WAKOLOSAI

¹ Aniye Paulo mutumigwa wa Kilisito Yesu kwa wendo we Mulungu, na Timoseyo imundugusetu, ² Kuwandugusangu awasunhile muchawelu ya Kilisito awowile Kolosai; Dihewa dyuwe nanye, ne idigoya dye Baba yetu Mulungu. ³ Chikumulumba Mulungu, iBabakwe we Mundewa wetu Yesu Kilisito amajuwa gose ichigele chochikuwatasila, ⁴ kosoko hachihulika dihuwi dyenu kwa Kilisito Yesu na uwendo womwinawo kuwasunhile wose, ⁵ kosoko ye dihuwi dyomwikiligwe kulanga. Mwihuwi didyo, hamuhulika katali simbuli sakwe se ichawelu ye Imbuli Swamu ⁶ iyafikile ukwenu, kifana foyowile muyisi yose, ikweleka mamudyo na kukula, kifana foyikukula ukwenu nako, kulawa dijuwa dyomwahulike na kumanya dihewa dye Mulungu muchawelu, ⁷ kifana fomwafusigwe na Epafula imwendigwa na mutumigwa miyetu. Kagaluka mutumigwa wa kuhuwilwa wa Kilisito ahanhu hetu ⁸ naye hakachitamila uwendo wenu ukwetu mu Muhe. ⁹ Kosoko yiyo, kukongela dijuwa dyochawahulike, chisilekile kumutasilani, kumutasa iMulungu yamumemeseni umanyi we isinhenda sakwe, no ubala womukwinghigwa ne Muhe wakwe. ¹⁰ Mugendelele kwikala ifene iMundewa foyakwenda na kugolosa gose agekumwendesa. Inyikala yenu yeleke mamudyo ge milimo yenu imiswamu kugendelela mu umanyi we Mulungu. ¹¹ Mudahiswe no udahi wose, wo uludole wo ukulu wakwe, noho mudahe kufinyilisa na gose, hamwedu ne chinyemi; ¹² mwingheni ilumbo iBaba iyachinghile kuhokela uhasi wa wasunhile mu ujelu. ¹³ Imwene hakachihonya muludole we chisa, na kuchisanyisila mu undewa we Mwanagwe mwendigwa; ¹⁴ iyekuchingha uhonya wo kulekeleligwa uwihi. ¹⁵ Imwene no futa ye Mulungu inghekoneka, mwelekwa we bosi we fyumbigwe fyose. ¹⁶ Kugendela imwene ifinhu fyose fyumbigwa, ifyuwile kulanga na ifyuwile muisi, ifikoneka na ifisikoneka; fyuwe fya magoda go undewa kahi magoda ga udaha, kahi ga ludole na udaha. Ifinhu fyose fyumbigwa kwa injila ye imwene kosoko ya imwene. ¹⁷ Naye yejayowa ugele ifinhu fyose na ifinhu fyose finghali fyuwe, na umwakwe ifinhu fyose fikikolelesa hamwedu. ¹⁸ Imwene no ditwi dyo umutufi, dikanisa; kahe imwene no nghonga, no mwelekwa we bosi wa awafile, imwene no chilongosi wa fyose. ¹⁹ Kosoko mugati yakwe hayendesa umemelesi wose we Mulungu wikale; ²⁰ na kugendela imwene ifinhu fyose filamulwe foyafulusa kugolosa ihoso ne isakame yo musalaba wakwe; ifinhu fyose ifyuwile muisi na ifyuwile kulanga. ²¹ Anyeye, umowile aho bosi mulekigwa, kahe wanghondo mufidoga fyenu, kwe sinhenda senu sihile, ²² hambiha kamulamulani mumutufi wakwe, na kwa difa dyakwe, uleke yamwigaleni hamwande yakwe, wasunhile, mwichaka wihi, ²³ mwikale mu dihuwi, mwikigwe muchanhya ye nghindiso, munghafumile kusingisigwa na kuleka dihuwi dye imbuli swamu iyahubiliigwe kwe ifyumbigwe fyose ifyuwile mu yisi; iyene aniye Paulo hanigaluka mutumigwa wakwe. ²⁴ Hambiya nina chinyemi mu magayo goninago kosoko yenu; kahe nikugamemelesa mumutufi wangu amagayo agahunguke mumutufi wa Kilisito, kosoko yo umutufi wakwe, dikanisa, ²⁵ dyonigaluke mutumigwa wo mulimo we Mulungu fina foninghigwe, kosoko yenu; umulimo wo kugolosa imbuli ye Mulungu inghamanyike. ²⁶ Imbuli aiya iyafisigwe kulawa katali fyotoke ifyeleko fyose, hambiya igubuligwa ku wasunhile wose. ²⁷ Mulungu iyendile kuwatamila ifene fouwile ugoli we ditunyo dye imbuli aino kuwamembe, uwo no Yesu mugati yetu dihuwilo dye ditunyo. ²⁸ Yuyo nochikuwatamilisa imbuli yakwe, chikumujama chila munhu, na kumufusa chila munhu, mu umanyi wose uleke chimwigale chila munhu yamemelekele kwa Kilisito. ²⁹ Nani nikiidasa kwa ludole lose kwe imbuli iyo, kwa udaha uukulawa ukwakwe uwuwile mugati yangu.

¹ Kosoko nikuhananga anyeye mumanye ukulu we nyituma yangu kosoko yenu, na kosoko ya awoile Laodikiya, hamwedu na awanhu wose awasinimanyile; ² uleke wahongesigwe mufidoga fyao, wakuhanganisigwa na uwendo, wakapate ugoli wose wa kumanya kwa chawelu, wamanye imbuli ifisigwe ye Mulungu na Kilisito imwenyecho, ³ iyina mugati yakwe ugoli wose wa ubala hamwedu no umanyi uwikigwe. ⁴ Nikumutamilani imbuli aino, imumhu yangheje yamudanhilisani kwa mbuli sa kukochelesa. ⁵ Hata ninghowa nahechaka chimutufi, mumanye fina nahamwendu nanye chimuhe, kwa nyemo kosoko ya kona ifene fomwimile chawelu mwihuwi dya Kilisito. ⁶ Hambiya fina fomumuhokele Kilisito Yesu, iMundewa, gendeleleni kwikala naye nhaifo; ⁷ mukijimbila na kujengwa naye; mugolosigwa ngwingwingwi mwihuwi, ifene fomufusigwe; na kugendelela mwi lumbo. ⁸ Langisiseni imunhu yanghawagolose kifana mwa watumwa kwa umanyi wakwe na udasi uwichaka chinhu, ifene awanhu we iyisi fowahokele, ifene amafuso age iyisi agakatali fogowile, nago ng’o si ga Kilisito. ⁹ Kosoko mugati yakwe mwina umemelesi wose we Mulungu, ifene fouwile mumutufi. ¹⁰ Nanye mumemelekela mugati yakwe imwene no ditwi dyo ukulu wose na undewa. ¹¹ Mugati yakwe mufinigwa ku dikumbi disigolosigwe kwe imikono, kwa kuuhambula umutufi we inyama, kwa dikumbi digoloseke kwa njila ya Kilisito. ¹² Kahe hamusikigwa hamwedu naye, mu ubatiso; na kwinuka hamwedu naye kwa kuhuwila uludole we Mulungu iyamwinule mudifa. ¹³ Nanye fomofile muwihi kuleka kufinigwa mumitufi yenu, hakawagolosa mwawomi hamwedu naye foyamalile kuchilekelela uwihi wetu wose; ¹⁴ foyamalile kuilegusa diwandiko dyoa uwihi wetu idyawandikwe kuchisongesa hoyailegusa inghowe baho kahi haibamandiligwa mumusalaba. ¹⁵ Foyamalile kuhambula ukulu na undewa na kusigubula kwa ludole, hakabwedelela naso mumusalaba uwo. ¹⁶ Hambiya imunhu yanghawaliganise nyeye mufyakudiya kahi ifinhu fyo kunywa, kahi kosoko ye sikukuu kahi kulawa ko umwesi kahi kosoko ye sabato. ¹⁷ Isimbuli aso hasuwa inyefu dya isimbuli isikwija; amba umutufi no Kilisito. ¹⁸ Imunhu yanghawahokeni digelo dyenu, kwa kinenela kwa kwenda kwake imwecho na kufuga malaika, kwa kigamba kwa magubulo gakwe na kiyona chaka kwa umanyi wakwe we chimunhu munhu; ¹⁹ kahe iyalekile kikolela ngwingwi mwitwi dyo umutufi. Kulawa imwene umutufi wose ukukula na kukoleleswa hamwedu ne ifilungo ne isinghwali, ukukula kwa udaha wa Mulungu. ²⁰ Nghona mwafile hamwedu na Kilisito kulawa kumafuso agakatali agechilunga, nhani mukwikala kifana mwawanya muchilunga? Nhani mukugendelela kulongosigwa na malagiso, ²¹ Munghakole, munghawonje, munghakwafe ²² ifinhu afyo fyose fikubanika ugele wofikutumiigwa; na kugendelela kwandamila malagiso na mafuso ga awanhu? ²³ Asino sikonesa kifana sina misungu, mumafugo gomukigolosele mowenyecho, na kufuga na kuudima umutufi kwa ukali; ninga gechaka ludole lwa kuwalemesa usulumisi wo mutufi.

¹ Hambiya halika mwinuka muchilalo hamwedu na Kilisito, galangiseni agowile kuchanhya, koyowile Kilisito, kekala ku mukono wo kulume we Mulungu. ² Dogeni agoile kuchanhya, siyo age muchilunga. ³ Kosoko hamufa, na uumi wenu ufisigwa hamwedu na Kilisito mwi Mulungu. ⁴ Ugele Kilisito foyawija yakoneke yuyo uwumi wetu, noho nanye mukwija mukoneka hamwedu naye mwitunyo dyakwe. ⁵ Kosoko yiyo, ikomeni chila mbuli iyihile ye chilunga iyuwile umwenu: Dihabwa, uwafu, kusulumila, magelegesi gehile, usulumisi wihile, na kufuga ifisikimunhu. ⁶ Kosoko ya gago inyono ye Mulungu ikwija. ⁷ Mugaga anyeye nanye hamugendela katali, fomowage mugago. ⁸ Amba hambiya gekeni kutali nanye ago gose: Inyono, fihi, uwihi, amaligo na amaligo mumilomo yenu. ⁹ Munghakidanhilise, kosoko mufulusa kuhambula uunhu wenu wa katali hamwedu ne sinhenda sakwe; ¹⁰ na kuufala uunhu musha, uukugolosigwa musha noho upate umanyi kifana imwenyecho iyawombile. ¹¹ Aho hechaka Muyunani kahi Muyahudi, kufinigwa kahi kuleka kufinigwa, mugeni kahi mumataifa, mutumwa kahi isimutumwa, amba iKilisito no gose, na mugati ya gose. ¹² Hambiya, kosoko mugaluka wanhu musaguligwe ne Mulungu, wasunhile umukwendigwa, faleni moyo wa ubasi, uswamu, unenenghesi, chogoho, uholo, na ufinyilisi, ¹³ mukitase na kilekelela, imunhu yanghowa kena mbuli ne miyagwe yamulekelele fina iMundewa foyawalekelele anyeye nanye mukilekelele nheifo. ¹⁴ Kahe, muchanhya yago gose kiyoheni uwendo no chifungo cha umemelesi. ¹⁵ Na digoya dya Kilisito dilamule mufidoga fyenu; nodyo mwenangiligwe, mumutufi umwedu, kahe muwe wanhu wa ilumbo. ¹⁶ Imbuli ya Kilisito ikale kwa umemelesi mugati yene, mukifuse na kijama chila munhu na miyagwe mu ubala wose, na kwimba sabuli na nyimbo, na nyimbo se Chimuhe; akuno mukumwimbila Mulungu kwe ilumbo dyose mufidoga fyenu. ¹⁷ Na chila chomukugolosa, kwa mbuli au kwa nhenda, goloseni gose mwisina dye Mundewa Yesu, akuno mukumulumba Mulungu Baba kugendela imwene. ¹⁸ Anyeye muwanawake muwahulike awalume senu, ifene foyagilwe mwi Mundewa. ¹⁹ Anyeye muwagosi, wendeni awake senu munghowe na ukali nawo. ²⁰ Anyeye muwana wahulikeni awaBaba senu na awang’ina senu musimbuli sose; kosoko imbuli ayo ikumwendesa Mundewa. ²¹ Nanye muwaBabamunhu, munghawande awana wenu wangheje wafifihala mufidoga fyawo. ²² Anyeye muwatumwa muwahulike awakulu wenu we chilunga, musimbuli sose, siyo kiyonesa mumeso, kefana awekikomba kuwanhu, ninga kwa moyo muswanu akuno mukumogoha Mundewa. ²³ Chila dyo mukugalosa goloseni kwa moyo, fina kwi Mundewa kahe si kwa wanhu, ²⁴ mumanye nhafi mohokela kwe Mundewa uhasi kifana igelo dyenu; mukumutogomela Mundewa Kilisito. ²⁵ Kosoko iyekupujila kohokela maliho go uwihi wakwe, kahe hechaka koneligwa.

¹ Anyeye Muwakulu, wagoloseleni awatumwa wenu mu digoya na kuwengha foiwagile kwinghigwa, kosoko mumanye nanye fina mwina Mundewa kulanga. ² Mugendelele lugano kutasa, na kuwa meso mu nhasa hamwedu na kulumba; ³ kahe muchitasile naseye, noho iMulungu yachikumulile mulango we imbuli yakwe, chilonge imbuli iyifisigwe ya Kilisito ilekile aniye nikohigwa, ⁴ noho nilonge, fonikwendigwa nilonge. ⁵ Muwe wabala na wose awowile kunje, na kugolosela digoya ichigele chomwinghigwe. ⁶ Isinonga senu suwe na ihewa amajuwa gose, sikolele munyu, mudahe kumanya foyagile kumubidula chila munhu. ⁷ iTikiko komutamilani simbuli sangu sose; imwene mwendigwa wangu kahe mutogomi yahuwilwe miyetu mu milimo ye Mundewa. ⁸ Nimutuma imwene ukwenu kosoko mumanye ifene fochuwile, kahi yawagumeni moyo, ⁹ kahe hamwedu na Onesimo, imundugusangu yahuwilwe, iyowile hamwedu nanye. Wowatamilani chila chinhu ichigoloseke ahano. ¹⁰ Alistaliko, iyohigwe hamwedu naniye, yakumulamusani; na Maluko imwihwawe wa Balinaba iyamwinghileni amalagiso yangheja ukwenu muhokeleni, ¹¹ na Yesu iyekwinangigwa Yusito. Awo ni wanhu wafinigwe mugati ya watogomi wayangu kosoko yo undewa we Mulungu kahe wagendelela kunhasa lugano. ¹² Epafula imwinya ukwenu, imutumigwa wa Kilisito Yesu, yekumulamusani, na kugolosa ludole majuwa gose kosoko yenu munhasa yakwe, uleke mwime ngwingwingwi na kugendelela chawelu kumwendesa Mulungu. ¹³ Kosoko nikumutamilani fina kagolosa kwa ludole kosoko yenu na kwa waya Laodikiya, na awoile Hielapoli. ¹⁴ Luka, imuganga mwendigwa, na Dema wekumulamusani. ¹⁵ Walamuseni awandugesetu awowile Laodikiya, na Nimufa, na dikanisa idyuwile munyumba yakwe. ¹⁶ Ibaluwa ino fomukufulusa kuyisoma, wengheni awayenu wa dikanisa dya Laodikiya waisome nawo; na ibaluwa iya yonawandikile awa Laodikiya wamwingheni nanye muisome. ¹⁷ Mugambeni Alikipo, Yakonye kuwugolosa umulimo woyenghigwe ne Mundewa. ¹⁸ Aniye Paulo, nyandika umulamuso uno kwa mukono wangu. Ngelegeleni muminyolo yangu. Dihewa dyuwe hamwedu nanye.