LUKA

LUKA

¹ Kosoko wanhu wengi waguma mikono kwika hamwedu simbuli sigoloseke ukwetu, ² fina fowachisimulila awaya wowile watogomi we imbuli kulawa kunghonga, ³ nyona fiswanu kwandika kusoko aniye nani nyandamila simbuli sose kwa habehi, sa ugele ulokile, kwandika hamwedu fina fosilawanise Mutunyigwa Teofilo; ⁴ udahe kumanya chawelu simbuli so utamiligwe. ⁵ Ugele wo undewa wa Helode, Mundewa wa Uyahudi heja howa na mutambiki yumwedu disina dyakwe Sakalia wo ugele wa Abiya, na imukagwe yowa Elisabeti wo ulukolo lwa Haluni. ⁶ Na wose foniweli hawowa wachawelu mumeso ge Mulungu, hawekala fiswanu, hawagendelela kuikola misigililo ye Mundewa bila kubana chochose. ⁷ Nawo weja wowa wechaka mwana, kosoko Elisabeti yowa mugumba hawowa wasehe lugano. ⁸ Hambiya foyatogomage mumulimo wo utambiki hamwande ye Mulungu, foyowile muugele wakwe, ⁹ kwa kwandamila sinhenda se chitambiki, ikula haimugwila imwene kwingila mwihekalu dye Mundewa kufunghisa ufumba. ¹⁰ Ugele wo kufunghisa amatewa gose ga wanhu hagowa kunje gekutasa. ¹¹ Baho Sakalia hakalawiligwa na Malaika we Mundewa, Kema nyima ulwandi lo kulume lwa Hefugilo dyo kufunghisa. ¹² Kamei Sakalia hakedasika na kogoha lugano foyamonile Malaika. ¹³ Ninga, “Malaika kamutamila Sakalia, ughogohe kusoko kutasa kwako kuhulikigwa na imukago Elisabeti kokweleka mwana we chigosi, nagwe komwinanga disina dyakwe Yohana. ¹⁴ Nagwe kokuwa na chinyemi na kubwedelela na matewa wonyemuka ugele wo kwelekwa kwakwe. ¹⁵ Kosoko kokuwa mukulu mumeso ge Mundewa, na imwene nghekunghwa difai kahigimbi mukali, naye komemeswa Muhe Musunhile kulawa munda mwe ng’ina. ¹⁶ Kawowisa matewa ga wana wa Isilaeli kwe Mundewa Mulungu wawo, ¹⁷ na komulongolela Mundewa, kolongosigwa ne Muhe na ludole lwa Eliya. Kubidula imimoyo ya waBabamunhu ku wana, kowagolosa awechaka chogoho wowe na madoga ga uchawelu, kuwatandila awanhu kusoko ye Mundewa.” ¹⁸ Sakalia kamusa Malaika yakugamba, “Nomanya nhani? Aniye namusehe ne mukangu mudaha lugano.” ¹⁹ Na Malaika kamugamba, “Aniye na Gabilieli, nikwima ahanhu he Mulungu, nhumigwa kulonga na gweye na kukwigalila mbuli swanu fina ino. ²⁰ Langa nghudaha kulonga mpaka dijuwa diya gogekwija gelawanisa agano gonikutamile, kusoko nghusifumile simbuli sangu sikwija silawanisa mu ugele wakwe.” ²¹ Wanhu wenda wemugojela Sakalia na hawesina kusoko hakekalisa kwi hekalu. ²² Na foyalawile kunje nghadaha kulonga nawo, howemutanga fina kona majumo kugati ye dihekalu; kawengha chitangilo na kugendelela kuwa chimumu. ²³ Foyafuluse amajuwa go mulimo wakwe, hakoya ukaya ukwakwe. ²⁴ Kulawa ugele uwo imuke Elisabeti hakeyoha. Hakefisa kugati kwa chigele cha minyesi mishano, yakugamba, ²⁵ “Nhafi no Mundewa foyanigolosele muchigele choyanyonile, kanilegusila chinyala changu mumeso ga wanhu.” ²⁶ Mumwesi wa mutandatu kulawa kwiyoha kwa Elisabeti; Malaika Gabilieli hakatumigwa ne Mulungu mukaya ya Galilaya disina dyakwe Nasaleti. ²⁷ Kwa bikila yatumisigwe na munhu disina dyakwe Yusufu, wa lukolo lwa Daudi, na disina dya bikila yuyo ni Maliamu. ²⁸ Gabilieli kengila munyumba yakwe yakugamba, “Bahoni gowinghigwe dihewa, iMundewa kahamwedu nagwe.” ²⁹ Maliamu foyahulike galongigwe na Malaika, hakedasika lugano, na hakesina na kiyusa umulamuso uno wa aina yaki? ³⁰ Malaika kamugamba, “Unghogohe Maliamu, kusoko kwinghiwa Dihewa na Mulungu. ³¹ Nagwe kokiyoha na kweleka Mwana we chigosi, na disina dyakwe kokwinangigwa Yesu. ³² Kokuwa Mukulu na kokwinangigwa Mwana wa yowile Kuchanhyasi. iMundewa Mulungu komwingha idigoda dyo undewa we Babakwe Daudi. ³³ Naye kodima awanhu wa Yakobo majuwa gose na undewa wakwe ukuwa wichaka ndumo.” ³⁴ Maliamu kamubidula Malaika yakugamba, “Yokuwa nhani mbona simanyile mugosi?” ³⁵ Malaika kamubidula kamugamba, “Muhe Musunhile kokwijila muchanhya yako na ludole wa yowile kuchanhyasi wokugubika kosoko yo imwana yekwelekigwa kokwinangigwa musunhile, Mwana we Mulungu. ³⁶ Kahi langa imunduguso Elisabeti muudala wakwe Kakiyoha mwana wa chigosi, na auno mwesi wa mutandatu ukwakwe ayuya yowile mugumba. ³⁷ Kosoko chila chinhu chikudahika kwe Mulungu.” ³⁸ Maliamu kabidula yakugamba, “Langa niye na mutumwa we Mundewa, leka yuwe ukwangu fina foulongile.” Malaika kamuleka, kaluta. ³⁹ Ichigele chicho Maliamu hoyekinuka hoyeluta kwa chimwande mpaka isi ya fitunda, mukaya ya Yuda. ⁴⁰ Kengila kugati munyumba ya Sakalia na kumulamusa Elisabeti. ⁴¹ Na Elisabeti yakahulike umulamuso wa Maliamu, ichali hachijumha munda mwa Elisabeti kwa chinyemi. Na Elisabeti hoyememeswa Muye Musunhile. ⁴² Elisabeti hakalonga kwa dijwi ikulu yakugamba, “Agweye kupata mboto kusuma wanawake wose na cheleko chako chipata mboto! ⁴³ Aniye na nani mpaka ingina we Mundewa yeje kunilamusa? ⁴⁴ Kosoko dijwi dyo mulamuso wako fodyengile munghutwi sangu, ichali chidodogi hachijumha kwa chinyemi mugati ye sinda sangu. ⁴⁵ Nagwe Ibeka gouhuwile, kosoko gakwenda gomemelesigwe gago galongigwe ne Mundewa.” ⁴⁶ Maliamu kagamba, “Umoyo wangu ukumutunya Mundewa. ⁴⁷ Na muhe wangu wonela kosoko ye Mulungu mwihula wanguq ⁴⁸ Kosoko kamulanga kwa ubasi mutumwa wakwe muholo, na langa kulawa hambiya awanhu wose woninanga mumoti. ⁴⁹ Imulungu kanigolosela makulu na disina dyakwe disunhile. ⁵⁰ Usungu wakwe kwa wanhu wakumwogoha kwa cheleko mpaka cheleko. ⁵¹ Konesa makulu kwa mukono wakwe; kawachakula awowile weyoni mufidoga fyawo. ⁵² Kawakinya awakulu kulawa Muundewa wawo na wakiwa kawenula, ⁵³ Kawegutisa awene injala kwa maswanu, na wagoli kawaleka chaka, ⁵⁴ Kamutasa Isilaeli imutogomi wakwe, kagelegela usungu wakwe, ⁵⁵ Fina foyawatamila awakulu setu, hakalonga Abulahamu na weleko wakwe majuwa gose. ⁵⁶ Maliamu yekala chigele cha minyesi midatu, kamei hoyekuya ukaya ukwakwe.” ⁵⁷ Ichigele cho kidohola kwakwe Elisababeti chafika, yeleka mwana mugosi. ⁵⁸ Awanhu wowile habehi naye na wanduguse fowahulike fina Mundewa kamonela ubasi, howonyemula hamwedu na Elisabeti. ⁵⁹ Mwijuwa dya munana howikwija kumufina imwana, howehananga kumwingha disina dye Babakwe Sakalia. ⁶⁰ Ing’inakwe kabidula kagamba, “Ng’oo! Sinheifo; ayuno kokwinangwa Yohana.” ⁶¹ Wamugamba, “Nhani hechaka wowose yakwinangwa disina dyo mulukolo lwako?” ⁶² Kamei hawamonesa chitangilo iBabakwe kumusa imwanagwe komwinanga nani? ⁶³ Katasa chibao cha kwandika, hoyokwandika fina, “Disina dyakwe Yohana.” Wose howekisina. ⁶⁴ No baho ni baho du mulomo wakwe hougubuligwa, hamwedu na dilimi dyakwe, hoyokonga kulonga na kumutunya Mulungu. ⁶⁵ Weja wengilwa na itisi wose awekalage hamwedu nawo, na simbuli siya hosikwenela muchilunga chose che fitunda fya Yudea. ⁶⁶ Na wose awahulike howegeka mufidoga fyawo wekugamba, “Imwana yuno kokuwa mwana wa nhani? kosoko umukono we Mundewa hawuwa naye.” ⁶⁷ Na iBabakwe Sakalia hoyomemeswa Muhe Musunhile yekugamba, ⁶⁸ “Yatunyigwe Mundewa Mulungu wa Isilaeli, kusoko kawejila wanhu wakwe, na kuwahonya. ⁶⁹ Kachingha ihembe dya uhonya mwelekwa wa Daudi mutogomo wakwe. ⁷⁰ Fina foyalonga kulawa kunghonga kwa njila ya wagonesi wakwe wasunhile. ⁷¹ Uleke chihonyigwe kulawa ku wanghondo wetu. Na kulawa mumikono ya awekuchisuhila. ⁷² Kuwonela ubasi awaBaba setu, na kudigelegela dilagano dyakwe disunhile. ⁷³ Inyilaha yoyamwilahila iBaba yetu Ibulahimu ⁷⁴ Chihonyigwe kulawa mumukono wa wanghondo wetu, chitogome chichaka kogoha. ⁷⁵ Kwa usunhile ne chawelu mumeso gakwe majuwa getu gose. ⁷⁶ Nagwe gomwana kokwinangwa mugonesi wa iyowile kulanga. Kusoko kulongola kumwande ye Mundewa kumugolosela sinjila sakwe. ⁷⁷ Kuwatamila awanhu wose fina wahonyigwa, kwa kulekeligwa uwihi wawo. ⁷⁸ Kwa njila ya ubasi we Mulungu wetu, ujelu fina wo mugingu wochijila kulawa kulanga. ⁷⁹ Awaya wakwikala muchisa, awagubikigwe na dipeho dye difa, kuchilongosa mu njila ye digoya.” ⁸⁰ Kamei, imwana hakakula, hoyopata ludole lwe chimuhe, hoyokwikala kunyika mpaka dijuwa dyo kwiyonesa kwakwe ku Isilaeli.

¹ Muchigele chicho dilagiso dyalawa kwa Kayisali Agosito ikugamba, “Awanhu wose muchilunga wandikwe masina gawo.” ² Aino yowa nyandikwa ya bosi yalawanise ugele wo undewa wa Kilenio yowile Mundewa wa Silia. ³ Kosoko yo wanhu wose hawaluta kwandikigwa, chila munhu ukaya ukwawo. ⁴ Yusufu naye hakakwila kulawa Galilaya, Mukaya ya Nasaleti kaluta Yudea mukaya ya Daudi ikwinangigwa Betelehemu, kosoko imwene ni wa lukolo lwa Daudi. ⁵ Hakaluta kiandikisha hamwedu na Maliamu mutumisigwa wakwe naye hakeyoha. ⁶ Ichigele chicho fowowile uko, majuwa gakwe gokidohola geja gafika. ⁷ Kamei hakedohola nhula hanju naye hakowa mugosi, kamufasa sisuke se mwana, kamugonesa ahanhu hokudiila sing’ombe, kwasoko wasapata luneka musinyumba sa wageni. ⁸ Na muisi iiya kweja kowa na wadimi wekwikala kwidimo ne isawo yawo hechilo. ⁹ Malaika we Mundewa hoyowalawila, kema hagati yawo, utunyi we Mundewa houwamulikila, nawo howokwingilwa na itisi ikulu. ¹⁰ Malaika kawagamba, “Munghogohe nikumwigalilani mbuli swamu, mbuli ya chinyemi chikulu, awanhu wose wokonela. ¹¹ Kosoko diyelo mukaya ya Daudi kelekigwa muhonyi wenu, no Kilisito Mundewa. ¹² Achino no chitangilo chenu, mokona mwana mudodogi kafasigwa suke sa chali, kagoneswa hanhu hakudiila sing’ombe.” ¹³ Kamei baho itewa dya Malaika kulawa kulanga, howetunya Mulungu na kwimba, ¹⁴ “Utunyi ulute kuchanhya kwe Mulungu, na Muchilunga chuwe digoya kwa wanhu woyasagule.” ¹⁵ Malaika fowaleuke na kuluta kulanga wadimi wetamila wakugamba, “Hambiya chilute Betelehemu chikone adiya dochitamiligwe ne Mundewa.” ¹⁶ Howoluta chimwandemwande, wamufika Maliamu na Yusufu na yuya imwana mudodogi kagona ahakudiila sing’ombe. ¹⁷ Howomona imwana na kuwatamila gose gowahulike soko ye imwana. ¹⁸ Wose wahulike simbuli salongigwe na wadimi hawesina lugano. ¹⁹ Ninga Maliamu hoyogeka na kugadoga gose mumoyo wakwe. ²⁰ Awaya wadimi weja woya, akuno wekumutunya Mulungu, kosoko ya gose gowahulike na kona, ifyene fyowatamiligwe. ²¹ Majuwa munana gakaloke, na ugele wo kumufina haufika, howomwinanga Yesu disina dyakwe, ifene foyenangwa na Malaika kabla ya kwifunga kwe ing’ina. ²² Ugele wo kuhojoligwa kwawo ukafike, Yusufu ne Maliamu hawamulonda Yesu ne kuluta naye Yelusalemu kumwika kumwande ye Mundewa fina imisigililo ya Musa foyikulonga. ²³ (Fina foyandikwe muchitabu che malagiso ge Mundewa, “Mwana nhula hanju we chigosi kokwinangigwa musunhile kwe Mundewa).” ²⁴ Kahi hawaluta kulafa filafwa ifene dilagiso dye Mundewa fodilongile, “Huwa mbili hagela makinda ge njiwa.” ²⁵ Ugele wuwo akuya Yelusalemu hakuwa na munhu wa chelu na yekumogoha Mulungu, disina dyakwe Simioni. Yendeyogojela kwa nghwina uhonya wa Isilaeli. Hakalongosigwa ne Muhe Musunhile. ²⁶ Imuhe Musunhile hakamugubulila fina nghodaha kufa mpaka yamone Kilisito we Mundewa. ²⁷ Kamei yamemesigwe no uMuhe Musunhile yamulongosa kwija kwi hekalu iBaba na ng’ina wa Yesu wamwigala kugati, kosoko wamugolosele ifina fowalagisigwe ne Mundewa; ²⁸ Simioni yamudinghula imwana, hoyomutunya Mulungu yakugamba, ²⁹ “Hambiya Mundewa kumulekela imutumwa wako, Yaleguke digoya ifene diwandiko dyako fodilongile. ³⁰ Kosoko ameso gangu gona uhonya wako. ³¹ Ninga awanhu wose wowona uhonya wako woutandile mumeso ga wanhu wose. ³² Ujelu wa magubulo kuwamembe, na we ditunyo ku wanhu wako Isilaeli.” ³³ iBabakwe ne ing’ina weja wakisina kosoko ya simbuli salongigwe soko ye imwana. ³⁴ Simioni kuwamotesa na kumutamila Maliamu ing’ina fina, “Imwana yu kekigwa kwa kugwa na kwinuka wengi wowile Isilaeli, na chitangilo che wanhu womulema. ³⁵ Nagwe gomwecho idipanga dyokwingila mumoyo wako uleke gagubuligwe madoga ga mimoyo itewa.” ³⁶ Kweja kowa na Mugonesi yumwedu we chike disina dyakwe Ana mwana wa Fanueli wa lukolo lwa Asheli. Hakekala na mugosi minyaka mufunghate kulawa munhole yakwe. ³⁷ Kahi hakasigala mwigane mpaka ugele wuwo foyowile mudala wa miyaka makumi munana na mine, nghekuleuka mihekalu ye Mulungu yekutasa kuleka kudia chigele chose. ³⁸ Ugele wuwo hoyolawanisa, hoyomutunya Mulungu na kulonga simbuli se mwana ku wanhu wose wagojelage uhonya wa Yelusalemu ³⁹ iBabakwe ne ing’ina fowamalile kugolosa gose fina fodyendage dilagiso, hawoya ukwawo Nasaleti mumukoa wa Galilaya. ⁴⁰ Imwana hoyokula, hoyokongeseka ludole, kamema misungu, na Dihewa dya Mulungu hadyuwa umwakwe. ⁴¹ Chila mwaka iBabakwe ne ing’ina wenda weluta Yelusalemu fina fowasowele ugele we sikukuu ya Pasaka. ⁴² Imwana foyafika miyaka ikumi na mili, howolutanya Yelusalemu fina fowasowele. ⁴³ Fowafulusa isikukuu, isikukuu ye Pasaka wejawakonga inhambo ya kuya ukwawo, amba Iyesu hoyosigala Yelusalemu, na iBabakwe ne ing’ina wasamanyile; ⁴⁴ Awene wamanya kaumo mwitewa, howogenda mpaka dijuwa duswa, wakonga kumuhananga kuwambwiya sawo na wayawo. ⁴⁵ Kosoko wasamonile, howokuya Yelusalemu kumuhananga. ⁴⁶ Dijuwa dya kadatu howomufika mwihekalu kekala hagatigati ya wafusaji yakuwategelesa na kuwosa. ⁴⁷ Wose wamuhulike hawesina lugano kwasoko ye misungu na mbidula yakwe swamu. ⁴⁸ iBabakwe ne ing’ina fowamonile hawesina, ing’inakwe kamusa yakugamba, “Gomwana kuchitenda nhani? iBabako na niye chenda chikukongha kwa usungu.” ⁴⁹ Imwene hakabidula yekugamba, “Nhani mukunihananga? Musamanyile fina inyagila kwikala munyumba ye Babangu?” ⁵⁰ iBabakwe ne ing’ina wasamanyile simbuli sowatamiligwe. ⁵¹ Hoyokuya hamwedu nawo mpaka Nasaleti, hoyogendelela kuwahulika. Ing’ina hoyofundika gose mumoyo wakwe. ⁵² Na iYesu hoyogendelela kukula kwa misungu na chimo, hoyowendesa wanhu ne Mulungu.

¹ Hawuwa mwaka wa kumi na shano wa undewa wakwe Kaisali Tibelio. Pondio Pilato hakowa Mundewa wa Uyahudi, Helode Mundewa mudodo wa Galilaya na imunduguse Filipo hakowa Mundewa mudodo wa mikoa ya Itulea na Tilakoniti; na Lusania Mundewa mudodo wa Abilene, ² Anasi na Kayafa hawowa Makuhani wakulu. Imbuli ye Mulungu hoimwijila Yohana mwana wa Sakalia uko kunyika. ³ Kamei Yohana hoyeluta mumhelo ya ulwanda wa Yolodani. Hoyohubili ubatiso wo kulamba kosoko yo kulekeleligwa uwihi. ⁴ Fina foyandikwe muchitabu cha Mugonesi Isaya: “Dijwi dya munhu dihulikika kunyika, ‘Igoloseni injila ye Mundewa; gololeni injila yakwe! ⁵ Chila ilolo difukiswe, chila itunda na kitongo iduliswe. ahagonjile hagoloke, sinjila sihile sigoloswe na kuwa swamu. ⁶ Na chila munhu kowona uhonya we Mulungu.’” ⁷ Wanhu matewa haweja kubatisigwa na Yohana, kawosa yakugamba, “Anyeye cheleko cha majoka nani yawafundile muitije inyono ye Mulungu? ⁸ Mweleke mamudyo gakonesa fina mulamba, kahi munghakonge kugamba: ‘Chinaye Baba Ibulahimu,’ kosoko nikuwatamila Imulungu yakudaha kumwinulila Ibulahimu wana kulawa mumawe gano. ⁹ Muchigele chino inhemo ikigwa mumasina ga mabiki, idibiki disikweleka mamudyo maswamu, dikung’enyigwa na kusomigwa.” ¹⁰ Awanhu wamusa wakugamba, “Chigolose nhani seye?” ¹¹ Hoyowabidula yakugamba, “Iyena makoti meli na yamwinghe iyechaka; na iyena chakudiya yagolose nhaifo.” ¹² Awakonghosa we ikodi nawo howokwija kubatisigwa, howomusa, “Mwalimu chigolose nhani seye?” ¹³ Kawagamba, “Munghakongose chinhu kujumha fomusigililigwe.” ¹⁴ Awasilikali nawo howomusa wekugamba, “Ase nase chigolose nhani? Kawagamba Munghapujile munhu, kahi munghamubalalile munhu, na mwigutiswe na maliho genu.” ¹⁵ Awanhu fowowile mukugoja agelawanisa, wose wakudoga mufidoga fyawo isimbuli sa Yohana, nhegela imwene no Kilisito. ¹⁶ Yohana kawabidula yekugamba, “Aniye nikubatisa kwa meji, ninga yekwija munhu iyena ludole kujumha niye, kai aniye sagilwe kohola sisigi sa filwatu fyakwe. Ayo kowabatisa kwa Muhe Musunhile na kwa moto. ¹⁷ Diselo dyakwe dya mumukono yakwe, naye koshagila uluga lwakwe, na kukunjagisa ngano mukano yakwe, ninga amakohelele kogasoma mumoto usikusima.” ¹⁸ Kahi kwa mbuli nyingi hoyowahubilia wanhu mbuli swanu. ¹⁹ Ninga iMundewa Helode yagombelwa na Yohana kosoko yamulonda Helodia imuke we munduguse na kumutenda mukagwe, kahi no uwihi wose woyagolose. ²⁰ Kahi Helode yongesa uwihi wakwe kwa kumoha Yohana. ²¹ Ninga awanhu wose wakamale kubatisigwa, na Yesu yakafuluse kubatisigwa yendeyotasa, ulanga wagubuka, ²² Kamei Muhe Musunhile yadulika muchanhya yakwe kefana njiwa, dijwi dyalawa kulanga, “Agweye no mwanangu mwendigwa wangu nyendesigwe nagwe.” ²³ iYesu foyakonga umulimo wa kufusa, yowa fina minyaka makumi madatu nhafia hakamanyika fina mwana wa Yusufu wa Heli, ²⁴ mwana Matati, mwana wa Lawi, mwana wa Meliki, mwana wa Janai, mwana wa Yusufu, ²⁵ mwana wa Matatiya, mwana wa Amosi, mwana wa Nahumu, mwana wa Esili, mwana wa Nagai, ²⁶ mwana wa Maati, mwana wa Matatia, mwana wa Semei, mwana wa Yoseki, mwana wa Joda. ²⁷ Joda hakowa mwana wa Yohanani, mwana wa Lesa, mwana wa Selubabeli, mwana wa Shealitieli, mwana wa Neli, ²⁸ Neli hakowa mwana wa Meliki, mwana wa Adi, mwana wa Kosamu yowile mwana wa Elimodamu, mwana wa Eli. ²⁹ Eli hakowa mwana wa Yoshua, mwana wa Elieseli, mwana wa Yolamu, mwana wa Matati, mwana wa Lawi. ³⁰ Lawi hakowa mwana wa Simoni, mwana wa Yuda, mwana wa Yosefu, mwana wa Yonamu, mwana wa Eliakimu, ³¹ Eliakimu hakowa mwana Melea, mwana wa Mena, mwana wa Matasa, mwana wa Nasani, mwana wa Daudi, ³² Daudi hakowa mwana wa Yese, mwana wa Obedi, mwana wa Boasi, mwana wa Sala, mwana wa Nashoni, ³³ Nashoni yowa mwana wa Aminadabu, mwana wa Adimini, mwana wa Alini, mwana wa Hesiloni, mwana wa Pelesi, mwana wa Yuda. ³⁴ Yuda yowa mwana wa Yakobo, mwana wa Isaka, mwana wa Ibulahimu, mwana wa Tela, mwana wa Naholi, ³⁵ Naholi hakowa mwana wa Selugi, mwana wa Lewu, mwana wa Pelegi, mwana wa Ebeli, mwana wa Shela. ³⁶ Shela hakowa mwana wa Kainani, mwana wa Alifokisadi, mwana wa Shemu, mwana wa Nuhu, mwana wa Lameki, ³⁷ Lameki yowa mwana wa Mesusela, mwana wa Henoki, mwana wa Yaledi, mwana wa Mahalale, mwana wa Kainani, ³⁸ Kainani hakowa mwana wa Enoki, mwana wa Seti, mwana wa Adamu yowile mwana wa Mulungu.

¹ Foyamema Muhe Musunhile hoyokuya kulawa Yolodani, kalongoswa na Muhe ² chigele cha majuwa makumi mane kunyika, yagesigwa na Luhoma. Na majuwa gose ngadiya chinhu, gakahele hakowa na njala ³ Luhoma kalonga naye yakugamba, “Nghona gweye ni Mwana we Mulungu, dilonge idiwe adi dyuwe mukate.” ⁴ Yesu hakamubidula, “Yandikigwa fina, ‘Munhu nghakuhuwila mukate wimwene.’” ⁵ Na iluhoma hoyomukwisa kuchanhya na kumunesa undewa wa muchilunga kwa chipisi chiguhi, ⁶ na kumugamba, “Nokwingha gweye Undewa na Ukulu wakwe ne ditunyo kosoko galafigwa ukwangu, nani nikumwingha wowose ifene fonikwenda. ⁷ Ninga gweye unghanifugamila, ai yose ikuwa yako.” ⁸ Na iYesu kamubidula yakugamba, “Yandikigwa Komufugamila, Mundewa Mulungu wako na imwene du komutogomela!” ⁹ Na iLuhoma hakamulonda mpaka Yelusalemu na hakamwika muchisusu che dihekalu na kumugamba, “Inghowa gweye kwa mwana we Mulungu, lagala hasi kulawa hano. ¹⁰ Fina yandikigwa, ‘Kokwingha malaika wakwe wakwimilise, ¹¹ na mumikono yawo wokudinghula ungheje utowa mugulu wako nghwalo mwiwe.’” ¹² Na iYesu kamubidula yakugamba, “Ilongigwa unghamugese Mulungu Mundewa wako.” ¹³ Na iLuhoma yakamale chila igesa, hoyomuleka kwa chipisi. ¹⁴ Na iYesu hakowa Galilaya yamemesigwe ne ludole lwa Muhe Musunhile, simbuli sakwe seja senela muchilunga chose cha munghanda ya Galilaya. ¹⁵ Hoyofusa mumasinagogi gawo, yatunyigwa na awanhu wose. ¹⁶ Na iYesu hoyokwija Nasaleti ahanhu hoyakulila, mwijuwa dye Sabato hakaluta kwisinagogi fina foyasowela. Hakema kosoko. ¹⁷ Na bahaya hakenghigwa chitabu cha Mugonesi Isaya. Hoyogubula ichitabu, hoyopata hanhu handikigwe, ¹⁸ “Muhe wo Mundewa kamuchanhya yangu, kosoko kanibaka mafuta kuwahubilia awakiwa mbuli swanu. Kanituma kutamila kulekeleligwa kwa amateka, kona kwa waya wasikona, kuwengha kulekeleligwa awaya awakoneligwa, ¹⁹ na kutamilisa umwaka we Mundewa ufumiligwe.” ²⁰ Na hakagubika ichitabu, hoyomuwisila imutumishi na hoyokwikala hasi, na awanhu wose wowile mwisinagogi howomung’olela meso. ²¹ Hoyokonga kulonga nawo, “Diyelo ditulumo dino dimemelesigwa musinghutwi senu.” ²² Na wose hawalonga fiswanu kosoko yakwe na kwisina simbuli swanu silawile mumulomo wakwe; nawo hawagamba, “Ayu si mwana wa Yusufu?” ²³ Kawatamila, “Hechaka manhonge fina molonga nonga ayi, ‘Gomuganga kihonye gomweecho, gose gochihulike kugolosa Kapelinaumu, golosa hano naho haisi yako gomweecho.’” ²⁴ Na iYesu hakawagamba, “Chawelu nikumutamilani, hechaka Mugonesi iyekufumiligwa muisi yakwe. ²⁵ Ninga, chawelu nikumutamilani, hakuwa na wegane wengi Muislaeli ugele wa Eliya, ugele ulanga fowohigwa miyaka midatu na miyesi mutandatu bila kutonya fula. Muchigele chicho njala nghulu haingila muisi, ²⁶ na Eliya nghatumigwa kwa yoyose, amba kwa Seleputa, muisi ya Sidoni, kwe mwanamuke yowa mwigane. ²⁷ Na hahowa na awena ukoma matewa Muislaeli ugele we Mugonesi Elisha, na hechaka yoyose yasunhigwa, ila Naamani wa Siliya.” ²⁸ Ninga fowahulike gago, hawadeseka wose wowile mwisinagogi. ²⁹ Nawo howekwinuka na kumulafa kunje ye ikaya, na kumulongosa ditwi kung’enge ye chitunda chajengigwe ikaya yawo, kosoko wamukubite hasi, ³⁰ Ninga imwene kapuluta mugatigati yawo hoyoleuka. ³¹ iYesu hoyohulumuka Kapelinaumu, kaya yuwile Galilaya. Na yenda yewafusa mwijuwa dye Sabato. ³² Nawo hawesina kosoko ye mafusa gakwe, simbuli sakwe hasuwa na udaha. ³³ Na mwisinagogi mowa na munhu yena magini, hoyolila kwa ijwi ikulu, ³⁴ “Koo! China choni na gweye Yesu Munasaleti? Kwija kuchimalagisa? Nikumanya kwa nani gweye, Musunhile we Mulungu.” ³⁵ Yesu kaigombela imhepo yekugamba, “Nyamala na umulawe. Na yakakinyigwe hasi ne imhepo mugatigati ya wanhu, imhepo hoilawa, ninga isimugolose dihile.” ³⁶ Na wose hawesina wakilongelesa wakugamba, “Aino mbuli yaki? Kosoko kwa udaha na ludole yakugombela simhepo sihile naso sikulawa.” ³⁷ Simbuli sakwe seja senela chila hanhu munghandanghanda ye iisi iya. ³⁸ Hakenuka na kuleuka mwisinagogi, hoyokwingila munyumba ya Simoni. Ninga imukwewe Simoni hakowa mutamu, yakoligwa na ipwipwi ikali, na howomutasa kosoko yakwe. ³⁹ Hoyokwima hanghanda yakwe, hoyedigombela dipwipwi, na hodimuleka, na chimwande hoyokwinuka na kuwatogomela. ⁴⁰ Ninga dijuwa dikoswe, awanhu wose wowile na watamu, howomwigalila awanhu wose awakutamwa sinhamu mbalimbali; naye hoyokwika mikono yakwe muchanhya ya chila mutamu hoyowahonya. ⁴¹ Na simhepo naso hasiwalawa matewa, hositowa chowe, “Agweye kwa mwana we Mulungu!” Ninga hoyosigombela na nghasifumise kulonga, kosoko hasimumanya fina no Kilisito. ⁴² Housiku yakwe dijuwa dikalawe, hoyoleuka na kuluta ahanhu hachinyele. Awanhu howomuhananga na kwija ukwakwe, howokwenda kumulemesa kuleuka ukwawo. ⁴³ Ninga hayowagamba, “Inyagila kuhubili imbuli swanu ya undewa we Mulungu musikaya singi kahi, kosoko iyo hanitumigwa.” ⁴⁴ Na yenda yefusa mumasinagogi ga Yudea.

¹ Ugele awanhu wakelunde na kumumemelela kutegelesa imbuli ye Mulungu, hakowa yemile munghanda ya dilamba dya Genesaleti. ² Na hakona minhumbwi mili habehi na dilamba, ninga awalowa somba hawalawa muminhumbwi na wenda wesunha sinyafu sawo. ³ Hakakwila mumunhumbwi umwedu no wakwe Simoni, hakamutasa yawile mumeji kidogo kulawa kunghingi. Na hakekala na kuwafusa wanhu kulawa mumunhumbwi. ⁴ Yakafuluse kulonga, hoyomugamba Simoni, “Guma kuchiligati, na ulafe sinyafu sako ulowe somba.” ⁵ Simoni hoyobidula, “Mundewa chigolosa kasi yo kusokesa chilo chose chinghapate chinhu. Ninga kwa imbuli yako nohulumusa sinyafu.” ⁶ Ninga wakahulumuse sinyafu, hawapata somba nyingi lugano, sinyafu sawo hosikonga kudumuka. ⁷ Hawawenanga awayawo wowile mumunhumbwi wa keli weje kuwatasa. Haweja na kumemesa minhumbwi yose mili, ninga haikonga kusama. ⁸ Ninga Simoni Petulo yakone nhaifo, hakogwa mumigulu ya Yesu yakugamba, “Leuka ukwangu go Mundewa, kosoko aniye na munhu wa wihi.” ⁹ Kosoko hakesina imwene hamwedu na waya wowile naye kosoko ya uwingi we sisomba sowapatile; ¹⁰ na baho kahi weja wowa Yakobo na Yohana, wana wa Sebedayo, wowile wayagwe wa Simoni Petulo. Na iYesu hoyomutamila Simoni, “Unghogohe kulawa hambiya kokuwa mulowa wanhu.” ¹¹ Nawo fowafuluse kwigala minhumbwi yawo kunghingi, howoleka fyose na kumwandamila. ¹² Ugele foyowile mukaya imonga, baho keja munhu iyena ukoma, na foyamonile Yesu yogwa funama kededela yakugamba, “Mundewa nghona ukuhananga ukudaha kunihonya.” ¹³ Naye yagolola umukono wakwe hoyomukwafa yakugamba, “Nikuhanga, hona baho ni baho ukoma houhona.” ¹⁴ Na hakamulemesa yanghamutamila munhu, ninga, “Luta gomweecho ukeyonese kwa mutambiki, na ukalafe digelo fina foyalongile Musa uwe uhomelesi ukwawo.” ¹⁵ Ninga simbuli so seja senela lugano kola hanhu na matewa mengi hawetang’anyila kutegelesa na kuhonyigwa sinhamu sawo. ¹⁶ Imwene hoyoleuka hoyoluta kunyika kutasa. ¹⁷ Mwijuwa dimonga dya majuwa gago, foyendeyefusa, heja howa na Mafalisayo na walimu we malagiso wekale naye, awo nowejile kulawa chila kaya ya Galilaya, na Yudea na kulawa Yelusalemu, na uludole lwe iMundewa hauwa naye kuhonya. ¹⁸ Langa, wanhu hawegala munhu yaholole mwisasi, wahananga wamwingise kugati na kumwika kumwande ya Yesu. ¹⁹ Ninga fowonile hechaka njila ya kumwingisa kosoko ya matewa, howokwila munyumba muchanhya howotobola na kumwingisa na disasi dyakwe kupulutila mukano mpaka kugati kumwande ya Yesu. ²⁰ Yakone dihuwi dyawo hakagamba, “Mwanangu uwihi wako ulekeleligwa.” ²¹ Na Watulumi na Mafalisayo howakonga kiyusa, wakugamba, “Ayuno nani yakulonga lubeso? Nani yakudaha kulekelela uwihi ninga Mulungu yemwene!” ²² Ninga Yesu hakatanga amahweso gawo hakawagamba, “Nhani mukihwesa mumimoyo yenu?” ²³ Imhufu no ihoki? Kugamba, “Kulekeleligwa uwihi wako ama kugamba leuka ulute?” ²⁴ Ninga uleke mumanye fina mwana we munhu kena udaha muchilunga wa kulekelela uwihi. Hakalonga ne munhu yaholole, Nikukugamba, “Inuka winule disasi dyako ulute ukaya.” ²⁵ Baho ni baho kenuka kumwande yawo, na hakalonda achiya choyagonele, na kuluta ukaya akuno yakumutunya Mulungu. ²⁶ Na itisi ikulu hadiwengila wose, na hawamutunya Mulungu na hawamema lutwitwi wakugamba, “Diyelo chona mbuli ya ijumo.” ²⁷ Hoyoleuka na kumona mukonghosa kodi yakwinangigwa Lawi, kekala ahanhu ho kulihila kodi, hoyomugamba, “Nyandamile.” ²⁸ Na hoyoleka fyose, na kumwandamila. ²⁹ Na Lawi hoyomugolosela chakudiya chikulu ukaya ukwakwe, na heja howa na mulundo mukulu wa wakonghosa kodi na wamonga wekale mumesa na wene. ³⁰ Amafalisayo na Watulumi wawo hawawakalalilaga awefusa wakwe wakugamba, “Nhani mukudiya na kunywa hamwedu na wakonghosa kodi na wena uwihi?” ³¹ Yesu hoyowagamba, “Awomi wasikumuhananga Muganga, ninga awaya iwatamu.” ³² Sijile kuwenanga awaswanu ninga awena uwihi wadahe kulamba. ³³ Na hawamugamba, “Awefusa wa Yohana wakufunga mikangha mingi na wakutasa, nheifo awefusa wa Mafalisayo, ninga awako wakudiya na kunywa.” ³⁴ Na iYesu hakawagamba, “Mukudaha kuwagolosa awageni we halusi wohe ugele imwenye halusi kahamwedu nawo? ³⁵ Amajuwa gokwija, hona imwenye halusi yekuleusigwa ukwawo, noho wakwenda wafunge mumajuwa gago.” ³⁶ Kawatamila mbasi yakugamba, “Hechaka munhu iyekudega ndame ya suke nyisha na kuguma musuke ing’ono, yanghagolosa nhaifo, yakudega inyisha, na indame kulawa inyisha fisikiyagila na ing’ono. ³⁷ Kahi hechaka munhu yakuguma difai nyisha mufiliba filalile, yanghagamba yagume idifai nyisha, yotula ifiliba na difai yokitika na ifiliba fyobanika. ³⁸ Ninga idifai nyisha ikuhanangigwa igumigwe mufiliba fisha. ³⁹ Kosoko hechaka munhu yakunywa difai yakatali hoyosulumila difai nyisha, kosoko yakugamba, ‘Chakatali kiswanu.’”

¹ Mwijuwa dye Sabato Yesu foyendayogenda mumigunda ye ngano, awefusa wakwe wadudula masamhu, wafigisa mumikono yawo wa kudiya. ² Ninga awamonga wa Mafalisayo wagamba, “Nhani mukugolosa chinhu chene chilemesigwe mwijuwa dye Sabato?” ³ Yesu hoyobidula, “Musisomile adiya dyo yagolose Daudi foyowile na njala, imwene hamwedu na waya awowile naye. ⁴ Foyengile munyuma ye Mulungu hoyolonda imikate ya konesa na kudiya, yene si fiswamu kudiigwa na wowose ninga Makuhani, kahi hoyowengha awaya woyowile nawo.” ⁵ Hoyowagamba, “Imwana we munhu no Mundewa we Sabato.” ⁶ Mwijuwa dingi dye Sabato, foyendae kwingila Mwisinagogi na kufusa, heja howa na munhu yaholole umukono wakwe wo kulume. ⁷ Na Watulumi na Mafalisayo weja wamunyembela, kona fina komuhonya mwijuwa dye Sabato, kosoko wapate mbuli ya kumusongesa. ⁸ Ninga hoyotanga madoga gawo, hakamugamba ayuya iyena umukono uholole, “Wije wime hano.” Hakenuka na kwima haya. ⁹ Na Yesu hakawagamba, “Nikuwosani togoleni! Ikuhanangigwa dijuwa dye Sabato kugolosa maswamu ama gehile? Kuhonya ugima ama kuubana?” ¹⁰ Hakawakongholela meso wose, na kumugamba ayuya imunhu, “Golola umukono wako. Hakagolosa nheifiya na umukono wakwe hauhona.” ¹¹ Ninga weja wamemwa na nyono na kiyusa wene kwa wene wamugolose nhani Yesu. ¹² Mumajuwa gago hakakwila kufitunda kutasa; hakatasa kwe Mulungu chilo chose. ¹³ Hosiku yakwe hakawenanga wefusa wakwe, na kuwasagula ikumi na weli kulawa mwiwefusa wawo, hakawenanga watumigwa; ¹⁴ Simoni, yamwinanga disina dya keli Petulo, na Andelea imunduguse, na Yakobo na Yohana, na Filipo na Batolomayo, ¹⁵ na Matayo, na Tomasi na Yakobo imwana wa Alufayo, na Simoni yenangigwe Selote, ¹⁶ Na Yuda mwana wa Yakobo, na Yuda Isikalioti yabiduke kuwa musongesi. ¹⁷ Hoyohulumuka nawo na kwima hanhu hatindimale, hamwedu na itewa dya wefusa wakwe na matewa ga wanhu walawile Yudea yose na Yelusalemu na mhwani ya Tilo na Sidoni, awejile kumutegelesa na kuhonyigwa sinhamu sawo, ¹⁸ na wose wedasigwagwe na simhepo sihile weja wahonyigwa. ¹⁹ Na amatewa wose hawahananga kumukwafa, kosoko uludole wenda umulawa kuwahonya wose. ²⁰ Yesu hakenula meso gakwe hoyowalanga awefusa wakwe na kugamba, “Ibeka nyeye muwakiwa; kosoko undewa wa Mulungu ni wenu! ²¹ Ibeka nyeye mufungile hambiya; kosoko mokigutisigwa! Ibeka nyeye gomukulila hambiya; kosoko moseka! ²² Ibeka nyeye awanhu wanghawasula, kahi wanghawabagula, na kuwaliga na kuwabanila disina dyenu fina mbuli ihile kosoko ye Mwana we Munhu! ²³ Sekeleleni dijuwa diya na kujumhajumha kosoko digelo dyenu ikulu kulanga, kosoko awaBaba sawo weja wawagolosa nhaifo awagonesi. ²⁴ Ninga usungu wenu anyeye muwagoli; kosoko mufulusa kupata imhoso yenu! ²⁵ Usungu wenu gomwigute hambiya; kosoko mokona njala! Usungu wenu anyeye gomukuseka hambiya; kosoko molombola na kulila! ²⁶ Usungu wenu awanhu wose wanghawatogola; kosoko awaBaba sawo hawawagolosela nhaifo awagonesi wa udasi.” ²⁷ “Ninga nikumutamilani anyeye mukunitegelesa, wendeni wanghondo wenu, muwagolosele maswamu awaya wakumusulani, ²⁸ muwamotese awaya wakuwaligita, mutase kosoko ya waya wakuwabesa. ²⁹ Kwa yuya yakukutowa munjeje mubidulile na ya keli, na yuya iyakulonda dikoti dyako unghamulemese inghasu nhaifiya. ³⁰ Mwinghe chila munhu iyakukutasa, na iyakupokola finhu fyako unghahanange yakuwisile. ³¹ Na fina fomukuhananga wanhu wawagolosele anyeye, muwagolosele nhaifo. ³² “Nghona mukuwenda awaya awakuwenda nyeye, mukonesa uswamu waki? Kosoko hata awena uwihi wakugolosa nhaifo. ³³ Na nghona mukuwagolosela uswamu awaya wakuwagolosela maswamu, mukupata igelo dyaki? Kosoko hata awena uwihi wakugolosa nhaifo. ³⁴ Na nghona mukuwakopesha awaya wene womumanyile fina mohokela, mukugolosa uswamu waki? Hata awena uwihi wakuwakopesha awena uwihi kuhokela kahi. ³⁵ Ninga wendeni awanghondo wenu, goloseleni fiswamu, kopesheni bila kugojela chochose kulawa ukwawo, na digelo dyenu dyokuwa ikulu na mokuwa wana wa ye kuchanhyasi, kosoko imwene muswanu kwa awasikumulumba na awakiyenda wenyecho. ³⁶ Muwe na ubasi, ninga fina iBaba yenu foyena ubasi.” ³⁷ Munghalamule; nanye musilamuligwa, munghatofule; nanye musitofuligwa, mulekelele; nanye molekeleligwa. ³⁸ Wengheni; nanye mokwinghigwa chipimo chiswamu cha kumema na kukandisa na kusingisigwa hata kwitika chokwikigwa muchifa chenu. Kosoko ichipimo chomukulafa no chicho chomukupimiligwa. ³⁹ Kahi hoyowatamila mbasi, “Togoleni! Imudula kodaha kumulongosa Mudula? Wasihubugila wose mwikolongo? ⁴⁰ Imwifusa nghakumusuma imwalimu wakwe, ninga kila munhu yanghafusigwa fiswanu yakuwa fina imwalimu wakwe. ⁴¹ Nhani ukuchona ichibasi chuwile mwigiso dye munduguso, ninga nghukutanga dibiki dyuwile mwigiso dyako gomwecho? ⁴² Ama kodahaje kumugamba imunduguso, sekulu, leka nileuse ichibasi chuwile mwigiso dyako, nagwe gomwenecho nghukudyona dibiki duwile mwigiso dyako? Agwe wechimwefe! Konga kuleusa dibiki mwigiso dyako, baho kokona fiswamu kuleusa ichibasi chuwile mwigiso dye imunduguso.” ⁴³ “Kosoko hechaka ibiki iswamu dikweleka mamudyo gehile, kahi kwichaka ibiki dihile dikweleka mamudyo maswamu. ⁴⁴ Kosoko chila ibiki dikumanyika kwa mamudyo gakwe, kosoko amasada sigakubawigwa mumiwa, kahi sisabibu sisikubawigwa kulawa mumisega. ⁴⁵ Imunhu muswamu kulawa musigafu ya umoyo wakwe yakulafa maswamu, na imunhu yehile kulawa musigafu ya uwihi wakwe yakulafa gehile; kosoko kulawa gaya agemile mumoyo wakwe umulomo wakwe ukulonga.” ⁴⁶ “Nhani mukuninanga, ‘Mundewa,’ Mundewa, na musikugolosa agaya gonikumutamilani? ⁴⁷ Chila munhu yekwija ukwangu na kuhulika simbuli sangu na kusigolosa nomutamilani foyakuliganiswa: ⁴⁸ Yakuliganiswa na munhu yakujenga nyumba, iyakukata mpaka kusi, na kwika inghindiso mwiwe. Amafaluko gangheja, ameji gakutowa munyumba na gasikudaha kuisingisa kosoko ijengigwa fiswanu. ⁴⁹ Ninga ayuya yakuhulika na kuleka kusigolosa kakifana munhu yakujenga nyumba mwisanga bila nghindiso, ameji gakuitowa na kuibena, na baho ni baho ikugwa, na inyugwa yakwe ikuwa nghulu.”

¹ Foyafuluse kuwatamila gaya goyendage wanhu wahulike, hakengila Kapelinaumu. ² Ninga Chilongosi wa wasilikali igana hakowa na mutumwa yowile mwendigwa wakwe, hakowa mutamu habehi na kufa. ³ Foyahulike simbuli sa Yesu, hakawatamila wasehe we Chiyahudi kumutasa yeje na kumuhonya imutogomi. ⁴ Nawo fowejile kwa Yesu howokidedela wakugamba, “Yendesigwa umugolosele dino. ⁵ Kosoko yakuwenda wanhu wetu na kachijengela disinagogi dyetu.” ⁶ Na Yesu hakaluta nawo. Foyowile habehi ne inyumba, “Ichilongosi wa wasilikali igana hakatuma wambwiya ukwakwe wakugamba Mundewa unghakiidase, kosoko aniye sagiligwe agweye wingile hasi he ikano yangu, ⁷ kosoko iyo hanikiyona sagiligwe nimwenecho kwija ukwako. Ninga longa mbuli du na imutumwa wangu yakuhananga yahone. ⁸ Kosoko ani nani na munhu mukulu nina wasilikali hasi yangu, na nighamulonga yumwedu, ‘Luta na yakuluta,’ na kwa yumonga, ‘Nyagula na yakwija,’ na kwa mutumwa wangu, ‘Golosa dino na yakugolosa.’” ⁹ Foyahulike nhaifo, Yesu hoyekisina lugano kosoko yakwe, hoyobiduka na kuwatamila matewa wamwandamilage, “Nikumutamilani hata Muisilaeli singhati nyone ihuwi fina dino.” ¹⁰ Na waya watumigwe fowowile ukaya, hawamufika imutumwa yuya mumi togi. ¹¹ Chigele chiguhi hakaluta mukaya imonga ikwinangigwa Naini, hamwedu na wefusa wakwe na itewa ikulu hadikilongosa naye. ¹² Foyeja yasegelela mumulango umukulu we ikaya iya, langa munhu yafile yenda yelafigwa kunje, ni mwana ye imwene we ing’inakwe yowile mwigane, na itewa ikulu kulawa kukaya iya hawowa naye. ¹³ Na iMundewa yakamone, hoyomonela ubasi hakamugamba, “Unghalile.” ¹⁴ Hoyokwija na kudikwafa dijenesa na waya wadipikile howokwima, hoyogamba, “Gomujelelo nikulonga na gweye, inuka.” ¹⁵ Na yuya yofile hoyekwinuka na kukonga kulonga, Yesu hoyomwingha ing’ina we imujelelo. ¹⁶ Itisi hadiwengila wose, na hawamutunya Mulungu wakugamba, “Mugonesi mukulu kalawanisa mugati yetu na Mulungu kawejila wanhu wakwe.” ¹⁷ Imbuli ayo hoyikwenela muisi yose ya Uyahudi na muisi sose sa munghanda yakwe. ¹⁸ Awefusa wa Yohana hawamutamila gose gano. ¹⁹ Yohana hakawenanga wefusa wakwe weli, hakawatuma kwa Mundewa wamuse, “Agweye no yuya iyekwija hegu chimugoje yungi?” ²⁰ Kamei awanhu waya fowejile ukwakwe hawagamba, “Yohana Mubatisaji kachituma ukwako yakugamba, ‘Agweye noyuya yakwija hegu chimugoje yungi?’” ²¹ Muugele uya hoyowahonya wanhu matewa na sinhamu sawo, na sinhato sawo, na magini gehile, na wengi wowile wasikona hakawowisila kona kwawo. ²² Yesu hakagamba, “Luteni mukamutamile Yohana agene gomukona na kuhulika: Mudula wakona, fiwete wakugenda, wakoma wakusunhigwa, na fihuli wakuhulika, wafile wakwinuligwa, awakiwa wahubiligwa mbuli swamu. ²³ Ibeka imunhu iyechaka manhonge kosoko yangu.” ²⁴ Awatumigwe na Yohana wakaleuke, hakakonga kulonga na amatewa muchanhya ya Yohana. “Hamulawa kuluta kunyika kulanga choni?” Chibwade chikusingiswa ne imheho? ²⁵ Ninga hamuluta kulanga choni? Munhu yafasigwe suke swamu? Langa, awaya wakufala sisuke se ditunyo na kwikala kwa kubwedelela wowa musinyumba sa undewa. ²⁶ Ninga hamuluta kwija langa choni? Mugonesi? Heye! Nikumutamilani mukulu kusuma mugonesi. ²⁷ Ayo yoyaandikiligwa gano, langa nikumwigala mutumigwa wangu kumwande yako yakugolosele injila. ²⁸ Nikumutamilani mu wanhu wose welekigwe na wanawake hechaka mukulu kusuma Yohana, hata nheifo ayuya imudodogi mu undewa wa Mulungu ni mukulu kujumha Yohana. ²⁹ (Fowahulike gago awanhu wose na wakonghosa kodi hawamufumila Mulungu, na kutunya kubatisigwa ubatiso wa Yohana; ³⁰ Ninga Mafalisayo na walamusi we malagiso weja walema inyenda ye Mulungu ukwawo, kosoko wasabatisigwe na Yohana.) ³¹ “Nowaliganisa na choni awanhu wa cheleko chino? Nawo wakifana choni? ³² Wakifana wana awekale kwigulilo na kiinanga, ‘Hachiwatowela filimbi, nanye musafinile! Chiwembila nyimbo sa usungu, nanye musililile!’ ³³ Kosoko Yohana Mubatisaji keja nghakudiya mukate na kunywa difai, hamugamba, ‘Kena magini!’ ³⁴ Mwana we munhu keja yakudiya na kunywa, na mukugamba Langeni muhongho yuno na mulefi! Mbwiya yawo wakonghosa kodi na wena uwihi! ³⁵ Ninga imisungu ikufumiligwa na wanagwe wose.” ³⁶ Mufalisayo yumonga hoyomugoneka kudiya hamwedu naye, hoyoluta kunyumba ye Mufalisayo, na kwikala hamesa. ³⁷ Kahi imwanamuke we ikaya iya iyeja yowa na uwihi, foyahulike fina hakekala mumesa munyumba ye Mufalisayo, hoyokwigala chichupa cha mafuta ge imhungile. ³⁸ Kamei foyemile hanyuma yakwe hamigulu ya Yesu, hakalila, hakakonga kumutwinhesela imigulu yakwe na masosi, na kuihamusa na sinjwili sa muditwi dyakwe, na kuinonela migulu yakwe na kuibaka agaya mafuta ge mhungile swanu. ³⁹ Hambiya Imufalisayo yuya yamugoneke yakone nhaifo, yalonga mumoyo wakwe, “Imunhu ayu mhali ni Mugonesi hakowa yakutanga fina imwanamuke yuno no nani kahi kanhani! Ayuya yakumukwafa, fina ni munhu wa uwihi.” ⁴⁰ Kamei iYesu kamubidula kamugamba, “Simoni, nina chinhu cha kulonga na gweye.” Naye hoyomubidula, “Chinhu chaki Mwalimu?” ⁴¹ Yesu hakawagamba, “Mukopeshaji wa mapesa yumwedu yeja yowa na wanghokwa wakwe weli, yumwedu yakopa magana mashano, na wakeli makumi mashano. ⁴² Fowadugile kuliha hoyowalekelela wose. Hambiya yehoki yemwendesa yuya imukopeshaji?” ⁴³ Simoni kamugamba, “Nikudoga fina ayuya yalekeleligwe inghokwa inghulu.” Hoyomugamba, “Kulamula fiswamnu.” ⁴⁴ Baho hakamubidukila imwanamuke, yakumugamba, “Simoni ukumona imwanamuke yono? Ningila munyumba yako, nghuninghile meji ga kunawa migulu yangu, ninga yuno kanidonhesa migulu yangu na masosi na kuihamusa na sinjwili sakwe. ⁴⁵ Nghuninonele, ninga ayuno kulawa fonengile nghalekile kuninonela migulu yangu. ⁴⁶ Nghunibakile mafuta ditwi dyangu, ninga imwene kanibaka migulu yangu na mafuta ge mhungile swanu. ⁴⁷ Kosoko iyo nikumutamilani, kalekeleligwa uwihi wakwe wowile mwingi, kosoko hakenda lugano, ninga iyakulekeleligwa chidodogi yakwenda chidodogi.” ⁴⁸ Hoyomugamba, “Uwihi wako ulekeleligwa.” ⁴⁹ Kahi awaya wowile naye hamesa hawakonga kihwesa, “Ayuno no nani yakulekelela hata uwihi?” ⁵⁰ Na hakamugamba imwanamuke, “Dihuwi dyako dikuhonya. Genda mheho.”

¹ Kulawa baho hoyoleuka kugendela mumakaya ne fijiji, yekuhubili na kwigala mbuli swanu ya undewa we Mulungu. Na waya ikumi na weli hawowa hamwedu naye. ² Kahi wanawake wamonga awahonyigwe kwa kulafigwa simhepo na sinhamu. Maliamu yanangigwe Magidalena, yalafigwe simhepo mufungate, ³ na Yoane imuke wa Chusa mutumwa wa Helode, na Susana, na wamonga wengi wawatogomele kwa isawo yawo. ⁴ Amatewa wakeje hamwedu na wanhu kulawa kaya kwa kaya, hakalonga kwa mbasi. ⁵ “I muhandi hakaleuka kuhanda imbeyu, kamei foyahandage, simonga hasilagala munjila, na wagendanjila hawasijata, na fidege hofisidiya. ⁶ Na simonga hosilagala mwikangalawe, na fosakulile, hasinyala kosoko hasiswela ujolo. ⁷ Na simonga hasilagala mumiwa, na imiwa haikulanaso na kusikanhamisa. ⁸ Na kamei simonga hasilagala muulongo muswamu na kukula na kweleka kocho! Iyena singhutwi sa kuhulika na yahulike.” ⁹ Kamei wefusa wakwe wakamuse difuso dye imbasi, ¹⁰ hakawagamba, “Anyeye mwinghigwa udaha wa kumanya ififiso fye undewa we Mulungu, ninga kwa wamonga ukutamiligwa kwa mbasi, kosoko wanghalanga wanghone na wanghahulika wanghamanye.” ¹¹ “Difuso dye imbasi nodi: Imbeyu no imbuli ye Mulungu. ¹² Awaya we habehi ne injila no waya waihulike imbuli, ninga Iluhoma yakwija na kuilonda imbuli kulawa mumimoyo yawo, kosoko wangheje wehuwila na kuhona. ¹³ Awaya wowile mwikangalawe no waya wene fowakuhulika imbuli, wakuihokela kwa chinyemi, ninga wano wechaka misisi, wakuhuwila kwa chigele chiguhi na ugele wa magesa wakugwa. ¹⁴ Asiya salagale mumiwa, no waya wakuihulika imbuli, ninga fowakugendelela wakukanhamisigwa na ugoli we chilunga, na mamudyo gawo gasikukangala. ¹⁵ Na kwa siya silagale muulongo muswamu, awo no waya waihulike imbuli, na kuikola mumimoyo yawo miswamu na kweleka mamudyo kwa ufinyilisi wawo.” ¹⁶ “Hechaka munhu yekwasa taa na kuigubika ama kuigubika na idebe, ninga yakuika muchigwaso, kosoko awekwingila wadahe kona ujelu wakwe. ¹⁷ Hechaka mbuli ifisigwe uleke ikakiyonese, kahi chinhu che chifiso chisimanyika na koneka hajelu. ¹⁸ Mulangisise gomukuhulika, kosoko iyenacho kokwinghigwa, na iyechaka hata chiya choyekudoga kenacho kohokigwa.” ¹⁹ Kahi ing’inakwe Yesu ne wanduguse howomwijila, ninga wasafikile ukwakwe kosoko ye ditewa. ²⁰ Hakatamiligwa, “Ing’inako ne wanduguso wema kunje, wakuhananga kukona.” ²¹ Hoyowabidula, “Ing’inangu na wandugu sangu no waya awakuhulika mbuli ye Mulungu na kuigolosa.” ²² Ijuwa dimonga Yesu na wefusa wakwe hawakwila mumunhumbwi, hakawagamba, “Lekeni chiloke umwambu ye dilamba.” Howoleuka. ²³ Na ifene fowalutage Yesu hakakoligwa na nhongo na kugona. Na imheho yo luputa hoitowa mwilamba, ameji hagakonga kumema mumunhumbwi, na hawowa habehi kudidimila. ²⁴ Hawaluta na kumwinusa wakugamba, “Mundewa, Mundewa! Chikufa!” Kamei hakenuka na kuigombela imheho na mawingo gajojage, hofinyamala na kuposika posi. ²⁵ Hoyowagamba, “Dihuwi dyenu dyuwahi?” Hawogoha, na kisina wekulonga chila munhu na miyagwe, ninga yuno munhu waki? Iyakugombela hata imheho na meji, nafyo fikumuhulika! ²⁶ Kahi howofika muisi ya Wagelasi yuwile umwambu wa Galilaya. ²⁷ Foyajatile hasi kulawa mumumhumbwi, hakatang’anyila na munhu kulawa kwikaya yowile na mhepo, kwa chigele chitali nghafalile suke, nghekalage munyumba ninga mufilalo. ²⁸ Foyamonile Yesu, hakatula chowe na kugwa kumwande yakwe, na kutowa lwangi, “Choni choukuhananga unigolose, Yesu Mwana we Mulungu iyekuchanhyasi? Nikukutasa unghanisambase.” ²⁹ Kosoko Yesu yasidindilisa si mhepo kumulawa imunhu yuya. Ugele mwingi hasimukola, hakemilisigwa, na kohigwa kwa minyolo na simhingu, ninga hakedumula minyolo ne simhingu na kulongoswa na magini. ³⁰ “Ninga Yesu hayamusa Disina dyako nani?” Hoyogamba, “Itewa,” kosoko mhepo itewa hasimwingila. ³¹ Kahi hasikinenela yanghasilafe na kuluta kwikolongo. ³² Baho heja howa na itewa dya nguluwe dikudima muluduli, simhepo hasikinenela yasileke singile musinguluwe. Hoyofumila. ³³ Simhepo hosilawa kwe imunhu na kwingila kusinguluwe, kamei ditewa hodikulumhuka kuluduli lwe inghingi ye dilamba na kunywa munghabu. ³⁴ Awadimi wakone dyalawanise, hawatija, na kutamilisa mwikaya na mufijiji. ³⁵ Awanhu watamiligwe hawaleuka kulanga dyalawanise, na kwija kwa Yesu, howomufika ayuya yalafigwe simhepo yekale mumigulu ya Yesu, kafala suke na mahala gakwe maswamu, na howokogoha. ³⁶ Awaya wonile hawawatamila foyowile ayuya yakoligwe ne simhepo na fene foyahonyigwe. ³⁷ Na wanhu wose wa si isi sa munghanda ya Genesaleti hawamutasa yaleuke ukwawo kosoko hawengiligwa na itisi ikulu, baho hakengile mumunhumbwi na kuya. ³⁸ Imunhu yalafigwe simhepo hakakinenela fina yamwandamile Yesu, ninga Yesu nghamufumise ila kamugamba, ³⁹ “Yuya ukaya ukwako, ukatamilise fina Imulungu foyakugolosele.” Hoyoluta na kwanjasa mwikaya dyose fina foyagoloseligwe na Yesu. ⁴⁰ Ninga iYesu yakoye, awanhu wose hawamuhokela kosoko wose wenda womugojela. ⁴¹ Baho hakeja munhu disina dyakwe Yailo, yowile mukulu we disinagogi, hoyofugama hamigulu ya Yesu, hoyomutasa kwija ukaya ukwakwe, ⁴² kosoko hakowa na mwanagwe yemwene we chike, yena minyaka ikumi na mili nhafi, naye hakowa mutamusi. Foyaluta awanhu hawelunda kumusunguluta. ⁴³ Na imwanamuke yowile na utamu wo kulawa sakame kwa minyaka ikumi na mili na hechaka munhu yadahile kumuhonya. ⁴⁴ Hoyokwija kulawa kunyuma ya Yesu na kukwafa dihepu dye isuke yakwe, na baho ni baho inhamu yakwe hoihona. ⁴⁵ Yesu hoyogamba, “Nani yanikwafile?” Wose fowakanile Petulo hakagamba, “Mundewa, amatewa wakusunguluta na kukuumbilila.” ⁴⁶ Ninga Yesu hoyogamba, “Yumonga kanikwafa, kosoko nyona fina ludole lunilawa.” ⁴⁷ Na imwanamuke yakone fina nghodaha kifisa hakeja yakutetema na kugwa kumwande yakwe na kumutamila mumeso ga wanhu wose ichilekile yomukwafa na ifyene fyoyahonile baho ni baho. ⁴⁸ Yesu hoyomugamba, “Mudala dihuwi dyako dikuhonya, genda mhepo.” ⁴⁹ Foyalongage gago, munhu kulawa kwe mukulu we disinagogi keja na kugamba, “Imundele wako kafulusa kufa, unghamwidase Mwalimu.” ⁵⁰ Ninga Yesu foyahulike gago hakamubidula, “Unghogohe, huwila du, naye kokuwa muswamu.” ⁵¹ Foyafika ukaya nghamufumile munhu wowose kwingila naye kugati, ninga Petulo na Yohana na Yakobo na iBabakwe ne ing’ina we imwana. ⁵² Na wose wendewolila na kuhongesa, ninga hoyogamba, “Munghalile; kosoko nghafile ila kagona.” ⁵³ Howomuseka, kosoko hawamanya fina kofa. ⁵⁴ Ninga hakamukola na umukono wakwe, na kumwinanga yakugamba, “Gomwana inuka.” ⁵⁵ Umuhe wakwe howumuwila, na kwimanyima chimwande, Yesu hakalagisa yenghigwe chakudiya. ⁵⁶ iBabakwe ne ing’ina hawakisina lugano; ninga hakawalemesa wanghamutamile munhu wowose agalawanise.

¹ Yesu hakawenanga awefusa ikumi na weli na kuwengha ludole na udaha muchanhya ya simhepo na kuhonya sinhamu. ² Hakawatuma awefusa kuhubili undewa we Mulungu na kuhonya. ³ Hakawagamba, “Munghalonde chochose kosoko ya inhambo yenu, si mhando kahimukoba kahimukate kahidipesa,” na munghowe na makasu meli. ⁴ Munyumba yoyose yomukwingila, mwikale baho, na kulawa baho mugendelele ne inhambo. ⁵ Na ikaya yoyose yene ina wanhu wasikuwahokela, fomukuleuka mukaya iyo kunghunheni amanghundi gowile mumigulu yenu chuwe chitangilo ukwawo. ⁶ Howoleuka na kugendela mufijiji, wakutamilisa mbuli swamu na kuhonya chila hanhu howagendile. ⁷ Kahi iMundewa Helode hakahulika gose gagoloseke, hakedasika kosoko hailongigwa na wamonga fina, “Yohana kenuligwa kulawa mudifa.” ⁸ na wamonga, “Eliya hakeyonesa, na wamonga yumwedu wa Wagonesi wakatali kenuka.” ⁹ Helode hoyagamba, “I Yohana hanimudumula ditwi, ninga ayuno nani yene ifinhu fya itisi?” Hoyohananga kumona. ¹⁰ Munyuya yawo awatumigwa hawamutamila gowagolose. Yesu hoyowalonda awefusa ikumi na weli na kuluta kukaya yenangigwe Betisaida. ¹¹ Amatewa wakahulike howomwandamila, hoyowahokela na kulonga nawo simbuli sa undewa we Mulungu, na kuwahonya awaya wendage kuhonyigwa. ¹² Ninga dijuwa hadikonga kuswa, na waya ikumi na weli howokwija na kulonga naye, “Uwelage amatewa walute kufijiji na sikaya sa munghanda, wakagone na kupata chakudiya kosoko ayi nyika isikwikaligwa na wanhu.” ¹³ Hawagamba, “Wengheni nyeye chakudiya.” Howogamba, “Chichaka chinhu kujumha ino mikate mishano na somba mbili, nghona chisilutile na kugula chakudiya kosoko ye ditewa dino!” ¹⁴ Kosoko hahowa na wanhu fina figulu fishano nhafi. Hoyowatamila awefusa wakwe, “Wagambeni wanhu wekale hasi mufilundolundo fya wanhu makumi mashano nhafi.” ¹⁵ Awefusa hawagolosa nhaifo, awanhu wose hawekwikala hasi. ¹⁶ Hakailonda aiya imikate mishano na siya sisomba simbili, hakenula meso kuchanhya kulanga, na kulumba. Hakaibendula aiya imikate na sisomba na kuwengha awefusa wawagawile wanhu. ¹⁷ Na wanhu wose hawadiya na kwiguta. Na kudondola ifyasigale, fisege ikumi na fili fya fibendu. ¹⁸ Ugele foyejayowa yakutasa ye imwene, awefusa wakwe hawowa hamwedu naye, hakawosa, “Awanhu wakunigamba niye nene nani?” ¹⁹ Hawamubidula, “Yohana Mubatisaji, wamonga Eliya, Wamonga Yumwedu wa Wagonesi.” ²⁰ Hakamosa yakugamba, “Anyeye nanye mukugamba niye nene nani?” Petulo hakamubidula yakugamba, “Agweye no Kilisito we Mulungu.” ²¹ Hakawalemesa wanghamutamile munhu wowose imbuli iyo; ²² yakugamba, “Imwagila Mwana we Munhu kitang’anyila na magayo mengi na kulemigwa ne wasehe na wakulu wa watambiki na Watulumi na kukomigwa, na mwijuwa dya kadatu kwinuka.” ²³ Kamei hoyowatamila wose Nghona munhu wowose yakuhananga kunyandamila, yakileme imwenyecho na kulonda umusalaba wakwe chila ijuwa na kunyandamila. ²⁴ Kosoko wowose yakuhananga kuhonya uumi wakwe yakuwagilisa, na ulomo yakuhananga kwagilisa uumi wakwe kosoko yangu, kouhonya. ²⁵ Kosoko imunhu kopata chambusi chaki yanghapata ichilunga chose na kiyagilisa imwenecho? ²⁶ Kosoko chila yakunyonela chinyala aniye na imbuli yangu, imwana we imunhu naye komonela chinyala ugele wayakwija mwitunyo dyakwe, mwitunyo dye Babakwe na dya Malaika Wasunhile. ²⁷ Ninga chawelu nikumutamilani, wabaha wamonga wemile hano awene wasidyona difa mpaka wawone undewa we Mulungu. ²⁸ Gakaloke majuwa munana, kufulusa kulonga gago, hoyowalonda Petulo na Yohana na Yakobo hamwedu naye na kuluta kwitunda kutasa. ²⁹ Ugele woyatasage inyoneka ye chihanga chakwe haibiduka na sisuke sakwe hosikwakaika swee! ³⁰ Langa wanhu weli wendewolonga naye, hawowa awagonesi Musa na Eliya. ³¹ Woneka mwitunyo ikulu na kulonga soko ye difa dyakwe dikuhananga dilawanise Yelusalemu. ³² Petulo na wayagwe wowile naye hawowa na nhongo, ninga howokwinuka na kona ditunyo dyakwe na wanhu weli wemile hamwedu naye. ³³ Na wanhu waya fowamulekage Yesu, Petulo hoyomugamba Yesu, Mundewa, ni fiswamu fina cha hano, leka chigolose fibanda fidatu, chimwedu chako, chimwedu cha Musa, chimwedu cha Eliya. Nghamanyile choyalongage. ³⁴ Foyalongage nhaifo, ifunde hodikwija na kuwagubika, nawo hawogoha fowengile mwifunde. ³⁵ Na dijwi hadilawa mwifunde dikugamba, “Ayuno no mwanangu wonimusagule; mutegeleseni!” ³⁶ Na dijwi diya dikahulikike, Yesu hoyokoneka yemwene. Nawo howonyamala na wasamutamile yoyose gowonile mumajuwa gago. ³⁷ Mwijuwa dya keli, fowadulike kulawa kwitunda, itewa ikulu hodikitang’anyila naye. ³⁸ Langa munhu kulawa mwitewa yenula dijwi yakugamba, “Mwalimu nikukutasa umulange imwanangu, kosoko no yuyuno yumwedu. ³⁹ Langa imhepo imukinya, na baho ni baho hoyotowa chowe, dimuguma chisilisi mpaka kalawa ifulo, na disikumulekela chimwande. ⁴⁰ Haniwatasa wefusa wako wadilafe, ninga hawaduga.” ⁴¹ Yesu hoyobidula, “Anye icheleko kichaka dihuwi, chagilile nokikala na nyeye, na kuwafinyilisa mpaka milaki? Mwigale imwanago ahano.” ⁴² Kamai foyendeyokwija dipepo hodimukinya na kumuguma chisilisi. Ninga iYesu hoyodigombela dipepo dihile na kumuhonya imujelelo na kumwingha keli iBabakwe. ⁴³ Na wose howokisina kosoko ya udaha ukulu we Mulungu. Ninga wose fowesinage soko ya kila chinhu choyagolose, hoyolonga na wefusa wakwe, ⁴⁴ “Lekeni simbuli sino singile musinghutwi senu, kosoko imwana we munhu kolafigwa kumikono ya wanhu.” ⁴⁵ Ninga wasaimanyile inonga iyo, na hoifisigwa ukwawo, wanghaitange, nawo wende wokogoha kumusa Yesu soko ye inonga iyo. ⁴⁶ Na howokwingila mumawango mugati yawo, nani imukulu kusuma wose? ⁴⁷ Ninga iYesu foyatanga amadoga ge mimoyo yawo, hoyolonda mwana mudodogi na kumwika habehi naye, ⁴⁸ na hoyowagamba, “Wowose yakumuhokela imwana yuno kwisina dyangu, yakunihokela niye, na wowose yakunihokela niye, yakumuhokela ayuya yanitumile, kosoko ayuya imudodogi mugati yenu wose ayo no mukulu.” ⁴⁹ Yohana hakabidula, “Mundewa hachona munhu yakuwinga magini kwa disina dyako, na hachimulemesa kosoko nghakiyandamila na seye.” ⁵⁰ Ninga Yesu hoyomugamba, “Munghamulemese, kosoko inghowile chinyume chetu kaulwandi lwetu.” ⁵¹ Amajuwa gakasegelele kwe imwene kwinuligwa kulawa muchilunga, hoyohananga kuluta Yelusalemu. ⁵² Na hoyotuma watumigwa kumulongolela, awo hawaluta na kwingila muchijiji cha Wasamalia kosoko wamugolosele hanhu. ⁵³ Ninga awakaya wasamuhokela kosoko hakalongosa injila kuluta Yelusalemu. ⁵⁴ Kamei awefusa wakwe Yakobo na Yohana fowonile imbuli iyo hawagamba, “Mundewa ukuhananga chilagise moto kulawa kulanga uwalakase?” ⁵⁵ Ninga iYesu hakabiduka na kuwagombela. ⁵⁶ Kamei hakawagombela na kugamba, “Musimanyile mwina chidoga chaki chihile kosoko imwana we Munhu nghejile kukoma uumi wa wanhu ninga kuwahonya. Kamei hawaluta mukaya ingi.” ⁵⁷ Ninga fowendowogenda munjila, munhu yumwedu hoyomugamba, “Nokwandamila hohose howukuluta.” ⁵⁸ Na iYesu hoyomugamba, “Amabwasiko gena makolongo na fidege fya mulanga fina mafulu, ninga imwana we munhu kechaka hanhu hokugona.” ⁵⁹ Kwa yumonga kagamba, “Nyandamile,” ninga imwene kagamba, “Mundewa leka nghonge kumusika iBabangu.” ⁶⁰ Ninga Yesu hoyomugamba, “Waleke wofile wawasike wayawo wofile; amba gweye leuka ukatamilise undewa we Mulungu.” ⁶¹ Yumonga kamugamba, “Mundewa nokwandamila, ninga leka nghonge kuwelaga awanhu wa ukaya ukwangu.” ⁶² Yesu hoyomugamba, “Munhu iyagumile umukono wakwe kulima, kayi yekulanga kunyuma, nghagiligwe kuundewa we Mulungu.”

¹ Kulawa baho iMundewa hoyosagula makumi Mufungate na weli, na kuwegala wamulongolele weli weli musikaya na hanhu hoyendoyohananga kuluta. ² Hakawagamba, “Uludyo kumugunda mwingi, ninga awagolaji wakefu; mutase iMundewa wa uludyo yegale awagolaji mumugunda wakwe. ³ Sanghanyeni, mulangisise nikumutumani nyeye fina ngholo mugati ya mausi. ⁴ Munghalonde mufuko kahi mukoba, kahifilwatu, na munjila munghamulamuse munhu. ⁵ Munyumba yoyose yo mukwingila kunghonga gambeni dihewa dyuwe hamwedu ne inyumba ayino! ⁶ Inghowa mwana wa uswamu kabaho, dihewa dyenu dyokwikala hamwedu naye, ninga nghona kechaka, dihewa dyenu dyomuwilani. ⁷ Musigale munyumba imwedu, mudiye na kunywa fowakumwinghani, kosoko imutogomi kagiligwa maliho gakwe; munghasungulute kulawa inyumba imwedu kuluta ingi. ⁸ “Mukaya yoyose yomukwingila na wanghawahokela, diyeni fikwikigwa kumwande yenu. ⁹ Honyeni watamu wawo na kuwagamba, ‘Undewa we Mulungu wija habehi yenu.’ ¹⁰ Ninga mukaya yoyose yomukwingila wanghaleka kuwahokela, mulute musinjila sawo na kugamba, ¹¹ ‘Hata dinghundi dye ikaya yenu idinamatile mumigulu yetu chikudikunghuna chuwe chitangilo ukwenu; ninga manyeni fina undewa we Mulungu usegelela.’ ¹² Nikumutamilani yokuwa fihufu ku Sodoma kufinyilisa mwijuwa diya kujumha ikaya iya.” ¹³ “Usungu wako Kolasini! Usungu wako Betisaida! Kosoko mhali majumo ago agagoloseke ukwenu, gagoloseke Tilo na Sidoni, hawowa wekulamba katali, no kufala suke sa magunia na kwikala mudifu. ¹⁴ Ninga yokuwa fihufu kufinyilisa diliganiso, kosoko ya Tilo na Sidoni kusuma nyeye. ¹⁵ Na gweye Kapelinaumu, togola! Kokwisigwa mpaka kulanga? Koduliswa mpaka kusimu. ¹⁶ Iyakuwahulika nyeye, yakunihulika niye, na yuya yakuwalema nyeye, yakunilema niye, na iyakunilema niye, yakumulema ayuya yanitumile.” ¹⁷ Awaya makumi mufungate na weli howokuya kwa chinyemi, wakugamba, “Mundewa, hata simhepo sikuchogoha seye ku disina dyako.” ¹⁸ Hoyowagamba, “Hanimona Shetani yakulagala fina lumwemwe kulawa kulanga. ¹⁹ Langeni, niwengha udaha wa kujata majoka na fisuswe, ne udaha wose muchanhya ye imunghondo, na hechaka chinhu chidaha kuwabulaga. ²⁰ Hata nheifo munghasekelele kosoko simhepo sikuwogoha, ninga musekelele kosoko amasina genu gawandikigwa kulanga.” ²¹ Ugele uwo Yesu hakonela mwi Muhe Musunhile, hoyosekelela na kugamba, “Nikukulumba, Baba, Mundewa we iisi na Ulanga, kosoko simbuli sino kuwafisa awena misungu na umanyi na kuwagubulila wana wadodogi. Heye Baba, kosoko nofowendile.” ²² Kawatamila wanhu yakugamba, “Ninghigwa finhu fyose na Babangu, kahi hechaka yamumanyile Mwana ila Baba, kahi hechaka yamumanyile Baba ila Mwana, na wowose imwana yoyakuhananga kumugubulila.” ²³ Kahi hakawabidukila awefusa wakwe na kulonga nawo kwa chinyele, “Ibeka ameso agekona gomukona nyeye! ²⁴ Kosoko nikumutamilani nhafi, wagonesi na Wandewa wengi hawasulumila kona gomukona nyeye, wanghagone na kugahulika.” ²⁵ Langa! Mulamusi yumwedu hoyokwima kumugesa, yakugamba, “Mwalimu, nigolose nhani niuhale uumi wa majuwa gose?” ²⁶ Hakamugamba, “Iwandikigwa choni mwilagiso? Ukusoma nhani?” ²⁷ Kamei hakamubidula, “Umwende iMundewa Mulungu wako kwa umoyo wako wose, na ichidoga chako chose, na uludole lwako lwose, na imisungu yako yose, na iyehabehi nagwe fina gomwenecho.” ²⁸ Naye kamugamba, “Kubidula fiswamu, Golosa nhaifo, nagwe kokuwa mumi majuwa gose.” ²⁹ Ninga imwene hakahananga kiyonesa muswamu, hakamusa Yesu, “Na iyehabehi na niye noyehoki?” ³⁰ Yesu hakamubidula, “Munhu yumwedu yeja yadulikaga kulawa Yelusalemu kuluta Yeliko, hoyokoligwa na wahiji hawamuhambula na kumutowa, na kumuleka habehi na kufa. ³¹ Ninga kwa bahati, Kuhani yumwedu yendoyedulika kupulutila injila iiya, na foyamonile hoyogenda kunghanda. ³² Kahi ne Mulawi nheifiya, foyafikile baho na kumona hoyogenda kunghanda. ³³ Ninga Musamalia yumwedu munghenda yakwe, yafika baho hoyowile, na foyamonile, hakamonela ubasi, ³⁴ hakamulutila, kamubaka mafuta na miti na kumoha filonda fyakwe, kahi hoyomukwisa mwipunda dyakwe na kumwigala kunyumba ya wageni, na hoyomulagula. ³⁵ Na dijuwa dya keli yalafa dinali mbili na kumwingha imwenye nyumba yakugamba, ‘Mulangisise yuno, na chochose chowukwenda ulafe kusuma ino, nokuwisila nghona nikuya.’ ³⁶ “Togola! Yehoki mudatu wawo, yeyonese fina kahabehi na yuya yatowigwe na wahiji?” ³⁷ Hoyogamba, “Ayuya yamonele ubasi.” Na Yesu hoyomugamba, “Luta nagwe ukagolose nhaifo.” ³⁸ Ninga Yesu na wefusa wakwe, fowowile munhambo, Yesu hoyokwingila muchikaya chimonga, na imwanamuke disina dyakwe Malita hoyomuhokela munyumba yakwe. ³⁹ Malita hakowa na mufunakwe yenangagwe Maliamu, imwene yekala mumigulu ya Yesu na kutegelesa amafuso gakwe. ⁴⁰ Ninga Malita hakedasika na utogomi mwingi, hoyomulutila na kumugamba, “Mundewa, ukona fiswanu fonikidasika niimwene, imufunangu kanileka nikutogoma niimwene? Mugambe ninga yanitase.” ⁴¹ iMundewa hoyomubidula, “Agwe Malita, ukugaya na kiidasika na finhu fingi, ⁴² chinhu chimwedu chikuhanangigwa. Imaliamu kasagula chinhu ichiswamu, nacho chisileusigwa ukwakwe.”

¹ Yesu yeja yowa hanhu hamonga yakutasa, foyamalile kutasa yumwedu wa wefusa wakwe hoyomugamba, “Mundewa, chifuse kutasa fina Yohana foyawafusile awefusa wakwe.” ² Hakawagamba, “Nghona mukutasa gambeni: Baba, Disisina dyako ditunyigwe; Undewa wako wije. ³ Uchinghe chila ijuwa chakudiya chetu, ⁴ na uchilekelele uwihi wetu, kosoko seye nase chikuwalekelela awachigolosele uwihi. Na unghachigume mumagesa.” ⁵ Kamei hakawagamba, “No nani ukwenu yena mbwiyakwe yomulutila muchilo gati na kulonga naye, mbwiyangu ninghe mikate midatu, ⁶ ‘Kosoko nijiligwa na mbwiyangu yekulawa nhambo, nani nichaka chinhu cha kumwingha yadiye,’ ⁷ naye komubidula kulawa kugati, ‘Unghanidase, dibanhi difulusa kuhindigwa, aniye ne wanangu chifulusa kugona, sidaha kwinuka na kukwingha chochose.’ ⁸ Nikumutamilani, hata nghona nghekwinuka na kumwingha chochose kosoko ni mbwiyakwe, ninga kosoko yakugendelela kumutasa kokwinuka na kumwingha chochose choyakuhananga. ⁹ “Nikumutamilani, Taseni, mokwingigwa, hanangeni; mopata, gong’ondeni; nanye mokumuliligwa. ¹⁰ Kosoko chila yakutasa yakuhokela, na kwa yuya yakugong’onda yakukumuliligwa. ¹¹ Hena Baba yehoki ukwenu imwanagwe yanghamutasa somba komwingha ijoka? ¹² Ama yanghatasa ditagi komwingha chisuswe? ¹³ Nghona nyeye gomwina uwihi mumanya kuwengha awana wenu finhu fiswamu, iBaba yenu wa kulanga kamanya mikangha mingahi kuwengha Muye Musunhile awaya awekumutasa!” ¹⁴ Baho yendoyolafa imhepo yowile imutendile imunhu chimumu, imhepo foyalawile ichimumu hoyolonga, na awanhu howokisina lugano. ¹⁵ Ninga wamonga hawagamba, “Yekulafa simhepo kwa udaha wa Belisebuli, imukulu wa simhepo.” ¹⁶ Baho awamonga wakumugesa wakuhananga chitangilo kulawa kulanga. ¹⁷ Ninga imwene yamanya amadoga gawo, hoyowatamila yakugamba, “Chila undewa ukigawa uwecho kwa uwecho usikwima na nhaifo ulukolo kwa ulukolo. ¹⁸ Nghona Shetani yakigawa imwenecho, undewa wakwe wokwima nhani? Kosoko mukugamba nikulafa simhepo kwa ludole lwa Belisebuli. ¹⁹ Kahi nghona nikulafa simhepo kwa ludole lwa Belisebuli, togoleni awana wenu wakulafa kwa ludole lwani? Kosoko yo, awene nowowoliganisa. ²⁰ Ninga inghowa kwe ludole lwa Mulungu, nikulafa simhepo, ninga mutange fina undewa we Mulungu ufulusa kuwejila. ²¹ Ugele munhu yena uludola yakiyohile ifilama fyakwe na kwimilisa ikaya yakwe, ifinhu fyakwe fikala digoya. ²² Ninga imunhu iyena ludole kusuma imwene yanghamulutila na kumutowa, yakumuhoka ifilama fyakwe foyahuwile na kufigawa ku wayagwe. ²³ Wowose nghowile na niye nghehamwedu nami; na wowose nghakukunjagisa na niye yakwanjasa.” ²⁴ “Imhepo ihile foikumulawa munhu, ikugenda muluwala kuhananga hanhu hakubwihila, na inghaleka kona ahanhu hokwikala, ikugamba Nokuya kukaya yangu, akuya konilawile. ²⁵ Na inghoya ikuifika ikaya yakwe ishagiligwe na kuhambigwa fiswanu. ²⁶ Baho yakuluta na kwigala simhepo singi mufungate sihile kusuma iyene, na sikwingila na kwikala umo, na imunhu yuya nyuwa yakwe ya kundumo ikuwa iha kujumha ya nghonga.” ²⁷ Foyalongage nhaifo, mwanamuke yumonga mwitewa yatowa ikenje na kugamba, “Ibeka imwanamuke yakweleke, na matombo gowonghile.” ²⁸ Imwene hakagamba, “Heye, ninga ibeka awekuihulika imbuli ye Mulungu na kuikola.” ²⁹ Na amatewa fowongesekage, hoyokonga kugamba, “Icheleko chino ni cheleko cha wihi, chikuhananga chitangilo, ninga hechaka chitangilo chochikwinghigwa ninga achiya cha Yona. ³⁰ Kosoko fina Yona foyowile chitangilo kwe wanhu wa Ninawi, nhaifo nofoyekuwa imwana we munhu kucheleko chino. ³¹ Malikiya wa kwekulu kokwinuka mwijuwa dya kuliganisigwa hamwedu na wanhu we cheleko chino na kuwaliganisa, kosoko imwene yeja kulawa ulwandi lwe ndumo ye chilunga, uleke yahulike ubala wa Sulemani, na hano hena munhu mukulu kusuma Sulemani. ³² Awanhu wa Ninawi wokwinuka mwijuwa dya kuliganiswa hamwedu na cheleko chino na kuchiliganisa, kosoko awene hawalamba kwa mahubili ga Yona, langa ahano hena mukulu kusuma Yona.” ³³ “Hechaka munhu iyakwasa taa na kuifisa ama kuigubika ne isege, ninga yakuika muchigwaso, kosoko awekwingila wone ujelu wakwe. ³⁴ Digiso dyako no taa yo umutufi wako, digiso dyako dinghowa dikona, umutufi wose winawo ujelu, ninga nghona disikona umutufi wako wina chisa. ³⁵ Ninga langisisa ujelu uwile umwako ungheje ukuwa chisa. ³⁶ Ninga inghowa umutufi wako wose umema ujelu, hechaka hanhu hena chisa, wokuwa na ujelu muhala, fina itaa foikumulika na ujelu wakwe.” ³⁷ Ugele wuwo woyalongage, Mufalisayo yumwedu hakamugoneka kudiya naye ukwakwe, hakaluta na kwikala hamesa. ³⁸ Imufalisayo hakesina kumona kakonga kudiya chakudiya cha nhegulo nghenati yanawe. ³⁹ Kamei iMundewa hakamugamba, “Hambiya anyeye Mafalisayo mukusunha kunje ye fikombe na sisahani, ninga kugati mumema upujilaji na wihi. ⁴⁰ Anye mubwalate! Iyombile fya kunje soyombile fya kugati? ⁴¹ Ninga lafeni ku wakiwa fyose fuwile kugati na kila chinhu chokuwa chiswanu ukwenu. ⁴² “Usungu ukwenu Mafalisayo! Kosoko mukutosa wanhu saka hata musunga na munafu na mabago gengi, na kuno mukuleka ichawelu na uwendo we Mulungu; agano hayagila mugakole kahi munghaleke agamonga. ⁴³ Usungu wenu Mafalisayo! Kosoko mukwenda amadoga ga kumwande Mumasinagogi na kulamusigwa mumagulilo. ⁴⁴ Usungu wenu! Kosoko mukifana filalo ifisikoneka, na awanhu wakugenda muchanhya yawo bila ya kutanga. ⁴⁵ Yumwedu wa walimu wa shelia hoyomubidula, Mwalimu kwa kulonga nhafi kuchiliga na seye nheifiya.” ⁴⁶ Hoyogamba, “Usungu wenu nanye muwalamusi we isheliya! Kosoko mukuwengha wanhu misigo misito, nanye muweecho musikukwafa ga makanda na chimwedu che fidole fyenu. ⁴⁷ Usungu wenu! Kosoko mukushagila fiswanu mifilalo fya wagonesi wakomigwe ne waBaba senu. ⁴⁸ Mukuhomelela na kuifumila imilimo ya wasehe wenu; Kosoko hawawakoma, nanye mukujengela ifilalo fyawo. ⁴⁹ Na kosoko ubala we Mulungu ukugamba, ‘Nowatumila Wagonesi na watumigwa, awamonga wowakoma na kuwasambasa,’ ⁵⁰ na sakame ye Wagonesi itike kulawa kunghonga ye chilunga, yohanangigwa kucheleko chino. ⁵¹ Kulawa isakame ya Habili mpaka isakame ya Sakalia, iyakomigwe hagati ye hanhu hasunhile na hakulafila filafwa. Heye nikumutamilani yohanangigwa mucheleko chino!” ⁵² “Usungu wenu! Wanhu we malagiso, kosoko muleusa chikumulilo ye misungu; anye muweecho musingile na muwalemesa awaya wendowekwingila!” ⁵³ Foyaleukage kulawa haya, Watulumi na Mafalisayo hawakonga kumwidasa na kumwanda yalonge mbuli nyingi, ⁵⁴ Kumugojela wamukole muchinhu choyedaha kulonga.

¹ Muchigele chicho, wanhu matewa kwa matewa hawakilunda hamwedu mpaka wendewokijata, hakakonga kulonga ne wefusa wakwe kunghonga, “Muwe meso na inungo ya Mafalisayo, nayo no chimwefe. ² Hechaka chigubikwe chisigubuligwa, kahi chifisigwe ichene chisikamanyika. ³ Chochose chomulongile muchisa, chohulikika kuujelu, na chomulongile chinyele kuchumba kugati chotamiliswa munyumba muchanhya.” ⁴ “Nikumutamilani wambwiya sangu, munghogohe awaya wakukoma umutufi, kulawa baho wechaka dyowokudaha kugolosa. ⁵ Ninga nomutamilani nonani wokumwogoha: Mumogohe ayuya, yanghafulusa kukoma, kena udaha wa kuguma munhu kujehanamu, heye! Nikumutamilani mogoheni! ⁶ Togoleni ifindewa fishano fisikuguligwa kwa sendi mbili? Na hechaka chimwedu chikusimiligwa kumwande ye Mulungu. ⁷ Nhani, hata sinjwili sa matwi genu sitaligwa sose. Munghogohe anyeye mukwendigwa lugano kusuma findebwa fingi.” ⁸ “Na nikumutamilani wowose yekunifumila kumwande ya wanhu, imwana we munhu nheifiya komufumila kumwande ya Malaika we Mulungu. ⁹ Amba yuya yekunilema kumwande ya wanhu, kolemigwa kumwande ya Malaika we Mulungu. ¹⁰ Na chila munhu iyekumutofula Mwana we Munhu ngholekeleligwa, amba iyekumutofula Muhe Musunhile nghelekeleligwa. ¹¹ Na wanghawegala anyeye kumwande ya masinagogi na wandewa na wena udaha munghowe na manhonge ifene fomubidula, hegu fomulonga; ¹² Kosoko Muhe Musunhile kowafusa nyeye muchigele chicho agawagile kulonga.” ¹³ Munhu yumwedu mwitewa diya hoyomugamba, “Mwalimu mutamile mundugu sangu yanigawile ichipe changu.” ¹⁴ Ninga hakamugamba, “Gomunhu gwe! Nani yanigolose niye kuwa mulamusi hegu mugawaji wenu?” ¹⁵ Na hakawatamila, “Muhulikise na muwe meso na usulumisi; kosoko uwumi wa munhu usuwile muwingi we finhu foyenafyo.” ¹⁶ Hakawatamila mbasi yakugamba, “Umugunda wa Munhu yumwedu mugoli haweleka lugano. ¹⁷ Hakadoga mumoyo wakwe, ‘Nogolosa nhani kosoko hechaka hanhu hokwika uludyo wangu.’ ¹⁸ Hakagamba, ‘Nogolosa chino: Nosimola sikano sangu, na kujenga singi nghulu lugano, na umo nokwika uludyo lwangu na ifinhu fyangu fyose. ¹⁹ Nani nogoga ne chidoga changu nikugamba agwe gochidoga changu kwina finhu fingi foukiikile sigafu kwa miyaka mingi, bwihila, udiye, unywe, ubwede!’ ²⁰ Ninga Imulungu hakamugamba, ‘Agwe kubwalata! Ichilo achi cha diyelo wekuhananga ichidoga chako; na ifinhu foukiikile fokuwa fyani?’ ²¹ Nofoyowile munhu yakilundila ugoli kosoko yakwe, ninga si mugoli kwe Mulungu.” ²² Yesu hakawatamila wefusa wakwe, “Kosoko iyo nikumutamilani munghakiidase kosoko yo uumi wenu, modiya choni, hegu kosoko yo umutufi mofala choni? ²³ Kosoko uumi ni muswamu kusuma chakudiya, na umutufi ni muswamu kujumha kwifasa. ²⁴ Langeni amahowe gasikuhanda kahi kugola, gechaka chilindo kahi kano, na hata nheifo Mulungu yekugegutisa. Anyeye ibeka mikangha mingahi kusuma amadege! ²⁵ No nani ukwenu kosoko ye chogoho kodaha kongesa majuwa ku wumi wakwe? ²⁶ Ninga nghona musikudaha kugolosa chinhu chidodogi finacho, nhani mukiidasa kosoko ya gamonga? ²⁷ “Langeni ga amaluwa, fogekukula; gasikugolosa milimo hegu kubota; hata nhaifo nikumutamilani, hata Sulemani muditunyo dyakwe dyose nghafasigwe fina dimwedu dya gano. ²⁸ Ninga nghona Imulungu yakudifasa dinyagala dibaho diyelo mumugunda na hosiku dikukubitigwa mumoto, mikangha mingahi kuwafasa anyeye, anye mowanhu we dihuwi dikefu! ²⁹ Na munghahanange chomudiya choni kahi chomukunywa choni, kahi munghowe na manhonge. ³⁰ Kosoko amataifa gose ge chiluga gakuhananga ifinhu afi; na iBaba yenu kamanya fina mukufihananga. ³¹ Ahanhu hakwe, muhanange undewa wakwe, na finhu fyose fyokuwa fyenu nheifiya.” ³² “Munghogohe, itewa didodogi, kosoko iBaba yenu kona fiswanu kuwengha undewa. ³³ Yambaseni fyose fyomwinafyo, muwatase awakiwa; kigoloseleni mikoba isikulala, na isigafu ya kulanga isikuhunguka, ahanhu muhiji nghakusegelela na hechaka nondo ikudiya. ³⁴ Kosoko hena isigafu yako, baho noho ukuwa umoyo wako.” ³⁵ “Mukiyohe kwa dyodyose dilawanisa, na sitaa senu suwe sikwaka, ³⁶ na muwe fina wanhu awakumugojela Mundewa wawo kwija ukaya kulawa kuhalusi, soko wodaha kumukumulila chimwande foyakwija na kugong’onda. ³⁷ Ibeka ku watumwa waya awene wakufikigwa meso iMundewa wawo foyakwija; huwileni nikumutamilani, kokiyoha, kowaleka wekale hamesa na kuwengha chakudiya. ³⁸ Kahi yangheja habehi chilogati ama habehi na kucha na kuwafika nhaifo ibeka awatumwa wo! ³⁹ Ninga mutange nhafi, woile imwenye nyumba yamanyile ugele woyakwija muhiji, hakowa yekuwa meso na nghowile yakuleka inyumba yakwe imoligwe. ⁴⁰ Nanye nheifiya muwe meso, kosoko imwana we munhu yakwija muchigele chomusimanyile.” ⁴¹ “Petulo hakagamba Mundewa, ukuchitamila aseye du imbasi ayi hegu ukuwatamila wose?” ⁴² Na iMundewa hakagamba, “No nani imutogomi musindamafu na iyena misungu, imwene Mundewa wakwe komwika muchanhya ya watogomi wakwe wose, yawenghe ifuka yawo kwa ugele wakwe? ⁴³ Ibeka imutogomi yuya, imwene iMundewa wakwe yangheja kumufika yakugolosa nhaifo. ⁴⁴ Chawelu nikumutamilani, komwika muchanhya ye isawo yakwe yose. ⁴⁵ Ninga imutogomi yuya mumoyo wakwe yanghagamba, ‘iMundewa wangu yekwikalisa kwija,’ na yanghakonga kuwatowa awatogomi we chike ne wechigosi, na kudiya na kunywa na kulewa, ⁴⁶ iMundewa we imutumwa yuya kokwija mwijuwa dyonghamugonele, na chigele chonghamanyile, kumutosa na kumwika hamwedu na wasikuhuwila. ⁴⁷ Na imutogomi ayuya yamanyile inyenda ye Mundewa wakwe, ninga nghekale meso hegu kugolosa fina foikuhananga inyenda yakwe, kotoigwa lugano. ⁴⁸ Ninga ayuya inghamanyile, yanghagolosa wihi yagiligwa kujoligwa, kojoligwa hadodogi. Kahi chila yenghigwe fingi, fyohanangwa fingi kulawa ukwakwe; naye yenghigwe fingi na wanhu wohananga fingi lugano.” ⁴⁹ “Nija kwasa moto muchilunga, nani hanyendaga uwe ufulusa kwaka. ⁵⁰ Ninawo ubatiso unyagile kubatiswa, langa fonikugaya mpaka umemeleke. ⁵¹ Mukudoga fina nija niwengha idigoya muchilunga? Ka! Nikumutamilani, ninga matemanuko. ⁵² Kosoko kulawa hambiya munyumba imwedu mokuwa wanhu washano wakitemanule, wadatu kwa weli, na weli kwa wadatu. ⁵³ Wokitemanhula iBaba munhu ne imwanagwe, na imwana ne iBabakwe; ing’ina ne imwanagwe we chike, na imwana we chike ne ing’ina; ng’ina fyala ne muke mwana, kahi muke mwana ne ingina fyala.” ⁵⁴ Kahi hakawatamila amatewa, “Fomukona ifunde dikwinuka kuchanhya mukulonga hamwedu fina ifula ikwija; na ikulawanisa nhaifo. ⁵⁵ Na fomukona imheho yo kulume ikupumhuna, mukugamba, ‘Kokuwa na ifuke ikali, na nofoikuwa.’ ⁵⁶ Anye we chimwefe! Mumanya kutanga ichihanga che isi na ulanga; ninga nhani musikudaha kutanga ugele wa hambiya?” ⁵⁷ “Kahi nhani musikulamula muwecho amaswanu? ⁵⁸ Nghona ukuluta ne musongesi wako kwe mulamusi, golosa ludole kifumilisa naye munjila, yangheje yekwigala mumikono ya musilikali na imusilikali yakugume muchifungo. ⁵⁹ Nikukutamila nghukulawa mo mpaka ulihe isendi ye ndumo.”

¹ Hahowa na wamonga wowile baho muchigele chicho, awamutamile imbuli ya Wagalilaya awakomigwe na Pilato ne sakame yawo kuhasigwa na iya ye filafwa fyawo. ² Na hoyowabidula, “Mukudoga fina Awagalilaya awo hawowa na uwihi mwingi kusuma Awagalilaya wose, kosoko hawapatigwa nago gehile? ³ Nikumutamilani, si nheifo; ninga munghaleka kulamba anye mose nheifiya mukwangilila. ⁴ Mukugelegela awaya ikumi na munana awakomigwe kosoko hawogwiligwa na umunala akuya Siloamu, mukudoga fina waya hawowa wehile kusuma wose wekalage Yelusalemu? ⁵ Nikumutamilani, wasowile nheifo, ninga munghaleka kulamba anye mose mukwagilila.” ⁶ Yesu hoyowatamila kwa mbasi: “Munhu yumonga hakowa na musada uhandigwe mumugunda wakwe; hoyokwija kuhananga mamudyo mumusada na nghagapatile. ⁷ Hakalonga ne imwimilisi wo umugunda, ‘Langa, miyaka ino midatu nija kuhananga mamudyo mumusada awu, na sipatile chinhu, ung’enye; nhani ukongha chaka isanga?’ ⁸ Hakamubidula, ‘Dileke dikule Mundewa, umwaka uno nawo; mpaka nidifukisile na kudigumila mboleya. ⁹ Na ungheleka mamudyo umwaka ukwija ni fiswamu, ninga nghona si nheifo, ukudaha kung’enya.’” ¹⁰ Kahi Yesu yendeyofusa Mwisinagogi dimwedu mwijuwa dye Sabato. ¹¹ Na baho hahowa na mwanamuke yowile mutamu kwa miyaka ikumi na munana kosoko ya kwingiligwa na mhepo ihile, hakatendigwa kagongomana na nghadahage kigolola imwecho. ¹² Na Yesu foyamonile, hoyomwinanga na kumugamba, “Mudala, kuhonyigwa utamu wako.” ¹³ Hakamwikila mikono muchanhya yakwe, na baho ni baho hoyogoloka, na kumutunya Mulungu. ¹⁴ Ninga imukulu we disinagogi kadeseka kosoko Yesu kamuhonya munhu mwijuwa dye Sabato, hakawatamila wanhu, “Hena majuwa mutandatu aganogele kugolosa milimo, mwija muhonyigwe majuwa gago, na siyo mwijuwa dye Sabato.” ¹⁵ Kahi iMundewa yamubidula, “Agwe wechimwefe! Chila munhu mwijuwa dye Sabato nghekudohola inghambaku yakwe hegu dipunda dyakwe kulawa mwidewa na kuigala kulwanda? ¹⁶ Na isimwagile imwanamuke ayuno, biti Ibulahimu yowile yohigwe ne chifungo che Shetani kwa miyaka ikumi na munana, yoholigwe kulawa muchifungo mwijuwa dye Sabato?” ¹⁷ Foyalongile nheifo, awanghondo wakwe hawengila chinyala, na wanhu wose weja wonela kosoko ye matunyo gose gagoloseke ne imwene. ¹⁸ Kahi hakagamba, “Undewa wa kulanga ukifana choni? Nouliganisa na choni? ¹⁹ Ukifana mbeyu yo umheja yoyalondile munhu na kuihanda mumugunda wakwe, hayota na kukula na kuwa ibiki ikulu, na fidege hofigolosa mafulu mumanhambi gakwe.” ²⁰ Kahi keli hakagamba, “Nouliganisa na choni undewa wa Mulungu? ²¹ Ukifana nungo yalondigwe ne mwanamuke na kuiguma mu simhishi ndatu sa usage, mpaka usage wose usasa.” ²² Hakagendelela ne inhambo yakwe kuluta Yelusalemu na munjila hakalokela musikaya na fijiji, na kufusa umo. ²³ Na munhu yumwedu hakamusa, “Mundewa, awakuhonyigwa wokuwa wakefu?” Hoyowagamba, ²⁴ “Mugangamale kwinjila ko umulongo umusisili; kosoko wengi nikumutamilani wohananga kwingila wanghadahe. ²⁵ Ugele wokwija imwenye nyumba kokwinuka na kuhinda umulango; mokonga kwima kunje na kugong’onda hamulango, mukugamba, ‘Mundewa, chikumhulile!’ Kowabidula, ‘Simumanyile komukulawa.’ ²⁶ Kahi mokonga kugamba, ‘Hachidiya na kunywa hamwedu na gweye, na hakafusa mukaya setu!’ ²⁷ Ninga kogamba, ‘Nikumutamilani, simanyile komukulawa; leukeni, anye mose muwagolosaji wa wihi!’ ²⁸ “Baho molila na kugwegwejula meno, fomukamona Ibulahimu na Isaka na Yakobo na wagonesi wose mu Undewa we Mulungu nanye muwecho kutagigwa kunje. ²⁹ Na wanhu wokwija kulawa kundawilo ye dijuwa na kuuswilo, na kulawa kutwe na kwikulu, na kwikala muchakudiya mu undewa we Mulungu. ³⁰ Langa! Wamonga wakundumo wokuwa kunghonga, na wamonga wakunghonga wokuwa wa indumo.” ³¹ Muchigele chicho Mafalisayo wamonga weja, na kulonga naye, Leuka hano kosoko Helode yakuhananga yakukome. ³² Hakawagamba, “Gendeni kamutamileni ayuya dibwasiko: Langa, nikulafa mhepo na kugolosa uhonyaji diyelo na nhousiku na mwijuwa dya kadatu nikufulusa milimo yangu. ³³ Hata nheifo, inyagila kuluta munjila yangu diyelo na nhosiku na chisindo, kosoko isikudahika Mugonesi yakomigwe kunghanda ya Yelusalemu. ³⁴ Agwe Yelusalemu, Yelusalemu, goukukoma wagonesi na kuwatowa na mawe awaya awatumigwe ukwako! Mikangha mingahi hanihananga kuwakunjagisa kifana inghuku foikukunyagisa ifyali fyakwe hasi ye mabawa gakwe, kahi musifumile! ³⁵ Langa inyumba yenu ilekigwa. Nikumutamilani, musinyona mpaka mulonge, Ibeka ayuya iyakwija mwisina dye Mundewa!”

¹ Musabato imwedu Yesu foyaluta kudiya munyumba ya chilongosi yowile Mufalisayo, wenda wemunyembela. ² Langa! Hawowa na Munhu kumwande yakwe yowile na utamu wa kufimba mutufi, ³ na Yesu hakalonga na walamusi na Mafalisayo yakugamba, “Ni fiswanu kuhonya mwijuwa dye Sabato hegu si fiswam?” ⁴ Ninga, awene weja wanyamala, kamei hoyomulonda na kumuhonya, na kumuleka yalute. ⁵ Hakawagamba, “No nani ukwenu yena dipunda hegu dikambaku idilagale mwikolongo, inghekudilafa chimwande mwijuwa dye Sabato?” ⁶ Howonyamala twi. ⁷ Kahi hakawatamila mbasi awaya wagonekigwe, foyonile fina fowasagule magoda ga kumwande hakawagamba, ⁸ “Unghagonekigwa na munhu kuhalusi, unghekale a hanhu ha kumwande, ingheje ikuwa kagonekigwa munhu mukulu kusuma gweye, ⁹ na yuya yawagoneke wose kokwija na kukugamba, ‘Mwinghe luneka munhu ayu,’ baho kokonga kwa chinyala kwikala mwigoda dya hasi. ¹⁰ Ninga, unghagonekigwa, luta na kwikala mumagoda ga kunyuma, kahi imukaya wako yangeja kodaha kugamba, ‘Mbwiyangu, nyagula kuno kumwande, no houkuwa na itunyo kumwande ya wose awekale hamesa hamwedu na gweye. ¹¹ Kosoko wowose yakiinula kodulisigwa na yakidulisa kokwisigwa.’” ¹² Kahi hakamutamila ayuya yumugoneke, “Unghatogoma chakudiya cha nhemisi ama cha ijuwa ikulu, unghagoneke wambwiya sako, ama wanduguso ama wanhu wa lukolo lwako hegu awagoli we habehi nagwe, wangheje nawo wekugoneka na kuhokela maliho gako. ¹³ Ninga foukugolosa sikukuu wagoneke awakiwa, awesikidaha, awechete na womudula; ¹⁴ yokuwa ibeka ukwako kosoko awo wasikudaha kukuliha. Kolihigwa ugele wa kwinuligwa awaya awachawelu.” ¹⁵ Yumwedu wa waya wowekalanye mumesa foyahulike gago, hakamugamba, “Ibeka imunhu iyakiyodiya chakudiya kuundewa we Mulungu!” ¹⁶ Ninga Yesu hakamugamba, “Munhu yumonga hakagolosa sikukuu nghulu, na kugoneka wanhu matewa. ¹⁷ Ugele we chakudiya ukasegelele, hakatuma mutogomi wakwe kuwatamila awaya awagonekigwe, mwije kosoko fyose fifuluka! ¹⁸ Ninga wose wakonga kikojela kwa moyo umwedu. Iwabosi kamugamba, ‘Nigula mugunda, na nikuhanangigwa nilute na kuwona; nghulambila dedede unilekelele.’ ¹⁹ Yumonga kagamba, ‘Nigula makambaku ikumi ga ng’ombe, nikwija gagesa, nikukutasa dedede nilekelele.’ ²⁰ Na yumonga kagamba, ‘Nimutola Mwanamuke na kosoko iyo sidaha kwija.’ ²¹ Imutumwa yuya hoyokwija na kumutamila iMundewa wakwe. Kahi imwenye nyumba kwa nyono hakamutamila imutumwa wakwe, ‘Leuka chimwande ulute kunjila inghulu na kufijila fya kumbago fye ikaya, na uwengise awakiwa, awesikudaha, awechete na wasikona.’ ²² Imutumwa hakagamba, ‘Mundewa, ago goulagise gafulusa kugoloseka na kunghali na luneka.’ ²³ iMundewa hakamutamila imutumwa wakwe, ‘Leuka ulute kusinjila singhulu na mumihaka uwadindilise wanhu kwingila kugati soko inyumba yangu imeme. ²⁴ Kosoko nikukutamila, hechaka yumwedu wa awaya wagonekigwe iyodiya ichakudiya chonikugolose.’” ²⁵ Baho amatewa makulu ga wanhu gendogamwandamila, hakabiduka na kuwagamba, ²⁶ “Nghona munhu wowose yakwija ukwangu na nghakumusula iBabakwe, ing’inakwe na imuke na wanagwe, na wanduguse we chigosi ne walumbuse, heye! Na hata uumi wakwe imwecho, nghedaha kuwa mwifusa wangu. ²⁷ Munhu wowose ingholonda umusalaba wakwe na kunyandamila, nghodaha kuwa mwifusa wangu. ²⁸ Kosoko no nani ukwenu, yanghahananga kujenga munala, nghakwikala kunghonga na kutala digelo, nghona yenafyo fya kudaha kumala umunala. ²⁹ Nghona nheifo, foyakumala inghindiso, na nghekudaha kuimala, wose wakona wokonga kumutowa, ³⁰ wakugamba, ‘Imunhu ayu hakakonga kujenga, kalemeligwa kumalagisa!’ ³¹ “Kahi kwina Mundewa waki, yanghahananga kitowa nghondo, inghakwikala hasi kunghonga na kudoga fina kodaha na wanhu ifigulu ikumi kwitang’anyila na yuya yakwija kitowa na wanhu figulu makumi meli? ³² Yanghona fina nghodaha, imiyagwe yekali kutali, yakumutuma munhu na kutasa kilamula. ³³ No nheifo, wowose ukwenu nghakulekelela foyenafyo, nghakudaha kuwa mwifusa wangu.” ³⁴ “Munyu ni muswanu, amba unghasusuka wogumigwa choni unogelekele? ³⁵ Usidaha kuwa muswanu kuuisi ama kwikusisi; wanhu wakuutaga. Iyena singhutwi sa kuhulika yahulike.”

¹ Ijuwa dimonga awakong’osa kodi na wena uwihi wose weja wamwijila na kumutegelesa. ² Mafalisayo na Watulumi wang’ung’ulika wakugamba, “Imunhu ayu yakuwahokela awena uwihi kahi yakudiya nawo!” ³ Yesu hoyowatamila imbasi ayi: ⁴ “Munhu waki ukwenu yena singholo igana, yanghagililigwa na imwedu, nghakuleka asiya makumi ikenda na ikenda munyika na kuluta kuihananga iyagilile, mpaka yayone? ⁵ Na yanghayona, yakuipika mumayega kwa chinyemi. ⁶ Na foyekuya ukaya, yakuwenanga hamwedu awambwiya sakwe na wehabehi naye yakugamba, ‘Muwe na chinyemi hamwedu na niye kosoko niyona ingholo yangu yagilile!’ ⁷ No nheifo nikumutamilani, kokuwa na chinyemi chikulu kulanga kosoko yo kulamba kwa yumwedu yena uwihi kujumha makumi ikenda na ikenda awakoneka fina wechaka nghwina ya kulamba.” ⁸ “Mwanamuke waki yena shilingi ikumi, yanghagilisa imwedu, nghakwasa taa na kushagila inyumba na kuhananga digoya mpaka yayone? ⁹ Na yanghayona yakwinanga wambwiya sakwe na wehabehi naye, yakugamba, ‘Bwedeleleni hamwedu na niye, kosoko niyona ishilingi yonyagilise. ¹⁰ No nheifo nikumutamilani, kwina chinyemi kumwande ye Malaika we Mulungu kosoko ye munhu yumwedu yakulamba.’” ¹¹ Hakagamba, “Hahowa na munhu yowile na wana weli. ¹² Na imudodogi hakamugamba, ‘iBabakwe, Baba ninghe ichipe changu ichinyagile, hakawagawila awanagwe aweli ichipe chakwe.’ ¹³ Majuwa mengi gasilokile, imwana mudodogi hakausa isawo yakwe yose na kuleuka ukaya na kuluta kuisi ya kutali, na uko hakadiya isawo yakwe ku mikalile ihile. ¹⁴ Foyafuluse kudiya fose foyowile nafyo, njala nghulu hoikwingila muisi iya, hoyokonga kuhananga. ¹⁵ Noho yaluta na kutasa Mulimo kwe mukaya yumwedu we isi iya, iyamwigale kumugunda wakwe kulisha singuluwe. ¹⁶ Naye yasulumila kudiya imhumba yadiyagwe na singubi na hechaka munhu yamwinghile chinhu. ¹⁷ Ninga foyagelegele hakagamba, ‘Nhafo watogomi wengahe we iBabangu iwakudiya na kusigasa, ninga niye nikufa ne injala ahano! ¹⁸ Noleuka na kuluta kwe iBabangu na kumugamba, Baba nimugolosela wihi Mulungu na gweye. ¹⁹ Sagile kahi kwinangigwa mwanago, nilonde kifana yumwedu wa watogomi wako.’ ²⁰ Hakaleuka na kwija kwe iBabakwe, ninga foyowile yekali kutali, iBabakwe yamona na kumonela ubasi, hakamubilimila kamukunyatila na kumunonela. ²¹ “Ne imwana hakamugamba, ‘Baba, nigolosa uwihi kwe Mulungu na ukwako; sagigwe kahi kwinangigwa mwanago.’ ²² Ninga iBabakwe hakawagamba iwatumwa, ‘Leteni chimwande isuke iswamu, mumufase, kahi mufaseni nyamwidole mumukono wakwe na filwatu mumigulu yakwe; ²³ leteni indama iginile na muichinje, lekeni chidiye na kubwedelela. ²⁴ Kosoko ayuno imwanangu hakofa, naye mumi kahi; hakagilila naye koneka.’ Na howokonga kubwedelela. ²⁵ “Ugele uwo imwanagwe imukulu hakowa kumugunda; na foyafikile habehi ne hakaya, hakahulika majwi ga ng’oma na miseigo. ²⁶ Hakamwinanga yumwedu wa watumwa na kumusa, ‘Ichikugendelela choni?’ ²⁷ Hakamugamba, ‘Imunduguso keja, ne iBabako kamuchinjila ndama inonile, kosoko kamupata mumi na muswamu.’ ²⁸ “Ninga imwana mukulu hakasuha na kulema kwingila; iBabakwe hakaluta na kumugongelesa, ²⁹ ninga imwana mukulu hakamubidula iBabakwe, ‘Langa minyaka ayi mingi nikala kukutogomela milimo, na sinhati nileke kugolosa agaya gounilagise; kahi nghwinati uninghe hata chipene, soko nyonele ne wambwiya sangu. ³⁰ Ninga, ayuno imwanago foyejile, yadiile isawo yako hamwedu na we dihabwa, kumuchinjila ndama inonile!’ ³¹ “iBabakwe hakamugamba, ‘Mwanangu, ugele wose kwahamwedu na niye, na fyose fyoninafyo ni fyako. ³² Hayagila kunyemuka na konela, kosoko ayu imunduguso hakowa yafile, hambiya mumi, hakagilila, kahi koneka.’”

¹ Kahi hakalonga na wefusa, “Hahowa na munhu mugoli yowile na mwimilisi, usongesi hawija ukwakwe fina, imunhu ayu yendeyoboshola ifinhu fyakwe. ² Hakamwinanga na kumutamila, ‘Choni chino chonikuhulika muchanhya yako?’ Lafa inhala yako yo kuhokela na kulafa, kosoko nghukudaha kahi kuwa kalani. ³ Ayuya ikalani hakadoga, ‘Notea nhani, kosoko iMundewa wangu yakunihoka ukalani? Uludole lo kulima nichaka, na nikona chinyala kutasa. ⁴ Hambiya, nimanya dyonigolosa, uleke wanhu wanihokele ukwawo fonikulafigwa mu ukalani.’ ⁵ “Baho, hakawenanga awasinghokwa we Mundewa wakwe chila yumwedu, hoyamutamila ayuya we nghonga, ‘Ukupigiligwa choni ne Mundewa wangu?’ ⁶ Hakagamba, ‘Mafuta mapipa igana.’ Hakagamba, ‘Londa ikalatasi ye dideni, ikala chimwande na utulume makumi mashano.’ ⁷ Kahi hakalonga ne yumonga, ‘Nagwe ukupigiligwa choni?’ Hakagamba, ‘Makanda igana ge ngano.’ Hakamugamba, ‘Londa ikalatasi ye dideni tuluma makumi munana.’ ⁸ “iMundewa hakamutunya ikalani inghahuwilika kosoko ya ubala wakwe, kosoko awana we chilunga chino wena misungu mucheleko chawo kusuma awana wo ujelu. ⁹ Yesu hakagamba Nani nikuwatamila kigoloseleni mbwiya kosoko ye ugoli wihile, kosoko foikwija ihela wodaha kuwahokela muwikalo wa majuwa gose. ¹⁰ Imuchawelu muchidodogi lugano ni muchawelu kahi mudikulu; na yuya imupujili muchidodogi lugano ni mupujili kahi mudikulu. ¹¹ Ninga nghona musuwile wachawelu mu ugoli uwihile, no nani yewengha ugoli we chawelu? ¹² Na nghona musuwile wachawelu mufinhu fya wanhu wengi, no nani yewengha afiya ifyenu? ¹³ “Hechaka mutogomi yedaha kuwatogomela wandewa weli; kosoko ama komusula yumwedu na kumwenda yumonga, ama komwandamila yumwedu na kumubesa yumonga. Musikudaha kumutogomela Mulungu na ugoli.” ¹⁴ Amafalisayo wowile wendaji wa sendi, hawahulika ago gose, na weja wamubesa. ¹⁵ Ninga hakawagamba, “Anye nomukiyonesa kumwande ya wanhu, amba Imulungu kamanya imimoyo yenu, kosoko ikwinuligwa mugati ya wanhu ni lubeso kwe Mulungu. ¹⁶ “Itolati ne wagonesi hafyuwa baho mpaka ugele wa Yohana; kulawa ugele wuwo mbuli swamu yo undewa wa Mulungu ikuhubiliigwa, na chila munhu yakuwingila kwa ludole. ¹⁷ Ninga ni fihufu ku ulanga ne iisi kwagilila, kusuma ichipisi chidodogi che itolati kuhunguka ¹⁸ Chila munhu yakumuleka imuke na kutola yungi yakugolosa ugoni, na iyekutola imuke yalekigwe ne imulume wakwe yakugolosa ugoni.” ¹⁹ “Hahowa na munhu mugoli, yafalage suke sa ibei inghulu na kudiya fina sikukuu chila ijuwa. ²⁰ Na hamulango wakwe ayuya imugoli yendeyetambalisigwa munhu mukiwa disina dyakwe Lasalo, yena filonda fingi, ²¹ yenda yehosa injala yakwe na simhonamhona salagalage kulawa mumesa ye mugoli; kahi amabwa hageja na kumunamha ifilonda fyakwe. ²² Imukiwa hakafa, malaika hawamwinula mpaka muchifa cha Ibulahimu. Imugoli naye hakafa na kusikigwa, ²³ imugoli foyowa ukusimu, foyowile mumagayo hoyokwinula meso gakwe na kumona Ibulahimu kwa kutali na Lasalo muchifa chakwe. ²⁴ “Hoyokwinanga kwa dijwi ikulu, ‘Baba Ibulahimu unyonele ubasi, umwigale Lasalo kuchanghisa ichidole chakwe mumeji na kuhosa dilimi dyangu, kusoko nikugaya mwililimba dino.’ ²⁵ “Ninga, Ibulahimu hakamugamba, ‘Mwanangu gelegela fina munyikala yako kuchilunga hakuhokela finhu fiswanu, na iLasalo nheifiya hakahokela finhu fihile; ninga hambiya imwene kowa hano yakuhosigwa, na gweye kwa mumagayo. ²⁶ Na hamwedu na gago gose, hagati yetu aseye na nyeye hena ikolongo ikulu, kosoko awaya wakwenda kuloka kulawa hano kwija ukwenu wanghadahe, na hechaka yeloka kulawa ko kwija ukwetu.’ ²⁷ “Iyowile mugoli hakagamba, ‘Ninga nikukutasa Baba, umwigale kunyumba ye Babangu, ²⁸ kosoko nina wandugu sangu washano, naye yawatamile wanghagolose fyene fyonigolose, wangheje nawo wokwija ahanhu hano ha magayo.’ ²⁹ “Ninga Ibulahimu hakagamba, ‘Wenawo Musa na Wagonesi, wawahulike awene.’ ³⁰ Imwene hakagamba, ‘Hata Baba Ibulahimu, amba yanghawalutila yumonga kulawa kwe wafile, wolamba.’ ³¹ Hakamugamba, ‘Nghona wasiwahulike Musa ne wagonesi, kahi hechaka yewahuisa hata yanghenuka kulawa kwe wafile.’”

¹ Yesu hakawatamila awefusa wakwe, “Amagesa ku uwihi chawelu gokwija, ninga usungu wakwe iyakugagolosa geje! ² Haimwagila imunhu yuya nhanga yohigwe diwe dyo kusagila musingo yakwe na kugumigwa mubahali, kusuma kumwagilisa yumwedu wa wano wadodogi ku uwihi. ³ Kilangisiseni, Nghona imunduguso kagolosa wihi mugombele, na yanghalamba mulekelele. ⁴ Na iyakugolosela uwihi mikangha mufungate kwa ijuwa na kuya ukwako mikangha mufungate, na kugamba Nilamba, mulekelele.” ⁵ Awefusa hawamutamila iMundewa, “Chongesele dihuwi.” ⁶ Na iMundewa kagamba, “Nhanga mowile na ihuwi ikefu fina imhule ye umheja, hamuwa mukudaha kuutamila umukuyu, ‘Uno ng’oka, ukahandwe mubahali,’ nawo hauwa ukufumila.” ⁷ “No nani ukwenu yena imutogomi yekulima ama kudima ngholo, yakumugamba foyekuya kumugunda, ‘Wija chimwande, ikala udiye chakudiya?’ ⁸ Togola! Nghemugamba, ‘Nyambikile chakudiya, ukiyohe unitogomele, mpaka nidiye na kunywa; noho nagwe udiye na kunywa.’ ⁹ Togola, komugamba kwimage imutumwa yuya kosoko kagolosa goyalagisigwe? ¹⁰ No nheifo na nyeye fomukufulusa kugolosa gose gomulagiswe, gambeni, ‘Aseye cha watogomi wechaka chambusi; chigolosa du yowile milimo yetu.’” ¹¹ Foyejayowa munjila kuluta Yelusalemu, yeja yapulutila Samalia na Galilaya. ¹² Na foyengilage muchijiji hakatang’anyila na wakoma ikumi, wemile hatali, ¹³ hawenula majwi gawo na kugamba, “Yesu, Mundewa, uchonele ubasi.” ¹⁴ Foyawonile yawagamba, “Mulute mukayonese kwa watambiki.” Na fowalutage hawahona. ¹⁵ Kahi yumwedu wawo yakone fina kahona, hakoya kunyuma, yakumutunya Mulungu kwa dijwi ikulu, ¹⁶ na hakakubita hamigulu ya Yesu, na kumwingha ilumbo. Naye hakowa Musamalia. ¹⁷ Ninga Yesu hakagamba, “Siwahonyile ikumi? Awaya ikenda wowahe? ¹⁸ Nghoneke yungi yowile na kumutunya Mulungu ninga imugeni ayu?” ¹⁹ Hoyomugamba, “Inuka ulute, dihuwi dyako dikuhonya.” ²⁰ Foyosigwe na Mafalisayo, “Undewa we Mulungu ukwija milaki?” hakawabidula, “Undewa we Mulungu usikwija ne fitangilo fikiyonesa. ²¹ Na hechaka munhu yegamba, ‘Langa auno hano,’ ama, ‘Auya.’ Kosoko langa, undewa wa Mulungu uwa mugati yenu.” ²² Na kawatamila wefusa wakwe, “Majuwa gokwija, ugele womukamusulumila kona ijuwa dimwedu dye mwana we munhu, na musidyona.” ²³ Nawo wowatamila, “Langa kuya, ama langa kuno, munghalute,” kahi munghawandamile. ²⁴ Kosoko fina ulumwemwe foukumulika na kwasa ulanga kulawa ulwandi umwedu mpaka umonga, no nheifo Imwana we Munhu foyekuwa mwijuwa didyo. ²⁵ Ninga, kunghonga ikuhanangigwa yapate magayo mengi na kulemigwa ne wanhu wo ugele uwo. ²⁶ Fina foyowile mumajuwa ga Nuhu, no foikwija ikuwa mumajuwa ge Mwana we munhu ²⁷ Wanhu wendawodiya, wendawokunywa, wendawetola, wendawetoligwa mpaka dijuwa diya Nuhu dyoyengila musafina, na mafaluko hogekwija na kuwakoma wose. ²⁸ Kahi fina foyowa mumajuwa ga Lutu, wendawodiya, wendawekunywa, wendawogula na kwambasa finhu, wendawohanda, wendawojenga, ²⁹ ninga mwijuwa diya Lutu foyaleuke kulawa Sodoma homutonya moto kulawa kulanga na kuwalakasa wose. ³⁰ No nheifo foikwija ikuwa mwijuwa diya iMwana we munhu foyekwija yekiyonesa. ³¹ “Mwijuwa didyo, iyowile munyumba muchanhya ne finhu fyakwe kugati yanghahulumuke na kufilonda; na nheifiya, yowile kumugunda yanghoye kunyuma. ³² Gelegeleni dyalawanise kwe muke wa Lutu. ³³ Wowose yakuhananga kuchihonya ichidoga chakwe yakuchagilisa; na yoyose yakuchagilisa chidoga chakwe yakuchihonya. ³⁴ Nikumutamilani, muchilo chiya hokuwa na wanhu weli wagonile mwisasi, dimwedu, yumwedu kalondigwa na yumwedu kolekigwa. ³⁵ Wanawake weli wokuwa wakusaga hamwedu; yumwedu kolondigwa na yumonga kolekigwa. ³⁶ Wanhu weli wokuwa kumugunda; yumwedu kolondigwa na yumonga kolekigwa.” ³⁷ Baho howomwusa, Hoki Mundewa? Hakagamba, “Howuwile umufimba noho sikitang’anyila sinumba.”

¹ Hakawatamila mbasi kuwafusa fina iwagila kumutasa Mulungu majuwa gose na wanghasoke. ² Hakagamba, “Mukaya imonga hahowa na mulamusi yowile nghakumogoha Mulungu kahi kutunya wanhu.” ³ Kahi hahowa na mwanamuke mwigane mukaya iyo yamwijilage bila kusoka na kumugamba, “Nigolose muchawelu kumwande ye munghondo wangu.” ⁴ Kwa chipisi hakalema; ninga hanyuma hakalonga mumoyo wakwe, “Hata nghona sikumogoha Mulungu ama kogoha wanhu, ⁵ ninga kosoko yuno mwanamuke mwigane yakunidasa, nomugolosela foyakuhanga ama konisokesa kwa kwija kwakwe chila ugele.” ⁶ iMundewa kagamba, “Hulikeni foyakulonga ayuya imulamusi yechaka chawelu. ⁷ Ne Mulungu nonghamba inghowalongela awaya wayasagule, awakulila ukwakwe chilo ne misi? Togoleni! Kokwikalisa kuwategelesa? ⁸ Nikumutamilani kowateteya chimwande. Hata nheifo ugele wo yakwija iMwana we munhu muchilunga kodyona dihuwi?” ⁹ Kahi hakawatamila mbasi ino, kwa wamonga awekiyona fina hawowa wachawelu na kubesa wayawo. ¹⁰ Wanhu weli hawakwila kwihekalu kutasa, yumwedu Mufalisayo na yumonga mukonghosa kodi. ¹¹ iMufalisayo hakema na kutasa chiyomoyo, go Mulungu, nikukulumba kosoko aniye si kifane wanhu wamonga, wahokali, wabani, wa dihabwa, ama kifana ayu imukonghosa kodi. ¹² Nikufunga majuwa meli kwa majuwa mufungate, nikulafa saka ya imwedu kwa chila ikumi kwa fyose fyonikupata. ¹³ Ninga imukonghosa kodi, yemile kutali, nghendile hata kulanga kuchanhya, ninga haketowa muchifa chakwe, yakugamba, “Mulungu, unyonele ubasi aniye nimugolosaji wo wihi. ¹⁴ Nikumutamilani, imunhu ayu hakoya ukaya ukwakwe yataliligwe muchawelu kusuma yumonga; kosoko chila iyakiinula yakudulisigwa ninga chila iyekidulisa yakwinuligwa.” ¹⁵ Awanhu hawamwigalila Yesu hata awana uleke yawamotese, na awefusa wakone hawalemesa. ¹⁶ Ninga Yesu hakawenanga ukwakwe yakugamba, “Walekeni awana weje ukwangu, munghawalemese, kosoko undewa we Mulungu ni wawo. ¹⁷ Chawelu, nikumutamilani, wowose nghakuuhokela undewa wa Mulungu fina mwana mudodogi nghekwingila mu undewa uwo.” ¹⁸ Na mukulu yumonga wa Chiyahudi hakamusa Yesu, Mwalimu muswamu, nigolose choni uleke niuhokele uwumi wa majuwa gose? ¹⁹ Yesu hakamugamba, “Nhani ukuninanga muswamu? Hechaka munhu muswamu ninga Mulungu yemwene.” ²⁰ Kugamanya amalagiso: “Unghagolose dihabwa; unghakome; unghadanhe, wogohe iBabako ne ing’inako.” ²¹ Hakagamba, “Aga gose nigakola kulawa udodo wangu.” ²² Yesu yakahulike nheifo, hakamugamba, “Kuhungukiligwa chinhu chimwedu. Yambasa fyose fyowinafyo na ufigawe kwe wakiwa, nagwe kokuwa na sigafu kulanga, kamei wije unyandamile.” ²³ Ninga, foyahulike gago, hakowa na usungu, kosoko hakowa mugoli lugano. ²⁴ Yesu foyamonile foyasuhile hakatamila Foikuwa nghugutu ku wagoli kwingila kuundewa wa Mulungu! ²⁵ Kosoko ni fihufu kwe ingamiya kwingila mwihengele dye sing’ano kusuma imugoli kwingila mu undewa we Mulungu. ²⁶ Awaya wahulike hawagamba, “Ninga no nani yedaha kuhona?” ²⁷ Ninga hakagamba, “Ichisikudahika ku wanhu, kwe Mulungu chikudahika.” ²⁸ Petulo hakamugamba, “Langa aseye chileka fyose na kumwandamila.” ²⁹ Hakawagamba, “Chawelu, nikumutamilani, hechaka munhu yalekile nyumba, ama muke, ama wanduguse we chigosi, ama iBabakwe ne ing’ina, ama wanagwe, kosoko yo undewa wa Mulungu, ³⁰ inghehokela mikangha mingi hambiya, na muchilunga chikwija, uumi wa majuwa gose.” ³¹ Foyawalondile awaya ikumi na weli, hakawagamba, “Langa chikukwila kuluta Yelusalemu, na chila chinhu chandikigwe soko ye Mwana we munhu ne wagonesi chomemelesigwa. ³² Kosoko kogumigwa mumikono ya wanhu wa Mumataifa, kokogeleligwa na kogoloseligwa kwa chinyala na kutwiligwa mate; ³³ womutowa mikotya na kumukoma, na mwijuwa dya kadatu kekwinuka.” ³⁴ Amba imene wasatangile dyodyose dya gago, inonga yo, haifisigwa ukwawo, na wasatangile chalongigwe. ³⁵ Foyafikile habehi na Yeliko, imunhu inghakona hakekalaga hanghanda ye injila na kutasa; ³⁶ Foyahulika ditewa dyalogage, hakawosa wowile habehi naye, “Kwina choni?” ³⁷ Hawamugamba, “Yesu wa Nasaleti yakuloka.” ³⁸ Hakatula chowe, “Yesu, Mwana wa Daudi, unyonele ubasi.” ³⁹ Na waya wowile kumwande yakwe hawamulemesa, wakumugamba yanyamale; ninga imwene hakongesa kujoja, “Mwana wa Daudi, unyonele ubasi!” ⁴⁰ Yesu hakema, na kulagisa yegaliligwe imunhu yuya; ⁴¹ na foyejile habehi, hoyomusa, “Ukuhananga nikugolosele choni?” Hakagamba, “Mundewa, nikuhananga unigubule ameso gangu.” ⁴² Yesu hakamugamba, “Ameso gako gagubuke, wone! Dihuwi dyako dikuhonya.” ⁴³ Baho ni baho ameso gakwe hogegubuka na hakamwandamila, yamutunya Mulungu na wanhu wose wakone gago howomutunya Mulungu.

¹ Yesu hakengila Yeliko na hakapulutila mukaya iyo. ² Na hahowa na munhu disina dyakwe Sakayo; hakowa mukulu wa wakonghosa kodi, na munhu mugoli. ³ Hakagesa kumona Yesu ni munhu wa namuna yaki, ninga nghadahile kosoko ye ditewa dya wanhu naye hakowa munhu muguhi. ⁴ Ninga, hakabilima kumwande na kukwila mumukuyu kumona, kosoko hayuwa yapulutile baho. ⁵ Na Yesu yakafike ahanhu haya, hakalanga kuchanhya na kumugamba, “Sakayo, hulumuka hasi chimwande, kosoko na mugeni wako diyelo.” ⁶ Sakayo hakahulumuka hasi chimwande, na kumuhokela kwa chinyemi. ⁷ Awanhu fowonile nheifo, hawang’ung’ulika, Kaluta kuwa mugeni wa munhu yena uwihi. ⁸ iSakayo hakema na kumutamila Mundewa, Lnga, Mundewa inusu ye Sawo yangu nikuwengha iwakiwa, na nghona nimudanhilise munhu chinhu chochose, nikumuwisila(nikumuliha) mikangha mine. ⁹ Yesu hakagamba, “Diyelo uhonya wingila munyumba ayi, kosoko ayu naye ni mwana wa Ibulahimu. ¹⁰ Kosoko Mwana we Munhu keja kuhananga na kuwokowa ichagilile.” ¹¹ Fina fowahulikage simbuli siso, hakagendelela kuwatamila mbasi, kosoko hakowa habehi na Yelusalemu, na kosoko wenda wofumila fina undewa we Mulungu wokiyonesa chimwande. ¹² Kosoko yo hakagamba, “Munhu wa lukolo lwa undewa hakaluta ku isi ya kutali kuhokela uludole lwo undewa yanghafulusa kuhokela kuya. ¹³ Hakenanga watumwa wakwe ikumi hoyowegha maliho ga minyesi midatu chila munhu na kuwagamba, ‘Goloseni uchulusi ne isendi yo mpaka nomanikwija.’ ¹⁴ Ninga, iwanhu we isi iya wasamwendile, na hawatuma wajumbe kunyuma yakwe, wakugamba, ‘Chisikwenda imunhu ayu yachidime.’ ¹⁵ “Foyagolosigwe Mundewa hoyokuya na kulagisa awatogomi woyawenghile sisendi wenangigwe na kuluta ukwakwe uleke yadahe kumanya chowapatile. ¹⁶ Iwanghonga keja hameso gakwe yakugamba, ‘Mundewa ifesa yako yeleka mikangha ikumi.’ ¹⁷ Hakamugamba, ‘Nitunya lugano, agwe kwa mutogomi muswanmu! Kosoko hakuwa musindamafu muchinhu chidodogi, kokuwa na udaha wa kudima kaya ikumi!’ ¹⁸ Na wa keli keja yakugamba, ‘Mundewa, ifesa yako yeleka mikangha mishano.’ ¹⁹ Naye hakamugamba, ‘Agwe nagwe kodima kaya shano.’ ²⁰ “Kahi yumonga hakeja yakugamba, ‘Mundewa, aino no fesa yako, haniyoha na kuifisa fiswanu mumusipi. ²¹ Hanyogoha kosoko gweye kwa munhu mukugutu, agweye kwa kifana munhu yakulonda ifinhu si fyakwe, na kugola honghuhandile.’ ²² iMundewa hakagamba, ‘Nikukuliganisa kosoko ye simbuli sako gomwecho agwe gomutogomi wihile! Hakumanya fina na munhu mukugutu, nikulonda finhu si fyangu, na nikugola fosihandile. ²³ Ninga nhani nghwaikile kubengi, na kunyija yangu hanuwa nikuihokela ne chambusi yakwe?’ ²⁴ Hakawatamila awaya watogomi wakwe, ‘Londeni ipesa kulawa ukwakwe na mwingheni ayuya iyenaso ikumi.’ ²⁵ Nawo hawamugamba, ‘Mundewa, kenaso ikumi tayali!’ ²⁶ Nikumutamilani, fina chila yena chinhu kokongeseligwa, ninga iyechaka chinhu hata choyenacho kohokigwa. ²⁷ Ninga, kosoko ya wao wanghondo wangu, wasikuhananga niwadime, wegaleni hano na kuwachinja mumeso gangu!” ²⁸ Na foyafuluse kulonga nheifo, hakagendelela kumwande, munhambo yakwe kuluta Yelusalemu. ²⁹ Foyafikile habehi na Betifage na Betania, hatunda dyenangigwagwe Itunda dya Olifeti, hakatuma wefusa wakwe weli ³⁰ yakugamba, “Gendeni kuchijiji chihamwande yenu, baho mukwingila kwenu modyona ipunda dyohigwe, disinati ditumiigwe na munhu, didoholeni na kudigala hano. ³¹ Nghona munhu wowose yangawosa, ‘Nhani mukudidohola? Mugambeni Mundewa yekudihananga.’” ³² Ninga, awaya watumigwe hawaluta na kona fina foyawatamile. ³³ Fowadidoholage dipunda imwenyecho hakawagamba, “Nhani mukudohola dipunda?” ³⁴ Hawagamba, “Mundewa yakudihananga.” ³⁵ Hawadigala kwa Yesu, na hawatandika sisuke sawo mwipunda na kumukwisa Yesu muchanhya yakwe. ³⁶ Na foyagendelelage ne inhambo, na wanhu hawatandika sisuke sawo munjila. ³⁷ Yakafike habehi na Yelusalemu, muluduli lwa ditunda dya miseituni, ditewa dyose dye wefusa wakwe hawakonga konela na kumutunya Mulungu kwa dijwi ikulu kosoko ya makulu gowonile yakugolosa, ³⁸ wakugamba, “Yamotesigwe, imukulu iyakwija mwisina dye iMundewa! Dihewa kulanga na ditunyo kuchanhyasi kulanga!” ³⁹ Na Amafalisayo wowile mwitewa diya howomugamba, “Mwalimu, wagombele awefusa wako!” ⁴⁰ Hakawabidula, Nikumutamilani, awano nhanga wanyamale, amawe gano hagowa gakutowa chowe. ⁴¹ Foyafikile habehi na kuyona ikaya, hakaililila, ⁴² na hakagamba, “Hayuwa ikuwa ibeka nhanga nagwe wamanyile imbuli ya dihewa! Amba hambiya ifisigwa mumeso gako. ⁴³ Kosoko ugele ukwija ukwako, we wanghondo wako wokwikila ikigo, wokusunguluta na kukwingilila kulawa sisandi sose. ⁴⁴ Wokubana lugano agweye ne wanago hamwedu, na wasileka diwe muchanhya ye diwe ukwako kosoko nghwamanyile ugele wo kwija kwe Mulungu.” ⁴⁵ Na Yesu hakengila kwihekalu na kukonga kuwawinga awaya awambasage, ⁴⁶ na hakawagamba, “Itulumigwa, Nyumba yangu yokuwa hanhu ha nhasa, ‘Ninga muigolosa fina mhango ya wahiji.’” ⁴⁷ Naye yendeyofusa chila ijuwa mwihekalu. Makohani wakulu, watulumi na wakulu wa wanhu filongosi hawahananga kumukoma, ⁴⁸ ninga wasonile njila ya kugolosa, kosoko wanhu wose wasendage hata mbuli yakwe imwedu iwaloke.

¹ Ijuwa dimonga Yesu foyafusage wanhu mwihekalu na kuhubili mbuli swamu, awatambiki wakulu, watulumi na wasehe haweja ² na hawamugamba, “Chitamile kwa udaha uhoki ukugolosa gano, ama no nani yakwinghile udaha uno?” ³ Hakawabidula, “Ani nani nikuwosa mbuli; haya nhamileni, ⁴ ubatiso wa Yohana haulawa kulanga ama kuwanhu?” ⁵ Ninga awene hawalonga iwecho kwa wecho wakugamba, “Ghona chinghagamba, haulawa kulanga, kochigamba, nhani musamuhuwile? ⁶ Ninga chinghagamba, haulawa kuwanhu, awanhu wose wochikubitila mawe na kuchikoma, kosoko wose wamanya mumimoyo yawo fina Yohana hakowa mugonesi.” ⁷ Hawabidula fina wasimanyile haulawa hoki. ⁸ Na Yesu hakawagamba, “Ani nani sikuwatamila fina kwa udaha wa nani nikugolosa gano.” ⁹ Hakakonga kuwatamila wanhu imbasi ayi, “Imunhu hakahanda mugunda wakwe wa misabibu na hakaweka wemilisi na hakaluta kuisi kwa chisele chitali. ¹⁰ Ugele wo kugola, hakegala watogomi ku wemilisi soko yawenghe digelo dyo ugolaji idimwagile, ninga awemilisi hawamutowa na kumuwisa yechaka chinhu. ¹¹ Hakamutuma mutumwa yungi; imwene naye hawamutowa na kumugolosela fihile, na kumuwisa yechaka chinhu. ¹² Na hakamwigala kahi wa kadatu; ayuno hawamubulaga na kumuwinga. ¹³ Kahi ayuya imwenye mugunda hakagamba, ‘Notea nhani?’ Nomwigala imwanangu mwendigwa wangu; nhagela womwogoha. ¹⁴ “Ninga awaya awemilisi wo mugunda wakamone, hawekitamila wakugamba, ‘Ayuno no muhasi; lekeni chimukome ne ichipe chino chuwe chetu.’ ¹⁵ Hawamulafa kunje yo mugunda we misabibu na kumukoma. “Choni choyawagolosela imwenye mugunda awaya awemilisi? ¹⁶ Kokwija na kuwakoma awaya awemilisi, na kuwengha wengi umugunda we misabibu.” Fowahulike imbuli ayo, hawagamba, “Mulungu uchilekelele.” ¹⁷ Ninga Yesu hakawakumhulila meso na kugamba, “Mukudigamba nhani ditulumo dino: ‘Isumbi yowalemile wajengaji igaluka no sumbi ya hagati.’ ¹⁸ Imunhu wowose yakugwiligwaa ne isumbi iyo ikumubulaga, ninga inghogwa mwe munhu wowose ikumutiginha.” ¹⁹ Awatulumi na watambikii wakulu hawahananga kumukola muchigele chichiya, ninga hawawogola iwanhu; hawahananga kugolosa nheifo kosoko hawatanga fina hakatowa imbasi ayi kosoko yawo. ²⁰ Hawahananga luneka lwa kumukola, howotuma wasakulaji, wegolose fina wanhu wachawelu uleke wamutegele kwa simbuli sakwe na kosoko yo wamukole na kumwigala kuwasilikali. ²¹ Hawamusa, Mwalimu, chimanya finan ukulonga na kufusa kwa chawelu, na nghukuwalanga wanhu kufihanga, ninga ukufusa chawelu injila ye Mulungu amalagiso. ²² Ni fiswanu kumwingha Kaisali kodi ama si fiswanu? ²³ Ninga hakatanga ichimwefe chawo, na hakawagamba, ²⁴ “Nyoneseni isendi, yacholigwe muno nani? Amatulumo gamutaja nani?” Hawagamba, “Kaisali.” ²⁵ Hakawagamba, “Ninga ifinhu fya Kaisali mwingheni Kaisali, na ifinhu fye Mulungu mwingheni Mulungu.” ²⁶ Wasadahile kumukola kwa simbuli soyalongile hamwande ya wanhu; hawanyamala twi na hawakisina imbidula yakwe. ²⁷ Baho haweja ukwakwe Masadukayo, awaya wakugamba fina kwechaka kwinuka awafile, hawamusa, ²⁸ Mwalimu, Musa hakachandikila fina imunduguse we munhu yatolile yanghafa bila mwana, imunduguse yamuhale imwanamuke na yamwelekele imunduguse wana. ²⁹ Kweja kowa na wanhu mufungate we nyumba imwedu; wa nghonga hakatola muke na hakatagika bila cheleko. ³⁰ Kahi wa keli hakamuhala ayuya mwanamuke na kutagika, ³¹ na wakadatu hakamuhala, na nheifiya wose mufungate hawatagika bila kuleka mwana. ³² Kundumo ayuya imwanamuke naye hakatagika. ³³ Togola! Mwijuwa dya kwinuka wafile yakuwa muke wani? Kosoko hakatoligwa na wose mufungate. ³⁴ Yesu hakawagamba, “Awana we chigele chino, wakutola na kutoligwa; ³⁵ ninga awaya awagiligwe kuhokela ugele ukwija na kukwinuka kwa wafile wasikutola kahikutoligwa. ³⁶ Kosoko wasikufa keli, wakifana Malaika na ni wana we Mulungu, kosoko wenuligwa kulawa kudifa. ³⁷ Ninga fina awafile wekwinuligwa, hata Musa hakonesa fiswanu mu sula ya ichihulo chikwaka hoyamwinange Mundewa ni Mulungu wa Ibulahimu na Mulungu wa Isaka na Mulungu wa Yakobo. ³⁸ Kahi imwene si Mulungu wa wafile, ninga wa womi, kosoko wose wakwikala naye.” ³⁹ Na Watulumi wamonga hawagamba, “Mwalimu kulonga fiswamu.” ⁴⁰ Nawo wasagesile keli kumusa mbuli ingi. ⁴¹ Ninga hakawagamba, “Ikudahika nhani wagambe fina Kilisito ni mwana wa Daudi? ⁴² Kosoko Daudi imwenecho yakulonga muchitabu che Isabuli, Mundewa kalonga ne Mundewa wangu: ‘Ikala ukulume kwangu ⁴³ mpaka niwagolose wanghondo wako fina chibao cha kulwatila migulu yako.’ ⁴⁴ iDaudi kamwinanga Masiya; ninga kokuwa nhani mwanagwe?” ⁴⁵ Awanhu wose fowategelesage, Yesu hakawatamila wefusa wakwe; ⁴⁶ Muwe meso na watulumi, awakwenda kugenda wafalile makasu matali na kulamusigwa mumasoko na kwikala mumagoda ga kumwande Mumasinagogina mufyakudiya fye si kukuu. ⁴⁷ Wakudiya kunyumba se wegane, na kwa chimwefe wakutasa nhasa nhali. Awano wehokela itoso ikulu mwijuwa dyo uliganiso.

¹ Yesu hakenula meso na kona awagoli fowakuguma filafwa fyawo mwisanduku dyo kulafila, ² na hakamona mwigane yumwedu yakuguma mwisanduku sendi mbili. ³ Hakawagamba, “Chawelu nikumutamilani, imwigane ayu mukiwa kalafa kujumha wose. ⁴ Kosoko awa wose walafa sadaka isigafu ye isao yawo, ninga ayu mu ukiwa wakwe kalafa fyose foyenafyo hata chiya choyahuwile.” ⁵ Na wamonga fowejawasimulilaga isoko ye dihekalu ifene fodihambigwe na mawe maswamu na finhu fiswamu fowalafile wanhu kumwingha Mulungu, hakagamba, ⁶ “Amba kosoko ye finhu fino fomukona amajuwa gokwija disilekigwa diwe muchanhya ye diwe ambadyo disimoligwa.” ⁷ Hawamusa, “Mwalimu, agano gokuwa milaki, na chitangilo chokuwa choni ugele wa gano gehabehi kwija?” ⁸ Hakawagamba, “Kilangisiseni mungheje mudanhilisigwa, kosoko wengi wokwija kwa disina dyangu, wakugamba, ‘Aniye no mwene, Ugele usegelela!’ Munghawandamile. ⁹ Na munghahulika imbuli ye inghondo na chiyunguyungu, munghogohe; kosoko ago gakuhananga galawanise kunghonga, amba indumo isikwija chimwande.” ¹⁰ Kahi hakawagamba, “Wanhu we isi ayi wokitowa na wanhu we isi aiya, na undewa wokitowa na uundewa. ¹¹ Kokuwa na musingisiko mukulu, na hanhu hengi hokuwa na njala na matamu, na kokuwa na chogoho kikulu na fitangilo fingi. ¹² Ninga ugele ago gose gasinati galawanise wowakola na kuwasambasa, wowegala kumasinagogi na kuchifungo, na wowegala kumwande ya wandewa na Majumbe, kosoko ye disina dyangu. ¹³ Achino chokuwa chigele ukwenu cha kutamilisa dihuwi dyenu. ¹⁴ Mumadoga genu muwe na mbuli ayi munghadoge ugele usinati wije mobidula nhani, ¹⁵ kosoko aniye nomweghani misungu, hechaka munghondo yedaha kuwasuma ama kuwahilula. ¹⁶ Waweleke, wandugu senu, wewahabehi nanye na wambwiya senu wowasongesa na wamonga wenu wokomigwa; ¹⁷ Mosuligwa na wanhu wose kosoko ye disina dyangu. ¹⁸ Musikwagilisa hata ulujwili lumwedu lwa matwi genu. ¹⁹ Kwa kugugumila kwenu mouhokela uumi we chawelu.” ²⁰ “Ninga munghona ikaya ya Yelusalemu ikusungulutigwa na wasilikali, baho mutange fina ugele wo kutikimisa ikaya usegelela. ²¹ Baho lekeni awowile Uyahudi watijile kumatunda, na awowile mukaya waleuke, na awowile kumigunda wanghengile mukaya, ²² kosoko amajuwa gago ni ge Mulungu kuwatosa awanhu wakwe, kamemelesa gose agatulumigwe. ²³ Usungu wawo awanawake wakiyohe na wakonghesa mumajuwa gago! Kosoko mokuwa na magayo makulu muisi na nyono muchanhya ye wanhu. ²⁴ Wakomigwa kwa ukali we dipanga, na wogolosigwa mateka ku mataifa gose, na Yelusalemu yolwatigwa na wamataifa mpaka ugele wawo umemelekele.” ²⁵ “Fitangilo fokoneka mwijuwa, mumwesi na musinyelesi, na muchilunga mokuwa na magayo kosoko ya ichowe che bahali ne inghundali ya mawimbi gakwe. ²⁶ Wanhu wosimia kwa chogoho, fina fowakugoja agekwija muchilunga, kosoko ifinhu fyo kulanga fyosingisika. ²⁷ Baho wakiyawomona imwana we Munhu yakwija mumafunde kwa ludole na itunyo ikulu. ²⁸ Na baho simbuli so singhakonga kulawanisa, sangalaleni na kwinula matwi genu, kosoko uhonya wenu ufulusa kwija.” ²⁹ Na hakawatamila kwa mbasi: “Langeni umutini na mabiki gose; ³⁰ chimwande fogakukonga kutuguta mukona muweecho na kumanya fina ichilangasi chahabehi. ³¹ No nheifo munghona simbuli aso sikulawanisa, mumanye undewa we Mulungu wa habehi: ³² Cawelu, nikumutamilani, icheleko chino chisiloka mpaka gose gagoloseke. ³³ Ulanga ne iisi foloka, amba si mbuli sangu sisikuloka ng’o. ³⁴ Ninga kilangisiseni, imimoyo yenu ingheje isumigwa na anasa na unywaji na magayo ga ugima uno, na dijuwa diya hodiwajila kwa kusinhukisa fina umutego foukugwisa. ³⁵ kosoko yowejila wose wakwikala muchilunga chose. ³⁶ Ninga muwe meso na mutase majuwa gose, soko muwe na ludole lwa kuhona na ago gose gelawanisa, na kwima kumwande ye Mwana wa Munhu.” ³⁷ Chila ijuwa yendeyofusa mwihekalu, nina hechilo yendeyoluta kwitunda dye miseituni na kwikala uko. ³⁸ Na nhousikusiku wanhu wengi hawamwijila mwihekalu na kumutegelesa.

¹ Kahi dijuwa dikulu dye imikate isigumigwe nungo dyenangwa Pasaka hadyuwa habehi. ² Na awatambiki wakulu ne watulumi weja wahanangaga njila ya kumukoma; ninga wenda wewogoha awanhu. ³ Ishetani hakamwingila Yuda yenangigwagwe Isikalioti, yowile yumwedu wa waya ikumi na weli; ⁴ Hakaluta na kusimulila na awakulu wa watambiki na filongosi we dihekalu fina foyemulafa ukwawo. ⁵ Hawonela lugano na hawalagana fina womuliha mapesa. ⁶ Yuda hakafumila, na hakahananga luneka lwa kumusongesa ukwawo, ugele amatewa gehechaka. ⁷ Kahi hosikwija dijuwa dye imikate isigumigwe nungo, adyo no dijuwa dyo kuchinja ingholo ye Pasaka. ⁸ Yesu hakawatuma Petulo na Yohana yakugamba: Luteni na kuigolosa iPasaka kosoko yetu chidiye. ⁹ Hawamugamba, “Hoki houkuhananga chikugolosele?” ¹⁰ Hakawagamba, “Langa, fomukwingila mukaya motangana na munhu mugosi yetwike ibiga dya meji, mwandamileni na mwingile munyumba yoyekwingila; ¹¹ mutamileni imwenye nyumba, ‘Mwalimu yakusa chuwa hoki ichibuha che wageni, honidiya iPasaka hamwedu na wefusa wangu?’ ¹² Naye komonesani chibuha chikulu che golofa chihambigwe, muchitengele umo.” ¹³ Hawaluta na kona fina foyawasigilile nawo hawailenga iPasaka. ¹⁴ Na ugele ukafike hoyokwikala mumesa hamwedu ne watumigwa wakwe. ¹⁵ Hakawagamba, “Nyenda lugano kudiya iPasaka ino hamwedu na nyeye akuno sinati nigaye. ¹⁶ Kosoko nikumutamilani, siidiya keli iPasaka mpaka imemelesigwe mu undewa we Mulungu.” ¹⁷ Hakalonda chikombe, na foyamulumbile Imulungu hakagamba, “Londeni chino na munywe hamweu; ¹⁸ Kosoko nikumutamilani kulawa diyelo sikunywa keli difai mpaka undewa we Mulungu foukwija.” ¹⁹ Hakalonda umukate, na yakalumbe hakaubendula na kuwengha, yakugamba, “Awuno no umutufi wangu ukulafigwa kosoko yenu. Goloseni dino kwa kunigelegela niye.” ²⁰ Hakagolosa nheifiya na kuchikombe, fowafuluse kudiya ichakudiya che hegulo hakagamba, “Chikombe chino ni ilagano disha mu sakame yangu iikwitika kosoko yenu. ²¹ Ninga, langeni ayuya yenisongesa kahamwedu na niye mumesa! ²² Kosoko imwana we Munhu yakufa fina foiandikigwe, ninga usungu wakwe imunhu yuya yemusongesa!” ²³ Hawakonga kiyusa awecho kwa wecho, ni nani mugati yawo yegolosa dino. ²⁴ Hahowa na lukani mugati yawo, fina no nani iyekutaligwa kuwa mukulu kujumha wose. ²⁵ Yesu hakawagamba, “Awandewa wa Mataifa wakuwadima wanhu kwa ludole, na waya wena udaha muchanhya yawo wekwinangigwa Watasi wa wanhu. ²⁶ Ninga inghowe nhaifo ukwenu; amba imukulusi ukwenu yowe fina mudodogisi, na ichilongosi yowe yakuwatogomela. ²⁷ Kosoko imukulu no yehoki, ayuya yakwikala mumesa, ama ayuya yakutenga chakudiya? So yuya yakwikala mumesa? Ninga aniye na mugati yenu fina yumwedu yakutogoma. ²⁸ Anyeye nomugendelele kuwa hamwedu na niye mumagesa gangu; ²⁹ fina iBabangu foyaninghile niye undewa, no nheifo nikuwenghani nyeye. ³⁰ Mudahe kudiya na kunywa mumesa yangu mu undewa wangu, na kwikala mwigoda dyo undewa na kuwaliganisa amakabila ikumi na meli ga Isilaeli.” ³¹ Simoni, Simoni, tegelesa Shetani hakakuhananga uleke yadahe kukusunga fina ngano. ³² Ninga nitasa kosoko yako idihuwi dyako dinghahunguke; nagwe foukwija unyuwila keli wagume ludole awanduguso. ³³ Petulo hakagamba, “Mundewa, aniye nifumila kuluta na gweye kwigelesa na hata kukomigwa.” ³⁴ Hakagamba, “Nikukutamila Petulo, dijogolo disikwika diyelo, mpaka gweye ukuwa unikanile mikangha midatu fina nghunimanyile.” ³⁵ Hakawagamba, “Togoleni, baho fonawegale bila mufuko ama mukoba ama filwatu, hamuhungukiligwa na choni?” Hawagamba, “Chisahungukiligwe na chinhu.” ³⁶ Yesu kawagamba, “Amba hambiya, leka imunhu yena mufuko yaulonde, na yena umukoba nheifiya. Ninga imunhu nghona yechaka ipanga yause dikasu dyakwe yagule dimwedu. ³⁷ Iwandikigwa fina hakataligwa hamwedu na wena uwihi Amatulumo gano mpaka gamemelesigwe ukwangu; kosoko iwandikigwe muchanhya yangu ina umemeleso wakwe.” ³⁸ Nawo hawagamba, “Mundewa, Langa hano hena mapanga meli;” Hakagamba, “Fiswamu.” ³⁹ Hakaleuka, na kuluta kwitunda dye miseituni fina foyasowele, na wefusa wakwe hawamwandamila. ⁴⁰ Na yakafike uko hakawagamba, “Taseni, mungheje mukwingila mumagesa.” ⁴¹ Na imwene hohonitemanula nawo chipisi cha kukubita diwe, hakafugama na kutasa. ⁴² Baba, unghahananga unileusile ichikombe achi, hata nhaifo, si nyenda yangu, amba iyako igoloseke. ⁴³ Na baho imalaika hakoneka ukwakwe kulawa kulanga na kumwingha ludole. ⁴⁴ Na foyowile mu usungu mukulu hakatisa lugano; na difuke dyakwe digaluka fina matwene ga sakame gakulagala hasi. ⁴⁵ Na foyafuluse kutasa, hakeja kuwefusa wakwe na hakawona fina wagona kosoko yo usungu, ⁴⁶ na hakawagamba, “Nhani mukugona? Inukeni mutase mungheje mukwingila mumagesa.” ⁴⁷ Na foyalongage nhaifo, hodikwija itewa dya wanhu dikulongosigwa na munhu yenangigwagwe Yuda, yumwedu wa wefusa ikumi na weli. Hakamusegelela Yesu uleke yamunonele. ⁴⁸ Ninga Yesu hakamugamba, “Yuda ukumosongesa Mwana we Munhu kwa kumunonela?” ⁴⁹ Na wowile habehi naye fowonile gakuhananga galawanise, hawagamba, “Mundewa, chiwateme na mapanga?” ⁵⁰ Na yumwedu wawo hakamutowa imutumwa Kuhani mukulu na kumudumula inghutwi yakwe yo kulume. ⁵¹ Ninga Yesu hakagamba, “Lekeni, munghagolose keli!” Hakamukwafa inghutwi yakwe na kumuhonya. ⁵² Kahi Yesu hakalonga na wakulu wa watambiki na filongosi we dihekalu na wasehe, awejile kumukola, “Mwija na mapanga na mapulo fina kukola muhiji? ⁵³ Fonyowile hamwedu na nyeye majuwa gose mwihekalu musanikolile. Ninga auno no ugele wenu, na ugele wa ludole lwa chisa.” ⁵⁴ Baho hawamukola na kumulongosa kumwigala kunyumba ye Kohani mukulu. Petulo hakamwandamila kwa kutali. ⁵⁵ Na fowasile moto hagati ye dikumbo, hawakala hasi na kotela, Petulo hakekala hamwedu nawo. ⁵⁶ Imutumishi yumonga we chike yakamone Petulo kekala mu ujelu na kumulanga fiswanu, hakagamba, “Imunhu ayu naye hakowa naye.” ⁵⁷ Ninga hakakana, yakugamba, “Gomwanamuke, simumanyile.” ⁵⁸ Hanyuma chidogo munhu yungi yamona na kumugamba, “Agwe nagwe kwa yumwedu wa wawo.” Ninga Petulo hakagamba, “Gomunhu gwe, si yumwedu wawo.” ⁵⁹ Na chikaloke chigele cha isaa dimwedu kahi munhu yungi hakalonga kwa mukaso, yakugamba, “Chawelu imunhu ayu naye hakowa naye; kosoko ni Mugalilaya.” ⁶⁰ Ninga Petulo hakagamba, “Go munhu, simumanyile choukulonga.” Na baho ni baho foyowile yekali longa dijogolo hadika. ⁶¹ Na iMundewa hakabiduka na kumulanga Petulo. Na Petulo hakagelegela imbuli ye Mundewa fina foyamutamile, “Dijogolo disinati dike diyelo, ukunilema mikangha midatu.” ⁶² Hakalawa kunje na kulila lugano. ⁶³ Na awanhu wamwilisage Yesu hawamwogelela na kkumutowa; ⁶⁴ na hawamugubika chitambala muchihanga na kumusa, “Tanga no nani yakutowile?” ⁶⁵ Hawalonga mbuli nyingi ukwakwe na kumuliga. ⁶⁶ Kukoche, wasehe wa wanhu, watambiki wakulu na watulumi, hawatang’anyila na hawamulongosa kwi balasa dyawo, na hawagamba, ⁶⁷ “Nghona gweye no Kilisito chitamile.” Ninga hakawagamba, “Ninghamutamilani, musihuwila; ⁶⁸ na ninghawosa, musinibidula. ⁶⁹ Ninga kulawa hambiya na kugendelela, Imwana we Munhu yakwikala kumukono wo kulume lwa uludole lwe Mulungu.” ⁷⁰ Na wose hawagamba, “Ninga gweye kwa Mwana we Mulungu?” Naye hakawagamba, “Anye muilonga, fina na mwana we Mulungu.” ⁷¹ Nawo hawagamba, “China nghwina kahi ya uhomelesi ungi? Chihulika chiwecho kulawa mumulomo wakwe.”

¹ Kahi ditewa dyose hodikwinuka na kumwigala Yesu kwa Pilato. ² Hawakonga kumusongesela wakugamba, “Chimona imunhu ayu yakukubuganisa ditaifa dyetu na kuwalemesa wanhu kuliha kodi kwa Kaisali na kugamba imwene no Mundewa Kilisito.” ³ Pilato hakamusa, “Agweye no Mundewa wa Wayahudi?” Na hakamubidula, “Agwe kuilonga.” ⁴ Ne Pilato hakalonga na Makohani wakulu na matewa, “Sonile uwihi we munhu yuno.” ⁵ Ninga awene wadindilisa wakugamba, “Yakuwasongesa wanhu kwa kufusa ku Yudea yose, kulawa Galilaya mpaka kuno.” ⁶ Pilato yakahulike gago, hakosa nghona Yesu ni Mugalilaya. ⁷ Foyamanyile fina kowa mu undewa wa Helode, hakamwigala kwa Helode, yowile Yelusalemu muchigele chicho. ⁸ Foyamonile Yesu iHelode hakonele lugano kosoko hakahanangaga kumona, kosoko hakahulika mbuli nyingi muchanhya yakwe, na hakahuwila kona majumo gamonga gekugolosigwa ne mwene. ⁹ Naye Helode hakamusa mbuli nyingi; ninga Yesu nghamubidula. ¹⁰ Amakohani wakulu na watulumi hawalawa kumwande na kulafa uhomelesi wawo kwa ludole. ¹¹ Na Helode ne wasilikali wakwe hawamugolosela kwa chinyala na kumogelela, kahi hawamufasa ikasu iswamu lugano, hakamuwisa kwa Pilato. ¹² Helode na Pilato hawowa mbuya kulawa dijuwa diya, kosoko weseyendage ugele adino disinati dilawanise. ¹³ Kahi Pilato hakenanga hamwedu Amakohani wakulu na filongosi wa wanhu, ¹⁴ na hakawagamba, “Mumwigala ukwangu imunhu ayu fina kabuganisa wanhu, nani langa nilamula simbuli sakwe mumeso genu, kahi sonile dyodyose dihile muuhomelesi wenu wose ukwakwe; ¹⁵ nheifiya Helode naye kosoko kamuwisa ukwetu. Langa! Nghagolose chochose chimwagilile yakomigwe; ¹⁶ kosoko yo nomutowa na kumudohola.” ¹⁷ Pilato hakahanangigwa yawadoholele munhu yumwedu mwijuwa dikulu. ¹⁸ Ninga awanhu wose howojoja hamwedu, Chileusile imunhu ayu na uchidoholele Balaba. ¹⁹ Munhu yagumigwe kugati kosoko ye finju yalawanise mwikaya, na kwa ukomaji. ²⁰ Pilato hakahananga kumohola Yesu, hakalonga nawo keli; ²¹ ninga hawatowa chowe Yasambasigwe, musambase! ²² Kahi lwakadatu hoyolonga nawo, “Nhani, kagolosa choni chihile? Sonile umwakwe mbuli yoyose ihile imwagile kufa; kosoko yiyo nomujola na kumudohola.” ²³ Ninga hawakonya kuhananga kwa majwi makulu fina yasambasigwe. Na majwi gawo hagasuma. ²⁴ Pilato yalamula fina ingwina yawo igoloseka. ²⁵ Hakamoholela imunhu yagumigwe kugati kosoko ye ulefi na ukomaji, wowamuhanange, ninga iYesu hakamulafa yakomigwe fina fowendile. ²⁶ Fene fowamulongose kulawa kwa Pilato, hawamukola munhu disina dyakwe Simoni wa Kilene yalawage kumugunda, na kumutwika umusalaba yaupike kunyuma ya Yesu. ²⁷ Na baho hadimwandamila itewa ikulu dya wanhu, hamwedu na wanawake walilage na kuhongesa. ²⁸ Ninga Yesu yayabidukila na kuwagamba, “Muwanawake wa Yelusalemu, munghanililile niye ninga mukililile muweecho na mulile kosoko ye iwana wenu. ²⁹ Kosoko langeni! Amajuwa gekwija nawo wekwija welonga, Ibeka awechaka cheleko, na sinda siseleke, na matombo gasonghese! ³⁰ Nawo wakonga kulonga na matunda, Chugwileni na fitongo Chigubikeni. ³¹ Nghona wagolose dino mwibiki dideke yokuwa nhani mwibiki dinyalile?” ³² Kahi hawawalonda wanhu weli wowile wabanaji, hawawalongosa wawakome hamwedu na Yesu. ³³ Na fowejile ahanhu hekinangigwa Iguha dya ditwi, baho howomusambasa na waya wabanaji, yumwedu kulume na yumonga kumoso kwakwe. ³⁴ Na Yesu hakagamba, “Baba uwonele ubasi kosoko wasimanyile chowakugolosa. Na hawegawila sisuke sakwe kwa kutowa kula.” ³⁵ Na wanhu hawema baho na kulanga, ninga, ifilongosi hawamujowa wakugamba, “Hakahonya wamonga; lekeni yakihonye imwenecho, nghona imwene no mubakigwa we Mulungu yasaguligwe!” ³⁶ Wasilikali nawo hawamogelela, haweja na kumwingha siki, ³⁷ wakugamba, “Nghona gweye uMundewa wa Wayahudi kihonye gomwecho!” ³⁸ Muchanhya yo musalaba hahowa na matulumo AYUNO NO MUNDEWA WA WAYAHUDI. ³⁹ Yumwedu wa waya wabani watungikigwe hakamuliga yakugamba, “Agweye so Kilisito? Kihonye gomwecho na seye.” ⁴⁰ Ninga iyumonga hakamugombela yakugamba, “Nghukumogoha Imulungu, nagwe kuwa munamulwa iyo? ⁴¹ Naseye ichagila, kosoko chikuhokela amaliho ge sinhenda setu, amba imunhu ayu nghagolose dyodyose dihile.” ⁴² Na hakagamba, “Yesu unigelegele no maa ukwingila muundewa wako.” ⁴³ Na Yesu hakamugamba, “Chawelu, nikukutamila, diyelo ukuwa na niye kulanga.” ⁴⁴ Hachuwa chigele cha saa mutandatu, hakuwa na chisa muisi yose mpaka saa ikenda; ⁴⁵ dijuwa fyodyadugile kwalika; na dipasia dye dihekalu dyadegeka fipande fili. ⁴⁶ Baho Yesu hakalila kwa ijwi ikulu yakugamba, “Baba mumikono yako nikwika ichidoga changu! Na foyalongile nhaifo hakatajika.” ⁴⁷ Ayuya imukulu wa wasilikali yakone galwanise, hakamutunya Mulungu na kugamba, “Chawelu, imunhu ayu hakowa muswamu.” ⁴⁸ Na amatewa wose watang’anyile kosoko yo kona imbuli ayo yo usungu, fowonile chagoloseke, hawoya ukaya wakwitowatowa mumhambaga. ⁴⁹ Wengi wamumanyile, na awanawake wamwandamile kulawa Galilaya hawema hatali na kona fiswamu imbuli ayo. ⁵⁰ Hahowa na munhu disina dyakwe Yusufu kulawa mukaya ye Chiyahudi ya Alimataya. Hakowa yumwedu wa wasehe we dibalasa, munhu muswanu na muchawelu, ⁵¹ imwene nghefumilise ne weyagwe soko ya diya dyowalamule na kugolosa, na yendeyongojela undewa we Mulungu. ⁵² Imunhu ayu hakaluta kwa Pilato na kuutasa umutufi wa Yesu. ⁵³ Hoyouhumulusa na kuwoha musanda na kuwika muchilalo chowile mwiwe, nacho chisinghati chisikigwe munhu. ⁵⁴ Hadyuwa ijuwa dya maandaliwo, ne sabato hayuwa habehi na kukonga. ⁵⁵ Awanawake walawile Galilaya hamwedu naye hawamwandamila Yusufu na kuchona ichilalo na fowamusikile; ⁵⁶ kahi howokuya, na hawagolosa mafuta ge mhungileu. Mwijuwa dye sabato hawabwihila fina foyalagisigwe.

¹ Ninga dijuwa dye inghonga ye dijuma, hawaluta kuchilalo, na kulonda amafuta ge imhungile swamu gowagolose. ² Hawona idewe dyo kuhindila difingilisigwa kulawa muchilalo. ³ Ninga fowengile kugati, wasawonile umutufi wa Yesu. ⁴ Fowedasikage kosoko ye imbuli ayo, langa! Wanhu weli wema habehi nawo wena suke njelu swee; ⁵ na fowowile na chogoho na kukinya ameso gawo hasi, awanhu waya hawawagamba, “Nhani mukumulangisa imumi kuwanhu wafile? ⁶ Kahechaka hano, ninga kenuka. Gelegeleni fina foyawatamile foyowile yekali Galilaya, ⁷ fina, Imwana we munhu, kolafigwa mumikono ye wanhu wena uwihi, nawo womusambasa, na mwijuwa dya kadatu kokwinuka.” ⁸ Baho hawagelegela simbuli sakwe, ⁹ na wakoye kulawa kuchilalo, hawawatamila gose go awaya ikumi na yumwedu na wose wasigale. ¹⁰ Awanawake wo, hawowa Maliamu Magidalene na Yoane na Maliamu ing’ina wa Yakobo na wanawake wamonga wowowile nawo, hawawatamila awatumigwa; ¹¹ ninga simbuli asi hasoneka ni sa ubwalasi ukwawo na wasasihuwile. ¹² Ninga Petulo hakenuka na kubilima ku chilalo, hakenama na kulanga kugati hakona isanda iimwene, na hakoya ukaya yakwisina kwa soko ya dilawanise. ¹³ Mwijuwa didyo weli wa wefusawakwe wenda weluta muchijiji chikwinangigwa Emau, utali wa isaa dimwedu nhafi kwa migulu kulawa Yelusalemu, ¹⁴ na wenda wesimulila awecho soko ye simbuli sose silawanise. ¹⁵ Fowasimulilage na kuwanga hamwedu, Yesu imwecho hakawejila na kwilongosa nawo. ¹⁶ Ninga ameso gawo hagahindigwa wanghamutange. ¹⁷ Hakawagamba, “Mbuli saki sino somukugenda mulonga?” Hawema, wakunyahala ifihanga fyawo. ¹⁸ Yumwedu wawo yekinangigwa Kileopa, hoyomubidula, “Agweye kwa mugeni we mwene ku Yelusalemu nghumanyile imbuli ilawanise kuya mumajuwa gano?” ¹⁹ Kawagamba, “Mbuli yaki?” Hawamugamba, “Imbuli ikumuhusu Yesu wa Nasaleti, yowile mugonesi yena udaha mu go yakulonga na kugolosa kumwande ye Mulungu na wanhu, ²⁰ na ifyene wakulu wa Makuhani na wakulu wetu fowamulafile yahokele indamulwa ye difa, kahi yasambasigwe. ²¹ Ninga hachihuwila fina imwene hakowa yakuwakombola Isilaeli. Heye, na kuleka gago gose, diyelo ni ijuwa dija kadatu kulawa gano galawanise. ²² Hamwedu na gago, awanawake wamonga wamwandamilage fina seye, wachitinhusa; hawaluta kuchilalo nhousikusiku. ²³ Na wasawonile umutufi wakwe, na woya wakugamba fina hawalawiligwa na malaika, wawatamile fina ni mumi. ²⁴ Awamonga wowile na seye hawaluta kuchilalo na kona fina awanawake fowalongile, ninga imwene wasamonile.” ²⁵ Hakawagamba, “Anye mu wanhu muwabwalasi! Na wakugutu wa kuhuwila gose galongigwe na wagonesi? ²⁶ Togoleni, isamwagile imubakigwa, yapate magayo gano na kwingila ku undewa wakwe?” ²⁷ Yakonga kulawa Musa na wagonesi wose, kawagubulila mumatulumo masunhile simbuli sose simwagile imwene. ²⁸ Kahi hawachisegelela ichijiji chowalutage. Imwene hakakigolosa fina yakuhananga kugendelela kumwande; ²⁹ ninga hawamulemesa wakugamba, “Ikala na seye, kosoko dijuwa diswa.” Baho hakaluta na kwikala nawo. ³⁰ Foyowile muchakudiya hamwedu nawo, hakalonda umukate kuumotesa, na kaubendula na kuwengha. ³¹ Na ameso gawo hagagubuka na hawamutanga; naye hakaleuka mumeso gawo. ³² Hawakiyusa, Imimoyo yetu isakile mugati yetu foyalongage na seye munjila, foyachigubulilage amatulumo masunhile? ³³ Kamei hawenuka muchigele chichiya na kuya Yelusalemu; na hawawafika awaya ikumi na weli wetang’anyile hamwedu na waya wose wowile nawo, ³⁴ wagambile, iMundewa kenuka chawelu na keyonesa kwa Simoni! ³⁵ Baho, awatumigwa aweli hawawatamila galawanise munjila na fyene fowamutangile mu kuubendula umukate. ³⁶ Fowalongage gago, Yesu imwecho hakema mugati yawo na kuwagamba, “Digoya dyuwe ukwenu.” ³⁷ Ninga hawatinhuka na kwingilwa na manhonge, na hawamanya fina wona isoki. ³⁸ Na hakawagamba, “Nhani mukiidasika, na nhani mukiyusa mumimoyo yenu? ³⁹ Langeni imikono ne migulu yangu, fina no niye nimwenecho, nyalabaseni munilange, kosoko umusikule wechaka nyama na maguha fina fomukona ninafo.” ⁴⁰ Na yakalonge gago, hakawonesa imikono ne imigulu. ⁴¹ Na fowowile wenghali kuhuwila kosoko ye inyemo na kukisina, hakawagamba, “Mwina chochose hano chakudiya?” ⁴² Hawamwingha chibendu cha somba ibanikigwe, ⁴³ na hakakilonda na kudiya mumeso gawo. ⁴⁴ Kahi hakawagamba, “Asi no simbuli sonalongile na nyeye, fonowile nikali na nyeye, fina chila chinhu chitulumigwe muchanhya yangu mutolati ya Musa na wagonesi na Musabuli ikuhanangigwa chimemelekele.” ⁴⁵ Noho yawagubulila imisungu yawo wadahe kugatanga amatulumo, ⁴⁶ hakawagamba, “Nofo itulumigwe fina iKilisito kogaligwa, na mwijuwa dya kadatu kokwinuka kulawa kuwanhu wafile, ⁴⁷ na fina kulamba na kulekeleligwa uwihi fikuhanangigwa fihubiliigwe mudisina dyakwe kuMataifa gose kukongela Yelusalemu. ⁴⁸ Anyeye mwa wahomelesi wa simbuli asi. ⁴⁹ Langeni, nomwigalilani ayuya iBaba woyalongile; ninga mwikale mukaya mpaka mufasigwe uludole kulawa kuchanhya.” ⁵⁰ Kahi hakawalongosa kuluta mpaka Betania, hakenula mikono yakwe na kuwamotesa. ⁵¹ Foyeja yowa mukuwamotesa, hoyokwitemanula nawo na hakenuligwa kulanga kuchanhya. ⁵² Awene hawamufugamila na hawoya Yelusalemu kwa chinyemi chikulu, ⁵³ Hawekala chigele chose mwihekalu wakumutunya Mulungu.