WATUMIGWA

WATUMIGWA

¹ Ichitabu achiya che inghonga hanichiandika Teofilo simbuli sose soyagolose na kufusa Yesu kulawa kunghonga ye milimo yakwe ² hata dijuwa diya dyoyenuligwe kuluta kulanga. Ugele nghenati yenuligwe kuluta kulanga hakawalekela misigililo kwa njila ya Muhe Musunhile, awaya awatumigwa wakwe woyawasagule. ³ Ukwawo hakakionesa imwenyecho yemumi foyamalile amagayo gakwe kwa uhomelesi mwingi, hoyokiyonesa ukwawo kwa majuwa makumi mane na kulonga simbuli se undewa wa kulanga. ⁴ Fowowile hamwedu hakawalagisa nhafi: Munghaleuke Yelusalemu ninga mugojele achiya choyawahuwise iBaba “ichene, choyalongile”, chomuhulike kulawa ukwangu; ⁵ Kosoko Yohana hakabatisa kwa meji, ninga nyeye fogakuloka majuwa makefu, anyeye mukubatisigwa kwa Muhe Musunhile. ⁶ Awefusa, wakakitanganyile na Yesu howomusa, “Togola Mundewa ugele uno noho ukuuwisa undewa ku Isilaeli?” ⁷ Hakawagamba simulimo wenu kumanya, ugele hegu chipisi chikigwe na Baba kwa udaha wakwe imwenyecho, ⁸ Ninga mohokela ludole foyakumwijilani Muhe Musunhile muchanhya yenu nanye mokuwa wahomelesi wangu ahano Yelusalemu, Muyahudi yose na Samaliya mpaka kundumo ye chilunga. ⁹ Yakamale kulonga nheifo, fowagendelelage kulanga hakenuligwa kuluta kulanga na difunde hodimulonda mumeso gawo ¹⁰ Na foyakwilage kulanga hawakumhula meso gawo kulanga chimwande wanhu weli wafalile suke njelu howokwima habehi nawo ¹¹ howogamba, “Anye Muwagalilaya, nhani mwimile ho mukulanga kuchanhya? Yesu yuno, iyalondigwe kulawa ukwenu kuluta kulanga, yakayokwija nheifo fomumonile yakuluta kulanga.” ¹² Kamei hawoya Yelusalemu kulawa kwitunda dye miseituni idihabehi na Yelusalemu chitambo cha nghanyo igana nhafi; ¹³ wakengile mwikaya hawaluta kuchibuha cha kuchanya, mowekalage Petulo, Yohana, Yakobo, Andelea, Filipo na Tomaso Batolomayo na Matayo, Yakobo imwana wa Alifayo, Simoni Selote na Yuda imwana wa Yakobo. ¹⁴ Wose wano hawagendelela hamwedu kutasa, hamwedu na wanawake, na Maliamu ing’ina wa Yesu, na wanduguse. ¹⁵ Mumajuwa gago, Petulo hoyokwima muchiligati ya awandugu (wose hamwedu hawafika wanhu igana dimwedu na makumi meli), hoyogamba, ¹⁶ “Wandugu sangu ditulumo hayagila dimemelisigwe, idilongigwe ne Muhe Musunhile, kwa simbuli sa Daudi, hakalonga muchanhya ya Yuda iyawalongose awaya awejile kumukola Yesu; ¹⁷ Yuda hakowa yumwedu wetu, kosoko hakasaguligwa yowe hamwedu nase mu mulimo wetu.” ¹⁸ (Hambiya imunhu yuno hakagula umugunda na mapesa gaya goyapatile kulawa munhenda yakwe ihile, hoyokugwa hasi, na kutulika utumbu wakwe wose houlawa kunje. ¹⁹ Chila munhu mu Yelusalemu hoyohulika imbuli kwa nonga yakwe howowinanga umugunda uya Hakelidama no ng’amba, “Mugunda wa Sakame.”) ²⁰ “Iwandikigwa mu chitabu cha Sabuli: ‘Uwikalo wakwe usigale mahame; Munhu wowose yanghekale umo.’ Kahi iwandikigwa, ‘Munhu yungi yalonde ahanhu hakwe haugolosaji.’ ²¹ Kamei yumwedu wa wanhu awendewochandamila muugele wose iMundewa Yesu woyendeyokwingila na kulawa mugati yetu, ²² kukogela muubatiso wa Yohana mpaka mwijuwa dyoyalondigwe kulawa ukwetu kuluta kuchanhya yumwedu wa wanhu wawo yowe hamwedu na seye, muhomelesi wo kwinuka kwakwe.” ²³ Baho howotambula masina ga wanhu weli wa kunghonga Yusufu iyakwinangwa Balisaba disina dyakwe dya keli Yusto, na Matiya. ²⁴ Kamei, hawatasa, wakugamba, “Mundewa, gowumanyile imimoyo ya wanhu wose, chonese no yehoki woumusagule mu wano aweli, ²⁵ uleke yalonde ahanhu ho umulimo na utumigwa hoyaleke Yuda na kuluta kunhu kwakwe imwenyecho.” ²⁶ Howotowa kula; ikula na kumugwila Matiya naye hoyokongesigwa kulafigwa hamwedu na awaya ikumi na imwedu.

¹ Dijuwa dye Pendekosite fodiyifikile, wose hawowa wakilundile hanhu hamwedu. ² Kamei chimwande hoihulikika kifana mheho ya ludole kulawa kulanga na kumemela munyumba yose yowowekale ³ Kamei hagoneka kumeso gawo malilimba go moto gakigawile, na kumwikalila chila munhu. ⁴ Wose howomemesigwa Muhe Musunhile, howokonga kulonga kwa nonga ingi, ifyene iMuhe foyawenghile udaha wokulonga. ⁵ Kamei hahowa na Wayahudi wakwikala Yelusalemu wanhu wena chogoho kwe Mulungu kulawa chila itaifa hasi ya ulanga. ⁶ Dijwi didyo fodyahulikwe matewa howokitang’anyila, howokwingila itisi, kosoko chila munhu hakawahulika wakulonga mu nonga yakwe imwecho. ⁷ Howokisina na kujuma wakugamba, “Awa wose wochikuhulika wakulonga nheifino si Wagalilaya? ⁸ Ya nhani, hambiya, chila yumwedu wetu yakuwahulika wakulonga kunonga yakwe imwecho? ⁹ Wamonga wetu ni Wapalitiya, Wamedi na Waelamu; wamonga wakaya wa Mesopotamiya, Uyahudi, Kapadokia, Pondo na Asiya, ¹⁰ Filigiya na Pamufiliya, Misili na ulwandi lwa Libiya habehi na Kilene; Wamonga wetu ni wageni kulawa Loma. ¹¹ Wayahudi na wanhu wabidukile idini ye Chiyahudi na wamonga walawa Kilete na Alabiya ase chose chikuwahulika wakulonga ku nonga setu chiwecho mbuli ghulu sa Mulungu.” ¹² Wose howokisina na kogoha, ukuno wakiyusa, “Ayi nayo yoni?” ¹³ Ninga awamonga hawogelela wakugamba, “Awanhu wano wonywa difai nyisha.” ¹⁴ Ninga Petulo hoyokwima hamwedu na waya ikumi na yumwedu, hoyokwinula dijwi dyakwe hoyokonga kulonga: “Wandugu sangu Wayahudi, na nyeye mose mukwikala hano Yelusalemu; munitegelese fonikulonga simbuli sangu. ¹⁵ Awanhu wano wasilewile, fina fomukudoga, kosoko digaluka isaa dya kadatu du dye dijuwa; ¹⁶ ichawelu ni kugamba imbuli ino no iya yoyalongile imugonesi Yoeli: ¹⁷ ‘Mumajuwa go kundumo, yakulonga iMundewa, nikuwetilila awanhu wose Muhe wangu. Awana wenu we chigosi na we chike wakwenda walafe ugonesi, na wajelelo wenu wokona magubulo na wasehe wenu walota njosi. ¹⁸ Heye, na awatogomi wana we chigosi na we chike nokuwetilila Muhe wangu majuwa gago nawo wakwenda walafe ugonesi. ¹⁹ Nogolosa majumo kwichanhya mulanga na chitangilo hasi muchilunga, Kukuwa na sakame, moto na mosi musito; ²⁰ dijuwa dyokugumigwa chisa, umwesi ukuwa mudunghu kifana sakame, ugele disinati difike, adiya dijuwa dikulu dye ditunyo dye Mundewa. ²¹ Baho, wowose iyakwinanga kwe disina dye Mundewa, yakuhonyigwa.’ ²² “Anye Waislaeli mutegelese simbuli sino! Yesu wa Nasaleti, imunhu imwene udaha wakwe we chilungu hawoneka ukwenu kwa njila ya majumo, gokwisina na ifitangilo foyagolose Mulungu mugati yenu kwa njila yakwe fina fomumanyile. ²³ Imunhu yuno hakalafigwa kwandamila iMulungu imwecho foyadumula mbuli kulawakatali, na kwa kumanya kwakwe, kuwa Yesu kogumigwa kumikono yenu nanye homumuguma mumiko ya wanhu wihile howomutungika na kumukoma ²⁴ imwene, Mulungu kamwinula kulawa mudifa, hoyoudohola, usungu we difa, isadahile yakoligwe nawo. ²⁵ Kosoko iDaudi yakutambula simbuli soko ye imwene, Hanimona iMundewa kumwande yangu majuwa gose, kosoko kowa ulwandi iwo mukono wangu wo kulume ninghasingisike. ²⁶ Kosoko iyo umoyo wangu houkwendeswa dilimi dyangu hodisekelela; kamei umutufu wangu haukwikala mudihuwi. ²⁷ Kosoko nghukuchileka ichidoga changu kusimu, nghukumulafa imusunhile wako yone kukubanika. ²⁸ Kunyonesa injila ya uwumi kuwakwako hamwedu naniye kanimemesa chinyemi. ²⁹ “Wandugu sangu nikumutamilani muchawelu ku iBaba yetu Daudi. Yejayafa, hoyosikigwa, na ichilalo chakwe chabahano ahetu mpaka diyelo nhafi. ³⁰ Ninga kosoko Daudi yowile mugonesi, hakamanya kuwa Mulungu hakimulahila fina yakwenda yumwedu we cheleko chakwe kuwa Mundewa ahanhu hakwe. ³¹ Daudi hakona katali Mulungu cho yakwenda yagolose kosoko iyo hoyolonga muchanhya ya kwinuka mwichilalo kwa Kilisito, ugele foyagambile: Nghalekigwe kusimu, umutufi wakwe usadodile. ³² Mulungu hakamwinula muchilalo yuyo Yesu ase chose cha wahomelesi we imbuli yo. ³³ Yesu yakafuluse kwinuligwa na kwikigwa na Mulungu ulwandi lwakwe lwo kulume, hoyohokela kulawa kwa Baba ayuya Muhe Musunhile, imwene woyachihuwise, kachitilila yuyo Muhe, acho nocho mukona hambiya na kuhulika. ³⁴ Kosoko Daudi mwecho, ghakwilile mpaka kulanga; ninga imwene hakagamba: ‘Mundewa hakamulonga Mundewa, Ikala ulwandi lwo kulume kwangu ³⁵ mpaka niwagolose awanghondo wako wowe hasi ya migulu yako.’ ³⁶ Wanhu wose wa nyumba ya Isilaeli inogela wamanye kwa chawelu ayo Yesu womwamutungike, no yuyo, Mulungu woyamugolose fina Mundewa na Kilisito.” ³⁷ Wakahulike simbuli siso howotamigwa mumoyo yawo, howomusa Petulo na waya awatumigwa wamonga, “Aho chitende nhani wandugu setu?” ³⁸ Petulo hoyobidula, “Mulambe na chila munhu yumwe yumwe yabatisigwe mu disina dya Yesu Kilisito, uleke muleusiligwe uwihi wenu na kuhokela ichinghwa che Muhe Musunhile. ³⁹ Kosoko dihuwiso dino hadyuwa kosoko yenu na kosoko ya wana wenu kosoko ya wose wowile kutali na kosoko ya chila munhu imwene Mundewa Mulungu wetu yakumwinanga ukwakwe.” ⁴⁰ Na kwa mbuli nyingi du Petulo hoyolonga kwa ludole na kuwasongesa wanhu yakugamba, “Mukihonye ne cheleko chino cha uwihi.” ⁴¹ Wengi howosifumila simbuli sakwe, howobatisigwa. Awanhu wafikile figulu fidatu howokongeseka muchitewa chiya dijuwa dyo. ⁴² Awa wose howogendelela kifusa kulawa kuwatumigwa, kwikala hamwedu chindugu, kumega mukate na kutasa. ⁴³ Chila munhu hakengiligwa itisi, kosoko ya fitangilo na majumo mengi gagoloseke na watumigwa. ⁴⁴ Na wose wahuwile hawowa hamwedu na kuwa ne finhu fyose muhangi. ⁴⁵ Howokwambasa isimali sawo ne finu fyawo kamei howogawa ifesa kwandamila chila munhu foyakuhanga. ⁴⁶ Na chila ijuwa hawagendelela kitang’anyila mwihekalu kwa moyo umwedu na mega umukate musinyumba sawo, wakudiya chakudiya chawo kwa chinyemi na kwa moyo mujelu, ⁴⁷ howomutogola Mulungu, howokwendigwa na wanhu wose. Chila ijuwa iMundewa hoyokongesa dikanisa kwa waya awendile kuhonyigwa.

¹ Dijuwa dimonga wugele we saa ya dikenda ya nhemisi, Petulo na Yohana wendewoluta kwihekalu, ichigele cho kufuga. ² Ugele wuwo awanhu hawamwinula munhu imwene nghenati yagende kulawa kwelekigwa kwakwe. Awanhu wawo wendewomwinula na kumwika hamulango ukwinangigwa, “Mulango Muswanu,” uleke yatase chokwinghwa na awaya awakwingila kwihekalu. ³ Yakawone Petulo na Yohana wakowe wakwingila mwihekalu, hoyowatasa wamwinghe chinhu chochose chiya. ⁴ Howomukumhulila meso, kamei, Petulo hoyogamba, “Chilange seye!” ⁵ Kamei hoyowalanga yakuhuwila kuhokela chinhu kulawa ukwawo. ⁶ Ninga Petulo hoyomugamba, “Nachaka mapesa hegu sahabu, ninga nikukwingha choninacho: Mwisina dya Yesu wa Nasaleti nikukugamba winuke na kugenda!” ⁷ Kamei hoyomukola umukono wokulume hoyomutasa kwinuka. Chimwande imugulu yakwe na simwegele sakwe hosikuwa na ludole; ⁸ hoyojumha, na kwima kwa mimigulu yakwe, hoyokonga kugenda yakusunguluta. Kamei hoyokwingila mwihekalu hamwedu nawo, yakugenda na kujumha na kumutunya Mulungu. ⁹ Awanhu baho howomwona yakugenda na kumutunya Mulungu, ¹⁰ wakamutange fina no yuya imutasaji yekalage ha Mulango Muswanu, wose howokisina lugano ku chinhu chigoloseke ukwakwe. ¹¹ Ugele foyendeyowandamila Petulo na Yohana, wanhu wose howokikonghola howobilima kudikumbo idikwinangwa Dikumbo dya Sulemani. Wakisina lugano. ¹² Kamei Petulo yakone nheifo hoyowabidula awanhu waya, Anyeye Waislael, nhani mukuching’olela meso aseye, kifana aseye chimugolosa ayuno yagende kwa udaha wetu seye? ¹³ Mulungu wa Ibulahimu na wa Isaka na wa Yakobo, wa waBaba setu, kumutunya imutumishi wakwe Yesu imwene anyeye hamumutungika na kumukana kumwande ya Pilato, ugele foyalafile ulamusi wakwe fina yadoholeligwe. ¹⁴ Ninga anyeye homumukana ayuya Imusunhile, ayuya Imuswamu; homuhananga mwinghigwe imukomaji; ¹⁵ Homumukoma ayuya imukulu wa uwumi, imwene yenuligwe na Mulungu kulawa mu wafile; na seye na chiwahomelesi wakwe ¹⁶ ku disina dyakwe, kwa kudihuwila disina dyakwe, dimugolosa imunhu ayuno wo mukumona womumumanyile, na kwa dihuwi didyo duwile umwakwe imwene, dimwingha ayuno uwumi umemelekele kumwande ya meso genu anyeye mose. ¹⁷ Ninga hambiya wandugusangu, nimanya fina hamugolosa nheifo kosoko musamanyile fina na wakulu wenu fowatendile. ¹⁸ Ninga agaya iMulungu goyalongile kulawa katali kwa milomo ya wagonesi wakwe wose, fina Kilisito yakwija yadumangisigwa kagamemelesa naifo. ¹⁹ Hambiya, mulambe na kumubiduchila Mulungu, uleke uwihi wenu uleusigwe, wije ugele wo kuhola mufidoga, ²⁰ kulawa kwa Mundewa, yekumutuma Kilisito Yesu womwikiligwe kulawa katali; ²¹ imwene hayagila kuhokeligwa kulanga na kuwa uko mpaka ifinhu fyose fogolosigwe usha fina foyalongile Mulungu kwi milomo ya wagonesi wakwe kulawa katali. ²² Kosoko Musa hakagamba Mundewa iMulungu wenu yakumwigalilani mugonesi, fina foyanigale niye, naye yakuwa yumwedu wa wanhu awenu muwecho: Iwagila mwandamile chila choyakulonga mugolose. ²³ Imunhu wowose inghakumuhulikisa foyakulonga yakubaguligwa na wanhu wa Mulungu na kubanigwa. ²⁴ Awagonesi wose, kukongela Samweli na waya wamwandamile hawalonga simbuli sino isene sikugoloseka majuwa gano. ²⁵ Amahuwiso kwa njila ya wagonesi ni kosoko yenu, na mukuhangila dilagano iMulungu dyoyagolose na wakuku senu, fina foyamutamila Ibulahimu. Kunjila ye cheleko chako, ifyeleko fyose fye chilunga fyomotesigwa. ²⁶ iMulungu kamwinula kulawa mudifa imutogomi wakwe, mbuli swanu kosoko yenu, kunghonga, hoyomutuma yamwigalile imboto kwa kumugolosa chila yumwedu wenu yabiduke kulawa kuwihi

¹ Petulo na Yohana fowalongage na wanhu, watambiki ne chilongosi we dihekalu na Masadukayo hawawejila, ² wadeseke kosoko wendewowafusa wanhu na kuhubili fina mu Yesu awafile wakwija wokwinuligwa kulawa mu difa. ³ Howowakola, howowaguma mwigelesa mpaka nhosiku yakwe nhosikusiku, kosoko hauwa ugele wa hegulo. ⁴ Ninga wengi mu waya awahulike iyo imbuli howohuwila; mu wawo wahuwile wakudaha kuwa figulu fishano. ⁵ Nhosiku yakwe, wakulu na wasehe na watulumi howokitang’anyila Yelusalemu, ⁶ hamwedu na Mutambiki Mukulu Anasi na Kayafa, na Yohana na Isikanda, na wose wose waya awene howawa wo lukolo lwa kuhani Mukulu. ⁷ Kamei hawaweka hagati yawo, na kuwosahowowosa Kwa ludole lwaki ama kwa isina dyake mugolosa dino? ⁸ Kamei Petulo yakameme Muhe Musunhile, hoyowagamba Anyeye Filongosi na wasehe wa wanhu: ⁹ Hona chikusigwa diyelo mu ichitendo ichiswamu choyagoloseligwe ayuya ichiwete yahonyigwe na kuwa mumi, ¹⁰ imanyike ukwenu nyeye wose, na kwa wanhu wose wa Isilaelii, fina imunhu yuno kama kumwande yenu diyelo, mumi, telele, kwa udaha wa disina dya Yesu wa Nasaleti imwene anyeye hamumutungika, ninga Mulungu kamwinula kulawa mudifa. ¹¹ Ayuno no yakulongigwa na Matulumo Masunhile fina Isumbi yomulemile nyeye mukujenga, hambiya igaluka sumbi nghulu ye nghindiso. ¹² Kwachaka uhonya kwa yeyose yuya, kosoko kwachaka isina dyodyose hasi ya ulanga, dyowenghigwe awanhu dikuchagila kuhonyigwa nadyo aseye. ¹³ Wakone ing’inyo ya Petulo na Yohana na kumanya fina hawowa wanhu wachaka chisomo, howomanya fina hawowa na Yesu. ¹⁴ Ninga wakamwone yuya imunhu yahonyigwe kema hamwedu nawo howoswela mbuli ya kulonga ¹⁵ baho, howowagamba walawe kunje ya ibalasa, awene howosigala kugati wakusimulila kwa Chifiso. ¹⁶ Howokiyusa Chitende nhani na awanhu wano? Kosoko ijumo ikulu digolosigwa kwa njila yawo na dimanyikana na wanhu wose wa Yelusalemu, chisikudaha kuikana imbuli ino. ¹⁷ Ninga uleke imbuli ino inghagendelele kwenela kuwanhu, chiwagambe wanghalonge na munhu wowose kudisina dya Yesu. ¹⁸ Howowenanga kahi kugati howowelagisa wanghalonge kahi kahiwanghafuse wanhu kwa disina dya Yesu. ¹⁹ Ninga Petulo na Yohana howowabidula, Mulamule anyeye muwecho, hona ni fiswamu kumwande ya Mulungu kuwahulikisa anyeye kusuma Mulungu. ²⁰ Kosoko chisikudaha kuleka kulonga simbuli so chonile na kuhulika. ²¹ Kamei wakawagume chogoho na kuwagombela, howowalekelela. Howolemeligwa kuwatenda chinhu kosoko awanhu wose wendewomutunya Mulungu kosoko ya didyo dya goloseke. ²² Imunhu yuyo yagoloseligwe dijumo didyo dyokuhonyigwa hakowa mukulu mugima yena minyaka kujumha makumi mane. ²³ Chimwande, fowalekeligwe, Petulo na Yohana howokuya kuwayawo, howowatamila agaya gowalongigwe na watambiki wakulu na wasehe. ²⁴ Wakahulike simbuli so, Howomwinulila Mulungu majwi gawo kwa moyo umwedu, wakugamba, “Mundewa Mukulu, agweye no Mulungu wumbile ulanga ne iisi, ne bahali na fyose fuwile umo; ²⁵ nagwe hakulonga kwa mulomo we mutogomi wako Baba yetu Daudi, kwa udaha wa Muhe Musunhile: ‘Nhani awamembe wakugolosa ukali Na makabila gakudoga hechaka chinhu? ²⁶ Na wandewa we chilunga wakiika fiswanu, uleke wamuleme Mundewa na Masiha wakwe.’ ²⁷ “Kosoko chawelu nofyo Helode, Pontio Pilato, na wanhu wa Isilaeli na wanhu wa wamembe fowakitang’anyile bahano mukaya iino, kumulema imutogomi wako musunhile Yesu, imwene wowamugumile mafuta, ²⁸ uleke wagolose gose agene umukono wako na kwenda kwako kulawa hatali hakuhananga gagoloseke. ²⁹ Hambiya, Mundewa ulange kogohesa kwawo, uwenghe awatumwa wako kuilonga imbuli yako kwa ludole; ³⁰ golola umukono wako kuhonya, fitangilo na majumo gagoloseke ku disina dya Mutumishi wako musunhile Yesu.” ³¹ Wakamale kumutasa Mulungu, ahanhu haya howakitang’anyile hohosingisika wose howomemesigwa na Muhe Musunhile, howolonga imbuli ya Mulungu kwa ludole. ³² Na awanhu awahuwile hawowa na moyo umwedu na chidoga chimwedu; hachaka munhu wowose yagambile fina ichinhu chochose cho yenacho ni mali yakwe imwecho; ninga hawowa ne finhu fyose muhangi; ³³ awatumigwa howolafa uhomelesi wa kwinuka kwakwe Yesu kulafa mudifa kwa ludole lukulu, na dihewa ikulu hadyuwa hamwedu nawo wose. ³⁴ Kusowile na munhu mugati yawo yowile kachaka chinhu choyakuhanga, kosoko awanhu wose wowile na fiwanja ama nyumba wawafyambasa, howokwigala diyombe dye finhu fiya fyo fyaguligwe, ³⁵ howofika hamigulu ya watumigwa; chila munhu hoyogawiligwa fina foyakuhanga. ³⁶ Na Yusufu iyenangigwe na watumigwa Balinaba (nong’amba: Mwana wa usindamafu, “Mulawi, nghonga yakwe ni munhu wa kupono”). ³⁷ Hokowa na mugunda houguligwa, hoyokwigala ifesa yose, hoyoika hamigulu ya watumigwa.

¹ Ninga munhu yumonga hamwedu ne muke Safila howousa umugunda. ² Hoyofisa isehemu ye fesa ilawile mumugunda kwa chifiso, imuke naye hakamanya, hayokwika sehemu ndodogi na kwiigala hamigulu ya watumigwa. ³ Petulo hogamba, “Anania nhani Ishetani yamemese umoyo wako, kumutamila udasi Muhe Musunhile? Na kufisa isehemu ya imali ilawile mumugunda? ⁴ Fowowile ukwako usowile wako? Na chikamale kuguligwa imali yakwe isowile mu udaha wako? Hayuwa yuwa nhani noho wike imbuli iino muchidoga chako? Nghumudanhilise munhu, ninga Mulungu.” ⁵ Anania yakahulike simbuli sino hoyokugwa hasi, hoyokufa. Chogoho chikulu hochiwapata awanhu wose awahulike simbuli sino. ⁶ Awanike howoleuka, howomuguma mu sisanda howeja musika. ⁷ Chipisi cha saa ndatu hanyuma yakwe, imuke naye hoyokwingila, na hamanyile dyodyose muchanhya ya simbuli silokile. ⁸ Petulo hoyomubidula yakumugamba, “Nitamile, hamuusa umugunda kwa diliho didyo?” Hoyogamba, “Heye, kwa diliho didyo.” ⁹ Hayuwa nhani mulagane kumugesa Muhe Musunhile we Mundewa? Langa, imugulu yawo wamusikile imugosi wako yuwa hamulango, nawo wakwenda wakulonde agwe nagwe. ¹⁰ Chimwande hoyokugwa hamigulu yakwe hoyokufa. Awaya awanike howokwingila howomufika yafile, howomulafa kunje, howomusika hamwedu na mulume. ¹¹ Chogoho chikulu hochiwengila, dikanisa dyose na wanhu wose awahulike simbuli siya. ¹² Kwa mikono ya Watumigwa hogogoloseka mengi ga majumo na kisina muchiligati cha wanhu. Awahuwile hawekala hamwedu mwikumbo dya Sulemani. ¹³ Hechaka munhu yungi wowose imwene inghahuwile yadahile kihasa nawo, ninga awaya du awawatunyage. ¹⁴ Kamei awamuhuwile iMundewa wagosi kwa wanawake hawongeseka lugano. ¹⁵ Kamei hawawenula awatamu hata awoile musikaya, kamei na kuwagonesa musinghingo na mumikeka, uleke dinyefu dya Petulo diwogwile awamonga ichigele foyalokage. ¹⁶ Na wanhu wa sikaya sa munghanda ya Yelusalemu howokikonghola, wakwigala watamu, na wendewokwidasigwa na simhepo sihile na wose howohonyigwa. ¹⁷ Kamei Imutambiki mukulu na wose wowile hamwedu naye, (awo no wamasehebu ga Mafalisayo), wamema wifu. ¹⁸ Howowakola watumigwa howowaguma imwigelesa. ¹⁹ Ninga imusungula we Mundewa hoyokumula umulango wa digelesa nechilo, hoyowalafa, hoyogamba, ²⁰ “Luteni mukeme mwi hakalu na kuwatamila awanhu si mbuli sa uumi uno.” ²¹ Nawo wakahulike howoluta nhosikusiku kwihekalu, howokonga kufusa. Hoyokwija Ikuhani Mukulu na waya wowile hamwedu naye, howowakusanya awanhu wa dibalasa, na wasehe wose wa Isilaeli, howotuma wanhu kwigelesa wakawalonde. ²² Ninga awatogomi waya fowafikile wasawonile kwigelesa, howokuya howowatamila, ²³ wakugamba Digelesa chifika dihindigwe fiswanu, na awemilisi wema kumwande ye milango, ninga chikakumule chisonile munhu kugati! ²⁴ Kamei ichilongosi we dihekalu na wakulu wa watambiki wakahulike nheifo, howokwila manhonge kosoko yawo, imbuli ino yokuwa nhani. ²⁵ Munhu yumonga hoyokwija hoyowatamila fina, awanhu waya womwawekile kwigelesa wowa kwihekalu, wemanyima wekufundisha wanhu. ²⁶ Noho yuya ichilongosi we dihekalu hoyoluta hamwedu na watogomi waya, howowegala, ninga si kwa ludole, kosoko hawogoha wanhu wangheje wowatowa na mawe. ²⁷ Wakawegale, howoweka mudibalasa. Ikuhani Mukulu hoyowosa, ²⁸ yakugamba, “Togoleni, chisawagambile kwa udaha kuwa munghafuse kusisina dino?” Nanye langeni mumemesa Yelusalemu na mafuso genu, na mukuhananga kuigala isakame ye munhu yuya muchanhya yetu. ²⁹ Petulo na watumigwa howobidula wakugamba, “Ichagila kumuhulikisa Mulungu kusuma wanhu. ³⁰ Imulungu wa WaBabaset hakamwinula Yesu kulawa muchilalo, imwene anyeye hamumukoma kwa kumutungika mwibiki. ³¹ Imunhu yuno iMulungu kamwinula kumukono wakwe wo kulume yowe Chilongosi na Muhonya yawenghe wa Isilaeli dilumbo dya chawelu na kulekeligwa uwihi. ³² Na seye cha wahomelesi wa simbuli siso, hamwedu na Muhe Musunhile imwene Imulungu yakuwengha awanhu wose awakumuhulika.” ³³ Awene wakahulike howokwafigwa mufidoga fyawo; howogola njama yakuwakoma. ³⁴ Ninga munhu yomonga, Falisayo, Gamalieli, mwalimu wa tolati, yakogohigwa na wanhu wose, hoyokwima mwibalasa, na kulagisa watumigwa wekale hanghanda kwa chipisi chiguhi, ³⁵ hoyowagamba, “Anye wagosi wa Isilaelii, muchilangisise fomukuwatendela awanhu wano. ³⁶ Kosoko ugele wawo fowowile usinati ufike hakalawanisa Teuda, hokigamba imwene munhu mukulu, wanhu wafikile magana mane howomwandamila. Naye hakachinjigwa na wose awamuhuwile howokwaganika howokuwa si chinhu. ³⁷ Hanyuma yakwe hoyolawanisa Yuda wa Mugalilaya, ugele uya wokutala wanhu, hoyowakwega wanhu wengi howomwandamila, naye hoyokwagilila na wose wamwandamile howokwaganika. ³⁸ “Hambiya, nikumugambani nhafi, Mukinege na wanhu wano, walekeni; kosoko imbuli iino no mulimo uno hona ulawile kuwanhu, ukwenda ubanike uwecho, ³⁹ ninga hona ulawile kwa Mulungu musikudaha kuubana; mungheje mukoneka fina mukulewa na Mulungu. ⁴⁰ Howofumila simbuli sakwe; kamei wakawenange awatumigwa, howowatowa, howowalemesa, wanghalonge ku disina dya Yesu; kamei howowaleka ku disina dya Yesu; kamei howowaleka walute. ⁴¹ Nawo hawaleuka mwibalasa diya, na chinyemi, kosoko watalikwa, kugumigwa chinyala, kosoko ya disina didyo. ⁴² Na chila ijuwa, mwihekalu na musinyumba sawo, wasalekile kufundisha na kuhubili si mbuli si swanu sa Yesu kuwa ni Kilisito.”

¹ Hambiya mumajuwa gago, chigele awefusa fowendewakongeseka, hakulawanisa kung’ung’ulika mugati ya waya wakulonga Chiyunani na waya wakulonga Chiebulaniya. Awaya wakulonga Chiyunani howonghunghulika fina awegane wao wendewosimiligwa ugele wokugawiligwa amahitaji gawo ga chila ijuwa. ² Kosoko iyo, awaya awatumigwa ikumi na weli howokwinanga mulundo wa wanhu wose awahuwile howogamba, “Si fiswanu aseye chileke kuhubili imbuli ya Mulungu, uleke chishugulikie kugawa amahitaji. ³ Kosoko iyo, wandugu setu, saguleni wanhu mufungate, awakoneka wanhu waswanu, wamemile Muhe na misungu, uleke chiwenghe u mulimo uwo. ⁴ Ninga, aseye, chuwe no mulimo wa mataso na kuhubili imbuli ya Mulungu.” ⁵ Imbuli ino hoiwendesa ditewa dyose, kamei howowasagula Sitefano, munhu yena ihuwi ikulu na yamemesigwe na Muhe Musunhile, Filipo, Polokoni, Nikanola, Timona, Palimena na Nikolao wa Andiyokiya imwene yabidukile idini ye Chiyahudi kunghonga. ⁶ Howoweka kumwande ye watumigwa, nawo howowatasila na kuwechila mikono. ⁷ Imbuli ya Mulungu hoigendelela kongeseka na matewa ga wanhu awahuwile ako Yelusalemu hoikongeseka lugano, na matewa makulu ga watambiki howohuwila. ⁸ Kamei hoyomwingha Sitefano yamemile ihewa ikulu na ludole, hoyomwigha udaha mwingi; hoyodaha kugolosa fitangilo na majumo mugati ya wanhu. ⁹ Ninga wanhu wamonga awoile we disinagogi dya walekeleligwe fina fodyenangwa, wakilene, Walekisandaliya, na wamonga kulawa Kilikiya na Asiya, hawema na kuwanga na Sitefano. ¹⁰ Ninga wasadahile kumusuma kosoko ye misungu yakwe na Muhe yamulongose kukulanga. ¹¹ Kosoko iyo howowafupa wanhu Awagambile chimuhulika imunhu yuno yakulonga mbuli sa kumuliga Musa na Mulungu. ¹² Howowasongesa awanhu na wasehe na watulumi, howomulutila, howomukola, howomwigala kwibalasa. ¹³ Howokwinula wahomelesi wa udasi wagambile, Munhu yuno ghakuleka kulonga simbuli si kubesa ahanhu hano hasunhile na malagiso ga Musa. ¹⁴ Kosoko chimuhulika yakugamba ayo iYesu wa Nasaleti yakwenda yahabane lugano ahanhu ahano na kugaleusa ijadi yetu yochinghigwe kulawa kwa Musa ¹⁵ Wose wowile mumulundo uya we dibalasa howomukumhulila amaso Sitefano, howokona ichihanga chakwe kifana chihanga cha malaika.

¹ Kamei imutambiki mukulu hoyomusa, Togola simbuli sino ni chawelu? ² Naye Sitefano hoyogamba, “Wandugu sangu na waBaba sangu munitegelese! Mulungu hakailawanisa kwi Baba yetu Abulahamu foyowile kuya Mesopotamiya ugele ghenati yakekale Halani. ³ iMulungu hoyomugamba, ‘Leuka muisi yako, waleke awanhu wo lukolo lwako, ulute ku isi yonikwenda nikonese.’ ⁴ Kosoko iyo Abulahamu hoyosama iisi ya kalidayo, hoyejakwikala Halani. iBabakwe yakafe. Mulungu hoyomuleusa kahi Halani hoyokwija na kwikala mu isi ino yomukwikala hambiya. ⁵ iMulungu nghamwinghile hata uhasi we iisi ino hata nghanyo imwedu uwe mali yakwe; hata nheifo, hoyomuhuwisa fina yakwenda yamwinghe iisi ino yuwe yakwe ne cheleko chakwe, hata fina ugele uwo hakowa chaka mwana. ⁶ Mulungu hakalonga nhafi: ‘Icheleko chako wakwigaligwa ku isi ukutawaligwa na wanhu wengi, na uko wakagolosigwa watumwa, na kugoloseligwa fihile, kwa minyaka magana mane. ⁷ Ninga niye nikuhananga nidiliganise ditaifa didyo dikuwagolosani watumwa. Kamei nikwenda niwaleuse mu isi iyo uleke weje wanifuge ahanhu ahano.’ ⁸ Hanyuma iMulungu hoyogolosa dilagano dye dikumbi kwa nheifo Ibulahimu hakowa Baba wa wa Isaka na kufinigwa mwijuwa dye munane na Isaka naye yagaluka Babakwe wa Yakobo na Yakobo Baba wa wakuku ikumi na weli. ⁹ “Awaya awakulu wetu howomonela finju Yusufu, howomusambasa, hoyoguligwa kuutumwa Misili Ninga iMulungu hoyokuwa hamwedu naye, ¹⁰ hoyomuhonya mumagayo gakwe gose. Mulungu hoyomwingha ihewa na misungu kumwande ya Falao, iMundewa wa Misili, iFalao hoyomwika kuwa mukulu wa iisi ne inyumba ye chindewa. ¹¹ “Baho hakulawanisa njala nghulu mu isi yose ya Misili na Kanaani, hoikwigala magayo makulu lugano. Awababu setu howolemeligwa kupata chakudiya chochose, ¹² Ninga iYakobo yakahulike fina ako Misili kwina chakudiya, hoyowatuma wanangwe, awaBaba setu weje uko Misili ichipango cha kunghonga. ¹³ Inhambo yawo iyakeli Yusufu hoyokiyonesa kuwanduguse na Falao hoyowamanya awanduguse wa Yusufu. ¹⁴ Kamei Yusufu hakawatuma na kumwinanga Baba yawo Yakobo na wandugu sakwe wose wamwijile, hawowa kifana magana mufungate na na shano wose. ¹⁵ Kamei Yakobo hakadulika Misili. Imwene imwenyecho hakafila ukuya hamwedu na waBaba setu, ¹⁶ kamei imitufi yawo hoikwigaligwa mpaka Shekemu, hosikigwa mu chilalo cha Abulahamu choyagulile kuwa kwi kabila dya Hamoli kwa chayasi fulani cha mapesa. ¹⁷ “Ugele wo kumemelesa dihuwi dya Abulahamu, ukowe habehi ditewa dya wanhu waya akuya Misili hadyongeseka na kuwa ikulu lugano. ¹⁸ Hanyuma yakwe, hoyotawala Mundewa yumonga imwene nghamumanyile Yusufu, ako Misili. ¹⁹ Hoyodigolosela ditaifa dyetu Lwidaso, hoyowatendela wababu setu fihile, kwa kuwagamba wawatage awana wawo we chigosi uleke wafe. ²⁰ “Musa hoyokwelekigwa ugele uwo. Hokowa mwana muswanu lugano. Hoyoleleligwa ukaya kwa chipango kwa minyesi midatu, ²¹ yakalafigwe kunje, imwana we chike wa Falao hoyomulonda, hoyomulela kifana mwanagwe. ²² Musa hoyofusigwa finhu fyose na misungu yose ya Wamisili, hoyokuwa munhu wa itunyo na chogoho kwa sinhenda na simbuli. ²³ “Yakowe munhu wa minyaka makumi mane, hoyolamula kwijawalanga awanduguse Awaislaeli. ²⁴ Uko hokomona yumwedu wawo yakutendeligwa fihile, hoyoluta kumuhonya, na kwa kuliha chisasi hoyomukoma ayuya iMumisili. ²⁵ (Hakamanya nhagela Waislaeli wayagwe womanya fina iMulungu kumutumiya imwene kuwakombola, ninga wasatangile nheifo.) ²⁶ “Nhosiku yakwe howona Waislaeli weli wakitowa, hoyogesa kuwapatanisha yakugamba, ‘Yoloko anye mwa ndugu, nhani mukulemana muwecho kwa wecho?’ ²⁷ Ayuya yamufowage miyagwe hoyomukundugisa Musa kughanda, yakugamba: Nani yakwikile gweye kuwa chilongosi na mulamusi wetu? ²⁸ ‘Togola ukuhanga unikome fina fowamukomile iMumisili digulo?’ ²⁹ Yakahulike nheifo iMusa hoyotija, hoyeja kwikala ku isi ya Midiani na uko hoyopata wana weli. ³⁰ “Minyaka makumi mane iyilokile, imalaika we Mundewa hakamwijila Musa muchisinghu chendechikwaka moto akuya kunyika habehi na ditunda dya Sinai. ³¹ iMusa hoyokisina lugano kukona kona ichinhu fina chino, hoyosegela habehi uleke yalange fiswanu; ninga hoyohulika dijwi dye Mundewa. ³² ‘Aniye no ni Mulungu wa waBaba sako; Mulungu wa Abulahamu, Isaka na Yakobo.’ Musa hoyotetema kwa chogoho kahinghagendelele kulanga kahi. ³³ “iMundewa hoyomugamba: ‘Hambula ifilwatu fyako kosoko ahano howimile ni hanhu hasunhile. ³⁴ Niyona agehile gowakugoloseligwa awanhu wangu akuya Misili. Nihulika ichilolo chawo, nani nija niwahonye. Kosoko iyo wije hano nikulagise ulute Misili.’ ³⁵ Ayuno iMusa no yuya awanhu wa Isilaelii wowamulemile fowagambile: ‘Nani yakwikile gweye uwe chilongosi wetu na mulamusi wetu?’ Kwa soko ya yuya imalaika yamulawanisile muchihulo chendechikwaka moto, iMulungu hakumutuma iMusa yuyo yowe chilongosi mwihula kwa njila ya yuya malaika yamulawanisile muchisinghu chendechikwaka moto.. ³⁶ No yawalongose awa awanhu walawe Misili kwa kugolosa mengi ga majumo na gakisina mu isi ya Misili mu bahali ya Shamu na munyika kwa chipango cha minyaka makumi mane. ³⁷ “iMusa noyagambile awanhu wa Isilaelii, ‘iMulungu yakwenda yamusagulileni mugonesi fina niye kulawa mugatigati ya wandugu senu mwecho.’ ³⁸ Ugele awanhu wa Isilaelii fowakitanganyile akuya kunyika, iMusa noyowile uko hamwedu nawo. Hokowa uko hamwedu na waBaba setu na yuya imalaika isalongile naye akuya kwitunda dya Sinai; noyenghigwe asiya simbuli sikwigala uumi yachinghe seyee ³⁹ “Ninga imwene no yuyo awakuku setu yowalemile kumuhulikisa; howomukundugisa kunghanda, howohananga kuya Misili. ⁴⁰ Howomugamba Haluni: ‘Chigolose milungu ikudaha kuchilongosa munjila, kosoko chisimale chimupatile iMusa iyachilongose kulawa Misili.’ ⁴¹ Baho noho wakigolosele isanamu ye indama, wakuitambichila na kugolosa chinyemi, ichinhu chowagolose kwa mikono yawo awecho. ⁴² Ninga iMulungu hoyoleuka mugati yawo, hoyowaleka wafuge sinyelesi sa kulanga, fina foiandikigwe mu chitabu che mugonesi: ‘Anye wanhu wa Isilaelii! Siniye womwanichinjile sinyama na kunitambichila kwa chipisi cha minyaka makumi mane akuya kunyika. ⁴³ Anyeye hamwinula dihema dya Moleki ne inyelesi ye mulungu wenu Lefani; sisanamu sowagolose nosoukufuga; kosoko iyo nikukwigala kukutagigwa kutali kusuma Babeli.’ ⁴⁴ “AwaBaba setu hawowa na diya dihema dya homelele akuya kunyika fina Mulungu foyawalongose chigele Mulungu foyamusigilile Musa yadigolose, kifana foyonesigwe ne Mulungu. ⁴⁵ Kamei awaBabasetu howokihokela awecho kwa wecho mpaka ugele wa Yoshua, foyailondile iisi iya ya wamembe waya wawingigwe ne Mulungu kumwande yawo. Hodikwikala baho mpaka ugele wa Daudi. ⁴⁶ Daudi hakendigwa na Mulungu kusuma wayagwe wose, hoyomutasa Mulungu luneka lwa kumujengela nyumba imwene iMulungu wa Yakobo. ⁴⁷ Ninga Sulemani noyamujengele Mulungu nyumba. ⁴⁸ “Hata nheifo, iMulungu Mukulu nghakwikala musinyumba sijengigwe na wanhu; fina foyakulonga imogonesi. ⁴⁹ iMundewa yakugamba: ‘Ulanga no digoda dyangu dya ditunyo, na chilunga no digoda dyangu dya kwichila migulu. Ni nyumba inhani yomukudaha kunijengela? Na hoki honikudaha kubwihila? ⁵⁰ Ifinhu fono fyose aniye nonifigolose, aho si nheifo?’ ⁵¹ “Anyeye mwichaka chihuliko! Singhutwi si fidoga fyenu sifana awanhu wasimumanyile Mulungu, anyeye mukifana na awaBabasenu. Majuwa gose mukusilema simbuli sa Muhe Musunhile. ⁵² Togoleni, kwina mugonesi wowose imwene awaBabasenu wasamudumangise? Hawawakoma awaya awatumigwe ne Mulungu weje watamile kwija kwakwe ayuya imunhu we chawelu. Hambiya anyeye homumusongesa, homumukoma. ⁵³ Anyeye hamuhokela adiya dilagiso degaligwe ukwenu ne Malaika, ninga musagolose fodikulonga!” ⁵⁴ Awaya wasehe we dibalasa wakahulike nheifo, howosuha lugano, howogwegwejula meno kwa nyono. ⁵⁵ Ninga Sitefano yakameme Muhe Musunhile, hoyokwinula ameso gakwe kulanga, hoyokona ditunyo dye Mulungu na Yesu kekala ulwandi lwo kulume lwa Mulungu. ⁵⁶ Hoyogamba Langeni! Nikona ulanga ugubuka ne iMwana we Munhu kema ulwandi lwo kulume lwa Mulungu. ⁵⁷ Baho, awanhu wose awowile mwi Balasa, howotula chowe na kwingisa fidole fyawo kusinghutwi kusihinda. Kamei howomujumhila wose hamwedu, ⁵⁸ howomulafa kunje ye ikaya, howomutowa na mawe. Awaya wahomelesi howokwika si amako gawo kwimilisigwa na mujelelo yakwinanga Sauli. ⁵⁹ Howogendelela kumutowa Sitefano na mawe, ugele imwene yakuwomba: Mundewa Yesu chihokele chidoga changu! ⁶⁰ Hoyotowa mafindi hasi, hoyokwinula dijwi dyake: Mundewa ungawatalilile wihi muchanhya yawo. Yakamale kulonga nheifo, hoyokufa.

¹ Na Sauli hakendesigwa na kukomigwa kwakwe Sitefano. Dijuwa didyo hokulawanisa lwidaso lukulu lugano kwikanisa diya Yelusalemu. Awahuwile wose ninga awaya awatumigwa du, howokiyagala kusiisi sa Uyahudi na Samalia. ² Awanhu awakumogoha Mulungu howomusika Sitefano na kumugolosela mohongesi makulu. ³ Ugele uwo, Sauli hoyogesa kudibana dikanisa. Hoyoluta kwa chila nyumba, hoyowalafa kunje awahuwile, wagosi kwa wanawake, hoyowaguma kwi gelesa. ⁴ Awaya awahuwile awakiyagale, howoluta kose kose wakuhubili imbuli iya. ⁵ iFilipo hakadulika mukaya ya Samalia na kumuhubili Kilisito ku wakaya wa baho. ⁶ Awanhu howokihasa kwa chinyemi kuutegelesa simbuli sa Filipo na kona majumo gaya goyagolose. ⁷ Kosoko simhepo sihile isawekalile wanhu wengi, hosilawa sikutula chowe chikulu; kahi na wanhu wengi wowile na utamu wa kuholola vilungo fyawo no filema howohonyigwa. ⁸ Hokukuwa na chinyemi mukaya iya. ⁹ Baho, hahowa na munhu yumonga yakwinangwa Simoni, imwenye yagolose uhayi wakwe mukaya iyo ku majuwa galokile, na kuwatenda wanhu wa Samalia wakisine lugano, yakiyona imwene ni munhu mukulu. ¹⁰ Awanhu wose wakulu na wadodo, hawamutegelesa wakugamba, “Munhu yuno ni udaha uya mukulu we Mulungu.” ¹¹ Hawakwegigwa lugano ne imwene kosoko hawakisina uhayi wakwe kwa majuwa mengi. ¹² Ninga wakahuwile inonga ya Filipo mchanhya ya Imbuli iswanu yo undewa we Mulungu na disina dya Yesu Kilisito, howobatisigwa wanawake na wagosi. ¹³ Hata Simoni imwenyecho hoyohuwila; yakamale kubatisigwa hoyokiyandamila na Filipo, hoyokisina amajumo gagolosagwe na Filipo. ¹⁴ Awaya watumigwa wowile Yelusalemu wakahulike fina awakaya wa Samalia waihokela imbuli ya Mulungu, howowatuma ukwawo Petulo na Yohana. ¹⁵ Wakafike howowawombela awahuwile uleke wahokele Muhe Musunhile; ¹⁶ kosoko ugele uwo Muhe Musunhile hakowa nghenati yamwingile hata yumwedu wao muchiligati yao; ninga hawowa wabatisigwe du mudisina dye Mundewa Yesu. ¹⁷ Petulo na Yohana howowechila mikono awaya wahuwile, awo howohokela Muhe Musunhile. ¹⁸ Baho Simoni yakone fina kwa kwikiligwa mikono na watumigwa wanhu wakuhokela Muhe Musunhile. Kosoko iyo hoyoweng’a Petulo na Yohana mapesa, ¹⁹ yakugamba Ningheni na niye udaha uwo uleke wowose wonikumwichila mikono yahokele Muhe Musunhile. ²⁰ Ninga Petulo hoyomubidula, Wagilile kutali na mapesa gako kosoko kumanya simboto sa Mulungu sikuguligwa kwa mapesa! ²¹ Kwachaka mugawo wowose, kahi ifungu dyodyose mumulimo uno kosoko umoyo usiliganile kumwande ya meso ge Mulungu. ²² Kwa nheifo, ulambe uwihi wako uno na umutase Mundewa naye yakudaha kukonela ubasi amawaso fina gago. ²³ Nikukona kumama wifu mukali na kohigwa na uwihi! ²⁴ Simoni hoyobidula, Dedede, nitasileni kwe Mundewa dinghanipata dyodyose mugago gomulongile. ²⁵ Petulo na Yohana wakamale kulafa uhomelesi wao na kutamula imbuli ya Mundewa, howokuya Yelusalemu. Ugele fowoyage hawahubili imbuli swamu mu fikaya fingi fya Wasamalia. ²⁶ Malaika we Mundewa hoyomugamba Filipo, Winuke, ulute kwikulu kwandamila injila ikulawa Yelusalemu kuluta Gasa, (Injila iyo ikugendela munyika) ²⁷ Kamei, hakenuka na kuluta. Ugele wuwo hokuwa na Mwesiyopiya yumwedu, yemhende, munhu yuyo hakowa munyamhala mukulu we sawo ye Kendake, iMundewa we chike we Chiyesiyopiya hakowa munhambo kulawa Yelusalemu kukufuga. ²⁸ Kamei yendeyokuya ukaya hokowa yakwilile umukokoteni ukukwegigwa, munhambo yakwe yendeyosoma chitabu che Mugonesi Isaya. ²⁹ Baho Muhe Musunhile hoyomugamba Filipo, Luta habehi ne mukokoteni uya ukukwegigwa, ukiyandamile nawo ³⁰ Filipo hoyobilimila habehi na digali didyo, hoyomuhulika ayo imunhu yakusoma muchitabu cha Isaya. Baho Filipo hoyomusa, Togola, ukutanga ago go ukosoma? ³¹ Imunhu yuyo hoyobidula, Nodaha kutanga nhani bila munhu kunilongosa? Baho hoyomwinanga Filipo yakwile mwigali dyakwe, yekale naye. ³² Hambiya, difungu dya matulumo masunhile dyoyasomage hadyuwa dino: Hakowa kifana ngholo ikwigaligwa kuchinjigwa; fina ichana che ingholo fochikunyamala posi ugele chikugetigwa, nghagubule mulomo wakwe. ³³ Hakagumigwa chinyala na koneligwa. Hachaka yakudaha kulonga muchanhya ye cheleko chakwe, kosoko uumi wakwe ulewusigwa muchilunga. Imwene naye nghalafile dijwi dyakwe hata chidodogi. ³⁴ Ayo Mwisiyopiya hoyomugamba Filipo, Nitamile, iMugonesi yuno yalonga kosoko yani? Yakulonga kosoko yakwe imwecho ama kosoko ya munhu yungi? ³⁵ Kamei, Filipo hoyokongela baho mu matulumo Masunhile, hoyomutamila simbuli si swanu muchanhya ya Yesu. ³⁶ Fowowile wakugendelela ne inhambo, howofika ahanhu hena meji, kamei imukulu yuya hoyogamba, “Ahanhu hano hena meji mengi: Togola, kwina chochose ichikudaha kunemesa nighabatisigwe?” ³⁷ [Filipo hoyogamba, “Honaga ukuhuwila kwa moyo wako wose ukudaha kubatiswa.” Imwene hoyobidula, “Heye, nikuhuwila fina Yesu Kilisito ni Mwana wa Mulungu.]” ³⁸ Kamei Imukulu yuya hoyolagisa mukokoteni uya wime; awene wose aweli howohumuluka, ayuya imukulu na Filipo hoyomubatisa. ³⁹ Wakalawe mumeji Muhe we Mundewa hoyomutenda Filipo yaleuke bila koneka na yuya Muwesiyopiya nghamonile kahi; ninga hoyogendelela na nhambo yakwe yamemile chinyemi lugano. ⁴⁰ Filipo hotangila kowa Asoto, hoyogenda musikaya sose yakuhubili Imbuli swanu hata foyafikile Kaisalia.

¹ Ninga ichigele chicho iSauli hakagendelela kongesa itisi ikulu kwa kuwakoma awamuhuwile Mundewa, hoyoluta kwa mutambiki mukulu, ² hoyotasa yanghigwe baluwa sa kumanyigwa ku masinagogi ge Chiyahudi gowile Damesiki, uleke yanghafika uko wagosi ama wanawake awakwandamila injila ye Mundewa yawakole na kukwila nawo Yelusalemu. ³ Ninga foyowile munjila, habehi na kufika Damesiki, chimwande ujelu kulawa kulanga howumumulike kosekose. ⁴ Hoyokugwa hasi na kuhulika dijwi dikumugamba Sauli; Sauli! Nhani ukunyidasa? ⁵ Imwene naye Sauli hoyokusa Agwe no nani, Mundewa? Dijwi diya hodibidula, Aniye no Yesu imwene agweye ukunyidasa! ⁶ Ninga hambiya Inuka, wingile mukaya, na uko ukwende utamiligwe dyokugolosa. ⁷ Awaya awanhu awende woluta hamwedu na Sauli howokwima bahaya, howowa chaka dya kulonga; howohulika dijwi diya ninga wasonile munhu. ⁸ Sauli hoyokwinuka, yakagubule ameso gakwe nghadahile kona chochose; kwa nheifo awanhu waya howomulongosa kwa kumukola mukono mpaka kukaya ya Damesiki. ⁹ Sauli hoyokwikala majuwa madatu bila kona, na ugele uwo nghadiile kahi kunywa chochose. ¹⁰ Kamei, uko Damesiki hakuwa mwifusa yumwedu yakwinangwa, “Anania. iMundewa hoyumugamba mumagubulo, Anania.” Hoyokwidika, “Nuwa hano Mundewa.” ¹¹ Naye Mundewa hoyomugamba, “Kiyohe ulute kwibalabala dikwinangwa digoloke, kwinyumba ya Yuda ukamuhanange munhu yumonga kulawa Talso yakwinangwa Sauli. Hambiya yakutasa, ¹² na mumagubulo, kona munhu yakwinangwa Anania yakwingila kugati na mwichila mikono uleke yadahe kona.” ¹³ Ninga Anania hoyobidula, “Mundewa, nihulika simbuli sa munhu yuyo kulawa kwa wanhu wengi, nihulika agihile mene goyawagolosele wanhu wako ako Yelusalemu. ¹⁴ Na keja hano yena udaha kulawa kwa watambiki wakulu kuwakola awanhu wose awakuwomba kudisina dyako.” ¹⁵ Ninga iMundewa hoyomugamba, “Luta du, kosoko nimusagula yowe chiya changu, yadingase disina dyangu ku mataifa na wandewa wao na kwa wanhu wa Isilaelii. ¹⁶ Aniye nimwecho nikuhanga nimonese mengi goyakwenda yedasigwe kosoko ya disina dyangu.” ¹⁷ Kamei, Anania hoyoluta, hoyokwingila munyumba iyo. Kamei hoyokwika mikono yakwe muchanya ya Sauli, hoyogamba, “Mundugusangu Sauli, Mundewa, iYesu imwecho yakiyonese ukwako fowowile munjila kwija hano kanituma uleke udahe kona kahi, na kumemesigwa Muhe Musunhile.” ¹⁸ Chimwande finhu kifana makangha hofilagala kuulawa kumeso ga Sauli, hoyodaha kona kahi. Hoyokwima hoyobatisigwa; ¹⁹ yakamale kudiya, si ngufu sakwe hosimuwila. Sauli hoyokwikala majuwa makefu hamwedu na wefusa uko Damesiki. ²⁰ Chimwande hoyokonga kuhubili Mumasinagogi fina, “Yesu ni Mwana wa Mulungu.” ²¹ Wanhu wose wamuhulike howokisina lugano, wakugamba, “Munhu yuno so yuyuya yawakomile waya wawombage ku disina dino akuya Yelusalemu? Hakeja hano uleke yawakole awanhu wawo na kuwegala kuwatambiki?” ²² Sauli hoyogendelela kupata ludole na kuwagolosa wafumile aWayahudi wekalage Damesiki kwa kuhomela fina Yesu no Kilisito. ²³ Majuwa mengi gakaloke, Wayahudi howokikonghola hamwedu na kugolosa njila ya kumukoma Sauli, ²⁴ ninga Sauli hoyohulika imbuli iyo. chilo ne misi hawemilisa hemulango wo kwingilila mukaya uleke wamukome. ²⁵ Ninga ugele wa nechilo awefusa wakwe howomulonda, howomuhulumusa mudisege dikulu kulokela muluneka lowile mulukasi. ²⁶ Sauli yakafike Yelusalemu hoyogesa kihasa na wefusa. Ninga wose hawamogoha, na wasahuile fina naye kagaluka mwifusa. ²⁷ Baho Balinaba hoyokwija hoyomulonda Sauli na kumwigala ku Watumigwa na kuwatamila ifyene foyamonile Mundewa munjila na fye ne foyasimulile naye. Hoyowatamila Suli foyahubili bila woga akuya Damesiki. ²⁸ Kamei Sauli hoyokwikala hamwedu nawo, hoyoigendela Yelusalemu yose yakuhubili imbuli ye Mundewa bila kogoha. ²⁹ Kamei hakalongaga na kuwanga chinyume na Wahelenisiti ninga wendewahananga kumukoma. ³⁰ Awaya awandugu wakamanya imbuli iyo, howogolosa njila ya kumulonda Sauli, howomwigala Kaiselia, howomuleka yule Talso. ³¹ Kamei dikanisa muisi yose ya Uyahudi na Galilaya na na Samalia, hodijengeka na kukula na kugendelela kumogoha Mundewa na kulongosigwa na Musunhile. ³² Petulo foyendeyoluta chila hanhu, hoyofika nheifo ku wanhu wa Mulungu awendewokwikala Luda. ³³ Uko hoyomufika munhu yumonga yakwinangwa Enea, imwene yuya kagona mwisasi kwa miyaka ikumi na munana kwa utamu wa kuholola. ³⁴ Petulo hoyumugamba, “Yesu Kilisito yakuhonya. Inuka utandike disasi dyako. Enea hoyokwinuka chimwande. ³⁵ Awakaya wose wa Luda na Saloni howomwona Enea, nawo wose howomubiduchila Mundewa.” ³⁶ Hakuwa na mufusigwa yumonga mukaya ya Yopa yakwinangwa Tabisa (kwa Chiyunani ni Dolika, nong’amba Chipala). Imwanamuke yuno yendeyogolosa maswanu na kuwatasa wakiwa wengi ugele wose. ³⁷ Ugele uwo hayuwa fina hakatamigwa, hoyokufa. Awanhu howousunha umutufi wakwe, howomutambalisa muchumba cha kuchanhya. ³⁸ Yopa si hatali sana na Luda, kwa nheifo awefusa wakahulike fina Petulo kuwa Luda, howotuma wanhu weli ukwakwe na imbuli, Wije ukwetu chimwande lugano foikudahika. ³⁹ Kamei Petulo hoyokilongosa nawo. Yakafike howomwigala kuchumba cha kuchanhya kwigolofa, uko wanawake wegane wengi howomusunguluta Petulo wakulila na kumonesa makoti na sisuke soyendeyogolosa ugele foyowile mumi. ⁴⁰ Petulo hoyowalafa wose kunje, hoyofugama, hoyowomba. Hanyuma hoyomubiduchila ayuya yafile, hoyogamba Tabisa inuka! Naye hoyogubuka meso na yakamwone Petulo, hoyokwikala. ⁴¹ Petulo hoyomutasa kwimanyima, kamei hoyowenanga awaya awanhu wa Mulungu na waya wegane, hoyomuleka mumikono yao, ugele ni mumi. ⁴² Imbuli iyo yagoloseke baho, hoikwenela chila hanhu uko Yopa na wanhu wengi howomuhuila Mundewa. ⁴³ Petulo hoyokwikala majuwa mengi uko Yopa, hoyokwikala na munhu yumonga mugolosaji wa nghingo yakwinangwa Simoni.

¹ Uko Kaisalia hakuwaga na munhu yumonga yakwinangwa Kolinelio Mukulu wa chikosi chimonga chikwinangwa, “Chikosi cha Italia.” ² Hakowa munhu muswamu; imwene hamwedu na wa munyumba yakwe wose wendewomogoha Mulungu. Yendeyogolosa mengi kuwatasa awakiwa we Chiyahudi na yende yomuwomba Mulungu ugele wose. ³ Hayuwa kifana saa kenda nhafi ya nemisi, hoyokona chimesomeso, kagubuliligwa, malaika wa Mulungu hoyokwingila kugati hoyomugamba, “Kolinelio!” ⁴ Kolinelio hoyomukumhulila meso yuyo malaika kwa chogoho, hoyomugamba, “Kwina choni Mundewa?” Ayo imalaika hoyomugamba, “Amawombi hamwedu na kulafa kwako kuwatasa wakiwa kufika kuchanhya kuwa ngelegesi kwe Mulungu. ⁵ Hambiya, watume wanhu Yopa wakamwinange munhu yumonga yakwinangwa Simon, disina dimonga Petulo. ⁶ Kowa munyumba ya Simon mugolosaji wa singhingo, nyumba yakwe yuwile habehi ne bahali.” ⁷ Kamei malaika yalongile siso hakafulusa kuleuka na kuluta, Kolinelio hoyowenanga awatogomi weli wa munyumba yakwe na yumwedu wa wasilikali wakwe yendeyomogoha Mulungu, ⁸ hoyowatamila gose galawanise, hoyowatuma Yopa. ⁹ Nhosiku yakwe dijuwa dya keli, awanhu wawo wadatu wakali munhambo, ninga behi na kufika Yopa, Petulo hoyokwila kwipala dye inyumba kuchanhya, ku saa mutandatu ya nemisi uleke yawombe. ¹⁰ Hakona njala, hoyokwenda kupata chakudiya; ugele ichakudiya fochendechigolosigwa, hoyapatigwa na nhongo sito, hoyokona diono chimesomeso. ¹¹ Hakona ulanga ugubuligwa na chinhu kifana isuke ikulu ikudulisigwa dikoligwa musimhembe sakwe sose ine. ¹² Kugati yakwe kwina fiyumbe fyose: Si nyama se migulu mine, sinyama sikutambala hasi, ne fidege fya mulanga. ¹³ Hoyohulika dijwi dikumugamba: Petulo, Inuka uchinje sinyama sino udiye! ¹⁴ Petulo hoyobidula, Hata, Mundewa; aniye sinati nidiye chinhu chochose ichene chikusemunigwa ama chihile. ¹⁵ Dijwi diya hodihulikika kahi dikugamba, “Unghafigambe fichafu ifinhu ifyene Mulungu foyasunhile.” ¹⁶ Imbuli ino hoyigoloseka kadatu, kamei adiya disuke hodikwinuligwa kulanga. ¹⁷ Petulo foyendeyokisina isoko ye digubulo didyo dyoyonile, awaya awanhu watumigwe na Kolinelio, wakaitange inyumba ya Simoni, howofika hamulango, ¹⁸ howokwinanga kwa ijwi: Togoleni, hena mugeni bahano yakwinangigwa Simoni Petulo? ¹⁹ Petulo hakowa nghenati yamanye magubulo gano, na baho Muhe hoyomugamba, “Tegelesa! Hena wanhu wadatu hano, wakukuhanga. ²⁰ Dulika chimwande na unghowe na manhonge kiyandamila nawo, kosoko aniye noniwatumile.” ²¹ Kamei, Petulo hoyodulika hasi, hoyowagamba awanhu wawo, Aniye nowomukuhanga. Nhani mwijile? ²² Awene howomubidula, Imukulu we chikosi cha wasilikali, Kolinelio; munhu muswanu, yakumogoha Mulungu na yakutunyigwa na Wayahudi wose, kachituma. Hakagambigwa na malaika Musunhile yakwinange ukaya ukwake uleke yategelese chochose chiwinacho cho kulonga. ²³ Petulo hoyowakalibisha kugati, hoyowengha hanhu haguna ichilo chia. Nhosiku yakwe, Petulo hoyokonga inhambo hamwedu nawo, na wamonga wa wandugu wa Yopa howokiyandamila naye. ²⁴ Dijuwa dya keli yakwe, howofika Kaisalia, na uko Kolinelio yendeyowagojela hamwedu na wandugu na wambuya, awene woyagoneke. ²⁵ Petulo yakowe yakwingila Kolinelio, hoyolawa kunje kumuhokela, hoyofugama kumwande yakwe na funamana hasi. ²⁶ Ninga Petulo hoyomwinula, hoyomugamba, “Inuka kosoko aniye na munhu du.” ²⁷ Petulo hoyogendelela kusimulila na Kolinelio ugele wakwingila kunyumba koyafikile wanhu wengi wakikonghola. ²⁸ Petulo hoyowagamba, “Anye muwecho mumanya fina Muyahudi wowose yakulemesigwa na malagiso ge dini yakwe yanghakihase na wanhu wa wamembe gengi. Ninga Mulungu kanyonesa nileke kumwona munhu wowose kuwa yakusemunigwa ama muchafu. ²⁹ Kosoko iyo, fomuninange nija, bila kulema. Hambiya, nimusani, Nhani muninange?” ³⁰ Kolinelio hoyogamba, “Majuwa madatu galokile ichigele kifana chino, saa ya dikenda ya nemisi, nendeniwomba kuchumba changu. Chimwande munhu yafalile suke sikwakaika kema kumwande yangu, ³¹ hoyogamba, ‘Kolinelio! Amawombi gako na kulafa kwako na kuwatasa kwako wakiwa fihokeligwa na Mulungu. ³² Mutume munhu Yopa yakamwinange munhu yumonga yakwinangwa Simoni, disina dimonga Petulo; kowa kunyumba ya Simoni mgolosaji wa singhingo behi na bahali.’ ³³ Kosoko iyo hanikutumila wanhu baho ni baho nagwe kutenda fiswanu kwija. Hambiya, aseye cha hamwande ya Mulungu, kuhulikisa chochose ichene Mulungu kakulagisa ulonge.” ³⁴ Baho Petulo hoyokonga kulonga; Hambiya nimanya chawelu Mulungu kechaka ubagusi. ³⁵ Munhu wa ditaifa dyodyose yakumogoha Mulungu na kugolosa simbuli se chawelu, Mulungu yakuhokeligwa naye. ³⁶ Aino no imbuli Mulungu yo yawegalile wanhu wa Isilaelii, yakutamila Imbuli swanu iikwigala digoya kwa njila ya Yesu Kilisito imwene no Mundewa wa wose. ³⁷ Anye mumanya imbuli iya yagoloseke mu isi yose ya Uyahudi kukongela woyahubili Yohana. ³⁸ Mumanya Yesu wa Nasaleti ifyene Mulungu foyamusagule kwa kumwitilila Muhe Musunhile na ludole. Mulungu hakowa hamwedu naye; holuta ako nako na kugolosa maswanu na wose awoneligwe na Luhoma. ³⁹ Aseye cha wahomelesi wa simbuli sose soyagolose mu isi ya Uyahudi na Yelusalemu. Howomukoma kwa kumutungika mumusalaba. ⁴⁰ Ninga Mulungu hoyomwinula dijuwa dya kadatu, hoyomugolosa yonigwe, ⁴¹ si kuwanhu wose, ninga kwa waya awene awasaguligwe wowe wahomelesi wakwe, no seye chanywile na kudiya hamwedu naye yamale kwinuka kulawa kuwafile. ⁴² Kachituma chihubili imbuli swanu ku wanhu wose na kuhomela fina imwene noyasaguligwe na Mulungu yowe mulamusi wa womi na wafile. ⁴³ Wagonesi wose hawalonga simbuli sakwe fina chila munhu yakumuhuwila yakuleusiligwa uwihi wakwe kudisina dyakwe. ⁴⁴ Ugele Petulo hoyowile yakalilonga simbuli siso, Muhe Musunhile hoyowahumuluchila wose wategelesage imbuli iyo. ⁴⁵ Awaya Awayahudi wahuwile awejile na Petulo kulawa Yopa howokisina kuhona Mulungu hakawetilila ichipawa che Muhe Musunhile wanhu wa wamataifa gengi nheifiya. ⁴⁶ Kosoko hawawahulika wakulonga kwa nonga sa hayo hayo wakumutunya Mulungu. Baho Petulo hoyogamba, ⁴⁷ “Awanhu wano wahokela Muhe Musunhile fina seye chiwecho fochihokele. Togoleni kwina wowose yakudaha kulemesa awanhu wano wanghabatisigwe kwa meji?” ⁴⁸ Kamei, Hoyogamba wabatisigwe kwa disina dya Yesu Kilisito. Baho howomutasa yekale nawo kwa majuwa makefu.

¹ Hambiya awatumigwa na wandugu akuya Uyahudi howohulika fina awamembe nawo waihokela imbuli ya Mulungu. ² Kamei, Petulo yakalute Yelusalemu, awaya Awayahudi wahuwile awendage awanhu wamataifa gamonga wagaligwe kwikumbi, howomugamba kabana, wakugamba, ³ “Agweye kwijakwikala na walajoni mpaka kudiya nawo.” ⁴ Baho Petulo hoyowatamila chila chinhu, simbuli siya sagoloseke kulawa kunghonga: ⁵ Dijuwa dimonga nendeniwomba mukaya ya Yopa, honikona iono; honikona chinhu kifana isuke ikulu dikudulisigwa hasi kulawa kulanga dikoligwa mu simhembe sakwe ine, hodikwikigwa hanghanda yangu. ⁶ Honisungilila kugati kwa fiswanu honikiona umo si nyama se migulu mine, sinyama sa kumbago, sinyama sikuhambala na fidege fya kulanga. ⁷ Baho honihulika dijwi dikunigamba Petulo, inuka, uchinje, udiye. ⁸ Ninga aniye honigamba; Hata, Mundewa! Kosoko chochose chikusemunigwa na chihile chisinati chingile mumulomo wangu. ⁹ Dijwi diya hodihulikika kahi kulawa kulanga: Unghafigambe fikusemunigwa ifinhu fisunhigwe na Mulungu. ¹⁰ Imbuli hogoloseka kadatu, kamei fyose hofikuwisigwa kuchanhya kulanga. ¹¹ Chimwande wanhu wadatu awene watumigwe ukwangu, howofika kunyumba yonyendenikwila. ¹² Muhe hoyonigamba nikuyandamile nawo nilekekuwa na manhonge. Awo no awandugu mutandatu howakiyandamila nani kuluta Kaisalia, na uko hochikwingila munyumba ya Kolinelio. ¹³ Imwene hoyochitamila ifyene fyoyamonile malaika yemile kunyumba yakwe yakumugamba, “Mutume Munhu Yopa yakamwinange munhu yumonga yakwinangwa Simoni kwa disina dimonga Petulo. ¹⁴ Imwene hokutamila simbuli isene agweye na wayago wose mukwende muhonyigwe.” ¹⁵ Kamei, nikakonge du kulonga, Muhe Musunhile hoyowawadulichila fina foyachidulikile aseye kunghonga. ¹⁶ Baho honigelegela simbuli siya iMundewa soyalongile: Yohana hakabatisa kwa meji, ninga anyeye mukubatisigwa kwa Muhe Musunhile. ¹⁷ Hambiya, honaga Mulungu yawenghile wanhu wa wamembe gamonga ichipawa chichiya choyachinghile seye fochamuhuwile Mundewa Yesu Kilisito, togola aniye no nani mpaka nidahe kumupinga Mulungu? ¹⁸ Wakahulike simbuli siso howoleka lukani, howomutunya Mulungu wakugamba, “Mulungu kawengha wanhu wa wamembe gamonga luneka lwo kulamba na kuwa na uumi!” ¹⁹ Kosoko ya magayo galwanise ugele foyakomigwe Sitefano, wahuwile howokiyagala. Wamonga howoluta mpaka Foinike, Kupulo, na Andiyokiya wakuhubili imbuli iya kuwayahudi du. ²⁰ Ninga wamonga wa wahule kulawa Kupulo na Kulene, howoluta Andiyokiya, howotamila simbuli siso kuwanhu wa wamembe gengi wakuhubili aiya imbuli swanu ye Mundewa Yesu. ²¹ Mundewa hoyowatasi na itewa ikulu dya wanhu hodihuwila na kumubiduchila Mundewa. ²² Simbuli siso hosihulikigwa akuya kwi kanisa dya Yelusalemu. Kosoko iyo howomutuma Balinaba yalute Andiyokiya. ²³ Yakafike uko na kona Mulungu foyawamotese awanhu waya, hoyokonela na kuwaguma moyo wose wagendelele kuwa wanhu wa dihuwi kwi Mundewa. ²⁴ Balinaba hakowa munhu muswamu na yamemile Muhe Musunhile na digoya. Itewa ikulu dya wanhu howokwegigwa kwi Mundewa. ²⁵ Kamei Balinaba, hoyoluta Talso kumuhananga Sauli. ²⁶ Yakamwone hoyokwija naye Andiyokiya. Nawo wose weli howokwikala na dikanisa diya kwa mwaka wose mugima, wakufusa itewa ikulu dya wanhu. Ako Andiyokiya noko kunghonga, awefusa kwinangigwa Wakilisito. ²⁷ Ugele uwo wagonesi wengi howokwija Andiyokiya kulawa Yelusalemu. ²⁸ Yumwedu wawo iyakwinangwa Agabo hoyokwima kwa udaha wa Muhe Musunhile, hoyolonga gakwende kalawanise fina kukwende kuwa na njala nghulu mu isi yose. ²⁹ Awahuwile howokifumilisa chila yumwedu, kwa udaha wakwe yegale chochose uleke wawatase awandugu waye wekalage Uyahudi. ³⁰ Kamei, howogolosa nheifo na kwigala kuwasehe wedikanisa umusada wawo kwa mikono ya Balinaba

¹ Ugele uwo Mundewa Helode hakakonga kuwedasa wanhu we dikanisa. ² Hoyomukoma kwa ipanga Yakobo, munduguse wa Yohana. ³ Yakone Wayahudi wendesigwa na chitendo chakwe chicho, hoyogendelela, hoyomukola na Petulo. (Ayo haigoloseka ugele we sikukuu ye mikate isigumigwe nungo.) ⁴ Yakakoligwe, hoyokwikigwa, kulangiligwa na wasilikali fitewa fine fya wasilikali wanewane. Helode hakahananga kumulafa kumwande ya wanhu honaimalile kuloka ikikukuu ye Pasaka. ⁵ Petulo fowile kwigelesa, dikanisa dyende dimuwombela kwa Mulungu kwa moyo. ⁶ Nechilo dijuwa dya longolele dijuwa Helode yahanangage yamulafe Petulo kunje kumwande ya wanhu wose, Petulo hohowa yagonile hagati ya wasilikali weli. Hakowa yohigwe minyolo mili, na wemilisi wendewokwimilisa dilango dya digelesa. ⁷ Chimwande malaika we Mundewa hoyokwima habehi naye, no ujelu houmulika ichumba ichiya chose che digelesa. Malaika hoyomukwafa hambafu hoyomwinusa hoyogamba, “Inuka chimwande!” Baho ni baho iminyolo yamohile mikono hoidumuka na kulagala hasi. ⁸ Malaika hoyomugamba, “Fala umukanda wako, fala filwatu fyako.” Hoyotenda nheifo. Kamei Malaika yuya hoyomugamba, “Fala dikoti dyako, unyandamile.” ⁹ Petulo hoyomwandamila kunje, ninga nghamanyile fina ago gagolosigwe ne malaika hagowa ga chawelu, hakawa yalota nyosi. ¹⁰ Howoloka ichituwo cha nghonga cha wimilisi na cha keli, hanyuma howofika kumulango we chuma wokwingilila mukaya. Umulango houkumuka uwecho du, awene howolawa kunje. Howokuwa wakugenda mwibalabala dimonga chimwande, ayuya Malaika hoyomuleka Petulo yamwene. ¹¹ Ako noho Petulo yatangile choni chigoloseke, hoyogamba, “Hambiya nimanya chawelu fina Mundewa katuma Malaika wakwe na kunihonya mumikono ya Helode na simbuli sose awana wa Isilaelii sowende wa gojela.” ¹² Yakatange nheifo hoyula kunyumba ya Maliyamu ing’ina wa Yohana iyakwinangwa Mlk o, umo wanhu wengi hawakikonghola wakuwomba. ¹³ Petulo hoyotowa hodi kumulango wa kunje, na mutumishi yumonga we chike yakwinangwa Loda, hoyoluta hamulango kwidika. ¹⁴ Ayo imwana we chike hoyotanga dijwi dya Petulo hosekelela lugano, ahanhu hokukumula auya umulango hoyobilima kugati na kuwatambila Petulo kema kunje hamulango. ¹⁵ Howomugamba ayuya imwana we chike, “Kwina chilalu!” Ninga imwene hoyokasana kuwa ni chawelu nofoyuwile. Nawo howomugamba, “Ayo ni Malaika wakwe.” ¹⁶ Ugele uwo Petulo yakugendelela kutowa hodi. Hanyuma yakwe howokumula u mulango, howomwona, howokisina. ¹⁷ Kamei hakawapungila umukono wanyamale, hoyowatamila ifene Mundewa foyamulafile mwigelesa. Kamei hoyowagamba wagale imbuli kwa Yakobo na ku awandugu wamonga. Kamei hoyoleuka hoyoluta hanhu hengi. ¹⁸ Ikafike nhousikusiku hahowa na lutemanuko mugati ya awasilikali kosoko ye imbuli yagoloseke ya Petulo. ¹⁹ Ichigele Helode foyamukonghile na kuleka kumona, hakawosilisa awasilikali na kulagisa wakomigwe. Kamei hakadulika kulawa Yudea mpaka Kaisaliya na kwikala uko. ²⁰ Helode hakasuha sana na watu wa Tilo na Sidoni. Ninga wene howomwigalila wanhu. Awene wawo howomupata kunghonga, Blasito yowe ulwandi ulwawo, Blasito hakowa mumyamhala mukulu munyumba ye Mundewa. Kamei howomulutila Helode, howomutasa kuwa na igya kosoko ye iisi yawo haihula iisi ye Mundewa ku chakudiya. ²¹ Dijuwa dimwedu dyasaguligwe, Helode hoyofala si suke sakwe sechindewa hoyokwikala mwigoda dyakwe dye chindewa hoyolonga na wanhu. ²² Wanhu waya howotula chowe cha chinyemi howogamba, “Adino ni ijwi dyo Mulungu si dya Munhu!” ²³ Baho ni baho Malaika we Mendewa hoyomukinya Helode hasi. ²⁴ Imbuli ya Mulungu hoigendelela na kukula. ²⁵ Balinaba na Paulo wakamale kugolosa umulimo wawo, howolewuka kahi Yelusalemu howomulonda na Yohana iyakwindigwa kahi Mlk o.

¹ Kwi kanisa dya Andiyokiya hakuwa na wanhu wamonga wagonesi na walimu; mugati yawo hakowa Balinaba, Simoni yakwinagwa hanyuma Mutitu (Nigel) Lukio wa Kilene, Manaeni imwene yaleligwe hamwedu na Mundewa Helode, na Sauli. ² Wawagolosage kumufugila Mulungu na kufunga Muhe Musunhile hoyowagamba, “Nisagulileni Balinaba na Sauli kosoko yo mulimo woniwenangile.” ³ Kamei, wakamale kuwomba na kufunga, howowechila mikono howowaleka walute. ⁴ Kamei, Balinaba na Sauli wakafuluse kutumigwa na Muhe Musunhile, howadulika mpaka Seleukia, kulawa uko howokwila meli mpaka ku chisiwa cha Kuplo. ⁵ Wakafike Salami howohubili imbuli ya Mulungu mumasinagogi ge Chiyahudi. Yohana hakowa mutasi wasi wawo. ⁶ Howogenda kulawa ulwandi lumwedu lwe chisiwa mpaka Pafo, ulwandi lwa keli, na uko howomufika muhai yumonga Muyahudi yekwinangwa Bali Yesu, imwene yendeyokitenda fina mugonesi ⁷ Ayuno hakowa hamwedu na Seligio Paulo, no mukulu wa chicho ichisiwa, hokowa munhu yena umanyi lugano. Seligio Paulo hoyowenanga Balinaba na Sauli uleke yaihulike imbuli ya Mulungu. ⁸ Ninga ayo imuhayi Elima (foyendeyokwinangwa kunonga ye Chiyunani), hoyogesa kuwabesa uleke yamutende yuya imukulu we chisiwa yanghahuwile na kubiduchila dihuwi dye chiKilisito. ⁹ Baho, Sauli imwene yenangigwe kahi Paulo, yakameme Muhe Musunhile, hoyomukumhulila ameso gakwe imuhayi, ¹⁰ hoyogamba, “Agweye kwa mudasi lugano, kwechaka chawelu! Agweye kwa mwana wa luhoma! Agwe kwa mughondo wa chila chinhu chiya che chawelu; nghukuleka hata chimwedu kwaganisa si njila se Mundewa isigoloke. ¹¹ Hambiya, umukono we Mundewa ukuwa muchanhya yako; ukuwa chipofu na nghukudaha kona ujelu we dijuwa kwa chigele.” Chimwande chila chinhu hochikuwa kifana ifunde na chisa ukwakwe, hoyokonga kugenda kuno na kuno yakuhananga munhu yamukole mukono yamulongose. ¹² Ayuya imukulu we chiwa yakone nheifo, hoyobiduka, hoyohuwila; hoyokisina lugano amafuso goyahulike muchanhya ye Mundewa. ¹³ Kulawa Pafo, Paulo na wayagwe howokwila meli mpaka Pelga ya Pamfulia; ninga Yohana hoyowaleka hoyokuya Yelusalemu. ¹⁴ Ninga awene howogendelela ne inhambo kuwa Pelga mpaka mukaya ya Andiyokiya Pisidia. Dijuwa dye Sabato howokwingila mwi sinagogi howokwikala. ¹⁵ Gamale kusomigwa amasomo mu chitabu cha malagiso ga Musa ne chitabu cha Wagonesi, awakulu wa disinagogi howogelegela ne nonga ino, Wandugu hona mwina mbuli ya kuwatamila wanhu uleke muwagume moyo, longeni ¹⁶ Kamei Paulo hoyokwima, hoyowonesa kwa mukono, hoyokonga kulonga Anye wanhu wa Isilaelii na wamonga wose mukumogoha Mulungu tegeleseni! ¹⁷ Mulungu wa wanhu wano wa Isilaelii hakawasagula waBabasetu; hoyowagolosa wowe itaifa ikulu ugele fowowile kuya kuutumwa Misili. Mulungu hoyowaleusa uko kwa udaha wakwe mukulu. ¹⁸ Hoyowafinyilisa kwa minyaka makumi mane munyika. ¹⁹ Hoyowamala mataifa mafungate we isi ya Kanaani, hoyowengha awo awanhu wakwe isi iya yuwe yawo. ²⁰ Hoyiloka minyaka magana mane na makumi mashano. Kamei hoyowengha walamusi kuwalongosa mpaka ugele we mugonesi Samweli. ²¹ Baho, howokwenda kuwa na Mundewa, Mulungu hoyowegha Sauli, mwana wa Kisha wa dikabila dya Benyamini, yowe Mundewa wawo kwa chigele cha minyaka makumi mane. ²² Hanyuma hoyomuleusa Sauli, Mulungu hoyomusagula Daudi kuwa Mundewa wawo. Mulungu hak kumufumila kwake hoyogamba: Nimona mwana wa Yese; ni munhu imwene moyo wangu wendesigwa naye, ni munhu yakwenda yagolosa agaya gose gonikwenda kugolosa. ²³ Kwandamila ulukolo lwakwe munhu yuyu, Mulungu, fina foyalongile, kawegalila wana wa Isilaelii muhonya, no Yesu. ²⁴ Ugele nghenati yeje Yesu, Yohana hakamulongolela yakuwahubilia wanhu wose wa Isilaelii fina ikuhanangigwa walambe na kubatisigwa. ²⁵ Yohana foyamalagisage imbuli yakwe hakawagamba wanhu, Mukudoga aniye no nani? Aniye ni yuya yomukulangilila. Imwene yakwija hanyuma yangu na aniye sinogelwe hata kudohola sisigi se filwatu fyakwe. ²⁶ Wandugu sangu, anyeye mu wana wo lukolo lwa Abulahamu, na wamonga wose mo mukumogoha Mulungu! Imbuli ino yo uhonya igaligwa ukwetu. ²⁷ Kosoko awakaya wa Yelusalemu hamwedu na wakulu wawo wasamumanyile imwene kuwa Muhonya, kahiwasatangile simbuli sa wasungula sikusomigwa chila Sabato. Hata neifo hawagolosa simbuli sa wasungula simemeligwe kwa Yesu yakomigwe. ²⁸ Ninga wasonile mbuli yoyose yoyabanile iikumutenda yakomigwe, fowamulongile Pilato yamuliganise yakomigwe. ²⁹ Kamei wakafuluse kumemelesa gose agawandigwe kosoko ye mwene, howomuhulumusa kulawa mumusalaba howomwika muchilalo. ³⁰ Ninga Mulungu hoyomwinula kulawa kuwafile. ³¹ Naye kwa majuwa mengi, hoyokiyonesa kuwa wakiyandamile naye kulawa Galilaya mpaka Yelusalemu. Awo no wahomelesi wakwe hambiya ku wanhu wa Isilaelii. ³² Naseye chija hano kumwigalilani imbuli swanu; imbuli iya Mulungu yoyawahuwise awaBabasetu. ³³ Kamemelesa ukwetu seye chi wajukulu wawo kwa mwinula Yesu kulawa ku wafile fina foyiwandikwe Musabuli ya keli. Agweye kwa mwanangu, Aniye diyelo nigaluka Babako! ³⁴ Na kukumwinula kulawa kuwafile, yanghadahe kahi kuya uko na kudoda. Mulungu hakagamba nhafi: Nikukwingha simboto sisunhile se chawelu sonamuhuwise Daudi. ³⁵ Heye, nna musisehemu simonga se Sabuli yakugamba: Nghukumuleka isusunhile wako yadode ³⁶ Daudi mwecho hakamemelesa foyakwenda Mulungu mu ugele wakwe; kamei hoyokufa hosikigwa habehibehi na wasehe wakwe, na uwili wakwe houdoda. ³⁷ Ninga yuya yanuligwe na Mulungu kulawa kuwafile nghadodile. ³⁸ Kwa nheifo, mumanye, wandugu sangu, fina kwe injila ye munhu yuno imbuli yo kulekeleligwa uwihi ikuhubihiigwa ukwenu; ³⁹ na fina chila munhu yakumwihuwila Yesu yakulekeleligwa uwihi wose; chinhu ichene chisikudahika kwa malagiso. ⁴⁰ Muchilangisise, mungheje mufikiligwa nagaya gowalongile awagonesi: ⁴¹ Tegeleseni anyeye mu wolubeso, jumeni mwagilile! Kosoko nikugolosa milimo aniye mumajuwa genu, ni chinhu ichene musikudaha kuhuwila hata munhu yanghamutamilani! ⁴² Paulo na Balinaba wokowe wakulawa mwisinagogi awaya awanhu howowagoneka weje kahi isabato ikwandamila, walonge wongesele simbuli siso. ⁴³ Umulango wo ukahele, Wayahudi wengi na wanhu wa wamembe gamonga awabidukile idini ye Chiyahudi howowandamilla Paulo na Balinaba. Awo watumigwa howolonga nawo howagamba wagendele kwikala wakuhuwila dihewa dye Mulungu. ⁴⁴ Isabato yandamile, kalibu ikaya yose hoyokwija kuhulikisa imbuli ye Mundewa. ⁴⁵ Ninga Awayahudi wakone didyo ditewa dya wanhu, howomema wifu, howopinga goyalongage Paulo na kumuliga. ⁴⁶ Hata nheifo Paulo na Balinaba howolonga kwa chigosi bila kogoha, wakugamba: Hayuwa fiswanu imbuli ya Mulungu imufikileni anye we kunghonga; ninga kosoko muilema na kiyona msagiligwe uwumi wa majuwa gose, aseye chikumulekani na kuwalutila awanhu wa mataifa gengi. ⁴⁷ Kosoko Mundewa hakachilagisa nhafi: Nikwika gweye uwe ujelu ku wanhu wa wamembe, uleke nwegalile wanhu uhonya kose kuchilunga. ⁴⁸ Awanhu wa wamembe gamonga wakahulike imbuli iyo huwosekelela, howowutunya ulongi wa Mulunguna waya awene wasaguligwe kupata uwumi wa majuwa gose, howohuwila. ⁴⁹ Imbuli ya Mulungu hoikwenela kose kose mu isi iya. ⁵⁰ Ninga Wayahudi howowasongesa awanawake wakulu wene fyeyo wa mataifa gengi na awene wende womogoha Mulungu na wagosi we kaya iyo. Howokonga kuwedasa Paulo na Balinaba, howowawinga kulawa mu sehemu yawo. ⁵¹ Kamei, watumigwa howokung’unha diluli mumigulu yawo, kuwa ushahidi ukwawo, kamei howoluta Ikonia. ⁵² Ninga awaya wahuwile howomema chinyemi na Muhe Musunhile.

¹ Ako Ikonia simbuli hasuwa fina fosowile kuya Andiyokiya; Paulo na Balinaba howoluta kwi sinagogi dya Wayahudi howolonga kwa udaha mpaka Wayahudi wengi na Wayunani howohuwila. ² Ninga aWayahudi wamonga awalemile kuhuwila howosongesa na kuguma nyono mu mimoyo ya wanhu wa mataifa wamonga uleke wawaleme awandugu wawo. ³ Paulo na Balinaba hogendelela kwikala uko kwa udaha muchanhya ye Mundewa, naye Mundewa hoyowililila ulongi wo walongile muchanhya ye dihewa dyakwe, kwa wadahisa kugolosa ga majumo na gokisina. ⁴ Awanhu we kaya iyo howokitemanula: Wamonga howokifumilisa na Wayahudi, na wamonga howokuwa ulwandi lwa watumigwa. ⁵ Kundumo yakwe, wamonga wa wanhu wa mataifa gamonga na Wayahudi wakihasa na wakulu wawo, howolamula kuwatendela fihile awo watumigwa na kuwatowa na mawe. ⁶ Watumigwa wakatange imbuli iyo, howotijila Lisitila na Delibe, sikaya sa Likaonia, na sisehemu sa mubehi behi. ⁷ Hogendelela kuhubili imbuli iswanu uko. ⁸ Hakuwa munhu yumonga uko Lisitila, imwene yowile chiwete kulawa kwelekigwa kwake hakowa nghenati yagende ng’oo. ⁹ Imunhu yuyo yendeyomutegelesa Paulo foyendeyohubili. Paulo hoyomulanga ludole yokone fina hakowa na ihuwi dya kudaha kuhona, ¹⁰ hoyolonga kwa dijwi dya muchanhya, Ima nyima kwa migulu yako! Ayuno munhu imwene imigulu yakwe hailemaa, hoyokwinuka chimwande hoyokonga kugenda. ¹¹ Chigele itewa dya wanhu wakone choyagolose Paulo, howokonga kujoja mu nonga ye Chilukaonia, Milungu ichijila mu sifuta sa wanhu. ¹² Balinaba hoyokwinangwa Seu, na Paulo, kwa fiya imwene noyalongage, hoyokwinangwa Helme. ¹³ Na imutambiki wa dihekalu dya Seu dyowile kunje ye kaya hoyokwigala nghambaku na mahwanya ga maluwa hamwedu yo mulango mukulu we kaya, imwene hamwedu na ditewa dya wanhu hoyohananga kuwatambichila watumigwa. ¹⁴ Balinaba na Paulo wakamanye imbuli iyo, howodega si suke sawo na kudibilimila ditewa dya wanhu wakugamba dijwi ikulu: ¹⁵ “Wandugusetu nhani mukutenda nheifo? Ase nase cha wanhu fina nyeye. Na chabahano kuwahubili imbuli iswanu, musileke asino si sanamu muhala, mukamubidukile Mulungu imumi, Mulungu yowumbile ulanga ne iisi, ibahali na fyose fuwile umo. ¹⁶ Katali Mulungu hakaleka chila itaifa ditende fyo dikwenda. ¹⁷ Hata nheifo nghalekile kiyonesa kusimbuli si swanu soyakuwagolosela: Yakuwatonyesela ifula kulawa mulanga, kugola kwa ugele wakwe na chakudiya na kuimemesa miyoyo yenu na chinyemi.” ¹⁸ Hata walongile nheifo isowile fihufu kuwalemesa waleke kuwatambichila. ¹⁹ Ninga Wayahudi wamonga howokwija kulawa Andiyokiya na Ikonia, howowatenda wanhu wakihase nawo howomutowa mawe Paulo na kumubulumula mpaka kunje ye kaya howogamba kafulusa kufa. ²⁰ Ninga wahuwile wakakikonghole na kumusunguluta, hoyokwinuka, hoyokuya ukaya. Nhosiku yakwe imwene na Balinaba howoluta Delbe. ²¹ Paulo na Balinaba wakamale kuhubili imbuli swanu ako Delibe na kupata wahuwile wengi, howokiyoha nhambo ya kuluta Andiyokiya kwa kugendela Lisitila na Ikonia. ²² Howowakangasa wahuwile wa sikaya siso na kuwaguma moyo wowe wakangale mu dihuwi, Howowagamba, ichangila chose seye chigendele mu masambasiko mengi, uleke chingile mu undewa we Mulungu. ²³ Howosagula wasehe kwa chila ikanisa kosoko ya wahuwile, kamei kwa kuwomba na kufunga howoweka hasi ya wimilili we Mundewa imwene wowamuhuwile. ²⁴ Wakalokele mu isi ya Pisidia, howofika Pamfulia. ²⁵ Wakamale kuhubili imbuli iyo ako Penga, howoluta Atalia. ²⁶ Kulawa uko hawasafili kwa meli howokuya Andiyokiya ahene kunghonga hawekigwa mu kwimilisi we dihewa dye Mulungu kosoko ye milimo, hambiya hawowa waimemelese. ²⁷ Wakafike ako Andiyokiya howogolosa mulundo wa dikanisa ahanhu baho, howowatamila simbuli soyagolose Mulungu hamwedu nawo, na fyene foyawakumulile wanhu wa wamembe gamonga umulango wo kwingila mu dihuwi. ²⁸ Howokwikala na waya wahuwile chipisi chitali hamwedu nawo.

¹ Kamei wanhu wamonga hawafika Andiyokiya kulawa Uyahudi howokonga kuwafusa waya wandugu wakugamba, “Hona musigaligwe kwikumbi kwandamilo amahokelo na malagiso ga Musa musikudaha kuhonyigwa ng’oo.” ² Imbuli ino hoikwiga kuwanga kukulu na Balinaba na Paulo wakalonge nao, howokifumilisa fina Paulo na Balinaba hamwedu na wahuwile wengi wa dikanisa dya Andiyokiya wakawona awaya watumigwa na wasehe muchanhya ye imbuli iyo. ³ Kamei dikanisa, hodiwelaga nawo wokowe wakulokela Foinike na Samalia howowatamila wanhu ifyene awamembe gamonga fowawamubidukile Mulungu. Simbuli siso hosiwendesa sana wandugu wawo wose. ⁴ Wakafike Yelusalemu howokalibishigwa na dikanisa, watumigwa na wasehe; nawo howowatamila gose goyagolose Mulungu hamwedu nawo. ⁵ Ninga wahuwile wamonga wowile we chitewa cha Mafalisayo, howokwima wakugamba, ikwendigwa wanhu wa wamembe gengi wegaligwe kwikumbi na kufusigwa kwandamila malagiso ga Musa. ⁶ Kamei, watumigwa na wasehe howogolosa mulundo wi waimwene uleke wailange imbuli iyo. ⁷ Wakamale masimulisi matali, Petulo hoyokwima, hoyogamba, “Wandugu sangu, mumanya fina kukonga Mulungu hakanisagula niye mugati yenu uleke awanhu wa wamembe wahulike imbuli Iswanu na kuhuwila kosoko ya mahubili gangu. ⁸ Naye Mulungu yamanyile miyoyo ya wanhu hoyokonesa fina kawafumila nawo kwa kuwengha Muhe Musunhile fina foyachinghile seye. ⁹ Nghagolose ubagusi wowose ukwetu na ukwawo, hakaisunha miyoyo kwa dihuwi. ¹⁰ Hambiya, nhani, kumugesa Mulungu kwa kuwatwika awo wahuwile musigo wene hata wababu setu, kahi aseye chilemeligwa kuwinula? ¹¹ Inghowe nheifo, ninga, chikuhuwila fina aseye fina awene nawo, chikuhonyigwa kwa njila ya dihewa dye Mundewa Yesu.” ¹² Chitewa chose hochinyamala twi, chikuwategelesa Balinaba na Paulo wakutamila majumo na kisina kwagohesigwe na Mulungu kwa mikono yawo mugati ya wanhu wa wamembe gengi. ¹³ Wakamale kulonga Yakobo hoyokonga kulonga: Wandugu sangu, nitegeleseni! ¹⁴ Simoni kachitamila fyene Mulungu kunghonga foyawagolosele wanhu wa wamembe gengi, hoyawasagula wamonga wawo wowe wanhu wakwe. ¹⁵ Imbuli ino iligana lugano na simbuli sa wagonesi fina mawandiko masunhile fogakulonga: ¹⁶ Hanyuma ya simbuli sino kukuya, nikwenda nijenge kahi aiya inyumba ya Daudi yuwile; Nikugolosa mahame gakwe na kuijenga kahi. ¹⁷ Ako awanhu wamonga wose, wanhu wa mataifa gose woniwenange wowe wangu womuhamanga Mundewa. ¹⁸ Nofo yakulonga Mundewa, iyagolosa imbuli ino dimanyike kulawa katali. ¹⁹ Kosoko iyo ulamusi wangu nowuno: Chinghawedase wanhu wa wamembe awakumubiduchila Mulungu. ²⁰ Chiwawandikile baluwa wanghadiye fyakudiya vigumigwe wihi kwa kulafigwa kuwa filafwa ku sisanamu se milungu; waleke dihabwa, wanghadiye nyama yoyose iinyongigwe na wanghonywe sakame. ²¹ Kosoko simbuli sa Musa sendesihubiliwa mu chila isinagoti kwa kaya na kusomigwa mu masinagogi gose chila ijuwa dya sabato. ²² Watumigwa, wasehe na dikanisa dyose walamula kuwasagula wanhu wamonga mugati yawo na kuwatuma Andiyokiya hamwedu na Paulo na Balinaba. Kamei, howousagula Yuda iyakwinagwa kahi Balinaba, na Sila, wose wamanyikana lugano mugati ya wandugu. ²³ Howowengha baluwa ino: Aseye watumigwa na wasehe wandugu senu chikuwalamusani anyeye wandugu wa wamembe gengi muwile ako Andiyokiya, Silia na Kilikia. ²⁴ Chihulika fina wanhu wamonga kulawa kuno ukwetu wamidasani kwa simbuli sawo, wayiguma mimoyo yenu chiyangayanga. Ninga wagolosa bila kutumigwa na seye. ²⁵ Chilamula hamwedu, chisagula wanhu wakefu na kuwatuma ukwenu hamwedu na wendigwa Balinaba na Paulo, ²⁶ awene walafile uumi wawo kosoko ye disina dye Mundewa wetu Yesu Kilisito. ²⁷ Kosoko iyo chikumutuma Yuda na Sila ukwenu, awano wakwenda wawatamileni awenyecho agano gochiwandike. ²⁸ Muhe Musunhile naseye chikifumilisa chinghamutwikeni musigo kusuma agano gawagile mugamanye. ²⁹ Munghadiye fyakudiya filafigwe kusisanamu; na kunywa sakame, munghadiye nyama inyongigwe; na muleke dihabwa. Mokuwa mugolose fiswanu munghaleka kugolosa simbuli so. Chikuwalamusani. ³⁰ Wakamale chilagigwa awo awatumigwe, howoluta ulwandi lwa Andiyokiya, kowenange mulundo wa wahuwile, howowengha ibaluwa iyo. ³¹ Wakaisoma iyo ibaluwa, simbuli sakwe hosiwaguma moyo, howokonela lugano. ³² Yuda na Sila awene wowile wagonesi, howosimulila na wandungu wawo kwakuwaguma moyo na kuwasindamika kwa ugele mutali. ³³ Wakamale kwikala uko kwa chigele chiguhi, wandugu wa Andiyokiya howowelaga, wakuwahangingila dihewa, kamei howokuya kuway awawatumile. ³⁴ Ninga Sila hakalamula kusigala. ³⁵ Paulo na Balinaba howosigala uko Andiyokiya kwa ugele muguhi, howofusa na kuhubili imbuli ye Mundewa hamwedu na wanhu wamonga. ³⁶ Gakaloke majuwa mengi, Paulo hoyomugamba Balinaba, Chuye chikawagendele awaya wandugu mu chila kaya kochahubili imbuli ye Mundewa chikakiyonele fowakugendelela. ³⁷ Balinaba hoyohananga wamulonde na Yohana yakwinangwa Mlk o, ³⁸ Ninga Paulo nghendile kumulonda Mlk o, imwene yawalekile akuya Pamfulia na Kulimu kihasa nawo mumilimo yawo. ³⁹ Hoholawanisa muwango mukali mugati yawo, kwa nheifo howokitamanuka. Balinaba hoyomulonda Maluko, howokwila meli kuluta Kuplo. ⁴⁰ Naye Paulo hoyomusagula Sila, awandugu wa baho wakamale kuweka mu udimi wa dihewa dya Mulungu, hoyoleuka. ⁴¹ Mu nhambo iyo hoyolokela Silia na Kilikia yakugemisa makanisa.

¹ Paulo hoyofika Delbe na Lisitila, koyekalage Mkilisito yomonga yakwinaningwa Timoseyo. Ing’ina imwene yawile muKilisito nheifia, hakowa Muyahudi; ninga iBabakwe hakowa Muyunani. ² Timoseo hakowa na itunyo ikulu ku mugati ya wandugu wa Lisitila na Ikonia. ³ Paulo hakahananga Timoseyo yakiyandamile naye munhamo, kosoko iyo hoyomwigala kwikumbi. Hakagosa nheifo kosoko ya Wayahudi wose awekale ulwandi wa ukuya hawamanya fina iBabakwe hakowa Muyunani. ⁴ Ugele fowende wogenda musikaya siya hawawengha wanhu agaya malagiso galafigwe na watumigwa na wasehe akuya Yelusalemu howowagamba wagakole. ⁵ Nheifo, agaya makanisa ahogokongeseka mudihuwi, na ihesabu ya wawahuile hoikongeseka chila ijuwa. ⁶ Howogenda ulwandi lwa Fulugia na Galatiya, Muhe Musunhile hakawalemes kuhubili imbuli iyo mu si isi sa Asia. ⁷ Wakafike kusimhaka sa Musia, howogesa kwingila ku si isi sa Bisinia, ninga Muhe wa Yesu hoyowalemesa. ⁸ Kamei, howolokela Musia howoluta mpaka Tulowa. ⁹ Ichilo chicho, Paulo hoyokona diono, hoyokona munhu yumonga wa Mekedonia kema baho yakumutasa Loka wije Makedonia uchitase. ¹⁰ Chimwande Paulo yakone diono didyo, hochikitayalisha kuluta Makedoni bila kusululuka, chihuwila fina Mulungu kachinanga chiwegalile imbuli swanu. ¹¹ Kulawa Tulowa hochikwila meli mpaka Samatilake, nosiku yakwe hochiguma nanga Neapoli. ¹² Kulawa uko, hochiluta Filipi, kaya ya Wilaya ya kunghonga ya Makedonia, yene nheifia ni utawala wa Chilumi. Hochikwikala mukaya iyo majuwa makefu. ¹³ Dijuwa dye Sabato hochilawa kunje ye kaya hochiluta kunghingi ye lwanda, hachigamba nhegela hanhu ha kufugila. Hochikwikala, hochilonga na wanawake wakitang’anyila baho. ¹⁴ Mugati ya waya wachitegelesage hokowa baho mwanamuke yumonga yakumogoha Mulungu yakwinangwa Ludia, mukaya wa Tiatila yendeyogolosa uchulusi wa suke sa bafuta sa langi ya ndunghundunghu. Mulungu hoyougubula umoyo wakwe hoyogahokela agaya Paulo goyalongange. ¹⁵ Yakabatiswe mudala yuyu hamwedu ne nyumba yakwe, hoyochigoneka yakugamba, “Hona chawelu munyonile fina niye nikumuhuwila Mundewa, kalibuni ukaya ukwangu.” Hoyochidindilisa chilute. ¹⁶ Dijuwa dimonga fochalutage ahanhu ho kufugila, mundele yumonga yowile na dipepo dya kulagula hakatang’anyila nase. Mundele yowapatila wagoli wakwe fesa nyingi kwa kulagula kwakwe. ¹⁷ Kamei, yendeyomwandamila Paulo na seye, yakujoja na kugamba, “Awanhu ni watogomi we Mulungu Mukulu. Wakuwatamilani injila ya uhonyo.” ¹⁸ Hoyogolosa nheifo kwa majuwa mengi, dijuwa dimonga Paulo hakasuha, hoyomubiduchila nakugamba dipepo, Nikukugamba kwa disina dya Yesu Kilisito, mulawe yuno 1 Chiwande dipepo diya hodilawa. ¹⁹ Awagoli wa yuya mundele wakone fina dihuwi dyawo dyokupata sawo dihela, howowakola Paulo na Sila, howowabulumula mpaka kuwanhu, kumwande ya wakulu. ²⁰ Howowasongesa kuwalamusi wakugamba, “Wanhu wano Wayahudi wakwigala fujo mukaya yetu. ²¹ Wakufusa mahokelo agene aseye chi wanhu we Chilumi chikulemesigwa kusihokela kahikusandamila.” ²² Ditewa dya wanhu hodikihasa nawo howowatowa. Awaya watambiki howowadegela cha Paulo si suke sawo, howogamba watowigwe fiboko. ²³ Wakamale kutowigwa lugano, howokwingisigwa kugati, na musilikali wa digelesa hoyotumigwa yaweke hasi ya uwimilisi mukali. ²⁴ Kosoko ya malagiso gago, ayo musilikali howeka kuchumba cha kugati kuchaisi, che digelesa no kuyoha migulu yawo kusingoso. ²⁵ Ninga muchilo mugati Paulo na Sila wende wowomba na kwimba nyimbo sa kumutunya Mulungu. ²⁶ Chimwande, hukulawanisa itetemeko dye isi ikulu, dyasingise imisingi ya digelesa. Chimwande milango yose hoikumuka ne minyolo yawohile awafungwa waya hoikilekela. ²⁷ Musilikali wedigelesa foyenuke yakona imilango yose yamwasi, hoyogamba nhagela awafungwa wose hawowa watijile, kosoko iyo hoyosomola dipanga dyakwe na kuhananga kikoma. ²⁸ Ninga, Paulo hoyokwinanga kwa dijwi ikulu, Unghakikome gomwecho kosoko aseye chose chabahano. ²⁹ Yakamale kumwinanga munhu yegale taa aye msilikali hoyobilimila kugati, hoyokugwa hasi ha migulu ya Paulo na Sila akuno yakutetema kwa chogoho. ³⁰ Kamei hoyowalongosa kunje, hoyowosa, Wakulu nitende nhani noho nihone? ³¹ Awene howomubidula, Muhuwile Mundewa Yesu nagwe ukuhonyigwa na inyumba yako yose. ³² Kamei, howomuhubilia imbuli ye Mundewa imwene hamwedu ne inyumba yakwe. ³³ Ayuya Msilikali hoyowalonda ugele uuya we chilo, hoyowasunha malonda gawo, kamei imwene ne inyumba yakwe howobatisigwa baho ni baho. ³⁴ Hanyuma hoyowalonda Paulo na Sila kunyumba yakwe, hoyowengha chakudiya. Imwene ne inyumba yakwe yose howogolosa shelehe kosoko hambiya hawowa wamuhuwile Mulungu. ³⁵ Nosiku yakwe nosikusiku Mahakimu howowatuma awakulu wa wasilikali awene wakugamba, “Walekeni awanhu waya.” ³⁶ Ayuya musilikali wa digelesa hoyomutamila Paulo; Mahakimu watuma mbuli fina mudoholeligwe. Hambiya mukudaha kulawa na kuleuka kwa digoya. ³⁷ Ninga Paulo hoyomubidula, Hawachitowa fiboko kumwande ya wanhu ugele seye cha wanhu wa selekali ya Chilumi. Kahi hawachiguma kugati hambiya wakuhananga wachilafe kwa chinyele. Hata chidodogi! Ikuwagila weje awene awecho bahano weje wachidoholele. ³⁸ Awaya awakulu wa wasilikali howowatamila amahakimu imbuli iyo, nawo wakahulike fina Paulo na Sila ni wanhu wa Chilumi howokogoha. ³⁹ Kwa nheifo huwoluta kutasa musamaha na wakamale kuwalafa kugati howowatasa waleuke mukaya iya. ⁴⁰ Paulo na Sila howolawa mwigelesa, howoluta kunyumba ya Lidiya, uko howokiyona na wandugu awahuwile na wakafuluse kuwaguma moyo howoleuka.

¹ Kwa kulokela Amufipoli na Apolonia, Paulo na Sila howoluta mpaka Sesalonike kowile na disinagogi dya Wayahudi ² Paulo hoyokihasa nawo fina foyasowele, howolonga nawo sabato ndatu, yakutambula mawandiko gasunhile. ³ Hoyotamila fina haimwagila Masiya kusambasigwa na kwinuligwa kulawa kuwafile. Hoyowagamba, “Yesu imwene wo nikumuhubili ukwenu no Masiya.” ⁴ Wamonga wawo howofumila, howokihasa na Paulo na Sila. Nheifo, itewa ikulu dya Wayunani wamogohe Mulungu hamwedu na wanawake wengi wakulu wene fyeyo howokihasa nawo. ⁵ Ninga aWayahudi howokona wifu; howowaliha wanhu wehile sokoni, howogolosa chitewa na kwigala fujo ikaya yose. Howoingilila nyumba ya Yasoni, wakuhuwila kuwapata umo Paulo na Sila uleke wawalafe kuwanhu. ⁶ Ninga wasawapatile kosoko iyo howowabulumula Yasoni na wandugu wamonga mpaka kuwakulu we ikaya, wakujoja, Awanhu wano wendewobana ichilunga chose na hambiya wowa hano mukaya. ⁷ Yasoni kawakalibisha ukaya ukwakwe wose wakugolosa chinyume cha dilagiso dya Kaisali wakugamba Hati kwina Mundewa yungi yakwinangigwa Yesu ⁸ Kwa simbuli sisi howowaguma chiyangayanga awakulu we ikaya na ditewa dya wanhu. ⁹ Howowatenda Yasoni na wayagwe walafe amana, kamei howowalekela. ¹⁰ Nechilo awandugu howowadindilisa Paulo na Aila walute Beleya. Chimwande wakafike uko, howoluta kwi sinagogi dya Wayahudi. ¹¹ Awanhu wa uko hawowa wategelesaji waswamu kusuma waya wa Tesaloniki. Howoihokela imbuli iya kwa kwenda mufidoga, howokuwa wakulangisa mawandiko masunhile chila ijuwa, uleke wamanye fina agaya gowakulonga Paulo na Sila ni chawelu. ¹² Wengi wawo howohuwila kahi wanawake we Chiyunani wakulu wene fyeyo na wagosi nawo. ¹³ Ninga, Wayahudi wa Tesaloniki wakang’amuwe fina Paulo yendeyohubili imbuli ya Mulungu ako Belea, howoluta ako, howokonga kwigala fujo na kuwasongesa matewa ga wanhu. ¹⁴ Awaya awandugu howomusindikis achimwande mhwani; ninga Sila na Timoseyo howosigala Beleya. ¹⁵ Awaya awandugu awamusindikise Paulo howoluta naye mpaka Asene. Hanyuma, howokuya ne misigililo kuwa kwa Paulo fina Sila na Timoseyo wamwandamile chimwande foikudahika. ¹⁶ Paulo foyawagojage Sila na Timoseo ako Asene, moyo wakwe houchukisigwa yakone ikaya iyo na sanamu sa milungu. ¹⁷ Awanga na Wayahudi na wanhu wamonga wendewomogoha Mulungu mumasinagogi; na chila ijuwa yende yowanga nawo sokoni hamwedu na wose waya awakisololose. ¹⁸ Wamonga awandamilage falisafa ya Epikuwo na Sitoiki howowanga naye. Wamonga howogamba, “Yakuhananga kulonga choni ayuno chilongelonge? Kosoko Paulo yendeyohubili muchanya ya Yesu na kwinuligwa kulawa mudifa, wamonga howogamba Ikonela fina yakuhubili muchanya ya milungu ya chigeni.” ¹⁹ Kwa nheifo howomulonda Paulo, howomwigala Aleopago, howogamba Chikuhananga uchitamile imbuli ino nyisha yowende ulonga. ²⁰ Finhu fimonga fochihulike na singhutwi setu fikoneka kifan figeni ukwetu. Chikuhananga chimanye simbuli sina maloloso gaki. ²¹ Awakaya wa Asene na wamonga wakalage uko wendewolonda ugele wose kwa kitamila na kutegelesa mbuli nyisha nyisha. ²² Kamei Paulo hoyokwima mugatigati ya Aleopago, hoyogamba Wakaya wa Asene! Nikona fina anyeye kwa fyu fyuse, ni wanhu wa dini lugano. ²³ Kosoko mukugendagenda kwangu nilanga si sinamu sa sinhambiko senu nifika masabahu iwandikigwe kwa Mulungu inghamanyike Hambiya, ayo yomukutambichila bila kumumanya, ukwenu. ²⁴ Mulungu yombile iisi na fyose fyuwile umo ni Mundewa wa Ulanga na iisi. Imwene nghakwikala musinyumba sijengigwe na wanhu. ²⁵ Kahi ghakutogomeligwa kwa mikono ya wanhu, kifana yakuhananga chochose chiya, kosoko imwene noyakuwengha wanhu uumi, yakuwadahisa kukeha na kuwengha chila chinhu. ²⁶ Kulawa kwa munhu yumwedu, komba mataifa gose na kugadahisa kwikala muisi yose. Yalamula na kupanga katali lugano milaki na hoki mataifa gago gekale. ²⁷ Hakagolosa nheifo uleke amataifa gago gamuhanange, hata fina kwa kwalabata kwalabata, uleke wamufikile. Hata nheifo Mulungu nghe hatali nase; ²⁸ fina foyalongile munhu yumonga Mugati yakwe aseye chikala womi. Fina yumonga wenu yakutunga mashaili, foyalongile, kosoko Ase chose cha cheleko chakwe ²⁹ Honanga seye chi wana wa Mulungu isichagile kugamba Mulungu kakifana sahabu ama fesa ama iwe, finhu fisongoligwe kwa ufundi we mwanadamu. ³⁰ Ugele uya wa ubwalasi Mulungu hakakitenda kifana nghakugona; ninga hambiya yakuwalagisa wanhu wose wa chila hanhu walambe. ³¹ Kosoko kekala ijuwa doyakayowaliganisa wanhu we chilunga chose kwa chawelu, kwa imunhu yuya woyamusagule; naye kawengha wanhu wose dihuwi dye imbuli iyo kwa kumwinula kuwa kuwafile. ³² Baho, wakahulike muchanhya ya wanhu kuinuligwa kulawa kuwafile, wamonga howokwigala utani; wamonga howogamba, “Chokuhulika ku imbuli iyo.” ³³ Kamei nheifi, Paulo hoyoleuka hoyowaleka. ³⁴ Wamonga howokiyandamila naye, howohuwila mu wawo, hakowa umo Dionesio, Mwaleopago, na mwanamuke yumonga disina dyakwe Damali, na wanhu wengi hamwedu nawawo.

¹ Ago gakahole, Paulo hoyoleuka Asene, hoyoluta Kolindo. ² Ako Kolindo hoyomufika Muyahudi yumonga yekwinangwa Akula hamwedu na muke yekwinangwa Plisila, hawo wowile kulawa Stalia majuwa gago kosoko Kaisali Kilaudio hokowa yagambile Wayahudi wose waleuke Loma. Paulo hakaluta kuwona, ³ na kosoko awene wowile mafundi wakusoma mahema fina imwene. ⁴ Chila Sabato hakalongaga nawo mwisinagogi, na kugesa kuwakwega Wayahudi na Wayunani. ⁵ Wakeje Sila na Timoseyo kulawa Mekodoniya, Paulo hoyohananga kutumia ugele wakwe wose kuhubili, hoyowatamila chawelu fina Yesu no Masiya. ⁶ Wakakonge kuwanga naye na kukonga kumuliga, hoyolonda dikoti dyakwe hoyokonga kudikung’unha kumwande yawo yakugamba, “Munghagilila ni kosoko yenu muwecho; aniye nechaka uwihi wowose muchanhya ye imbuli ino. Kulawa hambiya nikuwalutila wanhu wa mataifa gengi.” ⁷ Kamei, hoyoleuka aho hoyuluta kwikala na munhu yumonga yakumogoha Mulungu yekwinangigwa Tito Yusito. Inyumba ya Tito hayuwa habehi na disinagogi diya. ⁸ Ninga, Kilisipo imukulu we disinagogi, hoyomwihuwila Mundewa imwene na wanhu wakwe wose. ⁹ Dijuwa dimonga nechilo Mundewa hoyomugamba Paulo mumagubulo, Unghogohe, gendelela kuhubili du bila kufa moyo, ¹⁰ kosoko niye nahamwedu nagwe. Hachaka munhu yakwenda yagese kukutowa kahikukubulage kosoko hano mukaya hena wanhu wengi wuwile ulwandi ulwangu. ¹¹ Kamei, Paulo hoyokwikala uko yakufusa imbuli ya Mulungu mugati yawo kwa mwaka umwedu na nusu. ¹² Ninga Galiyo yakowe mukulu wa Wilaya ya Akaya, Wayahudi howokihasa hamwedu howomukola Paulo kwa ludole na kumwigala kumahakama. ¹³ Howogamba, “Chimusongese munhu yuno, kosoko yakusongesa wanhu wamufuge Mulungu kwa namuna ikupingana na malagiso.” ¹⁴ Ugele Paulo nghenati yakonge kulonga, Galiyo hoyowatamila Wayahudi, Hulikiseni anye Wayahudi Hona imbuli ino chawelu yowile muchanhya ya ubanaji ama uwihi hanuwa tayali kuwahulikisani. ¹⁵ Ninga wonaga ni kuwanga du muchanhya ya masina na malagiso genu mulamule anyeye muwecho. Aniye sikuhananga kuwa mulamusi wa simbuli sino! ¹⁶ Hoyowawinga kulawa kumahakama. ¹⁷ Nawo wose howomukola Sositene yowile chilongosi we disinagogi howomutowa baho hamahakama. Ninga Galiyo nghonile imbuli iyo kuwa chinhu, hata chidodogi. ¹⁸ Paulo hogendelela kwichila ako Kolindo na wandugu waya kwa majuwa mengi. Hanyuma, hoyochilaga, hoyakwila meli kuluta Silia hamwedu na Plisila na Akula. Ako Kenkileya, hoyogeta sinjwili sakwe kosoko ye chilaho yoyekile. ¹⁹ Howofika Efeso na baho Paulo hoyowaleka Pilisila na Akila, hoyoluta kwi sinagogi, howanga na Wayahudi. ²⁰ Howomutasa yekale nawo ugele mutali lugano, lakini nghendile. ²¹ Nanga, foyaleukage, hoyogamba, “Mulungu yanghenda hokwija ukwenu kahi.” Hoyoleuka Efeso kwa meli. ²² Meli hoiguma nanga, Kaisalia naye Paulo huyoluta Yelusalemu kudilamusa dikanisa, hanyuma hoyoluta Andiyokiya. ²³ Hoyokwikala uko ugele muguhi kamei hoyogendelela na inhambo ya kwa kulokela ulwandi lwa Galatiya na Fulugiya yakuma moyo awefusa wose. ²⁴ Muyahudi yumonga iyakwinangwa Apolo, yelekeligwe Alekisandilia, hoyofika Efeso. Hakowa munhu yena udaha wa kulonga na yena umanyi mwingi wa maandiko Gasunhile. ²⁵ Hakowa yafusigwe injila iyo ya Mundewa, na hoyokuwa na motomoto, hoyosimulila muchanhya ya simbuli sa Yesu. Hoyofusa kwa chawelu hata ingawa yapatile ubatiso wa Yohana du. ²⁶ Plisila na Akila wakamuhulike yakulonga kwa chawelu kugati ya disinagogi, howomulonda ukwawo howomufusa iyo injila ya Mulungu fiswanu lugano. ²⁷ Apolo yakalamule kuluta Akaya, awaya wandugu howomuguma moyo kwa kuwawandichila awefusa wa Akaya wamuhokele. Yakafike uko hoyodaha kwa udaha wa dihewa dya Mulungu, kuwatasa lugano awaya awandugu awahuwile; ²⁸ kosoko hakagendelela kwa udaha wakwe kuwasuma Wayahudi kumwande ya wanhu fina chawelu kwa Mawandiko Masunhile fina Yesu ni Masiya.

¹ Ugele Apolo foyowile Kolindo, Paulo yakaloke si isi sa kuchanhya, hoyofika Efeso na uko hoyowafika wefusa wengi. ² Hoyokusa, Togoleni, fomwahuwile hamuhokela Muhe Musunhile? Ng’o, hata kuhulika fina kwina Muhe Musunhile chisinati chihulike. ³ Naye hoyogamba, “Hambiya hamupata ubatiso wa namuna yaki? Howobidula Ubatiso wa Yohana.” ⁴ Naye Paulo hoyogamba, “Ubatiso wa Yohana hauwa wakonesa fina wanhu walambe. Yohana hakawagamba wanhu wamuhuwile ayuya imwene yakwija kunyuma yakwe, nong’amba Yesu.” ⁵ Wakahulike gago, howobatisigwa kwa disina dye Mundewa Yesu. ⁶ Kamei, Paulo hoyowekila mikono, Muhe Musunhile hoyowahumulukila, howokonga kulonga kwa nonga sa hayo hayo na kulafa ugonesi. ⁷ Wose hamwedu hawafika wanhu ikumi na weli. ⁸ Kwa ugele wa minyesi midatu Paulo yendeyoluta ku disinagoti hoyokuwa na ugele wa kulonga hamwedu nawo na kuwakwega muchanhya ya utawala wa Mulungu. ⁹ Ninga wamonga howokuwa wafudutu, howolema kuhuwila, howokonga kulonga fibi muchanhya ye injila ye Mundewa. Baho Paulo hoyokileka nawo, hoyowalonda hanghanda awaya awefusa wakwe, howosimulila nawo chila ijuwa munijuma dya masomo dya Tulano. ¹⁰ Hoyogendelela kugolosa nheifo kwa minyaka mili, wose wakwila Asia, Wayahudi na wanhu wa Mataifa gengi howodaha kuhulika imbuli ye Mundewa. ¹¹ Mulungu hoyogolosa majumo ga kisina kwa mukono wa Paulo. ¹² Wanhu wendewolonda ifitambala na sisuke simonga isene se milimo soyatumiye Paulo, howosigala kuwatamu, nawo howohonywa sinamu sawo; na waya wowile na simhepo sihile, howolawigwa na simhepo siso. ¹³ Wayahudi wengi wende wolafa simhepo sihile, howaluta ako nako wakugosa kuditumia disina dye Mundewa Yesu ku waya wengiligwa na si mhepo sihile. Wendewogamba Nikulonga kwa disina dya Yesu imwene woyahubili Paulo. ¹⁴ Wana mufungate wa Sekewe, kuhani Mukulu wa Chiyahudi, hawa mu wawo wagolosage nheifo. ¹⁵ Ninga dipepo dihile hodiwabidula, Nimumanya Yesu, nimumanya naye Paulo, ninga anye mwa cha nani? ¹⁶ Kamei ayuya munhu yowile na dipepo hoyowafumhila kwa ching’undi, hoyowashinda uludole. Na wawo awana wa Sikewe howotija kulawa munyumba iya wemwasi na wena malonda. ¹⁷ Kila munhu ako Efeso, Muyahudi na asiye Muyahudi, hoyohulika muchanhya ye ichituko chicho. Wose howokwingiligwa na itiso, howoditunya disina dya disina dya Bwana Yesu. ¹⁸ Wahuwile wengi howokisololosa kumwande ya wanhu na kulamba sinhenda sowatendile. ¹⁹ Wamonga howowa wakutumikia simbuli sa uhayi uko kunghonga, howokonghola ifitabu fyawo, howofisoma kumwande ya wanhu wose. Howoliganisa ibei ye fitabu fifyo, howokona ikudaha kuwa figulu fishano. ²⁰ Kwa nheifo, imbuli ye Mundewa hoikongeseka na kuwa udaha lugano. ²¹ Simbuliso, sikahele, Paulo hoyolamula kuluta Yelusalemu kwa kulokela Makedonia na Akaya. Hoyogamba, “Ninghamala kufika uko kunyagila nifike na Lumi nheifiya.” ²² Kwa nheifo hoyowatuma weli wa watasi wakwe, Timoseyo na Elasito, wamulongolele kuluta Makedoniya naye hoyosigala kwa chipisi chidodogi ako Asiya. ²³ Ugele wuwo noho kwalawanise mugogolo mukulu ago Efeso kosoko ya iyo injila ye Mundewa. ²⁴ Hakuwa na munhu yakugolosa fesa, disina dyakwe Demetelio, hakowa na milimo ya kugolosa sanamu sa nyumba ya Mulungu wa chike yakwinangwa Alitemi. Umulimo uwo wende umwigalila Demetilio na wanhu wakwe we milimo faida nghulu. ²⁵ Demetilio hoyowakonghola awo awakugosa milimo u kwakwe, hamweu na wamonga wowile ne milimo fina iyo, hoyowagamba, “Wakaya mumanya fina isawo yetu ikulawa mu uchulusi uno. ²⁶ Hambiya, mukudaha kuhulika na kona anyeye muwecho simbuli soyakugolosa Paulo, si hano du Efeso ninga na kose Asia Imwene kawashawishi na kuwabidula wanhu wafumile fina milungu iya iigolosigwe na wanhu si milungu hata chidodogi. ²⁷ Kwa nheifo kuna hatali ibiyashala yetu ikwende yuwe na isina dihile. Si nheifo du ila imbuli yo ikudaha kuigolosa imyumba ya Alitemi kuwa si chinhu cha itunyo. Kundumo yakwe ayo imwene ditunyo dyakwe dyenela mu Asia ne chilunga chose chikumutambichila dikuhela.” ²⁸ Wakahulike gago, howokola nyono, howokonga kujoja: Mukulu ni Alitemi wa Efeso! ²⁹ Ikaya yose hoimema mugogolo. Howomulonda Gayo na Alistaliko mukaya wa Makedonia, awowile wasafili wayagwe na Paulo, howotija nawo mpaka kunyuma ye miseigo. ³⁰ Paulo imwecho hoyohananga kiingisa muditewa diya, ninga awaya awahuwile howomulemesa. ³¹ Wamonga wa wakulu Asia, awowile wambuya sakwe howotuma wanhu ukwakwe wamutase fina yanghakiingise kuchiwanja che miseigo. ³² Ugele uwo chila munhu yendeyolonga sakwe, ayu yakulonga nhafi, ayu yakulonga nhafi, umulunfo uya houfulugika, hata wanhu wengi wasamanyile hata isoko yo kitang’anjila kwawo. ³³ Kosoko Awayahudi hawamutenda Alekisanda yachilafanise, wamonga wa wanhu mumulundo uya hawamanya no mwene. Kamei Alekisanda hoyowenulila mukono uleke yakitetee kumwande ya wanhu waya awengi. ³⁴ Ninga wakatange fina imwene ni Muyahudi, wose kwa hamwedu howojoja, “Mukulu ni Alitemi wa Efeso!” Howogendelela kujoja nheifo kwa masaa meli. ³⁵ Hanyuma yakwe kalani we ikaya hoyowanyamasa, hoyowagamba, “Wakaya wa Efeso,” chila munhu kamanya fina ikaya ino ya Efeso ni mwimilise we nyumba ya mulungu Alitemi na mwimilisi wa iya isanamu yalagale kulawa kulanga. ³⁶ Hachaka yakudaha kukana simbuli sino. Kosoko iyo, mutulie. Munghagolose chochose kwa chimwandemwande. ³⁷ Muwenanga awanhu wano ahano wasitofule inyumba ya mulungu kahikumuliga mulungu wetu we chike. ³⁸ Honaga Demetilio na awanhu wakugolosa milimo ukwakwe wena mashitaka gawo ku wanhu wano, sabaho si mahakama na wakulu we iisi; wakishitake uko. ³⁹ Hona mwina mbuli singi sigaleni ku fikalo fye halali. ⁴⁰ Kosoko chikudaha kushitakigwa kosoko ya mugogolo uno wa diyelo, uwene usina sababu, mu mbuli ino chisikudaha kulonga mbuli ikwigutisa ⁴¹ Yakamale kulonga siso hoyofunga mulundo.

¹ Umugogolo uya wa Efeso ukatuliye, Paulo hoyowenanga hamwedu awaya wahuwile, hoyowaguma moyo. Kamei hoyowelaga, hoyotamba kuluta Makedonia. ² Hoyolokela mu lwandi lwa isi siya yakuwaguma moyo kwa mbuli nyingi. Hanyuma hoyofika Uyunani. ³ Koyekale kwa minyesi midatu. Foyendeyokitayalisha kuluta Silia, hoyomabya fina Wayahudi wende womupangila mbuli ihile; kosoko iyo hoyokuya kwakulokela Makedonia. ⁴ Sopatilo mwana wa Pilo kulawa Beleya, hoyokiyandamila naye, na Alistaliko na Sekundo kulawa Sesalonike, Gayo kulawa Delbe, Timoseyo, Tukiko na Tulofomo wa isi ya Asia. ⁵ Awo howolongola na kuchigojela ukuya Tulowa. ⁶ Aseye, dikahele dijuwa dye dikukuu ye mikate isigumigwe nungo, nochipanda meli kulawa Filipi gakaloke majuwa madatu hachiwawafichila akuya Tulowa. Ako hochikwikala chipisi cha ijuma dimwedu. ⁷ Mwijuwa dye nghonga dye dijuma, hochikitang’anyila kukumega mukate. Kosoko Paulo yendeyohananga yaleuke nhosiku yakwe, hoyolonga na wanhu, hoyogendelela kusimulila mpaka muchilo mugati. ⁸ Muchumba mochowile, mwigolofa, hamuwa na taa nyingi sikwaka. ⁹ Mwanike yumonga yekwinangwa Eutiko hekekala hedilisha ugele Paulo foyagendelelelage kulonga, Eutiko hoyokonga kusisila chidochido hanyuma sonhongo hosimukola, hoyukugwa hasi kulawa mwi golofa dya kadatu. Howomudondola kafulusa kufa. ¹⁰ Ninga Paulo hoyohulumuka hasi, hoyofunamana, hoyomusungulusila imikono yakwe ayuya imwanike yafile, hoyogamba, “Munghowe na manhonghe kosoko kwina uwumi ukali kugati yakwe.” ¹¹ Kamei, hoyokwila kahi kugolofa, hoyomega mukate, hoyodiya. Hoyogendelela kuhubili kwa muda mutali mpaka nhosikusiku, kamei hoyoleuka. ¹² Awaya wanhu howomulonda mwanike yuya ukaya ni mumi kabisa, howopata falaja nghulu. ¹³ Aseye hochikwila meli, hochilongola kuluta Aso, kochamanyile chomulonda Paulo. Nofyo yapangile, kosoko hakahona kufika uko kwa kulokela kuisi kwa migulu. ¹⁴ Kamei, hoyochifika uko Aso, hochimukwisa mumeli, hochiluta Mitilene. ¹⁵ Hochileuka ne meli kulawa uko, dijuwa dya keli yakwe hochifika Kio. Dijuwa dya keli yakwe hochikwima Samo, na nhosiku yakwe hochifika Mileto. ¹⁶ Paulo hakahananga kugendelela ne inhambo kwa meli bila kulokela Efeso, uleke yanghachelewe ako Asia. Hakuwa na chimwande cha kufika Yelusalemu ku sikukuu ye Pendekosite inghadahika. ¹⁷ Kulawa Mileto Paulo hoyotuma mbuli kuwasehe wa Efeso wakitang’anyila naye. ¹⁸ Wakafike ukwakwe hoyowagamba, “Mumanya fina nitumiye ugele wose hamwedu naye kulawa dijuwa diya dye kunghonga dyo nengile Asia. ¹⁹ Mumanya fyene fyonimutogomele Mulungu kwa unyekefu wose, kwa masosi ne makugutu ganipatile kulawa mu mipango na si hila sa Wayahudi. ²⁰ Mumanya fina sogohe hata chidodogi kuwahubilia kumwande ya wanhu wose na musinyuma senu na kuwafusa chochose ichene chikudaha kuwataseni. ²¹ Niwasugula wose Wayahudi, nheifo na wanhu wa wamembe gengi, wamubidukile Mulungu na kumuhuwila Mundewa wetu Yesu. ²² “Hambiya, hulikiseni! Aniye kosoko nikumuhulika Muhe, nikuluta Yelusalemu bila kumanya aganipata uko. ²³ Chonimanyile du nifina Muhe Musunile yakunitamila chawelu mu chila kaya fina fifungo na magayo fikunigojela. ²⁴ Ninga, sikona fina uwumi wangu ni chinhu lugano ukwangu muladi nimemelese kutumigwa kwangu na kumala umulimo uya woyaninghile Mundewa niugolose, wokuhubili imbuli swanu ye dihewa dya Mulungu. ²⁵ “Nendenigenda ako nako muchiligati yenu nikuhubili utawala wa Mulungu. Hambiya, ninga, hachaka hata yumwedu wenu yakwenda yanyone kahi. ²⁶ Kwa nheifo diyelo dino nikumutamilani chawelu chawelu, fina inghowa yumwedu wenu yanghagilila, aniye sina wihi wowose kusakame ye munhu yuyo. ²⁷ Kosoko sogohe hata chidodogi kuwatangasila Mulungu foyalongile. ²⁸ “Muchilangilile muwecho; mudidime ditewa diya idyene Muhe Musunhile hamwikani anyeye mudimise. Didimeni dikanisa dya Mulungu adyene dyoyakipatile kwa sakame ye Mwanagwe. ²⁹ Nimanya fiswanu lugano fina aniye fonikuleuka, mausi makali gamwingilani na wachaka ubasi kuditewa didyo. ³⁰ Hata kulawa mugati yenu wakwenda walawanise wanhu awene wakwenda walonge mbuli sa udasi na maganisa wanhu na kuwagolosa wawandamile awene du. ³¹ Kosoko iyo, muwe meso, mukugelegela kwa minyaka midatu, chilo nemisi, sisokile kumufusani chila yumwedu wenu. ³² “Hambiya nikumulekani mu mikono ya Mulungu ne imbuli ye dihewa dyakwe. Kenawo udaha wokuwajenga nyeye na kuwadahisa musipate asiya simboto soyawekile wanhu wakwe. ³³ Aniye sitamani fesa, kahisahabu, kahisuke sa munhu. ³⁴ Anye muwecho mumanye fina imikono yangu ino itumika ku mahitaji gangu na gawaya wowile hamwedu na niye. ³⁵ Kwa njila sose niwonesani fina kwa kugolosa imilimo nheifino yawagila kuwasa wechaka ludole, na kugelegela simbuli se Mundewa Yesu imwecho: ‘Ibeka kulafa, kwina chinyemi kusuma kuhokela!’” ³⁶ Yakamale kulong nheifo, Paulo hoyofugama hamwedu nawo wose, hoyowomba. ³⁷ Wose wendewolila: Howomusungulusila mikono yawo howomwilaga kwa kumunonela howomukumbatila. ³⁸ Imbuli yawenghile usungu lugano hayuwa yoyalongile fina wasikwenda wamone kahi. Kamei, howomusindikisa mpaka kumeli.

¹ Chikamale kilaga nawo, hochikwila meli hochiluta bila kwingila hamonga mpaka kosi; Nhosiku yakwe hochifika Lodo na kulawa uko hochiluta Patala. ² Uko hochifika meli ikuluta Foinike, nheifo hochikwila, hochisafili. ³ Chakafike ahanhu ahene chikudaha kuyona Kuplo, hochogendela ulwandi lwakwe lwa kwekulu hochiluta Silia. Hochiguma nanga mukaya ya Tilo ahene imeli iya hayuwa ihulumisigwe misigo yakwe. ⁴ Hochikitang’anyila na wahuwile uko, hochikwikala hamwedu nawo kwa ijuma dimwedu. Awahuwile wawo wakulonga kwa udaha wa Muhe, howomugamba Paulo unghalute Yelusalemu. ⁵ Ninga, ugele wetu ukahele hochileuka, chose hamwedu na wanawake na wana wawo, howochisindikisa mpaka kunje ye ikaya. Chikafike mhwani chose hochifugama chochiwomba. ⁶ Kamei, hochichilaga; aseye hochikwila meli; awene nawo howokuya ukwawo. ⁷ Aseye hochigendelela ne nhambo yetu kulawa Tilo hochifika Tolemai, ahene hochawalamuse awandugu setu, hochikwikala nawo ijuwa dimwedu. ⁸ Nhosiku yakwe hochileuka hochiluta Kaisalia. Ako Kaisalia hochiluta ukaya kwa muhubili Filipo. Aye hakowa yumwedu wa waya mufungate wasaguligwe Yelusalemu. ⁹ Hakowa na wana wadatu, we chike, awene wowowile ne chinghwa che ugonesi. ¹⁰ Chikekale uko majuwa mengi, mugonesi yumonga yekwinangwa Agabo, hoyofika kulawa Uyahudi. ¹¹ Hoyochijila hoyolonda mukanda ya Paulo hoyokiyoha mumikono na mumigulu, hoyogamba, “Muhe Musunhile yakugamba nhafi: ‘Awayahudi kuya Yelusalemu wakamoha fina nheifino imunhu mwenye mukanda uno na kumulaguma mumikono ya wanhu wamembe!’” ¹² Chikahulike nheifo aseye na waya wamonga wowile baho hochimukongelesa Paulo yanghalute Yelusalemu. ¹³ Ninga imwene hoyobidula, Mukuhanga kutenda nhani? Natayali si kugumigwa kugati du akuya Yelusalemu, ninga hata kufa kosoko ye Mundewa Yesu. ¹⁴ Chikalemeligwe kumukongelesa hochinyamala na kugamba du, Foyakwenda Mulungu figoloseke. ¹⁵ Chikekale bahaya kwa ugele muguhi, hochikoha misigo yetu hochigendelela ne nhambo kuluta Yelusalemu. ¹⁶ Wamonga mugati ya waya wefusa wa Kaisalia hochilutanya, howochigala kunyumba ya Mnasoni mukaya wa Kupulo na hakowa mwifusa kwa majuwa mengi. ¹⁷ Chikafike Yelusalemu, wandugu wahuwile hawachihokela fiswanu lugano. ¹⁸ Nosiku yakwe Paulo hachilutanya kumulamusa Yakobo, na wasehe wose wa dikanisa hawowa uko nheifia. ¹⁹ Yakamale kulamusa Paulo hoyowatamila chikamilifu simbuli Mulungu so soyagolose muchiligati ya wamembe kwa njila ya utumishi wakwe. ²⁰ Wakahulike gago howomutunya Mulungu. Kamei, howomutamila Paulo ukudaha kona fina hambiya kwina figulu fingi fya Wayahudi awene hambiya wahuwile na wose wawo wakola fiswanu malagiso ga Musa. ²¹ Wahulika simbuli sako fina ukuwafusa Wayahudi wakwikala na wamembe gengi fina wanghawegale kwikumbi wana wawo kahiwanghandamile mila sa Wayahudi. ²² Hambiya, yokuwa nhani? Hachaka chifiso wakuhulika fina kufulusa kufika hano. ²³ Hambiya, ugolose fochikukutamila. Chenawo hano wanhu wane awene wekile chilaho. ²⁴ Kihase nawo mu nhambiko yo kitakasa, ukalihe na diyombe dikuhanangigwa, kamei wagetigwe si njwili sawo. Kwa nheifo wanhu wose wakwenda wamanye fina simbuli siya sowatamiligwe muchanhya yako sachaka musingi wowose, na fina agweye gomwecho ukuishi na kwandamila shelia na malagiso ga Musa. ²⁵ Ku awa awanhu wa wamembe gengi awejile awahuwile, chifulusa kuwegalila baluwa chikuwatamila simbuli sochilamule: Wanghadiye chochose chitambikiligwe milungu ya udasi, wanghanywe sakame, wanghadiye nyama ya inyama inyongigwe na waleke dihabwa. ²⁶ Kamei, nhosiku yakwe Paulo hoyowalonda waya wanhu hoyogolosa nhambiko hamwedu nawo, kamei hoyokwingila kwi Hekalu hoyolonga muchanya yo kumala majuwa go kitakasa na sabihu ikuhanangigwa ilafigwe kwa chila yumwedu wawo. ²⁷ Ugele amajuwa go mufungate gokowe habehi kuhela, Wayahudi walawile ku isi ya Asia hawamwona Paulo mwihekalu. Howosongesa nyono muditewa dyose dya wanhu, howomukola, ²⁸ howojoja Wakaya wa Isilaeli, taseni, taseni! Ayuno noyuya munhu yakufusa wanhu chila hanhu simbuli sikupinga wanhu wa Isilaelii, sikupinga malagiso ga Musa na ahanhu hano hasunhile. Hata hambiya kawengisa wanhu wa wamembe gengi Mwihekalu na kahaguma uchafu ahanhu hano hasunhile. ²⁹ Isoko yakulonga nheifo ni kosoko hawamona Tulofimo mukaya wa Efeso hamwedu na Paulo mukaya, howogambe nhegela Paulo hakamwigisa mwihekalu. ³⁰ Ikaya yose hoyikwenela mugogolo, wanhu howokwija kulawa chila ulwandi lwe ikaya, howomukola Paulo, howomubulumula howomulafa kunje ye dihekalu, baho ni baho imilango ya Dihekalu hoyihindigwa. ³¹ Howowa tayali kumukoma, ninga simbuli so hosimufichila imukulu wa dijeshi we Loma fina Yelusalemu yose imema mugogolo. ³² Chimwande imukulu wa jeshi hoyowalonda wasilikali na cholongosi wa wasilikali igana, hoyodifikila diya ditewa dya wanhu. Nawo wakone ukulu wa dijeshi na wasilikali, howoleka kumutowa Paulo. ³³ Imukulu wa dijeshi hoyomulutila Paulo na kumukola na kulagisa yohigwe minyolo mili. Kamei hoyokusa, Ni munhu waki yuno, na katenda choni? ³⁴ Wamonga mwitewa diya wende walabwata chinhu chino na wamonga chinhu chingi. Kosoko ye mugogolo uwo, hoyodaha kumanya ichotoko checho. Nheifo hoyowatuma wanhu wakwe wamwigale Paulo kugati ye ngome. ³⁵ Paulo yakafike mungasi, wasilikali haiwagela kumwinula kosoko yo umugogolo wa wanhu. ³⁶ Kosoko itewa ikulu dya wendewokwandamila wakujoja Mukomeni, yakaleuke! ³⁷ Ugele fowendewomwingisa mungome, Paulo hoyomutasa imukulu wa dijeshi yakugamba, “Nikudaha kukutamila chinhu? Ayuya imukulu wa dijeshi hoyomusa Kudaha Chiyunani? ³⁸ Agweye si yuya Mumisi imwene majusi hano hakegala kasi na kuwalongosa wakomaji figulu fine mpaka kunyika? ³⁹ Paulo hoyobidula, Aniye na Muyahudi; nelekeligwa Talso ku isi ya Kilikia, anie na laia wa kaya ikuheshimiwa. Dede, nileke nilonge na wanhu. ⁴⁰ Ayuya imukulu wa dijeshi hoyomuleka yalonge, kwa nheifo Paulo hoyokwima mu ngasi, hoyowenulila mikono awaya awanhu wakanyamale posi, hoyokonga kulonga nawo kwa Chiebulaniya.

¹ “Wandugusangu na waBabasangu, munitegelese fonikilongela kumwande yenu.” ² Wakahulike yakulonga nawo kwa Chiebulaniya hawagendelela kunyamala posi kusuma kunghonga. Kamei hakawagamba; ³ Aniye na Muyahudi, nyelekigwa Talso akuya Kilikiya, ninga nikulila mukaya iyino na kufusigwa ne Mufusa Gamaliyeli honifusigwa na kumanya lugano amalagiso ga waBabasetu, na chilafa lugano kwe Mulungu fina nyeye mose diyelo. ⁴ Honiwedasa kahi kuwakoma awaya awandamilage Injila ino, na kuwoha na kuwegala kumagelesa wagosi na wanawake. ⁵ Ifene fowakuhomelela makuhani na dibalasa dyose dya wasehe. Kulawa ukwawo honikwinghigwa ibaluwa kuwandugu waya honiluta mpaka Damesiki kuwalonda awaya awowile uko mpaka Yelusalemu wohigwe, uleke waliganiswe. ⁶ “Honikonga inhambo yangu, nikasegele habehi na Damesiki, saa ya mutandatu nehemisi, honikona ujelu mukulu lugano kulawa kulanga unisunguluta kosekose. ⁷ Honikugwa hasi, honihulika ijwi dikugamba, ‘Sauli, Sauli, nhani ukunyidasa? ’ ⁸ Honibidula, ‘Gwegwe nani Mundewa?’ Hoyonigamba, ‘Aniye no ni Yesu wa Nasaleti, woukwidasa.’ ⁹ Hambiya awaya awowile hamwedu naniye, hawawona ujelu du ninga dijwi diya wasadihulike dya yuya yalongage naniye. ¹⁰ Hoyogamba, ‘Nitende nhani Mundewa?’ iMundewa hoyonigamba, ‘Inuka ulute Damesiki na uko ukweda utamiligwe gose agekigwe kosoko yako ugagolose.’ ¹¹ Nikowe sikudaha kona kosoko ya ukali wa ujelu uya wonyonile, honilongosigwa kwa kukoligwa mukono na waya awowile hamwedu naniye hochikwingila Damesiki. ¹² Uko hakuwa na munhu yakwinangigwa Ananiya, munhu yakumogoha Mulungu, yakwandamila malagiso getu, imwene yuyo hakowa munhu muswanu hakendigwa naWayahudi wose awekale uko, ¹³ hoyonijila hoyokwima habehi na niye, hoyonigamba, ‘Mundugusangu Sauli, hokela kona kwako na disaa didyo ameso gangu hogogubuka honikona.’ ¹⁴ “Hoyogamba, ‘I Mulungu wa waBaba setu kakusagula agweye umanye inyenda yakwe, kumwona imutogomi wakwe yaliganile na kumuhulika imwene imwenecho yakulonga kwa mulomo wakwe; ¹⁵ kosoko ukuwa muhomelesi wakwe kuwanhu wose muchanhya ya gowonile na go uhulike. ¹⁶ Hambiya ukugoja choni? Inuka ubatisigwe, usunhwe uwihi wako kwa kwinanga disina dyakwe.’” ¹⁷ “Nikoye Yelusalemu ugele nikutasa mwihekalu, hanyona majumo, honimona yakulonga naniye, ¹⁸ Golosa chimwande uleuke Yelusalemu, kosoko wasikwenda wakuhulike uhomelesi wako muchanhya yangu. ¹⁹ Kamei hanigamba, ‘Mundewa, awene awenecho wamanya fina chila isinagogi haniwoha na kuwaguma mwigelesa awaya awakuhuwile, ²⁰ na ugele isakame ya Sitefano imuhomelesi wako foyalafigwe, ani nayi hanyuwa nyimile baho, nikufumila, inghomigwa yakwe, na kulekeligwa sisuke sa waya wamukomage.’ ²¹ “Hoyonigamba, ‘Leuka; kosoko nikukwigala kutali ku wamembe.’” ²² Kulawa kunghonga mpaka imbuli ino hawamutegelesa; kamei howekwinula amajwi gawo na kugamba, “Muleuse muchilunga! Kosoko nghagile kuwa mumi!” ²³ Hawagendelele kujoja na kwinula sisuke na kutimula diluli muchanhya, ²⁴ imukulu wa wasilikali wose hakalagisa wamukole Paulo wamwigale kwikigo kugati na kumujola mikotya uleke wamanye isoko iikuleka awanhu wakumujojoweka nheifo. ²⁵ Ninga hawamoha ne mikowa ye singhingo, Paulo hoyolonga na mukulu we chitewa cha wasilikali igana dimwedu iyemila habehi naye, “Togola ikudahika kumujola imunhu iMulumi ugele nghenati yaliganiswe?” ²⁶ Ugele ayuya imukulu we ichitewa cha wasilikali wose, hoyomugamba, “Mukuhananga mugolose choni? Kosoko imunhu yuno ni Mulumi.” ²⁷ Kosoko iyo imukulu wa wasilikali wose, hakeja na kumusa, “Nitamile agwe kwa Mulumi?” Hakagamba, “Heye.” ²⁸ Imukulu wa wasilikali wose hakabidula, “Aniye nigula Ulumi kwa mapesa mengi.” Paulo hakagamba, “Aniye nyelekigwa Mulumi,” ²⁹ Kosoko iyo awaya awanhu awahanangage wamusilise hawatimuka wose chimwandemwande; ayuya imukulu wa wasilikali wose naye hakogoha, kosoko hakatanga fina iPaulo hakowa Mulumi naye fina hakamoha. ³⁰ Ninga ikowe nhosikusiku uleke yamanye ichalekile Wayahudi wamusongesa, hakamudohola, na kulagisa makuhani wakulu na dibalasa dyose wakitanganyile, hoyomwigala Paulo, hoyomwika kumwande yawo.

¹ Paulo hoyowang’olela meso awaya awadibalasa, kamei hoyokonga kulonga, “Mpaka diyelo nafi nigendelela kwikala na moyo muswamu kumwande ye Mulungu.” ² Baho iMutambiki mukulu Anania hoyowalonga awaya awemile habehi na Paulo wamutowe kofi mumulomo. ³ Kamei Paulo hoyomugamba, “Mulungu imwecho yakwenda yakutowe kofi agweye goufanile lukasi lubakigwe swakaya! Ukudahani kwikala baho uniliganise chishelia na gweye gomwecho ubana ishelia kwa kugamba nifowigwe?” ⁴ Awanhu awemile baho howomugamba Paulo, “Ukumuliga iMutambiki mukulu wa Mulungu?” ⁵ Paulo hoyobidula, “Wandugu sangu samanyile fina imwene ni kuhani mukulu. Kosoko amawandiko gagamba nhafi: ‘Unghalonge fihile muchanhya ye mutawala wa wanhu wako.’” ⁶ Ninga ugele uwo Paulo yakamanye fina wamonga wa wanhu wadibalasa diya ni Masadukayo na wamonga ni Mafalisayo. Kamei, hoyokwinula dijwi kumwande ya Dibalasa, “Wandugu sangu aniye na Mufalisayo. Aniye nigaliku balasa dya ulamusi, kosoko nikuhuwila fina awanhu wakawokwinuka.” ⁷ Yakalonge nheifo, howokonga kuwanga lugano Mafalisayo na Masadukayo, umukutano houkitemanuka matewa meli. ⁸ Isoko iyecho hayuwa aino, Masadukayo wakugamba kwichaka kwinuka wanhu wafile, kwichaka malaika, na kwichaka Muhe, ninga Mafalisayo wakuhuwila gose madatu. ⁹ Ichowe hochikongeseka wamonga wa walimu we shelia we chitewa cha Mafalisayo howokwima na kulafa malalamiko gawo kwa ludole. “Chisikona chochose chihile mwi munhu yuno; ikudahika nhagela Muhe au malaika kalonga naye?” ¹⁰ Kuwanga hokukuwa kwingi mpaka imukulu wa wasilikali we nghondo hoyokogoha fina wakudaha kumudega fihindihindi. Kosoko iyo hoyowatuma wasilikali wakwe wengile muchiligati cha ditewa diya, wamulafe Paulo na kumuwisa kugati ya digelesa. ¹¹ Ichilo chandamile Mundewa hakema habehi na Paulo, hoyomugamba, “Kiinghe moyo! Kosoko fina founihomelela ahano Yelusalemu, ukwenda utende nheifo ukaya ya Lumi.” ¹² Kukoche Wayahudi howogolosa chikalo cha chinyele. Howochilaha: Chisikudiya kahikunywa mpaka ma chimalile kumukoma Paulo. ¹³ Wanhu wafike makumi mane wakifumilise injama yo kugolosa nheifo. ¹⁴ Kamei howoluta kuwatambiki wakulu na wasehe, howogamba, “Aseye chichilaha fina chisikuwonja chochose kumilomo yetu mpaka baho ma chimalile kumukoma Paulo. ¹⁵ Hambiya, anyeye na Dibalasa mutume mbuli kwi mukulu wa dijeshi,” yamwigale Paulo ukwenu mukitende kifana mukuhananga kumanya simbuli sakwe chikamilifu ku imwene. “Chatayali kumukoma ugele yakali nghenati yafike habehi.” ¹⁶ Ninga imwana we munduguse wa Paulo hoyohulika simbuli umupango uwo; kwa nheifo hoyokwingila kwigelesa, hoyomutamila Paulo injama iyo. ¹⁷ Paulo hoyomwinanga yumwedu wa wasilikali hoyomugamba, “Mulonde mwanike yuno mwigale kwi mukulu wa dijeshi, kena mbuli yakumutamila.” ¹⁸ Musilikali homugala imwanike yuya hoyomulongosa mpaka kwi mukulu wa majeshi, hoyogamba, “Ayuya imufungwa Paulo kanyinanga hoyonitasa nimulete imwanike yuno ukwako kosoko kena mbuli ya kukutamila.” ¹⁹ Imukulu wa dijeshi homukola mukono imwanike yuya hoyoluta naye hanghanda, hoyomusa, Kwina choni chokunitamila? ²⁰ Imwene hoyogamba, “Awayahudi wakifumilisa wakutase umwigale Paulo ku Dibalasa dikuhananga dipate simbuli sakwe fiswanu. ²¹ Ninga agweye unghafumile kosoko kwina wanhu wengi kusuma makumi mane wakiyohile kumukola kwa ludole. Wachilaha fina wasikudiya chinhu ama kunywa chinhu mpaka wowe wamalile kumukoma. Hambiya wakiyoha wagojela du ulamusi wako.” ²² Imukulu wa dijeshi hoyomuleka yalute hoyomusugula fina yanghamutamile munhu wowose fina kamwigalila imbuli iyo. ²³ Baho, imukulu we dijeshi hoyowenanga wasilikali weli hoyowagamba, “Weke tayali wasilikali magana meli, na wakukwila si nyumbu makumi mufungate, na wasilikali magana meli we migoha, walute Kaisalia; muwe tayali kuleuka, ugele isaa tatu inghati ifike diyelo neichilo. ²⁴ Ikeni nyumbu nghefu kosoko ya Paulo; mumwigale digoya kwa Felisi, imukulu we iyisi.” ²⁵ Kamei hakawandika baluwa ku mbuli ino: ²⁶ Aniye Kilaudio Lusia nikukuwandichila agweye mukulu Felisi: Mukulu we iisi Nikulamusa! ²⁷ Wayahudi hawamukola munhu yuno na hawowa habehi na kukoma nanga satamiligwe fina ni mukaya wa Chilumi, kwa nheifo honiluta na wasilikali na honimuhonya. ²⁸ Nikahanange kumanya imbuli ilekile womushitaki gawo muchanhya yakwe, honimwigala kwi Balasa dyawo dikulu. ²⁹ Honikona fina mashitaka agecho hagowa ga kuwanga muchanhya ya finhu fingi fye sheliya yawo, kwa nheifo sonile fina kagolosa chochose chiya ichagile yakomigwe ama yohigwe mwigelesa. ³⁰ Nikatamiligwe fina Wayahudi hawagolosa njila ya kumukoma, honilamula kumwigala ukwako. Honiwagamba awashitaki wakwe wagale mashitaka gawo kumwande yako. ³¹ Kamei awo awasilikali howomulonda Paulo fina fowalagisigwe. Howomwigalaichilo chicho mpaka Andipatili. ³² Nhosiku yakwe wasilikali we migulu howokuya kunghambi, howowaleka awaya awasilikali awakukwila si nyumbu wagendelele ne inhambo hamwedu na Paulo. ³³ Wakafika Kaisalia howomwingha yuya imukulu we iisi ibaluwa iya na kumwika Paulo mu udaha wakwe. ³⁴ Felisi yakamale kuisoma ibaluwa iya, hoyowosa Paulo kalawa iisi yaki. Yakatamiligwe fina kalawa iisi ya Kilikia, ³⁵ hoyogamba, “Notegelesa imbuli yako ma wafulusekwija awashitaki wako.” Kamei hoyolagisa Paulo yekigwe wimilisi mwikumbo dya Helode.

¹ Gakaloke majuwa mashano, iMutambiki mukulu Anania hoyokwija Kaisalia hamwedu na wasehe wakefu na wakili yumwedu wa shelia iyakwinangwa Telitulo. Howomulutila ayuya imukulu we iisi howomutamila amashitaka gawo muchanhya ya Paulo. ² Paulo hoyokwinangigwa na Telitulo, hoyokumula mashitaka nhafi: Mukulu Felisi, ulongosi wako muswanu ugolosa mabadiliko agawagile mwitaifa dyetu chila hanu chihokela dino kwa moyo wa ilumbo. ³ Chila hanu na chila ugele chikuhokela dino kwa moyo wa ilumbo. ⁴ Ninga chinghagilise umuda wako kahi, chikukutasa ku uswanu wako, utegelese ulongi wetu. ⁵ Chitanga fina imunhu yuno niwakogoha lugano. Imwene yukukonga migogolo muchiligati ya Wayahudi chila hanhu, muchilunga chose kasi ni chilongosi we chitewa cha Wanasaleti. ⁶ Kahi hakagesi kuchafula dihekalu, nase hochimukola, ⁷ “Ninga Lisiya Ichilongosi hoyeja na kumuleusa mumikono yetu kwa ludole.” ⁸ Kwa kumusamusa agweye gomwecho ukwenda wone pwii simbuli sino sose isene sochikumushitaka. ⁹ Nawo Wayahudi howofumila fina chawelu foyalongile yuya amashitaka gago. ¹⁰ Kamei imukulu we iisi hoyomonesa Paulo kuwa yakudaha kulonga. Naye Paulo hoyogamba, “Nikonela kitetea kumwande yako, fina kosoko nimanya fina mulimo wa mulamusi wa ditaifa dino kwa minyaka mingi. ¹¹ Ukudaha kuhananga ukweli fina gasilokile majuwa ikumi na meli du galokile fonalutile kufuga Yelusalemu. ¹² Wayahudi wasinifikile nikuwanga na munhu wowose. Wasanifikile nikusongesa wanhu mwihekalu, ama mumasunagogi gawo, ama ahanhu hengi hohose mukaya iyo. ¹³ Hata wasikudaha kuhomelela amashitaka gowalafile muchanhya yangu. ¹⁴ “Ninga chino nochonikufumila kumwande yako: Aniye nikufuga Mulungu ku Njila yo wagumba ya usushi. Nikufuga Mulungu wa waBaba setu, nikuhuwila chila chinhu chiwandikigwe mu fitabu fye sheliya na fya wagonesi. ¹⁵ Aniye nikumuhuwila Mulungu imwene, awa nawo wakumuhokela, fina kwina kwinuligwa kwa wanhu wafile, awaswamu na wehile. ¹⁶ Kosoko iyo nikitahidi kuwa na moyo muswanu kwa Mulungu na kuwanhu. ¹⁷ “Nikekale kutali chipisi cha minyaka mikefu, honikuya Yelusalemu na kwigalila ditaifa dyangu sadaka na filafya. ¹⁸ Fonagolosage nheifo noho wanifikile mwihekalu nigolose difugilo dyo kitakasa. Kusowile na itewa dya wanhu kahimugogolo. ¹⁹ Ninga hakuwa Wayahudi kulawa iisi ya Asia; awo no yowile fiswanu wowe bahano kumwande yako na kulafa mashitaka gawo hona wena chochose chokulonga ku niye. ²⁰ Ama waleke wano walonge dikosa dyowonile ukwangu fonyemile kumwande ya Dibalasa dyawo dikulu, ²¹ ninga simbuli sino sonalongile fonyemile kumwande yawo: ‘Mukuniliganisa diyelo dino kosoko yo kolelesa fina awafile wakawokwinuligwa.’” ²² Baho, Felisi imwecho hakaimanya oyo Injila iswanu, hoyokwimisa dishauli dyo. Hoyowagamba, “Nikanilafa ulamusi wangu muchanhya ye dishauli dino ugele Lusia mukulu wa dijeshi foyakwija hano.” ²³ Kamei hoyomulonga ayuya chilongosi wa wasilikali we inghondo yamwike Paulo kugati, ninga yowe na uhulu chiyasi, na wambuya sakwe wanghalemesigwe kumwingha fyoyakuhitaji. ²⁴ Gakaloke majuwa makefu, Felisi hoyofika hamwedu ne muke Dlusila, yowile Muyahudi. Holagisa Paulo yegaligwe, hoyomutegelesa yakulonga muchanhya ya kumuhuwila Yesu Kilisito. ²⁵ Ninga Paulo foyakongile kulonga muchanhya ya kuliganila, kuwa na chiyasi, muchanhya ya uligaswe ukwija, Felisi hoyokogoha hoyogamba, “Kwa hambiya ukudaha kuluta; nokwinanga kahi ninghapata luneka.” ²⁶ Ugele uwo yendeyohuwila fina Paulo komwingha fesa. Kosoko iyo hakagendelela kumwinanga na kusimulila naye chila ugele. ²⁷ Ikaloke minyaka mili, Palikio Festo hoyolonda ahanhu ha Felisi, hoyokuwa mukulu we iisi. Kosoko hakenda kuwendesa Wayahudi, Felisi hoyomuleka Paulo mwigelesa.

¹ Dijuwa dya kadatu yakafike Kaisali, Festo hoyoleuka kuluta Yelusalemu. ² Watambiki wakulu na filongosi wa Wayahudi hawalonga naye muchanhya ya mashitaka gondeyoshitakiigwa Paulo. Howomutasa kwa dede, Festo ³ yawagolosele uswanu kwa kumwigala Paulo Yelusalemu. Howadiya njama wamukome hona yowile munjila. ⁴ Ninga Festo hoyobidula, Paulo yakusigala kuya Kaisalia mwigelesa ani nani nikwenda nilute uko majuwa si mengi. ⁵ Walekeni filongosi wenu walute uko hamwedu naniye wakafe mashitaka gawo hona yagolose dyodyose dihile. ⁶ Festo yakamale kwikala nawo, majuwa gafikile munana ama ikumi nhafi, kamei hoyoyokuya Kaisalia. Nhosiku yakwe hoyoluta kwi balasa hoyolagisa Paulo yegaligwe kugati. ⁷ Ugele Paulo yakeje, Wayahudi awalawile Yelusalemu howokonga kulafa mashitaka mengi, masito agene gowasadahile konesa fina ni chawelu. ⁸ Kukitetea Paulo hoyogamba: Aniye sigolose ikosa dyodyose muchanhya ye sheliya ye Chiyahudi, ama dihekalu, ama muchanhya ya Kaisali. ⁹ Festo hoyohananga kuwendesa Wayahudi, kwa nheifo hoyomusa Paulo Togola! Kokwenda kuluta Yelusalemu uleke ukahukumiigwe uko kumwande yangu muchanhya ya mashitaka gano? ¹⁰ Paulo hoyobidula, Nima hamwande ya mahakama ga Kaisali, na bahano no hanogele ninghigwe hukumu. Fina foumanyile fiswanu, siwagolosele Wayahudi uwihi wowose. ¹¹ Ninga, hona nyoneke na ikosa dyodyose dinogele kufa, sikutasa kulekeleligwa kutendeligwa nheifo. Ninga hona kwichaka chawelu mu mashitaka, kwichaka yakudaha kuniguma mumiko yawo. Nikukanha lufaa kwa Kaisali! ¹² Baho, Festo yakamale kusimulila na washauli wakwe, hoyomugamba Paulo, Kukanha lufaa kwa Kaisali, haya ukuluta kwa Kaisali. ¹³ Majuwa makefu hanyuma Mundewa Aglipa na Belinike howofika Kaisalia, uleke walafe heshima sawo kwa Festo. ¹⁴ Howokuwa uko majuwa makefu, naye Festo hoyomutamila Mundewa simbuli sa Paulo. Henamunhu yumonga hano imwene Felisi hakamuleka mwigelesa. ¹⁵ Nikalute Yelusalemu, watambiki wakulu na asehe wa Wayahudi howomushitaki na kunitasa nimuhukumu. ¹⁶ Ninga niye honiwabidula fina si jadi ya Walumi kumulafa munhu yenghigwe asabu ugele iyekushitakigwa nghenati yakitang’anyile na awashiliki wakwe chimeso meso na kwinghigwa luneka lwa kitekea muchanhya ya gago mashitaka. ¹⁷ Wakafike baho sachelewe, ninga honigolosa chikao kumahakama, nhosiku yakwe honilagisa imunhu yuyo yegaligwe. ¹⁸ Awashitaki howokwima lakini wasalafile mashika gehile fina fonendenidoga. ¹⁹ Ninga du howowa na lukani lwa mbili, si dini yawo na sa munhu yakwinangigwa Yesu yafile, ninga Paulo yakukolelesa fina ni mumi. ²⁰ Nilemeligwa kumanya dyo kugolosa mu imbuli iyo. Kamei honimusa Paulo hona yakwenda kuluta kama hakama akuya Yelusalemu kosoko ya mashitaka gago. ²¹ Ninga Paulo hoyokanha lufa, hoyotasa yalekigwe mwigelesa mpaka ulamuso we imbuli iyo ulafigwe na Kaisali. Kosoko iyo hanidaha kumuleka mwigelesa mpaka ma nikudaha kumwigala kwa Kaisali. ²² Aglipa hoyomugamba Festo, Nokwenda kumuhulika imunhu yuyo aniye nimwecho. Festo hoyomugamba, “Komuhulika nhosiku.” ²³ Kwa nheifo, nhosiku yakwe Aglipa na Belinike howokwija kwa chinyemi ku dikumbo dye mikutano wakilose na wakulu wa majeshi na filongosi we kaya. Festo hoyolagisa Paulo yegaligwe kugati. ²⁴ Kamei hoyogamba, “Mundewa Aglipa na mose muwile hano hamwedu nase! Hano hamwande yenu hena munhu yuno, imwene aWayahudi wose wowile hano na kuya Yelusalemu, wakujoja fina nghawagilwa kuwa mumi kahi. ²⁵ Ninga niye sonile fina kagolosa chochose chihile ichene chikumutenda yagiligwe kukomigwa; ninga kosoko imwecho hakakanha lufaa kwa Kaisali, nilamula kumwigala. ²⁶ Ninga ku ulwandi ulwangu nichaka chinhu ichene chonikudaha kumuwandichila Kaisali muchanhya yakwe. Nochileka nimwigale hano kumwande yenu, na gano ukwako gweye, Mundewa Aglipa! Uleke munghamala kumusa Musa nipate mbuli ya kuwandika. ²⁷ Kosoko ikuwa mbuli ya chibwalasi kwigala mufungwa, akuno hechaka amakosa gakwe goyagolose.”

¹ Kamei Aglipa hoyomugamba Paulo, “Ukudaha kitetea.” Baho Paulo hoyogolola mukono wakwe hoyokitetea nhafi: ² “Mundewa Aglipa, nikiyona nijaliwa diyelo kitetea kumwande yako muchanhya ya mashitaka gose agene Wayahudi walonga muchanhya yangu. ³ Chawelu kosoko gweye kumanya simila sa Wayahudi na migagolo yawo, nikukutasa unitegelese kwa ufumilifu. ⁴ “Awayahudi wamanya amaisha gangu gose kulawa udodo wangu fyene fonikale kulawa kunghonga ne ditaifa dyangu ako Yelusalemu. ⁵ Wanimanya kwa ugele mutali, na wakudaha kuhomelela, wanghenda fina kulawa kunghonga hanikala kifana munhu yumwedu wa waya awakolile lugano idini yetu, chitewa cha Mafalisayo. ⁶ Na hambiya nima hano nilamuligwe kosoko nikuhuwila dihuwi Mulungu dyoyawahuwise waBaba setu. ⁷ Diwi dyo nodidiya dikuhuwiligwa na makabila kumi na meli kupata fowakumufuga Mulungu chilo ne misi. Ku dihuwi dino nikushitakigwa na Wayahudi! ⁸ Mundewa, Nhani nyeye mukona isikudahika kwi Mulungu kwinula wanhu wafile? ⁹ Chawelu aniye nimwecho hanihuwila fina inyagila kugolosa mbuli nyingi kulema disina dya Yesu wa Nasaleti. ¹⁰ “Simbuli so, noso nagolose ako Yelusalemu, aniye nimwecho ugele wonenghigwe udaha kulawa ku watambiki wakulu, haniwaguma mwigelesa wengi wa wanhu wa Mulungu. Fowalamuligwe kukomigwa, aniye hanitowa kula ya kufumila. ¹¹ Mikongho mingi haniwatenda wotowigwe mumasinagogi gose, honiwalonga kwa ludole wadikane dihuwilo dyawo. Inyono yangu ukwawo hoikuwa ghulu mpaka nende niwasaka sikaya sa kutali.” ¹² “Kwe njila iyo honiluta Dameski ugele umoja, nina udaha na malagiso kulawa ku watambiki wakulu. ¹³ Mukulu, ugele fonowile munjila saa mutandatu ya nemisi, hanyona ujelu mukulu kusuma we dijuwa, ukwaka kulawa kulanga, hounisunguluta niye hamwedu na wachowanye munhambo. ¹⁴ Chose hochikugwa hasi, nani honihulika ijwi dikulonga nani kwa Chiebulaniya, ‘Sauli, Sauli! Nhani kunibulaga? Ukibulaga chaka kifana kutowa mundome ichuma chisongoke.’” ¹⁵ Honigamba, “Gwegwe nani Mundewa?” Naye Mundewa hoyobidula, “Aniye no Yesu imwene agweye ukubulaga. ¹⁶ Si chinhu, inuka hambiya, imanyima. Nikisololosa ukwako kosoko ino nikwike uwe mutumishi wangu kuhomelela ifyene fyo unyonile niye na simbuli sonikwenda nikiyonese ukwako. ¹⁷ Nikukuhonya kulawa ku wa Isilaelii na wanhu wa wamembe gamonga wonikwenda nikutume ukwawo. ¹⁸ Ukuwagubula meso gawo na kuwadahisa walawe muchisa na kwingila mu ujelu; walawe mu utawala wa Shetani, wamubidukile Mulungu kwa kumuhuwila kwawo, walekeleligwe uwihi na kulonda ahanhu hawo mugati ya waya awene wagaluke fina wanhu wa Mulungu.” ¹⁹ “Nheifo, Mundewa Aglipa, sibesile diwono didyo dya kulanga. ²⁰ Ninga hanikonga kuhubili kunghonga ako Dameski, hanyuma ku waya wanhu wa Yelusalemu na wanhu wose wa Uyahudi na wa wamembe gamonga. Niwasonghesa wamubidukile Mulungu na konesa kwa sinhenda fina wabadilisha imiyoyo yawo. ²¹ Kosoko iyo Wayahudi hawanikola nuwile Mwihekalu, howohananga kunikoma. ²² Ninga Mulungu hoyonitasa; na kwa neifo mpaka diyelo nima chigosi nikuhomelela ku wose, ku wakulu na kuwadodo. Gonikulonga nogaya kuwagonesi na Musa wagamba gakagolawanisa: ²³ Fina Kilisito yakusambasigwa na kokuwa wanghonga kwinuka kulawa kuwafile, uleke yafamile fina ujelu wa uhonya ukuwamulikia awanhu wose hambiya, Wayahudi na nheifiya wanhu wa wamembe gamonga.” ²⁴ Paulo yakafike baho mukitetea kwakwe Festo hoyolonga kwa kwinula dijwi, “Paulo! Kwina chilalu! ²⁵ Ninga Paulo nichaka chilalu Mukulu Festo, honikulonga ni chawelu muhala. ²⁶ Agweye Mundewa kusimanya simbuli sino, kosoko iyo nikudaha kulonga nichaka chogoho kumwande yako. Nichaka manhonge fina aga gose gagoloseka gamanyika ukwako kosoko imbuli ino isigoloseke kwa chifiso. ²⁷ Mundewa Aglipa, Togola ukuhuwila wagonesi? Nimanya fina ukuhuwila.” ²⁸ Aglipa hoyomubidula Paulo, “Chidodogi du ukwenda unitende muKilisito?” ²⁹ Paulo hoyobidula, Nikumutasa Mulungu, fina kwa chapangu chiguhi ama chitali, si gweye du ninga wose awakunihulika diyelo wowe fina niye fonuwile, ninga bila ino iminyolo. ³⁰ Baho iMundewa mukulu we iisi, na Belinike, na waya wose wamonga wowile hamwedu nawo howokwinuka. ³¹ Wakaleuke howokiyusa wecho kwa wecho, Munhu yuno hakowa yadaha kulekeligwa howile ghakanhile lufaa kwa Kaisali. ³² Aglipa hakamugamba Fesito, “Imunhu yuno hakowa yakulekeleligwa woile ghatasile kuluta kwe Mundewa.”

¹ Wakafuluse kulamula fina chilute mpaka Italia, howomwika Paulo hamwedu na wafungwa wamonga ku wimilisi wa akida we chikosi chikwinangwa Chikosi cha Kaisali. ² Hochikwila meli ya Adilamito iyende iluta na kulokela musibandali sa mu iisi ya Asia, hochikonga lugendo. Alistaliko mukaya wa Makedonia, kulawa Sesaloniki hakowa hamwedu nase. ³ Nhosiku yakwe hochikwima kubandali ya Sidoni. Yuliyo hoyomutendela Paulo fiswamu kwa kumuleka yamone wambwiya sakwe na kupata ifinhu foyakuhananga. ⁴ Kulawa uko hochigendelela ne nhambo, ninga kosoko imheho yendeitowa kwa ludole kulawa kumwande yetu, hochilokela ulwandi lwe chisiwa cha Kupulo ukwene kusowile na mheho nyingi. ⁵ Hanyuma hochiloka ibahali ya Kilikia na Pamfulia, hochikwima Mula, ikaya ya Lukia. ⁶ Baho, ichilongosi wa wasilikali igana yuyo hoyofika meli imonga ya Alekisandilia iyendeluta Italia, kwa nheifo hoyochikiwisa kugati. ⁷ Kwa chipisi cha majuwa mengi hachigenda digaluga, na kwa fikugutu hochifika habehi na Nido. Na kosoko imheho isachinghile luneka hochiluta kumwande bila kubiduka, hochigenda ulwandi lwa Klete habehi na Salimone ukusowile na mheho nyingi. ⁸ Hochigenda kunghanda yakwe digaluga, hochifika hanhu hakwinangwa Bandali Swanu, habehi ne kaya ya Lasea. ⁹ Chipisi chitali hachuwa chilokile, hata dijuwa dyo kufunga hadyuwa dilokile. Hambiya hayuwa hatali lugano kugenda na meli. Kamei, Paulo hoyowasugula: ¹⁰ Wakulu, nikona fina inhambo ino ikuwa na mugogolo, kwagilila finhu fingi, si imisigo du yuwile mu meli, hata na kwa mwumi wetu. ¹¹ Ninga ayuya ichilongosi wa waslikali igana hakahulikila simbuli sa ayuya iyakugendesa imeli na imwenye meli kusuma soyalongile Paulo. ¹² Kosoko ibandali iyo isowile hanhu haswanu kwikala ugele we imheho ye inyota, uwengi huwosagula kugendelela ne inhambo kwa kubahatisha fina wakudaha kufika Foinike, bandali ya Kleti, hasi ya kuuswilo we dijuwa na kuchanhya ya kuuswile we dijuwa; na uko hawowa wakudaha kwikala uko ugele we inyota. ¹³ Kamei imheho ya kusini ikakonge kuputa fiswanu, howodoga fina wapata dowahanange, kosoko iyo howoleuka howoigenesa imeli habehi sana na mwani ya Klete. ¹⁴ Ninga, chisalokile chipisi chitati, imheho inghali ikwinangwa Mheho ya kasikasi haikonga kuputa kulanga kuchisiwa. ¹⁵ Imheho hoitowa imeli iya, na kosoko chisendechidaha kuisuma hochiileka ikwelegetigwe na iyo imheho. ¹⁶ Chisiwa chimonga chikwinangwa Kauda, hochichikinga chidodogi imheho iyo; na chikole kusini kwakwe hochisuma, hata nheifo kwa fikugutu kuhonya u munhumbwi uya wa imeli. ¹⁷ Awaya anamaji howowukweka umunhumbwi kugati, kamei howoisungulusila imeli lusigi na kuyoha kwa ludole. Awogoha fina wakudaha kwangamila kuchilo che bahali ku mwani ya Libiya. Kosoko iyo hawadulisa matanga na kuileka imeli ibulumuligwe ne imheho. ¹⁸ Umusukosuko hougendelela kuputa, na nhosiku yakwe howokonga kukubita kunje imisigo ya mumeli. ¹⁹ Dijuwa dya kadatu howokonga kuguma mumeji ifinhu fye imeli kwe mikono yawo awecho. ²⁰ Kwa majuwa mengi chisadahile kona dijuwa ama sinyelesi; umusingisiko hugendela kuputa lugano. Hata dihuwi dyo kuhona hodichihelela. ²¹ Chikafuluse kwikala majuwa mengi bila kudiya chakudiya, Paulo hoyokwima mugati yawo hoyogamba, “Wakulu nanga yowile fiswamu nanga mwanitegelese na kuleka kugenda kulawa Klete. He mwatendile nheifo chosowile chikwingila mugogolo uno na si hasala sino sose. ²² Hambiya nikumutasani muwe na moyo, kwichaka hata yumwedu wenu yakwenda yagilise uumi wakwe; imeli du noikwende yagilile. ²³ Kosoko digulo nechilo choikwinuchila diyelo, malaika we Mulungu imwene aniye na munhu wakwe, kahi nowo nikufuga, kanijila, ²⁴ hoyonigamba, ‘Paulo, unghogohe, Inogela wine kumwande ya Kaisali, naye Mulungu kwa uswamu wakwe kakutendela maswanu kwa kukuhonya agweye na wose womuwaniye munhambo wanghagilile.’ ²⁵ Nheifo, mowanhu nye, kiingheni moyo! Kosoko nikumuhuwila Mulungu fina ikwende yuwe sawa fina fonitamiligwe. ²⁶ Ninga hata nheifo chikwenda chikatagigwe muchiwa chingi.” ²⁷ Ichilo cha dijuwa dya ikumi na ine, chendechikwigaligwa kuno na kuno mu bahali ya Adilia. Habehi na muchilo mugati, wanamaji howokona fina chuwa habehi na iisi. ²⁸ Kwa nheifo howohananga chilinde che bahali uleke walagase ulusigi lohigwe chinhu chisito, howopata chilindi cha meta makumi mane, hanyuma howopima kahi howopata meta igana dimwedu na makumi madatu. ²⁹ Kosoko ya kogoha kukwama kumawe, howodulisa nanga ine kunyuma ye imeli; howotasa usiku uche chimwande. ³⁰ Wanamaji howohanga kutija na hawafulusa kudulisa auya umunhumbwi kumeji, wakitenda fina wakahulumusa si nanga kumwande ye meli. ³¹ Ninga Paulo hoyomulonga yuya akida wa dijeshi na wasilikali wakwe, Awano awanamaji wanghaleka kusigala amuno mu meli musikuhona. ³² Baho awasilikali waya howosidumula sisigi sakolelese au umunhumbwi, howouleka ulondigwe na meji. ³³ Kukwende kuche, Paulo hoyowatasa wose wadiye chakudiya: Kwa majuwa ikumi na ine hambiya, hamuwa mumanhonge na musighati mudiye chinhu chochose. ³⁴ Hambiya, nikumutasani mudiye chakudiya kosoko muchananga ikuhanangika mudiye uleke mudahe kugendelela kuwa womi. Kosoko hata lujwili lumwedu lwa matwi genu usikwagilila. ³⁵ Yakamale kulonga nheifo hoyolonda mukate, hoyulumba kwa Mulungu, kumwande yawo wose hoyoubendula hoyokonga kudiya. ³⁶ Baho wose howosindamala, howodiya chakudiya awecho. ³⁷ Chose hamwedu hachuwa wanhu magana meli na makumi mufungate na mutandatu, mu meli. ³⁸ Wose wakamale kudiya na kwiguta, howohungula usito mu meli kwa kutanga ingano mubahali. ³⁹ Kukoche, wanamaji wasadahile kuitanga iisi iya ninga howokona hanhu hamonga hena mhwani na disanga, howolamula kuluta ne imeli uko mhwani inghahadahika. ⁴⁰ Kwa nheifo hawosidumula si nanga na kusileka kubahali sisigi isohile ikukani, kamei howokwinula itanga dimwedu kumwande kukola imheho, howoluta imhwani. ⁴¹ Ninga howofika hanhu ahene mikondo mili ye bahali ikitang’anyila, ulwandi lwa kunyuma hoibenduka dibasibasi kusoko ya uludole lwa mawimbi. ⁴² Wasilikali howohananga kuwakoma awafungwa wose kwa kogoha fina wakudaha kogela mpaka mhwani na kutija. ⁴³ Ninga kosoko yuya akida wa dijeshi hakahananga kumuhonya Paulo, hakawalemesa wanghatende nheifo. Hoyolagisa fina kunghonga awaya awakudaha kogela wajumhe kulawa mu meli na kogela mpaka mhwani, ⁴⁴ na wamonga wendamile wakikolele mufibao au mufipande fye imeli ineneke. Nofo aseye chose chafikile mhwani.

¹ Chikafuluse kufika kuisi hochimanya fina ichisiwa chiya chikwinangigwa Melita. ² Wakaya wa baho howa waswanu sana ukwetu. Ifula yendeikonga kutonya na hakuwa na mheho, kosoko iyo howokwasa moto, howochikalibisha. ³ Paulo hoyodondola chisigo chidodogi cha figodi, ugele foyasigumange mumoto. Baho kosoko ya dijoto dya umoto hodilawa ijoka mufigodi hodikisinga mumukono wakwe hodinyalilila. ⁴ Awakaya wa baho wakone ichiyumbe chiya chikuning’inha mumukono wakwe, howokitamila kwa wecho, Chawelu imunhu yuno kakoma munhu hata kona yahonile kufila mubahali, ihaki isimulekile yowe mumi. ⁵ Ninga Paulo hodikung’unhila mumoto ichiyumbe chiya, na imwene nghabulagigwe hata chidodogi. ⁶ Awa wanhu wendewolangilila fina kofimba ama kokugwa hasi na kufa. Wakagojele kwa chipisi chitali bila kona Paulo yapatigwa na chinhu chochose ichene si cha kawaida, howobidula mafikili gawo muchanhya yakwe, howogamba fina ni mulungu. ⁷ Habehi na ahanhu baho hahowa na migunda ya Publio, imukulu we chisiwa chiya. Publio hoyochikalibisha chimbuya, hochikuwa wageni wakwe kwa majuwa madatu. ⁸ Hoyikuwa fina iBabakwe wa Publio hakowa mutamu wa mhungo na kahala, kagona mwisasi. Paulo hoyoluta kumwona na yakamale kuwomba, na yakamwikile mikono yakwe muchanhya yakwe hoyonona. ⁹ Kulawa dino kugoloseka, watamu wose muchisiwa howokwija howohonyigwa. ¹⁰ Howochingha finghwa fya hayo hayo, na ugele wochaleukage howochigumila mumeli ifinhu fyose fochendechihanga. ¹¹ Ikaloke minyesi mitatu, hochileuka na meli yowile baho kosoko ye imheho mu chisiwa, meli ya Alekisandilia iikwinangwa, Wandugu mapasa (Milungu Mapasa) ¹² Hochifika ikaya ya Silakusa, hochikwikala baho majuwa madatu. ¹³ Kulawa uko hachileuka hochisunguluta na kufika Legio. Dikaloke ijuwa dimwedu, imheho hoikonga kuputa kulawa kusini, kamei gakaloke majuwa meli hochifika bandali ya Potioli. ¹⁴ Uko hachifika wandugu wakefu awe wahanange chikale nawo kwa ijuma dimwedu. Nheifi nofo ehafikile Lumi. ¹⁵ Awandugu wa Lumi fowahulike simbuli setu, howokwija kuchihokela kwe soko dya Apio na Mikahawa midatu. Paulo yakawone hoyomulumba Mulungu, na hoyopata moyo. ¹⁶ Chikafike Lumi, Paulo hakalekeligwa yekale yemwene na musilikali yumwedu wa kumwimilisa. ¹⁷ Gakaloke majuwa madatu, Paulo hoyowenanga filongosi wose we Chiyahudi wa hanhu baho, wakakikonghole, Paulo hoyowagamba, “Wandugu sangu, aniye sagolose chochose chihile, kahikulema sijadi sa wasehe wetu, hamikoligwa akuya Yelusalemu na kugumigwa mumikono ya Walumi. ¹⁸ Wakanyusenyuse na kona fina nichaka wihi wowose, howohananga wanilekele. ¹⁹ Ninga Wayahudi wamonga howolema imbuli yo hoinigolosa nihanange lufaa kwa Kaisali, ninga niye sowile na mbuli yoyose ya kuwashitaki awaditaifa dyangu. ²⁰ Kosoko iyo nihananga kiyona nanye na kusimulila nanye, kosoko nyohigwa iminyolo ku dihuwilo didyo dya Waislaeli.” ²¹ Nowo howomugamba fina, “Chisihokele baluwa sosose kulawa Uyahudi muchanhya yako, na kwichaka ndugu yeyose yejile hano yachitamile mbuli yoyose ihile ulwandi ulwako. ²² Ninga chikona inogela chihulike kulawa ukwako gomwecho foukona agweye; kosoko cho chimanyile muchanhya ye chitewa chino ni fina chila hanhu chikulongigwa fibi.” ²³ Wakakifumilise dijuwa dyo kitang’anyila naye, howokwija hoyekalage wanhu wengi lugano. Hoyoyowatamila imbuli iyo kulawa nhosikusiku mpaka hegulo, yakuhomelela ku undewa wa Mulungu kuwonesa fina chawelu simbuli sa Yesu kulawa mu sheliya ya Musa na amanabii. ²⁴ Wamonga wawo howofumila ku siya soyalongile, ugele uwo wamonga wasahuwile. ²⁵ Howoleka kifumilisa wecho kwa wecho, howoleuka ugele Paulo yakagambe: “Muhe Musunhile hakowa sawa foyalongile kuwa Baba senu kwa njila ye mugonesi Isaya: ²⁶ ‘Luta ku wanhu wano, ukagambe, chaweli mukamuhulika ninga musikutanga ng’oo; ²⁷ kosoko imisungu ya wanhu wano ibwalata, wahindi singhutwi sawo, wafinya meso gawo. Hona si nheifo, wowa wakona kwa meso gawo, hawahulike kwa singhutwi sawo, na kutanga kwe misungu yawo, na kunibiduchila, yakulonga Mundewa, nani nuwanikuwa honya.’” ²⁸ Paulo hoyomalagisa kwa kugamba, “Mumanye fina uhonya uwo wa Mulungu. ²⁹ wigaligwa kuwawamembe wakwende wahulike!” ³⁰ Paulo hoyokwikala minyaka mili munyumba yakwe imwecho yendeyolihila kodi, yendeyowakalibisha wose wamwijilage. ³¹ Yakuhubili undewa wa Mulungu na kufusa muchanhya ya Mundewa Yesu Kilisito kwa udaha hechaka kulemesigwa.