Kamei hoyofumila. ¹⁶ Yesu yakamale kubatisigwa yalawa mulwanda; kamei, ulanga weja wagubuka na kumona, Muhe we Mulungu kifana huwa yakuhumuluka mchanhya yakwe; ¹⁷ kamei, dijwi kulawa kulanga dikugamba, “Ayuno no Mwanangu, mwendigwa wangu, wonyendesigwe naye.”

¹ Kamei Yesu hoyolongosingwa na Muhe hoyomwigala kunyika, uleke yagesigwe ne luhoma ² Hoyokwikala bila kudiya majuwa makumi mane chilo ne misi, hoyokona njala. ³ Imugesa hoyomwijila hoyomugamba, “Nghonaga gweye no Mwana we Mulungu, gagambe amawe gano gowe mikate.” ⁴ Ninga hoyomubidula hoyogamba, “Itulumigwa fina imunhu nghakudaha kuwa mumi kosoko yo mukate muhala, ninga kwa chila mbuli ikulawa mumulomo we Mulungu.” ⁵ Kamei Luhoma hoyomulonda mpaka ikaya isunhile, hoyomwika kuchisusu chisololoke kuchanhya ye dihekalu, ⁶ hoyomugamba, “Nghonaga gwe no Mwana we Mulungu kilagase hasi; kosoko itulumigwa, Yakwenda yatume malaika wakwe; Wakwenda wakuhokele mumikono yawo; Unghakibulage umugulu wako mwiwe.” ⁷ Yesu yamugamba, “Kahi itulumigwa, ‘Unghamugese Mundewa Mulungu wako.’” ⁸ Kamei Luhoma hoyomulonda mpaka kwitunda ditali lugano, hoyomonesa, undewa wose we chilunga, na uswanu wakwe, ⁹ yamugamba, “Aga gose nikwenda nikwinghe, unghogwa na kunifugamila.” ¹⁰ Kamei Yesu hoyomugamba, “Halawe, Shetani!” Kosoko itulumigwa, “Umufugamile Mundewa Mulungu wako, umufugamile imwene muhala!” ¹¹ Kulawa baho Luhoma hoyomuleka; kamei, howokwija malaika kumutogomela. ¹² Kamei Yesu yakahulike fina Yohana kohigwa, hakaluta mpaka Galilaya; ¹³ Hakaleuka Nasaleti, hoyejakwikala Kapelinaumu, ikaya yuwile munhika ye bahali muundewa wa Sabuloni na Nafutali; ¹⁴ uleke iliganile imbuli yalongigwe ne Mugonesi; Isaya yagambile, ¹⁵ “Iisi ya Sabuloni na iisi ya Nafutali, Injila ye bahali, umwambu wa Yolodani, iGalilaya ya Mataifa, ¹⁶ Awanhu waya awekale muchisa wona ujelu mukulu, Nawo wekale muisi ya dinyefu dya difa ujelu uwahulumukila.” ¹⁷ Kulawa ugele uwo Yesu hakakonga kuhubili, na kugamba, “Lambeni, kosoko undewa wa kulanga usegelela.” ¹⁸ Naye foyendeyogenda munghanda ye bahali ya Galilaya, hakona wandugu weli, Simoni yekwinangwa Petulo ne munduguse Andelea, wakuguma ulwafu lwao mubahali, kosoko hawowa walowaji wa somba. ¹⁹ Yawagamba, “Munyandamile, nikuhananga niwagolose muwe walowa wanhu.” ²⁰ Chimwande howoleka sinyafu sawo, howomwandamila. ²¹ Yogendelela kumwande, yakawona wamonga wandugu weli, Yakobo wa Sebedayo ne munduguse Yohana, wowile mu chiya hamwedu ne Baba yawo Sebedayo, wendewogolosa sinyafu sawo; yawenanga. ²² Chimwande howoleka chiya chawo ne Baba yawo howomwandamila. ²³ Naye yendeyosunguluta Galilaya yose, yakufusa mumasinagogi gawo na kuhubili simbuli siswamu so undewa wa kulanga, na kuwahonya wanhu na matamu gose. ²⁴ Simbuli sakwe hosihulikika ako Shamu yose howomwigalila awanhu wose wowile na si nhamu, awowile na sinhamu se hayo hayo ne magayo, wowile na magini, wowile ne chisilisi, na wowile na utamu wa kuholola, hoyowahonya. ²⁵ Matewa ga wanhu wengi howomwandamila kulawa Galilaya, Dekapoli, Yelusalemu na Uyahudi na umwambu wa Yolodani.

¹ Naye yakawone matewa, yakwila kwitunda; yakafuluse kwikala hasi, wefusa wakwe howomwijila; ² Yagubula umulomo wakwe, na kukonga kuwafusa, yakugamba, ³ “Ibeka awakiwa mufidoga, Kosoko undewa wa kulanga wawo! ⁴ Ibeka wena usungu; Kosoko wakwenda waholesigwe! ⁵ Ibeka awaholo; Kosoko awene wakwenda wahale iisi! ⁶ Ibeka wena injala na inghilu ya chelu; Kosoko awene wakwenda wegusigwe! ⁷ Ibeka awena ubasi; Kosoko awo wakwenda woneligwe ubasi! ⁸ Ibeka awena mimoyo miswanu; Kosoko awo wakwenda wamone Mulungu! ⁹ Ibeka awalamusi; Kosoko wakwenda wenangigwe wana we Mulungu! ¹⁰ Ibeka awakugaya kwa kugolosa foyakwenda Mulungu; Kosoko undewa wa kulanga wawo! ¹¹ Ibeka anyeye ghona wakwenda wamubeseni na kumugoloselani fibi, na kumulongani, na kumusigani mabuli gehile kwa udasi, kosoko yangu. ¹² Sekeleleni na kwanga, kosoko digelo dyenu ikulu kulanga. Kosoko nofowawagolosele fibi awagonesi awawalongolele nyeye.” ¹³ “Anyeye no umunyu we chilunga; ninga umunyu unghabanika wogumigwa choni ukolele? Usikunoga ka, isigalila kutagigwa kunje na kujatigwa na wanhu. ¹⁴ Anyeye no ujelu we chilunga. Ikaya isikudaha kifisa inghowa muchitunda muchanhya. ¹⁵ Kahi awanhu wasikwasa itaa na kuigubika, ninga wakuika muchigwaso, ikuwamulikila wose awoile munyumba. ¹⁶ Nheifo ujelu wenu umulike kumwande ya wanhu, uleke wone sinhenda senu si swanu, uleke wamutunye iBaba yenu yowile kulanga.” ¹⁷ “Munghadoge fina nija nileusa itolati ama awagonesi, ng’o, sijile kuleusa ninga kumemelesa. ¹⁸ Kosoko chawelu nikumutamilani, mpaka ulanga ne iisi fileuke, chisikuleuka ng’o chinhu chidodogi chimwedu che tolati mpaka gose gamemelesigwe. ¹⁹ Hambiya imunhu yakubesa dilagiso dimwedu du musino si ndodogi, na kuwafusa wanhu wandamile nheifo yakwenda yenangigwe mudodogi mu undewa wa kulanga, ninga imunhu yekusigolosa na kuwafusa wamonga wandamile nheifo, yakwinangigwa mukulu ku undewa wa kulanga. ²⁰ Kosoko nikumutamilani fina uswanu wenu ughaleka kusuma wa watulumi na Mafalisayo, musikudaha kwingila ng’o mu undewa wa kulanga.” ²¹ “Muhulika wanhu wa katali fowagambigwe fina, ‘Unghakome! Na imunhu yanghakoma yowisiligwe.’ ²² Ninga niye nikugamba chila munhu yakumonela nyono imiyagwe yagila yowisiligwe; na munhu yakuliga imiyagwe, ‘Dibwalata’ yagila yengisigwe mu moto wa majuwa gose. ²³ Unghegala isadaka yako hokufugila, kamei unghagelegela fina imunduguso kena mbuli na gweye. ²⁴ Uileke isadaka yako hadifugilo, ulute, ukakifumilise ne munduguso, noho uye ulafe isadaka yako. ²⁵ Kifumilise ne munghondo wako, yanghakwigale kwe mulamusi; ne mulamusi yakwigale ku wasilikali, wakugume kuchifungo. ²⁶ Huwila, nikukutamila, nghukulawa mo mpaka ulihe isendi yo ndumo.” ²⁷ “Muhulika awanhu wakatali fowagambigwe, ‘Unghagolose dihabwa!’ ²⁸ Ninga niye nikugamba, ‘Chila munhu yakumulanga imwanamuke kwa kumusulumila, kafulusa kugona naye muchidoga chakwe. ²⁹ Digiso dyako dyo kulume dinghakwambusa ugolose wihi ding’ole uditage kutali nagwe, kosoko yagila ichilungo chako chimwedu chagilile, uleke umutufi wako wose unghatagigwe kumoto uusikusima. ³⁰ No mukono wako wo kulume unghakuhosa ugolose wihi udumule uutage kutali nagwe, kosoko yagila chilungo chako chimwedu chagilile, uleke umutufi wako wose unghatagigwe jehanamu.’” ³¹ “Kahi igambigwa, ‘Imunhu yanghamuleka imuke yamwinghe baluwa ya malekeni.’ ³² Ninga niye nikugamba, ‘Chila munhu iyakumuleka imuke, inghowa si kosoko ye dihabwa, yakumugolosa fina yakwingililigwa; ne munhu yakumutola yuya yalekigwe yakuwa kengilila.’” ³³ “Kahi muhulika wanhu wa katali fowagambigwe, ‘Unghakilahe kwa udasi ninga umugolosele, Mundewa fina foukilahile.’ ³⁴ Ninga niye nikugamba: Unghakilahe ng’o, kahi kwa ulanga, kosoko no digoda dyo undewa we Mulungu; ³⁵ Kahi kwa iisi, kosoko noho yakwika imigulu yakwe, kahi kwa Yelusalemu, kosoko no kaya ye Mundewa mukulu; ³⁶ Kahi unghakilahile ditwi dyako, kosoko nghukudaha kulugolosa ulujwili lumwedu luwe lujelu ama lutitu. ³⁷ Ninga simbuli senu suwe Heye; heye, si nheifo, si nheifo; sose isikupulutisa sikulawa kwa yuya iyehile.” ³⁸ “Muhulika fina igambigwa, ‘Igiso kwa igiso, na igego kwa igego.’ ³⁹ Ninga niye nikugamba, ‘Munghakikushe ne munhu yehile, ninga imunhu yanghakutowa ifunda yo kulume, mubidusile na ya keli. ⁴⁰ Ne munhu yakuhananga kukusongesa na kukuhoka inghasu yako, mulekele na dijoho nadyo. ⁴¹ Ne munhu yakukudindilisa utali wa chipisi chimwedu, luta naye fipisi fili. ⁴² Iyakukutasa, mwinghe; iyakuhananga kukopa ukwako, unghamwinghe chigosigosi.’” ⁴³ “Muhulika fina igambigwa, ‘Umwende imiyago, umusule imunghondo wako.’ ⁴⁴ Ninga niye nikugamba, wendeni awanghondo wenu, muwatasile wakumutendani fibi. ⁴⁵ Uleke muwe wana we Baba yenu iyowile kulanga; kosoko imwene yakwalisa dijuwa dyakwe kuwehile na waswanu, yakuwatonyesela ifula awaswanu na wehile. ⁴⁶ Kosoko munghawenda awakumwendani nyeye mopata igeleko dyaki? Aho awaya awakuhokela ikodi togoleni nawo wasikugolosa nheifo? ⁴⁷ Kahi munghawalamusa awandugusenu du, mugolosa nhenda yaki yongeseke? Aho awanhu wa mataifa wasikuwagolosela fina nheifo! ⁴⁸ Hambiya anyeye mokuwa muliganile fina Baba yenu yowile kulanga foyaliganile.”

¹ “Langisiseni munghagolose uswanu wenu, mumeso ga wanhu, kosoko mulangigwe na awene, kosoko munghagolosa nheifo mukuswela igeleko kwi Baba yenu iyowile kulanga; ² Hambiya, agweye nghona ukulafa isadaka yako unghakitowele igunda kumwande yako fina wanhu awena chimwefe fowakugolosa mumasinagogi na musinjila, uleke watunyigwe na wanhu. ³ Chawelu, nikumutamilani, wafulusa kuhokela digeleko dyawo. Ninga gweye ghona ukulafa isadaka yako, umukono wako wo kumoso unghamanye umukono wo kulume choukugolosa; ⁴ isadaka yako yuwe ku chifiso; Baba iyakona ichifiso yakwenda yakumemese.” ⁵ “Kahi ghona mukutasa, munghowe fina wanhu we chimwefe, kosoko awene wakwenda kutasa wemilenyima mumasinagogi na musinjilamhanda, uleke wonigwe na wanhu. Chawelu, nikumutamilani wafulusa kuhokela digeleko dyawo. ⁶ Ninga agweye nghona ukutasa, ingila kuchaisi unghafulusa kuhinda dibakwa dyako, utase kumwande ye Babako yowile kuchifiso; ne Babako iyakona kuchifiso kokumemelesa. ⁷ Nanye munghowa mukutasa, munghabagebage fina wanhu we chilunga; kosoko awene wakona fina wohulikigwa kosoko ye simbuli sawo fo ni nyingi. ⁸ Ninga anyeye munghowe fina awene, kosoko Baba yenu kamanya gomukuhananga ugele musinati mutase. ⁹ Nanye taseni nhafi: Baba yetu uwile kulanga: Disina dyako ditunyigwe; Undewa wako wije; ¹⁰ Kwenda kwako kugoloseke. Ahano ha chilunga fina ako kulanga. ¹¹ Uchinghe diyelo chakudiya chetu cho kuchigutisa. ¹² Uchilekelele uwihi wetu fina seye nase fochikuwalekelela awachigolosele wihi, ¹³ Na unghachingise mumagesa, ninga uchihonye na uwihi. Kosoko, undewa ni wako, no ludole, ne ditunyo, majuwa gose hano. ¹⁴ “Kosoko munghawalekelela wanhu uwihi wawo, ne Baba yenu wa kulanga yakuhananga yamulekeleni na nyeye uwihi wenu. ¹⁵ Amba munghaleka kuwalekelela awanhu uwihi wawo, na iBaba yenu nghakwenda yawalekelele uwihi wenu.” ¹⁶ “Kahi fomukufunga, munghowe fina wechimwefe wena fihanga fisinanghale, kosoko yokiyonesa ifihanga fyawo, uleke wonigwe na wanhu fina wafunga. Chawelu nikumutamilani, wafulusa kuhokela digeleko dyawo. ¹⁷ Ninga agweye nghonaukufunga, ukibake mafuta mwitwi, unawe chihanga; ¹⁸ Uleke unghoneke na wanhu fina kufunga, ninga iBabako yowile muchifiso yakwenda yakumemese.” ¹⁹ “Mughakiikile sigafu muchilunga, sinondo ne ikanga fikubana, na wahiji wakubena na kuhija; ²⁰ mukiikile sigafu kulanga, kusikubanika chinhu, kwichaka sinondo kahikanga, kahiwahiji wasikubena kahiwasikuhija; ²¹ kosoko isigafu yako hoyuwile, noho umoyo wako houkuwa.” ²² “Digiso no taa yo mutufi; digiso dyako dinghowa iswanu, mutufi wako wose ukuwa na ujelu. ²³ Ninga digiso dyako dinghowa dibanike, umutufi wako wose wokuwa na chisa. Ninga awuya ujelu uwile kugati yako unghowa chisa, chititu tukutuku!” ²⁴ “Kwechaka munhu iyekudaha kutogomela wakulu weli; kosoko yekumusula yuno, na kumwenda ayuno, nhagela yekiyandamila nayu, na kumubesa ayuno. Musikudaha kumutogomela Mulungu no ugoli. ²⁵ Kosoko iyo nikumutamilani, munghakiidase no uumi wenu, modiya choni, kahi mokunywa choni; kahi imitufi yenu, mufale choni. Uumi si mukulu kujumha chakudiya, no mutufi si mukulu kujumha sisuke? ²⁶ Filangeni fidege fya Mulanga, fisikuhanda kahi fisikugola, kahi fichaka kano; ne Baba yenu wa kulanga yekufigutisa. Togoleni! Anyeye si ibeka kujumha ifyene? ²⁷ Yehoki ukwenu imwene kwakiidasa yekudaha kiyongesela utali wakwe hata mukono umwedu? ²⁸ “Nhani mukiidasile sisuke? Gelegeleni amaluwa ga kumigunda, ifene fo ga kukula; gasikugolosa milimo yoyose, kahigasikubota; ²⁹ Nanyeye nikumutamilani, hata Sulemani muditunyo dyakwe dyose nghafasigwe fiswanu kifana dimwedu dyawo. ³⁰ Kamei inghowa Mulungu yekugafasa nhaifo amanyagala ga kumbago agebaho diyelo, na nhosiku gakutagigwa kwikusisi, togoleni! Nghodaha lugano kuwafasa nyeye mwina dihuwi dikefu? ³¹ “Munghakiidase mukugamba, Chodiya choni? Ama chokunywa choni? Ama chofala choni? ³² Kosoko ago gose awe chilunga wekugahananga; kosoko Baba yenu wa kulanga kamanya fina mukugahananga ago gose. ³³ Ninga uhanangeni undewa wakwe, no uliganisi wakwe, nago gose mukwenda mongeseligwe. ³⁴ Ninga munghakiidase na ganhoosiku, kosoko aganhoosiku gakakiidasila agecho. Leka amagayo ge dijuwa gamemelekele mwijuwa dyakwe.”

¹ “Munghaliganise, uleke anye nanye munghaliganiswe. ² Kosoko kukuliganisa akuya komukuliganisa nofo nanye mukwenda muliganisigwe. Nacho ichipimo chomukupimila, nocho mukwenda mupimiligwe. ³ Nhani ukulanga ichibasi chuwile mwigiso dye munduguso, na dibiki duwile mudigiso dyako gomwecho nghukudyona? ⁴ Kahi komulonga nhani imunduguso, Nileke nileguse ichibasi ichuwile mwigiso dyako; ugele! Mwina dibiki mwigiso dyako go mwecho? ⁵ Kwina chimwefe gweye! Yenda kuleusa dibiki dyuwile mwigiso idyako go mwenecho noho udahe kona fiswamu kuleusa achiya ichibasi mwigiso dye munduguso. ⁶ Munghagenghe mabwa ichinhu chisunhile, kahi munghakubitile silulu senu kumwande ye singuluwe, singheje sisijata ne migulu yawo, hosimubidukilani nyeye, na kumulumani.” ⁷ “Taseni, nanye mokwinghigwa; hanangeni, nanye mokona; gong’ondeni, nanye mokumuliligwa; ⁸ kosoko chila yekutasa, yakuhokela; naye yekuhananga, yakona; naye yekugong’onda, yekukumuliligwa. ⁹ Kahi kwina munhu nani ukwenu imwene imwanagwe yanghatasa mukate komwingha diwe? ¹⁰ Kahi yanghatasa isomba, komwingha dijoka? ¹¹ Inghowa, anyeye mwihile, mumanya kuwengha awana awenu ifinhu fiswanu; togoleni! Si chawelu iBaba yenu wakulanga, yakwenda yawenghe maswanu awakumutasa? ¹² Gose gomukuhananga mugoloseligwe na wanhu, anyeye nanye muwagolosele nheifo; kosoko ayo no tolati na wagonesi.” ¹³ “Ingileni kwa kugendela umulango umusisili; kosoko umulango mugalamu, ne njila ni ngalamu iikuluta kukwagilila, nawo awekwingila kumulango uwo ni matewa ¹⁴ Ninga mulango musisili, na injila ilongoka kuumi, nawo awakuyona wakefu.” ¹⁵ “Kilangisiseni na Wagonesi wo udasi, awanhu awakuwejila wafala suke sa ngholo ninga kugati yawo mausi makali. ¹⁶ Mowatanga kosoko ye sinhenda sawo. Togoleni! Awanhu wekubawa sabibu mumabiki ge miwa; ama tini mu mibaluti? ¹⁷ No nheifo chila dibiki diswanu dikweleka mamudyo maswanu, dibiki dihile dikweleka amamudyo gehile. ¹⁸ Dibiki diswanu disikudaha kweleka mamudyo gehile. ¹⁹ Chila ibiki idisikweleka mamudyo maswanu dikung’enyigwa na kugumigwa kumoto. ²⁰ Hambiya mowatanga kosoko ye sinhenda sawo.” ²¹ “Siyo chila munhu yekunigamba Mundewa, Mundewa, iyakudaha kwingila mu undewa wa kulanga; ninga iyakugolosa ifyene foyakwenda Baba yowile kulanga. ²² Matewai wakuhananga weje wanigambe dijuwa diya, Mundewa, Mundewa! Aniye salafile ugonesi kudisina dyako na kugolosa majumo mengi? ²³ Kamei nikwenda nije niwagambe, Anyeye siwamanyile ka, Halaweni hano, anyeye mukugolosa gehile!” ²⁴ “Hambiya chila iyakuhulika simbuli sangu, na kusigolosa, yekuliganisigwa ne munhu iyena misungu, yajengile inyumba yakwe mwiwe. ²⁵ Ifula hoitonya, amafaluko hogokwingila mengi, imheho hoitowa, ipumunha inyumba iya, isogwile; kosoko inghindiso yakwe hayuwa mwiwe. ²⁶ “Na chila yakuhulika simbuli sangu yanghagolose, yakuliganisigwa ne munhu imubwalasi, yajengile inyumba yakwe mwisanga; ²⁷ ifula hoitonya, amafaluko hogokwingila, imheho hoipumunha, hoitowa inyumba iya, hoikugwa, inyugwa yakwe hoikuwa nghulu! ²⁸ Kamei, Yesu yakamale simbuli siso, amatewa ga wanhu hogojuma lugano kosoko ya amafuso gakwe; ²⁹ kosoko yendeyofusa kifana munhu yena udaha; siyo fina watulumi wawo.”

¹ Naye foyadulike kulawa kwitunda, matewa mengi hogomwandamila. ² Ulange, hoyokwija imunhu yena ukoma hakamufugamila, na kumugamba, “goMundewa,” unghenda ukudaha kunihonya. ³ Yesu hoyogolola umukono wakwe hakamukwafa, hakagamba, “Nikwenda hona.” Baho ni baho ukoma wakwe houhona. ⁴ Yesu hoyomugamba, “Ulangisise, unghamutamile munhu, ulute ukakiyonese kwa kuhani, ukalafe digelo fina foyalongile Musa, uwe uhomelesi ukwawo.” ⁵ Yakengile Kapelinaumu, akida yumonga yamwijila, ⁶ na kumugongelesa yakugamba, “Mundewa imutumishi wangu kagona ukaya, mutamu wa kuholola, yakutamigwa lugano.” ⁷ Yesu yagamba, “Nokwija nimuhonye.” ⁸ Ayuya iakida, yamubidula, yakugamba, “Mundewa, Isinyagile aniye agweye wingile hasi ye ikano yangu; ninga longa mbuli du imutumishi wangu yakwenda yahone. ⁹ Kosoko ani nani na munhu nuwile hasi ya udaha, nina wasilikali hasi yangu, ninghamugamba ayuno, ‘Luta,’ yekuluta; na ayuno, ‘Wije,’ yekwija, ne mutumwa wangu, ‘Golosa nhafi,’ yekugolosa.” ¹⁰ Yesu yakahulike simbuli siso, yajuma, yakuwagamba awaya wendewomwandamila, “Sinati nyone ihuwi ikulu fina dino mu Isilaeli. ¹¹ Chawelu, nikumutamilani, fina wengi wakwenda weje kulawa kundawilo ye dijuwa, wakwenda wekale hamwedu na Ibulahimu, na Isaka na Yakobo mu undewa wa kulanga; ¹² amba awana wo undewa wakwenda watagigwe ku chisa cha kunje; ukwene kukuwa chililo na kugwegwejula meno.” ¹³ Kamei Yesu hoyomugamba ayuya ichilongosi wa wasilikali igana, “Luta, yuwe ukwako fina fouhuwile.” Imutumishi wakwe hoyohona ichigele chichiya. ¹⁴ Kamei Yesu foyafikile ukaya kwa Petulo, yamona imukwewe wa Petulo, inghina we muke, kagona mwisasi kena mhungo. ¹⁵ Hakamukwafa umukono, imhungo hoimuleuka; hoyokwinuka hoyomutogomela. ¹⁶ Ikafike hegulo, wejawamwijila matewa awena simhepo, hoyosilafa kwa kulonga imbuli yakwe, hakawahonya wose awowile watamu, ¹⁷ uleke imemelesigwe imbuli yalongigwa ne mugonesi Isaya, yekugamba, “Imwenyecho hakalonda usokesi wetu, Nakulonda matamu getu.” ¹⁸ Imwene Yesu foyejayona amatewa ga wanhu gekumusunguluta, yalagisa walute umwambu. ¹⁹ Imutulumi yumwedu hoyomulutila, yamugamba, “Mwalimu, Nokwandamila kokose kowukwenda ulute.” ²⁰ Yesu yamugamba, “Mabwasiko gena mapango, fidege fya mulanga fina mafulu, Ninga imwana we munhu kechaka hokugonesa ditwi dyakwe.” ²¹ Yumwedu wa wefusa wakwe yamugamba, “Mundewa, ninghe luneka nilute nikamusike iBabangu.” ²² Ninga Yesu yamugamba, “Nyandamile, waleke wafile wasike awafile wawo.” ²³ Yakengile muchiya, awefusa wakwe wejawamwandamila. ²⁴ Hakuwa musingisiko mukulu mubahali, hata ichiya hochigubikigwa na meji, imwene hakowa yagonile sinhongo. ²⁵ Awefusa wakwe wejawamulutila, na kumwinusa, wakumugamba, “Mundewa, chihonye, chikufa!” ²⁶ Yawagamba, “Nhani mukogoha anyeye we dihuwi dikefu?” Chimwande, yekwinuka na kuyigombela hoyoigombela imheho ne bahali; hoisalama lugano. ²⁷ Awanhu waya wejawajuma wakugamba, “I munhu yuno munhu waki! Imwene imheho ne ibahali fikumuhulika?” ²⁸ Naye foyafikile umwambu kuisi ya Wagelasi, wanhu weli wena simhepo weja wakitang’anyila naye, wakulawa kufilalo, wakali lugano, awanhu wasendewodaha kugenda injila iyo. ²⁹ Langa wejawatula chowe, wakugamba, “China choni na gweye go Mwana we Mulungu? Togola! Kwija kuchisambasa ugele wetu unghali?” ³⁰ Hatali na baho hahowa na itewa dya nguluwe itewa sikudiya. ³¹ Magini gaya gejagamutesa, gakugamba, “Unghachilafe chileke chilute chikengile mwitewa dye singuluwe.” ³² Hakagamba, “Luteni Hogelawa,” hogekwingila musinguluwe; kamei ditewa dyose hodidulika kwigenge mpaka kubahali, hosikunywa munghabu hosikufa. ³³ Awadimi howotija, howoluta ukaya, howokwanjasa simbuli sose, na sawaya wowile na simhepo. ³⁴ Langa ikaya yose hoilawa kwija kumusingila iMundewa Yesu; kamei wakamwone, howomutasa yaleuke muisi yawo.

¹ Yakengile muchiya, hoyoloka, umwambu hoyokwingila mukaya iyawo. ² Langa, howomwigalila imunhu yena utamu wo kuholola, kagona mwisasi, imwene Yesu yakone dihuwi dyawo, hoyomugamba yuya yaholole, “Kiinghe moyo mukulu, mwanangu!” kulekeleligwa uwihi wako. ³ Langa, awamonga wa Watulumi howolonga kufidoga fyawo, “Ayuno yakubesa!” ⁴ Ninga Yesu hakamanya fowakudoga, hoyogamba, “Nhani mukudoga gehile mufidoga fyenu? ⁵ Dihufu no dihoki, kugamba, ‘Kulekeleligwa uwihi wako,’ ama kugamba, ‘Inuka ulute?’ ⁶ Ninga mumanye fina Imwana we Munhu kena udaha muisi wokulekelela uwihi.” Yakumulonga ayuya yaholole inuka, ukitwike disasi dyako, ulute ukaya ukwako! ⁷ Hoyokwinuka, hoyoluta ukaya ukwakwe. ⁸ Amatewa gakone nheifo howomemigwa na ditisi, hogamutunya Mulungu, iyawenghile awanhu udaha kifana uwo. ⁹ Kamei Yesu foyagendage yakulawa uko hakona munhu ahanhu hakulihiligwa ikodi, yakwinangwa Matayo, hoyomugamba, “Nyandamile.” Hoyokwinuka na kumwandamila. ¹⁰ Yakengile kugati kudiya chakudiya, langa, wakonghosa kodi itewa na awena uwihi haweja, na kwikala hamwedu na Yesu na wefusa wakwe. ¹¹ Mafalisayo, wakone nheifo, hawawagamba awefusa wakwe, “Nhani imwalimu wenu yakudiya hamwedu na wakonghosa kodi na wena uwihi?” ¹² Imwene yakahulike, yawagamba, “Awomi wasikuhananga muganga, ninga awatamu.” ¹³ Ninga luteni mukakifuse isoko ye simbuli sino: “Nikuhananga ubasi, ninga si igelo. Kosoko sijile nikwinanga awanhu awaswamu, ninga awena uwihi.” ¹⁴ Ugele uwo wefusa wa Yohana howomulutila, howogamba, “Nhani aseye na Mafalisayo chikufunga, ninga awefusa wako wasikufunga?” ¹⁵ Yesu yawagamba, “Awenangigwe kuhalusi wodaha nhani kulila, ugele imwenye halusi kahamwedu nawo? Ugele uukwija wo kuleusiligwa imwenye halusi; aho noho wakwenda weje wafunge. ¹⁶ Hechaka munhu iyakuguma indame ya suke nyisha musuke ing’ono, kosoko aiya indame ikwenda idege isuke iya ilalile, na haya ahadegeke hakwenda hongeseke. ¹⁷ Kahi awanhu wasikuguma difai nyisha mufiya filalile; wanghagamba wagume mufiya ifilalile fikwenda fitulike, idifai ikwenda itike, ne ifiya fikwenda fibanike; ninga wakuguma idifai nyisha mufiya ifisha, kamei fyose fisikubanika.” ¹⁸ Ugele fo yalongage nawo gago, langa, hoyokwija jumbe yumonga, hoyomufugamila, yekugamba, “Imwanangu we chike kafa hambiya baha; ninga wije, wike imikono yako umwakwe naye yakwenda yowe mumi.” ¹⁹ Hoyoleuka Yesu, hoyomwandamila hamwedu na wefusa wakwe. ²⁰ Langa, imwanamuke yejayowa na utamu wa kulawa sakame kwa miyaka ikumi na mili, hoyokwija kunyuma, hoyokwafa dipindo dye suke yakwe, ²¹ kosoko hakagamba muchidoga chakwe, “Ninghakwafa du dipindo dye isuke yakwe nikuhona.” ²² Yesu hoyobiduka, hoyomona, hoyomugamba, “Kiinghe moyo mukulu, mwanangu we chike! Dihuwi dyako dikuhonya.” Imwanamuke yuya hoyohona kulawa ugele uwo. ²³ Yesu yakafike ukaya kwa yuya ijumbe, hakona wanhu wakutowa sifilimbi, na matewa wakuhongesa. ²⁴ Hoyowagamba, “Leukeni! Kosoko ayuno imundele nghafile, kagona du.” Howomuseka lugano. ²⁵ Ninga amatewa fowaleusigwe, hoyokwingila, hoyomukola umukono, ayuya imundele hoyokwimanyima. ²⁶ Simbuli sino hosikwenela iisi iya yose. ²⁷ Yesu foyagendage kulawa uko, wanhu wemudula weja wamwandamila wakwinula majwi, wakugamba, “Uchonele ubasi Mwana wa Daudi!” ²⁸ Naye yakafike ukaya, awaya fidula howomulutila; Yesu hoyowagamba, “Mukuhuwila fina nodaha kugolosa dino?” Howogamba, “Heye, Mundewa!” ²⁹ Hoyowakwafa ameso gawo, hoyogamba, “Ifene fomuhuwile muhokele!” ³⁰ Ameso gawo hogogubuka; Imwene Yesu hoyowasigilila kwa ludole, “Langisiseni, hata munhu yumwedu yanghamanye.” ³¹ Ninga hawaleuka, howokwenesa simbuli sakwe mu isi iya yose. ³² Ugele awaya fowaleukage, hawamwigalila munhu chibubu iyena imhepo. ³³ Imhepo ikalafigwe, ichibubu yalonga, amatewa hogojuma lugano, wakugamba, “Isinati yoneke nheifino mu Isilaeli ugele wowose.” ³⁴ Amba Amafalisayo howogamba, “Kuludole lwe mukulu we simhepo yakulafa simhepo.” ³⁵ Ne mwene Yesu yende yosunguluta mu sikaya ne fikaya fyose, yakufusa mumasinagogi gawo na kuhubili imbuli iswanu yo undewa, na kuhonya sinhamu sose na usokesi wowose uya. ³⁶ Foyawonile amatewa, hakawonela ubasi kosoko hawasoka kifana ngholo sichaka mudimi. ³⁷ Noho yawagambile awefusa wakwe, “Ugolaji mwingi, ninga wagolosaji wakefu. ³⁸ Mutaseni Mundewa wo ugolaji, yegale wagolaji ku ugolaji wakwe.”

¹ Yawenanga awefusa wakwe ikumi na weli, hoyowengha udaha wa kulafa simhepo sihile, na kuhonya sinhamu sose na usokesi wowose uya. ² Na masina ga wefusa ikumi na weli no gano: Wa bosi Simoni yakwinangigwa Petulo, na Andelea imunduguse; Yakobo mwana wa Sebedayo, na Yohana imunduguse; ³ Filipo, na Batolomayo; Tomaso, na Matayo imukonghosa kodi; Yakobo mwana wa Alufayo, na Tadayo; ⁴ Simoni Mukananayo, na Yuda Isikalioti, ayo noyeja yamusongesa. ⁵ Awo ikumi na weli Yesu hoyowatuma, hoyowalagisa fina, “Kusinjila sa Mataifa munghalute, kahi injila yoyose ya wowose Wasamalia munghengile. ⁶ Ibeka mukole injila yokusilutila singholo sagilile se inyumba ya Isilaeli. ⁷ Mung’enda yenu hubilini, mugambe, Undewa wa kulanga usegelela! ⁸ Honyeni awatamu, inuleni awofile, wahonyeni awena ukoma, lafeni simhepo, muhokela chaka, lafeni chaka. ⁹ “Munghalonde sahabu, kahe fesa, kahe shaba mumisipi yenu; ¹⁰ kahi umufuko we nhambo, kahi ghasu mbili, kahi filwatu, kahi mhando, kosoko iyakugolosa milimo imwagila yenghigwe ichakudiya chakwe. ¹¹ Ne ikaya yoyose ama chikaya chochose chomukwingila, hanangeni no nani umo imunhu yekudaha kuhuwilika; mwikale ukwakwe mpaka fomukuleuka. ¹² Nanye munghengila munyumba muilamuse. ¹³ Ne inyumba iyo inghagiligwa digoya dyenu diwafikile; ninga honaga isagiligwe digoya dyenu dimuwileni muwecho. ¹⁴ Imunhu yanghaleka kumuhokelani kahi kusitegelesa simbuli senu, nghona mukulawa munyumba iyo, ama ikaya iyo, kung’unheni dinghundi duwile mumigulu yenu. ¹⁵ “Chawelu, nikumutamilani, ikwenda yuwe ibeka ku iisi ya Sodoma na Gomola kufinyilisa magayo gakwe dijuwa dye kuliganiswa, kusuma ikaya iyo.” ¹⁶ “Mulange, aniye nikumutumani, kifana ngholo muchiligati cha mausi, muwe ne misungu kifana majoka, na waholo kifana huwa. ¹⁷ Kilangisiseni na awanhu; kosoko wakwenda wawegale kumabalasa, na kumasinagogi gawo, wakwenda wamutoweni; ¹⁸ nanye mukwenda mwigaligwe ku maliwali na wandewa kosoko yangu, uwe uhomelesi ukwawo na kumataifa. ¹⁹ Ninga baho nghona wakumwigalani, munghadogedoge chomukwenda mulonge, kosoko mukwinghigwa ugele uwo gokulonga. ²⁰ Kosoko siyo nyeye mukulonga, ninga ni Muhe we Baba yenu yakulonga mugati yenu. ²¹ “Ne imundugu yekumusongesa imunduguse uleke yakomigwe, ne baamunhu imwana, awana wekuwenukila awaweleke, na kuwakoma. ²² Nanye mukwenda musuligwe na wanhu wose kosoko ye disina dyangu, ninga iyakwenda yafinyilise mpaka kundumo noyakwenda yahone. ²³ Ninga fowakuwawinga mukaya ayino, mutijile kuyimonga; kosoko, chawelu nikumutamilani, musikumala sikaya sa Isilaeli, mpaka yeje Imwana we Munhu. ²⁴ “Imwifusa ghakumusuma imufusa wakwe, kahi imutumwa nghakumusuma iMundewa wakwe. ²⁵ Yagila imwifusa yowe fina imwalimu wakwe, mutumwa yowe fina imukulu wakwe. Nghonaga wamwinange imwenye nyumba Belisebuli, isikuwa lugano kuwaya awoile munyumba yakwe.” ²⁶ “Munghawogohe, kosoko kwa chaka mbuli ikifisile iyene isikwenda imanyike. ²⁷ Dyonikumutamilani mu chisa, dilongeni mu ujelu; na dyomukuhulika kuchifiso, mudihubili munyumba muchanhya. ²⁸ Munghawogohe awakukoma umutufi, wasikudaha kukoma ne chidoga; ibeka mumogohe ayuya iyakudaha kubana umutufi ne chidoga nacho mu jehanamu. ²⁹ Togoleni ifindebwa fili fisikuguligwa kwe sendi imwedu? Ninga hata chimwedu chisikugwa hasi Baba yenu yaleke kumanya; ³⁰ Ninga nyeye, hata si njwili sa mumatwi genu sitaligwa sose! ³¹ Munghogohe, ibeka nyeye kusuma findebwa itewa.” ³² “Ninga chila munhu yakwenda yanifumile kumwande ya wanhu, aniye nani nikwenda nimufumile kumwande ye iBabangu yowile kulanga. ³³ Ninga imunhu wowose yakwenda yanikane kumwande ya wanhu, ani nani nikwenda nimukane kumwande ye iBabangu yowile kulanga.” ³⁴ “Munghagambe fina nigala igoya muisi; ng’o! Sijile kwigala igoya, ninga ipanga. ³⁵ Kosoko nija kuwatemanula imunhu ne Babakwe, imwana we chike ne ing’ina, imukwemulima ne mukwewe. ³⁶ Awanghondo we munhu no waya wowile munyumba yakwe. ³⁷ Iyakwenda iBabakwe ne ing’ina kusuma niye, nghakunyendesa; kahi iyakwenda imwanagwe we chigosi ama wechike kusuma niye nghakunyendesa. ³⁸ Ninga imunhu inghakulonda umusalaba wakwe na kunyandamila, nghakunyendesa. ³⁹ Iyakuchona chidoga chakwe yakuchagilisa; ninga ayuya iyakwagilisa chidoga chakwe, kosoko yangu yakwenda yachone.” ⁴⁰ “Iyakuwahokelani nyeye yakunihokela niye, iyakunihokela niye, yakumuhokela ayuya iyanitumile. ⁴¹ Iyakumuhokela mugonesi kosoko ni mugonesi, yakwenda yapate digeleko dya mugonesi, naye iyakumuhokela imunhu we chawelu, kosoko ni munhu we chawelu, yakwenda yapate digeleko dye munhu wa chawelu. ⁴² Ne munhu wowose yakwenda yamunywise yumwedu wa awano awadodogi hata chinghowa chikombe cha meji gemheho, kosoko ni mwifusa, huwila, nikumutamilani, nghakwagililigwa na digeleko dyakwe ng’o.”

¹ Kamei Yesu yakamale kuwasigilila awefusa wakwe ikumi na weli, hoyoleuka kuluta kufusa na kuhubili kusikaya sawo. ² Yohana yakahulike ako kwigelesa sinhenda sa Kilisito, hoyotuma awefusa wakwe, wamuse, ³ “Agweye noyuya yakwija ama chimulangilile yungi?” ⁴ Yesu yabidula, na kuwagamba, “Luteni mukamutamile Yohana agene gomukuhulika, na gomukona: ⁵ awemudula wakona, ifiwete wakugenda, awena ukoma wakuhona, ifihuli wakuhulika, awafile wakwinuligwa, na awakiwa wakuhubiliigwa imbuli swanu. ⁶ Naye ibeka imunhu wowose yuya inghakunyona fina niha.” ⁷ Kamei awaya wakaleuke, Yesu yakonga kulonga na matewa simbuli sa Yohana, “Hamulawa kuluta kunyika kulanga choni? Chibago chikusingiswa ne imheho? ⁸ Ninga hamulawa kwijalanga choni? Munhu yafalile suke swamu lugano? Langa awanhu awakufala sisuke siswamu lugano, wowa musinyumba sa wandewa. ⁹ Ninga nhani mwalawile? Nikona mugonesi? Heye, nikumutamilani imukulu kusuma imugonesi, ¹⁰ langa, nikumutuma mutumigwa wangu, ‘Kumwande ye chihanga chako. Iyakwenda yagolose injila yako kumwande yako.’ ¹¹ Chawelu nikumutamilani, nghenati yoneke munhu mu fyeleko fya wanawake imukulu kusuma Yohana Mubatisaji; ninga imudodogi mu undewa wa kulanga no mukulu kusuma imwene. ¹² Kulawa ugele wa Yohana Mubatisaji mpaka hambiya undewa wa kulanga ukulondigwa kwa ludole, nawo awena ludole wakuwulonda. ¹³ Kosoko wagonesi wose na tolati watamila mpaka ugele wa Yohana. ¹⁴ Munghahananga kufumila, imwene no Eliya iyakwenda yeje. ¹⁵ Iyena singhutwi, yahulike! ¹⁶ “Ninga icheleko chino nochiliganisa na choni? Chikifana wana wekwikala kwisoko, wakuwenanga wayao wakugamba, ¹⁷ ‘Chiwatowela filimbi ninga musifinile! Chimba nyimbo so usungu kahi musililile!’ ¹⁸ Kosoko Yohana hakeja, nghakudiya kahi nghakunywa, wagamba Kena mhepo yuno! ¹⁹ iMwana we Munhu keja yakudiya na kunywa, wagamba, ‘Mulafi yuno, na mulefi, wo ugimbi mbwiya yawo awakonghosa kodi na wena uwihi!’ Ne imisungu imanyika fina ina chawelu kumilimo yakwe.” ²⁰ Hokakonga kusigombela sikaya siya sene soyagolose majumo mengi mugati yakwe, kosoko sisalambile. ²¹ “Usungu wako Kolasini! Usungu wako Betisaida! Kosoko amajumo agagolosigwe ukwenu nhanga gagolosigwe Tilo na Sidoni, howowa wakulamba katali na kufala magunia na kibaka difu. ²² Ninga nikumutamilani ikuwa ibeka Tilo na Sidoni kufinyilisa ditoso dyawo dijuwa dyo kuliganiswa kusuma nyeye! ²³ Agwe nagwe Kapelinaumu, togola! Kokwinuligwa mpaka kulanga? Ukwenda udulisigwe mpaka kusimu! Kosoko amajumo agagoloseke ukwako nhanga gagoloseke Sodoma, ikaya iyo nhanga inghali mpaka diyelo. ²⁴ Ninga nikumutamilani, ikwenda yuwe ibeka kwa Sodoma kufinyilisa uliganiso wakwe kusuma nyeye!” ²⁵ Ugele uwo Yesu hakabidula yakugamba, “Nikukulumba, Baba wo ulanga ne iisi, kosoko ye simbuli siso, hakuwafisa wene ubala na wena misungu, na kuwagubulila wana wadodogi. ²⁶ Heye, Baba, kosoko nofoyagile kumwande yako.” ²⁷ Hoyogamba, “Ninghigwa fyose ne Babangu; kahi hechaka iyamumanyile Imwana, ninga Baba; kahi hechaka yamumanyile Baba ninga Mwana, na wowose imwene iMwana woyakwenda kumugubulila. ²⁸ Mwije ukwangu, anye wose, mukwidasigwa na kusumigwa na makanda, aniye nikwenda niwabwihiseni. ²⁹ Faleni umugwato, mukifuse ukwangu; kosoko niye na muholo munhu we digoya dye chidoga, nanye mukwenda muwe na kubwihila mufidoga fyenu. ³⁰ Kosoko ulugwato lwangu lutelemeko, na dikanda dyangu ihufu.”

¹ Ugele uwo Yesu yendeyogenda mumigunda dijuwa dye sabato; awefusa wakwe howokona njala, howokonga kukwanyula masamhu, na kudiya. ² Amafalisayo wakone nheifo, howomugamba, “Langa, awefusa wako wakugolosa chinhu chene si chiswamu kugolosa dijuwa dye sabato!” ³ Hakawagamba, “Musasomile foyagolose Daudi, foyowile ne njala, imwene na wayagwe? ⁴ Ifyene foyengile munyumba ye Mulungu, na kudiya imikate ilafigwe kwa Mulungu, iyene si fiswanu imwene kudiya kahi awayagwe waya, ninga makuhani wemwene? ⁵ Kahi musisomile mutolati ifina awatambiki dijuwa dye sabato wakuibana isabato wanghowe na wihi? ⁶ Ninga nikumutamilani, ahano kabahano imukulu kusuma dihekalu. ⁷ Ninga nhanga mumanyile isoko ye simbuli sino, Nikuhananga ubasi, siyo igelo. Musowile mukuwagamba wabana awechaka wihi; ⁸ Kosoko Mwana we Munhu no Mukulu we sabato.” ⁹ Yaleuke uko, na kwingila mwisinagogi dyawo. ¹⁰ Langa, hamuwa na munhu iyena mukono uholole; weja wamusa, wakugamba, “Togola! Yagila kuhonya munhu dijuwa dye sabato?” Uleke wamusongese. ¹¹ Hakawagamba, “No yehoki mugati yenu imwene ingholo yakwe imwedu inghahubugila mwikolongo dijuwa dye sabato, nghakuikola na kuilafa? ¹² Togoleni! Imunhu si ibeka kusuma ingholo mikangha mingahi! Ninga ni fiswanu kugolosa amaswamu dijuwa dye sabato.” ¹³ Kamei yamugamba imunhu yuya, “Golola umukono wako.” Hakagolola, houhona, houkuwa mumi fina uyagwe wa keli. ¹⁴ Ninga awaya Mafalisayo, howolawa, howokuwa na mulundo kosoko yakwe, ifene fowakwenda wamukome. ¹⁵ Imwene Yesu yakagamanye ago, yaleuka uko; na wanhu itewa howomwandamila; hoyowahonya wose. ¹⁶ Hakawalemesa wanghamutamilise kuwanhu. ¹⁷ uleke iliganile imbuli yalongigwe ne mugonesi Isaya, yakugamba: ¹⁸ “Langa, imutumigwa wangu wonisagule, Mwendigwa wangu, umoyo wangu wendeswa naye. Nikuguma muhe wangu umwakwe, Yakwenda yawatamilise Amataifa uliganiso. ¹⁹ Nghakuwa na lukani kahi chowe, kahi imunhu nghakwenda yamuhulike munjila. ²⁰ Ichibwade chitulike nghakuchibena, kahi ichikoloboyi chikulawa umosi nghakuchisima, Mpaka hona yakwigala uliganiso usume. ²¹ Disina dyakwe Amataifa wakwenda wadihuwile.” ²² Ugele uwo hakegaliligwa munhu yena magini, mudula, kahi chibubu, yamuhonya, kamei yuyuya chibubu yalonga na kona. ²³ Matewa gose hagajuma, wakugamba, “Ayuno so mwana wa Daudi?” ²⁴ Mafalisayo wakahulike, hawagamba, “Ayuno nghakulafa simhepo chaka, ninga kwa Belisebuli mukulu we simhepo.” ²⁵ Kamei Yesu yakamanye fowakudoga, yawagamba, “Chila undewa ukigawile uwecho kwa uwecho, ukwenda ubanike; na kwachaka kaya iikitemanula iyenyecho ikudaha kwima. ²⁶ Na Luhoma yanghamulafa Luhoma, yakibanila imwecho kwa imwecho, undewa wakwe wokwima nhani? ²⁷ Nghona aniye nikulafa simhepo kwa Belisebuli, togoleni! Awana wenu wakumulafa kwa yehoki? Kosoko iyo awene nowakwenda wamuliganiseni! ²⁸ Ninga niye ghona nikulafa simhepo kwa Muhe wa Mulungu, undewa wo Mulungu ufulusa kumwijilani. ²⁹ “Ama kodaha nhani imunhu kwingila kunyumba ye munhu yena ludole na kufilonda ifinhu fyakwe, nghonaga nghakongile kumoha ayuya iyena uludole? Noholo yakonge kuhoka inyumba yakwe. ³⁰ Imunhu inghehamwedu naniye kachinyume naniye; ne imunhu inghekukunjagisa hamwedu na niye yakwanjasa. ³¹ Kosoko iyo nikuwagambani, chila wihi na chila mbuli yo kubesa wakwenda walekeleligwe wanhu, ninga kwa kumbesa Muhe Musunhile wasikulekeleligwa. ³² Naye munhu wowose yakwenda yalonge mbuli muchanhya yo mwana wa Munhu yakwenda yalekeleligwe. Ninga Imunhu wowose yakwenda yalonge mbuli muchanhya ya Muhe Musunhile nghakwenda yalekeleligwe muchilunga chino hambiya na achiya chikwija.” ³³ “Digoloseni dibiki dyuwe iswanu, na mamudyo gakwe maswanu; ama digoloseni dibiki dyuwe diha, na mamudyo gakwe geha; kosoko kwa mamudyo gakwe dibiki dikumanyika. ³⁴ Anyeye mu wana wa majoka, modaha nhani kulonga maswanu nghonaga mwihile? Kosoko umulomo we munhu ukulonga agamemile mu moyo wakwe. ³⁵ Munhu muswanu mu sigafu yakwe iswanu, yakulafa maswanu, na munhu yehile musigafu yakwe ihile yakulafa gehile. ³⁶ Hambiya, nikumutamilani, chila mbuli ye chibwalasi yowakulonga wanhu, wakwija wolafa nhaguso yakwe dijuwa dyo kuliganiswa. ³⁷ Kosoko kwa simbuli sako kotaligwa kuwa muswamu, na ku simbuli sako koliganiswa.” ³⁸ Baho awamonga, awatulumi na Mafalisayo howomubidula, wakugamba, “Mwalimu Chikuhananga kona chitangilo ukwako.” ³⁹ Hawabidula na kuwagamba, “Cheleko chihile na chechilanga, chikuhananga chitangilo? Wala chisikwinghigwa chitangilo, ninga ichitangilo che mugonesi Yona. ⁴⁰ Kosoko fina Yona foyejayowa majuwa madatu misi ne chilo mudida dye nyamungumi, nonheifo foikuwa iMwana we Munhu foyakwenda yowe majuwa madatu imisi ne chilo mu moyo we iisi. ⁴¹ Wanhu wa Ninawi wakwija wokwima dijuwa dyo uliganiso na wanhu we cheleko chino, nawo wakwenda wawaliganise fina wabana; kosoko awene hawalamba kwa mahubili ga Yona; na ahano kabaha imukulu kusuma Yona: ⁴² Imalikia wa kwikulu yakwenda yeme dijuwa dyo uliganiso hamwedu na wanhu we cheleko chino, naye yakwenda yawaliganise fina wabana; kosoko imwene yeja kulawa ulwandi lwe ndumo we chilunga uleke yahulike ubala wa Sulemani; na hano kabahano imukulu kusuma Sulemani.” ⁴³ “Imhepo ihile, foikulawa mwe munhu, ikugendela ahanhu hechaka meji, ikuhananga hanhu hakubwihila, inghaswela. ⁴⁴ Kamei, ikugamba, ‘Nikuya ukaya ukwangu konilawile,’ nghonaikwija, ikuifika yechaka munhu, ishagiligwa, na ihambigwa. ⁴⁵ Chimwande ikuluta ikalonda mhepo mufungate isihile kusuma iyene naso sokwingila na kwikala umo; na imunhu yuya inyuma yakwe ya ndumo ikuwa ihile kusuma aiya ya kunghonga. Nofo ikwenda yuwe kucheleko chino chihile.” ⁴⁶ Ugele woyalongage na matewa, langa, ing’ina na wanduguse hawowa wemile kunje, wakuhananga kulonga naye. ⁴⁷ Imunhu yumonga yamutamila, “Langa, ing’inako na wanduguso wowa kunje, wakuhananga kulonga nagwe.” ⁴⁸ Kabidula yekumugamba, “Ayuya yamwigalile imbuli, Ing’inangu nonani, na awandugusangu?” ⁴⁹ Hakawagololela umukono awefusa wakwe, yakugamba, “Langa, ing’inangu na wandugu sangu!” ⁵⁰ Kosoko wowose iyakwenda yagolose foyakwenda iBaba yowile kulanga, ayu no mundugu sangu, lumbu dyangu, ne ing’inangu.

¹ Dijuwa diya Yesu hoyoleuka ukaya, hoyokwikala hanghingi ye bahali. ² Howomwijila matewa mengi, hoyokwingila mumunhumbwi, hoyokwikala; agaya matewa gose hogokwima kunghingi ye bahali. ³ Hoyolonga nawo mbuli nyingi kwa mbasi, hoyogamba, “ “Langa, imuhandi yaluta kuhanda. ⁴ Kamei foyendeyonyaga, simbeyu simonga silagala habehi ne njila; ifidege hofikwija hofisidiya; ⁵ simonga hosilagala mwikangalawe, ahechaka ulongo mwingi; hosikota chimwande kosoko ulongo usingile hasi; ⁶ dijuwa dikalike hosilakala; na kosoko sichaka misisi hosinyala. ⁷ Simonga hosilagala ahena imiwa; imiwa iya hoikula, hoisikanhamisa; ⁸ Simonga hosilagala hena ulongo muswanu, hosikweleka, imonga, igana, makumi mutandatu, imonga makumi madatu. ⁹ Iyena singhutwi yahulike!” ¹⁰ Howokwija awefusa wakwe howomugamba, “Nhani ukulonga nawo kwa mbasi?” ¹¹ Yabidula, yekugamba, “Anyeye mumotesigwa kufimanya ififiso fyo undewa wa kulanga, ninga awene wasimotesigwe. ¹² Kosoko wowose iyena ichinhu, yakwenda yongeseligwe, naye yakwenda yamemesiligwe telele: Ninga ayuya iyechaka chinhu; hata achiya choyenacho yakwenda yahokigwe. ¹³ Kosoko iyo nikulonga nawo kwa mbasi; kosoko wanghalanga wasikona, na wanghategelesa wasikuhulika, kahi kumanya. ¹⁴ Imbuli ye mugonesi Isaya ikuliganiswa ukwawo, iikugamba: ‘Kuhulika mohulika, ninga musimanya; Kulanga molanga, ninga musikona. ¹⁵ Kosoko imimoyo ya wanhu wano igaluka misito, Na kusinghutwi sawo wasikuhulika fiswanu, Ameso gawo wafinya; Wangheje wokona kwa meso gawo, Howohulika kwa nghutwi sawo, Howomanya mumiyoyo yawo. Howobiduka honiwahonya.’ ¹⁶ Ninga ibeka ameso genu, kosoko gakona, ne singhutwi senu, kosoko sikuhulika. ¹⁷ Kosoko chawelu, nikumutamilani, wagonesi wengi na waswanhu hawenda kugona gomukona nyeye, ninga wasagonile, na wasagahulike gomukuhulika nyeye wanghagahulike.” ¹⁸ “Hulikiseni imbasi ye muhandi. ¹⁹ Chila munhu nghona yakuhulika imbuli ya undewa nghona nghakuimanya, yakwija ayuya iyehile, yakuidondola iihandigwe mumoyo wakwe. Ayo noyahandigwe habehi ne injila. ²⁰ Na yuya iyahandigwe mumakangalawe, no yuya yakuihulika imbuli yakuihokela kwa chinyemi; ²¹ ninga kusiyakwe kechaka misisi, yakugendelela chipisi chiguhi, inghalawanisa nyidaswa kosoko ye imbuli iyo, chimwande yakuileka. ²² Iyahandigwe hamiwa, no yuya iyakuhulika imbuli; kamei simbuli se chilunga, na udasi wo ugoli we chilunga, fikuikanhamisa imbuli iya; kamei isikweleka. ²³ Ayuya yahandigwe haulongo muswanu no yuya yakuhulika iyo imbuli, na kuimanya: Na chawelu yakweleka mamudyo na kulafa igana dimwedu, na makumi mutandatu, na imonga makumi madatu.” ²⁴ Hoyowalafila mbasi ingi, yakugamba, “Undewa wa kulanga uligana na munhu yahandile mbeyu swanu mumugunda wakwe: ²⁵ awanhu wakagone hakeja imunghondo wakwe na kuhanda mabago mugati ye ingano, na kuleuka. ²⁶ Hanyuma, ingano ikakule na kweleka, hogoneka na mabago gengi mugatigati ye ingano. ²⁷ Awatumwa wakwe imwenye kaya howoluta kumutamila, ‘Mundewa, nghwahandile mbeyu swanu mu mugunda wako; galawa hoki amabago?’ ²⁸ Hakowagamba, ‘Imunghondo noyagolose nhaifi!’ Awatumwa hawamugamba, ‘Ukuhananga chikagalunde hamwedu?’” ²⁹ Hakagamba, “Ng’o, Mungheje mung’ola mabago, na kung’ola ingano hamwedu nago. ³⁰ Filekeni fyose fikule fifike ku ugele wokududula; nikaniwatamila awakududula, Kongeni kugalunda amabago, madulu na kugasoma; ingano muyigale kukano yangu.” ³¹ Hakawalafila mbasi ingi: Yakugamba, “Undewa wa kulanga ukifana ne imhule ye haladali, imunhu yailonda, hoyoihanda mumugunda wakwe; ³² nayo ndodogi kusuma simbeyu sose; amba inghakula ikuwa nghulu kusuma mabiki gose, dikuwa ibiki ikulu fidege fya kulanga fikwija na kujenga mafulu gawo mumanhambi gakwe." ³³ Hoyowatamila mbasi ingi: “Undewa wa kulanga ukifana inungo yoyalondile imwanamuke, hoyoiguma mu simhishi ndatu so usage, kamei usage wose housasa.” ³⁴ Ago gose Yesu hoyowatamila amatewa kwa mbasi, ninga bila mbasi nghawatamile mbuli. ³⁵ Uleke iliganile imbuli iyalongwa ne mugonesi, iyagamba, “Nogubula umulomo wangu kwa mbasi; Nikugatambula agakifisile kulawa kunghonga.” ³⁶ Kamei Yesu yakawaleke amatewa, hoyokwingila munyumba; awefusa wakwe howomwijila, wakugamba, “Chibulile imbasi ya mabago ga mumugunda.” ³⁷ Hoyowabidula, hoyowagamba, “Iyakunyaga asiya simbeyu si swanu no Imwana we Munhu; ³⁸ umugunda uya no chilunga; simbeyu siswanu no wana wa undewa; agaya amabago no wana wa yuya yehile; ³⁹ ayuya imunghondo yahandile no Luhoma; kukududula no kuhela kwe chilunga, na waya awakududula no malaika. ⁴⁰ Kamei; fina mabago fogakulundigwa na kusomigwa mumoto; nofo ikwenda yuwe kukuhela kwe chilunga. ⁴¹ Imwana we Munhu yakwija yakutuma malaika wakwe, nawo wakwenda wawakonghole kulawa mu undewa wakwe wose awena uwihi, na wose awakugolosa gehile, ⁴² na kuwaguma mwililimba dyo umoto; kukwende kuwe chililo na kugwegwejula meno. ⁴³ Noho awanhu awaswamu wakwenda wake fina dijuwa mu undewa we Baba yawo. Yena singhutwi yahulike!” ⁴⁴ “Kahi undewa wa kulanga ukifana na ugoli ukifisile mumugunda; imunhu yakawone, hoyoufisa; na kwa chinyemi chakwe hoyoluta hoyolafa ifinhu fyakwe fyose hofiguligwa, kamei hoyogula umugunda uya.” ⁴⁵ “Kahi undewa wa kulanga ukifana munhu mwambasi iyekuhananga lulu swanu. ⁴⁶ Kamei yakone lulu imwedu ya iliho lugano, hakaluta na kulafa ifinhu fyakwe fyose figuligwe, hoyoigula.” ⁴⁷ “Kahi undewa wa kulanga ukifana ulwafu lugumigwe mubahali, kamei houkwega sisomba sa matalago gose. ⁴⁸ Lukameme, howolukwega kunje; howokwikala, howosagula si swanu howosiguma mufiya, isihile howositaga. ⁴⁹ Nofo ikaikuwa kukuhela kwe chilunga; malaika wakwenda walawanise na kuwabagula awehile na awaswanu, ⁵⁰ na kuwakubita mwililimba dyo umoto; kukwende kuwe chililo na kugwegwejula meno.” ⁵¹ Yesu hoyowosa, “Mugamanya agano gose?” Howomugamba, “Heye.” ⁵² Hoyogamba, “Ninga kosoko iyo chila mutulumi yena umanyi wa undewa wa kulanga, kakifana imunhu imwenyenyumba iyakulafa mufinhu fyakwe ifingi ifinhu fisha ne figono.” ⁵³ Kamei Yesu yakamale simbasi siso, hoyolawa, ⁵⁴ Yakafike kuiisi yakwe, hakawafusa mwisinagogi dyawo, howojuma, wakugamba, “Ayuno kapata hoki imisungu ino na amajumo gano? ⁵⁵ Ayuno si mwana we muselemala? Ing’ina si yuya yekwinangwa Maliamu? Na awandugusakwe si cha Yakobo, na Yusufu, na Simoni, na Yuda? ⁵⁶ Na walumbuse wose wasibaha ahetu? Hambiya yuno kapata hoki gose gano?” ⁵⁷ Hawamusula. Yesu hakawagamba, “Imugonesi nghakuswela chogoho, ninga kuisi yakwe imwecho na munyumba yakwe.” ⁵⁸ Kamei nghagolose majumo mengi makulu uko, kosoko yakuleka kuhuwila kwawo.

¹ Ugele uwo iMundewa Helode hoyohulika simbuli se Mundewa Yesu, yawatamila awatumishi wakwe, ² “Ayo no Yohana Mubatisaji kenuka mudifa, kosoko udaha ukugolosa milimo mugati yakwe.” ³ Kosoko Helode hakowa yamukolile Yohana, hoyomoha, hoyomuguma mwigelesa, kosoko ya Helodia imuke wa Filipo imunduguse. ⁴ Kosoko Yohana yamugamba, “Fina isinogele agweye kuwa naye.” ⁵ Naye yakahanange kumukoma, hakawogoha awanhu, kosoko hawamona Yohana fina mugonesi. ⁶ Dikafike dijuwa dye sikukuu yo kwelekwigwa kwakwe Helode, imwanagwe we chike wa Helodia hoyofina fiswanu kumwande ya wanhu, hoyomwendesa Helode, ⁷ hakamuhuisa kwa kilaha fina komwingha chochose cho yakuhananga. ⁸ Kwa kusongesigwa ne ing’ina, yagamba, “Ninghe bahano, mwisahani ditwi dya Yohana Mubatisaji!” ⁹ iMundewa, hakona usungu lugano, ninga kosoko ye nyilaha yakwe, na kosoko ya waya awowile naye hachakudiya, hakalagisa yenghigwe; ¹⁰ hakatuma munhu, howomudumula ditwi Yohana amuya mwigelesa. ¹¹ Ditwi dyakwe hadigaligwa mwibakuli, hoyokwinghigwa imwana yuya we chike; hoyodigala kwe ing’ina. ¹² Awefusa wakwe hawaluta, howolonda umutufi uya, howowika, muchilalo; kamei howoluta kumutamila Yesu. ¹³ Ninga Yesu yakahulike gago, hoyoleuka uko muchiya, hoyoluta hanhu hechaka wanhu, ye imwene chinyele. Amatewa wakahulike, howomwandamila kwa migulu kulawa mukaya sawo. ¹⁴ Yesu hoyolawa hoyokona, itewa ikulu dya wanhu, hoyowonela ubasi, hoyowahonya sinhamu sawo. ¹⁵ Ikafike hegulo, awefusa wakwe howamulutila, wokugamba, “Ahanhu hano nyika muhala, ne chigele chiloka, uwelage amatewa walute kusikaya wakakigulile fyakudiya.” ¹⁶ Yesu hoyowagamba, “Hechaka soko ya kuleuka, Wengheni nyeye chakudiya!” ¹⁷ Howomugamba, “Chichaka chinhu hano ila mikate mishano na somba mbili du.” ¹⁸ Hoyogamba, “Nigalileni hano.” ¹⁹ Hoyowalonga amatewa wekale mumbago: Hoyoilonda aiya imikate mishano na sisomba si mbili, hoyolanga kulanga, hoyoitasila mboto, hoyoibendula imikate iya, hoyowengha awefusa wakwe; awefusa howowengha amatewa. ²⁰ Howodiya wose howokwiguta; howodondola ifibesu fye mikate fisigale, fisege ikumi na fili fimemile. ²¹ Nawo awadiile hawowa wagosi figulu fishano, kuleka wanawake na wana wadodogi. ²² Chimwande hoyowadindilisa awefusa wakwe wengile muchiya, na kulongola kumwande yakwe kuloka umwambu ugele imwene yakilaga na amatewa. ²³ Kamei yakamale kilaga na matewa, hoyokwila kwitunda yemwene, kutasa. Ikafike hegulo, hakowa uko yewaimwene. ²⁴ Ne chiya chiya chifika muchiligati che bahali, chikwidasigwa lugano na meji gakujubajuba, kosoko imheho yende itowa muchiya kwa ludole. ²⁵ Kumalile kucha ninga kukali chilo, Yesu hoyowejila, yakugenda nemigulu mubahali. ²⁶ Awefusa wakwe wakamone yakugenda mubahali, howokogoha, howogamba, “Inyefu! Howotula chowe kosoko ya uwoga.” ²⁷ Chimwande Yesu hoyolonga, hoyowagamba, “Kiingheni moyo; No niye. Munghogohe.” ²⁸ Petulo hoyomubidula, yakugamba, “Mundewa, nghona nogweye, nilonge uleke nije ukwako mumeji muchanhya.” ²⁹ Hoyomugamba, “Wije!” Petulo hoyohumuluka muchiya, hoyogenda kwa migulu mumeji kumulutila Yesu. ³⁰ Ninga yakone imheho hoyokogoha; hoyokonga kudidimila, hoyotula chowe, “Mundewa, nihonye!” ³¹ Chimwandemwande Yesu hakagolola umukono wakwe, hakamukola, na kumugamba, “Agwe go we dihuwi dikefu! Nhani wowile na manhonge?” ³² Nawo wakengile muchiya, imheho hoiposika. ³³ Nawo awowile muchiya howomufugamila howogamba, “Chawelu agweye no umwana we Mulungu!” ³⁴ Wakafuluse kuloka, hawengila mu iisi ya Wagenesaleti. ³⁵ Na awanhu wa hanhu haya wakamutange, howotuma wanhu kuluta ku si iisi sose sisungulute hawamwigalila wose wowile ne sinhamu; ³⁶ nawo hawamutasa fina wakwafe du; dipindo dye isuke yakwe; na wose wakwafile howohona.

¹ Baho Mafalisayo na Watulumi kulawa Yelusalemu howomulutila Yesu na kugamba, ² “Nhani awefusa wako wakubana ijadi? Kosoko wasikunawa imikono nghona wakudiya chakudiya.” ³ Hoyowabidula yakuwagamba, “Nhani anye nanye mukubana imisigililo ye Mulungu kosoko ya ijadi yenu? ⁴ kosoko Mulungu yagamba, ‘Mogohe iBabako, ne ing’inako, na Iyakuliga iBabakwe, ama ing’ina, yakomigwe chelu.’ ⁵ Ninga anyeye mukugamba, ‘Iyakwenda yamulonge iBabakwe ama ing’ina, Chochose chiwagile kutasigwa kulawa ukwangu niye ni cha Mulungu. Kechaka soko ya kumogoha iBabakwe.’ ⁶ Kamei mukuibesa imbuli ye Mulungu kosoko ye ijadi yenu. ⁷ Anye mwina ichimwefe, ni fiswanu foyalongile mugonesi Isaya kosoko yenu, yekugamba, ⁸ ‘Awanhu wano wakunyogoha kwa milomo; Ninga imimoyo yawo ya hatali naniye. ⁹ Nawo wakufuga chaka, Wakufusa amafuso ge misigililo ya Wanhu.’” ¹⁰ Hoyowenanga matewa hoyowagamba, ¹¹ “Hulikiseni, mumanye! Siyo ichikwingila kumulomo ichikumuguma imunhu uwafu; nanga ichikumulawa kumulomo nochikumuguma imunhu uwafu.” ¹² Noho awefusa wakwe wamulutile wakugamba, “Kumanya fina Mafalisayo fowahulike imbuli iya hawasuha?” ¹³ Hakabidula, “Chila mbeyu iisihandigwe ne Babangu wa kulanga ikung’oligwa. ¹⁴ Walekeni! Awene ni filongosi mudula, wa mudula; na mudula yanghamulongosa imudula miyagwe, wakwenda wahubugile mwikolongo wose foniweli.” ¹⁵ Kamei Petulo hakabidula yakugamba, “Chitamile, imbasi iyo.” ¹⁶ Yesu hoyowagamba, “Hata nyeye nanye mwikali mwechaka misungu? ¹⁷ Munghati mumanye fina chila chikwingila kumulomo chikuloka kunda, na kuluta kutagigwa kucholo? ¹⁸ Ninga ifikulawa kumulomo fikulawa kumoyo; nofikumuguma imunhu uwafu. ¹⁹ Kosoko kumoyo kukulawa magelegela gehile, kukoma, dihabwa, uhiji, uhomelesi wa udasi, na maligo; ²⁰ ago nanga gekumwingha imunhu uwafu, ninga kukudiya na mikono isinawigwe kusikumwingha imunhu uwafu.” ²¹ Yesu yakaleuke uko hoyoluta ulwandi lwa Tilo na Sidoni. ²² Langa mwanamuke yumonga Mukananayo we simhaka sa kuya hoyomwijila, hoyokwinula dijwi, na kugamba, “Unyonele ubasi, Mundewa mwana wa Daudi. Mwanangu we chike, kekaliligwa lugano na simhepo.” ²³ Kahi Yesu nghamubidule mbuli. Awefusa wakwe howomulutila, howomutasa, wakugamba, “Muleke yaleuke, kosoko yakuchijojela kunyuma yetu.” ²⁴ Hakabidula, yekugamba, “Nhumigwa kusingholo sagilile du, se nyumba ya Isilaeli.” ²⁵ Naye hoyokwija hoyomufugamila hoyogamba, “Mundewa nitase!” ²⁶ Hakabidula yekugamba, “Siyo fiswanu kulonda ichakudiya cha wana na kugakubitila amabwa.” ²⁷ Hoyogamba, “Heye, Mundewa, ninga hata amabwa gakudiya chakudiya che sigafu ichikulagala musimesa se wandewa wawo.” ²⁸ Kamei Yesu hoyobidula yekugamba, “Mayi, dihuwi dyako ikulu.” Na yuwe ukwako fina fo ukuhananga. Imwanagwe we chike hoyohona kulawa ugele uwo. ²⁹ Yesu hakaleuka uko, na kufika ulwandi lwa bahali ya Galilaya; hoyokwila kwitunda, hoyokwikala hasi uko. ³⁰ Hawamulutila matewa wakumwigalila fiwete, fidula, fibubu, filema, na wamonga itewa hawaweka hamigulu yakwe; hoyowahonya; ³¹ Kamei amatewa howajuma, wakone fibubu wakulonga, filema wakuhona, fiwete wakugenda; na fidula wakona; howomutunya Mulungu wa Isilaeli. ³² Yesu hakawenanga wefusa wakwe hoyogamba, “Nikuwonela ubasi amatewa, kosoko gafika majuwa madatu wekala hamwedu na niye, kahi wechaka chinhu cho kudiya; kuwelaga wafungile sikwenda, wangheje wosilika munjila.” ³³ Awefusa wakwe howogamba, “Chopata hoki mikate ahano hanyika, yo kudigutisa ditewa dikulu fina dino?” ³⁴ Yesu hoyowosa, Mwina mikate mingahe? Howogamba, “Mufungate, Na fisomba fikefu.” ³⁵ Hoyowalagisa amatewa wekale hasi; ³⁶ hoyoilonda iya imikate mufungate ne fisomba fiya, hoyolumba, hoyoibendula, hoyowengha awefusa wakwe, awene nawo howowengha amatewa. ³⁷ Howodiya wose, howokwiguta, howodondola ifibendu fisigale fye mikate fisege mufungate, fimemile. ³⁸ Nawo awadiile hawowa wagosi figulu fine, leka wanawake na wana. ³⁹ Hoyowelaga amatewa, hoyokwila mu chiya, hoyoluta ulwandi lwa Magadani.

¹ Howomwijila Mafalisayo na Masadukayo, kumugesa, howomuhananga yawonese chitangilo chikulawa kulanga. ² Hoyobidula, hoyowagamba, “Hona ni hegulo, mukugamba, ‘Kukuwa kuswanu; kosoko ulanga mudunghu.’ ³ Na nhosikusiku, mukugamba, ‘Diyelo kukuwa mheho ya luputa; kosoko ulanga mudunghu, kahi kukudidima.’ Mumanya kutanga ulanga fowuwile; ninga, musikudaha kutanga ifitangilo fya ugele uno. ⁴ Cheleko chihile cha dihabwa chikuhananga chitangilo? Wala! Chisikwinghigwa chitangilo kusuma chiya cha Yona.” Hoyowaleka, hoyoleuka. ⁵ Nawo awefusa wakwe howoluta mpaka umwambu, howosimilwa kulonda mikate; ⁶ Yesu hoyowagamba, “Mukilangisise ne inungo ya Mafalisayo na Masadukayo.” ⁷ Howokonga kusimulila awecho kwa wecho, wakugamba, “Kosoko chisigale mikate.” ⁸ Ninga Yesu yakamanye, hoyowagamba, “Nhani mukuwanga nyenye kwa nyenye, anyeye we dihuwi dikefu, kosoko mwichaka mikate? ⁹ Mukali kumanya? Kahi musikugelegela aiya imikate imishano ku wanhu figulu fishano, homudondola fisege fingahi? ¹⁰ Na aiya mikate mufungate, na waya wanhu figulu fine, homudondola fisege fingahe? ¹¹ Yanhani musikumanya fina si kosoko ye mikate nimutamilani? Ninga mukilangisise na inungo ya Mafalisayo na Masadukayo.” ¹² Noho wamanyile fina nghalongile wakilangisise ne nungo ya mukate, ninga na mafuso ga Mafalisayo na Masadukayo. ¹³ Yesu yaluta ulwandi lwa Kaisalia-Filipi, hoyowosa awefusa wakwe yakugamba, “Awanhu wakugamba fina Imwana we Munhu no nani?” ¹⁴ Howogamba, “Wamonga wakugamba Yohana Mubatisaji, wamonga Eliya, wamonga Yelemia, nhagela yumwedu wa Wagonesi.” ¹⁵ Hoyowagamba, “Anyeye mukugamba niye no nani?” ¹⁶ Simoni Petulo hokabidula, “Agweye no Kilisito Imwana we Mulungu imumi.” ¹⁷ Yesu hoyobidula, hoyomugamba, “Ibeka gweye Simoni Bal-yona! Kosoko umutufi ne sakame fisikugubulile adino, ninga iBabangu iyowile kulanga.” ¹⁸ Nani nikukugamba, “Agweye no Petulo, na muchanhya ya diwe dino nikudijenga dikanisa dyangu; kahi imilango ya kusimu isikudisuma. ¹⁹ Nani nikukwingha gweye sifunguo sa undewa wa kulanga, dyodose dyoukuhinda hasi dihindigwe na kulanga, na dyodyose dyo ukukumula hasi hano, dikukumuligwa kulanga.” ²⁰ Kamei hoyowalemesa awefusa wakwe wanghamutamile munhu wowose fina imwene no Kilisito. ²¹ Kulawa ugele uwo Yesu hakakonga kuwatamila awefusa wakwe na kuwagamba ikuhanangigwa yalute Yelusalemu na kitang’anyila na masambasiko mengi, kulawa kuwasehe na Makuhani, na watulumi na kukomigwa na dijuwa dya kadatu kwinuligwa muchilalo. ²² Petulo hoyomulonda, hoyokonga kumugombela, yakugamba, “Mulungu yalegusile kutali Mundewa! Agano ganghakwijile ng’o.” ²³ Hakabiduka, na kumugombela Petulo, “Luta kunyuma yangu Shetani! Kwa chikwakwalisi ukwangu; kosoko nghukudoga aga Mulungu, ninga ge chimunhumunhu.” ²⁴ Ugele uwo Yesu yawatamila awefusa wakwe, “Munhu wowose iyakwenda kunyandamila, yakikane mwecho, yakitwike umusalaba wakwe, yanyandamile. ²⁵ Kosoko imunhu yakuhananga kuhonya chidoga chakwe kosoko yangu; yakuchagilisa, iyakwenda yagilise chidoga chakwe kosoko yangu, yakuchihonya. ²⁶ Imunhu kopata chinhu chaki yanghapata ichilunga chose, ninga yagilise ichidoga chakwe? Kahi munhu yakudaha kulafa choni ahanhu he chidoga chakwe? ²⁷ kosoko Mwana we Munhu yakwija mwitunyo dye Babakwe hamwedu na malaika wakwe; noho yakwenda yamulihe chila munhu kuligana na sinhenda sakwe. ²⁸ Chawelu nikumutamilani, hena wanhu wamonga wemile hano, awene wasikufa ugele wasinati wamone iMwana we Munhu yekwija mu undewa wakwe.”

¹ Gakaloke majuwa mutandatu, Yesu hakawalonda Petulo na Yakobo, na Yohana imunduguse, hoyowegala kwitunda kuchanhya wemwene; ² Hakabiduka ichihanga chakwe, kumwande yawo, ichihanga chakwe hachikonga kwakaika fina dijuwa. ³ Langa hawalawanisa Musa na Eliya, wakusimulila naye. ⁴ Petulo hakabidula yakumugamba Yesu, “Mundewa, nifiswamu chuwe bahano; unghenda nigolose fibanda fidatu, chimwedu chako gweye, chimonga cha Musa, na chimonga cha Eliya.” ⁵ Ugele yakulonga go, langa, difunde dijelu dyawagubika, kamei dijwi hodilawa mwifunde diya, dikugamba, “Ayuno no Mwanangu Mwendigwa wangu, wonikwendesigwa naye, mumutegelese imwene!” ⁶ Ninga awefusa wakwe wakahulike, hawogwa funama, na kogoha lugano. ⁷ Yesu hakawejila, na kuwakwafa, hoyowagamba, “Inukeni, kahi Munghogohe!” ⁸ Howokwinula ameso gawo, wosonile munhu ila Yesu yemwene. ⁹ Ugele foweja wadulikaga kulawa kwitunda, Yesu hoyowalagisa, hoyogamba, “Munghamutamile munhu wowose si mbuli sa gago gomonile mpaka Imwana we Munhu yenuke muchilalo.” ¹⁰ Awefusa wakwe howomusa, wakugamba, “Ninga nhani awatulumi wakugamba fina yakulongola Eliya?” ¹¹ Naye hoyobidula, yakuwagamba, “Eliya yakwija, Naye koliganisa gose, ¹² ninga nikumutamilani, fina Eliya kafulusa kwija, howoleka kumutanga, ninga howomugolosela gose gowendile kumugolosela. Nheifo Imwana we Munhu naye yakuluta kudumangiswa mumikono yawo.” ¹³ Noho awaya awefusa wamanyile fina yakulonga nawo simbuli sa Yohana Mubatisaji. ¹⁴ Kamei wakadifikile ditewa, munhu yumonga hoyomwijila, hoyomufugamila, yakugamba, ¹⁵ “Mundewa, umonele ubasi imwanangu! Kosoko kena chisilisi, na yakwidasigwa lugano, kosoko chila ugele yakugwa mumoto, na chila ugele mumeji. ¹⁶ Nimwigala kuwefusa wako, walemeligwa kumuhonya.” ¹⁷ Yesu hoyobidula hoyomugamba, “Anyeye cheleko chichaka dihuwi! Ichagilile, nokwikala hamwedu nanye mpaka milaki? Nimufinyiliseni mpaka milaki? Mwigaleni akuno ukwangu.” ¹⁸ Yesu hoyoigombela imhepo, nayo hoilawa; imwanike yuya hoyohona kulawa ichigele chicho. ¹⁹ Noho awaya awefusa wakwe howomulutila Yesu wemwene kwa chinyele howogamba, “Nhani seye chalemeligwe kuilafa?” ²⁰ Yesu hoyowagamba, “Kosoko yo ukefu we dihuwi dyenu, kosoko chawelu nikumutamilani, Munghowa na ihuwi idodogi kifana mhule ya haladali, modaha kudilonga ditunda dino, ‘Leuka hano ulute akuya,’ nadyo dikwenda dileuke. Kahi kusikuwa na mbuli iyene isikudahika ukwenu!” ²¹ Ninga ifanile ino isikulawa ila kwa kutasa na kufunga. ²² Nawo fowakitang’anyile Galilaya, Yesu hoyowagamba, “iMwana we Munhu yakagumigwa mumikono ya wanhu, ²³ nawo wakumukoma, na dijuwa dya kadatu yakwinuka muchilalo.” Howokuwa na usungu lugano. ²⁴ Kamei fowafikile Kapelinaumu, awaya awende wakonghosa ikodi ya nusu shekeli hawamulutila Petulo, wakugamba, “Togola! iMwalimu wenu yakuliha kodi?” Hakawagamba, “Heye.” ²⁵ Naye yakengile munyumba, “Yesu hakakonga kumusa.” Yakugamba, “Ukona nhani Simoni? Awandewa we chilunga chino wakulonda ikodi au maliho kuwanhu wenhani? Kuwana wawo ama wanhu wengi?” ²⁶ Naye yakagambe, “Kuwanhu wengi.” Yesu yagamba, “Nghona noneifo, basi awana wasikulafa. ²⁷ Chingheje chiwakwakwalisa, luta kubahali, ukagume induwano kamei ulonde isomba iya yowukwenda ukole kunghonga, unghagubula umulomo wakwe kokona shekeli, ilonde iyo ukawenghe, kosoko yako na kosoko yangu.”

¹ Ichigele chichiya awefusa wakwe howomulutila Yesu howogamba, “No nani imukulu mu undewa wa kulanga?” ² Hoyokwinanga imwana yumwedu, hoyomwika mugati yawo, ³ hoyowagamba, “Chawelu nikumutamilani munghaleka kubiduka na kuwa kifana fyana fidodogi, musikudaha kwingila ng’o mu undewa wa kulanga. ⁴ Hambiya wowose iyakihungusa imwecho fina imwana ayuno, ayo no mukulu mu undewa wa kulanga. ⁵ Na wowose yekwenda yamuhokele imwana yumwedu kifana yuno kosoko ye disina dyangu, yakunihokela niye.” ⁶ “Ninga iyakwenda yamwagilise yumwedu wa wadodogi wano awakunihuwila, iwagila yohigwe musingo ulwala na kutubugisigwa muchiligati che bahali. ⁷ Usungu we chilunga kosoko ya simbuli sokwagilisa! Kosoko gakwenda geje mabuli gakwagilisa; ninga usungu wakwe imunhu yuya iyakwigala simbuli sokwagilisa! ⁸ Hambiya umukono ama umugulu wako unghakugolosa ugolose wihi, udumule, uutage kutali nagwe! Ibeka kwingila mu undewa wa kulanga kuhungukiligwa mukono ama mugulu, kusuma kuwa na mikono mili na migulu mili, na kutagigwa kumoto wa majuwa gose. ⁹ Na digiso dyako dinghakugolosa ugolose wihi, ding’ole uditage kutali nagwe, ibeka kwingila ku undewa wa kulanga kwina igiso dimwedu, kusuma kuwa na meso meli na kutagigwa kumoto uusikusima.” ¹⁰ “Mulangisise munghamubese yumwedu wa awadodogi wano; kosoko nikumutamilani fina malaika wawo kulanga majuwa gose wakulanga ichihanga che Babangu yowile kulanga. ¹¹ Kosoko Mwana we Munhu keja yochihonya chagilile. ¹² Mukona nhani? Imunhu yanghowa na ngholo igana, imwedu inghagilila, togola! Nghakusileka siya makumi ikenda na ikenda, hoyoluta kwitunda, na kuihananga aiya yagilile? ¹³ Ninga yanghayona, chawelu, nikumutamilani, yakuisekelela aiya lugano kusuma asiya makumi ikenda na ikende isene si sagilile. ¹⁴ No nheifo isikwendesa kumwande ye Babangu yowile kulanga fina yumwedu wa awadodogi wano yagilile.” ¹⁵ “Ne munduguso yanghakugolosela wihi, luta ukamulolese, agweye ne imwene mwiwene, yanghakuhulika, kumupata imunduguso. ¹⁶ Ninga, nghona nghakuhulika, londa hamwedu nagwe munhu yumwedu ama weli uleke kwa milomo ya wahomelesi weli ama wadatu. ¹⁷ Yanghaleka kuwahulika awene, ditamile dikanisa; na yanghaleka kudihulikisa dikanisa nadyo, yowe ukwako kifana munhu wa mataifa na mukonghosa kodi.” ¹⁸ “Chawelu nikumutamilani: Gogose gomukoha muisi, gakohigwa na kulanga; na gogose gomukugadoholela muisi, gakudoholigwa na kulanga. ¹⁹ Kahi nikumutamilani: Weli wenu wanghakifumilisa mbuli yoyose muisi, imbuli yoyose yowakwenda watase, wakwenda wagoloseligwe ne Babangu yowile kulanga. ²⁰ Kosoko howowile weli ama wadatu wakitang’anyile kudisina dyangu, nani nabaho mugati yawo.” ²¹ Kahi Petulo hoyomulutila hoyomugamba, “Mundewa, mundugusangu yanigolosele uwihi kengahe nimulekele? Mpaka mikangha mufungate?” ²² Yesu hoyomugamba, “Sikukugamba mpaka mikangha mufungate, ninga mufungate mikangha makumi mufungate. ²³ Kosoko iyo undewa wa kulanga ukifana na Mundewa yumonga yahananga kutala si mali sakwe na watumwa wakwe. ²⁴ Yakakonge kuigolosa, hoyokwigaliligwa munhu iyakudaigwa talanda figulu ikumi. ²⁵ Naye yakaswele chokuliha, iMundewa hoyogamba yaguligwe, imwene, ne muke, na wanagwe, na finhu fyose foyenafyo, uleke dideni diya dilihigwe. ²⁶ Kamei imutumwa yuya, hakamufugamila yakugamba, ‘Mundewa nyonele ubasi, naniye nikwenda nikulihe fyose figima!’ ²⁷ iMundewa we mutumwa yuya yamonela ubasi, na kumudoholela, na kumulekelela dideni diya. ²⁸ Imutumwa yuya yakalawe yamona yumonga imiyagwe woyendeyomudayi dinali igana du, hakamukola, mwilaka, yakugamba Unilihe dideni dyangu dyonikukudai! ²⁹ Kamei imiyagwe hoyokugwa hamigulu yakwe, hoyomutasa, hoyogamba, ‘Nyonele ubasi, nani nokuliha!’ ³⁰ Ninga nghendile; hoyoluta, hoyomuguma muchifungo, mpaka yalihe dideni diya. ³¹ Kamei awayagwe wakone agagoloseke, howokalala lugano howoluta kumutamila iMundewa wawo gose gene gagoloseke. ³² Kamei iMundewa wakwe hoyomwinanga, hoyomugamba, ‘Agweye go mutumwa wihile! Nikulekelela di deni diya dyose, fowanitasile. ³³ Agwe nagwe isagile kumonela ubasi imiyago, fina niye fonikonele ubasi agweye.’ ³⁴ iMundewa wakwe hoyokona nyono, hoyomwigala kuwakusambasa wanhu, mpaka yalihe dideni diya dyose. ³⁵ Nofo iBaba wa kulanga yakwenda yamugoloseleni anyeye, munghaleka kuwalekelela kwa mimoyo yenu yose chila munhu ne munduguse.”

¹ Kamei Yesu yakamale simbuli siso, hoyoleuka Galilaya, hoyekwingila kusimhaka sa Uyahudi, umwambu wa Yolodani. ² Matewa makulu hogomwandamila, hoyowahonya uko. ³ Baho Amafalisayo howomulutila, howomugesa, howomugamba, “Togola fiswanu imunhu kumuleka imuke kosoko yoyose?” ⁴ Hoyobidula, hoyowagamba, “Musisomile fina yawombile kunghonga hakomba munhu mugosi na mwanamuke? ⁵ Hoyogamba, ‘Kosoko iyo imunhu yakumuleka iBabakwe ne ing’ina, yakiyandamile ne muke; na wano aweli wakuwa mutufi umwedu?’ ⁶ Awano si weli kahi, ninga mutufi umwedu woyahasile Mulungu, imunhu yanghawatemanule.” ⁷ Howomugamba, “Hayuwa nhani Musa hakalagisa kumwingha ibaluwa ya malekeni, na kumuleka?” ⁸ Hoyowagamba, “Musa kosoko ya ukugutu we fidoga fyenu, kafumila muwaleke awake senu; ninga kulawa kunghonga isowile nheifo. ⁹ Aniye nikumugambani anyeye, chila munhu iyakumuleka imuke, ninga kosoko ya dihabwa, hoyotola yungi, yekwingilila; ayuya naye iyekumutola yalekigwe naye kengilila.” ¹⁰ Awefusa wakwe howomugamba, “Nghonaga simbuli se munhu ne muke nofosuwile nheifo, isagile kutola.” ¹¹ Ninga imwene hoyowagamba, “Si wose wakudaha kuhokela imbuli ino, ninga awaya awakudahisigwa ne Mulungu. ¹² Hena wanhu awekigwe ne Mulungu wowe mhende kulawa muinda ya wang’ina sawo, wabaho watendigwe na wanhu wowe mhende, na wabaho wakitendile mhende kosoko ya undewa wa kulanga. Iyekudaha kuihokela imbuli ino leka yaihokele.” ¹³ Kamei hoyokwigaliligwa wana wadodogi uleke yawekile mikono yakwe muchanhya yawo na kuwatasila; awefusa wakwe howowagombela. ¹⁴ Ninga Yesu hoyogamba, “Walekeni wana wadodogi weje ukwangu; munghawalemese, kosoko awafanile wawo, undewa wa kulanga ni wawo.” ¹⁵ Hoyowekila mikono muchanhya yawo, hoyoleuka uko. ¹⁶ Langa, imunhu yumonga hakamulutila hoyomugamba, “Mwalimu, nigolose chinhu chaki chiswanu uleke niupate uumi wa majuwa gose?” ¹⁷ Hoyomugamba, “Nhani ukunyusa imbuli ya uswanu? Imuswanu yumwedu du. Ninga unghahananga kwingila kuumi, ugakole amalagiso.” ¹⁸ Kamugamba, “Agehoki?” Yesu hoyogamba, “Agano, Unghakome, Unghengilile, Unghahije, Unghamuhomelele miyago udasi. ¹⁹ Wogohe iBabako ne ing’inako; Mwende imiyago fina fowukiyenda gomwecho.” ²⁰ Imujelelo yuya hoyomugamba, “Ago gose nigakola nihungukiligwa na choni kahi?” ²¹ Yesu hoyomugamba, “Unghahananga uwe munhu yaliganile ulute ukambase ifinhu fyako fyose figuligwe, uwenghe awakiwa, kamei kokuwa na ugoli kulanga; kamei nyagula unyandamile.” ²² Imujelelo yuya yakahulike imbuli iyo, hoyoleuka na usungu, kosoko hakowa na finhu fingi. ²³ Yesu hoyowagamba awefusa wakwe: “Chawelu, nikuwatamilani, ikuwa fikugutu kwe imugoli kwingila ku undewa wa kulanga. ²⁴ Nikumutamilani kahi: Ni fihufu ingamia kwingila muchihengele che sing’ano, kusuma imugoli kwingila ku undewa we Mulungu.” ²⁵ Awefusa wakwe wakahulike, siso howojuma lugano, howogamba, “Ninga nani iyakudaha kuhona?” ²⁶ Yesu hoyowakumhulila ameso, yakugamba, “Kuwanhu adyo disikudahika. Ninga kwe Mulungu gose gakudahika.” ²⁷ Noho Petulo yabidula yakugamba, “Langa aseye chileka fyose chikwandamila, chopata choni?” ²⁸ Yesu hoyowagamba, “Chawelu, nikumutamilani, fina anyeye munyandamile niye, muchilunga ichisha, nghona yakayokwija Imwana we Munhu mu digoda dye ditunyo dyakwe, anye nanye mukwikala mumagoda ikumi na meli, mowaliganisa amakabila ikumi na meli ga Isilaeli. ²⁹ Na chila munhu iyalekile nyumba, ama munduguse wa chigosi, ama wachike, ama iBabakwe, ama ng’ina, ama wana, ama migunda, kosoko ya disina dyangu, yakwenda yahokele mikangha igana, na kuhala undewa wa majuwa gose. ³⁰ Ninga wengi awoile we nghonga; wakuwa we ndumo; na wendumo wakuwa we nghonga.”

¹ “Kosoko undewa wa kulanga ukifana na imwenyenyumba, yelawile nhosikusiku kuhananga walimisi wakagolose milimo kumugunda wakwe we misabibu. ² Naye hoyokifumilisa nawo kuwengha kwa ijuwa dinali imwedu, hoyowegala kumugunda we misabibu. ³ Hoyolawa kahi chigele cha saa tatu, hoyowona wamonga wemile hesoko wechaka milimo; ⁴ awene nawo hoyowagamba, ‘Luteni nanyeye kumugunda wangu we misabibu, na digelo dyenu nomwinghani. Howoluta.’ ⁵ Hoyoleuka kahi muchipisi cha saa mutandatu, na saa ikenda, hoyogolosa nheifiya. ⁶ Ikafike saa ikumi na imwe, hoyoleuka, hoyofika wamonga wemile, hoyowagamba, ‘Nhani nyeye mwimile hano imisi yose bila milimo?’ ⁷ Howomugamba, ‘Kosoko hachaka munhu yachinghile milimo.’ Hoyowagamba, ‘Luteni nanyeye kumugunda wangu we misabibu.’ ⁸ “Dikoswe, ayuya imwenye mugunda hoyomulonga imunyamhala wakwe, wenange awalimisi, uwalihe digelo dyawo, ukongele wakunyuma mpaka wa kunghonga.” ⁹ Wakeje awaya wa saa kumi na imwedu, howohokela chila munhu dinali. ¹⁰ Awaya wa kunghonga wakeje hawamanya fina wohokela nyingi kusuma waya; awene nawo howohokela chila munhu dinali. ¹¹ Wakamale kuhokela, howomukalalila imwenye nyumba, ¹² wakugamba, “Awano wa kunyuma wagolosa milimo saa imwedu du, nagwe kuwaliganisa na seye chifinyilise misi yose?” ¹³ “Hakamubidula yumwedu wawo, yamugamba, ‘Mbwiyangu, sikonele hata, sichilagane na niye kwa dinali. ¹⁴ Londa iyako uleuke, nikwenda kumwingha yuno wa kunyuma fina gweye. ¹⁵ Isinogele niye kugolosa neifyangu fina fonikwenda nimwecho? Ama digiso dyako digaluka diha kosoko yaniye kuwa muswanu?’ ¹⁶ No nheifo we ndumo wokuwa wa kunghonga, na wakunghonga wokuwa we ndumo.” ¹⁷ Baho Yesu yakowe yekugenda kuluta Yelusalemu, hoyowalonda awaya awefusa wakwe ikumi na weli we imwene; munjila hoyowagamba, ¹⁸ “Langisiseni! Chikukwila Yelusalemu, Imwana we Munhu yakwijagumigwa mumikono ya Makuhani na Watulumi, nawo wakwijamuliganisa yakomigwe; ¹⁹ Kamei wakumwigala kuwamataifa nawo uleke wamuseigile, kumutowa mikotya, na kumutungika; na dijuwa dya kadatu yakwinuka muchilalo.” ²⁰ Noho ing’ina yawo awana wa Sebedayo yamulutila hamwedu na wanagwe, yakumufugamila, na kumutasa mbuli. ²¹ Hoyomugamba, “Ukuhananga choni?” Hoyogamba, “Ulagise fina awanangu wano aweli wekale iyumonga umukono wako wo kulume, na iyumonga umukono wako wo kumoso, mu undewa wako.” ²² Yesu hoyobidula, hoyogamba, “Musimanyile dyomukutasa. Togoleni! Mukudaha kunywila ichikombe chonikunywila niye?” Howogamba, “Chikudaha.” ²³ Hoyowagamba, “Chawelu mokunywila ichikombe changu; ninga kwikala umukono wangu wo kulume na mukono wangu wo kumoso, nechaka udaha wa kuwengha, ninga wakwinghigwa wekiligwe ne Babangu.” ²⁴ Nawaya ikumi wakahulike howowasuhila awaya awandugu aweli. ²⁵ Ninga Yesu hoyowenanga, hoyowagamba, “Mumanya fina awakulu wa Mataifa wakuwalongosani kwa ludole, na wakulu wawo, wakonesa uludole lwawo ukwawo. ²⁶ Ninga isikuwa nhaifo ukwenu, ninga imunhu wowose yekuhananga kuwa mukulu ukwenu, na yowe mutumwa wenu; ²⁷ imunhu wowose yakuhananga kuwa wa kunghonga ukwenu, na yowe mutumwa wenu; ²⁸ fina imwana we Munhu fonghejile kutogomeligwa ninga kutogoma na kulafa uwumi wakwe uwe iliho dya wengi.” ²⁹ Wakowe wekulawa Yeliko, itewa ikulu hodiwandamila. ³⁰ Langa, mudula weli wekala hanghanda ye njila, nawo wakahulike fina Yesu yekuloka, hawekwinula majwi, wakugamba, “Uchonele ubasi, Uchonele ubasi, Mundewa, go Mwana wa Daudi!” ³¹ Amatewa howowagombela, wanyamale. Ninga awene howokongesa kwinula majwi, wekugamba, “Uchonele ubasi, Mundewa go Mwana wa Daudi!” ³² Yesu yeja yema, na kuwenanga, yakugamba, “Mukuhananga nimugoloseleni choni?” ³³ Hawamugamba, “Mundewa, chikuhananga ameso getu gagubuligwe.” ³⁴ Yesu yawonela ubasi, yawakwafa ameso gawo; baho ni baho howona, na kumwandamila.

¹ Kamei wakasegelele Yelusalemu, na kwija Betifage, muditunda dya Miseituni, noho Yesu yawatuma awefusa wakwe weli, yakuwagamba, ² “Luteni mpaka he chikaya chiya chi hamwande yenu, baho mokona dipunda dyohigwe hamwedu ne mwanagwe: Gadoholeni chimwande munigalile. ³ Na munhu yanghawosa mbuli, gambeni, ‘iMundewa yekugahananga,’ yakwenda yagowise chimwande.” ⁴ Aga gose galawanisa, uleke iliganile imbuli yalongigwe ne imugonesi yakugamba, ⁵ “Mutamileni Biti Sayuni, Langa iMundewa wako yakwija ukwako! Muholo, naye kakwila dipunda, Ne mwanagwe we dipunda, ichana che dipunda.” ⁶ Awaya awefusa wakwe howoleuka, howogolosa fina Yesu foyawatumile: ⁷ Howomwigalila dipunda ne mwanagwe, howokwika sisuke sawo muchanhya yawo, naye hoyokwikala muchanhya yakwe. ⁸ Amatewa makulu howotandalisa sisuke sawo mwibalabala, na wamonga howotema mahupi kulawa mumabiki na kugatandalisa mwibalabala. ⁹ Na amatewa agamulongolele na gamwandamile hogokwinula majwi “Hosana Mwana wa Daudi! Kamotesigwa ayuya iyakwija kudisina dye Mundewa! Hosana kuchanhya kulanga.” ¹⁰ Yakengile Yelusalemu, ikaya yose hoisingisika, wanhu wekugamba; Nani yuno? ¹¹ Amatewa howogamba, “Ayuno no yuya imugonesi, Yesu, wa Nasaleti ya Galilaya.” ¹² Yesu yengila kugati ye dihekalu dye Mulungu, na kuwawinga wose wende wokwambasa, na wende wogula mwihekalu, na kusibidula si mesa sa wendewobadilisha mapesa, na magoda gawo awende wakwambasa sinjiwa. ¹³ Hakawagamba, “Itulumigwa, ‘Inyumba yangu ikwinangwa nyumba ya kufugila.’ Amba nyeye muigolosa mhango ya wahiji.” ¹⁴ Ne midula, ne fiwete howomulutila umuya mwi hekalu, hakawahonya. ¹⁵ Ninga awakulu wa Makuhani na Watulumi, wakone majumo goyagolose, na wana wakwinula majwi gawo mwi hekalu, wakugamba, “Hosana, Mwana wa Daudi!” Hawasuha wakumugamba, ¹⁶ “Ukuhulika wanhu fowakulonga?” Yesu hakawagamba, “Heye, musinati musome kwa milomo ya wana wadodogi na wakongha kumemelesa ditunyo?” ¹⁷ Yakawaleke, hakalawa kunje ye kaya mpaka Betania, hakagona uko. ¹⁸ Ugele wa nhosikusiku foyoyage kwikaya, hakowa na njala. ¹⁹ Hakona musada hanghanda ye injila na kuulutila, hoyokona mwachaka chinhu ninga manyagala du. Kamei hoyogamba, “Ungheleke mamudyo. Kahi kulawa diyelo na majuwa gose.” Umusada hounyala baho ni baho. ²⁰ Awefusa wakwe wakone, howokisina, howogamba, “Yanhani umusada unyalile baho ni baho?” ²¹ iYesu yabidula, na kuwagamba, “Chawelu, nikumutamilani, Munghowa na ihuwi, munghaleka kuwa na manhonge, mukwenda mugolose si didyo du dyo mutini, ninga mu kudaha kudigamba ditunda dino ‘Ng’oka ukatagigwe kubahali,’ ikwenda igoloseke. ²² Na dyo dyose dyomukutasa mumawombi genu, munghahuwila, mukuhokela.” ²³ Kamei yakengile mwihekalu awakulu wa Makuhani, na wasehe wa wanhu, howomulutila ugele foyendeyofusa, howogamba, “Kwa udaha waki ukugolosa gano go ukugolosa? Naye nani yakwinghile udaha uwo?” ²⁴ Yesu hoyobidula hoyowagamba, “Aniye nani nikumusani mbuli imwedu, ninga munghabidula, nikwende nimutamileni kwa udaha wani nikugolosa gano. ²⁵ Ubatiso wa Yohana haulawa hoki? Haulawa kulanga ama ku wanhu?” Howokonga kuwa na lukani awecho kwa wecho, wakugamba, “Chinghagamba ulawa kulanga, yakwenda yachigambe, ‘Nhani musamuhuwile?’ ²⁶ Na chinghagamba, ‘Ulawa ku wanhu,’ chikogoha amatewa, kosoko awanhu wose wakumona Yohana fina ni mugonesi.” ²⁷ Howomubidula Yesu howogamba, “Chisimanyile.” Naye hoyowagamba, “Aniye nani sikumutamilani anyeye ni kwa udaha waki nikugolosa gano.” ²⁸ “Ninga, mukonanhani? Munhu yumonga hakowa na wana weli; kamulutila yuya we nghonga, hoyomugamba, ‘Mwanangu diyelo ulute ukagolose milimo kumugunda we misabibu.’ ²⁹ Hoyobidula na kugamba, ‘Nema!’ Ninga hanyuma hoyelamba na kuluta. ³⁰ Hoyomulutila ayuya iwakeli, hoyolonga naye nheifiya, naye hoyobidula hoyogamba, ‘Nikuluta Mundewa,’ ninga hoyoleka kuluta. ³¹ Togoleni! Mu wano aweli no yehoki yagolose foyakwenda iBabakwe?” Howogamba, “Ayuya we nghonga.” Kamei Yesu, hoyowagamba, “Chawelu, Nikumutamilani, awakonghosa kodi na wedihabwa wakwenda walongole kumwande yenu kukwingila ku undewa we Mulungu. ³² Kosoko Yohana hakeja ukwenu kwa njila ya chawelu, anyeye homuleka kumuhuwila; ninga awakonghosa kodi na wadihabwa howomuhuwila, anye hata fomonile, nheifo musalambile mumuhuwile.” ³³ Tegeleseni mbasi ingi, “Hakuwa na munhu imwenye nyumba, iyahandile mugunda wakwe we misabibu, hoyojengela ikigo, hoyokata ikolongo dyo kukamila si sabibu, hoyojenga ilingo, hoyokwika wanhu wo kugolosa milimo, hoyoluta nhambo. ³⁴ Ugele sisabibu sikakonge kuwa habehi na kwifa; hoyowatuma awatumwa kuwaya awakwimilisa mugunda, wahokele umudyo. ³⁵ Awaya awemilisi howowakola awatumwa wakwe, ayuno howomutowa, na yumonga howomukoma, yumonga howomutowa na mawe. ³⁶ Hakatuma kahi watumwa wengi kusuma awaya wa kunghonga, hawawatenda nheifiya. ³⁷ Kundumo hakamutuma imwanagwe ukwawo, yakugamba, ‘Wakwenda wamogohe imwanangu,’ ³⁸ Ninga awemilisi wakamone ayuya imwana hawalonga, awecho kwa wecho, ‘Ayuno no muhasi; handikoni chimukome! Kamei chilonde uhasi wakwe.’ ³⁹ Hawamukola, hawamulafa kunje yo mugunda we misabibu, howomukoma. ⁴⁰ Nghona yakwija ayuya imwenyemugunda we misabibu kowatenda nhani awemilisi?” ⁴¹ Howomugamba, “Yakwenda yawakome fibi awaya awemilisi wehile No umugunda we misabibu yakwenda yawenghe wemilisi wengi, awakwenda wamwinghe si sabibu ku ugele wakwe.” ⁴² Yesu hakawagamba, “Musinati musome mu matulumo? ‘Diwe dyowalemile awajengaji, Adyo digaluka diwe dikulu dye inghindiso!’ ⁴³ Kosoko iyo nikumutamilani, Undewa wa Mulungu, ukuleusigwa ukwenu, wakwenda wenghigwe ditaifa dingi idikweleka mamudyo gakwe. ⁴⁴ Naye yakwenda yogwe mudiwe didyo, yakudumuka fiponge ponge; na yuya imwene dikwende dimugwile dikumutiginha tiki tiki.” ⁴⁵ Awakulu wa Makuhani na Mafalisayo, wakahulike si mbasi sakwe, hawatanga fina yakuwalonga awene. ⁴⁶ Ninga fowahanangage kumukola, howokogoha amatewa, kosoko awene hawamona fina mugonesi.

¹ iYesu hakabidula, hakawatamila kahi kwa mbasi, yakugamba, ² “Undewa wa kulanga ukifana Mundewa yumonga, yamugolosela imwanagwe halusi. ³ Hoyowatuma awatumwa wakwe wawenange awaya awagonekigwe kwija kuhalusi; nawo howolema kwija, ⁴ Hoyotuma kahi watumwa wengi, yakugamba, ‘Watamileni awaya awagonekigwe, Langeni, nifulusa kugolosa ifyakudiya fyangu; sing’ombe sangu na finonile fifulusa kuchinjigwa, na fyose fifuluka, mwije kuhalusi.’ ⁵ Ninga hawona si chinhu, howoleuka, yumonga kaluta kumugunda wakwe: Yumonga kubiyashala yakwe, ⁶ awasigale howowakola awatumwa wakwe, howowatenda fibi na kuwakoma. ⁷ Kamei iMundewa yuya hoyosuha; hoyokwigala wasilikali wakwe we inghondo, howowakoma awakomaji waya na kuisoma ikaya yawo. ⁸ Kamei, hoyowagamba awatumwa wakwe, ‘Ugele we halusi ufika, ninga awaya awagonekigwe wasagiligwe. ⁹ Handikoni luteni kusinjila mhanda sa mabalabala, na wose womukona wenangeni weje kudikumbo.’ ¹⁰ Awatumwa waya hawalawa na kulata kusinjila singhulu, howowalonda wose wowawonile, awehile na waswanu; dikumbo dye halusi hadimema wageni. ¹¹ “Ninga foyengile iMundewa yuya kuwalanga awageni wakwe, hoyokona umuya munhu yumwedu yechaka suke ye halusi. ¹² Hakamugamba, ‘Mbwiyangu, kwingila nhani muno nagwe kwechaka suke ya halusi?’ Hoyonyamala twi. ¹³ iMundewa hoyowagamba awatumwa wakwe, ‘Moheni, imikono ne migulu, mulondeni mukamutage kuchisa cha kunje, no kukwenda kuwe chililo na kugwegwejula meno.’ ¹⁴ Kosoko wengi awakwinangigwa, amba wakusaguligwa wakefu.” ¹⁵ Noho Mafalisayo howoluta, howogolosa mulundo, uleke wamutege kwa simbuli sakwe. ¹⁶ Howotuma ukwakwe awefusa wawo hamwedu na Mahelodi, hawagamba, “Mwalimu, chimanya agweye kwa munhu wa chawelu ne injila ya Mulungu ukuifusa mu chawelu kahi nghukogoha ukulu we munhu wowose, kosoko nghukulanga sifuta sa wanhu. ¹⁷ Haya chitamile, Ukona nhani. Ni fiswanu kumwingha Kaisali kodi, ama si fiswanu?” ¹⁸ Ninga iYesu hakamanya uwihi wawo, hakagamba, “Nhani mukunigesa anyeye mwine ichimwefe? ¹⁹ Nyoneseni ifesa ye kodi!” Howomwigalila dinali. ²⁰ Hakawagamba, “Isanamu ino yani, ne anuwani ino?” ²¹ Howomugamba, “Ni ya Kaisali.” Hakawagamba, “Basi muliheni Kaisali age Kaisali, ne Mulungu age Mulungu.” ²² Wakahulike, hawajuma; hawamuleka, na kuleuka. ²³ Dijuwa didyo, Masadukayo, wanhu wakugamba kwichaka kwinuka awanhu wafile, howomulutila, howomusa, ²⁴ wakugamba, “Mwalimu, Musa yagamba fina, imunhu yanghafa, nghona nghalekile mwana, imunduguse yamutole imwigane yuya yowe muke, kosoko yamwelekele imunduguse cheleko. ²⁵ Hambiya, ukwetu hakuwa wandugu mufungate, iwenghonga hoyotola, hoyokufa, kosoko nghalekile mwana, hoyomulekela imunduguse imuke, ²⁶ Nheifo na wakeli naye, na wakadatu mpaka wose mufungate. ²⁷ Hanyuma ya wose ayuya mwanamuke naye hoyokufa. ²⁸ Dijuwa dye ndumo ye chilunga yakwenda yowe muke wa yehoki? Kosoko wose mufungate hawowa naye.” ²⁹ Yesu hoyobidula, hoyowagamba, “Mwagilila! Kosoko musimanyile matulumo kahi udaha we Mulungu. ³⁰ Kosoko ku ndumo ye chilunga wasikutola kahi wasikutoligwa, ninga wakuwa kifana malaika wa kulanga. ³¹ Kahi, imbuli ya wafile kwinuka, musisomile imbuli ilongigwe na Mulungu, yakugamba, ³² ‘Aniye na Mulungu wa Ibulahimu, na Mulungu wa Isaka, na Mulungu wa Yakobo.’ Si Mulungu wa wafile, ninga wa womi.” ³³ Na matewa wakahulike, howojuma kosoko ya mafuso gakwe. ³⁴ Na Amafalisayo wakahulike fina Yesu kawanyamasa Masadukayo, hawakitanganyila hamwedu. ³⁵ Yumwedu wawo, mulahi, hoyomusa, kwa kumugesa, ³⁶ “Mwalimu, Mu tolati ligasilo dikulu no dihoki?” ³⁷ Hakamugamba, “Umwende Mundewa Mulungu wako kwa umoyo wako wose, na chidoga chako chose, na misungu yako yose. ³⁸ Adino no dilagiso dikulu, kahi no dya kunghonga. ³⁹ Na dya keli dikifana na didino, nadyo no dino: ‘Umwende imiyago fina foukiyenda agweye gomwecho.’ ⁴⁰ Malagiso gose ga Musa na mafuso ga wagonesi gakwegamila mumalagiso agano ameli.” ⁴¹ Amafalisayo wakakitanganyile hamwedu, Yesu hoyowosa, yekuwagamba, ⁴² “Anyeye mukona nhani muchanhya ya Kilisito? Togoleni ni mwana wani? Howomubidula, wa Daudi.” ⁴³ Yesu hoyowagamba, “Ikudahika nhani fina kwa udaha wa Muhe Daudi yakumwinanga imwene Mundewa? Yekugamba, ⁴⁴ ‘Mundewa hoyomutamila Mundewa wangu, Ikala ukulume kwangu, mpaka niweke awanghondo wako hasi ye migulu yako.’ ⁴⁵ Daudi hona yakumwinanga Kilisito iMundewa, yakuwa nhani mwanagwe?” ⁴⁶ Hachaka munhu kahi yadahile kumubidula. Na kulawa dijuwa didyo hechaka yadahile kumusa iswali.

¹ Kamei Yesu hakawagamba amatewa na wefusa wakwe, fina, ² “Awatulumi na Mafalisayo wekala mwigoda dya Musa, ³ ninga, gose gawakumutamilani mugakole na kugagolosa, ninga kusinhenda sawo munghagolose; kosoko awene wakulonga ninga wasikugolosa. ⁴ Awene wakoha makanda masito na kuwatwika awanhu mu mayega gawo; awene awecho wasikwenda kugasegesa makanda gaya ne fidole fyawo. ⁵ Kahi sinhenda sawo sose wakugolosa uleke wonigwe na wanhu, wakufala mikanda mikulu ina simbuli sa Mulungu siandikigwe, wakugalamula amapindo ga makasu gawo. ⁶ Wakwenda amagoda ga kumwande mumajuwa ge sikukuu na kwikala kumwande mumasinagogi; ⁷ na kulamusigwa mumagulilo, na kwinangigwa na wanhu, ‘Labi’. ⁸ Ninga anyeye munghenangigwe ‘Labi’, kosoko iMwalimu wenu yumwedu anye wose mwa ndugu. ⁹ Munghamwinange munhu ‘Baba’, muchilunga, kosoko mwina Baba yenu yumwedu, iyowile kulanga. ¹⁰ Kahi munghenangigwe Filongosi, kosoko ichilongosi wenu yumwedu, imwene no Kilisito. ¹¹ Mukulu wenu yakuwa mutumwa wenu. ¹² Na wowose iyakiinula yakudulisigwa, na wowose iyekidulisa, yekukwisigwa.” ¹³ “Usungu wenu, watulumi na Mafalisayo! Mwine chimwefe! Kosoko mukuwa hindila awanhu undewa wa kulanga, anye muwecho musikwingila, na awaya awakuhananga kwingila musikuwaleka wengile! ¹⁴ Usungu wenu watulumi na Mafalisayo, mwine chimwefe! Kosoko mukudiya musinyumba sa wegane na kwa chimwefe mukutasa nhasa nhali; kosoko iyo mukupata uliganiso mukulu lugano. ¹⁵ Usungu wenu watulumi na Mafalisayo! Mwine chimwefe! Kosoko mukusunguluta kuisi na kubahali kumugolosa munhu yabiduke na kumwandamilani, kamei nomoyabiduke yakuwa mwana wa jehanumu mikangha mili kusuma anyeye muwecho. ¹⁶ “Usungu wenu mufilongosi mudula, anyeye mukugamba, imunhu yekilaha kwa dihekalu, siyo chinhu; ninga iyakilaha kwa sahabu ya kwi hekalu, kakiyoha. ¹⁷ Mubwalata nyeye! Kahi mwa mudula inghulu no ihoki, aiya hefugilo, ama adiya dihekalu idikuisunha hefugilo? ¹⁸ Kahi anyeye mukugamba imunhu yakilaha kwa mumasabahu si chinhu; ninga yanghakilaha kwa digelo duwile mu masabahu, yakiyoha. ¹⁹ Mwafidula nyeye! Kosoko inghulu no ihoki, adiya digelo, ama amafugilo agakusunha digelo? ²⁰ Basi ayuya yakilaha kwa mafugilo, yakilaha kwa iyo na kwa ifinhu fyose fuwile muchanhya yakwe; ²¹ naye iyakilaha kwa dihekalu, yakilaha kwa didyo, na kwa yuya iyakwikala mugati yakwe; ²² na iyakilaha kwa ulanga, yakilaha kudigoda dyo undewa we Mulungu, na kwa imwene iyakudikalila. ²³ “Usungu wenu watulumi na Mafalisayo! Mwine chimwefe! Kosoko mulafa filafywa fya munanaa, bisali na jila, ninga muleka simbuli singhulu se malagiso naso no usindamafu, ubasi, na dihuwi; ago iwagila kugagolosa, ninga gaya gamonga munghagaleke. ²⁴ Filongosi mudula mukuchuja ujuguni mukumesa ingamia! ²⁵ Usungu wenu watulumi na Mafalisayo! Mwine chimwefe! Kosoko mukusunha kunje ye fikombe na mabakuli kugati yakwe fimema uhiji na upujili. ²⁶ Agwe Gomufalisayo chidula! Yenda kusunha, kugati ye chikombe, ne sahani uleke kunje yakwe nako kuwe kuswanu! ²⁷ “Usungu wenu, watulumi na Mafalisayo, mwine chimwefe! Kosoko mukifana filalo fibakigwe swakaya, nafyo kunje fikoneka fiswanu, ninga kugati fimema maguha ga wanhu wafile na uwafu wose. ²⁸ No nheifo anye nanye, kwa kunje mukoneka fina wanhu waswanu, ninga kugati mumema chimwefe na wihi.” ²⁹ “Usungu wenu watulumi na Mafalisayo! Mwine chimwefe! Kosoko mukujengela ifilalo fya wagonesi na kuhamba ifilalo fya wanhu waswamu; ³⁰ mukugamba, ‘Nhanga aseye chowile uko ugele wa waBaba setu, chisowile chikihasa nawo musakame ya wagonesi.’ ³¹ Mukihomelela muwecho fina anyeye mwa wana wawo awawakomile awagonesi! ³² Chimemeleseni ichipimo cha wababasenu! ³³ Anyeye mumajoka, cheleko cha majoka! Moitija nhani iliganiswa kwa jehanumu? ³⁴ Kosoko iyo, mulangisise, aniye nikwigala ukwenu awagonesi na wena imisungu na watulumi; wamonga mukwende muwakome na kuwatungika, na wamonga mukwenda muwatowe mumasinagogi genu, na kuwawinga kulawa kaya mpaka kaya; ³⁵ kwa nheifo ikwija muchanhya yenu isakame yose ya wanhu waswanu iitike mu iisi, kukongela sakame ya Habili, ayuya iwechawelu mpaka isakame ya Sakalia imwanagwe wa Balakia, yomwakomile hagati gati ya ahasunhile na masabahu. ³⁶ Chawelu, nikumutamilani: Simbuli siso sose sikwenda sije muchanhya ye cheleko chino!” ³⁷ “Agwe Yelusalemu, Yelusalemu! Go ukukoma awagonesi, na kuwatowa na mawe awaya awatumigwe ukwako! Ni mikangha mingahi nihananga kukunyatila hamwedu awanago fina inghuku foikukunyagisa hamwedu ifyanagwe hasi ye mabawa gakwe, ninga musendile! ³⁸ Mulangisise, Inyumba yenu ikusimiligwa na kulekigwa. ³⁹ Kosoko nikumutamilani, Musikwenda munyone kahi kulawa hambiya, mpaka fomukwija mugamba, ‘Kamotesigwa iyakwija kwe disina dye Mundewa.’”

¹ Yesu hakaleuke, mwihekalu; awefusa wakwe hawamulutila, uleke wamonese amajengo ge dihekalu. ² Imwene hakawabidula, “Mukugona agano gose? Chawelu, nikumutamilani: Disikusigala ahano diwe muchanhya ye diwe idyene disikumoligwa.” ³ Hata foyeja yekala muditunda dya Miseituni, awefusa wakwe howomwijila kwa chinyele, wakugamba, “Chitamile simbuli sino sikuwa milaki. Ne chitangilo cho kwija kwako chikuwa choni, na indumo ye chilunga?” ⁴ Yesu yabidula, yakuwagamba, “Mulangisise imunhu yanghawadanhiliseni. ⁵ Kosoko wengi wakwenda weje kwi disina dyangu, wakugamba ‘Aniye no ni Kilisito!’ Nawo wakwenda wawadanhilise wengi. ⁶ Mohulika simbuli se singhondo; na fununu se singhondo; mulangisise, munghogohe; kosoko ago gakwenda galawanise; ninga indumo iyecho inghali. ⁷ Kosoko ditaifa dimwedu dikwinuka na dikitowa na ditaifa dingi; undewa kitowa na undewa; kukwenda kuwe na njala, na disingisi dye iisi kose kose. ⁸ Ago gose no nghonga ya usungu kifana wakweleka kwa mwanamuke. ⁹ “Ugele uwo wakwenda wamugumeni mu magayo, nawo womukomani, nanye mukuwa wanhu wasuligwe na wanhu wose kosoko ya disina dyangu. ¹⁰ Noho wengi wokuya kunyuma, kisongesa na kisula. ¹¹ Wagonesi wengi wa udasi wakwija walawanisa, na kuwadanhilisa wengi. ¹² Kosoko ya kongeseka uwihi, uwendo wa wanhu wengi ukwija uhola. ¹³ Ninga iyakufinyilisa mpaka kundumo, noyakwenda yahone. ¹⁴ Kahi imbuli iswanu ya undewa ikwija ihubiliigwa muchilunga yuwe uhomelesi ku mataifa gose; aho noho iya indumo ikwija.” ¹⁵ “Ugele womukamukona Disinhu dihile dya kubana, adiya dyalongigwe ne mugonesi Danyeli, dima ahanhu asunhile (iyakusoma yamanye). ¹⁶ Noho wowile Uyahudi watijile kumatunda, ¹⁷ na yowile ukano yanghahumuluke kulonda ifinhu fuwile munyumba yakwe, ¹⁸ yowile kumugunda yanghoye ukaya kulonda si suke sakwe; ¹⁹ Usungu wawo awena siinda na wakonghesa majuwa gago! ²⁰ Mutase uleke kutija kwenu kunghowe ichigele che imheho au dijuwa dye sabato! ²¹ Kosoko ugele uwo kukwija kukuwa lwidaso lugano, agene gasinati goneke gafanile gago kulawa kunghonga ye chilunga mpaka ugele uno, kahi isikwijaikuwa nheifo kahi. ²² Nhanga amajuwa gago woile gasahunguligwe, nghowile yakuhona munhu wowose yuya; ninga kosoko ya wasaguligwe majuwa ago gohunguligwa. ²³ “Ugele uwo imunhu yanghawagamba, ‘Langa Kilisito! Kowa hano’, ama ‘kowa kuya’, munghahuwile. ²⁴ Kosoko gakwenda galawanise Makilisito ga udasi, na wagonesi wa udasi, wogolosa fitangilo fingi na majumo; wawagilise, inghadahika du hata waya awasaguligwe. ²⁵ Langa! Nifulusa kumutamilani gasinati galawanise. ²⁶ Waghamugambani, ‘Langa kowa kunyika!’ Munghaleuke; ‘kowa kumabuha ga kugati!’ Munghahuwile. ²⁷ Kosoko fina ulumwemwe foukoneka kulawa kundawilo ye dijuwa mpaka kukuswila dijuwa, nofo kukwenda kuwe kukwija kwakwe Imwana we Munhu. ²⁸ Hena umufimba noho sikitanganyila si numba.” ²⁹ “Chimwande, kulawa kwidasigwa kwa majuwa gago, dijuwa dikugumigwa chisa, umwesi nawo usikwijalafa ujelu wakwe, na sinyelesi sikwija silagala kulawa kulanga, uludole lwa kulanga losingisika, ³⁰ Noho chikwija chikoneka ichitangilo chakwe iMwana we Munhu kulanga; noho amataifa gose ge chilunga gakwija golila, wekwija wamona iMwana we Munhu yakwija mumafunde ga kulanga na ludole na ditunyo ikulu. ³¹ Yakwija yowatuma malaika wakwe ne dijwi dikulu dyo lwinango nawo wakwenda wawakonghole awasagulwe kulawa si sandi sose ine, we digunda kulawa ulwandi luno lwe ndumo yo ulanga mpaka ulwandi luya lwe indumo yo ulanga.” ³² “Kwibiki dyo mutini mukifuse imbasi; manhambi gakwe ganghalafa na kusanhula manyagala, mukutanga fina ugele we dibahu wahabehi; ³³ anye nanye nhaifo, fomukugona ago gose, mutange fina kahabehi, hamulango. ³⁴ Chawelu, nikuwatamilani, Icheleko chino chisikuloka, mpaka ago gose gamemelesigwe. ³⁵ Ulanga ne chilunga fikuloka; ninga simbuli sangu sisikuloka ng’o.” ³⁶ “Ninga dijuwa diya na ugele uya hechaka iyamanyile, kahimalaika wowile kulanga, kahiiMwana; ninga iBaba yemwene. ³⁷ Kosoko fina mumajuwa ga Nuhu nofo kukuwa kukwija kwakwe iMwana we Munhu. ³⁸ Kosoko fina amajuwa gaya Difaluko foduwile dikali, awanhu fowendawodiya, na kunywa, wakutola na kutoligwa, mpaka dijuwa diya doyengila Nuhu musafina; ³⁹ wasamanyile mpaka Digalika fodejile, hodiwalonda wose, nofo kukwenda kuwe kwakwe iMwana we Munhu. ⁴⁰ Ugele uwo wanhu weli wokuwa kumugunda; yumonga yakulondigwa, yumonga yekulekigwa; ⁴¹ wanawake weli wakuwa wakusaga: Yumonga yakulondigwa, yumonga yakusigala. ⁴² Mwikale meso; kosoko musimanyile dijuwa dihoki dyo yakayokwija Mundewa wenu. ⁴³ “Ninga mumanye imbuli ino; imwenyenyumba nhanga yamanyile dijuwa dyo yakwija imuhiji, nhanga yekale meso, nghowile yakuleka inyumba yakwe ibenigwe. ⁴⁴ Kosoko iyo anye nanye, ikaleni meso, kosoko isaa yo musimanyile Mwana we Munhu yakwija.” ⁴⁵ “No nani imutumwa, yekuhuwiligwa, na yene misungu. Imwene yalekeligwe ne Mundewa wakwe inyumba yakwe, yawenghe wanhu ichakudiya ku ugele wakwe? ⁴⁶ Ibeka imutumwa yuya imwene, iMundewa wakwe foyakwija yamufike yakugolosa nheifo. ⁴⁷ Chawelu, kumutamilani, yakwenda yamwike kulangisisa ifinhu fyakwe fyose. ⁴⁸ Ninga imutumwa yuya yehile yanghagamba mu moyo wakwe, ‘iMundewa yekuchelewa,’ ⁴⁹ yanghakonga kuwatowa wayagwe na kudiya na kunywa hamwedu na walefi. ⁵⁰ iMundewa wakwe imutumwa yuya yakayakwija dijuwa dyonghamanyile na isaa yonghamanyile. ⁵¹ Yakumudumula mahindi meli, na kumwika hamwedu na wechimwefe, no kokuwa chililo na kugwegwejula meno.”

¹ “Noho undewa wa kulanga ukwija uliganiswa na wali ikumi, awalonda sitaa sawo, howolawa kuluta kumuhokela bwana halusi. ² Washano wawo howokuwa wabwalasi, na washano wena misungu. ³ Awaya awabwalasi howolonda sitaa sawo, howoleka kulonda na mafuta; ⁴ ninga awaya awene misungu howolonda sitaa sawo na mafuta gasigafu mufiya fyawo. ⁵ Kamei ibwana halusi yakachelewe kwija, wose howasisila howogona. ⁶ Ninga muchilo gati, hokuwa na chowe, ‘Handikoni, ibwana halusi keja mumuhokele!’ ⁷ “Chimwande, hawaleuka, awali waya wose na kugolosa sitaa sawo. ⁸ Awaya awabwalasi howowalonga awene misungu, ‘Chingheni amafuta genu makefu du, kosoko sitaa setu sikusima.’ ⁹ Ninga waya wene misungu hawawabidula wakugamba, ‘Kaa, gasikuchenela aseye na nyeye; ibeka mulute kumaduka, mukagule.’ ¹⁰ Ugele awaya wakalute kukugula; ibwana halusi keja. Awaya awowile baho howokwingila hamwedu naye kuhalusi, umulango howuhindigwa. ¹¹ “Howokwija awamonga waya, wakugamba, ‘Mundewa, Mundewa! Chikumulile!’ ¹² Hakawabidula, yakuwagamba, ‘Chawelu, nikumutamilani, siwamanyileni nyeye.’ ¹³ Mwikale meso, kosoko musimanyile dijuwa kahi ugele.” ¹⁴ “Kosoko ikifana imunhu yakuluta kunhambo, hakawenanga awatumwa wakwe, hakeka isawo yakwe ukwawo. ¹⁵ Hakamwingha yumonga talanda shano, yumonga talanda mbili, yumonga talanda imwedu; chila yumwedu kaliganiswa ifene fyo yakudaha, kamei hakaluta. ¹⁶ Chimwande ayuya yenghigwe talanda shano, hakaluta kwambasa na si talanda siya, na kupata talanda singi shano. ¹⁷ Nheifo ayuya naye we simbili, naye hakapata talanda singi mbili. ¹⁸ Ninga ayuya yahokele talanda imwedu, hakaluta na kufukula hasi, na kufisa italanda ye Mundewa wakwe. ¹⁹ “Gakaloke majuwa mengi hakeja, iMundewa wa watumwa waya, hakatala ifesa iya hamwedu nawo. ²⁰ Yakeje ayuya yahokele talanda shano, na kwigala talanda singi shano, hakagamba, ‘Mundewa hakwika ukwangu talanda shano, Langa nipata talanda singi shano.’ ²¹ iMundewa wakwe hakamugamba, ‘Fiswamu, mutumwa muswamu, na wakuhuwilwa! Hakuhuwiligwa kwa makefu, nikwenda nikwike muchanhya ya mengi. Ingila mu chinyemi che Mundewa wako!’ ²² “Hakeja ayuya iyahokela sitalanda mbili, hakagamba, ‘Mundewa, hakwika ukwangu talanda mbili. Langa nipata talanda singi mbili.’ ²³ iMundewa wakwe hakamugamba, ‘Fiswamu, mutumwa muswamu na wakuhuwilwa! Hakuhuwiligwa kwa makefu, nikukwika muchanhya ya mengi. Ingila mu chinyemi che Mundewa wako!’ ²⁴ “Kamei hakeja na ayuya iyahokele italanda imwedu, hakagamba, ‘Mundewa, hanimanya agweye kwa munhu mukugutu; ukugola honghuhandile, ukulunda honghwanjase. ²⁵ Kamei hanyogoha, haniluta na kufisa italanda yako musanga. Langa! Aino no iiya iyako.’ ²⁶ “Mundewa wakwe yabidula, yakumugamba, ‘Agwe kwa mutumwa wihile na mudoba! Hakumanya fina nikugola hosihandile, nikulunda, hosanjase; ²⁷ Haikwagila kwikisa isawo yangu ku wakwambasa na kulafa nyongesa, nani fonikwija nipate iyangu ne nyongesa yakwe. ²⁸ Muhokeni italanda iyo, mwingheni ayuya iyenaso ikumi. ²⁹ Kosoko chila iyena chinhu yekwinghigwa, na kongesigwa telele; ninga iyechaka, hata achiya cho yenacho yakuhokigwa. ³⁰ Na imutumwa yuya yehile, mumutage kutali ku chisa cha kunje, no kukuwa chililo na kugwegwejula meno.’” ³¹ “Nghona yakwija iMwana we Munhu mu ditunyo dyakwe, hamwedu na malaika wasunhile wose, noho yekwikala mwigoda dyakwe dya ditunyo dya undewa wakwe; ³² kumwande yakwe wakwenda wakitang’anyile awanhu wa mataifa gose, naye yakwenda yawabagule fina imudimi foyakubagula singholo na simhene; ³³ yakusika singholo umukono wakwe wo kulume na simhene umukono wakwe wo kumoso. ³⁴ Kamei Mundewa yakuwagamba awaya awowile kumukono wakwe wokulume; ‘Wijeni, anyeye mulugutiswe ne Babangu! Muhale undewa womwikiligwe kulawa kukumbigwa kwe chilunga; ³⁵ kosoko hanuwa na njala, homuningha chakudiya, hanuwa na nghilu homunigha meji go kunywa; hanuwa mugeni, hamunihokela. ³⁶ Hanuwa mwasi; hamunifasa, hanuwa mutamu; hamwija munilanga, hanuwa kuchifungo; homunijila.’ ³⁷ “Noho awanhu waswamu, womubidula, ‘Mundewa, milaki fochakonile kwina njala, hochikwingha chakudiya, ama kwina nghilu hochikwingha meji? ³⁸ Kahi milaki fochakonile kwa mugeni, hochikukalibisha, ama kwa mwasi hochikufasa? ³⁹ na kahi milaki chakonile umutamu, kahi kwa muchifungo, hochikwijila?’ ⁴⁰ iMundewa yakuwabidula yekuwagamba, ‘Chawelu, nikumutamilani, ifyene fyomumugolosele yumwedu wa wano awandugusangu awadodogi, munigolosela niye.’ ⁴¹ “Kamei yakuwalonga awaya awowile umukono wakwe wo kumoso, ‘Leukeni ukwangu, muligitiswe, mulute ku umoto wa majuwa gose! Woyafuluse kwikiligwa iLuhoma na malaika wakwe; ⁴² kosoko hanuwa na njala, musaninghile chakudiya; hanuwa na nghilu; musaninghile meji; ⁴³ hanuwa mugeni; musanihokele, hanuwa mwasi; musanifasile, hanuwa mutamu na muchifungo; musejile kunilanga.’ ⁴⁴ “Kamei nawo wakubidula, wakugamba, ‘Mundewa milaki, fochakonile agweye kwina njala kahe kwina nghilu, kahe kwa mugeni, kahe kwa mwasi, kahe kwa mutamu, kahe kwa muchifungo, hochileka kukutogomela?’ ⁴⁵ Yakwenda yawabidule, yekugamba, ‘Chawelu nikuwatamilani, ifyene fo musimugolosele yumwedu wa awa awadodogi, musinigolosele niye.’ ⁴⁶ Kamei awo nawo wakwenda walute kwingila mu usungu wa majuwa gose; ninga awanhu waswamu wakuluta ku wumi wa majuwa gose.”

¹ Yesu yakamale kulonga simbuli siso sose, hoyowagamba awefusa wakwe, ² “Mumanya fina fogakuloka majuwa meli ikuwa Pasaka, ne Mwana we Munhu yakwenda yasongesigwe na kukomigwa kwa kutungikigwa mwibiki.” ³ Ugele uwo awakulu wa makuhani na wasehe wa wanhu, weja wakitang’anyila mudijumba dye Kuhani Mukulu, iyenangagwa Kayafa; ⁴ Wagolosa masimulisi hamwedu ifene fowakudaha kumukola Yesu kwa chimwefe na kumukoma. ⁵ Ninga howogamba, “Unghowe ugele we sikukuu, ungheje ulawanisa mugogolo ku wanhu.” ⁶ Imwene Yesu hoyokuwa Betania munyumba ya Simoni mukoma, ⁷ mwanamuke yene chichupa cha mafuta ga malihamu, ga diliho ikulu lugano hakamusegelela na kumwitilila mwitwi dyakwe ugele yekale hachakudiya. ⁸ Awefusa wakwe wakone nhaifo, howosuha, howogamba, “Hasala yaki ino? ⁹ Kosoko amafuta gano hagowa gakudaha kuguligwa kwa mapesa mengi howogawiligwa awakiwa.” ¹⁰ Yesu yakamanye, hoyowagamba, “Nhani mukumwidasa imwanamuke? Kosoko kanigolosela chinhu chiswanu. ¹¹ Kosoko majuwa gose awakiwa mwinawo hamwedu nanye, ninga niye si hamwedu nanye majuwa gose. ¹² Kosoko kwa kunyitilila umutufi wangu amafuta gano, kagolosa nhaifo kosoko ya kutandila amasiko gangu. ¹³ Chawelu, nimukuwatamilani, chila ahakuhubiliigwa imbuli iswamu muchilunga chose, ichinhu chino choyagolose chotambuligwa, kosoko ya kumugelegela.” ¹⁴ Ugele uwo iyumonga wa waya ikumi na weli, disina dyakwe Yuda Isikalioti, hakawalutila awakulu wa makuhani, ¹⁵ hakagamba Moningha choni, ninghamulafa ukwenu? Howomuliha fipande makumi madatu fya fesa. ¹⁶ Kulawa ugele uwo yende yohananga luneka lwa kumusongesa. ¹⁷ Dijuwa dya kukonga dye mikate isigumigwe nungo, awefusa wakwe hawamulutila Mundewa Yesu, na kumugamba, “Ukuhananga chigolose hoki uleke ukadiile iPasaka?” ¹⁸ Hakagamba, “Luteni ukaya kwa munhu yumonga, Mukamugambe: ‘Mwalimu yekugamba; ugele wangu wahabehi; ukwako nikuhananga nigolose iPasaka hamwedu na wefusa wangu.’” ¹⁹ Awefusa hawagolosa fina Yesu foyawasigilile kamei hawaitandila iPasaka. ²⁰ Ikowe hegulo hakekala hachakudiya hamwedu na waya wefusa wakwe ikumi na weli. ²¹ Fowendewodiya, hakagamba, “Chawelu nikumutamilani, Yumwedu wenu yakunisongesa.” ²² Hawakona usungu lugano, hawakonga kiyusa yumwe yumwe, “No niye, Mundewa?” ²³ Hakabidula yakugamba, “Iyengise umukono wakwe mwibakuli hamwedu na uwangu, noyakwenda yanisongese. ²⁴ Imwana we Munhu yakuluta ifene foyaandikiigwe, ninga usungu wakwe imunhu yuya imwene yekumusongesa imwana wa Munhu! Hayuwa ibeka kwe munhu yuyo yowile nghelekigwe!” ²⁵ Yuda ayuya imwene yekumusongesa, hoyobidula, “Togola no niye, Mundewa? Hoyomugamba Agweye kuilonga.” ²⁶ Ugele fowadiyage, Yesu hakalonda mukate, hakaulugutisa, hakaubendula, hakawengha awefusa wakwe, yakugamba, “Londeni mudiye, auno no mutufi wangu.” ²⁷ Hakalonda ichikombe, hakalumba, na kuwengha, yakugamba, “Munywile mose muchichino. ²⁸ Kosoko aino no sakame yangu ya dilagano iikwitika, kosoko ya wengi kuwaleusila uwihi. ²⁹ Ninga nikumutamilani, sikunywa kahi kulawa hambiya difai aino ikulawa mumisabibu, mpaka fonikanikunywa aiya inyisha hamwedu nanye, mu undewa we Babangu.” ³⁰ Kamei wakamale kwimba lwimbo, hawalawa kunje, hawaluta kwitunda dya Miseituni. ³¹ Noho Yesu hoyowagamba, “Anye mose motija kosoko yangu ichilo chino cha diyelo,” kosoko iandikigwa, “Nikumutowa imudimi, ditewa dye singholo, dyokiyagala. ³² Ninga, fonikwinuka kulawa mu difa, nowalongolela kuluta Galilaya.” ³³ Petulo hakagamba, “Wose wanghatija kosoko yako, aniye sikutija ng’o!” ³⁴ Yesu hakamugamba, “Huwila, nikukutamila agweye, ugele dijogolo disinati dike, ukuwa unikanile, kadatu. ³⁵ Petulo, hoyomugamba, ‘Inghanyagila kufa nagwe, sikukukana ng’o!’ Awefusa wamonga nawo howolonga nheifo.” ³⁶ Yesu hakaluta hamwedu nawo mpaka ahanhu henangagwe Getisemane, hakawagamba awefusa wakwe, “Ikaleni baha, ani nilute kuya nikatase.” ³⁷ Hakamulonda Petulo na awaya awana aweli wa Sebedayo, howokonga kuwa na usungu na kwidasika. ³⁸ Hakagamba, “Nina usungu lugano, kifana kufa. Ikaleni hano, muwe meso hamwedu naniye.” ³⁹ Hakaluta kumwande chidodogi, na kugwa chifunhifunhi, hoyotasa, yakugamba, “Baba, inghadahika, unileusile ichikombe chino cha magayo dino! Ninga si fina fonikuhananga niye, ninga foukuhananga agweye.” ⁴⁰ Hakawejila awaya awefusa, na kuwefika wagonile; hakamugamba, “Petulo Mulemeligwa kwikala meso na niye hata isaa imwedu? ⁴¹ Ikaleni meso, mutase, mungheje mukwingila mumagesa; ichidoga chikufumila, ninga umutufi wechaka ludole.” ⁴² Hakaluta kahi, keli, yakutasa, yakugamba, “Baba nghonaga isikudahika kunileusila ichikombe chino cha magayo, ninghachunywe, foukwenda gweye nofoyuwe.” ⁴³ Hoyokwija kahi, na kuwona wagonile; kosoko ameso gawo hagowa masito. ⁴⁴ Hoyowaleka kahi, hoyoluta, kuwomba lwa kadatu, yakulonga simbuli sisiya. ⁴⁵ Kamei hoyowejila awefusa wakwe, na kuwawagamba, “Munghali mugonile na kubwihila; Langeni, ugele usegelela, Imwana we Munhu yakugumigwa mumikono ya wanhu awena uwihi. ⁴⁶ Inukeni, chigendeni. Langeni, ayuya iyakunisongesa kasegelela.” ⁴⁷ Ugele foyalongage, Yuda, yumwedu, wa awaya ikumi na weli hoyokwija, hamwedu na itewa ikulu dya wanhu wena mapanga na mapulo walawa ku wakulu wa Makuhani na awasehe wa wanhu. ⁴⁸ Na yuya yakumusongesa hakawengha chitangilo, kawagamba, “Wonikwenda nimunonele no yuyo Mukoleni” ⁴⁹ Chimwandemwande, hoyomulutila Yesu, hoyogamba, “Baho hako Mundewa!” Hoyomunonela. ⁵⁰ Yesu hoyomugamba, “Mbwiyangu, golosa idikwigale” Howoluta howogolola imikono yawo, howomukola Yesu. ⁵¹ Langa yumwedu wawo awaya awowile hamwedu na Yesu, hoyogolola umukono wakwe, hoyokwega dipanga dyakwe, hoyomutema imutumishi we kuhani Mukulu, hoyomudumula inghutwi. ⁵² Kamei Yesu hoyomugamba, “Yuwisa dipanga dyako baho hodyowile, Kosoko wose wakukola mapanga wakukomigwa na mapanga.” ⁵³ Kahi ukona fina aniye sikudaha kumutasa iBaba, naye yakunigalila hambiya hano matewa ga wasilikali malaika kumi na meli? ⁵⁴ Amatulumo gomemelesigwa nhani fina agakugamba ikuwa nheifo? ⁵⁵ Ugele uwo Yesu hoyowagamba matewa fina, “Togoleni, mulawa kifana kumukola muhiji, mwina mapanga na mapulo, kosoko ya kunikola? Majuwa gose hanikala Mwihekalu na kufusa, musanikolile. ⁵⁶ Ninga agano gose gagaluka nheifino, uleke amatulumo ga wagonesi gamemelesigwe.” Noho awefusa wakwe wose howotija, howomuleka. ⁵⁷ Nawo awamukolile Yesu hawamwigala kwa Kayafa, Ikuhani Mukulu, kowamemile awatulumi na wasehe. ⁵⁸ Na Petulo yeja yandamila kwa hatali, mpaka kwi kumbo dye Kuhani Mukulu, hakengila kugati, na kwikala hamwedu na watumwa yone indumo yokuwa nhani. ⁵⁹ Awakulu wa Makuhani na dibalasa dyose howohananga uhomelesi wo udasi, kosoko ya Yesu, uleke wamukome; ⁶⁰ howoswela kamei, hawalawanisa wahomelesi wengi wa udasi, kulawabaho howolawanisa weli ⁶¹ wakugamba, “Ayuno hakagamba, ‘Yakudaha kudimola dihekalu dya Mulungu, na kudijenga kwa majuwa madatu.’” ⁶² Kamei Ikuhani Mukulu hoyokwinuka hakamugamba, “Nghukubidula mbuli? Awano wakukuhomelesa choni?” ⁶³ Ninga Yesu hakanyamala. Kuhani Mukulu hoyomugamba, “Nikukwilahisa kwa Mulungu imumi: Chitamile, nghona agweye no Kilisito, Mwana we Mulungu.” ⁶⁴ Yesu hoyomugamba, “Agwe nanga kuilonga. Ninga nikumutamilani kulawa hambiya mukwenda mumone iMwana we Munhu yekale kumukono wo kulume wo ludole, yakwija mumafunde ga kuulanga.” ⁶⁵ Ikuhani Mukulu, hoyodega si suke sakwe, yakugamba, “Lubeso. Nhani chikuhananga wahomelesi kahi? Langeni hambiya muhulika ulubeso lwakwe. ⁶⁶ Mukulamula nhani nyeye?” Howobidula, howogamba, “Imwagila yakomigwe.” ⁶⁷ Howomutwila amate kuchihanga, howomutowa, wamonga howomutowa makofi, ⁶⁸ wakugamba, “Agwe Kilisito! Tanga, nani yakutowile?” ⁶⁹ Petulo hoyokuwa yekale kunje ye dikumbo; mwamuke yumonga hoyomulutila, hoyogamba, “Agwe nagwe hakuwa hamwedu na Yesu wa Galilaya.” ⁷⁰ Ninga hakakana kumwade ya wose, na kugamba, “Simanyile cho ukulonga.” ⁷¹ Kamei yakalawe kunje mpaka habalasa, mwanamuke yungi hoyomona, hoyowatamila awanhu wowile baho, “Imunhu yuno hakowa hamwedu na Yesu Munasaleti.” ⁷² Hakakana kahi kwa kilaha, “Simumanyile imunhu yuno.” ⁷³ Chikaloke chipisi chidodogi, awaya awowile baho howomwijila Petulo, howomugamba Chawelu agwe nagwe kwa yumwedu wawo, “Kosoko hata inonga yako ikukusongesa.” ⁷⁴ Hoyokonga kuligita na kilaha yakugamba, “Simumanyile imunhu yuno!” Ugele uwo dijogolo hodikwika. ⁷⁵ Petulo hakagelegela imbuli yoyalongile Yesu fina, “Ugele dijogolo disinati dike, agweye ukuwa unikanile kadatu.” Hoyolawa kunje, hoyolila kwa usungu lugano.

¹ Ikowe nhosikusiku, wakulu wa makuhani wose na wasehe wa wanhu, haweka mulundo kosoko ya Yesu, uleke wamukome; ² Hawamoha, na kumulonda kumwigala kwa Pilato yowile liwali. ³ Kamei, Yuda ayuya yamusongese, yakone fina kafulusa kuliganiswa, hoyokalala, hoyowowisila awakulu wa makuhani na wasehe wa wanhu fipande fiya fye ifesa, makumi madatu, ⁴ hoyogamba, “Hanibana, fonaisongese isakame ichaka wihi.” Howagamba, “Ago gena choni ukwetu. Ugalange agweye gomwecho.” ⁵ Hoyafikubita afiya ifipande fye ifesa kugati ya dihekalu hoyoleuka; hoyoluta, na hoyejakinyonga. ⁶ Awakulu wawatambiki howofilonda afiya ifipande fye ifesa, howogamba, “Si fiswanu kufika mudisanduku dya filafwa, kosoko ni fesa ya sakame.” ⁷ Howokifumilisa fina, wagule ilolo dya ulongo we chumbo howe hanhu hakusikila wageni. ⁸ Kosoko iyo dilolo didyo dikwinangigwa, Ilolo dya sakame mpaka diyelo. ⁹ Hoimemelesigwa imbuli yalongigwa ne mugonesi Yelemia: Yagamba, “Howofilonda fibemhe makumi madatu fye fesa, diliho dyakwe dyafumiligwe, na wana wa Isilaeli, ¹⁰ howofilafa kwa kugulila ilolo dya ulongo we chumbo, fina iMundewa foyanisigilile.” ¹¹ Hoyokwima kumwande ya liwali; liwali hoyomusa, yakugamba, “Agweye no goMundewa wa Wayahudi?” Yesu hoyogamba, “Agwe kuilonga.” ¹² Ninga foyaliganiswe na wakulu wa makuhani na wasehe, nghabidule mbuli. ¹³ Noho Pilato hoyomugamba, “Nghukuhulika amabuli gose gowakukuhomelela?” ¹⁴ Hoyoleka kumubidula hata mbuli imwedu, iliwali hoyokisina lugano. ¹⁵ Ugele we sikukuu iliwali hakasowela kuwadoholela mufungwa yumwedu wowakuhananga. ¹⁶ Baho hahowa na mufungwa yumonga yamanyike lugano majuwa gaya, disina dyakwe Balaba. ¹⁷ Wakakitang’anyile, Pilato hakawagamba, “Mukuhananga nimulekele yehoki? Ayuya iBalaba ama iYesu yekwinangigwa Kilisito?” ¹⁸ Kosoko hakamanya fina hawamulafa kwa finju. ¹⁹ Yakekale mwigoda dyakwe dyo uliganisi, imuke hoyomwigalila, nonga yakugamba fina, “Unghowe na mbuli na yuya imunhu imuswamu; kosoko nidasigwa lugano musinjosi diyelo kosoko yakwe.” ²⁰ Awakulu wa makuhani na wasehe wa wanhu howowagongelesa matewa wamuhanange Balaba, na kumukoma Yesu. ²¹ Iliwali hoyobidula kahi hoyowagamba, “Mukuhananga niwadoholele yehoki mu awano aweli?” Howogamba, “Balaba!” ²² Pilato hoyowagamba, “Nimugolose nhani Yesu iyekwinangwa Kilisito?” Howobidula wose, “Yasambasigwe!” ²³ Hoyogamba, “Nhani, wihi waki woyagolose?” Howokongesa kujoja wakugamba, “Yatungikigwe!” ²⁴ Baho Pilato yakone nghodaha chochose, ninga chiyunguyungu chikongeseka du, hoyolonda meji, hoyonawa mikono kumwande ya matewa, hoyogamba, “Aniye nachaka uwihi kusakame ye munhu yuno imuswamu! Mugalange ago anyeye muwecho.” ²⁵ Wanhu wose howobidula howogamba, “Isakame yakwe yuwe muchanhya yetu na muchanhya ya awana wetu!” ²⁶ Kamei hoyomukumulila Balaba; Yakamale kumutowa Yesu mikotya, yamulafa uleke wakamusambase. ²⁷ Noho wasilikali wa liwali hawomwigala Yesu ku Plitolio, howomumemelela ichitewa chose. ²⁸ Hawamuhambula si suke, howomufasa ikasu indunghu. ²⁹ Hawaluka nghofia ya miwa, howomufasa mwitwi dyakwe, hawamwingha mhando ya digwami mumukono wakwe wo kulume, hawafugama kumwande yakwe, na kumuhowa wakugamba, “Baho hako, Mundewa wa Wayahudi!” ³⁰ Kahi howomutwila mate, hawalonda imhando iya howomutowa towa mwitwi. ³¹ Wakamale kumogelela, howomuhambula dikasu diya, howomufasa sisuke sakwe, howomulonda kuluta kumusambasa. ³² Wokowe wakulawa hawona munhu wa Kilene, disina dyakwe Simoni; ayuno howomudindilisa yalonde umusalaba wakwe. ³³ Wakafike ahanhu hekwinangwa Goligota, (nong’amba, ahanhu hediguha dye ditwi,) ³⁴ howomwingha yonywe difai ihanganisigwe ne sungwi; ninga yakainomole du nghendile kuyunywa. ³⁵ Wakafuluse kumutungika mumusalaba, “Howogawa sisuke sakwe, howositowela kula.” ³⁶ Howokwikala, wakumugojelesa uko. ³⁷ Howokwika hachanhya ye ditwi dyakwe usongesi wawo diandiko dikugamba, “AYUNO NO YESU MUNDEWA WA WAYAHUDI.” ³⁸ Ugele uwo wahiji weli howosambasigwa hamwedu naye, yumonga umukono wakwe wo kulume, na yumonga umukono wakwe wo kumoso ³⁹ Awalokage munjila howomuliga, wakusingisasingisa amatwi gawo, ⁴⁰ Wakugamba, “Agweye go ukudimola dihekalu na kudijenga kwa majuwa madatu! Kihonye gomwecho; honaga no mwana we Mulungu, humuluka mumusalaba.” ⁴¹ No nheifo awaya awakulu wa makuhani fowamogelele hamwedu na watulumi na wasehe, wakugamba, ⁴² “Hakawahonya wamonga, nghakudaha kihonya imwecho. Aye iMundewa wa Isilaeli; yahumuluke hambiya mumusalaba, nase chomuhuwila. ⁴³ Kamuhuwila Mulungu; na yamuhonye hambiya, nghona yakumuhananga; kosoko hakagamba, ‘Aniye na Mwana we Mulungu.’” ⁴⁴ Nheifo awaya awahiji nawo awasambasigwe hamwedu naye hawamuliga. ⁴⁵ Kulawa isaa ya mutandatu mpaka isaa ya ikenda iisi yose hayuwa na chisa. ⁴⁶ Ikafike isaa ya ikenda nhafi, iYesu yekwinula dijwi dyakwe kwa ludole, yekugamba, “Eloi, Eloi, lama sabakitani?” Nong’agamba, “Mulungu wangu, Mulungu wangu, nhani unilekile?” ⁴⁷ Na wamonga awowile baho, wakahulike, hawagamba, “Ayuno yakumwinanga Eliya!” ⁴⁸ Chimwandemwande yumwedu wawo hoyobilima, hoyolonda sifongo hoyoiloweka mu siki, hoyoiguma mu chigwami, hoyomwingha yonywe. ⁴⁹ Awaya wamonga howogamba, “Leka chilange nghona Eliya kokwija kumuhonya!” ⁵⁰ Naye Yesu yakenule dijwi kwa ludole, hoyolafa ichidoga chakwe. ⁵¹ Langa dipasia dye dihekalu hadidegeka fibemhe fili, kulawa kuchanhya mpaka hasi; iyisi hoisingisika; amawe hogotulika; ⁵² ifilalo hofigubuka; hoikwinuka mitufi mingi ya wasunhile awagonile mufilalo. ⁵³ Kamei wakafuluse kulawa mufilalo, wakafuluse kwinuka, howokwingila mukaya isunhile, hawokonigwa na wengi. ⁵⁴ Kamei ayuya iakida, hamwedu na waya wowile hamwedu naye wakumugojelesa Yesu, wokone umusingisiko we iisi na agaya gagoloseke, howokogoha lugano, howogamba, “Chawelu ayuno hakowa Mwana we iMulungu!” ⁵⁵ Hahowa na wanawake wengi baho wakulanga kwa hatali, awo no weja wamwandamila Yesu kulawa Galilaya, na kumutogomela. ⁵⁶ Mugati yawo hakowa umo Maliamu Magidalena, na Maliamu ing’ina yawo cha Yakobo na Yusufu na ng’ina yawo awana wa Sebedayo. ⁵⁷ Ikowe hegulo hoyokwija munhu yumonga mugoli wa Alimataya, disina dyakwe Yusufu, imwene naye hakowa mwifusa wa Yesu; ⁵⁸ imunhu yuyo hoyomulutila Pilato, hoyoutasa umutufi wa Yesu. Kamei Pilato hoyolagisa yenghigwe. ⁵⁹ Yusufu, hoyoulonda umutufi, hoyousingilisa ne sanda ye bafuta swanu. ⁶⁰ Hoyowika muchilalo chakwe chisha, choyasongole mwiwe, hoyofingilisa diwe dikulu hamulango we chilalo, yaleuka. ⁶¹ Baho hahowa na Maliamu Magidalena, na Maliamu ayuya wa keli, wekala wekulanga ku chilalo. ⁶² Dijuwa dya keli, idyoile dye Isabato, wakulu wa makuhani, na Mafalisayo howomwijila Pilato; ⁶³ wakugamba, “Mundewa, chigelegela fina ayuya imusugu, foyowile yakali mumi hakagamba, ‘Ganghaloka majuwa madatu yakwinuka.’ ⁶⁴ Ulagise ichilalo chimilisigwe fiswanu mpaka dijuwa dya kadatu, wangheje awefusa wakwe womuhija na kuwatamila wanhu, Kenuka kulawa kuwafile; na udasi wa keli ukusuma auya we nghonga.” ⁶⁵ Pilato hoyowagamba, “Mwina wasilikali, mulute mukemilise ichilalo fiswamu fomukudaha.” ⁶⁶ Hawaluta, howokwimilisa ichilalo fiswamu, howodiguma diwe diya muhuli na kwika wemilisi.

¹ Isabato ikahele, fokwakongile kucha dijuwa dye inghonga ye dijuma, Maliamu Magidalena na Maliamu yuya wa keli, howoluta kwijalanga ichilalo. ² Langa, hokukuwa musingisiko mukulu we iisi; kosoko imalaika we Mundewa hakadulika kulawa kulanga, hoyokwija, hoyodifingilisa diwe diya hoyodikalila. ³ Ifuta yakwe hayuwa kifana lumwemwe, na sisuke sakwe njelu swe swe swe. ⁴ Kosoko yo kumogoha, awaya awemilisi hawahihima, na kuwa kifana wanhu wafile. ⁵ Kamei malaika yakawagamba awaya awanawake, “Munghogohe anyeye; kosoko nimanya mukumuhananga Yesu yasambasigwe.” ⁶ Kahechaka hano; kosoko kenuka, fina fyoyalongile. Wijeni mulange ahanhu hoyekigwe. ⁷ Nanye luteni chimwande, mukawatamile awefusa wakwe. Kenuka kulawa kuwanhu wafile; Langeni! Yakuwalongolela kuluta Galilaya; ako noko mukamwona. Handikoni, nifulusa kumutamilani. ⁸ Hawaleuka chimwande kulawa hechilalo, kwa itisi uwoga ne chinyemi chikulu, howobilima kwijawatamila simbuli siso awefusa wakwe. ⁹ Langa, Yesu hakakitang’anyila nawo, yakugamba, “Bahoni!” Howomusegelela, howomukola imigulu, howomufugamila. ¹⁰ Kamei Yesu hoyowagamba, “Munghogohe; gendeni mukawatamile wandugusangu walute Galilaya, nokowakanyona.” ¹¹ Ugele awaya fowalutage, langa wamonga wa wasilikali howokwingila mukaya, howatamila awakulu wa makuhani gose agagoloseke. ¹² Howokitanganyila hamwedu na wasehe, howokifumilisa, howowengha wasilikali fesa nyingi, ¹³ wakugamba, “Watamileni wanhu fina awefusa wakwe weja nechilo, wamuhija, fochowile chigonile. ¹⁴ Imbuli ino inghahulikigwa kwa liwali, aseye, chikwenda chilonge naye, anye nanye chiwaleusila lwidaso.” ¹⁵ Kamei howohokela ifesa iya, howogolosa fina fowafundigwe. Na imbuli iyo hoikwenela ku Wayahudi wose mpaka diyelo. ¹⁶ Awaya awefusa wakwe ikumi na yumwedu hawaluta Galilaya mpaka ditunda diya Yesu dyoyawasigilile. ¹⁷ Nawo wakamwone, howomufugamila, ninga awamonga hawowa na manhonge. ¹⁸ Yesu hoyowejila, hoyolonga nawo, hoyowagamba, “Ninghigwa udaha wose wa kulanga na wa muisi. ¹⁹ Luteni mukawagolose mataifa gose wowe wefusa: Muwabatise kudisina dya Baba, na Mwana, na Muhe Musunhile, ²⁰ na kuwafusa wagakole gose gonimulagiseni anyeye; langa aniye nikuwa hamwedu nanye majuwa gose, mpaka kundumo ye chilunga.”