WAGALATIYA

WAGALATIYA

¹ Paulo Mutumigwa siyo na wanhu kahi kulawa kwa mwanadamu, ninga iYesu Kilisito imwecho ne Mulungu Baba, yamwinule kulawa muchilalo. ² Awakilisito wose woile hano hamwedu na niye chikuwegalilani mulamuso kumakanisa gose gowile ako Galatiya: ³ Mulungu iBaba yetu na Mundewa wetu Yesu Kilisito na yamwingheni mboto yakwe ne idigoya, ⁴ uleke yachilekelele kulawa muchigele achi cho wihi. Kilisito hakakilafa imwenyecho kosoko yo wihi wetu, fina foyendile Mulungu iBaba yetu; ⁵ Ditunyo dina imwene chigele chose! Hano. ⁶ Aniye nikujuma! Nhani nheifo mukumuleka chimwande mwande iyamwinangileni mumboto ya Kilisito kamei mukubidukila Injila ingi. ⁷ Na ninga siyo fina kwina mbuli swanu ingi, ninga nikulonga nhafi kosoko kuna wanhu wakumwidasani na kuibidula Imbuli swanu ya Kilisito. ⁸ Ninga inghowa noseye ama Malaika kulawa kulanga yangheja yawahubili Imbuli swanu ingi ikulemana na aiya yochihubili aseye ukwenu, basi yaligitwe! ⁹ Fina fochilongile, na nikulonga lwakeli: Munhu yoyose iyakuwahubiliani Imbuli ikulemana na aiya yomuhokele na yaligitisigwe! ¹⁰ Aniye nikiyendesa kuwanhu ama kwe Mulungu? Ama nikituma kuwendesa awanhu? Kusigwa ninghali kwenda kuwendesa wanhu sinowile nikuwa mutogomi wa Kilisito. ¹¹ Hambiya gojeni niwatamileni wandugu sangu fina imbuli aiya yonawahubili siyalawile kwa munhu. ¹² Kahi siipatile kwa munhu wowose, kahi safuswa na munhu wowose ninga kwa kugubuliligwa na Yesu Kilisito. ¹³ Togoleni simuhulika niye fonowile imikalile yangu mudini ye Chiyahudi, fina fonidisambase dikanisa dye Mulungu bila ubasi na kugesa kudibana. ¹⁴ Aniye haniwalongolela wengi we disika dyangu kukola mafuso ge dini ya Chiyahudi, na kupiligala kukola mahokelo ga wasehe wetu. ¹⁵ Ninga iMulungu kwa imboto yakwe hakanisagula na kuninanga nimutumikie hata fonowa nikali kwelekwa. Yenda kunigubulila ¹⁶ imwanagwe, uleke nimuhubili kuwanhu wa mataifa wasimumanyile Mulungu, na simutasile munhu wowose ama kumusa fina nikonge nhani, ¹⁷ sakwila hata Yelusalemu kuwatumigwa wanilongolele kuwosa. Ila haniluta ningila mpaka Alabiya kunghonga, kamei kahi honikuya mpaka Damesiki. ¹⁸ Kamei foyaloka minyaka midatu hanikwila kahi mpaka Yelusalemu hanijamona Kefa ukuya, honikala ihakwe majua ikumi na mashano. ¹⁹ Sawonile hachikiyonile na awatumigwa wamonga ninga Yakobo du munduguse na Mundewa. ²⁰ Aga gonikumwandikilani Mulungu kamanya fina sikuwandika udasi! ²¹ Kulawa baho haniluta kusitalafa sa iisi ya Silia na Chilikia. ²² Na ichigele cho samanyike kaa! Mumakanisa ga Wakilisito wa kuya Yudea. ²³ Awanhu waya imbuli yowamanyile awene ni fina: Munhu yuya yendeyoliga na kuchitesa fibi kaumo naye yakuhubili dihuwi didino dyoyendayaliga! ²⁴ Kamei hawamutunya Mulungu kosoko yangu.

¹ Basi foyaloka minyaka ikumi na mine hanikwila kuluta Yelusalemu na Balinaba, kamei chalutanya na Tito. ² Kuluta kwangu ni kosoko ya magubulo ge Mulungu. (Chuwile mu njama haniwatamila Filongosi) fina fonihubili Imbuli swanu muwanhu wa mataifa wamumanyile Mulungu. Hanigolosa nhaifo uleke milimo yangu ingheje ikuwa chaka. ³ Ninga hata imiyangu Tito iMuyunani, hadindiligwe kufinigwa, ⁴ ninga kosoko hakuwa na maKilisito ga udasi gendage gahananga gafinigwe. Mamunhu go hagakiingisa chinyemela, na kuhananga uhulu wetu wo chikilungise na wochuwile nawo mugati mwa Kilisito Yesu. Uleke wachingise muutumwa, ⁵ aseye hachilema lemilemi uleke ichawelu ye Mbuli swanu igendelele kusigala na nyenye. ⁶ Ninga wanhu wawo wakugambigwa Filongosi halika ni Filongosi ama hata, filongosi aniye ukwangu kaa; kosoko iMulungu hakulamula kwa kulanga futa. Wanhu wano hawowile na dyodyose dya kunongesela, ⁷ ninga chinyume chakwe fowona kwinghwigwa ne Mulungu mulimo wo kuhubili Mbuli swanu kuwamataifa kifana Petulo foyeng’igwe ikasi yo kuwahubiliya Wayahudi Mbuli swanu. ⁸ Kwa ludole lwa Mulungu nigoloswa Mutumi yatumigwe kuwamataifa, kifana Petulo foyagoloswa Mutumi kuwayahudi. ⁹ Wakone fina dihewa dyoninghigwe, Yakobo, Petulo na Yohana awowile mikiki hawafumi fina aniye ne Balinaba chilute ku wamataifa awene walute kuwanhu wafinigwe. ¹⁰ Ila nonga imwendu du yowachisigilile fina chiwagelegele awakiwa, mbuli iyo ayo hanuwa ludole nayo lugano. ¹¹ Ila Petulo foyeja Andiyokiya, hanimugombela bila chifiso kosoko hakowe kena wihi. ¹² Kosoko chigele wasinati hawanghati weje wanhu kulawa kwa Yakobo, yondeyodiya hamwedu na wanhu wamataifa. Kamei foyawonile wanhu waya wafika, hakakitenda kifana hadiyage nawo kosoko yendeyowogoha waya wafinigwe. ¹³ Nawo Awayahudi wamonga hawagolosa nheifiya mpaka Balanaba naye hakanegigwa na chimwefe chawo. ¹⁴ Aniye nikawone fina wasikugenda munjila inogile ye chawelu ye mbuli swanu, honimugombela iPetulo hamwande ya wanhu wose fina, Inghowa gweye go Muyahudi ukwandamila sijadi sa wamataifa; wanhu wasimanyile Mulungu kahi si Wayahudi. Nhani ukudindilisa wamataifa wandamile sa Wayahudi? ¹⁵ Aseye chiwecho Chiwayahudi kwa kwelekigwa kahi si wamataifa awena uwihi. ¹⁶ Kahi wamanyile fina imunhu nghekulaliligwanhenda sa chawelu kosoko yasinhenda sa malogiso ninga kosoko ya dihuwi mu Yesu Kilisito, hata na seye chihuwila mu Kilisito uleke chiteliligwe ichawelu kwa dihuwi mu Yesu, ninga si kwa sinhenda sa Malagiso, kosoko kwa sinhenda sa malagiso hechaka munhu wowose yakudaha kutaliligwa fina kena nhenda sa chewelu. ¹⁷ Hambiya inghowaga aseye chiwecho kwa kukonga kutaliligwa haki kwa njila ya Kilisito, hachoneka fina china wihi. Inghowa nonheifo togoleni nong’amba iKilisito yakutasa kwenesa uwihi? Chawelu ng’o! ¹⁸ Kosoko inghowa nikujenga gagaya kahi gonimonile, togoleni isikonesa finanimwecho nomubanaji. ¹⁹ Kosoko aniye kwa njila ya malagiso iyecho ganikoma, ila hambiya namumi kosoko ye Mulungu. ²⁰ Nisambasigwa hamwedu na Kilisito kahi siniye ni mumi ninga Kilisito no mumi mugati yangu. Na uumi wo ninawo hambiya mumutufi, ninawo mwihuwi dye mwana we Mulungu, imwene yanyendile na kulafa chidoga chakwe kosoko yangu. ²¹ Sikwenda kuilema imboto ye Mulungu. Kosoko inghowa munhu yakutaliligwa nhenda sa chawelu kwa njila ya malagiso, basi Kilisito hakafa chaka!

¹ Nhafo nyeye Muwagalatiya muwabwalasi! Nani yamulogileni inghowaga imanyika kumwande ya meso genu fina Yesu Kilisito katungikwa? ² Nimuseni mbuli ayi imwedu: Hamuhokela Muhe kwa nhenda sa malagiso, hegu kwe kuhulika na kuihuwila? ³ Mwabwalasi lugano! Mukakonge na Muhe; hambiya mukuhananga Mulungu; ninga hambiya mukuhananga kwa chimutufi kumala? ⁴ Ninga gose gomugolose mutenda chaka? Chawelu chaka chakasi! ⁵ Je nong’amba iMulungu yamwinghileni Muhe na kugolosa majumo umwenu ago gose agakugoloseka kosoko ya nhenda sa malagiso ama kosoko hamuhulika Mbuli swamu na kuihuwila? ⁶ Hambia Ibulahimu hakamuhuwila Mulungu, na kutaliligwa fina muchawelu. ⁷ Nanye mumanye fina awanhu we dihuwi no wana wa Ibulahimu. ⁸ Matulumo gakone kumwande fina iMulungu yakwenda yawatalile ichawelu awamataifa kwa dihuwi, kahubili imbuli swamu kwa Ibulahimu yakugamba, “Umwako gweye amataifa gose gamotesigwa.” ⁹ Kwa nheifo awanhu we dihuwi wakumotesigwa hamwedu na Ibulahimu iyowile ne dihuwi. ¹⁰ Kosoko awaya awakwegamila lugano mumalagiso, awo wakwikala mumaligito makulu. Kosoko imbuli ye Mulungu ikugamba, “Munhu wowose nghakwandamila sose situlumigwe muchitabu che malagiso, basi kowa mwiligito ikulu!” ¹¹ Hambiya imanyike lugano fina kwichaka munhu yakupata haki kwe Mulungu, kosoko yakwandamila malagiso kosoko matulumo gakugamba nhafi: No yuya du yene Dihuwi mwi Mulungu mumi. ¹² Ninga amalagiso gasikwima mudihuwi. Iyakugagolosa yakwenda yowe mumi mugago. ¹³ Ninga kwa kugoloseka kuwa iligito iKilisito kachilegusa seye kulawa mwiligito, ligito dikwigaligwa ne malagiso; kosoko matulumo gagamba fina, Kaligitisigwa ne Mulungu imunhu yatungikigwe mwibiki. ¹⁴ Kilisito kagolosa gano gose uleke simboto se Mulungu soyalagane na Ibulahimu wasipate nawo awamataifa kwa njila ya Kilisito Yesu, uleke kwa njila ya kumuhuwila chihokele Muhe kwa ihuwi dye Mulungu. ¹⁵ Wandugu sangu, chinghalondela mbasi ye chimunhu munhu kifana wanhu weli nomowa kulagana mbuli na kikulumisa, hechaka yungi kahi yoibidulisa fingi. ¹⁶ Hambiya no nheifo kugamba dilagano dyagoloswa kwa Ibulahimu na lukolo lwakwe. Aino isigambigwe fina Milukolo ya wengi, ila igambigwa: Kulokela mulukolo lumwedu lwa Kilisito. ¹⁷ Chonikulonga hano nochi; Mulungu hakeka ilagano na Ibulahimu na kudigelegela. Dilagiso dyalafwa minyaka magana mane na makumi madatu ilokile isikudaha kubena Dilagano diya na kulegusa dilagano dye Mulungu. ¹⁸ Kosoko inghowa uhasi we Mulungu ukuhuwila ilagiso, basi ichaka haja ya ahadi. Ihuwi ninga iMulungu kamwingha ino Ibulahimu kwa njila ya dilagano. ¹⁹ Nhani mbiya yuwe ilagiso? Ni kosoko dilagiso hadija uleke konesa nhenda sihile mpaka lukolo lwa Ibulahimu, lukolo lwe dilagano wije. Dilagiso hadija kwa mikono ya malaika, ne munhu yengilile kifana mulamusi. ²⁰ Ninga Imulamusi nghodaha kuwa yumwedu amba Imulungu ni yumwedu. ²¹ Aho, nong’amba dilagiso dikulemana ne siyahadi se Mulungu? Gwe hata! Kosoko woile dilagiso hadija uleke munhu yapate uumi, kahi ichawelu nayo hayuwa kwa njila ya dilagiso. ²² Ninga matulumo gagamba fina ichilunga chose chitawaligwa na ludole lwa sambi, na kosoko ya iyo basi uhasi wa ahidiigwe ukupatikana kwa njila ya ihuwilo, dikupatikana mwa Yesu Kilisito kwa waya wakuhuwila ²³ Ninga chigele Dihuwi fodowa dikali kwija, aseye chose hachuwa muchifungo mpaka Dihuwi dino fodigubuligwe. ²⁴ Nonghomba dilagiso hadichilongosagaa mpaka chigele Yesu foyeja, uleke chuwe we chawelu kwe Mulungu kulokela dihuwi. ²⁵ Hambiya ugele we dihuwi no uno, ninga dilagiso dichaka chinhu ukwetu keli. ²⁶ Kosoko muKilisito Yesu anyeye mose mwa wana we Mulungu kulokela dihuwi. ²⁷ Ifene amatewa mugati yenu fowabatisigwa mu Kilisito wamufale Kilisito.. ²⁸ Aho lo hechaka Muyahudi kahiMuyunani, mutumwa ama si mutumwa, hechaka mugosi kahimwanamuke, kosoko mana anyeye mose mwa hamwedu mu Kilisito Yesu. ²⁹ Inghowa nyeye mwa wanhu wa Kilisito mumanye fina mwawana wa Ibulahimu, kahi mwawahasi kuligana ne dilagano.

¹ Nikugamba nhafi Imuhasi muugele woyekuwa mudodogi, kefana mutumwa, hamwedu nokuwa no Mundewa wa fyose. ² Ninga yakuwa kowa hasi ya wanhu wakumulela na kumulangilila mpaka chigele iBabakwe foyakwija yamulekela ukulu. ³ Nheifo aseye nase fochowa chinghati chikule, hachuwa watumwa, we simbuli se chilunga achi. ⁴ Ninga chigele ichecho chikeje Mulungu hakamutuma mwanagwe. Imwene yelekwe na Mwanamuke, hakelekwa mwidilagiso dye Chiyahudi, ⁵ soko yawaleguse waya woile mwidilagiso, ili seye chinangwe wana wa Mulungu. ⁶ Na kosoko nyeye mwa wana wakwe, Mulungu hakamutuma Muhe we Mwanagwe kufidoga fyetu iyakulila Aba! Agwe Baba. ⁷ Hambiya kulokela Imulungu musikugendelela kuwa watumwa ning wana, na nghona ni wana kahi wahasi.. ⁸ Katali fomowile munghati mumumanye Mulungu we chawelu, hamugendelelaga kufuga ifyumbigwe ifisowile Mulungu. ⁹ Ninga hambiya mumumanya Mulungu we chawelu, ama chigambe fina Mulungu mbiya kamumanyani nyeye, nhani mukuwila keli mafuso gasokile, mukuhananga muwe watumwa wani? ¹⁰ Mukukolelesa mbuli sa majuwa, minyesi, figele na minyaka. ¹¹ Aniye to nikogoha seka ije yuwe nghiidasa chaka chakasi kosoko yenu. ¹² Wandugusangu nikutasa lugano muwe kifana fonuwile niye. Kosoko niye nani nikifana nyeye ninga du musinigolosele dyodyose dihile. ¹³ Mumanya fina haniwahubili Imbuli swanu ichigele che inghonga, kosoko hanuwa na mutamu. ¹⁴ Hamwedu ihali yangu hayuwa Magesa ukwenu, musanibesile kahi kuniliga, ninga hamunihokela fina Malaika we Mulungu kifana Kilisito Yesu. ¹⁵ Fina hamuwa na chinyemi chikulu, mpaka hanidoga fina woile ikudahika kukumhula meso genu muninghe niye. ¹⁶ Togoleni nong’amba nigaluka mughondo wenu kosoko yo kuwatamilani ichawelu? ¹⁷ Awo wayenu wakonesa kifana wanogelelwa na nyeye, kumbeke wakuwahindilani kunje, uleke nyeye muwendese awene lugano. ¹⁸ Chawelu ni mbuli swanu kuwedasikila wamonga musimbuli si swanu siyo ugele wonibaho hamwedu nanye. ¹⁹ Mowangu wadodogi! Nikumonelani ubasi kifana imwanamuke nomaa yakukolwa no usungu wo kweleka, nani nikumonelani usungu mpaka Kilisito yombike mugati yenu. ²⁰ Nikudoga nhanga nowile na nyeye lulu bahano, uleke nibidule dijwi dyangu kosoko nikona manhonge kosoko yenu. ²¹ Nikuhananga munitamile nyeye mukwenda kwikala mudilagiso: Musihulike fina dilagiso fodikulonga? ²² Fina Ibulahimu hakowa na wana weli, yumonga ni mwana we mwanamuke we chitumwa, kamei yumonga mwanamuke siwechitumwa. ²³ Ayuno mwanagwe we chitumwa hakelekwa munjila ye chimutufi kifana wanhu wose, ninga yuno yumonga hayuwa kwa njila ya ihuwiso dye Mulungu imwecho. ²⁴ Mbuli sino simanyika kifana mbasi: Kosoko wanawake wano weli wakonesa agaya malagano meli. Ayuya yene wana welekwe muutumwa, no Hajili, na ayuno yakonesa adiya dilagano dyagoloswa he tunda dya Sinai. ²⁵ Hajili yuno yemile mwilagano dya mwitunda dya Sinai duwile ako Uwalabuni ni kifana mufano wa konesa dikaya dya Yelusalemu, kosoko dina wanagwe watumwa mpaka hambiya. ²⁶ Ninga iYelusalemu ya kulanga siyo ye chitumwa, nayo iyo no ng’ina yetu seye. ²⁷ Kosoko Itulumigwa nhafi: Sekelela gweye Musilatungulu go hukweleka! Inula dijwi dyako ujoje, agweye go winghati wone usungu wo kweleka! Kosoko wanagwe wa yuya yalekigwe ye mwene, wengisi kusuma yuya yene mugosi. ²⁸ Hambiya wandugusangu, aseye nase cha wanagwe we Mulugu kwe chihuwi, fina Isaka foyowa. ²⁹ Ninga kifana chigele chiya ayuya yelekigwe muutumwa foyamwidasage yuya yelekwa kwa njila ya muhe; noyuwile yuwile mpaka hambiya. ³⁰ Ninga itulumwa nhani mwilago? Si ikugamba, “Muwingeni mwanamuke we chitumwa ne mwanagwe, kosoko imwana we chitumwa gwe hata nghodaha kuhala hamwedu ne mwana wa hakaya.” ³¹ Nhafo no chileka nikugamba aseye siyo cha wana wa mutumwa ila wana wa yuyo mwanamuke we hakaya.

¹ Indekelelwa yochinayo chinghigwa na Kilisito Hambiya mwime ngwingwi mwinghowe hasi keli yo utumwa. ² Tegeleseni! Aniye Paulo niwatamileni, Munhu yanghafinigwa yangheje yamanya fina Kilisito yakumutasa chinhu. ³ Kahi nikumujama chila munhu fina; yanghahananga kufinigwa yakuhanangwa yakole ne Itolati yose foikulonga. ⁴ Mubagulwa na Kilisito nyeye mukukola malagiso uleke noho mumwedese Mulungu. Ninga muwa kunje ne imboto ye Mulungu. ⁵ Ninga seye kwa Muhe chikugojela nhenda se chawelu ye Mulungu kwa njila ya dihuwi. ⁶ Kosoko kwa Kilisito kufinigwa na kuleka kufinigwa gose go gasikumutasa munhu chinhu chochose, ila kuwa na dihuwi dikugolosa mulimo kwa njila ya wendo. ⁷ Mwendemubilima fiswanu! Hambiya kahi nani yawagoloseni munghaifumile ichawelu? Iyamubilimiseni fibi nhafo nani? ⁸ Dilagiso dino sidikulawa kwa yuya iyamwinangileni. ⁹ “Unghaguma nungo hata inghowa ndodogi ikusasisa usage wose.” ¹⁰ Nikihulika nituna mwe Mundewa, nong’amba musilonda madoga gengi kusuma agangu, na wowose iyowedasa nyeye momwingha maliho gakwe hata yanghowa nani. ¹¹ Ninga kwa ulwandi ulwangu halika nogendelela kuhubili fina kufinigwa ikuhanangigwa, nhani mbiya ho kudumangiswa? Woile fina no nheifo yuwile, basi kuhubili kwangu imbuli yo musalaba wa Kilisito kusowile kukuwa na lwidaso. ¹² Ninga ibeka wawo wakumugumani manhonge walute wakafile kutali na nyeye. ¹³ Kosoko nyeye wandugu sangu hamwinangigwa mulekeleleligwe. Ninga mughasigolosele ndekelelwa yenu fibi kosoko mulekelelwa. Lekeni mukitase chila munhu na miyagwe. ¹⁴ Kosoko Malagiso gose muchitabu gamemelekela mwimbuli yiyo imwedu nayo: “Mwende miyago kifana foukiyenda gomwecho.” ¹⁵ Ninga munghowa kifana makewe, kiluma na kinghwakila, langisiseni mungheje mukimala. ¹⁶ Chonikulonga niye nochi, fina: Lekeni Muhe no umulongoseni mumikalile yenu, ninga hata nheifo simukwiguta usulumisi we mutufi. ¹⁷ Kosoko agaya agakwendigwa no umutufi, no gesikwendigwa na Muhe. Na agakwendigwa no Muhe no gasikwendigwa no mutufi. Awano weli Wanghondo, na ayino ikonesa fina musikudaha kugolosa muwecho gaya go mukwenda kugolosa. ¹⁸ Ninga inghowa mukulongosigwa na Muhe, aho nanga musuwile mumalagiso. ¹⁹ Na gose gakugolosigwa ne mutufi gamanyika du, mbona gamonga noga: Dihabwa, uwihi, nhenda sihile; ²⁰ mafugo ge chikindikindi, uhayi, unghondo, kugomba, kiyonela gele, nyono, ukobo, kulemana, udasi; ²¹ chimesomeso, kunywa gimbi, ulefi, na goose gamonga kifana gago. Ayo lo nikumutamilani nghana fina: Wanhu wakugolosa ago, awo wasikwingila kulanga kwe Mulungu ng’o. ²² Ninga Dimudyo dye uMuhe we Mulungu nodi: Uwendo, ichinyemi, digoya, ufinyilisi, uunhu uswanu, kitasa, uchawelu, ²³ uholosi, kechaka makulu. Musimbuli so, hechaka sheliya. ²⁴ Na awaya woile mugati ya Kilisito wasabwalisa mutufi na madoga gakwe gehile. ²⁵ Halika chikwikala na Muhe; basi na chigende na Muhe. ²⁶ Chinghakitunye chiwecho chaka na chaka, na kiyanda sese kwa sese.

¹ Wandugu sangu imiyenu wowose yanghagolosa wihi, nyeye mwichaka wihi mujameni miyenu na kumuwisa kwa moyo muswanu. Ninga kilangisiseni nanye muwenyecho mungheje mukugwila umo. ² Kitaseni nyenye kwa nyenye, kosoko kwa njila ya kugolosa nhafo no kwandamila dilagiso dya Kilisito. ³ Munhu imwiyoni nomoo yakiyona imwenyecho ni chinhu kumbe siyo chinhu, yakidanhilisa imwecho. ⁴ Ninga chila munhu na yaisungilile imilimo yakwe imwecho. Kamei noho yowe na nonga ya kiyona nayo imwenyecho kuchidoga chakwe siyo kwe miyagwe. ⁵ Kosoko chila munhu yakwija yakwinula dikanda dyakwe imwecho. ⁶ Ninga iMufusigwa yakifusile mbuli swanu nayamutamile ne iMufusa wakwe. ⁷ Munghakidanhilise, Mulungu hakubesigwa. Kosoko chochose munhu cho ya kuhanda nocho yakwija yagola. ⁸ Iyakuhanda kwa kwandamila mbuli so mutufi wakwe, basi yakwija yagola difa kulawa umo mumutufi wakwe; lakini yuya yahandile kwa Muhe, yakwija yagola umo muMuhe uumi wa majuwa gose. ⁹ Ninga chinghasoke kugolosa maswanu; kosoko chikwija chigola kwa chigele chakwe, halika chokuwa hachilekile. ¹⁰ Hambiya nheifino nomaa chine luneka, basi chigendelele kugolosa maswanu kuwanhu wose ninga saidi lugano chiwagolosele wayetu wochuwanye mwikanisa. ¹¹ Langeni ukulu lwa ulutulumo wo nitulume mubaluwa yangu ukwenu kwa mukono wangu ni mwecho! ¹² Awaya wakwenda kiyonesa mitufi yawo fina wakugolosa nhenda swanu, nowene wakumulasimishani nyeye mufinigwe. Awakugolosa du nheifo uleke wanghadesigwe kosoko ya musalaba wa Kilisito. ¹³ Ninga du hata awecho wawo awakwenda kufinigwa, malagiso wasikuyakola, ila wakwanga nyeye nomufinigwe uleke wakitunyile umwenu fina langa lo! Wakukola malagiso fiswanu. ¹⁴ Ninga Aniye to, hata sikitunyila chinhu chochose ila musalaba wa Mundewa wetu Yesu Kilisito, kosoko kwa kulokela uwo ichilunga chisabwalisigwa ukwangu, na aniye nani nisabwalisigwa muchilunga. ¹⁵ Kosoko kufinigwa na kuleka kufinigwa gose sawa du; chikuhanangigwa usha wo moyo. ¹⁶ Na kwa wose wakuhanga wandamile gago, nikugamba kwimageni, ninga wagende digoya na ubasi we Mulungu ugende nawo ne wanhu we Mulungu Isilaeli! ¹⁷ Nikumalagisa kwa Kugamba: Kukongela hambiya nhafi munhu yanghanidase, fina nikulonda lubonoto lwa Yesu mumutufi wangu. ¹⁸ Wandugu sangu dihewa du ye Mundewa wetu Yesu Kilisito na dyuwe hamwedu ne mimoyo yenu. Hano.