3 YOHANA

¹ Kulawa kwe Musehe kwa mwendigwa Gayo, wonikwenda muchawelu ² Mwendigwa, nikutasa Mulungu yakumotese kwa chila chinhu na uwe chaka matamu gogose; nimanya fina muchidoga chako mwina uswanu. ³ Kosoko hanisekelela lugano awandugu wamonga fowejile na kuhomelela ichawelu ya uwumi wako, fina chawelu foukwandamila ichawelu. ⁴ Kwechaka chinyemi chikulu fina chino, kukuhulika fina awanangu wakwandamila ichawelu. ⁵ Mwendigwa, ni mbuli ya ilumbo inhenda youkugolosa kuwatogomela awandugu, lugano, awageni, ⁶ awakuhomelela uwendo wako kwikanisa. Kogolosa fiswanu unghawatasa wagendelele munhambo yawo yo kumutogomela Mulungu. ⁷ Kosoko waleuka kukonga inhambo kahi wasihokele chochose kulawa kuwanhu awasikumuhuwila Mulungu. ⁸ Kwa nheifo ichagila kuwatasa fina wawo, uleke chuwe wayawo mumulimo we chawelu. ⁹ Niwandika chinhu chimonga kwi kanisa, ninga iDiyotelefe, iyekuhananga kwikusa kuwa chilongosi nghakufumila udaha wangu na ulongosi wangu, ¹⁰ Nghona nikwija nikwenda nike chalinje gose agene goyagolose na simbuli sihile soyagolose muchanhya yangu. Hamwedu na gago gose yakuwalemesa awaya awakwenda kuwahokela, na kuwawinga waleuke mwikanisa. ¹¹ Mwendigwa, unghandamile gehile ninga wandamile amaswanu. Ayuya iyakugolosa maswanu ni wa Mulungu, iyakugolosa gehile nghamonile Mulungu. ¹² Demeteliyo kena uhomelesi kulawa kwa chila munhu, na kulawa muchawelu iyenyecho, nikumuhomelela imwene kehi, na mumanya fina uhomelesi wangu wachawelu. ¹³ Hanuwa na mengi ga Kumwandikilani nyeye, ninga nikona fina ibeka ninghawandike na kalamu na wino; ¹⁴ Nikuhuwila kumonani chimwande, kahi chosimulila chimesomeso. ¹⁵ Digoya dyuwe nanye. Awambuya wakumulamusani. Walamuseni awambuya, chila yumwedu wenu.