YAKOBO

YAKOBO

¹ Yakobo mutogomi we Mulungu na we Mundewa Yesu Kilisito, kumakabila kumi na mbili gowile kuutawanyiko. Chikumulamusani. ² Wandugu sangu inghowa mukugwila mumagesa ge hayohayo taleni kuwa chinyemi, ³ kosoko mumanya fina mugeswa ye dihuwi dyenu mukweleka ufinyilisi; ⁴ na kufinyilisa kwenu kwigale mabidulo makulu, uleke mukangale na kwenela, munghahungukiligwe na chinhu. ⁵ Inghowa yumwedu wenu kahunghukiligwa ubala, yamutase Mulungu, iyakuwengha wose kwa undewa ninga hakugombela na mokwinghigwa. ⁶ Ninga utase kwa kuhuwila, bila manhonge kosoko yene manhonge ni kifana mawingo mubahali, gakwigaligwa ne mheho; ⁷ munhu iyene milomo mili na kudogadoga muchila njila sakwe, ⁸ yanghamanye kohokela chinhu kulawa kwe Mundewa ⁹ Lekeni imundugu muholo yakitunye mukukwisigwa kwakwe, ¹⁰ na imugoli mundulisigwa yakwe kosoko awagoli wakwija wakwagilila kifana iula dya kumbago. ¹¹ Kosoko dijuwa dikulawanisa dikusoma na kunyalisa na maula gakulagala, na uswanu ukwagilila. Nofoyuwile kwe imugoli; muchiligati che mbuli nyingi se mikalile yakwija yanyala. ¹² Ibeka munhu yuya iyakufinyilisa magesa. Kosoko yangafulusa kwima kohokela nghofiya ya itunyo dye uumi Mulungu dyoyawahuwisile waya wakumwenda. ¹³ Munhu nomayakugesigwa yanghagambe ’nikugesigwa ne Mulungu kosoko Mulungu nghakugesigwa na wihi, kahi imwene nghakugesa munhu. ¹⁴ Ninga munhu yakugesigwa ne usulumisi wakwe imwecho, aku yakukwigigwa na kudanhilisigwa nago. ¹⁵ Kamei, auya usulumisi unghesha kukola inda. Ukweleka wihi, na uya wihi unghafulusa kukula ukweleka difa. ¹⁶ Munghadanhilisigwe wandugu sangu ¹⁷ Chila kulafa kwa undewa, hamwedu na chilafwa chimemelekele kukulawa kuchanhya, kudulika kulawa kwe Baba we ujelu we ulanga, kwe imwene kwichaka kubidukabiduka kahi chinyefu cha kubidukabiduka. ¹⁸ Muumemelesi wakwe foyendile imwenyecho hakacheleka kwa mbuli ya chawelu, uleke chuwe mamudyo gakwe ge nghonga mufyumbigwa fyakwe. ¹⁹ Mumanye aino, wendigwa wangu: Chila munhu na yowe muhufu kutegelesa, muholo kulonga, muholo kudeseka, ²⁰ kosoko inyono yenu isikutasa ichawelu ye Mulungu. ²¹ Hambiya lekeni gose gehile na wihi wose na muhokele kwa uholo imbuli iya ihandigwe mugati yenu iine uludole wo kuhonya fidoga fyenu. ²² Ninga yuweni wagolosaji we simbuli ninga siyo wategelesaji muhala wakidanhilisa awecho. ²³ Kosoko munhu yanghowa mutegelesaji du we imbuli ninga simutogomaji kakifana waya wakilanga ne fiyoo muchihanga ²⁴ Kosoko wakilanga awecho howaluta na kisimilwa fowowile, ²⁵ Ninga awaya wakulanga mwilagiso dimemelekele, dilagiso dye indekelelwa, na kwikala umo, na kuwa simutegelesaji yakusimilwa ninga iyakugolosa mulimo ayo kamotesigwa mungolosa yakwe. ²⁶ Inghowa munhu yakiona munhu wa dini, ninga nghakulemesa dilimi dyakwe ninga yakidanhilisa kumoyo wakwe, dini yakwe munhu yo yachakachakasi. ²⁷ Idini iswanu iichaka dilema hamwende ye Mulungu Baba no iyino: Kuwalangilila yatima na wegane mungaya yao na kinega na wihi we chilunga.

¹ Wandugu sangu, mwinadyo dihuwi dye chawelu dye ditunyo dyetu dye Mundewa Yesu Kilisito kwa Kiendelela? Koleni dihuwi dye ditunyo dye Mundewa wetu Yesu Kilisito bila kiendelela. ² Kosoko yanghengila munhu mwitewa dyenu yene sipete se sahabu na kafala fiswanu, kamei yengile yungi yachuchile, ³ na unghamulanga du yafalile fiswanu na kugamba, “Agweye wikale mwigoda,” kamei yuya mukiwa umugambe, “Keme kuya” au “Ikala hamigulu yangu.” ⁴ Togoleni baho hamonelele muchiligati yenu muwecho na kuwa walamusi wa madoga gehile? ⁵ Tegeleseni, wendigwa wangu, Mulungu sikawasagula awakiwa we chilunga kuwa wagoli mwihuwi na wahasi we undewa woyawahuwise awakumwenda? ⁶ Ninga anyeye mukuwabesa wakiwa. Ninga sowawo wagoli wakuwonelani nyeye? Sowene awakuwagumani mumajela? ⁷ Siwawo wakuliga disina diswanu dyomwinangiligwe? ⁸ Mukugolosa fiswanu chawelu munghadimemelesa dilagiso dyo undewa fina maandiko fogakulonga, “Mwende miyago kifana gomwecho.” ⁹ Kosoko halika ukonelela, ukugolosa wihi na ukuhomelesigwa ne dilagiso fina kwa mwihi. ¹⁰ Kosoko wowose yakukola malagiso gose ninga yaduke ilagiso dimwedu basi kaduka gose. ¹¹ Kosoko munhu nomoyakugamba, “Unghagolose dihabwa,” kahi yakugamba, “Kukoma mwiko.” Hambiya halika nghukugolosa dihabwa ninga ukukoma, basi kugaluka mubanaji we dilagiso. ¹² Longeni na kugagolosa kifana wanhu wamanyile wakwijawaliganisigwa ne dilagiso dye ndekelelwa. ¹³ Kosoko Uliganiso ukuwa wichaka ubasi kwe munhu yechaka ubasi, ninga ubasi wokitunya muchanya ye uliganiso ¹⁴ Ina uswanu waki, wandugu sangu inghowa kwinadyo ihuwi ninga kwichaka sinhenda? Dihuwi muhala dyodaha kukuhonya? ¹⁵ Inghowa lumbudyo ama mundugu sako kamwasi kechaka na ndiya, ¹⁶ kamei yumwedu wenu yamugambe luta, “Genda mheho, kotele moto ukaya na kadiye wigute,” bila kumwingha chakudiya na goyakuhananga, togola baho kugolosa choni? ¹⁷ Ihuwi muhala disikutasa chinhu, dufa. ¹⁸ Ninga yanghagamba, “Agweye kwina dihuwi aniye miyago nina nhenda.” Nyonese dihuwi dyako idichaka sinhenda, kamei aniye nani kwa nhenda sangu nokonesa dihuwi dyangu. ¹⁹ Ukuhuwila fina Mulungu yumwedu; ukugolosa fiswanu. Ninga hata magini gakuhuwila nheifo ninga na kuchichima. ²⁰ Ukuhananga umanye, agweye gomunhu kumanya fina dihuwi dichaka sinhenda ni musilatungulu? ²¹ Somwene Ibulahimu kukuyetu yataliligwe ichawelu foyamulafa mwanagwe Isaka yowe sadaka hokufugila? ²² Ukona fina dihuwi dyatogoma mulimo hamwedu na nhenda sakwe na dihuwi hadija kumalagisa mulimo. ²³ Ninga matulumo gakumemelekela gagambile, “Ibulahimu hakamuhuwila Mulungu na hakataliligwa chawelu,” na hakenangigwa mbuyakwe we Mulungu. ²⁴ Ukona fina munhu yakutaliligwa chawelu kwa nhenda ninga siyo kwa dihuwi muhala. ²⁵ Nonheifo, hukona Ilahabu yuya we dahabwa foyataliligwe nhenda swanu kwa kuwahokela wageni na kuwegala kwa njila ingi? ²⁶ Ni kifana mutufi wichaka muhe ukuwa ufa, nheifo ihuwi dichaka nhenda dufa.

¹ Wandugusangu, munghowe wafusa wengi, kosoko mumanya fina aseye ichikufusa choiganiswa na uliganiso mukulu lugano. ² Kosoko chose chikugolosa matoso mengi, na inghowa hechaka munhu yakulosa matoso munonga yakwe, ayo ni munhu yaliganile, iyekudaha kisisa umutufi wakwe. ³ Inghowa chikoha imilomo ye sifalasi, uleke sichogohe, chikudima imitufi yawo yose. ⁴ Langeni simelikebu naso; hata inghowa ni nghulu lugano na sikukundugisigwa na imheho inghali, sikulongosigwa na sitelingi ndodogi lugano kokose koyekwenda idelefa. ⁵ Nheifo kahi dilimi ni chilungo chidodogi lugano, nadyo dikitogola kwa matogolo makulu. ⁶ Kahi dilimi ni moto. Dilimi dikigwa muchilunga cho uwihi, mufilungo fyetu, nadyo nodikuguma umutufi wose wihi, ukwasa moto chimilila we vilungo fyetu nadyo dikwasigwa moto na jehanamu ⁷ Kosoko chila itaho dya ikewe, na dya fidege, na dya ifikutambala, na dye finhu fyuwile mubahali, fikufugika, nafyo fyohigwa na wanhu ⁸ Ninga hechaka iyodaha kufunga dilimi ni wili uwusikubwihila, wina sumu iikukoma. ⁹ Kwa didyo chikumutunya Mundewa na Baba, and kwa didyo chikuwaligitisa awanhu awombigwe kifana Mulungu. ¹⁰ Umulomo umwedu ukumotesa na kuligitisa. Wandugusangu isagile kugolosa nheifo. ¹¹ Nhafo, inhoko kulawa muchosanda chimwedu yodaha kulafa meji gemulile na ageusungu? ¹² Umutini wodaha kulela seituni wandugusangu, hegu umusabibi kulela tini? Nonhaifo inhoko isidaha kulafa meji ga munyu na meji gemulile. ¹³ No nani iyena mahala na misungu mugati yenu? Na yonese imilimo yakwe kwa sinhenda sakwe siswanu, mu uholo wa mahala. ¹⁴ Ninaga munghowa na finju uwina usungu na ulefi mumimoyo yenu, munghakiyone, kahi munghalonge udasi muchanhya ye chawelu. ¹⁵ Ubala wo si uya uwukudulika kulawa kuchanhya, ninga we chilunga, we sinhenda se chimunhu, na Luhoma. ¹⁶ Kosoko ahena ifinju na ulefi no hena matemanuko, na chila nhenda ihile. ¹⁷ Ninga ubala uwukulawa kuchanhya, bosi ni swanu, kahi ni wa digoya, wa uholo, tayali kutegelesa simhuli sa wanhu, wina ubasi na mamudyo maswanu, wichaka, finju, wichaka unafiki. ¹⁸ Na dimudyo dyo uchawelu dikuhandigwa mu digoya na waya awekugolosa digoya.

¹ Inghondo ikwigaligwa na choni, choni chikwigala kitowa mugati yenu? Singhamba usulumisi wenu muwecho wuwile mufilungo fye mitufi yenu? ² Mukusulumila ninga musikupata gomukuhananga, hambiya mukoma na kusulumila kwa fibi, ninga musikupata hata mukitowa na kwika nghodo. Hamukupata kosoko musikutasa. ³ Mukutasa ninga musikupata kosoko mukutasa fibi, uleke mutumie musinhenda sso usulumiso wihile. ⁴ Anyeye mufiyumbe fisikuhuwilika! Musimanyile fina kikola mbuya ne chilunga ni kuwa munghondo ne Mulungu? Kosoko iyo wowose yakuhanaga kuwa mwimbuya ne chilunga yakigolosa imwecho kuwa munghondo we Mulungu. ⁵ au mumanya matulumo gakulonga chaka gagambile; Yuyo yakona finju muchanya ye muhe iyagolose kwikala mugati yetu? ⁶ Ninga yakulafa dihewa dingi; kwahiyo ikugamba Mulungu yakuwapinga awakiinula ninga yakuwengha dihewa awaholo. ⁷ Muhulikeni Mulungu. Mlemeni luhoma naye kuwatijani. ⁸ Msegeleleni Mulungu naye kowasegelela nyeye. Sunheni mikono yenu, anyeye mwine wihi, safisheni mimoyo yenu, anyeye wanhu we milomo mili. ⁹ Hongeseni na kulila. Chiseko chenu chuwe kuhongesa chinyemi chenu chuwe chililo. ¹⁰ Muwe waholo hamwende ye Mundewa naye kowenulani. ¹¹ Munghakilonge fibi nyenye kwa nyenye. Kosoko imwene yakulonga gehile muchanya ye munduguse, yakudilonga dilagiso na yakuliganisa dilagiso. Ninga inghowa ukudiliganisa dilagiso basi gweye simugolosaji we dilagiso ninga mulamusi. ¹² Kwina mulafaji we dilagiso yumwedu du kahi nomuliganisi imwene iyakudaha kuhonya na kubana. Ninga kwanani ukumulamula imiyago? ¹³ Wijeni hambiya anyeye mukugamba, Diyelo ama nhosiku choluta akuya na kukaya iya na kugolosa nhafi na nhafi na kugolosa biyashala; ¹⁴ ugele uwo musimanyile iyo inghousiku. Mikalile yenu ni choni, kosoko nyeye mwa maluwa gakubota kwa chipisi na kunyala. ¹⁵ Mukinhangagigwa mugambe Mundewa yanghenda chogolosa nhafi na kuluta nhafi ¹⁶ Kifana fomukitunya kitunya. Kitunya kose kwa namna ino kwiha. ¹⁷ Kosoko wowose yamanyile amaswanu ninga yakuduga kugagolosa, ukwakwe munhu yo ni sambi.

¹ Tegeleseni nyeye muwagoli, lileni na kuhongesa kosoko ya magayo agakwanga gawejileni. ² Ugoli wenu udoda kamei suke senu siidigwa na matele. ³ sahabu yenu ne ifesa ikola kutu na ikutu yakwe yokwija kuwadiyani ne mitufi yenu kifana moto. Mukiikila ugoli wenu mwijuwa dye ndumo. ⁴ Langeni mushahala wa awakulima wakugola migunda yenu, gomukiikile, ne chililo che wagolaji chimufikila Mundewa we inghondo. ⁵ Hamwikala muchilunga kwa mikalile ya anasa; munonesa mimoyo yenu muchanhya ye dijuwa dye kuchinjigwa. ⁶ Mulamula na kukoma we sinhenda siswanu, ninga nghawatendile chinhu. ⁷ Finyiliseni wandugu sangu mpaka kwija kwe Mundewa. Langeni kifana mukulima foyakugojela kugola kwa mafuno gakwe ge chilunga, mpaka gapate ifula ya nghonga ne ya ndumo. ⁸ Anye nanye muwe na ufinyilisi nheifo. Mwime mumimoyo yenu, kosoko dijuwa dyokwija Mundewa dyahabehi. ⁹ Munghakinghunghulikile nyenye kwa nyenye wandugu, uleke mungheje mulamuligwa; langeni, Imulamusi kema mumilango. ¹⁰ Uwe kifana nonga ya kwandamila ye magayo na ufinyilisi mukulu wa wagonesi wagonese mwisina dye Mundewa. ¹¹ Langeni chikuwenanga ibeka awaya awafinyilisi. Hamuhulika ufinyilisi wakwe Ayubu, na hamona idikusudi dye Mulungu, ifene foniwahuluma na ubasi. ¹² Ninga muchanhya ya gose wandugu sangu munghakilahe, kwa ulanga kahi kwa isi ama kilaha kwa namna yoyse iya, ninga heye yenu yowe heye na hata nayo yuwe hata, uleke mungheje mukugwila muulamusi. ¹³ Kwina munhu wowose yakwidasika mugati yenu? Na yatase. Kasangalala? Na yembe sinyimbo sa kutunya. ¹⁴ Mugati yenu mwina munhu mutamu? Na yawenange wasehe we dikanisa, wamutasile, wamubake na mafuta mwisina dye Mundewa; ¹⁵ na akuya kutasa kwa ihuwi komuhonya mutamu yuya, na hata inghowa hakagolosa wihi kolekeleligwa. ¹⁶ Hambiya lambeni wihi chila munhu kwe miyagwe, na kitasila nyenye kwa nyenye, uleke muhonyigwe. Kosoko mataso gemuchawelu gakwigala mabidulo makulu. ¹⁷ Eliya hakowa munhu fina seye, ninga hakatasa ifula inghatonye, na kwa minyaka midatu na minyesi mutandatu isilafile hata ditwenhe. ¹⁸ Kamei hakatasa lwa keli hoitonya na chilunga hochikweleka. ¹⁹ Wandugu sangu munhu wowose mugati yenu yanghagilila kutali kulawa kuchawelu kamei yumwedu wenu yamuwise, ²⁰ manyeni fina ayuya yamuwise imwihi yuya kulawa musambi kohonya chidoga chakwe ne difa na sambi sakwe nyingi sogubikigwa.