2 TIMOSEYO

¹ iPaulo, mutumigwa wa Kilisito Yesu kwa wendo we Mulungu, kosoko yo uumi uwuwile mugati ya Kilisito Yesu, ² kwa Tinoseyo, imwanangu mwendigwa; Imboto, ubasi, na imheho kulawa kwe Mulungu Baba na Kilisito Yesu iMundewa wetu fyuwe hamwedu nagwe. ³ Nikumulumba Mulungu yonikumufuga kwa chidoga chelile, ifene fowagolosaga cha Baba, ichigele chose chonikukugelegela munhasa yangu. ⁴ Ifene fonikugelegela amasosi gako, nina ngwina lugano nechilo na nemisi ya kukona gweye, uleke memelesigwe ne chinyemi. ⁵ Nikugelegeswa na dihuwi dyako idichaka chimwefe, dihuwi idyowaga mwe imamako Loisi ne inghinako Eunike na ichigele chino nimanya fina dyuwa umwako. ⁶ Hambiha nikukugelegesa usonghelese ichipawa che Mulungu ichuwile mugati yako kwa kwikiligwa mikono yangu; ⁷ kosoko iMulungu nghachingha moyo we ikeng’enha ninga moyo wa ludole na wendo na ufinyilisi. ⁸ Hambiha unghawonele chinyala uhomelesi we Mundewa wetu, kahi unghanyonele niye chinyala nimufungwa wakwe, ninga ufinyilie agehile hamwedu nani kosoko ye Injili muludole we Mulungu, ⁹ iyachihonya seye na kuchinanga seye mu lwinango umusunhile, siyo kosoko ya sinhenda setu, amba kwasoko yo uwendo wakwe ne simboto soyachingha seye mugati ya Kilisito Yesu minyaka itewe iilongole. ¹⁰ na hambiya igubuligwa kwa kwija kwakwe Mundewa wetu Kilisito Yesu, iyasumile difa na kwigala umi na kubanika kuwa jelu kwa njila ya injili. ¹¹ Kosoko ye injili nasagulwa nyuwe muhubili kahe mufusaji, ¹² kahe hambiya nikudumangila fina fonyuwile. Ninga sikona chinyala, kosoko nimumanya yonimuhuwile, na nimanya fina kena ludole lwa kwikilisa ichinhu chonikiligwa mpaka Dijuwa diya. ¹³ kolelesa umufano we simbuli so uumi souhulike ukwangu, mwihuwi na uwendo uwuwile mugati ya Kilisito Yesu; ¹⁴ kolelesa imbuli ye chawelu yowinghigwe gweye ne Muye Musunhile iyowile mugati yetu. ¹⁵ Ifene foumanyile fina awanhu wose awowile Asiya, wafulusa kunileka, mugati yawo no cha Figelo na Helimogene. ¹⁶ iMundewa yawonele ubasi wose awowile munyumba ya Onesifolo, kosoko hakanisangalasaga figele fingi, na kuleka konela chinyala iminyolo yangu, ¹⁷ ninga foyafikile ahano Lumi hakanikongha kwa ludole hoyonyona. ¹⁸ Mundewa yamonele ubasi Mwijuwa diya, na agweye kumanya fiswanu ifene foyanihokele kwa mengi ako Efeso.

¹ Hambiya gweye, mwanangu, wime chewelu mumboto iyuwile mugati ya Kilisito. ² Na simbuli siya souhulike ukwangu hamwande ya mashahidi itewa uwenghe awanhu awahuilwe awodaha kuwafusa wamonga nawo. ³ Uwe mumagayo hamwedu nani kefana chitung’ati yahuwilwe na Kilisito Yesu. ⁴ Hechaka chitung’ati iyekitowa munghondo iyokiguma mu milimo ye chilunga, yadahe kumwendesa imukulu wakwe iyamwingise mumulimo. ⁵ Hata imunhu iyekisuma mumiseigo nghodaha kwinghingwa mhongesi yanghaleka kisuma muchawelu ifene foikwendigwa. ⁶ Yagila imulimi iyekituma mumulimo yowe wa nghonga kuhokela dikanda dya mamudyo agalawile mumugunda. ⁷ Kolelesa lugano gonikutamile, kosoko iMundewa kokwingha udaha wa kumanya chila chinhu. ⁸ Mugelegele Yesu Kilisito, iyenuke kulawa kwa wofile, iwo lukolo lwa Daudi, ifene foikulonga Injili yangu, ⁹ nani mu Injili iyo ndumangiswa mpaka kohigwa kefana ngolosa wihi. Ninga imbuli ye Mulungu isikudaha kohigwa. ¹⁰ Kosoko iyo nikufinyilisa simbuli sose, kosoko ya wanu wasagulwe, uleke nawo wapate uhonya uwuwile mugati ya Kilisito ¹¹ Ni mbuli ya kuhuwiligwa: Inghowa chufa hamwedu naye, chokwikala hamwedu naye; ¹² inghowa chofinyilisa, chokuwa wandewa hamwedu naye; chinghamulema imwene, naye kodaha kuchilema seye; ¹³ chinghaleka kuwa na ihuwi, imwene yakusigala wa kuhuwiligwa, kosoko ngodaha kilema imwenyecho. ¹⁴ Uwagelegese simbuli sino, na kuwajama hamwande ye Mundewa wanghowe na nyisuma ye simbuli isichaka chinhu chochose, amba sikuwagilisa awekusihulikisa. ¹⁵ Upiligale lugano ukiyonese fina kufumiligwa ne Mulungu, mtogomi we milimo iyechaka chinyala, iyakolelese imbuli ye chawelu ye Mulungu. ¹⁶ Kinege na mabuli agechaka dini, kosoko gakuwegala awanhu kutali ne Mulungu, ¹⁷ na dibuli dyokwenela kefana ilonda ndugu. Mugati yawo no cha Hinenayo na Fileto, ¹⁸ awaiswelile ichawelu, wekugamba nhafi indumo ifulusa kuloka. Howabidula dihuwi dya wamonga. ¹⁹ Amba umusingi we Mulungu uukangale ufulusa kwima, wina muhuli uno: iMundewa kawamanya wose awakwe na chila iyekutambula disina dya Mundewa yauleke uwihi. ²⁰ Mugati ye inyumba inghulu siyo du mwina finhu fye sahabu na fesa amba mwina fya mabiki na fya ulongo; ifimonga fina heshima na ifimonga fichaka. ²¹ Hambiya inghowa imunhu kakikwema kwa kinega nawo, kokuwa chiya cha kwinghigwa heshima, ichisunhigwe, ichimwagile Mundewa, chigoloswa kwa chila mulimo muswamu. ²² Ninga utije usulumisi wo ujelelo na uikonghe ichawelu, dihuwi, uwendo, na itoyoyo hamwedu na wose awekwinanga iMundewa kwa chidogo chelile. ²³ Ugaleme amaswali go ubwalasi agechaka mahala; umanyile fina gakwigala ulefi. ²⁴ Na kwa uholo awekisuma naye. Mulungu kodah Imutogomi we Mundewa yakwendigwa yanghowe mulefi amba muholo kwa chila yumwedu, iyekudaha kufusa, mufinyilisi, ²⁵ iyekudaha kuwajama kwa uholo awekisuma naye. Mulungu kodaha kuwatasa walambe na kuimanya ichawelu, ²⁶ wadahe kinega no muheto wa luhoma, uwuwakolile, wagolose sinyenda sakwe.

¹ Ninga umanye imbuli ino, nhafi amajuwa ge indumo kokuwa na figele fya kogohesa. ² Kosoko awanhu wokuwa wakiyenda awenyecho, wakwenda mapesa, wakwenda kitunya, wakiyona, waligaji, wasikuwahulika awaBaba sawo na awang’ina sawo, wechaka ilumbo, wehi, ³ wasikuwenda awanhu wo ukwawo, wasikwenda kulamulwa, wasongesi, wechaka ufinyilisi, wakali, wasikwenda uswamu, ⁴ wahomelesi wo udasi, wafumbi, wekiyona, awekwenda amabuli gehile kuliko Mulungu, ⁵ wekigamba wamuhokela Mulungu amba awekukana uludole wakwe. Kinege na wanhu wo. ⁶ Kwasoko mugati yawo waumo wanhu awekwingila musinyumba sa wanhu na kuwalonda wanawake awechaka ludole, awena amakanda go uwihi wakoligwe no usulumisi wa mataho itewa, ⁷ awekituma kuhulikisa kwa chila munhu amba awesidaha kugafikila mahala ge chawelu. ⁸ Kefana Yanne na Yamble awamulemage Musa, awano nawo wakuilema ichawelu, wanhu wajugume matwi na awalemigwe na simbuli se dihuwi; ⁹ Ninga siwodaha kutowa nghanyo; kwasoko ubwalasi wawo wokonigwa na wanhu wose, kefana fowowile awuya wa wanhu weli. Mafuso ge ndumiliso ¹⁰ Ninga agweye kufulusa kona amafuso gangu, dihuwi dyangu, ufinyilisi wangu, uwendo wangu, umwimo wangu, ¹¹ amagayo gangu, indumangiswa yangu, agamhatile Lisitila, amba hanifinyilisa kwa chila igayo; kahe mugago gose iMundewa hakamhonya. ¹² Chawelu wose awekwenda kwikala ifene Kilisito Yesu foyekwenda wondumangiswa, ¹³ ninga awehi na wadasi wogendelela na kongeseka kuwa wehi, kudanha na kudanhiliswa. ¹⁴ Ninga gweye, ugendelele ne simbuli siya soufusigwe na kuhuiswa, kosoko kumanya kwifusa kwa che nani ¹⁵ na kulawa udodo wako kugamanya amawandiko masunhile, agodaha kukwingha mahala go kupata uumi kwa dihuwi idyuwile mugati ya Kilisito Yesu. ¹⁶ Amawandiko gose gena Muhe wa Mulungu kahe gena udaha wa kufusa, kugombela, kujama, kufusa mu chawelu, ¹⁷ uleke imunhu we Mulungu yamemelekele, yadahe kugolosa chila mulimo muswamu.

¹ Nikukulagisa hamwande ye Mulungu na ya Kilisito Yesu iMulamusi wa wanhu awomi na wafile, na kwa kugubuligwa kwakwe no uumi wakwe: ² tamilisa imbuli, wiyohe chigele chiswamu ne chihile, jama, gombela, na kulolesa kwa ufinyilisi wose na kufusa. ³ Kosoko chokwija chigele awanhu wakaalema mafuso go uumi, ninga kwa kwandamila sinyenda sawo awenyecho wodaha kupata wafusaji awekuwendesa, ⁴ nawo wokinega wanghahulike simbuli se chawelu na kubidukila sisimo so udasi. ⁵ Amba gweye, wiyohe majuwa gose, finyilisa mumagayo, togoma umulimo wo uinjilisti, togoma umulimo wako. ⁶ Kosoko aniye nyuwa muchigele cho kulafigwa nyuwe nhambiko; ichigele cha difa dyangu chisegelela. ⁷ Nilewa inghondo fiswamu, inhambo niimala, dihuwi nidimilisa; ⁸ kulawa baho nyikilwa mhongesi yo kusuma kwangu, yonikanikwinghigwa ne Mundewa, imulamusi we chawelu mwijuwa diya, kahe siyo niye muhala amba na wose awendile kwija ukwakwe. ⁹ Witahidi kwija ukwangu chimwandemwande. ¹⁰ Kosoko Dema kwa kwenda ichulunga chino hakandeka na kuluta Tesalonike; Kilesike kaluta Galatiya, Tito kaluta ku Dulumatiya. ¹¹ Luka du noyowile naniye. Mulonde Maluko kamei mwijanye; kosoko yakunhasa lugano mumulimo. ¹² Tikiko hanimwigala Efeso. ¹³ Ichigele chowukwija, wigale inghasu yangu yonalekile kwa Kalupo ku Tolowa, kahe wigale ifitabu fiya fye singhingo. ¹⁴ Alekisanda ayuya imulugulusaji we finhu fye shaba hakonesa winhi mwingi ukwangu; Mundewa komuliha ifene uwihi wakwe fowuwile. ¹⁵ Kinege naye, kosoko hakasilema lugano simbuli setu. ¹⁶ Munyinenela yangu ya bosi hechaka hata munhu yumwedu iyemile ulwandi lwangu; wose hawandeka niye. Nikutasa wanghawaliligwe itoso kwasoko yiyo! ¹⁷ Amba iMundewa hakema ulwandi lwangu na kunyingha ludole lwa kuitamilisa imbuli yose, uleke awamataifa nawo waihulike. Nani hanihuligwa mumulomo we simba. ¹⁸ iMundewa konihonya kulawa mu wihi wowose na kunhasa niufikile undewa wakwe wa kulanga. Ditunyo dyuwe ne mwene majuwa gose. ¹⁹ Walamuse cha Pilisika na Akila, hamwedu no ulukolo lwa Onesifolo. ²⁰ Elasito yasigala Kolinto; Tulofimo hanimuleka mutamu ku Mileto. ²¹ Usunguse kwija ichigele che imheho chinati chikonge. Eubulo, Pude, Lino na Kilawudiya wose wakukulamusa. ²² iMundewa yowe hamwedu ne chidoga chako. Imboto yuwe nanye.