WAEFESO

WAEFESO

¹ Paulo mutumigwa wa Kilisito Yesu kwa nyenda ya Mulungu, ku wasunhile awene wakuhuwilika mu Kilisito Yesu: ² Dihewa dyuwe ukwenu na idigoya kulawa Mulungu Baba yetu ne Mundewa wetu Yesu Kilisito. ³ Yatunyigwe Mulungu Baba we Mundewa wetu Yesu Kilisito imwene iyachimotese seye muKilisito hamwedu ne simboto sose se chimuhe kulanga, ⁴ hata foyachisagule chigele Ichilunga fochowa chisinati chumbigwe uleke chuwe wasunhile wechaka ilema ukwakwe. ⁵ Hakachisagula chuwe wanagwe kulokela Yesu Kilisito, kosoko ye nyenda yakwe. ⁶ Kuditunyo dyakwe dye nhogolwa dye dihewa fina hakachilekelela kulokela mwimwendigwa. ⁷ Umwakwe china uhonya kwanjila ya sakame yakwe, na kulekeleligwa wihi wetu ifene ugoli we dihewa dyakwe fowuwile. ⁸ Imwene hoyaching’ha ago mumemelesi, ⁹ kosoko hoyomanyika ukwetu kwa ubala na ujelu wose uwichaka chifiso kosoko no nheifo yendile mumakusudi gakwe goyakusudie fina galokele mwa Kilisito. ¹⁰ No nyenda yakwe fina ichigele fochimemelekela yafigale ifyumbigwe fyose umwakwe ifinhu fuwile kulanga na muchilunga. ¹¹ Umwakwe ifinhu fyose fifuluka kugolosigwa kifana foyendile. ¹² Aseye chi wanghonga mwihuwi dya Kilisito chasaguligwa na kwikigwa chikale chimutunye mwitunyo dyakwe. ¹³ Kulokela muimwene anye nanye hamuhulika imbuli ye chawelu, aiya mbuli swanu imwigalileni Uhonya wenu, kahi homuhuwila ninga homutoigwa lubonoto we dilagano dye Muhe musunhile, ¹⁴ iyo no dihuwiso dyo uhasi wetu, mpaka kuuhonya we wanhu wakwe Mulungu kunhogolwa ye ditunyo dyakwe. ¹⁵ Kosoko yo ninga hanihulika dihuwi dyenu mu Mundewa Yesu na wendo wenu kuwasunhile wose we Mulungu, ¹⁶ Sikuleka kulafa malumbo kosoko yenu na kuwagelegelani mumataso gangu, ¹⁷ fina Mulungu we Mundewa wetu Yesu Kilisito iBaba we ditunyo yawengheni Muhe we ubala na magubulo mumanyi wose uwile umwakwe. ¹⁸ Meso ga mimoyo yenu gowe majelu mudahe kumanya dihuwi dyomwinangiligwe na ifene ukulu wo ugoli wakwe fouwile mwitunyo dyo uhasi kuwasunhile wakwe. ¹⁹ ne ifene ukulu we udaha uusikudaha kupimika fouwile ukwetu seye chimuhuwile na kosoko ye milimo mikulu ine udaha yoyakutogoma. ²⁰ Iyene iyo noijile imalagikila mwa Kilisito chigele foyamulafa muchilalo na kumugolosa yekale mumukono wakwe wa kulume kulanga. ²¹ Kuchanhasi ya undewa wose na udaha na ludole na ulongosi na kuchanhya ya chila isina idinangigwe siyo du muugele uno ninga na muchigele chikwija; ²² Naye keka finhu fyose hasi ye migulu yakwe, na kamugolosa imwene Kilisito kuwa no Ditwi dye finhu fyose kosoko ye dikanisa ²³ no mutufi wakwe, umemelekele muimwene iyakumemelesa ifinhu fyose.

¹ Hamuwa wanhu wafile kosoko ya sisambi senu. ² hamwandamilaga mbuli sihile se chilunga achino, na kumwandamila Mundewa wo ludole we ulanga, muhe uya uukutogoma mlimo mpaka hambiya muwana wasikwenda kuhulika. ³ Na aseye chose hachuwa nheifo chigele cha kunyuma hachandamila nhenda sihile se mitufi yetu na gose madoga gehile na kugagolosa, hachuwa wana woile muihukumu ye nyono kifana awamonga. ⁴ Ninga iMulungu yamemile ubasi yene uwendo mukulu woyachendile seye, ⁵ hata chigele fochowa wanhu wasimumi kosoko ya makosa getu, imwene hakachigolosa womi kulokela Kilisito (ninga kwa mboto ye Mulungu muhonyigwa) ⁶ na hakachinula muchilalo hamwedu naye na kuchika ne imwene kulanga muKilisito Yesu. ⁷ Fina ichigele chikwija yadahe konesa umemi we simboto sakwe isisikupimika muswanu wakwe ukwetu seye mu Kilisito Yesu, ⁸ kosoko muhonyigwa kwa mboto ya Mulungu kwa njila ya kuhuwila, ninga siyo kosoko ye sinhenda senu, ninga ni kwa chingwa cha Mulungu du ⁹ sikosoko ya milimo yoyose ninga munhu wowose yangheje yakitunya. ¹⁰ Kosoko seye no mulimo wakwe hachumbigwa mu Kilisito Yesu kosoko yo mulimo muswanu utandiligwe ne Mulungu kulawa kunghonga uleke chigende umo. ¹¹ Hambiya mugelegele fina anyeye muugele uya hamuwa wamembe kwa chimutufi, mukwinangigwa wasifinigwe na waya wafinigwe, ikumbi dya mutufi dikugolosigwa na mikono, ¹² ninga gelegeleni fina chigele chiya nyeye hamubaguligwa na Kilisito hamutemanhulwa kulawa mwisilaeli kahi wagenii mwi malagano ge dihuwiso, hamuwa mwichaka ihuwi kahi Mulungu muchilunga. ¹³ Ninga hambiya kulokela Kilisito Yesu anyeye mowile kutali ne Mulungu mugaligwa habehi kulokela sakame ya Kilisito. ¹⁴ Kosoko imwene no idigoya yetu, iyachigolose seye chuwe yumwedu, na kubena ulukasi woile hagatigati uchibagule. ¹⁵ Hoyalegusa ulukasii kwa mutufi wakwe no sisheliya malagiso na kugolosa muimwenyecho munhu musha yumwedu badala ya wanhu weli hoyegala idigoya lugano, ¹⁶ na yadahe kuchilamula chiweli kwe Mulungu kwanjila ya mutufi umwedu ahaya ho musalaba na kulegusa fikwakwaliso. ¹⁷ Hoyeja na kuhubili idigoya ukwenu nyeye mowile kutali kamei na waya woile habehi. ¹⁸ Kosoko kulokela imwene chose chipata luneka lwa kumufikila Baba kwa Muhe yumwedu. ¹⁹ Hambiya nyeye siyo mwa wageni keli, ninga siyo wagendanjila ninga mwa wakaya hamwedu na wasunhile wanhu wa hakaya he Mulungu, ²⁰ mujengigwa mu munghindiso ya Watulumi na Wagonesi, iKilisito no sumbi ya hagatigati, ²¹ muimwene yuyo mujengo wose ukikolela hamwedu na kukula mpaka duwe ihekalu disunhile mwi Mundewa; ²² Muimwene umo anye nanye mukujengigwa uleke muwe kaya ya Mulungu kwa njila ya Muhe.

¹ Kosoko ya iyo Aniye, Paulo, mohigwa kosoko ya Kilisito Yesu na kosoko yenu nyeye wamembe. ² Dihuwi dyangu ni fina muhulika utogomi we mboto ye Mulungu wonenghigwe niye kosoko yenu. ³ Ifene foyanigubulile ichifiso na kugolosa imanyike na niye imbuli yakwe, kifana foniyandike chidodogi. ⁴ Nomo mukusoma aino motanga ifene fonimanyile ichifiso chakwe Kilisito, ⁵ ichifiso cho chisimanyike ne wana we wanhu we chigele chilokile kifana foigubuligwe hambiya muchigele achi ku watumigwa wakwe na wagonesi wasunhile kwa njila ya Muhe. ⁶ Ayo no ikuleka awamembe nawo niwahasi hamwedu na seye wakuhala hamwedu mu mutufi umwedu na wakuhangila na seye idihuwiso dyakwe dyuwile mwa Kilisito Yesu kulokela Mbuli swanu ⁷ Kosoko ya iyo Imbuli swanu aniye hanigoloswa mutogomi kwa chinghwa che imboto yakwe Mulungu cho neng’hingwa kosoko yo ludole lwe mulimo wakwe. ⁸ Aniye no ni mudodo kusuma imudodogi mu wasunhile, haning’igwa mboto ino uleke niwahubili wamataifa utajili wakwe Kilisito umemile, ⁹ na kuwagolosa wanhu wose wone na kumanya inyenda ye ichifiso chakifisile minyaka mingi ilokile mwe Mulungu yombile finhu fyose; ¹⁰ no kugamba fina kulokela dikanisa ubala we Mulungu hambiya umanyike na undewa wose na udaha muchilunga cha kulanga. ¹¹ Adino haduwa soko ya minyaka na minyaka dyoyapangile mu Kilisito Yesu Mundewa wetu, ¹² muimwene umo chichaka woga kahi chikihuwisa ku njila ya ihuwi dyetu umwakwe. ¹³ Ninga hambiya nikuwatasani munhofe mimoyo kosoko nikiidasa kosoko yenu na kwa itunyo dyenu. ¹⁴ Kosoko ya iyo nikufugama hamwande ya Baba, ¹⁵ Yuyo imwene ifinhu fyose kulanga na hasi fikutambuligwa, ¹⁶ uleke kugendela ugoli wakwe we ditunyo yakudaha kumwingha nyeye mudahe kuwa na ludole lwe ditunyo hamwedu na udaha kugendela Muhe wakwe mugati yenu, ¹⁷ na fina Kilisito yekale mumimoyo yenu kwa njila ya dihuwi; na ninga muwe na misisi na kugimbisigwa muwendo, ¹⁸ muwe na ludole lwa kutanga hamwedu na wasunhile amagalamu, matali, masisilii na gengile, ¹⁹ na mumanye uwendo wa Kilisito ambawo ni umanyi ulokile umanyike wose, ninga mumeme telele umemelesi wose we Mulungu. ²⁰ Hambiya muimwene yene udaha ukugolosa mulimo mugati yetu kena ludole lwa kugolosa mengi kusuma gaya gochikutasa ama kugadoga, ²¹ ditunyo duwe kuimwene mwikanisa na mwa Kilisito Yesu kufyeleko fyose, minyaka na minyaka. Hano.

¹ Aniye hambiya nimohigwa kosoko ye Mundewa, nikuwatasani mwikale mikalile kifana ya wanhu wenangigwe mulwinango womwinangwe, ² hamwedu na uholo na ubasi, na ufinyilisi aku mukilondela chila munhu na miyagwe muuwendo, ³ hanangeni kukolelesa uumwedu we Muhe mohigwa nawo ne idigoya. ⁴ Kwina mutufi umwedu na Muhe nawo umwedu, kifana fomwinangigwe chila munhu mwihuwi dimwedu dye lwinango lwenu, ⁵ Mundewa yumwedu, dihuwi dimwedu, ubatiso umwedu, ⁶ Mulungu yumwedu naye no Baba wa wose yowile kuchanhya ya wose na muwowose. ⁷ Ninga mboto hachinghigwa chose kulokela chipimo cha ichingwa cha Kilisito. ⁸ Hambiya igambigwa, Foyapululuke kulanga hakalonda mateka kahi kalafa chinghwa kuwanhu. ⁹ (kugamba hakakwila togoleni ina maana yaki halika sikugamba imwene naye hakadulika hasi hasisi ye chilunga? ¹⁰ imwene yadulike no mwene kahi yapululuke kuchanya kutali lugano kuloka ulanga wose, uleke yamemese finhu fyose.) ¹¹ Ne mwene hakalafa wamonga wowe watumi, wamonga wagonesi, wamonga wainjilisti, wamonga wadimi na wamonga wafusa, ¹² uleke kuwatandila wasunhile wowe tayali kutogoma mulimo, wo kujenga mutufi wa Kilisito ¹³ mpaka chose fochikuhokela umwedu we dihuwi na umanyi we Mwana we Mulungu na kukula kuunhu we chipimo che disika dye umememelesi wa Kilisito; ¹⁴ uleke fina ching’agendelele kuwa fyana fikulondigwa londigwa ne mawingo ga mafuso gatungigwe na wanhu, muufundi wawo wo udasi. ¹⁵ Wakuleka kulonga gaya ge chawelu muuwendo, aseye chikule umwakwe imwene Kilisito ambaye no ditwi, ¹⁶ kosoko muimwene umutufi wose ukiyoha hamwedu na kikolela chila chilungo chakwe, chikutogoma mulimo wakwe noho umutufi ukule digoya na kijenga uwecho muuwendo. ¹⁷ Ninga nikulonga na kuhomelesa muMundewa fina anyeye kulawa hambiya munghekale mikalile kifana ya wamembe fowakwikala muubwalasi we mahala gawo gehile; ¹⁸ kosoko wakugumigwa lwisa mukutanga kwawo na waleusigwa na uumi we Mulungu kosoko yo ubwalasi uwile mugati yawo kamei na ukugutu we mimoyo yawo; ¹⁹ wofa mangete kahi wakiguma musimbuli so uwihi wo usulumisi uleke wagolose chila aina ya nhenda ihile, ²⁰ ninga nyeye hamukifusile kwa Kilisito gago! ²¹ Nikuhuwila muhulika foifusigwe kuhusu imwene na ichawelu iya yuwile mwa Yesu. ²² Tageni nhenda senu sa katali isihile sikubanika sikwandamila umelo ukwenda mbuli sa udasi, ²³ na goloseleni wanhu washa mufidoga fye sihakili senu. ²⁴ Na faleni unhu usha wumbigwe kwa futa ye Mulungu muhaki ye chawelu na usunhi. ²⁵ Kulawa hambiya nhafi lekeni udasi kamei chila munhu yalonge ichawelu ne miyagwe, kosoko cha filungo chila chilungo chikuhuwila miyagwe. ²⁶ Ninga munghadeseka langisiseni mungheje mugolosa sambi; dijuwa ding’hoswe mwikali ne inyono, ²⁷ mung’hamwinghe luhoma luneka. ²⁸ Imuhiji hambiya yang’ahije keli, ibeka yalime na kutogoma milimo kwa mikono yakwe ulekeyowe na cha kuweng’ha wamonga awakuhananga. ²⁹ Mbuli sihile sing’alawe mumilomo yenu, ninga siswanu na asiya sikudaha kuwatasa awakuhananga ili siweng’he mboto awakuhulika. ³⁰ Ninga munghamudese Muhe Musunhile we Mulungu, ambaye muimwene umo hamutoigwa lubonoto, mpaka dijuwa diya dya uhonyi. ³¹ Usungu wose, nyono, kudeseka, chowe na maligo galeguke ukwenu, ne chila aina yo wihi, ³² yuweni na ubasi chila munhu na miyagwe na mimoyo ya kilekelela nyenye kwa nyenye kifana Mulungu kulokela Kilisito foyawalekeleleni nyeye.

¹ Hambiya muwe wanhu wakugolosa fina Mulungu foyakugolosa kifana wana wendigwa. ² Kamei gendeni muuwendo ifina Kilisito foyachendile seye hoyokilafa imwecho kufa kosoko yetu hakowa chilafwa che mhungile na kuwa nhambiko kwe Mulungu. ³ Ninga idihabwa na gose gehile mung’hagese hata kugataja ago gasikwendigwa kuwanhu we Mulungu. ⁴ Kunghowe chinyala, maligo, malumo, kahi ufumbi kosoko gasikuhanangigwa ukwenu, hanyuma yakwe du muwe wanhu wa kulumba. ⁵ Langisiseni lugano fina umo mugati yenu mwichaka muchilanga kahimunhu mwihi, ama yoyose musulumisi (mufugamila we sisanamu) yene uhasi muundewa we Kilisito na we Mulungu ayo lo kwichaka chakasi. ⁶ Munhu yang’awadanhilise kwa mbuli sakwe sibwalate. Mana nikumutamilani ni kosoko ya iino inyono ye Mulungu ikuwejila wana awasikuhulika. ⁷ Kahi munghakihase nawo, ⁸ kosoko chigele chiya hamuwa mulwisa ninga hambiya muwa muujelu we Mundewa; gendeni kifana wana we ujelu. ⁹ (kosoko dimudyo dye ujelu dikoneka nadyo ni; uswanu, haki ne chawelu) ¹⁰ mugese Kukonha agaya gakumwedesa Mundewa. ¹¹ Ninga munghakihase na nhenda sihile se dichisa ambaso hasikweleka, ninga gagubuleni, ¹² kosoko agakugoloseka ukwawo muchifiso ni chinyala hata kugalonga; ¹³ ninga gose gagubuligwe gakoneka munje muujelu, kosoko chila chikoneka chichoo no ujelu. ¹⁴ Ninga igambigwa, Handiko winuke gweye ugonile, winuke mudifa na Kilisito kokwingha ujelu. ¹⁵ Kilangisiseni fomukugenda siyo kifana wanhu wabwalasi ninga wabala ¹⁶ Togomeleni ugele fiswanu kosoko ichigele chino ni cha wihi. ¹⁷ Ninga munghowe wabwalasi bali tangeni agaya Mundewa goyakwenda. ¹⁸ Munghalewe gimbi na difai, kosoko umo mugati yakwe mwina wihi; ila memesigweni Muhe, ¹⁹ Kitamiliseni munhu na miyagwe aku mukwimba sabuli ne sinyimbo se tensi sa lohoni, aku mukwimba na kubwedelela Mundewa mufidoga fyenu fyose, ²⁰ chila ijuwa na kwa chila chinhu lumbeni mudisina dye Mundewa watu Yesu Kilisito kwe Mulungu Baba. ²¹ Munghakibese munhuna miyagwe kosoko ya kumogoha Kilisito. ²² Anyeye muwanawake wahulikisiseni wagosi wenu kifana kumuhulika Mundewa, ²³ kosoko mugosi no ditwi dye mwanamuke kifana Kilisito fo ye ditwi dye dikanisa mutufi na imwene no Mwihula. ²⁴ kifana dikanisa fodikumuhulika Kilisito basi wanawake nawo wawahulike wagosi wawo kwa chila chinhu. ²⁵ Anyeye wagosi wendeni wafele wenu, fina Kilisito foyajendile dikanisa mpaka yakilafa kosoko yakwe ²⁶ uleke yakilafe kosoko yakwe na kudisunha kwa meji mwimbuli yakwe, ²⁷ uleke yalafe ikanisa iswanu dichaka wihi kahi ilema dya wihi wowose ili duwe isunhile dichaka dyodyose dihile. ²⁸ Awagosi wawende wanawake wawo kifana fowakuyenda imitufi yawo, imunhu yakumwenda imuke yakiyenda imwecho, ²⁹ kosoko kwichaka munhu iyakuudesekela mutufi wakwe imwecho bali yakuwingha ndiya na kuutunduliya kifana Kilisito naye foyakudigolosela dikanisa. ³⁰ kosoko seye cha filungo fya mutufi wakwe. ³¹ kosoko ya iyo mugosi yakuleka iBabakwe ne ing’ina na kiyandamila ne muke, nawo weli wakuwa mutufi umwedu. ³² Isili ino nghulu aniye to nikulonga du ikuhusu Kilisito na dikanisa; ³³ Ninga chila munhu yamwende imuke fina foyakiyenda imwecho na imufele yanghaleke kumogoha imulume.

¹ Muwana wahulikeni awaweleke mwi Mundewa, kosoko nhafo no fiswanu. ² Wengheni chogoho awaBaba senu na awang’ina senu. (adino no dilagiso dye nghonga dine dilagano), ³ fina yokuwa mbuli inogile ukwenu, kamei mokwikala chigele chitali muchilunga, ⁴ Anye nanye waBaba munhu munghawande wana wenu, hadi wapate nyono, ninga waleleni mumafuso maswanu na maloleso ge Mundewa. ⁵ Anye muwatumwa wahulikeni awandewa wenu we chilunga kwa kogoha na kuchichima kwa chidoga chose fina fomukumugolosela Kilisito; ⁶ munghagolose du kosoko wawoneni na meso, na nyendesa ya meso du, ninga goloseni kifana watogomi wa Kilisito, awakugolosa kifa na Mulungu foyakwenda kulawa kumimoyo. ⁷ Goloseni milimo yenu kwa chinyemi, kifana mukumugolosela Mundewa ninga wanhu, ⁸ manyeni fina dyodyose diswanu dikugolosigwa na yoyose mutumwa ama simutumwa Mundewa yakwija yalafa maliho gakwe. ⁹ Anye nanye muwandewa wagoloseleni nheifo, lekeni kuweng’ha itisi manyeni fina anye nanye mwina Mundewa wenu kulanga ambaye no mukulu wawo nawo, na mugati yakwe mwichaka kubagula. ¹⁰ Kwa kumalagisa, nikugamba, imeni ngwingwi mwi Mundewa na kwa udaha we ludole lwakwe mukulu. ¹¹ Faleni filama fyose fye Mulungu, noho mudahe kwima kitowa ne simhando sa Luhoma, ¹² kosoko Inyisuma yetu seye siyo Nyisuma ye mitufi na sakame ninga ni udaha no ludole lwa wakulu we ichisa muchilunga achi, Ninga ni nghondo ya mhepo na wihi muchilunga cha muchanhya. ¹³ Hambiya londeni filama fyose fye Mulungu, uleke muwe na ludaha mwijuwa dya magesa, na fomukumala nheifo kwima imeni ngwi. ¹⁴ Hambiya mukwima nako imeni akuno mukifasa mukanda we ichawelu muchuno na kufala ngulo ye chuma ye chawelu muchifa, ¹⁵ na migulu yenu yuwe tayali kosoko ya mbuli swanu ye idigoya; ¹⁶ hamwedu na gago, londeni ne ngula ye dihuwi uleke sime umoto we misale ya luhoma. ¹⁷ Kamei londeni nghofiya ya wokofu ne dipanga dye Muye, nadyo no mbuli ye Mulungu. ¹⁸ Taseni chila ugele mu Muhe, kwa mataso gose na nhala. Muwe meso na munghofe mimoyo watasileni hata awamonga awanhu we Mulungu. ¹⁹ Ninga na niye nitasileni uleke Mulungu yaning’e mulomo uwechaka chogoho, mulomo wo kulonga chifiso che imbuli swanu imbuli yakwe. ²⁰ Fina aniye nigaluka na munyamhala kosoko ye Imbuli swanu, ninga hambiya namuchifungo taseni uleke nilekeligwe nilonge imbuli yakwe fina fonikuhanangigwa nilonge mulamuso wo kumalagisa. ²¹ Hambiya manyeni fina fonuwile na fonikugolosa, fina iTikiko mundugusetu mwendigwa na mutogomi yahuwilike mwe Mundewa imwene yeja yawatamila chila chinhu. ²² Nimwigala ukwenu kosoko ya iyo du, ili mwije mumanye ifene fochuwile kamei yawagumeni moyo mufidoga fyenu. ²³ Idigoya yuwe na nyeye wandugu, na uwendo, hamwedu ne dihuwi kulawa kwe Mulungu Baba na Mundewa wetu Yesu Kilisito. ²⁴ Mboto yuwe na nyeye mose mukumwenda Mundewa Yesu Kilisito na kwa wendo usikufa.